BTV NEWS

ក្នុងគោលបំណងមនុស្សធម៌! អាជ្ញាធរកម្ពុជាសម្រេចបើកច្រកទ្វារព្រំដែនអនុញ្ញាតដល់អនុព័ន្ធយោធាថៃប្រចាំនៅភ្នំពេញ និងមនុស្សពីរនាក់ធ្វើដំណើរតាមច្រកទ្វារអន្តរជាតិប៉ោយប៉ែត-ខ្លងលីកទៅព្យាបាលជំងឺនៅខេត្តស្រះកែវ

ចៅក្រមស៊ើបសួរសាលាដំបូងរាជធានីភ្នំពេញសម្រេចឃុំខ្លួនជនត្រូវចោទ៨នាក់ជាបណ្តោះអាសន្នពាក់ព័ន្ធអំពើឆបោកតាមឆបោកតាមប្រព័ន្ធអនឡាញ

ត្រឹមថ្ងៃទី១៩កក្កដា សមត្ថកិច្ចរាជធានី-ខេត្ត បង្រ្កាបករណីឆបោកតាមប្រព័ន្ធបច្ចេកវិទ្យា ៥២ទីតាំង ឃាត់ខ្លួនជនសង្ស័យ ២.៧៦៧ នាក់ មានជនជាតិចិនចំនួន ៨៤៣នាក់

សមាគមកាយឫទ្ធិនារីកម្ពុជាសាខាខេត្តមណ្ឌលគិរី បានចូលរួមសកម្មភាពជាច្រើននៅក្នុងសង្គមស្របតាមគម្រោងសកម្មភាពទាំង៥ របស់សមាគម

ព័ត៌មានជាតិ

ក្រសួងបរិស្ថាន និងរដ្ឋបាលខេត្តមណ្ឌលគីរីជំរុញទីក្រុង និងទីប្រជុំជនទុកដាក់សំរាម សំណល់ប្លាស្ទិកឱ្យបានត្រឹមត្រូវ

នៅព្រឹកថ្ងៃទី៣១ ខែមករា ឆ្នាំ២០២៥ នៅសួនច្បារដំរីដែក ខេត្តមណ្ឌលគីរី នាយកដ្ឋានសេដ្ឋកិច្ចបៃតងនៃអគ្គគោលនយោបាយនិងយុទ្ធសាស្ត្រ បានសហការជាមួយអង្គការ WWF ធ្វើយុទ្ធនាការ «កម្ពុជាស្អាត ខ្មែរធ្វើបាន» ក្រោមអធិបតីភាព ឯកឧត្តម មាស សុផល អនុរដ្ឋលេខាធិការក្រសួងបរិស្ថាន និងឯកឧត្តម ថង សាវុន អភិបាលនៃគណៈអភិបាលខេត្តមណ្ឌលគីរី និងមានការចូលរួមពីតំណាងបណ្តារដ្ឋបាលស្រុកនៃខេត្តមណ្ឌលគីរី សហភាពសហព័ន្ធយុវជន យុវជនកាកបាទក្រហមកម្ពុជា និងយុវជនកាយឬទ្ធិខេត្ត និងតំណាងអង្គការWWF ប្រមាណ២០០នាក់។ក្នុងឱកាសនោះ ឯកឧត្តម ថង សាវុន អភិបាលខេត្ត បានបង្ហាញការតាំងចិត្តខ្ពស់ក្នុងការគ្រប់គ្រងសំរាមឬសំណល់ឱ្យបានកាន់តែមានប្រសិទ្ធភាព និងគ្រប់អង្គភាពនៅក្នុងខេត្តត្រូវយកចិត្តទុកដាក់ចំពោះបរិស្ថាន ជាពិសេសសំណល់ប្លាស្ទិក ព្រមទាំងជំរុញឱ្យប្រជាពលរដ្ឋត្រូវចូលរួមចំពោះការទុកដាក់សំណល់ដោយមិនត្រូវបោះចោលពាសវាលពាសកាលនោះទេ។ជាមួយគ្នានេះ ឯកឧត្តម មាស សុផល អនុរដ្ឋលេខាធិការ បានជំរុញគ្រប់អ្នកពាក់ព័ន្ធក្នុងខេត្តមណ្ឌលគីរី បន្តគាំទ្រយុទ្ធសាស្ត្រចក្រាបរិស្ថាន និងយុទ្ធនាការនានារបស់ក្រសួងជាពិសេស «កម្ពុជាស្អាត ខ្មែរធ្វើបាន» ព្រមទាំងបន្តជំរុញវិធានការ៣កុំ ចំពោះសំណល់«កុំបោះ កុំដុត និងកុំ កប់»សំណល់ប្លាស្ទិក។គួរបញ្ជាក់ថា យុទ្ធនាការ «កម្ពុជាស្អាត ខ្មែរធ្វើបាន» នៅខេត្តមណ្ឌលគីរី ធ្វើឡើងក្នុងគោលបំណង៖ ១- ពង្រឹងកិច្ចសហប្រតិបត្តការរវាងថ្នាក់ក្រោមជាតិ និងថ្នាក់ក្រោមជាតិ ដើម្បីកាត់បន្ថយការប្រើប្រាស់ប្លាស្ទិក ២- ណែនាំអំពីផលប៉ះពាល់នៃសំណល់ប្លាស្ទិកមកលើបរិស្ថាន និងសុខភាពទៅដល់យុវជន និងភាគីពាក់ព័ន្ធ ដើម្បីសាលារៀនស្អាត និងភូមិស្អាត ៣- ពង្រឹងការអនុវត្តយុទ្ធនាការ សាលារៀនគ្មានសំណល់ប្លាស្ទិក ដោយមានការចូលរួមពីសិក្សានុសិស្សនៅក្នុងសាលា និងបន្តឥរិយាបថល្អរបស់សិស្សទៅដល់អ្នកភូមិ ឬសហគមន៍ និង៤-កែសម្អសកម្មភាពរបស់សាលាក្នុងការញែក និងកែច្នៃសំណល់៕

កម្ពុជា ដាក់ប្រើប្រាស់ជាផ្លូវការសៀវភៅសិក្សាស្តីពី អក្ខរកម្មឌីជីថល អក្ខរកម្មហិរញ្ញវត្ថុ និងសុវតិ្ថភាពតាមប្រព័ន្ធអនឡាញ

