BTV NEWS

កម្ពុជាតវ៉ាជាផ្លូវការចំពោះសកម្មភាពខុសច្បាប់របស់ថៃចូលកាន់កាប់នៅតំបន់ភូមិជោគជ័យ, ច្រកទ្វារអន្តរជាតិអូរស្មាច់ និងស្រុកអន្លង់វែង

ឯកឧត្តម ហួត ហាក់ ជួបពិភាក្សាការងារលើវិស័យទេសចរណ៍ ការការពារបេតិកភណ្ឌវប្បធម៌ និងធម្មជាតិនៅកម្ពុជា ជាមួយអ្នកស្រី Angelina Jolie

ឯកឧត្តម ហ៊ុន ម៉ានី អញ្ជើញជួបសំណេះសំណាលកងកម្លាំងខេត្តកំពង់ស្ពឺសម្រាប់ឱកាសចូលឆ្នាំប្រពៃណីជាតិខ្មែរ

«ព្រឹត្តិការណ៍សុខភាពតែមួយនៅកម្ពុជា»រយៈពេលពីរថ្ងៃពិភាក្សាគ្នាលើប្រធានបទសំខាន់ចំនួន៥

ព័ត៌មានជាតិ

កម្ពុជា និងសហភាពអឺរ៉ុប ប្តេជ្ញាចិត្តដ៏រឹងមាំក្នុងការពង្រឹងភាពជាដៃគូទាំងនៅក្នុងក្របខ័ណ្ឌទេ្វភាគី និងពហុភាគី

ភ្នំពេញ៖ កម្ពុជា និងសហភាពអឺរ៉ុប បានសម្តែងនូវការប្តេជ្ញាចិត្តដ៏រឹងមាំក្នុងការពង្រឹងភាពជាដៃគូកម្ពុជា-សហភាពអឺរ៉ុប ទាំងនៅក្នុងក្របខ័ណ្ឌទេ្វភាគី និងពហុភាគី ផងដែរ និងបានកត់សម្គាល់អំពីវឌ្ឍនភាពដែលសម្រេចបានរួមមាន កិច្ចសហប្រតិបត្តិការអភិវឌ្ឍន៍ ពាណិជ្ជកម្ម និងការវិនិយោគ និងការកសាងស្ថាប័ន កំណែទម្រង់រដ្ឋបាល ច្បាប់ និងយុតិ្តធម៌ អភិបាលកិច្ច និងសិទ្ធិមនុស្ស។ ការប្តេជ្ញាចិត្តនេះ ក្នុងកិច្ចប្រជុំពេញអង្គគណៈកម្មាធិការចម្រុះកម្ពុជា-សហភាពអឺរ៉ុបលើកទី១៣ កាលពីនៅរសៀលថ្ងៃទី២៦ ខែមីនា ឆ្នាំ២០២៦ នៅទីស្តីការក្រសួង។ឯកឧត្តម កាន់ ផារិទ្ធ រដ្ឋលេខាធិការនៃក្រសួងការបរទេស និងសហប្រតិបត្តិការអន្តរជាតិ និង លោកស្រី Paola Pampaloni នាយិការងនៃមន្ទីរការបរទេស សហភាពអឺរ៉ុប បានធ្វើជាសហប្រធានដឹកនាំកិច្ចប្រជុំពេញអង្គគណៈកម្មាធិការចម្រុះកម្ពុជា-សហភាពអឺរ៉ុបលើកទី១៣ ដែលត្រូវធ្វើឡើងជារៀងរាល់២ឆ្នាំម្តង។ កិច្ចប្រជុំនេះមានការអញ្ជើញចូលរួមពីតំណាងក្រសួង-ស្ថាប័នពាក់ព័ន្ធកម្ពុជាសំខាន់ៗ និងតំណាងរបស់ភាគី EU ដែលមកពីអគ្គនាយកដ្ឋានពាក់ព័ន្ធរបស់គណៈកម្មការអឺរ៉ុប និងពីស្ថានទូតនៃប្រទេសសមាជិក EU។ក្នុងអំឡុងពេលនៃកិច្ចប្រជុំ ភាគីទាំងពីរបានកត់សម្គាល់អំពីវឌ្ឍនភាពដែលសម្រេចបានដោយអនុក្រុមទាំង៣៖ (១) កិច្ចសហប្រតិបត្តិការអភិវឌ្ឍន៍ (២) ពាណិជ្ជកម្ម និងការវិនិយោគ និង (៣) ការកសាងស្ថាប័ន កំណែទម្រង់រដ្ឋបាល ច្បាប់ និងយុតិ្តធម៌ អភិបាលកិច្ច និងសិទ្ធិមនុស្ស។ កិច្ចប្រជុំបានផ្លាស់ប្តូរទស្សនៈលើការវិវត្តផ្នែកនយោបាយ និងសេដ្ឋកិច្ចនៅក្នុងសហភាពអឺរ៉ុប និងកម្ពុជា ហើយបានរំលេចនូវក្តីបារម្ភរួមគ្នាចំពោះភាពតានតឹងដែលកើនឡើងបណ្តាលមកពីភាពស្មុគស្មាញនៃបរិបទសកល។ អនុសាសន៍ និងសកម្មភាពសំខាន់ៗត្រូវបានដាក់ចេញ ដើម្បីពង្រឹងកិច្ចសហប្រតិបត្តិការក្នុងវិស័យអាទិភាពរួមមាន ពាណិជ្ជកម្មនិងវិនិយោគ, ការអភិវឌ្ឍធនធានមនុស្ស និងបណ្តុះបណ្តាលវិជ្ជាជីវៈ កំណើនបៃតង ថាមពលបៃតង និងបច្ចេកវិទ្យាឌីជីថល៕ អត្ថបទ៖ វង្ស សុភាព

ប្រមុខការទូតកម្ពុជា៖ រាជរដ្ឋាភិបាលកំពុងខិតខំដោះស្រាយបញ្ហាព្រំដែនជាមួយថៃតាមយន្តការការទូត

ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ នៅថ្ងៃទី ២៧ ខែមីនា ឆ្នាំ២០២៦ ថ្លែងប្រាប់ពលរដ្ឋភៀសសឹកកំពុងស្នាក់នៅមណ្ឌលសុវត្ថិភាព វិទ្យាល័យ ហ៊ុន សែនប្រមោយថា រាជរដ្ឋាភិបាលកំពុងខិតខំតស៊ូដោះស្រាយបញ្ហាព្រំដែនជាមួយថៃ តាមយន្តការការទូត ដើម្បីធ្វើយ៉ាងណាឱ្យប្រជាពលរដ្ឋអាចវិលត្រឡប់ទៅលំនៅឋានវិញដោយសុវត្ថិភាព និងគ្មានការរារាំង។ប្រមុខការទូតកម្ពុជា បានថ្លែង បែបនេះក្នុងឱកាសដឹកនាំអង្គទូត និងតំណាងអង្គទូតចំនួន១៦ និងអង្គការអន្តរជាតិចំនួន២ ប្រចាំនៅកម្ពុជា ទៅទស្សនកិច្ចផ្ទាល់ ស្ថានភាពជនភៀសសឹក និងទីតាំងយោធាថៃដាក់បន្លាលួស និងទូកុងតឺន័រ នៅតំបន់ថ្មដា ស្ថិតក្នុងស្រុកវាលវែង ខេត្តពោធិ៍សាត់។ អង្គទូតដែលចូលរួមទាំងនោះ រួមមាន ប្រ៊ុយណេ, រុស្ស៊ី, ប៉ាគីស្ថាន,មីយ៉ាន់ម៉ា, គុយបា,ឥណ្ឌា,ទីម័រឡេស្តេ,ប្រេស៊ីល,ឡាវ,វៀតណាម,តួកគី,សហរដ្ឋអាមេរិក,ជប៉ុន,ចិន,ឥណ្ឌូនេស៊ី,និងម៉ាឡេស៊ី ព្រមទាំង ប្រព័ន្ធអង្គការសហប្រជាជាតិ ប្រចាំប្រទេសកម្ពុជា (United Nations Resident Coordinator to Cambodia-UNRC)និង អង្គការកម្មវិធីស្បៀងអាហារពិភពលោក (WFP)។ប្រជាពលរដ្ឋភៀសសឹកដែលកំពុងបន្តរស់នៅជំរំសុវត្ថិភាព បានប្រាប់ BTV ថា ចាប់តាំងពីយោធាថៃឈ្លានពានមកលើកម្ពុជាចំនួនពីរលើកក្នុងឆ្នាំ២០២៥ រហូតមកដល់ពេលនេះ អាជ្ញាធរខេត្ត ក៏ដូចជា រាជរដ្ឋាភិបាល បានយកចិត្តទុកដាក់ដល់ការរស់នៅរបស់ពួកគាត់ ក្នុងនោះទីតាំងមណ្ឌលសុវត្ថិភាពមានទឹក ភ្លើង សួនបន្លែ សាលារៀនបណ្តោះអាសន្ន និងមានទីតាំងសង្រ្គោះបឋមជាមួយគ្រូពេទ្យប្រចាំការជាដើម។ពួកគាត់នៅតែជឿជាក់លើរាជរដ្ឋាភិបាលក្នុងដោះស្រាយបញ្ហាជាមួយភាគីថៃដោយសន្ដិវិធី ដើម្បីអាចឱ្យ ពួកគាត់អាចវិលត្រឡប់ទៅរស់នៅ និងប្រកបរបររកស៊ីនៅភូមិឋានវិញ។ ពួកគាត់ក៏បានអំពាវនាវសហគមអន្តរជាតិ បន្តដាក់សម្ពាធទៅរដ្ឋាភិបាលថៃឱ្យចូលខ្លួនមកដោះស្រាយជាមួយកម្ពុជាដោយសន្តិវិធី និងច្បាប់អន្តរជាតិផងដែរ។សូមរំលឹកថា បច្ចុប្បន្ន ប្រជាពលរដ្ឋចំនួន ៧៦ គ្រួសារ កំពុងរស់នៅក្នុងមណ្ឌលសុវត្ថិភាពក្នុង វិទ្យាល័យ ហ៊ុន សែន ប្រមោយ ស្ថិតនៅស្រុកវាលវែង ខេត្តពោធិ៍សាត់ ខណៈផ្ទះសម្បែងរបស់ពួកគាត់ត្រូវបានយោធាថៃដាក់ទូកុងតឺន័រ និងបន្លាលួសរារាំងមិនអាចចូលទៅរស់នៅវិញបាន៕

យុទ្ធនាការផ្សព្វផ្សាយទេសចរណ៍កម្ពុជាចាប់ផ្តើមដោយមានក្រុមហ៊ុនទេសចរណ៍ជាច្រើនក្នុងតំបន់អាស៊ាន

