នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
នាយឧត្តមសេនីយ៍ ខ្វាន់ ស៊ាម៖ ភារកិច្ចស្នូលរបស់កងកម្លាំងក្នុងសម័យសន្តិភាព គឺធ្វើទំនាក់ទំនងល្អជាមួយប្រទេសជិតខាង
រយៈពេល៦ថ្ងៃ ក្នុងយុទ្ធនាការ​បោសសម្អាត​ករណីឆបោកតាមប្រព័ន្ធបច្ចេកវិទ្យា សមត្ថកិច្ចខេត្តពោធិ៍សាត់ ឃាត់ខ្លួនជនបរទេស ចំនួន១០២នាក់
សមត្ថកិច្ចរាជធានីភ្នំពេញបង្ក្រាបទីតាំងបទល្មើសឆបោកតាមអនឡាញ២កន្លែងទៀតឃាត់ខ្លួនមនុស្សបាន១៣៣នាក់
បទបញ្ជាបោសសម្អាតការឆបោកតាមប្រព័ន្ធបច្ចេកវិទ្យា នឹងជួយទាក់ទាញអ្នកវិនិយោគកាន់តែច្រើនថែមទៀតមកកាន់កម្ពុជា

ព័ត៌មានជាតិ

ថ្ងៃនេះ NEA នាំក្រុមហ៊ុនធំៗចំនួន១៩ ទៅជ្រើសរើសបុគ្គលិកផ្ទាល់ភ្លាមៗជាង ២ ០០០ កន្លែង នៅក្នុងបរិវេណ វិទ្យាស្ថានជាតិពាណិជ្ជសាស្រ្ត (NIB)

2025/02/13 12:49:03 pm        88
Facebook Telegram Linkin
ភ្នំពេញ៖ នាព្រឹកថ្ងៃទី១៣ ខែកុម្ភៈ ឆ្នាំ២០២៥ នេះ ទីភ្នាក់ងារជាតិមុខរបរ និងការងារ (NEA) រួមជាមួយ វិទ្យាស្ថានជាតិពាណិជ្ជសាស្រ្ត (NIB) នៃក្រសួងការងារ និងបណ្តុះបណ្តាលវិជ្ជាជីវៈ ដោយមានការសហការពី ស.ស.យ.ក វិស័យការងារ សន្តិសុខសង្គម និងបណ្តុះបណ្តាលវិជ្ជាជីវៈ បានរៀបចំ “វេទិកាការងារ និងឱកាសកម្មសិក្សាការងារ” រយៈពេលមួយថ្ងៃពេញ ដោយនាំយកក្រុមហ៊ុនធំៗ ១៩ ទៅជ្រើសរើសបុគ្គលិកដោយផ្ទាល់ភ្លាមៗជាង ២ ០០០ កន្លែង នៅក្នុងបរិវេណវិទ្យាស្ថាន ផ្ទាល់តែម្តង។ វេទិកាការងារនេះ ត្រូវបានបង្កើតឡើងក្នុងគោលបំណងដើម្បីសម្រួលដល់ យុវជន សិស្ស/និស្សិត ដែលមានបំណងស្វែងរកការងារធ្វើ និងនិយោជកដែលត្រូវការកម្លាំងពលកម្ម ឱ្យបានជួបគ្នានៅកន្លែងតែមួយដោយងាយស្រួល។ យុវជន សិស្ស/និស្សិត និងអ្នកស្វែងរកការងារ អាចយកប្រវត្តិរូបសង្ខេប (CV) មកដាក់ពាក្យ និងសម្ភាសការងារភ្លាមៗជាមួយតំណាងក្រុមហ៊ុនទាំង ១៩ ចាប់ពីពេលឥឡូវនេះ ដល់ម៉ោង ៥ ល្ងាច៕

រដ្ឋាភិបាលកម្ពុជារៀបចំកម្មវិធីដើម្បីស្វែងរកឱកាសជំរុញពាណិជ្ជកម្មវិស័យស្រូវអង្ករនៅប្រទេសហ្វីលីពីន

2025/02/13 12:44:03 pm        141
Facebook Telegram Linkin
ភ្នំពេញ៖ ក្រុមគណៈប្រតិភូកម្ពុជា រួមទាំងតំណាងមកពីសហព័ន្ធស្រូវអង្ករកម្ពុជា កាលពីកន្លងទៅនេះ បានចូលរួមកម្មវិធីផ្គូផ្គងទីផ្សារនៃវិស័យស្រូវអង្ករ កម្ពុជា-ហ្វីលីពីន នៅទីក្រុងម៉ានីល ប្រទេសហ្វីលីពីន ដែលរៀបចំឡើងដោយក្រុមការងារក្រសួងពាណិជ្ជកម្មកម្ពុជា ដើម្បីបានប្រមូលផ្តុំអ្នកនាំចេញ-នាំចូលសំខាន់ៗក្នុងវិស័យស្រូវអង្ករ នៃប្រទេសទាំងពីរ ក្នុងគោលបំណងស្វែងរកឱកាសនៃការជំរុញពាណិជ្ជកម្មក្នុងវិស័យស្រូវអង្ករ។យោងតាមក្រសួងពាណិជ្ជកម្មកម្ពុជា នៅថ្ងៃទី១២ ខែកុម្ភៈ ឆ្នាំ២០២៥កន្លងទៅ បានឲ្យដឹងថា ក្នុងឱកាសនោះ ក៏មានកិច្ចពិភាក្សាស្ដីពីការពង្រីកសក្តានុពល និងជំរុញការនាំចេញអង្កររបស់កម្ពុជាទៅកាន់ប្រទេសហ្វីលីពីន ព្រមទាំងលើកកម្ពស់ការសម្រួលពាណិជ្ជកម្ម ការធានាគុណភាព និងប្រសិទ្ធភាពខ្សែច្រវាក់ផ្គត់ផ្គង់ផងដែរ។ជាលទ្ធផលកម្មវិធីផ្គូផ្គងនេះ បានផ្គូផ្គងពាណិជ្ជកម្មតាមរយៈយន្តការ B2B ដោយជំរុញទំនាក់ទំនងផ្ទាល់ រវាងអ្នកនាំចេញអង្ករកម្ពុជា និងអ្នកទទួលទិញហ្វីលីពីន ក្នុងការពង្រឹងភាពជាដៃគូពាណិជ្ជកម្មឱ្យកាន់តែរឹងមាំ និងបង្កើនលទ្ធភាពក្នុងការពង្រីកទីផ្សារអង្ករកម្ពុជាទៅកាន់ប្រទេសហ្វីលីពីន៕

