នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
អនុប្រធានទី១ នៃរដ្ឋសភាបង្ហាញពីភាពជោគជ័យនៃនយោបាយសន្តិវិធី និងការការពារបូរណភាពទឹកដីជូនប្រជាពលរដ្ឋ
នាយឧត្តមសេនីយ៍ ឥត សារ៉ាត់ អញ្ជើញចុះសួរសុខទុក្ខដល់យោធិនដែលកំពុងបំពេញបេសកកម្ម និងកំពុងសម្រាកព្យាបាលជំងឺ នៅសមរភូមិមុខតាមបណ្តោយព្រំដែនកម្ពុជា-ថៃ
អនុប្រធានក្រុមការងាររាជរដ្ឋាភិបាលចុះមូលដ្ឋានអញ្ជេីញសំណេះសំណាល និងបំពាក់គ្រឿងឥស្សរិយយសជូនមន្រ្តីរាជការចំនួន១៤៨ រូប នៃរដ្ឋបាលស្រុកកណ្ដាលស្ទឹង ខេត្តកណ្ដាល
ឯកឧត្តម ចាយ បូរិន អញ្ជើញចុះសួរសុខទុក្ខនិងនាំយកអំណោយដ៏ថ្លៃថ្លារបស់ សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជូនឯកឧត្តម​ សួស កាណាន នៅគេហដ្ឋាន

ព័ត៌មានជាតិ

កម្ពុជា-សិង្ហបុរី ពង្រឹងកិច្ចសហប្រតិបត្តិការលើវិស័យកម្មសិទ្ធិបញ្ញា ដើម្បី​ជំរុញ​សេដ្ឋកិច្ច​ផ្អែក​ចំណេះ​ដឹង និងនវានុវត្តន៍

2026/03/24 02:44:45 pm        120
Facebook Telegram Linkin
កម្ពុជា-សិង្ហបុរី សហការរៀបចំសិក្ខាសាលា ស្តីពីការចុះបញ្ជីប្រកាសនីយប័ត្រតក្កកម្ម គំនូរ​ឧស្សាហ​កម្ម និងការចុះបញ្ជីកម្មសិទ្ធិបញ្ញា សិង្ហបុរី និងការប្រើប្រាស់កម្មវិធីបច្ចេកវិទ្យា ដើម្បី​លើក​កម្ពស់​ការ​ចុះបញ្ជី និងការការពារកម្មសិទ្ធិឧស្សាហកម្មនៅកម្ពុជា។ឯកឧត្តម ផែ ច័ន្ទត្រាវុឌ្ឍ អគ្គនាយកនៃអគ្គនាយកដ្ឋានឧស្សាហកម្ម ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើកឡើង​ក្នុង​សិក្ខា​សាលា​ស្តីពី​ការ​ចុះ​បញ្ជី​ប្រកាស​នីយប័ត្រ​តក្កកម្ម គំនូរឧស្សាហកម្ម និងការចុះបញ្ជីកម្មសិទ្ធិបញ្ញាសិង្ហបុរី និងការប្រើ ប្រាស់​កម្ម​វិធី​បច្ចេក​វិទ្យា នៅថ្ងៃទី២៤ ខែមីនា ឆ្នាំ២០២៦ នេះថា កម្មសិទ្ធិឧស្សាហកម្ម​ជា​ផ្នែក​មួយ​ដ៏​មាន​សារៈ​សំខាន់​ សម្រាប់ជំរុញការធ្វើ ពាណិជ្ជកម្ម ការជំរុញឲ្យមានការច្នៃប្រឌិត និងបង្កើត​ផលិត​កម្ម​ឧស្សាហ​កម្ម​ថ្មីៗ ជំរុញការប្រកួតប្រជែងទីផ្សារក្នុងប្រទេស តំបន់ និងអន្តរជាតិ និងធ្វើឱ្យ​កាន់​តែ​រីក​ចម្រើន និងធានាបាននូវការការពារកម្មសិទ្ធិ ស្របតាមច្បាប់ជាតិ និងបទដ្ឋានអន្តរជាតិ។ឯកឧត្តមបន្ថែមថា ចំពោះប្រព័ន្ធនៃការចុះបញ្ជីកម្មសិទ្ធិឧស្សាហកម្ម ជាមូលដ្ឋាន​គ្រឹះ​មួយ​ដ៏​សំខាន់​ផ្ដល់​ភាព​កក់​ក្តៅ និងទំនុកយ៉ាង រឹងមាំដល់សហគ្រាសធុនតូច និងមធ្យម និងអ្នកច្នៃម៉ូដទាំងអស់ ដែល​បានប្រើប្រាស់បញ្ញា និងទេពកោសល្យផ្ទាល់ខ្លួន ដើម្បីច្នៃប្រឌិត បង្កើតនូវផលិតផលថ្មីៗ ក្នុង​ការ​ប្រកួតប្រជែងផលិតផលលើទីផ្សារក្នុងប្រទេស តំបន់ និងអន្តរជាតិ ជៀសវាង​ការលួច​ក្លែង​បន្លំ​ផលិ​តផ​ល ដែលបានចុះបញ្ជីការពារកម្មសិទ្ធិបញ្ញារួចហើយ។ សិក្ខាសាលា​នេះមា​ន​គោល​បំណង​លើក​កម្ពស់​ការប្រើប្រាស់ប្រព័ន្ធចុះបញ្ជីអេឡិចត្រូនិក (E-filing) ដើម្បីកាត់បន្ថយពេលវេលា និង​ចំណាយ, ចែករំលែកបទពិសោធន៍ល្អពីសិង្ហបុរី ក្នុងការការពារនិងគ្រប់គ្រងកម្មសិទ្ធិបញ្ញា តាម ស្តង់​ដាអ​ន្តរជាតិ, និងពង្រឹងការយល់ដឹងរបស់អាជីវកម្ម និងនវានុវត្តន៍ករ ក្នុងការ​ប្រើ​ប្រាស់​បច្ចេក​វិទ្យា​។លោក ប៉ែន ប៉ូលី ម្ចាស់សហគ្រាសពេញហឫទ័យប៉ែន លើកឡើងថា ជុំវិញកា​រ​ចុះ​បញ្ជី​ប្រកាស​នីយប័ត្រ​តក្កកម្មនេះពិតជាមាន សារៈសំខាន់ណាស់ សម្រាប់អ្នកអាជីវកម្ម ដើម្បីរក្សា​នូវ​កម្ម​សិទ្ធ​បញ្ហា​របស់​ខ្លួន ចៀសវាងការលួចបន្លំនូវគំនូរឧស្សាហកម្មផ្សេងៗ ក្នុងគោល ដៅជំរុញ​ដល់​បរិយា​កាស​ធ្វើធុ​រកិច្ច និងការច្នៃប្រឌិត ឱ្យមានភាពប្រកួតប្រជែងស្មើភាពគ្នា។ឯកឧត្តម ភោគ សុវណ្ណរិទ្ធ រដ្ឋលេខាធិការ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និង​នវា​នុវត្តន៍​បានបញ្ជាក់ថា កម្មសិទ្ធិ បញ្ញាគឺជាឆ្អឹងខ្នងនៃនវានុវត្តន៍ និងការប្រកួតប្រជែងសេដ្ឋកិច្ច ហើយ​កិច្ចសហប្រតិបត្តិការជាមួយ IPOS នឹងជួយជំរុញកម្ពុជាទៅរកសេដ្ឋ កិច្ចផ្អែក​លើ​ចំណេះ​ដឹង​។ កិច្ចសហប្រតិបត្តិការនេះមិនត្រឹមតែជួយសម្រួលដល់ធុរកិច្ចសិង្ហបុរីនៅកម្ពុជាប៉ុណ្ណោះទេ ប៉ុន្តែ​ថែម​ទាំង​ពង្រឹង ប្រព័ន្ធការពារកម្មសិទ្ធិបញ្ញា បង្កើនទំនុកចិត្តវិនិយោគិនអន្តរជាតិ គាំទ្រការ​អភិវឌ្ឍ​សេដ្ឋ​កិច្ច​ប្រកបដោយនវានុវត្តន៍ និងភាពប្រកួតប្រជែង។ កិច្ចសហប្រតិបត្តិការរវាងភាគីទាំងពីរដែលបានចាប់ផ្តើមតាំងពីឆ្នាំ២០១៥ ទទួលលទ្ធ​ផល​សំខាន់​ៗ​រួម​មាន​៖ ការចុះអនុស្សរណៈនៃការ យោគយល់ ស្តីពីកម្មសិទ្ធិឧស្សាហកម្ម (២០១៥), ការ​បន្ត​សុពល​ភាព​ការចុះអនុស្សរណៈនៃការយោគយល់ជាបន្តបន្ទាប់ (២០២០–២០២៥ និង ២០២៥–​២០៣០), ការទទួលស្គាល់ទៅវិញទៅមកលើប្រកាសនីយបត្រតក្កកម្ម និងគំនូរ​ឧស្សាហ​កម្ម, ការជ្រើសរើស IPOS ជាអាជ្ញាធរពិនិត្យ និងស្រាវជ្រាវ និងការកសាង​សមត្ថ​ភាព​មន្ត្រី​តាម​រយៈកម្មវិធីបណ្តុះបណ្តាលជាដើម៕ អត្ថបទ៖ សុន រ៉ាឌី

ក្រសួងទេសចរណ៍ និងរដ្ឋបាលខេត្តកោះកុង សហការជាមួយវិស័យឯកជន ជំរុញ​អភិវឌ្ឍ​វិស័យ​ទេសចរណ៍​កម្រិត​ខ្ពស់ក្នុងខេត្តកោះកុង

