នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ប្រតិភូគណៈចលនាសាសនិកឥស្លាមកម្ពុជា នាំយកអំណោយឧបត្ថម្ភជូនកងកម្លាំងជួរមុខ ដែលកំពុងឈរជើងការពារព្រំដែន ខេត្តព្រះវិហារ
ឯកឧត្តម ឌិត ទីណា អញ្ជើញបើកកិច្ចប្រជុំបូកសរុបសកម្មភាព និងលទ្ធផលការងារមូលដ្ឋានខេត្តបន្ទាយមានជ័យ
កូនប្រុសពៅសម្ដេចធិបតី ហ៊ុន ម៉ាណែត ទទួលបានមេដាយមាសសិស្សឆ្នើម លើការប្រកួតគណិតវិទ្យាអន្តរជាតិ ចំណាត់ថ្នាក់លេខមួយ ៣ឆ្នាំជាប់គ្នា
ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី បន្តចុះពិនិត្យ ព្យាបាលជំងឺ ជូនប្រជាពលរដ្ឋដោយឥតគិតថ្លៃ នៅឃុំតាសាល ស្រុកឱរ៉ាល់ ខេត្តកំពង់ស្ពឺ

ព័ត៌មានជាតិ

សម្តេចធិបតី អញ្ជើញវិនិយោគិនពីគ្រប់ទិសទីមកស្វែងយល់ពីឱកាសវិនិយោគនៅកម្ពុជា

2025/02/10 06:19:57 pm        129
Facebook Telegram Linkin
ភ្នំពេញ ៖សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានអំពាវនាវដល់វិនិយោគិនគ្រប់ទិសទីទាំងអស់ អញ្ជើញមកស្វែងរកឱកាសវិនិយោគនៅកម្ពុជា ខណៈដោយរាជរដ្ឋាភិបាលកម្ពុជា និងសម្ដេចផ្ទាល់បានប្តេជ្ញាចិត្តជួយសម្របសម្រួល ធ្វើឱ្យការវិនិយោគិនដែលមកវិនិយោគទាំងអស់អនុវត្តទៅបានដោយរលូន និងជោគជ័យ។សម្តេចធិបតី នាយករដ្ឋមន្រ្ដី បានអំពាវនាវបែបនេះ ក្នុងឱកាស អញ្ជើញជាអធិបតី និងថ្លែងសុន្ទរកថាគន្លឹះក្នុងវេទិកាធុរកិច្ចកម្ពុជា-ហ្វីលីពីន នៅប្រទេសហ្វីលីពីន នារសៀលថ្ងៃទី១០ ខែកុម្ភៈ ឆ្នាំ២០២៥ ដោយមានវិនិយោគិនចូលរួមសរុបចំនួន ២០៩នាក់ ដែលមកពីបណ្តាក្រុមហ៊ុនចំនួន ១៥១ក្រុមហ៊ុន។នៅចំពោះមុខអ្នកវិនិយោគ និងពាណិជ្ជករហ្វីលីពីន សម្តេចបវរធិបតីបានថ្លែងអញ្ជើញអ្នកទាំងនោះមកកម្ពុជា ទាំងអ្នកដែលមិនធ្លាប់អញ្ជើញមកកម្ពុជាក្ដី និងអ្នកធ្លាប់អញ្ជើញក្ដី សូមបន្តអញ្ជើញទៅកម្ពុជាបន្តទៀត។ សម្តេចថ្លែងថា អាស៊ីអាគ្នេយ៍មិនធំពេកទេ ប៉ុន្តែមានទីផ្សារធំ ហើយមានបេះដូងធំ។សូមជម្រាបថា កម្ពុជាជាប្រទេសដែលពោរពេញទៅដោយសក្តានុពល សម្រាប់វិនិយោគជាច្រើនឥតគណនា សម្រាប់វិនិយោគិនធ្វើការបោះទុនវិនិយោគ ដោយហេតុថា កម្ពុជាបានរក្សាបាននូវស្ថិរភាពកំណើនសេដ្ឋកិច្ចក្នុងរង្វង់ ៧ភាគរយក្នុងមួយឆ្នាំ ដែលសម្រេចបាននូវវឌ្ឍនភាពលើគ្រប់វិស័យ ដោយទំហំផលិតផលក្នុងស្រុកសរុប (GDP) បានកើនឡើង ១០ដង ពី ៣.១១ពាន់លានដុល្លារក្នុងឆ្នាំ១៩៩៨ ដល់ ២៩.៦០ពាន់លានដុល្លារនៅឆ្នាំ២០២២។សម្ទុះនៃការវិនិយោគដោយផ្ទាល់ពីបរទេស (FDI) បានកើនឡើង ១៥ ដងក្នុងចន្លោះឆ្នាំ២០០៧-២០២២ យោងតាមតារាង FDI Standouts Watchlist 2024, កម្ពុជាបានឈរលើលេខរៀងទី១ នៃប្រទេសដែលមានសន្ទុះការវិនិយោគដោយផ្ទាល់ពីបរទេស (FDI) ដោយទទួលបានពិន្ទុ Index Score ៩៦.១១ លើ១០០។ លើសពីនេះ កម្ពុជាសម្បូរដោយកម្លាំងពលកម្ម ដែលមានវ័យក្មេង ប្រកបដោយសក្តានុពល និងជាកាតាលីករដ៏សំខាន់នៅក្នុងចរន្តសេដ្ឋកិច្ចជាតិ។កម្ពុជាក៏បានធ្វើទំនើបកម្មហេដ្ឋារចនសម្ព័ន្ធរូបវន្តបានយ៉ាងល្អប្រសើរ រាប់ចាប់ពីអាកាសយានដ្ឋានអន្តរជាតិ កំពង់ផែទឹកជ្រៅ ផ្លូវគោក ផ្លូវទឹក ក៏ដូចជាប្រព័ន្ធឡូជីស្ទីក បូកផ្សំនឹងទីតាំងដ៏មានសក្តានុពលដែលផ្តល់នូវកាលានុវត្តភាពប្លែកពីគេសម្រាប់វិនិយោគ។ ក្នុងយុទ្ធសាស្ត្របញ្ចកោណ ដែលបានដាក់ចេញដោយរាជរដ្ឋាភិបាល នីតិកាលទី៧ ក៏បានបន្ថែមនូវមុំយុទ្ធសាស្ត្រថ្មីបន្ថែម លើបច្ចេកវិទ្យា ដែលកំពុងតែសាយភាយលូតលាស់ពេញ ស្រទាប់យុវជនវ័យក្មេងរបស់កម្ពុជា ដោយអភិវឌ្ឍបាននូវប្រព័ន្ធឌីជីថល សម្រាប់ប្រើប្រាស់បានដ៏ល្អប្រសើរ៕អត្ថបទ៖ វ៉ន ដារ៉ា

រដ្ឋមន្ត្រីក្រសួងសុខាភិបាល បានណែនាំដល់អ្នកដឹកនាំ ត្រូវតែមានការពុះពារ និងត្រូវឱ្យមានភាពបុរេសកម្ម និងនវានុវត្តន៍

2025/02/10 06:06:29 pm        47
Facebook Telegram Linkin
ភ្នំពេញ ៖ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល ដឹកនាំកិច្ចប្រជុំកម្រិតថ្នាក់ដឹកនាំលើកទី១ នៃខែកុម្ភៈ ដើម្បីលើកទិសដៅការងារបន្ត ដែលមានការអញ្ជើញចូលរួមពី ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ ទីប្រឹក្សាក្រសួង អគ្គនាយក អគ្គនាយករង និងគ្រប់ប្រធានអង្គភាពថ្នាក់កណ្តាលក្រោមឱវាទក្រសួងសុខាភិបាល ប្រធានមន្ទីរសុខាភិបាលរាជធានីភ្នំពេញ និងតាមប្រព័ន្ធ Zoom ប្រធានមន្ទីរសុខាភិបាលខេត្ត, ព្រឹកថ្ងៃទី១០ ខែកុម្ភៈ ឆ្នាំ២០២៥នេះ នៅទីស្តីការក្រសួងសុខាភិបាល។ឯកឧត្តមសាស្រ្តាចារ្យ ឈាង រ៉ា បានលើកឡើងដល់ថ្នាក់ដឹកនាំគ្រប់លំដាប់ថ្នាក់ ត្រូវឱ្យច្បាស់លាស់ នូវការទទួលបន្ទុកការងារ និងភារកិច្ចរបស់ខ្លួន ឱ្យបានស៉ីជម្រៅ ជាពិសេសការងារដែលពាក់ព័ន្ធនឹងសុខភាពសាធារណៈ ការពុលអាហារ ពុលស្រា ដោយត្រូវបង្កើនការផ្សព្វផ្សាយសារអប់រំសុខភាព អនាម័យចំណីអាហារ និងបញ្ហាគ្រោះថ្នាក់ចរាចរណ៍ផងដែរ។ក្នុងឱកាសនោះដែរ ឯកឧត្តមសាស្រ្តាចារ្យរដ្ឋមន្រ្តី បានណែនាំដល់ថ្នាក់ដឹកនាំ និងមជ្ឈមណ្ឌលជាតិពាក់ព័ន្ធ ត្រូវបង្កើនការយកចិត្តទុកដាក់ខ្ពស់ អំពីបញ្ហាមូស ដោយត្រូវរៀបចំជាយុទ្ធនាការបាញ់ថ្នាំសម្លាប់មូស ដាក់ថ្នាំបាណកឃាជ ការផ្សព្វផ្សាយសារអប់រំ និងជាពិសេសនៅតាមមូលដ្ឋានសុខាភិបាលសាធារណៈ ត្រូវត្រៀមក្នុងការផ្តល់ជាព័ត៌មានជូនប្រជាពលរដ្ឋ អំពីបញ្ហាមូស និងការបង្ការការពារខ្លួន។ ទន្ទឹមនឹងនេះដែរ ក៏ត្រូវបង្កើនការស្រាវជ្រាវ ការកកើតមូស ប្រភេទមូស ដើម្បីវាយតម្លៃអំពីស្ថានភាពជាក់ស្តែង និងការព្យាករណ៍ដែលអាចនឹងបង្កផលប៉ះពាល់ដែលអាចកើតមានឡើង និងត្រូវបង្កើនការផលិត spot បន្ថែមទៀតឱ្យស្របនឹងបច្ចុប្បន្នភាព។ឯកឧត្តមសាស្រ្តាចារ្យរដ្ឋមន្រ្តី បានសង្កត់ធ្ងន់បន្ថែម ត្រូវពន្លឿនការរៀបចំសេចក្តីព្រាងច្បាប់ទាំងឡាយ ដោយនាយកដ្ឋានជំនាញ ត្រូវសហការជាមួយស្ថាប័នពាក់ព័ន្ធ សិក្សាឱ្យបានស៊ីជម្រៅគ្រប់ទិដ្ឋភាពច្បាប់ និងបច្ចេកទេស។ ឯកឧត្តមសាស្រ្តាចារ្យរដ្ឋមន្រ្តី បានគូសរំលេចបន្ថែមអំពីការលើកយកប្រធានបទសុខភាពបឋម នៅកម្រិតមណ្ឌលសុខភាព មន្ទីរពេទ្យស្រុក ដែលជាបញ្ហាសុខភាពចម្បង ត្រូវយកចិត្តទុកដាក់ ក្នុងការបម្រើសេវាសុខាភិបាល និងប្រព័ន្ធបញ្ជូនជាដើម ដោយត្រូវដាក់បញ្ចូលក្នុងប្រធានបទនាពិធីបើកសន្និបាតសុខាភិបាល លើកទី៤៤ នាថ្ងៃទី៣-៤ ខែមីនា ឆ្នាំ២០២៥នេះ។ ជាចុងក្រោយ ឯកឧត្តមសាស្រ្តាចារ្យរដ្ឋមន្រ្តី បានកោតសរសើរ និងថ្លែងអំណរគុណដល់ថ្នាក់ដឹកនាំ និងមន្រ្តីរាជការទាំងអស់ ដែលបានខិតខំក្នុងការបំពេញភារកិច្ចប្រកបដោយស្មារតីទទួលខុសត្រូវខ្ពស់ ឥរិយាបថល្អ ការបម្រើសេវាដោយគុណភាព ប្រសិទ្ធភាព ស័ក្តិសិទ្ធិភាព សមធម៌ និងក្រមសីលធម៌វិជ្ជាជីវៈ៕អត្ថបទ រដ្ឋា

