BTV NEWS

ផ្ទះទេវតា១ ខ្នងដោយមានភ្ជាប់ប្រព័ន្ធទឹកស្អាត និងភ្លើងសូឡា ជាអំណោយដ៏ថ្លៃថ្លារបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ត្រូវបានប្រគល់ជូនពលរដ្ឋខ្វះខាតជីវភាពនៅខេត្តកំពង់ធំ

ក្រសួងសុខាភិបាលចេញសេចក្តីប្រកាសព័ត៌មានស្តីពីការការពារខ្លួនពីការឆ្លងវីរុសហាន់តា (Hantavirus)

ក្រសួងការងារ នាំយកឱកាសការងារពិសេសទាំងក្នុង និងក្រៅប្រទេសជូនអតីតពលករ និងយុវជននៅក្នុងខេត្តឧត្តរមានជ័យ

សម្តេចប្រធានរដ្ឋសភា អំពាវនាវដល់ពលរដ្ឋបន្តរក្សាស្មារតីសាមគ្គីជាតិ គាំទ្ររាជរដ្ឋាភិបាល ដើម្បីប្រែក្លាយការគំរាមកំហែង និងបញ្ហាប្រឈមនានា ទៅជាឱកាសពង្រឹងសេដ្ឋកិច្ច និងខឿនការពារជាតិ

ព័ត៌មានជាតិ

វិស័យឯកជន៖ ជម្លោះព្រំដែនមិនប៉ះពាល់ដល់ការស្រូបយកឱកាសវិនិយោគ និងការនាំចេញរបស់កម្ពុជា

វិស័យឯកជនថា បញ្ហាប្រឈមនៃជម្លោះព្រំដែនរវាងកម្ពុជា-ថៃ បានធ្វើឱ្យពិភពលោកស្គាល់កម្ពុជាកាន់តែច្បាស់ និងកាន់តែច្រើន បន្ទាប់ពីមានការសម្របសម្រួលពីប្រទេសមហាអំណាច ដោយបានបង្កើននូវទំនុកចិត្តកាន់តែខ្លាំងដល់វិនិយោគិនមកបណ្តាក់ទុន និងការនាំចេញរបស់កម្ពុជា។អ្នកឧកញ៉ា លឹម ហេង លើកឡើងក្នុងកិច្ចសម្ភាសន៍ជាមួយសារព័ត៌មាន ស្តីពីជម្លោះព្រំដែនរវាងកម្ពុជា-ថៃ នៅក្នុងមហាសន្និបាតបូកសរុបលទ្ធផលការងារឆ្នាំ២០២៥ របស់សភាពាណិជ្ជកម្មកម្ពុជា នៅថ្ងៃទី២៨ ខែមករា ឆ្នាំ២០២៦ម្សិលមិញនេះថា ជុំវិញបញ្ហាជម្លោះព្រំដែនរវាងកម្ពុជា-ថៃ កម្ពុជាពិតជាចៀសមិនផុតពីបញ្ហាប្រឈមនោះឡើយ ជាពិសេសការធ្វើពាណិជ្ជកម្មកម្ពុជា-ថៃ នេះឯង ប៉ុន្តែទោះបីយ៉ាងណាកម្ពុជាក៏មិនមែនពឹងផ្អែកតែលើទីផ្សារមួយនេះឡើយ ដោយកម្ពុជាបាននិងកំពុងស្វែងរកទីផ្សារថ្មីៗ ក៏ដូច ពង្រីកទីផ្សារដែលមានស្រាប់បន្ថែមដូចជា ទីផ្សារវៀតណាមជាដើម ដើម្បីនាំចេញកសិផល ឬផលិតផលពាក់កណ្តាលសម្រេច ខណៈការនាំចេញទៅកាន់ទីផ្សារអន្តរជាតិផ្សេងៗ កម្ពុជាមិនមានការបារម្ភនោះឡើយ ព្រោះយើងនាំចេញជាផលិតផលសម្រេច ហើយការនាំចេញផលិតផលសម្រេចនេះ ក៏កម្ពុជាបានកំពុងពង្រីកបន្ថែមផងដែរ។អ្នកឧកញ៉ា បន្តថា ទាក់ទងការនាំចេញវិញ, កម្ពុជាក៏មិនមែនពឹងផ្អែកលើការនំាចេញផលិតផលកម្មន្តសាលមានដូចជា៖ សម្លៀកបំពាក់ វាយនភណ្ឌ ស្បែកជើង កាបូប និងសម្ភារៈធ្វើដំណើរប៉ុណ្ណោះ ជាក់ស្តែងនាប៉ុន្មានឆ្នាំចុងក្រោយនេះ កម្ពុជាទទួលបានការ ចុះបញ្ជីវិនិយោគ ដែលអនុម័តដោយក្រុមប្រឹក្សាអភិវឌ្ឍន៍កម្ពុជា គឺមានការវិនិយោគនៅគ្រប់វិស័យ ដែលសុទ្ធតែផលិតសម្រាប់ទីផ្សារនាំ ចេញ ខណៈដែលការវិនិយោគក៏កម្ពុជានៅតែស្រូបយកជាបន្តបន្ទាប់ ទោះបញ្ហាជម្លោះព្រំដែនរវាងកម្ពុជា-ថៃ នៅប្រឈមក៏ដោយ។លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម លើកឡើងផងដែរថា ស្ថិតក្នុងបរិបថនេះ កម្ពុជាមិននៅស្ងៀមនៅឡើយ បច្ចុប្បន្នបាននិងកំពុងខិតខំប្រឹងប្រែង ក្នុងកាបន្តធ្វើនូវសមាហរណកម្មសេដ្ឋកិច្ចស៊ីជម្រៅទៅក្នុងតំបន់ និងសកល ជាពិសេសការបន្តការចរចាបើកទីផ្សារសក្តានុពលថ្មីៗ ទាំងទ្វេភាគី និងពហុភាគី ដោយក្នុងនោះវិស័យឯកជនពិតជាបានចូលរួមចំណែកយ៉ាងសំខាន់ ក្នុងការ ជំរុញពាណិជ្ជកម្មកម្ពុជា ដើម្បីរុញច្រានកំណើនពាណិជ្ជកម្មជាតិ តាមរយៈការបង្កើតនៃការវិនិយោគ ការធ្វើពិពិធកម្មទំនិញនាំចេញចូល ការលើកកម្ពស់ភាពប្រកួតប្រជែង និងការបង្កើននៃការចូលរួមក្នុងខ្សែច្រវាក់តម្លៃ សម្រាប់ផ្គត់ផ្គង់ក្នុងតំបន់ និងសកលផងដែរ៕ អត្ថបទ៖ សុន រ៉ាឌី

