BTV NEWS

ក្នុងគោលបំណងមនុស្សធម៌! អាជ្ញាធរកម្ពុជាសម្រេចបើកច្រកទ្វារព្រំដែនអនុញ្ញាតដល់អនុព័ន្ធយោធាថៃប្រចាំនៅភ្នំពេញ និងមនុស្សពីរនាក់ធ្វើដំណើរតាមច្រកទ្វារអន្តរជាតិប៉ោយប៉ែត-ខ្លងលីកទៅព្យាបាលជំងឺនៅខេត្តស្រះកែវ

ចៅក្រមស៊ើបសួរសាលាដំបូងរាជធានីភ្នំពេញសម្រេចឃុំខ្លួនជនត្រូវចោទ៨នាក់ជាបណ្តោះអាសន្នពាក់ព័ន្ធអំពើឆបោកតាមឆបោកតាមប្រព័ន្ធអនឡាញ

ត្រឹមថ្ងៃទី១៩កក្កដា សមត្ថកិច្ចរាជធានី-ខេត្ត បង្រ្កាបករណីឆបោកតាមប្រព័ន្ធបច្ចេកវិទ្យា ៥២ទីតាំង ឃាត់ខ្លួនជនសង្ស័យ ២.៧៦៧ នាក់ មានជនជាតិចិនចំនួន ៨៤៣នាក់

សមាគមកាយឫទ្ធិនារីកម្ពុជាសាខាខេត្តមណ្ឌលគិរី បានចូលរួមសកម្មភាពជាច្រើននៅក្នុងសង្គមស្របតាមគម្រោងសកម្មភាពទាំង៥ របស់សមាគម

ព័ត៌មានជាតិ

សម្ដេចតេជោ៖ពាក្យចាស់តែងនិយាយថាកុំពត់ស្រឡៅកុំប្រដៅក្មេងពាលពិតជាត្រឹមត្រូវ ខណៈយុវជនប្រឆាំងនៅជប៉ុនម្នាក់សម្ដេចបានជួយជាច្រើនបែរជាងាកមកវាយបកសម្ដេច និងរាជរដ្ឋាភិបាលទៅវិញ

ភ្នំពេញ៖សម្ដេចអគ្គមហាសេនាបតីតេជោ ហ៊ុន សែន បានទម្លាយសារសំឡេងមួយ ដែលសម្ដេចបានជជែកជាមួយ យុវជនជាសកមម្មជនប្រឆាំងនៅប្រទេសជ៉ុនម្នាក់ឈ្មោះ Seth ប៉ុន្ដែបុគ្គលនេះបែរជាចង់បានតួនាទីលើសសមត្ថភាព ហើយងាកមកវាយប្រហាររាជរដ្ឋាភិបាលទៅវិញ។សម្ដេចតេជោ បានសរសេរនៅលើបណ្ដាញសង្គមហ្វេសប៊ុកថា បើបានតែវាជ្រុលបែកធ្លាយទៅហើយទម្លាយវាតែម្តងទៅ។ ពាក្យចាស់តែងនិយាយថាកុំពត់ស្រឡៅកុំប្រដៅក្មេងពាលពិតជាត្រឹមត្រូវ។ ខ្ញុំបានជួយឧបត្ថម្ភក្មេងនេះទៅឪពុកម្តាយដើម្បីមានដើមទុនរកស៊ី។ កូនមួយនេះបានផ្ញើសារសុំលុយជាបន្តតែខ្ញុំមិនឆ្លើយ។ ចុងក្រោយសុំការងារធ្វើតែខ្ញុំបានពន្យល់កូនមួយនេះដូចមានសំឡេងក្នុងនេះស្រាប់។ មិនបានប៉ុន្មានស្រាប់តែកូននេះចេញវាយប្រហារច្រើនគោលដៅ។សម្ដេចបានសរសេរថា កន្លងមកដោយមានការសម្របសម្រួលតុលាការបានពន្យារពេលបណ្តោះអាសន្នលើរឿងក្តី១៨ សីហា ២០២៤។ ពេលនេះសម្ដេចមិនស្នើសុំពន្យារពេលសម្រាប់រឿងក្តីនេះទៀតទេ ព្រោះសាមីខ្លួនបានចាកចេញពីការសន្យារបស់ខ្លួនហើយ។ សម្ដេចបានបញ្ជាក់ថា កន្លងមកសម្ដេចបានស្នើសុំត្រឹមពន្យារពេលកាត់ក្តីប៉ុណ្ណោះ មិនមែនលើកលែងការចោទប្រកាន់នោះឡើយ។ តាមរយៈសារលំឡេងនេះ សម្ដេចបានស្នើដល់មិត្តជប៉ុនស្តាប់សំឡេងកូនប្រុសម្នាក់នេះឲ្យច្បាស់តើគាត់សមនឹងទទួលបានការអនុគ្រោះឲ្យនៅប្រទេសជប៉ុនឬទេបន្ទាប់ពីអស់រយៈពេលស្នាក់នៅ៕

ថវិកាបេឡាមរណ:សង្រ្គោះចំនួន៤០លានរៀលត្រូវបានប្រគល់ជូនគ្រួសារអតីតយុទ្ធចំនួន១០គ្រសារនៅកំពង់ឆ្នាំង

កំពង់ឆ្នាំង: នៅព្រឹកថ្ងៃទី៣១ ខែមករា ឆ្នាំ២០២៥ លោកឧត្តមសេនីយ៍ត្រី អ៊ុ សុភា មេបញ្ជាការ តំបន់ប្រតិបត្តិការសឹករងកំពង់ឆ្នាំង និងជាប្រធានសមាគមអតីតយុទ្ធជនកម្ពុជាខេត្ត បានដឹកនាំ នាយទាហាន និងក្រុមការងារលេខាធិការដ្ឋាន ស.អ.ក ខេត្តកំពង់ឆ្នាំង នាំយកថវិកាបេឡាមរណៈសង្គ្រោះចំនួន ១៦លានរៀល លិខិតចូលរួមរំលែកមរណទុក្ខ ព្រមទាំងអំណោយដ៏ថ្លៃថ្លារបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងជាអនុប្រធានទី១ សមាគមអតីតយុទ្ធជនកម្ពុជា និង លោកជំទាវបណ្ឌិត ពេជ ចន្ទមុនី ហ៊ុនម៉ាណែត ឧបត្ថម្ភដល់គ្រួសារអតីតយុទ្ធជនចំនួន ០៤គ្រួសារ ក្នុងនោះមាននៅស្រុករលាប្អៀរ ០២គ្រួសារ ស្រុកបរិបូណ៌ ០១គ្រួសារ និងស្រុកកំពង់លែង ០១គ្រួសារ ដែលពិធីប្រគល់នេះ បានប្រព្រឹត្តទៅ នៅទីបញ្ជាការ ផ្នែកសឹករងរលាប្អៀរ ។ ដោយឡែក នៅព្រឹកថ្ងៃដដែលនេះ លោក វរសេនីយ៍ឯក ស្រី ម៉ាច មេបញ្ជាការរង និងជាប្រធានលេខាធិការដ្ឋាន ស.អ.ក ខេត្តកំពង់ឆ្នាំង ជាតំណាង ដឹកនាំក្រុមការងារបន្តចុះប្រគល់ថវិកាបេឡាមរណៈសង្គ្រោះចំនួន ២៤លានរៀល និង លិខិតចូលរួមរំលែកមរណទុក្ខ ជូនដល់គ្រួសារសពអតីតយុទ្ធជន ចំនួន ០៦គ្រួសារទៀត ក្នុងនោះមាននៅស្រុកទឹកផុស ០៤គ្រួសារ ស្រុកសាមគ្គីមានជ័យ ០១គ្រួសារ និង ស្រុកកំពង់ត្រឡាច ០១គ្រួសារ ៕ កាំង ហុងវាស្នា

