BTV NEWS

រដ្ឋមន្ត្រីសុខាភិបាល «អ្នកដឹកនាំសុខាភិបាល ស្ថិតនៅជាប់ជានិច្ចជាមួយមន្រ្តីរបស់ខ្លួន ឈរលើគោលដៅសម្រេចឱ្យបានជោគជ័យក្នុងការបម្រើសេវាជូនប្រជាពលរដ្ឋ និងលើកកិត្តិយសវិជ្ជាជីវៈសុខាភិបាលទាំងមូល»

ផ្សារសមាគមខ្មែរកំពុងស្រូបយកផលិតផលកែច្នៃក្នុងស្រុក គាំទ្រដល់ការរីកចម្រើនរបស់សហគ្រិន

រដ្ឋមន្រ្តីសុខាភិបាល «យុទ្ធសាស្ត្រមួយល្អ លុះត្រាតែយុទ្ធសាស្រ្តនោះត្រូវបានយកទៅអនុវត្តជាក់ស្តែងបាន ដេីម្បីសម្រេចគោលដៅតាមការគ្រោងទុក»

ទូតឥណ្ឌូនេស៊ីកោតសរសើរកម្ពុជា ចំពោះការគ្រប់គ្រងវិស័យព័ត៌មាន និង សោតទស្សន៍

ព័ត៌មានជាតិ

ឯកឧត្តម ហេង រតនា អំពាវនាវដល់សមាជិកបក្សទាំងអស់ ត្រូវចូលរួមផ្សព្វផ្សាយគោលនយោបាយរបស់គណបក្សទៅកាន់ប្រជាពលរដ្ឋឱ្យបានគ្រប់គោលដៅ

កណ្តាល៖ ឯកឧត្តម ហេង រតនា អំពាវនាវដល់សមាជិក-សមាជិកាបក្សជាសិក្ខាកាមទាំងអស់ ដែលទើបបញ្ចប់វគ្គដោយជោគជ័យហើយនោះ ត្រូវចូលរួមផ្សព្វផ្សាយគោលនយោបាយរបស់គណបក្សបន្តទៅកាន់ប្រជាពលរដ្ឋឱ្យបានគ្រប់គោលដៅ និង ត្រូវរួមគ្នាខិតខំអូសទាញសមាជិកពីបក្សប្រឆាំងមកបន្ថែមទៀត ដើម្បីគាំទ្រ និងបង្កើនប្រៀបឈ្នះភាពខ្លាំងរបស់គណបក្សប្រជាជនកម្ពុជា បន្តដឹកនាំប្រទេស ជាតិកាន់តែរុងរឿងរីកចម្រើនតរៀងទៅ ក្រោមដំបូលនៃសុខសន្តិភាព ។ឯកឧត្តម ហេង រតនា សមាជិកគណៈកម្មាធិការកណ្តាលគណបក្សប្រជាជនកម្ពុជា អនុប្រធានក្រុមការងារគណ បក្សចុះមូលដ្ឋានខេត្តកណ្តាល និងប្រធានគណៈអចិន្ត្រៃយ៍ក្រុមការងារគណបក្សចុះមូលដ្ឋានស្រុកលើកដែក ថ្លែងក្នុងឱកាសអញ្ជើញជាអធិបតីភាពក្នុងពិធីផ្សព្វផ្សាយខ្លឹមសារលទ្ធផលនៃអង្គសន្និបាតគណៈកម្មាធិការកណ្តាល លើកទី៤៥ អាណត្តិទី៥ របស់គណបក្សប្រជាជនកម្ពុជា និងបិទវគ្គអប់រំនយោបាយ របស់គណៈកម្មាធិការគណបក្សស្រុកលើកដែក ខេត្តកណ្តាល នាព្រឹកថ្ងៃទី២២ ខែកុម្ភៈ ឆ្នាំ២០២៥នេះ នៅទីស្នាក់ការគណបក្សប្រជានកម្ពុជា ស្រុកលើកដែក ។ក្នុងឱកាសនោះដែរ ឯកឧត្តម ហេង រតនា បានថ្លែងកោតសសើរដល់គ្រូឩទ្ទេសដែលបានបណ្តុះបណ្តាល និង បញ្ជ្រៀបឲ្យមានកាយល់ដឹងពីគោល នយោបាយគណបក្យប្រជាជនកម្ពុជាដល់សិក្ខាកាមដែលបានចូលរួមទាំង១២០រូបនោះ។ ឯកឧត្តម ក៏បានអបអរសាទរ ចំពោះវគ្គសិក្សាវគ្គទី១ ជំនាន់ទី៣២ និងវាយតម្លៃខ្ពស់ចំពោះលទ្ធផលសិក្សារបស់មន្រ្តីគណបក្សដែលជាសិក្ខាកាមទាំង១២០រូប ដែលសម្រេចបានយ៉ាងល្អក្នុងវគ្គ។ឯកឧត្តម ហេង រតនា មានប្រសាសន៍បន្ថែមទៀតថា ការរៀនសូត្រក្នុងវគ្គអប់រំនយោបាយរបស់គណបក្ស គឺជាការងារចាំបាច់សម្រាប់មន្ត្រីគណបក្សគ្រប់រូប ព្រោះថា តាមរយៈការរៀនសូត្រនេះ ផ្តល់ឲ្យសិក្ខាកាមនូវចំណេះដឹងលើផ្នែកនយោបាយ សតិអារម្មណ៍ និងចាត់តាំងកាន់តែរឹងមាំឡើង សម្រាប់យកទៅប្រើប្រាស់ក្នុងការអនុវត្តជាក់ស្តែង ទាំងក្នុងការងារកសាងគណបក្ស ទាំងក្នុងការងារជំនាញនៅតាមស្ថាប័ន អង្គភាពរបស់ខ្លួន ក៏ដូចក្នុងការងារពង្រឹងមូលដ្ឋាន ។បើតាមលោក ចាប ច័ន្ទវិទ្យា ប្រធានគណៈកម្មាធិការគណបក្សស្រុកលើកដែក បានឲ្យដឹងថា វគ្គអប់រំនយោបាយមានរយៈពេលចំនួន៣ថ្ងៃ គឺចាប់ពីថ្ងៃទី ២០- ២១-២២ ខែកុម្ភៈ ឆ្នាំ២០២៥ ដែលរួមមានការឧទ្ទេសនាមឯកសារមេរៀន ការពិភាក្សា ការឆ្លើយសំណួរ និងធ្វើតេស្តវាយតម្លៃមុនដំណើរការវត្ត ក្រោយពេលបញ្ចប់វគ្គអប់រំនយោបាយ និងបូកសរុបលទ្ធផលវគ្គ។ រៀបចំវិញ្ញាបនបត្របញ្ជាក់ការសិក្សាសម្រាប់ផ្តល់ជូនសិក្ខាកាមម្នាក់ៗនិង រៀបចំបទបញ្ជាផ្ទៃ ក្នុងសម្រាប់វគ្គ របាយការណ៍ បញ្ជីគ្រប់គ្រងវត្តមានសិក្ខាកាម។លោកបន្តឲ្យដឹងថា សិក្ខាកាមទាំងអស់បានស្វែងយល់ពីកលល្បិចក្រុមអគតិមួយចំនួន ដែលនៅតែបន្តធ្វើសកម្មភាពជាចំហ និង សម្ងាត់តាមគ្រប់មធ្យោបាយធ្វើការឃោសនាបំភ្លៃការពិត ញុះញង់ បញ្ចុះកំហឹងប្រជាជន ប្រើប្រាស់សង្គ្រាមចិត្តសាស្ត្រ ប៉ុនប៉ងធ្វើបដិវត្តពណ៌ផ្តួលរំលំរាជរដ្ឋាភិបាល និងគណបក្សប្រជាជនកម្ពុជា ព្រមទាំងបានឯកភាពគ្នាអំពីទស្សនៈ និងវាយ តម្លៃប្រកបដោយស្មារតីសុទិដ្ឋិនិយមថា រាជរដ្ឋាភិបាលដែលដឹកនាំដោយគណបក្សប្រជាជនកម្ពុជានៅតែបន្តស្ថិតក្នុងឧត្តមភាព និង ប្រៀបខ្លាំងក្នុងការដឹកនាំប្រទេស ជាតិ ការពារសុខសន្តិភាព ស្ថិរភាពនយោបាយធានាបាននូវសុខដុមរមនានៃសង្គមជាតិទាំងមូល ៕ អត្ថបទ,ភារម្យ