រដ្ឋមន្ត្រីក្រសួងសុខាភិបាល អញ្ជើញបើកទិវាវេជ្ជសាស្ត្រ-សល្យសាស្រ្តលើកទី២៧ និងថែទាំវេជ្ជសាស្រ្តលើកទី១៤

2025/02/13 12:38:55 pm        59
Facebook Telegram Linkin
ឯកឧត្តមសាស្រ្តាចារ្យ ឈាង រ៉ា រដ្ឋមន្ត្រីក្រសួងសុខាភិបាល នាព្រឹកថ្ងៃទី១៣ ខែកុម្ភះ នេះ បានអញ្ជើញជាអធិបតីបើកទិវាវេជ្ជសាស្រ្ត-សល្យសាស្រ្តលើកទី២៧ និងថែទាំវេជ្ជសាស្រ្តលើកទី១៤ ក្រោមប្រធានបទ«ការព្យាបាល និងថែទាំប្រកបដោយនវានុវត្តន៍ ក្នុងយុគសម័យឌីជីថល» និងបំពាក់គ្រឿងឥស្សរិយស ជូនដល់សប្បុរសជន ថ្នាក់ដឹកនាំ និងមន្រី្តរាជការ នៃមនី្ទរពេទ្យមិត្តភាពខ្មែរ-សូវៀត រយៈពេល០២ថ្ងៃ ចាប់ពីថ្ងៃទី១៣-១៤ ខែកុម្ភះ ឆ្នាំ២០២៥។ឯកឧត្តមសាស្រ្តាចារ្យ ងី ម៉េង នាយកមនី្ទរពេទ្យមិត្តភាពខ្មែរ-សូវៀត បានលើកឡើងថា ទិវានេះមន្ទីរពេទ្យមិត្តភាពខ្មែរ-សូវៀត តែងតែប្រារព្ធធ្វើប្រចាំឆ្នាំ។ ដោយឡែកក្នុងឆ្នាំ២០២៥នេះ ការរៀបចំទិវាវេជ្ជសាស្ត្រ-សល្យសាស្ត្រ និងថែទាំវេជ្ជសាស្ត្រ គឺសំដៅលើ «ការព្យាបាល និងថែទាំប្រកបដោយនវានុវត្តន៍ក្នុងយុគសម័យឌីជីថល» ដែលប្រធានបទ សំខាន់ៗ ទាក់ទងនឹងឯកទេសធំៗមានជាអាទិ៍ ឯកទេសបេះដូង និងសរសៃឈាម, ឯកទេសទឹកនោមផ្អែម និងមេតាបូលីស, ឯកទេសវះកាត់មុខ-មាត់ ឆ្អឹងថ្គាម និងឯកទេសសម្ភព ដែលក្នុងឱកាសនោះមានការចូលរួមពីសាស្ត្រាចារ្យ វេជ្ជបណ្ឌិត និង គិលានុបដ្ឋាក ឆ្មប និងអ្នកផ្តល់សេវាសុខាភិបាលផ្សេងទៀតនៅក្នុងមន្ទីរពេទ្យ តាមបណ្តាមន្ទីរពេទ្យជាតិនានា និងសាកល វិទ្យាល័យសុខាភិបាលផ្សេងទៀតក្នុងប្រទេស។ ទន្ទឹមនឹងនេះ ទិវានេះគឺជាឱកាសដ៏មានតម្លៃសម្រាប់គ្រូពេទ្យ គិលានុបដ្ឋាក និងនិស្សិតវេជ្ជសាស្ត្រគ្រប់រូបក្នុងការស្រង់យកចំណេះដឹងថ្មីៗបន្ថែមដើម្បីជាទុនទៅអនាគត។ឆ្លៀតក្នុងឱកាសនោះដែរឯកឧត្តមសាស្រ្តាចារ្យ ឈាង រ៉ា រដ្ឋមន្រី្តក្រសួងសុខាភិបាល បានថ្លែងថា កម្ពុជា ប្រកាន់យកការចែករំលែកនូវចំណេះដឹង ជាពិសេសការចែករំលែកលើវិស័យវេជ្ជសាស្រ្ត ដើម្បីឲ្យវិស័យវេជ្ជសាស្រ្តនៅកម្ពុជានេះ ក្លាយទៅជាវេជ្ជសាស្រ្តមួយកាន់តែលូតលាស់ឡើង។ ដូច្នេះតាមរយៈទិវានេះថ្ងៃនេះ ដឹងប្រាប់ អ្នកស្តាប់យក ហើយយកលទ្ធផលទាំងអស់នេះ ទៅអនុវត្តន៍ឲ្យទទួលបានផលល្អ។ ឯកឧត្តមសាស្រ្តាចារ្យ ឈាង រ៉ា ក៏សូមសម្តែងនូវការកោតសរសើរដោយស្មោះ ចំពោះគណៈកម្មាការវេជ្ជសាស្រ្ត-សល្យសាស្រ្តព្រមទាំងអ្នកថែទាំផងដែរ ដែលតែងតែសហការគ្នារៀបចំប្រារព្ធនូវទិវានេះជារៀងរាល់ឆ្នាំ ដែលជាគុណតម្លៃដ៏ធំក្នុងការចែករំលែកបទពិសោធន៍ ចំណេះដឹងថ្មីៗភាពជឿនលឿនវេជ្ជសាស្រ្ត ទៅដល់សហភាតរៈទាំងអស់ក្នុងមន្ទីរពេទ្យមិត្តភាពខ្មែរ សូវៀតផ្ទាល់ ក៏ដូចជាតាមបណ្តាខេត្តនានា ដើម្បីលើកស្ទួយវេជ្ជសាស្រ្ត វិស័យសុខាភិបាល បម្រើជូនប្រជាពលរដ្ឋឲ្យមានគុណភាព ប្រសិទ្ធភាព ស័ក្តិសិទ្ធិភាព ហើយជានិច្ចកាល គឺក្រមសីលធម៌វិជ្ជាជីវៈដែលជាកាតព្វកិច្ចចាំបាច់របស់យើង។ជាចុងក្រោយឯកឧត្តមសាស្រ្តាចារ្យ ឈាង រ៉ា មានសេចកី្តសង្ឃឹមយ៉ាងមុតម៉ាំចំពោះការជួបជុំគ្នានេះ ដែលមានរយៈពេល២ថ្ងៃ ដើម្បីទទួលបាននូវបទពិសោធន៍ល្អៗ យកទៅធ្វើការពិនិត្យ ព្យាបាលអ្នកជំងឺឲ្យបានល្អប្រសើរ ស្របតាមផែនការយុទ្ធសាស្រ្តរបស់ក្រសួងសុខាភិបាល និងស្របតាមយុទ្ធសាស្រ្តបញ្ចកោណរបស់រាជរដ្ឋាភិបាលអាណតិ្តទី៧នេះ ដែលមានសម្តេចមហាបវរធិបតី ហ៊ុន ម៉ាណែត នាយករដ្ឋមន្រី្តនៃព្រះរាជាណាចក្រកម្ពុជា ហើយសម្តេចបានជួយលើវិស័យសុខាភិបាលជាច្រើន ដោយផ្ទាល់ថែមទៀតផង ដោយសម្តេច បានស្វែងយល់ និងយល់ច្បាស់អំពីវិស័យសុខាភិបាលជានិច្ច៕ អត្ថបទ រដ្ឋា

