BTV NEWS

ព្រះមហាក្សត្របានចេញព្រះរាជក្រម ប្រកាសឲ្យប្រើប្រាស់ច្បាប់ធម្មនុញ្ញ ស្តីពីវិសោធនកម្មមាត្រា៣៣

ក្នុងគោលបំណងមនុស្សធម៌! អាជ្ញាធរកម្ពុជាសម្រេចបើកច្រកទ្វារព្រំដែនអនុញ្ញាតដល់អនុព័ន្ធយោធាថៃប្រចាំនៅភ្នំពេញ និងមនុស្សពីរនាក់ធ្វើដំណើរតាមច្រកទ្វារអន្តរជាតិប៉ោយប៉ែត-ខ្លងលីកទៅព្យាបាលជំងឺនៅខេត្តស្រះកែវ

ចៅក្រមស៊ើបសួរសាលាដំបូងរាជធានីភ្នំពេញសម្រេចឃុំខ្លួនជនត្រូវចោទ៨នាក់ជាបណ្តោះអាសន្នពាក់ព័ន្ធអំពើឆបោកតាមឆបោកតាមប្រព័ន្ធអនឡាញ

ត្រឹមថ្ងៃទី១៩កក្កដា សមត្ថកិច្ចរាជធានី-ខេត្ត បង្រ្កាបករណីឆបោកតាមប្រព័ន្ធបច្ចេកវិទ្យា ៥២ទីតាំង ឃាត់ខ្លួនជនសង្ស័យ ២.៧៦៧ នាក់ មានជនជាតិចិនចំនួន ៨៤៣នាក់

ព័ត៌មានជាតិ

មូលនិធិអាស៊ីនិងចូលរួមក្នុងផែនការសកម្មភាពជាតិ ស្តីពីស្ត្រីសន្តិភាព និងសន្តិសុខនៅកម្ពុជា

ភ្នំពេញ ÷ ក្រសួងកិច្ចការនារី និងអង្គការមូលនិធិអាស៊ី ចុះអនុស្សរណៈនៃការយោគយល់គ្នា លើការអនុវត្តគម្រោង គាំទ្រផ្នែកបច្ចេកទេសក្នុង ការអភិវឌ្ឍបែបបរិយាបន្ន ដល់ផែនការសកម្មភាពជាតិ ស្តីពីស្ត្រីសន្តិភាព និងសន្តិសុខនៅក្នុងប្រទេសកម្ពុជា និងគាំទ្រដល់ការបង្កើន សមត្ថភាព ផ្លាស់ប្តូរចំណេះដឹង និងការរៀនសូត្រពីប្រទេសផ្សេងទៀត។លោកជំទាវកិត្តិបណ្ឌិត អ៉ឹង កន្ថាផាវី រដ្ឋមន្ត្រីក្រសួងកិច្ចការនារី លើកឡើងនៅក្នុងពិធីចុះហត្ថលេខាលើអនុស្សរណៈនៃការ យោគយល់គ្នា (MoU) រវាងក្រសួងកិច្ចការនារី និងអង្គការមូលនិធិអាស៊ី ស្តីពីកិច្ចសហប្រតិបត្តិការ និងការគាំទ្រទៅលើការរៀបចំផែនការ សកម្មភាពជាតិ ស្តីពីរបៀបវារៈស្ត្រីសន្តិភាព និងសន្តិសុខនៅប្រទេសកម្ពុជា នៅល្ងាចថ្ងៃទី ១៩ ខែ កុម្ភៈ ឆ្នាំ២០៥ នេះថា ស្ត្រីសន្តិភាព និងសន្តិសុខគឺជាប្រធានបទថ្មីមួយ ដោយយកស្ត្រីជាភ្នាក់ងារមួយ ដើម្បីដោះស្រាយស្រ្តីដែលរងគ្រោះ ក្នុងនោះមានពីរប្រភេទរួមមាន សន្តិសុខប្រពៃណី, ដែលផ្តោតលើច្បាំង និងជម្លោះផ្សេងៗ ចំណែកសន្តិសុខមិនកើតឡើងដោយប្រពៃណីដូចជា ការបង្កើតឡើងដោយ ប្រព័ន្ធឌីជីថល គ្រោះថ្នាក់ធម្មជាតិ នេះគឺជាប្រធានបទមួយ លើសពីក្រសួងកិច្ចការនារីដែលកំពុងអនុវត្តបច្ចុប្បន្ន។ជុំវិញបញ្ហាខាងលើនេះដែរ, លោកជំទាវកិត្តិបណ្ឌិត ស្នើដល់អង្គការមូលនិធិអាស៊ី ជួយស្រាវជ្រាវទៅលើឧត្តមានុវត្តន៍របស់ ប្រទេសក្នុងតំបន់ ដែលជួបប្រទះបញ្ហាស្រដៀងនិងកម្ពុជា ខណៈបច្ចុប្បន្នទាក់ទិនបញ្ហានេះ គឺមានជាង ១០០ ប្រទេស បាននិងកំពុង អនុវត្តផែនការសកម្មភាពរបស់ខ្លួន។ ដូច្នេះបន្ទាប់ពីការស្រាវជ្រាវ និងបទពិសោធន៍ដែលទទួលបានពីបណ្តាប្រទេសផ្សេងៗ សូមយកមក អនុវត្តនៅកម្ពុជា ដើម្បីឱ្យកម្ពុជាអាចពន្លឿនការអភិវឌ្ឍន៍ផែនការសកម្មភាពជាតិរបស់ខ្លួន។លោកស្រី មេឡូនី លីនប៊ីក (Meloney C. Lindberg) តំណាងប្រចាំប្រទេសអង្គការមូលនិធិអាស៊ី លើកឡើងថា ស្ត្រីដើរតួ នៅគ្រប់វិស័យនៃសង្គម ជាអ្នកកសាងសន្តិភាព អ្នកសម្របសម្រួល អ្នកដឹកនាំ និងតម្លៃនៃការចូលរួមរបស់ស្ត្រីដើម្បីសន្តិភាព និង សន្តិសុខប្រកបដោយចីរភាព សព្វថ្ងៃអង្គការមូលនិធិអាស៊ី បានកសាងនៅលើមូលដ្ឋាននេះ ដោយទទួលស្គាល់ និងពង្រីកសំឡេង របស់ស្ត្រីសម្រាប់សន្តិភាពយូរអង្វែង និងធន់។ មូលនិធិអាស៊ី មានសេចក្តីសោមនស្សរីករាយ ក្នុងការកសាងភាពជាដៃគូនេះជាមួយក្រសួងកិច្ចការនារី តាមរយៈកម្មវិធី AMPLIFY របស់យើង។ AMPLIFY គឺជាគំនិតផ្តួចផ្តើមក្នុងតំបន់ រយៈពេលប្រាំឆ្នាំរបស់មូលនិធិអាស៊ី ដែលមានគោលបំណងជួយដល់ ស្ត្រីរស់នៅក្នុងអាស៊ាន ដែលរងផលប៉ះពាល់ មិនសមាមាត្រដោយជម្លោះ និងអសន្តិសុខ។ បញ្ហាស្រ្តីនេះដែរ, លោកស្រី ថ្លែងនូវ ការអបអរសាទរ ចំពោះកិច្ចខិតខំប្រឹងប្រែង និងការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងការលើកកម្ពស់របៀបវារៈស្ត្រីសន្តិភាព និង សន្តិសុខ (WPS) ទាំងក្នុងតំបន់និងថ្នាក់ជាតិ។ ជាក់ស្តែងនៅក្នុងឆ្នាំ២០២២ កន្លងមក ក្នុងឋានៈជាប្រធានអាស៊ាន កម្ពុជាបានផ្តល់ អាទិភាព និងដឹកនាំការអនុម័តផែនការសកម្មភាពថ្នាក់តំបន់ស្តីពីសន្តិភាព និងសន្តិសុខរបស់ស្ត្រី (RPA-WPS)។ ចាប់តាំងពីពេល នោះមក ប្រទេសកម្ពុជាតំណាងដោយក្រសួងកិច្ចការនារី បានបង្ហាញពីការប្តេជ្ញាចិត្តបន្តរបស់ខ្លួន ក្នុងនាមជាប្រធានក្រុមប្រឹក្សា អាស៊ានស្តីពីស្ត្រីសន្តិភាព និងសន្តិសុខ៕អត្ថបទ៖ សុន រ៉ាឌី

