BTV NEWS

គណៈបញ្ជាការឯកភាពរដ្ឋបាលក្រុងកំពង់សោម ចុះត្រួតពិនិត្យរដ្ឋបាលចំហរ រកឃើញជនបរទេស ២៦នាក់ ពាក់ព័ន្ធករណី Online Scams

សម្តេចតេជោ ហ៊ុន សែន៖ «គ្មានការយោគយល់ណាមួយ ចំពោះទីកន្លែងណាក៏ដោយ ដែលបើកឱកាសឲ្យពួកឆបោកតាមប្រព័ន្ធអនឡាញ ធ្វើសកម្មភាព»

មេបញ្ជាការរងកងរាជអាវុធហត្ថលើផ្ទៃប្រទេសណែនាំឱ្យគ្រប់ជំនាញទាំងអស់បង្កើនការយកចិត្តទុកដាក់បង្ក្រាប Online Scams និងបទល្មើសផ្សេងៗ

ស្ថានទូតខ្មែប្រចាំនៅសាធារណរដ្ឋកូរ៉េ ចុះ MOU ជាមួយមន្ទីរពេទ្យដៃគូ ដើម្បីផ្ដល់អត្ថប្រយោជន៍ដល់ពលរដ្ឋខ្មែរនៅកូរ៉េ

ព័ត៌មានជាតិ

អាជ្ញាធរសង្កាត់ចោមចៅ គណៈកម្មការផ្សារជម្ពូវ័ន២ និងបងប្អូនអាជីវករ រួមគ្នាផ្ដល់ជំនួយដល់សមរភូមិមុខ ដើម្បីជួយទៅដល់វីរៈកងទ័ព និងជនភៀសសឹក

គណៈកម្មការផ្សារជម្ពូវ័ន២ និងក្រុមអាជីវករ សម្ដែងអារម្មក្តុកក្តួល ចំពោះទង្វើសាហាវព្រៃផ្សៃពីសំណាក់កងកម្លាំងយោធាថៃ ដែលបានបើកការបាញ់ប្រហារគ្មានមេត្តាឈ្លានពានចូលទឹកដីកម្ពុជា ដែលបណ្តាលឲ្យមនុស្សជាច្រើននាក់បានស្លាប់ និងធ្វើឲ្យជនស៊ីវិលជាច្រើននាក់បានរងរបួស ។ពួកគាត់ក៏ដូចពលរដ្ឋខ្មែរទាំងអស់ដែរ គឺមានការក្តុកក្តួលយ៉ាងខ្លាំង បន្ទាប់ពីឃើញទង្វើឈ្លានពានដ៏ព្រៃផ្សៃរបស់ប្រទេសថៃមកលើដែនអធិបតេយ្យកម្ពុជា ព្រោះថៃមិនបានគោរពអ្វីទាំងអស់ និងបំផ្លិចផ្លាញគ្មានរើសមុខឡើយ ដែលសូម្បីតែកុមារ ឬជនស៊ីវិលក៏ពួកគេមិនខ្វល់ដែរ ។ ដូច្នេះហើយ ពួកគាត់ជាសមរភូមិក្រោយ បានផ្តល់ជំនួយ ស្បៀងអាហារ សម្ភារៈ បន្លែត្រីសាច់ និងថវិការជាដើម ដើម្បីផ្តល់ជូនទៅកាន់វីរជនកងទ័ពហានក្លារបស់កម្ពុជា និងបងប្អូនជនភៀសសឹក ដែលកំពុងនៅសមរភូមិមុខ ។ហើយពួកគាត់ បានស្នើដល់សប្បុរសជនទាំងអស់ សូមបន្តជួយឧបត្ភម្ភគាំទ្រដល់ជនភៀសសឹក និងវីរកងទ័ព រួមទាំងស្នើដល់អន្តរជាតិសូមបន្តជួយដល់កម្ពុជាផងដែរ ។ចំណែក អាជ្ញាធរសង្កាត់ចោមចៅ ក៏បានសម្តែងគាំទ្រដល់ការអំពាវនាវរបស់សម្តេចតេជោដែរ ព្រោះនេះជាការគិតគូរដ៏ត្រឹមត្រូវរបស់សម្តេចក្នុងការជួយដល់កងទ័ព និងជនភៀសរបស់យើង។ រីឯពួកគាត់ ក្នុងនាមជាជ្ញាធរមូលដ្ឋាន គឺកំពុងចូលរួមអំពាវនាវ រួមទាំងកៀគរឱ្យប្រជាពលរដ្ឋ និងសប្បុរសជនទាំងអស់ចូលរួមបរិច្ចាគឱ្យបានច្រើន រួមទាំងការចូលរួមបុកអំបុកស្រូវថ្មីដើម្បីវាយខ្មាំងឈ្លានពាន ឱ្យបានច្រើនផុសផុលផងដែរ។ដោយសារតែឃើញទង្វើឈ្លានពានរបស់ប្រទេសថៃ មកលើដែនអធិបតេយ្យភាពរបស់កម្ពុជា ទាំងបំពានច្បាស់ អមនុស្សធម៌ និងព្រៃផ្សៃបំផុតនោះ អាជ្ញាធរសង្កាត់ចោមចៅ គណៈកម្មការផ្សារជម្ពូវ័ន២ និងបងប្អូនអាជីវករ បានបន្តការបួងសួងដល់វត្ថុស័ក្តិសិទ្ធ និងវិញ្ញាណក្ខន្ធបុព្វបុរសខ្មែរទាំងអស់ សូមតាមជួយថែរក្សាឃុំគ្រងដល់វីរកងទ័ព និងទឹកដីរបស់ដូនតា យើងឱ្យបានជ័យជម្នះ និងគង់វង់ជារៀងរហូត។អត្ថបទ ៖ ពៅយី

