BTV NEWS

ក្រសួងព័ត៌មាន ប្រគល់ថវិកា ១០៦លានរៀល ប្រមូលបានពីព្រឹត្តិការណ៍រត់ដើម្បីមនុស្សធម៌ «ដើម្បីកុមារ ដើម្បីអនាគតយើង» ជូនមូលនិធិគន្ធបុប្ផាកម្ពុជា សម្រាប់គាំទ្រការព្យាបាល និងថែទាំសុខភាពកុមារដោយឥតគិតថ្លៃ

អាជ្ញាធរខេត្តប៉ៃលិនចុះពិនិត្យការប្រមូលផលទុរេន ដើម្បីបង្ការការក្លែងបន្លំ ខណៈឆ្នាំនេះទីផ្សារល្អជាងឆ្នាំមុន

ចៅក្រមស៊ើបសួរសម្រេចឃុំខ្លួនមន្ត្រីនគរបាល-អាវុធហត្ថខេត្តកំពត និងអ្នកទទួលផលចោរកម្មសរុបចំនួន ៤៧នាក់

គណៈកម្មការទី១ ព្រឹទ្ធសភា រួមជាមួយក្រុមសមាជិកព្រឹទ្ធសភាភូមិភាគទី៤ ប្រារព្ធទិវាកុមារអន្តរជាតិ និងទិវាប្រឆាំងពលកម្មកុមារ នៅខេត្តបាត់ដំបង

ព័ត៌មានជាតិ

ឯកឧត្តម ប៉ែន បូណា៖ រាជរដ្ឋាភិបាល និងថ្នាក់ដឹកនាំកម្ពុជាមិនដែលខ្ជះខ្ជាយពេលវេលាសូម្បីមួយវិនាទី ក្នុងការការពារទឹកដី និងដោះស្រាយការលំបាកជូនពលរដ្ឋដែលរងផលប៉ះពាល់ពីសង្គ្រាម

ភ្នំពេញ៖ ឯកឧត្តម ប៉ែន បូណា អ្នកនាំពាក្យរាជរដ្ឋាភិបាល បានបញ្ជាក់តាមរយៈសន្និសីទសារព័ត៌មាននៅថ្ងៃទី១៦ ខែមករា ឆ្នាំ២០២៦នេះថា រាជរដ្ឋាភិបាល ជាពិសេសថ្នាក់ដឹកនាំនៃយើងដែលមានសម្តេចតេជោ ហ៊ុន សែន ប្រធានព្រឹទ្ធសភា និងសម្តេចបវរធិបតី ហ៊ុន ម៉ាណែត នាយករដ្ឋមន្ត្រី រួមទាំងក្រសួង ស្ថាប័នដែលជាសេនាធិការទាំងអស់មិនដែលខ្ជះខ្ជាយពេលវេលាសូម្បីមួយវិនាទី និងមិនដែលសំចៃកម្លាំងកាយចិត្ត បញ្ញា ស្មារតី សូម្បីបន្តិចបន្តួចឡើយ ក្នុងការការពារអធិបតេយ្យភាពជាតិ និងបូរណភាពទឹកដី ក៏ដូចជាការដោះស្រាយការលំបាកជូនបងប្អូនប្រជាពលរដ្ឋដែលរងផលប៉ះពាល់។ ឯកឧត្តមបានបន្តថា ដូចប្រសាសន៍សម្តេចតេជោ ហ៊ុន សែន បានបញ្ជាក់កាលពីថ្ងៃទី ៧មករា ឆ្នាំ ២០២៦ ថា៖កម្ពុជាប្តេជ្ញាចិត្តយ៉ាងមុតមាំក្នុងការខិតខំដើម្បីសម្រេចនូវគោលដៅចម្បងរបស់ខ្លួន គឺការបញ្ចប់ទុក្ខវេទនារបស់ប្រជាជន ទប់ស្កាត់ការបំផ្លិចបំផ្លាញនិងបន្តដើរលើមាគ៌ាឆ្ពោះទៅរកសន្តិភាព ដំណោះស្រាយប្រកបដោយយុត្តិធម៌ និងចីរកាល។ ទន្ទឹមនោះកម្ពុជានឹងមិនធ្វើសម្បទាននូវអធិបតេយ្យ ឬសេចក្តីថ្លៃថ្នូររបស់ខ្លួនឡើយ។សម្តេចបវរធិបតី ហ៊ុន ម៉ាណែត ក៏បានបញ្ជាក់រួចហើយដែរថា៖ រាជរដ្ឋាភិបាលនឹងប្រើប្រាស់ថវិកាជាតិ និងថវិកាដែលជាជំនួយឧត្ថម្ភរបស់ប្រទេសជាមិត្តនិងដៃគូអភិវឌ្ឍន៍ដើម្បីស្តារជីវភាពប្រជាពលរដ្ឋភៀសសឹក និងហេដ្ឋារចនាសម្ព័ន្ធនានាដែលរងការបំផ្លិចបំផ្លាញឱ្យបានឆាប់បំផុត។ ពាក់ព័ន្ធនឹងបូរណភាពទឹកដី សម្តេចធិបតីក៏បានបញ្ជាក់ច្បាស់ថា ខ្សែព្រំដែនអន្តរជាតិរវាងកម្ពុជានិងថៃនៅតែត្រូវបានកំណត់ដោយសន្ធិសញ្ញា និងអនុសញ្ញាដែលមានស្រាប់ ហើយកម្ពុជានៅតែរក្សាបានពេញលេញនូវសិទ្ធិក្នុងការដោះស្រាយបញ្ហាព្រំដែននេះជាមួយនឹងភាគីថៃ ដោយអនុលោមតាមច្បាប់អន្តរជាតិ សន្ធិសញ្ញា អនុសញ្ញា និងយន្តការទ្វេភាគីទាំងឡាយដែលមានជាធរមាន។ អ្នកនាំពាក្យរាជរដ្ឋាភិបាលសូមបញ្ជាក់ជាថ្មីថា កម្ពុជាប្រកាន់ជំហរយ៉ាងម៉ឺងម៉ាត់ក្នុងការការពារខ្សែព្រំដែនអន្តរជាតិកម្ពុជា-ថៃ ដែលបន្សល់ទុកដោយគណៈកម្មការព្រំដែនឥណ្ឌូចិន-សៀម ដោយគោរពគោលការណ៍ច្បាប់អន្តរជាតិ គោលការណ៍ខ្សែព្រំដែនមិនកែប្រែ (Uti Possidetis Juris) គោរពអនុសញ្ញា សន្ធិសញ្ញាបារាំង-សៀម ផែនទី និងកំណត់ហេតុបោះបង្គោលព្រំដែនរបស់គណៈកម្មការបោះបង្គោលព្រំដែនឥណ្ឌូចិន-សៀម ព្រមទាំងកិច្ចព្រមព្រៀង និងឯកសារពាក់ព័ន្ធនានាដែលភាគីទាំងពីរបានឯកភាពគ្នានាពេលកន្លងមក។កម្ពុជាមិនទទួលស្គាល់នូវការកែប្រែខ្សែព្រំដែនណាមួយដែលកើតចេញពីការប្រើប្រាស់កម្លាំងនោះឡើយ។ ជំហរការពារអធិបតេយ្យភាពជាតិ និងបូរណភាពទឹកដីរបស់រាជរដ្ឋាភិបាលកម្ពុជា គឺជាជាជំហរដែលមិនអាចធ្វើសម្បទានបានឡើយ៕

