BTV NEWS

កិច្ចប្រជុំកំពូលប្រធានសភាស្រ្តីលើកទី១៥នៅប្រទេសស្វីសបានបិទបញ្ចប់ ដោយការចូលរួមរបស់គណៈប្រតិភូសភាកម្ពុជាទទួលបានលទ្ធផលជាទីមោទនៈ

កម្ពុជា-ចិន ឯកភាពគ្នាពិនិត្យលទ្ធភាពក្នុងការបន្តអនុស្សរណៈនៃការយោគយល់គ្នាលើវិស័យ ធីវ៉េត

លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត នាំយក គ្រឿងឧបភោគបរិភោគ ព្រមទាំងរបស់របរប្រើប្រាសចាំបាច់ជាចែកជូនពលរដ្ឋដែលកំពុងភៀសសឹកពីតំបន់មានជម្លោះព្រំដែនកម្ពុជា-ថៃ

ឯកឧត្តម ឧបនាយករដ្ឋមន្ត្រី ហ៊ុន ម៉ានី អញ្ជើញគោរពវិញ្ញាក្ខន្ធកងទ័ពពលី នៅខេត្តកំពង់ស្ពឺ

ព័ត៌មានជាតិ

ឯកឧត្តម ឃ្លាំង ហួត៖លោក ភូមិថាំ វៈឆៈយៈឆៃ នាយករដ្ឋមន្រ្តីស្ដីទីថៃធ្លាប់រង់ចាំជជែកតាមទូរស័ព្ទដើម្បីសុំចរចាជាមួយសម្ដេចតេជោរហូតដល់៤ម៉ោង

ភ្នំពេញ៖ ឯកឧត្តម ឃ្លាំង ហួត ជាទីប្រឹក្សារបស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា នៅរសៀលថ្ងៃទី១៦ ខែកក្កដា ឆ្នាំ២០២៥នេះបានបង្ហោះសារនៅលើហ្វេសប៊ុក ចំអកទៅលោក ភូមិថាំ វៈឆៈយៈឆៃ ภูมิธรรมเวชยชัย នាយករដ្ឋមន្រ្តីស្ដីទីរបស់ថៃថា ធ្លាប់រង់ចាំជជែកតាមទូរស័ព្ទដើម្បីសុំចរចាជាមួយសម្ដេចតេជោរហូតដល់៤ម៉ោង (ម៉ោង២រសៀល ដល់ម៉ោងប្រមាណជិត៦ល្ងាច) កាលពីថ្ងៃទី១៥ ខែមិថុនា ឆ្នាំ២០២៥ ប៉ុន្ដែនាយករដ្ឋមន្រ្ដីស្ដីទីរូបនេះបែរជាភ្លេចមេរៀនរបស់ខ្លួនដែលធ្លាប់ជួបផ្ទាល់។ ឯកឧត្តម ឃ្លាំង ហួត បានសរសេរនៅលើបណ្ដាញសង្គមហ្វេសប៊ុក ឆ្លើយតបចំពោះការលើកឡើងរបស់លោក ភូមិថាំ វៈឆៈយៈឆៃ ภูมิธรรมเวชยชัย នាយករដ្ឋមន្រ្តីស្ដីទីរបស់ថៃ ដែលបាននិយាយថា «សម្ដេចតេជោ ហ៊ុន សែន គ្មានតម្លៃ»។ ឯកឧត្តមបានបញ្ជាក់ថា៖«តើលោកនាយករដ្ឋមន្រ្តីស្ដីទីនៅចាំបានទេ កាលពីថ្ងៃទី១៥ ខែមិថុនា ឆ្នាំ២០២៥ លោកបានអមនាយករដ្ឋមន្រ្តី ផែថងថាន រង់ចាំជជែកតាមទូរស័ព្ទ ដើម្បីសុំចរចាជាមួយសម្ដេចតេជោរហូតដល់៤ម៉ោង (ម៉ោង២រសៀល ដល់ម៉ោងប្រមាណជិត៦ល្ងាច) នេះសបញ្ជាក់ឱ្យឃើញថា លោកច្បាស់ជាយល់ឃើញថា សម្ដេចតេជោគឺជាតួអង្គដ៏សំខាន់ដែលមានអំណាច និងមានឥទ្ធិពលអាចសម្រេចអ្វីបាននៅកម្ពុជា»។ឯកឧត្តម ឃ្លាំង ហួត បានសង្គត់ធ្ងន់ថា៖«ខ្ញុំសូមឆ្លើយទៅលោកវិញថា សម្ដេចតេជោ ជានិមិត្តរូបនៃសុខសន្តិភាព សម្ដេចបានលះបង់សាច់ស្រស់ឈាមស្រស់ដើម្បីរំដោះ និងកសាងប្រទេសជាតិឱ្យមានការរីកចម្រើន និងជាវីរបុរសដែលប្រជាជនកម្ពុជាគោរពស្រលាញ់ជាទីបំផុត»៕

មន្រ្តីជាន់ខ្ពស់ក្រសួងបរិស្ថាន៖ ការដាំកូនឈើជាការបង្កើនគម្របបៃតង និងបន្ស៊ាំនឹងការប្រែប្រួលអាកាសធាតុក្នុងសហគមន៍

