នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ស្នងការខេត្តកោះកុង៖សមត្ថកិច្ចទទួលបានតម្រុយ មន្ត្រីនគរបាលព្រំដែនខេត្តកោះកុងដែលបាញ់មនុស្សស្លាប់ម្នាក់ និងរបួសម្នាក់ហើយ
សប្បុរសជនបន្តផ្តល់ជំនួយដល់កងពលតូចដឹកជញ្ជូនលេខ៩៩ដើម្បីបន្តនាំយកទៅចែកជូនដល់បងប្អូនវីរកងទ័ពជួរមុខនៅតាមបន្ទាត់ព្រំដែន
រដ្ឋបាលស្រុកស្វាយទាប និងខេត្តតៃនិញ បន្តរួមគ្នាថែរក្សា សន្តិសុខ និងធ្វើការអភិវឌ្ឍន៍តាមព្រំដែន
ជនជាតិចិន ៣២៧នាក់ទៀត ត្រូវបានបណ្ដេញចេញពីកម្ពុជា ពាក់ព័ន្ធករណីឆបោកតាមប្រព័ន្ធអនឡាញ (Online Scams)

ព័ត៌មានជាតិ

រដ្ឋមន្រ្តីក្រសួងបរិស្ថាន ព្រមានចាត់វិធានការច្បាប់តឹងរ៉ឹងថែមទៀត ចំពោះជនល្មើសនិងអ្នកពាក់ព័ន្ធ ដើម្បីធានានិរន្តរភាពបរិស្ថាននៅកម្ពុជា

2026/03/24 03:51:28 pm        192
Facebook Telegram Linkin
ជាថ្មីម្តងទៀត ឯកឧត្តមបណ្ឌិត អ៊ាងសុផល្លែត រដ្ឋមន្ត្រីក្រសួងបរិស្ថាន បានបន្តដាក់ចេញវិធានការយ៉ាងម៉ឹងម៉ាត់ជាមួយមន្រ្តីមន្ទីរបរិស្ថានទាំងអស់ ធ្វើការគ្រប់គ្រងធនធានធម្មជាតិឱ្យមានប្រសិទ្ធភាព និងបានព្រមានចាត់វិធានការច្បាប់យ៉ាងតឹងរ៉ឹង ដោយគ្មានការលើកលែង ចំពោះអ្នកពាក់ព័ន្ធ និងបុគ្គល ដែលប្រព្រឹត្តបទល្មើសធនធានធម្មជាតិ និងឈូសឆាយ កាប់ រុករានយកដីព្រៃឈើខុសច្បាប់។ នៅក្នុងឱកាសអញ្ជើញជាអធិបតី ក្នុងកម្មវិធីបើកសិក្ខាសាលាផ្តល់សុពលភាព ស្តីពី «ការរៀបចំសំណើគម្រោងហិរញ្ញប្បទាន សម្រាប់ការទូទាត់ផ្អែកលើលទ្ធផលពីមូលនិធិអាកាសធាតុបៃតង សម្រាប់គម្រោងការកាត់បន្ថយការបញ្ចេញឧស្ម័នផ្ទះកញ្ចក់ ពីការបាត់បង់ និងរេចរិលព្រៃឈើ (រេដបូក)នៅកម្ពុជា» នៅទីស្តីការក្រសួងបរិស្ថាន នាថ្ងៃទី២៤ ខែមីនា ឆ្នាំ២០២៦ ឯកឧត្តមរដ្ឋមន្រ្តី មានប្រសាសន៍លើកឡើងលើវិធានការទាំងនេះ ដែលបាននិងកំពុងអនុវត្តស្របតាម គោលនយោបាយយុទ្ធសាស្រ្តរបស់រាជរដ្ឋាភិបាលកម្ពុជា ក៏ដូចជាយុទ្ធសាស្ត្រចក្រាវិស័យបរិស្ថាន ដើម្បីការពារតំបន់ការពារធម្មជាតិ ចូលរួមចំណែកលើកកម្ពស់ជីវភាព របស់សហគមន៍មូលដ្ឋាន ជាពិសេសជនជាតិដើមភាគតិច និងការគ្រប់គ្រង និងប្រើប្រាស់ធនធានធម្មជាតិប្រកបដោយនិរន្តរភាព។ឯកឧត្តមបណ្ឌិត អ៊ាង សុផល្លែត បានមានប្រសាសន៍ថា មន្ទីរបរិស្ថានខេត្តដែលមានតំបន់ការពារធម្មជាតិ ត្រូវបន្តកិច្ចសហការជាមួយអ្នកពាក់ព័ន្ធ ធ្វើការចុះពិនិត្យ និងទប់ស្កាត់បទល្មើស គ្រប់ប្រភេទនៅតាមតំបន់ការពារធម្មជាតិ ហើយប្រសិនបើមានការឃាត់ចាប់គ្រឿងចក្រ និងសម្ភារដែលប្រើប្រាស់សម្រាប់ប្រព្រឹត្តបទល្មើស គឺត្រូវរកអ្នកនៅពីក្រោយខ្នងនៃការជួល ឬប្រព្រឹត្តល្មើសធនធានធម្មជាតិ ឱ្យឃើញ ដើម្បីយកមកកាត់ទោសតាមច្បាប់។ ដូចគ្នាដែរ មន្រ្តីក្រសួងបរិស្ថាន ត្រូវពិនិត្យលើការគ្រប់គ្រងសម្ភារដកហូត ដូចជាឈើ ដែលជនល្មើសបានកាប់ និងឈូសឆាយ ត្រូវរៀបចំនិតិវិធីរក្សាទុក បម្រើប្រយោជន៍សហគមន៍និងសង្គមជាតិ។ «ការពង្រឹងការអនុវត្តច្បាប់យ៉ាងម៉ឺងម៉ាត់ ជួយទប់ស្កាត់បទល្មើសធនធានធម្មជាតិ។ មន្រ្តីក្រសួងបរិស្ថាន មានតួនាទីភារកិច្ចបម្រើប្រជាពលរដ្ឋ ជាតិ និងមាតុភូមិ មិនត្រូវប៉ះពាល់ដល់បទល្មើសធនធានធម្មជាតិ ដែលផ្ទុយនឹងច្បាប់នោះឡើយ» ឯកឧត្តមរដ្ឋមន្រ្តីបានថ្លែងបន្ថែម។

សមត្ថកិច្ចខេត្តព្រះសីហនុបង្ក្រាបបទល្មើស Online Scams ឃាត់ខ្លួនជន​សង្ស័យចំនួន៥០នាក់

