BTV NEWS

ឧបនាយករដ្ឋមន្រ្តី កើត រិទ្ធ៖យប់នេះក្រសួងយុត្តិធម៌មានភាពចាំបាច់ផ្អាកជាបណ្តោះអាសន្នមុខងាររបស់ព្រះរាជអាជ្ញារងឈ្មោះ គ្រី សីហា ដែលដោះលែងដោយរំលោភអំណាចនូវជនល្មើស

សម្តេចរដ្ឋសភាធិបតី ឃួន សុដារី ៖ កិច្ចប្រជុំក្រុមអ្នកនយោបាយអន្តរសភាអាស៊ានលើកទី១៦បានផ្លាស់ប្តូរនូវទស្សនៈយ៉ាងសកម្មក្នុងការជំរុញការទូតសភា កិច្ចសហប្រតិបត្តិការ និងភាពជាដៃគូដើម្បីប្រជាពលរដ្ឋ

លោក Prabowo ថាលោក Trump ជាអ្នកចរចាតឹងតែង ខណៈកិច្ចប្រជុំពាណិជ្ជកម្មឥណ្ឌូនេស៊ី-អាមេរិកនៅបន្ត

កម្លាំងចម្រុះរដ្ឋបាលរាជធានីភ្នំពេញចុះបង្រ្កាបទីតាំងលួចលាក់បង្កប់បទល្មើស Online Scams ឃាត់ជនសង្ស័យ១០០នាក់

ព័ត៌មានជាតិ

គណៈកម្មការទី១ នៃព្រឹទ្ធសភា ចុះ MoU ជាមួយក្រុមមេធាវីស្ម័គ្រចិត្តសម្ដេចតេជោសែន ដើម្បីផ្ដល់ជំនួយផ្នែកច្បាប់ជួយពលរដ្ឋ

ភ្នំពេញ ÷ គណៈកម្មការសិទ្ធិមនុស្ស ទទួលពាក្យបណ្ដឹង និងអង្កេត នៃព្រឹទ្ធសភា (គណៈកម្មការទី១) នៅព្រឹកថ្ងៃទី៦ ខែកុម្ភៈ ឆ្នាំ២០២៥នេះ បានចុះអនុស្សារណៈនៃការយោគយល់គ្នា (MoU) ជាមួយក្រុមមេធាវីស្ម័គ្រចិត្តសម្ដេចតេជោសែន ដើម្បីជួយការពារសិទ្ធិ បំពេញសិទ្ធិជូនប្រជាពលរដ្ឋដែលខ្វះលទ្ធភាព ជាពិសេសស្ដ្រីងាយរងគ្រោះខ្វះការការពារសិទ្ធិតាមផ្លូវច្បាប់ ឲ្យមានភាពស្មើគ្នាចំពោះមុខច្បាប់។ពិធីចុះអនុស្សារណៈនៃការយោគយល់គ្នានេះ ធ្វើឡើងក្រោមអធិបតីភាព ឯកឧត្តម អ៊ុច បូររិទ្ធ ប្រធានស្ដីទីព្រឹទ្ធសភា និងមានការចុះហត្ថលេខាដោយ ឯកឧត្តម ងី ច័ន្ទ្រផល ប្រធានគណៈកម្មការសិទ្ធិមនុស្ស ទទួលពាក្យបណ្ដឹង និងអង្កេត នៃព្រឹទ្ធសភា និងលោក គី តិច ទេសរដ្ឋមន្ដ្រីទទួលបន្ទុកបេសកកម្មពិសេស និងជាប្រធានក្រុមមេធាវីស្ម័គ្រចិត្តសម្ដេចតេជោសែន។ ឯកឧត្តម អ៊ុច បូររិទ្ធ បានកត់សម្គាល់ថា ការអនុស្សរណៈនាពេលនេះ បានបង្ហាញឲ្យឃើញនូវគោលដៅរួម ដែលមានសារៈសំខាន់ និងអត្ថប្រយោជន៍ក្នុងការផ្ដល់ការការពារ បំពេញសិទ្ធិតាមបញ្ញត្តិច្បាប់ ជូនប្រជាពលរដ្ឋកម្ពុជាដែលមានជីវភាពខ្សត់ខ្សោយងាយរងគ្រោះ ជាពិសេសចំពោះស្រ្ដីរងគ្រោះ ដែលខ្វះការការពារសិទ្ធិតាមផ្លូវច្បាប់ នៅក្នុងក្របខណ្ឌទូទាំងប្រទេស។ដោយឡែក ឯកឧត្តម ងី ច័ន្ទ្រផល បានលើកឡើងថា ក្នុងបរិបទនៃព្រឹទ្ធសភានីតិកាលទី៥ ដែលមានសម្តេចអគ្គមហាសេនាបតីតេជោ ហ៊ុន សែន ជាប្រធាន, ព្រឹទ្ធសភា និងគ្រប់យន្តការទាំងអស់ បាននិងកំពុងអនុវត្តតួនាទី ភារកិច្ច និងសមត្ថកិច្ចរបស់ខ្លួនយ៉ាងសកម្ម ស្របតាមរដ្ឋធម្មនុញ្ញ ច្បាប់ បទបញ្ជាផ្ទៃក្នុង និងបទប្បបញ្ញត្តិជាធរមាននានា ប្រកបដោយស្មារតីទទួលខុសត្រូវខ្ពស់ចំពោះម្ចាស់ឆ្នោត និងប្រទេសជាតិ។ឯកឧត្តម ងី ច័ន្ទ្រផល បានបង្ហាញនូវជំនឿយ៉ាងមុតមាំថា តាមរយៈស្មារតីនៃកិច្ចសហប្រតិបតិ្តការ និងការប្តេជ្ញាចិត្តខ្ពស់របស់គូភាគីយើងទាំងពីរ ដូចបានឆ្លុះបញ្ចាំងក្នុងអនុស្សរណៈនៃការយោគយល់នេះ នឹងសម្រេចបាននូវការអនុវត្តសកម្មភាពរួមគ្នា ដើម្បីលើកកម្ពស់ការគោរពសិទ្ធិមនុស្ស លទ្ធិប្រជាធិបតេយ្យ និងនីតិរដ្ឋ ក្នុងឧត្តមប្រយោជន៍ជាតិ និងប្រជាជន ស្របតាមការដឹកនាំដ៏ប៉ិនប្រសព្វ ឈ្លាសវៃ ប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃរាជរដ្ឋាភិបាលកម្ពុជា។ជាមួយគ្នានោះ ឯកឧត្តម ទេសរដ្ឋមន្ដ្រី គី តិច បានឲ្យដឹងថា ដោយគោរពប្រតិបត្តិតាមគតិបណ្ឌិតដ៏ខ្ពង់ខ្ពស់បំផុតរបស់សម្ដេចតេជោ ហ៊ុន សែន «ក្រុមមេធាវីស្ម័គ្រចិត្តសម្ដេចតេជោសែន» ត្រូវបានបង្កើតឡើងនៅថ្ងៃទី២៧ ខែកុម្ភៈ ឆ្នាំ២០១៩ ក្នុងគោលដៅជួយដល់ស្ត្រីងាយរងគ្រោះ មានជីវភាពខ្សត់ខ្សោយ និងពុំមានលទ្ធភាពទទួលបានការការពារសិទ្ធិតាមផ្លូវច្បាប់ ក្នុងក្របខណ្ឌទូទាំងប្រទេស។ បច្ចុប្បន្នក្រុមមេធាវីស្ម័គ្រចិត្តសម្តេចតេជោសែន មានចំនួន១២៩រូប ក្នុងនោះគណៈប្រតិបត្តិដឹកនាំដោយប្រធាន១រូប និងអនុប្រធាន១០រូប, ក្រុមមេធាវីស្រាវជ្រាវច្បាប់ និងពិគ្រោះយោបល់៩រូប, ក្រុមមេធាវីអន្តរាគមន៍២០រូប និងក្រុមមេធាវីទទួលបន្ទុកតាមបណ្ដារាជធានី-ខេត្ត ៨៩រូប។ ក្រុមមេធាវីស្ម័គ្រចិត្តសម្តេចតេជោសែន បំពេញភារកិច្ចដោយស្ម័គ្រចិត្ត ឥតទទួលយកកម្រៃសេវា ពីប្រជាពលរដ្ឋរងគ្រោះឡើយ។ឯកឧត្តម គី តិច បានអះអាងថា ប្រតិបត្តិការរបស់ក្រុមមេធាវីស្ម័គ្រចិត្តសម្ដេចតេជោសែន ពុំបានប្រើប្រាស់ថវិការបស់រាជរដ្ឋាភិបាលទេ ពោលសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត បានលះបង់ថវិកាផ្ទាល់ខ្លួនរបស់សម្ដេច សម្រាប់រាល់ការចំណាយលើបេសកកម្មការងាររបស់ក្រុមមេធាវីទាំងស្រុង។ ចាប់តាំងពីការបង្កើត ដល់ខែធ្នូ ឆ្នាំ២០២៤ ក្រុមមេធាវីស្ម័គ្រចិត្តសម្ដេចតេជោសែន បានបំពេញភារកិច្ច សម្រេចលទ្ធផលការងារ ជាអាទិ៍៖* ទទួលការពិគ្រោះ និងផ្ដល់យោបល់ បានចំនួន៧៤៣០ករណី (ផ្នែករដ្ឋប្បវេណី៤១៥៤, ផ្នែកព្រហ្មទណ្ឌ៣២៧៦)* ទទួលការពារក្ដី បានចំនួន៣១៧ករណី (ផ្នែករដ្ឋប្បវេណី៥៦, ផ្នែកព្រហ្មទណ្ឌ២៦១)* សម្របសម្រួលបញ្ចប់វិវាទផ្នែកសំណងរដ្ឋប្បវេណីក្រៅប្រព័ន្ធតុលាការ បានចំនួន១២៣ករណី។ ឯកឧត្តម គី តិច តាងនាមក្រុមមេធាវីស្ម័គ្រចិត្តសម្ដេចតេជោសែន និងជំនួសមុខជូនប្រជាពលរដ្ឋរងគ្រោះ មានជីវភាពខ្សត់ខ្សោយ ដែលទទួលបានការការពារសិទ្ធិ និងផ្ដល់យោបល់ច្បាប់ ពីក្រុមមេធាវីស្ម័គ្រចិត្តសម្ដេចតេជោសែន បានសម្ដែងនូវការគោរពដឹងគុណប្រកបដោយភក្ដីភាពដ៏ស្មោះស្ម័គ្របំផុតជូនចំពោះ សម្ដេចអគ្គមហាសេនាបតីតេជោ និង សម្ដេចកិត្តិព្រឹទ្ធបណ្ឌិត ដែលបានផ្ដួចផ្ដើមប្រកបដោយគតិបណ្ឌិតដ៏ខ្ពង់ខ្ពស់ បង្កើតក្រុមមេធាវីស្ម័គ្រចិត្តសម្ដេចតេជោសែននិងបានលះបង់ថវិកាផ្ទាល់ខ្លួនរបស់សម្ដេច សម្រាប់ប្រតិបត្តិការការពារសិទ្ធិ និងផលប្រយោជន៍ជូនប្រជាពលរដ្ឋគ្រប់រូប ឱ្យទទួលបានភាព ស្មើគ្នាចំពោះមុខច្បាប់ ស្របតាមស្មារតីរដ្ឋធម្មនុញ្ញ នៃព្រះរាជាណាចក្រកម្ពុជា ។