ទូតវៀតណាមថ្មី ប្ដេជ្ញាពង្រឹង និងពង្រីកទំនាក់ទំនងកម្ពុជា-វៀតណាម ឱ្យកាន់តែខ្លាំងក្លាថែមទៀត

ភ្នំពេញ ៖ នារសៀលថ្ងៃទី១៩ ខែកុម្ភៈ ឆ្នាំ២០២៥, សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យ ឯកឧត្តម ង្វៀន ម៉ិញវូ (Nguyen Minh Vu) ឯកអគ្គរដ្ឋទូតនៃសាធារណរដ្ឋសង្គមនិយមវៀតណាមប្រចាំកម្ពុជា ចូលជួបសម្ដែងការគួរសម និងពិភាក្សាការងារ នៅវិមានសន្ដិភាព។ ក្នុងឱកាសនៃជំនួប, ឯកឧត្តមឯកអគ្គរដ្ឋទូតបានសម្ដែងនូវការចាប់អារម្មណ៍ខ្ពស់ចំពោះសមិទ្ធផលជាច្រើនដែលរាជរដ្ឋាភិបាលកម្ពុជាសម្រេចបាននាពេលកន្លងមក មានជាអាទិ៍ ការរក្សាបាននូវសុខសន្តិភាព, ស្ថិរភាពនយោបាយ, ការអភិវឌ្ឍរីកចម្រើនដ៏ខ្លាំងក្លា និង ការលេចត្រដែតឡើងនូវកិត្យានុភាពកម្ពុជានៅលើឆាកអន្តរជាតិ ។ ឯកឧត្តមបានបង្ហាញនូវជំនឿជឿជាក់ថា ក្រោមការដឹកនាំរបស់សម្ដេចបវរធិបតី, កម្ពុជានឹងសម្រេចបាននូវការរីកចម្រើន និងការអភិវឌ្ឍ កាន់តែខ្លាំងក្លាថែមទៀត។ ក្នុងទំនាក់ទំនងទ្វេភាគី, ឯកឧត្តមអគ្គរដ្ឋទូត បានប្ដេជ្ញាចិត្តខ្ពស់ក្នុងការខិតខំប្រឹងប្រែងជំរុញការពង្រឹង និងពង្រីកកិច្ចសហប្រតិបត្តិការរវាងប្រទេសទាំងពីរឱ្យកាន់តែខ្លាំងក្លាបន្ថែមទៀត លើវិស័យជាច្រើន មានជាអាទិ៍៖ សេដ្ឋកិច្ច, ពាណិជ្ជកម្ម និងការវិនិយោគ, ការពារជាតិនិងសន្តិសុខ, ទេសចរណ៍, អប់រំ, ការបណ្ដុះបណ្ដាលធនធានមនុស្ស, ការតភ្ចាប់ហេដ្ឋារចនាសម្ព័ន្ធ, និងការតភ្ជាប់រវាងប្រជាជននិងប្រជាជន។ ជាការឆ្លើយតប, សម្ដេចបវរធិបតីបានសម្ដែងការអបអរសាទរជូនចំពោះឯកឧត្តម ដែលត្រូវបានតែងតាំងជាឯកអគ្គរដ្ឋទូតសាធារណរដ្ឋសង្គមនិយមវៀតណាម ប្រចាំព្រះរាជាណាចក្រកម្ពុជា និងបានវាយតម្លៃខ្ពស់ចំពោះទំនាក់ទំនងជាអ្នកជិតខាងល្អ, មិត្តជាប្រពៃណី និងយូរអង្វែង ជាមួយនឹងកិច្ចសហប្រតិបត្តិការប្រកបដោយផ្លែផ្កា លើគ្រប់វិស័យរវាងប្រទេសទាំងពីរ។ សម្ដេចបវរធិបតីក៏បានវាយតម្លៃខ្ពស់ចំពោះការប្ដេជ្ញាចិត្តរបស់ឯកឧត្តមឯកអគ្គរដ្ឋទូត ក្នុងការជំរុញទំនាក់ទំនង និងកិច្ចសហប្រតិបត្តិការនៃប្រទេសទាំងពីរឱ្យកាន់តែខ្លាំងក្លាបន្ថែមទៀត និងបានលើកទឹកចិត្តឯកឧត្តមឱ្យ សហការជិតស្និទ្ធជាមួយក្រសួង-ស្ថានប័នពាក់ព័ន្ធកម្ពុជា៕

