BTV NEWS

អនុប្រធានទី១ នៃរដ្ឋសភាបង្ហាញពីភាពជោគជ័យនៃនយោបាយសន្តិវិធី និងការការពារបូរណភាពទឹកដីជូនប្រជាពលរដ្ឋ

នាយឧត្តមសេនីយ៍ ឥត សារ៉ាត់ អញ្ជើញចុះសួរសុខទុក្ខដល់យោធិនដែលកំពុងបំពេញបេសកកម្ម និងកំពុងសម្រាកព្យាបាលជំងឺ នៅសមរភូមិមុខតាមបណ្តោយព្រំដែនកម្ពុជា-ថៃ

អនុប្រធានក្រុមការងាររាជរដ្ឋាភិបាលចុះមូលដ្ឋានអញ្ជេីញសំណេះសំណាល និងបំពាក់គ្រឿងឥស្សរិយយសជូនមន្រ្តីរាជការចំនួន១៤៨ រូប នៃរដ្ឋបាលស្រុកកណ្ដាលស្ទឹង ខេត្តកណ្ដាល

ឯកឧត្តម ចាយ បូរិន អញ្ជើញចុះសួរសុខទុក្ខនិងនាំយកអំណោយដ៏ថ្លៃថ្លារបស់ សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជូនឯកឧត្តម សួស កាណាន នៅគេហដ្ឋាន

ព័ត៌មានជាតិ

មន្រ្ដីជាន់ខ្ពស់ក្រសួងការពារជាតិជួបពិភាក្សាជាមួយគណៈប្រតិភូសហភាពអឺរ៉ុប ពាក់ព័ន្ធនឹងស្ថានការណ៍ព្រំដែនបច្ចុប្បន្នរវាងកម្ពុជា-ថៃ និងការពង្រឹងកិច្ចសហប្រតិបត្តិការទ្វេភាគី

ភ្នំពេញ៖ នៅព្រឹកថ្ងៃទី២៥ ខែមីនា ឆ្នាំ២០២៦នេះ មន្រ្ដីជាន់ខ្ពស់ក្រសួងការពារជាតិ ជួបពិភាក្សាជាមួយគណៈប្រតិភូសហភាពអឺរ៉ុបពាក់ព័ន្ធនឹងស្ថានការណ៍ព្រំដែនបច្ចុប្បន្នរវាងកម្ពុជា-ថៃ និងការពង្រឹងកិច្ចសហប្រតិបត្តិការទ្វេភាគីផ្នែកយោធារវាងកម្ពុជា និងសហភាពអឺរ៉ុប។ជំនួបនេះធ្វើឡើងដោយបានការអនុញ្ញាតជាតំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ឯកឧត្តម ឧត្តមសេនីយ៍ឯក រ៉ាត់ ដារ៉ារ័ត្ន រដ្ឋលេខាធិការ ក្រសួងការពារជាតិ បានទទួលជួបសម្តែងការគួរសម និងពិភាក្សាការងារជាមួយគណៈប្រតិភូសហភាពអឺរ៉ុប ដឹកនាំដោយឧត្តមសេនីយ៍ត្រី Danail BEAV នាយកទទួលបន្ទុកផ្នែកចារកិច្ចនៃ EUMS និង EEAS។«កិច្ចជំនួបនេះបានផ្តោតលើបញ្ហា ដែលពាក់ព័ន្ធនឹងស្ថានការណ៍ព្រំដែនបច្ចុប្បន្នរវាងកម្ពុជា-ថៃ និងការពង្រឹងកិច្ចសហប្រតិបត្តិការទ្វេភាគីផ្នែកយោធារវាងកម្ពុជា និងសហភាពអឺរ៉ុប»។ នេះបើតាមការបញ្ជាក់របស់ក្រសួងការពារជាតិកម្ពុជា។

ទូតថ្មីវៀតណាមប្រចាំកម្ពុជា៖ បច្ចុប្បន្នទំនាក់ទំនងកម្ពុជា-វៀតណាម ឈានដល់ដំណាក់កាលនៃកិច្ចសហប្រតិបត្តិការគ្រប់ជ្រុងជ្រោយ ផ្ដល់ផលប្រយោជន៍ទៅវិញទៅមក កាន់តែស៊ីជម្រៅ និងមានប្រសិទ្ធភាព

ភ្នំពេញ៖ ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋសង្គមនិយមវៀតណាមប្រចាំកម្ពុជាបានរំលេចពីប្រវត្តិសាស្ត្រ កម្ពុជា និងវៀតណាមកៀកស្មាគ្នា ជួយគ្នាទៅវិញទៅមក ដើម្បីរំដោះប្រទេសជាតិ និងនាំមកនូវសន្តិភាពជូនប្រជាជាតិរៀងៗខ្លួន ហើយមកដល់បច្ចុប្បន្ននេះ ទំនាក់ទំនងប្រទេសទាំងពីរបានឈានដល់ដំណាក់កាលនៃកិច្ចសហប្រតិបត្តិការគ្រប់ជ្រុងជ្រោយ ផ្ដល់ផលប្រយោជន៍ទៅវិញទៅមកកាន់តែស៊ីជម្រៅ និងកាន់តែមានប្រសិទ្ធភាព។ឯកឧត្តម ង្វៀន មិញវូ ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋសង្គមនិយមវៀតណាមប្រចាំកម្ពុជា បានថ្លែងបញ្ជាក់បែបនេះក្នុងឱកាស ឯកឧត្តម និងសហការី បានអញ្ជើញជូនពរឯកឧត្តម នាយឧត្តមសេនីយ៍ វង្ស ពិសេន អគ្គមេបញ្ជាការ នៃកងយោធពលខេមរភូមិន្ទ ក្នុងឱកាសដែលកម្ពុជាកំពុងត្រៀមខ្លួនទទួលអំណរសាទរបុណ្យចូលឆ្នាំថ្មី ប្រពៃណីជាតិខ្មែរ នាថ្ងៃទី១៤-១៥ និង១៦ ខែមេសា ឆ្នាំ២០២៦ខាងមុខ។ក្នុងឱកាសនោះឯកឧត្តម នាយឧត្តមសេនីយ៍ វង្ស ពិសេន បានថ្លែងអំណរគុណដល់ឯកឧត្តម ឯកអគ្គរដ្ឋទូតវៀតណាម និងអនុព័ន្ធយោធាវៀតណាម ដែលបានឆ្លៀតពេលវេលាដ៏មានតម្លៃមកជូនពរឯកឧត្តម អបអរឆ្នាំថ្មី បង្ហាញពីការរិតចំណងមិត្តភាព សាមគ្គីភាព និងកិច្ចសហប្រតិបត្តិការយ៉ាងជិតស្និតរវាងប្រទេសទាំង២ ក៏ដូចជាការពូនជ្រុំសាមគ្គីភាពមិត្តភាព កិច្ចសហប្រតិបត្តិការយូរអង្វែង។ជាកិច្ចឆ្លើយតប ឯកឧត្តម ង្វៀន មិញវូ បានរំលេចពីប្រវត្តិសាស្ត្រកម្ពុជា និងវៀតណាម កៀកស្មាគ្នា ជួយគ្នាទៅវិញទៅមក ដើម្បីរំដោះប្រទេសជាតិ និងនាំមកនូវសន្តិភាពជូនប្រជាជាតិរៀងៗខ្លួន ហើយមកដល់បច្ចុប្បន្ននេះ ទំនាក់ទំនងប្រទេសទាំងពីរបានឈានដល់ដំណាក់កាលនៃកិច្ចសហប្រតិបត្តិការគ្រប់ជ្រុងជ្រោយ ផ្ដល់ផលប្រយោជន៍ទៅវិញទៅមកកាន់តែស៊ីជម្រៅ និងកាន់តែមានប្រសិទ្ធភាព។ឯកឧត្តម ឯកអគ្គរដ្ឋទូតវៀតណាម បានជូនពរជ័យ សិរីសួស្តី ជ័យមង្គល ជូនចំពោះ ឯកឧត្តមអគ្គមេបញ្ជាការ និងក្រុមគ្រួសារ ព្រមទាំងថ្នាក់ដឹកនាំ ឆ្នាំថ្មីឆ្នាំមមី អដ្ឋស័ក ពុទ្ធសករាជ ២៥៦៩ សូមមានសុខភាពល្អបរិបូរណ៍ កម្លាំងមាំមួន និងបញ្ញាភ្លឺថ្លា ដើម្បីបន្តដឹកនាំកងយោធពលខេមរភូមិន្ទឱ្យកាន់តែរីកចម្រើនខ្លាំងក្លាបន្ថែមទៀត៕