ឯកអគ្គរដ្ឋទូតគុយបា និងអភិបាលរាជធានីភ្នំពេញជួបពិភាក្សាការងារពង្រឹង និងពង្រីកទំនាក់ទំនងការទូត និងកិច្ចសហប្រតិបត្តិការ

ភ្នំពេញ ៖ នៅព្រឹកថ្ងៃទី៦ ខែកុម្ភៈ ឆ្នាំ២០២៥ លោកជំទាវ មីឡេនណា ការីដាដ ស្សាលឌីវ៉ារ ពាដ្រា (Milena Caridad Zaldivar Piedra) ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋគុយបា ប្រចាំព្រះរាជាណាចក្រកម្ពុជា បានអញ្ជើញជួបសម្តែងការគួរសមជាមួយឯកឧត្តម ឃួង ស្រេង អភិបាលរាជធានីភ្នំពេញ នៅសាលារាជធានីភ្នំពេញ។មានប្រសាសន៌ក្នុងឱកាសនោះ ឯកឧត្តម ឃួង ស្រេង បានរំលឹកឡើងនូវគុណនូបការរបស់សាធារណរដ្ឋគុយបា ដែលជាមិត្តចាស់បានជួយឧបត្ថម្ភគាំទ្រដល់កម្ពុជា លើវិស័យសុខាភិបាល អប់រំ និងកសិកម្មនាពេលកន្លងមក ពោលរាប់ចាប់តាំងពីការចាប់ផ្តើមទំនាក់ទំនងការទូតរវាងប្រទេសកម្ពុជា និងសាធារណរដ្ឋគុណបា នាអំឡុងឆ្នាំ១៩៧៩ និងអំឡុងទសវត្ស ៨០ ជាពិសេសការជួយរបស់គុយបា មកកាន់កម្ពុជា ក្រោយកម្ពុជារំដោះប្រទេសជាតិចេញពីរបបប្រល័យពូជសាសន៍ ប៉ុល ពត ដែលគុយបា បានរួមចំណែកយ៉ាងធំធេង លើការអភិវឌ្ឍប្រទេសកម្ពុជា ក្រោយកម្ពុជារួចផុតពីសង្គ្រាម។ឯកឧត្តម ឃួង ស្រេង អភិបាលរាជធានីបានរំលឹកថា ជាការពិតចំណងការទូត ដែលផ្តួចផ្តើមឡើងដោយសម្តេចព្រះបរមរតនកោដ្ឋ និងឯកឧត្តម Fidel Castro បានធ្វើឱ្យកម្ពុជា និងគុយបា មានទំនាក់ទំនងការទូតតាំងពីបុរេប្រវត្តិមក ប៉ុន្តែមកដល់កម្ពុជា នៅសម័យរំដោះឱ្យរួចពីការកាប់សម្លាប់ពីរបស់ ប៉ុល ពត សម្តេចអគ្គមហាសេនាបតីតេជោ ហ៊ុន សែន ដែលជាមគ្គទេសការទូត ប្រចាំកម្ពុជានាពេលនោះ ក៏បានរៀបចំទំនាក់ទំនងជាមួយបណ្តាប្រទេសជាច្រើន ដោយឡែក គុយបា ក៏ជាប្រទេសមួយក្នុងចំណោមប្រទេស ដែលបានធ្វើកិច្ចការការទូត ជាមួយនឹងសាធារណរដ្ឋប្រជាមានិតកម្ពុជា នាពេលនោះផងដែរ។ឯកឧត្តម ឃួង ស្រេង មានប្រសាសន៍ថា ពាក្យស្លោកកម្ពុជា មួយ បានលើកឡើងថា ជួយគ្នាក្នុងគ្រាក្រ ហើយក្នុងពេលដែលកម្ពុជា ក្រ ក៏មានប្រទេសគុយបាមួយ បានជួយមកលើប្រទេសកម្ពុជា នូវជំនួយឥតសំណងសព្វបែបយ៉ាង ។ ជាមួយគ្នានេះ ឯកឧត្តម ឃួង ស្រេង បានជម្រាបជូនលោកជំទាវឯកអគ្គរដ្ឋទូតគុយបា នូវការត្រៀមលក្ខណៈរួចរាល់របស់អាជ្ញាធររាជធានីភ្នំពេញ នៅក្នុងការជួយជ្រោមជ្រែង លើកិច្ចការងារចាំបាច់ ជាពិសេសក្នុងបេសកកម្មការទូតរបស់លោកជំទាវ ក្នុងទីក្រុងភ្នំពេញ និងការការពារសុខសុវត្ថិភាព របស់ស្ថានទូតគុយបា នៅទីក្រុងភ្នំពេញផងដែរ។ជាការឆ្លើយតប លោកជំទាវ មីឡេនណា ការីដាដ ស្សាលឌីវ៉ារ ពាដ្រា ឯកអគ្គរដ្ឋទូតគុយបា បានថ្លែងអំរគុណចំពោះ ឯកឧត្តម ឃួង ស្រេង ដែលបានចំណាយពេលវេលាដ៏មមាញឹក អនុញ្ញាឱ្យលោកជំទាវ និងសហការី អញ្ជើញជួបសម្តែងការគួរសម ព្រមទាំងអរគុណដល់អាជ្ញាធររាជធានីភ្នំពេញ ដែលជានិច្ចជាកាល បានជួយដល់ស្ថានទូតគុយបា ទាំងការរក្សាអនាម័យបរិស្ថានជុំវិញស្ថានទូត និងជាពិសេស សុខសុវត្ថិភាពរបស់មន្ត្រីនៃស្ថានទូតគុយបា ដែលមានមូលដ្ឋាននៅទីក្រុងភ្នំពេញ។លោកជំទាវ ក៏បានរំលេច នូវចំណងមិត្តភាពរវាងប្រទេសទាំងពីរ គុយបា-កម្ពុជា ដែលមានទំនាក់ទំនងការទូតយ៉ាងស្អិតរមួត ហើយប្តេជ្ញារក្សាឱ្យបាននូវតម្លៃមិត្តភាព សាមគ្គីភាព និងបន្តឱ្យកាន់តែល្អប្រសើរថែមទៀត។ ក្នុងនោះលោកជំទាវ ឯកអគ្គរដ្ឋទូតគុយបា ក៏បានស្នើដល់ឯកឧត្តម ឃួង ស្រេង ពិនិត្យលទ្ធភាព ក្នុងការស្វែងរក នូវសាលារៀន ដែលធ្លាប់បានប្រើប្រាស់ឈ្មោះថា ជាសាលាគុយបាកាលពីអតីតកាល នឹងអាចឱ្យស្ថានទូតគុយបា អាចចុះទស្សនកិច្ច និងមានបំណងចង់ដាំដើមឈើ សម្រាប់ទុកជាអនុស្សាវរីយ៍ដែលបង្ហាញពីចំណងមិត្តភាព រវាងគុយបា និងកម្ពុជា ខណៈដែលកិច្ចការងារនេះ ឯកឧត្តម ឃួង ស្រេង បានឯកភាពលើការផ្តល់នូវការគាំទ្រចំពោះកិច្ចការមួយចំនួន ដែលជាសំណើររបស់លោកជំទាវឯកអគ្គរដ្ឋទូត តែយ៉ាងណាមិញ ឯកឧត្តម ឃួង ស្រេង ក៏បានផ្តល់អនុសាសន៍ណែនាំ ឱ្យឯកអគ្គរដ្ឋទូតគុយបា ពិនិត្យ និងពិភាក្សាការងារខាងលើ ជាមួយឧបនាយរដ្ឋមន្ត្រី រដ្ឋមន្ត្រីក្រសួងអប់រំជាមុនសិន ថាតើអាចមានការរៀបចំបានលើអ្វីខ្លះ ដើម្បីឱ្យសាកសមនឹងតម្លៃនៃចំណងមិត្តភាពរវាងប្រទេសទាំងពីរ។បន្ថែមលើនេះ ក្នុងជំនួបរវាងឯកឧត្តម ឃួង ស្រេង និងលោកជំទាវឯកអគ្គរដ្ឋទូត ក៏បានឯកភាពគ្នា លើការជំរុញការផ្សព្វផ្សាយនូវទំនាក់ទំនងអំពីវប្បធម៌ប្រពៃណីដ៏ផូផង់ រវាងប្រទេសទាំងពីរ ទៅកាន់ប្រជាជនគ្នាទៅវិញទៅមក និងសង្ឃឹមថានឹងអាចមានការចុះអនុស្សារណយោគយល់គ្នា រវាងទីក្រុងឡាហាវ៉ាន និងទីក្រុងភ្នំពេញផងដែរ៕អត្ថបទ ៖ ប្រាក់ វ៉ាន់ដា