អាជ្ញាធរខេត្តឧត្តរមានជ័យ កំពុងសិក្សាពីទីតាំងដីសង្គមកិច្ចត្រៀមផ្តល់ជូនពលរដ្ឋរងគ្រោះដោយសង្គ្រាម

ស្របទៅតាមអនុសាសន៍របស់សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា អាជ្ញាធរខេត្តឧត្តរមានជ័យបាន និងកំពុងសម្រួលឲ្យពលរដ្ឋភៀសសឹកអាចត្រឡប់ទៅលំនៅឋានវិញជាបន្តបន្ទាប់ និងកំពុងសិក្សាពីទីតាំងដីសម្បទានសង្គមកិច្ចដើម្បីផ្តល់ជូនពលរដ្ឋគ្រោះដែលមិនអាចត្រឡប់ទៅលំនៅឋានវិញដោយសារជម្លោះព្រំដែនរវាងប្រទេសកម្ពុជា-ថៃ។ឯកឧត្តម មាន ចាន់យ៉ាដា អភិបាលនៃគណៈអភិបាលខេត្តឧត្តរមានជ័យ នៅថ្ងៃទី១៦ខែមករានេះ បានប្រាប់ BTV ឲ្យដឹងថា សម្រាប់នៅខេត្តឧត្តរមានជ័យស្ថិតនៅតំបន់ក្រហមក្នុងរង្វង់៣ពាន់គ្រួសារដែលមិនទាន់អាចត្រលប់ទៅលំនៅឋានវិញបាន ហើយក្នុងចំណោមពលរដ្ឋ៣ពាន់គ្រួសារនេះ មានពលរដ្ឋជាង២រយគ្រួសាររងប៉ះពាល់ដោយផ្ទាល់ពីការឈ្លានពានរបស់យោធាថៃមកលើដែនអធិបតេយ្យភាពកម្ពុជា។ឯកឧត្តមបន្តថា ពលរដ្ឋរងផលប៉ះពាល់ផ្ទាល់ជាង២រយគ្រួសារ ស្ថិតនៅស្រុកបន្ទាយអំពិល និងក្រុងសំរោង គឺអាជ្ញាធរខេត្តឧត្តរមានជ័យនឹងត្រៀមផ្តល់ដីសម្បទានសង្គមកិច្ចដល់ពួកគេ ដោយបច្ច្បន្នរដ្ឋបាលខេត្តកំពុងធ្វើជាមួយគណៈកម្មាចំពោះកិច្ចដឹកនាំដោយក្រសួងសេដ្ឋកិច្ច និងហិរញ្ញវត្ថុ និងបណ្តាក្រសួងពាក់ព័ន្ធផ្សេងៗទៀត ដើម្បីកំណត់ទីតាំងដីមួយសមស្របក្នុងការផ្តល់ដីលំនៅឋាន និងកសិកម្ម ជូនពលរដ្ឋរងគ្រោះ។ទទឹមនឹងនេះ ក៍មានការត្រៀមសាងសង់ផ្ទះសំបែង និងការស្តារជីវភាពរបស់ពួកគាត់ផងដែរ។ពលរដ្ឋភៀសសឹកបានលើកឡើងដែរថា ឥលូវនេះមិនទាន់អាចត្រឡប់ទៅលំនៅឋានវិញបានទេ ព្រោះជាតំបន់ក្រហមដែលយោធាថៃកំពុងឈរជើង ម្លោះហើយអាជ្ញាធរឲ្យបន្តស្នាក់នៅមណ្ឌលសុវត្ថិភាពនេះសិន។លើសពីនេះ ពលរដ្ឋភៀសសឹកទាំងនោះ បង្ហាញការជឿជាក់លើរាជរដ្ឋាភិបាលក្នុងការស្តារលំនឹងជីវភាពឡើងវិញ។កាលពីថ្ងៃទី១០ខែមករា ឆ្នាំ២០២៦ សម្តេចធិបតី ហ៊ុន ម៉ាណែត នាយករដ្ឋកម្ពុជា បានចេញសារពិសេសស្តីពី វិធានការដោះស្រាយរបស់រាជរដ្ឋាភិបាលចំពោះផលប៉ះពាល់ដែលបណ្តាលមកពីជម្លោះព្រំដែនកម្ពុជា-ថៃ ដោយបានដាក់ចេញនូវវិធានការបន្ទាន់ភ្លាមៗដើម្បីដោះស្រាយបញ្ហាជូនពលរដ្ឋ ដោយអាចត្រឡប់ទៅកាន់ទីលំនៅវិញ៕ អត្ថបទ៖ទូច សោភ័ណ

