BTV NEWS

កូនត្រីចម្រុះប្រមាណ៣ម៉ឺនក្បាល និងត្រីមេពូជ១០០គីឡូក្រាម ត្រូវបានលែងចូលស្រះជំរកត្រីសហគមន៍នេសាទបឹងកំពែង ក្នុងទិវាមច្ឆជាតិ១កក្កដា

មន្ត្រីជាន់ខ្ពស់ក្រសួងសុខាភិបាលណែនាំដល់ក្រុមគ្រូពេទ្យត្រូវសិក្សាស្រាវជ្រាវបង្កើនសមត្ថភាពបម្រើការងារជំនាញ

កម្លាំងចម្រុះ រកឃើញជនជាតិចិន ៩០នាក់, ជនជាតិវៀតណាម ៣៥នាក់, ជនជាតិមីយ៉ាន់ម៉ា១៥នាក់, ឡាវម្នាក់ ក្នុងប្រតិបត្តិការចុះត្រួតពិនិត្យទីតាំងសង្ស័យលួចលាក់ប្រព្រឹត្តបទល្មើស Online Scam នៅក្រុងបាវិត

CDC ដាក់ឱ្យប្រើប្រាស់ e-Signature និង e-Stamp លើឯកសារទម្រង់ឌីជីថលចេញពីប្រព័ន្ធ cdcIPM

ព័ត៌មានជាតិ

អភិបាលខេត្តប៉ៃលិនអញ្ជើញបើកការដ្ឋានកសាងផ្លូវកៅស៊ូDBSTជាង៥ពាន់ម៉ែត្រនៅក្នុងក្រុងប៉ៃលិន

ប៉ៃលិន៖ លោកជំទាវបណ្ឌិត បាន ស្រីមុំ អភិបាលខេត្តប៉ៃលិន និងឯកឧត្តម ជា ចាន់ឌិន ប្រធានក្រុមប្រឹក្សា ខេត្ត នាថ្ងៃទី០៥ ខែកុម្ភៈ នេះ បានអញ្ជើញបើកការដ្ឋានកសាងផ្លូវក្រាលកៅស៊ូ DBST កំណាត់ផ្លូវខេត្ត លេខ១ PL១ ប្រវែង៥១០០ម៉ែត្រ ទទឹង៧ម៉ែត្រ នៅក្នុងសង្កាត់ទួលល្វា និងសង្កាត់ប៉ៃលិន ក្រុងប៉ៃលិន។លោកជំទាវ បាន ស្រីមុំ បានមានប្រសាសន៍ថា ក្រោមម្លប់សុខសន្តិភាព និងមាគ៌ាដឹកនាំប្រកបដោយគតិ បណ្ឌិតរបស់សម្តេចតេជោ ហ៊ុន សែន ប្រធានព្រឹទ្ធសភា និងបន្តមកសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានធ្វើឱ្យប្រទេសជាតិទទួលបាននូវសុខសន្តិភាពពេញលើផ្ទៃប្រទេស មានស្ថិរភាពនយោ បាយ ជាពិសេសបានធ្វើឱ្យខេត្តប៉ៃលិន ដែលជាខេត្តជាយដែន និងធ្លាប់ជាសមរភូមិយ៉ាងក្តៅគគុក មានការ អភិវឌ្ឍ និងរីកចម្រើនលើគ្រប់វិស័យ ហើយជីវភាពរបស់ប្រជាពលរដ្ឋកាន់តែធូរធារឡើងពីមួយថ្ងៃទៅមួយ ថ្ងៃ ដូច្នេះប្រជាពលរដ្ឋត្រូវបន្តគាំទ្ររាជរដ្ឋាភិបាលស្របច្បាប់ ដោយចៀសវាងការចាញ់បោកការញុះញង់ របស់ជនអគតិមួយក្តាប់តូច ។លោកជំទាវ បានបញ្ជាក់ថា ហេដ្ឋរចនាសម្ព័ន្ធគមនាគមន៍ ពិតជាមានសារសំខាន់ណាស់ បមើឱ្យ ផ្នែកសេដ្ឋកិច្ច ទេសចរណ៍ និងជីវភាពរស់នៅរបស់ប្រជាពលរដ្ឋ ដែលបន្ទាប់ពីស្ថាបនារួចរាល់ ផ្លូវ១ខ្សែនេះ នឹងអាចសម្រួលការធ្វើដំណើរ និងការដឹកជញ្ជូនកាន់តែមានភាពងាយស្រួល។ បច្ចុប្បន្ននេះ អាជ្ញាធរខេត្ត កំពុងខិតខំរៀបចំសណ្តាប់ធ្នាប់ និងកែលម្អសោភ័ណភាពនៅក្នុងខេត្តយ៉ាងសស្រាក់សស្រាំ ដូចជា ការក សាងហេដ្ឋារចនាសម្ព័ន្ធ កែលម្អសួនច្បារសាធារណៈ ការដាក់ភ្លើងបំភ្លឺ ការសម្អាតអនាម័យបរិស្ថាននៅ តាមទីសាធារណៈ និងតាមតំបន់រមណីយដ្ឋានទេសចរណ៍នានា ដើម្បីឱ្យខេត្តប៉ៃលិនប្រែក្លាយជាខេត្តមួយ មានការរីកចម្រើន និងមានទេសភាពស្រស់បំព្រង បរិស្ថានល្អ ព្រមទាំងប្រែក្លាយជាខេត្តគោលដៅ ទេស ចរណ៍ សម្រាប់ថ្ងៃអនាគត។នៅក្នុងឱកាសនេះដែរ លោកជំទាវ បាន ស្រីមុំ បានអំពាវនាវដល់ប្រជាពលរដ្ឋ ឱ្យនាំគ្នាចូលរួមគោ រពច្បាប់ចរាចរណ៍ និងរួមគ្នាជួយថែរក្សាទ្រព្យសម្បត្តិសាធារណៈរបស់រដ្ឋ ជាពិសេសផ្លូវ ស្ពាន ដើម្បីប្រ យោជន៍យូរអង្វែង ។លោក អ៊ាត សារ៉ាត់ ប្រធានមន្ទីរសាធារណការ និងដឹកជញ្ជូន បានឱ្យដឹងថា ផ្លូវក្រាលកៅស៊ូDBST ដែលចាប់ផ្ដើមកសាងនាពេលនេះ គឺជាកំណាត់ផ្លូវខេត្តលេខ ១ PL១ មានប្រវែង៥១០០ម៉ែត្រ ទទឹង ៧ម៉ែត្រ និងចិញ្ចើមក្រាលដីល្បាយថ្ម ១ម៉ែត្រ សងខាង ស្ថាបនាប្រព័ន្ធលូបង្ហូរទឹក (លូអ៊ុយ) មុខកាត់ ១ម៉ែត្រ×០,៨០ម៉ែត្រ ប្រវែង២៥០ម៉ែត្រ ស្ថាបនាលូមូលកាត់ទទឹងថ្នល់អង្កត់ផ្ចិត ១ម៉ែត្រ ប្រវែង១២ម៉ែត្រ ចំនួន១៣កន្លែង និងដំឡើងបរិក្ខារចរាចរណ៍ ដោយផ្លូវនេះឆ្លងកាត់សង្កាត់ចំនួន០២ គឺសង្កាត់ទួលល្វា (ភូមិអូរច្រាលិច ភូមិអូរច្រាលើ ភូមិវាលវង់ និងភូមិថ្មី) និងសង្កាត់ប៉ៃលិន (ភូមិទួលខៀវ និងភូមិបរឌិន នៀវ) ផងដែរ ៕

អភិបាលខេត្តប៉ៃលិន បិទសន្និបាតបូកសរុបលទ្ធផលការងារវិសយ័អប់រំ យុវជន និងកីឡាខេត្ត ឆ្នាំសិក្សា២០២៣-២០២៤