ពលករទេសន្តរប្រវេសន៍នៅប្រទេសជប៉ុន នឹងទទួលបានយន្តការគាំពារកាន់តែប្រសើរ តាមរយៈគម្រោង JICA និងអង្គការ ILO

2025/02/13 12:19:10 pm        136
Facebook Telegram Linkin
ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី១២ កុម្ភៈ ឆ្នាំ២០២៥នេះ បានជួប និងពិភាក្សាការងារជាមួយ​គណៈប្រតិភូ​នៃទីភ្នាក់ងារ​សហ​ប្រតិបត្តិការ​អន្តរជាតិ​នៃ​ប្រទេសជប៉ុន (JICA) និងការិយាល័យប្រចាំតំបន់អាស៊ីប៉ាស៊ីហ្វិក នៃអង្គការ​អន្តរជាតិ​ខាង​ការងារ (ROAP, ILO) ដែលដឹកនាំគណៈប្រតិភូដោយលោក កេនីឆី ស៊ីស៊ីដូ (Kenichi SHISHIDO) ជំនួយការពិសេសរបស់ប្រធានទីស្នាក់ការកណ្តាល JICA នៅទីស្តីការ​ក្រសួង។នៅក្រោយចប់ជំនួបការងារនេះ ក្រសួងការងារ និងបណ្តុះបណ្តាលវិជ្ជាជីវៈ បាន​ឲ្យ​ដឹង​ក្នុង​បណ្តាញ​សង្គមថា នាឱកាសដ៏មានសារៈសំខាន់នេះ ឯកឧត្តមរដ្ឋមន្រ្តី បានគូសបញ្ជាក់ថា គម្រោង​ក្នុងការបង្កើតឱ្យមានយន្តការគាំពារ និងដោះស្រាយបញ្ហា និងការ​ប្រឈម​របស់​ពលករ​ទេសន្តរ​ប្រវេសន៍នៅក្នុងប្រទេសជប៉ុន ថាពិតជាមានសារៈសំខាន់​ដើម្បី​ជំរុញ​ឱ្យ​កាន់​តែ​ប្រសើរ​ឡើង​ថែម​ទៀតនៃកិច្ចសហប្រតិបត្តិការរវាងប្រទេសបញ្ជូនពលករ និងប្រទេសទទួល​ពលករ​ទៅ​ធ្វើ​ការ​នៅ​ក្នុងប្រទេសជប៉ុន។ ឯកឧត្តមរដ្ឋមន្ត្រី បានលើកឡើងថា ប្រទេសជប៉ុននៅតែជាទិសដៅមួយ​ដែលពលករកម្ពុជាចង់ទៅធ្វើការ ខណៈដែលទទួលបានប្រាក់អត្ថប្រយោជន៍ខ្ពស់ រួមនិងទទួលបានជំនាញ និងបច្ចេកទេសការងារខ្ពស់ផងដែរ។ ឯកឧត្តម សង្ឃឹមថា តាមរយៈគម្រោងនេះ នឹងជំរុញឱ្យមានការផ្សព្វផ្សាយ និងស្វែងយល់ពីគ្នាកាន់តែប្រសើរ ជាពិសេសអំពីច្បាប់ការងារ និងអត្ថប្រយោជន៍ផ្សេងៗនៅក្នុងប្រទេសជប៉ុន សម្រាប់ភ្នាក់ងារជ្រើសរើសកម្មសិក្សាការី និងពលករជំនាញកម្ពុជា និងភាគីជប៉ុនដែលត្រូវការកម្លាំងពលកម្ម។ ជាការឆ្លើយតប លោក កេនីឆី ស៊ីស៊ីដូ បានបង្ហាញការពេញចិត្តចំពោះកិច្ចសហប្រតិបត្តិការជាមួយក្រសួងការងារ និងបណ្តុះបណ្តាលវិជ្ជានៃប្រទេសកម្ពុជាលើគម្រោងនេះ ដែលនឹងជួយជំរុញការគាំពារកាន់តែប្រសើរសម្រាប់ពលករទេសន្តរប្រវេសន៍នៅក្នុងប្រទេសជប៉ុន ជាពិសេសការស្វែងយល់រវាងគ្នាកាន់តែប្រសើររវាងប្រទេសបញ្ជូនពលករ និងប្រទេសទទួលពលករ៕ អត្ថបទ៖ ឈិត បូរ៉ាវី 