ជប៉ុនផ្តល់ជំនួយឥតសំណងដល់រដ្ឋបាលរាជធានីភ្នំពេញ សម្រាប់គម្រោងសន្តិសុខមនុស្សជាតិ

ភ្នំពេញ ៖ ស្ថានទូតជប៉ុន និងរដ្ឋបាលរាជធានីភ្នំពេញចុះហត្ថលេខាលើកិច្ចសន្យាផ្តល់ជំនួយឥតសំណង សម្រាប់គម្រោងសន្តិសុខមនុស្សជាតិ។នៅរសៀលថ្ងៃទី១៩ ខែកុម្ភៈ ឆ្នាំ២០២៥ នៅស្ថានទូតជប៉ុនប្រចាំនៅព្រះរាជាណាចក្រកម្ពុជា បានធ្វើពិធីចុះហត្ថលេខាលើកិច្ចសន្យាផ្តល់ជំនួយឥតសំណងរបស់រដ្ឋាភិបាលជប៉ុន សម្រាប់គម្រោងទ្រង់ទ្រាយតូចសន្តិសុខមនុស្សជាតិ ហៅថា គូសាណូណិ លើគម្រោងចំនួនពីររួមមាន ១. “គម្រោងធ្វើលទ្ធកម្មរថយន្តបាញ់ផ្សែងរបស់ជប៉ុន នៅរាជធានីភ្នំពេញ” ក្នុងថវិកាគម្រោងចំនួន ៨៣.៦៧២ដុល្លាអាមេរិក។ រថយន្តនេះមានមុខងារនឹងជួយឱ្យក្រុមការងារពន្លត់អគ្គិភ័យមានលទ្ធភាពបាញ់ផ្សែងចេញពីអគារមានឧប្បត្តិហេតុអគ្គិភ័យ និងបង្កលក្ខណៈងាយស្រួលដល់ប្រតិបត្តិការ សង្រ្គោះ និង២. “គម្រោងធ្វើលទ្ធកម្មរថយន្តពន្លត់អគិ្គភ័យ និងរថយន្តសង្រ្គោះបន្ទាន់ដែលប្រើប្រាស់រួច ក្នុងរាជធានីភ្នំពេញ” ក្នុងថវិកាគម្រោងចំនួន ១៥៤.៣៧៦ដុល្លាអាមេរិក។ គម្រោងនេះនឹងផ្តល់ជូននូវរថយន្តសង្រ្គោះបន្ទាន់ចំនួន ០១គ្រឿង ជាប្រភេទពន្លត់អគ្គិភ័យ និងរថយន្តពន្លត់អគ្គិភ័យបំពាក់ជណ្តើរកម្ពស់ ៤០ម៉ែត្រចំនួន ០១គ្រឿង។ ពិធីចុះកិច្ចសន្យាផ្តល់ជំនួយនេះចុះហត្ថលេខាដោយ ឯកឧត្តម អ៊ូអិណុ អាត់ស៊ូស៊ី ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុនប្រចាំព្រះរាជាណាចក្រកម្ពុជា និងឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ។ឯកឧត្តម ឃួង ស្រេង បានថ្លែងអំណរគុណយ៉ាងជ្រាលជ្រៅជូនរដ្ឋាភិបាល និងប្រជាជនជប៉ុន តាមរយៈស្ថានទូតជប៉ុន ដែលបានផ្តល់ជំនួយឧបត្ថម្ភជាថវិកា សម្ភារ និងបច្ចេកទេសក្នុងដំណើរការស្តារ កសាង និងអភិវឌ្ឍន៍រាជធានីភ្នំពេញជារៀងរហូតមក ជាពិសេសគម្រោងដែលបានចុះហត្ថលេខានាពេលនេះ គឺមិនត្រឹមតែបានគាំទ្រដល់ការធ្វើឱ្យប្រសើរឡើងនូវសមត្ថភាពពន្លត់អគ្គិភ័យប៉ុណ្ណោះទេ ប៉ុន្តែថែមទាំងបានរួមចំណែកយ៉ាងសំខាន់ក្នុងការរឹតចំណងមិត្តភាព សាមគ្គីភាព និងកិច្ចសហប្រតិបត្តិការល្អរវាងប្រទេសទាំងពីរ “កម្ពុជា-ជប៉ុន” ឱ្យកាន់តែរឹងមាំ និងស្ថិតស្ថេរគង់វង្សជានិច្ចនិរន្តន៍។ ជាមួយគ្នានេះដែរ ឯកឧត្តមអភិបាលរាជធានីបានបង្ហាញក្តីសង្ឈឹមយ៉ាងមុតមាំថាតាមរយៈការផ្តល់ជំនួយបច្ចេកទេស និងរថយន្តពន្លត់អគ្គិភ័យនាពេលនេះ គឺជាតម្រូវការចាំបាច់ចំពោះមុខ និងទាន់ពេលវេលា ដើម្បីធានាដល់ប្រសិទ្ធភាពនៃការអន្តរាគមន៍ពន្លត់អគ្គិភ័យក្នុងរាជធានីភ្នំពេញកាន់តែប្រសើរឡើង៕អត្ថបទ ៖ ប្រាក់ វ៉ាន់ដា

ឯកឧត្តមរដ្ឋមន្ត្រី ជា វ៉ាន់ដេត បានអញ្ជើញជាអធិបតីក្នុងសិក្ខាសាលាស្ដីពី “ការផ្ដល់ធាតុចូល និងគាំទ្រការអនុវត្តបទបញ្ជាផ្ទៃក្នុងនៃការគ្រប់គ្រងសន្តិសុខសាយប័រ”

កាលពីរសៀលថ្ងៃទី១៨ ខែកុម្ភៈ ឆ្នាំ២០២៥ ឯកឧត្តម ជា វ៉ាន់ដេត រដ្ឋមន្រ្តីក្រសួងប្រៃសណីយ៍និងទូរគមនាគមន៍ (ក.ប.ទ) បានអញ្ជើញជាអធិបតីក្នុងសិក្ខាសាលាស្ដីពី “ការផ្ដល់ធាតុចូល និងគាំទ្រការអនុវត្តបទបញ្ជាផ្ទៃក្នុងនៃការគ្រប់គ្រងសន្តិសុខសាយប័រ” ដោយមានការចូលរួមពីថ្នាក់ដឹកនាំគ្រប់អគ្គនាយកដ្ឋាន អគ្គាធិការដ្ឋាន នាយកដ្ឋានសវនកម្មផ្ទៃក្នុង និងគណៈកម្មាធិការរដ្ឋាភិបាលឌីជីថល ចាប់ពីអនុប្រធាននាយកដ្ឋានឡើង សរុបប្រមាណ ១០០នាក់។ សិក្ខាសាលានេះ រៀបចំឡើងក្នុងគោលបំណងបង្ហាញពីការប្តេជ្ញាចិត្តរបស់ថ្នាក់ដឹកនាំ និងអង្គភាពចំណុះទីស្តីការ ក.ប.ទ. ក្នុងការអនុវត្តនូវគោលការណ៍ស្តង់ដាសុវត្ថិភាពឌីជីថលសម្រាប់មន្រ្តីរាជការគ្រប់លំដាប់ថ្នាក់ កម្មវិធីនិងប្រព័ន្ធឌីជីថល ក៏ដូចជាឧបករណ៍ឌីជីថលដែលប្រើប្រាស់នៅក្នុង ក.ប.ទ. ដើម្បីឱ្យការធ្វើបរិវត្តកម្មឌីជីថលរបស់ក្រសួងកាន់តែមានប្រសិទ្ធភាព ប្រសិទ្ធិផល សុវត្ថិភាពខ្ពស់ និងកាត់បន្ថយហានិភ័យការពីវាយប្រហារតាមប្រព័ន្ធឌីជីថល។