ក្រសួងអប់រំ យុវជន និងកីឡា និងអង្គការ ឆាលហ្វាន កម្ពុជា បានប្រារព្ធពិធីប្រកាសដាក់ប្រើប្រាស់ជាផ្លូវការនូវសៀវភៅសិក្សាអក្ខរកម្មឌីជីថល អក្ខរកម្មហិរញ្ញវត្ថុ និងសុវត្ថិភាពតាមប្រព័ន្ធអនឡាញ របស់គម្រោងបង្កើនសមត្ថភាព ឌីជីថលក្នុង វិស័យអប់រំ, នាព្រឹកថ្ងៃទី៣១ ខែមករា ឆ្នាំ២០២៥នេះ។ឯកឧត្តម អ៊ុង ជិនណា អគ្គនាយក នៃអគ្គនាយកដ្ឋានអប់រំ ក្រសួងអប់រំ យុវជន និងកីឡា បានមានប្រសាសន៍ថា តាមរយៈគម្រោង អង្គការឆាលហ្វាន កម្ពុជា បានទទួលការអនុញ្ញាតដ៏ខ្ពង់ខ្ពស់ពីឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រី្ដ រដ្ឋមន្ត្រីក្រសួងអប់រំយុវជន និងកីឡា ក្នុងការអភិវឌ្ឍសៀវភៅ សិក្សាអក្ខរកម្មឌីជីថល អក្ខរកម្មហិរញ្ញវត្ថុ និងសុវត្ថិភាពតាមប្រព័ន្ធអនឡាញ។គម្រោងបាននឹងកំពុងផ្តល់វគ្គបណ្តុះបណ្តាលស្តីពីកម្មវិធីសិក្សាអក្ខរកម្មឌីជីថល អក្ខរកម្មហិរញ្ញវត្ថុ និងសុវត្ថិភាពអនឡាញ ដល់សិស្សសាលាគោលដៅទាំង១៧ ក្នុងរាជធានីភ្នំពេញ និងខេត្តកណ្តាល ចំនួន១៨ ២៣៧ នាក់ (ស្រីចំនួន៩ ៨៩២នាក់)។ ចំណែកលោកស្រី ហ៊ុន បូរមី នាយិកាប្រចាំប្រទេស នៃអង្គការឆាលហ្វាន កម្ពុជា បានលើកឡើងថា អង្គការបានគាំទ្រកុមារ និងក្រុមគ្រួសាររបស់គេ ក្នុងប្រទេសកម្ពុជា តាមរយៈកម្មវិធីអភិវឌ្ឍដែលមានរយៈពេលវែងនៅក្នុងវិស័យដូចជា៖វិស័យកិច្ចការពារកុមារ, វិស័យអប់រំ និងវិស័យបំណិនជីវិត និងសង្គម រួមទាំងការកាត់បន្ថយគ្រោះមហន្តរាយ។ សៀវភៅ និងសម្ភារៈឧបទ្ទេសសម្រាប់បណ្តុះបណ្តាលអំពីអក្ខរកម្មឌីជីថល អក្ខរកម្មហិរញ្ញវត្ថុ និងសុវត្ថិភាពតាមប្រព័ន្ធអនឡាញដែលនឹងប្រកាសដាក់អោយប្រើប្រាស់ជាផ្លូវការនៅក្នុងថ្ងៃនេះ គឺជាផ្នែកមួយនៃគម្រោង បង្កើនសមត្ថភាព ឌីជីថលក្នុងវិស័យអប់រំ ដែលទទួលបានការគាំទ្រថវិកាពីធនាគារ អ៊ូរី និងអង្គការឆាលហ្វាន កូរ៉េ ហើយអនុវត្តន៏ដោយអង្គការឆាលហ្វាន កម្ពុជា ក្នុងភាពជាដៃគូរជាមួយ អង្គការបង្រៀនដើម្បីកម្ពុជា Teach for Cambodia ពី ខែ មេសា ឆ្នាំ ២០២៣ ហើយនឹងបញ្ចប់នៅ ខែតុលា ឆ្នាំ ២០២៥។ គោលបំណងរួមរបស់គម្រោង គឺដើម្បីផ្តល់អោយកុមារ និងយុវជនកម្ពុជា មានជំនាញចាំបាច់ក្នុងសតវត្សទី២១ រួមមានចំណេះដឹងផ្នែកឌីជីថល ចំណេះដឹងផ្នែកហិរញ្ញវត្ថុ និងសុវត្ថភាពលើការប្រើប្រាស់ប្រពន្ធ័អនឡាញ ដើម្បីអោយពួកគេក្លាយជា ពលរដ្ឋ ដែលមានចំណេះដឹង សមត្ថភាព ជំនាញ និងទេពកោសល្យខ្ពស់។ គម្រោង ផ្តោតលើ បទអន្តរាគមន៍សំខាន់ៗដូចជា៖ កែលម្អហេដ្ឋារចនាសម្ព័ន្ធសិក្សាឌីជីថល ព្រមទាំងការពង្រឹងអភិបាលកិច្ចសាលាសម្រាប់ការគ្រប់គ្រងការសិក្សាឌីជីថលប្រកបដោយបរិយាប័ន្ន និងមានសុវត្ថិភាព។ ផ្តល់នូវចំណេះដឹង នៃសតវត្សទី២១ ដើម្បីការសិក្សាពេញមួយជីវិតសម្រាប់កុមារនៅក្នុងសាលាគោលដៅទាំង១៧ និងបង្កើនការយល់ដឹងជាសាធារណៈលើអក្ខរកម្មឌីជីថលនៅតាមសហគមន៍ និងថ្នាក់ជាតិ។នាឱកាសនោះឯកឧត្តមបណ្ឌិត អ៊ុម រម្យណី រដ្ឋលេខាធិការតំណាងដ៏ខ្ពង់ខ្ពស់ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា បានថ្លែងថា គម្រោងនេះពិតជាបានចូលរួមចំណែក និងឆ្លើយតបទៅនឹងការលើកកម្ពស់លទ្ធភាពទទួលបានបច្ចេកវិទ្យា និងធនធានសម្រាប់កុមារ និងយុវជន បានជំរុញចំណេះដឹងផ្នែកឌីជីថល ជំនាញ ICT ហិរញ្ញវត្ថុ និងសុវត្ថិភាពតាមប្រព័ន្ធអនឡាញ។សាលារៀនគោលដៅរបស់គម្រោងកំពុងកែលម្អហេដ្ឋារចនាសម្ព័ន្ធ ICT បន្តិចម្តងៗ ហើយគ្រូបង្រៀន និងសិស្សានុសិស្សកំពុងត្រូវបានបណ្តុះបណ្តាលឱ្យប្រើប្រាស់ឧបករណ៍ឌីជីថល ហិរញ្ញវត្ថុ និងសុវត្ថិភាពតាមប្រព័ន្ធអនឡាញប្រកបដោយប្រសិទ្ធភាព។ ឯកឧត្តម រដ្ឋលេខាធិការ បានបញ្ជាក់ថា ផែនការយុទ្ធសាស្ត្រវិស័យអប់រំ ២០២៤-២០២៨ ក៏បានយកចិត្តទុកដាក់ខ្ពស់ក្នុងការអភិវឌ្ឍ មូលធនមនុស្ស ដើម្បីឆ្លើយតបនឹងយុទ្ធសាស្ត្របញ្ចកោណដំណាក់កាលទី១ ស្តីពីការអភិវឌ្ឍមូលធន មនុស្ស៖ មុំទី១)ការពង្រឹងគុណភាពវិស័យអប់រំ កីឡា វិទ្យាសាស្ត្រ និងបច្ចេកវិទ្យា ដែលជាកត្តាគន្លឹះ ដើម្បីរក្សាចីរភាពនៃកំណើន និងការពង្រឹងភាពធន់សេដ្ឋកិច្ច-សង្គម។ ក្នុងន័យនេះ ក្រសួងអប់រំ យុវជន និងកីឡា បានដាក់បញ្ចូលការប្រើប្រាស់ឌីជីថលក្នុងការអប់រំ ដើម្បីធានាបានប្រសិទ្ធភាព នៃការសិក្សា និងសមត្ថភាពក្នុងការចាប់យកអ្វីដែលថ្មី ដែលជាមូលដ្ឋានគ្រឹះនៃការបង្កើតភាពធន់ ដើម្បីឆ្លើយតបទៅ នឹងការផ្លាស់ប្តូរយ៉ាងឆាប់រហ័សនៃសង្គម-សេដ្ឋកិច្ចផងដែរ៕អត្ថបទ រដ្ឋា

ស្ថាប័នរដ្ឋ និងឯកជន នឹងសហការលើកកម្ពស់សមភាពយេនឌ័រ បង្កើនភាពអង់អាចដល់ស្ត្រី និងក្មេងស្រី