អតីតប្រធានរដ្ឋសភានៃសាធារណរដ្ឋកូរ៉េ វាយតម្លៃខ្ពស់ចំពោះការរីកចម្រើនរបស់កម្ពុជា ខណៈក្រុមហ៊ុន Daejoo-KC កូរ៉េចង់ពង្រីកធុរកិច្ច និងបើកក្រុមហ៊ុនបុត្រសម្ព័ន្ធនៅកម្ពុជា

2025/02/10 05:55:24 pm        115
Facebook Telegram Linkin
ភ្នំពេញ៖ នៅព្រឹកថ្ងៃចន្ទ ទី១០ ខែកុម្ភៈ ឆ្នាំ២០២៥ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា បានបានអនុញ្ញាតឱ្យ ឯកឧត្តម Kim Jin-pyo អតីតប្រធានរដ្ឋសភានៃសាធារណរដ្ឋកូរ៉េ និងជាប្រធានក្រុមប្រឹក្សាភិបាលអង្គការដើម្បីពិភពលោកទាំងអស់គ្នា (Global Together) និងគណៈប្រតិភូ ចូលជួបសម្ដែងការគួរសម នៅវិមាន៧មករា រាជធានីភ្នំពេញ។សម្តេចតេជោ បានស្វាគមន៍យ៉ាងកក់ក្តៅចំពោះ ឯកឧត្តម Kim Jin-pyo និងគណៈប្រតិភូ និងសម្តែងក្តីរីករាយដែលជួប ឯកឧត្តម សាជាថ្មី បន្ទាប់ពីឯកឧត្តម បានមកចូលរួមសម័យប្រជុំពេញអង្គលើកទី១១ នៃសភាអន្តរជាតិដើម្បីភាពអត់ឱន និងសន្តិភាព (IPTP-11) នៅទីក្រុងភ្នំពេញ នាខែវិច្ឆកា កន្លងទៅនេះ។ សម្តេចតេជោ បានបន្តថា ឯកឧត្តម Kim Jin-pyo បានរួមចំណែកយ៉ាងធំធេងដល់ការអភិវឌ្ឍទំនាក់ទំនងកម្ពុជា-កូរ៉េ ដែល មកដល់បច្ចុប្បន្ននេះ ទំនាក់ទំនងកម្ពុជា និងសាធារណរដ្ឋកូរ៉េ បាននិងកំពុងរីកចម្រើនលើគ្រប់វិស័យ ហើយត្រូវបានតម្លើងកម្រិតទៅជាភាពជាដៃគូយុទ្ធសាស្រ្ត ក្នុងឱកាសទស្សនកិច្ចផ្លូវការរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីទៅកាន់សាធារណរដ្ឋកូរ៉េ នៅខែឧសភា ឆ្នាំ២០២៤ កន្លងទៅនេះ។  នាឱកាសជំនួបនេះ ឯកឧត្តម Kim Jin-pyo បានសម្តែងនូវអំណរអរគុណយ៉ាងជ្រាលជ្រៅ សម្តេចតេជោ ដែលបានអនុញ្ញាតឱ្យឯកឧត្តម និងគណៈប្រតិភូ បានចូលជួបសម្តែងការគួរសម បន្ទាប់ពីជំនួបកាលពីខែតុលា និងវិច្ឆិកា ឆ្នាំ២០២៤ កន្លងទៅនៅទីក្រុងភ្នំពេញ។ ឯកឧត្តម បានវាយតម្លៃខ្ពស់ ចំពោះការរីកចម្រើនរបស់កម្ពុជា ជាមួយនឹងកំណើនសេដ្ឋកិច្ចប្រមាណ ៧% រៀងរាល់ឆ្នាំ ក្រោមការដឹកនាំរបស់ សម្តេចតេជោ នាពេលកន្លងមក ហើយឯកឧត្តម មានសេចក្តីសោមនស្សរីករាយដែលបានចូលរួមចំណែកក្នុងដំណើរអភិវឌ្ឍន៍នេះ ជាមួយសម្តេចតេជោ ចាប់តាំងពីឆ្នាំ២០០៦មក។ ឯកឧត្តម បានជម្រាបសម្តេចថា គោលបំណងនៃទស្សនកិច្ចនេះ ដើម្បីជម្រាបជូនសម្តេចអំពីកិច្ចសហការរវាង អង្គការដើម្បីពិភពលោកទាំងអស់គ្នា (Global Together) ជាមួយនឹងវិទ្យាស្ថានពហុបច្ចេកវិទ្យាកម្ពុជា (NPIC) ដើម្បីចូលរួមចំណែកជាមួយរាជរដ្ឋាភិបាលកម្ពុជា ក្នុងការអភិវឌ្ឍធនធានមនុស្សកម្ពុជា ជាពិសេស ជំនាញវិជ្ជាជីវៈ ផ្នែកវិស្វកម្ម ព័ត៌មានវិទ្យា និងធុរកិច្ចរដ្ឋបាល សម្រាប់យុវជន និងនិស្សិតកម្ពុជា។ឯកឧត្តម បានជម្រាបសម្តេចតេជោ ថា នៅប្រទេសកូរ៉េ ជាង៥០ឆ្នាំកន្លងមកចាប់តាំងពីឆ្នាំ១៩៦៨ ការបណ្តុះបណ្តាលវិជ្ជាជីវៈ គឺជាស្នូលមួយរួមចំណែកក្នុងការអភិវឌ្ឍសេដ្ឋកិច្ច ជាពិសេស កូរ៉េបានបណ្តុះបណ្តាលយុវជន ជាង៣លាននាក់ នៅក្នុងវិស័យសេដ្ឋកិច្ចឌីជីថល ICT គ្រឿងបន្លាស់ និងកម្មន្តសាល។ ឯកឧត្តម បានបន្តថា ដើម្បីបន្តគាំទ្រកំណើនសេដ្ឋកិច្ចខ្ពស់ និងការអភិវឌ្ឍកាន់តែខ្លាំងក្លា ការបណ្តុះបណ្តាលធនធានមនុស្សដែលមានជំនាញខ្ពស់ ជាពិសេស លើផ្នែកអេឡិចត្រូនិក, ICT និងរថយន្ត គឺជាកត្តាចាំបាច់សម្រាប់ប្រទេសកម្ពុជា ។ ឯកឧត្តម បានកត់សម្គាល់ផងដែរថា ទំនាក់ទំនងរវាងប្រទេសយើងទាំងពីរ បន្តមានការរីកចម្រើនជាប្រក្រតី បើទោះបីជាប្រទេសកូរ៉េមានវិបត្តិនយោបាយផ្ទៃក្នុងដែលកំពុងកើតមានឡើងក៏ដោយ។ នៅក្នុងជំនួបនេះ ឯកឧត្តម Park Joo-bong ប្រធានក្រុមប្រឹក្សាក្រុមហ៊ុន Daejoo-KC Co., Ltd. និងជាប្រធានសភាពាណិជ្ជកម្ម និងឧស្សាហកម្មក្រុងអ៊ីនឈុន បានសម្តែងនូវក្តីសោមនស្សរីករាយដែលបានចូលរួមចំណែកអភិវឌ្ឍធុរកិច្ចនៅកម្ពុជា តាមរយៈការដឹកនាំគណៈប្រតិភូក្រុមហ៊ុនវិនិយោគធំៗមកកម្ពុជា ហើយឆ្នាំ២០២៥នេះ ឯកឧត្តម នឹងដឹកនាំក្រុមគណៈប្រតិភូក្រុមហ៊ុនវិនិយោគមកកម្ពុជាជាថ្មីម្តងទៀត។ ឯកឧត្តម ក៏បានបញ្ជាក់ផងដែរថា ក្រុមហ៊ុន Daejoo-KC Co., Ltd ចង់ពង្រីកធុរកិច្ចរបស់ខ្លួន និងបើកក្រុមហ៊ុនបុត្រសម្ព័ន្ធមួយចំនួនទៀតនៅកម្ពុជា និង សង្ឃឹមយ៉ាងមុតមាំថា នឹងទទួលបានគាំទ្រពីសម្តេច។ឆ្លៀតក្នុងឱកាសនោះ លោក Charles Lee នាយកសាកលវិទ្យាជាតិពហុបច្ចេកវិទ្យាកូរ៉េ បានវាយតម្លៃខ្ពស់ចំពោះការរីកចម្រើននៃវិស័យឧស្សាហកម្មនៅកម្ពុជា ដែលបច្ចប្បន្ន កម្ពុជាពិតជាត្រូវការការបណ្តុះបណ្តាលវិជ្ជាជីវៈបច្ចេកទេសខ្ពស់លើវិស័យនេះ។ តាមរយៈបទពិសោធកូរ៉េក្នុងការបណ្តុះបណ្តាលធនធានមនុស្សលើជំនាញបច្ចេកទេសខ្ពស់ លោក Charles Lee បានគូសបញ្ជាក់ថា កម្ពុជាមានសក្តានុពលយុវជន ដែលជាកម្លាំងស្នូលក្នុងការអភិវឌ្ឍសេដ្ឋកិច្ច។ ក្នុងន័យនេះ លោកនាយក បានបន្តថា លោកនឹងសហការជាមួយវិទ្យាស្ថាន NPIC ដើម្បីបណ្តុះបណ្តាលបច្ចេកវិទ្យាទំនើបកូរ៉េ ដល់យុវជនកម្ពុជាឱ្យក្លាយជាសសរទ្រូងពោរពេញដោយសក្តានុពលសម្រាប់ប្រទេសកម្ពុជា។ជាកិច្ចឆ្លើយតប សម្តេចតេជោ បានសម្តែងនូវអំណរអរគុណដែលឯកឧត្តម Kim Jin-pyo ដែលតែងតែគិតគូរពីកំណើនសេដ្ឋកិច្ច និងការអភិវឌ្ឍរបស់កម្ពុជា ជាពិសេស ការបណ្តុះបណ្តាលមូលធនមនុស្សដែលមានជំនាញបច្ចេកវិទ្យាខ្ពស់។ សម្តេចតេជោ បានថ្លែងអំពីសារៈសំខាន់ក្នុងការផ្តល់វគ្គបណ្តុះបណ្តាលបច្ចេកទេសខ្ពស់ ដល់យុវជនកម្ពុជា ដែលការណ៍នេះ ស្របទៅនឹងទិសដៅរបស់រាជរដ្ឋាភិបាលក្នុងការបណ្តុះបណ្តាលយុវជនកម្ពុជា ១.៥លាននាក់ផងដែរ។ សម្តេចតេជោ ក៏បានបញ្ជាក់ផងដែរថា កម្ពុជា នឹងចាកចេញពីប្រទេសអភិវឌ្ឍតិចតួច នៅឆ្នាំ២០២៩ និងក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងប្រទេសចំណូលខ្ពស់នៅឆ្នាំ២០៥០។សម្តេចតេជោ បានវាយតម្លៃខ្ពស់ចំពោះភាពជោគជ័យដ៏ធំធេងរបស់កូរ៉េ ក្នុងការវិវត្តខ្លួនយ៉ាងឆាប់រហ័សពីប្រទេសក្រីក្របំផុតមួយក្នុងពិភពលោកនៅទសវត្សរ៍ឆ្នាំ១៩៧០ មកជាប្រទេសមានប្រាក់ចំណូលខ្ពស់ និងក្រុមប្រទេសដែលមានឧស្សាហកម្មនាំមុខនាពេលបច្ចុប្បន្ន។ សម្តេចតេជោ បានបន្តថា កម្ពុជាបាននិងកំពុងខិតខំប្រឹងប្រែងធ្វើយ៉ាងណា មិនឱ្យធ្លាក់ក្នុងអន្ទាក់ចំណូលមធ្យម។ សម្តេច បានផ្តល់អនុសាសន៍ឱ្យគណៈប្រតិភូកូរ៉េ បន្តសហការជាមួយក្រសួងអប់រំ យុវជន និងកីឡា, ក្រសួងការងារនិងបណ្តុះបណ្តាលវិជ្ជាជីវៈ និងក្រសួងពាក់ព័ន្ធផ្សេងៗទៀត ហើយកិច្ចសហប្រតិបត្តិការនេះ នឹងផ្តល់ផលវិជ្ជមានសម្រាប់ការរីកចម្រើន និងសុខដុមនីយកម្មទាំងអស់គ្នា។ជាថ្មីម្តងទៀត សម្តេចតេជោ បានអរគុណចំពោះ ឯកឧត្តម Kim Jin-pyo ទោះបីសម្តេចមិនកាន់តំណែងជានាយករដ្ឋមន្រ្តីយ៉ាងក្តី នៅពេល ឯកឧត្តម មកកម្ពុជា តែងតែនឹករលឹកជួបសម្តេច។ បច្ចុប្បន្ន ជាប្រធាន ព្រឹទ្ធសភា សម្តេចតេជោ បានគូសបញ្ជាក់ថា សម្តេច បានដាក់គោលដៅធំពីរសម្រាប់ព្រឹទ្ធសភា គឺការទូតសភា ដើម្បីរួមចំណែកជាមួយរាជរដ្ឋាភិបាលពង្រឹងទំនាក់ទំនង និងការកសាងមិត្ត ក្នុងបរិបទពិភពលោកពោរពេញដោយការប្រកួតប្រជែងភូមិសាស្រ្តនយោបាយ និងគណនេយ្យភាព នៅចំពោះមុខអង្គបោះឆ្នោត។ សម្តេចតេជោ បានបន្តចែករំលែកបទពិសោធកម្ពុជាក្នុងការរក្សាបាននូវសុខសន្តិភាព និងស្ថិរភាពនយោបាយ ដែលជាមូលដ្ឋានគ្រឹះដ៏ចាំបាច់ សម្រាប់ធ្វើការអភិវឌ្ឍប្រទេសជាតិ។ នៅចុងបញ្ចប់ សម្តេចតេជោ បានបន់ស្រន់សូមឱ្យសភាពការណ៍នៅកូរ៉េវិលត្រឡប់មករកភាពប្រក្រតីឡើងវិញ ហើយ បន្តថា “មិត្តកម្ពុជាមិនចង់ឃើញមិត្តកូរ៉េមានវិបត្តិ” និង បានជូនពរ ឯកឧត្តម Kim Jin-pyo និងគណៈប្រតិភូ ទទួលបានជោគជ័យភារកិច្ច និងការស្នាក់នៅកម្ពុជាប្រកបដោយផាសុកភាព៕