លោកជំទាវ ជូ ប៊ុនអេង អញ្ជើញចូលរួមកិច្ចប្រជុំលើកទី២ នៃការពិនិត្យឡើងវិញការអនុវត្តកតិកាសញ្ញាពិភពលោកស្ដីពីទេសន្តរប្រវេសន៍ដោយសុវត្ថិភាពរៀបរយ និងស្របច្បាប់នៅមជ្ឈមណ្ឌលសន្និសិទអង្គការសហប្រជាជាតិ ទីក្រុងបាងកក

បាងកក៖ ថ្ងៃទី ៤-៦ ខែកុម្ភៈ ឆ្នាំ២០២៥ លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្រ្តៃយ៍ គ.ជ.ប.ជ បានអញ្ជើញចូលរួមកិច្ចប្រជុំ លើកទី២ នៃការពិនិត្យឡើងវិញការអនុវត្តកតិកាសញ្ញាពិភពលោកស្ដីពីទេសន្តរប្រវេសន៍ ដោយសុវត្ថិភាព រៀបរយ និងស្រប “ Second Asia-Pacific Regional Review of Implementation of the Global Compact for Safe, Orderly and Regular Migration ” អមដំណើរដោយ លោកជំទាវ ឧត្តមសេនីយ៍ទោ រ៉ន សិរីលក្ខិណា អគ្គលេខាធិការរង គ.ជ.ប.ជ ។កិច្ចប្រជុំនេះមានការអញ្ជើញចូលរួមពីតំណាងបណ្ដាប្រទេសដែលជាសមាជិកអង្គការសហប្រជាជាតិមួយចំនួននៅលើពិភពលោក ដូចជា៖ ប្រទេស Azerbaijan, Bangladesh, Cambodia, China, Fiji, France, India, Indonesia, Japan, Kazakhstan, Kyrgyzstan, Lao, Maldives, Micronesia(Federated States of), Mongolia, Nepal, Pakistan, Philippine, Republic of Koreas, Russian Federation, Sri Lanka, Thailand, Timor-Leste, Turkey, Turkmenistan, Tuvalu, United Kingdom of Great Britain and Northern Ireland, Uzbekistan, Viet Nam ដែលមានសមាសភាពចូលរួមចំនួន ១៣៩ រូប មានការចូលរួមសង្កេតការណ៍ពីប្រទេស Belarus, Canada, Chili, Egypt, Guatemala, Mexico, Morocco, Nigeria, Romania, South Africa, Sweden, Holy See, European Union ចំនួន ១៩ រូប មានការចូលរួមពីអង្គការ និងដៃគូពាក់ព័ន្ធមួយចំនួនផងដែរ សរុបចំនួន១៤៨ ។ សរុបសមាសភាពចូលរួមកិច្ចប្រជុំលើកទី២ នៃការពិនិត្យឡើងវិញការអនុវត្តកតិកាសញ្ញាពិភពលោកស្ដីពីទេសន្តរប្រវេសន៍ ដោយសុវត្ថិភាព រៀបរយ និងស្របច្បាប់ ចំនួន ២០៦រូប ។ជាកិច្ចចាប់ផ្តើមអ្នកសម្របសម្រួល នៃកិច្ចប្រជុំបានរៀបចំឱ្យមានការបោះឆ្នោតជ្រើសរើសប្រធាន និងអនុប្រធានអង្គប្រជុំដែលមានរយៈពេលចំនួន៣ថ្ងៃនេះ ជាលទ្ធផលនៃការបោះឆ្នោតជ្រើសរើស គឺប្រទេស Fiji ធ្វើជាប្រធានអង្គប្រជុំ ប្រទេសកម្ពុជា ធ្វើជាអនុប្រធានអង្គប្រជុំ ដោយមាន លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ ជាតំណាង ។ បន្ទាប់មកអង្គប្រជុំបានពិនិត្យ ១.ដំណើរការ និងបញ្ហា នៅក្នុងការអនុវត្ត កតិកាសញ្ញាពិភពលោក ស្ដីពីទេសន្តរប្រវេសន៍ ដោយសុវត្ថិភាព រៀបរយ និងស្របច្បាប់នៅអាស៊ី និងប៉ាស៊ីហ្វិក ។ ២.ដំណើរការ និងបញ្ហា នៅក្នុងការអនុវត្តកតិកាសញ្ញាពិភពលោកស្ដីពីទេសន្តរប្រវេសន៍ ដោយសុវត្ថិភាព រៀបរយ និងស្របច្បាប់នៅគ្រប់ថានានុក្រម ដោយគោរពទៅតាមគោលការណ៍ណែនាំ ដែលទាក់ទងនឹងការអាស្រ័យគ្នាទៅវិញទៅមក និងដាច់ដោយឡែក ។ក្រោយពីបានពិភាក្សាទៅតាមរបៀបវារៈ នៃកិច្ចប្រជុំ រដ្ឋជាសមាជិករបស់ ESCAP ដែលចូលរួមក្នុងការ ពិនិត្យឡើងវិញកតិកាសញ្ញាពិភពលោក ស្ដីពីទេសន្តរប្រវេសន៍ ដោយសុវត្ថិភាព រៀបរយ និងស្របច្បាប់ នៅក្នុងតំបន់អាស៊ីប៉ាស៊ីហ្វិក (GCM) ត្រូវបានគេរំពឹងថានឹងពិចារណាលើការអនុម័តរបាយការណ៍នៃកិច្ចប្រជុំ ។ចំពោះរបាយការណ៍នេះនឹងជូនដំណឹងដល់វេទិកាត្រួតពិនិត្យការធ្វើចំណាកស្រុកអន្តរជាតិនៅឆ្នាំ ២០២៦ ព័ត៌មានដែលផ្តោតលើឯកសារនានានៃកិច្ចប្រជុំនឹងត្រូវបានរៀបចំនៅពេលវេលាកិច្ចប្រជុំខិតជិតដល់ ។ លើសពីនេះ ESCAP ដោយមានការគាំទ្រពីបណ្តាញប្រចាំតំបន់នឹងសង្ខេបពីអ្នកតំណាងអចិន្ត្រៃយ៍របស់គណៈកម្មាធិការប្រឹក្សា ESCAP និងអ្នកតំណាងផ្សេងទៀតដែលកំណត់ដោយសមាជិកនៃគណៈកម្មការ(ACPR) ស្តីពីការរៀបចំសម្រាប់កិច្ចប្រជុំក្នុងពេលសមស្រប ៕