2026/03/24 03:08:07 pm        92
Facebook Telegram Linkin
ក្រុមការងារចម្រុះ នៃរដ្ឋបាលខេត្តព្រះសីហនុ កាលពីថ្ងៃទី២៣ ខែមីនា ឆ្នាំ២០២៦ បានបន្តយុទ្ធនាការយ៉ាងសកម្មក្នុងការអនុវត្តអនុក្រឹត្យលេខ០៣ និងការត្រួតពិនិត្យបទល្មើសឆបោកតាមប្រព័ន្ធបច្ចេកវិទ្យា Online Scams ដោយបានចុះត្រួតពិនិត្យទីតាំងស្នាក់នៅប្រមូលផ្តុំចំនួន ២៦ទីតាំង និងឈានទៅបង្ក្រាបបានចំនួន ៤ទីតាំងជាក់ស្តែង ។រដ្ឋបាលខេត្តព្រះសីហនុ បានឱ្យដឹងថា ទីតាំងទាំង៤កន្លែង ដែលសមត្ថកិច្ចចុះបង្ក្រាបនោះ រួមមានៈ សណ្ឋាគារ ជីនសា ហូលីដេ , វីឡាភូមិគ្រឹះ , អគារខុនដូរ ស៊ែង យូរ និង ផ្ទះជួល នៅសង្កាត់៤។  ជាលទ្ធផលសមត្ថកិច្ចបានឃាត់ខ្លួន ជនសង្ស័យសរុបចំនួន ៥០ នាក់ ក្នុងនោះមានជនជាតិចិនចំនួន៣៦, ជនជាតិខ្មែរចំនួន ៣ នាក់ (ស្រី្ត ១ នាក់), ជនជាតិឥណ្ឌា ចំនួន ៥ នាក់ (ក្នុងនោះ ស្រី្ត ២ នាក់), ជនជាតិបង់ក្លាដេស ចំនួន ៣ នាក់, ជនជាតិប៉ាគីស្ថាន ចំនួន ២ នាក់ និងស្រ្តីជនជាតិភូមា ចំនួន ១ នាក់ រួមទាំងបានដកហូតវត្ថុតាង មានដូចជាកុំព្យូទ័រលើតុ ទូរសព្ទដៃ និងកុំព្យូទ័រយួរដៃមួយចំនួន។ ក្រៅពីការបង្ក្រាបទីតាំងទាំង៤ខាងលើ ក្រុមការងារបានចុះត្រួតពិនិត្យនៅកាស៊ីណូ ហ្គោលដិន ដែលមានទីតាំងស្ថិតនៅភូមិ១ សង្កាត់លេខ១ ក្រុងព្រះសីហនុ ផងដែរ ដោយរកឃើញសម្ភារៈសង្ស័យពាក់ព័ន្ធនឹងការធ្វើ សកម្មភាពឆបោកតាមអនឡាញរួមមាន កុំព្យូទ័រលើតុចំនួន ១៨៦ គ្រឿង និងទូរសព្ទដៃចំនួន ១៥៤ គ្រឿង។បច្ចុប្បន្នជនសង្ស័យ និងវត្ថុតាងខាងលើនេះ ត្រូវបានប្រគល់ជូនសមត្ថកិច្ចជំនាញនៃស្នងការដ្ឋាននគរបាលខេត្តព្រះសីហនុដើម្បីអនុវត្តតាមនីតិវិធីច្បាប់ និងឈានទៅកំណត់មុខសញ្ញាមេខ្លោងពាក់ព័ន្ធជាបន្តទៀត។ លេខាធិការដ្ឋានគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប.) សូមជម្រាបជូនថា ការបោសសម្អាតOnline Scams នៅទួទាំងប្រទេស គិតចាប់ពីឆ្នាំ២០២៥ រហូតដល់សប្តាហ៍ទី២ ខែមីនា ឆ្នាំ២០២៦ នេះ សមត្ថកិច្ច និងអាជ្ញាធរក្នុងរាជធានី-ខេត្ត បានបង្ក្រាបដល់ទីតាំង និងបិទសៀល(មិនឱ្យមានសកម្មភាព) សរុបចំនួន ២៣៦ ទីតាំង នៅក្នុងបណ្តារាជធានី ខេត្ត ក្នុងនោះទីតាំងកាស៊ីណូ ចំនួន ៩១ ទីតាំង ទៅតាំងជាប្រភេទបុរី វីឡា ខុនដូ លំនៅឋាន ចំនួន ១៤៥ ទីតាំង។ តាមរបាយការណ៍របស់ក្រសួងយុត្តិធម៌ ក្នុងរយៈពេល៨ខែចុងក្រោយនេះ តុលាការកម្ពុជាបានអនុវត្តនីតិវិធីផ្លូវច្បាប់លើសំណុំរឿងពាក់ព័ន្ធនឹងការឆបោកអនឡាញ សរុបចំនួន ៧៩ សំណុំរឿង ដើម្បីផ្តន្ទាទោសមេខ្លោង និងបក្ខពួកចំនួន ៦៩៧ នាក់ ចំណោមនោះមានជនជាតិចិន វៀតណាម ឥណ្ឌូនេស៊ី ជប៉ុន កូរ៉េខាងត្បូង មីយ៉ាន់ម៉ា បង់ក្លាដេស សិង្ហបុរី នេប៉ាល់ ឥណ្ឌា ម៉ាឡេស៊ី ខ្មែរ ប៉ាគីស្ថាន ថៃ ហើយក្នុងនោះរាប់បញ្ចូលទាំងសំណុំរឿង ចេន ស៊ី , សំណុំរឿងឧកញ៉ា លី គួង និងសំណុំរឿងធំៗពាក់ព័ន្ធនឹងមេខ្លោងជាជនបរទេសផ្សេងទៀត។សម្ដេចមហាបវរធិបតី ហ៊ុន ម៉ាណែតនាយករដ្ឋមន្ត្រី នៃព្រះរាជាណាចក្រកម្ពុជាបានប្ដេជ្ញាចិត្តបោសសម្អាតឱ្យអស់នូវបទល្មើសឆបោកតាមប្រព័ន្ធបច្ចេកវិទ្យាចេញពីកម្ពុជានៅត្រឹមខែមេសា ឆ្នាំ២០២៦។ សម្តេចធិបតីបានបញ្ជាក់ថា កម្ពុជាមិនមែនជាកន្លែងសម្រាប់ឧក្រិដ្ឋជន បច្ចេកវិទ្យាប្រើប្រាស់ក្នុងការប្រព្រឹត្តការឆបោក ឬបទល្មើសឆ្លងដែនឡើយ។ រាល់បុគ្គល ឬអង្គភាពទាំងឡាយណាដែលនៅពីក្រោយសកម្មភាព ឆបោកទាំងនេះ នឹងត្រូវប្រឈមមុខនឹងទោសទណ្ឌខ្ពស់បំផុតដោយ គ្មានការយោគយល់ ឬការអន្តរាគមន៍ណាមួយឡើយ ៕

ក្រុមប្រឹក្សាជាតិគាំពារសង្គម ប្រជុំពិនិត្យសេចក្ដីព្រាងលើបញ្ហាជនអនាថា និងការចំណាយក្នុងប្រព័ន្ធគាំពារសង្គម

2026/03/24 03:01:30 pm        161
Facebook Telegram Linkin
ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាជាតិគាំពារសង្គម នៅថ្ងៃទី ២៣ ខែមីនា ឆ្នាំ ២០២៦ បានអញ្ជើញដឹកនាំកិច្ចប្រជុំក្រុមប្រឹក្សាជាតិគាំពារសង្គម លើកទី១៥។ កិច្ចប្រជុំផ្តោតលើ សេចក្ដីព្រាងសំខាន់ចំនួន ពីរ គឺ សេចក្តីព្រាង “គោលនយោបាយស្តីពីការគ្រប់គ្រង និងការដោះស្រាយបញ្ហាជនអនាថា” និងសេចក្ដីព្រាង “អនុក្រឹត្យស្តីពីការបញ្ជាក់ចំណាយក្នុងប្រព័ន្ធគាំពារសង្គម”។សេចក្តីព្រាងគោលនយោបាយនេះ “គោលនយោបាយស្តីពីការគ្រប់គ្រង និងការដោះស្រាយបញ្ហាជនអនាថា” មានគោលបំណង៖ (១) ផ្តល់ដំណោះស្រាយជាយុទ្ធសាស្ត្រ និងមានលក្ខណៈជាប្រព័ន្ធ, (២) ជំរុញការគាំទ្រលើសុខុមាលភាពជនអនាថា ដោយធានាលទ្ធភាពទទួលបានសេវាសង្គមកិច្ចសំខាន់ៗ និងអត្ថប្រយោជន៍នានាពីប្រព័ន្ធគាំពារសង្គម, (៣) រៀបចំប្រព័ន្ធអភិបាលកិច្ចច្បាស់លាស់តាមរយៈការពង្រឹងតួនាទី និងភារកិច្ចរបស់ក្រសួង-ស្ថាប័នពាក់ព័ន្ធ នៅថ្នាក់ជាតិ និងថ្នាក់ក្រោមជាតិ និង (៤) ពង្រឹងភាពជាដៃគូរវាងរាជរដ្ឋាភិបាល និងដៃគូអភិវឌ្ឍន៍ និងភាគីពាក់ព័ន្ធផ្សេងៗ ដើម្បីកាត់បន្ថយភាពអនាថា, លើកកម្ពស់ជីវភាព ស្តារនីតិសម្បទា, និងជំរុញការធ្វើសមាហរណកម្មទៅក្នុងសហគមន៍វិញតាមរយៈការបង្កើតយន្តការកំណត់អត្តសញ្ញាណច្បាស់លាស់។អង្គប្រជុំបានពិនិត្យ និងពិភាក្សាយ៉ាងយកចិត្តទុកដាក់លើចំណុចជាយុទ្ធសាស្ត្រសំខាន់ៗ និងបានផ្តល់មតិយោបល់កែសម្រួលខ្លឹមសារមួយចំនួន ដើម្បីឱ្យសេចក្តីព្រាងគោលនយោបាយនេះ កាន់តែមានភាពពេញលេញ និងគ្រប់ជ្រុងជ្រោយ មុននឹងគោរពស្នើសុំការពិនិត្យ និងសម្រេចដ៏ខ្ពង់ខ្ពស់របស់ សម្តេចមហាបវរធិបតី នាយករដ្ឋមន្រ្តី នៅពេលខាងមុខ។ បន្ទាប់ពីទទួលបានការសម្រេចដ៏ខ្ពង់ខ្ពស់, គោលនយោបាយនេះ នឹងក្លាយជាក្របខណ្ឌរួម ដែលចង្អុលបង្ហាញនូវដំណោះស្រាយជាយុទ្ធសាស្ត្រ និងយន្តការនានា សម្រាប់តម្រង់ទិសដល់ភាគីពាក់ព័ន្ធគ្រប់កម្រិតលើការងារគ្រប់គ្រង និងដោះស្រាយបញ្ហាជនអនាថាទូទាំងប្រទេស។សម្រាប់របៀបវារៈទី២ ដែលផ្តោតលើ“អនុក្រឹត្យស្តីពីការបញ្ជាក់ចំណាយក្នុងប្រព័ន្ធគាំពារសង្គម”ត្រូវបានរៀបចំឡើង ក្នុងគោលបំណងកំណត់អំពីវិធាន និងគោលការណ៍នៃការបញ្ជាក់ចំណាយ ដើម្បីធានាឱ្យបាននូវសុក្រឹតភាព, តម្លាភាព, គណនេយ្យភាព, ប្រសិទ្ធភាព និងស័ក្តិសិទ្ធិភាពនៃការទូទាត់ចំណាយក្នុងប្រព័ន្ធគាំពារសង្គម។ សេចក្តីព្រាងអនុក្រឹត្យនេះ បានកំណត់នូវគោលការណ៍សំខាន់ៗមួយចំនួន ដែលជាក្របខណ្ឌរួមនៃការរៀបចំ ពោលគឺ៖ (១) ការកំណត់ទីភ្នាក់ងារជាតិបញ្ជាក់ចំណាយជាអង្គភាពតែមួយគត់ ដែលមានសមត្ថកិច្ចអនុវត្តការបញ្ជាក់ចំណាយក្នុងប្រព័ន្ធគាំពារសង្គម, (២) ការប្រើប្រាស់ប្រព័ន្ធឌីជីថលបញ្ជាក់ចំណាយ ជាអភិក្រមក្នុងការបញ្ជាក់ចំណាយ, (៣) ការដាក់ចេញជាក់លាក់នូវវិធានការ និងការហាមឃាត់ចំពោះការស្នើសុំទូទាត់ចំណាយរបស់ភាគីផ្តល់សេវា ដែលមិនស្របតាមគោលការណ៍ដែលបានដាក់ចេញ, និង (៤) ការបង្កើតយន្តការដោះស្រាយវិវាទបញ្ជាក់ចំណាយ។អង្គប្រជុំបានពិនិត្យ និងពិភាក្សាយ៉ាងយកចិត្តទុកដាក់ និងបានឯកភាពជាគោលការណ៍លើ ខ្លឹមសារជារួមនៃសេចក្តីព្រាងអនុក្រឹត្យនេះ។ អង្គប្រជុំបានឯកភាពក្នុងការកែសម្រួលចំណុចមួយចំនួន ដើម្បីឱ្យការរៀបចំសេចក្តីព្រាង«អនុក្រឹត្យស្តីពីការបញ្ជាក់ចំណាយក្នុងប្រព័ន្ធគាំពារសង្គម» នេះ កាន់តែមានភាពគ្រប់ជ្រុងជ្រោយ មុននឹងគោរពស្នើសុំការពិនិត្យ និងសម្រេចដ៏ខ្ពង់ខ្ពស់របស់ សម្តេចមហាបវរធិបតី នាយករដ្ឋមន្រ្តី នៅពេលខាងមុខ។ អត្ថបទ៖គឹមហុក