សម្ដេចធិបតី៖ការចងក្រងជាសហគមន៍កសិកម្មទំនើបកសិករអាចទទួលបាននូវយន្តការគាំទ្រចំនួនពីរ គឺក្រុមប្រឹក្សាគោលនយោបាយសហគមន៍កសិកម្ម និងមូលនិធិអភិវឌ្ឍសហគមន៍កសិកម្ម

កំពង់ធំ ៖ ក្នុងឱកាសឆ្លៀត ចុះជួបសំណេះសំណាលជាមួយប្រជាសហគមន៍ និងពិនិត្យវឌ្ឍនភាពនៃការរៀបចំសហគមន៍កសិកម្មទំនើបប្រាសាទសំបូររុងរឿង ដែលផ្តោតលើដំណាំស្វាយចន្ទី ស្ថិតនៅក្នុងឃុំគោល ស្រុកប្រាសាទសំបូរ ខេត្តកំពង់ធំ នៅថ្ងៃសុក្រ ទី៣១ ខែមករា ឆ្នាំ២០២៥ សម្ដេចធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា មានប្រសាសន៍ថា ការចងក្រងជាសហគមន៍កសិកម្មទំនើប ប្រជាកសិករអាចទទួលបាននូវយន្តការគាំទ្រចំនួនពីរ ដូចជា៖ ១/. ក្រុមប្រឹក្សាគោលនយោបាយសហគមន៍កសិកម្ម និងទី២/. មូលនិធិអភិវឌ្ឍសហគមន៍កសិកម្ម។ក្នុងឱកាសនោះ សម្ដេចធិបតី បានមានប្រសាសន៍ថា សហគមន៍កសិកម្មទំនើបប្រាសាទសំបូររុងរឿង គឺជាសហគមន៍ទំនើបមួយ ក្នុងចំណោមសហគមន៍ទំនើបទាំង៣ (សហគមន៍កសិកម្មទំនើបកំពង់ធំសាលាវិស័យ និងសហគមន៍កសិកម្មទំនើបទំរីងកំពង់ធំ) ដែលផ្តោតលើដំណាំស្វាយចន្ទី នៅក្នុងខេត្តកំពង់ធំ ដោយមានសមាជិកសរុបចំនួន ១៥៣គ្រួសារ និងមានផ្ទៃដីផលិតកម្ម ចំនួន ៦៤៤ហិកតា ដោយរំពឹងបរិមាណផលគ្រាប់ស្វាយចន្ទីសើមប្រមាណ ១០០០តោន ។ សម្ដេចធិបតី បានកោតសរសើរដល់សហគមន៍ ក្នុងការរៀបចំផែនការបានយ៉ាងល្អ ដោយមានយុទ្ធសាស្ត្រក្នុងការលក់គ្រាប់ស្វាយចន្ទីសើម ៧០% និងគ្រាប់ស្វាយចន្ទីស្ងួត ៣០% ជាមួយនឹងការរៀបចំធ្វើផលិតកម្មកសិកម្មតាមកិច្ចសន្យាថ្លៃល្អជាងមុន ១០-១៥%។ បន្ថែមពី សម្ដេចក៏បានវាយតម្លៃខ្ពស់ដល់ការជួយសម្របសម្រួល និងជ្រោមជ្រែងរបស់ក្រសួងកសិកម្ម រុក្ខាប្រមាញ់ និងនេសាទ ក្នុងការអនុវត្តកម្មវិធីគោលនយោបាយអាទិភាពទី៦ របស់រាជរដ្ឋាភិបាល នីតិកាលទី៧ ក្នុងគោលដៅប្រែក្លាយការធ្វើកសិកម្មបែបគ្រួសារ ឱ្យទៅជាសហគ្រាសសេដ្ឋកិច្ចកសិកម្មដ៏រឹងមាំ មានសមាហរណកម្មខ្ពស់ មានសេដ្ឋកិច្ចមាត្រដ្ឋាន និងមានសមត្ថភាពប្រកួតប្រជែងទាំងបរិមាណ និងគុណភាព ។ សម្ដេចបញ្ជាក់ថា៖«បន្ថែមពីនេះទៀត ការចងក្រងជាសហគមន៍កសិកម្មទំនើប ប្រជាកសិករ ក៏អាចទទួលបាននូវយន្តការគាំទ្រចំនួនពីរ ដូចជា៖ ១/. ក្រុមប្រឹក្សាគោលនយោបាយសហគមន៍កសិកម្ម និងទី២/. មូលនិធិអភិវឌ្ឍសហគមន៍កសិកម្ម»។ជាលទ្ធផលដ៏វិជ្ជមានមួយក្នុងការកែប្រែការធ្វើកសិកម្មបែបគ្រួសារ មកក្លាយជាសហគ្រាសសេដ្ឋកិច្ចកសិកម្មរឹងមាំ ។ រាជរដ្ឋាភិបាល តាមរយៈក្រសួងកសិកម្ម រុក្ខាប្រមាញ់ និងនេសាទ ជាសេនាធិការ បានរៀបចំបង្កើតជាសហគមន៍កសិកម្មទំនើបបានចំនួន ៩ មានដូចជា៖ សហគមន៍កសិកម្មទំនើបស្រូវនាងអំ, បន្លែសរសី, ទំរឹងកំពង់ធំ, ប្រាសាទសំបូររុងរឿង, កំពង់ធំសាលាវិស័យ, បន្លែផ្ទះសំណាញ់ត្រាំកក់, ស្រូវផ្ការំដួលខ្នារឆ្មារ, បន្លែកោះខ្សាច់ទន្លេ និង សហគមន៍កសិកម្មទំនើបម្រេចមេមត់ត្បូងឃ្មុំ ព្រមទាំងកំពុងសម្របសម្រួល និងជ្រោមជ្រែងក្នុងការបង្កើតសហគមន៍ថ្មីមួយទៀតក្នុងស្រុកកំពង់ស្វាយ និងក្រុងស្ទឹងសែន ដែលនឹងលេចជារូបរាងឆាប់ៗនាពេលខាងមុខ ហើយសហគមន៍ថ្មីនេះ គឺផ្តោតលើការដាំស្រូវសែនក្រអូប០១ ដែលជាដំណាំយុទ្ធសាស្ត្រមួយរបស់កម្ពុជា៕

