BTV NEWS

ក្រសួងការងារ ថ្កោលទោសការប្រើប្រាស់អំពើហិង្សាពីសំណាក់ពលរដ្ឋថៃមកលើពលរដ្ឋស៊ីវិលខ្មែរ

រដ្ឋបាលខេត្តសៀមរាប ត្រៀមសម្របសម្រួលកន្លែងស្នាក់នៅ និងផ្គត់ផ្គង់អាហារជូនបងប្អូនភៀសខ្លួនពីខេត្តឧត្តរមានជ័យ និងខេត្តព្រះវិហារ

TOP STORY | សម្ដេចតេជោ៖ថាក់ សុីន ប្រើប្រាស់សង្រ្គាមដើម្បីសងសឹក ហ៊ុន សែន ដែលលទ្ធផលចុងក្រោយគឺប្រជាជនជាអ្នករងគ្រោះ

ប្រធានអាស៊ានប្តូរវេន អំពាវនាវដល់មេដឹកនាំកម្ពុជា និងថៃ អនុវត្តបទឈប់បាញ់ជាបន្ទាន់ និងសន្ទនាដោយសន្តិវិធី

ព័ត៌មានជាតិ

លេខាធិការដ្ឋានគ.វ.រ. បើកកិច្ចប្រជុំលើកទី៦ លើរបៀបវារៈចំនួន៤ ដើម្បីជំរុញការកែទម្រង់រដ្ឋបាលសាធារណៈ

កំពុងដំណើរការ៖ ខណៈនេះ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាអនុប្រធានប្រចាំការនៃ គណៈកម្មាធិការជាតិជំរុញការអនុវត្តវិធានការគន្លឹះក្នុងការកែទម្រង់រដ្ឋបាលសាធារណៈ របស់រាជរដ្ឋាភិបាលនីតិកាលទី៧ នៃរដ្ឋសភា (គ.វ.រ.) កំពុងដឹកនាំកិច្ចប្រជុំលេខាធិការដ្ឋាន ដើម្បីពិភាក្សាលើឯកសារបទដ្ឋានគតិយុត្តចំនួន៣ និងការងារឆ្ពោះទៅមុខក្នុងការអនុវត្តការកែទម្រង់រដ្ឋបាលសាធារណៈ។ កិច្ចប្រជុំនារសៀលថ្ងៃទី១៤ ខែកក្កដា ឆ្នាំ២០២៥ នៅគណៈកម្មាធិការកែទម្រង់រដ្ឋបាលសាធារណៈ នេះ មានការអញ្ជើញចូលរួមពីឯកឧត្តមឧបនាយករដ្ឋមន្ត្រី រដ្ឋមន្ត្រី ឯកឧត្តម លោកជំទាវ តំណាងក្រសួង ស្ថាប័នទាំង៣១ ការដ្ឋានកែទម្រង់ទាំង៥ របស់រាជរដ្ឋាភិបាល និងរដ្ឋបាលរាជធានី ខេត្តទាំង២៥ ព្រមទាំងថ្នាក់ដឹកនាំ និងមន្រ្តីបច្ចេកទេសក្រសួងមុខងារសាធារណៈ។ កិច្ចប្រជុំនេះ ជាការពិភាក្សាលើការរបៀបវារៈចំនួន៤ រួមមាន៖ (១)សេចក្តីព្រាងអនុក្រឹត្យស្តីពីការរៀបចំនិងការប្រព្រឹត្តទៅនៃលេខាធិការដ្ឋានរបស់ក្រសួង ស្ថាប័ន ចំណុះអង្គការនីតិប្រតិបត្តិំ (២)សេចក្តីព្រាងអនុក្រឹត្យស្តីពីការរៀបចំអង្គភាពសវនកម្មផ្ទៃក្នុងក្រសួង ស្ថាប័ន ចំណុះអង្គភាពនីតិប្រតិបត្តិ (៣)សេចក្តីព្រាងអនុក្រឹត្យស្តីពីការបង្កើតគណៈកម្មាធិការលើកកម្ពស់អភិបាលកិច្ចក្រសួង ស្ថាប័ន ចំណុះអង្គភាពនីតិប្រតិបត្តិ និង (៤)ការធ្វើបច្ចុប្បន្នភាពរចនាសម្ព័ន្ធ និងជំរឿនមន្ត្រីជាក់ស្តែងនៅតាមរចនាសម្ព័ន្ធនៃគ្រឹះស្ថានសិក្សាសាធារណៈ អង្គភាពសុខាភិបាលមូលដ្ឋាន និងក្រសួង ស្ថាប័ន ចំណុះអង្គភាពនីតិប្រតិបត្តិ៕

សម្ដេចតេជោ៖កម្ពុជាមិនចង់មានសង្គ្រាមទេ ប៉ុន្ដែប៉ុន្មានថ្ងៃនេះថៃចង់ធ្វើរបងព័ទ្ធប្រាសាទតាមាន់ធំ

ភ្នំពេញ ៖ ក្នុងឱកាសដឹកនាំសម័យប្រជុំលើកទី៣ ព្រឹទ្ធសភានីតិកាលទី៥ នៅថ្ងៃទី១៤ ខែកក្កដា ឆ្នាំ២០២៥នេះដែរ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានថ្លែងបញ្ជាក់ថា កម្ពុជាមិនចង់មានសង្គ្រាមជាមួយប្រទេសជិតខាងនោះទេ ប៉ុន្ដែប៉ុន្មានថ្ងៃនេះភាគីថៃនៅតែចង់ចូលមកបំពានដឹកដីកម្ពុជា និងចង់ធ្វើរបងព័ទ្ធប្រាសាទតាមាន់ធំថែមទៀត។សម្ដេចតេជោ មានប្រសាសន៍ថា ប៉ុន្មានថ្ងៃនេះថៃចង់ធ្វើរបងព័ទ្ធប្រាសាទតាមាន់ធំ។ សម្ដេចចំអកថា សាកលមើលៗសម័យនេះហើយបើអ្នកឯងប្រើប្រាស់ ឬបំពានដល់ថ្នាក់ប៉ុណ្ណឹង តើខ្មែរអន់ណាស់ឬអី? កម្ពុជាមិនចង់ធ្វើសង្រ្គាមទេ ប៉ុន្ដែកម្ពុជាត្រៀមរៀបចំសម្រាប់សង្គ្រាមមួយដែលវានឹងមកដល់។សូមជម្រាបថា រាជរដ្ឋាភិបាលកម្ពុជា ទាំងសម្ដេចតេជោ ហ៊ុន សែន និងសម្តេចបវរធិបតី ហ៊ុន ម៉ាណែត នាយករដ្ឋ បានបញ្ជាក់ម្ដងហើយម្ដងទៀតថា រាជរដ្ឋាភិបាលកម្ពុជា នៅតែប្រកាន់យកយន្តការចរចាជាទ្វេភាគីជាមួយប្រទេសថៃពាក់ព័ន្ធនឹងវិវាទព្រំដែនរវាងប្រទេសទាំងពីរ លើកលែងតែវិវាទកំពុងកើតឡើងនៅតំបន់ប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំ៣ គឺត្រូវតែដោះស្រាយតាមយន្តការតុលាការយុត្តិធម៌អន្តរជាតិ (ICJ)៕