ប៉ៃលិន៖ នៅសាលប្រជុំមន្ទីរអប់រំ យុវជន និងកីឡាខេត្ត នារសៀលថ្ងៃទី០៥ ខែកុម្ភៈ ឆ្នាំ២០២៤ លោកជំទាវបណ្ឌិត បាន ស្រីមុំ អភិបាល នៃគណៈអភិបាលខេត្តប៉ៃលិន បានអញ្ជើញជាគណៈអធិបតីពិធីបិទសន្និបាតបូកសរុប វាយតម្លៃលទ្ធផលការងារអប់រំ យុវជន និងកីឡា ឆ្នាំសិក្សា ២០២៣-២០២៤ និងលើកទិសដៅការងារឆ្នាំសិក្សា ២០២៤-២០២៥ ។លោកជំទាវបណ្ឌិត បាន ស្រីមុំ អភិបាល នៃគណៈអភិបាលខេត្តប៉ៃលិន បានមានប្រសាសន៍លើកឡើងថា៖ រាជរដ្ឋាភិបាលកម្ពុជា បានចាត់ទុកការអភិវឌ្ឍន៍ធនធានមនុស្ស ជាអាទិភាព នៃការអនុវត្តន៍យុទ្ធសាស្ត្រគោលនយោបាយ នៅគ្រប់ដំណាក់កាល សំដៅលើកកម្ពស់ចំណេះដឹង ជំនាញវិជ្ជាជីវៈសមត្ថភាព សហគ្រិនភាព ការច្នៃប្រឌិតនវានុវត្តន៍ គុណធម៌ សីលធម៌ មនសិកាស្នេហាជាតិ និងស្មារតីទទួលខុសត្រូវ សុខភាពល្អ និងកាយសម្បទារឹងមាំ តួនាទីស្ត្រី និងកិច្ចគាំពារសង្គម ដូច្នេះ សន្និបាតបូកសរុប និងវាយតម្លៃលទ្ធផលការងារអប់រំ យុវជន និងកីឡាឆ្នាំសិក្សា ២០២៣-២០២៤ និង លើកទិសដៅការងារឆ្នាំសិក្សា២០២៤-២០២៥ នេះ គឺពិតជាមានសារៈសំខាន់ខ្លាំងណាស់ ដើម្បីរកឱ្យឃើញនូវបញ្ហាចម្បងៗ ដើម្បីដាក់ចេញជាអនុសាសន៍សម្រាប់អនុវត្តនាឆ្នាំសិក្សាថ្មី ឲ្យសម្រេចបានទៅតាមផែនការដែលបានគ្រោងទុក។លោកជំទាវបណ្ឌិតអភិបាលខេត្ត បានមានប្រសាសន៍បញ្ជាក់ថា៖ វិស័យអប់រំ យុវជន និងកីឡា ពិតជាមានសារៈសំខាន់សម្រាប់សង្គម និងប្រទេសជាតិយើងទាំងមូល ក្នុងការអភិវឌ្ឍន៍លើគ្រប់វិស័យមិនអាចខ្វះបាននោះទេ ហើយដោយផ្អែកតាមកម្មវិធីនយោបាយរបស់រាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំដ៏ស្វាហាប់ និងឈ្លាសវៃរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលជាអគ្គមគ្គុទ្ទេសន៍វ័យក្មេងដ៏ឆ្នើម និងពោរពេញដោយសមត្ថភាព, ចំណេះដឹង និងថាមពល បានដាក់ចេញនូវយុទ្ធសាស្ត្របញ្ចកោណដំណាក់កាលទី១ ដើម្បីកំណើន, ការងារ, សមធម៌, ប្រសិទ្ធភាព, និង ចីរភាព, ដោយផ្តោតជាសំខាន់លើរបៀបវារៈ ធានា «ប្រសិទ្ធភាពសមិទ្ធកម្ម» តាមរយៈការអនុវត្តអភិក្រម «ឆ្លុះកញ្ចក់, ងូតទឹក, ដុសក្អែល, ព្យាបាល និងវះកាត់» ដែលនេះជាគតិបណ្ឌិតដឹកនាំដ៏ឈ្លាសវៃរបស់ប្រមុខរាជរដ្ឋាភិបាលកម្ពុជាយើង ក្នុងការអភិវឌ្ឍន៏លើគ្រប់វិស័យតែម្តង។ ក្នុងឱកាសនោះផងដែរ លោកជំទាវបណ្ឌិត បាន ស្រីមុំ ក៍បានមានប្រសាសន៍ផ្តាំផ្ញើ ដល់បុគ្គលិកអប់រំទាំងអស់ ពិសេសលោកគ្រូ អ្នកគ្រូ និងនាយកសាលានានា ត្រូវពង្រឹងនូវការគ្រប់គ្រងសាលារៀនឱ្យមានវិន័យល្អ ដើម្បីឱ្យប្រព័ន្ធអប់រំ ក្នុងខេត្ត កាន់តែមានភាពរឹងមាំ និងល្អប្រសើបន្ថែមទៀត ជាពិសេសត្រូវចូលរួមចំណែកអនុវត្ដន៍គោលនយោបាយភូមិ-ឃុំ សង្កាត់មានសុវត្ដិភាព ដែលធ្វើឱ្យស្របគ្នាទាំងការអប់រំក្នុងប្រព័ន្ធ និងក្រៅប្រព័ន្ធ ដើម្បីពង្រឹងសកម្មភាពអប់រំ កីឡា និងជំរុញឱ្យមានការចូលរួម ព្រមទាំងបន្ដពង្រឹងកិច្ចសហការ និងពង្រីកទំនាក់ទំនងជាមួយដៃគូអភិវឌ្ឍន៍នានា ។បើតាមរបាយការណ៍លោក តង់ ធារ៉ា ប្រធានមន្ទីរអប់រំ យុវជន និងកីឡាខេត្តប៉ៃលិន បានឱ្យដឹងថា៖ ឆ្នាំសិក្សាថ្មី ២០២៤-២០២៥នេះ ខេត្តប៉ៃលិន មានគ្រឹះស្ថានមធ្យមសិក្សាសាធារណៈចំនួន ៩កន្លែង ក្នុងនោះវិទ្យាល័យចំនួន៣ និងអនុវិទ្យាល័យចំនួន ៦ ដែលមានសិស្សសរុប ៥.៨៥៩នាក់ ស្រី ៣.១៩៧នាក់, គ្រឹះស្ថានមធ្យមសិក្សាឯកជនចំនួន១កន្លែង ក្នុងនោះអនុវិទ្យាល័យចំនួន១ ដែលមានសិស្សសរុប ៩៨នាក់ ស្រី ៦១នាក់, គ្រឹះស្ថានបឋមសិក្សាសាធារណៈចំនួន ៥៣ សាលា ដែលមានសិស្សសរុប ១៦.១៩៥នាក់ ស្រី ៥.៣០៥នាក់ (ក្នុងនោះសិស្សគ្រប់អាយុចុះឈ្មោះចូលរៀនថ្នាក់ទី១ចំនួន ១.៣៩៩នាក់ ស្រី ៦៨២នាក់), មត្តេយ្យសិក្សាសាធារណៈចំនួន ២៥សាលា ដែលមានសិស្សចុះឈ្មោះចូលរៀនថ្មីសរុប ៤៨១នាក់ ស្រី ២៤៤នាក់ និងមត្តេយ្យសិក្សាសហគមន៍សិស្សចុះឈ្មោះចូលរៀនថ្មីសរុប ១១៧នាក់ ស្រី ៦៧នាក់៕

ស្ថាប័នអប់រំ អ៊ិន ធី ស៊ី គ្រុប និងវិទ្យាស្ថានវិទ្យាសាស្ត្រ និងបច្ចេកវិទ្យាដុងវ៉ុង ចុះMOU ដើម្បីជំរុញវឌ្ឍនភាពវិស័យអប់រំ នៅកម្ពុជា និងសាធារណរដ្ឋកូរ៉េ