កម្មវិធីរៀនដេរ បានលុយ បានផ្តល់ឱកាសការងារដល់ប្រជាពលរដ្ឋចំនួនជិត៩០០នាក់

ក្រោមគម្រោងវគ្គបណ្តុះបណ្តាលជំនាញដេរ ៧ថ្ងៃ ឬនិយាយថា “រៀនដេរ បានលុយ” ដោយឥតគិតថ្លៃ បានជួយសម្រួលឱ្យប្រជាពលរដ្ឋទូទៅដែលមិនទាន់មានជំនាញ ជាពិសេសអតីតពលករត្រឡប់មកពីថៃ ទទួលបានឱកាសការងាររក្នុងវិស័យកាត់ដេរចំនួនជិត ៩០០នាក់ ខណៈគម្រោងនេះកំណត់ក្នុងការផ្តល់ចំនួនតែ ២ ៣០០នាក់។ក្នុងបទសម្ភាសន៍ជាមួយ លោក សំ សឿន ប្រធានសហភាពពលកម្មជាតិកម្ពុជា (NLC) ដែលកំពុងជួយសម្របសម្រួលលើការងារគម្រោងនេះ បានឱ្យព័ត៌មាន ប៊ីធីវី ដឹងថា តាមរយៈវគ្គបណ្ដុះបណ្ដាលជំនាញដេរ ៧ថ្ងៃ របស់រាជរដ្ឋាភិបាលកម្ពុជា និងមូលនិធិអភិវឌ្ឍន៍ជំនាញ (SDF) ដែលសហការជាមួយរោងចក្រក្នុងវិស័យកាត់ដេរក្នុងខេត្តកំពង់ស្ពឺ និងខេត្តកណ្តាលចំនួន៦ ពិតជាបានផ្តល់នូវអត្ថប្រយោជន៍ជាខ្លាំងក្នុងការសម្របសម្រួល និងផ្គូរផ្គងការងារភ្លាមៗ រវាងភាគីនិយោជក និងកម្មករនិយោជិត។លោក បានបញ្ជាក់ថា តាមរយៈគម្រោងនេះ ប្រសិនបើប្រជាពលរដ្ឋទូទៅ ក៏ដូចជាអតីតពលករមកពីថៃ មានបំណងចង់ចូលរៀនវគ្គបណ្តុះបណ្តាលរៀនដេរ បានលុយ នេះ គឺអាចទាក់ទងទៅកាន់លេខ ១២៩៧ ដោយឥតគិតថ្លៃ ក៏ដូចជាផេកផ្លូវការរបស់ក្រសួងការងារ និងបណ្តុះបណ្តាលវិជ្ជាជីវៈ ដើម្បីទទួលបានការសម្របសម្រួល និងផ្តល់ព័ត៌មានលម្អិតពីគម្រោងនេះ។លោកបន្ថែមទៀតថា អ្វីដែលសំខាន់ ចំពោះអតីតពលករ ដែលបាត់ឯកសារ ឬមិនមានឯកសារគ្រប់គ្រាន់ ក្រសួងការងារ ក៏មានការយោគយល់និងសម្របសម្រួលជូនផងដែរ ទាំងការរៀន និងឱកាសការងារជាដើម។ជុំវិញគម្រោងខាងលើនេះ លោក ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានបញ្ជាក់ឱ្យដឹងថា ប្រជាពលរដ្ឋ ក៏ដូចជាអតីតពលករត្រឡប់មកពីថៃ ដែលមានបំណងចង់ចូលបំពេញការងារក្នុងវិស័យកាត់ដេរ អាចមកចុះឈ្មោះចូលរៀនវគ្គបណ្តុះបណ្តាលជំនាញដេរបាន ដោយនឹងទទួលបានអត្ថប្រយោជន៍ជាច្រើន ដូចជា៖ ទទួលបានប្រាក់ឧបត្ថម្ភប្រចាំថ្ងៃ រយៈពេល ៧ថ្ងៃ, ទទួលបានការងារភ្លាមៗក្រោយពេលរៀនចប់, មានបន្ទប់ស្នាក់នៅ ទឹកភ្លើង ផ្ដល់ជូនអំឡុងពេលបណ្ដុះបណ្ដាល, ផ្ដល់មធ្យោបាយធ្វើដំណើរក្នុងអំឡុងពេលបណ្ដុះបណ្ដាល, ផ្ដល់ជូនអាហារថ្ងៃត្រង់ និងអាហារសម្រន់, អត្ថប្រយោជន៍ ប.ស.ស. និងអត្ថប្រយោជន៍ជាច្រើនទៀត នៅពេលចូលបម្រើការងារ។សូមបញ្ជាក់ថា ទាក់ទិនទៅនឹងលក្ខខណ្ឌ និងការចុះឈ្មោះដើម្បីរៀនជំនាញដេរនេះ សិក្ខាកាមទាំងពីរភេទ ត្រូវមានអាយុចាប់ពី ១៨ ដល់ ៤៥ឆ្នាំ និងត្រូវមានអត្តសញ្ញាណបណ្ណ ឬសំបុត្រកំណើត ឬសៀវភៅគ្រួសារ ឬលិខិតឆ្លងដែន។ ដោយឡែក ចំពោះអតីតពលកររស់នៅក្នុងខេត្តណាក៏ដោយ ក៏អាចចុះឈ្មោះបានដែរ គ្រាន់តែត្រូវចូលរួមវគ្គបណ្ដុះបណ្ដាលនៅរោងចក្រកាត់ដេរស្ថិតក្នុងខេត្តកណ្ដាល និងខេត្តកំពង់ស្ពឺ៕ អត្ថបទ៖ ឈិត បូរ៉ាវី

ស្ថាប័នថ្នាក់ជាតិចូលរួមអនុវត្តវិធានការសន្សំសំចៃថាមពល ខណៈវិបត្តិប្រេងឥន្ធនៈសកលបន្តហក់ឡើង