2026/03/24 02:33:22 pm        193
Facebook Telegram Linkin
ក្រសួងទេសចរណ៍ និងរដ្ឋបាលខេត្តកោះកុង ព្រមទាំងវិស័យឯកជន បានប្តេជ្ញារួមគ្នាក្នុងការជំរុញ និង​អភិវឌ្ឍ​វិស័យទេសចរណ៍នៅខេត្តកោះកុង ឱ្យក្លាយជាគោលដៅទេសចរណ៍កម្រិតខ្ពស់ សម្រាប់​ទាក់​ទាញភ្ញៀវទេសចរជាតិ និងអន្តរជាតិ។ ការអភិវឌ្ឍកោះទទឹងរីស្សតនេះ គឺជាការ​វិនិយោគ​ដោយ​ក្រុមហ៊ុនខ្មែរ ស្នាដៃនិងគំនិត ព្រមទាំងការឆ្នៃប្រឌិតដោយវិនិយោគិនខ្មែរ ដោយ​រក្សា​នូវ​អត្តសញ្ញាណខ្មែរ ដែលនេះបានឆ្លុះបញ្ជាំងពីការរួមចំណែករបស់ប្រជាជនខ្មែរ ដែល​ចេះ​ស្រឡាញ់​ និង​រួបរួមគ្នាក្រោមទិសស្លោក “ខ្មែររួមគ្នា ខ្មែរខ្លាំង”។ ក្នុងបេសកកម្មនេះ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងលោកជំទាវ ព្រម​ទាំង​លោក​ជំទាវ​ ឈី វ៉ា អភិបាលនៃគណៈអភិបាលខេត្តកោះកុង នៅថ្ងៃទី២៣ ខែមីនា ឆ្នាំ២០២៦ បាន​ដឹកនាំ​គណៈ​ប្រតិភូ​ចុះ​ទស្សន​កិច្ច​សិក្សា ​និងពិនិត្យស្ថានភាពអភិវឌ្ឍន៍ជាក់ស្តែងនៅ “កោះ​ទទឹង​រីស្សត” ដែលជារ​មណីយ​ដ្ឋាន​ទេសចរណ៍​កម្រិតខ្ពស់ថ្មីមួយ ស្ថិតក្នុងទឹកដីខេត្តកោះកុង។ ដំណើរទស្សនកិច្ចនេះ មាន​ការ​ចូល​រួម​ពី​ថ្នាក់​ដឹកនាំក្រសួងទេសចរណ៍ ថ្នាក់ដឹកនាំខេត្តកោះកុង តំណា​ង​សមាគម​ក្នុង​ឧស្សាហ​កម្ម​ទេសចរណ៍​កម្ពុជា រួមមាន CATA, CTF និង PATA ព្រមទាំងអ្នកផលិតមាតិកាជាតិ និងអន្តរជាតិ សរុប​ប្រមាណ ៦០នាក់។គណៈប្រតិភូបានចុះពិនិត្យហេដ្ឋារចនាសម្ព័ន្ធសំខាន់ៗនៅលើកោះទទឹងរីស្សត រួមមាន វីឡា​លំហែ​ប្រណិត​ ផ្ទះឈើបែបខ្មែរបុរាណ បណ្ណាល័យ កន្លែងហាត់ប្រាណ និងយូហ្គា អាងហែលទឹក កន្លែង​មើល​ថ្ងៃ​លិច និងភោជនីយដ្ឋាន ដែលបានរៀបចំតាមស្តង់ដារខ្ពស់។ក្នុងឱកាសនេះ ឯកឧត្តមរដ្ឋមន្ត្រី បានថ្លែងអំណរគុណ និងវាយតម្លៃខ្ពស់ចំពោះក្រុមហ៊ុន ដែន​នគរ (ខេមូឌា) អ៊ិនវេសមិន ឯ.ក. ដែលបានវិនិយោគ និងអភិវឌ្ឍកោះទទឹងរីស្សត តាមរយៈ ឱ្យ​ក្លាយ​ជា​រមណីយដ្ឋានទេសចរណ៍ប្រណិត មានសក្តានុពល​ខ្ពស់ក្នុង​ការ​ប្រកួត​ប្រជែង​លើ​ទីផ្សារ​អន្តរជាតិ​។ គួរបញ្ជាក់ថា “កោះទទឹងរីស្សត” បានបើកដំណើរការសាកល្បងកាលពីថ្ងៃទី២០ ខែមីនា ឆ្នាំ ២០២៦ ដោយមានវីឡាសរុបចំនួន ២៤ រចនាបែបបុរាណ និងសហសម័យ ព័ទ្ធ​ជុំវិញ​ដោយ​ធម្មជាតិ​ខៀវ​ស្រងាត់ និងមានឆ្នេរខ្សាច់សស្អាតប្រវែងប្រមាណ ២,០០០ ម៉ែត្រ ដែលផ្តល់​នូវ​បទ​ពិសោធន៍​លំហែ​កាយដ៏ប្រណិត និងឯកជនភាពខ្ពស់៕

កម្ពុជាដាក់ឱ្យដំណើរការកម្មវិធីរួម WISE ដើម្បីពង្រីកសេវាផ្គត់ផ្គង់ទឹកស្អាត និង​ថាមពល​កកើត​ឡើង​វិញ​ដែល​ធន់​នឹងអាកាសធាតុ