រដ្ឋមន្ត្រីក្រសួងសង្គមកិច្ច បន្តចុះប្រគល់ផ្ទះជូនជនមានពិការភាពក្រីក្រ

ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងលោកជំទាវ ជា ផល្គុន នៅថ្ងៃទី១៩ ខែកុម្ភ: ឆ្នាំ២០២៥នេះ បានអញ្ជើញប្រគល់ផ្ទះ«មូលនិធិជនពិការ» ជូនគ្រួសារជនមានពិការភាពក្រីក្រ១គ្រួសារនៅខេត្តព្រះវិហារ។ ពិធីនេះ ក៏មានការអញ្ជើញចូលរួមពី ឯកឧត្តម គីម រិទ្ធី អភិបាលនៃគណៈអភិបាលខេត្តព្រះវិហារ ថ្នាក់ដឹកនាំនៃក្រសួងសង្គមកិច្ច អតីតយុទ្ធជន និងយុវនីតិសម្បទា មន្ទីរពាក់ព័ន្ធជុំវិញខេត្ត មន្រ្តីក្រោមចំណុះរដ្ឋបាលខេត្តព្រះវិហារ និងសាខាមូលនិធិជនពិការខេត្តព្រះវិហារ។ផ្ទះ«មូលនិធិជនពិការ»ថ្មី១ខ្នងនេះ មានទំហំ ៤ម៉ែត្រ គុណនឹង ៦ម៉ែត្រ ធ្វើពីថ្មប្រកស័ង្កសីនេះ ត្រូវបានប្រគល់ជូនជនមានពិការភាពក្រីក្រមានឈ្មោះ អឹម ឈាន ភេទប្រុស អាយុ៤៦ឆ្នាំ ជាជនមានពិការភាពជើងខាងស្ដាំត្រឹមភ្លៅ ដោយសារមីនក្នុងកំឡុងពេលសម័យប៉ុលពត សព្វថ្ងៃមានសមាជិកក្នុងគ្រួសារ៣នាក់ ប្រពន្ធ(មានជំងឺស្លាប់មួយចំហៀងខ្លួន) និងកូនស្រី១នាក់ រស់នៅភូមិសេដ្ឋកិច្ច ឃុំឈានមុខ ស្រុកត្បែងមានជ័យ។ ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា បានថ្លែងនូវមតិសំណេះសំណាលសួរសុខទុក្ខដល់គ្រួសារជនមានពិការភាពខាងលើ ដែលជួបការលំបាកក្នុងជីវភាព។ ឯកឧត្តមបានបន្តថា តាមរយៈកម្មវិធីការងាររបស់រាជរដ្ឋាភិបាល គឺមិនទុកនរណាម្នាក់ចោលឡើយ ជាក់ស្តែងអំឡុងនៃការរីករាលដាលជាសកលនៃជំងឺកូវីដ១៩ គឺរាជរដ្ឋាភិបាលកម្ពុជាបានគិតគូរទាំងផ្នែកសុខភាព និងផ្នែកសង្គមកិច្ចដល់ប្រជាពលរដ្ឋ ជាពិសេសជនដែលងាយរងគ្រោះ នូវការដាក់ចេញជាគោលនយោបាយជាច្រើនដូចជា ការឧបត្ថម្ភសាច់ប្រាក់អំឡុងពេលជំងឺកូវីដ១៩ ការឧបត្ថម្ភសាច់ប្រាក់អំឡុងពេលអតិផរណា កម្មវិធីកញ្ចប់គ្រួសារ កុមារអាយុក្រោម២ឆ្នាំ ស្រី្តមានផ្ទៃពោះ និងមានកម្មវិធីគាំទ្រផ្សេងៗទៀតជាហូរហែរមកដល់បច្ចុប្បន្ននេះ។ ដូចអ្វីដែលមាននៅទីនេះស្រាប់ គឺមូលនិធិជនពិការ ក្នុងនាមជាសេវាធិការជូនក្រសួងស.អ.យ. បានរៃអង្គាសថវិកាពីសប្បុរសជននានា តាមរយៈការដាក់ហិបប្រាក់វិភាគទានសប្បុរសធម៌ ដើម្បីយកមកសាងសង់ផ្ទះ និងយកទៅទិញកញ្ចប់អំណោយសម្រាប់ចែកជូនជនមានពិការភាពទីទាល់ក្រ ដែលសកម្មភាពទាំងនេះពិតជាបានជួយសម្រាលទុក្ខលំបាក និងលើកកម្ពស់ជីវភាពរបស់ជនមានពិការក្រីក្រផងដែរ។ ឯកឧត្តម បានណែនាំឱ្យគ្រួសារជនមានពិការភាពខាងលើ ត្រូវចេះថែទាំសុខភាព និងទៅទទួលសេវាស្តារលទ្ធភាពពលកម្មកាយសម្បទាឱ្យបានទៀងទាត់តាមបច្ចេកទេស ដើម្បីបង្កើនលទ្ធភាពក្នុងការរស់នៅ និងចូលរួមក្នុងសកម្មភាពសង្គម។ជាមួយគ្នានេះដែរ ឯកឧត្តមរដ្ឋមន្ត្រី និងលោកជំទាវ បានប្រគល់សោរជានិមិត្តរូប និងបានផ្ដល់អំណោយដ៏ថ្លៃថ្លារួមមាន៖ អង្ករចំនួន ២៥គីឡូក្រាម មីចំនួន ១កេស ត្រីខកំប៉ុងចំនួន ១យួរ ទឹកត្រីចំនួន ១យួរ ទឹកស៊ីអ៊ីវចំនួន ១យួរ អំបិលចំនួន ១កញ្ចប់ ស្ករសចំនួន ១កញ្ចប់ និងថវិកាចំនួន ១០០,០០០រៀល ជូនដល់លោក អឹម ឈាន និងក្រុមគ្រួសារដើម្បីប្រើប្រាស់៕អត្ថបទ៖ គឹមហុក

អបអរសាទរ និស្សិតអាហារូបករណ៍ អ.ម.ត សិក្សានៅសាកលវិទ្យាល័យ អាស៊ី អឺរ៉ុប ទទួលជ័យលាភីបញ្ចប់ការសិក្សាដោយជោគជ័យ

ភ្នំពេញ ៖ នាថ្ងៃទី១៩ ខែកុម្ភៈ ឆ្នាំ២០២៥ និស្សិតអាហារូបករណ៍ដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន និង សម្ដេចកិត្តិព្រឹទ្ធបណ្ឌិតផ្តល់ជូនតាមរយៈ សម្ដេចមហាបវរធិបតី ហ៊ុន ម៉ាណែត និង លោកជំទាវបណ្ឌិត ពេជ ចន្ទមុន្នី ចំនួន ៦៩ នាក់ បានបញ្ចប់ការសិក្សាថ្នាក់បរិញ្ញាបត្រ និងបរិញ្ញាបត្រជាន់ខ្ពស់នៅសាកលវិទ្យាល័យ អាស៊ី អឺរ៉ុបដោយជោគជ័យ និងបានចូលរួមពិធីប្រគល់សញ្ញាប័ត្រក្រោមអធិបតីភាពដ៏ខ្ពង់ខ្ពស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា។ក្នុងនាមថ្នាក់ដឹកនាំនៃគណៈកម្មាធិការអាហារូបករណ៍ និងសមាគមសិស្ស-និសិ្សតអាហារូបករណ៍ អ.ម.ត សូមជូនពរដល់និស្សិតជ័យលាភីទាំង ៦៩ រូប សូមទទួលបានជោគជ័យក្នុងគ្រប់ភារកិច្ចទាំងអាជីពការងារ និងការសិក្សាបន្តទៀត៕

«ត្រូវបង្កើនសារអប់រំសុខភាពផលប៉ះពាល់ ហាមឃាត់ការផ្សាយ និងអនុវត្តវិធានការហាមជក់ ឬបង្ហុយផ្សែងផលិតផលថ្នាំជក់ នៅទីកន្លែងសាធារណៈ»