ក្នុងពេលមានវិបត្តិប្រេងឥន្ធនៈជាសកល ស្ថាប័នថ្នាក់ជាតិ បានចូលរួមអនុវត្តវិធានការសន្សំចំចៃថាម ពល ស្របទៅតាមសារាចរណែនាំរបស់សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា។ឯកឧត្តម ខ្វៃ អាទិត្យា អ្នកនាំពាក្យក្រសួងបរិស្ថាន នៅព្រឹកថ្ងៃទី២៥ ខែមីនា នេះ បានប្រាប់BTVថា ស្របទៅតាមសារាចររបស់រាជរដ្ឋាភិបាល ស្តីពីវិធានការសន្សំសំចៃលើការប្រើប្រាស់ប្រេងឥន្ធនៈ និងអគ្គិសនី ក្រសួងបរិស្ថានបានដាក់ចេញនូវវិធានការមួយចំនួនដូចជា៖ កំណត់ការប្រើប្រាស់ម៉ាស៊ីនត្រជាក់ត្រឹមសីតុណ្ហភាព២៥អង្សាសេ, បិទម៉ាស៊ីនត្រជាក់១៥ទៅ៣០នាទី មុនពេលសម្រាក ឬមុនពេលបញ្ចប់ម៉ោងការងារ , បិទអំពូលភ្លើងនៅតាមកន្លែងដែលមិនចាំបាច់ ឬកន្លែងដែលមានពន្លឺគ្រប់គ្រាន់ និង បិទអំពូលភ្លើងក្នុងបន្ទប់ធ្វើការរាល់ពេលចេញទៅខាងក្រៅលើសពី១៥នាទីជាដើម។ ឯកឧត្តមបានបន្តទៀតថា ការសន្សំសំចៃថាមពលនេះ គឺអាចឆ្លើយតបបានមួយចំណែក ក្នុងគ្រាដែលពិភពលោកកំពុងជួបប្រទះការខ្វះថាមពលដោយសារសង្គ្រាមនៅមជ្ឈិមបូព៌ា។បើតាមសារាចររបស់រាជរដ្ឋាភិបាល ស្តីពីវិធានការសន្សំសំចៃលើការប្រើប្រាស់ប្រេងឥន្ធនៈ និងអគ្គិសនី បានលើកឡើងថា ស្ថានការណ៍នៃសង្គ្រាមដែលកំពុងកើតមាន និងរីករាលដាលនៅតំបន់មជ្ឈិមបូព៌ា បានបង្កឱ្យមានផលប៉ះពាល់ដល់ខ្សែច្រវាក់ផ្គត់ផ្គង់ប្រេងឆៅ និងជាហេតុធ្វើឱ្យថ្លៃប្រេងឥន្ធនៈជាសកល រួមទាំងព្រះរាជាណាចក្រកម្ពុជាមានការកើនយ៉ាងគំហុក។ ទន្ទឹមនេះ ថ្លៃដើមលើការផលិតអគ្គិសនី ក៏អាចនឹងមានការកើនមួយ ចំនួននាពេលខាងមុខ ដោយសារប្រេងឥន្ធនៈជាធាតុចូលសំខាន់មួយពាក់ព័ន្ធនឹងការផលិតអគ្គិសនី។ ទោះជាយ៉ាងនេះក្តី ផ្អែកតាមការពិភាក្សាជាមួយក្រសួងរ៉ែ និងថាមពល និងអគ្គិសនីកម្ពុជា និងបណ្តាក្រុមហ៊ុននាំចូលប្រេងឥន្ធនៈ សមត្ថភាពផ្គត់ផ្គង់ប្រេងឥន្ធនៈ និងអគ្គិសនីនៅកម្ពុជា នៅចំពោះមុខនេះ ត្រូវបានវាយតម្លៃថា នៅតែអាចរក្សាបាននូវស្ថិរភាពនៃការប្រើប្រាស់ប្រេងឥន្ធនៈ និងអគ្គិសនី សម្រាប់ប្រតិបត្តិការសេដ្ឋកិច្ច និងការផ្តល់សេវាសាធារណៈរបស់ក្រសួង ស្ថាប័ន។ឆ្លើយតបទៅនឹងស្ថានភាពចំពោះមុខនៃការកើនថ្លៃប្រេងឥន្ធនៈ និងថ្លៃដើមលើការផលិតអគ្គិសនី ខាងលើ រាជរដ្ឋាភិបាលសម្រេចដាក់ចេញនូវវិធានការសន្សំសំចៃលើការប្រើប្រាស់ប្រេងឥន្ធនៈ និងអគ្គិសនី របស់ក្រសួង ស្ថាប័នទាំងអស់ ទាំងនៅថ្នាក់ជាតិ និងថ្នាក់ក្រោមជាតិ៕អត្ថបទ៖ ទូច សោភ័ណ

សហភាពសហព័ន្ធយុវជនកម្ពុជា សហការជាមួយរដ្ឋបាលខេត្តសៀមរាប រៀបចំសង្ក្រាន្តវត្តបូណ៌ខ្នារតេជោ ផ្ដល់ភាពរីករាយ និងលើកទឹកចិត្តគ្រួសារភៀសសឹក

ក្នុងស្មារតីចែករំលែកសេចក្ដីសុខ និងការយកចិត្តទុកដាក់ខ្ពស់ ចំពោះបងប្អូនប្រជាពលរដ្ឋ នាថ្ងៃទី២៥ ខែមីនា ឆ្នាំ២០២៦នេះ សហភាពសហព័ន្ធយុវជនកម្ពុជា សហការជាមួយរដ្ឋបាលខេត្តសៀមរាប និងរដ្ឋបាលស្រុកក្រឡាញ់ បានរៀបចំសង្ក្រាន្តវត្តបូណ៌ខ្នារតេជោ ក្នុងស្រុកក្រឡាញ់ ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ដែលនឹងចូលមកដល់នាពេលឆាប់ៗខាងមុខ និងដើម្បីផ្ដល់ភាពរីករាយ និងលើកទឹកចិត្តគ្រួសារភៀសសឹកកំពុងស្នាក់មណ្ឌលសុវត្ថិភាពក្នុងស្រុកក្រឡាញ់ ដើម្បីរក្សាវប្បធម៌ ទំនៀមទម្លាប់ដ៏ល្អផូរផង់របស់ជាតិខ្មែរ។លោក សុខ ណារ៉េត អភិបាលស្រុកក្រឡាញ់ បានឱ្យដឹងថា ការរៀបចំនេះមានកម្មវិធីជាច្រើន ដូចជា៖ ពិធីក្រុងពលី ពិធីសំណេះសំណាល ពិធីសូត្រមន្ត រាប់បាត្រ និងប្រគេនចង្ហាន់ព្រះសង្ឃដើម្បីឧទ្ទិសកុសលជូនវីរៈកងទ័ព ការលេងល្បែងប្រជាប្រិយ មានចោលឈូង លាក់កន្លែង វាយក្អម ទាញ ព្រ័ត្រ និងលោតបាវ ដល់ពេលថ្ងៃត្រង់ គឺយើងមានអាហារសាមគ្គី ពីសារនំបញ្ចុកជួបជុំគ្នា។ឯកឧត្តម ហេង សុខណាង សមាជិកអចិន្ត្រៃយ៍សហភាពសហព័ន្ធយុវជនកម្ពុជា មានប្រសាសន៍ថា ការរៀបចំសង្ក្រាន្តជាមួយបងប្អូនគ្រួសារភៀសសឹកកំពុងស្នាក់មណ្ឌលសុវត្ថិភាព មានគោលបំណងសំខាន់បំផុតនោះ គឺដើម្បីរក្សាវប្បធម៌ ទំនៀមទម្លាប់ដ៏ល្អផូផង់របស់ជាតិខ្មែរ។ កម្មវិធីនេះក៏ជាការយកចិត្តទុកដាក់ ការលើកទឹកចិត្ត ការផ្ដល់កម្លាំងចិត្ត និងអាចធ្វើឱ្យរសាយទុក្ខកង្វល់របស់បងប្អូនភៀសសឹក តាមរយៈការបង្កើតបរិយាកាសសប្បាយរីករាយតាមបែបប្រពៃណី ដូចជាការលេងល្បែងប្រជាប្រិយ ការធ្វើបុណ្យទានរួមគ្នា បង្ហាញពីការសាមគ្គីភាព និងការគោរពស្រឡាញ់រវាងថ្នាក់ដឹកនាំ មន្ត្រីរាជការ កងកម្លាំង ព្រះសង្ឃ អាជ្ញាធរក៏ដូចជាប្រជាពលរដ្ឋក្នុងមូលដ្ឋាន ជាមួយបងប្អូនប្រជាពលរដ្ឋភៀសសឹក។ក្នុងនាមរដ្ឋបាលខេត្តសៀមរាប លោក ឌី រ៉ាដូ អភិបាលរងខេត្ត បានមានប្រសាសន៍ថា ដោយបានការយកចិត្តទុកដាក់ខ្លាំងពីសុខទុក្ខ ការលំបាក និងការកំពុងរស់នៅរបស់បងប្អូនភៀសសឹក ដែលកំពុងបន្តការស្នាក់នៅក្នុងមណ្ឌលសុវត្ថិភាពនានាក្នុងខេត្ត ដោយមិនទាន់អាចត្រឡប់ទៅកាន់លំនៅឋានវិញបាន ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរខាងមុខនេះ ឯកឧត្តម លី សំរិទ្ធ ប្រធានក្រុមប្រឹក្សាខេត្ត និង ឯកឧត្តម ប្រាក់ សោភ័ណ អភិបាលខេត្ត បានអនុញ្ញាតឱ្យរដ្ឋបាលស្រុកក្រឡាញ់ និងសហភាពសហព័ន្ធយុវជនកម្ពុជាស្រុកក្រឡាញ់ សហការ ជាមួយអង្គភាពពាក់ព័ន្ធ អង្គការ សមាគម និងសប្បុរសជននានា រៀបចំអបអរសាទរពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំ២០២៦ ជាមួយបងប្អូនគ្រួសារភៀសសឹកកំពុងស្នាក់មណ្ឌលសុវត្ថិភាពក្នុងស្រុកក្រឡាញ់ ឱ្យមានសប្បាយរីករាយ និងល្អប្រសើរ៕