រាជរដ្ឋាភិបាលនៅតែបន្តពិនិត្យលទ្ធអន្តរាគមន៍លើវិស័យទេសចរណ៍ ទោះបីចំនួនភ្ញៀវបានហក់ឡើងក៏ដោយ

2025/02/10 04:37:29 pm        80
Facebook Telegram Linkin
ភ្នំពេញ ៖ រាជរដ្ឋាភិបាលនៅតែបន្តលើកទឹកចិត្ត និងពិនិត្យលទ្ធក្នុងការបន្តលើវិធានការអន្តរាគមន៍ ដើម្បីជួយស្ដារវិស័យទេសចរណ៍ ចំពោះ សហគ្រាសដែលបានចុះបញ្ជីពន្ធដារ និងមានសកម្មភាពអាជីវកម្មនៅខេត្តសៀមរាប ទោះបីបច្ចុប្បន្នចំនួនទេសចរណ៍នៅខេត្តសៀបរាប បានហក់ឡើងខ្ពស់ជាង ២០២៣ កន្លងក៏ដោយ។  ​ឯកឧត្តមបណ្ឌិត ផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លើកឡើងនៅក្នុង វេទិកាស្តីពីការគ្រប់គ្រងមីក្រូហិរញ្ញ វត្ថុ និងច្បាប់ថវិកាឆ្នាំ ២០២៥ នៅថ្ងៃទី ១០ ខែកុម្ភៈ ឆ្នាំ ២០២៥ នេះថា ជុំវិញវិស័យទេសចរណ៍នេះ មកដល់បច្ចុប្បន្នឃើញថា កម្ពុជា ទទួលបានភ្ញៀវទេសចរណ៍អន្តរជាតិកើនឡើងជាបន្តបន្ទាប់ ជាក់ស្តែងភ្ញៀវរទេសចរណ៍ដែលមកតាមជើងហោះហើរ នៃព្រលានយន្តហោះ អន្តរជាតិភ្នំពេញ បានកំពុងកើនឡើងដូចមុនវិបត្តិជំងឺកូវីដ-១៩ ។ ចំណែកសម្រាប់ខេត្តសៀមរាប ការលក់សំបុត្រចូលទស្សនានៅមុនវិបត្តិ ជំងឺកូវីដ-១៩ មានចំនួន ២,២ លាននាក់ ខណៈនៅក្នុងឆ្នាំ ២០២៤ កន្លងនេះការលក់សំបុត្រចូលទស្សនានៅខេត្តសៀមរាប បានត្រឹម ជាង ១ លាននាក់ប៉ុណ្ណោះ ក្នុងនោះអ្នកទេសចរណ៍មកពីអឺរ៉ុប និងអាមេរិក គឺបានចូលមកដូចឆ្នាំ ២០១៩ ខណៈភ្ញៀវទេសចិននៅមាន កម្រិតនៅឡើយ។ឯកឧត្តមបណ្ឌិត បន្តថា ទាក់ទិនភ្ញៀវទេសអន្តរជាតិនេះ សម្រាប់ខេត្តសៀមរាបនៅឆ្នាំ ២០២៣ កម្ពុជាទទួលបានភ្ញៀវទេសចរ ក្នុងរង្វង់ ៨០ ម៉ឺននាក់ប៉ុណ្ណោះ ខណៈនៅក្នុងឆ្នាំ ២០២៤ កម្ពុជាទទួលបានភ្ញៀវវទេសចរណ៍អន្តរជាតិបានជាង ១ លាននាក់ ដែលនេះ គឺជាចំនួនមួយដែលកើនឡើងគួរកត់សម្គាល់ ។ តែទោះបីចំនួននេះបានហក់ឡើងយ៉ាងណាក៏ដោយ ក៏រាជរដ្ឋាភិបាល នៅតែបន្តលើក ទឹកចិត្តពន្ធដារ ចំពោះសហគ្រាសក្នុងវិស័យទេសចរណ៍នៅខេត្តសៀមរាប ដើម្បីជួយស្ដារវិស័យទេសចរណ៍ឱ្យបានល្អប្រសើរឡើងវិញ ដោយក្នុងនោះអនុវត្តចំពោះសហគ្រាសក្នុងវិស័យទេសចរណ៍រួមមាន៖ សណ្ឋាគារ ផ្ទះសំណាក់ ភោជនីយដ្ឋាន និងក្រុមហ៊ុនភ្នាក់ងារ ទេសចរណ៍ ដែលបានចុះបញ្ជីពន្ធដារ និងមានសកម្មភាពអាជីវកម្មនៅខេត្តសៀមរាប ហើយបញ្ហានេះ រាជរដ្ឋាភិបាលនៅតែបន្តពិនិត្យ និងវាយតម្លៃ ក្នុងនោះប្រសិនស្ថានភាពមិនល្អប្រសើរ រាជរដ្ឋាភិបាលនឹងពិនិត្យលទ្ធក្នុងការបន្ត ដើម្បីលើកទឹកចិត្តបន្ថែម។សូមបញ្ជាកថា ក្រសួងសេដ្ឋកិច្ច និងហិរញ្ញវត្ថុ កន្លងមកនេះ បានចេញប្រកាសស្តីពីការលើកទឹកចិត្តពន្ធដារ ចំពោះសហគ្រាសក្នុងវិស័យ ទេសចរណ៍ នៅខេត្តសៀមរាប ដើម្បីជួយស្ដារវិស័យទេសចរណ៍ឱ្យបានល្អប្រសើរឡើងវិញ ។ ចំពោះការលើកទឹកចិត្តពន្ធដារនេះរួមមាន៖ លើកលែងការបង់ពន្ធអាករប្រចាំខែគ្រប់ប្រភេទ វៀរលែងតែអាករ លើតម្លៃបន្ថែម និងអាករលើការស្នាក់នៅ គិតចាប់ពីខែ កក្កដា ឆ្នាំ ២០២៤ រហូតដល់ដំណាច់ខែ មិថុនា ឆ្នាំ២០២៥ ។ លើកលែងពន្ធ លើប្រាក់ចំណូលប្រចាំឆ្នាំ ២០២៤ ។ ចំពោះប្រាក់រំដោះពន្ធលើ ប្រាក់ចំណូល ដែលសហគ្រាសបានបង់រួច នឹងត្រូវបានអនុញ្ញាតជា ឥណទានពន្ធ សម្រាប់កាត់កងជាមួយពន្ធលើប្រាក់ចំណូលប្រចាំឆ្នាំ ២០២៥, និងមិនទទួលរងការធ្វើសវនកម្មពន្ធដារ សម្រាប់ការិយបរិច្ឆេទឆ្នាំ២០២៤៕អត្ថបទ៖ សុន រ៉ាឌី