ភ្នំពេញ ៖ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល ជំរុញប្រធានមជ្ឈមណ្ឌលជាតិលើកកំពស់សុខភាព និងជាលេខាធិការដ្ឋាននៃគណៈកម្មាធិការត្រួតពិនិត្យផលិតផលថ្នាំជក់ ត្រូវបង្កើនសារអប់រំសុខភាពផលប៉ះពាល់ ហាមឃាត់ការផ្សាយ និងអនុវត្តវិធានការហាមជក់ ឬបង្ហុយផ្សែងផលិតផលថ្នាំជក់ នៅទីកន្លែងសាធារណៈ។ការថ្លែងរបស់ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល និងជាប្រធានគណៈកម្មាធិការត្រួតពិនិត្យផលិតផលថ្នាំជក់ យ៉ាងដូច្នេះ នាឱកាសដឹកនាំកិច្ចប្រជុំលើកទី១ នៃគណៈកម្មាធិការត្រួតពិនិត្យផលិតផលថ្នាំជក់ ដែលមានការអញ្ជើញចូលរួមពីឯកឧត្តម លោកជំទាវ លោក លោកស្រី អនុប្រធាន និងសមាជិកនៃគណៈកម្មាធិការត្រួតពិនិត្យផលិតផលថ្នាំជក់, នាព្រឹកថ្ងៃទី១៩ ខែកុម្ភៈ ឆ្នាំ២០២៥នេះ។ឯកឧត្តមសាស្រ្តាចារ្យរដ្ឋមន្រ្តី បានលើកឡើងពីគោលបំណងអំពីកិច្ចប្រជុំនាពេលនេះ ដើម្បីធ្វើបច្ចុប្បន្នភាព ការអនុវត្តការងារត្រួតពិនិត្យផលិតផលថ្នាំជក់ ដល់សមាជិក គណៈកម្មាធិការត្រួតពិនិត្យផលិតផលថ្នាំជក់ និងរៀបចំសកម្មភាពអាទិភាពសម្រាប់អនុវត្តបន្ត ដែលជាយុទ្ធសាស្ត្រដ៏សំខាន់មួយក្នុងការកាត់បន្ថយហានិភ័យនៃជំងឺមិនឆ្លង នៅកម្ពុជា។ ឯកឧត្តមសាស្រ្តាចារ្យរដ្ឋមន្រ្តី បានលើកឡើងអំពីផលប៉ះពាល់ធ្ងន់ធ្ងរដល់សុខភាពដូចជា ការប៉ះពាល់ដល់ការអភិវឌ្ឍខួរក្បាលរបស់យុវវ័យ និងជំងឺមហារីក ព្រមទាំងបណ្តាលឱ្យអ្នកប្រើប្រាស់ ងាយញៀនដោយសារធាតុញៀន ក៏អាចជាការបើកផ្លូវឱ្យយុវជនទៅប្រើប្រាស់ផលិតផលថ្នាំជក់ និងគ្រឿងញៀនផ្សេងទៀតផងដែរ។ ឆ្លៀតក្នុងឱកាសនោះដែរ ឯកឧត្តមសាស្រ្តាចារ្យរដ្ឋមន្រ្តី សូមអំពាវនាវ ដល់គណៈកម្មាធិការត្រួតពិនិត្យផលិតផលថ្នាំជក់ និងស្ថាប័នពាក់ព័ន្ធទាំងអស់ រួមគ្នាជំរុញការអនុវត្តកម្មវិធីត្រួតពិនិត្យផលិតផលថ្នាំជក់ និងការពារប្រជាជនពីបារីអេឡិចត្រូនិកឱ្យមានប្រសិទ្ធភាព ដោយ៖១. រាជធានី-ខេត្ត ជំរុញការហាមឃាត់ការជក់ ឬបង្ហុយផ្សែងផលិតផលថ្នាំជក់នៅកន្លែងធ្វើការ និងកន្លែងសាធារណៈ បង្កើតទីក្រុង ស្រុក ឃុំ គ្មានផ្សែងផលិតផលថ្នាំជក់ ទេសចរណ៍គ្មានផ្សែងផលិតផលថ្នាំជក់ឱ្យកាន់តែទូលំទូលាយ ដោយបិទស្លាកហាមជក់បារីនៅតាមទីកន្លែងធ្វើការ និងទីកន្លែងសាធារណៈ និងអប់រំណែនាំអ្នកប្រើប្រាស់ បង្កើតជាបរិបទសង្គម ដែលគ្មានផ្សែងផលិតផលថ្នាំជក់។២. ជំរុញការទប់ស្កាត់ និងហាមឃាត់ការផ្សាយពាណិជ្ជកម្ម ការផ្សព្វផ្សាយលក់ និងការឧបត្ថម្ភកម្មវិធីដោយឧស្សាហករថ្នាំជក់គ្រប់ប្រភេទ។៣. តាមដានការអនុវត្តច្បាប់ និងពង្រឹងសមត្ថភាព ដំណើរការរបស់មន្ត្រីអធិការកិច្ចផលិតផលថ្នាំជក់ជាពិសេសក្នុងរាជធានី-ខេត្ត និងអប់រំអ្នកលក់ដូរចែកចាយ និងអនុវត្តវិធានការច្បាប់។៤. តាមដាន ទប់ស្កាត់ការលក់ ចែកចាយ និងប្រើប្រាស់បារីអេឡិចត្រូនិក នៅតាមទីតាំងផ្សេងៗ ក្នុងដែនសមត្ថកិច្ចរបស់ថ្នាក់ក្រោមជាតិ និងស្ថាប័នពាក់ព័ន្ធ។ ៥. សមាជិកគណៈកម្មាធិការត្រួតពិនិត្យផលិតផលថ្នាំជក់ និងស្ថាប័ន្ធពាក់ព័ន្ធត្រូវគោរពតាមច្បាប់ ស្តីពីការត្រួតពិនិត្យផលិតផលថ្នាំជក់ ដោយមិនទទួលការឧបត្ថម្ភពីឧស្សាហកម្មថ្នាំជក់។ ៦. រាជធានី-ខេត្ត ត្រូវជំរុញការបង្កើតអនុគណៈកម្មាធិការត្រួតពិនិត្យផលិតថ្នាំជក់ថ្នាក់រាជធានី -ខេត្ត ដើម្បីជំរុញការអនុវត្តច្បាប់ និងការអប់រំ កាត់បន្ថយការប្រើប្រាស់ផលិតផលថ្នាំជក់។៧. ជំរុញការប្រឹក្សាលះបង់ទម្លាប់ជក់បារីនៅតាមមណ្ឌលសុខភាព ដោយមានការជួយជំរុញពីមេភូមិ អាជ្ញាធរ ដែនដី ដើម្បីគាំទ្រអ្នកប្រើប្រាស់ផលិតផលថ្នាំ ជក់លះបង់ទម្លាប់ប្រើប្រាស់ផលិតផលថ្នាំជក់ដើម្បីបង្ការជំងឺមិនឆ្លង៕អត្ថបទ រដ្ឋា

អាជ្ញាធរជាតិអប្សរា ប្រារព្ធខួប៣០ឆ្នាំនៃការបង្កើតអាជ្ញាធរជាតិអប្សរានាបរិវេណប្រាសាទបាយ័ន