ក្រុមហ៊ុនឯកជន លើកទឹកចិត្តអតីតពលករមកពីថៃ និងពលរដ្ឋភៀសសឹកមកដាក់ពាក្យស្វែងរកការងារ ខណៈកំពុងមានតម្រូវការ

តំណាងក្រុមហ៊ុន សហគ្រាសធំៗនៅក្នុងវេទិកាការងារ បានអំពាវនាវដល់យុវជន សិស្សនិស្សិត ជាពិសេសអតីតពលករមកពីប្រទេសថៃក៏ដូចជាជនភៀសសឹក ចូលរួមដាក់ពាក្យសម្ភាសន៍ការងារ ខណៈដែលឱកាសការងារជាច្រើនកន្លែងកំពុងរង់ចាំ។លោក ស្រេង លាងទ្រី អ្នកត្រួតពិនិត្យប្រតិបត្តិការ នៃក្រុមហ៊ុនខាងផ្នែកដឹកជញ្ជូន បានឱ្យដឹងថា នៅក្នុងពេលនេះ ក្រុមហ៊ុនខាងលោកកំពុងមានតម្រូវកម្លាំងពលកម្លាំងទាំងពីរភេទចំនួនជាង ២០០នាក់ ដើម្បីបម្រើការងារក្នុងវិស័យដឹកជញ្ជូន ដែលអាចរកប្រាក់ចំណូលជាមធ្យមចន្លោះពី ៤០០ ទៅ៥០០ដុល្លារ ក្នុងមួយខែ។ លោកឱ្យដឹងទៀតថា ចំពោះតម្រូវការកម្លាំងពលកម្មនេះ អ្នកមិនមានបទពិសោធន៍ ក្រុមហ៊ុនក៏ទទួលយកដែរ ដោយមានការបណ្តុះបណ្តាល មុនចេញបំពេញការងារ។ស្រដៀងគ្នាខាងលើនេះ កញ្ញា ហេង ស្រីនិច មន្រ្តីជ្រើសរើសបុគ្គលិកមកពីវិស័យមីក្រូហិរញ្ញវត្ថុ និងលោក សឿន ពិសិដ្ឋ ប្រធានធនធានមនុស្ស និងរដ្ឋបាលនៃក្រុមហ៊ុនខាងផ្នែកគ្រឿងសម្អាង បានជំរុញ និងលើកទឹកចិត្តដល់យុវជន សិស្ស/និស្សិត និងអ្នកកំពុងតែស្វែងរកការងារធ្វើ ឬចង់ផ្លាស់ប្តូរការងារ រួសរាន់មកដាក់ពាក្យដើម្បីបានជួប និងសម្ភាសផ្ទាល់ជាមួយតំណាងក្រុមហ៊ុន ទោះបីជាគ្មានបទពិសោធន៍ការងារ ឬគ្មានជំនាញ ក៏កុំមានការព្រួយបារម្ភ ព្រោះមុនចូលធ្វើការងារ ខាងក្រុមហ៊ុនក៏មានការបង្ហាត់បង្រៀនជាមុនផងដែរ ជាពិសេសតាមរយៈវេទិកាការងារនេះ អាចផ្តល់នូវឱកាសកាន់តែច្រើនសម្បូរបែបទៅដល់អ្នកដាក់ពាក្យស្វែងរកការងារ ដោយអាចសាកសួរព័ត៌មានបានដោយផ្ទាល់ជាមួយតំណាងក្រុមហ៊ុនដែលខ្លួនពេញចិត្ត។សូមបញ្ជាក់ថា នៅថ្ងៃទី២៩ ខែមករា ឆ្នាំ២០២៦នេះ ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ សហការជាមួយសហភាពសហព័ន្ធយុវជនកម្ពុជាវិស័យការងារ សន្តិសុខសង្គម និងបណ្តុះបណ្តាលវិជ្ជាជីវៈ បានរៀបចំវេទិកាការងារ និងកម្មសិក្សាការងារ ដោយនាំយកឱកាសការងារថ្មីៗបន្ថែមទៀតចំនួនជិត ៧០០កន្លែង ពីក្រុមហ៊ុនធំៗចំនួន៧ មកពីវិស័យមីក្រូហិរញ្ញវត្ថុ កសិកម្ម ដឹកជញ្ជូន និងគ្រឿងសម្អាងជាដើម សម្រាប់ផ្តល់ជូនយុវជន សិស្ស/និស្សិត និងអ្នកកំពុងស្វែងរកការងារធ្វើនៅបរិវេណក្រសួងការងារ និងបណ្តុះបណ្តាលវិជ្ជាជីវៈ៕ អត្ថបទ៖ ឈិត បូរ៉ាវី

រដ្ឋមន្រ្តីក្រសួងប្រៃសណីយ៍ លើកទឹកចិត្តឱ្យនិស្សិតប្រឹងប្រែងរៀនសូត្របន្តចូលរួមកិច្ចការសង្គម រក្សាសីលធម៌ និងសុជីវធម៌ឱ្យបានល្អ និងរួមចំណែកកសាងសង្គមជាតិកម្ពុជាឱ្យរីកចម្រើនទៅមុខ