ក្រុមអ្នកសង្កេតការណ៍អាស៊ាន (AOT) បន្តចុះពិនិត្យស្ថានភាពនៅចំណុចអូរភ្លុកដំរី មណ្ឌលសុខភាពថ្មដា និងច្រកថ្មដា ខេត្តពោធិ៍សាត់

ពោធិ៍សាត់៖ ក្រុមអ្នកសង្កេតការណ៍អាស៊ាន (AOT) នៅព្រឹកថ្ងៃទី១៦ ខែមករា ឆ្នាំ២០២៦ ក្រោមការសម្របសម្រួលពីលោក ខូយ រីដា អភិបាលខេត្តពោធិ៍សាត់ បានចុះទៅសង្កេតការណ៍ ផ្ទៀងផ្ទាត់ និងរាយការណ៍អំពីស្ថានភាពនៅចំណុចអូរភ្លុកដំរី មណ្ឌលសុខភាពថ្មដា និងច្រកថ្មដា ខេត្តពោធិ៍សាត់។

អូស្រ្តាលីប្តេជ្ញាចូលរួមសម្របសម្រួលបទឈប់បាញ់រវាងប្រទេសកម្ពុជា-ថៃឱ្យនៅស្ថិតស្ថេរជានិរន្តរ

ប្រទេសអូស្រ្តាលីប្តេជ្ញាសម្របសម្រួលបទឈប់បាញ់រវាងប្រទេសកម្ពុជា-ថៃឲ្យនៅស្ថិតស្ថេរជានិរន្តរ ដើម្បីធានាឲ្យពលរដ្ឋភៀសសឹកកម្ពុជាអាចត្រឡប់ទៅលំនៅឋានវិញ។មានប្រសាសន៍ក្នុងកិច្ចសម្ភាសជាមួយ BTV ក្នុងពេលចុះទៅកាន់មណ្ឌលសុវត្ថិភាពចុងកាល់ ខេត្តឧត្តរមានជ័យ នៅថ្ងៃទី១៥ ខែមករា ឆ្នាំ២០២៦នេះ លោក Derek Yip(ដេរិក យីប) ឯកអគ្គរដ្ឋទូតអូស្ត្រាលីប្រចាំកម្ពុជាបានលើកឡើងថា ក្នុងនាមរដ្ឋាភិបាលអូស្រ្តាលី និងស្ថានទូតអូស្រ្តាលីប្រចាំប្រទេសកម្ពុជា លោកមានការរីករាយដែលជួយគំាទ្រអ្វីដែលជាតម្រូវការរបស់ពលរដ្ឋរងផលប៉ះពាល់ដោយសារជម្លោះព្រំដែនកម្ពុជា-ថៃ ហើយជំនួយដែលរដ្ឋាភិបាលអូស្រ្តាលីបានផ្តល់ជូនពលរដ្ឋភៀសសឹកម្ពុជាដែលជាតំរូវការជាក់ស្តែងមានដូចជា អនាម័យទឹកស្អាត ប្រព័ន្ធចម្រុះទឹក បង្គន់អនាម័យ និងសាច់ប្រាក់ជាដើម។ លើសពីនេះ លោកបន្តថា ប្រទេសអូស្រ្តាលីប្តេជ្ញាសម្របសម្រួលបទឈប់បាញ់រវាងប្រទេសកម្ពុជា-ថៃ ឲ្យនៅស្ថិតស្ថេរជានិរន្តរ ដើម្បីធានាឲ្យពលរដ្ឋភៀសសឹកម្ពុជាគ្រប់រូបៗអាចត្រឡប់ទៅលំនៅឋានវិញ និងរស់នៅប្រកបដោយចីរភាព។ឯកឧត្តម មាន ចាន់យ៉ាដា អភិបាលនៃគណៈអភិបាលខេត្តឧត្តរមានជ័យ បានលើកឡើងដែរថា ការអញ្ជើញមកដល់របស់លោក Derek Yip ឯកអគ្គរដ្ឋទូតអូស្ត្រាលីប្រចាំកម្ពុជា នៅមណ្ឌលភៀសសឹកចុងកាល់ គឺបានបង្ហាញពីសារសំខាន់ៗចំនួន៣ រួមមាន៖ទី១.អូស្រ្តាលីបានចូលរួមចែករំលែកការលំបាករបស់ពលរដ្ឋភៀសសឹក ទី២.ធ្វើជាសាក្សីផ្ទាល់ ក្នុងការមើលឃើញសោដនាកម្ម ផលលំបាកផ្សេងៗរបស់ពលរដ្ឋភៀសសឹកកម្ពុជា និងទី៣.ការជួយស្តារឡើងវិញនូវហេដ្ឋារចនាសម្ព័ន្ធ និងជីវភាពពលរដ្ឋ ក្នុងរយៈពេលមធ្យម និងវែង។ក្រោយពេលបទឈប់បាញ់រវាប្រទេសកម្ពុជា-ថៃ ចូលជាធរមាននៅម៉ោង១២ថ្ងៃត្រង់ ក្នុងថ្ងៃទី២៧ខែធ្នូ ឆ្នាំ២០២៥មក គេសង្កេតឃើញថា បណ្តាប្រទេសជាមិត្តជាមួយប្រទេសកម្ពុជា បានផ្តល់ជំនួយជា ថវិកា និងសំភារៈផ្សេងៗទៀត ដល់ប្រទេសកម្ពុជា ដែលក្នុងនោះមានដូចជា៖ ប្រទេសអូស្រ្តាលី ចិន សហរដ្ឋអាម៉េរិក និងជប៉ុនជាដើម៕ អត្ថបទ៖ទូច សោភ័ណ