កម្ពុជា-សិង្ហបុរី ពង្រឹងកិច្ចសហប្រតិបត្តិការលើវិស័យកម្មសិទ្ធិបញ្ញា ដើម្បី​ជំរុញ​សេដ្ឋកិច្ច​ផ្អែក​ចំណេះ​ដឹង និងនវានុវត្តន៍

2026/03/24 02:44:45 pm        120
Facebook Telegram Linkin
កម្ពុជា-សិង្ហបុរី សហការរៀបចំសិក្ខាសាលា ស្តីពីការចុះបញ្ជីប្រកាសនីយប័ត្រតក្កកម្ម គំនូរ​ឧស្សាហ​កម្ម និងការចុះបញ្ជីកម្មសិទ្ធិបញ្ញា សិង្ហបុរី និងការប្រើប្រាស់កម្មវិធីបច្ចេកវិទ្យា ដើម្បី​លើក​កម្ពស់​ការ​ចុះបញ្ជី និងការការពារកម្មសិទ្ធិឧស្សាហកម្មនៅកម្ពុជា។ឯកឧត្តម ផែ ច័ន្ទត្រាវុឌ្ឍ អគ្គនាយកនៃអគ្គនាយកដ្ឋានឧស្សាហកម្ម ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើកឡើង​ក្នុង​សិក្ខា​សាលា​ស្តីពី​ការ​ចុះ​បញ្ជី​ប្រកាស​នីយប័ត្រ​តក្កកម្ម គំនូរឧស្សាហកម្ម និងការចុះបញ្ជីកម្មសិទ្ធិបញ្ញាសិង្ហបុរី និងការប្រើ ប្រាស់​កម្ម​វិធី​បច្ចេក​វិទ្យា នៅថ្ងៃទី២៤ ខែមីនា ឆ្នាំ២០២៦ នេះថា កម្មសិទ្ធិឧស្សាហកម្ម​ជា​ផ្នែក​មួយ​ដ៏​មាន​សារៈ​សំខាន់​ សម្រាប់ជំរុញការធ្វើ ពាណិជ្ជកម្ម ការជំរុញឲ្យមានការច្នៃប្រឌិត និងបង្កើត​ផលិត​កម្ម​ឧស្សាហ​កម្ម​ថ្មីៗ ជំរុញការប្រកួតប្រជែងទីផ្សារក្នុងប្រទេស តំបន់ និងអន្តរជាតិ និងធ្វើឱ្យ​កាន់​តែ​រីក​ចម្រើន និងធានាបាននូវការការពារកម្មសិទ្ធិ ស្របតាមច្បាប់ជាតិ និងបទដ្ឋានអន្តរជាតិ។ឯកឧត្តមបន្ថែមថា ចំពោះប្រព័ន្ធនៃការចុះបញ្ជីកម្មសិទ្ធិឧស្សាហកម្ម ជាមូលដ្ឋាន​គ្រឹះ​មួយ​ដ៏​សំខាន់​ផ្ដល់​ភាព​កក់​ក្តៅ និងទំនុកយ៉ាង រឹងមាំដល់សហគ្រាសធុនតូច និងមធ្យម និងអ្នកច្នៃម៉ូដទាំងអស់ ដែល​បានប្រើប្រាស់បញ្ញា និងទេពកោសល្យផ្ទាល់ខ្លួន ដើម្បីច្នៃប្រឌិត បង្កើតនូវផលិតផលថ្មីៗ ក្នុង​ការ​ប្រកួតប្រជែងផលិតផលលើទីផ្សារក្នុងប្រទេស តំបន់ និងអន្តរជាតិ ជៀសវាង​ការលួច​ក្លែង​បន្លំ​ផលិ​តផ​ល ដែលបានចុះបញ្ជីការពារកម្មសិទ្ធិបញ្ញារួចហើយ។ សិក្ខាសាលា​នេះមា​ន​គោល​បំណង​លើក​កម្ពស់​ការប្រើប្រាស់ប្រព័ន្ធចុះបញ្ជីអេឡិចត្រូនិក (E-filing) ដើម្បីកាត់បន្ថយពេលវេលា និង​ចំណាយ, ចែករំលែកបទពិសោធន៍ល្អពីសិង្ហបុរី ក្នុងការការពារនិងគ្រប់គ្រងកម្មសិទ្ធិបញ្ញា តាម ស្តង់​ដាអ​ន្តរជាតិ, និងពង្រឹងការយល់ដឹងរបស់អាជីវកម្ម និងនវានុវត្តន៍ករ ក្នុងការ​ប្រើ​ប្រាស់​បច្ចេក​វិទ្យា​។លោក ប៉ែន ប៉ូលី ម្ចាស់សហគ្រាសពេញហឫទ័យប៉ែន លើកឡើងថា ជុំវិញកា​រ​ចុះ​បញ្ជី​ប្រកាស​នីយប័ត្រ​តក្កកម្មនេះពិតជាមាន សារៈសំខាន់ណាស់ សម្រាប់អ្នកអាជីវកម្ម ដើម្បីរក្សា​នូវ​កម្ម​សិទ្ធ​បញ្ហា​របស់​ខ្លួន ចៀសវាងការលួចបន្លំនូវគំនូរឧស្សាហកម្មផ្សេងៗ ក្នុងគោល ដៅជំរុញ​ដល់​បរិយា​កាស​ធ្វើធុ​រកិច្ច និងការច្នៃប្រឌិត ឱ្យមានភាពប្រកួតប្រជែងស្មើភាពគ្នា។ឯកឧត្តម ភោគ សុវណ្ណរិទ្ធ រដ្ឋលេខាធិការ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និង​នវា​នុវត្តន៍​បានបញ្ជាក់ថា កម្មសិទ្ធិ បញ្ញាគឺជាឆ្អឹងខ្នងនៃនវានុវត្តន៍ និងការប្រកួតប្រជែងសេដ្ឋកិច្ច ហើយ​កិច្ចសហប្រតិបត្តិការជាមួយ IPOS នឹងជួយជំរុញកម្ពុជាទៅរកសេដ្ឋ កិច្ចផ្អែក​លើ​ចំណេះ​ដឹង​។ កិច្ចសហប្រតិបត្តិការនេះមិនត្រឹមតែជួយសម្រួលដល់ធុរកិច្ចសិង្ហបុរីនៅកម្ពុជាប៉ុណ្ណោះទេ ប៉ុន្តែ​ថែម​ទាំង​ពង្រឹង ប្រព័ន្ធការពារកម្មសិទ្ធិបញ្ញា បង្កើនទំនុកចិត្តវិនិយោគិនអន្តរជាតិ គាំទ្រការ​អភិវឌ្ឍ​សេដ្ឋ​កិច្ច​ប្រកបដោយនវានុវត្តន៍ និងភាពប្រកួតប្រជែង។ កិច្ចសហប្រតិបត្តិការរវាងភាគីទាំងពីរដែលបានចាប់ផ្តើមតាំងពីឆ្នាំ២០១៥ ទទួលលទ្ធ​ផល​សំខាន់​ៗ​រួម​មាន​៖ ការចុះអនុស្សរណៈនៃការ យោគយល់ ស្តីពីកម្មសិទ្ធិឧស្សាហកម្ម (២០១៥), ការ​បន្ត​សុពល​ភាព​ការចុះអនុស្សរណៈនៃការយោគយល់ជាបន្តបន្ទាប់ (២០២០–២០២៥ និង ២០២៥–​២០៣០), ការទទួលស្គាល់ទៅវិញទៅមកលើប្រកាសនីយបត្រតក្កកម្ម និងគំនូរ​ឧស្សាហ​កម្ម, ការជ្រើសរើស IPOS ជាអាជ្ញាធរពិនិត្យ និងស្រាវជ្រាវ និងការកសាង​សមត្ថ​ភាព​មន្ត្រី​តាម​រយៈកម្មវិធីបណ្តុះបណ្តាលជាដើម៕ អត្ថបទ៖ សុន រ៉ាឌី