2026/03/24 01:37:23 pm        156
Facebook Telegram Linkin
ភ្នំពេញ៖ នៅថ្ងៃទី២៣ ខែមីនា ឆ្នាំ២០២៦នេះ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍ សហការជាមួយអង្គការសហប្រជាជាតិប្រចាំនៅកម្ពុជា រួមមានយូនីសេហ្វ (UNICEF) និង​មូលនិធិអភិវឌ្ឍន៍មូលធនអង្គការសហប្រជាជាតិ (UNCDF) បានប្រកាសដាក់ឱ្យដំណើរការ កម្មវិធី​រួម​ស្តីពីហេដ្ឋារចនាសម្ព័ន្ធទឹកស្អាត និងថាមពលឆ្លាតវៃ (WISE) ដែលជា​កម្ម​វិធី​ហិរញ្ញ​ប្ប​ទា​​នច​ម្រុះដ៏លេចធ្លោមួយ ដើម្បីពន្លឿនការទទួលបានសេវាទឹកស្អាតដែលមានសុវត្ថិភាព និង​ធន់​នឹង​អាកាស​ធាតុនៅទូទាំងប្រទេសកម្ពុជា។ក្រោមការ​ផ្តល់​ហិរញ្ញប្បទានពីមូលនិធិរួមសម្រាប់ការអភិវឌ្ឍប្រកបដោយចីរភាព (SDG) របស់​អង្គការ​សហ​ប្រជាជាតិ កម្មវិធី WISE បង្ហាញគំរូហិរញ្ញប្បទានឈានមុខមួយ ដែលរួម​បញ្ចូល​មូល​ធន​ពាណិជ្ជកម្ម និងមូលធនមានការប្រាក់ទាប ជាយន្តការហិរញ្ញប្បទានចម្រុះវិលជុំ ផ្តោត​លើ​ការ​ធានា​ឱ្យ​មានប្រព័ន្ធផ្គត់ផ្គង់ទឹកស្អាតឆ្លាតវៃដែលធន់នឹងអាកាសធាតុ។តាមរយៈ​ការរួមបញ្ចូលកច្ចីសម្បទាន និងកម្ចីពាណិជ្ជកម្ម យន្តការនេះ​ជួយ​កាត់​បន្ថយ​ថ្លៃ​ដើម​នៃ​កម្ចី​ សម្រាប់ប្រតិបត្តិករទឹកស្អាតឯកជន ព្រមទាំងផ្តល់​ការ​គាំទ្រ​ផ្នែក​បច្ចេក​ទេស​សម្រាប់​ទាំង​ប្រតិបត្តិករ​ទឹក​ស្អាតឯកជន ស្ថាប័នហិរញ្ញវត្ថុ និងសាជីវកម្មធានាឥណទានកម្ពុជា។ ជំនួយនេះ​មាន​សារ​សំខាន់ណាស់ ដោយសារកុមារកម្ពុជាប្រមាណ ១,៩ លាននាក់ (ជាង​មួយ​ភាគ​បី​នៃ​កុមារ​កម្ពុជា) កំពុងរស់នៅក្នុងឃុំដែលប្រឈមនឹងហានិភ័យអាកាសធាតុខ្ពស់ រួមទាំង​គ្រោះ​រាំង​ស្ងួត ​និងទឹកជំនន់ញឹកញាប់ ព្រមទាំងសេវាទឹកស្អាត និងអនាម័យ នៅមានកម្រិតនៅឡើយ។ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បាន​លើក​ឡើងថា “ប្រតិបត្តិករទឹក​ស្អាត​ឯកជន​ដើរ​តួនាទី​យ៉ាង​សំខាន់​ក្នុង​ការ​ចូល​រួម​ផ្តល់​សេវា​ទឹក​ស្អាត​ដល់​ប្រជាពលរដ្ឋ។ ទោះជាយ៉ាងណា ប្រតិបត្តិករទាំងនោះនៅបន្តមានបញ្ហាប្រឈម ក្នុង​ការ​ទទួល​បាន​ហិរញ្ញប្បទានដែលមានតម្លៃសមរម្យ សម្រាប់ការកែលម្អហេដ្ឋារចនាសម្ព័ន្ធ និងការ​ផ្លាស់​ប្តូរ​មកប្រើប្រាស់ថាមពលកកើតឡើងវិញ។ កម្មវិធី WISE គឺជាគំនិតផ្តួចផ្តើមដ៏សំខាន់មួយ នៅ​ក្នុងកិច្ចខិតខំប្រឹងប្រែងថ្នាក់ជាតិរបស់យើង ដើម្បីធ្វើទំនើបកម្មវិស័យទឹកស្អាត ពង្រីក​ការ​ទទួល​បាន​ទឹ​កស្អាត និងជំរុញការប្តេជ្ញាចិត្តរបស់យើងលើបញ្ហាអាកាសធាតុ។ តាមរយៈការ​នាំ​យក​នវានុវត្តន៍ ការវិនិយោគ និងចីរភាពរយៈពេលវែងដល់ប្រព័ន្ធផ្គត់ផ្គង់ទឹកស្អាតរបស់កម្ពុជា ភាព​ជាដៃគូជាមួយអង្គការសហប្រជាជាតិប្រចាំនៅកម្ពុជានេះ រំពឹងថានឹង​ជួយ​ធ្វើ​ឱ្យ​ប្រសើរ​ឡើង​នូវ​​សេវា​កម្មផ្គត់ផ្គង់ទឹកស្អាតសម្រាប់ប្រជាពលរដ្ឋជាង ២០០.០០០ នាក់នៅទូទាំងប្រទេស។”លោក​ស្រី Vladanka Andreeva អ្នកសម្របសម្រួលអង្គការសហប្រជាជាតិប្រចាំនៅកម្ពុជា បាន​លើក​ឡើង​ថា “ការទទួលបានសេវាទឹកស្អាតដែលធន់នឹងអាកាសធាតុ គឺជារឿង​ចាំ​បាច់​សម្រាប់​សុខុមាល​ភាព​គ្រួសារ ព្រមទាំងសុខភាព និងការសិក្សារបស់កុមារ។ តាមរយៈកម្មវិធី WISE នេះ កម្ពុជា​កំពុងចាត់វិធានការយ៉ាងមុតមាំ ដើម្បីធានាថាកុមារ និងក្រុមគ្រួសារ ជា​ពិសេស​អ្នក​ដែល​នៅ​តំបន់​ឆ្ងាយ ​ទទួលបានអត្ថប្រយោជន៍ពីទឹកស្អាតដែលមានថ្លៃសមរម្យ និងមានចីរភាព ដោយ​ប្រើ​ប្រាស់​ថាមពលកកើតឡើងវិញ។ អង្គការសហប្រជាជាតិប្រចាំនៅកម្ពុជា តាមរយៈយូនីសេហ្វ និង UNCDF រីករាយសហការជាមួយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និង​ដៃគូ​របស់​យើង ដើម្បីត្រួសត្រាយផ្លូវសម្រាប់ហិរញ្ញប្បទានប្រកបដោយនវានុវត្តន៍ ដែលជួយព​ន្លឿន​វឌ្ឍនភាពឆ្ពោះទៅរកគោលដៅអភិវឌ្ឍន៍ប្រកបដោយចីរភាព (SDGs) និងពង្រឹង​ភាព​ធន់​របស់​សហគមន៍​នៅទូទាំងប្រទេស។”កម្មវិធីនេះ​គាំទ្រដល់វឌ្ឍនភាពរបស់កម្ពុជាឆ្ពោះទៅរកគោលដៅអភិវឌ្ឍន៍ប្រកបដោយចីរភាពទី៦ (ទឹក​ស្អាត និងអនាម័យ) និង គោលដៅអភិវឌ្ឍន៍ប្រកបដោយចីរភាពទី១៣ (សកម្មភាព​អាកាស​ធាតុ​) ​តាមរយៈ​ការ​កៀរគរ​ការ​វិនិយោគ​ឯកជន​លើ​ហេដ្ឋារ​ចនា​សម្ព័ន្ធ​ទឹក​ស្អាត​ដើរ​ដោយ​ថាមពល​កកើត​ឡើង​វិញ ជាពិសេសការបូមទឹកដោយថាមពលព្រះអាទិត្យ និងបច្ចេក​វិទ្យា​គ្រប់​គ្រង​ទឹក​ស្អាត​បែប​ឌីជីថល។កម្មវិធី WISE​ នឹងដំណើរការក្រោមគណៈកម្មការដឹកនាំថ្នាក់ជាតិ ដើម្បីធានាបាន​នូវ​ភាព​ជា​អ្នក​ដឹក​នាំ​ដ៏រឹងមាំដោយរាជរដ្ឋាភិបាល និងស្របតាមផែនការយុទ្ធសាស្ត្រអភិវឌ្ឍន៍ជាតិ និង​ផែន​ការ​ជាតិ​រួម​ចំណែកឆ្លើយតបនឹងការប្រែប្រួលអាកាសធាតុនៅកម្ពុជា (NDC)៕

គម្រោងស្ដារប្រឡាយបុរាណរបស់អាជ្ញាធរជាតិអប្សរាក្នុងឃុំដូនកែវ បាន​ផ្ដល់​ប្រយោជន៍​សំខាន់​លើ​ការ​អភិរក្សប្រឡាយទឹកបុរាណ ទេសភាពវប្បធម៌ និងរក្សាទឹក​ទុក​ស្រោច​ស្រព​ដំណាំ​របស់​ពលរដ្ឋ

2026/03/24 12:52:38 pm        77
Facebook Telegram Linkin
រយៈពេល២ឆ្នាំមកនេះ គម្រោងគ្រប់គ្រងទឹកអង្គរប្រកបដោយប្រសិទ្ធភាព និង​ចីរភាព​ដើម្បី​​ភាព​ធន់​នឹង​ការប្រែប្រួលអាកាសធាតុ និងសង្គមសេដ្ឋកិច្ច ឬ Angkor Water Resilience Project (AWR) របស់អាជ្ញាធរជាតិអប្សរា ក្រោមកិច្ចសហការជាមួយប្រទេសនូវែលហ្សេឡង់(New Zealand) បានយកចិត្តទុកដាក់ទៅលើការងារស្ដារប្រឡាយទឹកបុរាណចំនួន២ខ្សែ មានប្រវែង សរុប​៤៣៩០ម៉ែត្រ ស្ថិតនៅក្នុងឃុំដូនកែវ ស្រុកពួក។ ប្រឡាយ​ទឹកបុរាណទាំងពីរខ្សែនេះ បានបញ្ចប់រួចរាល់ជាស្ថាពរ និងបាន​រួម​ចំណែក​ក្នុង​ការ​ងារ​អភិរក្ស​ប្រឡាយ​ទឹកបុរាណ ទេសភាពវប្បធម៌ និងជាប្រព័ន្ធរំដោះទឹកជំនន់ចេញពីតំបន់អង្គរ និង​ក្រុង​សៀមរាប ព្រមទាំងជួយរំដោះទឹកភ្លៀងចេញពីភូមិដ្ឋានរបស់ពលរដ្ឋផង។ ប្រឡាយ២ខ្សែនេះ ក៏​មាន​តួនាទីជួយរក្សាទឹកទុកសម្រាប់ពលរដ្ឋក្នុងឃុំ យកទៅស្រោចស្រពស្រែចម្ការ ដំណាំ និង​ផ្តល់​ផល​នេសាទ ព្រមទាំងធ្វើជាផ្លូវដីតាមខ្នងទំនប់សងខាងប្រឡាយ សម្រាប់​ពលរដ្ឋ​ក្នុង​ភូមិ​អាច​ធ្វើ​ចរាចរ និងដឹកជញ្ជូនកសិផលជាដើម។ បច្ចុប្បន្ននេះ មានពលរដ្ឋក្នុងភូមិមួយចំនួន កំពុងទទួលប្រយោជន៍​ដោយ​ផ្ទាល់​ពី​គម្រោង​ស្ដារ​ប្រឡាយ​បុរាណ២ខ្សែនេះ ដូចជា ភូមិគោកត្នោត ភូមិប្រាសាទចារ្យ និងភូមិល្បើក។ ជាមួយគ្នានេះ មាន​ពលរដ្ឋនៅភូមិខ្លះទៀត ក៏ទទួលផលដោយប្រយោលពីប្រឡាយបុរាណនេះដែរ ដូចជា​ភូមិ​នគរ​ក្រៅ ​ភូមិគោកបេង ភូមិគោកពោធិ៍ ភូមិរហាល ភូមិពាម និងភូមិតាស្នែ ជាដើម។ដើម្បី​ជា​ការរួមចំណែកក្នុងការគ្រប់គ្រងទឹកនៅក្នុងភូមិសាស្រ្តឃុំដូនកែវ ស្រុកពួក​នេះ​ឱ្យ​កាន់​តែ​មាន​ប្រសិទ្ធ​ភាព គម្រោងAWR ក៏បានធ្វើការ​សាង​សង់​សំណង់​ធារា​សាស្ត្រ​មួយចំ​នួន​នៅ​តាម​បណ្តោយ​ប្រឡាយទាំងនេះថែមទៀត ដូចជាសំណង់ទ្វារទឹកថ្មីចំនួន៤កន្លែង សំណង់បង្ហៀរ​១​កន្លែង​ និងជួសជុលទំនប់សងខាងប្រឡាយប្រវែង១០០០ម៉ែត្រ៕

ទិវាពិភពលោកកម្ចាត់​រោគរបេង៖ កម្ពុជា​ទទួល​បាន​ជោគជ័យ​គួរ​ជាទី​មោទនៈ​លើការ​ប្រយុទ្ធ​នឹង​ជំងឺ​របេង