យុទ្ធនាការផ្សព្វផ្សាយគោលដៅទេសចរណ៍កម្ពុជាទៅកាន់ពិភពលោក រយៈពេលពេញមួយឆ្នាំ ដែលសហការរៀបចំឡើងដោយសមាគមទេសចរណ៍អាស៊ីប៉ាហ្វិក PATA ប្រចាំនៅកម្ពុជា គាំទ្រដោយក្រសួងទេសចរណ៍ បានចាប់ផ្តើមដំណើរការ ដោយមានបណ្តាក្រុមហ៊ុនទេសចរណ៍អន្តរជាតិ និងអ្នកផ្សព្វផ្សាយមាតិទេសចរណ៍ដែលមានឥទ្ធិពលជាច្រើន នៅក្នុងតំបន់អាស៊ាន អញ្ជើញមកដល់កម្ពុជា ដើម្បីចូលរួមជំនួបផ្លាស់ប្តូរពាណិជ្ជកម្មទេសចរណ៍CTM និងទស្សនាកម្ពុជា។បើតាមលោក ម៉េត សុជាតិ តំណាងសមាគមន៍ទេសចរណ៍អាស៊ីប៉ាហ្វិក PATA ប្រចាំនៅកម្ពុជា បានថ្លែងប្រាប់BTV នៅថ្ងៃទី២៧ ខែមីនានេះថា ដូចការគ្រោងទុក នៅថ្ងៃនេះ គ្រប់បណ្តាក្រុមហ៊ុនទេសចរណ៍ និងតំណាងបណ្តាញផ្សព្វផ្សាយមាតិការដ៏មានឥទ្ធិពល មកពីប្រទេសឥណ្ឌូនេស៊ី សឹង្ហបូរី និងម៉ាឡេស៊ី និងប្រទេសនានាទៀត នៅក្នុងតំបន់អាស៊ាន សរុបប្រមាណជាង៤០ ស្ថាប័ន បានអញ្ជើញមកដល់កម្ពុជា ដើម្បីចូលរួមព្រឹត្តិការណ៍ជំនួបផ្លាស់ប្តូរពាណិជ្ជកម្មទេសចរណ៍កម្ពុជា CTM ២០២៦ អមដោយមានការធ្វើដំណើរតាមខែ្សទស្សនកិច្ចសិក្សាស្វែងយល់សក្តានុពលវិស័យទេសចរណ៍ នៅរាជធានីភ្នំពេញ នៅខេត្តព្រះសីហនុ ខេត្តសៀមរាប រយៈពេល ៦យប់ ៧ថ្ងៃ។លោក បណ្ឌិត ធួន ស៊ីណាន ប្រធានPATA ប្រចាំនៅកម្ពុជា បានថ្លែងថា យុទ្ធនាការផ្សព្វផ្សាយទេសចរណ៍កម្ពុជា ទៅកាន់ពិភពលោក រយៈពេល១ឆ្នាំពេញដែលធ្វើឡើងជាសេរី អមដោយមានការរៀបចំព្រឹត្តិការណ៍ជំនួបធុរៈកិច្ចទេសចរណ៍កម្ពុជា CTM និងរៀបចំខ្សែទស្សនៈកិច្ចសិក្សាស្វែងយល់ក្នុងសក្តានុពលទេសចរណ៍កម្ពុជា នៅក្នុងដំណាក់កាលដំបូងនេះ គឺផ្តោតសហការអញ្ជើញបណ្តាក្រុមហ៊ុនទេសចរណ៍អន្តរជាតិ និងអ្នកផ្សព្វផ្សាយទេសចរណ៍ល្បីៗនៅតំបន់អាស៊ានអញ្ជើញចូលរួម ហើយដំណាក់កាលខែបន្តបន្ទាប់ទៀត សមាគម នឹងអញ្ជើញក្រុមហ៊ុនទេសចរណ៍អន្តរជាតិជាអ្នកទិញ និងតំណាងបណ្តាញផ្សព្វផ្សាយល្បីៗ តាមប្រទេសនានាទៀត នៅតំបន់អឺរ៉ុប អាមេរិច ចិន កូរ៉េ ឥណ្ឌា និងប្រទេសនានាទៀត អញ្ជើញមកកម្ពុជាចូលរួមព្រឹត្តិការណ៍ដូចគ្នានេះដែរ។លោកបណ្ឌិតថា យុទ្ធនាការផ្សព្វផ្សាយកម្ពុជាទៅកាន់ពិភពលោកនេះ គឺមានបំណងសំខាន់ជំរុញក្រុមហ៊ុនទេសចរណ៍អន្តរជាតិនានាដែលជាភាគីអ្នកទិញមកពីក្រៅប្រទេស និងក្រុមហ៊ុនទេសចរណ៍ដែលជាភាគីអ្នកលក់នៅក្នុងប្រទេស ទទួលបានឱកាសជួបគ្នា ពិភាក្សាគ្នាភ្ជាប់ដៃគូ ទំនាក់ទំនាក់អាជីវកម្មទេសចរណ៍ រួមគ្នាផ្សាយផ្សាយគោលដៅទេសចរណ៍កម្ពុជា សហការលក់កញ្ចប់ទេសចរណ៍កម្ពុជានៅក្រៅប្រទេស និងនាំគ្នាភ្ញៀវទេសចរអន្តរជាតិនានាមកទស្សនាកម្ពុជា នៅឆ្នាំក្រោយៗទៀត។លោកបណ្ឌិត ធួន ស៊ីណាន ថ្លែងថា បន្ទាប់ពីការរៀបចំយុទ្ធនាការផ្សព្វផ្សាយគោលដៅទេសចរណ៍កម្ពុជានេះរួច ក្នុងរយៈពេល៦ខែបន្ទាប់ រំពឹងថា នឹងមានភ្ញៀវទេសចរអន្តរជាតិនៅក្នុងតំបន់អាស៊ានមកទស្សនាកម្ពុជាកាន់តែច្រើន ហើយក្នុងរយៈពេល១ឆ្នាំទៅ២ឆ្នាំបន្ទាប់ រំពឹងមានភ្ញៀវទេសចរអន្តរជាតិ បណ្តាប្រទេសនៅតាមតំបន់អឺរ៉ុប អាមេរិក និងនៅកូរ៉េជាដើម នឹងមានទស្សនាកម្ពុជាកាន់តែច្រើនផងដែរ៕ អត្ថបទ ស៊ុម សុខជា

រដ្ឋមន្រ្តីសុខាភិបាល ជំរុញឱ្យមន្រ្ដីសុខាភិបាលយកចិត្តទុកដាក់បម្រើសេវានៅមូលដ្ឋាន ជាពិសេសក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរខាងមុខនេះ

ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានជំរុញឱ្យមន្ត្រីសុខាភិបាលទាំងអស់យកចិត្តទុកដាក់ខ្ពស់ ក្នុងការបម្រើសេវាសុខាភិបាលនៅតាមមូលដ្ឋាន ក្នុងរយៈពេលពិធីបុណ្យចូលឆ្នាំថ្មី ប្រពៃណីជាតិខ្មែរ។ការថ្លែងរបស់ឯកឧត្តមសាស្ត្រាចារ្យ ឈាង រ៉ា យ៉ាងដូច្នេះក្នុងកិច្ចប្រជុំប្រចាំខែមីនា ដើម្បីពិនិត្យវឌ្ឍនភាពការងារ និងលើកទិសដៅបន្ត ដោយមានការអញ្ជើញចូលរួមពីឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ ទីប្រឹក្សា អគ្គនាយក អគ្គនាយករង និងគ្រប់ប្រធានអង្គភាពថ្នាក់កណ្តាលក្រោមឱវាទក្រសួងសុខាភិបាល ប្រធានមន្ទីរសុខាភិបាលរាជធានីភ្នំពេញ និងតាមប្រព័ន្ធ Zoom ប្រធានមន្ទីរសុខាភិបាលខេត្ត, រសៀលថ្ងៃទី២៦ ខែមីនា ឆ្នាំ២០២៦ នៅទីស្ដីការក្រសួងសុខាភិបាល។ឯកឧត្តមសាស្រ្តាចារ្យរដ្ឋមន្រ្តី បានផ្តល់អនុសាសន៍ និងណែនាំសំខាន់ៗ មួយចំនួនដើម្បីបន្តពង្រឹងប្រសិទ្ធភាពការងារ និងគុណភាពសេវានៅតាមមូលដ្ឋាន ឱ្យកាន់តែល្អប្រសើរដូចខាងក្រោម៖ -តាមមូលដ្ឋានសុខាភិបាលទាំងអស់ ត្រូវយកចិត្តទុកដាក់ និងត្រៀមខ្លួនឱ្យបានល្អ ក្នុងការបម្រើសេវាជូនប្រជាពលរដ្ឋ ក្នុងកំឡុងពេលប្រារព្វពិធីបុណ្យចូលឆ្នាំថ្មីប្រពៃណីជាតិខ្មែរ ខាងមុខនេះ និងពិនិត្យឱសថ បរិក្ខារពេទ្យ ធានាឱ្យមានគ្រប់គ្រាន់ ដើម្បីប្រើប្រាស់នៅតាមមូលដ្ឋាន។-ឃ្លាំងឱសថកណ្តាល ត្រូវរៀបចំផែនការបែងចែកឱសថ ទៅតាមមូលដ្ឋានឱ្យបានសមស្រប និងឆាប់រហ័ស ទៅតាមចំនួនប្រជាជននៅក្នុងតំបន់។-មន្ទីរសុខាភិបាល និងមូលដ្ឋានសុខាភិបាល នៅតាមបណ្តាខេត្តជាប់ព្រំដែន ត្រូវបន្តយកចិត្តទុកដាក់លើការថែទាំសុខភាពជូនប្រជាជន និងវីរកងទ័ព នៅតាមមូលដ្ឋានរៀងៗខ្លួន។-គ្រប់មូលដ្ឋានសុខាភិបាល និងឯកជន ត្រូវពង្រឹងការប្រើប្រាស់រថយន្តគិលានសង្រ្គោះ ដោយត្រូវដឹងពីកាតព្វកិច្ចគោលការណ៍ ក្នុងការបំពេញការងាររបស់ខ្លួនឱ្យបានច្បាស់លាស់ត្រឹមត្រូវ និងក្រមសីលធម៌វិជ្ជាជីវៈខ្ពស់។-ពិនិត្យ និងយកចិត្តទុកចំពោះការប្រើប្រាស់ប័ណ្ណ ប.ស.ស. ប្រកបដោយសមធម៌។-ត្រូវរៀបចំរបាយការណ៍ ដោយមានការប្រៀបធៀបក្នុងរយៈពេល៣ឆ្នាំ រឺរយៈពេលសមរម្យណាមួយ ដើម្បីអាចមើលឃើញនូវលទ្ធផល និងអាចវាស់វែងបាន។-ត្រួតពិនិត្យ វិធានការសន្សំសំចៃលើការប្រើប្រាស់ប្រេងឥន្ទនៈ និងអគ្គិសនី។បន្ថែមពីនេះ ឯកឧត្តមសាស្រ្តាចារ្យ ឈាង រ៉ា ក៏បានណែនាំឱ្យមន្រ្តីសុខាភិបាលទាំងអស់ បន្តយកចិត្តទុកដាក់លើការងារទំនាក់ទំនងជាមួយអ្នកជំងឺដោយប្រើពាក្យសម្តី និងកាយវិការសមរម្យ និងការទទួលខុសត្រូវខ្ពស់ ប្រកបដោយសុជីវធម៌ គុណធម៌ សមធម៌ និងបង្កើនភាពជិតស្និទ្ធ៕ អត្ថបទ រដ្ឋា

ប្រមុខការទូតកម្ពុជា ដឹកនាំឯកអគ្គរាជ/រដ្ឋទូត តំណាងអង្គទូត ព្រមទាំងអង្គការអន្តរជាតិ ពិនិត្យស្ថានភាពប្រជាពលរដ្ឋភៀសសឹក នៅមណ្ឌលសុវត្ថិភាពវិទ្យាល័យ ហ៊ុនសែន ប្រម៉ោយ

ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ នៅព្រឹកថ្ងៃទី២៧ ខែមីនា ឆ្នាំ២០២៦នេះ បានដឹកនាំឯកអគ្គរាជទូត ឯកអគ្គរដ្ឋទូត តំណាងអង្គទូត ព្រមទាំងអង្គការអន្តរជាតិធំៗ ប្រចាំកម្ពុជា ចុះមកសួរសុខទុក្ខ និងពិនិត្យស្ថានភាពរស់នៅដោយផ្ទាល់របស់ប្រជាពលរដ្ឋភៀសសឹកនៅឃុំថ្មដា ស្រុកវាលវែង ខេត្តពោធិ៍សាត់។ប្រជាពលរដ្ឋភៀសសឹកទាំងនេះ បានមកស្នាក់នៅទីនេះ បន្ទាប់ពីយោធាឈ្លានពានថៃ បានចូលមករាយបន្លាលួស និងដាក់ទូកុងតឺន័រ ចូលដែនអធិបតេយ្យភាព បូរណភាពទឹកដីកម្ពុជា ដោយខុសច្បាប់ នាពេលកន្លងមក បន្ទាប់ពីការចុះហត្ថលេខាលើកិច្ចព្រមព្រៀងបទឈប់បាញ់ កាលពីថ្ងៃទី២៧ ខែធ្នូ ឆ្នាំ២០២៥។រាជរដ្ឋាភិបាលកម្ពុជា បានដាក់លិខិតតវ៉ាជាបន្តបន្ទាប់ តាមរយៈក្រសួងការបរទេស និងតែងតែបញ្ជាក់ម្តងហើយម្តងទៀត គឺប្រកាន់ជំហរដាច់ខាត ដោយមិនទទួលស្គាល់ការកែប្រែខ្សែបន្ទាត់ព្រំដែន តាមរយៈការប្រើកម្លាំងឡើយ។

