BTV NEWS

ក្រសួងព័ត៌មាន ប្រគល់ថវិកា ១០៦លានរៀល ប្រមូលបានពីព្រឹត្តិការណ៍រត់ដើម្បីមនុស្សធម៌ «ដើម្បីកុមារ ដើម្បីអនាគតយើង» ជូនមូលនិធិគន្ធបុប្ផាកម្ពុជា សម្រាប់គាំទ្រការព្យាបាល និងថែទាំសុខភាពកុមារដោយឥតគិតថ្លៃ

អាជ្ញាធរខេត្តប៉ៃលិនចុះពិនិត្យការប្រមូលផលទុរេន ដើម្បីបង្ការការក្លែងបន្លំ ខណៈឆ្នាំនេះទីផ្សារល្អជាងឆ្នាំមុន

ចៅក្រមស៊ើបសួរសម្រេចឃុំខ្លួនមន្ត្រីនគរបាល-អាវុធហត្ថខេត្តកំពត និងអ្នកទទួលផលចោរកម្មសរុបចំនួន ៤៧នាក់

គណៈកម្មការទី១ ព្រឹទ្ធសភា រួមជាមួយក្រុមសមាជិកព្រឹទ្ធសភាភូមិភាគទី៤ ប្រារព្ធទិវាកុមារអន្តរជាតិ និងទិវាប្រឆាំងពលកម្មកុមារ នៅខេត្តបាត់ដំបង

ព័ត៌មានជាតិ

ឯកឧត្តម ហេង រតនា ជំរុញក្រុមការងារចុះមូលដ្ឋានពង្រឹងសាមគ្គីភាព និងបន្តចុះជួបជាមួយពលរដ្ឋជាប្រចាំ ជាពិសេសត្រូវប្រមូលព័ត៌មានពីកង្វល់នានារបស់ពលរដ្ឋ ដើម្បីដោះស្រាយឱ្យបានទាន់ពេលវេលា

កណ្តាល៖ ឯកឧត្តម ហេង រតនា អនុប្រធានក្រុមការងារគណបក្សចុះមូលដ្ឋានខេត្តកណ្តាលបានជំរុញក្រុមការងារគណបក្សចុះមូលដ្ឋានស្រុកលើកដែក ពង្រឹងសាមគ្គីភាពគ្នាឲ្យរឹងមាំ និង បន្តការងារចិញ្ចឹមចលនានៅមូលដ្ឋានដោយចុះជួបសួរសុខទុក្ខប្រជាពលរដ្ឋឲ្យបានជាប់ជាប្រចាំ ជាពិសេសត្រូវប្រមូលព័ត៌មានពីកង្វល់នានារបស់ប្រជាពលរដ្ឋ ដើម្បីដោះស្រាយឱ្យបានទាន់ពេលវេលា ។ ឯកឧត្តម ហេង រតនា ក្នុងនាមជាអនុប្រធានក្រុម ការងារគណបក្សចុះមូលដ្ឋានខេត្តកណ្តាល និងជាប្រធានគណៈអចិន្រ្តៃយ៍ក្រុមការងារគណបក្សចុះមូលដ្ឋានស្រុក លើកដែកបានកោតសរសើរ និងវាយតម្លៃខ្ពស់ដូចនេះ ក្នុងខណះដឹកនាំបើកកិច្ចប្រជុំបូកសរុបការងារគណបក្សប្រចាំឆ្នាំ ២០២៥ និងលើកទិសដៅអនុវត្តបន្តឆ្នាំ២០២៦ របស់ក្រុម ការងារគណបក្សចុះមូលដ្ឋានស្រុកលើកដែកនាថ្ងៃទី ១៧ខែមករា ឆ្នាំ ២០២៦ នេះនៅទីស្នាក់ការគណបក្ស ប្រជាជនកម្ពុជា ស្រុកលើកដែក ខេត្តកណ្តាល ។នៅក្នុងឱកាសនោះឯកឧត្តម ហេង រតនា ក៏បានវាយ តម្លៃខ្ពស់ពីស្មារតី ឆន្ទៈ និងការលះបង់ ព្រមទាំងការទទួលខុសត្រូវខ្ពស់នូវរាល់ភារកិច្ចគណបក្សរបស់ថ្នាក់ដឹក នាំ និងសមាជិក-សមាជិការគណបក្សក្នុងមូលដ្ឋានស្រុក លើក ដែក ខេត្តកណ្តាលគ្រប់ឋានានុក្រម និងក្រុមការងារចុះ មូលដ្ឋានទាំងអស់ ដែលធ្វើឲ្យក្នុងមូលដ្ឋានមានការរីក ចម្រើននិងទទួលបានការគាំទ្រពីពលរដ្ឋជាបន្តបន្ទាប់មកលើគណបក្សប្រជាជនកម្ពុជា ។ ព្រមទាំងបានលើកទឹក ចិត្តដល់សមាជិកសមាជិការបក្សទាំងអស់រក្សាការពង្រឹង ស្មារតី និងឆន្ទៈ ហើយបោះឆ្នោតជូនគណបក្សប្រជាជនកម្ពុជា ដោយគោរពស្មោះត្រង់តាមគោលការណ៍គណបក្ស ។ ជាមួយគ្នានេះ ឯកឧត្តមប្រធានក្រុមការងារបានជំរុញទៅសមាជិកគណបក្សទាំងអស់ត្រូវបន្តធ្វើអំពើល្អលើពលរដ្ឋ និងត្រូវជួយបំពេញតម្រូវការសេវារដ្ឋបាលសាធារណៈទូទៅឲ្យបានទាន់ពេលវេលា ជាពិសេសបញ្ហាសុខមាលភាពជូនប្រជាពលរដ្ឋទាំងអស់ដោយមិនមានការរើសអើងនិន្នាការនយោបាយឡើយ. ដើម្បីរក្សាភាពជឿជាក់ និងទំនុកចិត្តមកលើគណបក្សប្រជាជនកម្ពុជាឲ្យបានកាន់តែច្រើនឡើង ។ បើតាមលោក ចាប ចន្ទ័វិទ្យា ប្រធានគណះកម្មាធិការបក្សស្រុកលើកដែកបានឲ្យដឹងថា ស្រុកលើកដែកនាពេលបច្ចុប្បន្ន គឺរក្សាស្ថេរភាព សុវត្ថិភាព សន្តិសុខ នយោបាយសង្គមបានល្អប្រសើរ សមត្ថកិច្ច ប៉ុស្តិ៍រដ្ឋបាល កម្លាំងប្រជាការពារ និងអាជ្ញាធរដែនដីគ្រប់ថ្នាក់បានសហការល្អ លើការពង្រឹងអនុវត្តគោលនយោបាយភូមិឃុំមានសុវត្ថិភាព បង្កបរិយាកាសសុខដុម ផ្តល់ឱកាសជូនប្រជាជនបានរស់នៅប្រកបមុខរបរជាប្រក្រតីភាពមិនមានការភ័យខ្លាច។ លោកបន្តថា គណបក្សស្រុក បានសហការជាមួយក្រុមការងារ ត្រៀមលក្ខណៈរៀបចំយ៉ាងហ្មត់ចត់នូវកិច្ចការនានា សម្រាប់ឈានទៅនិងកាន់ប្រៀបឈ្នះ ធានាសម្រេចបានជោគជ័យ(សមាជិក១នាក់សំឡេងគាំទ្រ១សន្លឹក) ដើម្បីគណបក្សប្រជាជនកម្ពុជាដឹកនាំគ្រប់ឃុំទូទាំងស្រុក ។ ដូច្នេះដើម្បីសម្រេចគោលដៅ យើងបានពុះពារសម្រេចបាននូវគ្រប់ការងារសំខាន់ៗបម្រើឲ្យការបោះឆ្នោត ដូចជា ការលើកកម្ពស់ប្រសិទ្ធិភាពនៃការដឹកនាំគ្រប់គ្រង ដោយបន្តការកសាងពង្រឹងរចនាសម្ព័ន្ធ អង្គការចាត់តាំង និងរបៀប របបការងារពង្រឹងការគ្រប់គ្រងកសាងពង្រីកសមាជិកថ្មី និងកម្លាំងគាំទ្រគណបក្សនៅមូលដ្ឋាននិងការលើកទឹកចិត្តសមាជិកគណបក្ស ទៅពិនិត្យ និងចុះឈ្មោះក្នុងបញ្ជីបោះ ឆ្នោតរបស់គ.ជ.ប ។ ដោយឡែកការធ្វើបច្ចុប្បន្នភាពជីវមាត្រ មានចំនួន ១៦.០៤៦ នាក់ ស្រី ៨.៩៤១ នាក់ ក្នុងនោះCPP ចំនួន ១៥.០៤៦នាក់ (ស្រី ៨.៦១៦នាក់ )។ ដោយប្រជាពលរដ្ឋទូទាំងស្រុកលើកដែកមានឈ្មោះក្នុងបញ្ជីបោះឆ្នោតឆ្នាំ ២០២៥សរុប ៣៩.៣២៧ នាក់ (ស្រី ២០.៥៦៣នាក់)ក្នុងនោះមានសមាជិកគណបក្សចំនួន ២៨.០១៨នាក់ (ស្រី ១៥.៤៣០ នាក់)ស្មើ ៧២%ដែលជាសមាជិកដែលមានទិន្នន័យក្នុងប្រព័ន្ធ ៕ អត្ថបទ៖ ភារម្យ