មន្ទីរពេទ្យគន្ធបុប្ផា បានពិនិត្យ និងព្យាបាលជំងឺដល់កុមារប្រមាណជាង ១០ម៉ឺននាក់ ក្នុងរយៈពេល១ខែ ឆ្នាំ២០២៥

2025/02/13 12:12:35 pm        71
Facebook Telegram Linkin
តាមរយៈការបង្ហាញពីតួលេខព្យាបាលជំងឺរបស់មន្ទីរពេទ្យគន្ធបុប្ផា ក្នុងខែមករា ឆ្នាំ២០២៥ នេះ, មានកុមារចំនួន ៨៨ ៦៤៨ នាក់ បានមកទទួលការពិនិត្យ និងព្យាបាលក្នុងផ្នែកជំងឺក្រៅ និងកុមារមានជំងឺធ្ងន់ៗចំនួន ១៥ ៤៦៥ នាក់ បានសម្រាកព្យាបាលនៅក្នុងមន្ទីរពេទ្យ ក្នុងនោះ មានចំនួន ២៨២ នាក់ មានជំងឺគ្រុនឈាន និង ២ ៦៦២ ត្រូវបានទទួលការវះកាត់។ ដោយឡែក ស្រ្តីមានផ្ទៃពោះចំនួន ៨ ៥៦៦ នាក់ បានមកពិនិត្យតាមដានផ្ទៃពោះ និងមកសម្រាលកូនចំនួន ១ ៧១៦ នាក់ ផងដែរ។សូមបបញ្ជាក់ថា រាល់ការពិនិត្យ និងព្យាបាលទារក កុមារ ស្រ្តីមានផ្ទៃពោះទាំងនេះ គឺធ្វើឡើងដោយមិនគិតថ្លៃ មិនរើសអើង គុណភាព និងប្រកបដោយវិជ្ជាជីវៈ៕ 

យុវជនឈប់យល់ខុសអំពីទិវានៃក្ដីស្រឡាញ់១៤កុម្ភៈ បែរមកចែករំលែកក្ដីស្រឡាញ់​ដល់អ្នកមានគុណវិញ

2025/02/13 12:07:30 pm        143
Facebook Telegram Linkin
ការយល់ដឹងពីថ្ងៃ ១៤កុម្ភៈ ក្នុងពេលបច្ចុប្បន្នបានផ្លាស់ប្ដូរមកភាពវិជ្ជមានច្រើនសម្រាប់ស្រទាប់យុវវ័យ ខណៈពួកគេដឹងច្បាស់ ថ្ងៃ ១៤កុម្ភៈ ជាទិវានៃក្ដីស្រឡាញ់ ពុំមែនជាថ្ងៃត្រូវលះបង់ ប្រព្រឹត្តិអំពើខុសឆ្គងនោះទេ ដោយបែរមកយកថ្ងៃនេះជាថ្ងៃចែករំលែកក្ដីស្រឡាញ់សម្រាប់មនុស្សជំវិញខ្លួន និងអ្នកមានគុណទៅវិញ។ថ្ងៃ ១៤កុម្ភៈ ទិវានៃក្ដីស្រឡាញ់ ទោះជាពិធីបុណ្យនៃជាតិសាសន៍ដទៃក្ដី តែវាបានហូរចូលសង្គមកម្ពុជា ជាច្រើនឆ្នាំមកហើយ។ អតីតកាលមានការយល់ខុស ដោយយុវជននាពេលនោះ ចាត់ទុកថ្ងៃ១៤កុម្ភៈ ជាថ្ងៃបុណ្យសង្សារ ដែលអាចឈានទៅការប្រព្រឹត្តិអំពើខុសឆ្គងប្រពៃណី។ ការយល់ឃើញដូចនេះ បានផ្លាស់ប្ដូរមកជាភាពវិជ្ជមានវិញ សម្រាប់យុវជននាពេលបច្ចុប្បន្ន។ ពួកគេលើកឡើងថា ថ្ងៃ ១៤កុម្ភៈ ជាថ្ងៃសម្រាប់បង្ហាញក្ដីស្រឡាញ់សម្រាប់មនុស្សគ្រប់គ្នា ចាប់រាប់ពីមិត្តិភក្តិ ក្រុមគ្រួសារ គ្រូបង្រៀន អ្នកបំពេញការងាររួមគ្នជាដើម។ក្នុងនាមជាសិស្ស ពួកគាត់ក៏គ្រោងទិញផ្កា ជូនលោកគ្រូ អ្នកគ្រូ នាឱកាសថ្ងៃ ១៤កុម្ភៈ ដើម្បីសម្ដែងការដឹងគុណចំពោះការខិតខំបង្រៀនផ្ដល់ចំណេះដឹងដល់សិស្សគ្រប់រូប។ រូបគេក៏នឹងទិញផ្កាជូនឪពុកម្ដាយ និងជួបជុំបងប្អូនញ៉ាំអាហាររួមគ្នាជាដើម។សម្រាប់ឱកាសថ្ងៃ ១៤កុម្ភៈស្អែកនេះ ក្រសួងវប្បធម៌ និងវិចិត្រសិល្យៈ បានចេញសេចក្ដីអំពាវនាវ ពន្យល់បន្ថែមពីអត្ថន័យថ្ងៃ ១៤កុម្ភៈ និងបញ្ជាក់ច្បាស់ពីអ្វីដែលយុវជនគួរប្រព្រឹត្តិ និងមិនត្រូវប្រព្រឹត្តិ។ សេចក្ដីអំពាវនេះ បានលើកឡើងដែរថា ទិវានៃក្តីស្រឡាញ់នៅកម្ពុជា គួរជាឱកាសមួយក្នុងការបង្ហាញអារម្មណ៍មនោសញ្ចេតនា និងកាយវិការចែករំលែក ធានានូវក្តីស្រឡាញ់ប្រកបដោយភាពថ្លៃថ្នូរ ស្មោះសរបរិសុទ្ធ ចំពោះមនុស្សជាទីស្រឡាញ់នៅជុំវិញខ្លួនយើងជាអាទិ៍៖ ក្រុមគ្រួសារ ឪពុកម្តាយ ប្តីប្រពន្ធ កូនចៅ ញាតិមិត្ត និងគួរតែជាកាយវិការចែករំលែកទៅដល់ ជនពិការ កុមារកំព្រា និងអ្នកដែលស្ថិតក្នុងស្ថានភាពលំបាកផ្សេងទៀត ក្រោមរូបភាព សរសេរលិខិតជូនពរ ការជូនអំណោយផ្សេងៗ ការសំណេះសំណាល ឬការទទួលទានអាហាររួមគ្នា ដោយក្តីសោមនស្សនិងការបន្សល់ទុកអនុស្សាវរីយ៍ល្អៗ។ទន្ទឹមគ្នានេះដែរ ក្រសួងអប់រំ យុវជន និងកីឡា ក៏បានចេញសេចក្ដីណែនាំស្ដីពី វិធានការទប់ស្កាត់សកម្មភាពមិនប្រក្រតីក្នុងទិវានៃក្ដីស្រឡាញ់ នៅតាមគ្រឹះស្ថានសិក្សាសាធារណៈ និងឯកជនផងដែរ។ សេចក្ដីណែនាំនោះមានរហូតដល់ ៧ចំណុចធំៗ៕ អត្ថបទ៖ គឹម ហុក