ឯកឧត្តមសាស្រ្តាចារ្យ ឈាង រ៉ា «ផែនការជាតិប្រយុទ្ធនឹងជំងឺមហារីកដែលរៀបចំនាពេលនេះ នឹងក្លាយយុទ្ធសាស្ត្រដ៏មានសារៈសំខាន់ ក្នុងការកាត់បន្ថយអត្រាគ្រោះថ្នាក់ធ្ងន់ធ្ងរ ដោយជំងឺដ៏កាចសាហាវនេះ នៅកម្ពុជា»

ភ្នំពេញ ៖ ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល បានអញ្ជើញដឹកនាំកិច្ចប្រជុំពិនិត្យអំពីសេចក្តីព្រាងផែនការជាតិប្រយុទ្ធនឹងជំងឺមហារីក, នាថ្ងៃទី៣១ ខែមករា ឆ្នាំ២០២៥នេះ។ក្រោយពីបានស្តាប់បទបង្ហាញពីក្រុមការងាររៀបចំសេចក្តីព្រាងរួច ឯកឧត្តមសាស្រ្តាចារ្យរដ្ឋមន្រ្តី បានអនុញ្ញាតដល់ថ្នាក់ដឹកនាំ ប្រធាននាយកដ្ឋាន ផ្តល់ជាមតិយោបល់ និងធាតុចូលបន្ថែម ដើម្បីឱ្យមានលក្ខណៈគ្រប់ជ្រុងជ្រោយ ដែលផែនការនេះ នឹងចូលរួមជាមួយរាជរដ្ឋាភិបាល ក្នុងការសម្រេចបាន ស្របតាមយុទ្ធសាស្រ្តបញ្ចកោណ ដំណាក់កាលទី១ របស់រាជរដ្ឋាភិបាល ក្នុងការលើកកម្ពស់សុខភាព សុខុមាលភាពប្រជាពលរដ្ឋកម្ពុជា ឱ្យកាន់តែប្រសើរឡើង។ ក្នុងឱកាសនោះដែរ ឯកឧត្តមសាស្រ្តាចារ្យរដ្ឋមន្រ្តី បានសំដែងនូវការកោតសរសើរ និងបានវាយតម្លៃដល់ថ្នាក់ដឹកនាំទទួលបន្ទុករៀបចំសេចក្តីព្រាង ផែនការប្រយុទ្ធនឹងជំងឺមហារីក ដែលបានរៀបចំបានល្អ គ្រប់ទិដ្ឋភាព។ ផែនការនេះ នឹងក្លាយជាផែនការយុទ្ធសាស្រ្តមួយ ជួយកាត់បន្ថយអត្រាឈឺ និងស្លាប់ ដោយជំងឺមហារីកនៅកម្ពុជា។ ឯកឧត្តមសាស្រ្តាចារ្យរដ្ឋមន្រ្តី ក៏បានផ្តល់ជាធាតុចូលបន្ថែម ដល់ថ្នាក់ដឹកនាំទទួលបន្ទុក ដើម្បីបានជាមូលដ្ឋានគ្រឹះដាក់បញ្ចូលក្នុងសេចក្តីព្រាង ផែនការជាតិនេះ ១) សូមរៀបចំផែនការនេះឱ្យក្លាយជាគ្រឹះមួយដ៏រឹងមាំ និងមានសារៈសំខាន់ ក្នុងការចូលរួមប្រយុទ្ធទប់ស្កាត់នឹងជំងឺមហារីក ស្របតាមស្ថានភាពនៅកម្ពុជា ២) ក្នុងផែនការត្រូវរំលេចឱ្យបានច្បាស់ ដូចជាកត្តាធនធានមនុស្ស និងហិរញ្ញវត្ថុ សមស្របទៅតាមស្ថានភាពជាក់ស្តែង ៣) ត្រូវបង្ហាញពីចំនុចសំខាន់ៗ នៃផែនការយុទ្ធសាស្រ្តនេះ ដើម្បីទាញចាប់អារម្មណ៍ឱ្យមានការចូលរួម ដូចជាអប់រំផ្សព្វផ្សាយសុខភាព ការធ្វើលំហាត់ប្រាណ និងជាពិសេសកាត់បន្ថយការពិសាគ្រឿងស្រវឹង ៤) សូមកិច្ចសហការឱ្យបានជិតស្និទ្ធជាមួយភាគីពាក់ព័ន្ធ អន្តរជាតិ ពីបណ្តាប្រទេសជឿនលឿន ជាពិសេសអ្នកជំនាញខាងជំងឺមហារីក។ជាទីបញ្ចប់ ឯកឧត្តមសាស្រ្តាចារ្យ ឈាង រ៉ា សង្ឃឹមយ៉ាងមុតមាំថា តាមរយៈផែនការជាតិនេះនឹងបង្កើនសមត្ថភាព ធ្វើនវានុវត្តន៍ក្នុងការព្យាបាល និងកាត់បន្ថយអត្រាឈឺដោយជំងឺមហារីក ដែលនឹងឆ្លុះបញ្ចាំងជាក់ស្តែង ពីការយកចិត្តទុកដាក់បញ្ហាសុខភាពសាធារណៈ ជាពិសេសជំងឺមិនឆ្លងនៅកម្ពុជា៕អត្ថបទ រដ្ឋា

ដុំដែកជាច្រើនដុំបានធ្លាក់លើដំបូលផ្ទះប្រជាពលរដ្ឋ ដោយពុំដឹងថាប្រភពមកពីណាឲ្យប្រាកដ បណ្ដាលឲ្យផ្ទះពលរដ្ឋរងការខូចខាត