«ការចូលរួមរបស់បងប្អូនប្រជាពលរដ្ឋ ក្នុងការទទួលយកកូនឈើទៅដាំតាមសហគមន៍ និងដាំស្តារព្រៃ មិនត្រឹមតែបង្កើនភាពបៃតង បង្កើនគម្របព្រៃឈើ និងបន្ស៊ាំនឹងការប្រែប្រួលអាកាសធាតុ។ លើសពីនេះ ដើមឈើ ដែលបានដាំនៅពេលនេះ នឹងក្លាយជាព្រៃឈើ និងកេរដំណែលធម្មជាតិ សម្រាប់កូនចៅជំនាន់ក្រោយ ហើយក័ជាផ្នែកមួយ នៃការអភិវឌ្ឍគោលដៅលំហែបៃតង ដែលទាក់ទាញទេសចរ នាពេលអនាគតផងដែរ»។ នេះគឺជាថ្លែងរបស់ឯកឧត្តម ខ្វៃ អាទិត្យា អនុរដ្ឋលេខាធិការក្រសួងបរិស្ថាន និងជាប្រធានក្រុមការងាររាជរដ្ឋាភិបាល ចុះមូលដ្ឋានឃុំព្រះធាតុ ស្រុកអូររាំងឪ ខេត្តត្បូងឃ្មុំ នៅចំពោះមុខថ្នាក់ដឹកនាំ នៃរដ្ឋបាលថ្នាក់ក្រោមជាតិ រដ្ឋបាលស្រុកអូររាំងឪ អាជ្ញាធរមូលដ្ឋាន កងកម្លាំងប្រដាប់អាវុធ រួមជាមួយសិស្សានុសិស្ស លោកគ្រូ អ្នកគ្រូ ព្រះសង្ឃ ក្រុមយុវជន និងប្រជាពលរដ្ឋនៅ ឃុំព្រះធាតុ ស្រុកអូររាំងឪ ខេត្តត្បូងឃ្មុំ និងមកពីឃុំពង្រ ស្រុកកោះសូទិន ខេត្តកំពង់ចាម នាថ្ងៃអង្គារ ថ្ងៃទី១៦ ខែកក្កដា ឆ្នាំ២០២៥។ ឯកឧត្តម បានថ្លែងបន្តថា ការចូលរួមដាំដើមឈើនៅមូលដ្ឋានគ្រប់ទីកន្លែង រួមចំណែក ជំរុញលើកទឹកចិត្តប្រជាសហគមន៍ ចូលរួម ក្នុងសកម្មភាពយុទ្ធនាការ ពិពរណ៍«ពន្លកបៃតង» ចែកកូនឈើដោយឥតគិតថ្លៃ ជូនប្រជាពលរដ្ឋយកទៅដាំ និងរួមជាមួយព្រឹត្តិការដាំកូនត្នោត១លានដើម ក្នុងឆ្នាំ២០២៥ ដែលគ្រោងរៀបចំឡើងដោយក្រសួងបរិស្ថាន ចាប់ពីថ្ងៃទី៥-៧ ខែសីហា ឆ្នាំ២០២៥ នៅវិមានឈ្នះឈ្នះ រាជធានីភ្នំពេញ។ ឯកឧត្តមអនុរដ្ឋលេខាធិការ ក្រសួងបរិស្ថាន បានវាយតម្លៃខ្ពស់ ចំពោះកិច្ចការងារ របស់អាជ្ញាធរមូលដ្ឋានគ្រប់ថ្នាក់ ក្នុងខេត្តត្ពូងឃ្មុំ និងជាពិសេសប្រជាពលរដ្ឋទូទាំងប្រទេស បានចូលរួម ចូលរួមការពារ និងអភិរក្សធានធានធម្មជាតិ និងបានតម្កល់ផលប្រយោជន៍ជាតិ ផលប្រយោជន៍បរិស្ថាន ដើម្បីបង្កើនជីវភាពសហគមន៍។ ក្រោមម្លប់សន្តិភាព និងការអភិវឌ្ឍជឿនលឿនលើគ្រប់វិស័យ ដែលថ្នាក់ដឹកនាំនៃរាជរដ្ឋាភិបាលកន្លងមក របស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្តី និងជាប្រធានព្រឹទ្ធសភានៃ ព្រះរាជាណាចក្រកម្ពុជា និងការដាក់ចេញគោលនយោបាយ និងយុទ្ធសាស្រ្តច្បាស់លាស់ របស់រាជរដ្ឋាភិបាល នីតិកាលទី៧ នៃរដ្ឋសភា ដឹកនាំដោយសម្តេចមហាបវរធិបតី ហ៊ុន ម៉ាណេត នាយករដ្ឋមន្រ្តីនៃព្រះរាជាណាចក្រកម្ពុជា ឆ្ពោះទៅសម្រេចទស្សនវិស័យឆ្នាំ២០៥០ កម្ពុជា ប្រទេសមានចំណូលខ្ពស់ និងអព្យាក្រឹតកាបូន។ជាមួយគ្នានេះ ឯកឧត្តម បានលើកឡើងពីសារៈសំខាន់នៃការដឹកនាំ របស់ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន និង ជាប្រធានក្រុមការងាររាជរដ្ឋាភិបាលចុះមូលដ្ឋាន ខេត្តត្ពូងឃ្មុំ ក្នុងការដាក់ចេញយុទ្ធសាស្រ្តចក្រាវិស័យបរិស្ថាន ក្នុងនោះមានយុទ្ធនាការ «ពន្លកបៃតង» ជំរុញការដាំដើមឈើឱ្យបានច្រើន នៅតាមតំបន់ព្រៃរិចរិល តំបន់សហគមន៍ ដែលផ្តល់គម្របបៃតង ផ្តល់ជាស្បៀង សម្រស់របស់មូលដ្ឋាន ទៅដល់ភ្ញៀវទេសចរណ៍ និងប្រាក់ចំណូល ជូនប្រជាពលរដ្ឋ ក្នុងតំបន់ នៅពេលរុក្ខជាតិទាំងអស់នេះ ដុះលូតលាស់ធំឡើង។ ឯកឧត្តមបានបន្ថែមថា សកម្មភាពទាំងនេះ ក៏ជាការចូលរួមធ្វើឱ្យប្រជាពលរដ្ឋឈប់ចូលព្រៃកាប់ឈើ ឈប់ប្រមាញ់សត្វព្រៃ ដូចមុន ហើយងាកមកជាអ្នកចូលរួមអភិរក្ស ថែរក្សាព្រៃឈើ ដើម្បីការពារធនធានធម្មជាតិ និងរៀបចំគោលដៅលំហែបៃតង ជាគួរទីទាក់ទាញ និងបន្សល់ទុកសម្រាប់កូនចៅ តជំនាន់ក្រោយៗទៀត។ សូមបញ្ជាក់ថា រដ្ឋបាលស្រុកអូររាំងឪ ខេត្តត្បូងឃ្មុំ មានគម្រោងដាំកូនឈើតាមមូលដ្ឋាន តាមដងផ្លូវ ចំនួនប្រមាណ១ម៉ឺនដើម ក្នុងឆ្នាំ២០២៥ ហើយដោយឡែកនៅក្នុងឃុំព្រះធាតុ នៅថ្ងៃនេះ ក្រុមការងារក្រសួងបរិស្ថាន រួមជាមួយអាជ្ញាធរនិងប្រជាពលរដ្ឋ បានដាំកូនឈើអមសងខាងផ្លូវ និងតាមគេហដ្ឋាន ចំនួន១០០០ដើម។ កូនឈើដែលយកមកដាំនៅពេលនេះ ជាអំណោយរបស់ ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន តាមរយៈថ្នាលបណ្តុះកូនឈើថ្នាក់តំបន់ខេត្តត្បូងឃ្មុំ ដែលបានបណ្តុះកូនឈើបានជាង៣៨ម៉ឺនដើម ជាឈើប្រភេទឈើហូបផ្លែ ឈើព្រៃ និងកូនត្នោត។ ក្នុងឆ្នាំ២០២៥នេះ ថ្នាលបណ្តុះកូនឈើថ្នាក់តំបន់នេះ បានផ្តល់កូនឈើជូនសាធារណជន ដោយឥតគិតថ្លៃជាបណ្តើរៗ ចំនួនជាង៣ម៉ឺនដើម រួចមកហើយ ។ សូមបញ្ជាក់ថា ក្រសួងបរិស្ថានបានបណ្តុះកូនឈើនៅតាមថ្នាលរបស់មន្ទីរបរិស្ថានទូទាំងប្រទេស និងថ្នាលបណ្តុះកូនឈើថ្នាក់តំបន់ នៅខេត្តត្បូងឃ្មុំ សៀមរាប កោះកុង មណ្ឌលគីរី និងកំពង់ស្ពឺ នៅឆ្នាំ២០២៥ បានចំនួនជាង ៣,៤លានដើម ហើយបានចែកជូនសាធារណជនជាបណ្តើរៗ នៅឆ្នាំនេះ បានចំនួនជាង៨៥ម៉ឺនដើមរួចមកហើយ រហូតមកទល់ថ្ងៃទី១៦ ខែកក្កដា ឆ្នាំ២០២៥។ ក្រសួងបរិស្ថានគ្រោងចែកកូនឈើនៅឆ្នាំ២០២៥នេះចំនួន៣លានដើម ក្នុងនោះមានកូនត្នោតចំនួន១លានដើម៕

អនុប្រធានទី២ព្រឹទ្ធសភា៖ ទស្សនវិស័យអាស៊ាន សម្រេចទៅបាន លុះត្រាតែអាស៊ានប្រកាន់ខ្ជាប់កិច្ចសន្ទនាផ្អែកលើច្បាប់ និងកិច្ចព្រមព្រៀងអន្តរជាតិដោយស្មោះត្រង់ទៅវិញទៅមក

នៅព្រឹកថ្ងៃទី១៦ ខែកក្កដា ឆ្នាំ២០២៥ ឯកឧត្តមបណ្ឌិត ធន់ វឌ្ឍនា អនុប្រធានទី២ ព្រឹទ្ធសភា តំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា បានអញ្ជើញថ្លែងសុន្ទរកថាបិទ កិច្ចប្រជុំក្រុមអ្នកនយោបាយអន្តរសភាអាស៊ានលើកទី១៦ (The 16th AIPA Caucus) នៅវិមានរដ្ឋសភា។ឯកឧត្តមបណ្ឌិត បានវាយតម្លៃខ្ពស់ ចំពោះលេខាធិការដ្ឋាន AIPA ដែលបានរៀបចំកិច្ចប្រជុំនេះប្រកបដោយជោគជ័យ និងស្នើឱ្យមានការពិចារណាបង្កើត វេទិកាអ្នកដឹកនាំសភា AIPA ដើម្បីជាវេទិកាថ្មីមួយទៀតដល់សភា ក្នុងការជជែក ស្វែងរកដំណោះស្រាយបញ្ហាប្រឈមពិភពលោក ដែលមានរាប់មិនអស់ ។ឯកឧត្តមបណ្ឌិត បានលើកឡើងពីករណីបញ្ហាជម្លោះព្រំដែនកម្ពុជា-ថៃ ដោយបញ្ជាក់ជូនគណៈប្រតិភូជាសមាជិកសភាបរទេសទាំងអស់ថា តំណាងរាស្រ្តកម្ពុជាទាំងអស់ បានគាំទ្រជាឯកច្ឆន្ទចំពោះការយកបញ្ហាព្រំដែនទៅដោះស្រាយនៅតុលាការយុត្តិធម៌អន្តរជាតិ តាមគំរូសំណុំរឿងសិង្ហបុរី-ម៉ាឡេស៊ី ក្នុងឆ្នាំ២០០៨ និងសំណុំរឿងម៉ាឡេស៊ី-ឥណ្ឌូនេស៊ី ឆ្នាំ១៩៩៨។បន្ទាប់ពីការចរចាអស់២៥ឆ្នាំ គ្មានលទ្ធផលដុំកំភួន និងមានជម្លោះជាបន្តបន្ទាប់។ ឯកឧត្តម បានអំពាវនាវឱ្យ រដ្ឋាភិបាលថៃពិចារណាដំណោះស្រាយដោយសន្តិវិធីតាមរយៈច្បាប់អន្តរជាតិ ដើម្បីបញ្ចៀសជម្លោះបន្ថែមទៀតដែលបណ្តាលឱ្យមានអ្នកស្លាប់ និងអ្នករបួសទាំងសងខាង។ឯកឧត្តមបណ្ឌិត ធន់ វឌ្ឍនា បានមានប្រសាសន៍បញ្ជាក់ថា “ទស្សនវិស័យតែមួយ អត្តសញ្ញាណតែមួយ សហគមន៍តែមួយ” សម្រេចទៅបាន លុះត្រាតែអាស៊ានប្រកាន់ខ្ជាប់នូវកិច្ចសន្ទនាផ្អែកលើច្បាប់ គោរពច្បាប់ និងកិច្ចព្រមព្រៀងអន្តរជាតិ ដោយស្មោះត្រង់ទៅវិញទៅមក៕

