BTV NEWS

អនុប្រធានទី១ នៃរដ្ឋសភាបង្ហាញពីភាពជោគជ័យនៃនយោបាយសន្តិវិធី និងការការពារបូរណភាពទឹកដីជូនប្រជាពលរដ្ឋ

នាយឧត្តមសេនីយ៍ ឥត សារ៉ាត់ អញ្ជើញចុះសួរសុខទុក្ខដល់យោធិនដែលកំពុងបំពេញបេសកកម្ម និងកំពុងសម្រាកព្យាបាលជំងឺ នៅសមរភូមិមុខតាមបណ្តោយព្រំដែនកម្ពុជា-ថៃ

អនុប្រធានក្រុមការងាររាជរដ្ឋាភិបាលចុះមូលដ្ឋានអញ្ជេីញសំណេះសំណាល និងបំពាក់គ្រឿងឥស្សរិយយសជូនមន្រ្តីរាជការចំនួន១៤៨ រូប នៃរដ្ឋបាលស្រុកកណ្ដាលស្ទឹង ខេត្តកណ្ដាល

ឯកឧត្តម ចាយ បូរិន អញ្ជើញចុះសួរសុខទុក្ខនិងនាំយកអំណោយដ៏ថ្លៃថ្លារបស់ សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជូនឯកឧត្តម សួស កាណាន នៅគេហដ្ឋាន

ព័ត៌មានជាតិ

មហោស្រពភាពយន្តអន្តរជាតិកម្ពុជាឆ្នាំនេះមានភាពយន្តចាក់បញ្ចាំងចំនួន ១៥០រឿងមកពី ៤០ប្រទេស ក្នុងនោះភាពយន្តខ្មែរ ៦០រឿង

មហោស្រពភាពយន្តអន្តរជាតិកម្ពុជា លើកទី១៥ (CIFF) បានត្រឡប់មកវិញនៅថ្ងៃទី២៤ ដល់ទី២៩ ខែមីនា ឆ្នាំ២០២៦ ដែលបញ្ជាក់ជាថ្មីពីកិត្យានុភាពរបស់ខ្លួន ក្នុងនាមជាព្រឹត្តិការណ៍វប្បធម៌ និងភាពយន្តអន្តរជាតិដ៏ធំបំផុតប្រចាំកម្ពុជា។ កម្មវិធីឆ្នាំនេះប្រមូលផ្តុំភាពយន្តចំនួន ១៥០រឿង មកពី៤០ប្រទេស ក្នុងនោះមានភាពយន្តកម្ពុជាប្រមាណ ៦០រឿង ជាមួយនឹងកម្មវិធីដ៏សំបូរបែប ដែលមានទាំងភាពយន្តប្រឌិត ភាពយន្តឯកសារ ភាពយន្តខ្លី គំនូរជីវចល និងព្រឹត្តិការណ៍ពិសេសៗជាច្រើន។ក្នុងរយៈពេល ៦ថ្ងៃនេះ CIFF នឹងផ្តល់ជូនការចាក់បញ្ចាំងភាពយន្ត និងព្រឹត្តិការណ៍ជាង ១៥០ ដោយឥតគិតថ្លៃ នៅតាមទីតាំងសំខាន់ៗក្នុងរាជធានីភ្នំពេញ រួមមានៈ រោងភាពយន្ត Legend Cinema Olympia, រោងភាពយន្ត Legend Exchange Square, រោងភាពយន្ត Fable Cinema, វិទ្យាស្ថានបារាំង (Institut français du Cambodge), មជ្ឈមណ្ឌលបុប្ផាណា, Rosewood Phnom Penh, រោងភាពយន្ត Sabay Cinema (ផ្សារទំនើប អ៊ីអនទី១) ព្រមទាំងការចាក់បញ្ចាំងនៅទីវាល (open-air) នៅ Walking Street មាត់ទន្លេ និងកម្មវិធី «ពិធីបុណ្យជនជាតិដើមភាគតិច៖ ទឹក ដី ព្រៃឈើ» នៅសាកលវិទ្យាល័យភូមិន្ទភ្នំពេញ (RUPP) ផងដែរ។ក្នុងឱកាសបើកមហោស្រពភាពយន្តអន្តរជាតិកម្ពុជា លើកទី១៥នេះ លោកជំទាវបណ្ឌិតសភាចារ្យ ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ បានថ្លែងថា តាមរយៈកិច្ចប្រឹងប្រែងគាំទ្ររបស់ក្រសួងវប្បធម៌ និងវិចិត្រសិល្បៈ ព្រមទាំងការចូលរួមសហការពីដៃគូពាក់ព័ន្ធនានា ឆ្នាំនេះ គឺជាឆ្នាំទី១៥ ដែលមហោស្រពភាពយន្តអន្តរជាតិកម្ពុជា បានរៀបចំឡើង ហើយបានក្លាយជាព្រឹត្តិការណ៍ភាពយន្ត ដ៏ធំបំផុតក្នុងប្រទេស និងតំបន់អាស៊ាន ដែលមានភាពយន្តប្រមាណ១៥០ចំណងជើង មកពី៤០ប្រទេស ក្នុងនោះភាពយន្តកម្ពុជា ចំនួន ៦០ចំណងជើង នឹងធ្វើការចាក់បញ្ចាំងរយៈពេល០៦ថ្ងៃ នៅលើផ្ទាំងសំពត់ស នៃរោងភាពយន្តជាច្រើនក្នុងរាជធានីភ្នំពេញ ដើម្បជូនសាធារណជនទស្សនាដោយសេរី។ ក្នុងឱកាសដ៏ថ្លៃថ្លានេះ លោកជំទាវរដ្ឋមន្ត្រី ក៏សូមស្វាគមន៍លោកជំទាវអ្នកឧកញ៉ា ម៉ៅ ចំណាន គិតម៉េង ប្រធានសមាគមសិល្បករកម្ពុជា ដែលត្រូវបានតែងតាំងធ្វើជាអភិបាលកិត្តិយស នៃមហោស្រពភាពយន្តអន្តរជាតិកម្ពុជានាឆ្នាំនេះ ដែលបានគំាទ្រយ៉ាងមោះមុតសំដៅជំរុញលើកកម្ពស់ការយល់ដឹង និងសារសំខាន់នៃឧស្សាហកម្មភាពយន្ត ដើម្បីរួមចំណែកដល់ការអភិវឌ្ឍ និងការផ្សព្វផ្សាយសិល្បៈវប្បធម៌ជាតិ ព្រមទាំងរួមចំណែកជំរុញការអភិវឌ្ឍសេដ្ឋកិច្ចជាតិ ប្រកបដោយនិរន្តរភាព។ ការរៀបចំកម្មវិធី «មហោស្រពភាពយន្តអន្តរជាតិកម្ពុជា» នាពេលនេះ មិនត្រឹមតែជាសកម្មភាពនៃការជួបជុំផលិតករ សិល្បករ ក្នុងរង្វង់នៃឧស្សាកម្មភាពយន្តប៉ុណ្ណោះទេ ប៉ុន្តែក៏ជាការរួមចំណែកយ៉ាងសំខាន់បន្ថែមទៀត ក្នុងការពូនជ្រុំនូវចំណងមិត្តភាព និងជាសក្ខីភាពនៃការបង្កើតភាពជាដៃគូយូរអង្វែង ការគោរពគ្នាទៅវិញទៅមកក្នុងចំណោមប្រជាជាតិនានា ព្រមទាំងបានរួមចំណែកក្នុងការលើកកម្ពស់កិច្ចសន្ទនាវប្បធម៌ និងបង្កើនទំនាក់ទំនងរវាងប្រជាជន និងប្រជាជនផងដែរ។ ជាមួយនេះមហោស្រពភាពយន្តអន្តរជាតិកម្ពុជា ក៏បានដើរតួនាទីសំខាន់ក្នុងការលើកកម្ពស់ ការទាក់ទាញទេសចរណ៍វប្បធម៌ និងការប្រាស្រ័យទាក់ទងគ្នា ជាលក្ខណៈអន្តរជាតិផងដែរ។ ជាក់ស្តែង ជារៀងរាល់ឆ្នាំមហោស្រពនេះ បានទាក់ទាញផលិតករភាពយន្តបរទេស តារាសម្តែង និងភ្ញៀវអន្តរជាតិជាច្រើន មកចូលរួមក្នុងព្រឹត្តិការណ៍នេះផង និងមកស្នាក់នៅផង ដើម្បីស្វែងយល់អំពីសិល្បៈវប្បធម៌ ប្រវត្តិសាស្រ្ត និងទទួលយកនូវបទពិសោធន៍នៃការធ្វើបដិសណ្ឋារកិច្ច និងស្នាមញញឹមរបស់ប្រជាជនកម្ពុជាផងដែរ។លោកជំទាវបណ្ឌិតសភាចារ្យ ភឿង សកុណា សូមចាត់ទុកថា សកម្មភាពដែលរៀបចំនាពេលនេះ គឺជាព្រឹត្តការណ៍ដ៏សំខាន់ ក្នុងការលើកកម្ពស់ចំណងមិត្តភាព និងកិច្ចសហប្រតិបត្តិការលើវិស័យវប្បធម៌រវាងប្រទេសកម្ពុជា និងបណ្តាប្រទេសក្នុងតំបន់ ជាពិសេសលើវិស័យភាពយន្ត និងជាការផ្តល់ឱកាសសម្រាប់អ្នកដឹកនាំរឿង ផលិតករ សិល្បករ-សិល្បការិនី និងអ្នកដែលមានអាជីពក្នុងវិស័យភាពយន្តបានជួបជុំគ្នា ចែករំលែកចំណេះដឹង បទពិសោធន៍ពីគ្នាទៅវិញទៅមក និងស្វែងរកឱកាសវិនិយោគថ្មីៗបន្ថែមទៀត ដើម្បីរួមចំណែកដល់ការអភិវឌ្ឍឧស្សាហកម្មភាពយន្ត៕ អត្ថបទ រដ្ឋា