យុវជនបោះជំរំជាសកលលើកទី១១ នាំគ្នាសម្តែងរាត្រីវប្បធម៌ និងទំនៀមទម្លាប់វប្បធម៌ខ្មែរ

សម្រាប់ប្រតិភូយុវជនបោះជំរំជាសកលលើកទី១១បាន នាំគ្នាសម្តែងរាត្រីវប្បធម៌ និងទំនៀមទម្លាប់វប្បធម៌ខ្មែរ ដោយតម្រូវឱ្យយុវជននាំគ្នាធ្វើខំខ្មែរជាច្រើនប្រភេទ ដើម្បីឱ្យយុវជនបានបង្ហាញ សមត្ថភាពតាមក្រុមរៀងៗខ្លួន ។ក្រោយសម្តែងរាត្រីវប្បធម៌ និងកម្មវិធីទំនៀមទម្លាប់ខ្មែរ ដោយនាំគ្នាធ្វើនំខ្មែរ គឺយុវជនបោះជំរំចំនួន៣រូបបានប្រាប់ថា កម្មវិធីនេះពួកគេពិតជាសប្បាយរីករាយខ្លាំងណាស់ ដែលបានរៀបចំសម្តែងរាត្រីវប្បធម៌ ហើយឈុតឆាកសម្តែងនីមួយៗ ជាស្នាដៃរបស់ពួកគេតាមក្រុមជាអ្នករៀបចំ ដោយបង្កើតគំនិតជ្រើសរើសឈុតឆាកប្រពៃណីខ្មែរមកសម្តែង ហើយកម្មវិធីសម្តែងរាត្រីវប្បធម៌នេះ មានពេលវេលារៀបចំខ្លី ប៉ុន្តែពួកគេនៅតែអាចធ្វើបានយ៉ាងល្អ ជាមួយគ្នានេះពួកគេ សូមថ្លែងអំណរគុណដល់ក្រសួងអប់រំ ដែលបានរៀបចំកម្មវិធីបោះជំរំ ដែលអាចធ្វើឱ្យពួកគេបានចូលរួម និងបានធ្វើឱ្យពួកគេមានឱកាសបានសម្តែង ពិតជាសប្បាយរីករាយណាស់។សូមបញ្ជាក់ថា សម្រាប់កម្មវិធីបោះជំរំយុវជនជាសកលលើកទី១១ឆ្នាំនេះ ធ្វើឡើងក្រោមប្រធានបទ យុវជន និងការអប់រំនៅកម្ពុជាឆ្នាំ២០៣០ ហើយកម្មវិធីបោះជំរំនេះ នឹងធ្វើពិធីបិទជាផ្លូវការនៅថ្ងៃទី១៧មករា ក្រោមអធិបតីភាពឯកឧត្តមបណ្ឌិតសភាចារ្យ ហង់ ជួនណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជននិងកីឡា រួមនឹងអន្តរក្រសួង៕ អត្ថបទ៖ គង់ រ៉េន

ផលដំណាំនៃក្តីស្រឡាញ់កំពុងតែរីកដុះដាល និងជិតដល់ពេលប្រមូលផលហើយ ដំណាំនៅសាលាបឋមសិក្សាភ្នំពេញថ្មី

សិស្សានុសិស្សនៅតែបន្តស្រោចទឹក និងថែទាំដំណាំដោយក្តីយកចិត្តទុកដាក់ ក្នុងគោលបំណងជួយទ្រទ្រង់រដល់វីរកងទ័ពជួរមុខ និងបងប្អូនជនភៀសសឹកដែលកំពុងជួបការលំបាក។ សកម្មភាពដ៏មានន័យនេះបានប្រព្រឹត្តទៅនៅសាលាបឋមសិក្សាភ្នំពេញថ្មី នៅថ្ងៃទី១៧ ខែធ្នូ ឆ្នាំ២០២៥ កន្លងទៅ ក្រោមវត្តមានដ៏ខ្ពង់ខ្ពស់បំផុតរបស់ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អគ្គស្នងការ នៃសមាគមកាយឫទ្ធិនារីកម្ពុជា។«ក្តីសង្ឃឹមកំពុងរីកចម្រើន… ហើយថ្ងៃប្រមូលផលកំពុងមកដល់»៕