ក្រុមការងារចុះមូលដ្ឋានខេត្ដសៀមរាប អំពាវនាវដល់ក្រុមការងារកុំឱ្យក្រុមអគតិបំផ្លាញការអភិវឌ្ឍ និងសេចក្តីសុខប្រជាពលរដ្ឋ

ក្រុមការងារចុះមូលដ្ឋានខេត្ដសៀមរាប បានអំពាវនាវដល់ក្រុមការងារ រួមគ្នាការពារដាច់ខាតនូវសុខសន្តិភាព ស្ថិរភាពនយោបាយ និងសន្តិសុខជាតិ ដែលជាអាយុជីវិតរបស់ជាតិ និងជាគ្រឹះដ៏មានតម្លៃបំផុតសម្រាប់ការអភិវឌ្ឍជាតិ និងភាពសុខសាន្តរបស់ប្រជាជនកម្ពុជាមកដល់សព្វថ្ងៃនេះ កុំឱ្យកម្លាំងអមិត្ត ឬក្រុមជនអគតិណាមកបំផ្លាញបានឡើយ។ឯកឧត្តម ឥត សារ៉ាត់ សមាជិកអចិន្រ្តៃយ៍ គណៈកម្មាធិការកណ្ដាលគណបក្សប្រជាជនកម្ពុជា ជាប្រធានក្រុមការងារចុះមូលដ្ឋានក្រុងសៀមរាប ក្នុងកិច្ចប្រជុំផ្សព្វផ្សាយសេចក្តីជូនដំណឹង ស្តីពីលទ្ធផលនៃសន្និបាតគណៈកម្មាធិការកណ្តាលលើកទី៤៥ អាណត្តិទី៥ របស់គណបក្សប្រជាជនកម្ពុជា នៅខេត្តសៀមរាប នាថ្ងៃទី២២ ខែកុម្ភៈ ឆ្នាំ២០២៥នេះ។ឯកឧត្តម បានគូសបញ្ជាក់ថា តាមរយៈអង្គសន្និបាតរបស់គណបក្សប្រជាជនកម្ពុជា កាលពីពេលថ្មីៗកន្លងទៅ បានបង្ហាញនូវសមិទ្ធផលធំជាច្រើនដែលថ្នាក់ដឹកនាំគ្រប់លំដាប់ថ្នាក់ សមាជិកសមាជិកានៅទូទាំងប្រទេស សម្រចបានកន្លងមក ព្រមទាំងដាក់ចេញទិសដៅបន្តទៅមុខ ដោយមានការគិតគូរពីស្ថានភាពបរិយាកាសសង្គម សេដ្ឋកិច្ច នយោបាយ ទាំងក្នុងប្រទេស និងអន្តរជាតិ។ តាមរយៈអង្គសន្និបាតនោះដែរ ក៏បានវាយតម្លៃទៅលើចំណុចខ្លាំង និងចំណុចខ្សោយដែលត្រូវខិតខំប្រឹងប្រែងធ្វើឱ្យប្រសើរឡើងក្នុងបេសកកម្មបម្រើប្រទេសជាតិ និងប្រជាជន។ គោលជំហរ និងបេសកកម្មរបស់គណបក្សប្រជាជនកម្ពុជា គឺគណបក្សប្រជាជនកម្ពុជា ជារបស់ប្រជាជន ដោយសារប្រជាជន ដើម្បីប្រជាជន។ក្នុងឱកាសនេះដែរ ឯកឧត្តម ក៏សូមថ្លែងការកោតសសើរ និងវាយតម្លៃខ្ពស់ ចំពោះកិច្ចខិតខំប្រឹងប្រែងក្នុងការអនុវត្តការងារទាំងអស់ ដែលបានបំពេញតួនាទី ភារកិច្ចរបស់ខ្លួន ប្រកបដោយការយកចិត្តទុកដាក់ និងការទទួលខុសត្រូវខ្ពស់ រហូតសម្រេចបាននូវសមិទ្ធផលនានាជាច្រើនគួរឱ្យកត់សម្គាល់។ ទន្ទឹមនេះ ឯកឧត្តមបានជំរុញ លើកទឹកចិត្តឱ្យគណៈកម្មាធិការគណបក្សខេត្ត ដកស្រង់អនុសាសន៍របស់ថ្នាក់ដឹកនាំ ដើម្បីយកទៅសិក្សា និងអនុវត្តបំពេញបន្ថែម ដើម្បីពង្រឹង និងពង្រីកភាពរីកចម្រើនក្នុងមូលដ្ឋាន។ឯកឧត្តមប្រធានក្រុមការងារ ក៏សូមអំពាវនាវដល់បងប្អូនជនរួមជាតិទាំងមូល សូមបន្តរួមសាមគ្គីគ្នាជាធ្លុងមួយ ដើម្បីសម្រេចសមិទ្ធផលធំៗថ្មីៗទៀត ក្នុងការកសាង និងការពារមាតុភូមិកម្ពុជា ឆ្ពោះទៅរកអនាគតដ៏រុងរឿងលើមាគ៌ា សន្តិភាព ប្រជាធិបតេយ្យ នីតិរដ្ឋ និងអភិវឌ្ឍន៍៕

ប្រជាកសិករសប្បាយចិត្ត និងអរគុណរាជរដ្ឋាភិបាល ពេលពួកគាត់ធ្វើស្រែបាន៣លើក និងទទួលទិន្នផលខ្ពស់

