នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេចប្រធានរដ្ឋសភា៖ បារាំង​គឺជាតួអង្គដ៏សំខាន់​ចូលរួម​ចំណែក​ដោះស្រាយ​វិវាទ​ព្រំដែន​រវាង​កម្ពុជា និងថៃ
អភិបាលខេត្ត​កំពង់ចាម​ ស្នើ​ដល់អាជ្ញាធរ និងសមត្ថកិច្ចពាក់ព័ន្ធ បង្កើនការផ្សព្វផ្សាយពីបញ្ហា​ទឹកជំនន់ទន្លេមេគង្គ
ក្រសួងការងារ នាំយកឱកាសការងារជាង ៣ពាន់កន្លែងសម្រាប់ប្រជាពលរដ្ឋ និង​ពលករខ្មែរ​ក្នុង​ខេត្ត​បន្ទាយមានជ័យដែលទើបត្រឡប់មកពីប្រទេសថៃ
«ដំណើរទេសចរណ៍នៅប្រទេសកម្ពុជាពិតជាសប្បាយរីករាយ និង​ពោរ​ពេញ​ដោយ​អនុស្សាវរីយ៍​ល្អៗដែលមិនអាចបំភ្លេចបាន ហើយយើងមកលេងម្តងទៀតជាមិនខាន» ចំណាប់​អារម្មរណ៍​រួម​របស់​ប្រតិភូបុគ្គលិកក្រុមហ៊ុន EdF និង GdF បារាំង

ព័ត៌មានជាតិ

អង្គសន្និបាតបូកសរុបការងារឆ្នាំ២០២៤ និងលើកទិសដៅការងារឆ្នាំ២០២៥ អាជ្ញាធររាជធានី​ភ្នំពេញ​ពិភាក្សារកបានធាតុចូលសំខាន់ៗពាក់ព័ន្ធការគ្រប់គ្រងសណ្តាប់ធ្នាប់ការលក់ដូរតាម​ចិញ្ចើម​ផ្លូវសាធារណៈ

2025/01/22 12:33:56 pm        143
Facebook Telegram Linkin
ភ្នំពេញ៖ ដើម្បីបានជាធាតុចូលសំខាន់ៗ ក្នុងអង្គសន្និបាតបូកសរុបការងារឆ្នាំ២០២៤ និងលើកទិសដៅការងារឆ្នាំ២០២៥ ពាក់ព័ន្ធការគ្រប់គ្រងសណ្តាប់ធ្នាប់ការលក់ដូរតាមចិញ្ចើមផ្លូវសាធារណៈអង្គសន្តិបាតរបស់រដ្ឋបាលរាជធានីភ្នំពេញបានរកឃើញបញ្ហាប្រឈមចំនួន ១១បញ្ហា និងបានពិភាក្សារកមធ្យោបាយដោះស្រាយ ១៣ចំណុច ដែលការពិភាក្សានេះធ្វើឡើងនៅសណ្ឋាគារ រ៉េស៊ីដង់ សុខាភ្នំពេញ នាថ្ងៃទី២២ ខែមករា ឆ្នាំ២០២៥ ដឹកនាំនិងសម្របសម្រួលដោយ ឯកឧត្ដម កើត ឆែ អភិបាលរងរាជធានីភ្នំពេញ ដើម្បីធ្វើបទបង្ហាញពីលទ្ធផលនៃការពិភាក្សាក្រោមអធិបតីឯកឧត្ដមម៉ប់ សារិន ប្រធានក្រុមប្រឹក្សារាជធានីភ្នំពេញ។ពាក់ព័ន្ធការគ្រប់គ្រងសណ្តាប់ធ្នាប់ការលក់ដូរតាមចិញ្ចើមផ្លូវសាធារណៈ ឯកឧត្ដម ឆាយ វីរៈ អភិបាលរងរាជធានីភ្នំពេញបានឱ្យដឹងថា ក្រោយពីពិភាក្សាជាក្រុមយ៉ាងផុលផុសអស់ជាច្រើនម៉ោងអង្គសន្តិបាតបានរកឃើញបញ្ហាប្រឈមចំនួន ១១បញ្ហា និងបានពិភាក្សារកមធ្យោបាយដោះស្រាយចំណុច ១៣ចំណុច ។ ចំពោះបញ្ហាប្រឈម មានចំនួន ១១ ចំណុច ក្នុងនោះរួមមាន ១-ការយល់ដឹង និងខ្វះការចូលរួមសហការពីប្រជាពលរដ្ឋនៅមានកម្រិត ដោយបានប្រើប្រាស់ចិញ្ចើមផ្លូវសាធារណៈសម្រាប់ធ្វើការលក់ដូរ និងអារជីវកម្មរបស់ខ្លួន។ ២-អាជ្ញាធរមានសមត្ថកិច្ច និងកម្លាំងសណ្តាប់ធ្នាប់ អនុវត្តការងារមួយចំនួនពុំទាន់មានឆន្ទៈ គ្រប់គ្រាន់ក្នុងការអនុវត្តឱ្យបានល្អប្រសើរ ។ ៣-នៅតាមទីតាំងផ្សារឯកជនភាគច្រើនពុំមានទីតាំងចំណតត្រឹមត្រូវ សម្រាប់បម្រើឱ្យអាជីវករធ្វើការផ្ទេរទំនិញផ្សេងៗ។ ៤-អាជ្ញាធរមានសមត្ថកិច្ចពាក់ព័ន្ធទាំងអស់ពុំទាន់អនុវត្តការងារស្របទៅតាមលិខិតបទដ្ឋានគតិយុត្ត និងច្បាប់ផ្សេងៗ ក៏ដូចជាគោលកាណ៍ណែនាំនានាឱ្យបានល្អនៅឡើយ ។ ៥-ការអនុវត្តវិធានការនៅតាមតម្រាយផ្លូវ ដែលមានព្រំប្រទល់រវាងរដ្ឋបាលខណ្ឌ និងរដ្ឋបាលខណ្ឌ ពុំអនុវត្តការងារឱ្យបានស្របគ្នា។ ៦-ការអនុវត្តវិធានរដ្ឋបាល និងវិធានការច្បាប់ ពុំអាចអនុវត្តដោយមានភាពខ្លាំង ឬតក់ក្រហល់បាននោះទេ ព្រោះអាចធ្វើឱ្យប៉ះពាល់ដល់សតិអារម្មណ៍របស់ប្រជាពលរដ្ឋ ម្ចាស់អាជីវកម្ម និងអ្នកលក់ដូរនៅតាមចិញ្ចើមផ្លូវ។ ៧-ប្រសិទ្ធភាពនៅក្នុងការរៀបចំសណ្តាប់ធ្នាប់តាមផ្លូវតូចៗក្នុងមូលដ្ឋានខណ្ឌនៅមានកម្រិត។ ៨-ប្រសិទ្ធភាព នៃការរៀបចំមានរយៈពេលខ្លី បន្ទាប់ពីបានរៀបចំទីតាំងនោះរួចរាល់។ ៩-ប្រជាពលរដ្ឋដែលជាអ្នកលក់ដូរតាមចិញ្ចើមផ្លូវសាធារណៈភាគច្រើនជាអ្នកមានជីវភាពខ្វះខាត។ ១០-ពុំមានកម្លាំងគ្រប់គ្រាន់សម្រាប់បម្រើឱ្យក្នុងការចុះអប់រំ ណែនាំ ដល់ប្រជាពលរដ្ឋ អាជីវករ និងពុំមានទីកន្លែងសមរម្យ ឬសមស្របសម្រាប់ធ្វើការរៀបចំឱ្យអ្នកលក់ដូរតាមចិញ្ចើមផ្លូវ។ ១១-រដ្ឋបាលខណ្ឌ និងរដ្ឋបាលសង្កាត់ ពុំមានកម្លាំងគ្រប់គ្រាន់សម្រាប់បម្រើឱ្យក្នុងការចុះអប់រំ ណែនាំ ដល់ប្រជាពលរដ្ឋ អាជីវករ និងអ្នកលក់ដូរតាមចិញ្ចើមផ្លូវសាធារណៈ។ចំពោះដំណោះស្រាយ និងសំណូមពរ ១៣ចំណុចរួមមាន ១ ស្នើឱ្យអាជ្ញាធរមានសមត្ថកិច្ចរៀបចំសេចក្តីណែនាំមួយ។ ២-ស្នើឱ្យអាជ្ញាធរមានសមត្ថកិច្ច សណ្តាប់ធ្នាប់ខណ្ឌ និងកម្លាំងប្រជាការពារទាំងអស់ត្រូវអនុវត្តការងារប្រកបដោយឆន្ទៈ និងមានស្មារតីទទួលខុសត្រូវឱ្យបានខ្ពស់។ ៣-ស្នើឱ្យម្ចាស់ទីតាំងផ្សារឯកជនទាំងអស់ត្រូវរៀបចំទីតាំងចំណតឱ្យបានត្រឹមត្រូវ សមស្របទៅតាមទីតាំងរបស់ខ្លួន។ ៤-គណៈបញ្ជាការឯកភាពរដ្ឋបាលខណ្ឌ ត្រូវរៀបចំចាត់តាំងអ្នកដឹកនាំការងារឱ្យបានច្បាស់លាស់ ដើម្បីធ្វើការតាមដាន ប្រជុំត្រួតពិនិត្យវាយតម្លៃ ព្រមទាំងត្រូវវិភាគរកបញ្ហាប្រឈម និងរិះរកមធ្យោយដោះស្រាយ ឱ្យសមស្របទៅតាមស្ថានភាពជួបប្រទះផ្ទាល់។ ៥-អាជ្ញាធរមានសមត្ថកិច្ចពាក់ព័ន្ធទាំងអស់ត្រូវអនុវត្តការងារស្របទៅតាមលិខិតបទដ្ឋានគតិយុត្ត និងច្បាប់ផ្សេងៗក៏ដូចជាគោលការណ៍ណែនាំឱ្យបានត្រឹមត្រូវ។ ៦-គណៈបញ្ជាការឯកភាពរដ្ឋបាលខណ្ឌ ត្រូវរៀបចំចុះស្រង់ស្ថិតិអ្នកលក់ដូនៅតាមចិញ្ចើមផ្លូវសាធារណៈ នៅក្នុងមូលដ្ឋានខណ្ឌរបស់ខ្លួនឱ្យបានច្បាស់លាស់ និងបែងចែកទៅតាមតម្រាយផ្លូវនីមួយៗ ដើម្បីងាយស្រួលនៅក្នុងការគ្រប់គ្រង និងតាមដាន។ ៧-គណៈបញ្ជាការឯកភាពខណ្ឌ គួរបានរៀបចំវិភាគ និងកំណត់ទីតាំងតម្រាយផ្លូវស្មុគស្មាញ នៅក្នុងមូលដ្ឋានខណ្ឌរបស់ខ្លួន ដើម្បីបន្តរៀបចំផែនការដោះស្រាយ។ ៨ គណៈបញ្ជាការឯកភាពខណ្ឌ ត្រូវចុះធ្វើការអប់រំណែនាំដល់ប្រជាពលរដ្ឋ ដែលបាននឹងកំពុងប្រើប្រាស់ចិញ្ចើមផ្លូវ និងអ្នកលក់ដូរតាមចិញ្ចើមផ្លូវសាធារណៈ ដោយប្រើប្រាស់វិធីសាស្ត្រទន់ភ្លន់ តែម៉ឺងម៉ាត់ ឱ្យចូលរួមអនុវត្តតាមស្មារតី នៃសេចក្តីណែនាំលេខ ០១៣/១៨ សណន ចុះថ្ងៃទី០៧ ខែធ្នូ ឆ្នាំ២០១៨ របស់រដ្ឋបាលរាជធានីភ្នំពេញ ស្តីពីការរៀបចំសណ្តាប់ធ្នាប់តាមដងផ្លូវ និងការប្រើប្រាស់ចិញ្ចើមផ្លូវសាធារណៈទាំងអស់ក្នុងភូមិសាស្រ្តរាជធានីភ្នំពេញ៕ អត្ថបទ ៖ ប្រាក់ វ៉ាន់ដា