2026/03/24 12:43:49 pm        234
Facebook Telegram Linkin
នៅព្រឹកថ្ងៃទី២៤ ខែមីនា ឆ្នាំ២០២៦នេះ ក្រសួងសុខាភិបាលកម្ពុជា បានប្រារព្ធ ទិវា​ពិភព​លោក​កម្ចាត់​រោគ​របេង​ ក្រោមប្រធានបទ«មែនហើយ! យើងអាចបញ្ចប់ជំងឺរបេង៖ ដឹកនាំដោយ​ប្រទេ​ស​ជាតិ​ជំរុញដោយប្រជាជន» នៅក្នុងមជ្ឈមណ្ឌលជាតិកំចាត់រោគរបេង និងហង់សិន (រាជ​ធានី​ភ្នំពេញ​) ខណៈកម្ពុជាទទួលបានជោគជ័យគួរជាទីមោទនៈលើការប្រយុទ្ធនឹងជំងឺរបេង ដោយ​អត្រា​ស្លាប់​ដោយសារជំងឺរបេងនៅកម្ពុជា បានធ្លាក់ចុះពី ៨០ករណីក្នុងឆ្នាំ២០០០ មកត្រឹម ១៨​ករណី​នៅ​ឆ្នាំ២០២៤ ដែលស្មើនឹងការធ្លាក់ចុះ ៧៨%។ទិវាពិភពលោកកំចាត់រោគរបេងឆ្នាំនេះធ្វើឡើងក្រោមអធិបតី ឯកឧត្តមសាស្រ្តាចារ្យ ឈាង រ៉ា រដ្ឋ​មន្រ្តី​ក្រសួង​សុខាភិបាល និងមានការអញ្ជើញចូលរួមពីសំណាក់ តំណាងអង្គ​ការ​សុខភាព​ពិភព​លោក​ប្រចាំប្រទេសកម្ពុជា,តំណាងស្ថានទូតអូស្ត្រាលី ប្រចាំប្រទេសកម្ពុជា និងនាយក​ប្រតិបត្តិ​អង្គការ ​KHANA តំណាងអង្គការសង្គមស៊ីវិលជាច្រើនទៀត។លោកវេជ្ជបណ្ឌិត ហួត ចាន់យុដា ប្រធានមជ្ឈមណ្ឌលជាតិកំចាត់រោគរបេង និងហង់សិន បាន​លើក​ឡើង​ថា កម្ពុជាយើងប្រារព្ធទិវានេះ លើកដំបូងនៅឆ្នាំ១៩៩៩ ហើយលើកនេះគឺជាឆ្នាំទី២៨ ហើយ​ដែលមជ្ឈមណ្ឌលជាតិកំចាត់រោគរបេង និងហង់សិន នៃក្រសួងសុខាភិបាល បាននឹង​កំពុង​រៀប​ចំ​ប្រារព្ធធ្វើទិវានេះ។ នៅឆ្នាំ២០២៤នៅទូទាំងសកលលោក មានអ្នកជំងឺរបេងថ្មី កើតមាន​ប្រមាណ​ចំនួន​ ១០លាន ៧សែននាក់ ក្នុងនោះមានតែ ៨លាន ៣សែន ករណីប៉ុណ្ណោះ ដែល​បាន​ស្រាវ​ជ្រាវរកឃើញ និងរាយការណ៍ទៅអង្គការសុខភាពពិភពលោក ដូចនេះនៅ​សល់​ជំងឺ​ប្រមាណ ​២លាន ៤សែននាក់ទៀត ពុំបានទទួលសេវាស្រាវជ្រាវ និងព្យាបាលនៅឡើយ។ លើស​ពី​នេះទៀត ជំងឺរបេងនៅតែឆក់យកអាយុជីវិតមនុស្សក្នុងមួយឆ្នាំៗ ប្រមាណជាង១លាននាក់។លោក​បាន​បន្ថែមថា ការងារប្រយុទ្ធនឹងជំងឺរបេងនៅព្រះរាជាណាចក្រកម្ពុជា ទទួលបាន​ជោគ​ជ័យ​គួរ​ជា​ទីមោទនៈ។ ជាក់ស្តែងតាមរបាយការណ៍អង្គការសុខភាពពិភពលោកឆ្នាំ២០២៥ បង្ហាញ​ថា​អត្រា​ស្លាប់​ដោយ​សារជំ​ងឺរបេងនៅកម្ពុជា បានធ្លាក់ចុះពី ៨០ករណី ក្នុងចំណោមប្រជាជន ១០០,០០០​នាក់ ក្នុងឆ្នាំ២០០០ មកត្រឹម ១៨ករណីក្នុងចំណោម ប្រជាជន ១០០,០០០ នាក់ នៅ​ឆ្នាំ​២០២៤ ដែលស្មើ​នឹងការធ្លាក់ចុះ៧៨%។ ចំណែកឯអត្រាអាំងស៊ីដង់ រឺអត្រា កើត​ជំងឺ​រ​បេង​ករណី​ថ្មី​ ក៏បានធ្លាក់ចុះពី ៨៥៣ករណី ក្នុងចំណោមប្រជាជន ១០០,០០០នាក់ នៅឆ្នាំ២០០០ មក​ត្រឹម ២៧២ករណី ក្នុងចំណោមប្រជាជន ១០០,០០០នាក់ នៅឆ្នាំ២០២៤ ដែល​ស្មើ​នឹង​ការ​ធ្លាក់​ចុះ​៦៨%។ឆ្លៀតក្នុងឱកាសនេះដែរឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល បាន​ថ្លែង​សារ​លិខិត​សម្តេច​មហាបវរធិបតី ហ៊ុន ម៉ាណែត នាយករដ្ឋមន្រី្តនៃព្រះរាជាណាចក្រកម្ពុជា ក្នុង​ឱកាស​ប្រារព្ធ​ទិវា​ពិភពលោក កំចាត់រោគរបេង ថ្ងៃទី២៤ ខែមីនា ឆ្នាំ២០២៦នេះ។ ឯកឧត្តមរដ្ឋមន្រី្ត បានសង្កត់ធ្ងន់ថា រាជរដ្ឋាភិបាលមានជំនឿយ៉ាងមុតមាំថា ប្រធានបទ​ដែល​ត្រូវ​បាន​កំណត់​នៅ​ក្នុងឆ្នាំនេះ នឹងសង្កត់ធ្ងន់ឱ្យពិភពលោកទាំងមូលមានជំនឿយ៉ាងមុតមាំថា យើង​ទាំង​អស់​គ្នា​អាចបញ្ចប់ជំងឺរបេងបាន ដោយយើងទាំងអស់គ្នា ត្រូវរួបរួមប្តេជ្ញា វិនិយោគ អនុវត្ត និង​បង្កើន​ល្បឿន ​ដើម្បីបំពេញកិច្ចការដ៏ច្រើនបន្ថែមទៀត ជាពិសេសពង្រឹងសេវាថែទាំ បង្កើន​ការ​ស្រាវ​ជ្រាវ ​និងព្យាបាលជំងឺរបេងជាសកលនៅគ្រប់ទីកន្លែងសម្រាប់ជនគ្រប់រូប៕ អត្ថបទ រដ្ឋា

អ្នកនាំពាក្យ៖ មិនថានៅទីណាឬពេលណា រាជរដ្ឋាភិបាលមិនដែលភ្លេចកាតព្វកិច្ច «ការពារ​បូរណ​ភាព​ទឹកដី និងប្រជាជន»