ភ្នំពេញ ៖ ស្ថាប័នអប់រំ អ៊ិន ធី ស៊ី គ្រុប នៃព្រះរាជាណាចក្រកម្ពុជា និងវិទ្យាស្ថានវិទ្យាសាស្ត្រ និងបច្ចេកវិទ្យាដុងវ៉ុង នៃសាធារណរដ្ឋកូរ៉េ បានចុះហត្ថលេខាលើអនុស្សរណៈយោគយល់គ្នាដើម្បីជំរុញវឌ្ឍនភាពវិស័យអប់រំនៅកម្ពុជា និងសាធារណរដ្ឋកូរ៉េ។ពិធីចុះហត្ថលេខាលើអនុស្សរណៈយោគយល់គ្នានេះ ប្រារព្ធឡើងនារសៀលថ្ងៃទី៥ ខែកុម្ភៈ ឆ្នាំ២០២៥នេះ រវាងលោកឧកញ៉ា ជា ធីឡាយ អគ្គនាយក និងស្ថាបនិកនៃស្ថាប័នអប់រំ អ៊ិន ធី ស៊ី គ្រុប លោកសាស្ត្រាចារ្យ Lee Jung Hyun (លី ចុង យ៉ុន) ប្រធាននាយកដ្ឋាននៃវិទ្យាស្ថានវិទ្យាសាស្ត្រ និងបច្ចេកវិទ្យា ដុងវ៉ុន និងមានការអញ្ជើញចូលរួមពីលោក ឃឹម ផុន ប្រធាននាយកប្រតិបត្តិនៃស្ថាប័នអប់រំ អ៊ិន ធី ស៊ី គ្រុប និងគណៈប្រតិភូនៃវិទ្យាស្ថានវិទ្យាសាស្ត្រ និងបច្ចេកវិទ្យាដុងវ៉ុង (Dongwon Institute)។លោកឧកញ៉ា ជា ធីឡាយ អគ្គនាយក និងស្ថាបនិកនៃស្ថាប័នអប់រំ អ៊ិន ធី ស៊ី គ្រុប នៃព្រះរាជាណាចក្រកម្ពុជា បានថ្លែងថា ស្ថាប័នអប់រំ អ៊ិន ធី ស៊ី គ្រុប និងវិទ្យាស្ថានដុងវ៉ុន បានចុះកិច្ចព្រមព្រៀងសហប្រតិបត្តិការរយៈពេលវែង ពោលគឺចាប់ដៃរួមគ្នាក្នុងភាពជាដៃគូ រយៈពេល៥ឆ្នាំ ដើម្បីជម្រុញវឌ្ឍនភាព នៃការអនុវត្តគម្រោងផែនការយុទ្ធសាស្រ្តអប់រំ ដោយផ្តោតសំខាន់លើ៖ ការផ្តល់ឱកាសអាហារូបករណ៍ដល់សិស្សានុសិស្សដែលបានបញ្ចប់ការប្រឡងសញ្ញាបត្រមធ្យមសិក្សាទុតិយភូមិដោយជោគជ័យ, សិក្ខាសាលាតម្រង់ទិសមុខជំនាញសិក្សា និងអាជីពការងារ, ដំណើរទស្សនកិច្ចសិក្សាស្វែងយល់ពីបរិយាកាស និងការសិក្សាបែបអន្តរជាតិនៅវិទ្យាស្ថាន ដុងវ៉ុន ព្រមទាំងឱកាសក្នុងការចុះកម្មសិក្សា និងទទួលបានការបណ្តុះបណ្តាលដល់ថ្នាក់ដឹកនាំ បុគ្គលិកអប់រំ លោកគ្រូ អ្នកគ្រូនៃស្ថាប័នអប់រំ អ៊ិន ធី ស៊ី គ្រុបនៅសាធារណរដ្ឋកូរ៉េ។ លោកឧកញ៉ា បន្តថា ដើម្បីកសាងប្រទេសកម្ពុជា ឲ្យរីកចម្រើន គឺផ្តោតសំខាន់ទៅលើការបណ្តុះបណ្តាលធនធានមនុស្ស ហើយទៅអនាគត កម្ពុជា នឹងមានការអភិវឌ្ឍន៍រីកចម្រើនដូចសាធារណរដ្ឋកូរ៉េ ដោយសារមានការគាំទ្រយ៉ាងពេញទំហឹងពីរាជរដ្ឋាភិបាលកម្ពុជា ក៏ដូចជាមិត្តភក្តិ ដៃគូបរទេសជាច្រើន។ លោកសាស្ត្រាចារ្យ Lee Jung Hyun (លី ចុង យ៉ុន) ប្រធាននាយកដ្ឋាននៃវិទ្យាស្ថានវិទ្យាសាស្ត្រ និងបច្ចេកវិទ្យា ដុងវ៉ុន បានមានប្រសាសន៍ថា ថ្ងៃនេះលោក និងគណៈប្រតិភូ បានមកធ្វើទស្សនៈនៅកម្ពុជា ជាលើកដំបូង ជាពិសេសបានអញ្ជើញមកចុះហត្ថលេខាលើអនុស្សរណៈយោគយល់គ្នាជាមួយស្ថាប័នអប់រំ អ៊ិន ធី ស៊ី គ្រុប និងសង្ឃឹមថាធ្វើឲ្យប្រទេសកម្ពុជា កាន់តែរីកចម្រើនជាងមុន។ យើងបានសម្លឹងមើលឃើញថា ស្ថាប័នអប់រំ អ៊ិន ធី ស៊ី គ្រុប ជាគ្រឹះស្ថានមួយដែលមានភាពរឹងម៉ាំ ហើយសិស្សានុសិស្សជាច្រើនកំពុងខិតខំប្រឹងប្រែងរៀនសូត្រផងដែរ។ ក្នុងនាមវិទ្យាស្ថានវិទ្យាសាស្ត្រ និងបច្ចេកវិទ្យា ដុងវ៉ុន សូមប្តេជ្ញាចិត្ត និងសន្យាថា ប្រសិនបើសិស្សានុសិស្សនៃស្ថាប័នអប់រំ អ៊ិន ធី ស៊ី គ្រុប របស់ប្រទេសកម្ពុជា អញ្ជើញទៅសិក្សានៅសាធារណរដ្ឋកូរ៉េ យើងនឹងខិតខំប្រឹងប្រែងបណ្តុះបណ្តាល និងជួយគាំពារឲ្យអស់ពីសមត្ថភាព ព្រមទាំងខិតខំបណ្តុះបណ្តាលដើម្បីឲ្យនិសិ្សតដែលសិក្សានៅសាធារណរដ្ឋកូរ៉េ មានឱកាសបម្រើការងារនៅកូរ៉ ឬក៏ត្រឡប់មកមាតុភូមិកម្ពុជាវិញ ដើម្បីបម្រើការងារ និងចូលរួមអភិវឌ្ឍសង្គមជាតិ ឲ្យកាន់តែរីកចម្រើន។សូមបញ្ជាក់ផងដែរ៖ នេះមិនមែនជាលើកទី១ទេ សម្រាប់ស្ថាប័នអប់រំ អ៊ិន ធី ស៊ី គ្រុប ដែលចាប់ដៃគូសហការជាមួយនឹងសាកលវិទ្យាល័យមកពីសាធារណរដ្ឋកូរ៉េ។ វិសាលភាពនៃកិច្ចសហប្រតិបត្តិការលើកនេះ នឹងលើសពីការផ្តល់ផលប្រយោជន៍ឱ្យគ្នាក្នុងការសិក្សាសម្រាប់សិស្សានុសិស្ស។ តាមរយៈភាពជាដៃគូនេះ ស្ថាប័នអប់រំទាំងពីរ ប្តេជ្ញាចិត្តថា នឹងបន្តពង្រឹងវិស័យអប់រំនៅកម្ពុជា និងពង្រីកកិច្ចសហប្រតិបត្តិការនៃវិស័យអប់រំនៅកម្ពុជា និងសាធារណរដ្ឋកូរ៉េ ឱ្យមាននិរន្តរភាព ដោយស្របនឹងគោលដៅយុទ្ធសាស្រ្តក្នុងការអភិវឌ្ឍរួមគ្នា៕អត្ថបទ រដ្ឋា

សម្ដេចធិបតី នាយករដ្ឋមន្រ្ដីអញ្ជើញដឹកនាំកិច្ចប្រជុំពិនិត្យវឌ្ឍនភាពការរៀបចំ និងអនុវត្តផែនការអភិវឌ្ឍន៍ខេត្តជាប់ឆ្នេរសមុទ្រ

នៅរសៀលថ្ងៃទី៥ ខែកុម្ភៈ ឆ្នាំ ២០២៥នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃព្រះរាជាណាចក្រកម្ពុជា បានអញ្ជើញ ដឹកនាំកិច្ចប្រជុំត្រួតពិនិត្យវឌ្ឍនភាពនៃការរៀបចំ និងអនុវត្តផែនការអភិវឌ្ឍន៍ខេត្តជាប់ឆ្នេរសមុទ្រ នៅវិមានសន្តិភាព។សូមបញ្ជាក់ថា តាមការចង្អុលបង្ហាញដោយផ្ទាល់របស់សម្តេចធិបតី នាយករដ្ឋមន្ត្រីកម្ពុជា ក្នុងការពង្រីកវិសាលភាពនៃ «ផែនការមេអភិវឌ្ឍខេត្តព្រះសីហនុជាតំបន់សេដ្ឋកិច្ចពិសេសគំរូពហុបំណង», «ផែនការ មេអភិវឌ្ឍបណ្ដាខេត្តជាប់ឆ្នេរសមុទ្រកម្ពុជា ជារបៀងសេដ្ឋកិច្ចពហុបំណង និងប្រទាក់ក្រឡា» បានរៀបចំឡើង ដោយបញ្ចូលខេត្តជាប់ឆ្នេរសមុទ្រ តាមរយៈការប្រើប្រាស់ធនធាន និងសក្ដានុពលផ្សេងៗរបស់ខេត្តនីមួយៗ ដែលអាចផ្គុំចូលគ្នាបង្កើតជាផែនការមេដែលប្រទាក់ក្រឡា មានមាត្រដ្ឋាន និងជាកម្លាំងរួមមួយ សំដៅបង្កើនភាពប្រកួតប្រជែងរបស់ខេត្តទាំងបួន និងកម្ពុជាជារួម។ជាក់ស្ដែង សេចក្ដីព្រាង «ផែនការមេអភិវឌ្ឍបណ្ដាខេត្តជាប់ឆ្នេរសមុទ្រកម្ពុជា ជារបៀងសេដ្ឋកិច្ចពហុបំណង និងប្រទាក់ ក្រឡា» មានចក្ខុវិស័យរយៈពេលវែងដល់ឆ្នាំ ២០៣៨ ដែលមានទិសដៅអភិវឌ្ឍខេត្តជាប់ឆ្នេរសមុទ្រកម្ពុជាទៅជា៖ទី១៖ គោលដៅទេសចរណ៍ឆ្នេរកម្រិតពិភពលោក៖ ដៃគូប្រកួតប្រជែងទៅកាន់គោលដៅទេសចរណ៍ឆ្នេរ-សមុទ្រអន្តរជាតិ, ផ្ដល់សេវាទេសចរណ៍ប្រកបដោយវិជ្ជាជីវៈ និងបង្កើនបរិយាកាសសម្រាប់ទេសចរណ៍បែបកម្សាន្ដ ។ទី២៖ ថ្នាលថ្មីសម្រាប់សេដ្ឋកិច្ចបៃតង៖ ប្រកបដោយថាមពលបៃតង, ការប្រើប្រាស់វិធីសាស្រ្តបៃតងសម្រាប់ការធ្វើកសិកម្ម និងការអភិវឌ្ឍឧស្សាហកម្ម និងហិរញ្ញវត្ថុបៃតង។សេចក្ដីព្រាង «ផែនការមេអភិវឌ្ឍបណ្ដាខេត្តជាប់ឆ្នេរសមុទ្រកម្ពុជា ជារបៀងសេដ្ឋកិច្ចពហុបំណង និង ប្រទាក់ក្រឡា» បានធ្វើការវាយតម្លៃអំពីការគ្រប់គ្រងរដ្ឋបាល, ស្ថានភាពចរាចរណ៍, កម្ពស់សណ្ឋានដី, ការអភិវឌ្ឍដី, ចំនួនប្រជាជន, ស្ថានភាពធនធាន និងមូលដ្ឋានគ្រឹះនៃការអភិវឌ្ឍ ដើម្បីវិភាគទៅលើគោលដៅ, លក្ខខណ្ឌ និងសក្ដានុពលអភិវឌ្ឍន៍របស់ខេត្តនីមួយៗ។បន្ថែមពីលើនេះ, ផែនការមេនេះក៏មានការវិភាគលើសក្ដានុពលអភិវឌ្ឍឧស្សាហកម្មរបស់ខេត្តនីមួយៗ និងផ្តល់អនុសាសន៍លើការបំពេញឱ្យគ្នាទៅវិញទៅមក និងភាពប្រទាក់ក្រឡារវាងខេត្តទាំងបួន ព្រមទាំងគម្រោងយុទ្ធសាស្រ្ត សម្រាប់ខេត្តជាប់ឆ្នេរសមុទ្រកម្ពុជាផងដែរ៕

សម្ដេចតេជោ ហ៊ុន សែន ជំរុញឱ្យកម្ពុជា-ហុងគ្រីពង្រឹងកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគជាស្នូល