មន្រ្តីអធិការការងារចំនួន ១២០រូប ទទួលបាននីតិសម្បទាជានគរបាលយុត្តិធម៌

ភ្នំពេញ៖ មន្រ្តីអធិការការងារ នៃអគ្គនាយកដ្ឋានការងារ អគ្គលេខាធិការដ្ឋានគណៈកម្មការដោះស្រាយបញ្ហាកូដកម្ម បាតុកម្មនៅតាមគ្រប់មុខសញ្ញា និងមន្ទីការងារនិងបណ្តុះបណ្តាលវិជ្ជាជីវៈរាជធានីភ្នំពេញ នៃក្រសួងការងារ និងបណ្តុះបណ្តាលវិជ្ជាជីវៈសរុបចំនួន១២០រូប បានបំពេញនីតិវិធីធ្វើសម្បថស្របតាមក្រមនីតិវិធីព្រហ្មទណ្ឌ ដើម្បីក្លាយជានគរបាលយុត្តិធម៌។ ពិធីសម្បថនេះ ប្រព្រឹត្តទៅនាព្រឹកថ្ងៃទី៦ ខែកុម្ភៈ ឆ្នាំ២០២៥ នៅអយ្យការអមសាលាដំបូងរាជធានីភ្នំពេញ។ យោងតាមក្រសួងការងារ និងបណ្តុះបណ្តាលវិជ្ជាជីវៈ នីតិសម្បទាជានគរបាលយុត្តិធម៌នេះ ត្រូវបានផ្តល់ជូនអធិការការងារ ដើម្បីពង្រឹងការអនុវត្តបទប្បញ្ញត្តិច្បាប់ពាក់ព័ន្ធនឹងវិស័យការងារ សន្ដិសុខសង្គម និងបណ្ដុះបណ្ដាលវិជ្ជាជីវៈ ឱ្យកាន់តែមានប្រសិទ្ធភាពបន្ថែមទៀត ជាពិសេស៖ ១. ត្រួតពិនិត្យនិងតាមដានការអនុវត្តបទប្បញ្ញត្តិនៃច្បាប់ និងលិខិតបទដ្ឋានគតិយុត្តពាក់ព័ន្ធនឹងវិស័យការងារ សន្ដិសុខសង្គម និងបណ្ដុះបណ្ដាលវិជ្ជាជីវៈ។ ២. លើកកម្ពស់លក្ខខណ្ឌការងារ លក្ខខណ្ឌសុវត្ថិភាព និងសុខភាពការងារ ការអនុវត្តរបបសន្តិសុខសង្គម និងទំនាក់ទំនងវិជ្ជាជីវៈ នៅតាមរោងចក្រ សហគ្រាស គ្រឹះស្ថាន ឱ្យកាន់តែប្រសើរឡើង។ ៣. ជំរុញរោងចក្រ សហគ្រាសគ្រឹះស្ថាន ដើម្បីប្រែក្លាយ "សហគ្រាសមួយ ជាសហគមន៍សុខសាន្តមួយ" ពោលគឺជាកន្លែងធ្វើការដែលគោរពតាមច្បាប់ ធានាបាននូវសុខដុមនីយកម្មក្នុងទំនាក់ទំនងវិជ្ជាជីវៈ ប្រកបដោយគុណភាព និងផលិតភាពការងារខ្ពស់។ សម្រាប់អធិការការងារនៅតាមមន្ទីការងារ និងបណ្តុះបណ្តាលវិជ្ជាជីវៈនៅតាមបណ្តាខេត្តនានាចំនួន ១៣៦រូបទៀត នឹងបំពេញនីតិវិធីធ្វើសម្បថជានគរបាលយុត្តិធម៌ នៅតាមសាលាដំបូងខេត្ត តាមកាលកំណត់ជាបន្តបន្ទាប់។ ចំពោះមុខ អធិការការងារនៅមន្ទីរការងារ និងបណ្ដុះបណ្ដាលវិជ្ជាជីវៈខេត្តព្រះសីហនុចំនួន ១១រូប បានបំពេញនីតិវិធីសម្បថរួចហើយ កាលពីព្រឹកថ្ងៃទី៦ ខែកុម្ភៈ ឆ្នាំ២០២៥នេះ។ គួរបញ្ជាក់ថា ដើម្បីពង្រឹងកិច្ចការងារអធិការកិច្ចឱ្យកាន់តែមានប្រសិទ្ធភាព មន្រ្តីអធិការការងារនៃក្រសួងការងារ និងបណ្តុះបណ្តាលវិជ្ជាជីវៈបានទទួលវគ្គសុក្រឹតការ ស្តីពីច្បាប់ និងលិខិតបទដ្ឋានគតិយុត្តក្នុងវិស័យការងារ និងសន្តិសុខសង្គមដល់អធិការការងារផងដែរ។ វគ្គវិក្រឹតការទាំងនោះ ធ្វើឡើងក្នុងគោលបំណងដើម្បីពង្រឹង និងលើកកម្ពស់សមត្ថភាពអធិការកិច្ចការងារក្នុងការត្រួតពិនិត្យអនុវត្តលក្ខខណ្ឌការងារ លក្ខខណ្ឌសុវត្ថិភាព និងសុខភាពការងារ របបសន្តិសុខសង្គម និងសេរីភាពសមាគមនៅសហគ្រាស គ្រឹះស្ថាន ស្របតាមបទប្បញ្ញត្តិច្បាប់ជាធរមាន។ ក្រសួងការងារ និងបណ្តុះបណ្តាលវិជ្ជាជីវៈក៏បានរៀបចំសកម្មភាពការងារបន្តសម្រាប់ពង្រឹងសមត្ថភាពអធិការការងារផងដែរ ក្នុងនោះរៀបចំវគ្គបណ្តុះបណ្តាលដល់មន្រ្តីផ្សះផ្សារវិវាទការងារដោយសហការជាមួយអង្គការអន្តរជាតិខាងការងារ ILO, រៀបចំវគ្គបណ្តុះបណ្តាលដល់អធិការការងារ ដែលទទួលបាននីតិសម្បទានជានគរបាលយុត្តិធម៌ដោយសហការជាមួយក្រសួងយុត្តិធម៌ផងដែរ៕

រាជរដ្ឋាភិបាលនឹងធ្វើប្រតិភូកម្មលើការចុះបញ្ជីវិនិយោគមានទុនក្រោម ៥ លានដុល្លារ ដល់រាជធានី-ខេត្ត

ភ្នំពេញ ៖ រាជរដ្ឋាភិបាលកម្ពុជា នឹងធ្វើប្រតិភូកម្មលើការចុះបញ្ជីគម្រោងវិនិយោគ ដែលមានទុនវិនិយោគក្រោម ៥ លានដុល្លារអាមេរិក នៃលំ ហូរការងារពីថ្នាក់ជាតិ ដល់ថ្នាក់ក្រោមជាតិ ទាំង២៥រាជធានី-ខេត្ត ដើម្បីបង្កើតភាពប្រទាក់ក្រឡា និងការធ្វើឱ្យប្រសើរឡើងនូវបរិយា កាសវិនិយោគនៅក្នុងប្រទេសកម្ពុជា។ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា លើកឡើងនៅក្នុងកិច្ចប្រជុំពិគ្រោះ យោបល់ លើការរៀបចំយន្តការប្រទាក់ក្រឡា និងមានសង្គតិភាព នៃលំហូរការងារពីថ្នាក់ជាតិ ដល់ថ្នាក់ក្រោមជាតិ ជុំវិញការគ្រប់គ្រង ការចុះបញ្ជី និងការត្រួតពិនិត្យ តាមដានការអនុវត្តគម្រោងវិនិយោគ នៅថ្ងៃទី ៦ ខែកុម្ភៈ ឆ្នាំ២០២៥ នេះថា ដើម្បីផ្តល់ភាពងាយស្រួល នៃការរស្នើសុំដាក់ទុនវិនិយោគនៅព្រះរាជាណាចក្រកម្ពុជា, ក្រុមប្រឹក្សាអភិវឌ្ឍន៍កម្ពុជា ដែលមានសម្តេចមហាបវរធិបតី ហ៊ុន ម៉ាណែត ជាប្រធាន កន្លងមកបានដាក់ឱ្យប្រើប្រាស់ប្រព័ន្ធគ្រប់គ្រងគម្រោងវិនិយោគកម្ពុជា (ប្រព័ន្ធ cdcIPM) ដើម្បីពន្លឿននីតិវិធីផ្តល់សេវា ដែលអនុញ្ញាតឱ្យវិនិយោគិនអាចធ្វើការដាក់ពាក្យស្នើសុំវិនិយោគ បានពីគ្រប់ទីកន្លែង និងគ្រប់ពេលវេលា, ជាពិសេសពាក់ព័ន្ធ នឹង ការងារវិនិយោគពីបរទេសនៅក្នុងប្រទេសកម្ពុជា។បញ្ហានេះ, ក្រុមប្រឹក្សាអភិវឌ្ឍន៍កម្ពុជា បានរៀបចំប្រជុំពិគ្រោះយោបល់ ដែលមានឯកឧត្តមអភិបាល អភិបាលរងខេត្តនីមួយៗ ដែលមានតួនាទីជាប្រធាន អនុប្រធាន នៅក្នុងអនុកម្មការវិនិយោគរាជធានី-ខេត្តទាំង ២៥ ដើម្បីផ្សព្វផ្សាយ ពន្យល់អំពីប្រព័ន្ធ (cdcIPM) ហើយទៅថ្ងៃខាងមុខ នៅតាមបណ្តារាជធានី-ខេត្តទាំងអស់ អាចអនុម័តចុះបញ្ជីវិនិយោគបាន ដែលមានទុនក្រោម ៥ លានដុល្លារអាមេរិក ដោយមិនបាច់ឆ្លងមកគណៈកម្មាធិការវិនិយោគកម្ពុជាឡើយ ពោលគឺការធ្វើប្រតិភូកម្មនេះ ដើម្បីបង្កើតភាពប្រទាក់ ក្រឡា និងការធ្វើឱ្យប្រសើរឡើងនូវបរិយាកាសវិនិយោគនៅក្នុងប្រទេសកម្ពុជា។ឯកឧត្តមឧបនាយករដ្ឋមន្ត្រី បន្តលើកឡើងថា ដើម្បីឱ្យការងារនេះដំណើរទៅបាន ក្រុមប្រឹក្សាអភិវឌ្ឍន៍កម្ពុជានឹងជំរុញបណ្តុះបណ្តាល ដល់មន្រ្តីពាក់ព័ន្ធ នៅតាមរាជធានី-ខេត្តទាំងអស់ ឱ្យពួកគាត់បានស្គាល់ និងចេះប្រើប្រាស់ប្រព័ន្ធ (cdcIPM) ព្រោះប្រព័ន្ធនេះគឺជា ប្រព័ន្ធចុះបញ្ជីតែមួយ ដែលផ្តល់ភាពងាយស្រួលដល់វិនិយោគិនមិនថាក្នុងស្រុកឬក្រៅស្រុកនោះឡើយ។ ក្នុងកិច្ចប្រជុំនេះដែរ ឯកឧត្តម ឧបនាយករដ្ឋមន្ត្រី បានជម្រាបជូនអំពីកំណើននៃគម្រោងវិនិយោគនៅក្នុងឆ្នាំ ២០២៤ ជាពិសេសកំណើនចុះបញ្ជីនៅក្នុងខែ មករា ឆ្នាំ ២០២៥ ដែលនេះជាកំណត់ត្រាក្នុងប្រវត្តិ របស់ក្រុមប្រឹក្សាអភិវឌ្ឍន៍កម្ពុជា ដែលទទួលបាន ការចុះបញ្ជីមានកំណើនកើនឡើងគួកត់ សម្គាល់៕អត្ថបទ៖ សុន រ៉ាឌី