ក្រសួងទេសចរណ៍ និងរដ្ឋបាលខេត្តកោះកុង សហការជាមួយវិស័យឯកជន ជំរុញ​អភិវឌ្ឍ​វិស័យ​ទេសចរណ៍​កម្រិត​ខ្ពស់ក្នុងខេត្តកោះកុង

2026/03/24 02:33:22 pm        194
Facebook Telegram Linkin
ក្រសួងទេសចរណ៍ និងរដ្ឋបាលខេត្តកោះកុង ព្រមទាំងវិស័យឯកជន បានប្តេជ្ញារួមគ្នាក្នុងការជំរុញ និង​អភិវឌ្ឍ​វិស័យទេសចរណ៍នៅខេត្តកោះកុង ឱ្យក្លាយជាគោលដៅទេសចរណ៍កម្រិតខ្ពស់ សម្រាប់​ទាក់​ទាញភ្ញៀវទេសចរជាតិ និងអន្តរជាតិ។ ការអភិវឌ្ឍកោះទទឹងរីស្សតនេះ គឺជាការ​វិនិយោគ​ដោយ​ក្រុមហ៊ុនខ្មែរ ស្នាដៃនិងគំនិត ព្រមទាំងការឆ្នៃប្រឌិតដោយវិនិយោគិនខ្មែរ ដោយ​រក្សា​នូវ​អត្តសញ្ញាណខ្មែរ ដែលនេះបានឆ្លុះបញ្ជាំងពីការរួមចំណែករបស់ប្រជាជនខ្មែរ ដែល​ចេះ​ស្រឡាញ់​ និង​រួបរួមគ្នាក្រោមទិសស្លោក “ខ្មែររួមគ្នា ខ្មែរខ្លាំង”។ ក្នុងបេសកកម្មនេះ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងលោកជំទាវ ព្រម​ទាំង​លោក​ជំទាវ​ ឈី វ៉ា អភិបាលនៃគណៈអភិបាលខេត្តកោះកុង នៅថ្ងៃទី២៣ ខែមីនា ឆ្នាំ២០២៦ បាន​ដឹកនាំ​គណៈ​ប្រតិភូ​ចុះ​ទស្សន​កិច្ច​សិក្សា ​និងពិនិត្យស្ថានភាពអភិវឌ្ឍន៍ជាក់ស្តែងនៅ “កោះ​ទទឹង​រីស្សត” ដែលជារ​មណីយ​ដ្ឋាន​ទេសចរណ៍​កម្រិតខ្ពស់ថ្មីមួយ ស្ថិតក្នុងទឹកដីខេត្តកោះកុង។ ដំណើរទស្សនកិច្ចនេះ មាន​ការ​ចូល​រួម​ពី​ថ្នាក់​ដឹកនាំក្រសួងទេសចរណ៍ ថ្នាក់ដឹកនាំខេត្តកោះកុង តំណា​ង​សមាគម​ក្នុង​ឧស្សាហ​កម្ម​ទេសចរណ៍​កម្ពុជា រួមមាន CATA, CTF និង PATA ព្រមទាំងអ្នកផលិតមាតិកាជាតិ និងអន្តរជាតិ សរុប​ប្រមាណ ៦០នាក់។គណៈប្រតិភូបានចុះពិនិត្យហេដ្ឋារចនាសម្ព័ន្ធសំខាន់ៗនៅលើកោះទទឹងរីស្សត រួមមាន វីឡា​លំហែ​ប្រណិត​ ផ្ទះឈើបែបខ្មែរបុរាណ បណ្ណាល័យ កន្លែងហាត់ប្រាណ និងយូហ្គា អាងហែលទឹក កន្លែង​មើល​ថ្ងៃ​លិច និងភោជនីយដ្ឋាន ដែលបានរៀបចំតាមស្តង់ដារខ្ពស់។ក្នុងឱកាសនេះ ឯកឧត្តមរដ្ឋមន្ត្រី បានថ្លែងអំណរគុណ និងវាយតម្លៃខ្ពស់ចំពោះក្រុមហ៊ុន ដែន​នគរ (ខេមូឌា) អ៊ិនវេសមិន ឯ.ក. ដែលបានវិនិយោគ និងអភិវឌ្ឍកោះទទឹងរីស្សត តាមរយៈ ឱ្យ​ក្លាយ​ជា​រមណីយដ្ឋានទេសចរណ៍ប្រណិត មានសក្តានុពល​ខ្ពស់ក្នុង​ការ​ប្រកួត​ប្រជែង​លើ​ទីផ្សារ​អន្តរជាតិ​។ គួរបញ្ជាក់ថា “កោះទទឹងរីស្សត” បានបើកដំណើរការសាកល្បងកាលពីថ្ងៃទី២០ ខែមីនា ឆ្នាំ ២០២៦ ដោយមានវីឡាសរុបចំនួន ២៤ រចនាបែបបុរាណ និងសហសម័យ ព័ទ្ធ​ជុំវិញ​ដោយ​ធម្មជាតិ​ខៀវ​ស្រងាត់ និងមានឆ្នេរខ្សាច់សស្អាតប្រវែងប្រមាណ ២,០០០ ម៉ែត្រ ដែលផ្តល់​នូវ​បទ​ពិសោធន៍​លំហែ​កាយដ៏ប្រណិត និងឯកជនភាពខ្ពស់៕

កម្ពុជាដាក់ឱ្យដំណើរការកម្មវិធីរួម WISE ដើម្បីពង្រីកសេវាផ្គត់ផ្គង់ទឹកស្អាត និង​ថាមពល​កកើត​ឡើង​វិញ​ដែល​ធន់​នឹងអាកាសធាតុ