នៅព្រឹកថ្ងៃពុធ ទី៥ ខែកុម្ភៈ ឆ្នាំ២០២៥ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា បានអនុញ្ញាតឱ្យ លោកជំទាវ ម៉ាតា ម៉ាត្រៃ (Marta Matrai) អនុប្រធានទី១ រដ្ឋសភាហុងគ្រី និងគណៈប្រតិភូ ចូលជួបសម្តែងការគួរសម នៅវិមានព្រឹទ្ធសភា រាជធានីភ្នំពេញ។ ជាកិច្ចចាប់ផ្តើម សម្ដេចតេជោ ហ៊ុន សែន បានស្វាគមន៍យ៉ាងកក់ក្តៅចំពោះលោកជំទាវអនុប្រធានទី១ រដ្ឋសភាហុងគ្រី និងគណៈប្រតិភូទាំងអស់ រួមមានទាំងសមាជិករដ្ឋសភាមកពីគណបក្សប្រឆាំងនៅហុងគ្រី ដែលបានអញ្ជើញមកបំពេញទស្សនកិច្ចនៅកម្ពុជា។ សម្តេចតេជោ បានសម្តែងនូវក្តីរីករាយ និងវាយតម្លៃខ្ពស់ចំពោះការអញ្ជើញមកធ្វើទស្សនកិច្ចរបស់លោកជំទាវនាឱកាសនេះ ដែលវានឹងរួមចំណែកក្នុងការពង្រឹងទំនាក់ទំនងដ៏យូរអង្វែងបន្ថែមទៀតរវាងកម្ពុជា និងហុងគ្រី នៅខណៈដែលទំនាក់ទំនងការទូតរវាងប្រទេសទាំងពីរ នឹងឈានចូលដល់ខួប៧០ឆ្នាំ នៅឆ្នាំ២០២៦។ នាឱកាសជំនួបនេះ លោកជំទាវអនុប្រធានទី១ រដ្ឋសភាហុងគ្រី បានសម្តែងនូវគារវកិច្ច កិត្តិយស និងបានគោរពថ្លែងអំណរគុណយ៉ាងជ្រាលជ្រៅ ចំពោះសម្តេចតេជោ ដែលបានអនុញ្ញាតជូនលោកជំទាវ និងគណៈប្រតិភូរដ្ឋសភាហុងគ្រី ចូលជួបសម្តែងការគួរសម។ លោកជំទាវ ក៏បានពាំនាំនូវបណ្តាំផ្ញើសួរសុខទុក្ខរបស់ឯកឧត្តមប្រធានរដ្ឋសភាហុងគ្រី គោរពជូន សម្តេចតេជោ ផងដែរ។លោកជំទាវបានលើកឡើងថា ទំនាក់ទំនងរវាងកម្ពុជា និងហុងគ្រី គឺជាទំនាក់ទំនងដែលមានការគោរពគ្នាទៅវិញទៅមក ហើយកម្ពុជា គឺជាដៃគូលេចធ្លោរបស់ហុងគ្រីនៅក្នុងតំបន់។ រដ្ឋសភានៃប្រទេសទាំងពីរក៏បានបង្កើតក្រុមមិត្តភាពជាមួយគ្នា ហើយគណៈប្រតិភូរដ្ឋសភាហុងគ្រី ក៏បានមកចូលរួមសម័យប្រជុំពេញអង្គលើកទី១១ នៃសភាអន្តរជាតិ ដើម្បីភាពអត់ឱន និងសន្តិភាព (IPTP) ដែលកម្ពុជាបានធ្វើជាម្ចាស់ផ្ទះ កាលពីខែវិច្ឆិកា កន្លងទៅនេះ។ នៅក្នុងបរិបទនេះ លោកជំទាវ បានគូសបញ្ជាក់អំពីសារៈសំខាន់នៃវិស័យការទូតសភា ដែលនឹងរួមចំណែកនៅក្នុងការលើកកម្ពស់ទំនាក់ទំនងរវាងប្រទេសទាំងពីរ។ លោកជំទាវបានសម្តែងនូវក្តីជឿជាក់ថា តាមរយៈកិច្ចសហប្រតិបត្តិការក្រោមក្របខណ្ឌពហុភាគីនានាផ្សេងទៀត ដូចជារវាងអាស៊ាន និងសហភាពអឺរ៉ុប និងកិច្ចសហប្រតិបត្តិការអាស៊ី-អឺរ៉ុប (ASEM) ទំនាក់ទំនងកម្ពុជា និងហុងគ្រី កាន់តែមានភាពល្អប្រសើរឡើង។បន្ថែមពីនេះ លោកជំទាវបានលើកឡើងអំពីការពង្រឹងកិច្ចសហប្រតិបត្តិការរវាងកម្ពុជា និងហុងគ្រី ដោយនៅក្នុងនោះភាគីទាំងពីរបានរៀបចំកិច្ចប្រជុំគណៈកម្មការចម្រុះស្តីពីកិច្ចសហប្រតិបត្តិការលើវិស័យសេដ្ឋកិច្ចរវាងកម្ពុជា និងហុងគ្រី នៅទីក្រុងប៊ុយដាប៉េស នៅឆ្នាំ២០២៤ ដោយផ្តោតទៅលើវិស័យគ្រប់គ្រងធនធានទឹក កសិកម្ម និងការផ្តល់គម្រោងឥណទាននានា ដូចជានៅក្នុងវិស័យសន្តិសុខស្បៀងជាដើម។ លោកជំទាវក៏បានរំលេចផងដែរថា ហុងគ្រីបានផ្តល់អាហារូបករណ៍ប្រចាំឆ្នាំប្រមាណ៣០កន្លែង ប៉ុន្តែពុំបានប្រើប្រាស់ឱ្យបានអស់សក្តានុពលនោះទេ។ នៅក្នុងន័យនេះលោកជំទាវ លើកទឹកចិត្តជំរុញឱ្យនិស្សិតកម្ពុជាចូលរួមដាក់ពាក្យយកអាហារូបករណ៍នេះ ដើម្បីជាផ្នែកមួយនៃស្ពានតភ្ជាប់ទំនាក់ទំនងរវាងប្រទេសទាំងពីរ ក៏ដូចជារវាងប្រជាជននិងប្រជាជន។ នៅក្នុងវិស័យសេដ្ឋកិច្ចពាណិជ្ជកម្ម លោកជំទាវបានសម្តែងនូវក្តីសង្ឃឹមថា ភាគីនៃប្រទេសទាំងពីរនឹងខិតខំជំរុញកិច្ចសហប្រតិបត្តិការរវាងគ្នា ជាពិសេសការជំរុញទំហំពាណិជ្ជកម្ម ឱ្យសមទៅនឹងសក្តានុពលដែលប្រទេសទាំងពីរមាន។នៅក្នុងក្របខណ្ឌអង្គការសហប្រជាជាតិវិញ លោកជំទាវបានគូសបញ្ជាក់ថា រដ្ឋាភិបាលហុងគ្រីទទួលស្គាល់នូវកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការអភិវឌ្ឍ និងលើកកម្ពស់សិទ្ធិមនុស្ស និងបានចាត់ទុកកម្ពុជាជាប្រទេសគំរូមួយ។ ម្យ៉ាងទៀត ការអនុម័តធម្មនុញ្ញសន្តិភាពសកលសម្រាប់មនុស្សជាតិ និងភពផែនដី នៅក្នុងកិច្ចប្រជុំ IPTP នៅកម្ពុជា ក៏បានបង្ហាញអំពីគោលគំនិតដូចគ្នារវាងកម្ពុជា និងហុងគ្រីផងដែរ។ជាការឆ្លើយតប សម្តេចតេជោ បានថ្លែងអំណរគុណលោកជំទាវ ចំពោះការពាំនាំនូវបណ្តាំផ្ញើសួរសុខទុក្ខរបស់ឯកឧត្តមប្រធានរដ្ឋសភាហុងគ្រី និងលើកឡើងអំពីវឌ្ឍនភាពនៃទំនាក់ទំនង និងកិច្ចសហប្រតិបត្តិការល្អរវាងប្រទេសយើងទាំងពីរ ជាពិសេស ពាក្យពេចន៍ដ៏ល្អប្រពៃរបស់លោកជំទាវ ក្នុងការពង្រឹងទំនាក់ទំនងរវាងប្រទេសទាំងពីរ។ សម្តេចបានគូសបញ្ជាក់ដោយក្តីរីករាយថា វត្តមានរបស់គណៈប្រតិភូមកពីគណបក្សប្រឆាំងនៅប្រទេសហុងគ្រីនាពេលនេះ បង្ហាញឱ្យឃើញច្បាស់អំពីកុងសង់ស៊ីសរបស់ប្រទេសហុងគ្រីលើទំនាក់ទំនងជាមួយកម្ពុជា ទោះបីជាប្រវត្តិនៃទំនាក់ទំនងនេះបានឆ្លងកាត់ដំណាក់កាល និងរបបខុសៗគ្នាអស់រយៈពេល៦៩ឆ្នាំក៏ដោយ។ សម្តេចបានបន្ថែមថា កម្ពុជាមិនដែលបំភ្លេចនូវការគាំទ្រនិងជំនួយឧបត្ថម្ភនានា ដែលហុងគ្រី បានផ្តល់ដល់កម្ពុជា នៅក្នុងដំណើរស្តារនិងអភិវឌ្ឍន៍ប្រទេសជាតិនៅក្នុងដំណាក់កាលទាំងនោះឡើយ។ សម្តេច បានរំលឹកអំពីប្រវត្តិនៃដំណើរទស្សនកិច្ចជាញឹកញ៉ាប់របស់ សម្តេច ទៅហុងគ្រី ចាប់តាំងពីពេលសម្តេច ជាឧបនាយករដ្ឋមន្ត្រី រដ្ឋមន្រ្តីការបរទេស ក្រោយថ្ងៃរំដោះ ៧ មករា ១៩៧៩។ សម្តេចបានចង្អុលបង្ហាញថា ទោះបីស្ថានភាពកម្ពុជាមានការផ្លាស់ប្តូរ ដូចជាការផ្ទេរអំណាចរបស់សម្តេច ជូនអ្នកដឹកនាំបន្តវេនរាជរដ្ឋាភិបាលថ្ម៏ក៏ដោយ ក៏ទំនាក់ទំនងកម្ពុជា និងហុងគ្រី មិនផ្លាស់ប្តូរដែរ។ ដើម្បីលើកកម្ពស់កិច្ចសហប្រតិបត្តិការទ្វេភាគី សម្តេចបានលើកឡើងជាអនុសាសន៍ឱ្យភាគីទាំងពីរពង្រឹងកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគជាស្នូល ដោយភាគីទាំងពីរអាចស្វែងរកចំណុចកិច្ចសហប្រតិបត្តិការណា ដែលភាគីទាំងពីរអាចសម្រេចបាន ដើម្បីជំរុញទំហំពាណិជ្ជកម្មរវាងប្រទេសទាំងពីរឱ្យកាន់តែប្រសើរឡើងតាមសក្តានុពលដែលមាន។ ទោះយ៉ាងនេះក្តី សម្តេចបានលើកបន្ថែមថា ភាគីទាំងពីរក៏ត្រូវបន្តកិច្ចសហប្រតិបត្តិការលើវិស័យផ្សេងៗ ផងដែរ ដូចជា វិស័យវប្បធម៌ និងជាពិសេស អប់រំ។ នៅក្នុងបរិបទនេះ សម្តេចបានអំពាវនាវឱ្យភាគីហុងគ្រី បន្តជួយគាំទ្រការបណ្តុះបណ្តាល និងអភិវឌ្ឍធនធានមនុស្ស ដែលជាអាទិភាពរបស់រាជរដ្ឋាភិបាលកម្ពុជា បានផ្តោតការយកចិត្តទុកដាក់ តាំងពីពេល សម្តេច ជាប្រមុខរាជរដ្ឋាភិបាល។នៅក្នុងក្របខណ្ឌនីតិប្បញ្ញត្តិ សម្តេចតេជោ បានជម្រាបជូនលោកជំទាវអំពីការផ្តោតអាទិភាពរបស់ព្រឹទ្ធសភាកម្ពុជា ទៅលើវិស័យចំនួន២ ដែលនោះគឺ ការលើកកម្ពស់ការទូតសភា ដើម្បីរួមចំណែកជាមួយរាជរដ្ឋាភិបាលលើកិច្ចការការបរទេស នៅក្នុងបរិបទដែលស្ថានភាពភូមិសាស្រ្តនយោបាយតំបន់និងពិភពលោកមានភាពតានតឹង និងស្មុគស្មាញ និងការធ្វើគណនេយ្យភាពចំពោះអង្គបោះឆ្នោត ដើម្បីសមាជិកព្រឹទ្ធសភាសហការជាមួយអង្គបោះឆ្នោត ផ្សារភ្ជាប់ និងជួយដោះស្រាយបញ្ហារបស់ប្រជាពលរដ្ឋ។ ក្នុងស្មារតីលើកកម្ពស់ការទូតសភា សម្តេច បានសម្តែងនូវបំណងប្រាថ្នាឱ្យមានការបង្កើតក្រុមមិត្តភាពរវាងព្រឹទ្ធសភាកម្ពុជា និងរដ្ឋសភាហុងគ្រីផងដែរ។ ចំពោះបញ្ហាសិទ្ធិមនុស្ស សម្តេចបានថ្លែងអំណរគុណហុងគ្រីដែលបានគ្រាំទ្រធម្មនុញ្ញសន្តិភាពសកលសម្រាប់មនុស្សជាតិ និងភពផែនដី ហើយសម្តេចបានគូសបញ្ជាក់ថា តើយើងអាចនិយាយពីបញ្ហាសិទ្ធិមនុស្ស និងប្រជាធិបតេយ្យបានដែរឬទេ នៅពេលប្រទេសមានសង្គ្រាម ដែលសិទ្ធិរស់រានមានជីវិតក៏គ្មានដែរ ដូចស្តែងឱ្យឃើញនៅបណ្តាប្រទេសមួយចំនួន នៅក្នុងតំបន់នានា រួមទាំងអឺរ៉ុបផងដែរ។ក្រៅពីនេះ សម្តេចតេជោ បានពិភាក្សានិងផ្លាស់ប្តូរយោបល់អំពីស្ថានភាពនិងបញ្ហាតំបន់ និងអន្តរជាតិ និងគោលនយោបាយរបស់ប្រទេសមហាអំណាចផងដែរ។ជាចុងក្រោយនៃជំនួប សម្តេចតេជោ បានផ្តាំផ្ញើនូវការសួរសុខទុក្ខ តាមរយៈលោកជំទាវអនុប្រធានទី១ រដ្ឋសភាហុងគ្រី ជូនចំពោះឯកឧត្តមប្រធានរដ្ឋសភា ប្រធានាធិបតី និងនាយករដ្ឋមន្រ្តីហុងគ្រី ផងដែរ។ សម្តេចតេជោ បានជូនពរលោកជំទាវ Marta Martrai និងគណៈប្រតិភូ ទទួលបានជោគជ័យក្នុងដំណើរទស្សនកិច្ចការងារនៅកម្ពុជា៕