ក្រសួងមុខងារសាធារណៈ ទទួលភារកិច្ចដឹកនាំរៀបចំអភិវឌ្ឍផែនការការងារ៥ឆ្នាំ សម្រាប់កិច្ចការសហប្រតិបត្តិការអាស៊ានស្តីពី «កិច្ចការមុខងារសាធារណៈ ACCSM និង ACCSM+3 ឆ្នាំ២០២៦-២០៣០»

កាលពីសប្តាហ៍មុន ក្រសួងមុខងារសាធារណៈ បានសហការជាមួយនឹងលេខាធិការដ្ឋានអាស៊ាន រៀបចំសិក្ខាសាលាពិគ្រោះយោបល់ ដើម្បីអភិវឌ្ឍផែនការការងារ ៥ឆ្នាំ សម្រាប់កិច្ចការសហប្រតិបត្តិការអាស៊ានស្តីពី «កិច្ចការមុខងារសាធារណៈ ACCSM និង ACCSM+3 ឆ្នាំ២០២៦-២០៣០»។ កិច្ចការរបស់ACCSM ត្រូវបានកំណត់ដោយផែនការសកម្មភាពរយៈពេល ៥ឆ្នាំ ដែលផែនការនេះ ត្រូវបានសហការអនុវត្តជារួម ដោយប្រទេសជាសមាជិកអាស៊ាន។ ផែនការសកម្មភាពនេះ ជាការគាំទ្រដល់គោលដៅនៃការកសាង និងធានានិរន្តរភាពសេវាសាធារណៈជូនដល់ប្រជាជនអាស៊ាន ឱ្យកាន់តែមានប្រសិទ្ធភាពខ្ពស់ និងថាមវន្ត។ កន្លងមក ប្រទេសជាសមាជិកអាស៊ាន សម្រេចបានសមិទ្ធផលជាច្រើន តាមរយៈការអនុវត្តផែនការសកម្មភាពឆ្នាំ២០២១-២០២៥។ អ្វីដែលត្រូវធ្វើបន្ត គឺការរៀបចំផែនការសកម្មភាពឆ្នាំ២០២៦-២០៣០ ហើយក្រសួងមុខងារសាធារណៈ ជាអ្នកដឹកនាំរៀបចំ។សិក្ខាសាលាប្រមូលធាតុចូលកាលពីសប្តាហ៍មុន បានកំណត់នូវវិស័យអាទិភាព បញ្ហាប្រឈម និងនិន្នាការថ្មីៗ ដែលជាធាតុចូលសំខាន់ សម្រាប់អភិវឌ្ឍផែនការការងាររយៈពេល ៥ឆ្នាំ សម្រាប់កិច្ចការសហប្រតិបត្តិការអាស៊ានស្តីពី «កិច្ចការមុខងារសាធារណៈ ACCSM និងACCSM+3 (២០២៦-២០៣០)»។ ការប្រមូលធាតុចូលនេះ នឹងជួយដោះស្រាយបញ្ហាប្រឈម ក្នុងតំបន់រួមគ្នា និងជំរុញសហគមន៍ឱ្យកាន់តែមានភាពធន់ នវានុវត្តន៍ និងផ្តោតប្រជាជនជាស្នូល។ ឆ្លងកាត់សិក្ខាសាលាពិគ្រោះយោបល់យ៉ាងផុសផុលគួរឱ្យកត់សម្គាល់រយៈពេល ២ថ្ងៃនេះ បានពិនិត្យពីសមិទ្ធផលដែលសម្រេចបាន និងចែករំលែកមេរៀនពិសោធនៃការអនុវត្តផែនការការងារ ACCSM+3 កន្លងទៅ ដោយផ្សារភ្ជាប់នឹងចក្ខុវិស័យសហគមន៍អាស៊ាន២០៤៥ ព្រមទាំងរួមគ្នាកំណត់វិស័យអាទិភាព ទិដ្ឋភាពរួម និងលើកគំនិតផ្តួចផ្តើមថ្មីៗ សម្រាប់បញ្ចូលក្នុងផែនការការងារ ACCSM និងACCSM+3 ឆ្នាំ២០២៦-២០៣០។គួរជម្រាបថា ក្នុងនាមកម្ពុជា ជាប្រធាន និងជាម្ចាស់ផ្ទះ ក្នុងការដឹកនាំ និងរៀបចំកិច្ចប្រជុំ កិច្ចសហប្រតិបត្តិការអាស៊ានស្តីពី កិច្ចការមុខងារសាធារណៈ ASEAN Cooperation on Civil Service Matters (ACCSM) លើកទី២៣ និងកិច្ចប្រជុំកិច្ចសហប្រតិបត្តិការអាស៊ានបូកបី ស្តីពី កិច្ចការមុខងារសាធារណៈ (ACCSM+3)» ក្រសួងមុខងារសាធារណៈ បានសហការជាមួយលេខាធិការដ្ឋានអាស៊ាន រៀបចំសិក្ខាសាលាលើកទីមួយ ដើម្បីអភិវឌ្ឍផែនការការងារ ACCSM និង ACCSM+3 (២០២៦-២០៣០) នៅរាជធានីភ្នំពេញ ដោយមានការអញ្ជើញចូលរួមរបស់ប្រតិភូមកពីលេខាធិការដ្ឋានអាស៊ាន និងប្រទេសដែលជាសមាជិកអាស៊ាន ព្រមទាំងប្រទេសទីម័រខាងកើត។ សិក្ខាសាលានេះ បានបន្តរហូតដល់ថ្ងៃទី១០ ខែកក្កដា ឆ្នាំ២០២៥ ដោយមានការចូលរួមពី ACCSM+3 រួមមានប្រទេសដែលជាសមាជិកអាស៊ាន ប្រទេសទីម័រខាងកើត ប្រទេសចិន ប្រទេសជប៉ុន និងប្រទេសកូរ៉េខាងត្បូង៕

សភាតំណាងប្រជាជនចិនចាត់ទុកសម្តេចតេជោ ជាតួអង្គសំខាន់បន្តពីព្រះបរមរតនកោដ្ឋក្នុងការពូនជ្រំទំនាក់ទំនងរវាងកម្ពុជា និងចិន