ស្ថានភាពបំណុលសាធារណៈបច្ចុប្បន្នរបស់កម្ពុជា គឺស្ថិតក្នុងភាពអាចគ្រប់គ្រងបាន

2025/02/10 04:29:28 pm        93
Facebook Telegram Linkin
ភ្នំពេញ ៖ មន្ត្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុ អះអាងថា ស្ថានភាពបំណុលសាធារណៈបច្ចុប្បន្នរបស់កម្ពុជា នៅតែស្ថិតក្នុងភាពអាច គ្រប់គ្រងបាន ពោលគឺនៅតែមានចីរភាព និងហានិភ័យកម្រិតទាប ខណៈនៅឆ្នាំ ២០២៥ នេះ កម្ពុជាមានបំណុលសាធារណៈកើនឡើង ជាង ១៤ ពាន់លានដុល្លារអាមេរិក។​ឯកឧត្តម ចាន់ សុធី រដ្ឋលេខាធិការនៃក្រសួងសេដ្ឋកិច្ច និងហិរញ្ញវត្ថុ លើកឡើងនៅក្នុងវេទិកាស្តីពីការគ្រប់គ្រងមីក្រូហិរញ្ញ វត្ថុ និងច្បាប់ថវិកាឆ្នាំ ២០២៥ នៅថ្ងៃទី ១០ ខែកុម្ភៈ ឆ្នាំ ២០២៥ នេះថា គិតត្រឹមបំណាច់ឆ្នាំ ២០២៤ កម្ពុជាមានបំណុលសាធារណៈ សរុបចំនួនជាង ១២ ពាន់លានដុល្លារអាមេរិក ស្មើនឹងប្រមាណ ២៥,៨ ភាគរយ នៃ ផ.ស.ស. ក្នុងនោះបំណុលសាធារណៈក្នុងប្រទេស មានចំនួន ១១៥ លានដុល្លារអាមេរិក និងបំណុលក្រៅប្រទេសមានចំនួនជាង ១២ ពាន់លានដុល្លារអាមេរិក។ ការរក្សាបាននូវចីរភាព បំណុលសាធារណៈនេះ អាស្រ័យដោយកម្ពុជាមានប្រព័ន្ធគ្រប់គ្រងបំណុលសាធារណៈមួយដ៏រឹងមាំ សម្រាប់គ្រងប្រតិបត្តិការ និងរក្សាទុក ទិន្នន័យ ដើម្បីជាមូលដ្ឋាននៃការវិភាគ និងតាមដានហានិភ័យបំណុលផងដែរ។ឯកឧត្តម ចាន់ សុធី គូសបញ្ជាក់ថា បញ្ហានេះ មុនមកមានការចោទប្រកាន់ជាច្រើន មកលើរាជរដ្ឋាភិបាលកម្ពុជាថា គឺការខ្ចីលុយ ពីប្រទេសចិន ដោយបានជំពាក់ចិនវ័ណ្ឌក តាមពិតទៅរដ្ឋាភិបាលចិននៅតែបន្តផ្តល់កម្ចីដល់កម្ពុជាដដែល ប៉ុន្តែគ្រាន់តែថា ចិនបន្ថយកម្ចី ជាងមុន ដោយសារតែចិនត្រូវការធនធានដើម្បីអភិវឌ្ឍន៍ប្រទេសរបស់ខ្លួនផងដែរ។សូមបញ្ជាក់ថា ក្នុងការគ្រប់គ្រងបំណុលសាធារណៈ រាជរដ្ឋាភិបាលប្រកាន់ខ្ជាប់នូវគោលការណ៍គន្លឹះចំនួន ៥ រួមមាន៖ ១. ខ្ចីឥណទាន ក្នុងទំហំសមស្រប ដែលស្ថានភាពថវិកា និងសេដ្ឋកិច្ចអាចទ្រាំទ្របាន, ២. ខ្ចីតែឥណទានដែលមានកម្រិតសម្បទាន ឬលក្ខខណ្ឌ អនុគ្រោះខ្ពស់, ៣. ខ្ចីសម្រាប់តែវិស័យអាទិភាពទ្រទ្រង់ចីរភាពនៃកំណើនសេដ្ឋកិច្ច និងវិស័យបង្កើនផលិតភាពសេដ្ឋកិច្ច ឬផលិតភាព ផលិតកម្ម, ៤. ប្រើប្រាស់ឥណទានប្រកបដោយតម្លាភាព, គណនេយ្យភាព, ប្រសិទ្ធភាព, និងស័ក្តិសិទ្ធិភាពខ្ពស់បំផុត, និង ៥. ប្រើប្រាស់ ឥណទានសម្រាប់ហិរញ្ញប្បទានគម្រោងវិនិយោគលើហេដ្ឋារចនាសម្ព័ន្ធសាធារណៈ ដែលមានស្តង់ដារ និងគុណភាពខ្ពស់ ស្របតាម គោលការណ៍នៃការគ្រប់គ្រងការវិនិយោគសាធារណៈ ព្រមទាំងឆ្លើយតបទៅនឹងតម្រូវការនៃការអភិវឌ្ឍជាតិនៅក្នុងដំណាក់កាលថ្មី ពិសេសធានាបាននូវចីរភាពសេដ្ឋកិច្ច, សង្គម, បរិស្ថាន, និងភាពធន់ទៅនឹងការប្រែប្រួលអាកាសធាតុ៕អត្ថបទ៖ សុន រ៉ាឌី

សម្ដេចធិបតី ហ៊ុន ម៉ាណែត អញ្ជើញជាអធិបតី ក្នុងវេទិកាធុរកិច្ចកម្ពុជា-ហ្វីលីពីន នៅសាធារណរដ្ឋហ្វីលីពីន

2025/02/10 04:21:16 pm        107
Facebook Telegram Linkin
ភ្នំពេញ៖ នៅរសៀលថ្ងៃទី១០ ខែកុម្ភៈ ឆ្នាំ ២០២៥កុម្ភៈ ឆ្នាំ ២០២៥នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃព្រះរាជាណាចក្រកម្ពុជា បានអញ្ចើញជាអធិបតីក្នុងក្នុងវេទិកាធុរកិច្ចកម្ពុជា-ហ្វីលីពីន នៅសាធារណរដ្ឋហ្វីលីពីន។នៅក្នុងវេទិកាធុរកិច្ចកម្ពុជា-ហ្វីលីពីន មានវិនិយោគិនចូលរួមសរុបចំនួន ២០៩ នាក់ ដែលមកពីបណ្តាក្រុមហ៊ុនចំនួន ១៥១ ក្រុមហ៊ុន ។ក្នុងឱកាសនោះសម្ដេចធិបតី នាយករដ្ឋមន្រ្ដីបានមានប្រសាសន៍ប្រាប់ដល់វិនិយោគិនហ្វីលីពីនថា រាជរដ្ឋាភិបាលនីតិកាលទី៧ បាន និងកំពុងបន្តនូវការទាក់ទាញវិនិយោគិនបរទេសនិយាយជារួម និង វិនិយោគិន ហ្វីលីពីន និយាយដោយឡែក តាមរយៈការរៀបចំវេទិកាធុរកិច្ច ក្នុងគោលដៅផ្សព្វផ្សាយ អំពីសក្តានុពលវិនិយោគនៅកម្ពុជា ក៏ដូចជាយន្តការលើកទឹកចិត្តដល់វិនិយោគិន រួមទាំងច្បាប់ នៃការវិនិយោគរបស់កម្ពុជា ដើម្បីបញ្ជ្រាបការយល់ដឹងបន្ថែមអំពីកម្ពុជាដល់វិនិយោគិនគ្រប់រូប ក្នុងការសិក្សា ឈ្វេងយល់បន្ថែមអំពីឱកាសវិនិយោគ និងវិស័យសក្តានុពលដែលទីផ្សារកម្ពុជាកំពុងត្រូវការ ។