ប្រជាកសិករក្នុងខេត្តកំពង់ឆ្នាំង ថ្លែងអំណរគុណរាជរដ្ឋាភិបាល ដែលបានជួយស្វះស្វែងត្រៀមទឹកសម្រាប់ស្រោចស្រពស្រូវប្រាំងពួកគាត់នាពេលខាងមុខ

កំពង់ឆ្នាំង៖ ប្រជាកសិករក្នុងខេត្តកំពង់ឆ្នាំង នៅថ្ងៃទី០៥ ខែកុម្ភៈ ឆ្នាំ២០២៥នេះ បានថ្លែងអំណរគុណដល់រាជរដ្ឋាភិបាលសម្តេចធិបតី ហ៊ុន ម៉ាណែត នាយករដ្ឋមន្ត្រី ដែលបានអោយក្រុមការងារថ្នាក់ជាតិ ថ្នាក់ក្រោមជាតិ អាជ្ញាធរខេត្ត ស្រុក ឃុំ ចុះជួយប្រជាកសិករគ្រប់ទីកន្លែង ដោយបានរកប្រភពទឹក និងបានដាក់គ្រឿងចក្រជីកស្តារប្រឡាយ ត្រៀមដាក់ម៉ាស៊ីនបូមទឹកបង្ហូរទឹកស្រោចស្រព មិនអោយខ្វះខាតទឹកដូចឆ្នាំកន្លងទៅឡើយ។ ប្រជាកសិករក្នុងខេត្តកំពង់ឆ្នាំងបានអោយដឹងថា៖ ពួកគាត់សូមថ្លែងអំណរគុណដល់ប្រមុខរាជរដ្ឋាភិបាលសម្តេចធិបតី ហ៊ុន ម៉ាណែត នាយករដ្ឋមន្ត្រី ក្រុមការងារថ្នាក់កណ្តាលចុះជួយខេត្តកំពង់ឆ្នាំង មានសម្តេចមហាមន្ត្រី គុយ សុផល អនុប្រធានក្រុមការងារថ្នាក់កណ្តាលចុះមូលដ្ឋានខេត្តកំពង់ឆ្នាំង ឯកឧត្តមបណ្ឌិតសភាចារ្យ អ៊ុក រ៉ាប៊ុន ប្រធានក្រុមការងារថ្នាក់កណ្តាលចុះមូលដ្ឋានខេត្តកំពង់ឆ្នាំង និងក្រុមការងារថ្នាក់ជាតិ ក្រោមជាតិទាំងអស់ អរគុណដល់ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង ប្រធានមន្ទីរកសិកម្ម និងធនធានទឹក ដែលបានយកចិត្តទុកដាក់ចំពោះសុខទុក្ខប្រជាកសិករនៅក្នុងខេត្តកំពអ់ឆ្នាំង ដោយបានចុះជួបប្រជាកសិករគ្រប់ទីកន្លែង ទោះមានផលប៉ះពាល់ ឬមិនមានផលប៉ះពាល់ពីបញ្ហាទឹកក៏ដោយ តែក្រុមការងារបានចុះទៅដល់ទីតាំងស្រែប្រាំងប្រជាកសិករ និងបានពិនិត្យមើលប្រភពទឹក និងគុណភាពស្រូវ ត្រៀមទឹកសម្រាប់ជួយស្រោចស្រពពេលប្រជាកសិករខ្វះខាតទឹកនាពេលខាងមុខ។ លោក ងិន ហ៊ុន ប្រធានមន្ទីរកសិកម្មខេត្តកំពង់ឆ្នាំង បានអោយដឹងថា៖ ក្រុមការងារថ្នាក់ជាតិ ក្រោមជាតិក្រុមការងារក្រសួង និងមន្ទីរធនធានទឹក រួមនិងក្រសួងមន្ទីរកសិកម្ម បានចុះពិនិត្យស្រែស្រូវប្រជាកសិករ ដើម្បីត្រៀមជួយដោយក្នុងនោះត្រៀមស្តាប្រឡាយនៅក្នុងស្រុកបរិបូណ៌ចំនួន៣ខ្សែ ត្រៀមម៉ាស៊ីនបូមទឹក ត្រៀមប្រភពទឹក នឹងជួយដល់ប្រជាកសិករភ្លាមៗនៅពេលស្រូវប្រាំងឆ្នាំនេះខ្វះទឹកស្រោចស្រព។ ស្រូវប្រាំងដែលបានធ្វើក្នុងខេត្តកំពង់ឆ្នាំងឆ្នាំ២០២៥នេះ មានប្រមាណជិត៦ម៉ឺនហិកតា ដែលក្នុងចំណោមស្រូវទាំងជិត៦ម៉ឺនហិកតានេះ មិនទាន់មានកន្លែងណាមួយប្រឈមនឹងការខ្វះខាតទឹកស្រោចស្រពនៅឡើយទេ ដោយប្រជាកសិករបាន និងកំពុងប្រើប្រាស់ម៉ាស៊ីនផ្ទាល់ខ្លួនបូមទឹកយកមកស្រោចស្រព ចំណែកផលស្រូវឆ្នាំនេះល្អជាងឆ្នាំទៅ និងអាចទទួលផលបានចាប់ពី៦តោនឡើងទៅក្នុង១ហិកតា ៕ កាំង ហុងវាស្នា