នៅព្រឹកថ្ងៃទី១៩ ខែកុម្ភៈ ឆ្នាំ២០២៥នេះ អាជ្ញាធរជាតិអប្សរា រៀបចំពិធីសាសនា រួមទាំងពិធីរាប់បាត្រព្រះសង្ឈ១៣០អង្គ ក្នុងឱកាសប្រារព្ធខួប៣០ឆ្នាំ នៃការបង្កើតអាជ្ញាធរជាតិអប្សរា(១៩ខែកុម្ភៈ ឆ្នាំ១៩៩៥-១៩ខែកុម្ភៈ ឆ្នាំ២០២៥) នៅបរិវេណស្ពានហាលប្រាសាទបាយ័ន ច្រកចូលខាងកើត ក្រោមអធិបតីភាពលោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងជាប្រធានក្រុមប្រឹក្សាភិបាលអាជ្ញាធរជាតិអប្សរា តំណាងអង្គការយូណេស្កូប្រចាំកម្ពុជា ឯកឧត្តម ហង់ ពៅ អគ្គនាយកអាជ្ញាធរជាតិអប្សរា អគ្គនាយករង ឯកឧត្តម ប្រាក់ សោភ័ណ អភិបាលខេត្តសៀមរាប មន្ត្រីបុគ្គលិកអាជ្ញាធរជាតិអប្សរា និងអ្នកពាក់ព័ន្ធជាច្រើនរូបចូលរួមផងដែរ។ឯកឧត្តម ហង់ ពៅ អគ្គនាយកអាជ្ញាធរជាតិអប្សរា មានប្រសាសន៍ថា ស្ថាប័នអាជ្ញាធរជាតិអប្សរាបានដើរតួនាទីអភិរក្ស ដោយមានការជ្រោមជ្រែងជាឆ្អឹងខ្នង ការអនុវត្តបច្ចេកទេសពីគណៈកម្មាធិការអន្តរជាតិដើម្បីសម្របសម្រួលកិច្ចគាំពារ និងអភិវឌ្ឍន៍រមណីយដ្ឋានប្រវត្តិសាស្រ្តអង្គរ(អាយស៊ីស៊ី-អង្គរ) ការជួយជ្រោមជ្រែងពីបណ្តាប្រទេសអន្តរជាតិជាមិត្ត ជាពិសេស ជំហរដ៏រឹងមាំរបស់រាជរដ្ឋាភិបាលកម្ពុជាធ្វើឱ្យអាជ្ញាធរជាតិអប្សរាទទួលបានជោគជ័យ។ ក្នុងឆ្នាំ២០០៤ អង្គរត្រូវបានដកចេញពីបញ្ជីបេតិកភណ្ឌប្រឈមនឹងគ្រោះថ្នាក់ ហើយបន្ទាប់មកទៀត អាជ្ញាធរជាតិអប្សរាបានកំណត់គោលដៅបន្ថែមទៀត គឺការអភិវឌ្ឍដោយចីរភាពបន្ថែមលើការអភិរក្ស។ ក្រៅពីធានាឱ្យបាននូវកិច្ចការអភិរក្ស និងការអភិវឌ្ឍដោយចីរភាព ការងារដែលសំខាន់មួយទៀត គឺការយកចិត្តទុកដាក់ចំពោះប្រជាពលរដ្ឋរស់នៅក្នុងតំបន់អង្គរទាំង១១២ភូមិ ដែលជាផ្នែកមួយដ៏សំខាន់ក្នុងបេតិកភណ្ឌអរូបី ការថែរក្សាទំនៀមទម្លាប់ប្រពៃណី និងអត្តសញ្ញាណរបស់តំបន់អង្គរ ឱ្យមានជីវិតរស់រវើក។ ដោយសារកិច្ចខិតខំប្រឹងប្រែងរបស់រាជរដ្ឋាភិបាល រួមជាមួយអាជ្ញាធរជាតិអប្សរា នៅឆ្នាំ២០២៣ អង្គរ ត្រូវបានស្ថាប័នអន្តរជាតិទទួលស្គាល់ និងយកធ្វើជាគំរូ ក្នុងការអនុវត្តទៅលើបេតិកភណ្ឌផ្សេងទៀតលើពិភពលោក ក្នុងចំណោមបេតិកភណ្ឌ៣ប្រភេទ គឺបេតិកភណ្ឌក្នុងសង្រ្គាម បេតិកភណ្ឌក្រោយសង្រ្គាម និងបេតិកភណ្ឌជោគជ័យ។ឯកឧត្តមអគ្គនាយក មានប្រសាសន៍ទៀតថា សមិទ្ធផលទាំងអស់នេះ មិនអាចកើតឡើងបានទេ បើគ្មានសន្តិភាព និងការគាំទ្រពីថ្នាក់ដឹកនាំប្រទេសប្រកបដោយភាពឈ្លាសវៃរបស់ប្រមុខរាជរដ្ឋាភិបាលកម្ពុជាគ្រប់ជាន់ថ្នាក់ ដៃគូអន្តរជាតិ និងឧទ្ទិសព្រះរាជកុសលថ្វាយ ព្រះករុណា ព្រះបរមរតនកោដ្ឋ ចំពោះព្រះរាជកិច្ចដ៏ថ្លៃថ្លាលើកិច្ចការវប្បធម៌ និងបេតិកភណ្ឌ និងសូមឧទ្ទិសកុសលផលបុណ្យ ចំពោះវិញ្ញាណក្ខន្ធ អតីតថ្នាក់ដឹកនាំជាតិ អន្តរជាតិ និងឥស្សរជនផ្សេងទៀត ចំពោះបុព្វហេតុថែរក្សា ការពាររមណីយដ្ឋានអង្គរ។លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ និងជាប្រធានក្រុមប្រឹក្សាភិបាលអាជ្ញាធរជាតិអប្សរាមានប្រសាសន៍ថា ពិធីប្រារព្ធខួប៣០ឆ្នាំនៃការបង្កើតអាជ្ញាធរជាតិអប្សរា ធ្វើឡើងក្រៅពីរម្លឹកការដំណើរការដំបូងនៃអាជ្ញាធរជាតិអប្សរា ការខិតខំប្រឹងប្រែងកន្លងមក របស់បុព្វការីជន និងឥស្សរជនជាតិ អន្តរជាតិគ្រប់ជំនាន់ ដែលបានខិតខំកសាង ថែរក្សា ការពារ និងអភិរក្សរមណីយដ្ឋានអង្គរ មរតកវប្បធម៌ដ៏មានតម្លៃមិនអាចកាត់ថ្លៃបាន។ លោកជំទាវថា ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន និងការបន្តស្មារតីដ៏ត្រឹមត្រូវ និងឈ្លាសវៃរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ធ្វើឱ្យវិស័យទេសចរណ៍ និងវប្បធម៌កំពុងមានវឌ្ឍនភាព និងជាវិស័យមានភាពប្រទាក់ក្រឡាគ្នា គាំទ្រគ្នា ដើម្បីទាក់ទាញទេសចរជាតិ និងអន្តរជាតិ។ ជាក់ស្តែង កិច្ចអភិរក្ស និងអភិវឌ្ឍន៍រមណីយដ្ឋានអង្គរទាំងមូល បានផ្លាស់ប្តូរប្រកបដោយសោភ័ណភាព ទៅតាមអនុសាសន៍ដ៏ថ្លៃថ្លារបស់ថ្នាក់ដឹកនាំកំពូលជាតិ រហូតមានការទទួលស្គាល់ និងកោតសរសើរពីសាធារណជន។លោកជំទាវបណ្ឌិតសភាចារ្យមានប្រសាសន៍កោតសរសើរចំពោះការខិតខំប្រឹងប្រែងរបស់ថ្នាក់ដឹកនាំ មន្ត្រីរាជការ បុគ្គលិក ភ្នាក់ងារ ពលករ និងឆ្មាំទាំងអស់នៃអាជ្ញាជាតិអប្សរា និងអាជ្ញាធរពាក់ព័ន្ធជាតិ និងអន្តរជាតិ ដែលបានខិតខំប្រឹងប្រែងយកអស់កម្លាំងកាយចិត្ត បញ្ញាស្មារតី ថែរក្សា ការពារ អភិរក្ស និងអភិវឌ្ឍន៍រមណីយដ្ឋានអង្គរប្រកបដោយការយកចិត្តទុកដាក់៕