កោះច្រែង គឺជាតំបន់ទេសចរណ៍ធម្មជាតិដ៏ទាក់ទាញមួយ ស្ថិតនៅក្នុងខេត្តក្រចេះ តាមដងទន្លេមេគង្គ ដែលកំពុងទទួលបានការចាប់អារម្មណ៍ពីភ្ញៀវទេសចរជាតិ និងអន្តរជាតិ

នៅថ្ងៃទី២៦ ខែមីនា ឆ្នាំ២០២៦ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងលោកជំទាវ រួមជាមួយឯកឧត្តម វ៉ា ថន អភិបាលនៃគណៈអភិបាលខេត្តក្រចេះ អញ្ជើញដឹកនាំក្រុមការងារចុះពិនិត្យស្ថានភាពជាក់ស្តែងនៅកោះច្រែងខេត្តក្រចេះ ដើម្បីវាយតម្លៃសក្តានុពលទេសចរណ៍ និងហេដ្ឋារចនាសម្ព័ន្ធសំខាន់ៗ រួមមានផ្លូវចូលទៅកាន់តំបន់ ទីតាំងសេវាកម្មទេសចរណ៍ និងបរិស្ថានធម្មជាតិជុំវិញកោះផងដែរ។ដំណើរចុះពិនិត្យនេះត្រូវបានចាត់ទុកថាជាជំហានសំខាន់មួយក្នុងការបង្កើនការយកចិត្តទុកដាក់លើតំបន់កោះច្រែង និងជំរុញឱ្យមានគម្រោងអភិវឌ្ឍន៍ទេសចរណ៍ថ្មីៗនៅតំបន់នេះ នាពេលខាងមុខ។

ធុរជនចិនគ្រោងបោះទុន៥លានដុល្លារ វិនិយោគការកែច្នៃកាកសំណល់ទៅជាជី នៅខេត្តកំពង់ស្ពឺ ដើម្បីនាំចេញ

‎កំពង់ស្ពឺ៖ អ្នកវិនិយោគិន នៃប្រទេសចិន គ្រោងបោះទុនជំហានទី១ ចំនួន៥លានដុល្លារ ដើម្បីវិនិយោគលើវិស័យគ្រប់គ្រង និងកែច្នៃកាកសំណល់ ដែលចេញពីរោងចក្រ និងកសិដ្ឋានចិញ្ចឹមសត្វ ដើម្បីផលិតធ្វើជាជីកសិកម្ម នៅក្នុងខេត្តកំពង់ស្ពឺ ដើម្បីផ្គត់ផ្គង់ក្នុងស្រុក និងនាំចេញទៅក្រៅប្រទេស។ ក្នុងជំនួបពិភាក្សាការងារជាមួយឯកឧត្តមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ នៅថ្ងៃទី២៦ ខែមីនា ឆ្នាំ២០២៦ លោក Lee តំណាងឱ្យអ្នកវិនិយោគិនចិន បានឲ្យដឹងថា ដោយមើលឃើញពីសក្តានុពលរបស់ខេត្តកំពង់ស្ពឺ ពិសេសភាពរីកចម្រើននៃវិស័យកសិកម្ម ឧស្សាហកម្ម និងវិស័យទេសចរណ៍ ដែលអំណោយផលដល់ការងារវិនិយោគក្រុមហ៊ុនរបស់លោក ខណៈបច្ចុប្បន្ន កំពុងត្រៀមលក្ខណៈ ក្នុងការពង្រីកប្រតិបត្តិការ ប្រមូលកាកសំណល់ផ្សេងៗ ពីតាមបណ្តារោងចក្រ សហគ្រាស និងកសិដ្ឋានយកមកកែច្នៃផលិតជាជីកសិកម្ម ដែលក្នុងនោះ កាកសំណល់ដែលចេញពីរោងចក្រកែច្នៃផ្លែឈើ អំពៅ និងលាមកសត្វចេញពីកសិដ្ឋាន ។លោកបានបន្ថែមថា គោលបំណងចម្បងនៃគម្រោងនេះ ដើម្បីចូលរួមចំណែកកាត់បន្ថយផលប៉ះពាល់បរិស្ថាន ជាពិសេស ការលុបបំបាត់បញ្ហាក្លិនស្អុយ ដែលបង្កឡើងដោយកាកសំណល់គរទុក ដែលជាបញ្ហាប្រឈមក្នុងតំបន់មួយចំនួន