នាយឧត្តមសេនីយ៍ ម៉ឹង សំផន ចុះត្រួតពិនិត្យកងកម្លាំងកងពលតូចដឹកជញ្ជូនលេខ៩៩ បូមទឹកសង្រ្គោះស្រូវប្រាំងពលរដ្ឋ នៅស្រុកចន្រ្ទា ខេត្តស្វាយរៀង

2025/02/13 11:57:52 am        312
Facebook Telegram Linkin
នៅថ្ងៃទី១៣ ខែកុម្ភៈ ឆ្នាំ២០២៥នេះ នាយឧត្តមសេនីយ៍ ម៉ឹង សំផន រដ្ឋលេខាធិការ ក្រសួងការពារជាតិ និងជាប្រធានក្រុមការងារសម្របសម្រួលការត្រៀមរៀបចំឆ្លើយតបការសង្គ្រោះគ្រោះមន្តរាយក្រសួងការពារជាតិ បានអញ្ជើញចុះត្រួតពិនិត្យកងកម្លាំងកងពលតូចដឹកជញ្ជូនលេខ៩៩ ចុះបូមទឹកសង្រ្គោះស្រូវប្រាំងពលរដ្ឋនៅតាមបណ្តាឃុំនានា ស្រុកចន្រ្ទា ខេត្តស្វាយរៀង។សូមបញ្ជាក់ថា ក្រោយមានបទបញ្ជារបស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បទបញ្ជារបស់រដ្ឋមន្រ្តីក្រសួងការពារជាតិ ដោយគោរពបទបញ្ជាយ៉ាងម៉ឹងម៉ាត់របស់ នាយឧត្តមសេនីយ៍ ម៉ឹង សំផន រដ្ឋលេខាធិការ ក្រសួងការពារជាតិ និងជាប្រធានក្រុមការងារសម្របសម្រួល ការត្រៀមរៀបចំឆ្លើយតបការសង្គ្រោះ គ្រោះមន្តរាយក្រសួងការពារជាតិ និងបទបញ្ជាផ្ទាល់របស់ ឧត្តមសេនីយ៍ឯក ម៉ឹង ពន្លក អគ្គនាយក អគ្គនាយកដ្ឋានភស្តុភារ-ហិរញ្ញវត្ថុក្រសួងការពារជាតិ ឧត្តមសេនីយ៍ទោ ហ៊ុល សំអុន កាលពីថ្ងៃទី២ ខែកុម្ភៈកន្លងទៅថ្មីៗនេះ បានដឹកនាំកម្លាំងទ័ពចំនួន១៥០នាក់ រួមនិងម៉ាស៊ីនបូមទឹកចំនួន៣០គ្រឿង ទុយោបូមទឹក ចប បង្គី និងសម្ភារៈចាំបាច់មួយចំនួន ចុះជួយអន្តរាគមន៍ដោយផ្ទាល់ជាមួយអាជ្ញាធរស្រុកចន្ទ្រា ដើម្បីជួយសង្គ្រោះស្រូវ ប្រជាពលរដ្ឋ ដែលកំពុងប្រឈមនិងកង្វះទឹកស្រោចស្រព ស្ថិតនៅឃុំសំរោង ឃុំទួលស្តី និងឃុំច្រេស ស្រុកចន្ទ្រា ខេត្តស្វាយរៀង ចំនួន៦៥៧ហិកតា ក្នុងចំណោមស្រែប្រាំង សរុបចំនួន៤៧៤២ហិកតា៕