ភ្នំពេញ៖ មានដុំដែកធំៗបានធ្លាក់មកពីលើទាំងមិនដឹងប្រភព ធ្លាក់ចំផ្ទះប្រជាពលរដ្ឋបង្កការខូចខាតចំនួន៣ខ្នង និងបណ្ដាលឲ្យមនុស្សម្នាក់រងរបួសស្រាល ធ្វើមានការភ្ញាក់ផ្អើលយ៉ាងខ្លាំង។ហេតុការណ៍នោះបានកើតឡើងកាលពីវេលាម៉ោង១និង៥០នាទីរសៀលថ្ងៃទី៣១ ខែមករា ឆ្នាំ២០២៥ នៅក្នុងភូមិអង្គ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។ប្រជាពលរដ្ឋបាននិយាយថា នៅមុនពេលកើតហេតុ ខណៈពួកគាត់ខ្លះកំពុងស្ថិតនៅក្នុងផ្ទះ និងខ្លះទៀតកំពុងធ្វើការលក់ដូរ ស្រាប់តែមានដុំដែកមិនដឹងជាហោះមកពីទីកន្កែងណាធ្លាក់ចំផ្ទះពួកគាត់និងធ្លាក់លើផ្លូវរួចខ្ទាតបុកចូលផ្ទះគាត់តែម្ដង ។ ខណៈនោះសម្លេងធ្លាក់លាន់ដូចផ្ទុះគ្រាប់ផ្លោងគួរឲ្យភ័យខ្លាចខ្លាំងណាស់ ហើយបានបណ្ដាលឲ្យផ្ទះខ្លះខូចខាតដំបូល និងធ្លុះធ្លាយជញ្ជាំងថ្ម ធ្លុះធ្លាយប្លង់សេ ព្រមទាំងទ្វារផងដែរ ។ប្រជាពលរដ្ឋបាននិយាយបន្តទៀតថា មុនពេលកើតហេតុនោះគាត់ពុំបានដឹងថាដុំដែកនោះគឺជាបំណែកអ្វីមួយនោះទេ ហើយក្នុង១ដុំៗទម្ងន់រាប់សិបគីឡូក្រាម ពួកគាត់សង្ស័យថាជាបំណែកដែលផ្ទុះវត្ថុអ្វីមួយនៅឃ្លាំងណាមួយនៅតំបន់នោះ ហើយពួកគាត់ស្នើរសុំអោយអាជ្ញាធរមានសមត្ថកិច្ចជួយធ្វើការស្រាវជ្រាវរកប្រភពដុំដែកនោះ អោយម្ចាស់ចេញមកទទួលខុសត្រូវជាមួយពួកគាត់ផង ៕អត្ថបទ៖ កុម្ភៈ

នគរបាលប្រឆាំងបទល្មើសគ្រឿងញៀន បង្ក្រាបករណីជួញដូរគ្រឿងញៀនឃាត់ខ្លួនជនជាតិចិនម្នាក់ និងរឹបអូសថ្នាំជិត៥០គីឡូក្រាម ក្នុងភូមិសាស្ត្ររាជធានីភ្នំពេញ

ភ្នំពេញ៖ នគរបាលប្រឆាំងបទល្មើសគ្រឿងញៀនបានធ្វើការស៊ើបអង្កេតស្រាវជ្រាវរហូតឃាត់ខ្លួនជនជាតិចិនម្នាក់និងដកហូតសាធាតុញៀនចំនួនជាង៤៧គីឡូក្រាម នៅក្បែរខុនដូរ SKY 31 សង្កាត់បឹងកក់ទី១ ខណ្ឌទួលគោករាជធានីភ្នំពេញ។អនុវត្តតាមបទបញ្ជារបស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ នឹងដឹកនាំបញ្ជាផ្ទាល់ពីឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀន, កម្លាំងជំនាញមន្ទីរប្រឆាំងគ្រឿងញៀន បង្ក្រាបបានករណី រក្សាទុក ដឹកជញ្ជូនដោយខុសច្បាប់ នូវសារធាតុញៀន ចាប់ខ្លួនជនសង្ស័យម្នាក់ និងថ្នាំញៀនជិត៥០គីឡូក្រាម ក្នុងភូមិសាស្ត្ររាជធានីភ្នំពេញ។ ប្រតិបត្តិការនេះបានធ្វើឡើងកាលពីវេលាម៉ោង១៣៖៣០នាទី នាថ្ងៃទី២៩ ខែមករា ឆ្នាំ២០២៥ កម្លាំងនគរបាលនៃមន្ទីរប្រឆាំងបទល្មើសគ្រឿងញៀន ដោយមានការដឹកនាំសម្រសម្រួលដោយលោក គឹម ហុងសាន ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ បានស្រាវជ្រាវ និងបង្រ្កាបការណី រក្សាទុក ដឹកជញ្ជូន គ្រឿងញៀនដោយឃាត់ខ្លួនជនសង្ស័យម្នាក់និងដកហូតវត្ថុតាងជិត៥០គីឡូក្រាម។ក្នុងរង្វង់ប្រតិបត្តិការនេះកម្លាងនគរបាលជំនាញបានធ្វើនៅគោលដៅចំនួន០២គោលដៅផ្សេងគ្នា លទ្ធផល គោលដៅទី១៖ នៅក្បែរខុនដូរ SKY 31 សង្កាត់បឹងកក់ទី១ ខណ្ឌទួលគោក រាជធានីភ្នំពេញ ឃាត់ខ្លួនជនសង្ស័យបានចំនួន ០១នាក់ ឈ្មោះ CHEN YAN CHENG ជាជនជាតិចិន ភេទប្រុស កើតថ្ងៃទី០៩ ខែមិនា ឆ្នាំ១៩៩៨ ដោយចាប់យកគ្រឿងញៀន១៖ ប្រភេទកេតាមីន ៣កញ្ចប់ (១ធំ ២ធំល្មម) ១គីឡូក្រាម ២០៦ក្រាម និង២៖ អ៉ិចស្តាស៉ី ១០កញ្ចប់ ស្មើទម្ងន់ ១៨៨.៦៩ក្រាម ។ គោលដៅទី២៖ ឆែកឆេរនៅបន្ទប់ខុនដូរ SKY31 បន្ទប់លេខ ១៣០៦ ជាន់ទី១៣ ផ្លូវ២៨៧ ក្រុម៥០ សង្កាត់បឹងកក់ទី១ ខណ្ឌទួលគោក រាជធានីភ្នំពេញ ដកហូតវត្ថុតាងដូចរួមមាន៖ ម៉្សៅកេតាមីន ២កញ្ជប់ធំ ២គីឡូក្រាម ៤៨៨ក្រាម។ មេតំហ្វេតាម៉ីន (គ្រាប់) ចំនួន ៣១កញ្ចប់ធំ ស្មើទម្ងន់ ៤០គីឡូក្រាម ៥៦៦.១១ក្រាម។ អ៉ិចស្តាស៉ី ( F3 + ផ្លែឈើ) ១៧២កញ្ចប់ ស្មើ ៣គីឡូក្រាម ៤១៤.៣៩ក្រាម ។កញ្ជាក្រៀមចំនួន ២កញ្ចប់ (ធំ និងតូច) ស្មើទម្ងន់ ២៣០ក្រាម ។ជញ្ជីងថ្លឹងគ្រឿងញៀនចំនូន ០១គ្រឿង។ អាវុធខ្លី ២ដើម និង ២០គ្រាប់ និងឧបករណ៍សម្រាប់ប្រើប្រាស់ និងថង់វេចខ្ចប់គ្រឿងញៀនមួយចំនួន។ នគរបាលជំនាញបានបញ្ជាក់ថា សរុបសារធាតុញៀនទាំង ៣ប្រភេទ៖ ទម្ងន់៤៧គីក្រាម។បច្ចុប្បន្នជនល្មើស និងវត្ថុតាង ត្រូវបានកម្លាំងជំនាញកសាងសំណុំរឿងបញ្ជូនខ្លួន ទៅសាលាដំបូងរាជធានីភ្នំពេញ ដើម្បីចាត់ការតាមនីតិវិធី៕អត្ថបទ៖ កុម្ភៈ