ស៊ីម៉ាក់ និង NPA ធ្វើសិក្ខាសាលាស្តីពី «គ្រាប់បែកចង្កោមប្រភេទថ្មី CMR M-Series» ដើម្បីផ្លាស់ប្តូរបទពិសោធន៍ ខណៈរបាយការណ៍បឋមបង្ហាញថាក្នុងសង្គ្រាមឈ្លានពានថៃបានប្រើគ្រាប់នេះប្រមាណ១៣ម៉ឺនគ្រាប់ស្មើនឹងកូនគ្រាប់បែកចង្កោមពី៦លានទៅ៧លានគ្រាប់

នៅព្រឹកថ្ងៃ ទី២៥ ខែមីនា ឆ្នាំ២០២៦ នៅសាលសន្និសិទសារមន្ទីរតេជោសន្តិភាព ខេត្តសៀមរាប ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយក CMAC និងលោក Hans Peter Risser ប្រធានអង្គការ ជំនួយនៃប្រជាពលរដ្ឋន័រវេស្សន៍ (NPA) ប្រចាំកម្ពុជា បានចូលរួមធ្វើជាអធិបតីក្នុងពិធីបើកសិក្ខាសាលាស្តីពី " គ្រាប់បែកចង្កោមប្រភេទថ្មី CMR M-Series" សិក្ខាសាលានេះប្រព្រឹត្តទៅរយៈពេល២ថ្ងៃ ចាប់ពីថ្ងៃទី២៥-២៦ ខែមីនា ឆ្នាំ២០២៦។ អ្នកចូលរួមក្នុងសិក្ខាសាលានេះ មានមន្រ្តីជំនាញអង្គភាព CMAC ចំនួន២៨រូប និងអង្គការដៃគូអន្តរជាតិសំខាន់ៗរួមមាន៖ អង្គការNPA, អង្គការGolden West និងអង្គការAPOPO ជាដើម។ អង្គភាព CMAC និងអង្គការ NPA បានសហការគ្នារៀបចំសិក្ខាសាលានេះឡើង ដើម្បីផ្លាស់ប្តូរបទពិសោធន៍លើការងារបច្ចេកទេសគ្រាប់បែកចង្កោមប្រភេទស៊េរី M ដែលរងផលប៉ៈពាល់ដោយសារសង្គ្រាមសៀមឈ្លានពាន។ គ្រាប់បែកចង្កោមដែលទាហ៊ានសៀមបានប្រើប្រាស់បាញ់មកលើបូរណភាពទឹកដីកម្ពុជាមាន៣ប្រភេទសំខាន់គឺ M42 M46 និងM85 តាមលទ្ធផលស្រាវជ្រាវរបស់ក្រុមជំនាញអង្គភាពCMAC នៅតំបន់រងផលប៉ះពាល់ចំនួន៣៧១ ភូមិនៃខែត្រ៦តាមបណ្តោយព្រំដែនខ្មែរ-សៀម រួមមានខេត្តកោះកុង ពោធិ៍សាត់ បាត់ដំបង បន្ទាយមានជ័យ ឧត្តរមានជ័យ និងខេត្តព្រះវិហារ រួមទាំងខេត្តសៀមរាបផងនោះ កំណត់តំបន់រងផលប៉ះពាល់ដោយគ្រាប់បែកចង្កោមចំនួនប្រមាណ ៣,៦០០ ពហុកោណ (ទីតាំង) មានផ្ទៃដីសរុបប្រមាណ ២,៣៦០ គីឡូម៉ែត្រក្រឡា។ គ្រាប់បែកចង្កោមទាំងនេះបាញ់ផ្លោងមកលើភូមិឋានប្រជាពលរដ្ឋ ដីស្រែចម្ការ សាលារៀន មន្ទីរពេទ្យ តំបន់ស៊ីវិលនិងទីតាំងកងទ័ពជាដើម។ បើផ្អែកតាមលក្ខណៈបច្ចេកទេសនៃការស្រាវជ្រាវកំណត់អត្តសញ្ញាណតំបន់រងផលប៉ះពាល់ដោយសារគ្រាប់បែកចង្កោមប្រភេទស៊េរី M នេះ អាចធ្វើការសន្និដ្ឋានជំហានបឋមថា សៀមអាចប្រើប្រាស់គ្រាប់បែកចង្កោមកាំភ្លើងធំប្រភេទ 155MM មានចំនួនប្រមាណ ១២០,០០០ទៅ ១៣០,០០០គ្រាប់ ដែលមានកូនគ្រាប់បែកចង្កោមប្រមាណពី៦លានទៅ៧លានគ្រាប់។ ការស្រាវជ្រាវមូលដ្ឋានមិនទាន់បញ្ចប់ទាំងស្រុងនៅឡើយទេ។ សូមបញ្ជាក់ថា គ្រាប់បែកចង្កោមប្រភេទស៊េរីM មានប្រើប្រាស់ក្នុងសង្គ្រាមនៅប្រទេសមួយចំនួនដូចជានៅលីបង់ ស៊ីរី អ៊ុយក្រែន និងយេមែនជាដើម។ សូមជម្រាបថា គំនិតផ្តួចផ្តើមនៃការរៀបចំសិក្ខាសាលានេះ បានកើតចេញពីការយល់ឃើញយ៉ាងច្បាស់ថា គ្រាប់បែកចង្កោមប្រភេទនេះ បន្តបង្កហានិភ័យយ៉ាងធ្ងន់ធ្ងរ និងយូរអង្វែង ដល់សុវត្ថិភាព និងជីវភាពរស់នៅរបស់ប្រជាពលរដ្ឋនៅតាមតំបន់រងផលប៉ះពាល់ ហើយអង្គភាពCMACក្នុងនាមសេនាធិការរបស់រាជរដ្ឋាភិបាល នឹងខិតខំបន្តបេសកកម្មមនុស្សធម៌របស់ខ្លួន ដើម្បីធានាថាទឹកដីកម្ពុជាក្លាយជាតំបន់សុវត្ថិភាព ក្តីសង្ឃឹមនិងភាពរុងរឿង។

ម្ចាស់ទីតាំងបានបន្តឹងលក្ខខណ្ឌអនុវត្តចំពោះជនបរទេសដែលមកជួលស្នាក់ ដើម្បីបង្ការបទល្មើស Online Scams