គណៈកម្មាធិការ គ.ស.រ.ជ. បើកកិច្ចប្រជុំពិនិត្យ ពិភាក្សា និងការដោះស្រាយបញ្ហាប្រឈមវិស័យឯកជន

គណៈ កម្មាធិការសម្របសម្រួលការងារសម្រាប់យន្តការវេទិការាជរដ្ឋាភិបាល-ផ្នែកឯកជន (គ.ស.រ.ជ.) បើកកិច្ចប្រជុំអន្តរក្រសួង ពិនិត្យ ពិភាក្សាលើសេចក្តីព្រាងរបាយការណ៍វឌ្ឍនភាព នៃការអនុវត្តវិធានការ កែទម្រង់មុតស្រួចជាកញ្ចប់ ដែលបានដាក់ចេញក្នុងវេទិការាជរដ្ឋាភិបាល-ផ្នែកឯកជនលើកទី១៩ ដើម្បីដោះស្រាយបញ្ហាប្រឈមរបស់ វិស័យឯកជន សំដៅលើកកម្ពស់បរិយាកាសវិនិយោគនៅកម្ពុជាឱ្យកាន់តែរស់រវើក។ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) និងជាប្រធានគណៈ កម្មាធិការសម្របសម្រួលការងារសម្រាប់យន្តការវេទិការាជរដ្ឋាភិបាល-ផ្នែកឯកជន (គ.ស.រ.ជ.) នៅថ្ងៃទី២៥ ខែមីនា ឆ្នាំ២០២៦ បានអញ្ជើញដឹកនាំកិច្ចប្រជុំអន្តរក្រសួង ពិនិត្យ ពិភាក្សា លើសេចក្តីព្រាងរបាយការណ៍វឌ្ឍនភាព នៃការអនុវត្តវិធានការកែទម្រង់មុត ស្រួចជាកញ្ចប់ ដែលបានដាក់ចេញក្នុងវេទិការាជរដ្ឋាភិបាល-ផ្នែកឯកជនលើកទី១៩ ប្រចាំឆមាសទី២ ឆ្នាំ២០២៥ ក្រោមស្មារតីបុរេ សកម្ម ដោះស្រាយបញ្ហាប្រឈមរបស់វិស័យឯកជន សំដៅលើកកម្ពស់បរិយាកាស វិនិយោគនៅកម្ពុជាឱ្យកាន់តែរស់រវើក។ កិច្ចប្រជុំបានប្រព្រឹត្តិទៅដោយរលូន និងបានផ្តោតការពិភាក្សាយ៉ាងស៊ីជម្រៅ លើរបៀបវារៈយុទ្ធសាស្ត្រចំនួនពីររួមមាន៖ (១) ខ្លឹមសារនៃសេចក្តីព្រាងរបាយការណ៍វឌ្ឍនភាពការងារ នៃយន្តការវេទិការាជរដ្ឋាភិបាល-ផ្នែកឯកជន ប្រចាំឆមាសទី២ ឆ្នាំ២០២៥ និង (២) ការពន្លឿនការរៀបចំសៀវភៅណែនាំស្តីពី ស្តង់ដានីតិវិធីប្រតិបត្តិ (SOP) នៃការរៀបចំនិងប្រព្រឹត្តទៅនៃយន្តការវេទិកា G-PSF ដែលគ្រោងនឹងសម្រេចឱ្យបានរួចរាល់ក្នុងឆមាសទី១ នៃឆ្នាំ២០២៦នេះ។ ឯកសារ SOP នេះ នឹងក្លាយជាត្រីវិស័យសម្រាប់តម្រង់ទិស ការធ្វើការងាររួមគ្នារវាងរដ្ឋ និងវិស័យឯកជន ឱ្យកាន់តែមានតម្លាភាព ប្រសិទ្ធភាព និងភាពច្បាស់លាស់។អង្គប្រជុំបានពិភាក្សាផ្លាស់ប្តូរយោបល់យ៉ាងផុលផុស ជាមួយស្មារតីបុរេសកម្ម និងការយកចិត្តទុកដាក់ខ្ពស់ ក្នុងដោះស្រាយ បញ្ហាប្រឈមរបស់វិស័យឯកជន សំដៅលើកកម្ពស់បរិយាកាសវិនិយោគនៅកម្ពុជាឱ្យកាន់តែប្រសើរឡើង។ អង្គប្រជុំបានធ្វើការវាយ តម្លៃខ្ពស់ និងឯកភាពទៅលើខ្លឹមសារនៃសេចក្តីព្រាងរបាយការណ៍វឌ្ឍនភាពការងារ នៃយន្តការវេទិការាជរដ្ឋាភិបាល-ផ្នែកឯកជន ប្រចាំឆមាសទី២ ឆ្នាំ២០២៥ ដែលបានរៀបចំព្រាងឡើង និងគ្រោងដាក់ជូនទៅកាន់ទីស្តីការគណៈរដ្ឋមន្ត្រី ដើម្បីពិនិត្យ និងបន្តតាម នីតិវិធី មុននឹងឈានទៅដល់ការគោរពរាយការណ៍ជូនប្រមុខរាជរដ្ឋាភិបាល នៅក្នុងកិច្ចប្រជុំពេញអង្គគណៈរដ្ឋមន្ត្រីនាពេលខាងមុខ។ឯកឧត្តមឧបនាយករដ្ឋមន្ត្រី ប្រធាន គ.ស.រ.ជ. បានគូសរំលេចជាថ្មីពីសារសំខាន់នៃវិស័យឯកជន ដែលជាក្បាលម៉ាស៊ីន នៃកំណើនសេដ្ឋកិច្ចជាតិ ហើយរាជរដ្ឋាភិបាលក្រោមការដឹកនាំប្រកបដោយទស្សនវិស័យវែងឆ្ងាយ របស់សម្តេចមហាបវរធិបតី នាយក រដ្ឋមន្ត្រី តែងតែបាននិងកំពុងផ្តល់ការយកចិត្តទុកដាក់ ដោយទទួលស្តាប់នូវបញ្ហាប្រឈម ព្រមទាំងដាក់ចេញនូវដំណោះស្រាយជាក់ ស្តែងឱ្យបានទាន់ពេលផងដែរ។ ឯកឧត្តមឧបនាយករដ្ឋមន្ត្រី ក៏បានសំណូមពរឱ្យគ្រប់ផ្នែកពាក់ព័ន្ធទាំងអស់ ឱ្យបន្តរក្សាស្មារតីសហការ យ៉ាងស្អិតរមួត និងបុរេសកម្មបំផុត ដើម្បីប្រែក្លាយបញ្ហាប្រឈមឱ្យទៅជាកាលានុវត្តភាព សំដៅជំរុញបរិយាកាសវិនិយោគនៅកម្ពុជា ឱ្យកាន់តែមានភាពរស់រវើក និងប្រកួតប្រជែងខ្ពស់ក្នុងតំបន់។សូមបញ្ជាក់ថា កិច្ចប្រជុំនេះមានការចូលរួមពី ឯកឧត្តមរដ្ឋមន្ត្រី ក្រសួងរ៉ែ និងថាមពល អនុប្រធានទី៣ ក.អ.ក., ឯកឧត្តមរដ្ឋមន្ត្រី ក្រសួងកសិកម្ម រុក្ខាប្រមាញ់ និងនេសាទ, ឯកឧត្តមរដ្ឋមន្ត្រីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍, ឯកឧត្តម រដ្ឋមន្ត្រីក្រសួងសាធារណការ និងដឹកជញ្ជូន, ឯកឧត្តមរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ, អ្នកឧកញ៉ាប្រធាន សភាពាណិជ្ជកម្មកម្ពុជា និងជាប្រធានគណៈកម្មការសម្របសម្រួលការងារផ្នែកឯកជន សម្រាប់យន្តការវេទិការរាជរដ្ឋាភិបាល-ផ្នែក ឯកជន (គ.ស.ឯ.រ.ជ.), តំណាងក្រសួង/ស្ថាប័នពាក់ព័ន្ធជាសមាជិក គ.ស.រ.ជ., តំណាងក្រុមការងារទាំង១៦ នៃ គ.ស.ឯ.រ.ជ., អ្នកជំនាញនៃកម្មវិធី CAPRED និងមន្ត្រីពាក់ព័ន្ធជាច្រើនរូប៕អត្ថបទ៖ សុន រ៉ាឌី