ឯកឧត្តម វង្សី វិស្សុត ជួបពិភាក្សាការងារជាមួយឯកឧត្តម Hayashi Yoshimasa រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រីជប៉ុន

នារសៀលថ្ងៃទី៤ ខែកុម្ភៈ ឆ្នាំ២០២៥ ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី បានដឹកនាំគណៈប្រតិភូនៃទីស្តីការគណៈរដ្ឋមន្ត្រីជួបពិភាក្សាការងារជាមួយឯកឧត្តម Hayashi Yoshimasa រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រីជប៉ុន នៅទីស្តីការគណៈរដ្ឋមន្ត្រីជប៉ុន។ ជាកិច្ចចាប់ផ្តើម ឯកឧត្តម Hayashi Yoshimasa បានសម្តែងនូវការស្វាគមន៍យ៉ាងកក់ក្តៅចំពោះ ឯកឧត្ដម វង្សី វិស្សុត និងគណៈប្រតិភូនៃទីស្តីការគណៈរដ្ឋមន្ត្រី ដែលបានអញ្ជើញមកធ្វើទស្សនកិច្ចនៅប្រទេសជប៉ុន ព្រមទាំងបានបង្ហាញនូវការវាយតម្លៃខ្ពស់ចំពោះរាជរដ្ឋាភិបាលកម្ពុជា នីតិកាលទី៧នៃរដ្ឋសភាក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលបានបន្តខិតខំប្រឹងប្រែងយ៉ាងសកម្មប្រកបដោយភាពស្វាហាប់ ក្នុងការអនុវត្តយុទ្ធសាស្ត្រអភិវឌ្ឍជាតិ និងកិច្ចការកែទម្រង់សំខាន់ៗ ជាពិសេស ការពង្រឹងកិច្ចសហប្រតិបត្តិការរវាងកម្ពុជា ជប៉ុនលើគ្រប់វិស័យដើម្បីជំរុញការអភិវឌ្ឍសង្គម សេដ្ឋកិច្ចកម្ពុជាប្រកបដោយបរិយាបន្ន និងចីរភាព។ ជាការឆ្លើយតប ឯកឧត្តម វង្សី វិស្សុត បានថ្លែងអំណរគុណចំពោះរដ្ឋាភិបាលជប៉ុន ចំពោះការរៀបចំឱ្យមានដំណើរទស្សនកិច្ចនេះឡើង ជូនដល់គណៈប្រតិភូនៃទីស្ដីការគណៈរដ្ឋមន្ត្រី។ ទន្ទឹមនេះ ឯកឧត្តម វង្សី វិស្សុត បានពាំនាំនូវការផ្តាំផ្ញើសួរសុខទុក្ខពីសំណាក់ សម្តេចធិបតី ជូនដល់ ឯកឧត្តម Shigeru Ishiba នាយករដ្ឋមន្ត្រីជប៉ុនតាមរយៈ ឯកឧត្តម Hayashi Yoshimasa។ ក្នុងកិច្ចពិភាក្សាដ៏សំខាន់នោះផងដែរ ឯកឧត្តម វង្សី វិស្សុត បានសង្កត់ធ្ងន់ថា រាជរដ្ឋាភិបាលនីតិកាលទី៧ បាននិងកំពុងផ្ដល់ការយកចិត្តទុកដាក់ខ្ពស់ ក្នុងការពង្រឹងនិងពង្រីកទំនាក់ទំនងនិងភាពជាដៃគូល្អជាមួយគ្រប់បណ្ដាប្រទេស ជាពិសេស ការបន្តជំរុញកិច្ចសហប្រតិបត្តិការលើគ្រប់វិស័យអោយកាន់តែស្អិតរមួតរវាងបណ្ដាប្រទេសជាមិត្ត។ ឯកឧត្តម វង្សី វិស្សុត បានមានប្រសាសន៍ថា ជប៉ុនជាមិត្តដ៏ល្អរបស់កម្ពុជា ដែលមានកិច្ចសហប្រតិបត្តិការរឹងមាំ ហើយព្រមទាំងរំលឹកឡើងថា ជប៉ុនបានដើរតួនាទីយ៉ាងសំខាន់ក្នុងការជួយកសាង និងស្ដារនីតិសម្បទាកម្ពុជា តាំងពីដំណាក់កាលដំបូងនៃការកសាងសន្តិភាព រហូតមកដល់ដំណាក់កាលបច្ចុប្បន្ននៃការអភិវឌ្ឍកម្ពុជា។ ជាក់ស្ដែង កិច្ចសហប្រតិបត្តិការកម្ពុជា ជប៉ុន ក្នុងរយៈពេលជិត ៤ ទសវត្សរ៍មកនេះ បានរួមចំណែកយ៉ាងសំខាន់ក្នុងការកសាងមូលដ្ឋានគ្រឹះនៃការអភិវឌ្ឍសង្គម-សេដ្ឋកិច្ចកម្ពុជា ជាពិសេស ក្រោមក្របខ័ណ្ឌនៃជំនួយអភិវឌ្ឍន៍របស់រាជរដ្ឋាភិបាលជប៉ុន ដែលបាននាំមកនូវភាពជោគជ័យ ក្នុងការអភិវឌ្ឍនៃវិស័យសំខាន់ៗរបស់កម្ពុជា ជាអាទិ៍ វិស័យហេដ្ឋារចនាសម្ព័ន្ធតភ្ជាប់, វិស័យអប់រំ វិស័យសុខាភិបាល វិស័យភស្តុភារកម្ម វិស័យសេដ្ឋកិច្ច វិនិយោគ និងពាណិជកម្ម។ល។ ជាពិសេស សមិទ្ធផលដែលលេចធ្លោសំខាន់ៗ រូមមាន គម្រោងប្រព័ន្ធផ្គត់ផ្គង់ទឹកស្អាតនៅរាជធានីភ្នំពេញ និងខេត្តសៀមរាប, ស្ពានត្សឹបាសា (ស្ពានអ្នកលឿង) និងការចែករំលែកបទពិសោធរបស់កម្ពុជា និងជប៉ុនលើវិស័យបោសសម្អាតមីននិងយុទ្ធភណ្ឌមិនទាន់ផ្ទុះ ក្នុងបុព្វហេតុមនុស្សធម៌និងសន្តិភាពទាំងកម្រិតតំបន់និងពិភពលោក។ ជាទិសដៅទៅមុខ ក្នុងការបន្តគាំទ្រការអភិវឌ្ឍកម្ពុជាប្រកបដោយផ្លែផ្កា ឯកឧត្តម Hayashi Yoshimasa បានបញ្ជាក់អំពីជំហរបស់រដ្ឋាភិបាលជប៉ុននិងលើកឡើងពីការប្ដេជ្ញាចិត្តរបស់រដ្ឋាភិបាលជប៉ុនក្នុងការបន្តពង្រឹង និងពង្រីកកិច្ចសហប្រតិបត្តិការជាមួយរាជដ្ឋាភិបាលកម្ពុជា តាមរយៈការត្រៀមខ្លួនជាស្រេចក្នុងការលើកស្ទួយកិច្ចសហប្រតិបត្តិការលើវិស័យអាទិភាព ជាពិសេស ការអនុវត្តការដ្ឋានការងារក្នុងការអភិវឌ្ឍហេដ្ឋារចនាសម្ព័ន្ធ អភិបាលកិច្ច ច្បាប់ ទូរគមនាគមន៍និងឌីជីថល និងការអភិវឌ្ឍប្រព័ន្ធសេវា ៥G នៅកម្ពុជា ព្រមទាំងបានលើកទឹកចិត្តឱ្យមានការបន្តពង្រឹងយន្តការភាពជាដៃគូរវាងរដ្ឋនិងឯកជន (PPP) និងលើកទឹកចិត្តវិនិយោគិនជប៉ុនឱ្យមកវិនិយោគនៅកម្ពុជាបន្ថែមទៀត ដើម្បីពង្រឹងមូលដ្ឋាននៃការកសាងសង្គម សេដ្ឋកិច្ចកម្ពុជា។ក្នុងជំនួបនេះផងដែរ ឯកឧត្តម វង្សី វិស្សុត និងឯកឧត្តម Hayashi Yoshimasa បានបញ្ជាក់ថា ក្នុងបរិការណ៍បច្ចុប្បន្ន ដែលពិភពលោកកំពុងប្រឈមនឹងភាពមិនប្រាកដប្រជាខ្ពស់ និងផ្លាស់ប្ដូរយ៉ាងរហ័សដែលមិនអាចប៉ាន់ប្រមាណបាន រាជរដ្ឋាភិបាលកម្ពុជា និងជប៉ុននឹងរួមគ្នាបន្តប្រកាន់ខ្ជាប់នូវគោលនយោបាយលើកកម្ពស់សន្តិភាពលើកកម្ពស់ពហុភាគីនិយម ការពង្រឹងកិច្ចសហប្រតិបត្តការអន្តរជាតិ និងជាពិសេសការលើកកម្ពស់សណ្ដាប់ធ្នាប់អន្តរជាតិ ដែលផ្អែកលើច្បាប់ ក្នុងការជំរុញកិច្ចសហប្រតិបត្តិការជាមួយបណ្ដាប្រទេសក្នុងតំបន់និងសកល ទាំងក្នុងទិដ្ឋភាពនយោបាយ សន្តិសុខ សេដ្ឋកិច្ច ហិរញវត្ថុ និងសង្គម។ ជារួម កម្ពុជា និងជប៉ុនមានគុណតម្លៃនិងទស្សនវិស័យរួម ក្នុងការរួមចំណែកលើកកម្ពស់ស្ថិរភាព និងសន្តិភាពតំបន់សកលសម្រាប់ការបន្តជំរុញកិច្ចអភិវឌ្ឍប្រកបដោយនិរន្តរភាព៕