បណ្តាម្ចាស់ទីតាំងជួយ បាននឹងកំពុងបន្តឹងលក្ខខណ្ឌអនុវត្តចំពោះជនបរទេសដែលមកជួលស្នាក់ ដើម្បីបង្ការបទល្មើសនានា ពិសេសបទល្មើស Online Scams ដែលនឹងអាចជូនដំណឹងទៅដល់អាជ្ញាធរមូលដ្ឋានបានទាន់ពេលវេលា។ស្របពេលដែលយុទ្ធនាការបោសសម្អាតឧក្រិដ្ឋកម្មឆបោកតាមប្រព័ន្ធបច្ចេកវិទ្យា (Online Scams) ត្រូវបានកម្លាំងអាជ្ញាធរ និងសមត្ថកិច្ចពាក់ព័ន្ធនៅទូទាំងប្រទេសកំពុងបន្ថែមល្បឿនខ្លាំងដោយមិនមានការដកថយនោះ បណ្តាម្ចាស់ទីតាំងដែលផ្តល់ការជួលស្នាក់នៅពីសំណាក់ជនបរទេស ក៏បានចូលរួមចំណែកសំខាន់ ក្នុងការទប់ស្កាត់ការកើតមានបទល្មើសនេះដែរ តាមរយៈការបន្តឹងការត្រួតពិនិត្យភ្ញៀវរបស់ខ្លួនជាប្រចាំ ។ ពលរដ្ឋជាម្ចាស់ទីតាំងអគារខុនដូរមួយកន្លែង ក្នុងមូលដ្ឋានខណ្ឌចំការមន បានបង្ហាញការពេញចិត្តក្នុងការចូលរួមចំណែកជាមួយរដ្ឋាភិបាល និងអាជ្ញាធរមានសមត្ថកិច្ច ដែលមានគោលដៅ ក្នុងការទប់ស្កាត់ និងបង្ក្រាបបទល្មើសឆបោកតាមប្រព័ន្ធអនឡាញ ដើម្បីធានាបានសន្តិសុខសុវត្ថិភាពល្អក្នុងសង្គមជាតិ ។ លោក ម៉ៅ បូណែត អភិបាលរងខណ្ឌចំការមន បានឲ្យដឹងថា ដោយបន្តអនុវត្តអនុក្រឹត្យលេខ០៣របស់ប្រមុខរាជរដ្ឋាភិបាលកម្ពុជា ពិសេសក្រោមការដឹកនាំបញ្ជាដោយឯកឧត្តម ឃួង ស្រេង អភិបាលរាជធានី និងលោក កៀង ល័ក្ស អភិបាលខណ្ឌចំការមន កម្លាំងគណៈបញ្ជាការឯកភាពរដ្ឋបាលខណ្ឌ នៅតែបន្តការយកចិត្តទុកដាក់ក្នុងការអង្កេតតាមដានជាប់លាប់ជាប្រចាំ នៅតាមទីតាំងស្នាក់នៅប្រមូលផ្តុំទាំងឡាយក្នុងមូលដ្ឋាន ដើម្បីធានា និងទប់ស្កាត់ដាច់ខាតលើការចូលមករស់នៅពីសំណាក់ជនបរទេស ហើយលបលួចប្រព្រឹត្តបទល្មើសនានា ពិសេសឧក្រិដ្ឋកម្មឆបោកអនឡាញតែម្តង ។ គួរបញ្ជាក់ថា ទាក់ទងនឹងយុទ្ធនាការបោសសម្អាតឧក្រិដ្ឋកម្មឆបោកតាមប្រព័ន្ធបច្ចេកវិទ្យានេះដែរ ក្រសួងមហាផ្ទៃ នៃព្រះរាជាណាចក្រកម្ពុជា ដែលជាសេនាធិការសំខាន់របស់រដ្ឋាភិបាល ក៏បានដាក់បន្ទាត់ក្រហមក្នុងការបោសសម្អាតក្នុងដំណាច់ខែមីនា ពោលមុនខែមេសា ឆ្នាំ២០២៦ ដើម្បីលុបបំបាត់បទល្មើសឧក្រិដ្ឋនេះចេញពីកម្ពុជា ក្នុងគោលដៅធានាសន្តិសុខ សុវត្ថិភាព ជូនប្រជាជន និងប្រទេសជាតិ៕ អត្ថបទ ៖ លីហេង

សាលារៀនមួយចំនួនចាប់ផ្ដើមបំផុសឱ្យសិស្សស្គាល់ និងលេងល្បែងប្រជាប្រិយខ្មែរ

ជាការកត់សម្គាល់ តាមបណ្ដាសាលារៀនមួយចំនួន នាពេលនេះ បានចាប់ផ្ដើមបំផុសឱ្យសិស្ស បានស្គាល់ និងលេងល្បែងប្រជាប្រិយខ្មែរ ស្របពេលដែលពិធីបុណ្យចូលឆ្នាំប្រពៃណីជាតិខ្មែរ កាន់តែខិតចូលមកដល់។ ការបំផុសឱ្យសិស្សបានស្គាល់ បានលេងល្បែងប្រជាប្រិយខ្មែរនេះ ជាភាពសំខាន់មួយដែលជាការចូលរួមថែរក្សានូវអ្វីដែលជាវប្បធម៌ប្រពៃណីជាតិ។សាលារៀនមួយចំនួន មិនទាំងអស់នោះទេ បច្ចុប្បន្ននេះ បានបំផុសឱ្យសិស្សចាប់ផ្ដើមលេងល្បែងប្រជាប្រិយខ្មែរនៅម៉ោងសម្រាកសិក្សា។ សាលាខ្លះ ក៏ធ្លាប់បានអនុវត្តសកម្មភាពនេះជាច្រើនឆ្នាំរួចមកហើយ។ ជាក់ស្ដែងសម្រាប់សាលាបឋមសិក្សា អ្នកឧកញ៉ា មហាភក្ដី ហ៊ុន នាង ព្រែកកំពឹស បានបន្តសកម្មភាពនាំឱ្យសិស្សតូចៗរបស់ខ្លួន បានស្គាល់ និងបានលេងល្បែងប្រជាប្រិយជាច្រើនប្រភេទ។ ការបំផុសនេះ គឺមានការដឹកនាំ មានការបង្រៀន ពីរបៀបលេងដោយផ្ទាល់ ពីគ្រូបង្រៀន។លោក ផុន ណាត ជានាយកសាលា លើកឡើងថា សាលារបស់លោក បានដឹកនាំសិស្សលេងល្បែងប្រជាប្រិយខ្មែរនេះ ជាច្រើនឆ្នាំមកហើយ។ លោកថា វាជាភាពចាំបាច់ ដែលត្រូវបង្រៀនឱ្យកុមារបានស្គាល់ ពីអ្វីទៅដែលជាល្បែងប្រជាប្រិយខ្មែរ ដែលដូនតា បានបន្សល់ទុកសម្រាប់អ្នកជំនាន់ក្រោយ។ លោកថា វាពិតជាសំខាន់ ព្រោះកុមារ ជាអ្នកបន្ត ជាអ្នកបន្តថែរក្សា វប្បធម៌ប្រពៃណីជាតដ៏ផូរផង់របស់ខ្មែរ។សម្រាប់សិស្សដែលបានចូលរួមលេងល្បែងប្រជាប្រិយ ម្នាក់ៗបង្ហាញនូវស្នាមញញឹម ស្នាមញញឹមពោពេញដោយភាពសប្បាយរីករាយ។ ពួកគេម្នាក់ៗលើកឡើងពីការសប្បាយចិត្ត ដែលសាលាបានដឹកនាំឱ្យមានការលេងល្បែងប្រជាប្រិយទាំងនេះ។ ពួកគេបានស្វែងយល់កាន់តែច្រើន ពីល្បែងប្រជាប្រិយខ្មែរ។សម្រាប់ឱកាសពិធីបុណ្យចូលឆ្នាំ ប្រពៃណីជាតិខ្មែរខាងមុខនេះ សហភាពសហព័ន្ធយុវជនកម្ពុជា ក៏នឹងមានការរៀបចំព្រឹត្តិការណ៍នគរសង្ក្រាន្តនៅរាជធានីភ្នំពេញ។ រៀបចំ ព្រឹត្តិការណ៍នគរសង្ក្រាន្ត ដែលជាការបន្តដំណើរការសង្គមជាប្រក្រតីភាព និងជាការរក្សាសាមគ្គីភាព និងផ្សាភ្ជាប់ឱ្យប្រជាពលរដ្ឋចូលរួមថែរក្សា នូវអ្វីដែលជាទំនៀមទំលាប់ វប្បធម៌ប្រពៃណីជាតិ៕ អត្ថបទ៖ គឹមហុក