មន្ទីរពេទ្យយោធាបំពាក់ឧបករណ៍ទំនើបៗកាន់តែច្រើនរួមទាំងម៉ាស៊ីនវះកាត់បេះដូង ឆ្អឹងខ្នង និងសរសៃឈាម

មន្ទីរពេទ្យព្រះកេតុមាលា ឬហៅកាត់ថាមន្ទីរពេទ្យទាហាន បានបំពាក់ឧបករណ៍កាន់តែទំនើបបន្ថែមទៀត ដែលសុទ្ធតែយកមកពីប្រទេសជប៉ុន ចិន អាល្លឺម៉ង និងប្រទេសមួយចំនួនទៀតដើម្បីបម្រើសេវាព្យាបាល ដល់បងប្អូនប្រជាពលរដ្ឋ ខណៈឧករណ៍ទាំងនោះអាចធ្វើការវះកាត់បេះដូង ឆ្អឹងខ្នង សរសៃឈាម តម្រង់នោម ខួរក្បាល វះកាត់ក្រលៀន និងជំងឺជាច្រើនទៀត។ថ្លែងប្រាប់អ្នកសារព័ត៌មាន នៅថ្ងៃទី១៩ ខែកុម្ភៈ ឆ្នាំ២០២៥នេះ ឧត្តមសេនីយ៍ឯក លី សុវណ្ណ ជាប្រធានមន្ទីរពេទ្យព្រះកេតុមាលាបានឲ្យដឹងថា សព្វថ្ងៃនេះមន្ទីរពេទ្យបានកំពុងបំពាក់ឧបករណ៍ទំនើបៗជាច្រើនទៀតជាបន្តបន្ទាប់ រួមទាំងក្រុមវេជ្ជបណ្ឌិត ដើម្បីបម្រើសេវាព្យាបាលជំងឺទូទៅជូនដល់បងប្អូនប្រជាពលរដ្ឋ ខណៈបច្ចុប្បន្នមន្ទីរពេទ្យទាហានមួយនេះ បានកំពុងធ្វើការសហការជាមួយបេឡាជាតិសន្តិសុខសង្គម ដែលហៅកាត់ថា ប.ស.ស.នោះ។ឯកឧត្តមឧត្តមសេនីយ៍ឯក លី សុវណ្ណ បានបញ្ជាក់ឲ្យដឹងទៀតថា ក្រៅពីបំពាក់នូវឧបករណ៍ទំនើបៗកាន់តែច្រើនរួមទាំងក្រុមវេជ្ជបណ្ឌិតនោះ មន្ទីរពេទ្យក៏បានពង្រីកនូវអគារស្នាក់នៅ និងព្យាបាលរបស់អ្នកជម្ងឺកាន់តែច្រើនបន្ថែមទៀតផងដែរ ខណៈសព្វថ្ងៃអ្នកជំងឺមកទទួលសម្រាកព្យាបាលនូវមន្ទីរពេទ្យនេះកាន់តែច្រើនជាងមុន ពោលគឺមួយថ្ងៃរហូតដល់ជាងពីររយនាក់ ដោយកាលពីកន្លងទៅមានត្រឹមតែជាង៣០នាក់ក្នុងមួយថ្ងៃៗនោះ។សូមបញ្ជាក់ថា បច្ចុប្បន្នមន្ទីរពេទ្យកេតុមាលាទទួលការព្យាបាលជំងឺទូទៅ ជូនដល់បងប្អូនប្រជាពលរដ្ឋដោយមិនគិតថ្លៃ ហើយមួយវិញទៀតមន្ទីរពេទ្យក៏បានធ្វើការសហការជាមួយបេឡាសន្តិសុខសង្គម(បសស)ផងដែរ ដើម្បីចូលរួមជាមួយរាជរដ្ឋាភិបាលក្នុងការកែលម្អរគុណភាពសេវាសុខាភិបាល និងដើម្បី ឆ្លើយតបចំពោះការរំពឹងទុករបស់បងប្អូនប្រជាពលរដ្ឋខ្មែរទូទាំងប្រទេសនោះ។ឧត្តមសេនីយ៍ឯក លី សុវណ្ណ បានលើកឡើងទៀត រាជរដ្ឋាភិបាល អាណត្តិទី៧ បានបន្តយកចិត្តទុកដាក់ និងពង្រឹងគុណភាពសេវាសុខាភិបាលទាំងអស់តាមមូលដ្ឋាននៅទូទាំងប្រទេស ដោយពង្រឹងការពង្រាយគ្រូពេទ្យបន្ថែមទៀត ហើយផ្ដល់សេវា២៤ម៉ោងលើ២៤ម៉ោង ខណៈការណ៍មន្ទីរពេទ្យកេតុមាលាបានបើកចំហរព្យាបាលជូនប្រជាពលរដ្ឋ២៤ម៉ោងលើ២៤ម៉ោង ដើម្បីឆ្លើយតបនឹងការរំពឹងទុករបស់អ្នកជំងឺ និងបង្កើនជំនឿទុកចិត្ត របស់ប្រជាពលរដ្ឋមកលើប្រព័ន្ធសុខាភិបាលសាធារណៈ ក្នុងនោះចាំបាច់ត្រូវពង្រឹងប្រសិទ្ធភាព នៃយន្តការតាមដាន និងវាយតម្លៃគុណភាពសេវាសុខាភិបាល ដែលកំពុងអនុវត្តនាពេលបច្ចុប្បន្ននេះ៕ អត្ថបទ៖ បាន ចក់

ក្រសួងការងារ សហការជាមួយរោងចក្រ ផ្តល់ការងារថ្មីដល់កម្មករ និយោជិត នៃរោងចក្រ ហ័្វរម៉ាត ក្រោយពេលអគ្គិភ័យឆាបឆេះ