កំពង់ឆ្នាំង៖ ប្រជាកសិករក្នុងឃុំកោះថ្កូវ ស្រុកជលគីរី ខេត្តកំពង់ឆ្នាំង នៅថ្ងៃទី២២ ខែកុម្ភៈ ឆ្នាំ២០២៥នេះ បានសំដែងការសប្បាយរីករាយ និងអរគុណដល់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃរាជរដ្ឋាភិបាលកម្ពុជា ក្រុមការងាររាជរដ្ឋាភិបាលចុះមូលដ្ឋានខេត្តកំពង់ឆ្នាំង ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង ក្រសួងមន្ទីរធនធានទឹក និងកសិកម្ម ដែលបានចុះពិនិត្យ ផ្តល់នូវបច្ចេកទេស និងជួយជីកប្រឡាយខ្វាត់ខ្វែង នាំទឹកពីទន្លេសាប ស្រោចស្រពនៅលើដីស្រែប្រាំងពួកគាត់រហូតដល់ជាង៧ពាន់ហិកតា បានធ្វើស្រែរហូតដល់២ដងទៅ៣ដងក្នុង១ឆ្នាំ និងទទួលទិន្នផលចាប់ពី៦ទៅ៨តោនក្នុង១ហិកតា។ ប្រជាកសិករ បានបន្តថា៖ សព្វថ្ងៃដោយសារកត្តាសុខសន្តិភាព និងសន្តិសុខនៅតាមមូលដ្ឋានមិនមានបញ្ហាអ្វីនោះ នាំអោយប្រជាជនតាមភូមិឃុំរស់នៅដោយក្តីសុខសាន្ត ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី ។ នៅក្នុងស្រុកជលគីរី ឃុំកោះថ្កូវ គឺជាឃុំមួយដែលប្រជាជនបានប្រកបមុខរបរធ្វើស្រែប្រាំងច្រើនជាងគេរហូតដល់ជាង៩០% និងមិនសូវមានអ្នកចំណាកស្រុកឡើយ ។ ឆ្នាំនេះ ក៏ដូចជាឆ្នាំមុនៗ ប្រជាកសិករក្នុងឃុំ បានធ្វើស្រែប្រាំងប្រមូលផលលើកទី១ និងលើកទី២រួចហើយ តែនៅក្នុងខែកុម្ភៈនេះ បងប្អូនប្រជាកសិករយើងចំនួនជាង៤៥% កំពុងសាបព្រួស និងខ្លះកំពុងប្រមូលផលស្រូវប្រាំងជាបន្តបន្ទាប់ ដោយមិនគិតខ្វល់ពីការខ្វះទឹកធ្វើស្រែនោះឡើយ។ នៅក្នុងឃុំកោះថ្កូវនេះ ប្រជាជនប្រមាណ៩៥%មានជីវភាពធូរធារដោយសារស្រូវប្រាំង ខ្លះបានសង់ផ្ទះថ្មីៗប្រដេញគ្នា ខ្លះទិញរថយន្តដឹកស្រូវ ខ្លះទិញម៉ូតូ ឡានតូចជិះសឹងគ្រប់ផ្ទះ។ ដោយឡែកឧបករណ៍ធ្វើស្រែប្រាំងវិញ មានគោយន្តកន្ត្រៃ មានម៉ាស៊ីនបូមទឹកគ្រប់គ្នា មានត្រាក់ទ័រ ម៉ាស៊ីនព្រួសគ្រាប់ស្រូវ និងម៉ាស៊ីនច្រូតស្រូវជាដើម ។ ពួកគាត់បានថ្លែងអំណរគុណដល់សម្តេច ហ៊ុន សែន ប្រធានព្រឹទ្ធសភា ដែលបានជួយប្រជាពលរដ្ឋពីបាតដៃទទេរហូតមានអ្វីៗគ្រប់យ៉ាង និងសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាដែលបានបន្តផ្តល់នូវការផ្គត់ផ្គង់ជាប្រឡាយខ្វាត់ខ្វែង និងបារម្ភប្រជាកសិករគ្រប់វិនាទីបែបនេះ ។ លោក ប៊ុន សុផាន មេឃុំកោះថ្កូវ ស្រុកជលគីរី បានថ្លែងថា៖ ប្រជាកសិករប្រមាណជាង៩៥%ក្នុងឃុំ បានធ្វើស្រែប្រាំង ពួកគាត់មានត្រាក់ទ័រផ្ទាល់ខ្លួនជាង៣០គ្រឿង និងម៉ាស៊ីនច្រូត១០គ្រឿង រួមនិងម៉ាស៊ីនបូមទឹកតូចៗគ្រប់គ្នាទៀតផង ។ ដោយឡែកម៉ាស៊ីនបូមទឹករបស់សហគមន៍ និងម៉ាស៊ីនបូមទឹករបស់ខាងមន្ទីរធនធានទឹក រួមនិងមន្ទីរកសិកម្ម គឺនៅប្រចាំការបូមទឹកបញ្ចូលប្រឡាយ និងស្រូវពួកគាត់ជារៀងរាល់ថ្ងៃ ។ ការខិតខំរបស់ប្រជាកសិករក្នុងឃុំ និងការជួយជ្រោមជ្រែងពីរដ្ឋបាលឃុំស្រុកខេត្ត ក្រុមការងាររាជរដ្ឋាភិបាលចុះមូលដ្ឋាន និងពីរាជរដ្ឋាភិបាលកម្ពុជា ធ្វើអោយជីវភាពរបស់ពួកគាត់បានធូរធារយ៉ាងច្រើន មិនចាញ់អ្នកទីក្រុងនោះឡើយ ។ ជីវភាពប្រជាកសិករនៅក្នុងឃុំកោះថ្កូវបានរីកចម្រើនពី១ឆ្នាំទៅ១ឆ្នាំ មិនសូវមានអ្នកចំណាកស្រុកឡើយ មានតែអ្នកទៅធ្វើការនៅរោងចក្រក្នុងខេត្ត និងអ្នកធ្វើស្រែតែប៉ុណ្ណោះ ដែលកត្តាទាំងនេះដោយសារការជួយជ្រោមជ្រែងលើប្រព័ន្ធធារាសាស្ត្រពីរាជរដ្ឋាភិបាលកម្ពុជា ៕ កាំង ហុងវាស្នា