ថ្លែងក្នុងពិធីសំណេះសំណាលជាមួយនិស្សិតស្ម័គ្រចិត្តដែលបានចូលរួមក្នុងវេទិការដ្ឋាភិបាលឌីជីថល ឆ្នាំ២០២៥ ពិព័រណ៍បច្ចេកវិទ្យាឌីជីថល និងព្រឹត្តិការណ៍ជាតិ-អន្តរជាតិពាក់ព័ន្ធ នារសៀលថ្ងៃទី២៨ ខែមករា ឆ្នាំ២០២៦ ឯកឧត្តម ជា វ៉ាន់ដេត រដ្ឋមន្រ្តីក្រសួងប្រៃសណីយ៍និងទូរគមនាគមន៍ (ក.ប.ទ.) បានលើកទឹកចិត្តឱ្យនិស្សិតទាំងអស់ប្រឹងប្រែងរៀនសូត្របន្តចូលរួមកិច្ចការសង្គម រក្សាសីលធម៌ និងសុជីវធម៌ឱ្យបានល្អ និងរួមចំណែកកសាងសង្គមជាតិកម្ពុជាឱ្យរីកចម្រើនទៅមុខជាលំដាប់ស្របតាមចក្ខុវិស័យរបស់រាជរដ្ឋាភិបាល។ក្នុងពិធីសំណេះសំណាលនេះប្រព្រឹត្តទៅនៅទីស្ដីការ ក.ប.ទ.ដោយមានការអញ្ជើញចូលរួមពីថ្នាក់ដឹកនាំ និងមន្ត្រីរាជការ នៃ ក.ប.ទ. និងនិស្សិតស្ម័គ្រចិត្តប្រមាណ ៣១៥នាក់។ក្នុងឱការនោះឯកឧត្តមរដ្ឋមន្រ្តី បានលើកឡើងអំពីស្ថានភាពនៃការឈ្លានពានពីសំណាក់យោធាថៃមកលើដែនអធិបតេយ្យភាពកម្ពុជា ដែលបានបង្កផលប៉ះពាល់ជាច្រើនរួមមានផ្ទះសម្បែង ហេដ្ឋារចនាសម្ព័ន្ធសាធារណៈ និងជាពិសេសការខូចខាតប្រាសាទបូរាណដែលសម្បត្តិវប្បធម៌របស់ខ្មែរ និងមនុស្សជាតិ។ជាមួយគ្នានេះដែរ ឯកឧត្តមរដ្ឋមន្រ្តី បានបញ្ជាក់អំពីសារៈសំខាន់នៃបចេ្ចកវិទ្យាដែលបាននិងកំពុងរីកចម្រើនយ៉ាងឆាប់រហ័ស ហើយបានចូលរួមចំណែកក្នុងការជំរុញកំណើនសេដ្ឋកិច្ចរបស់កម្ពុជា និងប្រែក្លាយប្រទេសកម្ពុជាជាសេដ្ឋកិច្ចនិងសង្គមឌីជីថល នាពេលខាងមុខ។ ក្នុងន័យនេះ ក.ប.ទ. បានបំពេញខិតខំរៀបចំលិខិតបទដ្ឋានពាក់ព័ន្ធ បណ្តុះបណ្តាលធនធានមនុស្សឌីជីថល និងបានអភិវឌ្ឍថ្នាលនិងកម្មវិធីរបស់រដ្ឋាភិបាលឌីជីថល សំដៅឆ្លើយតបនឹងការវិវឌ្ឍនៃបច្ចេកវិទ្យា៕

រដ្ឋមន្រ្តីក្រសួងសុខាភិបាល៖ «បច្ចុប្បន្ន កម្ពុជា មិនទាន់មានករណីជំងឺនីប៉ាហ៍ (Nipah) នៅឡើយទេ»

ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល បានបញ្ជាក់ថា បច្ចុប្បន្ន កម្ពុជា មិនទាន់មានករណីជំងឺនីប៉ាហ៍(Nipah Virus) នៅឡើយទេ ប៉ុន្តែក្រសួងមានភារកិច្ច ក្នុងការរៀបចំបង្ការការចម្លងចូលទៅក្នុងសហគមន៍។ការថ្លែងរបស់ឯកឧត្តមសាស្ត្រាចារ្យ ឈាង រ៉ា យ៉ាងដូច្នេះនាឱកាសអញ្ជើញចុះពិនិត្យការអនុវត្តការងារចត្តាឡីស័ក នៅអាកាសយានដ្ឋានអន្តរជាតិតេជោ ដើម្បីបង្ការ និងទប់ស្កាត់នូវការនាំចូលជំងឺឆ្លងនានា ជាពិសេសជំងឺនីប៉ាស៍(Nipah Virus) ដែលកំពុងកើតមានក្នុងបណ្តាប្រទេសតំបន់អាស៊ី, ដោយមានការអញ្ជើញចូលរួមពីសំណាក់លោកឧកញ៉ា វ៉ាន់ ឆារស៍ នាយកគ្រប់គ្រងក្រុមហ៊ុន ខេមបូឌា អ៊ែរផត អិនវេសមិន ខូអិលធីឌី ឯ.ក (CAIC) និងឯកឧត្តម លោកជំទាវ ថ្នាក់ដឹកនាំទទួលបន្ទុកជំងឺឆ្លង វិទ្យាស្ថានជាតិសុខភាពសាធារណៈ វិទ្យាស្ថានប៉ាស្ទ័រ អគ្គនាយកដ្ឋានអន្តោប្រវេសន៍ អគ្គនាយកដ្ឋានគយ និងរដ្ឋាករកម្ពុជា មន្រ្តីចត្តាឡីស័ក, កាលពីថ្ងៃទី២៨ ខែមករា ឆ្នាំ២០២៦។ឯកឧត្តមសាស្ត្រាចារ្យរដ្ឋមន្ត្រី បានសង្កត់ធ្ងន់ថា បច្ចុប្បន្នកម្ពុជាមិនទាន់មានករណីជំងឺនីប៉ាហ៍ នៅឡើយទេ ប៉ុន្តែក្រសួងសុខាភិបាលមានភារកិច្ច ក្នុងការរៀបចំបង្ការការចម្លងចូលទៅក្នុងសហគមន៍។ ក្នុងករណីមានការសង្ស័យ លើអ្នកដំណើរត្រូវអនុវត្តតាមនីតិវិធីស្តង់ដា ក្នុងការឆ្លើយតបគ្រោះអាសន្នសុខភាពសាធារណៈនៅច្រកចេញចូលប្រទេស ដោយត្រូវមានការសហការគ្នាឱ្យបានជិតស្និតជាមួយគ្រប់ផ្នែកពាក់ព័ន្ធ អាកាសយានដ្ឋាន ក្រុមហ៊ុនហោះហើរ មន្ទីរពេទ្យជាតិ និងមន្ទីរសុខាភិបាល នៃរដ្ឋបាលរាជធានី-ខេត្ត។ ជាជំហានបន្ទាប់ត្រូវមាន លំហាត់សមយុទ្ធត្រៀមករណីមានការសង្ស័យមកដល់ គិតតាំងពីការរកឃើញ ការដាក់ឱ្យនៅដាច់ដោយឡែក ការបញ្ជូន ការព្យាបាល និងការអនុញ្ញាតិឱ្យចេញពីមន្ទីរពេទ្យ។ឯកឧត្តមសាស្ត្រាចារ្យ ឈាង រ៉ា បានថ្លែងអំណរគុណដល់ភាគីពាក់ព័ន្ធ ថ្នាក់ដឹកនាំ និងមន្ត្រីសុខាភិបាលដែលបានចូលរួម និងត្រៀមរួចជាស្រេច ដើម្បីឆ្លើយតបប្រកបដោយប្រសិទ្ធិភាព «ការពារថ្ងៃនេះ អ្នកនឹងបានប្រសើរនៅថ្ងៃស្អែក»។សូមជម្រាបជូនថា ជំងឺនីប៉ាហ៍ (Nipah) គឺជាជំងឺបង្កឡើងដោយវីរុសនីប៉ាហ៍ រាលដាលដោយផ្ទុកលើសត្វប្រចៀវ សត្វច្រឹង និងអាចឆ្លងមក មនុស្ស និងជ្រូក។ ជំងឺនេះអាចឆ្លងពីមនុស្សម្នាក់ ទៅមនុស្សម្នាក់ទៀត តាមរយៈការប៉ះពាល់ផ្ទាល់ តាមទឹកសរីរាង្គ របស់មនុស្ស និងមានអត្រាស្លាប់ចន្លោះពី៤០ភាគរយ ទៅ៧០ភាគរយ។ វីរុសរកឃើញដំបូងក្នុងឆ្នាំ១៩៩៩ នៅប្រទេសម៉ាឡេស៊ី និងប្រទេសសិង្ហបុរី បណ្តាលឱ្យមនុស្ស១០០នាក់បានស្លាប់ក្នុងចំណោមអ្នកឆ្លងវីរុសចំនួន៣០០នាក់។ ប៉ុន្តែបន្ទាប់ពីពេលនោះរហូតមកដល់បច្ចុប្បន្ន មិនមានការផ្ទុះឡើងជាថ្មីត្រូវបានគេរាយការណ៍ពីប្រទេសម៉ាឡេស៊ី ទៀតទេ។ វីរុសត្រូវបានរកឃើញក្នុងប្រទេសបង់ក្លាដែសនិងប្រទេសឥណ្ឌា ក្នុងឆ្នាំ២០០១ និងមានការផ្ទុះឡើងស្ទើររាល់ឆ្នាំក្នុងប្រទេសបង់ក្លាដែស និងភាគខាងកើតប្រទេសឥណ្ឌា នៅចន្លោះពេលទៀងទាត់។ ប្រទេសកម្ពុជា នៅមិនទាន់រកឃើញមានវីរុសនីប៉ាហ៍ នៅលើមនុស្សនៅឡើយ និងធ្លាប់រកឃើញលើសត្វប្រចៀវ៕អត្ថបទ រដ្ឋា

រដ្ឋមន្ត្រីក្រសួងពាណិជ្ជកម្ម៖ សម្ទុះស្មារតីស្នេហាជាតិ បានកំពុងលើកស្ទួយ និងឱ្យតម្លៃផលិតផលក្នុងស្រុក