ឯកឧត្ដមអភិបាលខេត្ត អញ្ជើញដឹកនាំក្រុមការងារចុះកាត់បន្លែក្នុងកសិដ្ឋានជនភៀសសឹក ដើម្បីពង្រឹងសន្តិសុខស្បៀង

ក្នុងយុទ្ធសាស្ត្រ "យកកសិកម្មទ្រទ្រង់ជីវភាពក្នុងគ្រាអាសន្ន" ឯកឧត្តម មាន ចាន់យ៉ាដា អភិបាលនៃគណៈអភិបាលខេត្តឧត្តរមានជ័យ បានដឹកនាំក្រុមការងារចុះផ្ទាល់ទៅកាន់ «កសិដ្ឋានកសិកម្មជនភៀសសឹក» មណ្ឌលសុវត្ថិភាពបាត់ថ្កៅ ដើម្បីប្រមូលផលបន្លែបង្ការជាច្រើនមុខ សម្រាប់យកទៅចែកចាយជូនបងប្អូនជនភៀសសឹក សំដៅធានាឱ្យបាននូវភាពគ្រប់គ្រាន់ និងនិរន្តរភាពនៃស្បៀងអាហារ នៅរសៀលថ្ងៃទី១៧ ខែមករា ឆ្នាំ២០២៦នេះ។ឯកឧត្តម មាន ចាន់យ៉ាដា បានមានប្រសាសន៍សរសើរដល់ការខិតខំរបស់បងប្អូនជនភៀសសឹកថា "បន្លែដែលយើងកាត់នៅថ្ងៃនេះ គឺជាផ្លែផ្កានៃការតស៊ូ និងសាមគ្គីភាព។ ការដែលយើងអាចដាំដុះ និងប្រមូលផលដោយខ្លួនឯងបែបនេះ គឺជាមធ្យោបាយដ៏ល្អបំផុតក្នុងការធានាថា គ្មានបងប្អូនណាម្នាក់ខ្វះអាហារបរិភោគឡើយ។ រដ្ឋបាលខេត្តនឹងបន្តគាំទ្រផ្នែកបច្ចេកទេស និងពូជដំណាំបន្ថែមទៀត ដើម្បីឱ្យកសិដ្ឋាននេះក្លាយជាជង្រុកស្បៀងដ៏រឹងមាំបំផុតសម្រាប់យើងទាំងអស់គ្នា។"ឯកឧត្ដម អភិបាលខេត្ត ចុះកាត់បន្លែពីកសិដ្ឋានយកមកផ្គត់ផ្គង់ដោយផ្ទាល់នេះ បានឆ្លុះបញ្ចាំងពីយុទ្ធសាស្ត្រគ្រប់គ្រងគ្រោះអាសន្នដ៏ឆ្លាតវៃ ដោយបានផ្លាស់ប្តូរស្ថានភាពពីការ "រង់ចាំជំនួយ" មកជាការ "ម្ចាស់ការលើខ្លួនឯង" ក្នុងការធានាយ៉ាងរឹងមាំនូវខ្សែសង្វាក់ផ្គត់ផ្គង់ម្ហូបអាហារ។ នេះគឺជាគំរូនៃភាពជោគជ័យក្នុងការចេះទាញយកសក្តានុពលដីធ្លី មកដោះស្រាយបញ្ហាប្រឈមចំពោះមុខ ប្រកបដោយប្រសិទ្ធភាពខ្ពស់បំផុតផងដែរ៕

លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អញ្ជើញប្រគល់ផ្ទះថ្មីចំនួន ៤ខ្នង ជូនក្រុមគ្រួសារវីរកងទ័ពពលី

ដោយការគិតគូរយ៉ាងយកចិត្តទុកដាក់នៅរសៀលថ្ងៃទី១៧ ខែមករា ឆ្នាំ២០២៦នេះ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានអញ្ជើញប្រគល់ផ្ទះថ្មី ចំនួន ៤ខ្នង ជូនដល់ក្រុមគ្រួសារនៃវីរយុទ្ធជនពលី ដោយផ្ទះថ្មី ១ខ្នង ត្រូវបានប្រគល់ជូនក្រុមគ្រួសាររស់នៅក្នុងខេត្តត្បូងឃ្មុំ និងផ្ទះថ្មី ៣ខ្នង ប្រគល់ជូនក្រុមគ្រួសារនៅក្នុងខេត្តកំពង់ចាម។លោកជំទាវបណ្ឌិត បានពាំនាំប្រសាសន៍ចូលរួមរំលែកមរណទុក្ខដ៏ក្រៀមក្រំបំផុត និងប្រសាសន៍សួរសុខទុក្ខពីសម្តេចអគ្គមហាសេនាបតីតេជោ ហ៊ុន សែន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន រួមទាំង សម្តេចមហាបវរធិបតី ហ៊ុន ម៉ាណែត ជូនដល់ក្រុមគ្រួសារនៃសពផងដែរ ។ ទន្ទឹមនឹងនេះ លោកជំទាវបណ្ឌិត ក៏បាននាំយកមកជាមួយនូវអំណោយដ៏ថ្លៃថ្លារបស់ សម្តេចបវរធិបតី និងលោកជំទាវបណ្ឌិត មានដូចជាថវិកា សម្ភារៈប្រើប្រាស់ ស្បៀងអាហារ និងគ្រឿងឧបភោគបរិភោគ ជូនដល់ក្រុមគ្រួសារនៃសព ដើម្បីជួយសម្រួលដល់ការរស់នៅប្រចាំថ្ងៃ។រាជរដ្ឋាភិបាលកម្ពុជា រួមទាំងប្រជាជនកម្ពុជាទាំងអស់សូមចងចាំនូវវីរភាពដ៏អង់អាចក្លាហានរបស់ វីរកងទ័ព និងវីរនគរបាលជាតិ ដែលបានពលីអាយុជីវិតដើម្បីការពារបូរណភាពទឹកដី ក៏ដូចជាការផ្តល់ជូនមកវិញនូវសន្តិភាពជូនជាតិ មាតុភូមិ ។សូមបញ្ជាក់ផងដែរថា សម្តេចបវរធិបតី បានដាក់ចេញនូវគោលនយោបាយ និងយន្តការជាច្រើនដើម្បីជួយសម្រួលដល់ក្រុមគ្រួសាររបស់យុទ្ធជនពលីដូចជាការផ្តល់ឱ្យមុខរបរចិញ្ចឹមជីវិត ការស្រោចស្រង់សមាជិកគ្រួសារ ការផ្តល់អាហារូបករណ៍ដល់កូនៗបានសិក្សាកម្រិតបរិញ្ញាបត្រ ការរៀបចំឥណទានសារជាថ្មី ការដោះស្រាយបំណុលជូនវីរយុទ្ធជនក្នុងសមរភូមិ ថែមទាំងមានការគិតគូរបង្កើតជាមូលនិធិសម្រាប់ជួយទ្រទ្រង់ដល់ក្រុមគ្រួសារវីរយុទ្ធជនពលីទៀតផង។ បន្ថែមពីលើនេះ រាជរដ្ឋាភិបាលក៏បាននិងកំពុងជួយសម្របសម្រួលឱ្យជនភៀសសឹកបានទៅផ្ទះសំបែងវិញ ការជួយដោះស្រាយហេដ្ឋារចនាសម្ព័ន្ធ ការជួយបោសសម្អាតអាវុធ គ្រាប់ យុទ្ធភ័ណ្ឌមិនទាន់ផ្ទុះ និងការស្តារជីវភាពរស់នៅប្រចាំថ្ងៃជាដើម៕