ហើយមួយវិញទៀត រោងចក្រនេះ នឹងដើរតួនាទីយ៉ាងសំខាន់ ក្នុងការបំប្លែងវត្ថុធាតុដើម ដែលជាសំណល់ ឱ្យក្លាយទៅជាផលិតផលដែលមានតម្លៃ សម្រាប់បម្រើឱ្យវិស័យកសិកម្មក្នុងស្រុក ។ លោក Lee បានបន្តថា លើសពីនេះ ក្រុមហ៊ុនក៏មានចក្ខុវិស័យវែងឆ្ងាយ ក្នុងការជំរុញការនាំចេញផលិតផលជី ដែលផលិតបានក្នុងខេត្តនេះ ទៅកាន់ទីផ្សារអន្តរជាតិក្នុងតំបន់អាស៊ី ដែលនឹងជួយនាំចំណូល ត្រឡប់មកកាន់សេដ្ឋកិច្ចជាតិ ក៏ដូចជាបង្កើតឱកាសការងារ ជូនដល់ប្រជាពលរដ្ឋក្នុងខេត្តកំពង់ស្ពឺ ផ្ទាល់ផងដែរ ដូចនេះហើយក្នុងករណីដំណើរជំហានទី១ ទទួលបានជោគជ័យ ក្រុមហ៊ុន និងពង្រីកទុនវិនិយោគរហូតដល់ ៥០លានដុល្លាបន្ថែមទៀត ជាជំហានទី២ ។ក្នុងជំនួបនោះ ឯកឧត្តមបណ្ឌិត ជាម ច័ន្ទសោភ័ណ បានលើកទឹកចិត្តដល់ក្រុមអ្នកវិនិយោគិនចិន ដែលបានជ្រើសរើសយកខេត្តកំពង់ស្ពឺជាគោលដៅវិនិយោគលើវិស័យគ្រប់គ្រង និងកែច្នៃកាកសំណល់ ខណៈបច្ចុប្បន្នខេត្តកំពង់ស្ពឺ មានរោងចក្រ សហគ្រាសជាង ១៦០០កន្លែង និងមានកម្មករ កម្មការិនីប្រមាណជាង ៣០ម៉ឺននាក់បម្រើការងារ ។ ទន្ទឹមនោះ ផ្ទៃដីខេត្តកំពង់ស្ពឺ មានផ្ទៃដីដាំដំណាំស្វាយជិត ៥ម៉ឺនហិកតា ដែលជាខេត្តឈានមុខគេមួយ ក្នុងការដាំដុះស្វាយនៅកម្ពុជា ។ ឯកឧត្តមអភិបាលខេត្តបានបន្តថា ក្នុងនោះ ផ្ទៃដីដែលអាចប្រមូលផលបានមានជិត ៤ម៉ឺនហិកតា ស្មើនឹងជិត ៩លានដើម ដោយភាគច្រើនជាប្រភេទ ស្វាយកែវរមៀត សម្រាប់នាំចេញ ចំពោះផ្ទៃដីដាំអំពៅសរុបប្រមាណជាង ២ម៉ឺនហិកតា ដែលវិនិយោគដោយក្រុមហ៊ុនកសិ-ឧស្សាហកម្មជាច្រើន។ ផ្ទៃដីទាំងនេះ ភាគច្រើនស្ថិតនៅក្នុងស្រុកឱរ៉ាល់ និងស្រុកថ្ពង ដែលជាកន្លែងមានគម្រោងវិនិយោគចំការអំពៅ និងរោងចក្រស្ករអំពៅខ្នាតធំ ។ រីឯកសិដ្ឋានចិញ្ចឹមសត្វមានជាង ៥០០កន្លែង និងសហគមន៍ចិញ្ចឹមសត្វចំនួន៥៥ ដែលផ្តោតសំខាន់លើការចិញ្ចឹមមាន់ ទា ជ្រូក និងគោ ។ឯកឧត្តមបាន បានបញ្ជាក់បន្ថែមថា ស្ថិតិផ្ទៃដី នៃការដាំដុះនិងការចិញ្ចឹមនេះ អាចផ្តល់ជាវត្ថុធាតុដើម សម្រាប់ផ្គត់ផ្គង់ដល់ផលិតកម្មគ្រប់គ្រង និងកែច្នៃកាកសំណល់របស់ក្រុមហ៊ុន ឱ្យដំណើរការបានដោយរលូន ហើយរដ្ឋបាលខេត្តបានត្រៀមខ្លួនរួចរាល់ ក្នុងការចូលរួមសម្របសម្រួលនីតិវិធី លើការងារដែលក្រុមហ៊ុន មានការរាំងស្ទះ៕ អត្ថបទ៖ បាន សុខរិទ្ធិ