ក្រសួងកិច្ចការនារី និងសមាគមសិល្បករខ្មែរ នឹងសហការគ្នាក្នុងការលើកកម្ពស់សមភាពយេនឌ័រ និងបង្កើនភាពអង់អាចដល់ស្ត្រី និងក្មេងស្រី តាមរយៈវិស័យសិល្បៈវប្បធម៌ នៅក្នុងសង្គមមួយគ្មានការរំលោភសិទ្ធិ និងរស់នៅក្នុងគ្រួសារ មិនមានអំពើហិង្សាជាដើម។លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី នៅក្នុងជំនួបពិភាក្សាការងារជាមួយ អ្នកឧកញ៉ា ម៉ៅ ចំណាន ប្រធានសមាគមសិល្បករខ្មែរ និងគណប្រតិភូ នៅរសៀលថ្ងៃទី ៣០ ខែមករា ម្សិលមិញនេះ លោកជំទាវកិត្តិបណ្ឌិតរដ្ឋមន្ត្រី បានសម្តែងនូវការអបអរសាទរ និងកោតសរសើរចំពោះការដឹកនាំសមាគម សិល្បករខ្មែរដ៏ល្អរបស់អ្នកឧកញ៉ា ដែលធ្វើឱ្យវិស័យសិល្បៈ ខ្មែរមានភាពរីកចំរើន និងសកម្មភាពជាយុទ្ធសាស្ត្រ ក្នុងការលើកកម្ពស់តម្លៃ សីលធម៌សង្គមរបស់សិល្បករខ្មែរ ដើម្បីរក្សាឱ្យបាននូវ កិត្តិយសសក្តិសមជាសិល្បករតំណាងជាតិតាមរយៈការអភិរក្ស អភិវឌ្ឍសិល្បៈវប្បធម៌ជាតិ។លោកជំទាវកិត្តិបណ្ឌិត បានបញ្ជាក់ថា បេសកកម្មរបស់សមាគម ពិតជាមានភាពស៊ីសង្វាក់គ្នា ជាមួយគោលបំណងរបស់ គណៈកម្មាធិការជាតិលើកកម្ពស់សីលធម៌សង្គម តម្លៃស្រ្តី និងគ្រួសារខ្មែរ ដើម្បីលើកកម្ពស់សីលធម៌សង្គម តម្លៃស្រ្តី និងគ្រួសារខ្មែរ ក្នុងគោលដៅថែរក្សា ការពារវប្បធម៌ជាតិ ធានាដល់ការគោរពសីលធម៌សង្គម និងសុភមង្គលនៅក្នុងគ្រួសារ ដោយលើកកម្ពស់ ស្ថានភាព តួនាទី សុខុមាលភាពស្រ្តីខ្មែរ។ក្នុងកិច្ចពិភាក្សានេះ អ្នកឧកញ៉ា ក៏បានស្នើសុំឱ្យលោកជំទាវរដ្ឋមន្ត្រី ផ្តល់នូវអនុសាសន៍ដល់សមាគមសិល្បករខ្មែរ អំពី សក្តានុពលដែលអាចសហការគ្នាទៅវិញទៅមក ក្នុងកិច្ចការងារជួយដល់សង្គមតាមរយៈវិស័យសិល្បៈវប្បធម៌ ដែលជាចំណែកមួយ យ៉ាងសំខាន់ ក្នុងការលើកកម្ពស់សមភាពយេនឌ័រ និងបង្កើនភាពអង់អាចដល់ស្ត្រីនិងក្មេងស្រី ។ជាលទ្ធផល, ស្ថាប័នទាំងពីរបានឯកភាពគ្នាក្នុងកិច្ចសហការក្នុងភាពជាដៃគូ ដើម្បីឈានទៅដល់ការចុះអនុស្សរណៈនៃការ យោគយល់គ្នា (MoU) លើសកម្មភាពគន្លឹះសំខាន់ៗដែលរួមមាន៖ រៀបចំព្រឹត្តិការណ៍អប់រំផ្សព្វផ្សាយក្នុងទិវានៃក្តីស្រលាញ់ ១៤ កុម្ភៈ តាមរយៈការផលិតសារអប់រំខ្លីៗដើម្បីផ្សព្វផ្សាយតាមទូរទស្សន៍ និងបណ្តាញសង្គម, រៀបចំព្រឹត្តិការណ៍អបអរសាទរទិវានារីអន្តរជាតិ ៨ មីនា, ចូលរួមក្នុងយុទ្ធនាការ១៦ថ្ងៃ លុបបំបាត់អំពើហិង្សា, និងទិវារក្មេងស្រី ក្នុងឆ្នាំ២០២៥ ខាងមុខនេះ៕ អត្ថបទ៖ សុន រ៉ាឌី,

រដ្ឋមន្ដ្រីអប់រំ៖ បេសកកម្មកាយរឹទិ្ធជាតិកម្ពុជា ពិតជាបានឆ្លើយតបយ៉ាងវិជ្ជមាន ទៅនឹងអនុសាសន៍របស់សម្តេចបវរធិបតី ហ៊ុន ម៉ាណែត

ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងជាប្រធានកាយរឹទ្ធិជាតិកម្ពុជា បានថ្លែងថា បេសកកម្មកាយរឹទិ្ធជាតិកម្ពុជា ពិតជាបានឆ្លើយតបយ៉ាងវិជ្ជមាន និងមានប្រសិទ្ធភាពបំផុតទៅនឹងអនុសាសន៍របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ស្តីពីការលើកកម្ពស់គុណភាពអប់រំ។ឯកឧត្តមឧបនាយករដ្ឋមន្ត្រី ហង់ជួន ណារ៉ុន បានលើកឡើងបែបនេះនាឱកាសអញ្ជើញជាអធិបតីភាព ក្នុងពិធីសច្ចាប្រណិធាន និងបំពាក់កន្សែងជូននវមេដឹកនាំកាយរឹទ្ធិ នៃកងឯកភាពសាកលវិទ្យាល័យជាតិបាត់ដំបង ចំនួន ១៥៥នាក់ ស្រី ៤៦នាក់ និងមានការចូលរួមពីសំណាក់ លោក-លោកស្រី ជាថ្នាក់ដឹកនាំក្រសួងអប់រំ យុវជន និងកីឡា ឯកឧត្តមសាកលវិទ្យាធិការ នៃសាកលវិទ្យាល័យជាតិបាត់ដំបង តំណាងប្រធានមន្ទីរអប់រំ យុវជន និងកីឡាខេត្តបាត់ដំបង មន្ត្រីមកពីនាយកដ្ឋានសហប្រតិបតិ្តការកាយរឹទិ្ធ និងអង្គភាពពាក់ព័ន្ធ នៅថ្ងៃទី៣០ មករា។តាមរយៈរបាយការណ៍របស់ ឯកឧត្តម សុខ ឃន សាកលវិទ្យាធិការ និងជាមេកងឯកភាពនៃសាកលវិទ្យាល័យជាតិបាត់ដំបង បានបង្ហាញថា នេះជាលើកទី១ ដែលគ្រឹះស្ថានឧត្តមសិក្សាសាធារណៈ បានរៀបចំកម្មវិធីបណ្តុះបណ្តាលជំនាញកាយរឹទិ្ធ និងបំពាក់កន្សែងកាយរឹទិ្ធដល់ថ្នាក់ដឹកនាំ និងបុគ្គលិកអប់រំ គ្រប់លំដាប់ថ្នាក់ ស្របតាមរចនាសម្ព័ន្ធគ្រប់គ្រងរបស់សាកលវិទ្យាល័យទាំងមូល ដោយបានគូសបញ្ជាក់ពីការប្ដេជ្ញាចិត្តរបស់សាកលវិទ្យាល័យក្នុងការបន្តរៀបចំវគ្គបណ្តុះបណ្តាល និងពិធីសច្ចាប្រណិធាន បំពាក់កន្សែងដល់និស្សិតទាំងអស់នាពេលបន្តបន្ទាប់ទៀត។ នេះជាការចូលរួមរបស់សាកលវិទ្យាល័យជាតិបាត់ដំបង ក្នុងការពង្រឹងនិងពង្រីកនូវសមាជិកសមាជិកាកាយរឹទ្ធិជាតិកម្ពុជា ដើម្បីបានចូលរួមចំណែកអភិវឌ្ឍន៍សង្គម។ក្នុងឱកាសនេះដែរ ឯកឧត្តមបណ្ឌិតសភាចារ្យ ឧបនាយករដ្ឋមន្រ្តី បានមានប្រសាសន៍ថា «បេសកកម្មកាយរឹទិ្ធជាតិកម្ពុជា ពិតជាបានឆ្លើយតបយ៉ាងវិជ្ជមាន និងមានប្រសិទ្ធភាពបំផុតទៅនឹងអនុសាសន៍របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ស្តីពីការ លើកកម្ពស់គុណភាពអប់រំ ដោយផ្តោតលើការពង្រឹងគុណភាពសាលារៀនរដ្ឋ កែប្រែជាសាលារៀនគំរូ ចាប់ពីថ្នាក់មត្តេយ្យសិក្សាដល់មធ្យមសិក្សា ដោយការបញ្ចូលសកម្មភាពកាយរឹទិ្ធ ចូលរួមការពង្រឹងសកម្មភាពក្រៅម៉ោងសិក្សា ការពង្រឹងវិន័យ សីលធម៌ ចរិយាធម៌ សុជីវធម៌ គុណធម៌ និងឥរិយាបថល្អរបស់សិស្សស្របតាមស្តង់ដាសាលារៀនគំរូ»។ ការរៀបចំ «ក្លឹបកាយរឹទិ្ធ» នៅតាមសាលារៀន បានបណ្តុះបណ្តាល និងអភិវឌ្ឍបុគ្គលិកលក្ខណៈពេញលេញ និងបំណិនសតវត្សរ៍ទី២១ដល់យុវជននិងកុមារ ដើម្បីប្រែក្លាយពួកគេទៅជាពលរដ្ឋល្អ ព្រមទាំងជួយគាំទ្រដល់ក្រុមប្រឹក្សាកុមារកម្ពុជា ក្រុមប្រឹក្សាយុវជនកម្ពុជា និងការពង្រឹងការគ្រប់គ្រងនៅតាមគ្រឹះស្ថានសិក្សា ព្រមទាំងការជំរុញចលនាប្រឡងប្រណាំងបីល្អ «កូនល្អ សិស្សល្អ មិត្តល្អ» ដូចជាការបង្កើតក្លឹបសកម្មភាពយុវជន និងក្លឹបសិក្សាសម្រាប់ជួយបំប៉នបន្ថែមដល់សិស្សត្រៀមប្រឡងមធ្យមសិក្សាទុតិយភូមិ។ ទាំងនេះ គឺជាយន្តការដ៏មានសារៈសំខាន់ក្នុងការគាំទ្រសាលារៀនគំរូ និងប្រែក្លាយយុវជននិងកុមារទៅជាពលរដ្ឋល្អ ពលរដ្ឋសកល និង មានស្មារតីស្រឡាញ់ជាតិ ការពារមាតុភូមិ និងការអភិវឌ្ឍសង្គមកម្ពុជា។បន្ថែមពីនេះ កាយរឹទិ្ធជាតិកម្ពុជា បានចូលរួមយ៉ាងសកម្មក្នុងការអនុវត្តគោលនយោបាយជាតិស្តីពី ការអភិវឌ្ឍយុវជនកម្ពុជា គោលនយោបាយជាតិស្តីពីការសិក្សាពេញមួយជីវិត និងផែនការយុទ្ធសាស្រ្តវិស័យអប់រំ សំដៅរួមចំណែកអភិវឌ្ឍកម្មវិធីសម្រាប់កុមារនិងយុវជនកម្ពុជា ឱ្យមានវិជ្ជាសម្បទា បំណិនសម្បទា ចរិយាសម្បទា និងជំនាញសតវត្សទី២១ ឆ្លើយតបទៅនឹងបដិវត្តន៍ឧស្សាហកម្ម៤.០ និងបរិវត្តកម្មឌីជីថល។ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានចូលរួមអបអរសាទរ និងកោតសរសើដោយស្មោះស្ម័គ្រចំពោះថ្នាក់ដឹកនាំ និងមន្ត្រីអប់រំគ្រប់លំដាប់ថ្នាក់នៃសាកលវិទ្យាល័យជាតិបាត់ដំបង មន្ត្រីអប់រំមកពីគ្រប់មជ្ឈដ្ឋានពាក់ព័ន្ធ ព្រមទាំងក្រុមការងារនាយកដ្ឋានសហប្រតិបតិ្តការកាយរឹទិ្ធ ដែលបានខិតខំប្រឹងប្រែងអស់ពីកម្លាំងកាយចិត្ត និងបានចំណាយពេលវេលាជួយបង្កលក្ខណៈគ្រប់យ៉ាង ជំរុញលើកទឹកចិត្តលោកគ្រូ អ្នកគ្រូ និងបុគ្គលិកអប់រំ ឱ្យស្ម័គ្រចិត្តចូលរួមក្នុងចលនាកាយរឹទិ្ធជាតិកម្ពុជា ដើម្បីសម្រេចបានកំណើនសមាជិកភាពស្របតាមផែនការយុទ្ធសាស្រ្តរបស់កាយរឹទិ្ធជាតិកម្ពុជា ឆ្នាំ២០២៤-២០២៨។គួរបញ្ជាក់ដែរថា បច្ចុប្បន្ន កាយរឹទិ្ធជាតិកម្ពុជា មានសមាជិកសរុប ១៨៥ ៣៥៦នាក់ ក្នុងនោះ កាយរឹទិ្ធប្អូន ១៩ ០១៦ នាក់ កាយរឹទិ្ធជំទង់ ១២៧ ៤៣១ នាក់ កាយរឹទិ្ធរៀមច្បង ២២ ៧៣៧ នាក់ មេដឹកនាំកាយរឹទិ្ធ ១៣ ៦៤៧ នាក់ និងសមាជិកកិត្តិយស ២ ៥២៥ នាក់៕