ប្រធានវិទ្យាស្ថាន ERIA៖ពិភពលោកគួររៀនសូត្រពីការដឹកនាំដ៏ប៉ិនប្រសប់របស់សម្តេចតេជោ ហ៊ុន សែន

2025/02/10 04:08:39 pm        62
Facebook Telegram Linkin
ភ្នំពេញ ៖ នៅព្រឹកថ្ងៃ ទី១០ ខែកុម្ភៈ ឆ្នាំ២០២៥ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា បានបានអនុញ្ញាតឱ្យ លោកសាស្រ្តាចារ្យ Tetsuya Watanabe ប្រធានវិទ្យាស្ថានស្រាវជ្រាវសេដ្ឋកិច្ចអាស៊ាន និងអាស៊ីបូព៌ា (ERIA) និងសហការី ចូលជួបសម្ដែងការគួរសម នៅវិមាន៧មករា រាជធានីភ្នំពេញ។ជាកិច្ចចាប់ផ្តើម សម្តេចតេជោ បានសម្តែងនូវការស្វាគមន៍យ៉ាងកក់ក្តៅលោកសាស្រ្តាចារ្យ Tetsuya Watanabe និងសហការី ដែលបានចូលជួបសម្តែងការគួរសម និងពិភាក្សាអំពីការរៀបចំដំណើរទស្សនកិច្ចរបស់ សម្តេចតេជោ នៅសាធារណរដ្ឋឥណ្ឌូនេស៊ី ជាពិសេស ការៀបចំបាឋកថាគន្លឹះស្តីពីភាពជាអ្នកដឹកនាំ នៅវិទ្យាស្ថាន ERIA។ ជាមួយគ្នានេះ នៅដំណើរទស្សនកិច្ចខាងមុខនេះ សម្តេចតេជោ បានសម្តែងនូវក្តីរីករាយនឹងជួប ឯកឧត្តមប្រធានាធិបតី ឥណ្ឌូនេស៊ី Prabowo Subianto ដែលជាមិត្តចាស់ និង ទស្សនាអគ្គលេខាធិការដ្ឋានអាស៊ានផងដែរ។ សម្តេចតេជោ បានអបអរសាទរ សាលាសិក្សាស្តីពីរដ្ឋាភិបាលនៃវិទ្យាស្ថាន ERIA ដែលទើបសម្ពោធកាលពីពេលថ្មីៗ ក្នុងឆ្នាំ២០២៤ នៅរដ្ឋធានីហ្សាកាតា ប្រទេសឥណ្ឌូនេស៊ី និង សង្ឃឹមថាសាលាសិក្សាស្តីពីរដ្ឋាភិបាលនេះ នឹងសម្រេចបាននូវចក្ខុវិស័យរបស់ខ្លួន ដើម្បីជំរុញភាពជាអ្នកដឹកនាំ និងអភិបាលកិច្ចល្អ នៅក្នុងតំបន់អាស៊ាន។នាឱកាសជំនួបនេះ លោកសាស្រ្តាចារ្យ Tetsuya Watanabe បានសម្តែងនូវក្តីសោមនស្សរីករាយ និង ថ្លែងអំណរគុណយ៉ាងជ្រាលជ្រៅចំពោះ សម្តេចតេជោ ដែលបានឆ្លៀតពេលវេលាដ៏មានតម្លៃទទួលជួបជាមួយលោក និងសហការី ជាពិសេស ការទទួលយកការអញ្ជើញរបស់វិទ្យាស្ថាន ERIA ក្នុងការថ្លែងបាឋកថាពិសេស ស្តីពីបទពិសោធន៍របស់សម្តេចផ្ទាល់ អំពីដំណើរស្វែងរកសន្តិភាព ការឯកភាពទឹកដី និងការអភិវឌ្ឍកម្ពុជា។ លោកសាស្រ្តាចារ្យ Tetsuya Watanabe បានវាយតម្លៃខ្ពស់ចំពោះការគាំទ្រដ៏រឹងមាំរបស់រាជរដ្ឋាភិបាលកម្ពុជា ជាពិសេស ពីពេលសម្តេចតេជោនៅជានាយករដ្ឋមន្ត្រី ចាប់តាំងពីដំណាក់កាលផ្តួចផ្តើមបង្កើតវិទ្យាស្ថាននៅឆ្នាំ២០០៧ និងដំណើរការរហូតមកដល់ពេលនេះ។ លោកសាស្រ្តាចារ្យ Tetsuya Watanabe បានបន្តថា ក្នុងនាមជាអ្នកបន្តវេនពីលោកសាស្រ្តាចារ្យ Hidetoshi Nishimura, លោកកំពុងធ្វើការងារយ៉ាងជិតស្និតជាមួយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងបានពិភាក្សាភាពជាដៃគូរវាងវិទ្យាស្ថាន ERIA និងកម្ពុជា លើកិច្ចការស្រាវជ្រាវ និងសហប្រតិបត្តិការលើវិស័យនានា រួមមាន ធនធានមនុស្ស សេដ្ឋកិច្ច ឧស្សហកម្ម ថាមពល បច្ចេកវិទ្យា និងនវានុវត្តន៍....។ លោកសាស្រ្តាចា្យ ក៏បានសហការជាមួយ ឯកឧត្តមបណ្ឌិត កៅ គឹមហ៊ួន អគ្គលេខាធិការអាស៊ាន ដើម្បីជំរុញសមាហរណកម្ម សេដ្ឋ កិច្ច អាស៊ាន ជាពិសេសតួនាទីរបស់សាលាសិក្សាអំពីរដ្ឋាភិបាលនៃវិទ្យាស្ថាន ERIA ដើម្បីជំរុញ និងចែករំលែកភាពជាអ្នកដឹកនាំ និងអភិបាលកិច្ចឱ្យបានល្អប្រសើរនៅក្នុងអាស៊ាន និងតំបន់អាស៊ីអាគ្នេយ៍ ដល់ថ្នាក់ដឹកនាំវ័យក្មេង។ នាឱកាសជំនួបនេះដែរ លោកសាស្រ្តាចារ្យ Nobuhiro Aizawa ព្រឹទ្ធបុរស និងជាប្រធានសាលាសិក្សាអំពីរដ្ឋាភិបាលនៃវិទ្យាស្ថាន ERIA បានសង្កត់ធ្ងន់អំពីភាពចាំបាច់មិនអាចខ្វះបាន ដែលពិភពលោកគួររៀនសូត្រពីតំបន់អាស៊ីអាគ្នេយ៍ ជាពិសេសការដឹកនាំដ៏ប៉ិនប្រសប់របស់ សម្តេចតេជោ ដែលត្រូវបានអនុវត្តជាក់ស្តែងនៅក្នុងប្រទេសកម្ពុជា និងតំបន់ផងដែរ។ លោកសាស្រ្តាចារ្យ ក៏បានគូសបញ្ជាក់ថា កិច្ចការជាច្រើនដែលសម្តេចតេជោបានធ្វើ និងសម្រេចបានមិនទាន់ត្រូវបានសិក្សាស្រាវជ្រាវវាយតម្លៃ និងទាញយកបទពិសោធដ៏មានតម្លៃនេះ គ្រប់គ្រាន់នៅឡើយ។លោកសាស្រ្តាចារ្យ បានបន្តថា លោក ចង់ឱ្យអាស៊ាន និងតំបន់អាស៊ីអាគ្នេយ៍បានស្តាប់អំពីកិច្ចការដែលសម្តេចតេជោសម្រេចបាននៅកម្ពុជា និងជាមួយដៃគូនានា រួមទាំងប្រទេសជិតខាងក្នុងការកសាងមូលដ្ឋានគ្រឹះសេដ្ឋកិច្ច និងអនាគតរបស់កម្ពុជា និងតំបន់។ លោកសាស្រ្តាចារ្យ បានវាយតម្លៃខ្ពស់ចំពោះបាឋកថាគន្លឹះ របស់សម្តេចតេជា ថានឹងជួយឱ្យអ្នកជំនាន់ក្រោយ សិក្សារៀនសូត្រកាន់តែស៊ីជម្រៅអំពីអាស៊ាន និងថ្នាក់ដឹកនាំកំពូលរបស់អាស៊ាន តួយ៉ាង សម្តេចតេជោ។ ជាកិច្ចឆ្លើយតប សម្តេចតេជោ បានអរគុណ លោកសាស្រ្តាចារ្យ Tetsuya Watanabe និង លោកសាស្រ្តាចារ្យ Nobuhiro Aizawa ចំពោះពាក្យពេចន៍ និងការវាយតម្លៃខ្ពស់ចំពោះបទពិសោធ និងតួនាទីសម្តេចតេជោ ក្នុងការកសាងសន្តិភាពនៅកម្ពុជា និងតំបន់។ សម្តេចតេជោ បានកត់សម្គាល់អំពីតួនាទីនិងសារៈសំខាន់នៃវិទ្យាស្ថាន ERIA ក្នុងការសិក្សាស្រាវជ្រាវ និងការរៀបចំវេទិកាសេដ្ឋកិច្ចតំបន់ ដោយមានការចូលរួមពីប្រទេសអាស៊ីបូព៌ា ប្រទេសសេដ្ឋកិច្ចធំ និងប្រទេសនានាលើពិភពលោកផងដែរ។ សម្តេចតេជោ បានបន្តថា ការរៀបចំវេទិកាក្នុងទម្រងង់ពីតូចទៅធំរបៀបនេះ ជាជំហានយុទ្ធសាស្រ្តដែលវិទ្យាស្ថាន ERIA គួរគិតគូរ។សម្តេចតេជោ បានបញ្ជាក់ថា សម្តេចរីករាយនឹងចែករំលែកនូវ បទពិសោធគន្លឹះជាច្រើនដែល សម្តេច មិនមានពេលគ្រប់គ្រាន់ក្នុងការចែករំលែកក្នុងវេទិកានានា ក្នុងពេលកន្លងទៅ។ សម្តេច បានលើកឡើងថា បទពិសោធរបស់ សម្តេច ក្នុងការបញ្ចប់សង្រ្គាមនៅកម្ពុជា តាមរយៈគោលនយោបាយឈ្នះ-ឈ្នះ ដោយមិនប្រើគ្រាប់កាំភ្លើងសូម្បីមួយគ្រាប់ ប្រហែលជាគ្មានទេនៅលើពិភពលោក។ សម្តេចតេជោ ក៏បានរំឭកអំពីការយកជីវិតទៅប្តូរនឹងការទទួលបានសន្តិភាពទាំងមូលនៅកម្ពុជាសម្រាប់រយៈពេលវែងនេះ។ សម្តេចតេជោ គូសបញ្ជាក់ថា រយៈកាល ២៦ឆ្នាំកន្លងមកនេះ កម្ពុជាកសាងនិង រក្សាបានសន្តិភាព ដែលជាសន្តិភាពវែងជាងគេក្នុងប្រវត្តិសាស្រ្ត ៥០០ឆ្នាំចុងក្រោយរបស់កម្ពុជា។ សម្តេចតេជោ បានបន្ថែមថា ក្រោយពីបញ្ចប់សង្រ្គាមផ្ទៃក្នុងទាំងស្រុង សម្តេចបានដាក់ចេញនូវគោលដៅយុទ្ធសាស្រ្តប្រែក្លាយតំបន់អតីតសមរភូមិឱ្យទៅជាទីផ្សារនិងតំបន់អភិវឌ្ឍ និងការប្រែក្លាយតំបន់តាមព្រំដែនជាតំបន់កិច្ចសហប្រតិបត្តិការល្អ។ សម្តេចតេជោ ក៏បានថ្លែងថាគោលដៅយុទ្ធសាស្រ្តទាំងពីរនេះ សម្តេច សម្រេចបានជាង ៩០% រួចហើយមកទល់នឹងពេលនេះ ហើយទំហំពាណិជ្ជកម្មរវាងកម្ពុជានិងប្រទេសជិតខាងយើងក៏បានកើនឡើងជាលំដាប់។ សម្តេចតេជោ បានសង្កត់ធ្ងន់ថា ទាំងនេះ គឺជាទ្រឹស្តី និងយុទ្ធសាស្រ្តរបស់ សម្តេច ផ្ទាល់ដែលនៅកម្ពុជា គេស្គាល់ថាជា "ទ្រឹស្តី និងយុទ្ធសាស្រ្ត ហ៊ុន សែន"។សម្តេចតេជោ បានរំឭកផងដែរពីមូលហេតុដែលសម្តេច ត្រូវតែដឹកនាំកម្ពុជាចូលជាសមាជិកអាស៊ាន។ សម្តេចតេជោ បន្តបញ្ជាក់ថា ប្រទេសសមាជិកអាស៊ានមានវប្បធម៌ប្រហាក់ប្រហែលគ្នា ដែលនេះជាកាលានុវត្តភាពក្នុងការផ្លាស់ប្តូរពាណិជ្ជកម្មរវាងគ្នា និងរវាងអាស៊ានជាមួយដៃគូផ្សេងៗទៀត តាមរយៈ កិច្ចព្រមព្រៀងផ្លាស់ប្តូរពាណិជ្ជកម្មសេរី កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) ជាដើម។ សម្តេចតេជោ ក៏បានបន្តថា យើងមិនអាចធៀបខ្លួនជាមួយនឹងតំបន់ណាមួយទេ គួរសំលឹងមើលអាស៊ានខ្លួនឯង តាមបែបប្រាកដនិយម និងសិក្សាពីខ្លួនឯង និងអ្នកជិតខាងឱ្យបានម៉ត់ចត់ ដោយ "យើងមិនអាចរត់រកឡានទឹកឆ្ងាយ នៅពេលភ្លើងឆេះផ្ទះនោះទេ"។ លោកសាស្រ្តាចារ្យ Tetsuya Watanabe បានសម្តែងនូវក្តីសោមនស្សរីករាយជាទីបំផុតដោយបានសិក្សារៀនសូត្របានច្រើននាឱកាសជំនួបនេះ និងថ្លែងថា បាឋកថារបស់សម្តេចតេជោ នៅវិទ្យាស្ថាន ERIA នាពេលខាងមុខនេះ គឺជាប្រវត្តិសាស្រ្ត ដើម្បីអាចឱ្យតំបន់បានសិក្សារៀនសូត្របន្ថែម។ តាមរយៈបាឋកថានេះ លោកសាស្រ្តាចារ្យ យល់ថា ប្រទេសជាសមាជិកអាស៊ាន ប្រទេសនានានៅក្នុងតំបន់ និងក្រៅតំបន់ នឹងបានស្តាប់ឮអំពីកិច្ចខិតខំប្រឹងប្រែង និងកិច្ចផ្តួចផ្តើម របស់កម្ពុជាក្នុងការកសាង និងរក្សាបានសន្តិភាពក្នុងប្រទេស ក៏ដូចជាតំបន់ និងពិភពលោក។ជាចុងក្រោយនៃជំនួប សម្តេចតេជោ បានជូនពរ លោកសាស្រ្តាចារ្យTetsuya Watanabe និងសហការី ទទួលបានជោគជ័យគ្រប់ភារកិច្ច និងទទួលផាសុកភាពពេលស្នាក់នៅកម្ពុជា៕