អាណិកជនខ្មែរចាប់ផ្តើមនាំគ្នាមកលេងស្រុកកំណើត ដើម្បីអបអរបុណ្យចូលឆ្នាំថ្មី រួមចំណែកជួយស្ទួយសេដ្ឋកិច្ចជាតិ

នៅអាកាសយានដ្ឋាអន្តរជាតិតេជោ ចាប់ផ្តើមមានភាពមមាញឹកទទួលអ្នកដំណើរអន្តរជាតិ ដែលភាគច្រើនជាអាណិកជនខ្មែររស់នៅក្រៅប្រទេស នាំគ្នាអញ្ជើញមកលេងស្រុកកំណើត ដើម្បីចូលរួមអបអរសាទរបុណ្យចូលឆ្នាំថ្មីប្រពៃណីជាតិខ្មែរ ដែលជិតឈានចូលមកដល់ និងដើម្បីជាចំណែកចូលរួមលើកស្ទួយសេដ្ឋកិច្ចជាតិ គ្រាដែលប្រទេសជាតិកំពុងប្រឈមនឹងការលំបាកនេះ។អាណិកជនខ្មែរមកពីប្រទេសអូស្ត្រាលី អាម៉េរិក អង់គ្លេស ជាដើម ដែលបានចុះចតនៅលើទឹកដីកំណើត នៅថ្ងៃទី២៥ ខែមីនា នេះ បាននិយាយថា រៀងរាល់ឆ្នាំ អំឡុងថ្ងៃបុណ្យចូលឆ្នាំជិតឈានចូលមកដល់ម្តងៗ គឺទាំងអស់គ្នាតែងមានការនឹកអាល័យស្រុកកំណើតជាខ្លាំង ពិសេសនឹកចង់មកជួបជុំយាយតា ឪពុកម្តាយ បងប្អូនមីងមាសាច់ញ្ញាតិ និងចង់នាំគ្នាដើរកម្សាន្តមើលការអភិវឌ្ឍរីកចម្រើនរបស់ប្រទេសជាតិនាពេលបច្ចុប្បន្ន ខណៈពួកគេក៏បានដឹងដែរថា បុណ្យចូលឆ្នាំថ្មីឆ្នាំនេះ ក៏មានការរៀបចំព្រឹត្តិការណ៍កម្សាន្តសប្បាយច្រើនតាមបែបប្រពៃណីខ្មែរនៅតាមរាជធានី ខេត្ត ពិសេសព្រឹត្តិការណ៍នគរសង្ក្រាន្ត រយៈពេល៦ថ្ងៃនៅរាជធានីភ្នំពេញ និងអង្គរសង្ក្រាន្តនៅខេត្តសៀមរាបជាដើម។ឯកឧត្តម ស៊ិន ចាន់សេរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល បានឲ្យដឹងថា ចលនាជំរុញពលរដ្ឋខ្មែរនៅក្រៅប្រទេស នាំគ្នាមកលេងកំណើតនេះ បានជំរុញឲ្យមានកំណើនជើងហោះហើរទ្វទិសចេញចូលកម្ពុជា មានជាមធ្យមប្រមាណជាង១២៨០ជើង ក្នុងមួយសប្តាហ៍ៗ ក្នុងថ្ងៃបុណ្យចូលឆ្នាំថ្មីប្រពៃណីខ្មែរជិតឈានចូលដល់ ខណៈវិស័យអាកាសចរណ៍កំពុងជួបរងការប៉ះពាល់ជាសកលដោយវិបត្តិសង្គ្រាមនៅតំបន់មជ្ឈិមបូព៌ា។ឯកឧត្តម បានបញ្ជាក់ថា ជើងហោះហើរទ្វេទិសចេញចូលកម្ពុជា ក្នុងរយៈពេល២សប្តាហ៍ចុងក្រោយនៅក្នុងខែមីនា ឆ្នាំ២០២៦ សម្រាប់គោលដៅអាកាសយានដ្ឋានអន្តរជាតិតេជោ រាជធានីភ្នំពេញ គឺមានមធ្យមប្រមាណ៨០០ជើងក្នុងមួយសប្តាហ៍ គោលដៅអាកាសយានដ្ឋានអន្តរជាតិសៀមរាបអង្គរទទួលបានជើងហោះហើរទ្វេទិសជាមធ្យមប្រមាណជិត៤០០ជើងក្នុងមួយសប្តាហ៍ និងគោលដៅអាកាសយានដ្ឋានអន្តរជាតិព្រះសីហនុ ទទួលបានជើងហោះហើរទ្វេទិសប្រមាណជាង៨០ជើងក្នុងមួយសប្តាហ៍៕ អត្ថបទ៖ ស៊ុម សុខជា

អនុប្រធានទី១ រដ្ឋសភា ជំរុញនិស្សិតជ័យលាភីអាហារូបករណ៍ MEXT ឱ្យក្លាយជា «ទូតមិត្តភាព» និងជាសសរទ្រូងអភិវឌ្ឍជាតិ

ភ្នំពេញ៖ ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ នៃរដ្ឋសភា តំណាងដ៏ខ្ពង់ខ្ពស់របស់សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា នាព្រឹកថ្ងៃទី២៥ ខែមីនា ឆ្នាំ២០២៦ នេះ បានអនុញ្ញាតឱ្យក្រុមនិស្សិតជ័យលាភីអាហារូបករណ៍រដ្ឋាភិបាលជប៉ុន (MEXT) ចូលជួបសម្តែងការគួរសម និងទទួលអនុសាសន៍ណែនាំ មុននឹងចេញទៅបន្តការសិក្សាសម្រាប់ឆ្នាំសិក្សា ២០២៦-២០២៨។ក្នុងឱកាសនោះ លោក កុល រដ្ឋា តំណាងនិស្សិតជ័យលាភី បានគោរពរាយការណ៍ជូនឯកឧត្តមកិត្តិសេដ្ឋាបណ្ឌិត និងអង្គពិធីអំពីកម្មវិធីសិក្សានៅប្រទេសជប៉ុន ព្រមទាំងបានថ្លែងអំណរគុណយ៉ាងជ្រាលជ្រៅចំពោះថ្នាក់ដឹកនាំរដ្ឋសភា ដែលបានផ្តល់ឱកាសដ៏វិសេសវិសាលឱ្យក្រុមនិស្សិតបានចូលជួបសម្តែងការគួរសម និងទទួលដំបូន្មាន ដើម្បីជាទុនសម្រាប់ជីវិតសិក្សានៅក្រៅប្រទេស។ឯកឧត្តមកិត្តិសេដ្ឋាបណ្ឌិត បាននាំនូវការអបអរសាទរយ៉ាងក្រៃលែងពីសំណាក់ សម្តេចប្រធានរដ្ឋសភា ជូនដល់និស្សិតទាំងអស់ ដោយឯកឧត្តមបានគូសបញ្ជាក់ថា ការទទួលបានអាហារូបករណ៍ដែលមានកិត្យានុភាពនេះ គឺជាសក្ខីភាពនៃសមត្ថភាពពិតប្រាកដរបស់យុវជនខ្មែរ ក្នុងការឈានទៅក្រេបជញ្ជក់ចំណេះដឹងនៅសាកលវិទ្យាល័យល្បីៗកម្រិតអន្តរជាតិ។ឯកឧត្តមអនុប្រធានទី១ រដ្ឋសភា ក៏បានផ្តល់អនុសាសន៍គន្លឹះសំខាន់ៗដល់និស្សិត ឱ្យខិតខំសិក្សារៀនសូត្រ ថែរក្សាសុខភាព និងរក្សាសាមគ្គីភាពរវាងនិស្សិតខ្មែរ និងស្ថាប័នទូតឱ្យបានស្អិតល្មួត។ ពិសេសជាងនេះទៅទៀត ឯកឧត្តមបានជំរុញឱ្យនិស្សិតម្នាក់ៗត្រូវធ្វើខ្លួនជា "អ្នកការទូត" ក្នុងការផ្សព្វផ្សាយពីការពិតនៃសន្តិភាព វប្បធម៌ និងទេសចរណ៍កម្ពុជាទៅកាន់ពិភពលោក។ជាមួយគ្នានេះ ឯកឧត្តមក៏បានរំលេចពីជំហររបស់កម្ពុជាក្នុងការការពារអធិបតេយ្យ និងបូរណភាពទឹកដីតាមផ្លូវច្បាប់ ក្នុងនាមជាប្រទេសស្រឡាញ់សន្តិភាព ដោះស្រាយបញ្ហាដោយសន្តិវិធី។ ជាមួយគ្នានេះផងដែរ ឯកឧត្តមអនុប្រធានទី 1 រដ្ឋសភា បានសម្តែងក្តីសង្ឃឹមថា ក្រោយបញ្ចប់ការសិក្សា និស្សិតទាំងអស់នឹងត្រឡប់មកមាតុភូមិវិញជាមួយរបកគំហើញថ្មីៗ ដើម្បីក្លាយជាសសរទ្រូងដ៏រឹងមាំសម្រាប់នាវាកម្ពុជា ស្របតាមយុទ្ធសាស្ត្របញ្ចកោណរបស់រាជរដ្ឋាភិបាលនីតិកាលទី៧ ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាផងដែរ៕