រដ្ឋបាលខេត្តព្រះសីហនុ បានបើកវគ្គបណ្តុះបណ្តាលស្តីពីការគ្រប់គ្រងសំរាម សំណល់រឹង ទីប្រជុំជន

ថ្ងៃទី២៤ ខែមីនា ឆ្នាំ២០២៦ លោក ឡុង ឌីម៉ង់ អភិបាលរងខេត្តព្រះសីហនុ បានអញ្ជើញជាអធិបតីក្នុងពិធីបើកវគ្គបណ្តុះបណ្តាល ស្តីពី ការគ្រប់គ្រងសំរាម សំណល់រឹង ទីប្រជុំជន ដោយមានការចូលរួមពីតំណាងមន្ទីរ-អង្គភាពពាក់ព័ន្ធ នៅសណ្ឋាគារ Seascape Palace ខេត្តព្រះសីហនុ។បន្ថែមពីលើការសំណេះសំណាល លោកអភិបាលរង បានគួសបញ្ជាក់ថាបញ្ហាសំរាម សំណល់រឹងទីប្រជុំជន និងសំណល់ប្លាស្ទិក ជាបញ្ហាសមូហភាព ដែលទាមទារជាដាច់ខាតនូវ ការចូលរួមពីសំណាក់គ្រប់ភាគី និងគ្រប់ស្ថាប័ន អង្គភាពទាំងអស់ ហើយត្រូវចាប់ផ្តើមចេញពីខ្លួនយើង និងពង្រឹកទៅកាន់មនុស្សជុំវិញខ្លួន។ យើងក៏ត្រូវការជាចាំបាច់នូវការជំរុញ និងការគាំទ្រនានា សំដៅធ្វើយ៉ាងណាពង្រឹងការយល់ដឹង និងពង្រឹងឆន្ទៈក្នុងការចូលរួមពីគ្រប់ភាគី ព្រោះបើមានការយល់ដឹងហើយ តែនៅខ្វះឆន្ទៈអនុវត្ត នោះយើងពិតជាមិនអាចសម្រេចបាននូវភាពស្អាតក្នុងសហគមន៍ ក៏ដូចជាក្នុងខេត្តទាំងមូល ដែលបង្ហាញពីតម្លៃ និងសេចក្តីថ្លៃថ្នូររបស់ខេត្តឡើយ។ជាមួយគ្នានេះ លោកអភិបាលរងក៏បានអំពាវនាវដល់អ្នកចូលរួមទាំងអស់ សូមងាកមកចាប់យកទម្លាប់ល្អ និងស្វែងយល់ឱ្យកាន់តែច្បាស់បន្ថែមអំពី ការគ្រប់គ្រងសំរាម សំណល់រឹង និងវិធីសាស្រ្តនានាក្នុងកាត់បន្ថយសំណល់ប្លាស្ទិក ដើម្បីរួមគ្នាកសាងកម្ពុជាស្អាត ព្រះសីហនុស្អាត គ្មានសំណល់ប្លាស្ទិក៕

មេសិទ្ធិមនុស្សកម្ពុជា៖ ការអនុវត្តយ៉ាងម៉ឺងម៉ាត់បទដ្ឋានសិទ្ធិមនុស្ស និងសន្ធិសញ្ញាអន្តរជាតិ ជាការប្តេជ្ញាចិត្តលើកកម្ពស់ និងការការពារសិទ្ធិមនុស្សរបស់កម្ពុជា