ភ្នំពេញ៖ កម្មករនិយោជិតនៃរោងចក្រ ហ្វ័រម៉ាត (ខេមបូឌា) ខូ អិលធីឌី ដែលត្រូវបានអគ្គិភ័យឆាបឆេះ បានបង្ហាញការ ពេញចិត្តជាខ្លាំង ដែលអាចរកកន្លែងការងារថ្មីធ្វើបានលឿន ងាយស្រួល ប្រកបដោយទំនុកចិត្ត តាមរយៈការជួយសម្របសម្រួលនិងយកចិត្តទុកដាក់ពីក្រុមការងារ នៃមជ្ឈមណ្ឌលការងារចល័តនៃទីភ្នាក់ងារជាតិមុខរបរ និងការងារ (NEA) របស់ក្រសួងការងារ និងបណ្តុះបណ្តាលវិជ្ជាជីវៈ។ អ្នកស្រី ច្រឹង ពៅ អតីតកម្មការិនីរោងចក្រ ហ្វ័រម៉ាត បានលើកឡើងថា បន្ទាប់ពីរោងចក្រត្រូវបានអគ្គិភ័យឆាបឆេះ ពិតជាមានការបារម្ភក្នុងការស្វែងរកកន្លែងការងារថ្មីធ្វើ ដើម្បីរកចំណូលដោះស្រាយជីវភាពក្នុងគ្រួសារ។ ទន្ទឹមនេះ អ្នកស្រី បានដាក់ពាក្យស្វែងរកការងារធ្វើភ្លាមៗផងដែរ តាមរយៈ NEA ចល័ត ដែលបានចុះមកដល់ទីតាំងនៅមុខរោងចក្រតែម្ដង។ ដោយមិនរងចាំយូរឡើយ អ្នកស្រីក៏ត្រូវបានជ្រើសរើសចូលធ្វើការងារនៅក្នុងរោងចក្រ ខេអេច វីនស្តារ ហ្កាម៉ិន ឯ.ក ដែលនៅមិនឆ្ងាយប៉ុន្មានពីកន្លែងធ្វើការចាស់នោះទេ គឺពិតជាធ្វើឱ្យលោកស្រីសប្បាយចិត្តបំផុត។ ជាមួយគ្នានេះ អ្នកស្រី ច្រឹង ចាន់ អតីតកម្មការិនីរោងចក្រ ហ្វ័រម៉ាត ក៏បានលើកឡើងផងដែរថា ក្រោយពីបានដាក់ពាក្យចុះឈ្មោះស្វែងរកការងារធ្វើថ្មី តាមរយៈ NEA ចល័តរបស់ក្រសួងការងារ និងបណ្ដុះបណ្ដាលវិជ្ជាជីវៈ គឺមិនរង់ចាំយូរនោះទេ អ្នកស្រីក៏ទទួលបានការងារ ដែលធ្វើឱ្យលោកស្រីរំភើបស្ទើរស្រក់ទឹកភ្នែក និងត្រេកអរជាខ្លាំង។ រោងចក្រថ្មីដែលអ្នកស្រីចូលធ្វើការនេះ មានការយកចិត្តទុកដាក់ និងជួយសម្រួលដល់លោកស្រីបានយ៉ាងល្អ។ កម្មការិនីទាំងពីររូបនេះ បានថ្លែងអំណរគុណដល់ក្រសួងការងារ តាមរយៈ NEA ចល័ត ដែលបានជួយសម្រួលទុក្ខលំបាករបស់កម្មករនិយោជិតបានយ៉ាងលឿន ដោយបានជួយរកការងារថ្មីឱ្យកម្មករនិយោជិតធ្វើបានភ្លាមៗ ក្រោយហេតុការណ៍អគ្គិភ័យឆាបឆេះរោងចក្រដែលពួកគាត់បានធ្វើការ។ លោក វ៉ិត សង្ហា ប្រធានរដ្ឋបាល និងអនុលោមច្បាប់នៃរោងចក្រ ខេអេច បានលើកឡើងថា ដោយមិនរងចាំយូរ ក្រោយពីបានទទួលដំណឹងអំពីហេតុការណ៍អគ្គិភ័យឆាបឆេះរោងចក្រ ហ្វ័រម៉ាត ភ្លាមៗក្រុមការងាររោងចក្រ បានចូលរួមសហការ ជាមួយមជ្ឈមណ្ឌលការងារចល័តនៃទីភ្នាក់ងារជាតិមុខរបរ និងការងារ NEA ធ្វើយ៉ាងណាចូលរួមចំណែកជួយសម្រួលការលំបាករបស់ កម្មករនិយោជិតឱ្យបានទាន់ពេលវេលា ស្របពេលដែលខាងរោងចក្ររបស់លោកកំពុងតម្រូវការកម្លាំងកម្មករនិយោជិតជាច្រើននាក់បន្ថែមផងដែរ។ លោកបញ្ជាក់ថា សម្រាប់កម្មករនិយោជិតទាំងអស់ សូមកុំមានការព្រួយបារម្ភ ខាងរោងចក្រ នឹងយកចិត្តទុកដាក់ខ្ពស់ និងផ្ដល់ជូនអត្ថប្រយោជន៍ផ្សេងៗស្របតាមច្បាប់ការងារកំណត់ជូនផងដែរ។ លោកបានអំពាវនាវដល់កម្មករនិយោជិត និងសាធារណជនទាំងអស់ អាចមកចុះឈ្មោះ ដាក់ពាក្យស្វែងរកការងារធ្វើតាមរយៈ NEA ឬមកកាន់រោងចក្រផ្ទាល់បានដូចគ្នា។ សូមជម្រាបជូនថា មន្រ្ដីនៃទីភ្នាក់ងារជាតិមុខរបរ និងការងារ (NEA) គឺនៅតែបន្តរង់ចាំជួយសម្រួលដល់ការចុះឈ្មោះស្វែងរកការងារធ្វើភ្លាមៗជូនបងប្អូនកម្មករនិយោជិតនៅមុខរោងចក្រហ្វ័រម៉ាត តែម្តង ពោលគឺចាប់ពីម៉ោង ៨ព្រឹក រហូតដល់ម៉ោង ៥ល្ងាច នៅមុខរោងចក្រនេះតែម្តង៕

បណ្ដាញសង្គម

ព័ត៌មានថ្មីៗ

វិមានក្រឹមឡាំង៖លោក Putin បើកឱ្យមានសន្តិភាពជាមួយអ៊ុយក្រែនលុះត្រាតែក្រោយពេលគោលដៅយោធារុស្ស៊ីត្រូវបានសម្រេច

សមាគមកាយឫទ្ធិនារីកម្ពុជាសាខាខេត្តមណ្ឌលគិរី បានចូលរួមសកម្មភាពជាច្រើននៅក្នុងសង្គមស្របតាមគម្រោងសកម្មភាពទាំង៥ របស់សមាគម

ឯកឧត្តម ឌិត ទីណា បន្តដំណើរចុះជួបសំណេះសំណាលជាមួយសហគមន៍ទំនើបស្វាយចន្ទីភ្នំគូលែន នៅខេត្តសៀមរាប

លោក Trump ទទូចថាទីតាំងនុយក្លេអ៊ែរអ៊ីរ៉ង់ត្រូវបានបំផ្លាញស្របពេលមានរបាយការណ៍មួយចំនួនថាបានរួចផុតពីការបំផ្លាញ

ពលរដ្ឋជប៉ុនបោះឆ្នោតក្នុងការសាកល្បងដ៏សំខាន់សម្រាប់នាយករដ្ឋមន្ត្រី Shigeru Ishiba

អ្នកស្លាប់ក្នុងជំនន់ទឹកភ្លៀងនៅកូរ៉េខាងត្បូងសប្តាហ៍នេះ កើនឡើងដល់១៤ នាក់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877