កម្ពុជា-ថៃ សន្យាបន្ដពង្រឹងកិច្ចសហប្រតិបត្តិការបន្ថែមទៀតក្នុងការទប់ស្កាត់ និងបង្ក្រាប​បទល្មើស​គ្រឿងញៀន

2025/02/10 03:56:52 pm        147
Facebook Telegram Linkin
រាជរដ្ឋាភិបាលកម្ពុជា និងថៃ បានប្រកាសប្ដេជ្ញាចិត្តរួមគ្នា ក្នុងការពង្រឹងកិច្ចសហប្រតិបត្តិការ និ​ង​ផ្លាស់​ប្ដូរ​ព័ត៌មានឲ្យគ្នាទៅវិញទៅមកបន្ថែមទៀតក្នុងការបង្ការទប់ស្កាត់ និងបង្ក្រាប​បទ​ល្មើស​គ្រឿង​ញៀន​ខុស​ច្បាប់​ខណៈ​បញ្ហានេះ​ត្រូ​វ​បាន​ភាគី​ទាំង​ពីរ​ចាត់​ទុក​ថា​ជាករណី​មួយ​ដ៏​ស្មុគ​ស្មាញនោះ។ការប្តេជ្ញារបស់ភាគីទាំងពីរនេះ គឺបានធ្វើឡើងនៅព្រឹកថ្ងៃទី១០ ខែកុម្ភៈ ឆ្នាំ២០២៥​នេះ​​នៅ​ទីស្តីកា​រគណៈរដ្ឋមន្រ្តី ក្នុងឱកាសជំនួបសម្ដែងការគួរសម និងពិភាក្សាការងាររវាងឯកឧត្តមសន្ដិបណ្ឌិត នេត សាវឿន ឧបនាយករដ្ឋមន្ដ្រី និងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន ជា​មួយ​ឧត្តម​សេនីយ៍ឯក ផានុរ៉ាត់ លក្ខណ៍បុណ្យ អគ្គលេខាធិការ​នៃ​ការិយាល័យ​ក្រុម​ប្រឹក្សា​ត្រួត​ពិនិ​​ត្យ​គ្រឿង​ញៀន​ថៃ។ថ្លែងនៅក្នុងកិច្ចជំនួបនោះ លោកឧត្តមសេនីយ៍ឯក ផានុរ៉ាត់ លក្ខណ៍បុណ្យ​បាន​សម្ដែង​នូវ​ការ​កោត​សរសើរ​ចំពោះ​សមិទ្ធផល​លើ​ការងារ​ប្រយុទ្ធ​ប្រឆាំង​គ្រឿង​ញៀន​របស់​កម្ពុជា​នា​ពេលក​ន្លង​មក ពិសេសភាពជោគជ័យលើយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៩ ឆ្នាំ​២០២៤ ក្នុងនោះបានបង្ក្រាបបទល្មើសគ្រឿងញៀន រឹបអូសសារធាតុញៀន និងសារធាតុគីមីផ្សំ ព្រម​ទាំងអនុវត្តវិធានការបង្ការទប់ស្កាត់ និងផ្សព្វផ្សាយអប់រំយ៉ាងមានប្រសិទ្ធភាពជាដើម។នៅ​ចំពោះមុខឯកឧត្តមសន្តិបណ្ឌិត នេត សាវឿន លោកឧត្តមសេនីយ៍ឯក ផានុរ៉ាត់ លក្ខណ៍​បុណ្យក៏​បានលើកឡើងអំពីការចាប់អារម្មណ៍ចំពោះវិធីសាស្ដ្រ របស់អាជ្ញាធរ​ជាតិ​ប្រយុទ្ធ​ប្រឆាំ​ង​គ្រឿង​ញៀន ក្រោមការដឹកនាំរបស់ឯកឧត្តមសន្ដិបណ្ឌិត ដែលទទួលបាននូវប្រសិទ្ធភាពជាច្រើន រួម​ទាំងការបង្កើត App NoDrug ជាដើម។ កម្មវិធី ឬ App NoDrug បាន​ប្រមូល​ផ្ដុំ​ទៅ​ដោយ​ការ​អប់​រំ​តាម​ប្រព័ន្ធឌីជីថល និងជាមធ្យោបាយមួយ​ដ៏មាន​ប្រសិទ្ធភាព​ដើម្បី​ឲ្យ​ប្រជា​ពលរដ្ឋ​រាយការណ៍ ដើម្បីលុបបំបាត់ករណីគ្រឿងញៀននៅក្នុងសហគមន៍នោះ។ បន្ថែម​ពី​នេះ​ទៀត​លោក​ឧត្តម​សេនីយ៍ឯកក៏បានវាយតម្លៃខ្ពស់ចំពោះកិច្ចសហប្រតិបត្តិការរវាងកម្ពុជា និងថៃ នាពេលកន្លង​មក​លើការងារប្រយុទ្ធប្រឆាំងគ្រឿងញៀន ដើម្បីទប់ស្កាត់ការលួចឆ្លងដែនគ្រឿងញៀនខុសច្បាប់ និង​ការផ្លាស់ប្ដូរព័ត៌មានឲ្យគ្នាទៅវិញទៅមកផងដែរ។ថ្លែងនៅក្នុងកិច្ចជំនួបនោះដែរ ឯកឧត្តម សន្ដិបណ្ឌិត នេត សាវឿន បានថ្លែង​អំណរ​គុណ​ដល់ភាគីថៃ ដែលជាមិត្តដ៏ល្អ និងបានជួយគ្នាលើគ្រប់វិស័យ។ ដោយឡែកចំពោះការប្រយុទ្ធប្រឆាំងគ្រឿងញៀននេះ ភាគីថៃបានដើរតួនាទីយ៉ាងសំខាន់ដល់កម្ពុជា ទាំងការងារជំនាញការផ្លាស់ប្ដូរព័ត៌មានការងារជំនួយសម្ភារបច្ចេកទេស។ ជាក់ស្ដែងជំនួយសម្ភារឧបករណ៍បច្ចេកទេសនៅថ្ងៃនេះ គឺជាសក្ខីភាពបង្ហាញអំពីការគិតគូររបស់ភាគីថៃ មកលើកម្ពុជា ហើយជំនួយទាំងអស់នេះប្រៀបដូចភាគីថៃ ចូលរួមជាមួយកម្ពុជា ដើម្បីប្រយុទ្ធប្រឆាំងគ្រឿងញៀននៅប្រទេសកម្ពុជាយ៉ាងដូច្នេះដែរ។កិច្ចជំនួបនោះដែរឯកឧត្តម សន្ដិបណ្ឌិតនេត សាវឿន ក៏បានរំលេចអំពីគោលនយោបាយរបស់រាជរដ្ឋាភិបាលកម្ពុជា ដែលចាត់ទុកការងារប្រយុទ្ធប្រឆាំងគ្រឿងញៀន ជាវិស័យអាទិភាពមួយ ក្នុងនោះមានក្បាលម៉ាស៊ីនដឹកនាំដ៏រឹងមាំ និងមានការចូលរួមពីគ្រប់វិស័យ គ្រប់ក្រសួងស្ថាប័នទាំងអស់ ដើម្បីធ្វើឲ្យការងារនេះកាន់តែមានប្រសិទ្ធភាព ឆ្លើយតបទៅនឹងបញ្ហាក្នុងសហគមន៍ បានទាន់ពេលវេលា។សូមបញ្ជាក់ថា ក្រៅពីជំនួបនោះឯកឧត្តម សន្ដិបណ្ឌិត នេត សាវឿន ក៏បានអញ្ជើញជាអធិបតីក្នុងពិធីប្រគល់-ទទួលរថយន្ដ និងឧបករណ៍តេស្ដរកសារធាតុញៀនតាមទឹកមូត្រ ដែលធ្វើឡើងដោយនាយឧត្តមសេនីយ៍ មាស វិរិទ្ធ អគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀន លោកឧត្តមសេនីយ៍ឯក ផានុរ៉ាត់ លក្ខណ៍បុណ្យ អគ្គលេខាធិការ នៃការិយាល័យក្រុមប្រឹក្សាត្រួតពិនិត្យគ្រឿងញៀនថៃផងដែរ៕ អត្ថបទ៖ បាន ចក់