ប្រតិភូ (ONCB) មកពី១២ប្រទេស ទទួលបានការស្វាគមន៍ពីមន្ដ្រីច្រកទ្វារអន្តរជាតិប៉ោយប៉ែត ខណៈមកទស្សនកិច្ចនៅខេត្តសៀមរាប រយៈពេល០៣ថ្ងៃ

បន្ទាយមានជ័យ៖ នៅរសៀលថ្ងៃទី៣១ ខែមករា ឆ្នាំ២០២៥ ប្រតិភូការិយាល័យក្រុមប្រឹក្សាត្រួតពិនិត្យគ្រឿងញៀនថៃ (ONCB) ក្នុងកម្មវិធីបណ្ដាញយុវជន (YNDPP) លើកទី៤ ស្ដីពីការបង្ការទប់ស្កាត់គ្រឿងញៀនចំនួន ៦០នាក់ មកពី១២ប្រទេស ដឹកនាំដោយលោក MOHD FARUZ HJ SULONG ប្រធានប្រតិភូ បានមកទស្សនកិច្ចនៅខេត្តសៀមរាប ប្រទេសកម្ពុជា រយៈពេល (០៣ថ្ងៃ) ចូលថ្ងៃទី៣១ ខែមករា ឆ្នាំ២០២៥ - ចេញថ្ងៃទី០២ ខែកុម្ភៈ ឆ្នាំ២០២៥ ។មន្ដ្រីនគរបាលប៉ុស្ដិ៍ច្រកទ្វារព្រំដែនអន្តរជាតិប៉ោយប៉ែត បានឱ្យដឹងថា ការមកដល់របស់ប្រតិភូការិយាល័យក្រុមប្រឹក្សាត្រួតពិនិត្យគ្រឿងញៀនថៃ (ONCB) ទទួលបានការស្វាគមន៍សម្របសម្រួលបែបបទចូលប្រទេសរហ័ស រៀបចំសណ្ដាប់ធ្នាប់ របៀបរៀបរយ ការពារសន្តិសុខ សុវត្ថិភាពជូនប្រតិភូ ដឹកនាំដោយឯកឧត្ដម ឧត្ដមសេនីយ៍ឯក លឹម តុងហួត ប្រធាននាយកដ្ឋានផ្សព្វផ្សាយ អប់រំ និងទំនាក់ទំនងសាធារណៈ (កិច្ចការទូទៅ និងសហការសន្តិសុខ) និងក្រុមយុវជននៅច្រកទ្វារព្រំដែនអន្តរជាតិប៉ោយប៉ែត ប្រើប្រាស់រថយន្តក្រុងកម្ពុជាចំនួន០២គ្រឿង៕