«អគារពហុបំណង និងហេដ្ឋារចនាសម្ព័ន្ធពាក់ព័ន្ធ» ដែលជាសមិទ្ធផលរបស់គម្រោងស្តារវិស័យទេសចរណ៍សហគមន៍ពីវិបត្តិកូវីដ-១៩ ត្រូវបានសម្ពោធដាក់ឱ្យប្រើប្រាស់ជាផ្លូវការនៅថ្ងៃនេះ

ខេត្តតាកែវ ៖ ព្រឹកថ្ងៃទី១៧ ខែមករា ឆ្នាំ២០២៦ ឯកឧត្តម ជា វ៉ាន់ដេត រដ្ឋមន្រ្តីក្រសួងប្រៃសណីយ៍និងទូរគមនាគមន៍ (ក.ប.ទ.) និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តតាកែវ និងលោក NAGASE Kensuke (ណាហ្គាសិ កេនស៊ូកិ) អនុប្រធានបេសកកម្មនៃស្ថានទូតជប៉ុនប្រចាំកម្ពុជា បានអញ្ជើញជាអធិបតីក្នុងពិធីសម្ពោធដាក់ឱ្យប្រើប្រាស់ជាផ្លូវការ "អគារពហុបំណង និងហេដ្ឋារចនាសម្ព័ន្ធពាក់ព័ន្ធ" ដែលជាសមិទ្ធផលរបស់គម្រោងស្តារវិស័យទេសចរណ៍សហគមន៍ពីវិបត្តិកូវីដ-១៩ នៅសាលាស្រុកអង្គរបូរី ខេត្តតាកែវ ដោយមានការនិមន្ត/ចូលរួមពីព្រះសង្ឃ ឯកឧត្តមអភិបាលនៃគណៈអភិបាលខេត្ត ឯកឧត្តម លោកជំទាវ សមាជិក សមាជិកា ព្រឹទ្ធសភា រដ្ឋសភា ឯកឧត្តម លោកជំទាវ ប្រធានក្រុមការងារក្រុង ស្រុក ភាគីពាក់ព័ន្ធ ប្រជាពលរដ្ឋក្នុងមូលដ្ឋាន លោកគ្រូ អ្នកគ្រូ និងសិស្សានុសិស្សប្រមាណ ១៤៥០ អង្គ/នាក់។ថ្លែងក្នុងពិធីនេះ ឯកឧត្តមរដ្ឋមន្រ្តី បានប្រសាសន៍ថា រាជរដ្ឋាភិបាលកម្ពុជាក្រោមការដឹកនាំដ៏ឈ្លាសវៃរបស់សម្ដេចធិបតីនាយករដ្ឋមន្រ្តី បានដាក់ចេញយុទ្ធសាស្រ្តបញ្ចកោណ ដំណាក់កាលទី១ ដោយបានកំណត់អាទិភាពចំនួន៥ គឺ មនុស្ស ផ្លូវ ទឹក ភ្លើង និងបច្ចេកវិទ្យា ដែលពិតជាឆ្លើយតបនឹងតម្រូវការរបស់ប្រជាពលរដ្ឋគ្រប់មជ្ឈដ្ឋាន ហើយរដ្ឋាភិបាលបាននិងកំពុងអនុវត្ត ព្រមទាំងទទួលបានលទ្ធផលគួរជាទីមោទនៈ។ ចំពោះការឈ្លានពានពីសំណាក់កងទ័ពថៃ ឯកឧត្តមរដ្ឋមន្រ្តី បានអំពាវនាវដល់ប្រជាពលរដ្ឋគ្រប់មជ្ឈដ្ឋានបន្តជឿជាក់លើរាជរដ្ឋាភិបាល ក្រោមការដឹកនាំរបស់សម្តេចតេជោ-ធិបតី និងរួបរួមគ្នាសាមគ្គីជាធ្លុងមួយ។ជាមួយគ្នានេះដែរ ឯកឧត្តមរដ្ឋមន្រ្តី បានលើកទឹកចិត្តឱ្យអាជ្ញាធរមូលដ្ឋាន និងប្រជាពលរដ្ឋ ក៏ដូចជាប្រជាកសិករ ឱ្យខិតខំធ្វើយ៉ាងបង្កើនប្រសិទ្ធភាពនិងបរិមាណដាំដុះ បន្លែ ផ្លែឈើ និងចិញ្ចឹមសត្វ ជាពិសេសចិញ្ចឹមបង្កងដោយមានការជួយជ្រោមជ្រែងពីគម្រោងតេជោភូមិ១០០ វេទិកាសម្ព័ន្ធសង្គមស៊ីវិល និងភាគីពាក់ព័ន្ធទាំងអស់។ បន្ថែមលើនេះ ឯកឧត្តមរដ្ឋមន្រ្តី បន្តថាដើម្បីប្រមូលផលបានទៀងទាត់ប្រជាកសិករ និងអាជ្ញាធរមូលដ្ឋានត្រូវចងក្រងប្រមូលផ្តុំជាសហគមន៍ដើម្បីជួយគាំទ្រគ្នាទៅវិញទៅមកទាំងបច្ចេកទេស ស្មារតី និងការស្វែងរកទីផ្សារ។មុននឹងបញ្ចប់ ឯកឧត្តមរដ្ឋមន្រ្តី បានផ្តល់អនុសាសន៍ដល់អាជ្ញាធរគ្រប់លំដាប់ត្រូវខិតខំ រៀបចំកែលម្អសោភ័ណភាពស្រុក ដាំដើមឈើ ពង្រឹងគុណភាពនិងអនាម័យម្ហូបអាហារ និងផ្តល់ភាពកក់ក្តៅដល់ភ្ញៀវទេសចរ ដែលមកទស្សនាស្រុកអង្គរបូរី អតីតរាជធានីខ្មែរសម័យហ្វូណន៕