ឯកឧត្ដមរដ្ឋមន្ត្រី ជា វ៉ាន់ដេត ចូលរួមកិច្ចប្រជុំថ្នាក់រដ្ឋមន្ត្រីនៃ “ភាពជាដៃគូសកល​លើបញ្ញាសិប្បនិម្មិត” ជាមួយឥស្សរជនតំណាងជាង ៦០ប្រទេសនិងអង្គការអន្តរជាតិ

2025/02/10 03:27:54 pm        180
Facebook Telegram Linkin
ប៉ារីស៖ នៅថ្ងៃទី៩ ខែកុម្ភៈ ឆ្នាំ២០២៥ ឯកឧត្ដម ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍តំណាងដ៏ខ្ពង់ខ្ពស់របស់ សម្ដេចធិបតីនាយករដ្ឋមន្ត្រី បានអញ្ជើញចូលរួម “កិច្ចប្រជុំថ្នាក់រដ្ឋមន្ត្រីនៃភាពជាដៃគូសកលលើបញ្ញាសិប្បនិម្មិត” (Ministerial Meeting of the Global Partnership on Artificial Intelligence) នៅទីស្ដីការក្រសួងការបរទេសនៃសាធារណរដ្ឋបារាំង។ កិច្ចប្រជុំនេះមានការចូលរួមពីរដ្ឋមន្ត្រីនិងឥស្សរជននៃប្រទេសជាសមាជិកនៃភាពជាដៃគូសកលលើបញ្ញសិប្បនិម្មិតចំនួន ៤៤ប្រទេស និងប្រទេសមិនមែនជាសមាជិកប្រមាណ២០ប្រទេស ព្រមទាំងអង្គការអន្តរជាតិមួយចំនួនដូចជាអង្គការសម្រាប់កិច្ចសហប្រតិបត្តិការនិងអភិវឌ្ឍន៍សេដ្ឋកិច្ច (OECD) និងសហភាពទូរគមនាគមន៍អន្តរជាតិជាដើម។ រដ្ឋមន្ត្រីការបរទេសនៃសហម្ចាស់ផ្ទះទាំងបី រួមមានប្រទេសបារាំង ស៊ែប៊ី និងស្លូវ៉ាគី បានថ្លែងមតិស្វាគមន៍បណ្ដាប្រទេសសមាជិកនិងមិនមែនសមាជិកនិងតំណាងអង្គការអន្តរជាតិទាំងអស់ដែលបានចូលរួម ដោយផ្ដោតលើកិច្ចសហប្រតិបត្តិការអន្តរជាតិលើអភិបាលកិច្ចបញ្ញាសិប្បនិម្មិត ក្នុងបរិការណ៍នៃការវិវត្តយ៉ាងលឿនរហ័សនៃបច្ចេកវិទ្យានេះ។ ក្នុងកិច្ចប្រជុំនេះដែរ រដ្ឋមន្ត្រីទទួលបន្ទុកវិស័យឌីជីថលដូចជារដ្ឋមន្ត្រីប្រទេសអេហ្ស៊ីប កាហ្សាក់ស្ថាន និងឥណ្ឌូនេស៊ី ព្រមទាំងនាយកប្រតិបត្តិនិងអ្នកគ្រប់គ្រងជាន់ខ្ពស់ជាវាគ្មិនមកពីបណ្ដាប្រទេសនានា បានពិភាក្សាអំពីសារៈប្រយោជន៍នៃការធ្វើអភិបាលកិច្ចបច្ចេកវិទ្យាបញ្ញាសិប្បនិម្មិត ការបញ្ចៀសនូវផលប៉ះពាល់អវិជ្ជមាន ការស្រាវជ្រាវ ការអប់រំគ្រប់កម្រិតសិក្សា និងការរៀបចំម៉ូដែលភាសាធំ (Large Language Model) ជាដើម។ ឯកឧត្ដម អេម៉ានុយអែល ម៉ាក្រុង និងឯកឧត្ដម ចាស្ទីន ទ្រូដូ ក៏បានអញ្ជើញចូលរួមជាកិត្តិយសនិងថ្លែងសុន្ទរកថាបិទកិច្ចប្រជុំនេះផងដែរ។ តាមរយៈកិច្ចប្រជុំនេះ កម្ពុជាជាប្រទេសក្នុងចំណោមប្រទេសមិនមែនសមាជិកដែលត្រូវបានអញ្ជើញឱ្យចូលរួមជាសមាជិកផងដែរ។គួររំឭកថា GPAI ត្រូវបានបង្កើតឡើងក្នុងឆ្នាំ២០២០ តាមគំនិតផ្ដួចផ្ដើមរបស់ប្រទេសបារាំងនិងកាណាដាក្នុងក្របខណ្ឌក្រុមប្រទេស G7 ហើយក្រោយមកត្រូវបានធ្វើសមាហរណកម្មជាមួយកិច្ចការបញ្ញាសិប្បនិម្មិតរបស់អង្គការ OECD ដើម្បីពង្រឹងកិច្ចសហការលើអភិបាលកិច្ចនិងការអភិវឌ្ឍបញ្ញាសិប្បនិម្មិត។ កិច្ចប្រជុំថ្នាក់រដ្ឋមន្ត្រីនាគ្រានេះ រៀបចំឡើងក្នុងឱកាសនៃ “កិច្ចប្រជុំកំពូលសកម្មភាពបញ្ញាសិប្បនិម្មិត” (AI Action Summit) រៀបចំឡើងដោយសាធារណរដ្ឋបារាំងនិងប្រទេសឥណ្ឌា ក្រោមអធិបតីភាព ឯកឧត្ដមប្រធានាធិបតី អេម៉ានុយអែល ម៉ាក្រុង ឯកឧត្ដមនាយករដ្ឋមន្ត្រី ណារ៉េនដ្រា ម៉ូឌី ព្រមទាំងប្រមុខរដ្ឋនិងប្រមុខរដ្ឋាភិបាលនៃបណ្ដាប្រទេសជាដៃគូ។ ឯកឧត្ដមរដ្ឋមន្ត្រី ជា វ៉ាន់ដេត ត្រូវបានរាជរដ្ឋាភិបាលកម្ពុជាចាត់តាំងជាតំណាងដ៏ខ្ពង់ខ្ពស់របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ចូលរួមក្នុងកិច្ចប្រជុំកំពូលនេះនិងបណ្ដាកិច្ចប្រជុំពាក់ព័ន្ធ។ កិច្ចប្រជុំនេះបានបន្តនាថ្ងៃចន្ទ ទី១០ និងថ្ងៃអង្គារ ទី១១ ដោយមានការចូលរួមពីប្រមុខរដ្ឋ ប្រមុខរដ្ឋាភិបាល និងតំណាងប្រមាណ ៦០ប្រទេសចូលរួម៕