នាវាចម្បាំងកងទ័ពជើងទឹកកាណាដា ១គ្រឿង គ្រោងចូលសំចតធ្វើទស្សនកិច្ចជាផ្លូវការនៅកម្ពុជា

នាយនាវី ទីបញ្ជាការជួបមុខអគ្គលេខាធិការដ្ឋាន នៃគណៈកម្មការជាតិសន្តិសុខលម្ហសមុទ្រ ប្រាប់ឲ្យដឹងថា នាវាចម្បាំងកងទ័ពជើងទឹកប្រទេសកាណាដា ១គ្រឿង គ្រោងចូលសំចតនៅកំពង់ផែស្វយ័តអន្តរជាតិក្រុងព្រះសីហនុ ក្នុងដំណើរទស្សនកិច្ចជាផ្លូវការនៅកម្ពុជា រយៈពេល ៤ថ្ងៃ (ថ្ងៃទី ០១-០៤ ខែកុម្ភៈ ឆ្នាំ២០២៥) ដើម្បីរឹតចំណងសាមគ្គីភាព មិត្តភាព រវាងកងទ័ពជើងទឹកប្រទេសទាំងពីរ ។ លោក បន្តថា ក្នុងដំណើរទស្សនកិច្ចជាផ្លូវការនៅកម្ពុជា ដើម្បីរឹតចំណងសាមគ្គីភាព មិត្តភាព រវាងកងទ័ពជើងទឹកប្រទេសទាំងពីរ ក្នុងនោះក៏មានកម្មវិធីខ្លះៗរួមមាន -ការប្រកួតកីឡាបាល់ទាត់ បាល់ទះជាមិត្តភាព -លោកវេជ្ជបណ្ឌិត និងគ្រូពេទ្យមកពិនិត្យមជ្ឈមណ្ឌលវិជ្ជសាស្ត្រនៅមូលដ្ឋានសមុទ្ររាម កងទ័ពជើងទឹក ដោតលើជំនាញការុករកស្វែងរក និងសង្គ្រោះ ។ល។ នាវាចម្បាំងកងទ័ពជើងទឹកកាណាដា ឈ្មោះ HMCS OTTAWA FFH 341 (Frigate. Helicopter) ដឹកនាំដោយមេបញ្ជាការ Adriano Lozer មាននាវិក ២៥៥នាក់។ នាវានេះ មានបណ្ដោយប្រវែងជាង ១០០ម៉ែត្រ ទទឹងជាង ១៦ម៉ែត្រ ជម្រៅទឹកជាង ៧ម៉ែត្រ ទម្ងន់ផ្ទុក ៥.០០០តោន ល្បឿន ៣០ knots ឧទ្ធម្ភាគចក្រ CH-148 Cyclone ១គ្រឿង៕

ព្រះចៅអធិការវត្តមានគុណ ប្រគល់បំណែកព្រះពុទ្ធប្រក់នាគ ជូនសារមន្ទីរខេត្តកំពង់ឆ្នាំង ដើម្បីតម្កល់ទុកជាសម្បត្តិជាតិ