ឯកឧត្តមបណ្ឌិតសភាចារ្យ ហង់ ជួនណារ៉ុន៖ ការអប់រំប្រកបដោយគុណភាពនឹងជួយបង្កើតយុវជនមានទាំងចំណេះដឹង ជំនាញ និងសីលធម៌ សមស្របនឹងតម្រូវការសង្គម

ឯកឧត្តមបណ្ឌិតសភាចារ្យ ហង់ ជួនណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំយុវជន និងកីឡា បានថ្លែងបញ្ជាក់ថា ការអប់រំប្រកបដោយគុណភាពនឹងជួយបង្កើតយុវជនដែលមានទាំងចំណេះដឹង ជំនាញ និងសីលធម៌ សមស្របនឹងតម្រូវការសង្គមសម័យសតវត្សរ៍ទី២១។ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានថ្លែងយ៉ាងដូច្នេះក្នុងឱកាសដែលឯកឧត្ដម អញ្ជើញធ្វើបាឋកថាពិសេស ស្ដីពី «យុវជន និងការអប់រំនៅកម្ពុជាឆ្នាំ២០៣០» ក្នុងកម្មវិធីបោះជំរំយុវជនជាសកលលើកទី១១ នាព្រឹកថ្ងៃទី១៧ ខែមករា ឆ្នាំ២០២៥ នៅស្រុកបន្ទាយស្រី ខេត្តសៀមរាប។ឯកឧត្តម ឧបនាយករដ្ឋមន្ត្រី បានមានប្រសាសន៍បន្តថា យុវជនត្រូវបានចាត់ទុកថាជាកម្លាំងស្នូល និងជាធនធានមនុស្សដ៏មានតម្លៃបំផុតសម្រាប់អនាគតនៃប្រទេសជាតិ។ ក្នុងបរិបទនៃការផ្លាស់ប្តូររហ័សផ្នែកសេដ្ឋកិច្ច សង្គម និងបច្ចេកវិទ្យាសកល ប្រធានបទ«យុវជន និងការអប់រំនៅកម្ពុជាឆ្នាំ២០៣០» បង្ហាញពីចក្ខុវិស័យវែងឆ្ងាយក្នុងការអភិវឌ្ឍយុវជនឱ្យមានសមត្ថភាពពេញលេញ ដើម្បីក្លាយជាកម្លាំងដឹកនាំ និងចូលរួមយ៉ាងសកម្មក្នុងការកសាងប្រទេសជាតិឱ្យមានភាពរឹងមាំ និងចីរភាព។ឯកឧត្តមបណ្ឌិតសភាចារ្យ ហង់ ជួនណារ៉ុន បានបន្ថែមថា ការអប់រំជាគ្រឹះសំខាន់បំផុតសម្រាប់ការអភិវឌ្ឍយុវជននៅកម្ពុជា ឆ្នាំ២០៣០។ ការអប់រំនាពេលអនាគត មិនត្រឹមតែផ្តោតលើការផ្ទេរចំណេះដឹងតាមសៀវភៅប៉ុណ្ណោះទេ ប៉ុន្តែត្រូវផ្តោតលើការអភិវឌ្ឍសមត្ថភាពជាក់ស្តែង ដូចជា ជំនាញគិតវិភាគ ការដោះស្រាយបញ្ហា ការច្នៃប្រឌិត ការងារជាក្រុម និងការទំនាក់ទំនងប្រកបដោយប្រសិទ្ធភាព។ឯកឧត្តមបានសង្គត់ធ្ងន់ថា «ការអប់រំប្រកបដោយគុណភាពនឹងជួយបង្កើតយុវជនដែលមានទាំងចំណេះដឹង ជំនាញ និងសីលធម៌ សមស្របនឹងតម្រូវការសង្គមសម័យសតវត្សរ៍ទី២១។»ឯកឧត្តម រដ្ឋមន្ត្រីបានរំលេចផងដែរថា ក្នុងយុគសម័យឌីជីថល ការបញ្ចូលបច្ចេកវិទ្យា និងបញ្ញាសិប្បនិម្មិតក្នុងវិស័យអប់រំ គឺជាកត្តាសំខាន់មួយសម្រាប់កម្ពុជាឆ្នាំ២០៣០។ យុវជនត្រូវមានសមត្ថភាពប្រើប្រាស់បច្ចេកវិទ្យាព័ត៌មាន និងឧបករណ៍ឌីជីថលដោយច្នៃប្រឌិត មានទំនួលខុសត្រូវ និងមានសុវត្ថិភាព។ ការរៀនតាមប្រព័ន្ធឌីជីថល និងការរៀនពេញមួយជីវិត នឹងជួយបើកឱកាសសិក្សាស្មើភាព និងបង្កើនសមត្ថភាពប្រកួតប្រជែងរបស់យុវជននៅលើឆាកជាតិ និងអន្តរជាតិ។ជាមួយគ្នានេះ ការអប់រំនៅកម្ពុជា ២០៣០ ត្រូវតភ្ជាប់យ៉ាងជិតស្និទ្ធជាមួយទីផ្សារការងារ និងការអភិវឌ្ឍសេដ្ឋកិច្ច។ ការផ្តោតលើជំនាញវិជ្ជាជីវៈ STEM សហគ្រិនភាព នវានុវត្តន៍ និងការអនុវត្តជាក់ស្តែង នឹងជួយឱ្យយុវជនអាចរកការងារធ្វើបាន មានសមត្ថភាពបង្កើតអាជីវកម្មផ្ទាល់ខ្លួន និងអាចសម្របខ្លួនទៅនឹងការប្រែប្រួលនៃពិភពការងារនាពេលអនាគត។ដើម្បីសម្រេចបាននូវចក្ខុវិស័យ «យុវជន និងការអប់រំនៅកម្ពុជា ២០៣០» ការចូលរួម រួមគ្នារបស់រាជរដ្ឋាភិបាល ស្ថាប័នអប់រំ គ្រួសារ សហគមន៍ វិស័យឯកជន និងយុវជនផ្ទាល់ គឺមានសារៈសំខាន់យ៉ាងខ្លាំង។ ការបង្កើតបរិយាកាសអប់រំដែលគាំទ្រ លើកទឹកចិត្ត និងផ្តល់ឱកាសស្មើភាព នឹងជួយបណ្តុះបណ្តាលយុវជនកម្ពុជាឱ្យក្លាយជាពលរដ្ឋមានចក្ខុវិស័យ មានស្មារតីទទួលខុសត្រូវ និងមានសមត្ថភាពចូលរួមយ៉ាងសកម្មក្នុងការអភិវឌ្ឍប្រទេសជាតិ។ឯកឧត្ដមបានបញ្ជាក់ផងដែរថា ប្រធានបទ «យុវជន និងការអប់រំនៅកម្ពុជា ២០៣០» បង្ហាញពីបេសកកម្មរួមក្នុងការកសាងយុវជនឱ្យមានគុណភាព គុណធម៌ និងសមត្ថភាពគ្រប់វិស័យ ដើម្បីធានាថាកម្ពុជាអាចឈានទៅរកការអភិវឌ្ឍប្រកបដោយចីរភាព និងមានកិត្តិយសក្នុងសហគមន៍អន្តរជាតិនៅឆ្នាំ២០៣០៕

បណ្ណាល័យនិងជ្រុងតម្រង់ទិសវិជ្ជាជីវៈ នៅវិទ្យាល័យប៊ុនរ៉ានី ហ៊ុនសែន ចរិយាវង្ស ខេត្តកែប បានបើកសម្ពោធជាផ្លូវការក្រោមជំនួយពីដៃគូអភិវឌ្ឍន៍