2026/03/24 12:24:33 pm        280
Facebook Telegram Linkin
អ្នកនាំពាក្យរាជរដ្ឋាភិបាលបានបញ្ជាក់ជាថ្មីថា មិនថានៅទីណា ឬពេលវេលាណា រាជ​រដ្ឋាភិបាល​មិន​ដែល​ភ្លេច​កាតព្វកិច្ច «ការពារបូរណភាពទឹកដី និងប្រជាជន» ដែលជាអាទិភាពខ្ពស់បំផុត ខណៈ​ប្រធាន​បទ​ស្តីពី «ការវិវត្តន៍ថ្មីៗនៃស្ថានការណ៍នៅតាមបណ្តោយព្រំដែនកម្ពុជាថៃ» បាន​ក្លាយ​ជា​របៀបវារៈ​ដ៏​សំខាន់​និង​ចាំ​បាច់​មួយ​រប​ស់​ថ្នាក់​ដឹក​នាំ​កម្ពុជា​សម្រាប់​កិច្ច​ពិភាក្សា​នានា​ទាំង​នៅ​​ក្នុ​ងប្រទេស និងក្រៅប្រទេស។ តាមរយៈសន្និសីទសារព័ត៌មាននៅថ្ងៃទី២៤ ខែមីនា ឆ្នាំ២០២៦នេះ ឯកឧត្តម ប៉ែន បូណា អ្នក​នាំ​ពាក្យរាជរដ្ឋាភិបាលកម្ពុជា បានថ្លែងថា ជាក់ស្តែង នៅព្រឹកថ្ងៃទី២៣ ខែមីនា ឆ្នាំ២០២៦ ឯកឧត្តម​ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ បាន​ទទួល​ជំនួបសម្តែងការគួរសមរបស់ឯកឧត្តម Shri P. Kumaran រដ្ឋលេខាធិការ​ទទួល​បន្ទុក​តំបន់​ខាង​កើត​នៃក្រ​សួង​ការបរទេសឥណ្ឌា ក្នុងឱកាស​ដែល​ឯកឧត្តម​អញ្ជើញ​មក​បំពេញ​ទស្សន​កិច្ច​នៅ​កម្ពុជា​។ក្នុងជំនួបនោះ ក្រៅពីកិច្ចពិភាក្សាអំពីទំនាក់ទំនង កិច្ចសហប្រតិបត្តិការ​ជាមិត្ត​ភាព​ដ៏​យូរ​អង្វែង​និង​យ៉ាង​ជិត​ស្និទ្ធ​រវាងកម្ពុជានិងឥណ្ឌា និងការរិះរកមធ្យោបាយនានា​ពង្រឹង​កិច្ច​សហ​ប្រតិបត្តិ​ការ​ដែល​ផ្តល់​ផល​ប្រយោជន៍ទៅវិញទៅមកបន្ថែមទៀតក្នុងវិស័យនានា ឯកឧត្តមឧបនាយករដ្ឋមន្ត្រី ប្រាក់ សុខុន​ក៏បានធ្វើបច្ចុប្បន្នភាពអំពីការវិវត្តថ្មីៗនៃស្ថានភាពព្រំដែនកម្ពុជា-ថៃ ជូនដៃគូ​សន្ទនាផ​ង​ដែរ​។ អ្នកនាំពាក្យបន្តថា ក្រៅពីនេះ នារយៈពេលប៉ុន្មានថ្ងៃចុងក្រោយនេះ ក្រសួងការបរទេស និង​ក្រសួង​ស្ថាប័ននានាក៏បានទទួលជួបជាមួយដៃគូបរទេសជាច្រើនដែលក្នុងជំនួបទាំងនោះ ស្ថាន​ការ​វិវត្តន៍នៅតាមព្រំដែនកម្ពុជាថៃគឺជារបៀបវារៈដ៏សំខាន់មួយ។ ក្រសួង​និង​ស្ថាប័ន​នានា​របស់​រាជ​រដ្ឋាភិបាល​ក៏បាននិងកំពុងធ្វើការងារយ៉ាងសកម្មតាមវិស័យរបស់ខ្លួនដោយមិនភ្លេចបញ្ហាព្រំដែន និង​ជនភៀសសឹក។ ជាក់ស្តែង តាមរយៈក្រសួងអប់រំ យុវជននិងកីឡា លោក Ian Hoskins នាយក​នៃ​នាយកដ្ឋាន​ទទួលប​ន្ទុក​កិច្ច​សហ​ប្រតិបត្តិការ និង​ភាព​ជា​ដៃគូ​អន្តរជាតិ​សំរាប់​តំបន់​អាស៊ី​អាគ្នេយ៍​និង​អាស៊ី​ខាង​ត្បូង​នៃស្នា​ក់ការកណ្ដាលសហភាពអឺរ៉ុប បានធ្វើដំណើរទ​ស្សន​កិច្ច​ទៅ​កាន់​ថ្នាក់​រៀន​ក្នុង​មណ្ឌល​ភៀស​សឹក ​ស្រុកអូរជ្រៅ ខេត្តបន្ទាយមានជ័យ ដើម្បីពិនិត្យដោយផ្ទាល់ពីកិច្ចខិតខំប្រឹងប្រែងនានា ក្រោម​ការគាំទ្រពីសហភាពអឺរ៉ុប ដើម្បីស្តារលទ្ធភាពទទួលបានការអប់រំឡើងវិញ សម្រាប់​អ្នក​ដែល​បាន​បាត់​បង់ឱកាស។សហភាពអឺរ៉ុប នៅតែបន្តប្តេជ្ញាចិត្តយ៉ាងមុតមាំ ក្នុងការធានាថា កុមារគ្រប់រូបនៅកម្ពុជា ទទួល​បាន​ការអប់រំប្រកបដោយគុណភាព ទោះបីស្ថិតក្នុងកាលៈទេសៈមិនច្បាស់លាស់ នៃជម្លោះ​ឬ​ការ​ផ្លាស់​ទី​លំនៅក៏ដោយ។ សហភាពអឺរ៉ុបនៅទីនេះជាមួយអ្នកដើម្បីជួយកសាងប្រព័ន្ធអប់រំមួយ ដែល​មាន​លក្ខណៈបរិយាបន្ន និងភាពធន់ជាងមុន។ នេះជាខ្លឹមសារ​ដែល​ត្រូវ​បាន​បង្ហោះ​លើ​គេទំ​ព័រ​ផ្លូវ​ការ​របស់សហភាពអឺរ៉ុបប្រចាំកម្ពុជា។ កាលពីចុងខែ​កុម្ភៈកន្លងទៅថ្មីៗនេះដែរ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការ​បរទេស​និង​សហប្រតិបត្តិការអន្តរជាតិ ក៏បានអញ្ជើញថ្លែងបទអន្តរាគមន៍ក្នុងសម័យប្រជុំលើកទី ៦១ ​នៃក្រុមប្រឹក្សាសិទ្ធិមនុស្សអង្គការសហប្រជាជាតិ នៅទីក្រុងហ្សឺណែវ សហព័ន្ធស្វីស ដោយ​បាន​សង្កត់​ធ្ងន់ថា ការបង្ក​ឧបសគ្គ​រារាំង​ដល់​ការ​វិល​ត្រឡប់​រប​ស់​ប្រជាជ​ន​ស៊ីវិ​ល​កម្ពុជា​រាប់​ម៉ឺន​នាក់​ទៅ​កាន់​ផ្ទះ​សម្បែងរបស់គេវិញ ប្រកបដោយសុវត្ថិភាពនិងសេចក្តីថ្លៃថ្នូរ គឺជាការប៉ះ​ពាល់​ធ្ងន់​ធ្ងរ​ទៅ​លើ​សិទ្ធិមនុស្ស។ សូមរម្លឹកជូនថា ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការ​បរទេសនិ​ង​សហ​ប្រតិប​ត្តិ​ការអន្តរជាតិ ក៏ទើបតែបានបញ្ចប់ដំណើរទស្សនកិច្ចផ្លូវការនៅប្រទេសសិង្ហបុរី នូវែល​សេឡង់​ និងអូស្ត្រាលី ដោយក្នុងដំណើរទស្សនកិច្ចនោះ ស្ថានការណ៍វិវត្តន៍​នៅ​តាម​បណ្តោយ​ព្រំដែន​កម្ពុជា​ថៃត្រូវបានពិភាក្សាយ៉ាងស៊ីជម្រៅ ដែលអនុញ្ញាតឱ្យបណ្តា​ដៃ​គូ​សន្ទនា​បាន​យល់​ច្បាស់​ពី​សភាពការណ៍ពិត ក៏ដូចជាជំហរ​សន្តិភាព​និយម​ដោយ​ផ្អែក​លើ​ច្បាប់​អន្តរជាតិ​របស់​កម្ពុជា​ដែល​ស្រប​នឹងការចង់បានរបស់សហគមន៍អន្តរជាតិ។ ដំណើរទស្សន​កិច្ច​ផ្លូវ​ការ​ទៅ​កាន់​ប្រទេស​ទាំង​បី​ខាង​លើរបស់ប្រមុខការទូតកម្ពុជា បានកើតឡើង​បន្ទាប់​​ពី​ដំណើរ​បេសកកម្ម​ការ​ទូត​របស់​សម្តេច​បវរ​ធិបតី ហ៊ុន ម៉ាណែត នាយករដ្ឋមន្ត្រី នៅសហរដ្ឋអាម៉េរិក និងអឺរ៉ុប កាលពីចុងខែកុម្ភៈ ឆ្នាំ២០២៦ថ្មីៗនេះ។ អ្នកនាំពាក្យរាជរដ្ឋាភិបាលបានបញ្ជាក់ថា សកម្មភាពទាំងការទូតសកម្មទាំងនេះ បាន​ឆ្លុះ​បញ្ចាំង​ពី​ភាព​សកម្មរបស់រាជរដ្ឋាភិបាលកម្ពុជា នៅលើសមរភូមិការទូតដើម្បីឧត្តមប្រយោជន៍ជាតិ ដោយ​ផ្សារ​ភ្ជាប់​ជាមួយអាទិភាពខ្ពស់បំផុតរបស់រាជរដ្ឋាភិបាលគឺ «ការការពារ​បូរណ​ភាព​​ទឹក​ដី និង​ប្រជា​ជន​» និងក៏បានបង្ហាញឱ្យឃើញថា សហគមន៍​អន្តរជាតិ​បាន​ទទួល​ព័ត៌មាន​ច្បាស់​លាស់​ និង​បន្ត​តាម​ដាន​យ៉ាងយកចិត្តទុកដាក់​លើ​ប្រទេស​កម្ពុ​ជា និង​ជន​ភៀស​សឹក​ជា​ច្រើន​ម៉ឺន​នាក់​ដែល​មិន​ទាន់​អាច​វិលត្រឡប់ទៅផ្ទះសម្បែងវិញបាននៅឡើយដោយសារការរារាំងពីកងកម្លាំងថៃ ក្នុង​នោះ​ក៏​មាន​កុមា​រកម្ពុជាជាច្រើនមិនបានទៅសាលារៀនរបស់ពួកគេវិញនៅឡើយ៕

រដ្ឋមន្រ្តីកិច្ចការនារី លើកទឹកចិត្តសហគ្រិនស្ត្រីឱ្យពង្រឹងគុណភាព និងស្តង់ដារដល់អ្នកប្រើប្រាស់