ប្រធានសហព័ន្ធស្រូវអង្ករកម្ពុជា៖ តម្លៃស្រូវអូអឹមនឹងបន្តឡើងថ្លៃក្រោយចប់បុណ្យចូលឆ្នាំប្រពៃណីចិន-វៀតណាម

2025/01/22 12:25:37 pm        266
Facebook Telegram Linkin
ឧកញ៉ា ចាន់ សុឃាំង ប្រធានសហព័ន្ធស្រូវអង្ករកម្ពុជា បានអំពាវនាវឲ្យប្រជាកសិករ ក៏ដូចជាសហគមន៍កសិករ ដែលមានស្រូវក្នុងពេលនេះកុំទាន់អាលបង្ខំច្រូតកាត់ ព្រោះថា នៅក្រោយចប់រដូវបុណ្យចូលឆ្នាំចិន-វៀតណាម នឹងមានការកើនឡើងតម្លៃត្រឡប់មកវិញ និងម្យ៉ាងទៀតដោយសារមានការបញ្ជាទិញពីខាងក្រៅត្រឡប់មកវិញដែរ។ក្នុងបទសម្ភាសន៍ផ្ទាល់ជាមួយព័ត៌មាន ប៊ីធីវី នៅរសៀលថ្ងៃទី២១ មករា ឆ្នាំ២០២៥នេះ ឧកញ៉ាប្រធានសហព័ន្ធស្រូវអង្ករកម្ពុជា បានមានប្រសាសន៍ថា ជាព័ត៌មានចង់ចែករំលែកដល់ប្រជាកសិករ និងសហគមន៍កសិកម្មទាំងអស់ នៅក្នុងកំឡុងពេលនេះ ជាកំឡុងគៀករដូវបុណ្យប្រពៃណីចិន និងវៀតណាម អញ្ចឹងការបញ្ជាទិញពីប្រទេសជិតខាងទៅលើដំណាំស្រូវនេះ មានការយឺត មានការតិចជាងមុន អ្វីដែលជាដំណោះស្រាយភ្លាមៗនៅក្នុងស្ថានការណ៍នេះ គឺស្នើសុំឲ្យប្រជាកសិករ ក៏ដូចជាសហគមន៍កសិករកុំទាន់អាលបង្ខំច្រូត ទុកស្រូវឲ្យទុំពេញគុណភាព ឬហៅថាទុំញាស់ ហើយប្រសិនបើមានទីលានអាចហាលទុកបាន ឬក៏មានជង្រុកដែលអាចរក្សាទុកបាន គួរតែរក្សាទុកសិន ក្រោយចប់ចូលឆ្នាំចិន-វៀតណាម នឹងមានការកើនឡើងតម្លៃត្រឡប់មកវិញ ដោយសារមានការបញ្ជាទិញពីខាងក្រៅត្រឡប់មកវិញផងដែរ ខណៈរយៈពេល ៣-៤ថ្ងៃចុងក្រោយនេះ តម្លៃស្រូវក៏ចាប់ផ្តើមមានកំណើនត្រឡប់មកវិញហើយដែរ នៅក្នុងមុខរោងម៉ាស៊ីនកិនស្រូវឥឡូវនេះ មានការទទួលទិញចន្លោះតម្លៃប្រហែល ៨៤០ ទៅ ៨៦០រៀល ក្នុងមួយគីឡូក្រាម ទៅតាមប្រភេទគុណភាពស្រូវ។ជុំវិញបញ្ហាស្រូវអង្ករនេះដែរ ឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានបន្តលើកទឹកចិត្តដល់ប្រជាកសិករ ទី១. ឲ្យងាកមកដាំពូជយុទ្ធសាស្រ្តរបស់កម្ពុជាដែលជាអង្ករក្រអូប ទី២. ការធ្វើផលិតកម្មកសិកម្មតាមកិច្ចសន្យា ពីព្រោះនេះជាអ្វីដែលយើងអាចធានាថា មានភាពច្បាស់លាស់ តម្លៃល្អ ទទួលបានព័ត៌មានមុននឹងធ្វើការសម្រេចចិត្តដាំ ហើយអ្វីដែលចង់លើកទឹកចិត្តបន្ថែមទៀតនោះ គឺការចងក្រងទៅជាសហគមន៍កសិកម្មទំនើប ដើម្បីជួយឱ្យកសិករទទួលបានផលចំណេញច្រើន តាមរយៈការកាត់បន្ថយថ្លៃដើមផលិត, ការទទួលបានទុនកម្ចីក្នុងអត្រាការប្រាក់ទាប, ការទទួលបានទីផ្សារ និងការគាំទ្រផ្នែកបច្ចេកទេសជាដើម។ សហគមន៍កសិកម្មទំនើប បង្កើតឡើងដោយ ក្រសួងកសិកម្ម រុក្ខាប្រមាញ់ និងនេសាទ ក្នុងគោលបំណង ដើម្បីប្រែក្លាយវិស័យកសិកម្មកម្ពុជា ពីលក្ខណៈគ្រួសារឱ្យទៅជាសហគ្រាស សេដ្ឋកិច្ចកសិកម្មដ៏រឹងមាំ មានសមាហរណកម្មខ្ពស់ មានសេដ្ឋកិច្ចមាត្រដ្ឋាន និងមានសមត្ថភាពប្រកួតប្រជែងទាំងបរិមាណ តម្លៃ និងគុណភាព។ ចំពោះលក្ខខណ្ឌក្នុងការចូលជាសហគមន៍កសិកម្មទំនើប គឺត្រូវមានសមាជិកចាប់ពី៥០គ្រួសារឡើង។ ដោយឡែក ចំពោះ ការចុះបញ្ចី, ការផ្សព្វផ្សាយ, ការៀបចំធ្វើផែនការអាជីវកម្ម និងនីតិវិធីផ្សេងៗទៀត ក្រសួងកសិកម្ម ធានាសម្របសម្រួលជូន៕ អត្ថបទ ឈិត បូរ៉ាវី