ខេត្តកែប៖ នាព្រឹកថ្ងៃសៅរ៍ ទី១៧ ខែមករា ឆ្នាំ២០២៦ នេះ អង្គការស៊ីប៉ាបានប្រារព្ធពិធីសម្ពោធបើកជាផ្លូវការបណ្ណាល័យ និងជ្រុងតម្រង់ទិសវិជ្ជាជីវៈ និងពិព័រណ៍មគ្គុទ្ទេសក៏អាជីព និងការសិក្សា នៅវិទ្យាល័យប៊ុនរ៉ានី ហ៊ុនសែន ចរិយាវង្ស ខេត្តកែប ក្រោមជំនួយឧបត្ថម្ភថវិកាពីមូលនិធិគីណាល់ និងទីភ្នាក់ងារបារាំងសម្រាប់អភិវឌ្ឍន៍(AFD) និងភាពជាដៃគូជាមួយក្រសួងអប់រំយុវជន និងកីឡា។ពិធីនេះមានការអញ្ជើញចូលរួមពីសំណាក់ លោកឧកញ៉ា ឱសថបណ្ឌិត ហៃ លីអ៊ាង ប្រធានមូលនិធិគីណាល់ និងជាប្រធានអគ្គនាយកក្រុមហ៊ុន PPM-Confirel លោកប្រធានមន្ទីរអប់រំ យុវជន និងកីឡាខេត្តកែប លោកអគ្គនាយកអង្គការស៊ីប៉ា លោកគ្រូ អ្នកគ្រូ និងសិស្សានុសិស្សសរុប ៣០០នាក់។បណ្តាល័យនេះ មានអត្ថន័យសំខាន់ណាស់ក្នុងការផ្តល់នូវធនធានអប់រំ សៀវភៅ និងអភិវឌ្ឍជំនាញនានា ដែលមានប្រយោជន៍សម្រាប់អនាគតរបស់សិស្សវិទ្យាល័យ ព្រមទាំងជួយពង្រឹងទស្សនៈនៃការសិក្សាយូរអង្វែងផងដែរ។ ក្រោយពិធីសម្ពោធគណៈអធិបតី ព្រមទាំងសិក្សានុសិស្សបានចូលរួមក្នុង ពិព័រណ៍មគ្គុទ្ទេសក៍អាជីព និងការសិក្សា ដែលមានសារៈសំខាន់ក្នុងការជួយដល់សិស្សាវិទ្យាល័យស្វែងយល់អំពីអាជីព និងការសិក្សានាពេលអនាគត ដើម្បីឱ្យពួកគេរៀបចំខ្លួនរួចរាល់ និងមានគោលដៅច្បាស់លាស់បន្ទាប់ពីបញ្ចប់ថ្នាក់វិទ្យាល័យ៕

ឃាត់ខ្លួនជនបរទេស ៧៥នាក់ សង្ស័យលួចប្រព្រឹត្តអំពើឆបោកតាមប្រព័ន្ធបច្ចេកវិទ្យានៅ រាជធានីភ្នំពេញ

ភ្នំពេញ៖ ក្នុងយុទ្ធនាការបោសសម្អាតបទល្មើសបច្ចេកវិទ្យាទូទាំងប្រទេស គណៈបញ្ជាការឯកភាពរដ្ឋបាលរាជធានីភ្នំពេញបានបន្តបើកប្រតិបត្តិការកាលពីថ្ងៃទី១៦ ខែមករា ឆ្នាំ២០២៦ ដោយបានឃាត់ខ្លួនជនបរទេសសរុបចំនួន ៧៥នាក់ ដែលសង្ស័យថាមានការពាក់ព័ន្ធនឹងអំពើច្បាប់ហាមឃាត់ ក្នុងនោះសង្ស័យមានការលបលួចធ្វើសកម្មភាពឆបោកតាមប្រព័ន្ធបច្ចេកវិទ្យា និងស្នាក់នៅដោយខុសច្បាប់។ក្នុងប្រតិបត្តិការនេះ កម្លាំងសមត្ថកិច្ចបានចុះអនុវត្តវិធានការរដ្ឋបាល ក្នុងភូមិសាស្ត្រខណ្ឌចំនួនពីរ រួមមាន៖ ១. ទីតាំងសណ្ឋាគារ សេវេន ហេវិន ស្ថិតនៅខណ្ឌ៧មករា ៖ ឃាត់ខ្លួនបាន ចំនួន ៣៩ នាក់ (ជនជាតិប៉ាគីស្ថាន៖ ២៦ នាក់, ជនជាតិឥណ្ឌា ១១ នាក់ និងជនជាតិបង់ក្លាដេស ០២ នាក់ ) និងទី២. ទីតាំងផ្ទះសំណាក់ C8 ស្ថិតនៅខណ្ឌសែនសុខ ឃាត់ខ្លួនបាន ៣៦ នាក់ ( ជនជាតិឥណ្ឌា ២៥នាក់ ក្នុងនោះស្រី្ត ០៤ នាក់) និងជនជាតិបង់ក្លាដេសចំនួន ១១នាក់។ការចុះបង្ក្រាបនេះ ធ្វើឡើងស្របតាមខ្លឹមសារនៃ អនុក្រឹត្យលេខ ០៣ របស់រាជរដ្ឋាភិបាល ស្តីពីការគ្រប់គ្រងសន្តិសុខសុវត្ថិភាពតាមទីតាំង រស់នៅប្រមូលផ្តុំ និងជាផ្នែកមួយនៃយុទ្ធនាការថ្នាក់ជាតិក្នុងការប្រយុទ្ធប្រឆាំងនឹងការឆបោកតាមប្រព័ន្ធបច្ចេកវិទ្យា។គួររម្លឹកថា ក្នុងប្រតិបត្តិការបង្រ្កាបសកម្មភាពឆបោកតាម ប្រព័ន្ធបច្ចេកវិទ្យា នៅទូទាំងប្រទេស ក្នុងរយៈពេល មួយសប្តាហ៍ចុងក្រោយនេះ ចាប់ពីចាប់ពីថ្ងៃទី១១ ដល់ថ្ងៃទី១៦ ខែមករា ឆ្នាំ២០២៦ សមត្ថកិច្ចចុះប្រតិបត្តិការបង្ក្រាបសរុបបាន ៤ទីតាំង នៅរាជធានីភ្នំពេញ ចំនួន២កន្លែង និងខេត្តបាត់ដំបង២កន្លែង ឃាត់ខ្លួនជនសង្ស័យសរុប ១២៣នាក់(ស្រី្ត៩នាក់) ក្នុងនោះជនជាតិចិន ៤៦នាក់(ស្រី្ត ៤នាក់) ស្ត្រីជនជាតិឡាវ ១នាក់, ឥណ្ឌា ៣៦នាក់(ស្រី្ត ៤នាក់), បង់ក្លាដេស ១៣នាក់ និងប៉ាគីស្ថាន ២៧នាក់។លេខាធិការដ្ឋានគ.ប.ឆ.ប. បានបញ្ជាក់ថា បើគិតពីថ្ងៃទី១ខែមករា ដល់ថ្ងៃទី១៦ខែមករា ឆ្នាំ២០២៦វិញ ចុះបង្ក្រាបសរុបបាន ១៤ទីតាំង នៅរាជធានីភ្នំពេញ បាត់ដំបង សៀមរាប ដោយឃាត់ខ្លួនជនសង្ស័យសរុប ១៦២ នាក់ ក្នុងនោះជនជាតិចិន ៥០នាក់, កូរ៉េខាងត្បូង៣២នាក់, ឡាវ ១នាក់, ឥណ្ឌា ៣៦នាក់(ស្រី្ត ៤នាក់), បង់ក្លាដេស ១៣នាក់, ប៉ាគីស្ថាន ២៧នាក់ និងនេប៉ាល់ ៣នាក់។ ដោយឡែក សំណុំរឿងជនជាតិនេប៉ាល់ ៣នាក់ នេះ កំពុងស្ថិតក្នុងនីតិវិធីតុលាការ ដោយសាលាដំបូងខេត្តសៀមរាបបានចេញ ដីកាឃុំខ្លួនបណ្ដោះអាសន្ន រង់ចាំការអនុវត្តនីតិវិធីតាមច្បាប់។សូមបញ្ជាក់ថា ក្នុងក្របខណ្ឌយុទ្ធនាការបោសសម្អាតការឆបោកតាមប្រព័ន្ធ បច្ចេកវិទ្យានេះ សមត្ថកិច្ចចម្រុះទូទាំងប្រទេសនឹងចាត់វិធានការតាមផ្លូវច្បាប់ យ៉ាងតឹងរឹងបំផុតចំពោះមេខ្លោងទាំងឡាយ ដែលជាប់ពាក់ព័ន្ធនឹង អំពើឆបោកតាមប្រព័ន្ធបច្ចេកវិទ្យានេះ ដោយគ្មានការលើកលែងឡើយ៕