ប្រធានបទទី៤ "ការងារវិស័យបច្ចេកវិទ្យាគមនាគមន៍និងព័ត៌មាន និងវិស័យឌីជីថល" ត្រូវបានលើកយកមកពិភាក្សាបន្តនៅក្នុងពិធីសន្និបាតបូកសរុបលទ្ធផលការងារ៥ឆ្នាំ នៃដំណើរឆ្ពោះទៅបរិវត្តកម្មឌីជីថល

នៅព្រឹកថ្ងៃទី៦ ខែកុម្ភៈ ឆ្នាំ២០២៥ ក្រោយបទអន្តរាគមន៍ពាក់ព័ន្ធនឹងការកែទម្រង់ និងការពង្រឹងអភិបាលកិច្ច ការងារវិស័យប្រៃសណីយ៍ ការងារវិស័យទូរគមនាគមន៍ ដែលថ្ងៃទី២នៃអង្គសន្និបាតគឺប្រធានបទទី៤ ស្តីពី “ការងារវិស័យបច្ចេកវិទ្យាគមនាគមន៍និងព័ត៌មាន និងវិស័យឌីជីថល” ដែលវេទិកានេះ សម្របសម្រួលដោយ ឯកឧត្តម សំ សិទ្ធិសេរី អគ្គនាយកនៃអគ្គនាយកដ្ឋានបច្ចេកវិទ្យាគមនាគមន៍និងព័ត៌មាន នៃក.ប.ទ. ដោយក្នុងនោះមានបទអន្តរាគមន៍ចំនួន ៣ ត្រូវបានលើកយកមកពិភាក្សារួមគ្នា ដូចខាងក្រោម៖-បទអន្តរាគមន៍ស្តីពី “ថ្នាលនិងកម្មវិធីរដ្ឋាភិបាលឌីជីថល ថ្នាល DG SuperApp និងបរិវត្តកម្មឌីជីថល” ដោយឯកឧត្តម ជា សេរីវឌ្ឍ អគ្គលេខាធិការ នៃអគ្គលេខាធិការដ្ឋានគណៈកម្មាធិការរដ្ឋាភិបាលឌីជីថល (គ.រ.ឌ. )- បទអន្តរាគមន៍ស្តីពី “បច្ចុប្បន្នភាពនៃការធ្វើអភិបាលកិច្ចនិងការអភិវឌ្ឍបញ្ញាសិប្បនិម្មិតរបស់ ក.ប.ទ.” ដោយ លោក អ៊ិន សុវណ្ណ ប្រធាននាយកដ្ឋានបរិវត្តកម្មរដ្ឋាភិបាលឌីជីថលនៃអគ្គលេខាធិការដ្ឋាន គ.រ.ឌ.- បទអន្តរាគមន៍ស្តីពី “កាលានុវត្តភាពនៃការអភិវឌ្ឍសន្តិសុខសាយប័ររបស់ ក.ប.ទ.” ដោយលោក ជា លីនណា អ្នកជំនាញជាន់ខ្ពស់សន្តិសុខសាយប័រនៃអគ្គនាយកដ្ឋានបច្ចេកវិទ្យាគមនាគមន៍និងព័ត៌មានវិស័យបច្ចេកវិទ្យាគមនាគមន៍និងព័ត៌មាន (Information and Communications Technology - ICT) ត្រូវបានរាជរដ្ឋាភិបាលផ្ទេរមកឱ្យ ស្ថិតនៅក្រោមការគ្រប់គ្រង របស់ ក.ប.ទ. តាមព្រះរាជក្រឹត្យលេខ នស/រកត/១០១៣/១០៦០ ចុះថ្ងៃទី២៤ ខែតុលា ឆ្នាំ២០១៣ ស្តីពីការផ្ទេរអាជ្ញាធរជាតិទទួលបន្ទុកកិច្ចការអភិវឌ្ឍវិស័យបច្ចេកវិទ្យាគមនាគមន៍ព័ត៌មានវិទ្យា (NiDA) ឱ្យស្ថិតនៅក្រោមការគ្រប់គ្រងរបស់ ក.ប.ទ. វិញ។ ជានិន្នាការនៃឧត្តមានុវត្តន៍អន្តរជាតិ វិស័យ ទូរគមនាគមន៍ និងបច្ចេកវិទ្យាគមនាគមន៍និងព័ត៌មាន រួមបញ្ចូលគ្នាជាវិស័យឌីជីថល (Digital) តែមួយ ដែលទស្សនៈនេះ ត្រូវបានកំណត់ទាំងនៅកម្រិតតំបន់និងក្នុងពិភពលោក ក៏ដូចជាកម្រិតអង្គការអន្តរជាតិ ដូចជា OECD, ITU, World Bank, និង UN ជាដើម។ ដើម្បីគ្រប់គ្រងនិងអភិវឌ្ឍវិស័យឌីជីថល ប្រកបដោយប្រសិទ្ធភាព ដែលអាចឆ្លើយតបទៅនឹងកម្មវិធី នយោបាយ យុទ្ធសាស្ត្រ បញ្ចកោណ-ដំណាក់កាលទី១ និងក្របខណ្ឌ គោលនយោបាយនានា ដែលបានដាក់ ចេញដោយរាជរដ្ឋាភិបាលកម្ពុជា ក.ប.ទ. បានដាក់ចេញសកម្មភាពការងារគ្រប់គ្រងលើ វិស័យឌីជីថលជារួម ការកសាងរដ្ឋាភិបាលឌីជីថល (DigitalGovernment) និងពលរដ្ឋឌីជីថល (Digital Citizen) ក៏ដូចជាការរួមចំណែក ក្នុងការពង្រឹងសន្តិសុខឌីជីថល (Digital Security) ដើម្បីគាំទ្រដល់ការអភិវឌ្ឍសេដ្ឋកិច្ចនិងសង្គមឌីជីថល (Digital Economy and Society)។

អាជ្ញាធរជាតិអប្សរា សហការជាមួយភាគីឥណ្ឌា ជួសជុលរោងទងទី៣ ផ្នែកខាងលិចនៃប្រាសាទតាព្រហ្ម