ភ្នំពេញ៖ ឯកឧត្តម វ៉ាង ហ្សីមីន (Wang Zhimin) អនុប្រធានគណៈកម្មាធិការកិច្ចការជនជាតិភាគតិចនៃសភាតំណាងប្រជាជនទូទាំងប្រទេសចិន បានចាត់ទុក សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា គឺជាតួអង្គមួយដ៏សំខាន់ដែលបន្តពីព្រះបរមរតនកោដ្ឋមកក្នុងការពូនជ្រំទំនាក់ទំនងរវាងកម្ពុជា-ចិន ខណៈភាពជាដៃគូយុទ្ធសាស្ត្រសហគមន៍វាសនារួមគ្នា កម្ពុជា-ចិនគ្រប់រដូវកាល និងក្នុងយុគ្គសម័យថ្មី បានពង្រីកនូវទំនាក់ទំនង ពាណិជ្ជកម្មវិនិយោគសម្រាប់ផលប្រយោជន៍ប្រទេស និងប្រជាជនទាំងពីរ។ ឯកឧត្តម វ៉ាង ហ្សីមីន (Wang Zhimin) អនុប្រធានគណៈកម្មាធិការកិច្ចការជនជាតិភាគតិចនៃសភាតំណាងប្រជាជនទូទាំងប្រទេសចិន បានលើកឡើងបែបនេះក្នុងឱកាស សម្ដេចតេជោ ហ៊ុន សែន អនុញ្ញាតឱ្យចូលជួបសម្ដែងការគួរសម នៅវិមានព្រឹទ្ធសភានៅព្រឹក ថ្ងៃទី១៦ ខែកក្កដា ឆ្នាំ២០២៥នេះ។ ក្នុងឱកាសនោះសម្តេចតេជោ បានសម្តែងនូវការស្វាគមន៍ចំពោះ លោក វ៉ាង ជីមីន (Wang Zhimin) និងសហការី ដែលបានអញ្ជើញមកបំពេញ ទស្សនកិច្ចនៅក្នុងព្រះរាជាណាចក្រកម្ពុជា។ សម្តេចតេជោ បានចាត់ទុកដំណើរទស្សនកិច្ចរបស់លោក វ៉ាង ជីមីន និងជាផ្នែកមួយដ៏សំខាន់ក្នុងការរុញច្រាននូវទំនាក់ទំនងទ្វេភាគីរវាងកម្ពុជា និងចិនឲ្យកាន់តែរឹងមាំ និងរីកចម្រើនទាំងក្របខ័ណ្ឌនៃរាជរដ្ឋាភិបាល និងក្របខ័ណ្ឌនៃស្ថាប័ននីតិបញ្ញត្តិ រវាងប្រទេសទាំងពីរ។នៅក្នុងឱកាសនោះ លោក វ៉ាង ជីមីន បានថ្លែងអំណរគុណសម្ដេចតេជោ ដែលបានចំណាយពេល អនុញ្ញាតឲ្យលោក និងសហការី ជួបសម្តែងការគួរសម នៅក្នុងឱកាសនេះ។ លោកក៏បានរំលេចអំពីទំនាក់ទំនងរវាងកម្ពុជា និងចិនជាមិត្តដែកថែប ជាមិត្តដ៏រឹងមាំ ជាមួយគ្នា ជាសហគមន៍វាសនារួមគ្នាគ្រប់រដូវកាលក្នុងយុគ្គសម័យថ្មី ដែលកំពុងតែបំពេញឲ្យគ្នាទៅវិញទៅមក និងជំរុញទំនាក់ទំនងរវាងប្រទេសទាំងពីរនេះ ឲ្យកើនឡើងជាបន្តបន្ទាប់ដោយឥតឈប់ឈរ។ លោកបាននាំនូវការសួរសុខទុក្ខពី ថ្នាក់ដឹកនាំចិន ចំពោះសម្ដេចតេជោផងដែរ នៅក្នុងដំណើរបំពេញទស្សនកិច្ចនៅក្នុងព្រះរាជាណាចក្រកម្ពុជា ហើយចិនរីករាយនៅក្នុងការសហការត្រៀមខ្លួននៅក្នុងការសហការធ្វើការងារ ជាមួយកម្ពុជា ដើម្បីលើកកម្ពស់ទំនាក់ទំនងភាពជាដៃគូយុទ្ធសាស្ត្រ រវាងគ្នានេះឲ្យកាន់តែរឹងមាំបន្តទៀត។នៅក្នុងឱកាសនោះ សម្ដេចតេជោ ហ៊ុនសែន បានរំលេចដោយបង្ហាញអំពីទំនាក់ទំនងរវាងកម្ពុជា និងចិនដែលសម្រេចបានបញ្ជាក់ថា ការចាប់ផ្ដើមដំបូងពី ជំនាន់លោក ម៉ៅ សេទុង ដល់នាយករដ្ឋមន្ត្រីចិន ជូរ អេងឡាយ ជាមួយព្រះបរមរតនកោដ្ឋ ក្នុងការបង្កើតនូវទំនាក់ទំនងផ្លូវការជាមួយគ្នា ហើយទំនាក់ទំនងនេះបានពូនជ្រុំនឹងកាន់តែរីកចម្រើនជាបន្តបន្ទាប់រហូតដល់នៅក្នុងពេលបច្ចុប្បន្ន។ សម្តេចតេជោ និងសម្ដេចធិបតីក៏បន្តកាន់តែរឹងមាំ។សម្ដេចតេជោ បានរំលេចបន្ថែមទៀតថា ជុំវិញទំនាក់ទំនងរវាងកម្ពុជាចិននេះ អ្វីដែលជាការកត់សម្គាល់គឺ ការរុញ នូវសេដ្ឋកិច្ចពាណិជ្ជកម្ម ការវិនិយោគ ទេសចរណ៍ និងការផ្លាស់ប្តូរ ប្រជាជននិងប្រជាជន ឲ្យកាន់តែរីកចម្រើន ទៅជាមួយគ្នាបន្ថែមទៀត ដែលជាផ្នែកក្នុងការញ៉ាំងទំនាក់ទំនងនយោបាយដែលមានស្រាប់ ដែលល្អស្រាប់ឲ្យកាន់តែល្អបន្ថែមទៀតនេះ។ ជា បញ្ជាក់បន្ថែមរបស់សម្តេចតេជោ។នៅក្នុងឱកាសនោះលោក វ៉ាង ជីមីន បានអរគុណចំពោះសម្ដេចតេជោ ជាពិសេសលោកបានចាត់ទុកសម្តេចតេជោគឺជា តួអង្គមួយដ៏សំខាន់ដែលបន្តពី អតីតកាលព្រះបរមរតនកោដ្ឋមកក្នុងការពូនជ្រំទំនាក់ទំនង រវាងកម្ពុជា និងចិន ហើយលោកបានរំលេចអំពី ភាពជាដៃគូយុទ្ធសាស្ត្រសហគមន៍វាសនារួមគ្នា កម្ពុជាចិនគ្រប់រដូវកាល និងក្នុងយុគ្គសម័យថ្មី ដែលមកដល់ពេលនេះភាគីទាំងពីរបានពង្រីកនូវទំនាក់ទំនងពោលគឺ ពាណិជ្ជកម្មវិនិយោគជាដើម បើនិយាយនៅក្នុងពាណិជ្ជកម្ម។ លោកបានបញ្ជាក់ថា ចាប់តាំងពីភាគីទាំងពីរបានរួមគ្នាក្នុងសហគមន៍វាសនារួមមក គឺពាណិជ្ជកម្មរវាងប្រទេសការកើនឡើងគុណដល់ទៅបួនដង។ លោកបន្តថា ចំណងមិត្តភាពផ្សេងៗទៀត ដែលប្រទេសទាំងពីរបានធ្វើជាមួយគ្នាមានភាពរីកចម្រើន នៅក្នុងការផ្តល់តម្លៃទំនាក់ទំនងគ្នាទៅវិញ។ជាចុងក្រោយ សម្តេចតេជោ ក៏បានរំលេចបន្ថែមដែរថា ទំនាក់ទំនងរវាងកម្ពុជាចិន គឺជាដោយការគោរពគ្នាទៅវិញទៅមក បើទោះបីកម្ពុជាជាប្រទេសតូច ប៉ុន្តែចិនតែងតែផ្តល់តម្លៃ និងគោរពចំពោះកម្ពុជា ហើយសម្តេចតេជោក៏បានជូនពរលោក និងសហការីឲ្យបំពេញទស្សនកិច្ចនៅក្នុងព្រះរាជាណាចក្រកម្ពុជា ប្រកបដោយជោគជ័យ និងរីករាយក្នុងការស្នាក់នៅក្នុងប្រទេសកម្ពុជា៕

គ.ល.ក. ណែនាំដល់ប្រតិបត្តិករមណ្ឌលល្បែងពាណិជ្ជកម្មឱ្យពង្រឹងការអនុវត្តតាមលក្ខខណ្ឌអាជ្ញាបណ្ណបញ្ចៀសសកម្មភាពខុសច្បាប់