រដ្ឋមន្ត្រីក្រសួងពាណិជ្ជកម្មអះអាងថា ខណៈស្មារតីស្នេហាជាតិ និងចលនារួមរួមជាតិដែលមានសម្ទុះកាន់តែខ្លាំង បានកំពុងជំរុញលើកស្ទួយ និងការឱ្យតម្លៃខ្ពស់ផលិតផលក្នុងស្រុក, ការណ៍នេះគឺជាកាលានុវត្តន៍ថ្មីមួយមានជាពិសេសសម្រាប់ការអភិវឌ្ឍសមត្ថភាព ការធ្វើពិពិធកម្ម ក្នុងស្រុក កាពង្រឹងឧត្តមភាពប្រកួតប្រជែង ដើម្បីរួមចំណែកដល់កំណើនសេដ្ឋកិច្ចជាតិ។លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម ថ្លែងលើកឡើងនៅក្នុងការបិទមហាសន្និបាតបូកសរុបលទ្ធផលការងារឆ្នាំ២០២៥ និងលើកទិសដៅការងារឆ្នាំ២០២៦ របស់សភាពាណិជ្ជកម្មកម្ពុជា នៅថ្ងៃទី២៨ ខែមករា ឆ្នាំ២០២៦ ម្សិលមិញនេះថា ចំពោះ វិស័យពាណិជ្ជកម្មនៅក្រៅប្រទេស ការនាំចេញរបស់កម្ពុជានៅក្នុងឆ្នាំ២០២៥ បានបន្តរក្សានូវចលនករមានកំណើនល្អគួកត់សម្គាល់ ជាក់ស្តែងការនាំចេញសរុបនៅក្នុងឆ្នាំ២០២៥ កើនឡើងជាង ១៧% ធៀបទៅនិងឆ្នាំ២០២៤។ ចំណែកលំហូរនៃទេសចរណ៍ ឃើញថា កញ្ចប់ទីផ្សារឆ្ងាយៗ គឺមាននិន្នាកាកើនឡើងផងដែរដូចជា ទេសរណ៍មកពីអឺរ៉ុប អូស្រ្តាលី និងឥណ្ឌាជាដើម។លោកជំទាវ បន្តថា ការសម្រេចបានលទ្ធផលដ៏ល្អប្រសើរខាងលើនេះ ពិតជាមិនអាចកាត់ផ្តាច់បានឡើយ ក្នុងការចូលរួម ចំណែកដ៏សំខាន់របស់សភាពាណិជ្ជកម្មកម្ពុជា ដែលក្នុងនោះមាន សាជីវកម្ម សហគ្រាស អាជីវករ និងធុរជន ដែលជាឆ្អឹងខ្នងដ៏រឹងមាំ នៃសង្គម-សេដ្ឋកិច្ចជាតិ ដែលបាននិងកំពុងចូលរួមបង្កើតការងារ និងមុខរបរ និងប្រាក់ចំណូល និងកាត់បន្ថយនូវភាពក្រីក្រ និងជំរុញនូវ ការអភិវឌ្ឍសង្គម-សេដ្ឋកិច្ចកម្ពុជា ប្រកបដោយចីភាព បរិយាប័ន្ន និងភាពធន់ ជាពិសេសខណៈដែលស្មារតីស្នេហាជាតិ និងចលនា រួមរួមជាតិ ដែលមានសម្ទុះកាន់តែខ្លាំង បានកំពុងជំរុញលើកស្ទួយ និងការឱ្យតម្លែខ្ពស់ផលិតផលក្នុងស្រុក។លោកជំទាវ ចម និម្មល លើកឡើងបន្តថា នៅក្នុងស្មារតីនេះ ក្រសួងពាណិជ្ជកម្មបានបន្តជំរុញសភាពាណិជ្ជកម្មកម្ពុជា ឱ្យដើរ តួនាទីកាន់តែសំខាន់ និងសកម្មថែមទៀត ស្របតាមភារកិច្ចសភាពាណិជ្ជកម្ម ដែលមានចែងនៅក្នុងសភាពាណិជ្ជកម្មឆ្នាំ១៩៩៥ និង អនុក្រិត្យលេខ ១៦ អ.ន.ក្រ.ក.ប ស្តីពីការរៀបចំ និងការប្រព្រឹត្តទីរបស់សភាពាណិជ្ជកម្មកម្ពុជា។អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា លើកឡើងផងដែរថា ឆ្នាំ២០២៥ គឺជាចំណុចរបត់ដ៏សំខាន់សម្រាប់ អាជីវកម្មកម្ពុជា ដែលពោរពេញទៅដោយបញ្ហាប្រឈមនិងឱកាស, បញ្ហាប្រឈមទាំងនោះរួមមាន ភាពតានតឹងភូមិសាស្ត្រនយោបាយ សង្គ្រាមពាណិជ្ជកម្ម រវាងរុស្ស៊ី-អ៊ុយក្រែន បញ្ហានៅមជ្ឈិមបូព៌ា និងជម្លោះព្រំដែនកម្ពុជា-ថៃ, ទោះជាយ៉ាងណាក៏ដោយ តាមរយៈកិច្ច ខិតខំប្រឹងប្រែងរួមគ្នា សភាពាណិជ្ជកម្មកម្ពុជា មិនត្រឹមតែការពារផលប្រយោជន៍ សមាជិកប៉ុណ្ណោះទេប៉ុន្តែ ថែមទាំងបានបង្កើតផ្លូវថ្មី សម្រាប់ផលិតផលកម្ពុជា នៅលើឆាកអន្តរជាតិផងដែរ។ អ្នកឧកញ៉ា បន្ថែមថា ដើម្បីគាំទ្រដល់សន្ទុះទៅមុខនេះ សភាពាណិជ្ជកម្ពុជា បានបើកការិយាល័យតំណាងចំនួន ៨ នៅទូទាំង ពិភពលោករួមមាន៖ នៅកាណាដា ជប៉ុន អូស្ត្រាលី សហរដ្ឋអាមេរិក និងនូវែលហ្សេឡង់។ ការិយាល័យទាំងនេះដើរតួជាច្រកសេដ្ឋកិច្ច ដ៏សំខាន់ ក្នុងការទាក់ទាញការវិនិយោគពីបរទេស និងធានាថាម៉ាកសញ្ញា "ផលិតនៅកម្ពុជា Made in Cambodia" ត្រូវបានទទួល ស្គាល់ក្នុងទីផ្សារអន្តរជាតិ។ ដោយឡែកសម្រាប់សកម្មភាពក្នុងស្រុកវិញ សភាពាណិជ្ជកម្មកម្ពុជា នៅតែជាដៃគូដ៏សកម្ម និងមាន លក្ខណៈស្ថាបនានៅក្នុងវេទិការាជរដ្ឋាភិបាល-ផ្នែកឯកជន ដោយធានាថា បញ្ហាប្រឈមនានា ដែលផ្នែកឯកជនជួបប្រទះ ជាពិសេស សហគ្រាសធុនតូច និងមធ្យម ត្រូវបានដឹងឮ និងដោះស្រាយជាក់ស្តែង៕អត្ថបទ៖ សុន រ៉ាឌី

កិច្ចប្រជុំក្រុមលេខា RBC រវាងយោធភូមិភាគទី៥ កម្ពុជា និងកងទ័ពភូមិភាគទី១ ថៃ បានបញ្ចប់កិច្ចប្រជុំ តែភាគីទាំងពីរមិនទាន់រកឃើញនូវចំណុចកណ្តាលរួមគ្នាមួយនៅឡើយ