រដ្ឋមន្រ្តីកសិកម្មជួបវិស័យឯកជនស្រូវអង្ករ ដេីម្បីស្វែងរកផលចំណេញដល់កសិករ

ភ្នំពេញ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងថ្នាក់ដឹកនាំ បានទទួលជួបសម្តែងការគួរសម និងពិភាក្សាការងារជាមួយក្រុមហ៊ុន OLAM International Limited នៅទីស្តីការក្រសួង នាព្រឹកថ្ងៃទី២១ ខែកុម្ភៈ ឆ្នាំ២០២៥។ ក្រោយចប់ជំនួបការងារនេះ ក្រសួងកសិកម្ម រុក្ខាប្រមាញ់ និងនេសាទ បានឲ្យដឹងក្រុមហ៊ុនខាងលេីនេះ ជាក្រុមហ៊ុនពាណិជ្ជកម្មស្រូវអង្ករខ្នាតអន្តរជាតិ ហេីយគោលបំណងនៃជំនួបនេះ គឺចង់ជួយសម្រួលទីផ្សារស្រូវអង្ករក្នុងប្រទេសកម្ពុជា ជួយកាត់បន្ថយថ្លៃដេីមផលិត បង្កេីនប្រាក់ចំនេញ និងថ្លៃកសិផលជូនប្រជាកសិករ។ការប្រជុំនេះ មានគោលដៅក្នុងការកំណត់ពីរបៀបរបបនៃការផលិតដេីម្បីទទួលបានតម្លៃបន្ថែមខ្ពស់ កាត់បន្ថយការប្រេីប្រាស់ធាតុចូលកសិកម្ម ផលិតកម្មមានគុណភាពខ្ពស់ ធានាទីផ្សារចេញពីការអនុវត្តកសិកម្មល្អ (GAP)។ លេីសពីនេះ ការអនុវត្តកសិកម្មល្អទ្រង់ទ្រាយធំ បានបម្រេីផលប្រយោជន៍ជាច្រេីនដល់កសិករ ក្នុងរៀបចំសហគមន៍កសិកម្មទំនេីប ទទួលបានបច្ចេកទេសទំនេីបៗ កាត់បន្ថយការបំភាយកាបូន និងទទួលបានប្រាក់ចំនេញខ្ពស់។ជាទីបញ្ចប់ ឯកឧត្តមរដ្ឋមន្ត្រី បានគូសបញ្ជាក់ថា ការងារនេះមានការសហការជាមួយដៃគូអភិវឌ្ឍន៍នានាដូចជា ស្ថានទូតអាល្លឺម៉ង់ អង្គការ(GIZ) ហេីយគម្រោងនឹងរៀបចំជាសហគមន៍ធំធ្វេីស្រែគំរូ ដោយអនុវត្តវិធីសាស្រ្តការអនុវត្តកសិកម្មល្អ និងកាត់បន្ថយការប្រេីប្រាស់ធាតុចូលកសិកម្ម៕អត្ថបទ ឈិត បូរ៉ាវី

ប្រជាពលរដ្ឋជាង៤០០០គ្រួសារ នៅខេត្តឧត្ដរមានជ័យ ទទួលសេវាព្យាបាលជំងឺដោយឥតគិតថ្លៃ

នៅព្រឹកថ្ងៃទី២២ ខែកុម្ភៈ ឆ្នាំ២០២៥នេះ ប្រជាពលរដ្ឋប្រមាណជាង ៤០០០គ្រួសារ អញ្ជើញមកទទួលសេវាពិនិត្យ និងព្យាបាលជំងឺទូទៅ ដោយឥតគិតថ្លៃ ពីក្រុមគ្រូពេទ្យស្ម័គ្រចិត្ត (TYDA) ដឹកនាំដោយលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អនុប្រធានក្រុមប្រឹក្សាភិបាល នៃសមាគមគ្រូពេទ្យស្ម័គ្រចិត្តយុវជសម្តេចតេជោ ស្ថិតនៅឃុំចុងកាល់ ស្រុកចុងកាល់ ខេត្តឧត្តរមានជ័យ ក្នុងវិទ្យាល័យ ហ៊ុន សែន ចុងកាល់។មានប្រសាសន៍សំណេះសំណាល មុនពិនិត្យ និង ព្យាបាល ជូនប្រជាពលរដ្ឋ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អនុប្រធានក្រុមប្រឹក្សាភិបាលសមាគមគ្រូពេទ្យស្ម័គ្រចិត្ត យុវជនសម្តេចតេជោ បានពាំនាំប្រសាសន៍ផ្តាំផ្ញើសួរសុខទុក្ខ ពីសំណាក់សម្តេចតេជោ ហ៊ុនសែន សម្តេចកិត្តិព្រឹទ្ធ ប៊ុន រ៉ានី ហ៊ុនសែន និង សម្តចធិបតី ហ៊ុន ម៉ាណែត ជូនចំពោះប្រជាពលរដ្ឋទាំងអស់ដែលមកទទួលសេវានាឱកាសនេះ។លោកជំទាវបណ្ឌិត បានឱ្យដឹងថា នេះជាលើក១ហើយ សម្រាប់ការដឹកនាំក្រុមគ្រូពេទ្យចុះមកព្យាបាល ជូនប្រជាលពលរដ្ឋនៅខេត្តឧត្តរមានជ័យ ។ លោកជំទាវបន្តថា នៅក្នុងអាណ្ណត្តិថ្មីនេះ សម្តេចធិបតី ហ៊ុន ម៉ាណែត បានយកចិត្តទុកដាក់ និងជម្រុញវិស័យសុខាភិបាល ផ្នែក ICU ក្នុងការព្យាលជំងឺជូនប្រជាពលរដ្ឋ ទៅដល់ ភូមិ ឃុំ របស់ពួកគាត់។ជាក់ស្តែង ដូចក្នុងឱកាសនេះ លោកជំទាវបានដឹកនាំក្រុមគ្រូពេទ្យជំនាញជាង៤០០នាក់ ចុះមកព្យាបាលជូន លោកយាយ លោកតា អ៊ុំពូមីងប្រកបដោយស្នាមញញឹម។ ម្យ៉ាងតំបន់នេះធ្លាប់ជាកន្លែងសមរភូមិដ៏ក្តៅគកុក សំបូរទៅអតីតយុជន ដែលរាជរដ្ឋភិបាលតែងតែយកចិត្តទុកដាក់ចំពោះពួកគាត់ អ្វីដែលរឹតតែពិសេសនោះគឺបានចូលរួមកាត់ការចំណាយរបស់បងប្អូនមួយចំណែកទៀតផង។លោកជំទាវ បានបន្ថែមទៀតថា ការចុះមកព្យាបាលនាថ្ងៃនេះរួមមានជំងឺទូទៅ ជំងឺមាត់ធ្មេញ ពិនិត្យអេកូនិងរោគស្រ្តី ជំងឺបេះដូង ជំងឺភ្នែក វះកាត់តូច ជំងឺឫសដូងបាត ជំងឺសន្លាក់ ជំងឺសើស្បែក ជំងឺត្រចៀក ច្រមុះ បំពង់ក ថតកាំរស្មី ពិនិត្យឈាម ហើយបើមានអ្នកជំងឺណាមានអាការៈធ្ងន់ធ្ងរ និងបញ្ជូនទៅព្យាបាលបន្តនៅភ្នំពេញ ក្រោមការឧបត្ថម្ភទាំងស្រុងពីសម្តេចធិបតី ហ៊ុន ម៉ាណែត និងលោកជំទាវបណ្ឌិត។ប្រជាពលរដ្ឋដែលអញ្ជើញមកទទួលសេវាពិនិត្យ និងព្យាបាលសុខភាពនាឱកាសនេះ បានសម្តែងនូវក្តីសប្បាយរីករាយ និងគោរពថ្លែងអំណរគុណជាអនេកចំពោះ លោកជំទាវបណ្ឌិត និង សម្តេចទាំងបី ក្នុងការផ្តល់ឱកាសដ៏វិសេសវិសាល ចុះមកព្យាបាលជំងឺជូនពួកគាត់ ដោយមិនគិតថវិកាអ្វីទាំងអស់ ថែមទាំងយកចិត្តដាក់ក្នុងព្យាបាលថែមទៀតផង។ដោយឃើញពីកាយវិកាដ៏មនុស្សធម៌របស់លោកជំទាវបណ្ឌិត និងក្រុមគ្រូពេទ្យទាំងអស់ខិតខំចំណាយ កម្លាំងកាយចិត្ត ចុះមកព្យាបាលជំងឺជូនប្រជាពលរដ្ឋដោយមិនគិតអ្វីទាំងអស់ ឯកឧត្តម មាន ចាន់យ៉ាដា អភិបាល នៃគណះអភិបាលខេត្តឧត្តរមានជ័យ តំណាងប្រជាពលរដ្ឋក្នុងខេត្តទាំងមូល សូមគោរពថ្លែងអំណរគុណយ៉ាងជ្រាលជ្រៅចំពោះ លោកជំទាវ និងក្រុមគ្រូពេទ្យអស់។ ឯកឧត្តមអភិបាលខេត្តឧត្តរមានជ័យ បានបន្តថា ការព្យាបាលជំងឺដោយមិនគិតថ្លៃនេះ គឺបានចូលរួមកាត់បន្ថយភាពក្រីក្ររបស់ប្រជាពលរដ្ឋនៅតំបន់នេះ បានមួយចំណែកទៀតដែរ។សូមបញ្ជាក់ផងដែរថា ក្នុងឱកាសនោះដែរ ក្រៅពីការពិនិត្យនិងព្យាបាលជំងឺ លោកជំទាវបណ្ឌិតក៏បានចែកកាបូបស្ពាយដល់ក្មួយៗសិស្សានុសិស្សប្រមាណជិត2០០នាក់ផងដែរ ដែលជាអំណោយដ៏ថ្លៃថ្លារបស់សម្ដេចតេជោ ហ៊ុន សែន និងសម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន រួមជាមួយសម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិតផ្ទាល់៕ អត្ថបទ៖ សំ ងីម