ក្រុមគ្រួសារអតីតយុទ្ធជនពលី ដែលមានជីវភាពលំបាកខ្វះខាត នៅស្រុកបារាយណ៍ ខេត្តកំពង់ធំ ទទួលបានផ្ទះថ្មី អំណោយសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត

កំពង់ធំ៖ នៅព្រឹកថ្ងៃទី២៥ ខែមីនា ឆ្នាំ២០២៦ ឧត្តមសេនីយ៍ទោ សោម ស៊ុន មេបញ្ជាការ តំបន់ប្រតិបត្តិការសឹករង អនុប្រធានប្រចាំការ និងជាប្រធានលេខាធិការដ្ឋាន នៃគណៈកម្មាធិការសមាគមអតីតយុទ្ធជន និងនិវត្តជនកម្ពុជា ខេត្តកំពង់ធំ តំណាងឯកឧត្ដម នួន ផារ័ត្ន អភិបាលខេត្ត ប្រធានគណៈកម្មាធិការសមាគមអតីតយុទ្ធជន និងនិវត្តជនកម្ពុជា ខេត្តកំពង់ធំ អមដំណើរដោយលោក ជួន សិលាវិត ប្រធានសាខាមូលនិធិជាតិជំនួយសង្គមខេត្ត អនុប្រធាន សមាគមអតីតយុទ្ធជន និងវត្តជនកម្ពុជា ខេត្ត និងលោក ឃន ចាន់ថៃ អភិបាលស្រុក និងជាប្រធានសមាគមអតីតយុទ្ធជន និងនិវត្តជនកម្ពុជា ស្រុកបារាយណ៍ ខេត្តកំពង់ធំ បានបន្តដឹកនាំសហការី ទៅប្រគល់ផ្ទះមួយខ្នងថ្មីទៀត ដែលជាខ្នងផ្ទះទី៤៣ ក្នុងស្រុកបារាយណ៍ អំណោយដ៏ថ្លៃថ្លារបស់សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានសមាគមអតីតយុទ្ធជន និងវត្តជនកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនគ្រួសារអតីតយុទ្ធជនពលី ដែលមានដី តែមានជម្រកស្នាក់នៅមិនសមរម្យ នៅភូមិត្រស់ ឃុំបល្ល័ង្ក ស្រុកបារាយណ៍ ខេត្តកំពង់ធំ។ លោកយាយ មុំ ខន មានអាយុ ៧៨ឆ្នាំ បានរៀបរាប់ថា៖ ប្ដីរបស់លោកយាយឈ្មោះ ឡុង ហ៊ាង ធ្លាប់បានចូលបម្រើការក្នុងជួរនគរបាលនៅអង្គភាព នគរបាលស្រុកបារាយណ៏ ខេត្តកំពង់ធំនៅឆ្នាំ ១៩៨០ មានឋានន្តរសក្ដិ វរសេនីយ៍ត្រី ដោយធ្លាប់បានឆ្លងកាត់ការសហការប្រយុទ្ធជាច្រើនលើកជាមួយកងទ័ព និងកងសេនាជនក្នុងសម័យសង្គ្រាមស៊ីវិល ដេីម្បី ការពារទប់ស្កាត់មិនឲ្យរបបប្រល័យពូជសាសន៍វឹលត្រឡប់មកវិញបាន ហើយត្រូវបានទទួលមរណភាពដោយរោគាពាធនៅឆ្នាំ២០១២។ លោកយាយ មុំ ខន មានជីវភាពលំបាកខ្វះខាត យ៉ាងខ្លាំង ហើយមានជម្រកស្នាក់នៅមិនសមរម្យ ដោយមានសមាជិកគ្រួសារចំនួន ៥នាក់ នៅក្នុងបន្ទុក។ ឧត្តមសេនីយ៍ទោ សោម ស៊ុន បានបញ្ជាក់ថា ផ្ទះថ្មី ដែលទើបសាងសង់រួចនេះ មានទំហំ ៥ម៉ែត្រ គុណនិង ៧ម៉ែត្រ សាងសង់ពីសសរបេតុង ឆ្អឹងដែក ដំបូលប្រក់ស័ង្កសីកិនភ្លី ជញ្ជាំងស្មាតប៊ត រនាបក្រាលក្តារ ដោយមានតសំយ៉ាបផ្ទះបាយទៅក្រោយប្រវែង ៣ម៉ែត្រ ព្រមទាំងមានបង្គន់អនាម័យសម្រាប់ប្រើប្រាស់ផងដែរ ដែលជាអំណោយដ៏ថ្លៃថ្លារបស់សម្ដេចតេជោ ហ៊ុន សែន ប្រធានសមាគមអតីតយុទ្ធជន និងនិវត្តជនកម្ពុជា និងសម្ដេចមហាបវរធិបតី ហ៊ុន ម៉ាណែត តាមរយៈឯកឧត្តមទេសរដ្ឋមន្ត្រី នាយឧត្តម សេនីយ៍កិត្តិសង្គហបណ្ឌិត គន់ គីម អនុប្រធាន និងជាអគ្គលេខាធិការសមាគមអតីតយុទ្ធជន និងនិវត្តជនកម្ពុជា ។នៅក្នុងឱកាសនេះ ឧត្តមសេនីយ៍ទោ សោម ស៊ុន និងលោក ឃន ចាន់ថៃ បាននាំយកនូវស្បៀងអាហារ គ្រឿង ឧបភោគបរិភោគ សម្ភារប្រើប្រាស់ មានមុង ភួយ កន្ទេល ខ្នើយ ចាន ឆ្នាំង និងថវិកាមួយចំនួន ព្រមទាំងសម្ភារប្រើប្រាស់ផ្សេងៗ ដែលជាអំណោយរបស់សម្ដេចមហាបវរធិបតី ហ៊ុន ម៉ាណែត និងលោកជំទាវ ជូនដល់លោកយាយ មុំ ខន សម្រាប់ដោះស្រាយជីវភាពប្រចាំថ្ងៃ និងសម្រាប់ប្រើប្រាស់ក្នុងឱកាសទទួលបានផ្ទះថ្មីនៅពេលនេះ ផងដែរ។លោក ឃន ចាន់ថៃ អភិបាលស្រុក ប្រធានសមាគមអតីតយុទ្ធជនកម្ពុជា ស្រុកបារាយណ៍ តំណាងឲ្យក្រុមគ្រួសារ អតីតយុទ្ធជនពលី បានសូមគោរពថ្លែងអំណរគុណដ៏ជ្រាលជ្រៅជាទីបំផុត ចំពោះសម្ដេចតេជោ ហ៊ុន សែន និងសម្ដេចមហាបវរធិបតី ហ៊ុន ម៉ាណែត ដែលបានផ្ដល់ផ្ទះថ្មីចំនួន ១ខ្នង ទៀត ដែលជាខ្នងផ្ទះទី៤៣ នៅស្រុកបារាយណ៍ និងស្បៀងអាហារ គ្រឿងឧបភោគបរិភោគ សម្ភារប្រើប្រាស់ និងថវិកាមួយចំនួន សម្រាប់ឡើងផ្ទះថ្មី ជូនដល់ក្រុមគ្រួសារគាត់នាពេលនេះ និងសូមគោរពជូនពរសម្ដេច ឯកឧត្តម លោកជំទាវ និងថ្នាក់ដឹកនាំគណៈកម្មាធិការសមាគមអតីតយុទ្ធជន និងនិវត្តជនកម្ពុជា នៅគ្រប់ថ្នាក់ សូមទទួលបាននូវពុទ្ធពរទាំង ៤ប្រការ កុំបីឃ្លៀងឃ្លាតឡើយ៕