តាមរយៈលោក អោក ហៃ មន្រ្តីកិច្ចសន្យា(ឆ្មាំ) ប្រចាំការនៅស្រុកកំពង់លែង បាននាំយកបំណែកព្រះពុទ្ធប្រក់នាគ ធ្វើពីថ្មភក់ មានកម្ពស់៣១.២ស.ម ទទឹង៣៦.៩ស.ម និងកម្រាស់១៧.១ស.ម សម័យអង្គរ មានប្រភពដើមមកពីវត្តមានគុណ ហៅវត្តត្របែក ស្ថិតក្នុងភូមិត្របែក ឃុំត្រងិល ស្រុកកំពង់លែង ខេត្តកំពង់ឆ្នាំង, នាព្រឹកថ្ងៃទី៣១ ខែមករា ឆ្នាំ២០២៥។វត្ថុបុរាណខាងលើនេះ ត្រូវបានព្រះចៅអធិការវត្តមានគុណ ព្រះនាម ជាន លុន ហៅវត្តត្របែក បានប្រគល់មកឱ្យឆ្មាំ យកមកដាក់ក្នុងសារមន្ទីរខេត្តកំពង់ឆ្នាំង ដើម្បីថែរក្សា និងតាំងបង្ហាញជូនសាធារណជនចូលទស្សនា និងសិក្សាឈ្វេងយល់ពីតម្លៃនៃប្រវត្តិសាស្រ្ត វប្បធម៌ដែលត្រូវបានបន្សល់ទុកដោយដូនតាយើង។ លោក សន ចាន់ធឿន ប្រធានការិយាល័យសារមន្ទីរ បានលើកឡើងថា ក្រោយពីបានធ្វើពិធីទទួល-ប្រគល់វត្ថុបុរាណ ក្រោមវត្តមានលោក ប៊ុនថន សុខាណារិទ្ធ ប្រធានមន្ទីរវប្បធម៌ និងវិចិត្រសិល្បៈខេត្តកំពង់ឆ្នាំង ដែលជាបំណែកបដិមាព្រះពុទ្ធប្រក់នាគមក មន្រី្តជំនាញរបស់សារមន្ទីរខេត្តកំពង់ឆ្នាំង នឹងធ្វើការថែរក្សា អភិរក្សក្រៅពីជួសជុលរួចរាល់ និងរៀបចំចុះបញ្ជីសារពើភណ្ឌ បញ្ចូលក្នុងប្រព័ន្ធទិន្នន័យ Data base របស់សារមន្ទីរជាតិ និងដាក់តាំងបង្ហាញជូនសាធារណជនចូលទស្សនាសិក្សាស្វែងយល់។ ក្រៅពីនេះ សារមន្ទីរខេត្តកំពង់ឆ្នាំង ក៏សិក្សាបន្ថែមលើទីតាំងប្រភពដើមសមុច្ច័យមួយនេះបន្តទៀតផងដែរ៕ អត្ថបទ រដ្ឋា

សម្តេចប្រធានរដ្ឋសភាលើកទឹកចិត្តឯកអគ្គរដ្ឋទូតស៊ែបៃហ្សង់ទាក់ទាញអ្នកវិនិយោគមកបណ្តាក់ទុននៅកម្ពុជា លើឧស្សាហកម្មកែច្នៃ ថាមពល កសិកម្ម សុខាភិបាលបន្ថែមទៀត

សម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា បានលើកទឹកចិត្ត ឯកអគ្គរដ្ឋទូតនៃសាធារណរដ្ឋអាស៊ែបៃហ្សង់ ប្រចាំព្រះរាជាណាចក្រកម្ពុជា ជួយទាក់ទាញអ្នកវិនិយោគអាស៊ែបៃហ្សង់ អញ្ជើញមកស្វែងរកឱកាសវិនិយោគថ្មីៗបន្ថែមទៀតនៅកម្ពុជា លើឧស្សាហកម្មកែច្នៃ ឧស្សាហកម្មថាមពល និងកម្មន្តសាល ដែលជាវិស័យដ៏មានសក្តានុពលនៅក្នុងតំបន់ និងសកលលោក។ សម្តេចប្រធានរដ្ឋសភា បានគូសបញ្ជាក់ថា កម្ពុជាកំពុងទទួលបានការចាប់អារម្មណ៍ និងទាក់ទាញអ្នកវិនិយោគយ៉ាងច្រើន ក្នុងវិស័យឧស្សាហកម្មទំាងនោះ ដោយសារកត្តាគោលនយោបាយពន្ធនាំចេញ ភូមិសាស្រ្ត នៃកំពង់ផែប្រទេសកម្ពុជាមានលក្ខណៈអំណោយផល ផ្ដល់ភាពងាយស្រួលក្នុងការដឹកទំនិញចេញចូលតាមផ្លូវទឹក។ ជាមួយគ្នានេះសម្តេចបានបញ្ជាក់ថា ប្រទេសទាំងពីរនៅមានសក្តានុពលផ្សេងៗជាច្រើនទៀត ដើម្បីជំរុញ និងបង្កើនការវិនិយោគផងដែរ ក្នុងនោះការនាំចេញនូវផលិតផលកសិកម្មពីកម្ពុជា ដូចជា អង្ករ ម្រេច ផ្លែស្វាយ គ្រាប់ស្វាយចន្ទី និងវិស័យសុខាភិបាលជាដើម។ សម្ដេចរដ្ឋសភាធិបតី ឃួន សុដារី បានលើកឡើងដូច្នេះនៅក្នុងឱកាសទទួលជួបពិភាក្សាការងារជាមួយ ឯកឧត្តម ស៊ូវគី មេឌីហ្សាដា (Shovgi Mechdizade) ឯកអគ្គរដ្ឋទូត នៃសាធារណរដ្ឋអាស៊ែបៃហ្សង់ ប្រចាំព្រះរាជាណាចក្រកម្ពុជា នៅព្រឹកថ្ងៃទី៣១ ខែមករា ឆ្នាំ ២០២៥ នៅវិមានរដ្ឋសភា។ សម្តេចប្រធានរដ្ឋសភា បានស្វាគមន៍យ៉ាងកក់ក្តៅ និងមានក្តីសោមនស្សរីករាយ ចំពោះវត្តមានរបស់ ឯកឧត្តម ស៊ូវគី មេឌីហ្សាដា ដែលបានអញ្ជើញមកកាន់វិមានរដ្ឋសភា ជាថ្មីម្តងទៀត ខណៈដែល សម្តេច ធ្លាប់បានជួប ឯកឧត្តម ឯកអគ្គរដ្ឋទូត កាលពីចុងឆ្នាំ២០២៣ នៅពេលដែលសម្តេចទើបត្រូវបានរដ្ឋសភាបោះឆ្នោតជ្រើសតាំងជាប្រធានរដ្ឋសភានីតិកាលទី៧។ សម្តេចប្រធានរដ្ឋសភាបានរំលឹកថា កាលពីជំនួបលើកមុន ឯកឧត្តម ឯកអគ្គរដ្ឋទូត បានផ្តួចផ្តើមគំនិតអំពីការចងក្រងក្រុមនិស្សិតកម្ពុជាដែលបានទទួលការសិក្សានៅប្រទេសអាស៊ែបៃហ្សង់ (Alumni)។ សមាគមនិស្សិតនៅដើរតួសំខាន់មួយចំណែកទៀតក្នុងការពង្រឹង និងពង្រីកទំនាក់ទំនងទ្វេភាគី ព្រោះទំនាក់ទំនងរវាងប្រជាជននិងប្រជាជន ពិតជាមានសារៈសំខាន់ខ្លាំងណាស់ និងជាមូលដ្ឋានគ្រឹះ នៃការលើកកម្ពស់ទំនាក់ទំនងទ្វេភាគីឱ្យកាន់តែប្រសើរឡើងថែមទៀត។ សម្តេចរដ្ឋសភាធិបតី បានគូសបញ្ជាក់ថា ក្នុងនាមរដ្ឋសភា សម្តេចគាំទ្រចំពោះគំនិតផ្តួចផ្តើមដ៏ល្អនេះ។ នាពេលបច្ចុប្បន្ន មានសមាគមអតីតនិស្សិតកម្ពុជាដែលសិក្សានៅបរទេសជាច្រើនដូចជា សមាគមអតីតនិស្សិតអូស្រ្តាលី ជប៉ុន សឹង្ហបូរី អង់គ្លេស និងកូរ៉េ ជាដើម។ឯកឧត្តម ស៊ូវគី មេឌីហ្សាដា បានថ្លែងអំណរគុណយ៉ាងជ្រាលជ្រៅ ដែលសម្តេចមហារដ្ឋសភាធិការធិបតី តែងតែឆ្លៀតឱកាសជួបពិភាក្សាការងារជាមួយឯកឧត្តម។ សម្តេចក៏ដូចជារដ្ឋសភាទំាងមូល បានសហការយ៉ាងល្អជាមួយស្ថានទូតសាធារណរដ្ឋអាស៊ែបៃហ្សង់ ប្រចាំនៅកម្ពុជា ទោះបីស្ថានទូតមាននិវេសនដ្ឋាននៅទីក្រុងហាណូយប្រទេសវៀតណាមយ៉ាងណាក្តី។ កិច្ចសហប្រតិបត្តិការរបស់រដ្ឋសភា បានលើកកម្ពស់ទំនាក់ទំនងកិច្ចសហប្រតិបត្តិការប្រទេសទំាងពីរឱ្យមានការរីកចម្រើននិងរឹងមាំជាលំដាប់ទំាងខាងស្ថាប័ននីតិប្បញ្ញត្តិនិងនីតិប្រតិបត្តិ។ឯកឧត្តម ឯកអគ្គរដ្ឋទូត បានវាយតម្លៃខ្ពស់និងកោតសរសើរយ៉ាងក្រៃលែងពីការរីកចម្រើនលើគ្រប់វិស័យរបស់កម្ពុជា ក្រោមការដឹកនាំរបស់រាជរដ្ឋាភិបាលនីតិកាលទី៧ មានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្រ្តី ដែលបន្តបេសកកម្មពីសម្តេចតេជោ ហ៊ុន សែន។ ឯកឧត្តម ឯកអគ្គរដ្ឋទូត បានគូសបញ្ជាក់ថានឹងខិតខំលើកកម្ពស់ទំនាក់ទំនងប្រទេសទំាងពីរឱ្យកាន់តែរឹងមាំនិងរីកចម្រើនបន្ថែមទៀតដោយនៅក្នុងនោះ បានសន្យាថានឹងកៀរគរអ្នកវិនិយោគអាស៊ែបៃហ្សង់ មកកម្ពុជាបន្ថែមទៀត។ សូមរំលឹកថាកាលពីឆ្នាំ២០២២ កន្លងទៅ រដ្ឋសភាកម្ពុជានិងរដ្ឋសភាអាស៊ែបៃហ្សង់ បានចុះហត្ថលេខាលើអនុស្សរណៈយោគយល់គ្នា (MoU) ដើម្បីបង្កើនកិច្ចសហប្រតិបត្តិការរដ្ឋសភានៃប្រទេសទំាងពីរ ទាំងកម្រិតទ្វេភាគី និងពហុភាគី ឱ្យកាន់តែជិតស្និទ្ធ និងស៊ីជម្រៅ។ សភាកម្ពុជានិងអាស៊ែបៃហ្សង់ តែងបានសហការ និងគាំទ្រគ្នាទៅវិញទៅមកក្នុងក្របខណ្ឌអន្តរសភាទាំងក្នុងក្របខណ្ឌតំបន់និងអន្តរជាតិ ជាអាទិ៍ អន្តរសភាអាស៊ាន (AIPA) សហភាពអន្ដរសភា(IPU) វេទិកាសមាជិកចលនាមិនចូលបក្សសម្ព័ន្ធ (Non-Aligned Movement/NAM) និងវេទិកាសភាអាស៊ីប៉ាស៊ីហ្វិក (APPF)។ សម្ដេចប្រធានរដ្ឋសភា មានប្រសាសន៍ថា ដើម្បីពង្រឹងទំនាក់ទំនងរវាងប្រទេសទាំងពីរឱ្យកាន់តែរឹងមាំ និងស្និទ្ធស្នាលបន្ថែមទៀត សភាទាំងពីរគួរបន្ដជំរុញការផ្លាស់ប្ដូរទស្សនកិច្ចរវាងថ្នាក់ដឹកនាំសភា ក្រុមមិត្ដភាពរដ្ឋសភា និងគណៈកម្មការជំនាញផងដែរ។ទំនាក់ទំនងដ៏ល្អរវាងកម្ពុជានិងអាស៊ែបៃហ្សង់ ពិតជាមានសារៈសំខាន់ដែលមិនត្រឹមតែរួមចំណែកដល់ការពង្រឹង ពង្រីកទំនាក់ទំនង ចំណងមិត្ដភាព និងកិច្ចសហប្រតិបត្តិការទ្វេភាគីរវាងប្រទេសយើងទាំងពីរដែលមានរយៈពេល ៣០ ឆ្នាំប៉ុណ្ណោះទេ ហើយថែមទាំងបានរួមចំណែកដល់សុខសន្តិភាព ស្ថិរភាព និងការអភិវឌ្ឍ ក្នុងតំបន់ និងសកលលោកថែមទៀតផង៕