2026/03/24 11:56:15 am        152
Facebook Telegram Linkin
រដ្ឋមន្រ្តីក្រសួងកិច្ចការនារី លើកទឹកចិត្តដល់សមាគមសហគ្រិនកម្ពុជា និងសហគ្រិនស្ត្រីទាំងអស់ ផ្តោតការយកចិត្តទុកដាក់ខ្ពស់លើ ការពង្រឹងគុណភាព និងស្តង់ដារផលិតផល ដើម្បីកសាង និងរក្សាឱ្យបាននូវទំនុកចិត្តពីសំណាក់អតិថិជន ទាំងក្នុងស្រុក និងអន្តរជាតិ។លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី ថ្លែងក្នុងឱកាសបិទសន្និបាតបូកសរុបលទ្ធផលការងារប្រចាំ ឆ្នាំ២០២៥ និងផែនការទិសដៅឆ្នាំ២០២៦ និងខួបអនុស្សាវរីយ៍ឆាំ្នទី១៤ របស់សមាគមសហគ្រិនស្ត្រីកម្ពុជា ក្រោមប្រធានបទ "ស្ត្រី រួមគ្នាដើម្បីភាពរីកចម្រើន និងចីរភាព”នៅថ្ងៃទី២៣ ខែមីនា ឆ្នាំ២០២៦ ថា ខណៈពេលពិភពលោកបច្ចុប្បន្នកំពុងមានភាពតានតឹង ភាពមិនប្រាកដប្រជា និងមានជម្លោះប្រដាប់អាវុធនៅតាមតំបន់មួយចំនួន រួមទាំងការវិវត្តយ៉ាងលឿននៃរបត់សេដ្ឋកិច្ច ដែលបន្តបង្កើត ឱ្យមានបញ្ហាប្រឈម ក៏ដូចជាកាលានុវត្តភាពថ្មីៗ និងសហគ្រិនស្ត្រីផងដែរ។ ការណ៍នេះ សូមបងប្អូនស្ត្រីសហគ្រិន ត្រូវបន្តអភិវឌ្ឍ សមត្ថភាព សាមគ្គីភាព គាំទ្រគ្នាទៅវិញទៅមក ថែរក្សាសុខុមាលភាពរបស់អាជីវកម្ម និងផ្ទាល់ខ្លួន ជាពិសេសពង្រឹងសមត្ថភាពធន់ ក្នុងការឆ្លើយតបនឹងការវិវត្តថ្មីៗនៅក្នុងសង្គម។ លោកជំទាវកិត្តិបណ្ឌិត បន្ថែមថា ខណៈដែលកម្ពុជាមានបញ្ហាភាពតានតឹងនៅតាមតំបន់ព្រំដែន, ស្ថិតក្នុងកាលៈទេសៈនេះ ប្រជាជនកម្ពុជាបានបង្ហាញសាមគ្គីភាពយ៉ាងមុតមាំ ក្នុងការគាំទ្រផលិតផលក្នុងស្រុក បញ្ហានេះសូមលើកទឹកចិត្តឱ្យសមាគម និង សហគ្រិនស្ត្រីទាំងអស់ ត្រូវផ្តោតការយកចិត្តទុកដាក់ខ្ពស់លើការពង្រឹងគុណភាព និងស្តង់ដារផលិតផល ក៏ដូចជាសេវាកម្មរបស់ខ្លួន ជាពិសេសត្រូវប្រកាន់ខ្ជាប់នូវភាពស្មោះត្រង់ក្នុងនាមជាសហគ្រិនកម្ពុជា ដើម្បីកសាង និងរក្សាឱ្យបាននូវទំនុកចិត្តពីសំណាក់អតិថិជន ទាំងក្នុងជាតិនិងអន្តរជាតិ។ចំណែកមសហគ្រិនជាស្រ្តី បានថ្លែងនូវការប្តេជ្ញាចិត្តខ្ពស់ ក្នុងការពង្រឹង និងពង្រីកអាជីវកម្ម ជំរុញផលិតទំនិញបម្រើតម្រូវការ ទីផ្សារ បច្ចុប្បន្នបាននិងកំពុងបង្ហាញឱ្យឃើញនូវភាពរឹងមាំជាបណ្តើរៗ ក្នុងកិច្ចដំណើរការអាជីវកម្ម ជាពិសេសផលិត និងវេចខ្ចប់ ផលិតផលបម្រើការហូបចុកប្រចាំថ្ងៃ ពោលគឺឆ្លើយតបទៅនិងតម្រូវទីផ្សារបច្ចុប្បន្ន ដែលនេះជាការចូលរួមជាមួយរាជរដ្ឋាភិបាល ដែល បានកំពុងជំរុញលើកកម្ពស់ខ្សែផលិតកម្មក្នុងស្រុក។លោកជំទាវ ចាន់ ភារី ប្រធានសមាគមសហគ្រិនស្ត្រីកម្ពុជា លើកឡើងថា គោលបំណងរៀបចំព្រឹត្តិការណ៍នេះ ពិតជាមាន សារៈសំខាន់ណាស់ ក្រៅពីការធ្វើរបាយការណ៏ជូនដល់សមាជិកា ក្រសួងពាក់ពន្ធ័ និងដៃគូរសហការនានា កម្មវិធីនេះក៏បានរៀបចំតាំង បង្ហាញផលិតផល សេវាកម្មរបស់សហគ្រិនស្ត្រី ដើម្បីភ្ជាប់បណ្ដាញអាជីវកម្ម បង្កើតភាពស្និទ្ធស្នាល រួមទាំងធ្វើបទបង្ហាញជូន សមាជិកាឱ្យឃើញ និងកាន់តែយល់ច្បាស់ ពីបេសសកម្មរបស់សហគ្រិនជាស្រ្តី។ ក្រៅពីនេះផផងដែរ, សមិទ្ធិផលថ្មីមួយត្រូវបាន ប្រកាសជាផ្លូវការ នៃការចាប់ផ្តើមដំណើរការកម្មវិធី "WE FINANCIAL SUPPORT HUB" ថ្នាលហិរញ្ញប្បទានសម្រាប់សហគ្រិនស្ត្រី ដើម្បីឆ្លើយតបនឹងការវិវត្តថ្មីៗនៅក្នុងសង្គម ដែលសហគ្រិនស្រ្តីកំពុងត្រូវការ៕ អត្ថបទ៖ សុន រ៉ាឌី

អតីតពលករ៖ «ខ្ញុំមិនត្រឡប់ទៅថៃទៀតទេ បើទោះបីជាស្ថានភាពវិលទៅរកប្រក្រតីភាពវិញក៏ដោយ»

2026/03/24 11:50:31 am        172
Facebook Telegram Linkin
ក្រុមពលករខ្មែរដែលត្រឡប់មកពីប្រទេសថៃ បានឱ្យដឹងថា ទៅថ្ងៃអនាគតខាងមុខ បើទោះបីជាស្ថានភាពព្រំដែនវិលត្រឡប់ទៅជាធម្មតាឡើងវិញ ពួកគាត់ក៏មិនវិលត្រឡប់ទៅរស់នៅ និងធ្វើការនៅថៃដូចពីមុនទៀតទេ ដោយសារការងារនៅកម្ពុជាមានសម្បូរបែប ប្រាក់ខែក៏សមរម្យព្រមទាំងមានអត្ថប្រយោជន៍ជាច្រើនថែមទៀត ជាពិសេស បានរស់នៅជួបជុំក្រុមគ្រួសារ សាច់ញាតិ និងមិត្តភ័ក្តិជាដើម។អ្នកស្រី តាន់ សុធា អតីតពលករមកពីថៃ បច្ចុប្បន្នកំពុងបម្រើការងារក្នុងរោងចក្រសម្លៀកបំពាក់ នៅរាជធានីភ្នំពេញ បាននិយាយប្រាប់ព័ត៌មាន ប៊ីធីវី ឱ្យដឹងថា គិតចាប់ពីការចាកចេញពីប្រទេសថៃ ដើម្បីវិលត្រឡប់មករស់នៅជួបជុំក្រុមគ្រួសារ និងបានការងារធ្វើនៅក្នុងស្រុកវិញ គឺមានរយៈពេលប្រមាណ ៨ខែហើយ ដោយពិតជាសប្បាយរីករាយជាងរស់នៅ និងធ្វើការនៅប្រទេសថៃ ពីព្រោះថា មានការរើសអើង ជាពិសេសជួបការលំបាកក្នុងពេលមានបញ្ហាសុខភាពត្រូវទៅពេទ្យម្តងៗ ព្រោះតម្រូវឱ្យមានឯកសារច្រើនទើបទទួលពិនិត្យនិងព្យាបាល។ ចំណែកអ្នកស្រី ទូច សាម៉េត អតីតពលករមកពីថៃដូចគ្នា និងមានស្រុកកំណើតមកពីខេត្តបាត់ដំបង បានឱ្យដឹងដែរថា ពិតជាមានការសប្បាយចិត្ត និងអរគុណរាជរដ្ឋាភិបាលកម្ពុជា ដែលបានយកចិត្តទុកដាក់ផ្តល់រថយន្តចាំទទួលជូនដំណើរពីច្រកព្រំដែនរហូតដល់ផ្ទះដោយឥតគិតថ្លៃ។ អ្នកស្រីបានអំពាវនាវដល់ពលករខ្មែរនៅប្រទេសថៃ ឱ្យត្រឡប់មកស្រុកកំណើតវិញ ព្រោះបច្ចុប្បន្នកម្ពុជាមានការងារសម្បូរបែបច្រើនគ្រប់វិស័យ ហើយប្រាក់ចំណូលក៏ទទួលបានមិនចាញ់ការងារនៅប្រទេសថៃផងដែរ ព្រមទាំងមានអត្ថប្រយោជន៍ជាច្រើនថែមទៀត។លោក ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថា សម្រាប់ឱកាសការងារនៅកម្ពុជាគឺមានច្រើន ហើយឥឡូវនេះក្រសួងការងារ ដែលជាសេនាធិការជូនរាជរដ្ឋាភិបាល ក៏បានដាក់ចេញការបណ្តុះបណ្តាលជំនាញបច្ចេកទេស និងវិជ្ជាជីវៈដោយមិនគិតថ្លៃជូនប្រជាពលរដ្ឋដែលរស់នៅតំបន់ឆ្ងាយៗថែមទៀត ដើម្បីឆ្លើយតបតម្រូវការខ្វះខាត ដោយផ្តល់នូវជំនាញមួយពិតប្រាកដ ដើម្បីងាយស្រួលក្នុងការស្វែងរកការងារ និងបង្កើតមុខរបរផ្ទាល់ខ្លួនឯង។សូមជម្រាបថា គិតត្រឹមខែមករា ឆ្នាំ២០២៦ ប្រជាពលរដ្ឋខ្មែរ និងអតីតពលករប្រមាណជាង ៩៦ម៉ឺននាក់ ក្នុងនោះមានអតីតពលករប្រមាណ ៦៣ម៉ឺននាក់ បានត្រឡប់មកកម្ពុជា ក្រោយកម្ពុជា និងថៃមានជម្លោះតាមព្រំដែន។ ក្នុងនោះយន្តការក្រសួងការងារ និងបណ្តុះបណ្តាលវិជ្ជាជីវៈ បានជួយពលករទទួលបានការងារធ្វើសរុបចំនួនជាង ៣១ម៉ឺន តាមរយៈប្រព័ន្ធទូរសព្ទ ១២៩៧, វេទិកាការងារ, ការផ្សព្វផ្សាយព័ត៌មានឱកាសការងារ និងតាមរយៈរោងចក្រផ្ទាល់។ ទន្ទឹមនេះ អតីតពលករចំនួន ៣២ម៉ឺននាក់ផ្សេងទៀតបានចាប់យកជីវភាពកសិកម្មបែបគ្រួសារ ការងារក្នុងកសិដ្ឋាន ការដ្ឋានសំណង់ សិប្បកម្ម ភោជនីយដ្ឋាន និងសកម្មភាពសេដ្ឋកិច្ចក្រៅប្រព័ន្ធ៕អត្ថបទ៖ ឈិត បូរ៉ាវី