សម្ដេចតេជោ៖គ្មានពលរដ្ឋណាមួយត្រូវដកសិទ្ធិនោះទេបើមិនបានធ្វើអ្វីក្បត់ផលប្រយោជន៍ជាតិខ្លួន

ភ្នំពេញ ៖ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជាពន្យល់ដល់ជនរួមជាតិកម្ពុជាថា គ្មានពលរដ្ឋ ឬអ្នកនយោបាយប្រឆាំងណាមួយ ត្រូវដកសិទ្ធិ ឬដកសញ្ជាតិនោះទេ បើសិនជាមិនបានធ្វើអំពើអ្វីដែលក្បត់ផលប្រយោជន៍ជាតិខ្លួនឯងនោះ ដូច្នេះសូមកុំភ័យ ឬព្រួយបារម្ភចំពោះច្បាប់ដកសញ្ជាតិ។ សម្ដេចតេជោ ហ៊ុន សែន បានពន្យល់ដល់ជនរួមជាតិបែបនេះ ក្នុងឱកាសដឹកនាំសម័យប្រជុំលើកទី៣ ព្រឹទ្ធសភានីតិកាលទី៥ នៅថ្ងៃទី១៤ ខែកក្កដា ឆ្នាំ២០២៥។ សម្ដេចតេជោ មានប្រសាសន៍ថា ប្រទេសកម្ពុជា បានធ្វើសញ្ជាតូបនីយកម្ម ដែលមកដល់ឥឡូវនេះមានបរទេសរាប់សិបសញ្ជាតិដែលបានចូលសញ្ជាតិខ្មែរ ប៉ុន្ដែកម្ពុជាមានសិទ្ធិត្រឹមតែបញ្ចូលពួកគេមកជាសញ្ជាតិខ្មែរ ប៉ុន្ដែមិនមានសិទ្ធិដើម្បីដកសញ្ជាតិវិញទេ។ ដូច្នេះអស់លោកតែងតែគិតអំពីបញ្ហានេះ ឥឡូវរាជរដ្ឋាភិបាលបានដើរដល់ចំណុចនេះហើយ។ ហើយច្បាប់ដកសញ្ជាតិនេះ ក៏ធ្វើចំពោះជនជាតិបរទេសមួយចំនួនគេបានចូលសញ្ជាតិខ្មែរ ប៉ុន្ដែទៅបម្រើបរទេសប្រឆាំងកម្ពុជាផងដែរ។ សូមជម្រាបថា យោងតាមមាត្រា៤៩ថ្មី នៃរដ្ឋធម្មនុញ្ញនៃព្រះរាជាណាចក្រកម្ពុជា ដែលជាច្បាប់កំពូលរបស់ជាតិ ប្រជាពលរដ្ឋខ្មែរគ្រប់រូបត្រូវតម្កល់ផលប្រយោជន៍ជាតិជាធំ ហើយមិនត្រូវធ្វើសកម្មភាពណាមួយ ទោះដោយផ្ទាល់ក្តី ឬដោយប្រយោលក្តីនាំឱ្យប៉ះពាល់ដល់ផលប្រយោជន៍របស់កម្ពុជា និងប្រជាពលរដ្ឋខ្មែរឡើយ។ មាត្រានេះក៏បញ្ជាក់យ៉ាងច្បាស់ថា ប្រជាពលរដ្ឋខ្មែរគ្រប់រូបមានកាតព្វកិច្ចរួមចំណែកកសាងប្រទេសជាតិ និងការពារមាតុភូមិ។ ផ្អែកតាមស្មារតីនេះ ការប្រព្រឹត្តអំពើក្បត់ជាតិ ឬការធ្វើសកម្មភាពណាមួយដែលបំផ្លាញឧត្តមប្រយោជន៍របស់ប្រទេសជាតិ និងប្រជាជនកម្ពុជា ពិសេសការឃុបឃិតគ្នាជាមួយបរទេស ដើម្បីធ្វើសកម្មភាពទាំងនេះ គឺជាការប្រព្រឹត្តខុសទៅនឹងរដ្ឋធម្មនុញ្ញ និងច្បាប់ព្រហ្មទណ្ឌនៃព្រះរាជាណាចក្រកម្ពុជា ព្រមទាំងប្រាសចាកពីឧត្តមគតិ និងមនសិការជាពលរដ្ឋខ្មែរ។

លោកអ្នកឧកញ៉ា បណ្ឌិត ទ្រី ភាព និងលោកជំទាវ ព្រមទាំងបុត្រា-បុត្រី ប្រគេនទានព្រះវស្សា ទេយ្យទាន និងបច្ច័យជូនព្រះសង្ឃគង់ចាំព្រះវស្សាចំនួន ២៩វត្ត