អ៊ែរអេស៊ា ខេមបូឌា សហការជាមួយរោងភាពយន្ត លេជេន ដើម្បីពង្រីកវិសាលភាពទីផ្សារក្នុងស្រុក

ក្រុមហ៊ុនអាកាសចរណ៍ អ៊ែរអេស៊ា ខេមបូឌា បានចុះហត្ថលេខាលើអនុស្សរណៈនៃការយោគយល់ ជាផ្លូវការជាមួយ រោងភាពយន្ត លេជេន ដែលជាខ្សែសង្វាក់រោងភាពយន្តឈានមុខរបស់កម្ពុជា។ នេះគឺជាកិច្ចសហការយុទ្ធសាស្ត្ររវាងម៉ាកយីហោល្បីៗចំនួនពីរក្នុងវិស័យអាកាសចរណ៍ និងការកម្សាន្ត។ ភាពជាដៃគូរនេះ ផ្តោតសំខាន់លើការបន្តពង្រឹងសម្ព័ន្ធភាពពាណិជ្ជកម្មក្នុងស្រុក និងការរួបរួមរវាងក្រុមហ៊ុនទាំងពីរ តាមរយៈ គំនិតផ្តួចផ្តើមទីផ្សាររួមគ្នា និងការផ្សព្វផ្សាយពាណិជ្ជកម្មផ្លាស់ប្តូរគំនិតគ្នាទៅវិញទៅមក។ ដោយផ្អែកលើវិសាលភាពនៃក្រុមហ៊ុនទាំងពីរ កិច្ចសហការនេះ មានគោលបំណងបង្កើតឱ្យមានការចូលរួមយ៉ាងស្អិតរមួត ជាមួយអតិថិជន និងភ្ញៀវជាតិ-អន្តរជាតិ នៅទូទាំងប្រទេសកម្ពុជា។រយៈពេលមួយឆ្នាំនៃភាពជាដៃគូ ក្រុមហ៊ុនទាំងពីរនឹងសហការគ្នាយ៉ាងយកចិត្តទុកដាក់ ដើម្បីបង្កើនយុទ្ធនាការកម្សាន្ត បែបចម្រុះ និងការធ្វើដំណើរដ៏សម្បូរបែប ដែលឆ្លើយតបទៅនឹងតម្រូវការរបស់អ្នកទស្សនា និងអ្នកធ្វើដំណើរ ព្រមទាំងរួម ចំណែកគាំទ្រដល់វិស័យពាណិជ្ជកម្ម នៃប្រទេសកម្ពុជាផងដែរ។លោក ណម វិស្សុត ប្រធាននាយកប្រតិបត្តិនៃក្រុមហ៊ុន អ៊ែរអេស៊ា ខេមបូឌា បានសម្តែងការសាទរ និងមានប្រសាសន៍ថា “អ៊ែរអេស៊ា ខេមបូឌា បានផ្សារភ្ជាប់ទំនាក់ទំនងប្រជាជាតិទៅកាន់ពិភពលោក រីឯរោងភាពយន្ត លេជេន បានតភ្ជាប់ទំនាក់ ទំនងសាធារណជនទៅកាន់ការកម្សាន្តដែលមានគុណភាព។ ភាពជាដៃគូនេះ គឺជាការប្តេជ្ញាចិត្តរបស់យើងក្នុងការធ្វើឱ្យ អ៊ែរអេស៊ា កាន់តែមានភាពលេចធ្លោនៅក្នុងប្រព័ន្ធផ្សព្វផ្សាយ និងការពង្រីកវិសាលភាពទីផ្សារឱ្យកាន់តែទូលំទូលាយ”។ លោក Tan Twu Yang អគ្គនាយកផ្នែកទំនាក់ទំនងទីផ្សារ និងផ្នែកលក់ តំណាងរោងភាពយន្ត លេជេន បានបង្ហាញពីទស្សនៈសំខាន់នៃភាពជាដៃគូថា “នេះគឺជាកិត្តិយសដ៏ធំធេងសម្រាប់រោងភាពយន្តលេជេន ក្នុងការសហការជាមួយក្រុមហ៊ុនដែលមានសេវាកម្មល្អ និងការទុកចិត្តពីអន្តរជាតិ។ កិច្ចសហការនេះ នឹងផ្តល់ជូននូវបទពិសោធន៍ដ៏វិសេស វិសាលជូនដល់អតិថិជនរាប់លាននាក់ ទាំងការកម្សាន្តក្នុងរោងភាពយន្ត និងការធ្វើដំណើរតាមផ្លូវអាកាស។ កិច្ចសហការនេះ បង្ហាញពីការប្តេជ្ញាចិត្តរួមគ្នារបស់ក្រុមហ៊ុនទាំងពីរ ក្នុងការគាំទ្រដល់វិស័យអាកាសចរណ៍ និងការកម្សាន្តនៅកម្ពុជា។ តាមរយៈការរួមបញ្ចូលការធ្វើដំណើរដែលមានតម្លៃសមរម្យ ជាមួយនឹងការកម្សាន្តដែលមានគុណភាព អ៊ែរអេស៊ា ខេមបូឌា និងរោងភាពយន្ត លេជេន ត្រៀមខ្លួនរួចជាស្រេចដើម្បីចូលរួមចំណែកគាំទ្រដល់វិស័យទេសចរណ៍ និងការកម្សាន្តក្នុងស្រុក តាមរយៈគំនិតផ្តួចផ្តើមប្រកបដោយភាពច្នៃប្រឌិត៕ អត្ថបទ៖ ឈិត បូរ៉ាវី

កម្មវិធីបោះជំរំជាសកលលើកទី១១ ត្រូវបានបិទបញ្ចប់ និងមានបំណិនជីវិតជាច្រើនសម្រាប់យុវជន