ការធ្វើបទអន្តរាគមន៍ចំនួន៣ ក្រោមប្រធានបទទី១ “ការកែទម្រង់ និងការពង្រឹងអភិបាលកិច្ច” នៅក្នុងសន្និបាតបូកសរុបលទ្ធផលការងារ ៥ឆ្នាំ របស់ក្រសួងប្រៃសណីយ៍និងទូរគមនាគមន៍

នាព្រឹកថ្ងៃទី៥ ខែកុម្ភៈ ឆ្នាំ២០២៥ បន្ទាប់ពីពិធីបើកសន្និបាតក្រសួងប្រៃសណីយ៍និងទូរគមនាគមន៍ (ក.ប.ទ.) អង្គសន្និបាតបានរៀបចំវេទិកាពិភាក្សាលើប្រធានបទទី១ ស្តីពី “ការកែទម្រង់ និងការពង្រឹងអភិបាលកិច្ច” ដែលវេទិកានេះ សម្របសម្រួលដោយ ឯកឧត្តម ជាប សត្ថារតន៍ រដ្ឋលេខាធិការប្រចាំការ ក.ប.ទ. ដោយក្នុងនោះមានបទអន្តរាគមន៍ចំនួន ៣ ត្រូវបានលើកយកមកពិភាក្សារួមគ្នា ដូចខាងក្រោម៖- បទអន្តរាគមន៍ទី១ “ប្រសិទ្ធភាពនៃការអនុវត្តមុខងារភារកិច្ច និងការធ្វើទំនើបកម្មកិច្ចការផ្ទៃក្នុងរបស់ ក.ប.ទ.” ដោយ ឯកឧត្តម ម៉ុក រ៉ាឌី អគ្គនាយកនៃអគ្គនាយករដ្ឋបាល ក.ប.ទ.- បទអន្តរាគមន៍ទី២ ស្ដីពី “ការពង្រឹងមុខងារអធិការកិច្ចរបស់ ក.ប.ទ. ដោយ ឯកឧត្តម ង៉ាន់ ដានី អគ្គាធិការនៃអគ្គាធិការដ្ឋាន ក.ប.ទ. និង- បទអន្តរាគមន៍ទី៣ ស្ដីពី “ការពង្រឹងមុខងារសវនកម្មផ្ទៃក្នុងរបស់ ក.ប.ទ.” ដោយលោក ឃុន សុផល ប្រធាននាយកដ្ឋានសវនកម្មផ្ទៃក្នុង ក.ប.ទ.។ជារួម បទអន្តរាគមន៍ទាំង៣ ខាងលើនេះ រំលេចអំពីសមិទ្ធផលសំខាន់ៗដែល ក.ប.ទ. សម្រេចបាន ក្នុងរយៈពេល ៥ ឆ្នាំ លើការកែទម្រង់ និងការពង្រឹងអភិបាលកិច្ច ឱ្យស្របតាមគោលការណ៍ លើកទឹកចិត្តនិងលើកកម្ពស់សុខុមាលភាពមន្រ្តី ដែលក្នុងនោះមានដូចជា (១)ការងារកែទម្រង់ការគ្រប់គ្រងរដ្ឋបាល (២)ការងារកែទម្រង់ហិរញ្ញវត្ថុ (៣)ការងារកែទម្រង់ការគ្រប់គ្រងនិងអភិវឌ្ឍធនធានមនុស្ស (៤)ការងារនីតិកម្ម និងកិច្ចសហប្រតិបត្តិការអន្ដរជាតិ (៥) ការងារកែទម្រង់អង្គភាព និង(៦)ការងារអធិការកិច្ច និងសវនកម្មផ្ទៃក្នុង។គូសបញ្ជាក់ថា ការងារកែទម្រង់ គឺជាបុរេលក្ខខណ្ឌដ៏មានសារៈសំខាន់សម្រាប់ជំរុញឱ្យមានការផ្លាស់ប្តូរជាវិជ្ជមានដើម្បីឈានឆ្ពោះទៅរកការលើកកម្ពស់ប្រសិទ្ធភាពនិងផលិតភាពការងារ។ ក.ប.ទ. បានកំណត់យកការកែលម្អនិងការពង្រឹងគុណភាព នៃកិច្ចការរដ្ឋបាល ហិរញ្ញវត្ថុ ការគ្រប់គ្រងនិងការអភិវឌ្ឍសមត្ថភាពធនធានមនុស្ស នីតិកម្ម កិច្ចសហប្រតិបត្តិការអន្តរជាតិ និងការកែទម្រង់អង្គភាព ជាមួយនឹងការពង្រឹងកិច្ចការអធិការកិច្ច និងសវនកម្មផ្ទៃក្នុង គឺជាស្នូលនៃបេសកកម្មការងាររបស់ខ្លួន ដែលត្រូវយកចិត្តទុកដាក់អនុវត្តឱ្យបានជោគជ័យ ដើម្បីបង្កើតបានជាមូលដ្ឋានគ្រឹះសម្រាប់គាំទ្រដល់ការងារនៃវិស័យក្រោមការទទួលខុសត្រូវរបស់ ក.ប.ទ.៕

រដ្ឋាភិបាលកម្ពុជាអំពាវនាវកម្មករនិយោជិតយកចិត្តទុកដាក់ថែទាំសុខភាព ដើម្បីបង្កើនប្រសិទ្ធិភាពការងារ

ក្រសួងការងារ និងបណ្តុះបណ្តាលវិជ្ជាជីវៈ សហការជាមួយក្រសួងសុខាភិបាល បានប្រកាសបើកយុទ្ធនាការផ្សព្វផ្សាយដើម្បីទប់ស្កាត់ជំងឺមិនឆ្លងជូនដល់កម្មករនិយោជិតនៅតាមសហគ្រាស គ្រឹះស្ថាន ដើម្បីចូលរួមចំណែកក្នុងបេសកម្មរបស់រាជរដ្ឋាភិបាលក្នុងការទប់ស្កាត់ជំងឺមិនឆ្លង និងធានាឲ្យបាននូវសុខុមាលភាពរបស់កម្មករនិយោជិត។នៅក្នុងកម្មវិធីនាព្រឹកថ្ងៃទី៥ កុម្ភៈ ឆ្នាំ២០២៥នេះ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា យុទ្ធនាការនេះ ក៏នឹងរួមចំណែកក្នុងការអនុវត្តសកម្មភាពដែលមានកំណត់នៅក្នុងផែនការយុទ្ធសាស្រ្តជាតិសម្រាប់ការពារ និងប្រយុទ្ធនឹងជំងឺមិនឆ្លងឆ្នាំ២០២២-២០៣០ និងការអនុវត្តផែនការយុទ្ធសាស្រ្តអភិវឌ្ឍន៍វិស័យការងារសន្តិសុខសង្គម និងបណ្តុះបណ្តាលវិជ្ជាជីវៈឆ្នាំ២០២៤-២០២៨ ក្នុងការលើកកម្ពស់លក្ខខណ្ឌសុវត្ថិផាព និងសុខភាពការងាររបស់កម្មករនិយោជិតនៅកន្លែងធ្វើការ។ ជាមួយនេះ ឯកឧត្តមរដ្ឋមន្រ្តី ក៏បានណែនាំដល់នាយកដ្ឋានពេទ្យការងារ ត្រូវបន្តជំរុញការផ្សព្វផ្សាយស្តីពីការបង្ការនិងប្រយុទ្ធនឹងជំងឺមិនឆ្លង និងជំងឺរាតត្បាតនានា នៅតាមសហគ្រាស គ្រឹះស្ថាន ដោយសហការជាមួយក្រសួង ស្ថាប័ន និងដៃគូពាក់ព័ន្ធនានា និងបន្តសហការជាមួយក្រសួងសុខាភិបាល ក្នុងការរៀបចំបោះពុម្ពខិតប័ណ្ណអប់រំ និងបិតផ្ទាំងផ្សព្វផ្សាយពាក់ព័ន្ធបញ្ហាសុខភាពនេះកាន់តែទូលំទូលាយបន្ថែមទៀត ដើម្បីលើកកម្ពស់ការយល់ដឹងទៅដល់កម្មករនិយោជិត។ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានមានប្រសាសន៍បញ្ជាក់ថា ពីដើមជំងឺមិនឆ្លងបណ្តាលឲ្យមានមនុស្សស្លាប់តិចជាងពាក់កណ្តាល តិចជាង ៥០% ប៉ុន្តែយោងតាមស្ថិតិស្រាវជ្រាវបច្ចុប្បន្ននេះ ជំងឺមិនឆ្លងស្លាប់រហូតដល់ ៦០% នៃការស្លាប់ជំងឺទូទៅច្រើនជាង ហើយកាន់តែវិវឌ្ឍច្រើនទៅៗ។ ឯកឧត្តម បានបន្តថា បើនៅក្នុងប្រទេសខ្លះ អត្រាស្លាប់កាន់តែច្រើនថែមទៅទៀតនិយាយជារួម ស្លាប់ច្រើនស្លាប់នឹងរឿងចំនួន៤ធំ មានដូចជា ជំងឺបេះដូង មហារីក ផ្លូវដង្ហើមរំារៃ និងទឹកនោមផ្អែម។សូមជំរាបជូនថា ពិធីបើកយុទ្ធនាការផ្សព្វផ្សាយ ដើម្បីទប់ស្កាត់ជំងឺមិនឆ្លងជូនដល់បងប្អូនកម្មករនិយោជិត នៅតាមសហគ្រាស គ្រឹះស្ថាន បានរៀបចំធ្វើឡើងនៅក្នុងឃុំបែកចាន ស្រុកអង្គស្នួល ខេត្តកណ្តាល ដោយមានការអញ្ជើញចូលរួមពី ឯកឧត្តម គួច ចំរើន អភិបាលនៃគណៈអភិបាលខេត្តកណ្តាល ថ្នាក់ដឹកនាំនៃក្រសួងសុខាភិបាល, ក្រសួងការងារ និងបណ្តុះបណ្តាលវិជ្ជាជីវៈ , អាជ្ញាធរមូលដ្ឋានខេត្ត, មន្ទីរជុំវិញខេត្ត, អង្គការដៃគូ, តំណាងសមាគមនិយោជក, តំណាងសហជីព និងកម្មករនិយោជិតសរុបចំនួនប្រមាណជាង ៤ពាន់នាក់។ យុទ្ធនាការនេះ រៀបចំឡើងក្នុងគោលបំណងដើម្បីរួមចំណែកក្នុងការទប់ស្កាត់ជំងឺមិនឆ្លង បង្កើនការយល់ដឹង សកម្មភាពអប់រំសុខភាព ធានាឱ្យនូវសុខុមាលភាពរបស់កម្មករ និយោជិត និងសាធារណជន អំពីកត្តាហានិភ័យ នៃជំងឺមិនឆ្លង ដើម្បីជំរុញការផ្លាស់ប្តូរ ឥរិយាបថរស់បុគ្គលផ្ទាល់ គ្រួសារ សហគមន៍ នៅប្រកបដោយសុខភាព និងសុខុមាលភាព៕ អត្ថបទ៖ ឈិត បូរ៉ាវី