ក្រុមម៉ុងសាយកំពុងបន្តខិតខំហ្វឹកហាត់ ដើម្បីត្រៀមសម្ដែងជូនអតិថិជនក្នុងឱកាសចូលឆ្នាំចិន

2025/01/22 12:19:02 pm        470
Facebook Telegram Linkin
ឈានចូលមកដល់រដូវកាលចូលឆ្នាំចិន ក្រុមម៉ុងសាយនីមួយៗ ចាប់ផ្ដើមមមាញឹកជាខ្លាំង ទាំងការហ្វឹកហាត់ ក៏ដូចជាការចេញសម្ដែងជូនអតិថិជន ដែលមានតម្រូវការ ពិសេសក្នុងការសម្ពោធហាងនានា។ ការហ្វឹកហាត់តែងធ្វើឡើងរៀងរាល់ថ្ងៃ រីឯការចេញសម្ដែងក៏មានស្ទើរាល់ថ្ងៃផងដែរ។ឈានចូលដល់រយៈពេលប្រមាណ ១សប្ដាហ៍មុន ពិធីបុណ្យសែនចូលឆ្នាំចិនចូលមកដលល់ ក្រុមម៉ុងសាយនីមួយៗកំពុងបន្តហ្វឹកហាត់ជារៀងរាល់ល្ងាច នូវក្បាច់ទម្រង់សម្ដែងនានាទាំងការហក់លោត ការឡើងលើបង្គោលជាដើម។ ការហាត់សមនេះ ត្រូវធ្វើឡើងមុនជាច្រើនខែ ដើម្បីរម្លឹក ក៏ដូចជាធ្វើឱ្យភាពស្ទាត់រស់រវើកឡើងវិញ ទោះពួកគេនីមួយៗសុទ្ធតែចេះសម្ដែងស្រាប់យ៉ាងណាក្ដី។សម្រាប់ក្រុមម៉ុងសាយ សមាគម កតញ្ញូ នៅវិហារលោកតាព្រះចៅ ស្ថិតក្នុងខណ្ឌច្បារអំពៅ បានប្រមូលកម្លាំងហ្វឹកហាត់រយៈពេលប្រមាណ ៦ខែរួចមកហើយ។ នេះជាការលើកឡើងរបស់លោក សូវ ប៊ុនទ្រី ដែលជាប្រធានសមាគមក្រុមម៉ុងសាយ កតញ្ញូ។ លោកថាវាជាភាពចាំបាច់ ដែលត្រូវហ្វឹកហាត់ក្នុងរយៈពេលយូរបែបនេះ និងត្រូវភ្ជាប់ជាមួយការសែនព្រេនម៉ុងសាយ មុនចេញសម្ដែងជាផ្លូវការ។ លោកថាទន្ទឹមនឹងការហ្វឹកហាត់ជារៀងរាល់ថ្ងៃនេះ ក្រុមម៉ុងសាយរបស់លោក ក៏ទទួលបានការអញ្ជើញទៅសម្ដែងស្ទើររាល់ថ្ងៃផងដែរ មុនចូលឆ្នាំចិនចូលមកដលល់ ពិសេសក្នុងការសម្ពោធហាងជាដើម។ លោកលើកឡើងដែរថា ការសម្ដែងមានច្រើនក្បាច់ ច្រើនទម្រង់ និងអាចប្រើប្រាស់ពេលវាលាតិចច្រើនផ្សេងៗគ្នា។ក្នុងនាមជាប្រធានសមាគម ក្រុមម៉ុងសាយ កតញ្ញូ លោក ប៊ុនទ្រី លើកឡើងដែរថា តាមជំនឿ ការសម្ដែងឡកម៉ុងសាយនេះ គឺអាចនាំមកនូវលាភសំណាងជូនម្ចាស់ផ្ទះ ម្ចាស់ហាង់ ក៏ដូចជាអាចបណ្ដេញចេញនូវភាពចង្រៃនានាចេញឱ្យឆ្ងាយផងដែរ។ តាមប្រតិទិន ថ្ងៃសែនចូលឆ្នាំចិន គឺនៅថ្ងៃទី ២៨ ខែមករា ឆ្នាំ ២០២៥។ រីឯថ្ងៃចូលឆ្នាំចិន មានរយៈពេល ៣ថ្ងៃ គឺនៅថ្ងៃទី ២៩ ថ្ងៃទី ៣០ និងថ្ងៃទី ៣១ ខែមករា ឆ្នាំ ២០២៥។ ពិធីបុណ្យចូលឆ្នាំចិន ពុំមែនជាបុណ្យជាតិ ដែលអនុញ្ញាតឱ្យមានការឈប់សម្រាកនោះទេ៕ អត្ថបទ៖គឹម ហុក