ក្រសួងការបរទេសកម្ពុជា៖ ការដាក់ឱ្យដំណើរការពេញលេញ នៃក្របខ័ណ្ឌ JBC, GBC និង RBC ជាមធ្យោបាយប្រាកដនិយម ធានានូវសន្តិភាពយូរអង្វែង និងវិបុលភាពរួមគ្នា

ភ្នំពេញ៖ អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ នៅថ្ងៃទី២៦ ខែមីនា ឆ្នាំ២០២៦នេះ បានចេញ សេចក្តីថ្លែងការណ៍ជុំវិញការវិវត្តថ្មីៗ បញ្ហាព្រំដែនកម្ពុជា-ថៃ។ឆ្លើយតបទៅនឹងការសាកសួររបស់បណ្តាញសារព័ត៌មានទាក់ទងនឹងជុំវិញបញ្ហាព្រំដែនកម្ពុជា-ថៃ អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ សូមធ្វើការគូសបញ្ជាក់ដូចខាងក្រោម៖១. កម្ពុជាកត់សម្គាល់ថា ការលើកឡើងកាលពីថ្ងៃទី១៩ ខែមីនា ឆ្នាំ២០២៦ របស់មជ្ឈមណ្ឌលព័ត៌មានរួម ស្តីពីស្ថានការណ៍ថៃ-កម្ពុជា ឆ្លុះបញ្ចាំងនូវគោលការណ៍ច្បាប់អន្តរជាតិ និងការដោះស្រាយជម្លោះដោយសន្តិវិធីពិតប្រាកដ ដែលកម្ពុជាបានប្រកាន់យកយ៉ាងខ្ជាប់ខ្ជួន។ ទស្សនៈស្របគ្នានេះ គឺជាការស្វាគមន៍ចំពោះការទទួលស្គាល់នូវវិធីសាស្ត្រ និងមាគ៌ា ដែលកម្ពុជាបានគាំទ្រជាយូរមកហើយ។២. កម្ពុជាសូមបញ្ជាក់សាជាថ្មីថា គណៈកម្មការចម្រុះខណ្ឌសីមាព្រំដែនគោគ (JBC) គឺជាស្ថាប័នបច្ចេកទេសមានសមត្ថកិច្ច និងជាយន្តការ ដែលបង្កើតឡើងដោយភាគីទាំងពីរ ដើម្បីកំណត់ខណ្ឌសីមាព្រំដែនរវាងប្រទេសកម្ពុជា-ថៃ។សេចក្តីប្រកាសរួមនៃកិច្ចប្រជុំពិសេសលើកទី៣របស់គណៈកម្មាធិការព្រំដែនទូទៅ (GBC) ចុះថ្ងៃទី២៧ ខែធ្នូ ឆ្នាំ២០២៥ បានបញ្ជាក់យ៉ាងច្បាស់ពីសារៈសំខាន់នៃតួនាទីរបស់ JBC និងការបន្តចាប់ផ្ដើមការងារវាស់វែង និងខណ្ឌសីមា ក្នុងការសម្រេចឱ្យបាននូវសន្តិភាពយូរអង្វែងនៅតាមបណ្ដោយព្រំដែនរវាងប្រទេសទាំងពីរ។ គណៈកម្មការចម្រុះខណ្ឌសីមាព្រំដែនគោកកម្ពុជា ត្រៀមខ្លួនជាស្រេច ដើម្បីបន្តចាប់ផ្ដើមការងារវាស់វែងនេះជាបន្ទាន់ ដោយផ្អែកលើអនុសញ្ញាបារាំង-សៀម ឆ្នាំ១៩០៤ និងសន្ធិសញ្ញាឆ្នាំ ១៩០៧ ព្រមទាំងផែនទីដែលផលិតដោយគណៈកម្មការខណ្ឌសីមាព្រំដែនឥណ្ឌូចិន-សៀម ដើម្បីកំណត់ខណ្ឌសីមាព្រំដែនរវាងប្រទេសទាំងពីរ តាមការព្រមព្រៀងគ្នា ដែលនឹងជួយទប់ស្កាត់ជម្លោះនាពេលអនាគត។៣. ដើម្បីលើកកម្ពស់ទំនុកចិត្ត និងភាពជឿជាក់ពិតប្រាកដ ការបន្តនូវវត្តមាន និងបេសកកម្មរបស់ក្រុមអ្នកសង្កេតការណ៍អាស៊ាន (AOT) គឺមានសារៈសំខាន់ចំពោះការងារផ្ទៀងផ្ទាត់លើការអនុវត្តនៃសេចក្តីប្រកាសរួម ចុះថ្ងៃទី២៧ ខែធ្នូ ឆ្នាំ២០២៥។ កម្ពុជានៅតបុរេសកម្ម ក្នុងការពង្រឹងបណ្ដាញទំនាក់ទំនងដោយផ្ទាល់ ដើម្បីទប់ស្កាត់ព័ត៌មានក្លែងក្លាយ និងធានាថា ការទំនាក់ទំនងទាំងអស់ គឺផ្អែកលើការពិតដែលអាចផ្ទៀងផ្ទាត់បាន។៤. ក្នុងនាមជាប្រទេសជិតខាង និងរដ្ឋសមាជិកអាស៊ានដូចគ្នា កម្ពុជាត្រៀមខ្លួនរួចជាស្រេច ក្នុងការបន្តពិភាក្សា តាមរយៈយន្តការដែលមានស្រាប់ ដើម្បីដោះស្រាយជម្លោះ ផ្អែកលើកិច្ចព្រមព្រៀងពាក់ព័ន្ធទាំងអស់ និងច្បាប់អន្តរជាតិ។ កម្ពុជាសូមអំពាវនាវឱ្យមានការវិវត្តពីកិច្ចសន្ទនាការ ទូតទៅជាការអនុវត្តជាក់ស្ដែង៕ការដាក់ឱ្យដំណើរការពេញលេញ នៃក្របខ័ណ្ឌយន្តការគណៈកម្មការចម្រុះខណ្ឌសីមាព្រំដែនគោក (JBC) គណៈកម្មាធិការព្រំដែនទូទៅ (GBC) និងគណៈកម្មាធិការព្រំដែនតំបន់ (RBC) គឺជាមធ្យោបាយប្រាកដនិយម ក្នុងការធានានូវសន្តិភាពយូរអង្វែង និងវិបុលភាពរួមគ្នា ដែលកម្ពុជារំពឹងទុក។

អ្នកជំនាញអន្តរជាតិ ចែករំលែកយុទ្ធសាស្ត្រ និងបទពិសោធន៍ជាក់ស្តែងអំពីការអនុវត្តបច្ចេកវិទ្យា AI