ខេត្តព្រះវិហារ៖ បន្ទាប់ពីបានអញ្ជើញចូលរួមក្នុងពិធីពិនិត្យ និងព្យាបាលជំងឺដោយក្រុមគ្រូពេទ្យ TYDA និងការប្រគល់អំណោយសម្ដេចតេជោ និងសម្ដេចកិត្តិព្រឹទ្ធបណ្ឌិតជូនដល់យោធភូមិភាគទី១ និងកងពលធំលេខ៣ ប្រចាំទិសខេត្តព្រះវិហាររួចមក លោកអ្នកឧកញ៉ាបណ្ឌិត ទ្រី ភាព បេសកជនពិសេសសម្ដេចតេជោ ហ៊ុន សែន ប្រធានព្រឹទ្ធសភា និងជាអគ្គនាយកក្រុមហ៊ុន ទ្រី ភាព គ្រុប និងលោកជំទាវ អ្នកឧកញ៉ា គៀន ស្រីនាង ព្រមទាំងបុត្រា-បុត្រី បានមានសទ្ធាជ្រះថ្លាក្នុងព្រះពុទ្ធសាសនា ប្រគេនទានព្រះវស្សា ទេយ្យទាន ក៏ដូចជាបច្ច័យ ជូនព្រះសង្ឃគង់ចាំព្រះវស្សាចំនួន ២៩វត្ត (ស្រុកប្រាសាទបល្ល័ង្កចំនួន ២៧វត្ត, ស្រុករវៀងចំនួន ១វត្ត និងស្រុកជាំក្សាន្តចំនួន ១វត្ត)។ បច្ច័យ និងទេយ្យទានដ៏ថ្លៃថ្លារបស់លោកអ្នកឧកញ៉ា បណ្ឌិត និងលោកជំទាវ អ្នកឧកញ៉ា សម្រាប់ក្នុង ១វត្ត រួមមាន៖ បច្ច័យទ្រទ្រង់ចង្ហាន់ព្រះសង្ឃក្នុងវត្ត, បច្ច័យបួន, សាដក, ទៀនព្រះវស្សា, អង្ករផ្ការំដួល, ទឹកដោះគោខាប់, ត្រីខកំប៉ុង, ផ្លែឈើ និងទឹកត្រចៀកកាំ ព្រមទាំងទេយ្យទានជាច្រើនមុខទៀត។ ក្នុងនោះដែរ លោកអាចារ្យ ២៩ នាក់ ដែលអញ្ជើញមកពីតាមវត្តនីមួយៗ ក្នុងម្នាក់ៗទទួលបានថវិកា ២០០.០០០ រៀល។បន្ថែមលើវត្តទាំង ២៩ ខាងលើ កាលពីថ្ងៃទី១៣ ខែកក្កដា កន្លងទៅនេះ លោកអ្នកឧកញ៉ា បណ្ឌិត និង លោកជំទាវ អ្នកឧកញ៉ា ក៏បានរៀបចំបច្ច័យ និងទេយ្យទានសម្រាប់ព្រះសង្ឃចំនួន ៤វត្ត ស្ថិតនៅក្នុងស្រុកកណ្ដាល ខេត្តកណ្ដាលផងដែរ។សូមបញ្ជាក់ជូនផងដែរថា សរុបការចំណាយលើបច្ច័យ ទេយ្យទាន និងចំណាយផ្សេងៗក្នុងពិធីប្រគេនទានព្រះវស្សានេះ អស់ថវិកាប្រមាណ ២០០.០០០.០០០ រៀល។

គណៈកម្មការអន្តរក្រសួងចុះពិនិត្យវាយតម្លៃការងារថែទាំផ្លូវចំនួន៨ខ្សែ ក្នុងខេត្តពោធិ៍សាត់

នៅថ្ងៃទី១៤ ខែកក្កដា ឆ្នាំ២០២៥ ឯកឧត្តម ចាន់ ដារ៉ុង រដ្ឋលេខាធិការ និងជាសមាជិកគណៈកម្មាធិការលទ្ធកម្មក្រសួងអភិវឌ្ឍន៍ជនបទ បានដឹកនាំគណៈកម្មការអន្តរក្រសួង រួមមាន៖ ក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ អមដំណើរដោយថ្នាក់ដឹកនាំ ក្រុមការងារបច្ចេកទេស នាយកដ្ឋានផ្លូវលំជនបទ គណៈកម្មការត្រួតពិនិត្យ និងវាយតម្លៃគុណភាពការងារសាងសង់ ស្តារឡើងវិញ ជួសជុល ថែទាំ និងលើកកម្រិតផ្លូវជនបទ និងសំណង់សិល្បការ្យ (គ.ត.វ) ថា្នក់ដឹកនាំ និងមន្រ្តីជំនាញរបស់មន្ទីរអភិវឌ្ឍន៍ជនបទខេត្តពោធិ៍សាត់់ ចុះពិនិត្យ និងវាយតម្លៃដំណាក់កាលទី១ លើការងារថែទាំផ្លូវជាលក្ខណៈប្រចាំផ្លូវចំនួន ៨ខ្សែ សរុបប្រវែង ៨០ ៦០០ម៉ែត្រ គម្រោងលេខ DRR-RM-2025-No.025 ដោយប្រើប្រាស់ថវិកាជំពូក៦១ អនុវត្តដោយមន្ទីរអភិវឌ្ឍន៍ជនបទខេត្តពោធិ៍សាត់ ក្នុងនោះ៖១. ផ្លូវក្រាលកៅស៊ូ DBST ចំនួន ៤ខ្សែ ប្រវែងសរុប ៤១ ៤០០ម៉ែត្រ ទទឹង ៥ម៉ែត្រ ៥,៥ម៉ែត្រ និង ៦ម៉ែត្រ ស្ថិតនៅត្នោតជុំ ឃុំផ្ទះរុង ឃុំតាលោ ឃុំកណ្តៀង ឃុំស្រែស្តុក ឃុំស្នាមព្រះ និងឃុំត្រពាំងជង ស្រុកក្រគរ ស្រុកតាលោសែនជ័យ ស្រុកកណ្តៀង និងស្រុកបាកាន ខេត្តពោធិ៍សាត់។ ២. ផ្លូវក្រាលល្បាយក្រួស ចំនួន ៤ខ្សែ ប្រវែងសរុបចំនួន ៣៩ ២០០ម៉ែត្រ ទទឹង ៥ម៉ែត្រ ៦ម៉ែត្រ និង៧ម៉ែត្រ ស្ថិតនៅឃុំកណ្តៀង ឃុំកោះជុំ ឃុំអន្លង់វិល ឃុំព្រងិល ឃុំឈើតុំ សង្កាត់បន្ទាយដី និងសង្កាត់ចំរើនផល ស្រុកកណ្តៀង ស្រុកក្រគរ និងស្រុកភ្នំក្រវាញ ខេត្តពោធិ៍សាត់។ បន្ទាប់ពីបានធ្វើការពិនិត្យរួចមក គណៈកម្មការអន្តរក្រសួង បានសម្រេចឯកភាពទទួលយកនូវការថែទាំផ្លូវជាលក្ខណៈប្រចាំខាងលើ ដោយបញ្ចប់ការថែទាំដំណាក់កាលទី១ ជាស្ថាបពរ ។ ជាមួយគ្នានោះ ឯកឧត្តម ចាន់ ដារ៉ុង មានប្រសាសន៍លើកឡើងថា ក្រសួងអភិវឌ្ឍន៍ជនបទ ក្នុងនាមជាសេនាធិការផ្ទាល់របស់រាជរដ្ឋាភិបាលកម្ពុជា បាននឹងកំពុងជំរុញការងារសាងសង់ ស្ដារឡើងវិញ កែលម្អ ពង្រីក ថែទាំ និងជួសជុលផ្លូវជនបទ ដើម្បីបង្កភាពងាយស្រួលក្នុងការធ្វើដំណើររបស់ប្រជាពលរដ្ឋ កាត់បន្ថយពេលវេលា និងកាត់បន្ថយចំណាយ លើការដឹកជញ្ជូនកសិផល និងទំនិញផ្សេងៗនៅជនបទ។ ផ្លូវមានសារៈសំខាន់ណាស់ ផ្លូវ គឺជាសរសៃឈាម ជំរុញ អន្តរកម្មទាំងផ្នែកសេដ្ឋកិច្ច និងសង្គម តាមរយៈការលើកកម្ពស់ជីវភាពរស់នៅ របស់ប្រជាជន និងប្រែក្លាយជនបទឱ្យទៅជាតំបន់ ដែលមានភាពរីកចម្រើន។ទន្ទឹមគ្នានេះ ឯកឧត្តមរដ្ឋលេខាធិការ ក៏បានវាយតម្លៃខ្ពស់ និងបានកោតសរសើរ ដល់មន្ទីរអភិវឌ្ឍន៍ជនបទខេត្តពោធិ៍សាត់ ទាំងថ្នាក់ដឹកនាំមន្ទីរ ក៏ដូចជាមន្រ្តីបច្ចេកទេស ដែលបានយកចិត្តទុកដាក់ ក្នុងកិច្ចការងារស្ថាបនា ដោយរក្សាបាននូវគុណភាពល្អប្រសើរ ដែលជាផ្នែកមួយដ៏សំខាន់ ចូលរួមជាមួយរាជរដ្ឋាភិបាល ក្នុងការចូលរួមរក្សាគុណភាពផ្លូវ៕