៨ថ្ងៃសមត្ថកិច្ចបង្ក្រាបក្មេងទំនើងជាង ១០ករណី និងឃាត់ខ្លួនជិត ៤០នាក់

2025/01/22 12:10:41 pm        159
Facebook Telegram Linkin
គិតចាប់ពីថ្ងៃទី១៣ ដល់ថ្ងៃទី២០ ខែមករា ឆ្នាំ២០២៥ សមត្ថកិច្ចបានបង្ក្រាបក្រុមក្មេងទំនើងទូទាំងប្រទេស បានជាង១០ករណី និងឃាត់ខ្លួនមនុស្សបានជិត៤០នាក់ដោយភាគច្រើនបញ្ជូនទៅកាន់ពន្ធនាគារ។ នេះបើតាមលោកបណ្ឌិត ទូច សុឃៈ អ្នកនាំពាក្យរងក្រសួងមហាផ្ទៃ។ ករណីក្មេងទំនើងដែលបង្ក្រាបបាននេះ គឺមាននៅក្នុងមូលដ្ឋាន រាជធានីភ្នំពេញ បាត់ដំបង ពោធិ៍សាត់ បន្ទាយមានជ័យ ក្រចេះ ស្វាយរៀង និងខេត្តកំពត។ បើតាមលោកបណ្ឌិត ទូច សុឃៈ លទ្ធផលនៃការបង្ក្រាបក្មេងទំនើងនេះ ផ្តើមចេញពីការយកចិត្តទុកដាក់របស់សមត្ថកិច្ច ព្រមទាំងការចូលរួមសហការពីប្រជាពលរដ្ឋ។ អនុវត្តតាមបទបញ្ជាដ៏ម៉ឺងម៉ាត់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្ត្រីក្រសួងមហាផ្ទៃ បានណែនាំជាប្រចាំឱ្យសមត្ថកិច្ចក្រសួងមហាផ្ទៃ រួមទាំងរដ្ឋបាលថ្នាក់ក្រោមជាតិ តាមបង្ក្រាបឱ្យបាន ក្រុមក្មេងទំនើង ដើម្បីបញ្ជូនខ្លួនឱ្យតុលាការផ្តន្ទាទោស និងនាំទៅឃុំនៅពន្ធនាគារ។ ឯកឧត្តមក៏បានណែនាំអគ្គនាយកដ្ឋានពន្ធនាគារត្រៀមលក្ខណៈទទួលឃុំក្រុមក្មេងទំនើងផងដែរ។ ក្នុងពិធីបិទសន្និបាតរដ្ឋបាលខេត្តព្រៃវែង កាលពីថ្ងៃទី២១ ខែមករា ម្សិលមិញ ប្រមុខក្រសួងមហាផ្ទៃ ក៏បានណែនាំឱ្យថ្នាក់ដឹកនាំនិងមន្រ្តីយកចិត្តទុកដាក់បំផុសឱ្យប្រជាពលរដ្ឋជាអាណាព្យាបាល បង្កើនការអប់រំ ទូន្មាន ប្រៀនប្រដៅកូនចៅរបស់ខ្លួន និងត្រូវរាយការណ៍មកសមត្ថកិច្ចភ្លាមៗ ប្រសិនបើដឹងថាកូនចៅរបស់ខ្លួនកំពុងដើរចូលកន្លងក្មេងទំនើងប្រដៅមិនស្ដាប់ ឬសង្ស័យពាក់ព័ន្ធនឹងការសេពគ្រឿងញៀន ក្នុងន័យដើម្បីរួមគ្នាតម្រង់ផ្លូវពួកគេ ចៀសវាងទុករហូតកើតមានបញ្ហាកាន់តែធំ៕

ក្រសួងសាធារណការ និងដឹកជញ្ជូន បើកសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥

2025/01/22 11:55:51 am        153
Facebook Telegram Linkin
ភ្នំពេញ៖ នាព្រឹកថ្ងៃពុធ ទី២២ ខែមករា ឆ្នាំ២០២៥ ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីបើកសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥ របស់ក្រសួងសាធារណការ និងដឹកជញ្ជូន ដោយមានការចូលរួមពី ឯកឧត្តម លោកជំទាវ ជាថ្នាក់ដឹកនាំក្រសួង មន្រ្តីរាជការ បុគ្គលិកនៃក្រសួងសាធារណការ និងដឹកជញ្ជូន និងថ្នាក់ដឹកនាំកងវិស្វកម្មជាច្រើនរូបផងដែរ។ពិធីនេះមានរៀបចំឡើងដើម្បីពិភាក្សា និងពិនិត្យវាយតម្លៃឡើងវិញរួមគ្នា លើវឌ្ឍនភាពការងាររបស់វិស័យសាធារណការ និងដឹកជញ្ជូន ដែលក្រសួងសម្រេចបានក្នុងរយៈ ពេលមួយឆ្នាំកន្លងទៅ ក៏ដូចជាពិភាក្សាពីបញ្ហាប្រឈមនានា និងលើកទិសដៅការងារសម្រាប់ឆ្នាំបន្ទាប់ ក្នុងស្មារតីចូលរួមអនុវត្តកម្មវិធីនយោបាយ របស់រាជរដ្ឋាភិបាល នីតិកាលទី៧ នៃរដ្ឋសភា ក្នុងបុព្វហេតុចូលរួមអភិវឌ្ឍសង្គម-សេដ្ឋកិច្ច ឱ្យកាន់តែរីកចម្រើនប្រកបដោយចីរភាព និងបរិយាបន្ន។គួរបញ្ជាក់ថា ក្នុងការអនុវត្តយុទ្ធសាស្ត្របញ្ចកោណ-ដំណាក់កាលទី១ ឱ្យមានប្រសិទ្ធភាព និងសម្រេចបានជោគជ័យ ក្រសួងសាធារណការ និងដឹកជញ្ជូន បានកំណត់នូវចក្ខុវិស័យសំខាន់ៗចំនួនពីរ រួមមាន ទី១)ការលើកកម្ពស់សេវាដឹកជញ្ជូន តាមរយៈការអភិវឌ្ឍ និង បន្តធ្វើទំនើបកម្មការប្រើប្រាស់បច្ចេកវិទ្យាឌីជីថលក្នុងការគ្រប់គ្រង និងការផ្តល់សេវាលឿន រហ័ស តម្លាភាព ប្រសិទ្ធភាព ងាយស្រួល និងជឿទុកចិត្ត និង ទី២)ការលើកកម្ពស់ការតភ្ជាប់ប្រព័ន្ធដឹក ជញ្ជូនអន្តរមធ្យោបាយ ឡូជីស្ទីក និងការអភិវឌ្ឍហេដ្ឋារចនាសម្ព័ន្ធដឹកជញ្ជូនឱ្យមានគុណភាព សុវត្ថិភាព ចីរភាព ភាពធន់ និងបរិយាបន្ន។ ដើម្បីសម្រេចចក្ខុវិស័យទាំងពីរខាងលើ ក្រសួងបានដាក់ចេញនូវវិធានការគន្លឹះសំខាន់ៗ ក្នុងការកែលម្អ និងអភិវឌ្ឍន៍ប្រព័ន្ធដឹកជញ្ជូនទាំងផ្លូវគោក ផ្លូវដែក និងផ្លូវទឹក ជាពិសេសផ្តោតលើការពង្រឹងគុណភាពហេដ្ឋារចនាសម្ព័ន្ធដឹកជញ្ជូន និងការតម្រង់ទិសឆ្ពោះទៅរកការអភិវឌ្ឍប្រព័ន្ធដឹកជញ្ជូនអន្តរមធ្យោបាយ ដែលមានភាពប្រទាក់ក្រឡា ប្រសិទ្ធភាពសេដ្ឋកិច្ច និងសុវត្ថិភាព ដើម្បីកាត់បន្ថយពេលវេលា និងចំណាយក្នុងការធ្វើដំណើរ និងការដឹកជញ្ជូនទំនិញ។ ក្រសួងក៏បានជំរុញ ការរៀបចំច្បាប់ គោលនយោបាយ លិខិតបទដ្ឋានគតិយុត្ត និងបទដ្ឋានបច្ចេកទេសដើម្បីពង្រឹងប្រសិទ្ធ ភាពនៃការគ្រប់គ្រងក្នុងវិស័យសាធារណការ និងដឹកជញ្ជូន។ថ្លែងក្នុងអង្គពិធី ជាមួយនឹងលទ្ធផលដ៏ល្អប្រសើរនៃការអនុវត្តការងារឆ្នាំ២០២៤ និងឆន្ទៈក្នុងការជំរុញនូវគុណភាព និងប្រសិទ្ធភាពការងារនៅក្នុងឆ្នាំ២០២៥នេះ ឯកឧត្តមរដ្ឋមន្រ្តី បានស្នើឯកឧត្ដម លោកជំទាវ លោក លោកស្រី ជាថ្នាក់ដឹកនាំ និងមន្ត្រីរាជការក្រសួងទាំងអស់ បន្តខិតខំប្រឹងប្រែង និងរួបរួមគ្នាជាធ្លុងមួយចូលរួមអនុវត្តការងារប្រកបដោយភាពបុរេសកម្ម និងស្មារតីទទួលខុសត្រូវខ្ពស់ ដើម្បីឆ្ពោះទៅសម្រេចបានជោគជ័យ នូវទិសដៅការងារស្របតាមកម្មវិធីនយោបាយ និងយុទ្ធសាស្រ្តបញ្ចកោណ-ដំណាក់កាលទី១ របស់រាជរដ្ឋាភិបាល ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត ដើម្បីឈានទៅសម្រេចបាននូវចក្ខុវិស័យកម្ពុជាឆ្នាំ២០៥០ ជាប្រទេសមានចំណូលខ្ពស់។សូមជម្រាបផងដែរថា ក្រសួងរៀបចំសន្និបាតបូកសរុបលទ្ធផលការងារ ប្រចាំឆ្នាំ២០២៤ និងលើកទិសដៅការងារឆ្នាំ២០២៥ រយៈពេល២ថ្ងៃ ដោយពិធីបើកនៅថ្ងៃទី២២ ខែមករា ឆ្នាំ២០២៤ ក្រោមអធិបតីភាព ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន និងពិធីបិទសន្និបាត នៅថ្ងៃទី២៣ ខែមករា ឆ្នាំ២០២៥ ក្រោមអធិបតីភាពដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា៕