រដ្ឋបន្ធូរបន្ថយបន្ទុកអាករលើតម្លៃបន្ថែម សម្រាប់ប្រេងសាំងធម្មតា និងម៉ាស៊ូតបញ្ចុះពីអត្រា១០% មកអត្រា៤%

2026/03/24 11:33:42 am        275
Facebook Telegram Linkin
ភ្នំពេញ៖ រាជរដ្ឋាភិបាលបានដាក់ចេញនូវវិធានការបន្ធូរបន្ថយបន្ទុកអាករលើតម្លៃបន្ថែម សម្រាប់​ប្រេង​សាំង​ធម្មតា និងប្រេងម៉ាស៊ូត ដោយបញ្ចុះពីអត្រា ១០% មកអត្រា ៤% (រដ្ឋទទួល​បន្ទុក​ជំនួស​ចំនួន​ ៦%) គិតចាប់ពីថ្ងៃទី២០ ខែមីនា ឆ្នាំ២០២៦។ នេះបើយោងតាមសេចក្តីណែនាំស្តីពី វិធានការបន្ធូរបន្ថយបន្ទុកអាករលើតម្លៃបន្ថែម ចំពោះ​ការ​ផ្គត់​ផ្គង់​ផលិត​ផលតេលសិលា (ប្រេងសាំងធម្មតា និងប្រេងម៉ាស៊ូត) របស់ក្រសួងសេដ្ឋកិច្ច និ​ង​ហិរញ្ញ​វត្ថុ​។ ក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា ដើម្បីឆ្លើយតបទៅនឹង និន្នាការ​នៃ​ការ​កើន​ឡើង​ថ្លៃ​ប្រេង​លើ​ទីផ្សារអន្តរជាតិ និងក្នុងគោលបំណងជួយសម្រួលដល់ជីវភាពរស់នៅរបស់ប្រជាពលរដ្ឋ រាជ​រដ្ឋាភិបាល បានដាក់ចេញនូវវិធានការបន្ធូរបន្ថយ​បន្ទុក​អាករ​លើ​តម្លៃប​ន្ថែម​សម្រាប់​ប្រេង​សាំង​ធម្មតា​ និងប្រេងម៉ាស៊ូត ដោយបញ្ចុះពីអត្រា១០% មកអត្រា៤% (រដ្ឋទទួល​បន្ទុក​ជំនួស​ចំនួន​៦%​) ​គិតចាប់ពីថ្ងៃទី២០ ខែមីនា ឆ្នាំ២០២៦។ក្រសួងសេដ្ឋកិច្ច និងហិរញ្ញវត្ថុ ក៏បានធ្វើការណែនាំ ដល់សហគ្រាសនាំចូល និងចែកចាយបន្ត ត្រូវ​គិត​អាករ​លើតម្លៃបន្ថែមអត្រា៤% លើការផ្គត់ផ្គង់ក្នុងស្រុកនូវប្រេងសាំងធម្មតា និងប្រេងម៉ាស៊ូត ដោយ​ត្រូវ​អនុវត្ត៖ ក- ត្រូវចេញវិក្កយបត្រអាករចំពោះការផ្គត់ផ្គង់ទៅឱ្យអតិថិជន ដែលជា​អ្នក​ជាប់​ពន្ធ​តាម​របបស្វ័យប្រកាស ដោយលើវិក្កយបត្រអាករត្រូវប្តូរ អាករលើតម្លៃបន្ថែមអត្រា១០% ទៅ​ជា​ “អាករលើតម្លៃបន្ថែមអត្រា៤%។ខ- ត្រូវចេញវិក្កយបត្រធម្មតាចំពោះការផ្គត់ផ្គង់ទៅឱ្យអតិថិជនដែលជាអ្នកប្រើប្រាស់ចុងក្រោយ (មិន​ស្ថិត នៅក្រោមរបបស្វ័យប្រកាស) ដោយថ្លៃលក់រួមទាំងអាករ ត្រូវគិត​អាករ​លើ​តម្លៃ​បន្ថែ​ម​អត្រា​៤%។គ- អាករលើតម្លៃបន្ថែមអត្រា១០% និងឬអត្រា៤% ដែលសហគ្រាសបានបង់លើការនាំចូល ឬ​ទិញ​ក្នុង​ស្រុក នូវប្រេងសាំងធម្មតា និងប្រេងម៉ាស៊ូត ត្រូវបានអនុញ្ញាត​ជា​ឥណទាន​អាករ​លើ​ធាតុ​ចូល​ទៅ​តាម​ទឹកប្រាក់ អាករបង់ជាក់ស្តែង ដោយត្រូវមានប្រតិវេទន៍គយនឹងបង្កាន់ដៃបង់ពន្ធអាករ និង​/ឬមានវិក្កយបត្រអាករ និងឯកសារទូទាត់ប្រាក់ត្រឹមត្រូវសម្រាប់ការទិញក្នុងស្រុក។ ដោយ​ឡែក​ ឥណទានអាករលើធាតុចូល ដែលបានបង់លើការនាំចូលឬទិញក្នុងស្រុក (ក្រៅពីប្រេង​សាំង​ធម្មតា ​និងប្រេងម៉ាស៊ូត) ត្រូវអនុវត្ត ស្របតាមបទប្បញ្ញត្តិស្តីពីអាករលើតម្លៃបន្ថែម។ក្រសួង​សេដ្ឋកិច្ច និងហិរញ្ញវត្ថុ ក៏បានណែនាំដល់ អគ្គនាយកដ្ឋានពន្ធដារ ត្រូវធ្វើ​បច្ចុប្បន្ន​ភាព​នៅ​ក្នុង​ប្រព័ន្ធ​គ្រប់គ្រងការប្រកាសពន្ធអាជីវកម្មប្រចាំខែតាម អនឡាញ (e-Filing) ដោយមុខងារ “បញ្ជី​ទិនានុប្បវត្តិទិញ-លក់ ត្រូវបន្ថែមប្រភេទផ្គត់ផ្គង់ទំនិញ ឬសេវា “អតប អត្រា៤% ដើម្បីគាំ​ទ្រ​ដល់​ការ​ប្រកាសពន្ធស្របតាមវិធានការបន្ធូរបន្ថយបន្ទុកអាករលើតម្លៃបន្ថែមនេះផងដែរ៕

ឯកអគ្គរដ្ឋទូតឡាវថ្មីប្រចាំកម្ពុជា ប្ដេជ្ញាពូនជ្រំទំនាក់ទំនងកម្ពុជា-ឡាវឱ្យកាន់តែរឹងមាំ និងរីកចម្រើនបន្ថែមទៀត