សន្និបាតសាខាកាកបាទក្រហមកម្ពុជាខេត្តកំពង់ធំអាណត្តិទី៦

កំពង់ធំ ៖ នៅព្រឹកថ្ងៃទី៣១ខែ មករា ឆ្នាំ ២០២៥ នេះ លោកជំទាវ ពុំ ចន្ទីនី អគ្គលេខាធិការ តំណាងសម្តេចកិត្តព្រឹទ្ធ ប៊ុន រ៉ានី ហ៊ុនសែន ប្រធាន កាកបាទក្រហមកម្ពុជា បានអញ្ជេីញជាអធិបតី ប្រារព្ធសន្និបាតសាខាកាកបាទក្រហមកម្ពុជា ខេត្តកំពង់ធំអាណត្តិទី៦ ដែលធ្វើឡើងក្នុងសាលប្រជុំសាលាខេត្តកំពង់ធំ ដោយមានការអញ្ជើញចូលរួមពី គណៈកិត្តិយសសាខា គណៈកម្មាធិការសាខាអាណត្តិទី៥ សមាជិក-សមាជិកាពេញសិទ្ធិ មន្ត្រីបច្ចេកទេសទីស្នាក់ការកណ្តាល ក្រុមប្រតិបត្តិសាខា យុវជនកាកបាទក្រហមកម្ពុជា និងអ្នកស្ម័គ្រចិត្តសរុប២៣០នាក់។បន្ទាប់ពីប្រកាសរំសាយ គណៈកម្មាធិការសាខាអាណត្ដិទី៥ អង្គសន្និបាតបានរៀបចំបោះឆ្នោតសម្ងាត់ដោយមានអង្គបោះឆ្នោតចំនួន៧៥លើ៨៧រូបដែលជាសមាសភាព ជាសមាជិក សមាជិការគណៈកម្មាធិការ សាខាអាណតិ្តទី៥,សមាជិកសមាជិកាគណៈកម្មាធិការអាណតិ្តទី៦។ ក្រោយដំណើរការ បោះឆ្នោតរួចរាល់ គណកម្មការរៀបចំ បានប្រកាស លទ្ធផល គឺអង្គសន្និបាត បានបោះឆ្នោតគាំទ្រ សមាសភាព បេក្ខជន គណៈកម្មាធិការសាខាកាកបាទក្រហមកម្ពុជាខេត្តកំពង់ធំចំនួន១៥រូប សម្រាប់អាណត្ដិទី៦នេះ ដោយសម្លេងគាំទ្រ៧៤លើ៧៥សម្លេង អនុបវាទចំនួន១សម្លេង។ អនុវត្តតាមនីតិវិធី គណៈកម្មាធិការសាខា ដែលទើបជាប់ឆ្នោតថ្មីភ្លាម បានបើកកិច្ចប្រជុំលើកទី១ ដើម្បីជ្រើសរើសបេក្ខភាព ប្រធាន អនុប្រធានអចិន្ត្រៃយ៍,អនុប្រធាន,ហេរញ្ញិកនិងលេខាធិការ ដើម្បីបន្តសុំការអនុម័ត ពីអង្គសន្និបាត ជាលទ្ធផល អង្គសន្និបាត បានអនុម័តទទួលយក បេក្ខភាព ឯកឧត្តម នួនផារ័ត្ន ជាប្រធានគណៈកម្មាធិការ សាខាកាកបាទក្រហមកម្ពុជា ខេត្តកំពង់ធំ សំរាប់អាណតិទី៦ លោកជំទាវ លំ គន្ធារី អនុប្រធានអចិន្ត្រៃយ៍ លោក កើត រ័ត្ន អនុប្រធាន ឯកឧត្តម គឹម លាងសេង ហេរញ្ញិក ឯកឧត្តម ជា វ៉ាន់ចាន់ លេខាធិការនិង សមាជិក សមាជិកា សាខា ចំនួន ៩រូបទៀត រួមមាន៖ លោក សោម ស៊ុន, លោក ហេង សុផល, លោក មាស យ៉ត, លោកវេជ្ជ. ស្រី ស៊ីន ,លោក ប៉ែន វណ្ណរិទ្ធ ,លោក តាន់ ប៊ុនហុង, លោក អ៊ឹម សុឌីណា, លោក ពត សាន, លោក លី ពេជ្រវីរៈ និងលោក ជាប សៅ។ក្នុងនាម ឯកឧត្តម នួន ផារ័ត្ន ជាប់ជាប្រធានគណៈកម្មាធិការថ្មីលោកជំទាវ លំ គន្ធារី អនុប្រធានអចិន្ត្រៃយ៍ បានថ្លែងអំណរគុណចំពោះ សន្និបាត ដែលបានបោះឆ្នោតគាំទ្រសមាភាពគណៈកម្មាធិការសាខាអាណត្តិថ្មីនាពេលនេះ។ ដើម្បីឆ្លើយតបចំពោះទំនុកចិត្តដ៏ឧត្តុងឧត្តមខាងលើនេះ លោកជំទាវ សូមប្តេជ្ញាចិត្ត នឹងគោរពនូវគោលការណ៍គ្រឹះទាំង៧ របស់ចលនាកាកបាទក្រហមនិងអឌ្ឍច័ន្ទក្រហម ,ខិតខំយកចិត្តទុកដាក់ ជួយសង្គ្រោះ ប្រជាពលរដ្ឋ ដែលងាយរងគ្រោះ និងរងគ្រោះដោយគ្រោះមហន្តរាយផ្សេងៗឱ្យបានទាន់ពេលវេលា,ពង្រឹងអ្នកស្ម័គ្រចិត្តនិងយុវជនកាកបាទក្រហមកម្ពុជាទាំងអស់ ដែលបានបណ្តុះបណ្តាល ,បំផុសផ្សព្វផ្សាយ គោលការណ៍ និងសកម្មភាពនានា របស់កាកបាទក្រហមកម្ពុជា ក៏ដូចជាសកម្មភាពនានា របស់សាខា ដើម្បីចលនាឱ្យមានការចូលរួម ពីសំណាក់ប្រជាពលរដ្ឋជាសមាជិកភាព,ខិតខំដឹកនាំកិច្ចទំនាក់ទំនងល្អជាមួយគណៈកិត្តិយសសាខាគណៈកម្មាធិការ សាខា ក្រុមប្រត្តិបត្តិ សាខា និងអនុសាខា ក្រុង/ស្រុក ទូទាំងខេត្ត,បំផុសចលនាគៀងគរ រកមូលនិធិពីគ្រប់មជ្ឈដ្ឋានដើម្បីនិរន្តភាពសកម្មភាពមនុស្សធម៌និងទំនាក់ទំនង ជាមួយដៃគូរសហប្រត្តិបត្តិការនានាឱ្យបានល្អប្រសើរ ។ថ្លែងបិទអង្គសន្និបាតនេះ លោកជំទាវ ពុំចន្ទីនី បានអានសេចក្តីថ្លែងការរបស់សម្តេចកិត្តិព្រឹទ្ធបណ្ឌិត ប៊ុន រ៉ានីហ៊ុនសែន ប្រធានដែលបានចូលរួម អបអរសាទរ និងប្រកាសគាំទ្រ ទទួលស្គាល់សមាសភាព គណៈកម្មាធិការសាខា ទាំង១៥ រូប ដែលទទួលបាន នូវទំនុកចិត្ត ពីអង្គសន្និបាតសាខាកាកបាទក្រហមកម្ពុជា អាណតិទី៦។ សំឡេងឆ្នោតគាំទ្រនេះជាសក្ខីកម្មនៃការប្រគល់ជូន ឯកឧត្តម លោកជំទាវអស់លោក,លោកស្រី នូវភារកិច្ចដ៏ឧត្តុង្គឧត្តម ជាជំនួយការ ជូនអាជ្ញាធរសាធារណៈ ក្នុងវិស័យមនុស្សធម៌នៅក្នុងបូរណៈភាពរដ្ឋបាលដែនដីខេត្តកំពង់ធំ ចាប់ពីថ្ងៃនេះតទៅ។ ក្នុងសេចក្តីថ្លែងការណ៍នេះ សម្ដេចកិត្តិព្រឹទ្ធបណ្ដិត ក៏បាន ថ្លែងអំណរគុណយ៉ាងជ្រាលជ្រៅបំផុត ជូនចំពោះ ឯកឧត្តម លោកជំទាវ នៃ គណៈកម្មាធិការ សាខាកាកបាទក្រហមកម្ពុជា ខេត្តកំពង់ធំ អាណត្តិទី៥ ដែលបានខិតខំប្រឹងប្រែង បំពេញភារកិច្ច ដ៏វិសេសវិសាលក្នុងឋានៈ ជាអ្នកស្ម័គ្រចិត្តសកម្ម ដឹកនាំ អភិបាលគ្រប់គ្រង សាខា-អនុសាខា១អាណត្តិកន្លងម ប្រកបដោយស្មាតីទទួលខុសត្រូវខ្ពស់សម្រេចបាននូវសមិទ្ធផលជាបន្តបន្ទាប់ ក្នុងការជួយប្រជាពល រដ្ឋរងគ្រោះបំផុត។ខ្លឹមសារនៃសេចក្តីថ្លែងការណ៍នេះ សម្ដេច កិត្តិព្រឹទ្ធបណ្ឌិត ក៏បានទាញការយកចិត្តទុកដាក់ពី ឯកឧត្តម លោកជំទាវ លោក លោកស្រី ក្មួយៗ យុវជន ជាសមាជិកទាំងអស់ ដែលចូលរួមក្នុងកម្មវិធីនេះ ឱ្យបន្តពង្រឹងកម្លាំង សាមគ្គីភាព លើកកម្ពស់សកម្មភាព មនុស្សធម៌ និងរៀបចំយន្តការត្រៀមបង្ការគ្រោះមហន្តរាយ ដើម្បីកាត់បន្ថយផលប៉ះពាល់ ដែលកើតចេញពី វិបត្តិសេដ្ឋកិច្ច វិបត្តិសង្គម គ្រោះអន្តរាយធម្មជាតិ និងការប្រែប្រួល អាកាសធាតុ,លើកកម្ពស់ការយល់ដឹង និងចូលរួមផ្ដល់ការអប់រំផ្សព្វផ្សាយ លើកកំពស់សុខភាពសាធារណៈ របស់ប្រជាពលរដ្ឋ ជាពិសេសក្នុងការទប់ស្កាត់ជំងឺឆ្លងនានានិងជំងឺមិនឆ្លងមួយចំនួន ដូចជា ជំងឺមហារីក ទឹកនោមផ្អែម លើសឈាម បេះដូងសរសៃឈាម ដែលកំពុងប្រឈមក្នុងចំណោមប្រជាពលរដ្ឋទូទៅរួមទាំងការលើកកម្ពស់ សុខភាព មាតា ទារក កុមារនិងមនុស្សពេញវ័យ និងលើកកម្ពស់គុណតម្លៃ នៃចលនាមនុស្សធម៌ សេចក្តីថ្លៃថ្នូរ មនុស្សជាតិ វប្បធម៌អហិង្ស ការពារសុខសន្តិភាពដែលក្នុងនោះទាមទារឱ្យមានការចូលរួមពង្រឹងស្មារតីសាមគ្គីភាព ការលើកកម្ពស់ វប្បធម៌នៃការចែករំលែក និងការជួយគ្នាទៅវិញទៅមក ចាប់តាំងពីភូមិ/ឃុំ/ស្រុក/ខណ្ឌ/ក្រុង ដែលជាថ្នាក់ក្រោមជាតិ រហូតដល់ ថ្នាក់ជាតិ៕ អត្ថបទ: សំ ងីម