ស.ស.យ.ក ធ្វើពិធីសំពះគ្រូមុនដឹកនាំសិល្បករសិល្បការិនីទៅចូលរួមក្បួនដង្ហែឈីងហ្គេ នៅសិង្ហបុរី

សហភាពសហព័ន្ធយុវជនកម្ពុជា នៅព្រឹកថ្ងៃទី ៣១ ខែមករា ឆ្នាំ ២០២៥នេះ បានរៀបចំពិធីសំពះគ្រូ តាមបែបសាសនា ដើម្បីសំពរសុំជ័យ សម្រាប់ការចាកចេញទៅចូលរួមសម្ដែងក្នុងក្បួនដង្ហែឈីងហ្គេ ដែលនឹងរៀបចំឡើងនៅសប្ដាហ៍ក្រោយ នៅប្រទេសសិង្ហបុរី។នៅសប្ដាហ៍ក្រោយនេះ សហភាពសហព័ន្ធយុវជនកម្ពុជា នឹងដឹកនាំសិល្បករសិល្បការិនីជាង ៣០រូប របស់កម្ពុជា ដើម្បីទៅបង្ហាញទស្សនីយភាពវប្បធម៌សិល្បៈខ្មែរ ក្នុងព្រឹត្តិការណ៍ក្បួនដង្ហែឈីងហ្គេ នៅប្រទេសសិង្ហបុរី។ ទស្សនីយភាពនោះ មានឈ្មោះថា «ជីវិត» ដែលមានតួអង្គ ទេពព្រះមេ សំណាប ស្រូវ និងទឹក ហើយវាជាការច្របាច់បញ្ចូលគ្នានូវទម្រង់សិល្បៈចម្រុះ ទាំងរបាំបុរាណ ប្រពៃណី និងរបាំសហសម័យ។មុនឈានដល់ការចាកចេញទៅប្រទេសសិង្ហបុរី សហភាពសហព័ន្ធយុវជនកម្ពុជា ក្រោមអធិបតីភាព ឯកឧត្តម សុខ សប្បាយណា តំណាងឱ្យ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា នៅព្រឹកថ្ងៃនេះ ក៏បានដឹកនាំសិល្បករសិល្បការិនី រៀបចំពិធីសំពះគ្រូ សុំពរសុំជ័យសម្រាប់ការចេញទៅសម្ដែងផងដែរ។ ក្នុងថ្ងៃរៀបចំពិធីសំពះគ្រូនេះ វីរសិល្បករ ព្រឿង ឈៀង ដែលនឹងមានវត្តមានដឹកនាំសិល្បករសិល្បការិនីទៅចូលរួមសម្ដែងក្នុងក្បួនដង្ហែឈីងហ្គេ បានលើកឡើងថា ការចូលរួមនេះជាឱកាសដ៏ថ្លៃថ្លាសម្រាប់កម្ពុជាក្នុងការបង្ហាញកិត្យានុភាពរបស់ខ្លួន ឱ្យកាន់តែរីកសុះសាយ ព្រោះព្រឹត្តិការណ៍នេះ ជាព្រឹត្តិការណ៍ដ៏ធំ មានអ្នកទស្សនារាប់លាននាក់។ វីរសិល្បកររូបដដែលលើកឡើងដែរថា ក្រៅពីបង្ហាញពីកិត្យានុភាពរបស់កម្ពុជា វាក៏ឱកាសរបស់សិល្បករសិល្បការិនី រៀនសូត្រពីអន្តរជាតិផងដែរ ផ្លាស់ប្ដូរបទពិសោធន៍ និងផ្សាភ្ជាប់ទំនាក់ទំនងឱ្យកាន់តែជិតស្និទ្ធផងដែរ។វត្តមានរបស់កម្ពុជាទៅចូលរួមក្នុងក្បួនដង្ហែឈីងហ្គេនៅក្នុងឆ្នាំនេះ គឺស្របពេលជាមួយនឹងខួប ៦០ ឆ្នាំនៃការបង្កើតទំនាក់ទំនងទ្វេភាគីរវាងព្រះរាជាណាចក្រកម្ពុជា និងសាធារណរដ្ឋសិង្ហបុរី ។ ក្នុងន័យនេះ ការសម្ដែងទស្សនីយភាព ក្រោមចំណងជើងថា «ជីវិត» ក៏បានបង្កប់នូវអត្ថន័យដ៏វិសេសវិសាលមួយបន្ថែមទៀត នោះគឺ ការរីកលូតលាស់ និងរីកចម្រើននៃចំណងមិត្តភាព កម្ពុជា-សិង្ហបុរី។ ការចូលរួមរបស់កម្ពុជាក្នុងព្រឹត្តិការណ៍ក្បួនដង្ហែឈីងហ្គេ២០២៥ នឹងរួមចំណែកក្នុងការពង្រឹង និងពង្រីកទំនាក់ទំនង រួមទាំងកិច្ចសហប្រតិបត្តិការរវាងកម្ពុជា - សិង្ហបុរីឱ្យកាន់តែរីកចម្រើន រឹងមាំ និងយូរអង្វែងថែមទៀត៕ អត្ថបទ៖ គឹម ហុក