រដ្ឋមន្ត្រីក្រសួងសុខាភិបាល បានអញ្ជើញជាអធិបតីបើកទិវាវេជ្ជសាស្ត្រកុមារលើកទី២៧

ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានអញ្ជើញជាអធិបតីក្នុងពិធីបើកទិវាវេជ្ជសាស្រ្តកុមារលើកទី២៧ ឆ្នាំ២០២៥ (27th Cambodian Pediatric Symposium) ដែលមានការអញ្ជើញចូលរួម ឯកឧត្តម លោកជំទាវថ្នាក់ដឹកនាំក្រសួង លោក លោកស្រី សមាជិក សមាជិកា សមាគមគ្រូពេទ្យកុមារកម្ពុជា, នាព្រឹកថ្ងៃទី២២ ខែកុម្ភៈ ឆ្នាំ២០២៥នេះ។ទិវាវេជ្ជសាស្រ្តកុមារ រៀបចំឡើងក្នុងគោលដៅ ដោយផ្តោតលើការបណ្តុះបណ្តាល បំពាក់បំប៉នសមត្ថភាពជាប្រចាំ ដល់គ្រូពេទ្យកុមារទូទាំងប្រទេស ដើម្បីផ្តល់លទ្ធភាពឱ្យគ្រូពេទ្យកុមារទាំងអស់ ឱ្យមានសមត្ថភាពគ្រប់គ្រាន់ និងក្រមសីលធម៌វិជ្ជាជីវៈខ្ពស់ ក្នុងការផ្តល់សេវាថែទាំកុមារៗ ប្រកបដោយប្រសិទ្ធភាព សុវត្ថិភាព ស្របតាមគោលនយោបាយរបស់ក្រសួងសុខាភិបាល និងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា ដើម្បីឈានទៅការគ្របដណ្តប់សុខភាពជាសកលនាឆ្នាំ២០៣៥។ ឆ្លៀតក្នុងឱកាសនេះ ឯកឧត្តមសាស្រ្តាចារ្យរដ្ឋមន្រ្តី សមាគមត្រូវបង្កើនការងារបណ្តុះបណ្តាលបន្ត ចំពោះគ្រូពេទ្យកុមារ ឱ្យមាននិរន្តរភាពតទៅទៀត ដែលជាគន្លឹះស្នូល នៃការពង្រឹងសមត្ថភាពរបស់គ្រូពេទ្យ។ ឯកឧត្តមសាស្រ្តាចារ្យ គាំទ្រឱ្យមានសកម្មភាពចុះបណ្តុះបណ្តាល របស់សមាគមគ្រូពេទ្យកុមារកម្ពុជា នៅតាមតំបន់ និងតាមបណ្តាខេត្តនានា ដោយផ្តោតលើការបណ្តុះបណ្តាល ផ្នែកទ្រឹស្តី ក្នុងការព្យាបាលថែទាំកុមារ ព្រមទាំងការណែនាំអនុវត្តផ្ទាល់ដល់ក្រុមគ្រូពេទ្យ និងបុគ្គលិកផ្នែកកុមារនៅតាមផ្នែកព្យាបាលកុមារនៃមន្ទីរពេទ្យស្រុក និងខេត្ត។ ការផ្តល់លទ្ធភាពដល់គ្រូពេទ្យកុមារ និងបុគ្គលិកថែទាំផ្នែកកុមារនៅតំបន់ឆ្ងាយៗ ដើម្បីមកធ្វើវិក្រឹត្យការពង្រឹងសមត្ថភាពបន្ថែមនៅតាមមន្ទីរពេទ្យកុមារថ្នាក់ជាតិធំៗ ដូចជាមន្ទីរពេទ្យគុន្ធបុប្ផា និងមន្ទីរពេទ្យកុមារជាតិ ជាដើម។ សូមគាំទ្រដល់សមាគមគ្រូពេទ្យកុមារកម្ពុជា ដែលបានចូលរួមសហការជាមួយ កម្មវិធីជាតិប្រយុទ្ធជំងឺគ្រុនឈាម នៃមជ្ឈមណ្ឌលជាតិប្រយុទ្ធជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ ក្នុងការបណ្តុះបណ្តាលផ្តោតលើការធ្វើរោគវិនិច្ឆ័យ និងការព្យាបាលនានា រាល់ពេលរាតត្បាតដោយជំងឺគ្រុនឈាមកន្លងមក។ ការងាររបស់សមាគមបានធ្វើកន្លងមក គឺពិតជាការងារដ៏សំខាន់ ដែលបានចូលរួមយ៉ាងសកម្ម ស្របតាមគោលនយោបាយរបស់ក្រសួងសុខាភិបាល ពោលគឺ ក្នុងគោលបំណងពង្រឹងនូវសមត្ថភាពវិជ្ជាជីវៈ ផ្នែកវេជ្ជសាស្ត្រកុមារ ក្នុងការផ្តល់នូវសេវាជូនប្រជាជន ដែលមានកុមារតូចៗ ប្រកបដោយគុណភាព ប្រសិទ្ធភាព ស័ក្តិសិទ្ធភាព និងសុវត្ថិភាព ដោយត្រូវចូលរួម ក្នុងការពង្រឹងនូវសុខុមាលភាពកុមារ និងកាត់បន្ថយនូវអត្រាឈឺ និងស្លាប់របស់កុមារ ទារក ដែលជាគោលដៅចម្បងមួយ ក្នុងចំណោមគោលដៅចម្បងៗ របស់ក្រសួងសុខាភិបាល ស្របតាមគោលនយោបាយអាទិភាពទាំង៦ ក្នុងនោះអាទិភាពទី១ របស់រាជរដ្ឋាភិបាល ក្នុងការពង្រីកសេវាថែទាំសុខភាព ឆ្ពោះទៅរកការគ្របដណ្តប់សុខភាពជាសកល ក្រោមការដឹកនាំប្រកបដោយភាពស្វាហាប់ បុរេសកម្ម រស់រវើក និងគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា។ជាចុងក្រោយ ឯកឧត្តមសាស្ត្រាចារ្យ ឈាង រ៉ា សង្ឃឹមយ៉ាងមុតមាំថា ការរៀបចំទិវាវេជ្ជសាស្ត្រកុមារនៅថ្ងៃនេះ នឹងផ្តល់នូវចំណេះដឹងថ្មីៗ និងព័ត៌មានថ្មីៗ ព្រមទាំងពិធីសារថ្មីៗក្នុងការគ្រប់គ្រងព្យាបាលនៃជំងឺកុមារ បន្តឱ្យមាននិរន្តរភាពការរៀបចំជារៀងតទៅទៀត។ ឯកឧត្តមសាស្រ្តាចារ្យ ណែនាំដល់មន្រ្តីសុខាភិបាល និងសមាគមទាំងអស់ សូមឱ្យមានការសហការគ្នាឱ្យបានល្អ ដោយត្រូវចេះសាមគ្គី យោគយល់ និងចេះចែករំលែកនូវចំណេះដឹង បទពិសោធន៍រវាងគ្នានិងគ្នា ក្នុងស្មារតីគោរព និងអនុវត្តឱ្យបានខ្ជាប់ខ្ជួននូវក្រមសីលធម៌វិជ្ជាជីវៈខ្ពស់ ដោយចាត់ទុកអ្នកជំងឺ ដូចជាសមាជិកគ្រួសារយើងដែរ៕អត្ថបទ រដ្ឋា