ក្រុមប្រឹក្សាធុរកិច្ចស្ត្រីហ្វីលីពីនចាប់អារម្មណ៍វិនិយោគលើវិស័យសក្ដានុពលនៅកម្ពុជា

2025/01/22 11:45:54 am        98
Facebook Telegram Linkin
នាព្រឹកថ្ងៃទី២២ ខែមករា ឆ្នាំ២០២៥នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតជូនលោកស្រី Rosemarie P. Rafael ប្រធានក្រុមប្រឹក្សាធុរកិច្ចស្ត្រីហ្វីលីពីន និងគណៈប្រតិភូ ចូលជួបសម្ដែងការគួរសម និងពិភាក្សាការងារនៅវិមានសន្ដិភាព។ក្នុងឱកាសនៃជំនួប, លោកស្រី Rosemarie P. Rafael បានគោរពជម្រាបជូនសម្ដេចបវរធិបតីអំពីសមាសភាពគណៈប្រតិភូនៃដំណើរទស្សនកិច្ចមកកម្ពុជានាពេលនេះ ដែលមានថ្នាក់ដឹកនាំស្ត្រី និងជាធុរជនហ្វីលីពីន ចំនួន៣៥រូប ជាសមាជិកនៃក្រុមប្រឹក្សាធុរកិច្ចស្ត្រីហ្វីលីពីនដែលកំពុងមានប្រតិបត្តិការអាជីវកម្មក្នុងវិស័យជាច្រើន។ ជាមួយគ្នានោះ លោកស្រីប្រធានក្រុមប្រឹក្សាបានគោរពជម្រាបជូនសម្ដេចបវរធិបតីថា គណៈប្រតិភូនឹងចូលរួមវេទិកាធុរកិច្ចដែលសហការរៀបចំឡើងដោយក្រុមប្រឹក្សាធុរកិច្ចស្ត្រីហ្វីលីពីន និងក្រសួងពាណិជ្ជកម្មកម្ពុជា។ ក្នុងឱកាសនោះដែរ, គណៈប្រតិភូ បានបង្ហាញចំណាប់អារម្មណ៍វិនិយោគលើវិស័យសំខាន់ៗជាច្រើននៅកម្ពុជា ក្នុងនោះរួមមាន៖ វិស័យកសិកម្ម (ឧស្សាហកម្មស្រូវអង្ករ), អាកាសចរណ៍, ទេសចរណ៍, យានយន្ត, អប់រំ, សុខាភិបាល, ដឹកជញ្ជូន និងឡូជីស្ទីក, អាជីវកម្មលក់រាយ និង កម្មន្ដសាល ព្រមទាំងបានបង្ហាញបំណងស្វែងរកកិច្ចសហការជាមួយសហគ្រិនជាស្ត្រីនៅកម្ពុជា ពាក់ព័ន្ធនឹងការពង្រឹងជំនាញវិជ្ជាជីវៈ, ការផ្លាស់ប្ដូរបទពិសោធន៍ និងឧត្តមានុវត្តន៍ល្អៗ ការកសាងសមត្ថភាពជាដើម។ ជាការឆ្លើយតប, សម្ដេចបវរធិបតីបានវាយតម្លៃខ្ពស់ចំពោះសកម្មភាពការងារ និងការជួយលើកកម្ពស់តួនាទីស្ត្រីក្នុងវិស័យធុរកិច្ចរបស់ក្រុមប្រឹក្សា ព្រមទាំងបានស្វាមគមន៍ចំពោះចំណាប់អារម្មណ៍របស់ក្រុមប្រឹក្សាធុរកិច្ចក្នុងការស្វែកឱកាសវិនិយោគ និងពាណិជ្ជកម្ម នៅកម្ពុជា និងបង្ហាញនូវក្ដីសោមនស្សរីករាយចំពោះការរៀបចំវេទិកាធុរកិច្ចនៅកម្ពុជានាពេលនេះ ក៏ដូចជាការរៀបចំវេទិកាធុរកិច្ចនៅហ្វីលីពីន នាពេលខាងមុខ ហើយសម្ដេចបានគូសបញ្ជាក់ថា វេទិកាធុរកិច្ចទាំងនេះនឹងជួយតភ្ជាប់ទំនាក់ទំនងរវាងធុរជន ឬវិនិយោគិននៃប្រទេសទាំងពីរ និងជួយបង្កើតកាលានុវត្តភាពបន្ថែម សម្រាប់ការវិនិយោគជាដើម។ សម្ដេចបវរធិបតីបានបន្ថែមទៀតថា រាជរដ្ឋាភិបាលកម្ពុជាតែងតែយកចិត្តទុកដាក់ចំពោះភាពជោគជ័យរបស់វិស័យឯកជន តាមរយៈការដាក់ចេញគោលនយោបាយគាំទ្រ និងវិធានការលើកទឹកចិត្តនានាសម្រាប់ការវិនិយោគ និងការធ្វើធុរកិច្ចនៅក្នុងកម្ពុជា។ បន្ថែមលើសនេះ, សម្ដេចបវរធិបតីលើកឡើងថា នៅកម្ពុជា តួនាទីរបស់ស្ត្រីក្នុងវិស័យធុរកិច្ចក៏បាន និង កំពុងវិវត្តរីកចម្រើនគួរឱ្យកត់សម្គាល់ ហើយការអភិវឌ្ឍសង្គម-សេដ្ឋកិច្ចអាចរីកលូតលាស់ទៅបាន លុះត្រាតែមានការចូលរួមពីពហុវិស័យ ដើម្បីធានា និងជំរុញសន្ទុះនៃកំណើនសេដ្ឋកិច្ចជាតិ៕

ត្រឹមសប្តាហ៍ទី៣ខែមករា មន្ត្រីអត្តសញ្ញាណកម្មផ្តល់សេវាជូនពលរដ្ឋបានជាង ១ ម៉ឺនសេវាទូទាំងប្រទេស