NEA នាំយកឱកាសការងារជិត៩ពាន់កន្លែង ជូនកម្មករនិយោជិតរោងចក្រ ហ្វ័រម៉ាត ដែលត្រូវបានអគ្គិភ័យឆាបឆេះ

2025/02/13 11:50:59 am        112
Facebook Telegram Linkin
មជ្ឈមណ្ឌលការងារចល័តនៃទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី១៣ ខែកុម្ភៈនេះ បានសហការជាមួយក្រុមហ៊ុន សហគ្រាសចំនួនជាង១០ ដោយផ្តល់ឱកាសការងារចំនួនជិត ៩ពាន់កន្លែង ជូនដល់ដល់កម្មករនិយោជិតរោងចក្រ ហ្វ័រម៉ាត (ខេមបូឌា) ខូ អិលធីឌី ដែលត្រូវបានឆាបឆេះកាលពីថ្មីៗកន្លងទៅ នៅសង្កាត់ព្រៃស ខណ្ឌដង្កោ រាជធានីភ្នំពេញ។លោក ជិន ខិ អនុប្រធានមជ្ឈមណ្ឌលការងាររាជធានីភ្នំពេញ បានឲ្យព័ត៌មាន ប៊ីធីវី ដឹងថា ជាការឆ្លើយតបស្ថានភាពចំពោះមុខ និងដើម្បីជួយសម្រួលបញ្ហាប្រឈមភ្លាមៗរបស់កម្មករនិយោជិត ពិសេសស្របតាមប្រសាសន៍របស់ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ មន្រ្ដីនៃ NEA ជាមួយក្រុមហ៊ុនឯកជន បានសហការគ្នាដើម្បីរង់ចាំជួយសម្របសម្រួលដល់ការចុះឈ្មោះ និងសម្ភាសន៍ការងារភ្លាមៗជូនកម្មករនិយោជិត។ លោកបានអំពាវនាវឱ្យកម្មករនិយោជិតទាំងអស់ នៃរោងចក្រដែលត្រូវបានអគ្គិភ័យឆាបឆេះ ក៏ដូចជាប្រជាពលរដ្ឋទូទៅរស់នៅតំបន់នេះ ក៏អាចអញ្ជើញមកចុះឈ្មោះស្វែងរកការងារធ្វើកន្លែងថ្មី តាមរយៈមជ្ឈមណ្ឌលការងារចល័ត ដែលមានមន្រ្ដី និងតំណាងរោងចក្រ សហគ្រាស រង់ចាំចុះឈ្មោះស្វែងរកការងារធ្វើភ្លាមៗជូនកម្មករនិយោជិតនៅមុខរោងចក្រ ហ្វ័រម៉ាត នេះតែម្តង។លោក ឆូយ វិបុល ប្រធានផ្នែកអនុលោមច្បាប់សង្គម មកពីរោងចក្រកាត់ដេរ សូឡាម៉ូដា ស្ថិតនៅស្រុកបាទី ខេត្តតាកែវ បានឲ្យ ប៊ីធីវី ដឹងថា សម្រាប់រោងចក្រលោកមានតម្រូវការកម្លាំងពលកម្មជាច្រើននាក់បន្ទាន់ ចំនួនប្រមាណជាង ៥០០នាក់ ដោយសារោងចក្រមានការពង្រីកអគារបន្ថែម ក្នុងនោះត្រូវការជំនាញផ្នែកដេរ ផ្នែកតុកាត់ ផ្នែកពិនិត្យគុណភាព និងអ្នកបកប្រែភាសាចិនជាដើម។ លោកបានបន្តថា ចំពោះប្រាក់ចំណូលប្រចាំខែ កម្មករនិយោជិតនឹងអាចទទួលបានចន្លោះ ៣៦០ ទៅ ១ពាន់ដុល្លារ ក្នុងមួយខែ ទៅតាមជំនាញ និងមុខតំណែង។ ស្រដៀងគ្នានេះ លោក វ៉ិត សង្ហា ប្រធានរដ្ឋបាលរោងចក្រ ខេអេច វីស្តារ ហ្គាម៉ិន ឯ.ក ស្ថិតនៅសង្កាត់ទៀន ខណ្ឌដង្កោ ក្បែររង្វង់មូលគួរស្រូវ បានឲ្យ ប៊ីធីវី ដឹងដែរថា សម្រាប់រោងចក្រលោក ក៏មានតម្រូវការកម្លាំងពលកម្មបន្ទាន់ដូចគ្នាដែរ គឺចំនួន ១ពាន់នាក់ ខាងផ្នែកដេរ ក្នុងនោះសម្រាប់អ្នកមិនចេះសោះក៏ទទួលដែរ ដោយសាររោងចក្រមានការបង្រៀនមុនអនុញ្ញាតចូលបំពេញការងារ។ លោកបានបន្តថា រីឯប្រាក់ខែ រួមមានប្រាក់ឈ្នួលអប្បបរមា បូកបន្ថែមជាមួយអត្ថប្រយោជន៍ផ្សេងៗ មានដូចជា ប្រាក់រង្វាន់ធ្វើការទៀងទាត់ ប្រាក់ថ្លៃបាយ និងប្រាក់ស្នាក់នៅនិងធ្វើដំណើរជាដើម កម្មករនិយោជិតអាចទទួលចន្លោះ ៣៥០ ទៅ ៥០០ដុល្លារ ក្នុងមួយខែ ទៅតាមជំនាញ និងមុខតំណែងនីមួយៗ។សូមបញ្ជាក់ថា កាលពីថ្ងៃទី១១ ខែកុម្ភៈ ឆ្នាំ២០២៥កន្លងទៅ រោងចក្រ ហ្វ័រម៉ាត (ខេមបូឌា) ខូ អិលធីឌី (FOREMART (CAMBODIA) CO., LTD.) ដែលមានកម្មករនិយោជិតបម្រើការងារសរុបចំនួន ៤៦៦នាក់ ត្រូវបានអគ្គិភ័យឆាបឆេះ និងបណ្តាលឲ្យខូចខាតទ្រព្យសម្បត្តិយ៉ាងធ្ងន់ធ្ងរ។ ករណីនេះដែរ មិនបណ្តាលឲ្យកម្មករនិយោជិតណាមួយរងគ្រោះថ្នាក់នោះទេ ហើយបច្ចុប្បន្ន សមត្ថកិច្ចកំពុងបន្តស៊ើបអង្កេតរកមូលហេតុបង្ករឲ្យមានអគ្គិភ័យនេះផងដែរ។ក្នុងពេលដែលរោងចក្រត្រូវការដំណើរការសាងសង់ឡើងវិញក្នុងរយៈពេល ៤ខែ ដូចនេះសូមកម្មករនិយោជិតស្វែងរកការងារថ្មី តាមរយៈមជ្ឈមណ្ឌលការងារចល័ត នៃទីភ្នាក់ងារជាតិមុខរបរ និងការងារ (NEA) ដែលមានមន្រ្ដីរង់ចាំចុះឈ្មោះស្វែងរកការងារធ្វើភ្លាមៗជូនបងប្អូនកម្មករនិយោជិត នៅមុខរោងចក្រនេះតែម្តង។ បន្ទាប់ពីរោងចក្រសាងសង់រួចរាល់ឡើងវិញ កម្មករនិយោជិតក៏អាចពិចារណាក្នុងការវិលត្រឡប់ចូលមកធ្វើការងារវិញបានដូចគ្នាផងដែរ៕អត្ថបទ៖ ឈិត បូរ៉ាវី 