ស្នងការរាជធានី ដាក់ចេញនូវគោលការណ៍បង្ការ ទប់ស្កាត់រាល់បទល្មើស និង អនុវត្តប្រកបដោយក្រមសីលធម៌វិជ្ជាជីវៈនគរបាល

ភ្នំពេញ៖ ស្នងការនគរបាលរាជធានីភ្នំពេញបានដាក់គោលការណ៍ដល់កម្លាំងនគរបាលផែនជំនាញពាក់ព័ន្ធទាំងអស់ឲ្យបង្កើនការយកចិត្តទុកដាក់ ទប់ស្កាត់ បង្ការបង្ក្រាបរាល់បទល្មើស និងពង្រឹងត្រួតពិនិត្យចំពោះមន្រ្តីចុះអនុវត្តច្បាប់ធ្វើយ៉ាងណាអនុវត្តឲ្យមានក្រមសីលធម៌វិជ្ជាជីវៈ មិនបង្កប៉ះពាល់កិត្តិយស និងសេចក្តីថ្លៃថ្នូររបស់កងកម្លាំងនគរបាលជាតិ។ជាក់ស្ដែងនាព្រឹកថ្ងៃទី១៤ ខែកក្កដា ឆ្នាំ២០២៥នេះ ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានដឹកនាំកិច្ចប្រជុំ បូកសរុបវាយតម្លៃសភាពការណ៍បទល្មើស និងលទ្ធផលនៃកិច្ចប្រតិបត្តិការបង្រ្កាបបទល្មើស និងរក្សាសណ្តាប់ធ្នាប់សុវត្ថិភាពសង្គម មានការចូលរួមពីលោក-លោកស្រីស្នងការរង លោកអនុប្រធានផែនលោក-លោកស្រីនាយការិយាល័យជំនាញទាំង៣៣ លោកអធិការខណ្ឌទាំង១៤ និងមន្រ្តីពាក់ព័ន្ធ។ឯកឧត្តម ជួន ណារិន្ទ អគ្គស្នងការរងនិងជាស្នងការនគរបាលរាជធានីភ្នំពេញ ក្នុងកិច្ចប្រជុំបានដាក់ចេញនូវគោលការណ៍ដឹកនាំបញ្ជាទៅតាមការិយាល័យជំនាញ និងអធិការដ្ឋាននគរបាលខណ្ឌទាំង១៤ រួមមាន៖បង្កើនការអនុវត្តបង្ការទប់ស្កាត់ និងកាត់បន្ថយបទល្មើសគ្រោះថ្នាក់ចរាចរណ៍ និងពង្រឹងត្រួតពិនិត្យចំពោះមន្រ្តីនគរបាលចរាចរណ៍ចុះអនុវត្តច្បាប់ចរាចរណ៍ផ្លូវគោកអនុវត្តឲ្យបានត្រឹមត្រូវតាមគោលការណ៍ច្បាប់ និងប្រកបដោយក្រមសីលធម៌វិជ្ជាជីវៈជំនាញ ជាពិសេសពង្រឹងកាត់បន្ថយភាពអសកម្មរបស់មន្រ្តីនគរបាលចរាចរណ៍នៅលើដងផ្លូវបង្កប៉ះពាល់កិត្តិយស និងសេចក្តីថ្លៃថ្នូររបស់កងកម្លាំងនគរបាលជាតិ។ ជាពិសេស ត្រូវបង្កើនពង្រឹងអនុវត្តវិធានការស្រាវជ្រាវបង្ការ និងបង្រ្កាបឲ្យមានប្រសិទ្ធភាពចំពោះបទល្មើសអនឡាញខុសច្បាប់ ហើយត្រូវបំពេញភារកិច្ចដោយឆន្ទៈ និងមានការទទួលខុសត្រូវខ្ពស់។ឯកឧត្តមស្នងការ បានសង្កត់ធ្ងន់ថា កងកម្លាំងទាំងអសបង្កើនអនុវត្តតាមវិធានការជំនាញ ស្រាវជ្រាវបង្ការទប់ស្កាត់ និងបទល្មើសព្រហ្មទណ្ឌដែលជាកង្វល់របស់ប្រជាពលរដ្ឋដូចជាបទល្មើសឆក់តាមផ្លូវសាធារណៈ និងបទល្មើសគាស់ផ្ទះយកទ្រព្យសម្បត្តិ និងបន្តយកចិត្តទុកដាក់បង្ការទប់ស្កាត់ និងបង្រ្កាបបទល្មើសគ្រឿងញៀន ដើម្បីចូលរួមអនុវត្តគោលនយោបាយភូមិឃុំ សង្កាត់ មានសុវត្ថិភាព និងបន្តយកចិត្តទុកដាក់គ្រប់គ្រងតាមដានព័ត៌មានលើការងារសន្តិសុខផងដែរ៕ អត្ថបទ៖ កុម្ភៈ

សប្ដាហ៍ទី២៣ នៅផ្លូវថ្មើរជើងចតុមុខ មានការសម្ដែងល្ខោនបាសាក់រឿង «តេជោមាស តេជោយ៉ត» ដែលជារឿងបុរាណរបស់ខ្មែរនាសម័យប្រឆាំងការឈ្លានពានពីសំណាក់ចោរសៀម