2025/01/22 11:27:04 am        102
Facebook Telegram Linkin
ក្នុងរយៈពេលមួយសប្តាហ៍គិតចាប់ពីថ្ងៃទី១៣ ដល់ថ្ងៃទី២០ ខែមករា ឆ្នាំ២០២៥ មន្ត្រី​អត្ត​សញ្ញាណ​កម្ម នៃក្រសួងមហាផ្ទៃ នៅទូទាំងប្រទេស បានផ្តល់សេវា​ជូន​ប្រជា​ពលរដ្ឋ​សរុប​ជាង​១​ម៉ឺន​សេវា។ ក្នុងចំណោមនោះ បើតាមលោកបណ្ឌិត ទូច សុឃៈ សេវាលិខិតឆ្លងដែនមានជាង៧ពាន់ លិខិត​ធ្វើដំណើរជាង១ពាន់ សៀវភៅស្នាក់នៅជាង២ពាន់ សៀវភៅគ្រួសារជាង២ពាន់ និង​អត្ត​សញ្ញាណ​ប័ណ្ណ​សញ្ជាតិខ្មែរជាង៥ពាន់សន្លឹក។ នេះបើតាមលោកបណ្ឌិត ទូច សុឃៈ អ្នកនាំពាក្យរង​ក្រសួង​មហាផ្ទៃ។ លោកបណ្ឌិត បានបន្ថែមថា រាជរដ្ឋាភិបាលកម្ពុជា ក្រោមការ​ដឹកនាំ​ប្រកប​ដោយ​ប្រតិភាណ​របស់​សម្ដេច​មហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ដោយមាន​ឯកឧត្តម​អភិ​សន្តិ​បណ្ឌិត ស សុខា ឧបនាយករដ្ឋមន្ត្រី រដ្ឋមន្រ្តីក្រសួងមហាផ្ទៃ ជាសេនាធិការ បាននិង​កំពុង​យក​ចិត្ត​ទុក​ដាក់​ពង្រឹងបន្ថែមទៀតលើគុណភាពនៃការផ្ដល់សេវាអត្តសញ្ញាណកម្ម។ ជាក់ស្ដែងនាថ្ងៃទី២២ ខែមករា ឆ្នាំ២០២៥នេះ ឯកឧត្តមអភិសន្តិ ស សុខា បានដឹកនាំ​កិច្ច​ប្រជុំ​ពិនិត្យ​ឆ្លង​សេចក្ដីព្រាងអនុក្រឹត្យស្ដីពីអត្តសញ្ញាណកម្មសញ្ជាតិខ្មែរ៕

ឯកឧត្តម ស៊ុន ចាន់ថុល ជួបពិភាក្សាការងារជាមួយថ្នាក់ដឹកនាំប្រទេសជាមិត្ត និងអ្នកវិនិយោគ​ជាបន្តបន្ទាប់​ក្នុងឱកាសចូលរួមកិច្ចប្រជុំប្រចាំឆ្នាំ២០២៥ វេទិកាសេដ្ឋកិច្ចពិភពលោក នៅប្រទេសស្វីស

2025/01/22 11:17:53 am        81
Facebook Telegram Linkin
ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានអញ្ជើញជាតំណាងដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ចូលរួមកិច្ចប្រជុំប្រចាំឆ្នាំ២០២៥ នៃវេទិកាសេដ្ឋកិច្ចពិភពលោក (World Economic Forum Annual Meeting 2025) ក្រោមប្រធានបទ "កិច្ចសហការសម្រាប់យុគសម័យឆ្លាតវៃ" (Collaboration for The Intelligent Age) ដែលប្រព្រឹត្តទៅនៅក្នុងទីក្រុងដាវ៉ូស ប្រទេសស្វីស ចាប់ពីថ្ងៃទី២០ ដល់ថ្ងៃទី២៤ ខែមករា ឆ្នាំ២០២៥។ក្នុងឱកាសចូលរួមកិច្ចប្រជុំនេះ ឯកឧត្តមឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា នៅក្នុងឱកាសអញ្ជើញជាតំណាងដ៏ខ្ពង់ខ្ពស់ សម្តេចមហាបវរធិបតី នាយករដ្ឋមន្ត្រី ចូលរួមកិច្ចប្រជុំប្រចាំឆ្នាំ២០២៥ នៃវេទិកាសេដ្ឋកិច្ចពិភពលោក នៅទីក្រុងដាវ៉ូស ប្រទេសស្វីស ឯកឧត្តមមានជំនួបពិភាក្សាការងារជាបន្តបន្ទាប់ជាមួយបណ្ដាប្រទេសជាមិត្ត និងអ្នកវិនិយោគបរទេស ក្នុងនោះរួមមាន៖• ជំនួបពិភាក្សាការងារជាមួយ ឯកឧត្តម កៅ គឹមហួន អគ្គលេខាធិការអាស៊ាន• ជំនួបពិភាក្សាការងារជាមួយ ឯកឧត្តម Maris Sangiampongsa រដ្ឋមន្ត្រីក្រសួងការបរទេស នៃព្រះរាជាណាចក្រថៃ• ជំនួបពិភាក្សាការងារជាមួយ លោក Tony Fernandes នាយកប្រតិបត្តិ ក្រុមហ៊ុន Air Asia• ជំនួបពិភាក្សាការងារជាមួយលោក Tan Yinglan ដៃគូគ្រប់គ្រងបង្កើត ក្រុមហ៊ុន Insignia Ventures Partners ជុំវិញសក្តានុពលនៃការវិនិយោគនៅកម្ពុជា• ជំនួបពិភាក្សាការងារជាមួយលោក Ricardo Hausmann សាស្រ្តាចារ្យផ្នែកសេដ្ឋកិច្ច នៃសាលា Harvard Kennedy ពាក់ព័ន្ធនឹងគម្រោងអញ្ជើញមកទស្សនកិច្ចនៅកម្ពុជា ដើម្បីសហការជាមួយ CAPRED និង ក្រុមប្រឹក្សាអភិវឌ្ឍន៍កម្ពុជា លើកិច្ចការពិពិធកម្មការវិនិយោគដោយផ្ទាល់ពីបរទេស។ក្នុងកិច្ចប្រជុំប្រចាំឆ្នាំ២០២៥នេះ វេទិកាសេដ្ឋកិច្ចពិភពលោកនឹងពិភាក្សាលើប្រធានបទ កិច្ចសហការសម្រាប់យុគសម័យឆ្លាតវៃ “Collaboration for the Intelligent Age” ដែលមានការចូលរួមពីថ្នាក់ដឹកនាំប្រមាណ ៣០០០នាក់ ពីជាង ១៣០ប្រទេសនៅទូទាំងពិភពលោក។សូមជម្រាបដែរថា វេទិកាសេដ្ឋកិច្ចពិភពលលោក ដែលរៀបចំឡើងក្នុងឆ្នាំ២០២៥ នេះ នឹងជួយជំរុញភាពជាដៃគូ និងការយល់ដឹងថ្មីៗ ដើម្បីអាចរៀបចំផែនការទៅថ្ងៃអនាគតបានប្រកបដោយនិរន្តរភាព និងបរិយាប័ន្ន នៅក្នុងយុគសម័យដែលបច្ចេកវិទ្យាមានភាពជឿនលឿនយ៉ាងឆាប់រហ័ស ដោយផ្តោតលើផ្នែកសំខាន់ៗចំនួន ០៥ រួមមាន ៖ (១) ការប្រមើមើលឡើងវិញនូវកំណើន (Reimagining Growth), (២) ឧស្សាហកម្មក្នុងយុគសម័យឆ្លាតវៃ (Industries in the Intelligent Age), (៣) ការវិនិយោគលើមូលធនមនុស្ស (Investing in People), (៤) ការការពារភពផែនដី (Safeguarding the Planet), និង (៥) ការកសាងទំនុកចិត្តឡើងវិញ (Rebuilding Trust )៕

នៅឆ្នាំ២០២៤ កំពង់ផែស្វយ័តភ្នំពេញរកចំណូលបាន ៤៣,៤៥ លានដុល្លារ ខណៈកំពង់ផែព្រះសីហនុទទួលបាន ១១០,៣៨ លានដុល្លារ