ឯកឧត្តម ប៉ែន បូណា៖ កម្ពុជាគោរពខ្ជាប់ខ្ជួនបទឈប់បាញ់ ខណៈពលរដ្ឋភៀសសឹកជាង៥០ម៉ឺននាក់ បានត្រឡប់ទៅផ្ទះសំបែងវិញ

ឯកឧត្តម ប៉ែន បូណា អ្នកនាំពាក្យរាជរដ្ឋាភិបាល បានបញ្ជាក់តាមរយៈសន្និសីទសារព័ត៌មាននៅថ្ងៃទី១៦ ខែមករា ឆ្នាំ២០២៦នេះថា មកទល់ពេលនេះ កម្ពុជា កម្ពុជាបានគោរពខ្ជាប់ខ្ជួននូវបទឈប់បាញ់រវាងកម្ពុជា និងថៃ ខណៈពលរដ្ឋភៀសសឹកកម្ពុជាជាង ៥០ ម៉ឺននាក់ហើយបានត្រឡប់ទៅផ្ទះសំបែងវិញ និងជាង ១៤ម៉ឺននាក់បន្តស្នាក់នៅជំរំនៅឡើយ។ ឯកឧត្តម ប៉ែន បូណា បានថ្លែងថា ក្នុងអំឡុងពេលនេះដែរ ក្រុមការងារចំពោះកិច្ចដែលបង្កើតឡើងដោយរាជរដ្ឋាភិបាល បាននិងកំពុងចុះបំពេញការងារយ៉ាងសកម្មដើម្បីវាយតម្លៃពីផលប៉ះពាល់លើជនស៊ីវិល និងហេដ្ឋារចនាសម្ព័ន្ធស៊ីវិលដែលរងការបំផ្លិចបំផ្លាញដោយការវាយប្រហាររបស់ទាហានថៃដោយបំពាន មកលើដែនអធិបតេយ្យភាពរបស់កម្ពុជា។ លទ្ធផលនៃការវាយតម្លៃនេះ គឺជាមូលដ្ឋានដ៏សំខាន់សម្រាប់រាជរដ្ឋាភិបាលក្នុងការចាត់វិធានការអន្តរាគមន៍បន្ទាន់ដើម្បីស្តាជីវភាពប្រជាពលរដ្ឋភៀសសឹក និងស្តារហេដ្ឋារចនាសម្ព័ន្ធទាំងឡាយដែលរងការខូចខាតឱ្យបានឆាប់បំផុត។ ឯកឧត្តមបន្តថា កម្ពុជាតែងតែផ្តល់ការគាំទ្រយ៉ាងពេញទំហឹងដល់ក្រុមអ្នកសង្កេតការណ៍អាស៊ាន (AOT) ព្រមទាំងសង្កត់ធ្ងន់ទៅលើសារៈសំខាន់មិនអាចខ្វះបានក្នុងការពង្រឹងតួនាទី និងអាណត្តិរបស់ AOT ដូចមានចែងក្នុងសេចក្តីប្រកាសរួម ដើម្បីផ្ទៀងផ្ទាត់និងធានាការអនុវត្តបទឈប់បាញ់ឱ្យបានពេញលេញ និងប្រកបដោយប្រសិទ្ធភាព សំដៅលើកកម្ពស់តម្លាភាព គណនេយ្យភាព និងការជឿទុកចិត្តគ្នាទៅវិញទៅមក។ឯកឧត្តម ប៉ែន បូណា បានបញ្ជាក់ជាថ្មីថា កម្ពុជាប្រកាន់ជំហរយ៉ាងម៉ឺងម៉ាត់ក្នុងការការពារខ្សែព្រំដែនអន្តរជាតិកម្ពុជា-ថៃ ដែលបន្សល់ទុកដោយគណៈកម្មការព្រំដែនឥណ្ឌូចិន-សៀម ដោយគោរពគោលការណ៍ច្បាប់អន្តរជាតិ គោលការណ៍ខ្សែព្រំដែនមិនកែប្រែ, គោរពអនុសញ្ញា សន្ធិសញ្ញាបារាំង-សៀម ផែនទី និងកំណត់ហេតុបោះបង្គោលព្រំដែនរបស់គណៈកម្មការបោះបង្គោលព្រំដែនឥណ្ឌូចិន-សៀម ព្រមទាំងកិច្ចព្រមព្រៀង និងឯកសារពាក់ព័ន្ធនានាដែលភាគីទាំងពីរបានឯកភាពគ្នានាពេលកន្លងមក។ កម្ពុជាមិនទទួលស្គាល់នូវការកែប្រែខ្សែព្រំដែនណាមួយដែលកើតចេញពីការប្រើប្រាស់កម្លាំងនោះឡើយ។ ជំហរការពារអធិបតេយ្យភាពជាតិ និងបូរណភាពទឹកដីរបស់រាជរដ្ឋាភិបាលកម្ពុជា គឺជាជាជំហរដែលមិនអាចធ្វើសម្បទានបានឡើយ៕