ឯកឧត្ដមរដ្ឋមន្ត្រី ជា វ៉ាន់ដេត ជួបពិភាក្សាការងារជាមួយ លោក Philippe Orliange នាយកទទួលបន្ទុកតំបន់ភូមិសាស្ត្រ នៃទីភ្នាក់ងារបារាំងសម្រាប់ការអភិវឌ្ឍ (AFD)

2025/02/13 11:44:50 am        62
Facebook Telegram Linkin
ប៉ារីស៖ នាថ្ងៃទី១២ ខែកុម្ភៈ ឆ្នាំ២០២៥ ឯកឧត្ដម ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ (ក.ប.ទ.) បានជួបពិភាក្សាការងារជាមួយ លោក Philippe Orliange នាយកទទួលបន្ទុកតំបន់ភូមិសាស្ត្រ នៃទីភ្នាក់ងារបារាំងសម្រាប់ការអភិវឌ្ឍ (AFD) នៅទីស្នាក់ការកណ្ដាល AFD។ឯកឧត្ដមរដ្ឋមន្ត្រីនិងលោកនាយក បានរំឭកពីកិច្ចសហប្រតិបត្តិការយ៉ាងជិតស្និទ្ធកន្លងមករវាង ក.ប.ទ. និង AFD លើការងារបរិវត្តកម្មឌីជីថល រួមមានការសិក្សាបុរេសមិទ្ធិលទ្ធភាពលើគម្រោងពាក់ព័ន្ធនឹងរដ្ឋាភិបាលឌីជីថលនិងនវានុវត្តន៍ឌីជីថល រួមមានគម្រោងជំនួយបច្ចេកទេសលើគោលនយោបាយទិន្នន័យបើកចំហ គម្រោងជំនួយបច្ចេកទេសពាក់ព័ន្ធនឹងរដ្ឋាភិបាលឌីជីថល និងគម្រោងមន្ទីរពិសោធជាតិបញ្ញាសិប្បនិម្មិតនិងវិទ្យាសាស្ត្រទិន្នន័យ ជាដើម។ឆ្លៀតក្នុងឱកាសនេះ ឯកឧត្ដមរដ្ឋមន្ត្រីបានជម្រាបលោកនាយកអំពីសន្ទុះបរិវត្តកម្មឌីជីថលនៅកម្ពុជាលើគ្រប់ផ្នែក ជាពិសេសការតភ្ជាប់ឌីជីថល ធនធានមនុស្សឌីជីថល ក្របខណ្ឌអភិបាលកិច្ច ការរៀបចំសួនឌីជីថល និងបច្ចេកវិទ្យាឌីជីថលរបស់រាជរដ្ឋាភិបាល រួមមានថ្នាល verify.gov.kh ជាដើម។ឯកឧត្ដមរដ្ឋមន្ត្រីបានបញ្ជាក់អំពីសារៈសំខាន់នៃកិច្ចសហប្រតិបត្តិការរវាងស្ថាប័នទាំងពីរ សម្រាប់ការអភិវឌ្ឍ វិស័យឌីជីថលនៅកម្ពុជា និងស្នើឱ្យ AFD ជំរុញគម្រោងមន្ទីរពិសោធជាតិបញ្ញាសិប្បនិម្មិតនិងវិទ្យាសាស្ត្រទិន្នន័យឱ្យបានជោគជ័យក្នុងពេលឆាប់ៗ ព្រមទាំងពិនិត្យលទ្ធភាពពង្រីកកិច្ចសហការលើផ្នែកធនធានមនុស្ស ថ្នាលសម្រាប់ការអប់រំ និងការទាក់ទាញក្រុមហ៊ុនឌីជីថលមកដំណើរការនៅកម្ពុជា ដើម្បីចូលរួមពង្រឹងអេកូឡូស៊ីបញ្ញាសិប្បនិម្មិតនិងវិស័យឌីជីថលនៅកម្ពុជាឱ្យទាន់សភាពការណ៍វិវត្តក្នុងវិស័យនេះ៕