វិស័យឯកជនកំពុងចូលរួមចំណែកលើការទាក់ទាញវិនិយោគិនបរទេសមកបណ្តាក់ទុននៅកម្ពុជា

វិនិយោគិនបរទេសជាច្រើនបានកំពុងងាកមកកម្ពុជា តាមរយៈការទំនាក់ទំនងសភាពាណិជ្ជកម្មកម្ពុជា និងតាមបណ្តាញក្រុមហ៊ុន សហគ្រាសជាដៃគូរផ្សេងៗ លើលទ្ធភាពនៃការវិនិយោគនៅកម្ពុជានៅព្រះរាជាណាចក្រកម្ពុជា។ឧកញ៉ា គួច ផេង អនុប្រធានសភាពាណិជ្ជកម្មកម្ពុជា លើកឡើងក្នុងកិច្ចសម្ភាសន៍ជាមួយសារពើរព័ត៌មាន នៅក្នុងសិក្ខាសាលា ស្តីពីលក្ខខណ្ឌតម្រូវនិងកិច្ចសម្រួលពាណិជ្ជកម្មនាំចេញទៅសាធារណរដ្ឋប្រជាមានិតចិន ថ្មីៗនេះថា ការវិនិយោគនៅកម្ពុជា បច្ចុប្បន្ន មានលំហូរកាន់តែច្រើន ក្នុងនោះវិនិយោគិនបរទេសរដែលឈានមុខគេ គឺមកពីប្រទេសចិន ក្រៅពីនេះកម្ពុជាទទួលបានវិនិយោគិនមក ពីតំបន់ផ្សេងៗដូចជា មកពីអឺរ៉ុប អាមេរិក និងអាស៊ីជាដើម ហើយការវិនិយោគមិនត្រឹមតែវិនិយោគនៅលើកាត់ដេរ និងសម្លៀកបំពាក់ ប៉ុណ្ណឹងនោះទេ បច្ចុប្បន្នកម្ពុជាទទួលបានការវិនិយោគស្ទើរគ្រប់វិស័យ និងជាវិស័យមានសក្តានុពល គាំទ្រដល់ការនាំចេញ ការបង្កើត ការងារក្នុងស្រុក និងជួយដល់កំណើនសេដ្ឋកិច្ចជាតិជាដើម។ឧកញ៉ា គួច ផេង បន្តថា ជុំវិញការទាក់ទាញវិនិយោគនេះ ឃើញថា រាជរដ្ឋាភិបាលបានខិតខំប្រឹងប្រែងយ៉ាងខ្លាំង និងការកែ ទម្រង់ដ៏មុតស្រួចនានា សំដៅទាក់ទាញអ្នកវិនិយោគ ក្រោមបរិយាកាសអំណោយផលគ្រប់បែបយ៉ាង ក្នុងនោះសភាពាណិជ្ជកម្មកម្ពុជា ក៏ជាផ្នែកមួយនៃការចូលរួមចំណែកលើការកៀងគរវិនិយោគិនបទេសផងដែរ តាមរយៈការទំនាក់ទំនងផ្សេងៗ ជាពិសេសសភាពាណិជ្ជ កម្មកម្ពុជា ក៏បានបង្កើតសាខាសភាពាណិជ្ជកម្មនៅតាមបណ្តាប្រទេសមួយចំនួន ដែលជាចលករដ៏សំខាន់ លើការផ្តល់ព័ត៌មានឱ្យ បានគ្រប់ជ្រុងជ្រោយ សម្រាប់ការនាំចេញ ការស្វែងរកដៃគូរពាណិជ្ជកម្ម និងការវិនិយោគដើម។សូមបញ្ជាក់ថា ជុំវិញឱកាសវិនិយោគនេះ រាជរដ្ឋាភិបាលកម្ពុជាក្រោមការដឹកនាំប្រកបដោយភាពស្វាហាប់ និងប៉ិនប្រសព្វរបស់សម្តេចបរវធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា សម្តេចបានខិតខំប្រឹងប្រែងយ៉ាងខ្លាំង ដើម្បីទាក់ទាញ អ្នកវិនិយោគឱ្យបណ្តាក់ទុននៅកម្ពុជា, សម្តេចបានដើរគោះទ្វារនៅតាមបណ្តាប្រទេសមួយចំនួន ការទាក់ម៉ូយ និងការកែទម្រង់ដ៏មុត ស្រួចនានាជាដើម ក្នុងគោលបំណងស្វែងរកការងារថ្មីៗជូនប្រជាពលរដ្ឋ, ជាក់ស្តែងនៅក្នុងឆ្នាំ២០២៤ កន្លងមក ក្រុមប្រឹក្សាអភិវឌ្ឍន៍ កម្ពុជា បានអនុម័តគម្រោងវិនិយោគសរុបមានចំនួន ៤១៤ គម្រោង មានទុនវិនិយោគសរុបប្រមាណ ៦,៩ ពាន់លានដុល្លារអាមេរិក និងអាចបង្កើតការងារបានប្រមាណជិត ៣២ ម៉ឺនកន្លែង។ ចំណែកនៅក្នុងខែមករា ឆ្នាំ២០២៥ នេះវិញ CDC បានអនុម័តគម្រោង វិនិយោគបានចំនួន ៦៨ គម្រោង មានទុនវិនិយោគប្រមាណ ៧៤៨ លានដុល្លារអាមេរិក, នេះបានបង្ហាញចំនួនខ្ពស់មួយ នៅក្នុងខែ ដំបូងសម្រាប់ឆ្នាំ២០២៥ នៃការស្រូបយកវិនិយោគិនបណ្តាក់ទុននៅកម្ពុជា៕ អត្ថបទ៖ សុន រ៉ាឌី,