2025/01/22 11:09:31 am        224
Facebook Telegram Linkin
ភ្នំពេញ៖ នៅឆ្នាំ២០២៤ កំពង់ផែស្វយ័តភ្នំពេញ សម្រេចបានការដឹកជញ្ជូនឆ្លងកាត់ផែនាំចេញ-នាំចូល មានចំនួនសរុប ៤,៥១លានតោន និងទទួលបានចំណូលសរុបប្រមាណ ៤៣,៤៥លានដុល្លារ កើនឡើង ១៦,៦០ភាគរយ ធៀបនឹងឆ្នាំ២០២៣ ដែលមានចំនួន ៣៧,២៧លានដុល្លារ។ នេះបើតាមរបាយការណ៍ក្នុងសន្និបាតបូកសរុបលទ្ធផលការងារឆ្នាំ២០២៤ និងទិសដៅការងារឆ្នាំ២០២៥ របស់ក្រសួងសាធារណការ និងដឹកជញ្ជូនខណៈកំពង់ផែព្រះសីហនុទទួលបាន ១១០,៣៨ លានដុល្លារ កើនឡើង ២៤,១២% ធៀបនឹងឆ្នាំ២០២៣។បើតាមរបាយការណ៍ក្នុងសន្និបាតបូកសរុបលទ្ធផលការងារឆ្នាំ២០២៤ និងទិសដៅការងារឆ្នាំ២០២៥ របស់ក្រសួងសាធារណការ និងដឹកជញ្ជូន បានឱ្យដឹងថា ចំពោះការងារដឹកជញ្ជូនផ្លូវទឹក ផ្លូវសមុទ្រ និងកំពង់ផែនេះ ក្នុងឆ្នាំ២០២៤ ក្រសួងបានផ្តល់សេវាចុះបញ្ជី ១) នាវាផ្លូវទឹកចំនួន ២៦ គ្រឿង និង ២)នាវាផ្លូវសមុទ្រចំនួន ១០គ្រឿង ក្នុងនោះទទួលបានចំណូលសរុបពីការផ្ដល់សេវាដឹកជញ្ជូនតាមផ្លូវទឹក ផ្លូវសមុទ្រ និងកំពង់ផែ ចំនួន ២ ២៨១ លានរៀល កើនឡើង ៣,៨៧% ធៀបនឹងឆ្នាំ២០២៣ ដែលមានចំនួន ២ ១៩៦លានរៀល។ ទន្ទឹមគ្នានេះ កំពង់ផែស្វយ័តក្រុងព្រះសីហនុ សម្រេចបានការដឹកជញ្ជូនទំនិញឆ្លងកាត់ផែ (នាំចូល និងនាំចេញ) មានចំនួនសរុប ៩,៦០លានតោន និងទទួលបានចំណូលសរុបប្រមាណ ១១០,៣៨លានដុល្លារអាម៉េរិក កើនឡើង ២៤,១២% ធៀបនឹងឆ្នាំ២០២៣ ដែលមានចំនួន ៨៨,៩៤លានដុល្លារអាម៉េរិក។ ចំណែកកំពង់ផែស្វយ័តភ្នំពេញ សម្រេចបានការដឹកជញ្ជូនទំនិញឆ្លងកាត់ផែ (នាំចូល និងនាំចេញ) មានចំនួនសរុប ៤,៥១លានតោន និងទទួលបានចំណូលសរុបប្រមាណ ៤៣,៤៥លានដុល្លារអាម៉េរិក កើនឡើង ១៦,៦០% ធៀបនឹងឆ្នាំ២០២៣ ដែលមានចំនួន ៣៧,២៧ លានដុល្លារអាម៉េរិក។ពាក់ព័ន្ធនឹងការងារភស្តុភារកម្ម ក្រសួងបានបានបញ្ចប់ ទី១) ការសិក្សាសមិទ្ធិលទ្ធភាពគម្រោងអភិវឌ្ឍន៍មជ្ឈមណ្ឌលភស្តុភារកម្មភ្នំពេញ, ទី២)ការសិក្សាសមិទ្ធិលទ្ធភាពគម្រោងផែនការគ្រប់ជ្រុងជ្រោយនៃគម្រោងកែលម្អច្រកទ្វារព្រំដែនអន្តរជាតិត្រពាំងស្រែ, ទី៣) ការសិក្សាបុរេសមិទ្ធិលទ្ធភាពគម្រោងអភិវឌ្ឍន៍មជ្ឈមណ្ឌលភស្តុភារកម្មក្រុងបាត់ដំបង និង ទី៤)គម្រោងអភិវឌ្ឍន៍មណ្ឌលភស្ដុភារកម្មតាមផ្លូវដែកភាគខាងជើង។បច្ចុប្បន្នក្រសួងបាននិងកំពុង ទី១) សិក្សាសមិទ្ធិលទ្ធភាពគម្រោងអភិវឌ្ឍន៍មជ្ឈមណ្ឌលភស្តុភារកម្មក្រុងព្រះសីហនុ ដោយសហការជាមួយស្ថាប័នសាជីវកម្មហិរញ្ញវត្ថុអន្តរជាតិ (IFC), ទី២) ការសិក្សាគម្រោងអភិវឌ្ឍន៍ហេដ្ឋារចនាសម្ព័ន្ធច្រកទ្វារព្រំដែនចំនួន ៤ រួមមាន ភ្នំដិន-ខេត្តតាកែវ ត្រពាំងថ្លុង-ខេត្តត្បូងឃ្មុំ ត្រពាំងស្រែ-ខេត្តក្រចេះ និងអូយ៉ាដាវ-ខេត្តរតនគិរី, និង ទី៣) ការសិក្សាគម្រោងអភិវឌ្ឍន៍ហេដ្ឋារចនាសម្ព័ន្ធទីក្រុង នៅខេត្តគោលដៅចំនួន៤ មាន ខេត្តកំពង់ឆ្នាំង កំពង់ចាម តាកែវ និងព្រៃវែងផងដែរ៕

សហជីពនៅកម្ពុជា៖ ក្រុមប្រឆាំងយក​ការស្លាប់របស់លឹមគិមយ៉ាជាឈ្នាន់ ដើម្បីប្រមូលកម្លាំងតវ៉ាករណីកោះគុត​