មន្ត្រីជាន់ខ្ពស់ក្រសួងអប់រំយុវជនជំរុញដល់លោកគ្រូអ្នកគ្រូខិតខំនិងរិះរកវិធានការដោះស្រាយកាត់បន្ថយអត្រាត្រួតថ្នាក់និងការបោះបង់សិក្សារបស់សិស្ស

ស្វាយរៀង ÷ មន្ត្រីជាន់ខ្ពស់ក្រសួងអប់រំយុវជននិងកីឡាឯកឧត្តមប៊ួយ ប៊ុណ្ណា អនុរដ្ឋលេខាធិការក្រសួងអប់រំយុវជននិងកីឡា បានជំរុញដល់សាស្ត្រាចារ្យ លោកគ្រូ អ្នកគ្រូនិងផ្នែកពាក់ព័ន្ធត្រូវខិតខំរិះរកវិធានការដោះស្រាយ កាត់បន្ថយឲ្យនៅកម្រិតទាបអត្រាបោះបង់ការសិក្សារបស់សិស្ស ។ ការថ្លែងនិងមានប្រសាសន៍របស់មន្ត្រីជាន់ខ្ពស់ក្រសួងអប់រំបែបនេះបានធ្វើឡើង ក្នុងឱកាសឯកឧត្តមអញ្ជើញបិទសន្និបាតអប់រំឆ្នាំ២០២៣.២០២៤ និងលើកទិសដៅបន្តឆ្នាំ២០២៤.២០២៥ របស់មន្ទីរអប់រំយុវជននិងកីឡាខេត្តស្វាយរៀងថ្ងៃទី៣១ ខែមករា ឆ្នាំ២០២៥ ដោយមានការអញ្ជើញចូលរួមពី លោក ញ៉ែម សារី អភិបាលរងខេត្តស្វាយរៀងផងដែរ ។ ក្នុងនាមឧបនាយករដ្ឋមន្ត្រីរដ្ឋមន្ត្រីក្រសួងអប់រំយុវជននិងកីឡា ឯកឧត្តមហង់ ជួនណារ៉ុង ឯកឧត្តមអនុរដ្ឋលេខាធិការក្រសួង បានសម្តែងអបអរសាទរចំពោះការដឹកនាំរបស់មន្ទីរអប់រំយុវជននិងកីឡាខេត្ត ដែលបានចូលរួមអនុវត្តគោលនយោបាយអប់រំបង្រៀន របស់សាស្ត្រាចារ្យ លោកគ្រូ អ្នកគ្រូ ធ្វើឲ្យសិស្ស ទទួលបានកំណើនក្នុងការប្រឡងជាប់សញ្ញាប័តមធ្យមទុតិយភូមិមានអត្រាខ្ពស់ ។ ឯកឧត្តមអនុរដ្ឋលេខាធិការបានណែនាំដល់មន្ត្រីអប់រំត្រូវបន្តអនុវត្តកំណែទម្រង់ស៊ីជម្រៅដែលក្រសួងអប់រំយុវជននិងកីឡាបាននិងកំពុងអនុវត្ត បន្តអនុវត្តគោលការណ៍អប់រំគឺសាលារៀនផ្សារភ្ជាប់ជាមួយនឹងគ្រួសារជាមួយនឹងសង្គមដោយផ្ដល់ឱកាសស្មើរៗគ្នាឲ្យកុមារដល់វ័យសិក្សាបានចូលរៀនសូត្រគ្រប់គ្នា និងអប់រំពួកគេឲ្យរៀនសូត្ររហូតចប់កម្រិតមធ្យមទុតិយភូមិ ឬយ៉ាងហោចណាស់បានចប់ថ្នាក់ទី៩។ មន្ត្រីអប់រំ លោកគ្រូ អ្នកគ្រូ ត្រូវពង្រឹងការងារគ្រប់គ្រងជំរុញពិនិត្យតាមដាននិងអធិការកិច្ចឲ្យបានជាប់ជាប្រចាំដើម្បីផ្លាស់ប្ដូរឥរិយាបទគ្រូបង្រៀនសម្រាប់អ្នកជំនាន់ថ្មី បន្តថែទាំជួសជុលកសាងអគារសិក្សានិងបំពាក់គ្រឿងសង្ហារឹមសិក្សាឲ្យបានគ្រប់គ្រាន់។ យកចិត្តទុកដាក់ដល់ការកសាងបណ្ណាល័យ បន្ទប់ពិសោធន៍ រោងជាង បន្ទប់គេហៈវិជ្ជា សូនច្បារ សួនបន្លែសួជីវៈចម្រុះ ទីលានកីឡាសម្រាប់ជាកន្លែងសិស្សសិក្សាផងនិងអនុវត្តជាក់ស្ដែងផងស្របតាមគោលការណ៍ផ្សារភ្ជាប់ទ្រឹស្ដីនិងការអនុវត្ត។ តាមរបាយការណ៍ដែលអានដោយលោកខៀវ សំអុល ប្រធានមន្ទីរអប់រំយុវជននិងកីឡាខេត្តស្វាយរៀង បញ្ជាក់ឲ្យដឹងថាក្នុងឆ្នាំសិក្សា២០២៣.២០២៤ ស្វាយរៀងមានបេក្ខជនដាក់ពាក្យប្រលងសញ្ញាបត្រមធ្យមសិក្សាបឋមភូមិចំនួន៧ពាន់ ២០៩នាក់ និងបេក្ខជនដាក់ពាក្យប្រលងមធ្យមសិក្សាទុតិយាភូមិ ចំនួន ៤ពាន់ ១៣៣នាក់ ក្នុងនោះបេក្ខជនប្រលងជាប់និទ្ទេសA ចំនួន៣៧នាក់ និទ្ទេស B ចំនួន២០៦នាក់ និទ្ទេស C ចំនួន៥៨៨នាក់ និទ្ទេស D ចំនួន១ពាន់៤១នាក់ និងនិទ្ទេស Eចំនួន១ពាន់ ៨០នាក់ ។

អូស្ត្រាលី និង យូអិនឌីភី ចុះហត្ថលេខាលើកិច្ចព្រមព្រៀងវិភាគទាន ដើម្បីគាំទ្រកម្ពុជាឆ្ពោះទៅរកការគ្មានមីននៅឆ្នាំ២០៣០