ភ្នំពេញ៖ អគ្គលេខាធិការដ្ឋាន នៃគណៈកម្មការគ្រប់គ្រងល្បែងពាណិជ្ជកម្មកម្ពុជា (គ.ល.ក.) នៅថ្ងៃទី១៦ ខែកក្កដា ឆ្នាំ២០២៥ បានចេញសេចក្ដីណែនាំពីការរឹតបន្តឹងការអនុវត្តសៀវភៅបន្ទុករបស់កម្មសិទ្ធិករ និង/ឬប្រតិបត្តិករមណ្ឌលល្បែងពាណិជ្ជកម្មសមាហរ័ណ និងល្បែងពាណិជ្ជកម្មទាំងអស់។តាមរយៈលិខិតរបស់អគ្គលេខាធិការដ្ឋាន បានធ្វើការណែនាំដល់កម្មសិទ្ធិករ និង/ឬប្រតិបត្តិករមណ្ឌលល្បែងពាណិជ្ជកម្មសមាហរ័ណ និងល្បែងពាណិជ្ជកម្មទាំងអស់ ត្រូវអនុវត្តតាមលក្ខខណ្ឌអាជ្ញាបណ្ណ និងសៀវភៅបន្ទុក ឱ្យបានម៉ឺងម៉ាត់ និងធានាឱ្យបាននៅការរក្សាសន្តិសុខសណ្ដាប់ធ្នាប់ក្នុងការប្រតិបត្តិការអាជីវកម្មស្របតាមច្បាប់ និងលិខិតបទដ្ឋានគតិយុត្តជាធរមាន ដោយជៀសវាងដាច់ខាតនូវរាល់សកម្មភាពចាប់ជំរិតនៅក្នុងកាស៊ីណូ, សកម្មភាពជួញដូរមនុស្សនៅក្នុងកាស៊ីណូ, សកម្មភាពជួញដូរអាវុធនៅក្នុងកាស៊ីណូ, សកម្មភាពជួញដូរគ្រឿងញៀននៅក្នុងកាស៊ីណូ និងសកម្មភាពកសាងកម្លាំងសន្តិសុខខុសច្បាប់នៅក្នុងកាស៊ីណូ ព្រមទាំងសកម្មភាពខុសច្បាប់ផ្សេងៗទៀត។ក្នុងករណីរកឃើញថា កម្មសិទ្ធិករ និង/ឬប្រតិបត្តិករមណ្ឌលល្បែងពាណិជ្ជកម្មសមាហរ័ណ និងល្បែងពាណិជ្ជកម្ម មិនអនុវត្តតាមសេចក្តីណែនាំនេះ កម្មសិទ្ធិករ និង/ឬប្រតិបត្តិករមណ្ឌលល្បែងពាណិជ្ជកម្មសមាហរ័ណ និងល្បែងពាណិជ្ជកម្ម ត្រូវប្រឈមនឹងការព្យួរ ឬដកហូតអាជ្ញាបណ្ណ និងត្រូវទទួលខុសត្រូវ ចំពោះមុខច្បាប់ជាធរមាន។អគ្គលេខាធិការដ្ឋាននៃ គ.ល.ក. សង្ឃឹមយ៉ាងមុតមាំថា កម្មសិទ្ធិករ និង/ឬប្រតិបត្តិករមណ្ឌល ល្បែងពាណិជ្ជកម្មសមាហរ័ណ និងល្បែងពាណិជ្ជកម្ម នឹងយកចិត្តទុកដាក់អនុវត្តតាមខ្លឹមសារនៃសេចក្តីណែនាំនេះ ប្រកបដោយប្រសិទ្ធភាព និងស្មារតីទទួលខុសត្រូវខ្ពស់៕

ក្រសួងមុខងារសាធារណៈ រំលឹកដល់ក្រសួង-ស្ថាប័ន ផ្តល់សំណុំឯកសារ អំពីការដំឡើងឋានន្តរស័ក្តិ ថ្នាក់ តាមកម្រិតសញ្ញាបត្រជូនដល់មន្ត្រីរាជការស៊ីវិល មកឱ្យបានយ៉ាងយូរត្រឹម ដំណាច់ខែសីហាឆ្នាំ២០២៥

ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ បានចេញលិខិតគោរពជូនសម្តេច ឯកឧត្តម លោកជំទាវ ឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រីនៃក្រសួង ស្ថាប័ន ឯកឧត្តម លោកជំទាវអភិបាល នៃគណៈអភិបាលរាជធានី ខេត្ត លោក លោកស្រី អភិបាល នៃគណៈអភិបាល ក្រុង ស្រុក ស្តីពី ការដំឡើងឋានន្តរស័ក្តិ ថ្នាក់ តាមកម្រិតសញ្ញាបត្រជូនដល់មន្ត្រីរាជការស៊ីវិល។លិខិតនេះរៀបចំឡើង ដើម្បីឱ្យការដំឡើងឋានន្តរស័ក្តិ ថ្នាក់ តាមកម្រិតសញ្ញាបត្រឆ្នាំ២០២៥ ជូនមន្ត្រីរាជការស៊ីវិល បានទាន់ពេលវេលា និងជាអត្ថប្រយោជន៍ដល់មន្ត្រីរាជការ ក្រសួងមុខងារសាធារណៈ សូមស្នើសុំដល់គ្រប់ក្រសួង ស្ថាប័ន រដ្ឋបាលរាជធានី ខេត្ត ក្រុង ស្រុក អង្គភាពពាក់ព័ន្ធ មេត្តាយកចិត្តទុកដាក់អនុវត្តលើការដំឡើងឋានន្តរស័ក្តិ ថ្នាក់ តាមកម្រិតសញ្ញាបត្រជូនមន្ត្រីរាជការស៊ីវិល និងចូលរួមសហការអនុវត្តន៍ ដូចខាងក្រោម៖-ការដំឡើងឋានន្តរស័ក្តិ ថ្នាក់តាមកម្រិតសញ្ញាបត្រជូនមន្ត្រីរាជការស៊ីវិល ត្រូវអនុវត្តតាមច្បាប់ស្តីពី សហលក្ខន្តិកៈមន្ត្រីរាជការស៊ីវិល និងព្រះរាជក្រឹត្យស្តីពីលក្ខន្តិកៈដោយឡែក ព្រមទាំងលិខិតបទដ្ឋាន គតិយុត្តជាធរមាន-ការដំឡើងឋានន្តរស័ក្តិ ថ្នាក់ តាមកម្រិតសញ្ញាបត្រជូនមន្ត្រីរាជការស៊ីវិល ត្រូវគិតចំពោះមន្ត្រី រាជការស៊ីវិល ដែលមានសញ្ញាបត្រពិតប្រាកដ និងមានសញ្ញាបត្រខ្ពស់ជាងសញ្ញាបត្រចុងក្រោយ ដែលធ្លាប់បានប្រើប្រាស់សម្រាប់ដំឡើងថ្នាក់កន្លងមក-សញ្ញាបត្រដែលសាមីខ្លួនមានក្នុងកម្រិតដូចគ្នា អាចទទួលបានការដំឡើងឋានន្តរស័ក្តិ ថ្នាក់ បានតែ មួយថ្នាក់តែប៉ុណ្ណោះ-ការដំឡើងឋានន្តរស័ក្តិ ថ្នាក់ តាមកម្រិតសញ្ញាបត្រ ត្រូវអនុវត្តចំពោះសញ្ញាបត្រដែលមានចាប់ពី ឆ្នាំ២០២០មក ចំពោះសញ្ញាបត្រដែលមានមុនឆ្នាំ២០២០ដែលពុំធ្លាប់បានស្នើសុំដំឡើងឋានន្តរស័ក្តិ ថ្នាក់ ក្រសួង ស្ថាប័នសាមី ត្រូវរៀបចំបញ្ជីដោយឡែក ដើម្បីក្រសួងមុខងារសាធារណៈ ពិនិត្យលម្អិត-ការដំឡើងឋានន្តរស័ក្តិ ថ្នាក់ តាមកម្រិតសញ្ញាបត្រ សាមីខ្លួនត្រូវទទួលខុសត្រូវ និងមានលិខិតធានា អះអាងថា សញ្ញាបត្រដែលយកមកសុំដំឡើងត្រូវតែជាសញ្ញាបត្រដែលពុំធ្លាប់បានយកមកស្នើសុំ ដំឡើងឋានន្តរស័ក្តិ ថ្នាក់-គ្រប់ក្រសួង ស្ថាប័ន រដ្ឋបាលរាជធានី ខេត្ត ក្រុង ស្រុក អង្គភាពទទួលបន្ទុកកិច្ចការបុគ្គលិក ព្រមទាំងសាមីខ្លួនដែលស្នើសុំដំឡើងឋានន្តរស័ក្តិ ថ្នាក់ ត្រូវបញ្ជាក់ពីភាពត្រឹមត្រូវ នៃសញ្ញាបត្រ ក្នុងករណី ក្រសួងមុខងារសាធារណៈ រកឃើញថា សញ្ញាបត្រមានការក្លែងបន្លំ និងបានដំឡើងថ្នាក់ម្តងរួចហើយ សាមីខ្លួនត្រូវទទួលខុសត្រូវក្នុងទណ្ឌកម្មថ្នាក់ទី ២ ត្រង់ចំណុច“ត” នៃច្បាប់ស្តីពីសហលក្ខន្តិកៈមន្ត្រីរាជការស៊ីវិល និងត្រូវបង្វែរប្រាក់ចូលថវិការដ្ឋវិញតាមគោលការណ៍-ក្រសួង ស្ថាប័ន ត្រូវផ្តល់សំណុំឯកសារមកដល់ក្រសួងមុខងារសាធារណៈ ឱ្យបានយ៉ាងយូរត្រឹម ដំណាច់ខែសីហា ឆ្នាំ២០២៥ និងត្រូវភ្ជាប់ឯកសារមួយចំនួន ដូចខាងក្រោម៖១- លិខិតស្នើសុំដំឡើងឋានន្តរស័ក្តិ ថ្នាក់ របស់ក្រសួង ស្ថាប័នសាមី ចំនួន ០១ច្បាប់២-បញ្ជីរាយនាមមន្ត្រីរាជការស៊ីវិល ស្នើសុំដំឡើងឋានន្តរស័ក្តិ ថ្នាក់ ចំនួន ០១ច្បាប់ (សូមអនុវត្តតាមគំរូជូនភ្ជាប់)៣-ភ្ជាប់សញ្ញាបត្រ (ចម្លងត្រឹមត្រូវតាមច្បាប់ដើម បើសញ្ញាបត្រក្រៅប្រទេសត្រូវបញ្ជាក់ពីគណៈកម្មការ វាយតម្លៃសញ្ញាបត្រ របស់ក្រសួងអប់រំ យុវជន និងកីឡា ឬក្រសួងសុខាភិបាល) ចំនួន ០១ច្បាប់៤- របាយការណ៍ស្តីពីការប្រជុំពិភាក្សាវាយតម្លៃរបស់គណៈកម្មការចំណាត់ថ្នាក់ ចំនួន ០១ច្បាប់-ចំពោះរដ្ឋបាលថ្នាក់ក្រោមជាតិ សូមរៀបចំការដំឡើងឋានន្តរស័ក្តិ ថ្នាក់ តាមកម្រិតសញ្ញាបត្រជូន មន្ត្រីរាជការស៊ីវិលរបស់ខ្លួន ដោយអនុលោមតាមបែបបទ នីតិវិធីដែលនៅជាធរមាន និងតាមពេល វេលាដូចគ្នានឹងថ្នាក់ជាតិ។ខ្លឹមសារលម្អិតមានភ្ជាប់ជូនក្នុងលិខិតរំលឹកស្តីពីការដំឡើងឋានន្តរស័ក្តិ ថ្នាក់ តាមកម្រិតសញ្ញាបត្រជូនដល់មន្ត្រីរាជការស៊ីវិល៕