2025/01/22 10:55:12 am        221
Facebook Telegram Linkin
ភ្នំពេញ៖ សហជីពនៅកម្ពុជាបានមើលឃើញថា ដើម្បីគេងចំណេញនយោបាយ ក្រុម​ប្រឆាំង​មិន​ខ្វល់​ពីការ​ស្លាប់របស់សមាជិកខ្លួន គឺលោកលឹម គិមយ៉ានោះទេ ហើយថែមទាំងបាន​យក​ការ​ស្លាប់​នោះ​ធ្វើ​អាជីវកម្មន​យោបាយ និងជាឈ្នាន់​ដើម្បី​ប្រមូល​កម្លាំង​ប្រជា​រាស្ត្រ​ឱ្យ​ជួយ​ជំរុ​ញ​រដ្ឋាភិបាល​យក​សំណុំ​រឿង​កោះគុតទៅតុលាការយុត្តិធម៌អន្តរជាតិ (ICJ)។លោក សំ សឿន ប្រធានសហភាពពលកម្មជាតិកម្ពុជា បញ្ជាក់ថា ការស្លាប់របស់លោកលិមគិមយ៉ាងពិតជាឈ្នាន់ដើម្បីក្រុមប្រឆាំងប្រមូលកម្លាំង ទៅបង្កើតចលាចលក្នុងស្រុក ក្នុងបំណងដកសេចក្តីទុកចិត្តប្រជារាស្ត្រពីរដ្ឋាភិបាល និងដើម្បីបានលេសធ្វើបាតុកម្មក្រៅស្រុកជំរុញឱ្យរដ្ឋាភិបាលយកបញ្ហារឿងកោះគុតប្តឹងទៅ (ICJ)។លោកថ្លែងថា៖«ក្រុមប្រឆាំងកំពុងយកការស្លាប់របស់លោកលិមគិមយ៉ាធ្វើជាឈ្នាន់ក្នុងការប្រមូលកម្លាំងរបស់ខ្លួនផ្សារភ្ជាប់និងបញ្ហាកោះគុតរវាង កម្ពុជា-ថៃ ដើម្បីបញ្ឆេះកំហឹងធ្វើឱ្យប្រជាពលរដ្ឋខឹងសម្បាទៅលើរាជរដ្ឋាភិបាល»។ លោកបន្ថែមថា ក្រុមប្រឆាំងមិនខ្លាចសោះឡើយក្នុងលះបង់សមាជិករបស់ខ្លួន ដើម្បីតែប្រយោជន៍នយោបាយ និងបក្ខពួកខ្លួន ហេតុនេះដើម្បីទម្លាក់កំហុសលើរាជរដ្ឋាភិបាល និងបំភាន់ការពិត ក្នុងការញុះញង់ឱ្យពលរដ្ឋខឹងសម្បា ឈប់ទុកចិត្តរដ្ឋាភិបាល ហើយងាកទៅចូលរួមជាមួយពួកគេ ក្នុងការផ្តួលរំលំរដ្ឋាភិបាលស្របច្បាប់។ លោកបញ្ជាក់ថា៖«គាត់មិនខ្លាចទេការបាត់បង់សមាជិក ឱ្យតែបានផលចំណេញនយោបាយ គាត់មិនខ្លាចប្រទេសធ្លាក់ក្នុងភ្លើងសង្គ្រាមម្តងហើយម្តងទៀតនោះទេ ឱ្យតែគាត់បានបំពេញមហិច្ឆតាចង់បានអំណាច ហើយផ្តួលរំលំរដ្ឋាភិបាលក្រៅប្រព័ន្ធបោះឆ្នោត»។ស្រដៀងគ្នានេះ លោក ហង្ស រ៉ាវី ប្រធានសហភាពសហជីពរក្សាសិទ្ធកម្មករកម្ពុជា បានលើកឡើងថា ក្រុមប្រឆាំងកំពុងយកការស្លាប់លោកលិមគិមយ៉ាបង្វែរសាច់រឿងទៅជាបញ្ហាកោះគុត ប្រមាថចោទប្រកាន់រាជរដ្ឋាភិបាល ប៉ុន្តែរូបភាពនេះ ជាក់ស្តែង គ្មានប្រជាពលរដ្ឋចូលរួមជាមួយឡើយ។ លោកថ្លែងថា៖«ការស្លាប់លោកលិមគិមយ៉ាជាឈ្នាន់របស់ក្រុមប្រឆាំង១០០ភាគរយ ព្រោះរាជរដ្ឋាភិបាលគ្មានផលចំណេញអ្វីប៉ុនក្រចកដៃឡើយ។ ជាក់ស្តែងក្រុមលោកសមរង្ស៊ី និងបក្ខពួកប្រឆាំង អាចចំណាយធនធានគណបក្សខ្លួនឯងដើម្បីទម្លាក់កំហុសលើរដ្ឋាភិបាល»។ ទន្ទឹមនេះ លោក អ៊ុន ដារ៉ា ប្រធានសហភាពសហជីពកម្ពុជាពន្លឺកម្មករ មើលឃើញថា ក្រុមប្រឆាំងក្រៅស្រុកបានរៀបចំល្ខោនមួយដោយយកការស្លាប់លោកលិមគិមយ៉ាធ្វើប្រធានបទ ចោទប្រកាន់រដ្ឋាភិបាល និងរុញរឿងរ៉ាវត្រឡប់ទៅកោះគុតវិញ ដោយសារបញ្ហាកោះគុតគ្មានអ្នកចាប់អារម្មណ៍។ លោកថ្លែងថា៖«បោកប្រាស់ពលរដ្ឋលែងបានរឿងកោះគុត ខាងក្រុមប្រឆាំងមួយក្តាប់តូចវារៀបចំយុទ្ធសាស្ត្រថ្មីរបស់គេ អ៊ីចឹងគេអាចហ៊ាន ខ្ញុំមិនវាយតម្លៃទេ ប៉ុន្តែ យើងមើលឃើញជាក់ស្តែង សួរថាតើអ្នកណាហ៊ានធ្វើដល់ថ្នាក់ហ្នឹង មានតែក្រុមប្រឆាំងហ្នឹង រីឯរដ្ឋាភិបាលចំណេញអី? វាអត់ចំណេញអីទេ។» បើតាមលោកអ៊ុន តារ៉ា ក្រុមប្រឆាំងហ៊ានធ្វើគ្រប់បែបយ៉ាង ទោះបីជាត្រូវលះបង់កម្លាំងសមាជិកជាន់ខ្ពស់របស់ខ្លួនម្នាក់ឬពីរនាក់ក៏ដោយ ដើម្បីបង្កើតបញ្ហាទាញការចាប់អារម្មណ៍ហើយទម្លាក់កំហុសគ្រប់យ៉ាងលើរាជរដ្ឋាភិបាល រីឯខ្លួនឯងចំណេញនយោបាយតាមបែបស្វាស៊ីបាយលាបមាត់ពពែ៕

បណ្ដាញសង្គម

ព័ត៌មានថ្មីៗ

សម្ដេចប្រធានរដ្ឋសភា៖ បារាំង​គឺជាតួអង្គដ៏សំខាន់​ចូលរួម​ចំណែក​ដោះស្រាយ​វិវាទ​ព្រំដែន​រវាង​កម្ពុជា និងថៃ
07/17/2025 12:07 PM
Facebook Telegram Linkin
អភិបាលខេត្ត​កំពង់ចាម​ ស្នើ​ដល់អាជ្ញាធរ និងសមត្ថកិច្ចពាក់ព័ន្ធ បង្កើនការផ្សព្វផ្សាយពីបញ្ហា​ទឹកជំនន់ទន្លេមេគង្គ
07/17/2025 11:07 AM
Facebook Telegram Linkin
ក្រសួងការងារ នាំយកឱកាសការងារជាង ៣ពាន់កន្លែងសម្រាប់ប្រជាពលរដ្ឋ និង​ពលករខ្មែរ​ក្នុង​ខេត្ត​បន្ទាយមានជ័យដែលទើបត្រឡប់មកពីប្រទេសថៃ
07/17/2025 11:07 AM
Facebook Telegram Linkin
អ្នកការទូត៖ សហភាពអឺរ៉ុប បានបរាជ័យជាលើកទីពីរក្នុងការអនុម័តទណ្ឌកម្មថ្មីលើរុស្ស៊ី
07/17/2025 11:07 AM
Facebook Telegram Linkin
កោះតៃវ៉ាន់ ហ្វឹកហ្វឺនលំហាត់សមការពារស៊ីវិលទ្រង់ទ្រាយធំ ខណៈសមយុទ្ធប្រចាំឆ្នាំជិតបញ្ចប់
07/17/2025 11:07 AM
Facebook Telegram Linkin
«ដំណើរទេសចរណ៍នៅប្រទេសកម្ពុជាពិតជាសប្បាយរីករាយ និង​ពោរ​ពេញ​ដោយ​អនុស្សាវរីយ៍​ល្អៗដែលមិនអាចបំភ្លេចបាន ហើយយើងមកលេងម្តងទៀតជាមិនខាន» ចំណាប់​អារម្មរណ៍​រួម​របស់​ប្រតិភូបុគ្គលិកក្រុមហ៊ុន EdF និង GdF បារាំង
07/17/2025 11:07 AM
Facebook Telegram Linkin
កាណាដា បញ្ចេញវិធានការពន្ធដែកថែបថ្មីលើដៃគូពាណិជ្ជកម្មដើម្បីការពារឧស្សាហកម្មក្នុងស្រុក
07/17/2025 11:07 AM
Facebook Telegram Linkin
ជនជាតិឥណ្ឌូនេស៊ីប្រុសស្រីចំនួន២៧១នាក់ ត្រូវបានឃាត់ខ្លួន ក្នុងទីតាំងអគារលួចបើកល្បែងអនឡាញ នៅក្រុងប៉ោយប៉ែត
07/17/2025 11:07 AM
Facebook Telegram Linkin
រដ្ឋមន្ត្រីការបរទេសអ៊ុយក្រែន៖ ក្រុងគីវ ត្រៀមខ្លួនរួចរាល់សម្រាប់ការចរចាបន្ថែមទៀតជាមួយក្រុងមូស្គូ ដោយពុំផ្ដល់កាលបរិច្ឆេទ
07/17/2025 11:07 AM
Facebook Telegram Linkin
ក្រុមហ៊ុនវិនិយោគធំៗចិននាំយកបច្ចេកវិទ្យាទំនើបលើប្រពន្ធ័ប្រព្រឹត្តកម្មទឹកកខ្វក់ និង​កែច្នៃ​កាក​សំណល់​រឹង, ប្លាស្ទិករួមចំណែកលើកកម្ពស់សុខភាពសាធារណៈនៅកម្ពុជា
07/17/2025 11:07 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.