2026/03/24 11:17:21 am        173
Facebook Telegram Linkin
ក្នុងឱកាសសម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រកម្ពុជា អនុញ្ញាតឱ្យ ឯកឧត្តម Sonexay Vannaxay ឯកអគ្គរដ្ឋទូតថ្មី នៃសាធារណរដ្ឋប្រជាធិបតេយ្យប្រជាមានិតឡាវចូលជួប និងប្រគល់សារតាំង នៅព្រឹកថ្ងៃទី២៤ ខែមីនា ឆ្នាំ២០២៦នេះ នៅវិមានសាមគ្គីភាពនៃព្រឹទ្ធសភា ឯកឧត្តម ឯកអគ្គរដ្ឋទូតឡាវថ្មីបានបង្ហាញនូវការប្ដេជ្ញាពូនជ្រំ និងពង្រឹងទំនាក់ទំនងរវាងកម្ពុជា-ឡាវឱ្យកាន់តែរឹងមាំ និងរីកចម្រើនបន្ថែមទៀត។ឯកឧត្តម ជា ធីរិទ្ធ អ្នកនាំពាក្យព្រឹទ្ធសភា បានឱ្យដឹងនៅក្រោយជំនួបនេះថា ជាកិច្ចចាប់ផ្ដើមសម្ដេចតេជោ ហ៊ុន សែន ក្នុងព្រះបរមនាមព្រះមហាក្សត្រនៃព្រះរាជាណាចក្រកម្ពុជា បានសម្ដែងនូវការស្វាគមន៍ និងអបអរសាទរចំពោះ ឯកឧត្តម ឯកអគ្គរដ្ឋទូតថ្មី នៃសាធារណរដ្ឋប្រជាធិបតេយ្យប្រជាមានិតឡាវដែលត្រូវបានតែងតាំងប្រចាំនៅកម្ពុជា។ សម្ដេចតេជោបានចាត់ទុកវត្តមានដ៏ឆាប់រហ័សរបស់ឯកឧត្តម មកបំពេញបេសកកម្មជាឯកអគ្គរដ្ឋទូតនៅកម្ពុជានេះ គឺបានបង្ហាញអំពីការផ្ដល់តម្លៃខ្ពស់ពីភាគីឡាវ ចំពោះទំនាក់ទំនងរវាងកម្ពុជា និងឡាវ។នៅក្នុងឱកាសនោះ ឯកឧត្តមឯកអគ្គរដ្ឋទូតឡាវថ្មីប្រចាំកម្ពុជា បានម្ដែងការអរគុណជាអនេកចំពោះសម្ដេចអគ្គមហាសេនាបតីតេជោ ហ៊ុន សែន ដែលបានអនុញ្ញាតឱ្យឯកឧត្តមចូលជួបជូនសារតាំងក្នុងឱកាសនេះ។ ឯកឧត្តម ឯកអគ្គរដ្ឋទូតឡាវ បានរំលេចអំពីទំនាក់ទំនងរវាងកម្ពុជា និងឡាវ នាពេលកន្លងមក និងបច្ចុប្បន្ន គឺជាទំនាក់ទំនងដ៏ល្អប្រសើរ ដែលភាគីទាំងពីរជាដៃគូយុទ្ធសាស្រ្ដគ្រប់ជ្រុងជ្រោយ គង់វង្ស និងយូរអង្វែងជាមួយគ្នា ហើយមិត្តភាពទំនាក់ទំនងរវាងកម្ពុជា និងឡាវ ជាមិត្តភាពដែលមានប្រវត្តសាស្រ្ដនៃការជួយគ្នាទៅវិញទៅមកហើយជាប្រទេសដន្លងនឹងគ្នា។ឯកឧត្តម ឯកអគ្គរដ្ឋទូតឡាវ បានរំលេចទៀតថា ឆ្នាំ២០២៦នេះ គឺជាខួប៧០ឆ្នាំនៃទំនាក់ទំនងរវាងកម្ពុជា និងឡាវ ហើយក្នុងពេលដែលឯកឧត្តមទទួលបានការតែងតាំងជាឯកអគ្គរដ្ឋទូតថ្មីនេះ និងប្ដេជ្ញាខិតខំប្រឹងប្រែងពូនជ្រំទំនាក់ទំនងប្រទេសទាំងពីរឱ្យកាន់តែរឹងមាំ រីកចម្រើនបន្តទៀត។ឯកឧត្តម ឯកអគ្គរដ្ឋទូតឡាវក៏សម្ដែងការអរគុណចំពោះរាជរដ្ឋាភិបាល និងប្រជាជនកម្ពុជាដែលតែងតែជួយដល់ប្រទេសឡាវ និងប្រជាជនឡាវគ្រប់កាលៈទេសៈជាពិសេសនៅក្នុងបរិបទកូវីដ-១៩កន្លងទៅ កម្ពុជាបានចូលរួមផ្ដល់វ៉ាក់សាំង និងសម្ភារៈបច្ចេកទេសមួយចំនួនទៀតដល់ប្រទេសឡាវលើការដោះស្រាយបញ្ហាកូវីដ-១៩នាពេលនោះ។នៅក្នុងឱកាសនោះ សម្ដេចតេជោបានសម្ដែងនូវការពេញចិត្តចំពោះការលើកឡើងរបស់ ឯកឧត្តម ឯកអគ្គរដ្ឋទូតឡាវ ដែលបានលើកឡើងជុំវិញបរិបទនៃទំនាក់ទំនងរវាងកម្ពុជា និងឡាវដែលមានភាពជិតស្និទ្ធជាមួយគ្នា។ សម្ដេចតេជោ បានលើកឡើងថា កម្ពុជា និងឡាវមានប្រវត្តិសាស្រ្ដនៃទំនាក់ទំនងរវាងប្រទេសទាំងពីរតាំងពីអតីតកាលរហូតមកដល់បច្ចុប្បន្ននៅតែមានទំនាក់ទំនងល្អ ស្អិតរមួតហើយប្រទេសទាំងពីរជាដៃគូយុទ្ធសាស្រ្ដគ្រប់ជ្រុងជ្រោយ គង់វង្សយូរអង្វែងជាមួយគ្នា។ ទន្ទឹមនឹងនេះសម្ដេចតេជោបានរំលេចថា ជាមិត្តដែលមានចិត្តស្មោះសរនឹងគ្នាជានិច្ច។ក្នុងឱកាសនោះសម្ដេចតេជោ ក៏បានជំរុញនូវទំនាក់ទំនងបន្ថែមទៀតរវាងកម្ពុជា និងឡាវ ដោយសម្ដេចជំរុញឱ្យប្រទេសទាំងពីរពង្រីកនូវកិច្ចសហប្រតិបត្តិការជាមួយគ្នានៅក្នុងក្របខ័ណ្ឌនៃពាណិជ្ជកម្ម សេដ្ឋកិច្ច និងវិនិយោគជាមួយគ្នាឱ្យកាន់តែមានការកើនឡើងច្រើនដែលជាផ្នែកដ៏សំខាន់គាំទ្រដល់ទំនាក់ទំនងនយោបាយ និងកាទូតរវាងប្រទេសទាំងពីរ៕

បណ្ដាញសង្គម

ព័ត៌មានថ្មីៗ

លោក Trump និយាយថា ការបាញ់ទម្លាក់យន្តហោះអាមេរិក នឹងមិនប៉ះពាល់ដល់កិច្ចចរចាជាមួយអ៊ីរ៉ង់ទេ
04/04/2026 05:04 PM
Facebook Telegram Linkin
ក្រុមហាម៉ាស អំពាវនាវឱ្យគណៈកម្មាធិការរដ្ឋបាលអន្តរកាល ចាប់ផ្ដើមកិច្ចការគ្រប់គ្រងតំបន់ហ្កាហ្សា
04/04/2026 04:04 PM
Facebook Telegram Linkin
ស្រីលង្កា កំពុងលំបាកក្នុងការបញ្ចៀសការដួលរលំសេដ្ឋកិច្ចដោយសារសង្គ្រាមមជ្ឈិមបូព៌ា
04/04/2026 04:04 PM
Facebook Telegram Linkin
សេណេហ្គាល់ ហាមមន្ត្រីរាជការមិនឱ្យធ្វើដំណើរក្រៅប្រទេស ខណៈវិបត្តិប្រេងប៉ះពាល់ហិរញ្ញវត្ថុសាធារណៈ
04/04/2026 04:04 PM
Facebook Telegram Linkin
យន្តហោះយោធាអាមេរិក ដែលអ៊ីរ៉ង់បាញ់ទម្លាក់ គឺជាហេតុការណ៍លើកដំបូងក្នុងពេលជាង ២០ឆ្នាំ
04/04/2026 04:04 PM
Facebook Telegram Linkin
កំណើនសេដ្ឋកិច្ចវៀតណាមនៅត្រីមាសទី១ បានថយចុះ ខណៈវិបត្តិថាមពលជំរុញអតិផរណា
04/04/2026 04:04 PM
Facebook Telegram Linkin
អនុប្រធានទី១ នៃរដ្ឋសភាបង្ហាញពីភាពជោគជ័យនៃនយោបាយសន្តិវិធី និងការការពារបូរណភាពទឹកដីជូនប្រជាពលរដ្ឋ
04/04/2026 04:04 PM
Facebook Telegram Linkin
នាយឧត្តមសេនីយ៍ ឥត សារ៉ាត់ អញ្ជើញចុះសួរសុខទុក្ខដល់យោធិនដែលកំពុងបំពេញបេសកកម្ម និងកំពុងសម្រាកព្យាបាលជំងឺ នៅសមរភូមិមុខតាមបណ្តោយព្រំដែនកម្ពុជា-ថៃ
04/04/2026 03:04 PM
Facebook Telegram Linkin
អាជ្ញាធរអាមេរិក បញ្ជាឱ្យប្រជាជនជម្លៀសខ្លួន ខណៈចំហេះព្រៃរាលដាលនៅភាគខាងត្បូងរដ្ឋ California
04/04/2026 02:04 PM
Facebook Telegram Linkin
កូរ៉េខាងត្បូង ប្រកាសស្ថានភាពសេដ្ឋកិច្ច «សម័យសង្គ្រាម» និងជំរុញកញ្ចប់ថវិកាគ្រាអាសន្ន
04/04/2026 02:04 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.