សម្រាប់កម្មវិធីបោះជំរំយុវជនជាសកលលើកទី១១ឆ្នាំនេះ ដែលមានរយៈពេល៤ថ្ងៃ ត្រូវបានបិទបញ្ចប់ជាផ្លូវការហើយ ក្រោមអធិបតីភាពបណ្ឌិតសភាចារ្យ ហង់ ជួនណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំយុវជននិងកីឡា ក្នុងនោះបានធ្វើឱ្យយុវជនបោះជំរំទទួលបានបំណិនជីវិតជាច្រើនផងដែរ។ថ្លែងក្នុងពិធីបិទជំរំយុវជនជាសកលលើកទី១១ ឯកឧត្តមបណ្ឌិតសភាចារ្យ ហង់ ជួនណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំយុវជននិងកីឡា បានមានប្រសាសន៍ថា «ការបោះជំរំយុវជនជាសកល» នេះ ជាគំនិតផ្តួចផ្តើមដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្តីនៃព្រះរាជាណាចក្រកម្ពុជា ក្រោមការជួយឧបត្ថមគាំទ្រពី លោកអ្នកឧកញ៉ាកិត្តិបណ្ឌិត ពុង ឃាវសែ ប្រធានក្រុមប្រឹក្សាភិបាលនៃធនាគារកាណាឌីយ៉ា ដែលមានគោលបំណងអភិវឌ្ឍសមត្ថភាព ជំរុញការយល់ដឹងអំពីវប្បធម៌ និងបណ្តុះបណ្តាលយុវជនឱ្យក្លាយជាអ្នកចូលរួមយ៉ាងសកម្មក្នុងការថែរក្សា និងអភិរក្សបេតិកភណ្ឌវប្បធម៌ជាតិ ដើម្បីបង្កើនការផ្សព្វផ្សាយទេសចរណ៍ និងលើកកម្ពស់កិត្តិនាមរបស់ព្រះរាជាណាចក្រកម្ពុជា ក្នុងនោះឯកឧត្តមលើកទឹកចិត្តដល់យុវជនឱ្យខិតខំប្រឹងប្រែងឈ្វេងយល់ខ្លួនឯងឱ្យដឹងឬសគល់នៃបញ្ហាសង្គ្រាមកម្ពុជា.ថៃ និងមានឥទ្ធិពលយ៉ាងណាចំពោះយុវជនសម្រាប់ឆ្នាំ២០៣០ ហើយក្នុងនាមយុវជនត្រូវធ្វើយ៉ាងម៉េចដើម្បីចូលរួមការពារប្រទេសជាតិ ពិសេសពាក់ព័ន្ធនឹងច្បាប់អន្តរជាតិពាក់ព័ន្ធនឹងសង្គ្រាមនេះ។ចំណែកលោកជំទាវ ស្រូយ សុជាតិ អគ្គនាយក នៃអគ្គនាយកដ្ឋានយុវជន ក្រសងអប់រំយុវជន និងកីឡាបានលើកឡើងថា ការបោះជំរំយុវជនជាសកលលើកទី១១ ធ្វើឡើងក្រោមប្រធានបទ «យុវជន និងការអប់រំនៅកម្ពុជាឆ្នាំ២០៣០» ក្នុងគោលបំណងអភិវឌ្ឍសមត្ថភាព ជំរុញការយល់ដឹងអំពីវប្បធម៌ និងបណ្តុះបណ្តាលយុវជនឱ្យក្លាយជាអ្នកចូលរួមយ៉ាងសកម្មក្នុងការថែរក្សា និងអភិរក្សបេតិកភណ្ឌវប្បធម៌ជាតិ ដើម្បីបង្កើនការផ្សព្វផ្សាយទេសចរណ៍ និងលើកកម្ពស់កិត្តិនាមរបស់ព្រះរាជាណាចក្រកម្ពុជា។ លើកទឹកចិត្តដល់យុវជនក្នុងកិច្ចខិតខំប្រឹងប្រែងអភិរក្សបេតិកភណ្ឌ និងលើកកម្ពស់ការយល់ដឹងដល់យុវជនអំពីសារៈសំខាន់នៃការថែរក្សាសម្បត្តិបេតិកភណ្ឌវប្បធម៌ជាតិ ក្នុងនោះមានកម្មវិធីជាច្រើន ដូចជា ពិធីបើកជំរំ ការរៀនសូត្រពីជំនាញហិរញ្ញវត្ថុ ការសិក្សាពីដំណើរស្វែងរកសន្តិភាពជូនជាតិ, សកម្មភាពមនុស្សធម៌ សម្អាតបរិស្ថាន ចែកសម្ភារសិក្សាដល់សិស្សានុសិស្សនៅសាលាបឋមសិក្សាមេបុណ្យ, ស្តាប់ឱវាទរបស់ សម្តេចព្រះព្រហ្មរតនមុនី ពិន សែម ស្តីពី «យុវជន និងការអប់រំបែបការកសាងស្មារតីស្នេហាជាតិ,ការប្រារព្ធរាត្រីវប្បធម៌ ដើម្បីចូលរួមលើកស្ទួយអភិរក្សទំនៀមទម្លាប់ប្រពៃណីជាតិ,ទស្សនកិច្ចសិក្សាស្វែងយល់ពីសហគមន៍កសិកម្មទំនើប សសី និងការធ្វើបាឋកថាពិសេសពីឯកឧត្តមបណ្ឌិតសភាចារ្យ ហង់ ជួនរណារ៉ុន។សូមបញ្ជាក់កម្មវិធីយុវជនជាសកលលើកទី១១» នេះ ស្ថិតក្នុងបរិបទដែលត្រូវបន្តអភិវឌ្ឍ និងជំរុញសមត្ថភាពយុវជន ឱ្យចូលរួមអនុវត្តផែនទីបង្ហាញផ្លូវ ការអប់រំកម្ពុជាឆ្នាំ២០៣០ ដើម្បីសម្រេចនូវគោលដៅអភិវឌ្ឍន៍ប្រកបដោយចីរភាពឆ្នាំ២០៣០ ក៏ដូចជាចូលរួមលើកស្ទួយការអប់រំ ផ្សព្វផ្សាយទេសចរណ៍ វប្បធម៌ អរិយធម៌របស់ព្រះរាជាណាចក្រកម្ពុជាក្រោមការដឹកនាំប្រកបដោយភាពប៉ិនប្រសព្វរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្ដី៕ អត្ថបទ៖ គង់ រ៉េន

ឆ្នាំ២០២៦៖ រាជរដ្ឋាភិបាលគ្រោងបោះផ្សាយលក់មូលបត្ររដ្ឋ មានទំហំទឹកប្រាក់ ៥២៤ លានដុល្លារ