រតនគិរី៖ ឯកឧត្តម កែវ រ៉េមី ទេសរដ្ឋមន្រ្តី ប្រធានគណៈកម្មាធិការសិទ្ធិមនុស្សកម្ពុជា បានអញ្ជើញជាអធិបតីដ៏ខ្ពង់ខ្ពស់ក្នុងពិធីបើកសិក្ខាសាលាផ្សព្វផ្សាយរបាយការណ៍ជាតិពីការអនុវត្តអនុសញ្ញាអន្តរជាតិស្តីពីការលុបបំបាត់រាល់ទម្រង់នៃការរើសអើងពូជសាសន៍ ក្រោមកិច្ចសហការរវាងគណៈកម្មាធិការសិទ្ធិមនុស្សកម្ពុជា និងរដ្ឋបាលខេត្តរតនគិរី នាព្រឹកថ្ងៃទី២៤ ខែមីនា ឆ្នាំ២០២៦ នៅសាលមហោស្រពខេត្តរតនគិរី។ថ្លែងក្នុងឱកាសនោះ ឯកឧត្តមទេសរដ្ឋមន្ត្រី បានលើកឡើងថា ការផ្តល់សច្ចាប័នលើសន្ធិសញ្ញាអន្តរជាតិ ស្តីពីសិទ្ធិមនុស្សចំនួន ៨ ក្នុងចំណោម៩ និងការអនុវត្តយ៉ាងម៉ឺងម៉ាត់នូវរាល់បទដ្ឋានសិទ្ធិមនុស្សអន្តរជាតិ និងសន្ធិសញ្ញាអន្តរជាតិស្តីពីសិទ្ធិមនុស្សដែលកម្ពុជាជារដ្ឋភាគី បានបង្ហាញពីការប្តេជ្ញាចិត្តដ៏មុតមាំ ក្នុងការគោរព ការលើកកម្ពស់ និងការការពារសិទ្ធិមនុស្ស។ កម្ពុជាបានខិតខំលុបបំបាត់រាល់ទម្រង់នៃការរើសអើង ដោយមិនគិតពណ៌សម្បុរ ភេទ ជាតិសាសន៍ ស្របតាមគោលនយោបាយ “មិនទុកនរណាម្នាក់ចោល”។ ក្នុងន័យនេះ ក៏រួមបញ្ចូលទាំងការមិនរើសអើងចំពោះអ្នកស្រឡាញ់ភេទដូចគ្នា (LGBT) ផងដែរ ដោយពួកគេត្រូវបានលើកទឹកចិត្ត និងគាំទ្រឱ្យមានការចូលរួមក្នុងសង្គមយ៉ាងស្មើភាព និងមានសក្តានុពលដូចគ្នា។ភ្ជាប់ទៅនឹងគោលការណ៍មិនរើសអើងពូជសាសន៍នេះ រាជរដ្ឋាភិបាលកម្ពុជា នៅតែបន្តរក្សាគោលជំហរដ៏ច្បាស់លាស់ក្នុងការមិនរើសអើង ទោះបីជាកម្ពុជាកំពុងប្រឈមនឹងវិបត្តិជម្លោះព្រំដែនជាមួយប្រទេសថៃក៏ដោយ។ ជាក់ស្តែង សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានផ្តល់អនុសាសន៍ណែនាំដល់មន្ត្រីរាជការគ្រប់ជាន់ថ្នាក់ និងប្រជាពលរដ្ឋទូទៅ ឱ្យគោរពអនុវត្តច្បាប់ជាធរមានយ៉ាងម៉ឺងម៉ាត់ ដោយមិនត្រូវមានការរើសអើង មិនប្រើអំពើហិង្សា ឬបង្កគ្រោះថ្នាក់ណាមួយចំពោះប្រជាជន ពលករ ឬអ្នកជំនួញជនជាតិថៃ ដែលកំពុងរស់នៅ និងបំពេញការងារនៅក្នុងប្រទេសកម្ពុជា ដែលអាចនាំឱ្យកើតមានការរើសអើងពូជសាសន៍ ឬជាតិសាសន៍ឡើយ។លើសពីនេះទៅទៀត ជនជាតិថៃដែលកំពុងជាប់ឃុំនៅក្នុងពន្ធនាគារ ក៏ទទួលបានការធានាសុវត្ថិភាព និងការពារយ៉ាងត្រឹមត្រូវ ដោយគ្មានអំពើហិង្សាណាមួយឡើយ។ ទាំងនេះបង្ហាញយ៉ាងច្បាស់ពីការគោរពតម្លៃមនុស្សជាតិ និងការប្តេជ្ញាចិត្តរបស់កម្ពុជា ក្នុងការរក្សាសន្តិភាព និងសហអភិវឌ្ឍជាមួយប្រទេសជិតខាង ដែលផ្ទុយពីរដ្ឋាភិបាលថៃ ដែលតែងអះអាងថាជាប្រទេសស៊ីវិល័យ និងគោរពច្បាប់អន្តរជាតិ ប៉ុន្តែបានប្រព្រឹត្តសកម្មភាពឈ្លានពាន និងអំពើល្មើសច្បាប់អន្តរជាតិ ច្បាប់សិទ្ធិមនុស្ស និងច្បាប់មនុស្សធម៌អន្តរជាតិគ្រប់បែបយ៉ាង រួមមានការបិទច្រកព្រំដែនដោយឯកតោភាគី ការចាប់ខ្លួនទាហានខ្មែរ ២០ នាក់ដោយខុសច្បាប់ ការរំលោភបូកលើពលការិនីកម្ពុជា ការប្រើអំពើហិង្សាលើពលករខ្មែរ ដែលរស់នៅក្នុងប្រទេសថៃ ការប្រើប្រាស់សំឡេងរំខានដោយហ្រ្វេកង់ខ្ពស់ ការប្រើប្រាស់គ្រាប់បែកចង្កោម ដែលជាអាវុធត្រូវបានហាមឃាត់ និងការបាញ់ប្រហារលើជនស៊ីវិល និងទីសាធារណៈជាដើម។ទន្ទឹមនេះ ឯកឧត្តមទេសរដ្ឋមន្រ្តី បានគូសបញ្ជាក់ថា រាជរដ្ឋាភិបាលកម្ពុជា នៅតែប្រកាន់ជំហរយ៉ាងម៉ឺងម៉ាត់ក្នុងការពារអធិបតេយ្យភាព និងបូរណភាពទឹកដី តាមរយៈវិធានការការទូត និងច្បាប់ ព្រមទាំងយន្ដការនានាទាំងកម្រិតតំបន់ អាស៊ាន និងអន្តរជាតិ។ គណៈកម្មាធិការសិទ្ធិមនុស្សកម្ពុជា ក៏បានរួមចំណែកជាមួយរាជរដ្ឋាភិបាល ដោយបានចេញញត្តិប្តឹងតវ៉ា សេចក្តីថ្លែងការណ៍ ការថ្កោលទោស និងលិខិតផ្សេងៗ សរុបចំនួន ៦០ ព្រមទាំងបានទៅបំពេញបេសកកម្មសិទ្ធិមនុស្សនៅទីក្រុងហ្សឺណែវ ប្រទេសស្វ៊ីស ដោយបានជួបពិភាក្សាទ្វេភាគីផ្សេងៗចំនួន ២៩ ជំនួប រួមមាន ក្រុមប្រឹក្សាសិទ្ធិមនុស្សអង្គការសហប្រជាជាតិ ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស បណ្តាប្រទេសដែលជាសមាជិកក្រុមប្រឹក្សាសិទ្ធិមនុស្ស ព្រមទាំងអ្នករាយការណ៍ពិសេសទទួលបន្ទុកសិទ្ធិតាមវិស័យនានាដើម្បីប្រាប់ពីស្ថានភាពពិតជាក់ស្តែងនូវទង្វើឈ្លានពានរបស់ថៃមកលើកម្ពុជា។ឯកឧត្តមទេសរដ្ឋមន្រ្តី បានកោតសរសើរចំពោះ ឯកឧត្តម ញ៉ែម សំអឿន អភិបាលនៃគណៈអភិបាលខេត្តរតនគិរី ដែលបានដឹកនាំយ៉ាងស្វាហាប់ ក្នុងការរៀបចំនិងអភិវឌ្ឍខេត្តឱ្យមានភាពរីកចម្រើនគួរឱ្យកត់សម្គាល់។ ឯកឧត្តមបានដឹងច្បាស់ពីសក្តានុពល និងតម្រូវការអភិវឌ្ឍបន្ថែមដើម្បីជំរុញខេត្តឱ្យកាន់តែរីកចម្រើន។ ជាមួយគ្នានេះ ការសហការរវាងរដ្ឋបាលខេត្តរតនគិរី ជាមួយគណៈកម្មាធិការសិទ្ធិមនុស្សកម្ពុជា ក្នុងការផ្សព្វផ្សាយរបាយការណ៍ជាតិពីការអនុវត្តអនុសញ្ញាអន្តរជាតិស្តីពីការលុបបំបាត់រាល់ទម្រង់នៃការរើសអើងពូជសាសន៍ថ្ងៃនេះ មានសារៈសំខាន់ណាស់ ក្នុងការបង្ហាញពីកិច្ចខិតខំប្រឹងប្រែង និងសមិទ្ធផលសំខាន់ៗរបស់រាជរដ្ឋាភិបាល។ ព្រមទាំងជំរុញការចូលរួមពីអង្គភាពថ្នាក់ជាតិ និងក្រោមជាតិ ក្នុងការបន្តរក្សា ការពារ និងលើកកម្ពស់សិទ្ធិមនុស្សនៅកម្ពុជា។បន្ថែមពីនេះ ឯកឧត្តមទេសរដ្ឋមន្រ្តី បានបញ្ជាក់ជូនអង្គសិក្ខាសាលាថា បញ្ហាទឹកដីគឺជារឿងអាយុជីវិតសំខាន់បំផុតសម្រាប់ជាតិ ដែលរាជរដ្ឋាភិបាលកំពុងបន្ដទាមទារយកត្រឡប់មកវិញជាដាច់ខាត ពីការកាន់កាប់ដោយខុសច្បាប់របស់យោធាថៃ។ ឯកឧត្តមទេសរដ្ឋមន្រ្តី ក៏បានអំពាវនាវឱ្យប្រជាពលរដ្ឋបន្ដជឿជាក់និងទុកចិត្តលើរាជរដ្ឋាភិបាលក្នុងការដោះស្រាយបញ្ហានេះ ព្រមទាំងត្រូវរួបរួមសាមគ្គីគ្នាជាធ្លុងដើម្បីការពារនិងកសាងជាតិឱ្យរីកចម្រើនជាលំដាប់៕