មួយឆ្នាំកន្លងមកមន្រ្តីឧទ្យានុរក្សប្រើប្រាស់ប្រព័ន្ធផ្កាយរណប និងDrone ល្បាត ទប់ស្កាត់ និងបង្រ្កាបបទល្មើសធនធានធម្មជាតិបាន ៧៧ករណី

ភ្នំពេញ៖ មន្រ្តីឧទ្យានុរក្សនៃតំបន់ការពារធម្មជាតិ បាននឹងកំពុងប្រើប្រាស់ ប្រព័ន្ធព័ត៌មានវិទ្យារូបភាពផ្កាយរណប (Satellite Image) និងឧបករណ៍ទំនើប(Drone) ដើម្បីអនុវត្ដការងារល្បាត ទប់ស្កាត់ និងបង្រ្កាបបទល្មើសធនធានធម្មជាតិ បានយ៉ាងមានប្រសិទ្ធភាព។ នៅក្នុងឆ្នាំ២០២៤-២០២៥ កន្លងមក ការប្រើប្រាស់ប្រព័ន្ធព័ត៌មានវិទ្យា និងឧបករណ៍ទំនើប ដើម្បីគ្រប់គ្រងតំបន់ការពារធម្មជាតិ ក្នុងភូមិសាស្រ្តខេត្តសៀមរាប បានជួយដល់មន្រ្តីឧទ្យាននុរក្ស បានចុះពិនិត្យទីតាំងជាក់ស្ដែង បានចំនួន៧៧ចំណុចរួមមាន៖ តាំងរងការកាប់ទន្ទ្រានមានចំនួន៣២ចំណុច ស្មើនឹងទំហំផ្ទៃដី៤៥៩,៦៤ហិកតា ទីតាំងដីមានការដាំដំណាំផ្សេងៗ មានចំនួន២៨ចំណុច ស្មើនឹងទំហំផ្ទៃដី៣៣១,៦៥ហិកតានិងទីតាំងដីពុំមានបទល្មើសអ្វី (ជាប្រភេទព្រៃល្បោះ ដីវាលដើមព្រិច) ចំនួន១៧ចំណុច។ ជាក់ស្តែង នៅក្នុង ដែនជម្រកសត្វព្រៃភ្នំត្នោត-ភ្នំពក មន្រ្ដីឧទ្យានុរក្ស បានសហការជាមួយកម្លាំងយោធា តំបន់ប្រតិបត្តិការសឹងរង ខេត្តសៀមរាប និងសមាជិកសហគមន៍តំបន់ការពារធម្មជាតិ ចុះពិនិត្យទីតាំងជាក់ស្ដែងទាំង៦៧ចំណុចរួមមាន ទីតាំងរងការកាប់ទន្រ្ទាន មានចំនួន៤០ចំណុច ស្មើនឹងទំហំផ្ទៃដី៤២៨,១៩ហិកតា ទីតាំងដី មានការដាំដំណាំផ្សេងៗ មានចំនួន២៥ចំណុច ស្មើនឹងទំហំផ្ទៃដី ៤៧៦,២៥ហិកតា និងទីតាំងដីពុំមានបទល្មើស (ជាប្រភេទព្រៃល្បោះ ដីវាលដើមព្រិច) ចំនួន០២ចំណុច។ មន្រ្តីឧទ្យានុរក្ស បានបញ្ជូនសំណុំរឿង បទល្មើសធនធានធម្មជាតិ ទៅអយ្យការអមសាលាដំបូងខេត្តសៀមរាប បានចំនួន១៥ករណី ក្នុងនោះ ករណីបទល្មើស ជាក់ស្ដែងចំនួន០២ករណី (បញ្ជូនខ្លួនជនសង្ស័យ ទៅតុលាការចំនួន០៦នាក់) និងករណីបទល្មើស មិនជាក់ស្ដែង ចំនួន១៣ករណី (បញ្ជូនឈ្មោះជនសង្ស័យ ទៅតុលាការចំនួន០៧នាក់)។សូមបញ្ជាក់ថា មន្ទីរបរិស្ថានខេត្តសៀមរាប គ្រប់គ្រងតំបន់ការពារធម្មជាតិ ចំនួន០៨កន្លែង មានទំហំផ្ទៃដី សរុបជា២៨៣.៩៩៩,២៧ហិកតា។ ការគ្រប់គ្រងធនធានធម្មជាតិ នៅតាមតំបន់ការពារធម្មជាតិ ត្រូវបានទទួលការគាំទ្រនិងសហការ ជាមួយកងកម្លាំងយោធា នៃតំបន់ប្រតិបត្តិការសឹករងខេត្តសៀមរាប កម្លាំងគណៈបញ្ជាការ ឯកភាពស្រុក និងគណៈកម្មការសហគមន៍ តំបន់ការពារធម្មជាតិផងដែរ។យោងតាមយុទ្ធសាស្រ្ដស្នូល មុំទី២ អាទិភាពទី១ «ការកសាងហេដ្ឋារចនាសម្ព័ន្ធឌីជីថល និងបំពាក់មធ្យោបាយឧបករ៍ និងសម្ភារទំនើបសម្រាប់ការងាររដ្ឋបាល» បានចែងក្នុងយុទ្ធសាស្រ្ដចក្រាវិស័យបរិស្ថាន ដែលបានដាក់ចេញ ស្របនឹងគោលនយោបាយយុទ្ធសាស្រ្ត របស់រាជរដ្ឋាភិបាលកម្ពុជា ដែលក្នុងនោះ កិច្ចខិតខំប្រែងប្រែងការពារនិងអភិរក្ស ធនធានធម្មជាតិនិងបរិស្ថាន ដ៏មោះមុត របស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្តី និងជាប្រធានរដ្ឋសភា នៃព្រះរាជាណាចក្រកម្ពុជា ដែលនាំយកសន្តិភាព ការបង្រួមបង្រួមជាតិ អធិបតេយ្យភាព និងការអភិវឌ្ឍគ្រប់វិស័យនៅកម្ពុជា ហើយបានផ្តល់កាលានុវត្តភាព ពេញលេញក្នុងការចាត់ចែង ការងារគ្រប់គ្រងធនធានធម្មជាតិ និងការអភិរក្សជីវៈចម្រុះ សម្រាប់កូនចៅតជំនាន់។ យុទ្ធសាស្រ្តបញ្ចកោណ ដំណាក់កាលទី១ របស់រាជរដ្ឋាភិបាលបន្តវេន្ត នីតិកាលទី៧ នៃរដ្ឋសភា ក៏ដូចជាប្រសាសន៍ដឹកនាំដ៏ខ្ពង់ខ្ពស់ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ផែនការគ្រប់គ្រងធនធានធម្មជាតិនិងបរិស្ថានបានចាត់បញ្ជូលជាអាទិភាព ដើម្បីធានាការអភិរក្សជីវៈចម្រុះ និងការលើកកម្ពស់ជីវភាពប្រជាពលរដ្ឋ នៅតាមសហគមន៍ តំបន់ការពារធម្មជាតិ ប្រកបដោយនិរន្តរភាព។ ដើម្បីគ្រប់គ្រង អភិរក្ស និងការពារតំបន់ការពារធម្មជាតិ និងព្រៃឈើរបស់កម្ពុជា ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បានដឹកនាំអនុវត្តយុទ្ធសាស្រ្តចក្រាវិស័យបរិស្ថាន ដែលក្នុងនោះមានផែនការសកម្មភាព ប្រើប្រាស់ប្រព័ន្ធបច្ចេកវិទ្យាទំនើប ដើម្បីត្រួតពិនិត្យ តាមដាន និងវិភាគព័ត៌មាន តាមរយៈទិន្នន័យដែល ទទួលបានពីផ្កាយរណប ហើយការទទួលបានទិន្នន័យទាំងនេះ ក៏ដូចជាបានបំពាក់ឧបករណ៍ សម្ភារៈទំនើបដូចជាដ្រូន ដើម្បីល្បាត និងផ្ទៀងផ្ទាត់ព័ត៌មាន ក៏ជាផ្នែកមួយជួយពន្លឿន ដល់ការងារចុះអនុវត្តច្បាប់ និងបទអន្តរាគមន៍ភ្លាមៗ នៅតាមតំបន់គោលដៅផងដែរ។ជាមួយគ្នានេះ ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បានថ្លែងអំណរគុណដល់ មន្ត្រីជំនាញរបស់ក្រសួង និងដៃសហការ រួមមានរដ្ឋបាលថ្នាក់ក្រោមជាតិ និងសមត្ថកិច្ចពាក់ព័ន្ធនានា ដៃគូអភិវឌ្ឍន៍ និងប្រជាសហគមន៍តំបន់ការពារធម្មជាតិ ដែលបានចូលរួមក្នុងការបង្កើនប្រសិទ្ធភាព នៃការការពារនិងអភិរក្ស ធនធានធម្មជាតិរបស់កម្ពុជា ឲ្យកាន់តែមានប្រសិទ្ធភាពថែមទៀត ធានាឲ្យបាននូវផលប្រយោជន៍ជូន ប្រជាជននិងប្រទេសកម្ពុជា ជាពិសេសការរក្សាបាននូវធនធានធម្មជាតិ និងព្រៃឈើ សម្រាប់យុវជនជំនាន់ក្រោយ តាមរយៈការរួមគ្នាការពារភាពបៃតងរបស់កម្ពុជា ឆ្ពោះទៅជាប្រទេសអព្យាក្រឹតកាបូននៅឆ្នាំ២០៥០។ ក្រសួងបរិស្ថាន នៅឆ្នាំ២០២៤-២០២៥ បានផ្តល់ផែនទីតំបន់ការពារធម្មជាតិ និងផែនទីផ្កាយរណបជូនទៅរដ្ឋបាលថ្នាក់ក្រោមជាតិ អាជ្ញាធរមូលដ្ឋាន ដើម្បីសហការគ្រប់គ្រងតំបន់ការពារធម្មជាតិ និងបានប្រគល់ដ្រូនចំនួន៤៧ គ្រឿងដល់មន្ទីរបរិស្ថានទាំងអស់ ហើយមន្ទីរបរិស្ថានដែលមានតំបន់ការពារធម្មជាតិ ក៏ទទួលបានការគាំទ្រពីបណ្តាអង្គការ និងដៃគូអភិវឌ្ឍបន្ថែមទៀត នូវសម្ភារៈប្រើប្រាស់និងដ្រូនជាច្រើនគ្រឿងបន្ថែមទៀត៕