អនុព័ន្ធយោធាមីយ៉ាន់ម៉ា បេ្តជ្ញាជំរុញទំនាក់ទំនង និងកិច្ចសហប្រតិបត្តិការរវាងកងទ័ពមីយ៉ាន់ម៉ា-កម្ពុជា ឱ្យកាន់តែមានប្រសិទ្ធភាពខ្ពស់

ភ្នំពេញ៖ នាយការិយាល័យអនុព័ន្ធយោធាមីយ៉ាន់ម៉ាប្រចាំកម្ពុជា ឧត្តមសេនីយ៍ត្រី ស៊រ វន បានបេ្តជ្ញាចិត្តថានឹងបន្តជំរុញទំនាក់ទំនង និងកិច្ចសហប្រតិបត្តិការរវាងកងទ័ពមីយ៉ាន់ម៉ា-កម្ពុជា ឱ្យកាន់តែមានប្រសិទ្ធភាពខ្ពស់ ។ ការប្ដេជ្ញាចិត្តនេះ ធ្វើឡើងនៅក្នុងឱកាស លោកឧត្តមសេនីយ៍ បានចូលជួបសម្តែងការគួរសមជាមួយឯកឧត្តម នាយឧត្តមសេនីយ៍ វង្ស ពិសេន អគ្គមេបញ្ជាការ នៃកងយោធពលខេមរភូមិន្ទ នាព្រឹកថ្ងៃទី២៥ ខែមីនា ឆ្នាំ២០២៦ នៅអគ្គបញ្ជាការដ្ឋាន។ឯកឧត្តម នាយឧត្តមសេនីយ៍ វង្ស ពិសេន បានថ្លែងនូវការស្វាគមន៍ និងអបអរសាទរចំពោះលោកឧត្តមសេនីយ៍ត្រី ស៊រ វន ដែលត្រូវបានតែងតាំងជាអនុព័ន្ធយោធាមីយ៉ាន់ម៉ា ប្រចាំព្រះរាជាណាចក្រកម្ពុជា ព្រមទាំងបានវាយតម្លៃខ្ពស់ចំពោះទំនាក់ទំនងរវាងប្រទេសទាំងពីរដែលមានជាយូរអង្វែងមកហើយ។ឯកឧត្តម បានស្នើដល់ភាគីមីយ៉ាន់ម៉ា បន្តពង្រឹងកិច្ចសហប្រតិបត្តិការផ្លាស់ប្ដូរទស្សនកិច្ចគ្រប់កម្រិត ការបណ្ដុះបណ្ដាលធនធានមនុស្ស ការផ្លាស់ប្ដូរព័ត៌មានប្រឆាំងភេរវកម្ម បទល្មើសផ្សេងៗ ព្រមទាំងសកម្មភាពការងារនានាដែលបម្រើឲ្យផលប្រយោជន៍រួមដល់ប្រជាជននិងកងទ័ពប្រទេសទាំងពីរ។ជាកិច្ចឆ្លើយតប លោកឧត្តមសេនីយ៍ត្រី ស៊រ វន បានថ្លែងអំណរគុណចំពោះ ឯកឧត្តម នាយឧត្តមសេនីយ៍ អគ្គមេបញ្ជាការ នៃកងយោធពលខេមរភូមិន្ទ ដែលបានឆ្លៀតពេលដ៏មមាញឹកអនុញាតឱ្យរូបលោក និងសហការី បានចូលជួបសម្តែងការគួរសម និងពិភាក្សាការងារ។លោកនាយការិយាល័យអនុព័ន្ធយោធា ក៏បានថ្លែងអំណរគុណយ៉ាងជ្រាលជ្រៅជូនចំពោះរាជរដ្ឋាភិបាលកម្ពុជា និងកងយោធពលខេមរភូមិន្ទ ដែលបានផ្ដល់អាហាររូបករណ៍ដល់កងទ័ពមីយ៉ាន់ម៉ា បានសិក្សានៅសាកលវិទ្យាល័យការពារជាតិកម្ពុជា។បន្ថែមលើនេះ លោកឧត្តមសេនីយ៍ត្រី បានរំឭកជូនឯកឧត្តមអគ្គមេបញ្ជាការ អំពីទំនាក់ទំនងការទូត និងកិច្ចសហប្រតិបត្តិការដ៏យូរអង្វែងរវាងប្រទេសទាំងពីរ ហើយលោកឧត្តមសេនីយ៍ ក៏បានបង្ហាញពីការបេ្តជ្ញាចិត្តក្នុងការជំរុញទំនាក់ទំនង និងកិច្ចសហប្រតិបត្តិការឱ្យកាន់តែមានប្រសិទ្ធភាពខ្ពស់ និងជិតស្និទ្ធបន្ថែមទៀត នៅក្នុងអាណត្តិបេសកកម្មការរបស់លោក។មុននឹងបញ្ចប់ ឯកឧត្តមអគ្គមេបញ្ជាការ បានផ្ដាំផ្ញើសួរសុខទុក្ខដល់ឯកឧត្តម នាយឧត្តមសេនីយ៍ មីន អ៊ុងឡាំង ប្រធានក្រុមប្រឹក្សារដ្ឋបាលរដ្ឋ និងជាអគ្គមេបញ្ជាការកងទ័ពមីយ៉ាន់ម៉ា ព្រមទាំងជូនពរលោកនាយការិយាល័យអនុព័ន្ធយោធាថ្មី សូមមានសុខភាពល្អ និងសម្រេចជោគជ័យលើគ្រប់ភារកិច្ច៕

អ្នកនាំពាក្យ៖ កម្ពុជាគោរព និងអនុវត្តយ៉ាងខ្ជាប់ខ្ជួននូវបទឈប់បាញ់ ក៏ដូចជាកិច្ចព្រមព្រៀងពាក់ព័ន្ធដទៃទៀតរវាងកម្ពុជា និងថៃ