អ្នកជំនាញអន្តរជាតិ មកពីក្រុមហ៊ុនបច្ចេកវិទ្យាឈានមុខមួយ បានចែករំលែកយុទ្ធសាស្ត្រ និងបទពិសោធន៍ជាក់ស្តែងអំពីការ អនុវត្តបច្ចេកវិទ្យា AI និងបានបង្ហាញពីអត្ថប្រយោជន៍មុខងារគ្រឹះជាច្រើន ដែល AI កំពុងជួយដោះស្រាយនៅគ្រប់ប្រតិបត្តិការនានា។ លោក Zhao Hongyu អគ្គនាយករងក្រុមហ៊ុន Beijing Electronic Digital Intelligence Technology (BEDI) បានលើកឡើងក្នុងកិច្ចពិភាក្សាការអនុវត្តបញ្ញាសិប្បនិម្មិត (AI) នៅក្នុងទិវាជាតិវិទ្យាសាស្ត្រ បច្ចេកវិទ្យា និងនវានុវត្តន៍ឆ្នាំ២០២៦ នៅថ្ងៃទី២៦ ខែមីនា ឆ្នាំ២០២៦ លោកបានចែករំលែកយុទ្ធសាស្ត្រ និងបទពិសោធន៍ជាក់ស្តែង អំពីការអនុវត្តបច្ចេកវិទ្យា AI ដល់មន្រ្តីរាជការ វិស័យឯកជន និងសិស្ស-និស្សិតកម្ពុជា ខណៈដែលវិស័យនេះកំពុងក្លាយជាកម្លាំងចលករជំរុញសេដ្ឋកិច្ចឌីជីថល។ លោក Zhao បានរៀបរាប់ពីដំណើររបស់ក្រុមហ៊ុន BEDI ក្នុងការកសាងហេដ្ឋារចនាសម្ព័ន្ធ AI ដ៏ធំបំផុតមួយរបស់ប្រទេស ចិន, លោកបានលើកឡើងថា BEDI បានបង្កើតក្រុមការងារដ៏ខ្លាំងមួយមកពីគ្រប់វិស័យ និងមានបទពិសោធន៍ចម្រុះ។ ក្រុមហ៊ុនមេ របស់យើងជាក្រុមហ៊ុន Semi-conductor ធំបំផុតនៅក្នុងប្រទេសចិន ហើយក្រុមហ៊ុនរបស់យើងផ្ទាល់ គឺជាក្រុមហ៊ុនដែលកំពុង ព្យាយាម កសាងមូលដ្ឋានគ្រឹះឌីជីថលសម្រាប់ប្រទេសចិន។ លោកបានរៀបរាប់ពីរបៀបដែលមាតិកាបង្កើតដោយ AI (AIGC) ផងដែរ ដែលបានកំពុងផ្លាស់ប្តូរការធ្វើទីផ្សារទេសចរណ៍ និងការអប់រំដោយ អនុញ្ញាតឱ្យសហគ្រាសធុនតូច និងមធ្យម អាចទាញយកអត្ថប្រយោជន៍ពីបច្ចេកវិទ្យា ដែលពីមុនគឺសម្រាប់តែក្រុម ហ៊ុនធំៗ។ លោកបានបង្ហាញឧទាហរណ៍ ដែលក្រុមការងាររបស់លោកបានជួយឱ្យសហគ្រាសក្នុងស្រុក បង្កើតវីដេអូផ្សព្វផ្សាយរាប់ពាន់ ដោយប្រើ AI ត្រឹមតែក្នុងរយៈពេលមួយយប់ ដែលជួយកាត់បន្ថយចំណាយផលិតកម្ម និងពេលវេលាយ៉ាងច្រើនសន្ធឹកសន្ធាប់។ ជុំវិញបញ្ញាសិប្បនិម្មិត (AI) លោក Zhao បានជំរុញឱ្យភាគីពាក់ព័ន្ធនៅកម្ពុជា ចាប់យកដំណោះស្រាយ AI និងបង្កើនកិច្ច សហប្រតិបត្តិការស៊ីជម្រៅក្នុងការកសាងពិភពលោកឌីជីថលជាមួយគ្នា៕ អត្ថបទ៖ សុន រ៉ាឌី

កងពលតូចដឹកជញ្ជូនលេខ៩៩ បន្តទទួលអំណោយពីសប្បុរសជនសម្រាប់នាំយកទៅចែកជូនបន្តដល់បងប្អូនវីរកងទ័ពជួរមុខ នៅតាមបន្ទាត់ព្រំដែន

មេបញ្ជាការកងពលតូចដឹកជញ្ជូនលេខ៩៩ ឧត្តមសេនីយ៍ទោ ហ៊ុល សំអុន បានបន្តទទួលអំណោយពីបងប្អូនសប្បុរសធម៌ សម្រាប់យកទៅចែកជូនបន្តដល់វីរកងទ័ពជួរមុខ ជាពិសេសនៅតាមបណ្តោយបន្ទាត់ព្រំដែនកម្ពុជា និងថៃ។ឧត្តមសេនីយ៍ទោ ហ៊ុល សំអុន បានថ្លែងអំណរគុណចំពោះសប្បុរសជនដែលបានជួយឧបត្ថម្ភ តង់ចំនួន២០០ គិតជាថវិកាចំនួន ៣០០០ដុល្លារ ទឹកសុទ្ធចំនួន១០០០យួរ និងថវិកាចំនួន ពីរលានរៀលជូនដល់កងពលសម្រាប់ប្រើប្រាស់ជាប្រយោជន៍ជាក់ស្តែងក្នុងអង្គភាព និងសម្រាប់នាំយកបន្តទៅចែកជូនដល់បងប្អូនវីរកងទ័ពជួរមុខ នៅតាមបន្ទាត់ព្រំដែន កម្ពុជា-ថៃ។ លោកឧត្តមសេនីយ៍បានលើកឡើងថា ទឹកចិត្តដ៏សប្បុរសធម៌របស់សប្បុរសជនទាំងអស់គ្នានេះ បានបង្ហាញយ៉ាងច្បាស់អំពី «ទឹកចិត្តសមរភូមិក្រោយ»ដែលមិនដែលបោះបង់ ឬមើលរំលងសុខទុក្ខ និងវីរភាពរបស់កងទ័ពជួរមុខ ដែលកំពុងឈរជើងការពារព្រំដែន ការពារអធិបតេយ្យភាព និងបូរណភាពទឹកដីកម្ពុជា៕ អត្ថបទ៖ បាន ចក់

បណ្ដាញសង្គម

ព័ត៌មានថ្មីៗ

គំនិតផ្តួចផ្តើមរបស់វិចិត្រករ បានគាំទ្រក្មេងៗជម្លៀសខ្លួននៅលីបង់ឲ្យគូរគំនូរតាមអារម្មណ៍របស់ខ្លួន

អ៊ីរ៉ង់អះអាងពីការបាញ់ទម្លាក់យន្តហោះចម្បាំង F-35 ទី២ របស់អាមេរិក ក្នុងរយៈពេល ២សប្តាហ៍

សហភាពអាហ្វ្រិក គាំទ្រការជំរុញសន្តិភាពចិន-ប៉ាគីស្ថាន ជុំវិញបញ្ហាមជ្ឈិមបូព៌ា និងជំរុញឲ្យបន្ថយភាពតានតឹង

មេបញ្ជាការយោធាប៊ូគីណា ហ្វាសូ និយាយថា បំភ្លេចចោលទៅលទ្ធិប្រជាធិបតេយ្យ

WTO ព្រមានអំពី «ការវាយប្រហារជាច្រើនដងលើទីតាំងសេវាសុខភាព» នៅអ៊ីរ៉ង់

មនុស្សម្នាក់ស្លាប់នៅជិតទីក្រុងគីវ ខណៈរុស្ស៊ីប្តូរមកវាយប្រហារទ្រង់ទ្រាយធំនៅពេលថ្ងៃ

របាយការណ៍៖ អាមេរិកបណ្តេញបេសកជនរងរបស់អ៊ីរ៉ង់ ប្រចាំនៅ UN ដោយសារក្តីបារម្ភពីសន្តិសុខជាតិ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877