សមាជិកសភាតួកគី៖ កិច្ចសហប្រតិបត្តិការរវាងស្ថាប័ននីតិប្បញ្ញត្តិកម្ពុជា-តួកគីនឹងជួយជំរុញទំនាក់ទំនងប្រទេសទាំងពីរឱ្យកាន់តែល្អប្រសើរ

ភ្នំពេញ៖ ឯកឧត្តម វង សូត អនុប្រធានទី២ នៃរដ្ឋសភា និងជាប្រធានក្រុមមិត្តភាពអន្តរសភាកម្ពុជា-តួកគី នៃរដ្ឋសភា បានអនុញ្ញាតឱ្យឯកឧត្តម អូស្មាន សាឡាម (Osman Sağlam) សមាជិកសភា និងជាប្រធានគណៈប្រតិភូ នៃសាធារណរដ្ឋតួកគី ប្រចាំសភាអន្តរសភាអាស៊ាន (AIPA) នៃរដ្ឋសភាTürkiye ចូលជួបសម្តែងការគួរសម និងពិភាក្សាការងារ ក្នុងឱកាសឯកឧត្តមអញ្ជើញមកបំពេញទស្សនកិច្ច និងចូលរួមកិច្ចប្រជុំ AIPA Caucus លើកទី១៦ ចាប់ពីថ្ងៃទី១៤-១៧ ខែកក្កដា ឆ្នាំ២០២៥ ដែលរដ្ឋសភាកម្ពុជាធ្វើជាម្ចាស់ផ្ទះ នឹងប្រព្រឹត្តនៅរាជធានីភ្នំពេញ។ ក្នុងនាមសម្តេចមហារដ្ឋសភាធីការធិបតី ប្រធានរដ្ឋសភា ឯកឧត្តមអនុប្រធានទី២រដ្ឋសភា បានថ្លែងអំណរគុណចំពោះគណៈប្រតិភូរដ្ឋសភាតួកគី ដែលបានអញ្ជើញមកចូលរួមកិច្ចប្រជុំអ្នកនយោបាយលើកទី១៦ ដែលសភាកម្ពុជាធ្វើជាម្ចាស់ផ្ទះ។ វត្តមានរបស់គណៈប្រតិភូរដ្ឋសភាតួកគី មិនត្រឹមតែផ្តល់កិត្តិយសដល់សភាកម្ពុជាក្នុងនាមជាម្ចាស់ផ្ទះប៉ុណ្ណោះទេ តែថែមទាំងបានឆ្លុះបញ្ចាំងអំពីទំនាក់ទំនង និងកិច្ចសហប្រតិបត្តិការដ៏ល្អរវាងប្រទេសទាំងពីរ។ ឯកឧត្តមមានប្រសាសន៍ថា ក្នុងនីតិកាលទី៧នៃរដ្ឋសភានេះ ឯកឧត្តមពិតជាមានកិត្តិយសខ្លាំងណាស់ ដែលបានចូលរួមបំពេញការងារនៅក្នុងស្ថាប័ននីតិប្បញ្ញតិ្ត ក្នុងនាមជាអនុប្រធានទី២នៃរដ្ឋសភា និងត្រូវបានចាត់តាំងជាប្រធានក្រុមមិត្តភាពរដ្ឋសភាកម្ពុជា-សាធារណរដ្ឋតួកគីថែមទៀតផង។ កាលពីឆ្នាំ ២០២៣ កន្លងទៅ ឯកឧត្តមបានដឹកនាំគណៈប្រតិភូរដ្ឋសភាកម្ពុជា ទៅចូលរួមកិច្ចប្រជុំគណៈកម្មការប្រតិបត្តិនៃសភាតំបន់អាស៊ី(APA) នឹងបានចូលជួបសម្តែងការគួរសម និងពិភាក្សាការងារជាមួយ ឯកឧត្តម នូម៉ាន ឃឺទូលម៉ូស នូម៉ា (Numan KURTULMUS) ប្រធានរដ្ឋសភានៃសាធារណរដ្ឋតួកគីផងដែរ។ ចំពោះទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ ឯកឧត្តមអនុប្រធានទី២រដ្ឋសភា បានសង្កេតឃើញថា មានការរីកចម្រើនជាបន្តបន្ទាប់ ប្រកបដោយភាពស្វាហាប់ រហូតឈានដល់មានការចុះកិច្ចព្រមព្រៀង និងអនុស្សរណៈនៃការយោគយល់គ្នា នៅលើវិស័យជាច្រើន ព្រមទាំងមានការគាំទ្រគ្នាទៅវិញទៅមកលើវេទិការអន្តរជាតិជាច្រើន ទាំងក្នុងក្របខណ្ឌនីតិប្បញ្ញាត្តិ និងនីតិប្រតិបត្តិ។ ជាការឆ្លើយតប ឯកឧត្តម អូស្មាន់ សាហ្លាម (Osman Saglam) បានថ្លែងអំណរគុណចំពោះ ឯកឧត្តម វង សូត អនុប្រធានទី២រដ្ឋសភា ដែលបានអនុញ្ញាតឱ្យឯកឧត្តម ចូលជួបសម្តែងការគួរសមនាពេលនេះ និងអរគុណចំពោះការទទួលបដិសណ្ឋារកិច្ចយ៉ាងកក់ក្តៅបំផុត ចំពោះគណៈប្រតិរដ្ឋសភាតួកគី។ ឯកឧត្តម បានគាំទ្រចំពោះទំនាក់ទំនង និងកិច្ចសហប្រតិបត្តិការដ៏ល្អរវាងប្រទេសទាំងពីរ ដែលឆ្លុះបញ្ចាំងតាមរយៈការផ្លាស់ប្តូរដំណើរទស្សនកិច្ចថ្នាក់ដឹកនាំគ្រប់ជាន់ថ្នាក់ និងការប្តេជ្ញាចិត្តបង្កើនកិច្ចសហប្រតិបត្តិការសេដ្ឋកិច្ច និងពាណិជ្ជកម្ម នៃប្រទេសទាំងពីរ ដោយឯកឧត្តមសង្ឃឹមថា ទំហំពាណិជ្ជកម្មទ្វេភាគីរវាងប្រទេសទាំងពីរ នឹងឈានដល់ ១ពាន់លានដុល្លា នាពេលខាងមុខឆាប់ៗនេះ។ ឯកឧត្តមប្រធានគណៈប្រតិភូរដ្ឋសភាតួកគី បានបញ្ជាក់ថា កិច្ចសហប្រតិបត្តិការរវាងស្ថាប័ននីតិប្បញ្ញត្តិទាំងក្នុងក្របខណ្ឌទ្វេភាគី និងក្នុងក្របខណ្ឌអាយប៉ា ក៏នឹងជួយជំរុញឱ្យទំនាក់ទំនងប្រទេសទាំងពីរកាន់តែល្អប្រសើរថែមទៀត។ ឯកឧត្តម បានជម្រាបជូនថា នាពេលកន្លងទៅ តួកគីបានដាក់ដំណើរការមជ្ឈមណ្ឌលវប្បធម៌នៅកម្ពុជា ដើម្បីបង្កើតកិច្ចសហប្រតិបត្តិការលើវិស័យអប់រំ និងអនុវត្តការទូតវប្បធម៌ និងបានបង្កើតមូលនិធិ Maarif តួកគី ដែលរំពឹងថាគំនិតផ្តួចផ្តើមទាំងពីរនេះ នឹងជួយពង្រឹងទំនាក់ទំនង និងកិច្ចសហប្រតិបត្តិការបន្ថែមទៀតរវាងប្រទេសទាំងពីរ និងស្នើសុំការគាំទ្រពីកម្ពុជាផងដែរ។ ជាចុងក្រោយ ឯកឧត្តម វង សូត អនុប្រធានទី២រដ្ឋសភា បានថ្លែងអំណរគុណចំពោះរដ្ឋាភិបាលនៃសាធាររដ្ឋតួកគី ដែលតែងតែគាំទ្រ និងផ្តល់ជំនួយអភិវឌ្ឍន៍ដល់កម្ពុជា លើវិស័យជាច្រើន ដូចជា៖ វិស័យអប់រំ ការថែទាំសុខភាព ជំនួយសង្គ្រោះទឹកជំនន់ ជំនួយដោះមីន ការកសាងលំនៅដ្ឋានជូនប្រជាជនក្រីក្រ និងជំនួយជាច្រើនទៀត តាមរយៈទីភ្នាក់ងារសម្របសម្រួល-ទីកា (TIKA) ចាប់តាំងពី ឆ្នាំ២០០៩ រហូតដល់បច្ចុប្បន្ន៕