យុវជនបោះជំរំ អនុវត្តផ្ទាល់ការដាំដុះពីកសិកម្មទំនើបនៅសហគមន៍កសិកម្មទំនើបសសី

សម្រាប់ប្រតិភូបោះជំរំយុវជនជាសកលលើកទី១១ បានចុះទៅសិក្សាឈ្វេងយល់ និងការអនុវត្តន៍ដោយការដាំដុះផ្ទាល់លើការដាំដុះកសិកម្មទំនើប នៅសហគមន៍កសិកម្មទំនើបសសី ដោយប្រតិភូបោះជំរំទំាងអស់សុទ្ធតែពេញចិត្ត និងចង់ឱ្យប្រទេសកម្ពុជា មានកសិកម្មទំនើបបែបនេះឱ្យច្រើន។តំណាងយុវជនបោះជំរំ២រូប បានប្រាប់ថា ពួកគេពិតជាសប្បាយរីករាយណាស់ ដែលបានចុះមកសិក្សាឈ្វេងយល់ និងបានអនុវត្តន៍ការដាំដុះដោយផ្ទាល់ពាក់ព័ន្ធនឹងកសិកម្មទំនើប ដោយសារកន្លងមកពួកគេធ្លាប់បានសិក្សាតែទ្រឹស្តី ប៉ុន្តែពេលនេះបានឃើញ និងបានអនុវត្តន៍ផ្ទាល់តែម្តង ហើយពួកគេចង់ឱ្យកសិករទូទំាងប្រទេសនាំគ្នាធ្វើកសិកម្មទំនើបឱ្យបានគ្រប់ៗគ្នា ដើម្បីផ្គត់ផ្គង់ទីផ្សារ ក្នុងនោះពួកគេចង់ឱ្យក្រសួងកសិកម្ម ជំរុញការអនុវត្តន៍កសិកម្មទំនើបឱ្យបានទូលំទូលាយដើម្បីឱ្យប្រជាកសិករបានចេះ និងនាំគ្នាធ្វើកសិកម្មទំនើបឱ្យបានច្រើន។ចំណែកលោក ភី សុភា អនុប្រធានក្រុមប្រឹក្សាភិបាលសហគមន៍កសិកម្មទំនើបសសី បានប្រាប់ដែរថា បច្ចុប្បន្ននេះបន្លែដែលដាំក្នុងសហគមន៍ទំនើបមានប្រភេទស្ពៃ សាឡាត់ និងម្ទេស ហើយប្រភេទបន្លែទំាងអស់នេះ មានទីផ្សារល្អណាស់ មានន័យថា មានម៉ូយមកចាំទទួលទិញជារៀងរាល់ថ្ងៃ ហើយលោកនៅតែចង់ឱ្យប្រជាកសិករ នាំគ្នាចងក្រងជាសមាជិកកសិកម្មទំនើបបន្ថែមទៀតដើម្បីរក្សាទីផ្សារ ក្នុងនោះលោសូមអរគុណដល់ប្រតិភូបោះជំរំយុវជនជាសកលលើកទី១១ ដែលបានចុះមកសិក្សាឈ្វេងយល់ និងចូលរួមផ្សព្វផ្សាយពីសហគមន៍កសិកម្មទំនើបសសីរបស់លោក។សូមបញ្ជាក់ថា បច្ចុប្បន្ននេះ សហគមន៍កសិកម្មទំនើបសសី មានសមាជិកចំនួន៧៥រូប ហើយសមាជិកម្នាក់ៗសុទ្ធតែទទួលបានអត្ថប្រយោជន៍ពីសហគមន៍កសិកម្មទំនើបទាំងអស់ ទំាងអស់ទីផ្សារ ធានាតម្លៃ និងមានបច្ចេកទេសក្នុងការដាំដុះគ្រប់បែបយ៉ាង៕ អត្ថបទ៖ គង់ រ៉េន

CMA បង្ហាញការគាំទ្ររបស់វិស័យមីក្រូហិរញ្ញវត្ថុ ដល់កងទ័ពជួរមុខ និងជនភៀសសឹកក្នុងជម្លោះព្រំដែន