2026/03/24 01:37:23 pm        156
Facebook Telegram Linkin
ភ្នំពេញ៖ នៅថ្ងៃទី២៣ ខែមីនា ឆ្នាំ២០២៦នេះ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍ សហការជាមួយអង្គការសហប្រជាជាតិប្រចាំនៅកម្ពុជា រួមមានយូនីសេហ្វ (UNICEF) និង​មូលនិធិអភិវឌ្ឍន៍មូលធនអង្គការសហប្រជាជាតិ (UNCDF) បានប្រកាសដាក់ឱ្យដំណើរការ កម្មវិធី​រួម​ស្តីពីហេដ្ឋារចនាសម្ព័ន្ធទឹកស្អាត និងថាមពលឆ្លាតវៃ (WISE) ដែលជា​កម្ម​វិធី​ហិរញ្ញ​ប្ប​ទា​​នច​ម្រុះដ៏លេចធ្លោមួយ ដើម្បីពន្លឿនការទទួលបានសេវាទឹកស្អាតដែលមានសុវត្ថិភាព និង​ធន់​នឹង​អាកាស​ធាតុនៅទូទាំងប្រទេសកម្ពុជា។ក្រោមការ​ផ្តល់​ហិរញ្ញប្បទានពីមូលនិធិរួមសម្រាប់ការអភិវឌ្ឍប្រកបដោយចីរភាព (SDG) របស់​អង្គការ​សហ​ប្រជាជាតិ កម្មវិធី WISE បង្ហាញគំរូហិរញ្ញប្បទានឈានមុខមួយ ដែលរួម​បញ្ចូល​មូល​ធន​ពាណិជ្ជកម្ម និងមូលធនមានការប្រាក់ទាប ជាយន្តការហិរញ្ញប្បទានចម្រុះវិលជុំ ផ្តោត​លើ​ការ​ធានា​ឱ្យ​មានប្រព័ន្ធផ្គត់ផ្គង់ទឹកស្អាតឆ្លាតវៃដែលធន់នឹងអាកាសធាតុ។តាមរយៈ​ការរួមបញ្ចូលកច្ចីសម្បទាន និងកម្ចីពាណិជ្ជកម្ម យន្តការនេះ​ជួយ​កាត់​បន្ថយ​ថ្លៃ​ដើម​នៃ​កម្ចី​ សម្រាប់ប្រតិបត្តិករទឹកស្អាតឯកជន ព្រមទាំងផ្តល់​ការ​គាំទ្រ​ផ្នែក​បច្ចេក​ទេស​សម្រាប់​ទាំង​ប្រតិបត្តិករ​ទឹក​ស្អាតឯកជន ស្ថាប័នហិរញ្ញវត្ថុ និងសាជីវកម្មធានាឥណទានកម្ពុជា។ ជំនួយនេះ​មាន​សារ​សំខាន់ណាស់ ដោយសារកុមារកម្ពុជាប្រមាណ ១,៩ លាននាក់ (ជាង​មួយ​ភាគ​បី​នៃ​កុមារ​កម្ពុជា) កំពុងរស់នៅក្នុងឃុំដែលប្រឈមនឹងហានិភ័យអាកាសធាតុខ្ពស់ រួមទាំង​គ្រោះ​រាំង​ស្ងួត ​និងទឹកជំនន់ញឹកញាប់ ព្រមទាំងសេវាទឹកស្អាត និងអនាម័យ នៅមានកម្រិតនៅឡើយ។ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បាន​លើក​ឡើងថា “ប្រតិបត្តិករទឹក​ស្អាត​ឯកជន​ដើរ​តួនាទី​យ៉ាង​សំខាន់​ក្នុង​ការ​ចូល​រួម​ផ្តល់​សេវា​ទឹក​ស្អាត​ដល់​ប្រជាពលរដ្ឋ។ ទោះជាយ៉ាងណា ប្រតិបត្តិករទាំងនោះនៅបន្តមានបញ្ហាប្រឈម ក្នុង​ការ​ទទួល​បាន​ហិរញ្ញប្បទានដែលមានតម្លៃសមរម្យ សម្រាប់ការកែលម្អហេដ្ឋារចនាសម្ព័ន្ធ និងការ​ផ្លាស់​ប្តូរ​មកប្រើប្រាស់ថាមពលកកើតឡើងវិញ។ កម្មវិធី WISE គឺជាគំនិតផ្តួចផ្តើមដ៏សំខាន់មួយ នៅ​ក្នុងកិច្ចខិតខំប្រឹងប្រែងថ្នាក់ជាតិរបស់យើង ដើម្បីធ្វើទំនើបកម្មវិស័យទឹកស្អាត ពង្រីក​ការ​ទទួល​បាន​ទឹ​កស្អាត និងជំរុញការប្តេជ្ញាចិត្តរបស់យើងលើបញ្ហាអាកាសធាតុ។ តាមរយៈការ​នាំ​យក​នវានុវត្តន៍ ការវិនិយោគ និងចីរភាពរយៈពេលវែងដល់ប្រព័ន្ធផ្គត់ផ្គង់ទឹកស្អាតរបស់កម្ពុជា ភាព​ជាដៃគូជាមួយអង្គការសហប្រជាជាតិប្រចាំនៅកម្ពុជានេះ រំពឹងថានឹង​ជួយ​ធ្វើ​ឱ្យ​ប្រសើរ​ឡើង​នូវ​​សេវា​កម្មផ្គត់ផ្គង់ទឹកស្អាតសម្រាប់ប្រជាពលរដ្ឋជាង ២០០.០០០ នាក់នៅទូទាំងប្រទេស។”លោក​ស្រី Vladanka Andreeva អ្នកសម្របសម្រួលអង្គការសហប្រជាជាតិប្រចាំនៅកម្ពុជា បាន​លើក​ឡើង​ថា “ការទទួលបានសេវាទឹកស្អាតដែលធន់នឹងអាកាសធាតុ គឺជារឿង​ចាំ​បាច់​សម្រាប់​សុខុមាល​ភាព​គ្រួសារ ព្រមទាំងសុខភាព និងការសិក្សារបស់កុមារ។ តាមរយៈកម្មវិធី WISE នេះ កម្ពុជា​កំពុងចាត់វិធានការយ៉ាងមុតមាំ ដើម្បីធានាថាកុមារ និងក្រុមគ្រួសារ ជា​ពិសេស​អ្នក​ដែល​នៅ​តំបន់​ឆ្ងាយ ​ទទួលបានអត្ថប្រយោជន៍ពីទឹកស្អាតដែលមានថ្លៃសមរម្យ និងមានចីរភាព ដោយ​ប្រើ​ប្រាស់​ថាមពលកកើតឡើងវិញ។ អង្គការសហប្រជាជាតិប្រចាំនៅកម្ពុជា តាមរយៈយូនីសេហ្វ និង UNCDF រីករាយសហការជាមួយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និង​ដៃគូ​របស់​យើង ដើម្បីត្រួសត្រាយផ្លូវសម្រាប់ហិរញ្ញប្បទានប្រកបដោយនវានុវត្តន៍ ដែលជួយព​ន្លឿន​វឌ្ឍនភាពឆ្ពោះទៅរកគោលដៅអភិវឌ្ឍន៍ប្រកបដោយចីរភាព (SDGs) និងពង្រឹង​ភាព​ធន់​របស់​សហគមន៍​នៅទូទាំងប្រទេស។”កម្មវិធីនេះ​គាំទ្រដល់វឌ្ឍនភាពរបស់កម្ពុជាឆ្ពោះទៅរកគោលដៅអភិវឌ្ឍន៍ប្រកបដោយចីរភាពទី៦ (ទឹក​ស្អាត និងអនាម័យ) និង គោលដៅអភិវឌ្ឍន៍ប្រកបដោយចីរភាពទី១៣ (សកម្មភាព​អាកាស​ធាតុ​) ​តាមរយៈ​ការ​កៀរគរ​ការ​វិនិយោគ​ឯកជន​លើ​ហេដ្ឋារ​ចនា​សម្ព័ន្ធ​ទឹក​ស្អាត​ដើរ​ដោយ​ថាមពល​កកើត​ឡើង​វិញ ជាពិសេសការបូមទឹកដោយថាមពលព្រះអាទិត្យ និងបច្ចេក​វិទ្យា​គ្រប់​គ្រង​ទឹក​ស្អាត​បែប​ឌីជីថល។កម្មវិធី WISE​ នឹងដំណើរការក្រោមគណៈកម្មការដឹកនាំថ្នាក់ជាតិ ដើម្បីធានាបាន​នូវ​ភាព​ជា​អ្នក​ដឹក​នាំ​ដ៏រឹងមាំដោយរាជរដ្ឋាភិបាល និងស្របតាមផែនការយុទ្ធសាស្ត្រអភិវឌ្ឍន៍ជាតិ និង​ផែន​ការ​ជាតិ​រួម​ចំណែកឆ្លើយតបនឹងការប្រែប្រួលអាកាសធាតុនៅកម្ពុជា (NDC)៕

គម្រោងស្ដារប្រឡាយបុរាណរបស់អាជ្ញាធរជាតិអប្សរាក្នុងឃុំដូនកែវ បាន​ផ្ដល់​ប្រយោជន៍​សំខាន់​លើ​ការ​អភិរក្សប្រឡាយទឹកបុរាណ ទេសភាពវប្បធម៌ និងរក្សាទឹក​ទុក​ស្រោច​ស្រព​ដំណាំ​របស់​ពលរដ្ឋ

2026/03/24 12:52:38 pm        78
Facebook Telegram Linkin
រយៈពេល២ឆ្នាំមកនេះ គម្រោងគ្រប់គ្រងទឹកអង្គរប្រកបដោយប្រសិទ្ធភាព និង​ចីរភាព​ដើម្បី​​ភាព​ធន់​នឹង​ការប្រែប្រួលអាកាសធាតុ និងសង្គមសេដ្ឋកិច្ច ឬ Angkor Water Resilience Project (AWR) របស់អាជ្ញាធរជាតិអប្សរា ក្រោមកិច្ចសហការជាមួយប្រទេសនូវែលហ្សេឡង់(New Zealand) បានយកចិត្តទុកដាក់ទៅលើការងារស្ដារប្រឡាយទឹកបុរាណចំនួន២ខ្សែ មានប្រវែង សរុប​៤៣៩០ម៉ែត្រ ស្ថិតនៅក្នុងឃុំដូនកែវ ស្រុកពួក។ ប្រឡាយ​ទឹកបុរាណទាំងពីរខ្សែនេះ បានបញ្ចប់រួចរាល់ជាស្ថាពរ និងបាន​រួម​ចំណែក​ក្នុង​ការ​ងារ​អភិរក្ស​ប្រឡាយ​ទឹកបុរាណ ទេសភាពវប្បធម៌ និងជាប្រព័ន្ធរំដោះទឹកជំនន់ចេញពីតំបន់អង្គរ និង​ក្រុង​សៀមរាប ព្រមទាំងជួយរំដោះទឹកភ្លៀងចេញពីភូមិដ្ឋានរបស់ពលរដ្ឋផង។ ប្រឡាយ២ខ្សែនេះ ក៏​មាន​តួនាទីជួយរក្សាទឹកទុកសម្រាប់ពលរដ្ឋក្នុងឃុំ យកទៅស្រោចស្រពស្រែចម្ការ ដំណាំ និង​ផ្តល់​ផល​នេសាទ ព្រមទាំងធ្វើជាផ្លូវដីតាមខ្នងទំនប់សងខាងប្រឡាយ សម្រាប់​ពលរដ្ឋ​ក្នុង​ភូមិ​អាច​ធ្វើ​ចរាចរ និងដឹកជញ្ជូនកសិផលជាដើម។ បច្ចុប្បន្ននេះ មានពលរដ្ឋក្នុងភូមិមួយចំនួន កំពុងទទួលប្រយោជន៍​ដោយ​ផ្ទាល់​ពី​គម្រោង​ស្ដារ​ប្រឡាយ​បុរាណ២ខ្សែនេះ ដូចជា ភូមិគោកត្នោត ភូមិប្រាសាទចារ្យ និងភូមិល្បើក។ ជាមួយគ្នានេះ មាន​ពលរដ្ឋនៅភូមិខ្លះទៀត ក៏ទទួលផលដោយប្រយោលពីប្រឡាយបុរាណនេះដែរ ដូចជា​ភូមិ​នគរ​ក្រៅ ​ភូមិគោកបេង ភូមិគោកពោធិ៍ ភូមិរហាល ភូមិពាម និងភូមិតាស្នែ ជាដើម។ដើម្បី​ជា​ការរួមចំណែកក្នុងការគ្រប់គ្រងទឹកនៅក្នុងភូមិសាស្រ្តឃុំដូនកែវ ស្រុកពួក​នេះ​ឱ្យ​កាន់​តែ​មាន​ប្រសិទ្ធ​ភាព គម្រោងAWR ក៏បានធ្វើការ​សាង​សង់​សំណង់​ធារា​សាស្ត្រ​មួយចំ​នួន​នៅ​តាម​បណ្តោយ​ប្រឡាយទាំងនេះថែមទៀត ដូចជាសំណង់ទ្វារទឹកថ្មីចំនួន៤កន្លែង សំណង់បង្ហៀរ​១​កន្លែង​ និងជួសជុលទំនប់សងខាងប្រឡាយប្រវែង១០០០ម៉ែត្រ៕