ក្រុមការងាររាជរដ្ឋាភិបាលចុះមូលដ្ឋានស្រុកជលគីរី ពិនិត្យស្ថានភាពការងារបង្ករបង្កើនផលស្រូវរដូវប្រាំងនៅឃុំកោះថ្កូវ

កំពង់ឆ្នាំង ៖ ថ្មីៗនេះ ឯកឧត្តម អ៊ុក ពញ្ញា រដ្ឋលេខាធិការក្រសួងអភិវឌ្ឍន៍ជនបទនិង ជាប្រធានក្រុមកាងាររាជរដ្ឋាភិបាលចុះមូលដ្ឋានស្រុកជលគិរី និង ឯកឧត្តម លាង សេង អនុរដ្ឋលេខាធិការ រួមដំណើរ ដោយលោក ដូវ គឹមស៊ីន អភិបាលស្រុកជលគិរី បានអញ្ជើញចុះសួរសុខទុក្ខ និងពិនិត្យលើការងារបង្ករបង្កើនផលស្រូវរដូវប្រាំងរបស់ប្រជាពលរដ្ឋនៅឃុំកោះថ្កូវ ស្រុកជលគិរី ខេត្តកំពង់ឆ្នាំង ។ ប្រជាកសិករ ឃុំកោះថ្កូវ ស្រុកជលគិរី បានឱ្យដឹងថា៖ ស្ថានភាពការងារបង្ករបង្កើនផលស្រូវរដូវប្រាំងរបស់ប្រជាកសិករ នៅក្នុងឃុំកោះថ្កូវ រហូតមកដល់ពេលនេះ បានសាបព្រួស១០០ភាគរយ ដែលបច្ចុប្បន្នស្រូវប្រាំងរបស់ប្រជាកសិករប្រមាណជាង១០ភាគរយបានកំពុងច្រូតកាត់ជាបណ្តើរៗ និងកំពុងបន្តការងារបង្ករបង្កើនជាលើកទី២ ។ ចំពោះការផ្គត់ផ្គង់ទឹកសម្រាប់ស្រោចស្រពស្រូវប្រាំង រហូតមកដល់នឹងសប្តាហ៍ទី៤នៃខែមករានេះ មិនមានខ្វះខាតទឹកនៅឡើយនោះទេ ដោយនៅតាមមូលដ្ឋាននីមួយមានសហគមន៍ផ្គត់ផ្គង់ទឹកជាប់ជាប្រចាំ ជូនដល់កសិករ ដោយប្រើប្រាស់ផ្ទាំងពន្លឺព្រះទិត្យសម្រាប់បូមទឹកដាក់បញ្ចូលស្រែតែម្តង ។នៅក្នុងឱកាសនោះ ឯកឧត្តម អ៊ុក ពញ្ញា បានសំដែងនូវការកោតសរសើរចំពោះអាជ្ញាធរមូលដ្ឋាន មន្រ្តីជំនាញគ្រប់លំដាប់ថ្នាក់ ដែលបានយកចិត្តទុកដាក់ចុះជាប់ជាប្រចាំជាមួយនិងប្រជាកសិករ ក្នុងកិច្ចការងារបង្ករបង្កើនផលស្រូវរដូវ ប្រាំង នៅក្នុងមូលដ្ឋានរបស់ខ្លួន ដោយបានផ្តល់នូវគ្រប់មធ្យោបាយ ក្នុងការជួយប្រជាពរលដ្ឋពេលដែលរងគ្រោះរាំងស្ងួតបានទាន់ពេវេលា ដោយធានាបាននូវទឹកបានស្រោចស្រពដល់ស្រូវប្រាំង ដោយពុំមានការខ្វះខាត ។ ដើម្បីធានា ស្រូវប្រាំងមិនខូចខាតដោយសារខ្វះខាតទឹកនោះ ប្រជាពលរដ្ឋត្រូវពិនិត្យមើល អំពីប្រភពទឹកឱ្យបានច្បាស់លាស់ ហើយធ្វើស្រូវឱ្យបានសមស្របតាមប្រភពទឹក ព្រោះថា ប្រសិនបើធ្វើហួសពីប្រភពទឹកក្នុងការផ្គត់ផ្គង់នោះ នឹងធ្វើឱ្យយើងខាតបង់ ជាក់ជាមិនខាន ។ ប៉ុន្តែសម្រាប់ស្ថាននៅក្នុងមូលដ្ឋានស្រុកជលគិរីនេះ គឺមិនមានផលប៉ះពាល់ក្នុងការផ្គត់ផ្គង់ទឹកសម្រាប់ស្រោចស្រពស្រូវប្រាំងនោះទេ ដោយប្រជាពលរដ្ឋ មានសហគមន៍សម្រាប់ផ្គត់ផ្គង់ទឹកជាប់ជាប្រចាំ ។ បើទោះបីនាពេលនេះ ស្ថានភាពទឹកស្រោចស្រពស្រូវរដូវប្រាំងអាចគ្រប់គ្រងបានយ៉ាងណាក៍ដោយ តែអាជ្ញាធរស្រុក ឃុំនៅគ្រប់មូលដ្ឋានទាំងអស់ ត្រូវតាមដានជាប់ជាប្រចាំ ហើយប្រសិនបើជួបបញ្ហារាំងស្ងួត ត្រូវរាយការណ៍ជាសុំអន្តរាគមន៍ជាបន្ទាន់ ដើម្បីក្រុមការងារជួយបានទាន់ពេលវេលា មិនអោយប្រជាកសិករយើងខូចខាតនូវដំណាំស្រូវប្រាំងរបស់ពួកគាត់៕ កាំង ហុងវាស្នា