សមាគមមីក្រូហិរញ្ញវត្ថុកម្ពុជា (CMA) បង្ហាញលទ្ធផលសំខាន់ៗនៃកិច្ចសហប្រតិបត្តិការក្នុងវិស័យមីក្រូហិរញ្ញវត្ថុ គាំទ្រដល់ កងទ័ព និងប្រជាពលរដ្ឋដែលរងផលប៉ះពាល់ដោយសារជម្លោះព្រំដែននាពេលថ្មីៗនេះ ដែលឆ្លើយតបទៅនឹងការអំពាវនាវរបស់ រារដ្ឋាភិបាល និងតាមសេចក្តីណែនាំរបស់ធនាគារជាតិនៃកម្ពុជា។សមាគមមីក្រូហិរញ្ញវត្ថុកម្ពុជា (CMA) នៅថ្ងៃទី១៦ ខែមករា ឆ្នាំ២០២៦ សេចក្តីប្រកាសព័ត៌មាន ដោយបានបង្ហាញការគាំទ្រ របស់វិស័យមីក្រូហិរញ្ញវត្ថុ ដល់កងទ័ពជួរមុខ និងប្រជាពលរដ្ឋដែលរងផលប៉ះពាល់ដោយសារជម្លោះព្រំដែននាពេលថ្មីៗនេះ ដែលបាន ឆ្លើយតបទៅនឹងការអំពាវនាវរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងតាមសេចក្តីណែនាំរបស់ធនាគារជាតិនៃកម្ពុជា (NBC)។ជុំវិញបញ្ហាខាងលើនេះ, ក្នុងរយៈពេលចន្លោះពីពាក់កណ្តាលដល់ដំណាច់ឆ្នាំ២០២៥ គ្រឹះស្ថានជាសមាជិករបស់សមាគម មីក្រូហិរញ្ញវត្ថុកម្ពុជា បានអនុវត្តវិធានការបន្ធូរបន្ថយផ្នែកហិរញ្ញវត្ថុ និងជំនួយមនុស្សធម៌ផ្សេងៗ ដើម្បីជួយសម្រាលបន្ទុកដល់ សហគមន៍ដែលរងគ្រោះ។ លទ្ធផលសំខាន់ៗនៃការអនុវត្តវិធានការទាំងនេះរួមមាន៖ លើកលែងការប្រាក់សរុបមានចំនួន ១០,៦ លាន ដុល្លារអាម៉េរិក សម្រាប់គ្រួសារដែលជាជនភៀសសឹក ដើម្បីជួយពួកគាត់ឱ្យមានស្ថិរភាពហិរញ្ញវត្ថុ ក្នុងអំឡុងពេលភៀសសឹក និងការ រំខានដល់ការរស់នៅ។ លុបចោលបំណុល (ទាំងប្រាក់ដើមនិងការប្រាក់) ចំនួនប្រមាណ ១ លានដុល្លារអាមេរិក សម្រាប់យោធិនជួរ មុខ យោធិនរងរបួស និងគ្រួសាររបស់យោធិនពលី ដើម្បីជាការដឹងគុណចំពោះការលះបង់ និងការបាត់បង់ចំណូលរបស់ពួកគេ។ ថវិកាចំនួន ៣៤ ម៉ឺនដុល្លារអាម៉េរិក ព្រមទាំងសម្ភារៈប្រើប្រាស់ចាំបាច់នានា ត្រូវបានរៃអង្គាស តាមរយៈកម្មវិធីសប្បុរសធម៌របស់ សមាគម និងគ្រឹះស្ថានសមាជិក បានយកទៅបរិច្ចាគជូនកងទ័ពជួរមុខ និងប្រជាពលរដ្ឋដែលជាជនភៀសសឹក នៅក្នុងខេត្តរងផល ប៉ះពាល់។ ឥណទានប្រមាណ ៥០០ លានដុល្លាអាមេរិក ត្រូវបានរៀបចំឡើងវិញ ដើម្បីសំរាលសំពាធហិរញ្ញវត្ថុជូនដល់ជនភាសឹក និង អតិថិជនដែលរងផលប៉ះពាល់ផ្សេងៗទៀត។វិធានការដែលបានលើកឡើងលើនេះ ត្រូវបានអនុវត្តស្របពេលជាមួយនឹងការអនុវត្តការរៀបចំឥណទានឡើងវិញ និងវិធាន ការជួយអតិថិជនផ្សេងៗ តាមការណែនាំរបស់ធនាគារជាតិនៃកម្ពុជា ដើម្បីធានាថា អតិថិជនដែលរងផលប៉ះពាល់នៅតែអាចទទួល បានសេវាហិរញ្ញវត្ថុដោយមិនមានសម្ពាធហិរញ្ញវត្ថុបន្ថែម។ សមាគមមីក្រូហិរញ្ញវត្ថុកម្ពុជា រួមជាមួយគ្រឹះស្ថានសមាជិក ប្តេជ្ញាចិត្តក្នុងការផ្តល់ជូននូវសេវាហិរញ្ញវត្ថុប្រកបដោយការទទួលខុសត្រូវ និងកិច្ចការពារអតិថិជន ហើយនិងបន្តអនុវត្តវិធានការជួយសម្រាលបន្ទុក អតិថិជនរបស់ខ្លួនប្រកបដោយភាពត្រឹមត្រូវ និងតម្លាភាព ស្របតាមការអំពាវនាវរបស់រាជរដ្ឋាភិបាល និងធនាគារជាតិនៃកម្ពុជា ដើម្បីគាំទ្រដល់ជីវភាពរស់នៅរបស់កងទ័ពជួរមុខ និងការស្តារសហគមន៍រងផល់បះពាល់ឡើងវិញ៕ អត្ថបទ៖ សុន រ៉ាឌី

រដ្ឋសភា បានអនុម័តសេចក្ដីព្រាងច្បាប់ស្តីពីការអនុម័តយល់ ព្រមលើអនុសញ្ញាអង្គការសហប្រជាជាតិស្ដីពីនីតិសមុទ្រ