ភ្នំពេញ៖ នៅផ្លូវថ្មើរជើងចតុមុខ កាន់តែល្បីល្បាញនៅសប្ដាហ៌ទី២៣នេះ ដោយមានការសម្ដែងល្ខោនបាសាក់រឿង «តេជោមាស តេជោយ៉ត» ធ្វើឱ្យប្រជាពលរដ្ឋយ៉ាងច្រើនកុះករនាំគ្នាទស្សនាទោះបីនៅថ្ងៃអាទិត្យនេះមានភ្លៀងរលឹមយ៉ាងណាក្ដី តែតំណក់ទឹកភ្លៀងមិនបានរារាំងប្រជាពលរដ្ឋដែលទៅលេងកម្សាន្តនៅផ្លូវថ្មើរជើងនោះទេ។នារាត្រីថ្ងៃអាទិត្យទី១៣ ខែកក្កដា ឆ្នាំ២០២៥ ឯកឧត្តម ឃួង ស្រេង អភិបាលរាជធានីភ្នំពេញ និងលោកជំទាវ ជា ស៊ីណា ឃួង ស្រេង ព្រមទាំងប្រជាពលរដ្ឋយ៉ាងច្រើនកុះករ បានអញ្ជើញចូលរួមទស្សនាល្ខោនបាសាក់នៃមន្ទីរវប្បធម៌ និងវិចិត្រសិល្បះរាជធានីភ្នំពេញក្រុមទី១ ដែលដឹកនាំការសម្ដែងដោយលោក អុល សំអាង ហើយបានសម្តែងជារឿង «តេជោមាស តេជោយ៉ត» ដែលជារឿងបុរាណរបស់ខ្មែរ នាសម័យប្រឆាំងការឈ្លានពានពីសំណាក់ចោរសៀម។ រោងល្ខោនរៀបចំនាមាត់ទន្លេក្បែរទីតាំងរូបសំណាក់តេជោមាស តេជោយ៉ត ខាងមុខវត្តឧណ្ណាលោម ដោយនាំគ្នាអង្គុយលើកន្ទេលស្លឹកត្នោតផ្ទាល់ដីមុខរោងល្ខោន ឯកឧត្តមអភិបាលរាជធានីភ្នំពេញ និងលោកជំទាវ ព្រមទាំងក្រុមគ្រួសារបានទស្សនាការសម្តែងល្ខោនបាសាក់ បង្កើតបាននូវភាពសប្បាយរីករាយ និងចូលរួមទស្សនាយ៉ាងជក់ចិត្តនាចុងសប្តាហ៍។នៅក្នុងការសម្តែងរបស់ក្រុមល្ខោនបាសាក់ក្នុងសាច់រឿង «តេជោមាស តេជោយ៉ត» ជាសាច់រឿងមួយឆ្លុះបញ្ចាំងពីភាពប៉ិនប្រសព្វ និងឈ្លាសវៃរបស់ព្រះមហាក្សត្រខ្មែរ និងមេទ័ពដ៏អង់អាចរបស់ខ្មែរនាសម័យនោះ ដែលបានធ្វើឱ្យកម្លាំងទ័ពបច្ចាមិត្តសៀម ដែលចង់ឈ្លានពានគ្រប់គ្រងដែននគរខ្មែរ ត្រូវវិនាសរត់ខ្ចាត់ខ្ចាយ និងកោតខ្លាចអំណាចឥទ្ធិពលព្រះមហាក្សត្រខ្មែរសម័យនោះ ពោលចន្លោះឆ្នាំ១៥៧៥ ដល់១៥៩៣។ ជាក់ស្តែងនៅឆ្នាំ២០២៥នេះទៀតសោត ប្រទេសភូមិផងរបងតែមួយរបស់ខ្មែរដដែលនេះ នៅតែចិញ្ចឹមចិត្តចង់បានទឹកដីរបស់ខ្មែរឥតឈប់ឈរ រហូតចូលមកលប់លួចបាញ់សម្លាប់ទាហានខ្មែរម្នាក់ក្នុងទឹកដីខ្មែរ ដែលហេតុការណ៍នេះ បានបង្ករជាជម្លោះព្រំដែន និងឈានដល់ការបិទច្រកទ្វារព្រំដែន ចាប់តាំងពីថ្ងៃទី២៨ ខែឧសភា ឆ្នាំ២០២៥ រហូតដល់បច្ចុប្បន្ន។នៅក្នុងឈុតឆាក ដែលមេទ័ពអង់អាចរបស់ខ្មែរឈ្មោះ តេជោមាស និង តេជោយ៉ត ដែលជាគ្រូ និងសិស្ស បានបណ្តេញពួកចោរសៀមឈ្លានពានអស់ពីដែននគរខ្មែរ ធ្វើឱ្យប្រជាពលរដ្ឋដែលចូលរួមទស្សនា ស្រែកហ៊ោ និងទះដៃអបអរសាទរយ៉ាងកងរំពង ដែលការណ៍នេះ បានបង្ហាញថា ប្រជាពលរដ្ឋខ្មែរ បានគាំទ្រពេញទំហឹងដល់រាជរដ្ឋាភិបាល ក្រោមការដឹកនាំរបស់សម្តេចតេជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា លើចំណាត់ការទាំងការប្តឹងទៅតុលាការអន្តរជាតិ ICJ និងយន្តការទ្វេភាគី ព្រមទាំងបន្តលើកទឹកចិត្តដល់វីរកងទ័ពជួរមុខ ដែលកំពុងត្រៀម២៤ម៉ោងលើ២៤ម៉ោងក្នុងការការពារបូរណភាពទឹកដីនាព្រំដែនផងដែរ។ការសម្តែងល្ខោនបាសាក់របស់ក្រុមសម្តែងលោក អុល សំអាង នាផ្លូវថ្មើរជើងចតុមុខ ត្រូវបានឧបត្ថម្ភគាំទ្រពីឯកឧត្តម ឃួង ស្រេង អភិបាលរាជធានីភ្នំពេញ ធ្វើយ៉ាងណាឱ្យពលរដ្ឋដែលកម្សាន្តនៅផ្លូវថ្មើរជើងទទួលបានបទពិសោធន៍ថ្មីៗជារៀងរាល់សប្តាហ៍ មិនថាការសម្តែងខ្នាតតូច ឬខ្នាតធំ ជាពិសេសរំលឹកដល់ទឹកចិត្ត និងការស្នេហាជាតិរបស់ថ្នាក់ដឹកនាំនាពេលបច្ចុប្បន្នផងដែរ។សូមបញ្ជាក់ថា ដំណើររឿង «តេជោមាស តេជោយ៉ត» ត្រូវបានកើតឡើងនៅក្នុងសម័យឧដុង្គក្នុងរជ្ជកាលព្រះបាទជ័យចេស្តា (១៥៧៥ ដល់១៥៩៣) គឺពេលដែលប្រទេសខ្មែរ ស្ថិតនៅក្នុងការទន្រ្ទានយាយីពីបរទេស និងទំនាស់ផ្ទៃក្នុងព្រះរាជវាំង និងចង់បង្ហាញពីវីរភាពរបស់បុព្វបុរសខ្មែរ ក្នុងបុព្វហេតុជាតិមាតុភូមិ ក៏ដូចជាព្រះមហាក្សត្រ ក្នុងកិច្ចការពារបូរណភាពទឹកដី។ ក្នុងរឿងល្ខោននោះដែរតួអង្គ តេជោយ៉ត បានប្រើយុទ្ធវិធីអូសប្ញស្សីបញ្ចាស់ចុង ដើម្បីរកខ្មាំងសត្រូវ និងជនបង្កប់ផ្ទៃក្រោយ ប្រើវិធីនេះហើយពួកជន់បង្កប់និងសត្រូវផ្ទៃក្នុងត្រូវបានបង្ក្រាបទើបព្រះរាជាណាចក្រខ្មែរសម័យនោះទទួលបានជ័យជំនះពីការឈ្លានពាន។ តេជោយ៉ត ជាតួអង្គតំណាងឱ្យមេទ័ពខ្មែរ នៅសម័យឧដុង្គ ដែលមានគំនិតស្រឡាញ់ជាតិ លើកតម្កើងជាតិ និងហ៊ានពលីជីវិតដើម្បីជាតិមាតុភូមិ ដែលទង្វើនេះជាគំរូមួយគួរជាទីមោទនៈ និងស្ញប់ស្ញែងក្រៃលែង។លោក ហួត ហៃ អភិបាលរងរាជធានីបានលើកឡើងថា ផ្លូវថ្មើរជើងធ្វើល្អបាន៩៩%ហើយ នៅសល់១%ទៀតអាជ្ញាធរនឹងបន្តធ្វើឱ្យបានល្អប្រសើរថែមទៀត។ ទោះបីយ៉ាងណាការរៀបចំសន្តិសុខសណ្តាប់ធ្នាប់របៀបរៀបរយសាធារណៈនៅលើផ្លូវថ្មើរជើងនៅតែជាចំណុចអាទិភាពដែលត្រូវយកចិត្តទុកដាក់បំផុត ពិសេសការយកចិត្តទុកដាក់ពីឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ៕ អត្ថបទ ៖ ប្រាក់ វ៉ាន់ដា