អាជ្ញាធរជាតិអប្សរាតាមរយៈកិច្ចសហការជាមួយស្ថាប័នស្រាវជ្រាវបុរាណវិទ្យាឥណ្ឌា(ASI)កំពុងធ្វើការជួសជុលនៅរោងទងទី៣ ផ្នែកខាងលិចនៃប្រាសាទតាព្រហ្ម។ រចនាសម្ពន្ធនៃរោងទងទី៣នេះ ប្រឈមនឹងគ្រោះថ្នាក់ទាមទាតម្រូវឲ្យមានការជួសជុល។លោក Chitranjan Kumar ប្រធានគ្រប់គ្រងការដ្ឋានជួសជុលនៅប្រាសាទតាព្រហ្មនៃភាគីឥណ្ឌាបានឱ្យដឹងថា ក្នុងគម្រោងនៃកិច្ចសហប្រតិបត្តិការដំណាក់កាលទី៣ ចាប់ផ្តើមក្នុងខែមករា ឆ្នាំ២០២៥ ដែលគ្រោងនឹងបញ្ចប់នាចុងឆ្នាំ។លោកChitranjan Kumar បន្តថា ជាជំហានដំបូងក្រុមការងារធ្វើកំណាយស្រាវជ្រាវ ដើម្បីសិក្សាអំពីស្ថានភាពគ្រឹះនៃសំណង់ប្រាសាទ ចុះបញ្ជីថ្មដែលនៅរាយប៉ាយ រុះរើនៅទីតាំងដែលបាក់បែក បានរកឃើញទីតាំងដែលខូចខាតខ្លាំងនៅជ្រុងខាងត្បួង ខាងជើង និងមុខខាងលិច ជួសជុលពង្រឹងគ្រឹះ និងជួសជុលថ្មដែលបែកបាក់ ទើបរៀបចំផ្គុំថ្មទៅកាន់ទីតាំងដើមវិញ៕

ចង់បានសុខភាពល្អ គប្បី “តិចខ្លាញ់ តិចអំបិល តិចស្ករ និងកុំពិសារគ្រឿងស្រវឹងនិងថ្នាំជក់”

ភ្នំពេញ៖ មន្រ្តីជំនាញផ្នែកសុខាភិបាល បានផ្ញើរសារថា ប្រជាពលរដ្ឋដែលចង់បានសុខភាពល្អ និងគេចផុតពីជំងឺមិនឆ្លង គប្បីត្រូវកាត់បន្ថយការទទួលផ្អែម ភេសជ្ជៈប៉ូវកម្លាំង កាត់បន្ថយការទទួលទានអំបិលឱ្យបានពាក់កណ្តាលនៃទម្លាប់ហូបប្រៃកន្លងមក, កាត់បន្ថយអាហារចៀន ឬបំពង អាហារដែលមានខ្លាញ់ច្រើន និងជៀងវាងការពិសាគ្រឿងស្រវឹង និងកុំពិសារថ្នាំជក់។ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានមានប្រសាសន៍ថា ជំងឺមិនឆ្លង ទី១.គឺមិនឆ្លងពីមនុស្សម្នាក់ទៅមនុស្សម្នាក់ទេ ២. ជំងឺនេះនឹងឈឺបន្តិចម្តងៗ នាពេលខាងមុខ ៣. ជំងឺនេះ មានលក្ខណៈរ៉ាំរ៉ៃ និងស្មុគស្មាញ និង៤. ជំងឺនេះប៉ះពាល់សេដ្ឋកិច្ចគ្រួសារ និងសង្គមជាតិ។យោងតាមអង្គការសុខភាពពិភពលោក (WHO) ជំងឺមិនឆ្លងបានសម្លាប់មនុស្សប្រមាណយ៉ាងតិច ៤១លាននាក់ ជារៀងរាល់ឆ្នាំ ស្មើនឹង ៧៥% នៃករណីស្លាប់ទាំងអស់នៅទូទាំងពិភពលោក។ ដោយឡែក នៅក្នុងប្រទេសកម្ពុជា ជំងឺមិនឆ្លង ចំនួន ៤ប្រភេទ រួមមាន៖ ជំងឺបេះដូងសសៃឈាម ជំងឺទឹកនោមផ្អែម ជំងឺមហារីក និងជំងឺផ្លូវដង្ហើមរ៉ាំរ៉ៃ បាននិងកំពុងមានការកើនឡើង និងសម្លាប់ប្រជាជនកម្ពុជាជិត ៦ម៉ឺននាក់ ជារៀងរាល់ឆ្នាំ ដែលស្មើនឹង ៦៤% នៃករណីស្លាប់ទាំងអស់ក្នុងឆ្នាំ២០១៨។ រាជរដ្ឋាភិបាលកម្ពុជា បានសម្រេចដាក់បញ្ចូលជំងឺមិនឆ្លងទៅក្នុងគោលដៅអភិវឌ្ឍន៍ប្រកបដោយចីរភាព ដើម្បីសម្រេចឲ្យបានការថយចុះ ១/៣ នៃអត្រាមរណភាពមុនអាយុដោយសារជំងឺមិនឆ្លងត្រឹមឆ្នាំ២០៣០។ ជំងឺមិនឆ្លងខាងលើ ដែលកំពុងជាបញ្ហាប្រឈមផ្នែកសុខភាពសាធារណៈដ៏ធំមួយនៅកម្ពុជា ក៏ដូចជានៅលើសកលលោក ដោយហេតុថា ជំងឺមិនឆ្លងទាំងនេះ គឺអាចការបារបានរហូតដល់ទៅ ៨០% តាមរយៈការមានរបបរអាហារឲ្យបានត្រឹមត្រូវ តិចអំបិល តិចស្ករ តិចខ្លាញ់ មានលំហាត់ប្រាណ កុំប្រើប្រាស់គ្រឿងស្រវឹង និងផលិតផលថ្នាំជក់ជាដើម៕

ជំនួបចរចាទ្វេភាគីរវាងសមភាគីរដ្ឋសភាកម្ពុជា និងរដ្ឋសភាហុងគ្រី គឺដើម្បីជំរុញទំនាក់ទំនងរដ្ឋសភា ក៏ដូចជាទំនាក់ទំនងនៃប្រទេសទាំងពីរឱ្យកាន់តែប្រសើរឡើងថែមទៀត