ទិវាពិភពលោកកម្ចាត់​រោគរបេង៖ កម្ពុជា​ទទួល​បាន​ជោគជ័យ​គួរ​ជាទី​មោទនៈ​លើការ​ប្រយុទ្ធ​នឹង​ជំងឺ​របេង

2026/03/24 12:43:49 pm        234
Facebook Telegram Linkin
នៅព្រឹកថ្ងៃទី២៤ ខែមីនា ឆ្នាំ២០២៦នេះ ក្រសួងសុខាភិបាលកម្ពុជា បានប្រារព្ធ ទិវា​ពិភព​លោក​កម្ចាត់​រោគ​របេង​ ក្រោមប្រធានបទ«មែនហើយ! យើងអាចបញ្ចប់ជំងឺរបេង៖ ដឹកនាំដោយ​ប្រទេ​ស​ជាតិ​ជំរុញដោយប្រជាជន» នៅក្នុងមជ្ឈមណ្ឌលជាតិកំចាត់រោគរបេង និងហង់សិន (រាជ​ធានី​ភ្នំពេញ​) ខណៈកម្ពុជាទទួលបានជោគជ័យគួរជាទីមោទនៈលើការប្រយុទ្ធនឹងជំងឺរបេង ដោយ​អត្រា​ស្លាប់​ដោយសារជំងឺរបេងនៅកម្ពុជា បានធ្លាក់ចុះពី ៨០ករណីក្នុងឆ្នាំ២០០០ មកត្រឹម ១៨​ករណី​នៅ​ឆ្នាំ២០២៤ ដែលស្មើនឹងការធ្លាក់ចុះ ៧៨%។ទិវាពិភពលោកកំចាត់រោគរបេងឆ្នាំនេះធ្វើឡើងក្រោមអធិបតី ឯកឧត្តមសាស្រ្តាចារ្យ ឈាង រ៉ា រដ្ឋ​មន្រ្តី​ក្រសួង​សុខាភិបាល និងមានការអញ្ជើញចូលរួមពីសំណាក់ តំណាងអង្គ​ការ​សុខភាព​ពិភព​លោក​ប្រចាំប្រទេសកម្ពុជា,តំណាងស្ថានទូតអូស្ត្រាលី ប្រចាំប្រទេសកម្ពុជា និងនាយក​ប្រតិបត្តិ​អង្គការ ​KHANA តំណាងអង្គការសង្គមស៊ីវិលជាច្រើនទៀត។លោកវេជ្ជបណ្ឌិត ហួត ចាន់យុដា ប្រធានមជ្ឈមណ្ឌលជាតិកំចាត់រោគរបេង និងហង់សិន បាន​លើក​ឡើង​ថា កម្ពុជាយើងប្រារព្ធទិវានេះ លើកដំបូងនៅឆ្នាំ១៩៩៩ ហើយលើកនេះគឺជាឆ្នាំទី២៨ ហើយ​ដែលមជ្ឈមណ្ឌលជាតិកំចាត់រោគរបេង និងហង់សិន នៃក្រសួងសុខាភិបាល បាននឹង​កំពុង​រៀប​ចំ​ប្រារព្ធធ្វើទិវានេះ។ នៅឆ្នាំ២០២៤នៅទូទាំងសកលលោក មានអ្នកជំងឺរបេងថ្មី កើតមាន​ប្រមាណ​ចំនួន​ ១០លាន ៧សែននាក់ ក្នុងនោះមានតែ ៨លាន ៣សែន ករណីប៉ុណ្ណោះ ដែល​បាន​ស្រាវ​ជ្រាវរកឃើញ និងរាយការណ៍ទៅអង្គការសុខភាពពិភពលោក ដូចនេះនៅ​សល់​ជំងឺ​ប្រមាណ ​២លាន ៤សែននាក់ទៀត ពុំបានទទួលសេវាស្រាវជ្រាវ និងព្យាបាលនៅឡើយ។ លើស​ពី​នេះទៀត ជំងឺរបេងនៅតែឆក់យកអាយុជីវិតមនុស្សក្នុងមួយឆ្នាំៗ ប្រមាណជាង១លាននាក់។លោក​បាន​បន្ថែមថា ការងារប្រយុទ្ធនឹងជំងឺរបេងនៅព្រះរាជាណាចក្រកម្ពុជា ទទួលបាន​ជោគ​ជ័យ​គួរ​ជា​ទីមោទនៈ។ ជាក់ស្តែងតាមរបាយការណ៍អង្គការសុខភាពពិភពលោកឆ្នាំ២០២៥ បង្ហាញ​ថា​អត្រា​ស្លាប់​ដោយ​សារជំ​ងឺរបេងនៅកម្ពុជា បានធ្លាក់ចុះពី ៨០ករណី ក្នុងចំណោមប្រជាជន ១០០,០០០​នាក់ ក្នុងឆ្នាំ២០០០ មកត្រឹម ១៨ករណីក្នុងចំណោម ប្រជាជន ១០០,០០០ នាក់ នៅ​ឆ្នាំ​២០២៤ ដែលស្មើ​នឹងការធ្លាក់ចុះ៧៨%។ ចំណែកឯអត្រាអាំងស៊ីដង់ រឺអត្រា កើត​ជំងឺ​រ​បេង​ករណី​ថ្មី​ ក៏បានធ្លាក់ចុះពី ៨៥៣ករណី ក្នុងចំណោមប្រជាជន ១០០,០០០នាក់ នៅឆ្នាំ២០០០ មក​ត្រឹម ២៧២ករណី ក្នុងចំណោមប្រជាជន ១០០,០០០នាក់ នៅឆ្នាំ២០២៤ ដែល​ស្មើ​នឹង​ការ​ធ្លាក់​ចុះ​៦៨%។ឆ្លៀតក្នុងឱកាសនេះដែរឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល បាន​ថ្លែង​សារ​លិខិត​សម្តេច​មហាបវរធិបតី ហ៊ុន ម៉ាណែត នាយករដ្ឋមន្រី្តនៃព្រះរាជាណាចក្រកម្ពុជា ក្នុង​ឱកាស​ប្រារព្ធ​ទិវា​ពិភពលោក កំចាត់រោគរបេង ថ្ងៃទី២៤ ខែមីនា ឆ្នាំ២០២៦នេះ។ ឯកឧត្តមរដ្ឋមន្រី្ត បានសង្កត់ធ្ងន់ថា រាជរដ្ឋាភិបាលមានជំនឿយ៉ាងមុតមាំថា ប្រធានបទ​ដែល​ត្រូវ​បាន​កំណត់​នៅ​ក្នុងឆ្នាំនេះ នឹងសង្កត់ធ្ងន់ឱ្យពិភពលោកទាំងមូលមានជំនឿយ៉ាងមុតមាំថា យើង​ទាំង​អស់​គ្នា​អាចបញ្ចប់ជំងឺរបេងបាន ដោយយើងទាំងអស់គ្នា ត្រូវរួបរួមប្តេជ្ញា វិនិយោគ អនុវត្ត និង​បង្កើន​ល្បឿន ​ដើម្បីបំពេញកិច្ចការដ៏ច្រើនបន្ថែមទៀត ជាពិសេសពង្រឹងសេវាថែទាំ បង្កើន​ការ​ស្រាវ​ជ្រាវ ​និងព្យាបាលជំងឺរបេងជាសកលនៅគ្រប់ទីកន្លែងសម្រាប់ជនគ្រប់រូប៕ អត្ថបទ រដ្ឋា

អ្នកនាំពាក្យ៖ មិនថានៅទីណាឬពេលណា រាជរដ្ឋាភិបាលមិនដែលភ្លេចកាតព្វកិច្ច «ការពារ​បូរណ​ភាព​ទឹកដី និងប្រជាជន»