អ្នកនាំពាក្យរាជរដ្ឋាភិបាលកម្ពុជា បានគូសបញ្ជាក់ជាថ្មីថា កម្ពុជាគោរព និងអនុវត្តយ៉ាងខ្ជាប់ខ្ជួន និងពេញលេញនូវបទឈប់បាញ់នូវស្មារតីរួម និងគ្រប់ចំណុចទាំងអស់នៃសេចក្តីប្រកាសរួមនេះក៏ដូចជាកិច្ចព្រមព្រៀងពាក់ព័ន្ធដទៃទៀត។ឯកឧត្តម ប៉ែន បូណា អ្នកនាំពាក្យរាជរដ្ឋាភិបាលកម្ពុជា តាមរយៈសន្និសីទសារព័ត៌មាននៅថ្ងៃទី២៥ ខែមីនា ឆ្នាំ២០២៦នេះ បានរម្លឹកឡើងវិញនូវខ្លឹមសារនៃការប្តេជ្ញាចិត្តរួមគ្នារវាងកម្ពុជា និងថៃតាមស្មារតីនៃសេចក្តីប្រកាសរួមនៃកិច្ចប្រជុំពិសេសលើកទី៣របស់គណៈកម្មាធិការព្រំដែនទូទៅ (GBC) ថ្ងៃទី ២៧ ខែធ្នូ ឆ្នាំ ២០២៥ ដែលកម្ពុជាបន្ត គោរព និងអនុវត្តយ៉ាងខ្ជាប់ខ្ជួន។អ្នកនាំពាក្យរម្លឹកឡើងវិញថា តាមរយៈកិច្ចប្រជុំពិសេសលើកទី ៣របស់គណៈកម្មាធិការព្រំដែនទូទៅ (GBC)កាលពីថ្ងៃទី ២៧ ខែធ្នូ ឆ្នាំ ២០២៥ រវាងកម្ពុជា និងថៃកិច្ចប្រជុំបាន៖ -ទទួលស្គាល់ពីសារៈសំខាន់នៃការពិភាក្សាស្តីពីដំណោះស្រាយជម្លោះដោយសន្តិវិធី ក្នុងបរិយាកាសនៃជំនឿទុកចិត្តគ្នា ភាពស្មោះត្រង់ សុទ្ធចិត្ត យុត្តិធម៌ និងការគោរពគ្នាទៅវិញទៅមក ស្របតាមគោលបំណងនិងគោលការណ៍នៃធម្មនុញ្ញអង្គការសហប្រជាជាតិ ធម្មនុញ្ញអាស៊ាន និង សន្ធិសញ្ញាមិត្តភាពនិងសហប្រតិបត្តិការនៅអាស៊ីអាគ្នេយ៍ សំដៅបើកផ្លូវសម្រាប់ជំពូកថ្មីនៃសន្តិភាព និងកិច្ចសហប្រតិបត្តិការរវាងប្រទេសទាំងពីរ។-រំលឹកឡើងវិញនូវសេចក្តីប្រកាសរបស់ប្រធានអាស៊ានក្នុងកិច្ចប្រជុំពិសេសរបស់រដ្ឋមន្ត្រីការបរទេសអាស៊ានស្តីពីស្ថានភាពបច្ចុប្បន្នរវាងកម្ពុជានិងថៃ ដែលបានរៀបចំឡើង កាលពីថ្ងៃទី២២ ខែធ្នូ ឆ្នាំ២០២៥ នៅទីក្រុងគូឡាឡាំពួរ។-បញ្ជាក់សាជាថ្មីអំពីការប្តេជ្ញាចិត្តយ៉ាងមុតមាំក្នុងការជៀសវាងការគំរាមកំហែង ឬការប្រើប្រាស់កម្លាំង ការដោះស្រាយជម្លោះដោយសន្តិវិធី និងការគោរពព្រំដែនអន្តរជាតិ និងច្បាប់អន្តរជាតិ ដើម្បីលើកកម្ពស់សន្តិភាព សន្តិសុខ ស្ថិរភាព និងវិបុលភាពនៅក្នុងតំបន់ ដោយផ្អែកលើការគោរពគ្នាទៅវិញទៅមក ចំពោះឯករាជ្យភាព អធិបតេយ្យ សមភាព បូរណភាពទឹកដី និងអត្តសញ្ញាណជាតិរបស់ប្រទេសរៀងៗខ្លួន។-បញ្ជាក់ឡើងវិញនូវការប្តេជ្ញាចិត្តដ៏មុតមាំចំពោះការអនុវត្តពេញលេញ និងមានប្រសិទ្ធភាពនៃបទឈប់បាញ់ចុះថ្ងៃទី២៨ ខែកក្កដា ឆ្នាំ២០២៥ និងកិច្ចព្រមព្រៀងពាក់ព័ន្ធទាំងអស់ដែលសម្រេចបានក្រោយបទឈប់បាញ់នេះ ព្រមទាំងកិច្ចព្រមព្រៀងផ្សេងៗដែលសម្រេចបាននិងកិច្ចព្រមព្រៀងដែលមានស្រាប់រវាងកម្ពុជានិងថៃ។-បញ្ជាក់ឡើងវិញនូវការតាំងចិត្តរួមគ្នាក្នុងការវិលត្រឡប់ទៅរកការសន្ទនាដោយផ្អែកលើមូលដ្ឋាននៃកិច្ចព្រមព្រៀងដែលធ្វើឡើងកន្លងមក ក៏ដូចជាយន្តការទ្វេភាគីដែលមានស្រាប់ សំដៅបញ្ឈប់អរិភាពគ្រប់ទម្រង់ដើម្បីបង្កើតនូវសន្តិភាពមួយដ៏ពិតប្រាកដ និងប្រកបដោយចីរភាព ជាមួយនឹងការប្តេជ្ញាចិត្តយ៉ាងមុតមាំចំពោះការកសាងទំនុកចិត្ត ការស្តារប្រក្រតីភាពឡើងវិញ និង ការកសាងសន្តិភាពយូរអង្វែងនៅតាមបណ្តោយព្រំដែន។អ្នកនាំពាក្យរាជរដ្ឋាភិបាលកម្ពុជាគូសបញ្ជាក់ជាថ្មីថា កម្ពុជាគោរព និងអនុវត្តយ៉ាងខ្ជាប់ខ្ជួន និងពេញលេញនូវបទឈប់បាញ់ នូវស្មារតីរួម និងគ្រប់ចំណុចទាំងអស់នៃសេចក្តីប្រកាសរួមនេះ ក៏ដូចជាកិច្ចព្រមព្រៀងពាក់ព័ន្ធដទៃទៀត។អ្នកនាំពាក្យថ្លែងថា៖«កម្ពុជាប្រកាន់ជំហរយ៉ាងម៉ឺងម៉ាត់ក្នុងការការពារខ្សែព្រំដែនអន្តរជាតិកម្ពុជា-ថៃដែលបន្សល់ទុកដោយគណៈកម្មការព្រំដែនឥណ្ឌូចិន-សៀម, គោរពគោលការណ៍ច្បាប់អន្តរជាតិ គោលការណ៍ខ្សែព្រំដែនមិនកែប្រែ(Uti Possidetis Juris) គោរពអនុសញ្ញា សន្ធិសញ្ញាបារាំង-សៀម ផែនទី និងកំណត់ហេតុបោះបង្គោលព្រំដែនរបស់គណៈកម្មការបោះបង្គោលព្រំដែនឥណ្ឌូចិន-សៀម ព្រមទាំងកិច្ចព្រមព្រៀង និងឯកសារពាក់ព័ន្ធនានាដែលភាគីទាំងពីរបានឯកភាពគ្នានាពេលកន្លងមក។ កម្ពុជាមិនទទួលស្គាល់នូវការកែប្រែខ្សែព្រំដែនណាមួយដែលកើតចេញពីការប្រើប្រាស់កម្លាំងនោះឡើយ»៕

ឯកឧត្តម ហ៊ុន ម៉ានី រំលេចកត្តាសំខាន់ចំនួន៤ ដែលនាំឱ្យក្រសួងមុខងារសាធារណៈ សម្រេចបានសមិទ្ធផលជាច្រើនគួរជាទីមោទនៈ