កម្ពុជាគ្រោងបើកសាលាបណ្តុះបណ្តាលជួសជុលយន្តហោះ នៅថ្ងៃអនាគតខាងមុខ

នាយកគ្រប់គ្រង នៃក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក (CAIC) ក្នុងដំណើរទស្សនកិច្ចនៅព្រលាយន្តហោះអន្តរជាតិតេជោ រដ្ឋាភិបាលហ្វីលីពីន នឹងជួយទាក់ទងក្រុមហ៊ុនអាកាសចរណ៍ពីប្រទេសហ្វីលីពីន ដើម្បីសហការជាមួយ កម្ពុជា ក្នុងការបើកសាលាបណ្តុះបណ្តាលជួសជុលយន្តហោះនាពេលឆាប់ៗខាងមុខនៅកម្ពុជា។នៅក្រោយចប់កម្មវិធីដឹកនំាគណៈប្រតិភូជាន់ខ្ពស់ នៃស្ថានទូតចំនួន២ ប្រចាំនៅកម្ពុជា រួមមាន អូស្រ្តាលី និងហ្វីលីពីន អញ្ជើញទស្សនកិច្ច ដើម្បីពិនិត្យវឌ្ឍនភាពនៃដំណើរការសាងសង់ព្រលាយន្តហោះអន្តរជាតិតេជោ កាលពីរសៀលថ្ងៃទី២១ ខែកុម្ភៈកន្លងទៅ លោកឧកញ៉ា ឆារស៍ វ៉ាន់ នាយកគ្រប់គ្រង នៃក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក (CAIC) មានប្រសាសន៍ឲ្យដឹងថា ស្ថានទូតហ្វីលីពីន នឹងររៀបចំសាលាហ្វឹកហាត់អាកាសចរណ៍ពីហ្វីលីពីន មកសហការជាមួយកម្ពុជា ដោយក្នុងពេលខាងមុខនេះ កម្ពុជានឹងមានការបើកសាលាបណ្តុះបណ្តាលជួសជុលយន្តហោះ នៅសាកលវិទ្យាល័យបច្ចេកវិទ្យា និងវិទ្យាសាស្ត្រកម្ពុជា ហៅកាត់ ខេមតិច ផងដែរ ប៉ុន្តែលោកមិនទាន់ដឹងថា សាកលវិទ្យាល័យនេះ នឹងបើកដំណើរការពេលណានោះទេ។លោកឧញ៉ា បានលើកឡើងបន្តថា ចំពោះ ភាគីអូស្រ្តាលី បានសន្យាថា នឹងជួយផ្សព្វផ្សាយពីកម្ពុជា និងជួយទាក់ទាញភ្ញៀវទេសចរណ៍ មកទស្សនាប្រទេសកម្ពុជាបន្ថែមទៀត។សូមជម្រាបជូនថា ឯកអគ្គរដ្ឋទូត ចំនួន២ប្រទេស ដែលបានអញ្ជើញទស្សនកិច្ច នៅរសៀលថ្ងៃនេះ រួមមាន៖ ឯកឧត្តម Derek Yip ឯកអគ្គរាជទូតវិសាមញ្ញ និងពេញសមត្ថភាពនៃស្ថានទូតអូស្រ្តាលីប្រចាំនៅកម្ពុជា និងលោកជំទាវ Plerida Ann Camille P. Mayo ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋហ្វីលីពីនប្រចាំនៅកម្ពុជា ក្នុងគោលបំណងដើម្បីពិនិត្យវឌ្ឍនភាពនៃដំណើរការសាងសង់អាកាសយានដ្ឋានអន្តរជាតិតេជោក្រុងតាខ្មៅ ដែលមានទីតាំងស្ថិតនៅឃុំព្រែកស្លែង ស្រុកកណ្តាលស្ទឹង ខេត្តកណ្តាល។ គិតត្រឹមរសៀលថ្ងៃទី២១ ខែកុម្ភៈ ឆ្នាំ២០២៥ អាកាសយានដ្ឋានអន្តរជាតិតេជោក្រុងតាខ្មៅ សម្រេចការសាងសង់ ប្រមាណ ៩៤% នឹងគ្រោងដាក់ឲ្យដំណើរការជាផ្លូវការនៅខែកក្កដា ខាងមុខនេះ ក្រោមអធិបតីភាពដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា។ ព្រលានយន្តហោះថ្មីនេះ សាងសង់ឡើងលើផ្ទៃដីជាង ២ ៦០០ហិចតា ជាព្រលានយន្តហោះលំដាប់ F4 ដែលអាចធ្វើអោយយន្តខ្នាតធំចុះចតបានដូចជា ប្រភេទ Airbus A380 និងប្រភេទ Boeing 747 និងអាចទទួលអ្នកដំណើរបានរហូតដល់ ១៣លាននាក់ ក្នុង១ឆ្នាំ ក្នុងដំណាក់កាលទី១៕ អត្ថបទ ឈិត បូរ៉ាវី

លូមេភ្លោះទំហំ៥ម៉ែត្រនៅតំបន់លូ៥ នឹងក្លាយជាប្រព័ន្ធបង្ហូរទឹកដ៏សំខាន់ ដើម្បីរំដោះទឹកជន់លិចក្នុងរាជធានី