ភ្នំពេញ ៖ ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១រដ្ឋសភានៃព្រះរាជាណាចក្រកម្ពុជា នៅព្រឹកថ្ងៃទី៦ ខែកុម្ភៈ ឆ្នាំ២០២៥ បានទទួលជួបប្រជុំទ្វេភាគីជាមួយ លោកជំទាវ ម៉ារតា ម៉ាត្រៃ (Marta MATRAI) អនុប្រធានទី១រដ្ឋសភា នៃប្រទេសហុងគ្រី ដើម្បីជំរុញទំនាក់ទំនងរដ្ឋសភា ក៏ដូចជាទំនាក់ទំនងនៃប្រទេសទាំងពីឱ្យកាន់តែប្រសើរឡើងថែមទៀត នៅក្នុងឱកាសដែលលោកជំទាវ ម៉ារតា ម៉ាត្រៃ និងសហការី អញ្ជើញមកបំពេញទស្សនកិច្ចការងារ និងមិត្ដភាព នៅព្រះរាជាណាចក្រកម្ពុជា ចាប់ពីថ្ងៃទី៥ ដល់ថ្ងៃទី៩ ខែកុម្ភៈ ឆ្នាំ២០២៥។ ឯកឧត្តមកិត្តិសេដ្ឋាបណ្ឌិត ជាម យៀប បានមានប្រសាសន៍ថា ដំណើរទស្សនកិច្ចជាផ្លូវការរបស់ លោកជំទាវអនុប្រធានទី១រដ្ឋសភា នៃប្រទេសហុងគ្រី មកកាន់ព្រះជាណាចក្រកម្ពុជានាពេលនេះ គឺជាព្រឹត្ដិការប្រវត្ដិសាស្រ្ដថ្មីមួយទៀតសម្រាប់ប្រទេសទាំងពីរ បន្ទាប់ពីទស្សនកិច្ចរបស់ឯកឧត្តមប្រធានរដ្ឋសភាហុងគ្រី កាលពីឆ្នាំ២០១៥កន្លងទៅ ដែលបង្ហាញឱ្យឃើញពីកិច្ចខិតខំប្រឹងប្រែងក្នុងការបន្ដពូនជ្រុំ ជំរុញពង្រឹង និងពង្រីកចំណងមិត្តភាព ដែលប្រទេសទាំងពីរដែលបានបង្កើតចំណងការទូតជាមួយគ្នាចាប់តាំងពីឆ្នាំ១៩៥៦ មក។ ឯកឧត្តមកិត្តិសេដ្ឋាបណ្ឌិត ជាម យៀប បានវាយតម្លៃខ្ពស់ ចំពោះកិច្ចខិតខំប្រឹងប្រែងរបស់ស្ថាប័ននីតិប្រតិបត្ដិ និងនីតិប្បញ្ញត្ដិ នៃប្រទេសទាំងពីរ ជាពិសេសក្នុងការបន្តពង្រឹង និងពង្រីកចំណងការទូត វប្បធម៌ និងសេដ្ឋកិច្ច ឱ្យកាន់តែស៊ីជម្រៅ ដើម្បីជាផលប្រយោជន៍សម្រាប់ប្រជាជន និងប្រទេសទាំងពីរ។ឆ្លៀតក្នុងឱកាសនេះ ឯកឧត្តមកិត្តិសេដ្ឋាបណ្ឌិត បានថ្លែងអំណរគុណយ៉ាងជ្រាលជ្រៅដល់សភាហុងគ្រី ដែលបានសហការរៀបចំកិច្ចប្រជុំពិគ្រោះយោបល់លើការរៀបចំខ្លឹមសារធម្មនុញ្ញសន្តិភាពសកលដើម្បីមនុស្សជាតិនិងភពផែនដី ដែលប្រព្រឹត្តទៅនៅទីក្រុង ប៊ូដាប៉េសនៃប្រទេសហុងគ្រី កាលពីខែកញ្ញា ឆ្នាំ២០២៤ និងនៅទីក្រុង សៀមរាប ទឹកដីអង្គរ នៃព្រះរាជាណាចក្រកម្ពុជាកាលពីខែវិច្ឆិកា ឆ្នាំ២០២៤ កន្លងទៅ ហើយទទួលបានការគាំទ្រយ៉ាងពេញទំហឹង ពីសំណាក់គណៈប្រតិភូចូលរួមក្នុងសម័យប្រជុំពេញអង្គលើកទី១១ នៃសភាអន្ដរជាតិដើម្បីភាពអត់ឱន និងសន្ដិភាព(IPTP)ឯកឧត្តមកិត្តិសេដ្ឋាបណ្ឌិត ជាម យៀប បានជម្រាបជូន លោកជំទាវ និងគណៈប្រតិភូ ថា សម័យប្រជុំពេញអង្គលើកទី១១របស់IPTP បានដាក់ចេញនូវឯកសារសំខាន់ចំនួនពីរគឺ៖ ទី១) សេចក្ដីប្រកាសទីក្រុងភ្នំពេញ និង២) ធម្មនុញ្ញសន្ដិភាពសកល ដើម្បីមនុស្សជាតិនិងភពផែនដី ដែលជាគំនិតផ្ដួចផ្ដើមរបស់ សម្ដេចតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា។ ធម្មនុញ្ញសន្ដិភាពនេះ គឺជាឯកសាររស់ និងមិនមានការចងកាតព្វកិច្ចច្បាប់ ព្រមទាំងបានបង្ហាញពី ឆន្ទៈដ៏មោះមុតក្នុងការកសាងនូវមូលដ្ឋាន និងប្រព័ន្ធអេកូឡូស៊ីនៃសន្តិភាព សំដៅទប់ស្កាត់ជម្លោះ ការកសាងសុខសន្ដិភាព ស្ថិរភាព និងវិបុលភាពសម្រាប់មនុស្សជាតិនៅលើពិភពលោក។ ក្នុងនាមប្រជាជនកម្ពុជា ឯកឧត្តមកិត្តិសេដ្ឋាបណ្ឌិតអនុប្រធានទី១រដ្ឋសភា បានសម្តែងនូវអំណរគុណយ៉ាងជ្រាលជ្រៅចំពោះ ហុងគ្រី ដែលបានរួមចំណែកក្នុងការស្វែងរកសន្តិភាព ការស្តារនិងអភិវឌ្ឍប្រទេសកម្ពុជាឡើងវិញ និងថាហុងគ្រី បានជួយដល់កម្ពុជាជាច្រើនវិស័យ។ឯកឧត្ដមក៏បានលើកឡើងពីកិច្ចសហប្រតិបត្តិការនៃប្រទេសទាំងពីរដែល សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្តី និងបច្ចុប្បន្នជាប្រធានព្រឹទ្ធសភា ធ្លាប់បានទៅបំពេញទស្សនកិច្ច និងបានអញ្ជើញចូលរួមកិច្ចប្រជុំស្ដីពីទឹកលើកទី៣ នៅប្រទេសហុងគ្រី ដែលក្នុងពេលនោះ ថ្នាក់ដឹកនាំប្រទេសទាំងពីរ បានឯកភាពគ្នាជំរុញកិច្ចកិច្ចសហប្រតិបត្ដិការជាច្រើនវិស័យដូចជា៖ វិស័យសេដ្ឋកិច្ច វិនិយោគ វប្បធម៌ ទេសចរណ៍ និងធនធានមនុស្សជាដើម។លោកជំទាវ ម៉ារតា ម៉ាត្រៃ បានថ្លែងអំណរគុណចំពោះសភាកម្ពុជាដែលបានទទួលស្វាគមន៍យ៉ាងកក់ក្ដៅ និងបានឯកភាពចំពោះប្រសាសន៍លើកឡើងរបស់ឯកឧត្តមកិត្តិសេដ្ឋាបណ្ឌិត ពិសេសការស្នើឱ្យសភាទាំងពីរធ្វើការផ្លាស់ប្ដូរទស្សនកិច្ចគ្រប់កម្រិត តាំងពីប្រធានសភា និងក្រុមមិត្ដភាពនៃប្រទេសទាំងពីរ ព្រមទាំងគណៈកម្មការជំនាញនានានៃរដ្ឋសភាទាំងពីរ ដើម្បីការសិក្សាស្វែងយល់ និងផ្លាស់ប្តូរបទពិសោធន៌ពីគ្នាទៅវិញទៅមក ក្នុងកិច្ចការតាក់តែងច្បាប់ និងការទូតសភាជាដើម។ ដោយលោកជំទាវបានបញ្ជាក់សារជាថ្មីពីគោលជំហររបស់ហុងគ្រី ក្នុងការពង្រឹងទំនាក់ទំនងជាមួយកម្ពុជាដោយផ្អែលលើគោលនយោបាយការបរទេសដែលមានការជឿទុកចិត្តគ្នា ការគោរពគ្នា និងការផ្ដល់ប្រយោជន៍ឱ្យគ្នាទៅវិញទៅមក ហើយកម្ពុជាគឺជាគោលដៅមួយដ៏សំខាន់សម្រាប់ហុងគ្រី នៅក្នុងការពង្រឹងនូវទំនាក់ទំនងជាមួយអាស៊ាន ក៏ដូចជានៅអាស៊ីទាំងមូល។ភាគីហុងគ្រីក៏បានបង្ហាញនូវមោទនភាព ដែលអតីតនិស្សិតកម្ពុជាដែលបានទៅសិក្សានៅប្រទេសហុងគ្រីកាលពីពេលកន្លងមក នៅពេលនេះបានរួមចំណែកយ៉ាងសំខាន់ក្នុងការអភិវឌ្ឍប្រទេសកម្ពុជា និងមួយចំនួនបានក្លាយជាថ្នាក់ដឹកនាំ ក្នុងនោះក៏មានសម្ដេចមហារដ្ឋសភាធិការធិបតី ឃួន សុដារី ផងដែរ។ ប្រតិភូហុងគ្រី បញ្ជាក់ថា និស្សិតគឺជាទូតសុឆន្ទៈនៃទំនាក់ទំនងរវាងប្រជាជន និងប្រជាជននៃប្រទេសទាំងពីរ។ភាគីទាំងពីក៏បានបង្ហាញនូវជំនឿថា ទោះបីជាសភាពការណ៍តំបន់ និងពិភពលោកមានការផ្លាស់ប្តូរ វិវត្តប្រែប្រួលឆាប់រហ័សមិនអាចស្មានទុកជាមុនបាន និងមានហានិភ័យខ្ពស់យ៉ាងណាក៏ដោយ ក៏ចំណងមិត្តភាព ទំនាក់ទំនងរបស់ប្រទេសទាំងពីរ កម្ពុជា ហុងគ្រី នៅតែឈរយ៉ាងរឹងមាំជាងមុនទៅទៀត ដោយផ្អែកលើការជឿទុកចិត្តគ្នា ការគោរពគ្នា និងការផ្ដល់ផលប្រយោជន៍ឱ្យគ្នាទៅវិញទៅមក។

លោកជំទាវបណ្ឌិតសភាចារ្យ ភឿង សកុណា៖ «កិច្ចការអភិរក្ស ការពារ និងអភិវឌ្ឍសិល្បៈវប្បធម៌ ជាការងារគ្មានទីបញ្ចប់»

លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានអះអាងថា កិច្ចការអភិរក្ស ការពារ និងអភិវឌ្ឍសិល្បៈវប្បធម៌ ជាការងារគ្មានទីបញ្ចប់ និងទាមទារឱ្យមានកិច្ចខិតខំ ប្រឹងប្រែងជាប់មិនដាច់ ព្រមទាំងកសាងឱ្យបាននូវយុវជនបន្តវេនប្រកបដោយជំនាញវិជ្ជាជីវៈ និងមនសិការខ្ពស់។ការថ្លែងរបស់លោកជំទាវបណ្ឌិតសភាចារ្យ ភឿង សកុណា យ៉ាងដូច្នេះក្នុងឱកាសនៃពិធីបិទសន្និបាតបូកសរុបការងារវប្បធម៌ និងវិចិត្រសិល្បៈឆ្នាំ២០២៤ និងលើកទិសដៅការងារសម្រាប់ឆ្នាំ២០២៥ នាសាលសន្និសីទចតុម្មុខ ព្រឹកថ្ងៃទី៦ ខែកុម្ភៈ ឆ្នាំ២០២៥នេះ។ លោកជំទាវបណ្ឌិតសភាចារ្យ រដ្ឋមន្រី្ត លើកឡើងទៀតថា ប្រទេសកម្ពុជា បានកកើតឡើង ជាមួយប្រវត្តិសាស្ត្រ វប្បធម៌ អរិយធម៌ ប្រពៃណីទំនៀមទម្លាប់ដ៏យូរលង់ និងច្បាស់លាស់ ដែលមកទល់បច្ចុប្បន្ន សិល្បៈ វប្បធម៌ បេតិកភណ្ឌទាំងរូបី និងអរូបី ដ៏សម្បូរបែប ដែលត្រូវបានបង្កើត បន្សល់ទុក និងថែរក្សាការពារ ដោយបុព្វបុរសគ្រប់ជំនាន់ គឺជាសក្ខីភាព និងបានក្លាយជាអត្តសញ្ញាណដ៏ថ្លៃថ្លារបស់ជាតិ និងប្រជាជន។ កិច្ចការបន្តវេនថែរក្សា ការពារ និងអភិវឌ្ឍន៍ បានក្លាយជាកាតព្វកិច្ចរបស់កូនខ្មែរគ្រប់ៗរូប ហើយបច្ចុប្បន្នភារកិច្ចនេះ មិនត្រឹមតែផ្តោតគោលដៅការការពារអត្តសញ្ញាណជាតិមួយមុខនោះទេ ប៉ុន្តែថែមទាំងជាកិច្ចខិតខំបង្វែរទិសបន្ថែម ដល់វិស័យសិល្បៈវប្បធម៌ ក្នុងការចូលរួមដោយផ្ទាល់និងដោយប្រយោលដល់កំណើនសេដ្ឋកិច្ច និងទ្រទ្រង់ជីវភាព ប្រជាជន តាមរយៈការកសាងជំនាញបន្តវេន បង្កបង្កើតការងារ និងតាមរយៈការរីកចម្រើនរបស់វិស័យឧស្សាហកម្ម វប្បធម៌។លោកជំទាវបណ្ឌិតសភាចារ្យ ភឿង សកុណា បានបញ្ជាក់ទៀតថា សន្និបាតឆ្នាំនេះ មានលក្ខណៈពិសេសជាងឆ្នាំមុន ដោយយើងទាំងអស់គ្នាជួបជុំមិនត្រឹមតែពិនិត្យ និងវាយតម្លៃទៅលើលទ្ធផលការងារទៅតាមទិសដៅដូចបានជម្រាបជូនខាងលើនោះទេ ប៉ុន្តែយើងបានផ្ទៀងផ្ទាត់ផងដែរ អំពីកម្រិតឆ្លើយតបទៅនឹងយុទ្ធសាស្ត្របញ្ចកោណ ដំណាក់កាលទី១ និងផែនការសកម្មភាព អាទិភាពទាំង៦ចំណុច ដែលក្នុងនោះក៏បានត្រួតពិនិត្យផងដែរ អំពីសន្ទុះនៃការរៀបចំផ្ទះឱ្យបានរៀបរយ ”ដោយផ្អែកលើអភិក្រម“ ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់។ ក្នុងន័យនេះ លោកជំទាវ សូមវាយតម្លៃខ្ពស់ជាថ្មី ចំពោះកិច្ចខិតខំប្រឹងប្រែងរបស់ថ្នាក់ដឹកនាំ មន្ត្រីរាជការ លោកគ្រូ អ្នកគ្រូ សិស្ស និស្សិត សិល្បករ សិល្បការិនី ទាំងក្នុង និងក្រៅប្រព័ន្ធ ដែលនាំឱ្យវិស័យសិល្បៈវប្បធម៌បន្តទទួលបាននូវវឌ្ឍនភាពថ្មីៗ។ ផ្អែកលើរបាយការណ៍លម្អិត លោកជំទាវបណ្ឌិតសភាចារ្យ សូមផ្តល់ការតម្រង់ទិសបន្ថែមទៅលើ៩ចំណុចសំខាន់ៗមួយចំនួននៃផ្នែក ផែនការសកម្មភាពដែលត្រូវបន្ត និងដែលសុទ្ធតែជាសកម្មភាពអាទិភាពបន្ទាន់ ដែលត្រូវសម្រេចឱ្យបាននា ពេលដ៏ខ្លីខាងមុខ និងនៅដំណាច់ឆ្នាំ២០២៥នេះ។ ជាមួយគ្នានេះ លោកជំទាវបណ្ឌិតសភាចារ្យ ភឿង សកុណា នៅតែមានជំនឿថា កិច្ចសហការប្រមូលផ្តុំកម្លាំងរួមមួយ រវាងគ្រប់អង្គភាពជំនាញរបស់ក្រសួងវប្បធម៌ និងវិចិត្រសិល្បៈ ជាមួយក្រសួងស្ថាប័នពាក់ព័ន្ធ វិស័យឯកជន និងប្រជាជនគ្រប់មជ្ឈដ្ឋាន គឺជាភាពចាំបាច់បំផុត ដែលនាំឱ្យយើងសម្រេចបានទិសដៅការងារដែលបានគ្រោងទុក។ ការលះបង់ និងការបំពេញការងារប្រកបដោយ វិជ្ជាជីវៈ និងការទទួលខុសត្រូវ ព្រមទាំងសាមគ្គីភាពជាធ្លុងមួយនៅតាមគ្រប់អង្គភាព ក៏ជាតម្រូវការចាំបាច់ និងជាការបង្កភាពអនុគ្រោះដល់បរិយាកាសការងារល្អ និងជោគជ័យរួមរបស់អង្គភាពទាំងមូល។ កិច្ចខិតខំប្រឹងប្រែង របស់យើងទាំងអស់គ្នា នឹងមិនត្រឹមតែដើម្បីបុព្វហេតុសិល្បៈវប្បធម៌ និងប្រជាជនប៉ុណ្ណោះទេ ប៉ុន្តែយល់ថា អ្វីដែលយើងកំពុងរៀបចំតម្រង់ទិសទាំង យន្តការការងារ ក្របខ័ណ្ឌគតិយុត្តគាំទ្រដល់ការអនុវត្តការងារ ការកសាង ធនធានមនុស្ស ទម្រង់នៃកិច្ចសហការជាតិ-អន្តរជាតិ ភាពជិតស្និទ្ធជាមួយវិស័យឯកជន ព្រមទាំងលទ្ធផល សម្រេចបានកន្លងមកនិងទៅអនាគត នឹងក្លាយជាមរតករបស់យើងទាំងអស់គ្នា ទុកជូនជនបន្តវេន ជាមួយក្តីសង្ឃឹម នៃការបង្កលក្ខណៈអនុគ្រោះនិងតម្រាយផ្លូវដ៏ល្អ សម្រាប់ការបន្តបុព្វហេតុការងារសម្រាប់វិស័យសិល្បៈវប្បធម៌៕ អត្ថបទ រដ្ឋា

បណ្ដាញសង្គម

ព័ត៌មានថ្មីៗ

កុមារជួបកង្វះអាហារូបត្ថម្ភទទួលការព្យាបាលនៅមន្ទីរពេទ្យ Nasser ស្ថិតក្នុងតំបន់ហ្កាហ្សា

តើហេតុអ្វីបានជាអឺរ៉ុបប្រឈមនឹងរលកកម្តៅបំបែកកំណត់ត្រា?

កងកម្លាំងសន្តិសុខស៊ីរី ត្រូវបានដាក់ពង្រាយទៅកាន់ទីក្រុង Sweida របស់ជនជាតិភាគតិច Druze

សភាអ៊ុយក្រែនគាំទ្រការបង្កើនជិត ១០ពាន់លានដុល្លារដល់ការចំណាយលើវិស័យការពារជាតិ ខណៈសង្រ្គាមបន្តមាន

អ៊ីតាលីអាចនឹងដោះលែងអ្នកទោស ១០.០០០នាក់ ដើម្បីសម្រាលភាពចង្អៀត ក្នុងពន្ធនាគារ

អង់គ្លេសដកចេញការរឹតត្បិតលើក្រុមហ៊ុនអាកាសចរណ៍ប៉ាគីស្ថាន ក្រោយបំរាមរយៈពេល ៥ឆ្នាំ

ការបំផ្ទុះសម្លាប់ទាហានកេនយ៉ា ៣នាក់ នៅតាមផ្លូវ ក្បែរព្រំដែនសូម៉ាលី

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877