កត្តាគោលនយោបាយ និងយុទ្ធសាស្ត្រដ៏ត្រឹមត្រូវរបស់រាជរដ្ឋាភិបាល កត្តាថ្នាក់ដឹកនាំប្រកបដោយភាពឈ្លាសវៃ មានចក្ខុវិស័យច្បាស់លាស់ និងមានព្រហ្មវិហារធម៌ កត្តាផ្ទៃក្នុងនៃក្រសួងមុខងារសាធារណៈ និងកត្តាក្រសួង ស្ថាប័ន រាជធានី ខេត្ត ក្រុង ស្រុក ខណ្ឌ និងភាគីពាក់ព័ន្ធ ជាកត្តាកំណត់នូវសមិទ្ធផលរបស់ក្រសួងមុខងារសាធារណៈ។ នេះ ជាការលើកឡើងរបស់ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ ក្នុងពិធីបើក «សន្និបាតបូកសរុបលទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥ របស់ក្រសួងមុខងារសាធារណៈ»។ថ្លែងក្នុងពិធីបើកនាពេលនេះ ឯកឧត្តមឧបនាយករដ្ឋមន្ត្រី បានគូសបញ្ជាក់ថា សមិទ្ធផលដែលក្រសួងអាចសម្រេចទៅបាន អាស្រ័យដោយកត្តាសំខាន់ ៤យ៉ាង។ ទី១. កត្តាគោលនយោបាយ និងយុទ្ធសាស្ត្រដ៏ត្រឹមត្រូវរបស់រាជរដ្ឋាភិបាល ជាពិសេសយុទ្ធសាស្ត្របញ្ចកោណ ដំណាក់កាលទី១ ដើម្បីកំណើនការងារ សមធម៌ ប្រសិទ្ធភាព និងចីរភាព កសាងមូលដ្ឋានគ្រឹះឆ្ពោះទៅសម្រេចចក្ខុវិស័យកម្ពុជា ឆ្នាំ២០៥០ កម្ពុជាក្លាយជាប្រទេសមានចំណូលខ្ពស់ និងការដាក់ចេញនូវវិធានការគន្លឹះទាំង៣ ក្នុងការកែទម្រង់រដ្ឋបាលសាធារណៈ ដែលជាការកំណត់អាទិភាពជាក់លាក់ សម្រាប់ការអនុវត្តឱ្យចេញជាលទ្ធផលជាក់ស្តែង។ ទី២. កត្តាថ្នាក់ដឹកនាំប្រកបដោយភាពឈ្លាសវៃ មានចក្ខុវិស័យច្បាស់លាស់ និងមានព្រហ្មវិហារធម៌ ដែលយើងអាចប្រែក្លាយគោលនយោបាយ និងយុទ្ធសាស្ត្រទៅជាការអនុវត្តចេញជាសមិទ្ធផលពិតប្រាកដ ដែលក្នុងនោះ សម្តេចមហាបវរធិបតី តែងផ្តល់អាទិភាពខ្ពស់ចំពោះការកែទម្រង់រដ្ឋបាលសាធារណៈ ដោយផ្តល់ការគាំទ្រ និងតម្រង់ទិសជាប្រចាំ។ ទី៣. កត្តាផ្ទៃក្នុងនៃក្រសួងមុខងារសាធារណៈ គឺដោយសារយើងមានចក្ខុវិស័យ និងផែនការច្បាស់លាស់ មានរចនាសម្ព័ន្ធការងារត្រឹមត្រូវ មានប្រព័ន្ធការងារល្អ និងជាពិសេសមានមន្ត្រី និងថ្នាក់ដឹកនាំគ្រប់កម្រិត ដែលមានជំនាញ សមត្ថភាពខ្ពស់ និងបំពេញការងារឈរលើមូលដ្ឋានអភិក្រមបុរេសកម្ម សកម្ម យោគយល់អធ្យាស្រ័យ សហការគ្នា ស្មារតីជាក្រុម ទទួលខុសត្រូវខ្ពស់ទៅតាមជំនាញនិងភារកិច្ចរៀងៗខ្លួន។ និង ទី៤. កត្តាក្រសួង ស្ថាប័ន រាជធានី ខេត្ត ក្រុង ស្រុក ខណ្ឌ និងភាគីពាក់ព័ន្ធទាំងអស់។ សមិទ្ធផលដែលក្រសួងមុខងារសាធារណៈសម្រេចបាននាពេលកន្លងមក និងដែលនឹងឈានសម្រេចបាននាពេលខាងមុខ មិនអាចកាត់ផ្តាច់ចេញពីការចូលរួម គាំទ្រ និងសហការពីក្រសួង ស្ថាប័ន រដ្ឋបាលថ្នាក់ក្រោមជាតិ និងភាគីពាក់ព័ន្ធទាំងអស់បានទេ។ទន្ទឹមនេះ ឯកឧត្តមឧបនាយករដ្ឋមន្ត្រី ក៏បានបញ្ជាក់ថា ដើម្បីបំពេញនូវបេសកកម្មដ៏ថ្លៃថ្លា ប្រកបដោយកិត្តិយសនេះ បន្ថែមទៅលើអ្វីដែលក្រសួងសម្រេចបាននាពេលកន្លងមក ពិតជាមានភាពចាំបាច់ដែលក្រសួងត្រូវកំណត់ទិសដៅ សម្រាប់ជំហានបន្ទាប់ ដោយផ្តើមចេញពីការកំណត់បានច្បាស់លាស់នូវបញ្ហាប្រឈមនាពេលបច្ចុប្បន្ន ចំណុចខ្លាំង និងចំណុចខ្សោយ និងដាក់ចេញនូវផែនការយុទ្ធសាស្ត្រ និងវិធីសាស្ត្រនានាដែលអាចដោះស្រាយនូវបញ្ហាប្រឈមទាំងនោះបាន ដើម្បីឈានទៅការពង្រឹងអភិបាលកិច្ច និងការធ្វើទំនើបកម្មស្ថាប័នរដ្ឋ ឱ្យក្លាយជារដ្ឋបាលសាធារណៈទំនើប មានសមត្ថភាពខ្ពស់ ខ្លាំង វៃឆ្លាត និងស្អាតស្អំ ដែលអាចបម្រើប្រជាជនបានកាន់តែល្អប្រសើរ។បន្ថែមពីនេះ ឯកឧត្តមឧបនាយករដ្ឋមន្ត្រី មានប្រសាសន៍ថា "ខ្ញុំមានមោទនភាពខ្ពស់ ចំពោះការបោះជំហានឆ្ពោះទៅមុខ នៃវិស័យមុខងារសាធារណៈ ដែលបាន និងកំពុងចូលរួមចំណែកដល់ ការលើកកម្ពស់អភិបាលកិច្ចក្នុងរដ្ឋបាលសាធារណៈ ដែលជាមូលដ្ឋានចាំបាច់ក្នុងការជំរុញល្បឿននៃការអភិវឌ្ឍសង្គម សេដ្ឋកិច្ចកម្ពុជា។"

បណ្ដាញសង្គម

ព័ត៌មានថ្មីៗ

លោក Trump និយាយថា ការបាញ់ទម្លាក់យន្តហោះអាមេរិក នឹងមិនប៉ះពាល់ដល់កិច្ចចរចាជាមួយអ៊ីរ៉ង់ទេ

ក្រុមហាម៉ាស អំពាវនាវឱ្យគណៈកម្មាធិការរដ្ឋបាលអន្តរកាល ចាប់ផ្ដើមកិច្ចការគ្រប់គ្រងតំបន់ហ្កាហ្សា

ស្រីលង្កា កំពុងលំបាកក្នុងការបញ្ចៀសការដួលរលំសេដ្ឋកិច្ចដោយសារសង្គ្រាមមជ្ឈិមបូព៌ា

សេណេហ្គាល់ ហាមមន្ត្រីរាជការមិនឱ្យធ្វើដំណើរក្រៅប្រទេស ខណៈវិបត្តិប្រេងប៉ះពាល់ហិរញ្ញវត្ថុសាធារណៈ

យន្តហោះយោធាអាមេរិក ដែលអ៊ីរ៉ង់បាញ់ទម្លាក់ គឺជាហេតុការណ៍លើកដំបូងក្នុងពេលជាង ២០ឆ្នាំ

កំណើនសេដ្ឋកិច្ចវៀតណាមនៅត្រីមាសទី១ បានថយចុះ ខណៈវិបត្តិថាមពលជំរុញអតិផរណា

អាជ្ញាធរអាមេរិក បញ្ជាឱ្យប្រជាជនជម្លៀសខ្លួន ខណៈចំហេះព្រៃរាលដាលនៅភាគខាងត្បូងរដ្ឋ California

កូរ៉េខាងត្បូង ប្រកាសស្ថានភាពសេដ្ឋកិច្ច «សម័យសង្គ្រាម» និងជំរុញកញ្ចប់ថវិកាគ្រាអាសន្ន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877