ភ្នំពេញ៖ ប្រព័ន្ធលូបង្ហូរទឹកនៅតំបន់លូ៥ នឹងក្លាយជាប្រព័ន្ធបង្ហូរទឹកដ៏សំខាន់មួយ ក្នុងភូមិសាស្ត្ររាជធានីភ្នំពេញ ដើម្បីរំដោះទឹកជន់លិចក្នុងរាជធានីភ្នំពេញ បន្ទាប់ពីមានការដាក់លូទំហំ២ម៉ែត្រកន្លះភ្លោះ ។ លោកស្រី ដោ សម្ផស្ស នាយិការងរដ្ឋបាល និងជាអ្នកនាំពាក្យរដ្ឋបាលរាជធានីភ្នំពេញ បានឱ្យដឹងថា ការដ្ឋានដាក់ប្រព័ន្ធលូប្រអប់ខ្នាតធំខាងលើនេះ មានប្រវែងជាង១០០០ម៉ែត្រ នៅផ្លូវលេខ៨០ ក្នុងភូមិសាស្ត្រខណ្ឌមានជ័យ ដោយបានផ្តើមការដ្ឋានពីផ្លូវប្រឡាយបារាំង ដល់មហាវិថីចោមចៅ (ហៅផ្លូវវេង ស្រេង) ត្រង់ទីតាំងស្តុបលូ៥ ។ គិតមកដល់ពេលនេះ ការដ្ឋានទាំងមូលសម្រេចលទ្ធិផលបាន ៣៩ភាគរយ នៃគម្រោង ពោលគឺការដាក់លូបានប្រវែង ៤៣០ម៉ែត្រហើយ ។លោកស្រីអ្នកនាំពាក្យ បានបន្តថា គម្រោងនេះ នឹងពង្វាងទឹកពីតំបន់ខាងត្បូង និងខាងកើតអាកាសយានដ្ឋានអន្តរជាតិភ្នំពេញ ឆ្ពោះទៅតំបន់ក្រៅក្រុង ដែលនឹងកាត់បន្ថយទឹកលិចដោយទឹកភ្លៀងនៅភូមិសាស្ត្រខណ្ឌសែនសុខ និងខណ្ឌពោធិ៍សែនជ័យ ។ប្រជាពលរដ្ឋ សប្បាយចិត្ត និងបង្ហាញការគាំទ្រ ចំពោះគម្រោងផ្លាស់ប្តូរប្រព័ន្ធលូមេធំៗបែបនេះ ព្រោះនេះជាផ្នែក ក្នុងការកាត់បន្ថយខ្ពស់អំពីការលិចលង់ នៅរៀងរាល់រដូវវស្សាចូលមកដល់ ។ សូមបញ្ជាក់ថា គម្រោងការដ្ឋានដាក់ប្រព័ន្ធលូមេធំៗខាងលើនេះ បានដំណើរការអនុវត្តតាំងពីខែមិថុនា ឆ្នាំ២០២៤ ហើយគ្រោង និងបញ្ចប់គម្រោងនៅខែមិថុនាឆ្នាំ២០២៥ខាងមុខនេះ ។ រាជរដ្ឋាភិបាល តាមរយះរដ្ឋបាលរាជធានីភ្នំពេញ បានរៀបចំគម្រោងចំនួន៥០គម្រោង សម្រាប់រយះពេល៥ឆ្នាំ ហើយបច្ចុប្បន្នគម្រោងមួយចំនួនធំហើយ បាននឹងកំពុងអនុវត្ត ក្នុងតំបន់ដែលងាយរងគ្រោះដោយការលិចលង់ជាងគេ រួមមាន ៖ តំបន់ជុំវិញស្ថានីយបូមទឹកលូប្រាំ, តំបន់ជុំវិញស្ថានីយបូមទឹកបឹងទំពន់ និងតំបន់ជុំវិញស្ថានីយបូមទឹកបឹងត្របែកជាដើម ៕ អត្ថបទ ៖ លីហេង

ក្នុងឆ្នាំ២០២៤-២០២៥ ក្រសួងធនធានទឹក និងឧតុនិយម បាននិងកំពុងជួសជុលច្រាំងទន្លេសរុបប្រវែង ៦៥០៥ ម៉ែត្រ

ភ្នំពេញ៖ ក្នុងឆ្នាំ២០២៤-២០២៥ ក្រសួងធនធានទឹក និងឧតុនិយម បាននិងកំពុងជួសជុលច្រាំងទន្លេសរុបប្រវែង ៦៥០៥ ម៉ែត្រដោយក្នុងនោះ រួមមាន ៖១-ឆ្នាំ២០២៤ ការងារច្រាំងបានអនុវត្តដោយប្រើប្រាស់បាវ Geo Textile ចំនួន ៣ទីតាំង ស្ថិតក្នុងខេត្តត្បូងឃ្មុំ សរុបប្រវែង ៣៥០៥ម។២-ឆ្នាំ ២០២៥ ស្ថិតក្នុងផែនការអនុវត្តចំនួន ៨ទីតាំង-ខេត្តកណ្តាល អនុវត្តដោយប្រើបាវ Geo Textile ទ្រាប់, Gabion Box និងបេតុង ចំនួន ៤ទីតាំង សរុបប្រវែង ១៤០០ម។-ខេត្តកំពង់ចាម ចំនួន ៤ទីតាំង អនុវត្តដោយប្រើបាវ Geo Textile សរុបប្រវែង ១៦០០ម។ការធ្វើច្រាំងទន្លេ ស្ទឹង បឹងបួរ ដើម្បីកាត់បន្ថយការបុកដាច់ និងច្រោះដីច្រាំងទន្លេ ស្ទឹង បឹងបួរ, រក្សារំហូរទឹកទន្លេ ស្ទឹង បឹងបួរ ឱ្យហូរតាមលក្ខណៈប្រក្រតី, ថែររក្សាលំនឹងបរិស្ថាន និងប្រព័ន្ធអេកូឡូសុី, រក្សាសុខភាពទន្លេ ស្ទឹង បឹងបួរ, ការពារទ្រព្យសម្បត្តិប្រជាពលរដ្ឋ រួមមានដីចំការ និងផ្ទះសំបែងជាដើម, ការពារទ្រព្យសម្បត្តិសាធារណៈដូចជា ផ្លូវ ស្ពាន មន្ទីរពេទ្យ វត្តអារាម និងសាលារៀនជាដើម ពីការច្រោះបាក់ច្រាំង និងការពារបូរណភាពទឹកដី ជាពិសេសការកសាងច្រាំងតាមព្រំដែន គឺជួយមិនឱ្យមានការបាត់បង់ដីតាមបណ្តោយព្រំដែនដែលបណ្ដាលមកពីការបាក់ច្រាំង។

បណ្ដាញសង្គម

ព័ត៌មានថ្មីៗ

ក្រុមផ្ដល់ជំនួយនិងសិទ្ធិមនុស្សជាង១០០ អំពាវនាវឱ្យចាត់វិធានការ ខណៈភាពអត់ឃ្លានរីករាលដាលនៅហ្កាហ្សាសម្លាប់មនុស្សជាង ១០០នាក់

ចិនចាប់ផ្តើមសាងសង់ទំនប់វារីអគ្គិសនីធំជាងគេបំផុតរបស់ពិភពលោកនៅតំបន់ទីបេតិ៍

គណៈកម្មាធិការស្វែងរកការពិតស៊ីរី រាយការណ៍ថា មនុស្ស ១.៤២៦នាក់ ត្រូវបានសម្លាប់អំឡុងអំពើហិង្សាក្នុងខែមីនា

ជនប៉ាឡេស្ទីននៅទីក្រុងហ្កាហ្សានិយាយថា ពួកគេពុំបានបរិភោគអស់រយៈពេល ៥ថ្ងៃមកហើយ

រលកកម្តៅធ្ងន់ធ្ងរនៅតំបន់បាល់កង់ បណ្តាលឲ្យមានភ្លើងឆេះព្រៃនៅប្រទេសប៊ុលហ្គារី និងអាល់បានី

ប្រេសិតពិសេសសហរដ្ឋអាមេរិកជួបជាមួយប្រធានសភាលីបង់នៅទីក្រុងបេរូត

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877