ពលករខ្មែរត្រឡប់មកពីថៃចំនួនជាងមួយម៉ឺននាក់ទទួលបានឱកាសការងារថ្មីធ្វើ

ភ្នំពេញ៖ តាមរយៈយន្តការចុះផ្សព្វផ្សាយឱកាសការងារដល់ប្រជាពលរដ្ឋ និងពលករដែលទើបមកពីប្រទេសថៃ នៅក្នុងខេត្តចំនួន៧ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានឱ្យដឹងថា គិតក្នុងសប្តាហ៍កន្លងទៅនេះ ពលករខ្មែរដែល ទទួលបានឱកាសការងារថ្មីធ្វើតាមបណ្តារោងចក្រ សហគ្រាស មានចំនួនជាង ១ម៉ឺន ៣ពាន់នាក់។ឯកឧត្តម ស៊ុន មេសា អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ នៅព្រឹកថ្ងៃទី១៤ កក្កដា ឆ្នាំ២០២៥នេះ បានមានប្រសាសន៍ប្រាប់ព័ត៍មាន ប៊ីធីវី ឱ្យដឹងថា ដើម្បីធានាថា ពលករខ្មែរដែលត្រឡប់មកពីប្រទេសថៃវិញមានការងារភ្លាមៗ ក្រសួងការងារ និងបណ្ដុះបណ្ដាលវិជ្ជាជីវៈ ដែលជាសេនាធិការរបស់រាជរដ្ឋាភិបាល រហូតមកដល់ពេលនេះ បានបើកវេទិកានៅតាមបណ្ដាខេត្តធំៗចំនួន៧រួចមកហើយ រួមមាន៖ ព្រៃវែង កំពង់ចាម កំពង់ធំ កំពង់ស្ពឺ កំពង់ឆ្នាំង កណ្តាល និងបាត់ដំបង ដោយផ្ដល់ឱកាសការងាររាប់ម៉ឺនកន្លែង។ ហើយនៅពេលនេះ ថ្នាក់ដឹកនាំក្រសួង ក៏បានកំពុងបន្តបន្ថែមទៀតលើការទទួលបានឱកាសការងារដែលផ្សព្វផ្សាយតាមច្រកព្រំដែន និងការប្រឹក្សាផ្សេងៗជាច្រើនថែមទៀតជូនដល់ពលរដ្ឋ និងពលករ។ឯកឧត្តមអ្នកនាំពាក្យ បានគូសបញ្ជាក់ថា ឱកាសការងារនៅកម្ពុជាបច្ចុប្បន្ន កំពុងមានតម្រូវការកម្លាំងពលកម្មជាច្រើនកន្លែង ហើយក្នុងនោះវិស័យឧស្សាហកម្មក៏មានច្រើនជាងគេ និងមានប្រាក់សោធនដែលប្រទេសថៃពុំមានផ្តល់ជូន ដូច្នេះបងប្អូនដែលបានត្រឡប់មកដល់ស្រុកកំណើតដើមវិញ សូមជ្រើសរើសការងារតាមចំណង់ចំណូលចិត្ត ជ្រើសរើសកន្លែងណាដែលនៅជិតផ្ទះ និងកន្លែងដែលបងប្អូនប៉ងប្រាថ្នា។ ចំណែកអ្នកដែលមិនទាន់ត្រឡប់មកពីថៃ ឯកឧត្តម បានអំពាវនាវឱ្យវិលមកកាន់កម្ពុជាវិញ ពីព្រោះឱកាសការងារនៅកម្ពុជាគឺសំបូរ ហើយក៏ជាពេលដែលយើងមកចូលរួមក្នុងការកសាងសេដ្ឋកិច្ចជាតិវិញទាំងអស់គ្នា ខណៈប្រាក់ឈ្នួល រវាងប្រទេសកម្ពុជា និងថៃ ខុសគ្នាបន្តិចបន្តួចតែប៉ុណ្ណោះ ប៉ុន្តែបើបងប្អូនងាកមកធ្វើការងារនៅក្នុងស្រុកកំណើត ឬនៅជិតផ្ទះ បងប្អូននឹងសន្សំបានប្រាក់ច្រើនជាងក៏ថាបាន។យោងតាមក្រសួងការងារ និងបណ្ដុះបណ្ដាលវិជ្ជាជីវៈ កម្ពុជាមានការងារចម្រុះសម្រាប់ពលករចំនួនជាង ២៥ម៉ឺននាក់។ ក្នុងនោះ មានផ្នែកឧស្សាហកម្មប្រមាណ ២២ម៉ឺនជាងកន្លែង ផ្នែកកសិកម្មប្រមាណ ២ម៉ឺនជាងកន្លែង និងផ្នែកសេវាកម្មមានប្រមាណ ៥ពាន់ជាងកន្លែង។ ក្រសួងការងារ បានបញ្ជាក់បន្ថែមទៀតថា ប្រសិនបើប្រជាពលរដ្ឋ ក៏ដូចជាពលករខ្មែរ មិនទាន់ទទួលបានព័ត៌មានអំពីការស្វែងរកការងារ គឺអាចទាក់ទងមកកាន់លេខទូរស័ព្ទ ១២៩៧ បានដោយឥតគិតថ្លៃ៕ អត្ថបទ៖ ឈិត បូរ៉ាវី