សម្តេចរដ្ឋសភាធិបតី ឃួន សុដារី អញ្ជើញដឹកនាំកិច្ចប្រជុំគណៈកម្មាធិការអចិន្រ្តៃយ៍រដ្ឋសភា

2025/02/13 11:40:02 am        104
Facebook Telegram Linkin
ភ្នុំពេញ៖ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជានៅព្រឹកថ្ងៃទី១៣ ខែកុម្ភៈ ឆ្នាំ២០២៥ បានអញ្ជើញដឹកនាំកិច្ចប្រជុំគណៈកម្មាធិការអចិន្រ្តៃយ៍រដ្ឋសភា នៅវិមានរដ្ឋសភា។ជាលទ្ធផលកិច្ចប្រជុំបានទទួលយកសេចក្តីព្រាងច្បាប់ស្តីពីជលផល ដែលជាសំណើរបស់រាជរដ្ឋាភិបាល ប្រគល់ជូនគណៈកម្មការជំនាញរដ្ឋសភាពិនិត្យសិក្សា ហើយធ្វើរបាយការណ៍ជូន គណៈកម្មាធិការអចិន្រ្តៃយ៍រដ្ឋសភា វិញ។កិច្ចប្រជុំក៏បានអនុម័តកំណត់កាលបរិច្ឆេទបន្តសម័យប្រជុំរដ្ឋសភាលើកទី៣ នីតិកាលទី៧ នៅព្រឹកថ្ងៃទី១៨ ខែកុម្ភៈឆ្នាំ២០២២៥ ខាងមុខនេះ ដើម្បីពិភាក្សាអនុម័តលើសេចក្តីព្រាងច្បាប់ចំនួនពីរ គឺសេចក្តីព្រាងច្បាប់ស្តីពី ការប្រឆំាងការទទួលស្គាល់ឧក្រិដ្ឋកម្មដែលប្រព្រឹត្តឡើងក្នុងរយៈកាលនៃកម្ពុជាប្រជាធិបតេយ្យនិងសេចក្តីព្រាងច្បាប់ស្តីពី ការចាត់ចែងជាបណ្តោះអាសន្ននូវវត្ថុចាប់យក៕

បណ្ដាញសង្គម

ព័ត៌មានថ្មីៗ

ស៊ីរីនឹងដាក់ពង្រាយកងកម្លាំងខណៈការប៉ះទង្គិចកាន់តែខ្លាំងរវាងក្រុម Bedouin-Druze ផ្ទុះឡើងនៅខេត្ត Suwayda
07/19/2025 11:07 AM
Facebook Telegram Linkin
រដ្ឋបាលលោកTrump ច្រានចោលការកែទម្រង់ជំងឺរាតត្បាតរបស់អង្គការសុខភាពពិភពលោក (WHO)
07/19/2025 10:07 AM
Facebook Telegram Linkin
តុលាការប្រេស៊ីលដាក់ការរឹតត្បិតលើ លោក Bolsonaro ដោយលើកឡើងពីទំនាក់ទំនងជាមួយលោក Trump
07/19/2025 10:07 AM
Facebook Telegram Linkin
នាយឧត្តមសេនីយ៍ ខ្វាន់ ស៊ាម៖ ភារកិច្ចស្នូលរបស់កងកម្លាំងក្នុងសម័យសន្តិភាព គឺធ្វើទំនាក់ទំនងល្អជាមួយប្រទេសជិតខាង
07/19/2025 10:07 AM
Facebook Telegram Linkin
រយៈពេល៦ថ្ងៃ ក្នុងយុទ្ធនាការ​បោសសម្អាត​ករណីឆបោកតាមប្រព័ន្ធបច្ចេកវិទ្យា សមត្ថកិច្ចខេត្តពោធិ៍សាត់ ឃាត់ខ្លួនជនបរទេស ចំនួន១០២នាក់
07/19/2025 09:07 AM
Facebook Telegram Linkin
ក្រុមហាម៉ាស៖ គ្មានបទឈប់បាញ់បណ្តោះអាសន្ននៅហ្កាហ្សាទេ បើគ្មានផ្លូវឈានទៅរកបទឈប់បាញ់អចិន្ត្រៃយ៍
07/19/2025 09:07 AM
Facebook Telegram Linkin
អាមេរិក ប្រកាសបទឈប់បាញ់ស៊ីរី-អ៊ីស្រាអែល ខណៈការប៉ះទង្គិចថ្មីបានធ្វើឲ្យរង្គើតំបន់បេះដូងសហគមន៍ Druze
07/19/2025 08:07 AM
Facebook Telegram Linkin
សមត្ថកិច្ចរាជធានីភ្នំពេញបង្ក្រាបទីតាំងបទល្មើសឆបោកតាមអនឡាញ២កន្លែងទៀតឃាត់ខ្លួនមនុស្សបាន១៣៣នាក់
07/18/2025 09:07 PM
Facebook Telegram Linkin
នាយករដ្ឋមន្ត្រីបារាំង ប្រឹងប្រែងបន្ទន់ជំហរប្រឆាំង ចំពោះច្បាប់ថវិការបស់លោក ដើម្បីបញ្ចៀសវិបត្តិថ្មី
07/18/2025 08:07 PM
Facebook Telegram Linkin
អ៊ីរ៉ង់៖ ប្រទេសអឺរ៉ុបគ្មានមូលដ្ឋានសីលធម៌ និងផ្លូវច្បាប់ ដើម្បីអនុវត្តទណ្ឌកម្មមានឡើងវិញភ្លាមៗ
07/18/2025 08:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.