ឯកឧត្តម គីម រិទ្ធី ចុះពិនិត្យវឌ្ឍនភាពការងារស្ថាបនាផ្លូវកៅស៊ូ ពីរជាន់ DBST នៅស្រុករវៀង

ព្រះវិហារ៖ ឯកឧត្តម គីម រិទ្ធី អភិបាលខេត្តព្រះវិហារ នៅរសៀលថ្ងៃទី ៣០ ខែមករា ឆ្នាំ២០២៥ ម្សិលមិញ អមដោយមន្ត្រីជំនាញ អាជ្ញាធរស្រុក បានចុះពិនិត្យវឌ្ឍនភាពការងារស្ថាបនា ផ្លូវកៅស៊ូពីរជាន់ DBST ចំនួន៣ខ្សែ ប្រវែង ២២,៧៥ គ.ម ទទឹង ៨ ម និងសំណង់សិល្បការ្យមួយចំនួន នៅស្រុករវៀង ខេត្តព្រះវិហារ ។យោងតាមរបាយការណ៍របស់មន្ទីរអភិវឌ្ឍន៍ជនបទខេត្ត បានឱ្យដឹងថា ផ្លូវចំនួន ៣ខ្សែនេះ គឺជាគម្រោង SAAMBAT ខេត្តព្រះវិហារ ដែលផ្លូវខ្សែទីមួយ តភ្ជាប់ពីភូមិអូរតាលោក ឃុំរមទម ទៅភូមិដូង ឃុំរីករាយ មានប្រវែង ១៣,៩៨គ.ម សំណង់សល្បការ្យ លូមូល ១១កន្លែង លូប្រអប់ ១កន្លែង គិតមកដល់ពេលនេះសម្រេចបាន ៧០.៤៥%។ ផ្លូវខ្សែទីពីរ តភ្ជាប់ពីភូមិថ្នល់កែង ទៅភូមិស្រែធំ មានប្រវែង ៣.៧៥គ.ម សំណង់សល្បការ្យ លូមូល ០៣កន្លែង គិតមកដល់ពេលសម្រេចបាន ៧១.៩៧% និងផ្លូវខ្សែទីបី តភ្ជាប់ពីភូមិត្នោតម្លូ ទៅភូមិបុះ មានប្រវែង ៥.០២គ.ម សំណង់សិល្បការ្យ លូមូល ០៨កន្លែង លូប្រអប់ ០៤កន្លែង គិតមកដល់ពេលនេះសម្រេចបាន ៥៥.៩៨%។ក្នុងឱកាសចុះពិនិត្យវឌ្ឍនភាពស្ថាបនានេះឯកឧត្តមអភិបាលខេត្ត បានថ្លែងអំណរគុណដល់ឯកឧត្តមរដ្ឋមន្ត្រីក្រសួងអភិវឌ្ឍន៍ជនបទ ដែលបានផ្ដល់ផ្លូវកៅស៊ូពីរជាន់ជាច្រើនខ្សែដល់ខេត្តព្រះវិហារ។ ឯកឧត្តម ក៏បានណែនាំដល់ក្រុមហ៊ុនដែលទទួលការអនុវត្ត ឱ្យធ្វើការស្ថាបនាផ្លូវនេះ ឱ្យបានត្រឹមត្រូវ ស្របតាមបទដ្ឋានបច្ចេកទេស និងត្រូវបង្កើនស្លាកសញ្ញាចរាចរណ៍ ដើម្បីបញ្ចៀសគ្រោះថ្នាក់ដល់អ្នកធ្វើដំណើរ។

បណ្ដាញសង្គម

ព័ត៌មានថ្មីៗ

ឯកឧត្តម ឌិត ទីណា បន្តដំណើរចុះជួបសំណេះសំណាលជាមួយសហគមន៍ទំនើបស្វាយចន្ទីភ្នំគូលែន នៅខេត្តសៀមរាប

លោក Trump ទទូចថាទីតាំងនុយក្លេអ៊ែរអ៊ីរ៉ង់ត្រូវបានបំផ្លាញស្របពេលមានរបាយការណ៍មួយចំនួនថាបានរួចផុតពីការបំផ្លាញ

ពលរដ្ឋជប៉ុនបោះឆ្នោតក្នុងការសាកល្បងដ៏សំខាន់សម្រាប់នាយករដ្ឋមន្ត្រី Shigeru Ishiba

អ្នកស្លាប់ក្នុងជំនន់ទឹកភ្លៀងនៅកូរ៉េខាងត្បូងសប្តាហ៍នេះ កើនឡើងដល់១៤ នាក់

ការប៉ះទង្គិចបានផ្ទុះឡើងក្នុងការតវ៉ាប្រឆាំងនឹងជនអន្តោប្រវេសន៍ក្នុងប្រទេសប៉ូឡូញ

ក្រសួងសុខាភិបាល បើកយុទ្ធនាការផ្តល់ថ្នាំលេបសមូហភាព ដើម្បីបង្ការជំងឺគ្រុនចាញ់ នៅខេត្តស្ទឹងត្រែង

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877