កម្ពុជាចាត់ទុកសេដ្ឋកិច្ចឌីជីថល ជាប្រភពនៃកំណើនថ្មីពន្លឿនដល់ការអភិវឌ្ឍសេដ្ឋកិច្ច

ប៉េកាំង៖ រាជរដ្ឋាភិបាលកម្ពុជា ចាត់ទុកសេដ្ឋកិច្ចឌីជីថល ជាប្រភពនៃកំណើនថ្មីដ៏មានសក្តានុពល ដែលឆ្លុះបញ្ជាំងអំពីការតាំងចិត្តខ្ពស់ ក្នុងការលើកកម្ពស់ការធ្វើឌីជីថលូបនីយកម្ម ឆ្ពោះទៅពន្លឿនការអភិវឌ្ឍក្នុងស្រុក និងការធ្វើសមាហរណកម្មក្នុងតំបន់។ឯកឧត្ដម ហ៊ាង សុទ្ធាយុត្តិ អគ្គលេខាធិការរង នៃអគ្គលេខាធិការដ្ឋានក្រុមប្រឹក្សាអភិវឌ្ឍន៍កម្ពុជា នៅចុងសប្តាហ៍កន្លងមកនេះ បានអញ្ជើញចូលរួមវេទិកាសេដ្ឋកិច្ចឌីជីថ២០២៥ និងទស្សនកិច្ចសិក្សា នៅទីក្រុងធានជីង ប្រទេសចិន ដោយការរៀបចំវេទិកានេះ ឡើង គឺដើម្បីឱ្យតំណាងក្រសួង-ស្ថាប័នមកពីប្រទេសជាសមាជិក-សមាជិកអង្កេតការណ៍ និងដៃគូសន្ទនាពាក់ព័ន្ធ ចូលរួមទស្សនកិច្ច សិក្សាបច្ចេកវិទ្យាទំនើបថ្មីៗ និងពិគ្រោះយោបល់ជុំវិញបទពិសោធន៍ និងកិច្ចសហប្រតិបត្តិការលើអន្តរកម្ម តភ្ជាប់ហេដ្ឋារចនាសម្ព័ន្ធ វិភាគសំយោគ និងចែករំលែកទិន្នន័យ ការប្រើប្រាស់បញ្ញាសិប្បនិម្មិត បច្ចេកវិទ្យាសម្រាប់ទីក្រុងឆ្លាតវៃ និងកម្មវិធីបច្ចេកវិទ្យានវានុវត្ត ផ្សេងៗ។ឯកឧត្តមអគ្គលេខាធិការរង បានរម្លឹកអំពីវេទិកាខ្សែក្រវ៉ាត់ឮនិងផ្លូវ ដឹកនាំដោយឯកឧត្តម ប្រធានាធិបតីចិន កាលពីឆ្នាំ ២០២៣ ដោយក្នុងនោះសម្តេចមហាបវរធីបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានសង្កត់ធ្ងន់ថា សេដ្ឋកិច្ច ឌីជីថលជាប្រភពនៃកំណើនថ្មី ដ៏មានសក្តានុពល ដែលឆ្លុះបញ្ជាំងអំពីការតាំងចិត្តខ្ពស់ ក្នុងការលើកកម្ពស់ការធ្វើ ឌីជីថលូបនីយកម្ម ឆ្ពោះទៅពន្លឿនការអភិវឌ្ឍក្នុងស្រុក និងការធ្វើសមាហរណកម្មក្នុងតំបន់។ ឯកឧត្តមអគ្គលេខាធិការរង ក៏បានជម្រាបជូនដោយសង្ខេបពីសមិទ្ធផល និងកិច្ចខិតខំប្រឹងប្រែងកំពុងបន្តរបស់រាជរដ្ឋាភិបាល កម្ពុជា លើការជំរុញការធ្វើទំនើបកម្មស្ថាប័ន និងការវិនិយោគ លើការកសាងហេដ្ឋារចនាសម្ព័ន្ធឌីជីថល ព្រមទាំងការកំណត់ចក្ខុវិស័យ ទិសដៅ និងផែនការសកម្មភាពដ៏រឹងមាំរបស់កម្ពុជា តាមរយៈយុទ្ធសាស្ត្របញ្ចកោណ-ដំណាក់កាលទី១ ក្របខណ្ឌគោលនយោបាយ សេដ្ឋកិច្ច និងសង្គមឌីជីថល២០២១-២០៣៥ និងបានគូសរំលេច នូវការរៀបចំដាក់ឱ្យដំណើការប្រព័ន្ធបច្ចេកវិទ្យាឌីជីថលសំខាន់ៗ របស់កម្ពុជារួមមាន ប្រព័ន្ធគ្រប់គ្រង គម្រោងវិនិយោគកម្ពុជា cdcIPM និងថ្នាលផ្លាស់ប្តូរទិន្នន័យកម្ពុជា CamDX ជាដើម។សូមបញ្ជាក់ថា នៅក្នុងវេទិកាសេដ្ឋកិច្ចឌីជីថ២០២៥ បានលើកឡើងនូវប្រធានបទសំខាន់ៗរួមមាន៖ ប្រព័ន្ធស្ថាប័នគោលសម្រាប់គ្រប់ គ្រងធាតុទិន្នន័យ, នវានុវត្តន៍នៃកិច្ចសហប្រតិបត្តិការក្នុងវិស័យហេដ្ឋារចនាសម្ព័ន្ធទិន្នន័យ, បរិវត្តកម្មឌីជីថលសម្រាប់ទីក្រុង និងឧស្សា- ហកម្ម, ការអភិវឌ្ឍ និងអភិបាលកិច្ចបញ្ញាសិប្បនិម្មិត, និងបទពិសោធនៃការអភិវឌ្ឍសេដ្ឋកិច្ចឌីជីថលនៅប្រទេសចិន៕ អត្ថបទ៖ សុន រ៉ាឌី

ការផ្គត់ផ្គង់រ៉ែសំណង់គ្រប់ប្រភេទនៅកម្ពុជា បានឆ្លើយតបតម្រូវការទីផ្សារក្នុងស្រុកបានគ្រប់គ្រាន់