នៅថ្ងៃទី៣០ ខែមករានេះ រដ្ឋាភិបាលប្រទេសអូស្ត្រាលី និងកម្មវិធីអភិវឌ្ឍន៍អង្គការសហប្រជាជាតិ (យូអិនឌីភី) បានចុះហត្ថលេខាលើកិច្ចព្រមព្រៀងវិភាគទានថ្មី ដើម្បីគាំទ្រដល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្លាយជាប្រទេសគ្មានមីននៅឆ្នាំ២០៣០។ រដ្ឋាភិបាលអូស្ត្រាលីបានបន្ថែមថវិកាជំនួយ ចំនួន ២ លានដុល្លារអូស្ត្រាលី ដល់គម្រោងបោសសម្អាតមីនដើម្បីលទ្ធផល ដែលអនុវត្តដោយអាជ្ញាធរមីនកម្ពុជា (CMAA) និង យូអិនឌីភី។ពិធីចុះហត្ថលេខានេះ ធ្វើឡើងនៅការិយាល័យអាជ្ញាធរមីនកម្ពុជា (CMAA) នៅភ្នំពេញ ដោយមានវត្តមានចូលរួមពី ឯកឧត្តមបណ្ឌិត លី ធុជ ទេសរដ្ឋមន្ត្រី និងអនុប្រធានទី១ នៃអាជ្ញាធរមីនកម្ពុជា រួមជាមួយ ឯកឧត្តម ដេរីក យីប ឯកអគ្គរដ្ឋទូតអូស្ត្រាលីប្រចាំព្រះរាជាណាចក្រកម្ពុជា និងលោកស្រី អាលីហ្សា ឆាកឃឺ តំណាងយូអិនឌីភី ប្រចាំនៅកម្ពុជា។ឯកឧត្តមបណ្ឌិត លី ធុជ បានមានប្រសាសន៍ថា អូស្ត្រាលី និង យូអិនឌីភី គឺជាដៃគូដ៏សំខាន់ក្នុងកិច្ចខិតខំប្រឹងប្រែងសកម្មភាពមីនរបស់កម្ពុជា ដោយអូស្ត្រាលីបានផ្តល់ជំនួយជាង ១០០ លានដុល្លារអូស្ត្រាលី ចាប់តាំងពីទសវត្សរ៍ឆ្នាំ ១៩៩០ ដោយក្នុងនោះ ជាង ៣៥ លានដុល្លារអាមេរិកបានផ្តល់ដល់គម្រោងបោសសម្អាតមីនដើម្បីលទ្ធផល។ ឯកឧត្តមបណ្ឌិតបានបន្តទៀតថា "ការគាំទ្រដ៏យូរអង្វែងរបស់ យូអិនឌីភី បានពង្រឹងវិស័យសកម្មភាពមីននៅកម្ពុជា បោសសម្អាតបានផ្ទៃដីទំហំ ៣៨៤ គីឡូម៉ែត្រក្រឡា និងប្រែក្លាយតំបន់គ្រោះថ្នាក់ទៅជាសហគមន៍ដែលរីកចម្រើន"។ឯកឧត្តមបណ្ឌិត លី ធុជ បានលើកសរសើរកងកម្លាំងបោសសម្អាតមីននៅកម្ពុជា ដែលភាពក្លាហាន និងការលះបង់របស់ពួកគេមានសារៈសំខាន់ក្នុងការធានាសុវត្ថិភាពដល់ប្រទេសជាតិ។ ឯកឧត្តមក៏បានស្វាគមន៍កិច្ចប្តេជ្ញាចិត្តជាថ្មីរបស់អូស្ត្រាលីក្នុងការផ្តល់ជំនួយ ចំនួន ២ លានដុល្លារអូស្ត្រាលី ដើម្បីជំរុញបន្ថែមទៀតនូវចក្ខុវិស័យរួម របស់កម្ពុជាគ្មានមីន និងសំណល់ជាតិផ្ទុះពីសង្រ្គាម។ឯកឧត្តម ដេរីក យីប បានមានប្រសាសន៍ថា “អូស្ត្រាលីគឺជាដៃគូដ៏យូរអង្វែង និងមានមោទនភាពរបស់កម្ពុជា ដែលគាំទ្រសកម្មភាពមីនតាំងពីដើមទសវត្សរ៍ឆ្នាំ ១៩៩០ មកម្ល៉េះ។ ចាប់ពីឆ្នាំ ២០០៦មក មូលដ្ឋានគ្រឹះនៃភាពជាដៃគូនេះគឺគម្រោងបោសសម្អាតមីនដើម្បីលទ្ធផល។ គម្រោងនេះមិនត្រឹមតែបោសសម្អាតមីនប៉ុណ្ណោះទេ ប៉ុន្តែវាបានផ្លាស់ប្តូរជីវិតមនុស្ស ដោយផ្តល់ការគាំទ្រដល់ជនរងគ្រោះដោយសារមីន និងធ្វើឱ្យផ្ទៃដីអាចប្រើប្រាស់បានយ៉ាងមានសុវត្ថិភាព ដើម្បីប្រជាជនកម្ពុជាកសាងអនាគតកាន់តែភ្លឺស្វាង»។លោកស្រី អាលីហ្សា ឆាកឃឺ មានប្រសាសន៍ថា “យូអិនឌីភី តែងតែផ្តល់តម្លៃដល់ភាពជាដៃគូយូរអង្វែងជាមួយអូស្ត្រាលី លើគម្រោងបោសសម្អាតមីនដើម្បីលទ្ធផល ដែលមានគោលដៅសម្អាតដីដែលមានគ្រាប់មីន និងសំណល់ជាតិផ្ទុះពីសង្រ្គាម ដើម្បីអោយប្រជាកសិករប្រើប្រាស់បានដោយសុវត្ថិភាព ក៏ដូចជាអប់រំដល់ប្រជាជនអំពីហានិភ័យ និងគាំទ្រជនរងគ្រោះអោយទទួលបានសេវាស្តារលទ្ធភាពពលកម្មកាយសម្បទា និងកសាងជីវិតរបស់ពួកគេ។ យូអិនឌីភី នៅតែប្តេជ្ញាក្នុងរួមដំណើរជាមួយរាជរដ្ឋាភិបាលកម្ពុជា ដើម្បីបិទទំព័រភាពសោកសៅនៃសង្គ្រាម»។គម្រោងបោសសម្អាតមីនដើម្បីលទ្ធផល - ដំណាក់កាលទី៤ (២០២០-២០២៥) ដែលផ្តល់មូលនិធិដោយប្រទេសអូស្ត្រាលី នូវែលសេឡង់ សាធារណរដ្ឋកូរ៉េ យូអិនឌីភី និងរាជរដ្ឋាភិបាលកម្ពុជា បានរួមចំណែក្នុងការបោសសម្អាតមីន ការអប់រំអំពីហានិភ័យដោយសារមីន និងជំនួយជនរងគ្រោះ។ ចាប់តាំងពីឆ្នាំ ២០០៦មក គម្រោងនេះ បានជួយសម្អាតផ្ទៃដីជាង ៣៨៤ គីឡូម៉ែត្រការ៉េ (ប្រហែលជាង ១២% នៃសមិទ្ធិផលទាំងមូលនៃវិស័យនេះ) ដែលអាចប្រើប្រាស់ប្រកបដោយសុវត្ថិភាព និងការអភិវឌ្ឍក្នុងតំបន់ ដែលផ្តល់អត្ថប្រយោជន៍ដល់ប្រជាជនជាង ១,២ លាននាក់៕

បណ្ដាញសង្គម

ព័ត៌មានថ្មីៗ

ឯកឧត្តម ឌិត ទីណា បន្តដំណើរចុះជួបសំណេះសំណាលជាមួយសហគមន៍ទំនើបស្វាយចន្ទីភ្នំគូលែន នៅខេត្តសៀមរាប

លោក Trump ទទូចថាទីតាំងនុយក្លេអ៊ែរអ៊ីរ៉ង់ត្រូវបានបំផ្លាញស្របពេលមានរបាយការណ៍មួយចំនួនថាបានរួចផុតពីការបំផ្លាញ

ពលរដ្ឋជប៉ុនបោះឆ្នោតក្នុងការសាកល្បងដ៏សំខាន់សម្រាប់នាយករដ្ឋមន្ត្រី Shigeru Ishiba

អ្នកស្លាប់ក្នុងជំនន់ទឹកភ្លៀងនៅកូរ៉េខាងត្បូងសប្តាហ៍នេះ កើនឡើងដល់១៤ នាក់

ការប៉ះទង្គិចបានផ្ទុះឡើងក្នុងការតវ៉ាប្រឆាំងនឹងជនអន្តោប្រវេសន៍ក្នុងប្រទេសប៉ូឡូញ

ក្រសួងសុខាភិបាល បើកយុទ្ធនាការផ្តល់ថ្នាំលេបសមូហភាព ដើម្បីបង្ការជំងឺគ្រុនចាញ់ នៅខេត្តស្ទឹងត្រែង

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877