សម្ដេចធិបតី នាយករដ្ឋមន្រ្ដី៖ ការជំរុញកំណើនសេដ្ឋកិច្ច និងបង្កើតការងារជូនប្រជាពលរដ្ឋជាអាទិភាពចម្បងរបស់រាជរដ្ឋាភិបាល

ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃព្រះរាជាណាចក្រកម្ពុជា មានប្រសាសន៍បញ្ជាក់ថា ការជំរុញកំណើនសេដ្ឋកិច្ច និងបង្កើតការងារជូនប្រជាពលរដ្ឋជាអាទិភាពចម្បងរបស់រាជរដ្ឋាភិបាល។ សម្ដេចធិបតី នាយករដ្ឋមន្រ្ដី មានប្រសាសន៍បញ្ជាក់បែបនេះ បន្ទាប់ពីបាន អញ្ជើញពិនិត្យខ្សែច្រវាក់ផលិតកម្មរោងចក្រម៉ូតូក្រុមហ៊ុន អិន ស៊ី អិច (NCX) ស្ថិតនៅសង្កាត់ចោមចៅ ខណ្ឌពោធិ៍សែនជ័យ រាជធានី ភ្នំពេញ នៅព្រឹកថ្ងៃទី៥ ខែកុម្ភៈ ឆ្នាំ២០២៥នេះ។សម្ដេចធិបតី មានប្រសាសន៍ថា ការជំរុញកំណើនសេដ្ឋកិច្ច និងបង្កើតការងារជូនប្រជាពលរដ្ឋជាអាទិភាពចម្បងរបស់រាជរដ្ឋាភិបាល។ ការធ្វើពិពិធកម្មផលិតកម្មគឺជាមធ្យោបាយមួយដើម្បីសម្រេចបានគោលដៅទាំងនេះ ដែលក្នុងនោះការពង្រឹងនិងលើកស្ទួយវិស័យឧស្សាហកម្ម និងកម្មន្តសាលគឺជាគោលនយោបាយដ៏សំខាន់របស់រាជរដ្ឋាភិបាល។ ក្នុងឱកាសនេះ សម្ដេចធិបតី នាយករដ្ឋមន្រ្ដីបាន អបអរសាទរចំពោះការរីកលូតលាស់របស់ក្រុមហ៊ុន NCX ដែលក្នុងរយៈពេល ២៦ ឆ្នាំនេះបានប្រែក្លាយពីក្រុមហ៊ុនដែលនៅឆ្នាំ ១៩៩៩ មានបុគ្គលិក ៧៤ នាក់ និងមានសមត្ថភាពត្រឹត្រឹមតែនាំចូលគ្រឿងបង្គំគ្រប់មុខពីក្រៅប្រទេសមកផ្គុំ និងដម្លើងម៉ូតូ Honda លក់ក្នុងទីផ្សារកម្ពុជា ទៅជាក្រុមហ៊ុនមួយដែលបច្ចុប្បនមានបុគ្គលិកជំនាញជាង ១២២០ នាក់ និងមានសមត្ថភាពផលិតគ្រឿងបង្គំច្រើនមុខ និងដម្លើងម៉ូតូលក់នៅទីផ្សារកម្ពុជា និងនាំគ្រឿងបង្គំម៉ូតូមួយចំនួនទៅលក់នៅក្រៅប្រទេសផងដែរ។ សម្ដេចធិបតីមានប្រសាសន៍បញ្ជាក់ថា ភាពជោគជ័យរបស់ក្រុមហ៊ុន គឺជាគំរូមួយដែលវិស័យឯកជនបានចូលរួមចំណែកយ៉ាងសំខាន់ជាមួយរាជរដ្ឋាភិបាល ក្នុងការជំរុញកំណើនសេដ្ឋកិច្ចនិងបង្កើតការងារជំនាញជូនប្រជាពលរដ្ឋខ្មែរ ក៏ដូចជាលើកកម្ពស់ភាពម្ចាស់ការរបស់កម្ពុជាក្នុងការផលិតដោយខ្លួនឯង នូវផលិតផលដើម្បីផ្គត់ផ្គង់ទីផ្សារក្នុងស្រុក។សូមបញ្ជាក់ថា ក្រុមហ៊ុន NCX បានចាប់ផ្តើមដំណើរការជាមួយការដំឡើងម៉ូតូបាន៥០គ្រឿងក្នុងមួយវេននៅឆ្នាំ១៩៩៩ កើនឡើងដល់ប្រមាណ ៨០០គ្រឿងក្នុងមួយវេន នៅឆ្នាំ២០១៥។ បច្ចុប្បន្នក្រុមហ៊ុនដំឡើងម៉ូតូចំនួន ៥ ប្រភេទ រួមមាន៖ Click, Scoopy, Dream, Wave និង Beat។ នៅមុនពេលជំងឺកូវីដ១៩ រាតត្បាត ក្រុមហ៊ុនដំឡើងម៉ូតូចែកចាយលើទីផ្សារប្រមាណ ៤០ ម៉ឺនគ្រឿងក្នុងមួយឆ្នាំ។ ហើយនៅឆ្នាំ២០២៤ ក្រុមហ៊ុនដំឡើងចែកចាយប្រមាណ ២៥ ម៉ឺនគ្រឿងក្នុងមួយឆ្នាំ។ ចំនួននេះមានការកើនឡើងប្រមាណពី ១៧ ភាគរយទៅ២០ភាគរយធៀបនឹងឆ្នាំ២០២៣។ ជាមួយនឹងដំណើរការដំឡើង និងផលិតគ្រឿងបន្លាស់នេះ ក្រុមហ៊ុនបានផ្តល់ការងារដល់បុគ្គលិក និងកម្មករសរុបប្រមាណ ១,២២១ នាក់ ដែលសុទ្ធសឹងជាពលរដ្ឋខ្មែរ មានបរទេសតែ៧នាក់ប៉ុណ្ណោះ។ បុគ្គលិក និងកម្មករទទួលបានប្រាក់ឈ្នួលទាបបំផុតជិត ៣០០ ដុល្លារអាមេរិក៕

បណ្ដាញសង្គម

ព័ត៌មានថ្មីៗ

លោក Zelenskyy៖ រុស្ស៊ីបាញ់មីស៊ីលជាង ៣០គ្រាប់ និងយានដ្រូន ៣០០គ្រឿង អំឡុងការវាយប្រហារលើអ៊ុយក្រែន

មនុស្សយ៉ាងតិច ១៩នាក់ រងរបួសដោយសារការផ្ទុះកាំជ្រួចនៅកន្លែងតាំងពិព័រណ៍ ភាគខាងលិចអាល្លឺម៉ង់

កុងហ្គោ និងក្រុមឧទ្ទាម M23 ចុះហត្ថលេខាលើកិច្ចព្រមព្រៀងឈប់បាញ់ នៅកាតា

នាយករដ្ឋមន្ត្រីជប៉ុន លោក Ishiba ប្រឈមនឹងឧបសគ្គដ៏ធំក្រៃលែង នៅក្នុងការបោះឆ្នោតសភាជាន់ខ្ពស់

រដ្ឋមន្ត្រីការបរទេសទួរគី ប្រាប់លោក Rubio ថា ជម្លោះ នៅស៊ីរី ត្រូវតែបញ្ចប់ឥឡូវនេះ

លោក Trump៖ BRICS នឹងមិនមានអាយុកាលយូរអង្វែងទេ បើត្រូវបានបង្កើតឡើង ដើម្បីបង្កឥទ្ធិពល

អតីតប្រធានាធិបតីកូរ៉េខាងត្បូងត្រូវបានចោទប្រកាន់ជាថ្មី ខណៈការស៊ើបអង្កេត លើការចេញច្បាប់អាជ្ញាសឹកនៅតែបន្តមាន

អ្នកពន្លត់អគ្គិភ័យរាប់រយនាក់ ប្រយុទ្ធនឹងចំហេះព្រៃ នៅភាគខាងត្បូងបារាំង ខណៈលក្ខខណ្ឌអាកាសធាតុប្រសើរឡើង

លោក Bolsonaro ប្រាប់ថា លោកគឺជាអ្នកមានសមត្ថភាពបញ្ឈប់លោក Lula ចិន និងពន្ធរបស់លោក Trump

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877