BTV NEWS

ទេសរដ្ឋមន្រ្តី គន់ គីម អញ្ជើញជួបអតីតយុទ្ធជនចំនួន ៣០០គ្រួសារ ដើម្បីរៀបចំផ្តល់ដីធ្វើកសិកម្ម ក្នុងខេត្តបាត់ដំបង

វិស័យឯកជនលើកទឹកចិត្តអ្នកស្វែងរកការងារ បង្កើនចំណេះ ជំនាញ ដើម្បីឆ្លើយតបតម្រូវការកម្លាំងពលកម្មជំនាញកើនឡើង

ប្រាសាទប្រែរូប ស្ថាបត្យកម្មឥដ្ឋដ៏លេចធ្លោសម័យអង្គរ និងការគ្រប់គ្រងបេតិកភណ្ឌ

ផ្លូវថ្មើរជើងចតុមុខបង្កើតឱកាសការងារ និងជំរុញសេដ្ឋកិច្ចមូលដ្ឋានកាន់តែរស់រវើក

ព័ត៌មានជាតិ

ប្រធានសមាគមត្រចៀកកាំ៖ ចិននឹងបើករបាំងពាណិជ្ជកម្មឆាប់ៗដល់ការនាំចេញសំបុកត្រចៀកកាំកម្ពុជា

ប្រធានសមាគមត្រចៀកកាំកម្ពុជា រំពឹងថា នៅក្នុងឆ្នាំ២០២៦នេះ កម្ពុជា-ចិននឹងបើកនូវរបាំងពាណិជ្ជកម្មលើការផលិតផល សំបុកត្រចៀកកាំ ទៅកាន់ទីផ្សារប្រទេសចិន ខណៈដែលកម្ពុជាបានត្រៀមខ្លួនរួចជាស្រេច លើផលិតកម្មសម្រាប់ទីផ្សារនាំចេញ។ លោក ស៊ុយ កុកធាន ប្រធានសមាគមត្រចៀកកាំកម្ពុជា លើកឡើងក្នុងកិច្ចសម្ភាសន៍ជាមួយសារព័ត៌មាន ស្តីពីការអភិរក្ស ការកែច្នៃផលិតផលចេញពីសំបុកត្រចៀកកាំ និងគម្រោងនាំចេញសំបុកចៀកកាំកម្ពុជានេះថា គិតមកដល់ពេលនេះ កម្ពុជាបាន អភិរក្សផ្ទះត្រចៀកកាំមានចំនួនរាប់ពាន់ខ្នងផ្ទះ និងបានប្រមូលសំបុកត្រចៀកកាំ មានកំណើនកើនឡើងជាបន្តបន្ទាប់, បច្ចុប្បន្នក៏មានសិប្បកម្មក្នុងស្រុកជាច្រើន បាននិងកំពុងកែច្នៃសម្រាប់ការចែកចាយសម្រាប់ទីផ្សារក្នុងស្រុក តែសម្រាប់ការនាំចេញ, មិនទាន់ មានទិន្នន័យណាមួយបានបង្ហាញច្បាស់លាស់នៅឡើយ។ជុំវិញសំបុកត្រចៀកកាំនេះ លោក បន្តឱ្យដឹងថា បើតាមការបង្ហាញឱ្យដឹងពីក្រសួងកសិកម្ម រុក្ខាប្រមាញ់ និងនេសាទ គិតមកដល់ពេលនេះក្រសួងបានជំរុញចុះបញ្ជីការអភិរក្សផ្ទះត្រចៀកកាំ បានចំនួនជិត១ពាន់ខ្នងផ្ទះ ក្នុងនោះក្រសួងបានបញ្ជូន ក្រុមហ៊ុនចំនួន ៦ ធ្វើការទំនាក់ទំនងជាមួយគយចិន និងការសុំគោលការណ៍គាំទ្រពីស្ថានទូតចិន ដែលតាមរយៈនៃកិច្ចសហការនេះ បានបង្កើតនូវទំនុកចិត្តខ្ពស់ ដល់ការនាំចេញសំបុកត្រចៀកកាំរបស់កម្ពុជាចូលទៅក្នុងទីផ្សារចិន នៅក្នុងឆ្នាំ២០២៦នេះ។លោក ស៊ុយ កុកធាន បន្តថា ប្រសិនកម្ពុជានាំចេញសំបុក្រត្រចៀកកាំទៅកាន់ទីផ្សារចិន សម្រេចបានតាមការគ្រោងទុក, វិស័យនេះនឹងចូលរួមលើកកម្ពស់ដល់ការអភិរក្សផ្ទះត្រចៀកកាំនៅកម្ពុជាបន្ថែម ការបង្កើតការងារ និងប្រាក់ចំណូលដល់ជីវភាពរស់ នៅរបស់ប្រជាជនកម្ពុជា និងបង្កើនចំណូលក្នុងសេដ្ឋកិច្ចជាតិផងដែរ។សូមបញ្ជាក់ថា ពាក់ព័ន្ធកិច្ចសហប្រតិបត្តិការលើផ្នែកពាណិជ្ជកម្មនេះ រាជរដ្ឋាភិបាលកម្ពុជាបានខិតខំប្រឹងប្រែងយ៉ាងខ្លាំង ជំរុញ បង្កើតកិច្ចសហប្រតិបត្តិការជាមួយបណ្តាប្រទេសដៃគូរផ្សេងៗ ជាពិសេសជាមួយប្រទេសចិន ដោយបានជំរុញឲ្យមានពាណិជ្ជកម្ម សេរី រវាងប្រទេសទាំងពីរ ជាក់ស្តែងនាពេលកន្លងមកនេះ កម្ពុជា-ចិនក៏បានបើកច្រកពាណិជ្ជកម្មលើផលិតផលសំបុកត្រចៀកកាំ និងការពង្រឹងបណ្តាញធុរកិច្ច តាមរយៈការរៀបចំវេទិការពាណិជ្ជកម្មផ្សេងៗដូចជា៖ វេទិការធុរកិច្ច ការផ្គត់ផ្គង់ពាណិជ្ជកម្ម និងការ ចូលរួមពិរពណ៌លើផលិតផលសំបុកត្រចៀកកាំជាដើម៕ អត្ថបទ៖ សុន រ៉ាឌី

ក្រុមហ៊ុនចិនមួយគ្រោងពង្រីកសេវាកម្មវិស្វកម្មគីមី ដើម្បីរួមចំណែកដល់ខ្សែច្រវាក់ផលិតកម្មនៅកម្ពុជា

ក្រុមហ៊ុនលំដាប់ពិភពលោកមួយ សម្លឹងមើលឱកាសវិនិយោគនៅកម្ពុជា នៃការពង្រីកសេវាកម្មវិស្វកម្មគីមី ពាក់ព័ន្ធនឹងហេដ្ឋារចនា សម្ព័ន្ធប្រព្រឹត្តិកម្មទឹកកខ្វក់ និងឧស្សហកម្មផលិតជី សម្រាប់បម្រើឱ្យវិស័យកសិកម្ម ដើម្បីចូលរួមចំណែកខ្សែច្រវាក់ផលិតកម្មក្នុងស្រុក។ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា នៅថ្ងៃទី១៤ ខែមករា ម្សិលមិញនេះ បានទទួលជួបគណៈប្រតិភូដឹកនាំដោយ លោក Zhou Hong ប្រធានក្រុមប្រឹក្សាភិបាលនៃក្រុមហ៊ុន Fourth Construction Co., Ltd. (FCC) ដែលជាបុត្រសម្ព័ន្ធយុទ្ធសាស្ត្ររបស់សហគ្រាសរដ្ឋខ្នាតធំចិន China National Chemical Engineering Group Corporation (CNCEC) ជួបសម្ដែងការគួរសម និងពិភាក្សាការងារលើកាលានុវត្តភាពវិនិយោគនៅកម្ពុជា។ ក្នុងជំនួបនេះ, លោក Zhou Hong បានជម្រាបជូនអំពីសាវតានិងសក្តានុពលដ៏រឹងមាំរបស់ក្រុមហ៊ុន CNCEC-FCC ដែលជា អង្គភាពមានបទពិសោធន៍ខ្ពស់លើការរចនា និងសាងសង់ហេដ្ឋារចនាសម្ព័ន្ធឧស្សាហកម្មគីមី ឥន្ធនៈ កម្រិតខ្ពស់នៅលើសកលលោក។ លោកប្រធាន Zhou បានបញ្ជាក់ពីបំណងក្នុងការសម្លឹងមើលកម្ពុជា សម្រាប់ជាមូលដ្ឋានសម្រាប់ការពង្រីកសេវាកម្មវិស្វកម្មគីមី ពាក់ ព័ន្ធនឹងហេដ្ឋារចនាសម្ព័ន្ធប្រព្រឹត្តិកម្មទឹកកខ្វក់ និងឧស្សហកម្មផលិតជី សម្រាប់បម្រើឱ្យវិស័យកសិកម្ម ដើម្បីជាការចូលរួមចំណែក ក្នុងខ្សែច្រវាក់ផលិតកម្មឧស្សាហកម្មក្នុងស្រុក ឱ្យកាន់តែមានភាពទំនើប ស្របតាមស្តង់ដារកម្រិតអន្តរជាតិ។ការឆ្លើយតប, ឯកឧត្តមឧបនាយករដ្ឋមន្ត្រី បានវាយតម្លៃខ្ពស់ ចំពោះចំណាប់អារម្មណ៍វិនិយោគរបស់ក្រុមហ៊ុន ដែលជាវិស័យ អាទិភាពមួយ និងមានសារៈសំខាន់ ក្នុងការគាំទ្រដល់មូលដ្ឋានគ្រឹះនៃឧស្សាហកម្មកែច្នៃនៅកម្ពុជា។ ជុំវិញវិស័យវិស្វកម្មគីមីសាស្ត្រ នឹងក្លាយជាកម្លាំងចលករថ្មីមួយ ក្នុងការបង្កើនតម្លៃបន្ថែមដល់សេដ្ឋកិច្ចជាតិ ស្របតាមគោលនយោបាយអភិវឌ្ឍន៍វិស័យឧស្សាហកម្ម កម្ពុជា និងយុទ្ធសាស្ត្របញ្ចកោណ ដែលផ្តល់អាទិភាពលើការធ្វើទំនើបកម្មឧស្សាហកម្ម៕អត្ថបទ៖ សុន រ៉ាឌី

ឯកឧត្តម ប៉ែន បូណា៖ ក្នុងស្មារតីចង់បានសន្តិភាពយូរអង្វែង ទើបកម្ពុជាស្នើទៅថៃកំណត់ខណ្ឌសីមាប្រទេសទាំងពីរ

ឯកឧត្តម ប៉ែន បូណា អ្នកនាំពាក្យរាជរដ្ឋាភិបាលកម្ពុជា តាមរយៈសន្និសីទសារព័ត៌មាននៅថ្ងៃទី១៥ ខែមករា ឆ្នាំ២០២៦នេះ បានគូសបញ្ជាក់ជាថ្មីថា ក្នុងស្មារតីគោរពសេចក្តីប្រកាសរួមដែលបានឯកភាពគ្នា និងចង់បានសន្តិភាពយូរអង្វែងតាមបណ្តោយព្រំដែននេះហើយទើបបានជាភាគីកម្ពុជាបានដាក់សំណើរជាបន្តបន្ទាប់ទៅភាគីថៃ ដើម្បីអនុវត្តការវាស់វែង កំណត់ខណ្ឌសីមាព្រំដែន រវាងប្រទេសទាំងពីរឱ្យបានឆាប់រហ័សជាក់លាក់ ដោយអនុលោមតាមអនុសញ្ញា សន្ធិសញ្ញា និងច្បាប់អន្តរជាតិ។ ឯកឧត្តម ប៉ែន បូណា បានថ្លែងថា ក្នុងនាមជាប្រទេសដែលស្រឡាញ់សន្តិភាពនិងគោរពច្បាប់អន្តរជាតិ កម្ពុជាមានឆន្ទៈយ៉ាងមោះមុតក្នុងការស្វែងរកដំណោះស្រាយបញ្ហាព្រំដែនដោយសន្តិវិធីដោយគោរពកិច្ចព្រមព្រៀងយ៉ាងស្មោះត្រង់បំផុត និងការពារអធិបតេយ្យភាពជាតិ និងបូរណភាពទឹកដីយ៉ាងប្តូរផ្តាច់បំផុត។ ឯកឧត្តមបានបន្តថា បន្ទាប់ពីភាគីថៃស្នើសុំលើកពេលកិច្ចប្រជុំពិសេសរបស់គណៈកម្មការខណ្ឌសីមាព្រំដែនគោក JBC ជាលើកទី២ដោយសុំពន្យាររហូតដល់ក្រោយការបោះឆ្នោតសភានៅដើមខែកុម្ភៈខាងមុខ ភាគីកម្ពុជាតាមរយៈរដ្ឋលេខាធិការដ្ឋានកិច្ចការព្រំដែនបានដាក់សំណើរសាជាថ្មីទៅភាគីថៃ តាមរយៈកំណត់ទូតចុះថ្ងៃទី១៣ ខែមករា ឆ្នាំ២០២៦ ដើម្បីបន្តការងារខណ្ឌសីមាព្រំដែនរវាងប្រទេសទាំងពីរឱ្យបានឆាប់បំផុត។ ឯកឧត្តម បានបញ្ជាក់ថា ការចាត់បញ្ជូនក្រុមវាស់វែងចម្រុះដើម្បីបន្តចុះធ្វើការលើដីជាក់ស្តែងនេះគឺធ្វើឡើងស្របតាមនីតិវិធីនិងបែបបទការងារ (Technical Instruction) ដែលបានឯកភាពគ្នានិងស្របតាមខ្លឹមសារនៃកំណត់ហេតុកិច្ចប្រជុំពិសេសរបស់គណៈកម្មការ JBC កម្ពុជា-ថៃ ចុះថ្ងៃទី២២ ខែតុលា ឆ្នាំ២០២៥ នៅខេត្តចន្ទបុរី ប្រទេសថៃ។ សំណើរលើកទី៣របស់ភាគីកម្ពុជាទៅកាន់ភាគីថៃគឺពាក់ព័ន្ធនឹងក្រុមការងារបច្ចេកទេសដែលអាចដំណើរការការងារបានធម្មតាបើទោះជាថៃស្ថិតនៅក្នុងដំណាក់កាលនៃរដ្ឋាភិបាលចាំផ្ទះក៏ដោយដូចដែលនាយករដ្ឋមន្ត្រីថៃធ្លាប់បានបញ្ជាក់រួចហើយកាលពីពេលកន្លងទៅ។អ្នកនាំពាក្យរាជរដ្ឋាភិបាលសូមបញ្ជាក់ជូនជនរួមជាតិជ្រាបថា គឺក្នុងស្មារតីគោរពសេចក្តីប្រកាសរួមដែលបានឯកភាពគ្នានិងចង់បានសន្តិភាពយូរអង្វែងតាមបណ្តោយព្រំដែននេះហើយទើបបានជាភាគីកម្ពុជាបានដាក់សំណើរជាបន្តបន្ទាប់ទៅភាគីថៃដើម្បីអនុវត្តការវាស់វែង កំណត់ខណ្ឌសីមាព្រំដែនរវាងប្រទេសទាំងពីរឱ្យបានឆាប់រហ័សជាក់លាក់ ដោយអនុលោមតាមអនុសញ្ញា សន្ធិសញ្ញា និងច្បាប់អន្តរជាតិ។ ក្នុងនាមជាប្រទេសដែលស្រឡាញ់សន្តិភាពនិងគោរពច្បាប់អន្តរជាតិ កម្ពុជាមានឆន្ទៈយ៉ាងមោះមុតក្នុងការស្វែងរកដំណោះស្រាយបញ្ហាព្រំដែនដោយសន្តិវិធីដោយគោរពកិច្ចព្រមព្រៀងយ៉ាងស្មោះត្រង់បំផុត និងការពារអធិបតេយ្យភាពជាតិ និងបូរណភាពទឹកដីយ៉ាងប្តូរផ្តាច់បំផុត។ រាជរដ្ឋាភិបាល និងថ្នាក់ដឹកនាំកម្ពុជាដែលមានសម្តេចតេជោ ហ៊ុន សែន ប្រធានព្រឹទ្ធសភា និងសម្តេចបវរធិបតី ហ៊ន ម៉ាណែត នាយករដ្ឋមន្ត្រី និងសេនាធិការរបស់រាជរដ្ឋាភិបាលទាំងអស់បាននិងកំពុងខិតខំប្រឹងប្រែងយ៉ាងសកម្មនិងឥតឈប់ឈរដើម្បីឈានទៅរកដំណោះស្រាយបញ្ហាព្រំដែនជាមួយប្រទេសថៃដោយត្រឹមត្រូវ និងយុត្តិធម៌ ស្របតាមស្មារតីនៃសេចក្តីប្រកាសរួមចុះថ្ងៃទី២៧ ខែធ្នូ ឆ្នាំ ២០២៥ ក៏ដូចជាសេចក្តីថ្លែងការណ៍រួមស្តីពីសន្តិភាពទីក្រុងគូឡាឡំពួរ ចុះថ្ងៃទី២៦ ខែតុលា ឆ្នាំ ២០២៥ រួមទាំងឯកសារ កិច្ចព្រមព្រៀងផ្សេងៗទៀតដែលបានឯកភាពគ្នាកាលពីពេលកន្លងទៅ។អ្នកនាំពាក្យរាជរដ្ឋាភិបាលបញ្ជាក់ថា កម្ពុជាប្រកាន់ជំហរយ៉ាងម៉ឺងម៉ាត់ក្នុងការការពារខ្សែព្រំដែនអន្តរជាតិកម្ពុជា-ថៃ ដែលបន្សល់ទុកដោយគណៈកម្មការព្រំដែនឥណ្ឌូចិន-សៀម ដោយគោរពគោលការណ៍ច្បាប់អន្តរជាតិ គោលការណ៍ខ្សែព្រំដែនមិនកែប្រែ (Uti Possidetis Juris) គោរពអនុសញ្ញា សន្ធិសញ្ញាបារាំង-សៀម ផែនទី និងកំណត់ហេតុបោះបង្គោលព្រំដែនរបស់គណៈកម្មការបោះបង្គោលព្រំដែនឥណ្ឌូចិន-សៀម ព្រមទាំងកិច្ចព្រមព្រៀង និងឯកសារពាក់ព័ន្ធនានាដែលភាគីទាំងពីរបានឯកភាពគ្នានាពេលកន្លងមក។ កម្ពុជាមិនទទួលស្គាល់នូវការកែប្រែខ្សែព្រំដែនណាមួយដែលកើតចេញពីការប្រើប្រាស់កម្លាំងនោះឡើយ។ នេះគឺជាជំហរឥតប្រែប្រួល និងមិនអាចធ្វើសម្បទានបាន៕

គណៈកម្មការរៀបចំការបោះជំរំយុវជនជាសកលលើកទី១១ បញ្ជាក់អត្ថន័យ និងប្រវត្តិដុតភ្លើងគុប

សម្រាប់កម្មវិធីបោះជំរំជាសកលលើកទី១១ ក្រោមប្រធានបទ យុវជន និងការអប់រំនៅកម្ពុជាឆ្នាំ២០៣០ ចាប់ផ្តើមដុតភ្លើងគុបបើកដំណើរការជាផ្លូវការហើយ ក្រោមវត្តមានផ្តល់ភ្លើងដោយលោកជំទាវ ស្រូយ សុជាតិ អគ្គនាយក នៃអគ្គនាយកដ្ឋានយុវជន របស់ក្រសួងអប់រំយុវជននិងកីឡា ក្នុងនោះ គណៈកម្មការរៀបចំការបោះជំរំយុវជនជាសកលលើកទី១១ បានបញ្ជាក់ពីអត្ថន័យ និងប្រវត្តិដុតភ្លើងគុបផងដែរ។បញ្ជាក់ប្រាប់ទូរទស្សន៍ BTV លោក ប្រាក់ ចិត្រា គណៈកម្មការរៀបចំការបោះជំរំយុវជនជាសកលលើកទី១១ និងជាអនុប្រធាននាយកដ្ឋានសហប្រតិបត្តិការកាយរឹទ្ធិ នៃក្រសួងអប់រំ យុវជន និងកីឡា បានបញ្ជាក់ពីអត្ថន័យ និងប្រវត្តិដុតភ្លើងគុប ក្នុងសកម្មភាពជំរំថា ភ្លើងគុបនេះ បានបង្កើងដោយលោក Robert Baden-Powell ស្ថាបនិកកាយរឹទ្ធ (Boy Scouts) ដោយបានប្រើភ្លើងឆេះនៅពេលយប់ ។ក្នុងជំរំ និងបានទៅបោះជំរំដកពិសោធន៍នៅឆ្នាំ១៩០៧ នៅកោះ Brown Sea ប្រទេសអង់គ្លេសដើម្បីដុត ភ្លើងបំភ្លឺជំរំ ដើម្បីឱ្យប្រតិភូជំងឺបានសប្បាយរីករាយក្នុងពេលរាត្រី និងដើម្បីការពារពីសត្វសាហាវផងដែរ ព្រោះជាទូទៅការបោះជំរំ តែងបោះនៅក្នុងព្រៃ។សូមបញ្ជាក់ថា ការបោះជំរំជាសកលលើកទី១១ឆ្នាំនេះ ធ្វើនៅភូមិសសី ឃុំត្បែង ស្រុកបន្ទាយស្រី ជាប់ជើងភ្នំគូលែន ស្ថិតក្នុងបរិបទដែលត្រូវបន្តអភិវឌ្ឍ និងជំរុញសមត្ថភាពយុវជន ឱ្យចូលរួមអនុវត្តផែនទីបង្ហាញផ្លូវ ការអប់រំកម្ពុជាឆ្នាំ២០៣០៕ ផលិត គង់ រ៉េន

ពុទ្ធិកសាកលវិទ្យាល័យព្រះសីហមុនីរាជា បើកវគ្គបណ្តុះបណ្តាលស្តីពី“គោលការណ៍គ្រឹះនៃមុខងារសាធារណៈ ដល់ព្រះមន្ត្រីសង្ឃ មន្ត្រីរាជការ បុគ្គលិក សាស្ត្រាចារ្យ

ភ្នំពេញ៖ ឯកឧត្តមបណ្ឌិត ជួន ជីវិន រដ្ឋលេខាធិការ និងជាតំណាង ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និង ឯកឧត្តម ងួន ស្តេចភក្តី រដ្ឋលេខាធិការក្រសួងធម្មការនិងសាសនា ទទួលបន្ទុកពុទ្ធិកសាកលវិទ្យាល័យព្រះសីហមុនីរាជា ជាព្រះរាជតំណាងដ៏ខ្ពង់ខ្ពស់របស់ សម្តេច ព្រះមហាសង្ឃរាជ បូរ គ្រី ព្រះសាកលវិទ្យាធិការនៃពុទ្ធិកសាកលវិទ្យាល័យព្រះសីហមុនីរាជា អញ្ជើញជាសហអធិបតី បើកវគ្គបណ្តុះបណ្តាលស្តីពី“គោលការណ៍គ្រឹះនៃមុខងារសាធារណៈ និងគុណសម្បត្តិនៃឥរិយាបថរបស់មន្ត្រីរាជការ” និង “សុក្រឹតការគរុកោសល្យ និងវិធីសាស្ត្របង្រៀន” ដល់ព្រះមន្ត្រីសង្ឃ មន្ត្រីរាជការ បុគ្គលិក សាស្ត្រាចារ្យ នាពុទ្ធិកសាកលវិទ្យាល័យព្រះសីហមុនីរាជា ថ្ងៃទី១៥-១៨ ខែមករា ឆ្នាំ២០២៦។ ក្នុងពិធីនេះ ឯកឧត្តម ងួន ស្តេចភក្តីមានប្រសាសន៍ថា ពុទ្ធិកសាកលវិទ្យាល័យព្រះសីហមុនីរាជា ដែលស្ថិតក្រោមព្រះរាជកិច្ចដឹកនាំដ៏ខ្ពង់ខ្ពស់របស់ សម្តេចព្រះមហាសង្ឃរាជ ជាអម្ចាស់ តែងតែយកចិត្ត ទុកដាក់លើការរួមបញ្ចូលគ្នារវាងចំណេះដឹងវិទ្យាសាស្ត្រទំនើប និងគុណធម៌ព្រះពុទ្ធសាសនា។ រាជរដ្ឋាភិបាលកម្ពុជា នីតិកាលទី៧ ក្រោមការដឹកនាំដ៏ខ្ពង់ខ្ពស់ និងឈ្លាស វៃបំផុតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានដាក់ចេញនូវ “យុទ្ធសាស្ត្រ បញ្ចកោណ ដំណាក់កាលទី១- ដែលក្នុងនោះ «ការអភិវឌ្ឍមូលធនមនុស្ស គឺជាអាទិភាពទីមួយក្នុងចំណោមអាទិភាព គន្លឹះទាំងប្រាំ។ ការបណ្តុះបណ្តាលនាពេលនេះ គឺជាការដើរស្របតាមចក្ខុវិស័យរបស់រាជរដ្ឋាភិបាល ក្នុងការកសាង រដ្ឋបាលសាធារណៈឱ្យមានសមត្ថភាពខ្ពស់ ខ្លាំង ឆ្លាត និងស្អាតស្អំ។ក្នុងយុគសម័យនៃបដិវត្តន៍ឧស្សាហកម្ម ៤.០ និងការរីកចម្រើនយ៉ាងរហ័សនៃបច្ចេកវិទ្យាបញ្ញាសិប្បនិម្មិត (AI) បរិបទនេះ ស្ថាប័នអប់រំមិនអាចនៅដាច់ ដោយឡែកពីការផ្លាស់ប្តូរនេះបានឡើយ។ ឯកឧត្តមបណ្ឌិត ជួន ជីវិន បានមានប្រសាសន៍ ក្នុងនាមក្រសួងអប់រំ យុវជន និងកីឡា សូមសម្តែងនូវការគោរពកោតសរសើរដោយ ស្មោះបំផុតចំពោះ សម្តេចជាអម្ចាស់ ដែលទ្រង់បានយកព្រះទ័យទុកដាក់ និងដាក់ចេញនូវទស្សនវិស័យអប់រំដ៏ វែងឆ្ងាយ គឺការផ្សារភ្ជាប់រវាង «ចំណេះវិជ្ជា” និង “គុណធម៌»។ ការពង្រឹងសមត្ថភាពមន្ត្រីរាជការ និងសាស្ត្រាចារ្យ គឺជាការដើរ តាមគន្លងព្រះតម្រិះដ៏ខ្ពង់ខ្ពស់របស់ទ្រង់ ក្នុងការធ្វើឱ្យពុទ្ធិកឧត្តមសិក្សានៅកម្ពុជា មានសមត្ថភាពស្មើមុខស្មើមាត់ ជាមួយបណ្តាប្រទេសក្នុងតំបន់ និងសកលលោក។ ដោយឡែកមន្ត្រីរាជការនៅក្នុង គ្រឹះស្ថានសិក្សា គឺជា «អ្នកបម្រើសេវាអប់រំ» ហើយការជ្រើសរើសយកប្រធានបទ «គោលការណ៍គ្រឹះនៃមុខងារសាធារណៈ និងគុណសម្បត្តិនៃឥរិយាបថ របស់មន្ត្រីរាជការ» មកដាក់បញ្ចូលក្នុងវគ្គបណ្តុះបណ្តាលនេះ គឺជាជម្រើសដ៏វៃឆ្លាត និងទាន់ពេលវេលាបំផុត។ នៅក្នុងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល ក្រោមការដឹកនាំដ៏ឈ្លាសវៃរបស់ សម្តេច មហាបវរធិបតី ហ៊ុន ម៉ាណែត ការកែទម្រង់រដ្ឋបាលសាធារណៈ គឺជាការងារអាទិភាព។ មន្ត្រីរាជការនៅក្នុង គ្រឹះស្ថានសិក្សា គឺជា «អ្នកបម្រើសេវាអប់រំ»។ ឯកឧត្តម បានបញ្ជាក់ថា ឥរិយាបថ និងរបៀបរបបធ្វើការរបស់មន្ត្រីរដ្ឋបាល គឺជាកត្តា កំណត់នូវបរិយាកាសសិក្សារបស់និស្សិត ត្រូវយល់ច្បាស់អំពីច្បាប់សហលក្ខន្តិកៈ សីលធម៌វិជ្ជាជីវៈខ្ពស់ និងមានអាកប្បកិរិយាទន់ភ្លន់ នោះការផ្តល់សេវារដ្ឋបាលអប់រំនឹងមានភាពរលូន និងមានប្រសិទ្ធភាព ដែលជាផ្នែកមួយយ៉ាងសំខាន់ក្នុងការបង្កើនគុណភាពនៃគ្រឹះស្ថានសិក្សាទាំងមូល៕ អត្ថបទ៖ បាន សុខរិទ្ធិ

រដ្ឋសភានឹងប្រជុំពិភាក្សាអនុម័ត សេចក្ដីព្រាងច្បាប់ស្តីពី ការអនុម័តយល់ព្រមលើអនុសញ្ញាអង្គការសហប្រជាជាតិស្ដីពីនីតិសមុទ្រ នៅព្រឹកថ្ងៃទី១៦ ខែមករា ឆ្នាំ២០២៦

សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា នៅព្រឹក ថ្ងៃទី១៥ ខែមករា ឆ្នាំ២០២៦ បានអញ្ជើញដឹកនាំកិច្ចប្រជុំគណៈកម្មាធិការអចិន្ត្រៃយ៍រដ្ឋសភា ដើម្បីពិនិត្យ និងអនុម័តរបៀបវារៈមួយចំនួន។កិច្ចប្រជុំគណៈកម្មាធិការអចិន្រ្តៃយ៍រដ្ឋសភា បានអនុម័តកំណត់កាលបរិច្ឆេទ នៅព្រឹកថ្ងៃទី១៦ ខែមករា ឆ្នាំ២០២៦ ស្អែកនេះ ដើម្បីបន្តសម័យប្រជុំរដ្ឋសភាលើកទី៥ នីតិកាលទី៧ ដើម្បីពិភាក្សា និងអនុម័តសេចក្ដីព្រាងច្បាប់ស្តីពី ការអនុម័តយល់ព្រមលើអនុសញ្ញាអង្គការសហប្រជាជាតិស្ដីពីនីតិសមុទ្រ។ អនុសញ្ញាអង្គការសហប្រជាជាតិស្តីពីនីតិសមុទ្រឆ្នាំ១៩៨២ ត្រូវបានចុះហត្ថលេខា កាលពីថ្ងៃទី១០ ខែធ្នូ ឆ្នាំ១៩៨២ នៅទីក្រុងម៉ុងតេហ្គាបៃ ប្រទេសហ្សាម៉ាអ៊ីក ហើយចូលជាធរមាននៅថ្ងៃទី១៦ ខែវិច្ឆិកា ឆ្នាំ១៩៩៤។ អនុសញ្ញានេះកំណត់អំពីក្របខ័ណ្ឌគតិយុត្តនៃការកំណត់ព្រំដែនសមុទ្រ សេរីភាពផ្នែកនាវាចរណ៍តាមផ្លូវសមុទ្រ សិទ្ធិ និងកាតព្វកិច្ចរបស់រដ្ឋភាគីក្នុងការប្រើប្រាស់លម្ហសមុទ្រ និងសេចក្តីណែនាំនានាសម្រាប់ការធ្វើធុរកិច្ច កិច្ចការពារបរិស្ថាន ព្រមទាំងការគ្រប់គ្រងធនធានធម្មជាតិសមុទ្រដ៏សម្បូរបែប ។ការផ្តល់សច្ចាប័នអនុសញ្ញាអង្គការសហប្រជាជាតិស្តីពីនីតិសមុទ្រ នឹងផ្តល់អត្ថប្រយោជន៍ដល់ព្រះរាជាណាចក្រកម្ពុជាដែលជាប្រទេសមានសមុទ្រ ទទួលបាននូវក្របខ័ណ្ឌច្បាប់សមុទ្រមួយពេញលេញ សម្រាប់កិច្ចការសមុទ្រ, ទទួលបានការការពារតាមច្បាប់សមុទ្រអន្តរជាតិទាក់ទងនឹងការគ្រប់គ្រងសមុទ្ររបស់កម្ពុជា និងការពង្រឹងតួនាទីកម្ពុជាលើឆាកអន្តរជាតិ តាមរយៈការពង្រីកកិច្ចសហប្រតិបត្តិការដោយស្មើមុខ ក្នុងការគ្រប់គ្រងសមុទ្រ, ដោះស្រាយបញ្ហាសមុទ្រជាមួយបណ្តាប្រទេសនានា និងមានសិទ្ធិចូលរួមបោះឆ្នោតជ្រើសរើសសមាសភាពអាជ្ញាធរបាតសមុទ្រអន្តរជាតិ ក៏ដូចជាចៅក្រមតុលាការអន្តរជាតិនីតិសមុទ្រ ជាដើម ៕

យុវជនបោះជំរំជាសកលលើកទី១១ នាំគ្នាសមាធិ អប់រំផ្លូវចិត្ត ដើម្បីឱ្យចេះប្រើអារម្មណ៍គ្រប់គ្រងខ្លួនឯង

នៅជាប់ជើងភ្នំគូលែន នាព្រឹកព្រហាមថ្ងៃទី១៥មករា ជាមួយនឹងអាកាសធាតុត្រជាក់២០អង្សា ប្រតិភូបោះជំរំយុវជនជាសកលលើកទី១១ បាននាំគ្នាសមាធិអប់រំផ្លូវចិត្ត ដើម្បីចេះប្រើអារម្មណ៍ ក្នុងការសម្របខ្លួនរៀនរស់នៅជាមួយសង្គមក្លាយជាពលរដ្ឋនៅថ្ងៃខាងមុខ។បញ្ជាក់ប្រាប់ BTV លោក ងន់ យ៉េង គ្រូជំនួយផ្នែកសមាធិ នៃក្រសួងអប់រំយុវជននិងកីឡា បានប្រាប់ថា ការធ្វើសមាធិនៅពេលនេះ គឺដើម្បីឱ្យយុវជនចេះពិនិត្យមើលខ្លួនឯង នូវភាពចន្លោះប្រហោងណាមួយ ដើម្បីទៅបំពេញនូវភាពចន្លោះប្រហោងនោះ ពិសេសដើម្បីជួយនូវភាពរាងកាយមំាមួន ដើម្បីឱ្យយុវជនមានកម្លាំងចិត្ត មានអំណាចនៃចិត្តរឹងមាំ ក្នុងការបំពេញការងារ និងការសិក្សាផ្សេងៗ សំខាន់ដើម្បីឱ្យយុវជនមានស្មារតីល្អ មានស្មារតីគិតិជ្ជមានក្នុងសង្គម ហើយការធ្វើសមាធិនេះ គេតែងធ្វើនៅពេលព្រឹកព្រលឹម ដោយសារទិន្នន័យខួរក្បាលស្រលះល្អ ។សូមបញ្ជាក់ថា ការបោះជំរំយុវជនជាសកលនេះ ជាគំនិតផ្តួចផ្តើមរបស់សម្តេចតេជោ ហ៊ុន សែន អតីតនាយករដ្ឋមន្ត្រី ក្នុងគោលបំណងពង្រឹងយុវជនឱ្យចេះរៀនរស់ជាមួយយុវជនផ្សេងៗទៀត ដែលពុំធ្លាប់ស្គាល់គ្នា ឱ្យចេះសាមគ្គីគ្នា ចេះបង្កើតជាសហគមន៍ និងរស់នៅជាមួយគ្នាដោយសុខសន្តិភាព ពិសេសការរស់នៅជុំគ្នារបស់យុវជន ប្រៀបដូចជាចង្កឹះមួយ គេកាច់បាក់ ចង្កឹះមួយបាច់កាច់មិនបាក់ ក្នុងន័យចេះឱ្យយុវជនចេះសាមគ្គីគ្នាទើបប្រទេសជាតិរឹងមាំ៕ ផលិត គង់ រ៉េន

មន្ត្រីជំនាញក្រសួងកសិកម្ម ចុះពិនិត្យកសិដ្ឋានបន្លែចម្រុះ កសិដ្ឋានកាហ្វេ និងកសិដ្ឋានត្រពាំងបារាំង ក្នុងខេត្តរតនគិរី ដើម្បីពិភាក្សាអំពីផលិតកម្មដំណាំ បច្ចេកទេសបំពេញបន្ថែម

នៅថ្ងៃទី១៤ ខែមករា ឆ្នាំ២០២៦ ឯកឧត្តមបណ្ឌិត ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អមដំណើរដោយលោកប្រធាន មន្ត្រីជំនាញនៃមន្ទីរកសិកម្មខេត្តរតនគិរី មន្រ្ដីកសិកម្មឃុំ និងអាជ្ញាធរមូលដ្ឋាន បានចុះពិនិត្យស្ថានភាពផលិតកម្ម ដើម្បីគាំទ្របច្ចេកទេស និងណែនាំអំពីព័ត៌មានពាក់ព័ន្ធសំខាន់ៗ ដល់កសិករ នៅខេត្តរតនគិរី។ក្នុងដំណើរចុះត្រួតពិនិត្យនេះ ឯឧត្ដមបណ្ឌិត និងក្រុមការងារ បានជួបសំណះសំណាលជាមួយកសិករដាំដុះដំណាំ និងពិនិត្យស្ថានភាពផលិតកម្ម ចំនួន ៣ទីតាំង រួមមាន៖ កសិដ្ឋានបន្លែចម្រុះ កសិដ្ឋានកាហ្វេ និងកសិដ្ឋានត្រពាំងបារាំង ដើម្បីពិភាក្សាអំពីផលិតកម្មដំណាំ បច្ចេកទេសបំពេញបន្ថែម និងបញ្ហាប្រឈម ស្ថិតនៅក្រុងបានលុង ទីរួមខេត្ដរតនគិរី។ ឆ្លៀតក្នុងឱកាសនេះ ឯកឧត្តមបណ្ឌិត បានណែនាំដល់ថ្នាក់នាំមន្ទីរកសិកម្មខេត្ដ និងមន្ត្រីកសិកម្មឃុំ បន្ដចុះតាមដានជាប្រចាំ និងសហការជាមួយក្រុមការងារជំនាញពាក់ព័ន្ធចុះជួយអន្តរាគមន៍ផ្ដល់បច្ចេកទេសកសិកម្មសមស្របប្រកបដោយប្រសិទ្ធភាព និងនិរន្តរភាព ដើម្បីបង្កើនផលិតភាព កាត់បន្ថយថ្លៃដើម គុណភាពផលិតផលខ្ពស់ និងការសម្របសម្រួលទីផ្សារ ជូនកសិករ។ ក្នុងនោះដែរ ឯកឧត្ដមណ្ឌិត ក៏បានកោតសរសើរ និងលើកទឹកចិត្ដដល់កសិករ បន្ដចូលរួមសហការជាមួយនឹងជំនាញរបស់មន្ទីរកសិកម្មខេត្ដដែលជាសេនាធិការរបស់ក្រសួងកសិកម្ម តាមរយៈការចូលរួមវគ្គបណ្ដុះបណ្ដាលលើចំណេះដឹកកសិកម្មថ្មី មានភាពធន់និងការប្រែប្រួលអាកាសធាតុ ដើម្បីអភិវឌ្ឍជីវភាពឱ្យកាន់តែល្អប្រសើរ៕

ឯកឧត្តមឧបនាយករដ្ឋមន្ត្រី ហ៊ុន ម៉ានី អញ្ជើញជាអធិបតីបិទសន្និបាតបូកសរុបលទ្ធផលការងារប្រចាំឆ្នាំ២០២៥ និងលើកទិសដៅការងារឆ្នាំ២០២៦ របស់រដ្ឋបាលខេត្តកំពង់ស្ពឺ

កំពង់ស្ពឺ៖ នៅព្រឹកថ្ងៃទី១៥ ខែមករា ឆ្នាំ២០២៦ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ស្ពឺ បានអញ្ជើញជាអធិបតីដ៏ខ្ពង់ខ្ពស់ក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ២០២៥ និងលើកទិសដៅការងារឆ្នាំ២០២៦ របស់រដ្ឋបាលខេត្តកំពង់ស្ពឺ។ ពិធីបិទសន្និបាតនាព្រឹកនេះ មានការអញ្ជើញចូលរួមពីសំណាក់ ថ្នាក់ដឹកនាំក្រសួងមហាផ្ទៃ ថ្នាក់ដឹកនាំក្រសួងមុខងារសាធារណៈ ក្រុមការងារថ្នាក់ជាតិចុះមូលដ្ឋានខេត្តកំពង់ស្ពឺ ក្រុមប្រឹក្សាខេត្ត គណៈអភិបាលខេត្ត កងកម្លាំងទាំងបីក្នុងខេត្ត មន្ត្រីរាជការចំណុះសាលាខេត្ត មន្ទីរអង្គភាពជុំវិញខេត្ត ក្រុមប្រឹក្សាក្រុង ស្រុក អភិបាលក្រុង ស្រុក អធិការនគរបាលស្រុក ក្រុង មេបញ្ជាការផ្នែកសឹករងស្រុក ក្រុង ចៅសង្កាត់ មេឃុំ ស្មៀនឃុំ និងគ្រឹះស្ថានឯកជនក្នុងខេត្ត សរុបប្រមាណ ៧៧០នាក់។ក្នុងសុន្ទរកថាស្វាគមន៍ និងធ្វើសេចក្តីរាយការណ៍អំពីលទ្ធផលនៃសន្និបាត ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តកំពង់ស្ពឺ បានលើកឡើងថា រដ្ឋបាលខេត្ត បានពង្រឹងថែរក្សាការពារសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គមបានយ៉ាងរឹងមាំ ជូនប្រជាពលរដ្ឋរស់នៅប្រកបដោយសុខដុមរមនា។ តាមរយៈការលើកកម្ពស់ការយល់ដឹងរបស់ប្រជាពលរដ្ឋ ឱ្យមានការចូលរួមអនុវត្តច្បាប់ និងលិខិតបទដ្ឋានគតិយុត្តជាធរមាន ព្រមទាំងផ្សព្វផ្សាយ និងជំរុញអនុវត្តចលនាគោលនយោបាយ «ភូមិ ឃុំ-សង្កាត់ មានសុវត្ថិភាព» សំដៅបង្កើនសកម្មភាពបង្ការ ទប់ស្កាត់ បទល្មើសគ្រប់ប្រភេទ។ ពិសេសដោះស្រាយ សម្របសម្រួលជាមួយកម្មករ និយោជក និងនិយោជិតតាមគ្រប់រូបភាព និងរក្សាបាននូវបរិយាកាសសុវត្ថិភាពសង្គមល្អប្រសើរ។ លើសពីនេះ ឯកឧត្តមបណ្ឌិត បានបញ្ជាក់ថា រដ្ឋបាលខេត្ត បានបង្កើននូវប្រសិទ្ធភាពនៃការអនុវត្តការផ្តល់សេវា សាធារណៈជូនប្រជាពលរដ្ឋតាមរយៈអង្គភាព និងការិយាល័យច្រកចេញចូលតែមួយ ប្រកបដោយការជឿជាក់ សាមញ្ញ ឆាប់រហ័ស មានភាពឆ្លើយតប និងមានស័ក្តិសិទ្ធិភាព ដោយក្នុងឆ្នាំ២០២៥ ទទួលបានសេវាសរុបចំនួន ១៤៣.៥៨៩សេវា។ រដ្ឋបាលខេត្ត បានខិតខំអនុវត្តតួនាទី ភារកិច្ច យ៉ាងសកម្ម ក្នុងការចូលរួមចំណែកអនុវត្តកម្មវិធីយុទ្ធសាស្ត្រ បញ្ចកោណ ដំណាក់កាលទី១ រាជរដ្ឋាភិបាល ដែលបានផ្តោតលើការពង្រឹង ការអភិវឌ្ឍ មូលធនមនុស្ស ការពង្រឹងសមត្ថភាពរដ្ឋបាលសាធារណៈ ការលើកកម្ពស់គុណភាពអប់រំ, ការលើកកម្ពស់គុណភាព សុខាភិបាល ការជ្រើសរើសយុវជនឱ្យចូលរៀនវគ្គបណ្តុះបណ្តាល បច្ចេកទេស និងជំនាញវិជ្ជាជីវៈចំនួន ១,៥លាននាក់។ឆ្លៀតក្នុងឱកាសនេះ ឯកឧត្តមបណ្ឌិត ក៏បានថ្លែងអំណរគុណយ៉ាងជ្រាលជ្រៅចំពោះវត្តមាន ឯកឧត្តមឧបនាយករដ្ឋមន្ត្រី ហ៊ុន ម៉ានី ដែលបានលះបង់កម្លាំងកាយ កម្លាំងចិត្ត ប្រាជ្ញា ស្មារតី ណែនាំចង្អុលបង្ហាញដល់រដ្ឋបាលខេត្តកំពង់ស្ពឺ សំដៅចូលរួមចំណែកក្នុងការថែរក្សា ការពារសន្តិភាព និងការអភិវឌ្ឍខេត្តនាបច្ចុប្បន្ន ព្រមទាំងរួមគ្នា ដើម្បីកំពង់ស្ពឺឆ្ពោះទៅសម្រេចនូវសមិទ្ធផល វឌ្ឍនភាព វិជ្ជមានថ្មីៗបន្ថែមទៀត ពោរពេញដោយភាពសុខដុមរមនា វិបុលភាព និងកាលានុវត្តន៍ភាពនាពេលអនាគតប្រាកដនិយម។សូមជម្រាបផងដែរថា ក្នុងរយៈពេលមួយថ្ងៃពេញថ្ងៃទី១ នៃកម្មវិធីសន្និបាត បានប្រព្រឹត្តទៅតាមរបៀបវារៈដែលបានគ្រោងទុកមានដូចជា៖ បន្ទាប់ពិធីបេីកកម្មវិធីសន្និបាតដោយឯកឧត្តមបណ្ឌិត អភិបាលខេត្ត ក៏មានការពិភាក្សា ផ្លាស់ប្តូរយោបល់ និងបទអន្តរាគមន៍របស់ក្រុមពិភាក្សាលើប្រធានបទចំនួន៥ សំខាន់ៗ ដែលជាមូលដ្ឋានគ្រឹះក្នុងការអភិវឌ្ឍខេត្ត ឱ្យមានការរីកចម្រើន ជឿនលឿន ដើម្បីឆ្លើយតបទៅនឹងតថភាពជាក់ស្តែង នៃការផ្តល់សេវាសាធារណៈជូនប្រជាពលរដ្ឋប្រកបដោយស័ក្តិសិទ្ធិភាព និងសម្រាប់ជាធាតុចូលក្នុងអង្គសន្និបាតទាំងមូល ដោយសម្រេចបានលទ្ធផលការងារក្នុងឆ្នាំ២០២៥ កន្លងមក៕

អភិបាលខេត្តឧត្ដរមានជ័យ ចាត់ទុកមន្ត្រីស៊ីម៉ាក់គឺជាវីរជនដែលស្វែងរកកន្លែងសុវត្ថិភាពជូនពលរដ្ឋ

ឧត្តរមានជ័យ៖ ដើម្បីលើកទឹកចិត្ត និងវាយតម្លៃខ្ពស់ចំពោះពលិកម្មដ៏ធំធេងក្នុងការបម្រើជាតិមាតុភូមិ ឯកឧត្តម មាន ចាន់យ៉ាដា អភិបាលខេត្តឧត្ដរមានជ័យ បានអញ្ជើញជួបសំណេះសំណាល និងសួរសុខទុក្ខជាមួយមន្ត្រីកងឯកភាពកំចាត់មីនទី១ (ស៊ីម៉ាក់) ដែលកំពុងបំពេញបេសកកម្មឈរជើងយ៉ាងសកម្មក្នុងភូមិសាស្ត្រខេត្តឧត្ដរមានជ័យ នៅរសៀលថ្ងៃទី១៤ ខែមករាឆ្នាំ២០២៦នេះ។លោក នេត រដ្ឋា ប្រធានកងឯកភាពកំចាត់មីនកម្ពុជា (CMAC) ប្រចាំខេត្តឧត្ដរមានជ័យ បានបញ្ជាក់ថា លទ្ធផលស្រាវជ្រាវ និងដាក់ស្លាកសញ្ញា តាមភូមិគោលដៅដែលរងផលប៉ះពាល់ ដោយសារសង្គ្រាម ចំនួន ១៤៥ភូមិ ១/រកឃើញទីតាំង និងដាក់ស្លាកសញ្ញាបានចំនួន៨២៤ទីតាំង ២/រកឃើញគ្រាប់លើដី និងដាក់ស្លាកសញ្ញាបានចំនួន៥៧ទីតាំង៣/រកឃើញគ្រាប់ក្នុងដី និងដាក់ស្លាកសញ្ញាបានចំនួន៦៤ទីតាំង ៤/រកឃើញរណ្តៅគ្រាប់ផ្ទុះ និងដាក់ស្លាកសញ្ញាបានចំនួន៧០៣ទីតាំង។ឯកឧត្តម មាន ចាន់យ៉ាដា លើកឡើងថា ការងារបោសសម្អាតមីនមិនមែនគ្រាន់តែជាការងារបច្ចេកទេសប៉ុណ្ណោះទេ ប៉ុន្តែគឺជាការលះបង់សាច់ស្រស់ឈាមស្រស់ ដើម្បីបំប្លែង ដីដែលបង្កហានិភ័យ ឱ្យទៅជាតំបន់សេដ្ឋកិច្ច ការដាំដុះ និងការតាំងទីលំនៅថ្មី ដែលឆ្លើយតបយ៉ាងប្រសើរទៅនឹងគោលនយោបាយកាត់បន្ថយភាពក្រីក្ររបស់រាជរដ្ឋាភិបាល។ "មន្ត្រីស៊ីម៉ាក់ គឺជាវីរជនដែលហ៊ានប្រឈមមុខនឹងគ្រោះថ្នាក់គ្រប់វិនាទី ដើម្បីដកយកគ្រាប់រំសេវដែលបង្កប់ក្នុងដី ចេញពីជីវិតរបស់ប្រជាជន។ បើគ្មានពួកគាត់ទេ យើងក៏មិនអាចមានដីដែលមានសុវត្ថិភាពសម្រាប់សាងសង់លំនៅឋាន សាលារៀន ឬអភិវឌ្ឍន៍វិស័យកសិកម្មបានដូចសព្វថ្ងៃនេះដែរ"។ឯកឧត្ដម អភិបាលខេត្ត បានផ្ដាំផ្ញើឱ្យមន្ត្រីស៊ីម៉ាក់ទាំងអស់ត្រូវបន្តយកចិត្តទុកដាក់លើសុខភាព និងត្រូវគោរពតាមបទដ្ឋានបច្ចេកទេសឱ្យបានខ្ជាប់ខ្ជួនបំផុត ដើម្បីធានាសុវត្ថិភាពផ្ទាល់ខ្លួនក្នុងពេលបំពេញបេសកកម្មផងដែរ៕ ឃិនសារិទ្ធ

បណ្ដាញសង្គម

ព័ត៌មានថ្មីៗ

ប្រធានាធិបតីអ៊ុយក្រែន ស្វែងរកវឌ្ឍនភាព មុនរដូវរងា ខណៈការចរចាឆ្ពោះទៅរកសន្តិភាពជាប់គាំង

ក្រុមអ្នកជួយសង្គ្រោះកំពុងប្រញាប់ប្រញាល់ជួយសង្គ្រោះមនុស្ស ២នាក់ ដែលជាប់ក្នុងរូងភ្នំ នៅប្រទេសឡាវ

រដ្ឋមន្ត្រី៖ កាតាត្រៀមខ្លួនចរចាអំពីការយកថ្លៃសេវាបណ្ដោះអាសន្នសម្រាប់ការឆ្លងកាត់ច្រកសមុទ្រ ហ័រមូស

តម្លៃប្រេងឡើងជាង ២ភាគរយ ខណៈអ៊ីស្រាអែលបង្កើនការលុកលុយក្នុងដែនដីរបស់លីបង់

ចក្រភពអង់គ្លេស និងអាល្លឺម៉ង់ ជំរុញឲ្យគ្រប់ភាគីនៃជម្លោះនៅលីបង់ បញ្ឈប់អរិភាព

ក្រសួងសុខាភិបាល៖ ចំនួនអ្នកស្លាប់ពីការវាយប្រហាររបស់អ៊ីស្រាអែលលើលីបង់កើនឡើងជាង ៣.៤០០នាក់

អ៊ីរ៉ង់បដិសេធរបាយការណ៍អំពីការលាលែងពីតំណែងរបស់ប្រធានាធិបតី

ប្រធានសហព័ន្ធបាល់ទាត់លើតុចាត់ទុកជើងឯកថ្នាក់ជាតិលើកដំបូងជាសញ្ញាណល្អក្នុងការអភិវឌ្ឍ

ប្រធានាធិបតីស៊ីរីបានសន្ទនាតាមទូរស័ព្ទជាមួយលោក TRUMP អំពីការគាំទ្រដល់សេដ្ឋកិច្ចរបស់ក្រុងដាម៉ាស

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877