ប្រជុំរដ្ឋសភាលើកទី៥ និតិកាលទី៧ ក្រោមអធិបតីភាព សម្តេចមហារដ្ឋសភាធិការធិបតី ឃួន សុដារី នៅព្រឹកថ្ងៃទី១៦ ខែមករា ឆ្នាំ២០២៦នេះ អង្គប្រជុំរដ្ឋសភា បានអនុម័តសេចក្តីព្រាងច្បាប់ស្តីពីការអនុម័តយល់ព្រមលើអនុសញ្ញាអង្គការសហប្រជាជាតិស្ដីពីនីតិសមុទ្រជាឯកច្ឆន្ទ។សេចក្តីព្រាងច្បាប់ស្តីពី ការអនុម័តយល់ព្រមលើអនុសញ្ញាអង្គការសហប្រជាជាតិស្ដីពីនីតិសមុទ្រមាន បីមាត្រា។ចំណែកអនុសញ្ញាអង្គការសហប្រជាជាតិស្តីពីនីតិសមុទ្រឆ្នាំ១៩៨២ ត្រូវបានចុះហត្ថលេខា កាលពីថ្ងៃទី១០ ខែធ្នូ ឆ្នាំ១៩៨២ នៅទីក្រុងម៉ុងតេហ្គាបៃ ប្រទេសហ្សាម៉ាអ៊ីក ហើយចូលជាធរមាននៅថ្ងៃទី១៦ ខែវិច្ឆិកា ឆ្នាំ១៩៩៤។ បច្ចុប្បន្នមានប្រទេស១៧១ បានចូលជារដ្ឋភាគីនៃអនុសញ្ញានេះ។ ក្នុងក្របខ័ណ្ឌអាស៊ាន ប្រទេសចំនួន១០ រួមទំាងប្រទេសឡាវដែលជាប្រទេសមិនជាប់សមុទ្រ បានចូលជាភាគីនៃអនុសញ្ញានេះរួចហើយ។ ព្រះរាជាណាចក្រកម្ពុជា បានចុះ ហត្ថលេខាលើអនុសញ្ញានេះ កាលពីថ្ងៃទី១ ខែកក្កដា ឆ្នាំ១៩៨៣។អនុសញ្ញានេះកំណត់អំពីក្របខ័ណ្ឌគតិយុត្តនៃការកំណត់ព្រំដែនសមុទ្រ សេរីភាពផ្នែកនាវាចរណ៍តាមផ្លូវសមុទ្រ សិទ្ធិ និងកាតព្វកិច្ចរបស់រដ្ឋភាគីក្នុងការប្រើប្រាស់លម្ហសមុទ្រ និងសេចក្តីណែនាំនានាសម្រាប់ការធ្វើធុរកិច្ច កិច្ចការពារបរិស្ថាន ព្រមទាំងការគ្រប់គ្រងធនធានធម្មជាតិសមុទ្រដ៏សម្បូរបែប។ការផ្តល់សច្ចាប័នអនុសញ្ញាអង្គការសហប្រជាជាតិស្តីពីនីតិសមុទ្រ នឹងផ្តល់អត្ថប្រយោជន៍ដល់ព្រះរាជាណាចក្រកម្ពុជាដែលជាប្រទេសមានសមុទ្រ ទទួលបាននូវក្របខ័ណ្ឌច្បាប់សមុទ្រមួយពេញលេញ សម្រាប់កិច្ចការសមុទ្រ, ទទួលបានការការពារតាមច្បាប់សមុទ្រអន្តរជាតិទាក់ទងនឹងការគ្រប់គ្រងសមុទ្ររបស់កម្ពុជា និងការពង្រឹងតួនាទីកម្ពុជាលើឆាកអន្តរជាតិ តាមរយៈការពង្រីកកិច្ចសហប្រតិបត្តិការដោយស្មើមុខ ក្នុងការគ្រប់គ្រងសមុទ្រ, ដោះស្រាយបញ្ហាសមុទ្រជាមួយបណ្តាប្រទេសនានា និងមានសិទ្ធិចូលរួមបោះឆ្នោតជ្រើសរើសសមាសភាពអាជ្ញាធរបាតសមុទ្រអន្តរជាតិ ក៏ដូចជាចៅក្រមតុលាការអន្តរជាតិនីតិសមុទ្រ ជាដើម។អង្គរដ្ឋសភា បានធ្វើការពិភាក្សាសេចក្តីព្រាងច្បាប់ខាងលើតាមនីតិវិធី ដែលជាលទ្ធផល អង្គរដ្ឋសភា បានអនុម័តសេចក្តីព្រាងច្បាប់ស្តីពីការអនុម័តយល់ព្រមលើអនុសញ្ញាអង្គការសហប្រជាជាតិស្ដីពីនីតិសមុទ្រ ជាឯកច្ឆន្ទ៕

បណ្ដាញសង្គម

ព័ត៌មានថ្មីៗ

អ៊ីស្រាអែល ភ្ជាប់ល្បឿននៃការដកកងទ័ពពីលីបង់ ទៅនឹងវឌ្ឍនភាពក្នុងការរំសាយអាវុធរបស់ក្រុមហេសបូឡា

ព្យុះត្រូពិកដ៏ខ្លាំងក្លានៅប្រទេសជប៉ុន បានលុបចោលជើងហោះហើរ និងនាវាចម្លង

នាយករដ្ឋមន្ត្រីឥណ្ឌា ទទួលស្វាគមន៍មេដឹកនាំមីយ៉ាន់ម៉ាដែលជាប់ទណ្ឌកម្ម ដើម្បីសាងទំនាក់ទំនង

លោក Zelenskyy ព្រមានពីកង្វះខាតប្រព័ន្ធប្រឆាំងមីស៊ីល ខណៈអាមេរិកបង្វែរការផ្តោតទៅមជ្ឈិមបូព៌ា

ការអបអរសាទរជើងឯកអឺរ៉ុបរបស់ក្រុម PSG នៅបារាំង ផ្ទុះហិង្សា ខណៈមនុស្សរាប់រយនាក់ត្រូវចាប់ខ្លួន ហើយម្នាក់ស្លាប់

ប្រធានាធិបតីអ៊ុយក្រែន ស្វែងរកវឌ្ឍនភាព មុនរដូវរងា ខណៈការចរចាឆ្ពោះទៅរកសន្តិភាពជាប់គាំង

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877