សម្តេចប្រធានរដ្ឋសភា ស្នើឱ្យទូតថ្មីនៅបរទេសត្រូវការពារកិត្តិយសជាតិ ដើម្បីធានាឯករាជ្យភាពកម្ពុជា

2025/02/10 03:02:25 pm        186
Facebook Telegram Linkin
សម្តេចប្រធានរដ្ឋសភា បានស្នើដល់ឯកអគ្គរាជទូតកម្ពុជាទើបតែងតាំងថ្មីនៅបរទេស ត្រូវបំពេញតួនាទូ និងភារកិច្ចការពារកិត្តិយសជាតិ ដើម្បីធានាឯករាជ្យភាពរបស់កម្ពុជា។ការស្នើដូចនេះធ្វើឡើង នៅថ្ងៃទី១០ ខែកុម្ភៈ ឆ្នាំ២០២៥ ក្នុងឱកាសសម្តេចមហារដ្ឋសភាធិការធិបតី ឃួន សដារី ប្រធានរដ្ឋសភា អនុញ្ញាតជូន ឯកអគ្គរាជទូតចំនួនបួនរូបដែលទើបទទួលបានការតែងតាំងក្នុងការបំពេញបេសកកម្មការទូតនៅបណ្តាប្រទេសនានា បានចូលជួបសម្តែងការគួរសម និងទទួលអនុសាសន៍ មុនពេលចាកចេញពីមាតុប្រទេសទៅបំពេញបេសកកម្ម។ នាឱកាសនោះ សម្តេចប្រធានរដ្ឋសភា មានក្តីសោមនស្សរីករាយ និងបានស្វាគមន៍យ៉ាងកក់ក្តៅចំពោះវត្តមានរបស់ ឯកឧត្តម លោកជំទាវ ឯកអគ្គរាជទូតទើបតែងតាំងថ្មីទាំងបួនរូប ដែលបានអញ្ជើញមកកាន់វិមានរដ្ឋសភា ដើម្បីជួបសម្តែងការគួរសម ក៏ដូចជាជម្រាបលា មុនចេញទៅបំពេញបេសកកម្មដ៏ឧត្តុង្គឧត្តមជូនជាតិមាតុភូមិ នាពេលខាងមុខ។ សម្តេចប្រធានរដ្ឋសភា មានប្រសាសន៍ថា ឯកអគ្គរាជទូតដែលត្រូវបំពេញបេសកកម្មការទូតនៅតាមបណ្តាប្រទេសនានា មិនត្រឹមតែតំណាងឱ្យក្រសួងការបរទេសប៉ុណ្ណោះទេ តែជាតំណាងឱ្យប្រទេសជាតិ តំណាងឱ្យព្រះមហាក្សត្រ និងតំណាងឱ្យប្រជាជនកម្ពុជាទាំងមូល។ ទន្ទឹមគ្នានេះ សម្តេចប្រធានរដ្ឋសភា ស្នើឱ្យបេសកកម្មការទូតជាការងារដ៏ឧត្តុងឧត្តម ត្រូវការពារឱ្យបាននូវផលប្រយោជន៍ប្រទេសជាតិ និងការលើកម្ពស់កិត្យានុភាពជាតិនៅលើឆាកអន្តរជាតិ។សម្តេចប្រធានរដ្ឋសភា បានគូសបញ្ជាក់ថា ជាមន្រ្តីការទូត ជាអ្នកដែលឈរនៅសមរភូមិជួរមុខ ហើយបេសកកម្មការទូតពិតជាសំខាន់ខ្លាំង ដើម្បីបំពេញបន្ថែមទៅលើកិច្ចខិតខំប្រឹងប្រែងរបស់អ្នកខាងក្នុងប្រទេស ដោយរួមចំណែកការពារ និងលើកកម្ពស់អត្តសញ្ញាណជាតិ កំណើនសេដ្ឋកិច្ច និងស្ថិរភាពជាតិ។  លើសពីនេះ ដើម្បីឈានទៅសម្រេចបាននូវគោលបំណងនេះ ក្នុងនាមជាមន្រ្តីការទូត ចាំបាច់ត្រូវមានសមត្ថភាព ក្នុងការសម្របសម្រួលយ៉ាងជិតស្និទ្ធរវាងការទូតរបស់រដ្ឋ ការទូតសភា និងការទូតផ្សេងៗ ដូចជាការទូតសេដ្ឋកិច្ច និងការទូតប្រជាជនជាដើម។ សម្តេចប្រធានរដ្ឋសភា លើកឡើងបន្តថា ក្រៅពីការបំពេញបេសកកម្មការទូត ឯកអគ្គរាជទូតក៏ជាអាណាព្យាបាលលើពលរដ្ឋខ្មែរ ដែលកំពុងស្នាក់នៅ សិក្សា ឬរកទទួលទាននៅតាមបណ្តាប្រទេសដែលខ្លួនបំពេញបេសកកម្មការទូតផងដែរ ពិសេសអ្នកការទូតត្រូវផ្សារភ្ជាប់សុខទុក្ខជាមួយប្រជាពលរដ្ឋត្រូវរក្សាអត្តសញ្ញាណជាតិ និងផ្សព្វផ្សាយវប្បធម៌ ប្រពៃណីរបស់ជាតិដល់អន្តរជាតិ។ក្នុងឱកាសនោះដែរ ឯកឧត្តម ជា ច័ន្ទបរិបូរណ៌ តំណាងឯកអគ្គរាជទូតទំាងបួនរូប បានថ្លែងអំណរគុណយ៉ាងជ្រាលជ្រៅជូនសម្តេចប្រធានរដ្ឋសភា ដែលបានផ្តល់ឱកាសជូន ឯកឧត្តម និងលោកជំទាវទាំងអស់ បានចូលជួបសម្តែងការគួរសម ពិសេសទទួលបានអនុសាសន៍ល្អៗនៅក្នុងឱកាសនេះ។  ឯកឧត្តមឯកអគ្គរាជទូត បានលើកឡើងពីការតាំងចិត្តខ្ពស់ នៅក្នុងការបម្រើប្រជាពលរដ្ឋ និងប្រទេសជាតិឱ្យទទួលបានជោគជ័យ ឆ្លើយតបចំពោះការជឿទុកចិត្តដ៏ខ្ពង់ខ្ពស់បំផុតរបស់សម្តេចប្រមុខរាជរដ្ឋាភិបាល ក៏ដូចជាសម្តេចប្រធានព្រឹទ្ធសភា និងសម្តេចប្រធានរដ្ឋសភា៕អត្ថបទ សេក ឧត្តម

បណ្ដាញសង្គម

ព័ត៌មានថ្មីៗ

ប្រតិភូគណៈចលនាសាសនិកឥស្លាមកម្ពុជា នាំយកអំណោយឧបត្ថម្ភជូនកងកម្លាំងជួរមុខ ដែលកំពុងឈរជើងការពារព្រំដែន ខេត្តព្រះវិហារ
07/19/2025 08:07 PM
Facebook Telegram Linkin
ឯកឧត្តម ឌិត ទីណា អញ្ជើញបើកកិច្ចប្រជុំបូកសរុបសកម្មភាព និងលទ្ធផលការងារមូលដ្ឋានខេត្តបន្ទាយមានជ័យ
07/19/2025 07:07 PM
Facebook Telegram Linkin
កូនប្រុសពៅសម្ដេចធិបតី ហ៊ុន ម៉ាណែត ទទួលបានមេដាយមាសសិស្សឆ្នើម លើការប្រកួតគណិតវិទ្យាអន្តរជាតិ ចំណាត់ថ្នាក់លេខមួយ ៣ឆ្នាំជាប់គ្នា
07/19/2025 05:07 PM
Facebook Telegram Linkin
ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី បន្តចុះពិនិត្យ ព្យាបាលជំងឺ ជូនប្រជាពលរដ្ឋដោយឥតគិតថ្លៃ នៅឃុំតាសាល ស្រុកឱរ៉ាល់ ខេត្តកំពង់ស្ពឺ
07/19/2025 05:07 PM
Facebook Telegram Linkin
ចិនប្តេជ្ញាចាត់វិធានការកាន់តែតឹងរ៉ឹង ប្រឆាំងនឹងការរត់ពន្ធរ៉ែយុទ្ធសាស្ត្រ
07/19/2025 05:07 PM
Facebook Telegram Linkin
មន្ត្រីជាន់ខ្ពស់ក្រសួងធម្មការនិងសាសនាណែនាំដល់យុវជនត្រូវធ្វើអំពើល្អនិងខិតខំរៀនសូត្រដើម្បីបន្តការពារនិងអភិវឌ្ឍន៍ជាតិ
07/19/2025 05:07 PM
Facebook Telegram Linkin
លោក Zelenskyy៖ រុស្ស៊ីបាញ់មីស៊ីលជាង ៣០គ្រាប់ និងយានដ្រូន ៣០០គ្រឿង អំឡុងការវាយប្រហារលើអ៊ុយក្រែន
07/19/2025 05:07 PM
Facebook Telegram Linkin
មនុស្សយ៉ាងតិច ១៩នាក់ រងរបួសដោយសារការផ្ទុះកាំជ្រួចនៅកន្លែងតាំងពិព័រណ៍ ភាគខាងលិចអាល្លឺម៉ង់
07/19/2025 05:07 PM
Facebook Telegram Linkin
កុងហ្គោ និងក្រុមឧទ្ទាម M23 ចុះហត្ថលេខាលើកិច្ចព្រមព្រៀងឈប់បាញ់ នៅកាតា
07/19/2025 05:07 PM
Facebook Telegram Linkin
កូនត្រីចម្រុះប្រមាណ៣ម៉ឺនក្បាល និងត្រីមេពូជ១០០គីឡូក្រាម ត្រូវបានលែងចូលស្រះជំរកត្រីសហគមន៍នេសាទបឹងកំពែង ក្នុងទិវាមច្ឆជាតិ១កក្កដា
07/19/2025 05:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.