រាជរដ្ឋាភិបាលនៅក្នុងឆ្នាំ ២០២៦នេះ គ្រោងបោះផ្សាយលក់មូលបត្ររដ្ឋ ក្នុងទំហំទឹកប្រាក់ ២ ១១៤ ប៊ីលានរៀល សមមូលនឹង ប្រមាណ ៥២៤ លានដុល្លារអាម៉េរិក ដើម្បីផ្តល់ចំណូលដោយត្រង់មករាជរដ្ឋាភិបាល ក្នុងគោលដៅធានាដល់ការវិនិយោគ និងចីរភាព នៃការគ្រប់គ្រងបំណុល និងថវិកាជាតិ។ក្រសួងសេដ្ឋកិច្ច និងហិរញ្ញវត្ថុ បានចេញសេចក្តីជូនដំណឹង នៃផែនការបោះផ្សាយលក់មូលបត្ររដ្ឋឆ្នាំ២០២៦ ដល់គ្រឹះស្ថាន ធនាគារ និងហិរញ្ញវត្ថុ និងគ្រឹះស្ថានមិនមែនធនាគារ និងហិរញ្ញវត្ថុ, អនុលោមតាមច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២៦ និងក្របខ័ណ្ឌគោលនយោបាយស្តីពីការអភិវឌ្ឍមូលបត្ររដ្ឋ ២០២៣-២០២៨ របស់រាជរដ្ឋាភិបាល, សម្រាប់ឆ្នាំ ២០២៦នេះ ក្រសួង សេដ្ឋកិច្ច និងហិរញ្ញវត្ថុ នឹងធ្វើការបោះផ្សាយលក់មូលបត្ររដ្ឋ តាមរយៈការដេញថ្លៃលើថ្នាលរបស់ធនាគារជាតិនៃកម្ពុជា ក្នុងទំហំទឹក ប្រាក់ ២ ១១៤ ប៊ីលានរៀល ស្មើប្រមាណ ៥២៤លានដុល្លារអាម៉េរិក។ជុំវិញព័ត៌មាននៃការបោះផ្សាយលក់មូលបត្របានកំណត់ដូចជា៖ ប្រភេទឥណប្រតិទានបានកំណត់ ១ឆ្នាំ, ២ឆ្នាំ, ៣ឆ្នាំ, ៥ឆ្នាំ ១០ឆ្នាំ និង១៥ឆ្នាំ ជារូបិយប័ណ្ណរៀល និងដុល្លារអាម៉េរិក។ តម្លៃចារឹកក្នុងមួយប័ណ្ណ ១ លានរៀល និង ១ ពាន់ដុល្លារ។ ការទូទាត់ គូប៉ុងរៀងរាល់ ៦ខែម្តង និងការសងប្រាក់ដើម ទូទាត់សងនៅចុងឥណប្រតិទាន។ ចំពោះទំហំគ្រោងបោះផ្សាយរួមមាន ឥណប្រតិទាន ១ឆ្នាំ ត្រូវបានគ្រោងក្នុងទំហំ ២១០ ទៅ ៣០០ ប៊ីលានរៀល, ២ឆ្នំា ពី ៤២០ ទៅ ៦០០ ប៊ីលានរៀល, ៣ឆ្នាំ ពី ៨៥០ ទៅ ១០០០ ប៊ីលានរៀល, និងឥណប្រតិទាន ៥ឆ្នាំ ១០ឆ្នាំ និង១៥ឆ្នាំ ត្រូវបានគ្រោងក្នុងទំហំ ២១០ ទៅ ៣០០ ប៊ីលានរៀលដូចៗគ្នា។ក្រៅពីការបោះផ្សាយលក់មូលបត្រខាងលើ ក្នុងឆ្នាំ ២០២៦ នេះ រាជរដ្ឋាភិបាលគម្រោងខ្ចីប្រាក់ពីស្ថាប័នហិរញ្ញវត្ថុ និងដៃគូ អភិវឌ្ឍមានចំនួន ២,២៥ ប៊ីលានអេសដេអ៊ែ សមមូលប្រមាណ ៣,១ ប៊ីលានដុល្លារអាម៉េរិក កើនចំនួន ២៥០ លានអេសដេអ៊ែ ធៀប និងឆ្នាំ២០២៥ ដោយផ្អែកលើទំហំនៃតម្រូវការវិនិយោគសាធារណៈដែលកម្ពុជាមានភាពចាំបាច់ ក្នុងការកៀរគរធនធានបន្ថែមឱ្យបានច្រើន ដើម្បីបំពេញតម្រូវការសម្រាប់ជំរុញកំណើនសេដ្ឋកិច្ច។ទាក់ទិនការបោះផ្សាយលក់មូលបត្ររដ្ឋ និងការខ្ចីពីក្រៅប្រទេសខាងលើនេះ រាជរដ្ឋាភិបាលបានបង្ហាញឱ្យដឹងថា សម្រាប់គម្រោង ទាំងពីរនេះនឹងមិនបង្កើតជាបន្ទុកបំណុលវណ្ឌកដល់កម្ពុជានោះទេ ពោលគឺជាទិដ្ឋភាពបច្ចេកទេស ស្ថានភាពបំណុលសាធារណៈ កម្ពុជា នៅតែត្រូវបានវាយតម្លៃថា មានចីរភាព និងហានិភ័យកម្រិតទាបដដែល ដោយរាល់សូចនាករបំណុលគន្លឹះៗរបស់កម្ពុជា សុទ្ធតែស្ថិតក្រោមអនុបាតគោលទាំងអស់៕ អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

ប្រធានាធិបតីមីយ៉ាន់ម៉ាបញ្ជាក់ឡើងវិញពីការប្តេជ្ញាចិត្តចំពោះសន្តិសុខរបស់ឥណ្ឌា

ប្រតិបត្តិករនាវា ជំរុញឲ្យមានច្បាប់ច្បាស់វិលត្រឡប់មកកាន់ច្រកសមុទ្រ Hormuz វិញ

កងទ័ពជើងទឹកបារាំងដោយមានការគាំទ្រពីអង់គ្លេស បានស្កាត់ចាប់នាវាដឹកប្រេងរុស្ស៊ី

EU ជំរុញឲ្យអ៊ីស្រាអែលឈប់បង្កើនភាពតានតឹងផ្នែកយោធា នៅលីបង់ និងគាំទ្រកិច្ចប្រឹងប្រែងការទូត

មន្ត្រី៖ ក្រុមហាម៉ាសនឹងធ្វើកិច្ចពិភាក្សាជាមួយអន្តរការីតំបន់ហ្កាហ្សា នៅអេហ្ស៊ីប

កម្អែហូរចេញពីមាត់ភ្នំភ្លើង Kilauea របស់រដ្ឋហាវ៉ៃ ខណៈការកម្រើកត្រូវបានគេរំពឹងថានឹងកើនឡើង

កិច្ចព្រមព្រៀងពាណិជ្ជកម្មឥណ្ឌា-អាមេរិក ឆ្លុះបញ្ចាំងពីការផ្លាស់ប្តូរពន្ធរបស់ទីក្រុងវ៉ាស៊ីនតោន

អ៊ីស្រាអែល៖ «គ្មានភាពស្ងប់ស្ងាត់ នៅទីក្រុងបេរូត» ទេ បើក្រុមហេសបូឡាមិនបញ្ឈប់ការវាយប្រហារ

វិមានក្រឹមឡាំង៖ អាជ្ញាធរកំពុងធ្វើការដោះស្រាយបញ្ហាបែងចែកប្រេងនៅតំបន់គ្រីមៀ

ពលរដ្ឋជម្លៀសខ្លួនចេញពីតំបន់ជាយក្រុងភាគខាងត្បូងទីក្រុងបេរូត ក្រោយលោក Netanyahu បញ្ជាឲ្យវាយប្រហារក្រុមហេសបូឡា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានជាតិ

ឯកឧត្ដមអភិបាលខេត្ត អញ្ជើញដឹកនាំក្រុមការងារចុះកាត់បន្លែក្នុងកសិដ្ឋានជនភៀសសឹក ដើម្បីពង្រឹងសន្តិសុខស្បៀង

លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អញ្ជើញប្រគល់ផ្ទះថ្មីចំនួន ៤ខ្នង ជូន​ក្រុម​គ្រួសារ​វីរកងទ័ព​ពលី

ឃាត់ខ្លួនជនបរទេស ៧៥នាក់ សង្ស័យលួចប្រព្រឹត្តអំពើឆបោកតាមប្រព័ន្ធបច្ចេកវិទ្យានៅ រាជធានី​ភ្នំពេញ

អ៊ែរអេស៊ា ខេមបូឌា សហការជាមួយរោងភាពយន្ត លេជេន ដើម្បីពង្រីក​វិសាលភាព​ទីផ្សារ​ក្នុង​ស្រុក

កម្មវិធីបោះជំរំជាសកលលើកទី១១ ត្រូវបានបិទបញ្ចប់ និង​មាន​បំណិន​ជីវិត​ជា​ច្រើន​សម្រាប់​យុវជន