2026/03/24 12:24:33 pm        280
Facebook Telegram Linkin
អ្នកនាំពាក្យរាជរដ្ឋាភិបាលបានបញ្ជាក់ជាថ្មីថា មិនថានៅទីណា ឬពេលវេលាណា រាជ​រដ្ឋាភិបាល​មិន​ដែល​ភ្លេច​កាតព្វកិច្ច «ការពារបូរណភាពទឹកដី និងប្រជាជន» ដែលជាអាទិភាពខ្ពស់បំផុត ខណៈ​ប្រធាន​បទ​ស្តីពី «ការវិវត្តន៍ថ្មីៗនៃស្ថានការណ៍នៅតាមបណ្តោយព្រំដែនកម្ពុជាថៃ» បាន​ក្លាយ​ជា​របៀបវារៈ​ដ៏​សំខាន់​និង​ចាំ​បាច់​មួយ​រប​ស់​ថ្នាក់​ដឹក​នាំ​កម្ពុជា​សម្រាប់​កិច្ច​ពិភាក្សា​នានា​ទាំង​នៅ​​ក្នុ​ងប្រទេស និងក្រៅប្រទេស។ តាមរយៈសន្និសីទសារព័ត៌មាននៅថ្ងៃទី២៤ ខែមីនា ឆ្នាំ២០២៦នេះ ឯកឧត្តម ប៉ែន បូណា អ្នក​នាំ​ពាក្យរាជរដ្ឋាភិបាលកម្ពុជា បានថ្លែងថា ជាក់ស្តែង នៅព្រឹកថ្ងៃទី២៣ ខែមីនា ឆ្នាំ២០២៦ ឯកឧត្តម​ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ បាន​ទទួល​ជំនួបសម្តែងការគួរសមរបស់ឯកឧត្តម Shri P. Kumaran រដ្ឋលេខាធិការ​ទទួល​បន្ទុក​តំបន់​ខាង​កើត​នៃក្រ​សួង​ការបរទេសឥណ្ឌា ក្នុងឱកាស​ដែល​ឯកឧត្តម​អញ្ជើញ​មក​បំពេញ​ទស្សន​កិច្ច​នៅ​កម្ពុជា​។ក្នុងជំនួបនោះ ក្រៅពីកិច្ចពិភាក្សាអំពីទំនាក់ទំនង កិច្ចសហប្រតិបត្តិការ​ជាមិត្ត​ភាព​ដ៏​យូរ​អង្វែង​និង​យ៉ាង​ជិត​ស្និទ្ធ​រវាងកម្ពុជានិងឥណ្ឌា និងការរិះរកមធ្យោបាយនានា​ពង្រឹង​កិច្ច​សហ​ប្រតិបត្តិ​ការ​ដែល​ផ្តល់​ផល​ប្រយោជន៍ទៅវិញទៅមកបន្ថែមទៀតក្នុងវិស័យនានា ឯកឧត្តមឧបនាយករដ្ឋមន្ត្រី ប្រាក់ សុខុន​ក៏បានធ្វើបច្ចុប្បន្នភាពអំពីការវិវត្តថ្មីៗនៃស្ថានភាពព្រំដែនកម្ពុជា-ថៃ ជូនដៃគូ​សន្ទនាផ​ង​ដែរ​។ អ្នកនាំពាក្យបន្តថា ក្រៅពីនេះ នារយៈពេលប៉ុន្មានថ្ងៃចុងក្រោយនេះ ក្រសួងការបរទេស និង​ក្រសួង​ស្ថាប័ននានាក៏បានទទួលជួបជាមួយដៃគូបរទេសជាច្រើនដែលក្នុងជំនួបទាំងនោះ ស្ថាន​ការ​វិវត្តន៍នៅតាមព្រំដែនកម្ពុជាថៃគឺជារបៀបវារៈដ៏សំខាន់មួយ។ ក្រសួង​និង​ស្ថាប័ន​នានា​របស់​រាជ​រដ្ឋាភិបាល​ក៏បាននិងកំពុងធ្វើការងារយ៉ាងសកម្មតាមវិស័យរបស់ខ្លួនដោយមិនភ្លេចបញ្ហាព្រំដែន និង​ជនភៀសសឹក។ ជាក់ស្តែង តាមរយៈក្រសួងអប់រំ យុវជននិងកីឡា លោក Ian Hoskins នាយក​នៃ​នាយកដ្ឋាន​ទទួលប​ន្ទុក​កិច្ច​សហ​ប្រតិបត្តិការ និង​ភាព​ជា​ដៃគូ​អន្តរជាតិ​សំរាប់​តំបន់​អាស៊ី​អាគ្នេយ៍​និង​អាស៊ី​ខាង​ត្បូង​នៃស្នា​ក់ការកណ្ដាលសហភាពអឺរ៉ុប បានធ្វើដំណើរទ​ស្សន​កិច្ច​ទៅ​កាន់​ថ្នាក់​រៀន​ក្នុង​មណ្ឌល​ភៀស​សឹក ​ស្រុកអូរជ្រៅ ខេត្តបន្ទាយមានជ័យ ដើម្បីពិនិត្យដោយផ្ទាល់ពីកិច្ចខិតខំប្រឹងប្រែងនានា ក្រោម​ការគាំទ្រពីសហភាពអឺរ៉ុប ដើម្បីស្តារលទ្ធភាពទទួលបានការអប់រំឡើងវិញ សម្រាប់​អ្នក​ដែល​បាន​បាត់​បង់ឱកាស។សហភាពអឺរ៉ុប នៅតែបន្តប្តេជ្ញាចិត្តយ៉ាងមុតមាំ ក្នុងការធានាថា កុមារគ្រប់រូបនៅកម្ពុជា ទទួល​បាន​ការអប់រំប្រកបដោយគុណភាព ទោះបីស្ថិតក្នុងកាលៈទេសៈមិនច្បាស់លាស់ នៃជម្លោះ​ឬ​ការ​ផ្លាស់​ទី​លំនៅក៏ដោយ។ សហភាពអឺរ៉ុបនៅទីនេះជាមួយអ្នកដើម្បីជួយកសាងប្រព័ន្ធអប់រំមួយ ដែល​មាន​លក្ខណៈបរិយាបន្ន និងភាពធន់ជាងមុន។ នេះជាខ្លឹមសារ​ដែល​ត្រូវ​បាន​បង្ហោះ​លើ​គេទំ​ព័រ​ផ្លូវ​ការ​របស់សហភាពអឺរ៉ុបប្រចាំកម្ពុជា។ កាលពីចុងខែ​កុម្ភៈកន្លងទៅថ្មីៗនេះដែរ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការ​បរទេស​និង​សហប្រតិបត្តិការអន្តរជាតិ ក៏បានអញ្ជើញថ្លែងបទអន្តរាគមន៍ក្នុងសម័យប្រជុំលើកទី ៦១ ​នៃក្រុមប្រឹក្សាសិទ្ធិមនុស្សអង្គការសហប្រជាជាតិ នៅទីក្រុងហ្សឺណែវ សហព័ន្ធស្វីស ដោយ​បាន​សង្កត់​ធ្ងន់ថា ការបង្ក​ឧបសគ្គ​រារាំង​ដល់​ការ​វិល​ត្រឡប់​រប​ស់​ប្រជាជ​ន​ស៊ីវិ​ល​កម្ពុជា​រាប់​ម៉ឺន​នាក់​ទៅ​កាន់​ផ្ទះ​សម្បែងរបស់គេវិញ ប្រកបដោយសុវត្ថិភាពនិងសេចក្តីថ្លៃថ្នូរ គឺជាការប៉ះ​ពាល់​ធ្ងន់​ធ្ងរ​ទៅ​លើ​សិទ្ធិមនុស្ស។ សូមរម្លឹកជូនថា ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការ​បរទេសនិ​ង​សហ​ប្រតិប​ត្តិ​ការអន្តរជាតិ ក៏ទើបតែបានបញ្ចប់ដំណើរទស្សនកិច្ចផ្លូវការនៅប្រទេសសិង្ហបុរី នូវែល​សេឡង់​ និងអូស្ត្រាលី ដោយក្នុងដំណើរទស្សនកិច្ចនោះ ស្ថានការណ៍វិវត្តន៍​នៅ​តាម​បណ្តោយ​ព្រំដែន​កម្ពុជា​ថៃត្រូវបានពិភាក្សាយ៉ាងស៊ីជម្រៅ ដែលអនុញ្ញាតឱ្យបណ្តា​ដៃ​គូ​សន្ទនា​បាន​យល់​ច្បាស់​ពី​សភាពការណ៍ពិត ក៏ដូចជាជំហរ​សន្តិភាព​និយម​ដោយ​ផ្អែក​លើ​ច្បាប់​អន្តរជាតិ​របស់​កម្ពុជា​ដែល​ស្រប​នឹងការចង់បានរបស់សហគមន៍អន្តរជាតិ។ ដំណើរទស្សន​កិច្ច​ផ្លូវ​ការ​ទៅ​កាន់​ប្រទេស​ទាំង​បី​ខាង​លើរបស់ប្រមុខការទូតកម្ពុជា បានកើតឡើង​បន្ទាប់​​ពី​ដំណើរ​បេសកកម្ម​ការ​ទូត​របស់​សម្តេច​បវរ​ធិបតី ហ៊ុន ម៉ាណែត នាយករដ្ឋមន្ត្រី នៅសហរដ្ឋអាម៉េរិក និងអឺរ៉ុប កាលពីចុងខែកុម្ភៈ ឆ្នាំ២០២៦ថ្មីៗនេះ។ អ្នកនាំពាក្យរាជរដ្ឋាភិបាលបានបញ្ជាក់ថា សកម្មភាពទាំងការទូតសកម្មទាំងនេះ បាន​ឆ្លុះ​បញ្ចាំង​ពី​ភាព​សកម្មរបស់រាជរដ្ឋាភិបាលកម្ពុជា នៅលើសមរភូមិការទូតដើម្បីឧត្តមប្រយោជន៍ជាតិ ដោយ​ផ្សារ​ភ្ជាប់​ជាមួយអាទិភាពខ្ពស់បំផុតរបស់រាជរដ្ឋាភិបាលគឺ «ការការពារ​បូរណ​ភាព​​ទឹក​ដី និង​ប្រជា​ជន​» និងក៏បានបង្ហាញឱ្យឃើញថា សហគមន៍​អន្តរជាតិ​បាន​ទទួល​ព័ត៌មាន​ច្បាស់​លាស់​ និង​បន្ត​តាម​ដាន​យ៉ាងយកចិត្តទុកដាក់​លើ​ប្រទេស​កម្ពុ​ជា និង​ជន​ភៀស​សឹក​ជា​ច្រើន​ម៉ឺន​នាក់​ដែល​មិន​ទាន់​អាច​វិលត្រឡប់ទៅផ្ទះសម្បែងវិញបាននៅឡើយដោយសារការរារាំងពីកងកម្លាំងថៃ ក្នុង​នោះ​ក៏​មាន​កុមា​រកម្ពុជាជាច្រើនមិនបានទៅសាលារៀនរបស់ពួកគេវិញនៅឡើយ៕

រដ្ឋមន្រ្តីកិច្ចការនារី លើកទឹកចិត្តសហគ្រិនស្ត្រីឱ្យពង្រឹងគុណភាព និងស្តង់ដារដល់អ្នកប្រើប្រាស់