ការផ្គត់ផ្គង់រ៉ែសំណង់គ្រប់ប្រភេទនៅកម្ពុជា បាននិងកំពុងឆ្លើយតប និងតម្រូវការទីផ្សារក្នុងស្រុកបានគ្រប់គ្រាន់ ជាពិសេសការផ្គត់ផ្គង់ ស៊ីម៉ង់ត៍ ខណៈកម្ពុជាមានរោងចក្រកំពុងដំណើរការ និងការបង្កើតថ្មីៗបន្ថែមទៀត ដែលនឹងអាចធ្វើឱ្យកម្ពុជានាំពេញវិស័យនាពេលអនាគត់។ឯកឧត្តម យស់ មុនីរ៉ាត់ រដ្ឋលេខាធិការក្រសួងរ៉ែ និងថាមពល លើកឡើងនៅក្នុងការអញ្ជើញជាវាគ្មិន ស្តីពីធនធានរ៉ែ ការកែច្នៃ និងការផ្គត់ផ្គង់រ៉ែគ្រប់ប្រភេទនៅលើទីផ្សារ នេះថា ជុំវិញធនធានរ៉ែនេះ, ក្រសួងរ៉ែ និងថាមពល បានបង្កើតនូវគោលនយោបាយធនធានរ៉ែ ឆ្នាំ២០១៨-២០២៨ ដោយគោលនយោបាយនោះ បានជំរុញឱ្យមានការប្រើប្រាស់វត្ថុធាតុដើម ដែលមាននៅក្នុងស្រុកឱ្យអស់លទ្ធភាព ដើម្បីជំនួសការនាំចូល ក្នុងនោះក្រៅពីថ្មអារ កម្ពុជានូវមានរ៉ែសំណង់ជាច្រើនប្រភេទដូចជា ខ្សាច់សំណង់ ថ្មសំណង់ និងស៊ីម៉ង់ត៍ជាដើម ដែលជាឆ្អឹងខ្នងយ៉ាងសំខាន់ ទ្រទ្រង់ដល់ការអភិវឌ្ឍនៃប្រទេសជាតិយើង តាមរយៈការអភិវឌ្ឍហេដ្ឋារចនាសម្ព័ន្ធជារូបវ័ន្ត និងបម្រើសេចក្តី ត្រូវការផ្សេងៗនៅក្នុងទីផ្សារទូទៅ។ចំណែកវិស័យស៊ីម៉ងត៍, ឯកឧត្តម លើកឡើងឱ្យដឹងថា បច្ចុប្បន្នកម្ពុជាមានរោងចក្រស៊ីម៉ង់ត៍កំពុងដំណើរការចំនួន ៥ កន្លែង ដែល អាចផលិតស៊ីម៉ង់ត៍បានចំនួនពី ៩ ទៅ ១០ លានតោន ក្នុងមួយឆ្នាំ ហើយថ្មីៗនេះកម្ពុជាទទួលរោងចក្រស៊ីម៉ង់ត៍បង្កើតថ្មីមួយកន្លែងទៀត នៅក្នុងស្រុកឱរ៉ាល់ ខេត្តកំពង់ស្ពឺ។ នាពេលកន្លងមកនេះដែរ ក្រសួងរ៉ែ និងថាមពល បានផ្តល់អាជ្ញាបណ្ណបង្កើតរោងចក្រផលិតស៊ីម៉ង់មួយ កន្លែងទៀត នៅក្នុងខេត្តក្រចេះ ដែលរោងចក្រនោះមានសមត្ថភាពផលិតក្នុងរង្វង់ ២លានតោនក្នុងមួយឆ្នាំ។ ជាសរុប, បន្ទាប់ពីរោងចក្រ ថ្មីៗនេះដាក់ឱ្យដំណើរការ ផលិតផលស៊ីម៉ង់នៅកម្ពុជានឹងមានកំណើនកើនឡើងបន្ថែមទៀត អាចឆ្លើយតបដល់ការនាំចេញផងដែរ។ទាក់ទងការផ្គត់ផ្គង់វិញ, ឯកឧត្តម យស់ មុនីរ៉ាត់ បន្ថែមឱ្យដឹងថា ជុំវិញវិស័យស៊ីម៉ង់ត៍ ថ្មីៗនេះសមាគមឧស្សាហកម្មស៊ីម៉ង់ត៍កម្ពុជា បានស្នើមកក្រសួងរ៉ែ និងថាមពល ហើយនិងដាក់ទៅជូនរាជរដ្ឋាភិបាល អំពីការធ្លាក់ចុះផលិតកម្មស៊ីម៉ង់ត៍ ក្នុងគោលបំណងដើម្បីជួយទប់ ស្កាត់ការនាំស៊ីម៉ង់ត៍នាំចូលពីក្រៅប្រទេស និងការផ្អាកផ្តល់អាជ្ញារបណ្ណដល់រោងចក្រស៊ីម៉ង់ត៍ថ្មីៗបន្ថែមទៀត ដើម្បីផ្តល់ឱកាសដល់កិច្ច ដំណើររោងចក្រក្នុងស្រុក ផលិតនិងផ្គត់ផ្គង់ឆ្លើយតបទៅនិងតម្រូវការទីផ្សារក្នុងស្រុកជាក់ស្តែង៕ អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

[BREAKING NEWS] ក្រុមប្រឹក្សាសន្តិសុខអង្គការសហប្រជាជាតិ នឹងជួបគ្នានៅថ្ងៃសុក្រនេះ ស្ដីពីការប៉ះទង្គិចគ្នារវាងថៃនិងកម្ពុជា

ទេសរដ្ឋមន្រ្តី គន់ គីម ចុះសួរសុខទុក្ខ និងរៀបចំបញ្ជូនអំណោយជូនជនភៀសសឹកក្នុងខេត្តឧត្តរមានជ័យ

កុមារខ្វះអាហារូបត្ថម្ភទទួលការព្យាបាលនៅមន្ទីរពេទ្យហ្កាហ្សា ខណៈវិបត្តិអត់ឃ្លានកាន់តែអាក្រក់ខ្លាំង

ហ៊្សកដានី បញ្ជូនជំនួយចូលទៅកាន់តំបន់ហ្កាហ្សា ស្របពេលដែលភាពអត់ឃ្លានកាន់តែអាក្រក់ខ្លាំង

រថយន្តក្រុងធ្វើដំណើរទៅកាន់ទីក្រុង Sweida ប្រទេសស៊ីរី ដើម្បីជម្លៀសជនស៊ីវិល

ថៃបាននឹងកំពុងប្រព្រឹត្តឧក្រិដ្ឋកម្មធ្ងន់ធ្ងរប្រឆាំងនឹងបេតិកភណ្ឌពិភពលោក និងរំលោភបំពានច្បាប់អន្តរជាតិ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877