រដ្ឋមន្ត្រីក្រសួងយុត្តិធម៌៖ កម្ពុជាជាប្រទេសឈានមុខគេក្នុងតំបន់បានបង្កើតច្បាប់ព្រហ្មទណ្ឌពិសេសពាក់ព័ន្ធការឆបោកតាមប្រព័ន្ធបច្ចេកវិទ្យា

រដ្ឋមន្ត្រីក្រសួងយុត្តិធម៌បញ្ជាក់ថា ប្រទេសកម្ពុជាជាប្រទេសឈានមុខគេក្នុងតំបន់ ក្នុងការបង្កើតច្បាប់ព្រហ្មទណ្ឌពិសេស ពាក់ព័ន្ធការឆបោកតាមប្រព័ន្ធបច្ចេកវិទ្យា ដោយបានកំណត់ទោសយ៉ាងធ្ងន់ធ្ងរបំផុតរហូតដល់ជាប់ពន្ធនាគារអស់មួយជីវិតចំពោះមេខ្លោងដែលបង្កឲ្យមានការបាត់បង់ជីវិតនៅក្នុងមជ្ឈមណ្ឌលឆបោក។ឯកឧត្តម ឧបនាយករដ្ឋមន្ត្រី កើត រិទ្ធ រដ្ឋមន្ត្រីក្រសួងយុត្តិធម៌បានមានប្រសាសន៍ប្រាប់ BTV នៅព្រឹកថ្ងៃទី២៥ខែមីនានេះថា ក្នុងច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា នឹងបង្កើតឲ្យមានបទល្មើសបន្ថែមចំនួន៥ ដោយក្នុងនោះមានទោសពី ៥ឆ្នាំ ទៅ ១០ឆ្នាំ និងកើនរហូតដល់ ៣០ឆ្នាំ ឬអស់មួយជីវិត បើក្នុងករណីមានសម្លាប់មនុស្ស ចាប់ជម្រិតជាដើម។ ហើយច្បាប់នេះនឹងត្រូវបានអនុម័តនៅពេលខាងមុខនេះ ក្នុងការលើកកម្ពស់ប្រសិទ្ធភាពក្នុងការបោសសម្អាតការឆបោកតាមប្រព័ន្ធបច្ចេកវិទ្យាក្នុងទ្រង់ទ្រាយជាយន្តនាការដែលរាជរដ្ឋាភិបាលបានដាក់ចេញកន្លងមកនេះ។ ច្បាប់នេះនឹងចូលរួមចំណែកក្នុងការធានាថា ការឆបោកតាមប្រព័ន្ធបច្ចេកវិទ្យានឹងមិនកើតមានជាថ្មីទេ ក្រោយពេលដែលរាជរដ្ឋាភិបាលបានបោសសម្អាតរួច។ឯកឧត្តមថ្លែងថា ប្រទេសកម្ពុជា ជាប្រទេសឈានមុខគេក្នុងតំបន់បានបង្កើតច្បាប់ព្រហ្មទណ្ឌពិសេស ស្ដីពីការឆបោកតាមប្រព័ន្ធបច្ចេកវិទ្យា ដោយបានកំណត់ទោសទណ្ឌយ៉ាងធ្ងន់ធ្ងរបំផុតចំពោះឧក្រិដ្ឋជនរហូតដល់ជាប់ពន្ធនាគារពី ៣០ឆ្នាំ ដល់អស់មួយជីវិតក្នុងករណីមានបទល្មើសផ្សេងទៀតកើតឡើង ឬមេខ្លោងដែលបង្កឲ្យមានការបាត់បង់ជីវិតនៅក្នុងបទល្មើសឆបោកដែលពួកគេបានប្រព្រឹត្ត»។សូមជម្រាបថា នៅថ្ងៃទី២៤ ខែមីនា ឆ្នាំ២០២៦ ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ បានអញ្ជើញផ្តល់ការពន្យល់ និងបំភ្លឺអំពីភាពចាំបាច់ និងគោលបំណងយុទ្ធសាស្ត្រនៃសេចក្តីព្រាងច្បាប់ពីការប្រឆាំងការឆបោកតាមប្រព័ន្ធបច្ចេកវិទ្យា ជូនអន្តរគណៈកម្មការជំនាញនៃរដ្ឋសភា។ តំណាងរាជរដ្ឋាភិបាលបានគូសបញ្ជាក់ជូនអន្តរគណៈកម្មការរដ្ឋសភាថា ឧក្រិដ្ឋកម្មឆបោកឆ្លងដែនតាមប្រព័ន្ធបច្ចេកវិទ្យាបានវិវត្តក្លាយជាកង្វល់សកល ដែលទាមទារឱ្យកម្ពុជាមាន "ឧបករណ៍គតិយុត្តិ" ដ៏រឹងមាំសម្រាប់បង្ក្រាប។ សេចក្តីព្រាងច្បាប់នេះមាន ៥ ជំពូក និង ២៤ មាត្រា ដោយក្នុងនោះបានកំណត់បង្កើតបទល្មើសព្រហ្មទណ្ឌថ្មីចំនួន ៥ បន្ថែមទៀត រួមមាន៖ បទឆបោកតាមប្រព័ន្ធបច្ចេកវិទ្យា, បទរៀបចំឬដឹកនាំមជ្ឈមណ្ឌលឆបោក, បទជ្រើសរើសឬបណ្តុះបណ្តាលបុគ្គលឱ្យប្រព្រឹត្តបទល្មើស, បទប្រមូលទិន្នន័យឯកជនក្នុងចេតនាទុច្ចរិត និងការបង្កើតទម្រង់ពិសេសនៃបទល្មើសសម្អាតប្រាក់៕ អត្ថបទ៖ វង្ស សុភាព

ក្របខ័ណ្ឌយុទ្ធនាការ «ខ្មែរត្រូវតែខ្លាំង» ដើម្បីបញ្ជាក់ពីការចូលរួមចំណែកលើកតម្កើងវិស័យទេសចរណ៍កម្ពុជាឱ្យកាន់តែរឹងមាំ

ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានអញ្ជើញទទួលជួបពិភាក្សាការងារជាមួយវិទ្យាស្ថានស៊ីអ៊ីអូ ដឹកនាំដោយ ឯកឧត្តមបណ្ឌិត អោម សេងបូរ៉ា ប្រធានក្រុមប្រឹក្សាភិបាល នៃវិទ្យាស្ថានស៊ីអ៊ីអូ ព្រមទាំងសហការីសរុបចំនួន ៧០នាក់ ក្នុងគោលបំណងពង្រឹងកិច្ចសហប្រតិបត្តិការរវាងក្រសួងទេសចរណ៍ និងវិទ្យាស្ថានស៊ីអ៊ីអូ ក្នុងការអភិវឌ្ឍធនធានមនុស្ស និងការចូលរួមលើកកម្ពស់វិស័យទេសចរណ៍នៅកម្ពុជា។ក្នុងឱកាសនោះ ឯកឧត្តមរដ្ឋមន្ត្រី បានលើកឡើងអំពីយុទ្ធសាស្ត្រសំខាន់ៗរបស់ក្រសួង ក្នុងការជំរុញវិស័យទេសចរណ៍ឱ្យមានភាពប្រកួតប្រជែង និងមានចីរភាព ជាពិសេសការផ្តោតលើការបណ្តុះបណ្តាលធនធានមនុស្សដែលមានជំនាញ និងគុណភាពខ្ពស់។ជាមួយគ្នានេះ ឯកឧត្តមបណ្ឌិត បានបង្ហាញពីតួនាទី និងសកម្មភាពរបស់វិទ្យាស្ថានស៊ីអ៉ីអូ ក្នុងការរៀបចំស្តង់ដាសម្រាប់អាជីវកម្មក្នុងវិស័យទេសចរណ៍កម្ពុជា ការកសាងសមត្ថភាពសម្រាប់សហគ្រិនវិស័យទេសចរណ៍ ពោលគឺផ្តល់ការអប់រំ និងបណ្តុះបណ្តាលជំនាញដល់យុវជន និងមន្ត្រីជំនាញ ដើម្បីឆ្លើយតបទៅនឹងតម្រូវការនៃទីផ្សារការងារ និងការអភិវឌ្ឍសេដ្ឋកិច្ចជាតិ ពិសេសឯកឧត្តមបណ្ឌិត ក៏បានស្នើសុំពិនិត្យលទ្ធភាពចុះ MoU ក្រោមយុទ្ធនាការ “ខ្មែរត្រូវតែខ្លាំង” ដើម្បីជួយជំរុញការអភិវឌ្ឍវិស័យទេសចរណ៍កម្ពុជាឱ្យកាន់តែខ្លាំង និងមាននិរន្តរភាព។ជាមួយគ្នានេះ ឯកឧត្តមបណ្ឌិត ក៏បានពិភាក្សាអំពីការរៀបចំកម្មវិធីបណ្តុះបណ្តាល ការស្រាវជ្រាវ និងការចែករំលែកបទពិសោធន៍ ដើម្បីរួមចំណែកលើកកម្ពស់គុណភាពសេវាកម្មទេសចរណ៍ និងបង្កើនភាពទាក់ទាញដល់ភ្ញៀវទេសចរជាតិ និងអន្តរជាតិ។ជំនួបបានប្រព្រឹត្តទៅក្នុងបរិយាកាសស្និទ្ធស្នាលនេះត្រូវបានចាត់ទុកថាជាជំហានសំខាន់មួយ ក្នុងការពង្រឹងទំនាក់ទំនង និងកិច្ចសហប្រតិបត្តិការរវាងរដ្ឋ និងវិស័យអប់រំ ដើម្បីជំរុញការអភិវឌ្ឍវិស័យទេសចរណ៍ឱ្យកាន់តែរីកចម្រើន និងមានប្រសិទ្ធភាពខ្ពស់៕

បណ្ដាញសង្គម

ព័ត៌មានថ្មីៗ

លោក Trump និយាយថា ការបាញ់ទម្លាក់យន្តហោះអាមេរិក នឹងមិនប៉ះពាល់ដល់កិច្ចចរចាជាមួយអ៊ីរ៉ង់ទេ

ក្រុមហាម៉ាស អំពាវនាវឱ្យគណៈកម្មាធិការរដ្ឋបាលអន្តរកាល ចាប់ផ្ដើមកិច្ចការគ្រប់គ្រងតំបន់ហ្កាហ្សា

ស្រីលង្កា កំពុងលំបាកក្នុងការបញ្ចៀសការដួលរលំសេដ្ឋកិច្ចដោយសារសង្គ្រាមមជ្ឈិមបូព៌ា

សេណេហ្គាល់ ហាមមន្ត្រីរាជការមិនឱ្យធ្វើដំណើរក្រៅប្រទេស ខណៈវិបត្តិប្រេងប៉ះពាល់ហិរញ្ញវត្ថុសាធារណៈ

យន្តហោះយោធាអាមេរិក ដែលអ៊ីរ៉ង់បាញ់ទម្លាក់ គឺជាហេតុការណ៍លើកដំបូងក្នុងពេលជាង ២០ឆ្នាំ

កំណើនសេដ្ឋកិច្ចវៀតណាមនៅត្រីមាសទី១ បានថយចុះ ខណៈវិបត្តិថាមពលជំរុញអតិផរណា

អាជ្ញាធរអាមេរិក បញ្ជាឱ្យប្រជាជនជម្លៀសខ្លួន ខណៈចំហេះព្រៃរាលដាលនៅភាគខាងត្បូងរដ្ឋ California

កូរ៉េខាងត្បូង ប្រកាសស្ថានភាពសេដ្ឋកិច្ច «សម័យសង្គ្រាម» និងជំរុញកញ្ចប់ថវិកាគ្រាអាសន្ន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានជាតិ

កម្មវិធីរៀនដេរ បានលុយ បានផ្តល់ឱកាសការងារដល់ប្រជាពលរដ្ឋចំនួនជិត៩០០នាក់

ស្ថាប័នថ្នាក់ជាតិចូលរួមអនុវត្តវិធានការសន្សំសំចៃថាមពល ខណៈវិបត្តិប្រេងឥន្ធនៈសកលបន្តហក់ឡើង

គណៈកម្មាធិការ គ.ស.រ.ជ. បើកកិច្ចប្រជុំពិនិត្យ ពិភាក្សា និងការដោះស្រាយបញ្ហាប្រឈមវិស័យឯកជន

រដ្ឋបាលខេត្តព្រះសីហនុ បានបើកវគ្គបណ្តុះបណ្តាលស្តីពីការគ្រប់គ្រងសំរាម សំណល់រឹង ទីប្រជុំជន

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានជាតិ

កម្មវិធីរៀនដេរ បានលុយ បានផ្តល់ឱកាសការងារដល់ប្រជាពលរដ្ឋចំនួនជិត៩០០នាក់

ស្ថាប័នថ្នាក់ជាតិចូលរួមអនុវត្តវិធានការសន្សំសំចៃថាមពល ខណៈវិបត្តិប្រេងឥន្ធនៈសកលបន្តហក់ឡើង​

គណៈកម្មាធិការ គ.ស.រ.ជ. បើកកិច្ចប្រជុំពិនិត្យ ពិភាក្សា និងការដោះស្រាយបញ្ហាប្រឈមវិស័យឯកជន

រដ្ឋបាលខេត្តព្រះសីហនុ បានបើកវគ្គបណ្តុះបណ្តាលស្តីពីការគ្រប់គ្រងសំរាម សំណល់រឹង ទីប្រជុំជន

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ស្ថាប័នថ្នាក់ជាតិចូលរួមអនុវត្តវិធានការសន្សំសំចៃថាមពល ខណៈវិបត្តិប្រេងឥន្ធនៈសកលបន្តហក់ឡើង