2026/03/24 11:56:15 am        152
Facebook Telegram Linkin
រដ្ឋមន្រ្តីក្រសួងកិច្ចការនារី លើកទឹកចិត្តដល់សមាគមសហគ្រិនកម្ពុជា និងសហគ្រិនស្ត្រីទាំងអស់ ផ្តោតការយកចិត្តទុកដាក់ខ្ពស់លើ ការពង្រឹងគុណភាព និងស្តង់ដារផលិតផល ដើម្បីកសាង និងរក្សាឱ្យបាននូវទំនុកចិត្តពីសំណាក់អតិថិជន ទាំងក្នុងស្រុក និងអន្តរជាតិ។លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី ថ្លែងក្នុងឱកាសបិទសន្និបាតបូកសរុបលទ្ធផលការងារប្រចាំ ឆ្នាំ២០២៥ និងផែនការទិសដៅឆ្នាំ២០២៦ និងខួបអនុស្សាវរីយ៍ឆាំ្នទី១៤ របស់សមាគមសហគ្រិនស្ត្រីកម្ពុជា ក្រោមប្រធានបទ "ស្ត្រី រួមគ្នាដើម្បីភាពរីកចម្រើន និងចីរភាព”នៅថ្ងៃទី២៣ ខែមីនា ឆ្នាំ២០២៦ ថា ខណៈពេលពិភពលោកបច្ចុប្បន្នកំពុងមានភាពតានតឹង ភាពមិនប្រាកដប្រជា និងមានជម្លោះប្រដាប់អាវុធនៅតាមតំបន់មួយចំនួន រួមទាំងការវិវត្តយ៉ាងលឿននៃរបត់សេដ្ឋកិច្ច ដែលបន្តបង្កើត ឱ្យមានបញ្ហាប្រឈម ក៏ដូចជាកាលានុវត្តភាពថ្មីៗ និងសហគ្រិនស្ត្រីផងដែរ។ ការណ៍នេះ សូមបងប្អូនស្ត្រីសហគ្រិន ត្រូវបន្តអភិវឌ្ឍ សមត្ថភាព សាមគ្គីភាព គាំទ្រគ្នាទៅវិញទៅមក ថែរក្សាសុខុមាលភាពរបស់អាជីវកម្ម និងផ្ទាល់ខ្លួន ជាពិសេសពង្រឹងសមត្ថភាពធន់ ក្នុងការឆ្លើយតបនឹងការវិវត្តថ្មីៗនៅក្នុងសង្គម។ លោកជំទាវកិត្តិបណ្ឌិត បន្ថែមថា ខណៈដែលកម្ពុជាមានបញ្ហាភាពតានតឹងនៅតាមតំបន់ព្រំដែន, ស្ថិតក្នុងកាលៈទេសៈនេះ ប្រជាជនកម្ពុជាបានបង្ហាញសាមគ្គីភាពយ៉ាងមុតមាំ ក្នុងការគាំទ្រផលិតផលក្នុងស្រុក បញ្ហានេះសូមលើកទឹកចិត្តឱ្យសមាគម និង សហគ្រិនស្ត្រីទាំងអស់ ត្រូវផ្តោតការយកចិត្តទុកដាក់ខ្ពស់លើការពង្រឹងគុណភាព និងស្តង់ដារផលិតផល ក៏ដូចជាសេវាកម្មរបស់ខ្លួន ជាពិសេសត្រូវប្រកាន់ខ្ជាប់នូវភាពស្មោះត្រង់ក្នុងនាមជាសហគ្រិនកម្ពុជា ដើម្បីកសាង និងរក្សាឱ្យបាននូវទំនុកចិត្តពីសំណាក់អតិថិជន ទាំងក្នុងជាតិនិងអន្តរជាតិ។ចំណែកមសហគ្រិនជាស្រ្តី បានថ្លែងនូវការប្តេជ្ញាចិត្តខ្ពស់ ក្នុងការពង្រឹង និងពង្រីកអាជីវកម្ម ជំរុញផលិតទំនិញបម្រើតម្រូវការ ទីផ្សារ បច្ចុប្បន្នបាននិងកំពុងបង្ហាញឱ្យឃើញនូវភាពរឹងមាំជាបណ្តើរៗ ក្នុងកិច្ចដំណើរការអាជីវកម្ម ជាពិសេសផលិត និងវេចខ្ចប់ ផលិតផលបម្រើការហូបចុកប្រចាំថ្ងៃ ពោលគឺឆ្លើយតបទៅនិងតម្រូវទីផ្សារបច្ចុប្បន្ន ដែលនេះជាការចូលរួមជាមួយរាជរដ្ឋាភិបាល ដែល បានកំពុងជំរុញលើកកម្ពស់ខ្សែផលិតកម្មក្នុងស្រុក។លោកជំទាវ ចាន់ ភារី ប្រធានសមាគមសហគ្រិនស្ត្រីកម្ពុជា លើកឡើងថា គោលបំណងរៀបចំព្រឹត្តិការណ៍នេះ ពិតជាមាន សារៈសំខាន់ណាស់ ក្រៅពីការធ្វើរបាយការណ៏ជូនដល់សមាជិកា ក្រសួងពាក់ពន្ធ័ និងដៃគូរសហការនានា កម្មវិធីនេះក៏បានរៀបចំតាំង បង្ហាញផលិតផល សេវាកម្មរបស់សហគ្រិនស្ត្រី ដើម្បីភ្ជាប់បណ្ដាញអាជីវកម្ម បង្កើតភាពស្និទ្ធស្នាល រួមទាំងធ្វើបទបង្ហាញជូន សមាជិកាឱ្យឃើញ និងកាន់តែយល់ច្បាស់ ពីបេសសកម្មរបស់សហគ្រិនជាស្រ្តី។ ក្រៅពីនេះផផងដែរ, សមិទ្ធិផលថ្មីមួយត្រូវបាន ប្រកាសជាផ្លូវការ នៃការចាប់ផ្តើមដំណើរការកម្មវិធី "WE FINANCIAL SUPPORT HUB" ថ្នាលហិរញ្ញប្បទានសម្រាប់សហគ្រិនស្ត្រី ដើម្បីឆ្លើយតបនឹងការវិវត្តថ្មីៗនៅក្នុងសង្គម ដែលសហគ្រិនស្រ្តីកំពុងត្រូវការ៕ អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

នាយករដ្ឋមន្រ្តីអ៊ីតាលីបំពេញដំណើរទស្សនកិច្ចទៅកាន់អារ៉ាប៊ីសាអ៊ូឌីត កាតា និងអារ៉ាប់រួម
04/05/2026 11:04 AM
Facebook Telegram Linkin
UN បោះឆ្នោតលើសេចក្តីសម្រេចច្រកសមុទ្រ Hormuz ខណៈចិនជំទាស់ការប្រើប្រាស់កម្លាំង
04/05/2026 11:04 AM
Facebook Telegram Linkin
ស្នងការខេត្តកោះកុង៖សមត្ថកិច្ចទទួលបានតម្រុយ មន្ត្រីនគរបាលព្រំដែនខេត្តកោះកុងដែលបាញ់មនុស្សស្លាប់ម្នាក់ និងរបួសម្នាក់ហើយ
04/05/2026 11:04 AM
Facebook Telegram Linkin
លោក Zelenskiy និយាយថា លោកត្រៀមខ្លួនរួចរាល់ក្នុងការជួបជាមួយប្រធានាធិបតីរុស្ស៊ី
04/05/2026 11:04 AM
Facebook Telegram Linkin
មនុស្សយ៉ាងហោច ១៥នាក់ ត្រូវបានសម្លាប់នៅក្នុងការវាយប្រហាររបស់រុស្ស៊ីលើអ៊ុយក្រែន
04/05/2026 11:04 AM
Facebook Telegram Linkin
សប្បុរសជនបន្តផ្តល់ជំនួយដល់កងពលតូចដឹកជញ្ជូនលេខ៩៩ដើម្បីបន្តនាំយកទៅចែកជូនដល់បងប្អូនវីរកងទ័ពជួរមុខនៅតាមបន្ទាត់ព្រំដែន
04/05/2026 10:04 AM
Facebook Telegram Linkin
រដ្ឋបាលស្រុកស្វាយទាប និងខេត្តតៃនិញ បន្តរួមគ្នាថែរក្សា សន្តិសុខ និងធ្វើការអភិវឌ្ឍន៍តាមព្រំដែន
04/05/2026 10:04 AM
Facebook Telegram Linkin
ជនជាតិចិន ៣២៧នាក់ទៀត ត្រូវបានបណ្ដេញចេញពីកម្ពុជា ពាក់ព័ន្ធករណីឆបោកតាមប្រព័ន្ធអនឡាញ (Online Scams)
04/05/2026 10:04 AM
Facebook Telegram Linkin
អគ្គមេបញ្ជាការរងកងយោធពលខេមរភូមិន្ទ អញ្ជើញចុះសួរសុខទុក្ខ និងជូនពរជ័យ សិរីសួស្តីដល់យោធិនដែលកំពុងបំពេញបេសកកម្មការពារបូរណភាពទឹកដី នៅសមរភូមិមុខយោធភូមិភាគទី១
04/05/2026 10:04 AM
Facebook Telegram Linkin
អាមេរិក និងអ៊ីរ៉ង់ កំពុងស្វែងរកអ្នកបើកយន្តហោះចម្បាំងសហរដ្ឋអាមេរិកដែលបាត់ខ្លួន
04/05/2026 10:04 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.