នៅថ្ងៃទី២៩ ខែមករា ឆ្នាំ២០២៦ វេលាម៉ោង ៩:០០នាទីព្រឹកនេះ កិច្ចប្រជុំក្រុមលេខាធិការដ្ឋាននៃគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) រវាងយោធភូមិភាគទី៥ ភាគីកម្ពុជា និងកងទ័ពភូមិភាគទី១ ភាគីថៃ បានបញ្ចប់កិច្ចប្រជុំពិភាក្សារបស់ខ្លួនហើយ បន្ទាប់ពីដំណើរការអស់រយៈពេលបីថ្ងៃគឺ ចាប់ពីថ្ងៃទី២៧ ដល់ថ្ងៃទី២៩ ខែមករា ឆ្នាំ២០២៦ ដែលបានប្រព្រឹត្តទៅនៅច្រកអន្តរជាតិប៉ោយប៉ែត ខេត្តបន្ទាយមានជ័យ ព្រះរាជាណាចក្រកម្ពុជា ទល់នឹងខេត្តស្រះកែវ ព្រះរាជាណាចក្រថៃ។ នេះបើតាមសេចក្តីប្រកាសព័ត៌មានរបស់លោកជំទាវ ឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិកម្ពុជា។ គណៈប្រតិភូក្រុមលេខាធិការរបស់កម្ពុជាដឹកនាំដោយ ឧត្តមសេនីយ៍ទោ សរ គឹមប៉ាក់ ប្រធានក្រុមលេខាធិការ (RBC) កម្ពុជា និងគណៈប្រតិភូក្រុមលេខាធិការរបស់ថៃដឹកនាំដោយ ឧត្តមសេនីយ៍ទោ ភិថាយ៉ាគូល ពោធិ៍សុវណ្ណ ប្រធានក្រុមលេខាធិការ (RBC ) ថៃ។ សូមជម្រាបជូនផងដែរថា ដោយសារតែភាគីទាំងពីរមិនទាន់រកឃើញនូវចំណុចកណ្តាលរួមគ្នាមួយនៅឡើយ ដូច្នេះភាគីទាំងពីរបានឯកភាពគ្នាដកឃ្លាវិលត្រលប់ទៅទីបញ្ជាការរៀងខ្លួនវិញ ហើយបន្តផ្លាស់ប្តូរឯកសារ និងពិភាក្សាគ្នាឈានដល់ការឯកភាពគ្នានាពេលខាងមុខទើបមានការរៀបចំពិធីចុះហត្ថលេខា និងកិច្ចប្រជុំគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) រវាងយោធភូមិភាគទី៥របស់កម្ពុជា និងកងទ័ពភូមិភាគទី១ របស់ថៃ ។ គួររំលឹកផងដែរថា កិច្ចប្រជុំពិសេសនៃគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) នេះធ្វើឡើងផ្អែកតាមស្មារតីនៃសេចក្តីប្រកាសរួម នៃកិច្ចប្រជុំពិសេសលើកទី៣ នៃគណៈកម្មាធិការព្រំដែនទូទៅ (GBC) រវាងព្រះរាជាណាចក្រកម្ពុជា និងព្រះរាជាណាចក្រថៃ កាលពីថ្ងៃទី២៧ ខែធ្នូ ឆ្នាំ២០២៥ ដែលភាគីទាំងពីរបានបញ្ជាក់សាជាថ្មី អំពីការបន្តអនុវត្តយ៉ាងម៉ឺងម៉ាត់ខ្ជាប់ខ្ជួននូវលទ្ធផលនៃកិច្ចប្រជុំពិសេសនេះឱ្យបានពេញលេញ និងប្រកបដោយប្រសិទ្ធភាព ក៏ដូចជាការបន្តកិច្ចខិតខំប្រឹងប្រែងកាត់បន្ថយភាពតានតឹងតាមបណ្តោយព្រំដែន ព្រមទាំងស្វែងរកកិច្ចសហប្រតិបត្តិការជាក់ស្តែងសំដៅលើកកម្ពស់សន្តិភាព និងស្ថិរភាពរវាងប្រទេសទាំងពីរ និងឈានដល់ការវិលត្រឡប់ទៅរកប្រក្រតីភាពឡើងវិញបានឆាប់រហ័ស។ សូមគូសបញ្ជាក់ផងដែរថា កិច្ចប្រជុំក្រុមលេខាធិការនៃ គណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) បានប្រព្រឹត្តទៅចាប់ពីថ្ងៃទី២៧ ដល់ថ្ងៃទី២៩ ខែមករា ឆ្នាំ២០២៦ ក្រោមការសង្កេតការណ៍ពីក្រុមអ្នកសង្កេតការណ៍អាស៊ាន (AOT) របស់កម្ពុជា និងថៃផងដែរ៕

អគ្គនាយកដ្ឋានគយ និងរដ្ឋាករកម្ពុជា ប្រកាសឱ្យផ្អាកការនាំចូលមុខទំនិញទឹកដោះគោម្សៅ Babybio Optima 1 ក្រោយរកឃើញមានជាតិពុល

ភ្នំពេញ៖ បណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បានចេញសេចក្តីជូនដំណឹងប្រកាសឱ្យផ្អាកការនាំចូលមុខទំនិញទឹកដោះគោម្សៅ Babybio Optima 1 បណ្តោះអាសន្ន បន្ទាប់ពីអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ បានជូនដំណឹងអំពីការរកឃើញ វត្តមានជាតិពុល (Toxin) ឈ្មោះ Cereulide ក្នុងផលិតផល ទឹកដោះគោនេះ។លិខិតរបស់បណ្ឌិត គុណ ញឹម បានបញ្ជាក់ថា ដើម្បីចូលរួមចំណែកធានាសុវត្ថិភាពសុខភាពទារក និងកុមារ អគ្គនាយកដ្ឋានគយនិងរដ្ឋាករកម្ពុជា សូមធ្វើការណែនាំដូចខាងក្រោម៖១. ត្រូវបានផ្អាកការនាំចូល ទឹកដោះគោម្សៅម៉ាក Babybio Optima 1 ដែលមានលេខឡូត៏ដូចខាងលើ។២. មន្ត្រីគយនិងរដ្ឋាករមានសមត្ថកិច្ច ត្រូវយកចិត្តទុកដាក់ខ្ពស់ក្នុងការផ្ទៀងផ្ទាត់ ព័ត៌មាននិងទិន្នន័យដែលប្រកាសក្នុងឯកសារជាមួយ និងទំនិញជាក់ស្ដែង ដើម្បីជៀសវាងការបន្លំនាំចូលដោយគេចវេះ ពីវិធានការខាងលើជាយថាហេតុ៕