ឯកឧត្តម ប៉េង ពោធិ៍នា អញ្ជើញចុះជួបសំណេះសំណាល និងសួរសុខទុក្ខកងទ័ពនៅទីបញ្ជាការជួរមុខ សមរភូមិទិសទី៣ យោធាភូមិភាគទី៤ ខេត្តឧត្តរមានជ័យ

នាព្រឹកថ្ងៃពុធ ទី១៦ ខែកក្កដា ឆ្នាំ២០២៥ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញដឹកនាំគណៈប្រតិភូក្រសួង ចុះជួបសំណេះសំណាល និងសួរសុខទុក្ខជាមួយនាយទាហាន នៃបញ្ជាការដ្ឋានកាំភ្លើងធំអគ្គបញ្ជាការ នៅទីបញ្ជាការជួរមុខ សមរភូមិទិសទី៣ យោធាភូមិភាគទី៤ ក្នុងខេត្តឧត្តរមានជ័យ ព្រំដែនកម្ពុជា-ថៃ ដោយមានការចូលរួមពី ឯកឧត្ដម នាយឧត្ដមសេនីយ៍សាស្រ្តាចារ្យបណ្ឌិត ណុប រតនា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការ បញ្ជាការដ្ឋានកាំភ្លើងធំ អគ្គបញ្ជាការ មេបញ្ជាការ មេបញ្ជាការរង នាយពលទាហាន ទាំងអស់ នៃបញ្ជាការដ្ឋានកាំភ្លើងធំ អគ្គបញ្ជាការជាច្រើនរូបទៀត។នាឱកាសនោះ ឯកឧត្តមរដ្ឋមន្រ្តី និងថ្នាក់ដឹកនាំក្រសួង បានពាំនាំនូវការផ្តាំផ្ញើសួរសុខទុក្ខពីសម្ដេចតេជោ និងសម្តេចកិត្តិព្រឹទ្ធបណ្ឌិត ក៏ដូចជាសម្តេចមហាបវរធិបតី និងលោកជំទាវបណ្ឌិត ជូនចំពោះបងប្អូនយុទ្ធជនទាំងអស់គ្នា ហើយក៏សូមថ្លែងអំណរគុណ និងកោតសរសើរដោយស្មោះចំពោះវីរភាពរបស់កងទ័ព និងគ្រប់បណ្តាកងកម្លាំងឈរជើងការពារព្រំដែនទាំងអស់ ដែលបានលះបង់យ៉ាងធំធេងទាំងសាច់ស្រស់ ឈាមស្រស់ និងឃ្លាតឆ្ងាយពីក្រុមគ្រួសារជាទីស្រឡាញ់ ដើម្បីបុព្វហេតុការពារទឹកដីមាតុភូមិរបស់យើង។ឯកឧត្តមរដ្ឋមន្រ្តី ក៏បានផ្តាំផ្ញើដល់បងប្អូននាយទាហាន និងកងការពារព្រំដែនទាំងអស់ ថែរក្សាសុខភាព និងបន្តពង្រឹងស្មារតីឱ្យបានខ្ជាប់ខ្ជួនក្នុងកិច្ចការពារអធិបតេយ្យ និងបូរណភាពទឹកដី ដើម្បីសេចក្ដីសុខក្សេមក្សាន្ត របស់ប្រទេសជាតិយើង និងសូមជឿជាក់លើរាជរដ្ឋាភិបាលក្នុងការដោះស្រាយបញ្ហាព្រំដែន ដោយមិនឲ្យប្រទេសឱ្យធ្លាក់ក្នុងជម្លោះប្រដាប់អាវុធ ឬសង្គ្រាមនោះឡើយ ព្រោះកម្ពុជាមានសុឆន្ទៈ និងគោលនយោបាយច្បាស់លាស់ក្នុងការបន្តពង្រឹង និងអភិវឌ្ឍន៍តំបន់ព្រំដែនជាមួយប្រទេសជិតខាង ឱ្យក្លាយជាព្រំដែនប្រកបដោយសន្តិភាព មិត្តភាព កិច្ចសហប្រតិបត្តិការ និងការអភិវឌ្ឍ ហើយការកសាងហេដ្ឋារចនាសម្ព័ន្ធ និងសហគមន៍ប្រជាពលរដ្ឋនៅជាប់ព្រំដែន គឺជាអាទិភាពចម្បងនៃយុទ្ធសាស្ត្រការពារព្រំដែនរបស់កម្ពុជា៕

បណ្ដាញសង្គម

ព័ត៌មានថ្មីៗ

រុស្ស៊ីនឹងបិទច្រកព្រំដែនចំនួន ២០កន្លែង នៅព្រំដែនអ៊ុយក្រែន នៅថ្ងៃទី ០១ ខែសីហា

អ្នកការទូតរុស្ស៊ី រិះគន់ជំហររបស់ប្រទេស E3 ចំពោះកម្មវិធីនុយក្លេអ៊ែរអ៊ីរ៉ង់ថា មិនសមហេតុផល

នាយករដ្ឋមន្ត្រី៖រដ្ឋបាលប៉ាឡេស្ទីន នឹងយល់ព្រមលើការដាក់ពង្រាយកម្លាំងអន្តរជាតិ នៅតំបន់ហ្កាហ្សា

ឯកឧត្ដម ហ៊ុន ម៉ានី៖“ខ្មែរត្រូវតែខំពង្រឹងសមត្ថភាពខ្លួនឯង […] ការធ្វើជំរឿនមន្ត្រីនាពេលនេះជាផ្នែកមួយនៃការពង្រឹងសមត្ថភាពរបស់យើង”

សប្បុរសជនខេត្តស្វាយរៀងផ្ដល់ជំនួយគាំទ្រជាគ្រឿងឧបភោគបរិភោគដល់កងទ័ពនិងជនភៀសសឹក

អ៊ីស្រាអែល បន្តសម្លាប់មនុស្ស ១០០នាក់នៅហ្កាហ្សា ទោះប្រកាសផ្អាកប្រយុទ្ធតាមកន្លែងក្ដី

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានជាតិ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី