នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
កម្ពុជាប្រកាសសម្រេចទម្លាក់កម្រិតការទូតកម្ពុជា-ថៃ ឱ្យមកនៅទាបបំផុតត្រឹមលេខាទី២ហើយតម្រូវឱ្យមន្ត្រីទូតថៃ កែសម្រួលចេញពីកម្ពុជា
អ្នកនាំពាក្យក្រសួងការពារជាតិកម្ពុជាច្រានចោលទាំងស្រុងការចោទប្រកាន់ដោយគ្មានមូលដ្ឋានរបស់ភាគីថៃមកលើកម្ពុជា ពាក់ព័ន្ធនឹងការរងរបួសរបស់ទាហានថៃដោយសារការផ្ទុះគ្រាប់មីន
ឯកឧត្តមសាស្រ្តាចារ្យ ឈាង រ៉ា អញ្ជើញប្រកាសដាក់ឱ្យប្រើប្រាស់នីតិវិធីប្រតិបត្តិស្តង់ដាជាតិ សម្រាប់ប្រព័ន្ធកត់ត្រាជំងឺមហារីក បែបប្រជាសាស្ត្រ
ឯកឧត្តម ហេង រតនា៖គ្រាប់មីនដែលទាហានថៃជាន់បណ្តាលឲ្យដាច់ជើងនៅតំបន់មុំបីជាមីនចាស់បើមីនថ្មីមិនត្រឹមតែដាច់ជើងទេគឺអាចដល់ស្លាប់

ព័ត៌មានជាតិ

កម្ពុជា ដឹកនាំកិច្ចប្រជុំរៀបចំផែនការលំហាត់សមយុទ្ធឆ្លើយតបគ្រោះមហន្តរាយ​ក្នុងតំបន់អាស៊ានឆ្នាំ២០២៥ (ARDEX-25)

2025/02/24 04:00:46 pm        197
Facebook Telegram Linkin
នៅថ្ងៃទី២៤ ខែកុម្ភៈ ឆ្នាំ២០២៥ ឯកឧត្តម គីម វីរៈ អគ្គលេខាធិការ គណៈកម្មាធិការជាតិគ្រប់គ្រងគ្រោះមហន្តរាយ បានអញ្ជើញបើកកិច្ចប្រជុំក្រុមការងាររៀបចំផែនការចុងក្រោយសម្រាប់លំហាត់សមយុទ្ធឆ្លើយតបគ្រោះមហន្តរាយក្នុងតំបន់អាស៊ានឆ្នាំ២០២៥ (ARDEX-25) នៅសណ្ឋាគារសូហ្វីតែល រាជធានីភ្នំពេញ។ កិច្ចប្រជុំនេះមានការអញ្ជើញចូលរួមពី លោក Lee Yam Ming នាយកប្រតិបត្តិនៃមជ្ឈមណ្ឌល AHA, ឯកឧត្តម Igor Driesmans ឯកអគ្គរដ្ឋទូតសហភាពអឺរ៉ុបប្រចាំកម្ពុជា, តំណាងរដ្ឋសមាជិកអាស៊ាន និងអាជ្ញាធរពាក់ព័ន្ធថ្នាក់ជាតិ និងថ្នាក់ក្រោមជាតិរបស់កម្ពុជា។ នាឱកាសនោះ ឯកឧត្តម គីម វីរៈ មានប្រសាសន៍ថា ក្នុងនាមឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្ត្រី អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ មានសេចក្តីសោមន្សរីករាយចំពោះការអញ្ជើញចូលរួមពីបណ្តាប្រទេសជាសមាជិកអាស៊ាន ភាគីពាក់ព័ន្ធ និងដៃគូអភិវឌ្ឍនានា ដែលចូលរួមក្នុងពេលប្រទេសកម្ពុជា ជាម្ចាស់ផ្ទះកិច្ចប្រជុំក្រុមការងាររៀបចំផែនការចុងក្រោយសម្រាប់លំហាត់សមយុទ្ធឆ្លើយតបគ្រោះមហន្តរាយក្នុងតំបន់អាស៊ានឆ្នាំ២០២៥។ ក្នុងឱកាសនោះ ឯកឧត្តម គីម វីរៈ ថ្លែងថា ប្រទេសកម្ពុជាមានមោទនភាពក្នុងការធ្វើជាម្ចាស់ផ្ទះ ARDEX-25 នៅខែកក្កដា ឆ្នាំ២០២៥ខាងមុខ ពិសេសក្នុងនាមរាជរដ្ឋាភិបាលកម្ពុជា គណៈកម្មាធិការជាតិគ្រប់គ្រងគ្រោះមហន្តរាយ (NCDM) នឹងសហការរៀបចំព្រឹត្តិការណ៍ដ៏សំខាន់នេះជាមួយមជ្ឈមណ្ឌល AHA ឱ្យទទួលបានជោគជ័យ និងតបតាមស្មារតីរួមរបស់អាស៊ាន។ឯកឧត្តម គីម វីរៈ បញ្ជាក់ថា តំបន់អាស៊ានស្ថិតក្នុងចំណោមតំបន់ដែលងាយរងគ្រោះបំផុតបណ្តាលមកពីអាកាសធាតុ និងគ្រោះថ្នាក់ធម្មជាតិ ដោយសារការប្រែប្រួលអាកាសធាតុ។ ជាមួយបញ្ហានេះ ឯកឧត្តម គីម វីរៈ បញ្ជាក់ថា ការខិតខំរបស់អាស៊ានសម្រាប់តួនាទីលើការគ្រប់គ្រងគ្រោះមហន្តរាយ ត្រូវបានអនុវត្តប្រកបដោយប្រសិទ្ធភាពនិងមានសារៈសំខាន់ណាស់ ពិសេសក្នុងពេលអនុវត្ត ARDEX ដើម្បីពង្រឹងសមត្ថភាពក្នុងការឆ្លើយតបទាំងក្នុង និងក្រៅតំបន់។ ឯកឧត្តម គីម វីរៈ លើកឡើងថា នេះជាលើកទីពីរហើយដែលកម្ពុជាធ្វើជាម្ចាស់ផ្ទះសមយុទ្ធថ្នាក់តំបន់ ដោយមានការគាំទ្រយ៉ាងពេញទំហឹងពីមជ្ឈមណ្ឌល AHA ក្នុងគោលបំណងធ្វើលំហាត់ដ៏ទូលំទូលាយ រួមទាំងលំហាត់លើតុ (TTX) លំហាត់បញ្ជាការប្រកាស (CPX) និងលំហាត់ហ្វឹកហ្វឺនលើវាល (FTX) ដែលទាំងអស់នេះជាការសាកល្បងយ៉ាងហ្មត់ចត់ និងពិនិត្យមើលយន្តការសម្របសម្រួលជាតិ និងប្រព័ន្ធឆ្លើយតបគ្រោះមហន្តរាយក្នុងតំបន់។ ឯកឧត្តម គីម វីរៈ រំពឹងថា ការធ្វើជាម្ចាស់ផ្ទះ ARDEX-25 នឹងពង្រឹងយន្តការក្នុងតំបន់របស់យើង និងពង្រឹងសមត្ថភាពឆ្លើយតបគ្រោះមហន្តរាយរបស់យើង ជាពិសេសសម្រាប់ជំនួយក្នុងតំបន់ ឬអន្តរជាតិ៕

លោក ទូច សុខៈ៖ រាជរដ្ឋាភិបាលកម្ពុជាតាំង​ពីអាណត្តិមុនៗ​ដល់អាណត្តិនេះ​បានអនុវត្ត​យ៉ាង​សកម្ម​លើការបង្ក្រាបករណីជនបរទេសប្រតិបត្តិការសកម្មភាពអនឡាញខុសច្បាប់នៅកម្ពុជា

2025/02/24 03:55:34 pm        277
Facebook Telegram Linkin
លោក ទូច សុខៈ អ្នកនាំពាក្យរងក្រសួងមហាផ្ទៃ នៅរសៀលថ្ងៃទី២៤ ខែកុម្ភៈនេះ បានបញ្ជាក់ទាក់ទងនឹងការបង្ក្រាបករណីជនបរទេសប្រតិបត្តិការសកម្មភាពអនឡាញខុសច្បាប់នៅកម្ពុជា ថារាជរដ្ឋាភិបាលកម្ពុជាបានធ្វើរឿងតាំងពីយូរមកហើយ គឺតាំងពីរដ្ឋាភិបាលអាណត្តិមុនៗ ហើយបាននិងកំពុងស៊ើបអង្កេតបង្ក្រាបជាបន្តបន្ទាប់។ លោក ទូច សុខៈ បានឱ្យដឹងថា ចំពោះករណីនេះនៅប្រទេសថៃ ឃើញថា រដ្ឋាភិបាលថ្មីចាប់ផ្ដើមធ្វើរឿងនេះដែរ ដើម្បីបង្ហាញឆន្ទៈ ពិសេសទប់នឹងការវាយប្រហារពីបក្សប្រឆាំងខ្លួនដែលឆ្កឹះប្រធានបទជាច្រើនដាក់បន្ទុកដល់រដ្ឋាភិបាលឬបក្សកាន់អំណាច។ ចំពោះកិច្ចសហការលើការបង្ក្រាបករណីនេះ ក៏មានតាំងពីយូរមកហើយដែររវាង កម្ពុជា ថៃ ឡាវ និងវៀតណាម រវាងក្រសួងមហាផ្ទៃកម្ពុជា និងក្រសួងពាក់ព័ន្ធនៃប្រទេសទាំងបី។ លោក ទូច សុខៈ បន្ថែមថា ពោលគឺ តែងប្រជុំប្រចាំឆ្នាំជាប្រពៃណី និងកិច្ចសហការជាប្រចាំថ្ងៃទាំងការបញ្ជូនព័ត៌មានឱ្យគ្នា និងកិច្ចសហការបង្ក្រាបបទល្មើស ដែលទទួលបានប្រសិទ្ធភាពជាទីមោទក។ លោកបញ្ជាក់ថា៖«បើគ្រាន់តែឃើញប្រទេសជិតខាង ដាក់ចេញវិធានការនេះវិធានការនោះ រួចមកភ្ជាប់កម្មជាក្នុងន័យអវិជ្ជមាន នោះជាការលើកឡើងពុំបានមើលឱ្យគ្រប់ជ្រុងជ្រោយ»។ បើតាមការបញ្ជាក់របស់លោក ទូច សុខៈ កម្ពុជាបានធ្វើច្រើន និងបន្តធ្វើទៀត មិនមែនត្រឹមកម្រិតប្រទេសជាប់ព្រំគ្នាទេ បណ្ដាប្រទេសផ្សេងៗ ក៏មានកិច្ចសហការជួយគ្នាទៅវិញទៅមកទាំងការបញ្ជូនព័ត៌មាន សហការបង្ក្រាប ការជួយគ្នាលើផ្នែកធនធានមនុស្ស និងឧបករណ៍បច្ចេកទេស...។ ជារួមករណីតាមប្រព័ន្ធ Call Centre ជាករណីរួមគ្នា ហើយកម្ពុជាបានធ្វើឱ្យភ្ញៀវទេសចរណ៍ និងអ្នកវិនិយោគមានទំនុកចិត្តគួរឱ្យកត់សម្គាល់ គឺបទល្មើសប្រភេទនេះបានស្រាកស្រាន និងគ្រប់គ្រងបាន។យោងតាមសេចក្ដីប្រកាសព័ត៌មានរបស់អគ្គស្នងការដ្ឋាននគរបាលជាតិ នៅថ្ងៃទី២៤ ខែកុម្ភៈ ឆ្នាំ ២០២៥នេះ បានបញ្ជាក់ថា គណៈបញ្ជាការដឹកនាំស្រាវជ្រាវ ស៊ើបអង្កេត និងបង្ក្រាបបទល្មើសគ្រប់ប្រភេទ នៃក្រសួងមហាផ្ទៃ នៅថ្ងៃទី២២ និង ២៣ ខែកុម្ភៈ ឆ្នាំ២០២៥ ក្រុមប្រតិបត្តិការ របស់គណៈបញ្ជាការ ធ្វើការចុះត្រួតពិនិត្យជាក់ស្តែងលើទីតាំងចំនួន២ទីតាំង ស្ថិតក្នុងភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ បន្ទាប់ពីបានធ្វើការស្រាវជ្រាវស៊ើបអង្កេតលើទីតាំង ខាងលើរយៈពេលជាងបីខែកន្លងមក។ អគ្គស្នងការដ្ឋាននគរបាលជាតិបានឱ្យដឹងថា ការឈានទៅបង្ក្រាបទីតាំងទាំងពីរខាងលើនេះ ធ្វើឡើងក្រោមបទបញ្ជា ដ៏ម៉ឺងម៉ាត់បំផុតរបស់ ឯកឧត្តមរអភិសន្តិបណ្ឌិត ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក៏ដូចជាការ ចង្អុលដឹកនាំដោយផ្ទាល់របស់ ឯកឧត្តម នាយឧត្តមសេនីយ៍ អគ្គស្នងការនគរបាលជាតិ។ចំណែក ក្នុងការឆ្មក់ចូលក្នុងទីតាំងខាងលើ សមត្ថកិច្ចបានរកឃើញជនបរទេសសរុបចំនួន ២៣០នាក់ (ស្រី ៦៨នាក់) ក្នុងនោះមានជនជាតិថៃចំនួន ១២៣នាក់ (ស្រី ៥៩នាក់)។ ជនបរទេសទាំងនោះកំពុងសំងំ លាក់ខ្លួនលួចលាក់ធ្វើប្រតិបត្តិការអនឡាញខុសច្បាប់ ដោយមានមេក្លោងជាជនជាតិចិន និងស្ថិតក្នុង ស្ថានភាពរស់នៅធម្មតា ព្រមទាំងទទួលយកការងារខុសច្បាប់ទាំងនោះដោយស្ម័គ្រចិត្ត។បើតាម អគ្គស្នងការដ្ឋាននគរបាលជាតិ ពលរដ្ឋថៃទាំង១២៣នាក់ នគរបាលជាតិកម្ពុជានឹងស្នើសុំកិច្ចសហការជាមួយនគរបាលភូមិន្ទថៃ ដើម្បីមានវិធានការបន្ត ក៏ដូចជាសហការដើម្បីកំណត់មុខសញ្ញាមេក្លោងសំខាន់ដទៃទៀត នឹងឈានទៅ ស្វែងរកចាប់ខ្លួនជនល្មើសជាមេក្លោងយកមកអនុវត្តច្បាប់នៃព្រះរាជាណាចក្រកម្ពុជា។ ចំពោះជនបរទេស ផ្សេងទៀត សមត្ថកិច្ចកំពុងធ្វើការសាកសួរ និងចាត់វិធានតាមច្បាប់នៃព្រះរាជាណាចក្រកម្ពុជា៕

លេខាធិការគណបក្ស នៃគណៈកម្មាធិការមជ្ឈិមបក្សកុម្មុយនីស្តប្រចាំរដ្ឋធានីប៉េកាំង​កោតសរសើរចំពោះការរីកចម្រើនយ៉ាងឆាប់រហ័សលើគ្រប់វិស័យរបស់កម្ពុជា

2025/02/24 03:46:31 pm        210
Facebook Telegram Linkin
នាព្រឹកថ្ងៃទី២៤ ខែកុម្ភៈ ឆ្នាំ២០២៥, សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យ ឯកឧត្តម យីន លី (Yin Li) សមាជិកការិយាល័យនយោបាយមជ្ឈិមបក្សកុម្មុយនីស្តចិន និងជាលេខាធិការគណបក្ស នៃគណៈកម្មាធិការមជ្ឈិមបក្សកុម្មុយនីស្ត ប្រចាំរដ្ឋធានីប៉េកាំង ចូលជួបសម្ដែងការគួរសម និងពិភាក្សាការងារ នៅវិមានសន្ដិភាព។ ក្នុងឱកាសនៃជំនួប, ឯកឧត្តម យីន លី បានកោតសរសើរ និងបង្ហាញនូវចំណាប់អារម្មណ៍ជាខ្លាំងចំពោះការរីកចម្រើនយ៉ាងឆាប់រហ័សលើគ្រប់វិស័យរបស់កម្ពុជា ជាពិសេសការបន្តរក្សាបាននូវសន្ដិភាព,​ ស្ថិរភាពនយោបាយ,​ ការអភិវឌ្ឍសង្គម-សេដ្ឋកិច្ច និងការធ្វើឱ្យប្រសើរឡើងនូវកម្រិតជីវភាពរស់នៅរបស់ប្រជាជន។ ឯកឧត្តមយីន លី បានបង្ហាញនូវជំនឿជឿជាក់ថា ក្រោមការដឹកនាំប្រកបដោយភាពឈ្លាសវៃរបស់សម្ដេចបវរធិបតី, សេដ្ឋកិច្ចកម្ពុជានឹងបន្តរីកចម្រើន​ និងកាន់តែខ្លាំងក្លាថែមទៀត។ ឯកឧត្តមបានវាយតម្លៃខ្ពស់ចំពោះចំណងមិត្តភាពជាប្រពៃណីរវាងប្រទេសទាំងពីរ ក៏ដូចជាភាពរីកចម្រើននៃទំនាក់ទំនងគ្រប់កម្រិត និងកិច្ចសហប្រតិបត្តិការលើគ្រប់វិស័យ​​ ចិន-កម្ពុជា ក្នុងក្របខ័ណ្ឌរដ្ឋ,​ បក្ស និងប្រជាជន។ ជាមួយគ្នានោះ, ឯកឧត្តមបានគោរពជម្រាបជូនសម្ដេចបវរធិបតីថា គោលបំណងនៃដំណើរទស្សនកិច្ចរបស់ឯកឧត្តម​ និង​ គណៈប្រតិភូនាពេលនេះ គឺចូលរួមអនុវត្តឱ្យកាន់តែស៊ីជម្រៅ និងខ្លាំងក្លាថែមទៀតនូវរាល់ការឯកភាពរបស់ថ្នាក់ដឹកនាំកំពូលនៃប្រទេសទាំងពីរ និងការបន្តជំរុញកិច្ចសហប្រតិបត្តិការជាក់ស្ដែង។ ឯកឧត្តមក៏បានគូសបញ្ជាក់ថារដ្ឋធានប៉េកាំងមានបំណងពង្រីកកិច្ចសហប្រតិបត្តិការជាមួយរដ្ឋបាលរាជធានីភ្នំពេញ, រដ្ឋបាលខេត្តសៀមរាប និងបណ្ដារដ្ឋបាលខេត្តផ្សេងទៀត​ ផងដែរ។ ជាការឆ្លើយតប, សម្ដេចបវរធិបតីបានសម្ដែងនូវការពេញចិត្ត និងវាយតម្លៃខ្ពស់ចំពោះភាពរីកចម្រើននៃទំនាក់ទំនងគ្រប់កម្រិត និងកិច្ចហប្រតិបត្តិការលើគ្រប់វិស័យ​កម្ពុជា-ចិន។ សម្ដេចបវរធិបតី ក៏បានអរគុណរដ្ឋាភិបាលចិន ដែលតែងតែជួយគាំទ្រការអភិវឌ្ឍសង្គម-សេដ្ឋកិច្ចកម្ពុជា និងចំពោះវិនិយោគិនចិន ដែលកន្លងមកបានបណ្ដាក់ទុនវិនិយោគជាច្រើន នៅកម្ពុជា រួមមាន ការកសាងហេដ្ឋារចនាសម្ព័ន្ធរូបវ័ន្ត ដូចជា៖ការកសាងផ្លូវល្បឿនលឿន, អាកាសយានដ្ឋានអន្តរជាតិសៀមរាប-អង្គរ និងការអភិវឌ្ឍតំបន់សេដ្ឋកិច្ចពិសេស ជាដើម។ សម្ដេចបវរធិបតី និងឯកឧត្តម យីន លី ក៏បានពិភាក្សាអំពីការបន្តពង្រឹងនិងពង្រីកទំនាក់ទំនង និងកិច្ចសហប្រតិបត្តិការប្រទេសទាំងពីរលើវិស័យសក្ដានុពលជាច្រើនដែលរួមមាន ជាអាទិ៍៖ វិស័យនយោបាយ, សេដ្ឋកិច្ច, ពាណិជ្ជកម្ម, វិនិយោគ, បច្ចេកវិទ្យាឌីជីថល, សិល្បៈ-វប្បធម៌, ទេសចរណ៍, ការផ្លាស់ប្ដូររវាងប្រជាជន និង ប្រជាជន៕

ស្នងការនគរបាលខេត្តកំពតយកចិត្តទុកដាក់ខ្ពស់លើបញ្ហាសោភ័ណភាពក្រុង

2025/02/24 03:41:24 pm        213
Facebook Telegram Linkin
បន្ថែមលើកិច្ចការពារសន្តិសុខសណ្តាប់ជូនប្រជាពលរដ្ឋទូទាំងខេត្ត ក៏ដូចជា​ភ្ញៀវ​ទេសចរ​ពី​ទី​ជិត​ឆ្ងាយ លោកស្នងការនគរបាលខេត្តកំពតបានយកចិត្តទុកដាក់ខ្ពស់លើបញ្ហាអនាម័យ បរិស្ថាន និង​សោភ័ណភាពក្រុងផងដែរ។ជាក់ស្តែងកាលពីរំលងអធ្រាត្រឈានចូលថ្ងៃទី២៤ ខែកុម្ភ: ឆ្នាំ២០២៥ ក្រុមរថយន្ត​ដឹក​ម្នាង​សិលា​បាន​បង្ក​ការ​កំពប់ជ្រុះរាយប៉ាយពាសពេញដងផ្លូវ និងលើស្ពានមិត្តភាពកម្ពុជា-កូរ៉េកំពង់បាយនា​កណ្តាល​ក្រុង​កំពត។ ក្រោយពិនិត្យឃើញសកម្មភាពទាំងនោះតាមរយ:កាមេរ៉ាស្វ័យប្រវត្តិ នៅព្រឹកថ្ងៃ​ដដែលនេះ លោកឧត្តមសេនីយ៍ទោ ម៉ៅ ច័ន្ទមធុរិទ្ធ បានបង្ហោះសារលើ​ផេក​ផ្លូវ​ការ​របស់​ស្នង​ការដ្ឋាននគរបាលខេត្តកំពតមានខ្លឹមសារថា ម្ចាស់រថយន្តទាំងអស់ដែលដឹកម្នាងសិលាឆ្លងកាត់ក្រុងកំពត និងស្ពានកំពង់បាយកាលពីយប់មិញ សូមមកលាងសម្អាតឲ្យបានល្អឡើងវិញ ដើម្បីបញ្ចៀសពីហេតុផល ថាសមត្ថកិច្ចមិនបានជូនដំណឹង។តាមការប្រាប់ឲ្យដឹងពីមន្ត្រីនគរបាលការិយាល័យចរាចរណ៍ផ្លូវគោកប្រចាំប៉ុស្តិ៍២៤ម៉ោងលើ២៤ម៉ោងថា នៅវេលាថ្ងៃត្រង់ថ្ងៃទី២៤ ខែកុម្ភ:នេះ ក្រុមម្ចាស់រថយន្តដឹកម្នាងសិលាបាននាំកម្លាំងកម្មករ និងរថយន្តស៊ីទែនទឹកមកលាងសម្អាតស្របតាមខ្លឹមសារនៃបទបញ្ជារបស់លោកស្នងការរួចរាល់ហើយ។ជាមួយនោះ លោកស្នងការក៏បានបង្ហោះសារបញ្ជាក់ឲ្យដឹងនារសៀលថ្ងៃដដែលផងដែរថា ក្រុមម្ចាស់រថយន្តដែលបានដឹកម្នាងសិលាធ្វើឲ្យជ្រុះនៅដងផ្លូវ និងលើស្ពានកាលពីយប់មិញបានមកលាងសម្អាតរួចរាល់ហើយ។ លោកសូមអរគុណចំពោះកិច្ចសហការនេះ៕

អតិផរណាសូចនាករម៉ាក្រូសេដ្ឋកិច្ចលើមុខទំនិញសំខាន់ៗ បានហក់ឡើងនៅដើមឆ្នាំនេះ

2025/02/24 03:31:11 pm        195
Facebook Telegram Linkin
ធនាគារជាតិនៃកម្ពុជា បង្ហាញពីអតិផរណាសូចនាករម៉ាក្រូសេដ្ឋកិច្ចលើមុខទំនិញសំខាន់ៗ ក្នុងខែមករា ឆ្នាំ២០២៥ មានកម្រិត ៦ ភាគរយ ដែលជាការកើនខ្ពស់ បណ្ដាលមកពីការកើនឡើងថ្លៃក្រុមម្ហូបអាហារ និងភេសជ្ជៈមិនមែនជាតិស្រវឹង និងភោជនីយដ្ឋាន។ធនាគារជាតិនៃកម្ពុជា បានបង្ហាញរបាយការណ៍ពីអតិផរណាជាសូចនាករម៉ាក្រូសេដ្ឋកិច្ចដ៏សំខាន់ៗ លើការតាមដានពីការប្រែ ប្រួលថ្លៃទំនិញ ដែលមានឥទ្ធិពលទៅលើអំណាចទិញរបស់អ្នកប្រើប្រាស់ និងអង្គភាពសេដ្ឋកិច្ចដទៃទៀត ជាក់ស្តេងក្នុងខែ មករា ឆ្នាំ២០២៥ អតិផរណាមានកម្រិត ៦ ភាគរយ ដែលការកើនឡើងនេះបណ្ដាលមកពី ការកើនឡើងថ្លៃក្រុមម្ហូបអាហារ និងភេសជ្ជៈ មិនមែនជាតិស្រវឹង និងភោជនីយដ្ឋាន។ចំពោះមុខទំនិញនៅក្នុងរយៈពេលនេះ ប្រភេទមុខទំនិញមួយចំនួនតូចបានបន្តធ្លាក់ចុះ តែមួយចំនួនផ្សេងទៀតបានបន្តហក់ ឡើងដូចជា៖ ភេសជ្ជៈមានគ្រឿងស្រវឹង និងថ្នាំជក់ ៤ ភាគរយ, ទំនិញ និងសេវាផ្សេងៗ ៤,២ ភាគរយ, ភោជ្ជនីយដ្ឋាន ៥ ភាគរយ, អាហារ និងភេសជ្ជៈមិនមែនជាតិស្រវឹង ៧,៨ ភាគរយ, ការសិក្សា ៤,៨ ភាគរយ, សម្លៀកបំពាក់និងស្បែកជើង ១០,៤ ភាគរយ, ផ្ទះសម្បែង អគ្គិសនី ឧស្ម័ន និងឥន្ធនៈដ៏ទៃទៀត ៣,៩ ភាគរយ, គ្រឿងសង្ហារឹម និងសម្ភារៈប្រើប្រាស់ ៣,៤ ភាគរយ និងក្រៅពីនេះ មុខទំនិញមួយចំនួនមានអតិផរណាទាបសមរម្យ។សូមបញ្ចាក់ថា ទាក់ទិនអតិផរណានេះ នៅក្នុងឆ្នាំ២០២៤ កន្លងមក មានកម្រិត ០,៨ ភាគរយ ខណៈនៅក្នុងឆ្នាំ២០២៣ មាន ២,១ ភាគរយ ដែលជាអត្រាទាបបំផុត ក្នុងរយៈពេលជាងមួយទសវត្សរ៍ចុងក្រោយនេះ។ អតិផរណាទាបនេះ បណ្តាលមកពីការធ្លាក់ថ្លៃប្រេង ឥន្ធនៈ ការថមថយកំណើនថ្លៃម្ហូបអាហារ និងកម្រិតទាបនៃអតិផរណាស្នូល។ ជាមួយគ្នានេះវិធានការបន្ធូរបន្ថយថ្លៃម្ហូបអាហារ និង ប្រេងសាំងរបស់រាជរដ្ឋាភិបាល គួបផ្សំនឹងការឡើងថ្លៃប្រាក់រៀល ក៏ជាការចូលរួមបន្ថយសម្ពាធអតិផរណាផងដែរ៕ អត្ថបទ៖ សុន រ៉ាឌី

ស្ថានីបូមទឹក និងផលិតទឹកស្អាតថ្មី ក្នុងក្រុងកំពង់ចាម សម្រេចការសាងសង់បានជាង៨០% គ្រោងដាក់ឲ្យប្រើប្រាស់នាពេលឆាប់ៗ

2025/02/24 03:15:18 pm        115
Facebook Telegram Linkin
ឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម នៅព្រឹកថ្ងៃចន្ទទី២៤ ខែកុម្ភៈ ឆ្នាំ២០២៥ នេះ បានដឹកនាំក្រុមការងារខេត្ត, មន្ត្រីបច្ចេកទេស, មន្ទីរអង្គភាពជំនាញ, អជ្ញាធរក្រុងកំពង់ចាម និងមន្ត្រីពាក់ព័ន្ធ បានអញ្ជើញចុះពិនិត្យវឌ្ឍនភាពនៃការសាងសង់ ស្ថានីយប្រព័ន្ធទឹកស្អាត ក្នុងក្របខណ្ឌក្រុងកំពង់ចាម ដែលសម្រេចការសាងសង់បានជាង៨០% ដែលគ្រោងនឹងដាក់ឱ្យប្រើប្រាស់នាពេលឆាប់ៗខាងមុខនេះ។គួរបញ្ជាក់ថា វិស័យទឹកស្អាតរបស់រដ្ឋ នៅខេត្តកំពង់ចាម កំពុងធានាបាននូវការផ្គត់ផ្គង់ជូនបងប្អូនប្រជាពលរដ្ឋប្រើប្រាស់គ្រប់គ្រាន់។ ដោយឡែក ស្ថានីយ៍បូមទឹកទឺ២ ក៏ជិតដាក់ដំណើរការឲ្យប្រើប្រាស់ ខណៈស្ថានបូមទឹកទឺ៣ បាននឹងកំពុងសិក្សាបញ្ចប់ផងដែរ។ ក្នុងនោះគម្រោងសិក្សា ៣គម្រោងផ្សេងទៀត បាននឹងកំពុងសិក្សាដូចគ្នា ក្នុងគោលដៅពង្រីកវិសាលភាពផ្គត់ផ្គង់ទឹស្អាត ប្រកបដោយស្តង់ដារ ក្នុងក្របខ័ណ្ឌទូទាំងខេត្តកំពង់ចាម នៅថ្ងៃអនាតដ៏ខ្លី៕

សម្តេចម៉ែនសំអនអញ្ជើញប្រកាសខេត្តស្វាយរៀងបញ្ចប់ការងារវាស់វែងចុះបញ្ជីដីធ្លីមានលក្ខណៈជាប្រព័ន្ធ

2025/02/24 03:01:52 pm        58
Facebook Telegram Linkin
ស្វាយរៀង ៖ សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ និងជាអ្នកតំណាងរាស្ត្រមណ្ឌលស្វាយរៀង នៅថ្ងៃទី២៤ ខែកុម្ភៈ ឆ្នាំ២០២៥នេះបានអញ្ជើញជាអធិបតីប្រកាសខេត្តស្វាយរៀង បញ្ចប់ការងាវាស់វែងចុះបញ្ជីដីធ្លីមានលក្ខណៈជាប្រព័ន្ធ និងពិធីចែកបណ្ណកម្មសិទ្ធដីធ្លីចំនួន ១ម៉ឺន៧ពាន់៧០៨បណ្ណ ជូនដល់ ពលរដ្ឋ ដែលពិធីនេះបនប្រព្រឹត្តធ្វើឡើងនៅវត្តបុសមន ឃុំបុសមន ស្រុករំដួល ខេត្តស្វាយរៀង ។  ឯកឧត្ដម ប៉េង ពោធិ៍សា អភិបាលខេត្តស្វាយរៀង បានអានសុរន្ទកថាស្វាគមន៏ ដោយគូសបញ្ជាក់ថា ខេត្តស្វាយរៀងក្រោមការដឹកនាំរបស់រាជរដ្ឋាភិបាល អឌឹតសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីក្នុងអាណត្តិទី៧ រួមនិងក្រសួង មន្ទីរអង្គភាពពាក់ពន្ធ័ បានចូលរួមអនុវត្តក្នុងកិច្ចការជំនាញផងនោះក្នុងរយះពេលប៉ុន្មានឆ្នាំនេះខេត្តសម្រេចបានលទ្ធផលធំៗចំនួន៣ រួមមានវិស័យអនាម័យជន បទ ត្រូវបានប្រកាសជាខេត្តទី១ បានបញ្ចប់ការបន្ទោបង់ពាសវាលពាសកាល, នៅក្នុងសកម្មភាពការងារបោះសម្អាតមីន ខេត្តត្រូវបានប្រកាសជាខេត្តទី៨ ក្លាយជាខេត្តអស់មីន និង ជាពិសេសសម្រាប់នៅថ្ងៃនេះ នៅក្នុងវិស័យដីធ្លី ក៏ត្រូវបានប្រកាសជាខេត្ត (ទី៣) បញ្ចប់ការវាស់វែងចុះបញ្ជីដីធ្លីមានលក្ខណៈជាប្រព័ន្ធ។   មានប្រសាសន៏សំណេះសំណាលជាឪកាសនោះសម្តេចកិត្តិសង្គហបណ្ឌិត បានថ្លែងអំណរគុណ ឯកឧត្ដម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដីនគរូបនីយកម្មនិងសំណង់ ដែលបានគាំទ្រយ៉ាងពេញលេញក្នុងការដឹកនាំ និងជំរុញដល់អង្គភាពពាក់ព័ន្ធ ជាពិសេស ការខិតខំអនុវត្តការងារនៅមូលដ្ឋានផ្ទាល់របស់មន្រ្តីជំនាញ ប្រកបដោយស្មារតីទទួលខុសត្រូវខ្ពស់ និងធ្វើឲ្យសម្រេចបានជោគជ័យតាមផែនការ ទិសដៅ និងចក្ខុវិស័យដ៏មានសារៈសំខាន់នេះ ស្របតាមកម្មវិធីនយោបាយ និងយុទ្ធសាស្រ្តបញ្ចកោណ ដំណាក់កាលទី១ របស់រាជរដ្ឋាភិបាល ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ជាមគ្គុទេសក៍ដឹកនាំ វ័យក្មេងដ៏ឆ្នើម និងឈ្លាសវៃ បន្តបេសកកម្មដ៏ថ្លៃថ្លាពី សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្តី និងបច្ចុប្បន្នជាប្រធានព្រឹទ្ធសភា ទើបឈានដល់ប្រកាសខេត្តស្វាយរៀងក្នុងការបញ្ចប់ការវាស់វែងដីធ្លីមានលក្ខណៈជាប្រព័ន្ធ និងពិធីចែកបណ្ណកម្មសិទ្ធដីធ្លីជូនប្រជាពលរដ្ឋក្នុងថ្ងៃនេះ។សម្តេចបានបញ្ជាក់បន្តថា ការបញ្ចប់ការងារវាស់វែងដីធ្លី មានលក្ខណៈជាប្រព័ន្ធនឹង បម្រើឧត្តមប្រយោជន៍ របស់ពលរដ្ឋ គ្រប់រូប និងតជំនាន់ ជាមួយគ្នានេះវាជាមូលដ្ឋាន ច្បាប់ដ៏រឹងមាំ ដែលនឹងចូលរួមកាត់បន្ថយ និងបញ្ចប់វិវាទទាំងឡាយ និងចូលរួមបង្កើត បរិយាកាសគ្មានវិវាទសម្រាប់សង្គមជាតិ ដែលជាឫសកែវនៃសុខសន្តិភាព។ ម្យ៉ាងវិញទៀត ការបញ្ចប់ការវាស់វែងដីធ្លី នឹងអនុញ្ញាតឱ្យខេត្តរៀបចំប្លង់ព្រំប្រទល់រដ្ឋបាល និងតាមភូមិសាស្ត្រ ប្លង់ហេដ្ឋារចនាសម្ព័ន្ធ និងទីធ្លាសាធារណៈប្លង់គោលប្រើប្រាស់ដីធ្លី និងពង្រីកកំណើនជីវភាពពលរដ្ឋ ឱ្យកាន់តែប្រសើរឡើង។ ស្ថិតក្នុងបរិយាកាសសប្បាយរីករាយក្នុងពេលមកទទួលបណ្ណ័កម្មសិទ្ធដីធ្លីសម្រាប់ប្រើប្រាស់ក្នុងជីវភាពប្រចាំថ្ងៃតំណាងពលរដ្ឋក្នុងឃុំបុសមន បានមានចំណាប់អារម្មណ៏ដោយគោរពថ្លែងអំណរគុណចំពោះរាជរដ្ឋាភិបាល សម្តេចមហាបវរធិបតី ហ៊ុន ម៉ាណែត ដែលសម្តេចបានគិតគូរការងារវាស់វែងចុះបញ្ជីដីធ្លី និងប្រគល់បណ្ណ័ប្រើប្រាស់អោយមកពួកខ្ញុំនៅពេលនេះជាជាការបញ្ចប់ទំនាស់ ពិសេសប្រើប្រាស់ដីធ្លីគ្មានការព្រួយបារម្មពីការគម្រាមកម្ហែកពីជនមានអំណាចតទៅទៀត ។ សំឡេង សូមបញ្ចាក់ថាស្វាយរៀងជាខេត្តនៅភាគខាងកើត រាជធានី ខេត្តមាន ស្រុក ក្រុងចំនួន៨ មាន៨០ឃុំសង្កាត់ និង៦៩០ភូមិ ពលរដ្ឋរស់នៅបច្ចប្បន្នប្រមាណជាង៦សែននាក់ មុខរបបសំខាន់ធ្វើស្រែចំការ រួមនិងបំរើការងារនៅក្នុងវិសយ័ឧស្សាហកម្មបន្ថែមដើម្បីកែលំអរជីវភាព ។

ក្រសួងពាណិជ្ជកម្មនឹងរៀបចំ «ពិព័រណ៍ផលិតផលខ្មែរ និងបន្លែផ្លែឈើលើកទី១៨» នៅខេត្តសៀមរាបចុងខែកុម្ភៈនេះ

2025/02/24 02:47:05 pm        67
Facebook Telegram Linkin
ក្រសួងពាណិជ្ជកម្ម នឹងរៀបចំ «ពិព័រណ៍ផលិតផលខ្មែរ និងបន្លែផ្លែឈើ លើកទី១៨» នៅបរិវេណសួនហាត់ប្រាណមាត់ស្ទឹងសៀមរាប ខេត្តសៀមរាប ចាប់ពីថ្ងៃទី២៧ ខែកុម្ភៈ ដល់ថ្ងៃទី២ ខែមីនា ឆ្នាំ២០២៥ ក្រោមមូលបទ «បង្កើនតម្លៃបន្ថែមនៃអាជីវកម្មបន្លែផ្លែឈើ»។ព្រឹត្តិការណ៍ពិព័រណ៍នេះ គឺជាឱកាសដ៏ល្អសម្រាប់កសិករ អាជីវករ និងសហគ្រិន ដើម្បី ផ្សព្វផ្សាយ ផលិតផល និងស្វែងរកឱកាសធ្វើអាជីវកម្មថ្មី និងកិច្ចសហការពាណិជ្ជកម្ម។ក្រសួងពាណិជ្ជកម្ម បានគោរពអញ្ជើញ លោក-លោកស្រី ជាអាជីវករ ផលិតករ អ្នកផ្គត់ផ្គង់ អ្នកកែច្នៃ សហគមន៍កសិកម្ម ម្ចាស់កសិដ្ឋាន អ្នកដាំដុះបន្លែផ្លែឈើ និងបងប្អូនប្រជាពលរដ្ឋដែលរស់នៅខេត្តសៀមរាប ចូលរួមទស្សនាពិព័រណ៍ឱ្យបានច្រើនកុះករ និងស្វែងរកឱកាសបង្កើតដៃគូពាណិជ្ជកម្មរវាងសហគមន៍កសិកម្ម ម្ចាស់កសិដ្ឋាន អ្នកដាំដុះបន្លែផ្លែឈើ ជាមួយនឹងអ្នកចែកចាយ អ្នកលក់ដុំ-រាយ អ្នកកែច្នៃ និងម្ចាស់អាជីវកម្មនានា៕

រដ្ឋមន្រ្ដីក្រសួងយុត្តិធម៌អញ្ជើញជាតំណាងរាជរដ្ឋាភិបាលចូលបំភ្លឺលើសេចក្តីព្រាងច្បាប់ស្ដីពីការប្រឆាំងការមិនទទួលស្គាល់ឧក្រិដ្ឋកម្មដែលប្រព្រឹត្តឡើងក្នុងរយៈកាលនៃកម្ពុជាប្រជាធិបតេយ្យដល់ព្រឹទ្ធសភា

2025/02/24 02:41:21 pm        109
Facebook Telegram Linkin
ភ្នំពេញ៖ នៅព្រឹកថ្ងៃ ទី២៤ ខែកុម្ភៈ ឆ្នាំ២០២៥ នេះ, ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្រ្តីក្រសួងយុត្តិធម៌ បានអញ្ជើញជាតំណាងរាជរដ្ឋាភិបាល ដឹកនាំគណៈប្រតិភូដែលមានសមាសភាពពីទីស្តីការគណៈរដ្ឋមន្ត្រី និងក្រសួងយុត្តិធម៌ ចូលរួមកិច្ចប្រជុំជាមួយគណៈកម្មការនីតិកម្ម និងយុត្តិធម៌ និងគណៈកម្មការនានា នៃព្រឹទ្ធសភា ដើម្បីបំភ្លឺលើសេចក្តីព្រាងច្បាប់ចំនួន ២ រួមមាន ៖ (១)-សេចក្ដីព្រាងច្បាប់ស្ដីពីការប្រឆាំងការមិនទទួលស្គាល់ឧក្រិដ្ឋកម្មដែលប្រព្រឹត្តឡើងក្នុងរយៈកាលនៃកម្ពុជាប្រជាធិបតេយ្យ និង (២)-សេចក្ដីព្រាងច្បាប់ស្ដីពីការចាត់ចែងជាបណ្ដោះអាសន្ននូវវត្ថុចាប់យក។កិច្ចប្រជុំនេះត្រូវបានរៀបចំឡើងក្រោមការដឹកនាំដោយលោកជំទាវបណ្ឌិត ចាន់ សុទ្ធាវី ប្រធានគណៈកម្មការនីតិកម្ម និងយុត្តិធម៌ នៃព្រឹទ្ធសភា និងដោយមានការអញ្ជើញចូលរួមពីសំណាក់ ឯកឧត្តម លោកជំទាវ ជាប្រធាន អនុប្រធាន សមាជិក និងសមាជិកា នៃគណៈកម្មការនានានៃព្រឹទ្ធសភា។ ជាលទ្ធផល, អង្គប្រជុំបានឯកភាពទាំងស្រុងចំពោះខ្លឹមសារនៃសេចក្តីព្រាងច្បាប់ទាំង ២ នេះ ដើម្បីដាក់ចូលក្នុងរបៀបវារៈនៃសម័យប្រជុំព្រឹទ្ធសភាជាវិសាមញ្ញ នីតិកាលទី៥ ដើម្បីពិនិត្យ និងអនុម័ត នៅពេលខាងមុខ៕

៣សប្ដាហ៍មកនេះ មន្រ្តីអត្តសញ្ញាណកម្មផ្តល់សេវាជូនពលរដ្ឋ៦ម៉ឺនសេវាទូទាំងប្រទេស

2025/02/24 02:25:36 pm        82
Facebook Telegram Linkin
គិតត្រឹមរយៈពេល៣សប្ដាហ៍ ចាប់ពីថ្ងៃទី១ រហូតដល់ថ្ងៃទី២៣ ខែកុម្ភៈ ឆ្នាំ២០២៥ មន្រ្តីអត្ត​សញ្ញាណកម្មបានបន្តផ្តល់សេវាជូនប្រជាពលរដ្ឋទូទាំងប្រទេសបានចំនួន៦ម៉ឺនសេវា។ នេះបើតាមលោកបណ្ឌិត ទូច សុឃៈ អ្នកនាំពាក្យរងក្រសួងមហាផ្ទៃ។ បើតាមអ្នកនាំពាក្យ សេវាបានផ្តល់ជូនប្រជាពលរដ្ឋនោះរួមមាន លិខិតឆ្លងដែនជាង ២៣.១៨៤ម៉ឺនក្បាល លិខិតធ្វើដំណើរជាង ៣.៥១២ពាន់ក្បាល សៀវភៅស្នាក់នៅជាង ៦.៨៩២ពាន់ក្បាល សៀវភៅគ្រួសារជាង ៥.៥៣៧ពាន់ក្បាល និងអត្តសញ្ញាណប័ណ្ណចំនួនជាង ២១.៥១៦ម៉ឺនសន្លឹក។ ឯកសារអត្តសញ្ញាណកម្ម គឺជាផ្នែកមួយនៃសេវាដែលផ្ដល់ជូនដោយមន្រ្តីថ្នាក់ជាតិ និងថ្នាក់ក្រោមជាតិ នៃក្រសួងមហាផ្ទៃ ដើម្បីផ្តល់ជូនពលរដ្ឋប្រើប្រាស់តាមតម្រូវការ។ សម្ដេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានលើកទឹកចិត្តឱ្យក្រសួងមហាផ្ទៃរិះរកវិធីសាស្រ្តថ្មីៗបន្ថែមទៀតដើម្បីផ្ដល់សេវាទាំងនេះឱ្យកាន់តែប្រសើរជូនពលរដ្ឋ៕

បណ្ដាញសង្គម

ព័ត៌មានថ្មីៗ

កម្ពុជាប្រកាសសម្រេចទម្លាក់កម្រិតការទូតកម្ពុជា-ថៃ ឱ្យមកនៅទាបបំផុតត្រឹមលេខាទី២ហើយតម្រូវឱ្យមន្ត្រីទូតថៃ កែសម្រួលចេញពីកម្ពុជា
07/24/2025 07:07 AM
Facebook Telegram Linkin
អ្នកនាំពាក្យក្រសួងការពារជាតិកម្ពុជាច្រានចោលទាំងស្រុងការចោទប្រកាន់ដោយគ្មានមូលដ្ឋានរបស់ភាគីថៃមកលើកម្ពុជា ពាក់ព័ន្ធនឹងការរងរបួសរបស់ទាហានថៃដោយសារការផ្ទុះគ្រាប់មីន
07/23/2025 10:07 PM
Facebook Telegram Linkin
ឯកឧត្តមសាស្រ្តាចារ្យ ឈាង រ៉ា អញ្ជើញប្រកាសដាក់ឱ្យប្រើប្រាស់នីតិវិធីប្រតិបត្តិស្តង់ដាជាតិ សម្រាប់ប្រព័ន្ធកត់ត្រាជំងឺមហារីក បែបប្រជាសាស្ត្រ
07/23/2025 08:07 PM
Facebook Telegram Linkin
ជំនួយស្បៀងអាហារដល់ពលរដ្ឋនីហ្សេរីយ៉ា ១,៣លាននាក់ ស្ថិតក្នុងហានិភ័យ ដោយសារអស់ស្តុក
07/23/2025 08:07 PM
Facebook Telegram Linkin
ឯកឧត្តម ហេង រតនា៖គ្រាប់មីនដែលទាហានថៃជាន់បណ្តាលឲ្យដាច់ជើងនៅតំបន់មុំបីជាមីនចាស់បើមីនថ្មីមិនត្រឹមតែដាច់ជើងទេគឺអាចដល់ស្លាប់
07/23/2025 08:07 PM
Facebook Telegram Linkin
ម្លប់ ទឹក និងភេសជ្ជៈ ជួយតំបន់បាល់កង់ទប់ទល់នឹងរលកកម្តៅធ្ងន់ធ្ងរនារដូវក្តៅ
07/23/2025 08:07 PM
Facebook Telegram Linkin
គណៈប្រតិភូអ៊ុយក្រែនជួបប្រធានាធិបតីទួរគីលោក Erdogan មុនកិច្ចប្រជុំជាមួយរុស្ស៊ី
07/23/2025 08:07 PM
Facebook Telegram Linkin
អ៊ីតាលី និងអាល់ហ្សេរី ព្រមព្រៀងធ្វើការ ដើម្បីដោះស្រាយបញ្ហាអំពើភេរវកម្ម និងជនអន្តោប្រវេសន៍
07/23/2025 08:07 PM
Facebook Telegram Linkin
EU នឹងដាក់វិធានការតបតលើទំនិញអាមេរិក ដើម្បីបញ្ចៀសការដំឡើងពន្ធ
07/23/2025 08:07 PM
Facebook Telegram Linkin
ទិវាវាយតម្លៃទទួលស្គាល់ គាំទ្រដល់ SME ប្រើប្រាស់សេវាកម្មវាយតម្លៃទទួលស្គាល់ក្នុងដំណើរការអាជីវកម្ម
07/23/2025 08:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.