ក្រសួងប្រកាសប្រមូលត្រឡប់វិញផលិតផលទឹកដោះគោម្សៅ Babybio Optima 1 ខណៈ អាចបង្កហានិភ័យដល់សុខភាពទារក កុមារ និង អ្នកប្រើប្រាស់ទូទៅ

ក្រសួងសុខាភិបាល នៃព្រះរាជាណាចក្រកម្ពុជា សូមជម្រាបជូនដល់សាធារណជន ជាពិសេសមាតាបិតា និងអាណាព្យាបាលទារក និងកុមារទាំងអស់ឱ្យបានជ្រាបថា យោងតាមលិខិតរបស់ទីភ្នាក់ងារជាតិសម្រាប់ សុវត្ថិភាព ចំណីអាហារប្រទេសបារាំង និងលិខិតបញ្ជាក់របស់រោងចក្រឈ្មោះ VITAGERMINE បានបញ្ជាក់ថា ផលិតផលទឹកដោះគោម្សៅឈ្មោះ Babybio Optima 1 ចំនួន ៣ ឡូតិ៍ (ដូចមានភ្ជាប់មកជាមួយនូវរូបភាព ផលិតផល) អាចមានវត្តមាន Toxin ឈ្មោះ Cereulide ដែលបង្ក ហានិភ័យដល់សុខភាពទារក កុមារ និង អ្នកប្រើប្រាស់ទូទៅផងដែរ។ ផលិតផលទឹកដោះគោម្សៅទាំង ៣ឡូតិ៍នេះមានដូចនៅក្នុងតារាងខាងក្រោម៖ តាមការបញ្ជាក់របស់ក្រុមហ៊ុន Comptoir Perfect Pharmed Co., Ltd ដែលជាអ្នកនាំចូលផលិតផល ទឹកដោះគោម្សៅនេះ បានជម្រាបជូនថា ក្រុមហ៊ុនបាននាំចូលផលិតផលទឹកដោះគោម្សៅទាំង ៣ឡូតិ៍ខាងលើ ប៉ុន្តែក្រុមហ៊ុនទើបបានចែកចាយផលិតផលចំនួន ២ឡូតិ៍ រួមមានលេខឡូតិ៍ 894408 និង 900035 ក្នុងចំណោម ផលិតផលទាំង ៣ឡូតិ៍ខាងលើ។ ទោះបីយ៉ាងណាក៏ដោយ ដើម្បីធានាបាននូវសុវត្ថិភាពចំពោះអ្នកប្រើប្រាស់ ក្រសួង សុខាភិបាល តម្រូវឱ្យក្រុមហ៊ុន Comptoir Perfect Pharmed Co., Ltd ប្រមូលត្រឡប់មកវិញនូវផលិតផល ទឹកដោះគោម្សៅទាំង ៣ឡូតិ៍ ខាងលើជាបន្ទាន់ និងត្រូវបន្តប្រមូលផលិតផលខាងលើ ឱ្យអស់ពីលើទីផ្សារនៅ ព្រះរាជាណាចក្រកម្ពុជាក្នុងរយៈពេលខ្លីខាងមុខនេះ។ទន្ទឹមនេះដែរ ដើម្បីធានាបាននូវអនាម័យ និងសុវត្ថិភាព សូមអាជ្ញាធរមានសមត្ថកិច្ច និងអ្នកពាក់ព័ន្ធ ទាំងអស់បន្តសហការ៖គ្រប់ទីតាំងចែកចាយ ឬលក់ផលិតផលខាងលើទាំងអស់ ត្រូវបញ្ឈប់ការចែកចាយ ឬលក់ ជាបន្ទាន់ភ្លាម និងត្រូវប្រគល់ផលិតផលទាំងនេះ ទៅឱ្យក្រុមហ៊ុន Comptoir Perfect Pharmed Co., Ltd វិញ។គ្រប់មន្ទីរសុខាភិបាល នៃរដ្ឋបាលរាជធានី ខេត្ត បន្តចុះត្រួតពិនិត្យតាមបណ្តាទីផ្សារ ផ្សារទំនើប ឱសថស្ថាន និងឱសថស្ថានរង ដើម្បីទប់ស្កាត់ការចរាចរនៃផលិតផលទាំង ៣ឡូតិ៍ខាងលើ។ចំពោះមាតាបិតា ឬអាណាព្យាបាល ដែលបានទិញនិងកំពុងប្រើប្រាស់ផលិតផលទឹកដោះគោម្សៅ Babybio Optima 1 ដែលមានលេខឡូតិ៍ខាងលើ សូមបញ្ឈប់ការប្រើប្រាស់ជាបន្ទាន់ និងតាមដានសុខភាព កូនជាប្រចាំ។ ក្នុងករណីមានរោគសញ្ញាដូចជា រាក ឬក្អួត សូមប្រញាប់នាំកូនទៅកាន់មន្ទីរពេទ្យ ឬ មណ្ឌលសុខភាពនៅជិតបំផុតជាបន្ទាន់។ករណីបងប្អូនបានជួបប្រទះឃើញ ឬកំពុងប្រើប្រាស់ លក់ ឬចែកចាយ ផលិតផលខាងលើ ឬបានឃើញ ទារក និងកុមារតូចៗ មានរោគសញ្ញាសង្ស័យពាក់ព័ន្ធនឹង ការប្រើប្រាស់ផលិតផលនេះ សូមប្រគល់ ផលិតផលនោះទៅទីតាំងដែលបានទិញវិញឬជូនដំណឹងទៅលេខទូរសព្ទខាងក្រោម។អាស្រ័យហេតុនេះ សូមសាធារណជន មាតាបិតា និងអាណាព្យាបាលទាំងអស់ មេត្តាជ្រាប និងចូលរួម សហការអនុវត្តតាមសេចក្តីប្រកាសព័ត៌មាននេះឱ្យមានប្រសិទ្ធភាពខ្ពស់។

ក្រុមប្រឹក្សាអភិវឌ្ឍន៍កម្ពុជា បញ្ជាក់ថា រាជរដ្ឋាភិបាលមិនដែលមានការលក់កោះណាមួយនៅដែនសមុទ្រកម្ពុជាទៅឱ្យក្រុមហ៊ុនឯកជននោះទេ

ក្រុមប្រឹក្សាអភិវឌ្ឍន៍កម្ពុជា (CDC) កត់សម្គាល់ឃើញថាមានការផ្សព្វផ្សាយតាមបណ្តាញសង្គមនូវព័ត៌មានមិនពិតថា រាជរដ្ឋាភិបាលបានលក់កោះមួយ នៅខេត្តព្រះសីហនុ និងកោះគី នៅខេត្តកំពត ទៅឱ្យក្រុមហ៊ុនឯកជន។ ក្រុមប្រឹក្សាអភិវឌ្ឍន៍កម្ពុជា បញ្ជាក់ជូនសាធារណជនថា កោះទាំងពីរនេះគឺជាទ្រព្យសម្បត្តិឯកជនរបស់រដ្ឋ ដែលនឹងត្រូវធ្វើការជួលទៅឱ្យក្រុមហ៊ុនឯកជនដើម្បីធ្វើការអភិវឌ្ឍបម្រើឱ្យវិស័យទេសចរណ៍។ កោះទាំងពីរនេះរាជរដ្ឋាភិបាលមិនបានលក់ទៅឱ្យក្រុមហ៊ុនឯកជនឡើយ ហើយក៏មិនដែលមានការលក់កោះណាមួយនៅដែនសមុទ្រកម្ពុជាទៅឱ្យក្រុមហ៊ុនឯកជនដែរ៕

កម្ពុជាវាយតម្លៃខ្ពស់ចំពោះតួនាទីដ៏សំខាន់របស់ម៉ាឡេស៊ី ក្នុងការសម្របសម្រួលឱ្យមានបទឈប់បាញ់ និងជំរុញឱ្យមានការដោះស្រាយជម្លោះព្រំដែនដោយសន្តិវិធីរវាងកម្ពុជា និងថៃ

ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ បានអញ្ជើញជួបពិភាក្សាការងារក្រៅផ្លូវការប្រកបដោយផ្លែផ្កាជាមួយ ឯកឧត្តម Dato’ Seri Utama Haji Mohamad bin Haji Hasan រដ្ឋមន្ត្រីការបរទេសម៉ាឡេស៊ី នៅថ្ងៃទី២៨ ខែមករា ឆ្នាំ២០២៦។ក្នុងឱកាសនោះ ប្រមុខការទូតកម្ពុជា បានវាយតម្លៃខ្ពស់ចំពោះតួនាទីដ៏សំខាន់របស់ម៉ាឡេស៊ី ក្នុងការសម្របសម្រួលឱ្យមានបទឈប់បាញ់ និងជំរុញឱ្យមានការដោះស្រាយជម្លោះព្រំដែនដោយសន្តិវិធីរវាងកម្ពុជា និងថៃ។ក្នុងឱកាសនេះផងដែរ កម្ពុជាសម្ដែងនូវការអបអរសាទរយ៉ាងកក់ក្តៅបំផុតចំពោះប្រទេសម៉ាឡេស៊ី ក្នុងនាមជាប្រធានអាស៊ានក្នុងឆ្នាំ២០២៥ ដែលសម្រេចបាននូវលទ្ធផលដ៏ត្រចះត្រចង់ ដែលបានរួមចំណែកយ៉ាងសំខាន់ដល់ស្ថិរភាព និងកំណើនក្នុងតំបន់។

បណ្ដាញសង្គម

ព័ត៌មានថ្មីៗ

ក្រុមហេសបូឡាអះអាងពីការវាយប្រហារថ្មី ដែលកំណត់គោលដៅលើមូលដ្ឋាន យោធានៅអ៊ីស្រាអែល

សហភាពអឺរ៉ុបនឹងរៀបចំកិច្ចប្រជុំកម្រិតខ្ពស់ចំនួន ២ ជាមួយអាជ្ញាធរអន្តរកាលស៊ីរី នៅទីក្រុងប្រ៊ុចសែល

កងទ័ពអ៊ីស្រាអែលអំពាវនាវប្រជាជនឲ្យជម្លៀសចេញពីភូមិចំនួន ៩ នៅភាគខាងត្បូងប្រទេសលីបង់

ប្រមុខការទូតរុស្ស៊ី និងអារ៉ាប៊ីសាអ៊ូឌីតអំពាវនាវឲ្យស្តារឡើងវិញនូវការធ្វើនាវាចរណ៍ដោយសេរី នៅច្រកសមុទ្រហ័រមូស

ស្លូវ៉ាគី៖ អឺរ៉ុបបង្ខូចប្រវត្តិសាស្ត្រ និងខ្វះការគោរពចំពោះព្រឹត្តិការណ៍សង្គ្រាមលោកលើកទី២

លោក TRUMP រំពឹងថា នឹងទទួលបានការឆ្លើយតបពីអ៊ីរ៉ង់ចំពោះសំណើរបស់អាមេរិក ក្នុងរយៈពេលប៉ុន្មានម៉ោងខាងមុខនេះ

អាមេរិកវាយប្រហារទូកដឹកគ្រឿងញៀននៅភាគខាងកើតមហាសមុទ្រប៉ាស៊ីហ្វិក បានសម្លាប់មនុស្សយ៉ាងតិច ២នាក់

ប្រមុខUN ជំរុញឲ្យមានការអត់ធ្មត់អតិបរមា ដើម្បីជៀសវាងការកើនឡើងភាពតានតឹងបន្ថែមទៀត នៅច្រកសមុទ្រហ័រមូស

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877