រដ្ឋបាលរាជធានីភ្នំពេញបន្តទទួលអំណោយពីសប្បុរសជន ដើម្បីបន្តចែកជូនវីកងទ័ពកំពុងប្រយុទ្ធនៅតំបន់ជួរមុខ និងប្រជាពលរដ្ឋភៀសសឹក

ភ្នំពេញ ៖ នៅរសៀលថ្ងៃទី១២ ខែធ្នូ ឆ្នាំ២០២៥ ឯកឧត្ដម ឃួង ស្រេង អភិបាលរាជធានីភ្នំពេញ និងលោកជំទាវ បានអញ្ជើញទទួលអំណោយពីសប្បុរសជន ខណៈសប្បុរសជនបានបន្តនាំយកអំណោយទាំងនេះមកប្រគល់ជូនរដ្ឋបាលរាជធានីភ្នំពេញ ដើម្បីត្រៀមរៀបចំបែងចែកជូនកងទ័ពជួរមុខ និងប្រជាពលរដ្ឋនៅមណ្ឌលសុវត្ថិភាពនានា។ គិតមកដល់ពេលនេះរដ្ឋបាលរាជធានីភ្នំពេញបានបើកទទួលអំណោយពីសប្បុរសជនបានរយៈពេល៤ថ្ងៃហើយ នៅសាលារាជធានីភ្នំពេញ ហើយអំណោយដែលទទួលបានមានដូចជា ថវិកា មី ទឹកបរិសុទ្ធ អង្ករ ខ្សែចង មួក កន្ទេល នំក្រៀម ត្រីងៀត ទឹកត្រី ទឹកស៊ីអ៊ីវ ស្ពៃក្តោប ប្រេងឆា ឆ្នាំង អំបុក ភួយ ទឹកផ្លែឈើ ទឹកក្រូច ក្រម៉ា អាវជជុះ និង ថ្នាំពេទ្យជាដើម។ ឯកឧត្ដម ឃួង ស្រេង អភិបាលរាជធានីភ្នំពេញបានថ្លែងអំណរគុណយ៉ាងជ្រាលជ្រៅចំពោះអំណោយ សប្បុរសធម៌របស់ប្រជាពលរដ្ឋជាច្រើនមុខដែលបាន ចូលរួមឧបត្ថម្ភតាមរយៈរដ្ឋបាលរាជធានីភ្នំពេញ ដេីម្បី រៀបចំបែងចែកជូនកងទ័ពជួរមុខ និងប្រជាពលរដ្ឋ។ រដ្ឋបាលរាជធានីភ្នំពេញនៅតែបន្តទទួលអំណោយពីសប្បុរសជនតទៅទៀត នៅសាលារាជធានីភ្នំពេញ។តាមសេចក្តីអំពាវនាវរបស់រដ្ឋបាលរាជធានីភ្នំពេញបានឱ្យដឹងថា ក្នុងបុព្វហេតុមនុស្សធម៌ដើម្បីចូលរួមគាំទ្រ និងលើកទឹកចិត្តដល់វីរកងទ័ពជួរមុខកម្ពុជា ដែលបាននឹងកំពុងប្រយុទ្ធយ៉ាងអង់អាចក្លាហាន ដើម្បីការពារបូរណភាពទឹកដី តតាំងជាមួយកងកម្លាំងប្រដាប់អាវុធថៃ ដែលនៅតែចិញ្ចឹមចិត្តឈ្លានពានមកលើដែនអធិបតេយ្យភាពរបស់កម្ពុជាម្តងហើយម្តងទៀតឥតឈប់ឈរ រដ្ឋបាលរាជធានីភ្នំពេញបានរៀបចំទទួលនូវអំណោយគ្រប់ប្រភេទ ដើម្បីយកទៅចែកជូនដល់វីរកងទ័ពជួរមុខ ដែលបាននឹងកំពុងខិតខំតស៊ូការពារបន្ទាត់ព្រំដែនកម្ពុជា យ៉ាងអង់អាចក្លាហាន មុះមុត ប្រឆាំងនឹងសត្រូវឈ្លានពាន ប្រកបដោយស្មារតីស្នេហាជាតិមាតុភូមិ និងចែកជូនបងប្អូនប្រជាពលរដ្ឋដែលត្រូវបានជម្លៀសខ្លួនមកកាន់មណ្ឌលសុវត្ថិភាពនានា៕

ឯកឧត្តម វង សូត៖ ប្រទេសជាតិរីកចម្រើន អភិវឌ្ឍជឿនលឿន និងរឹងមាំទៅបាន គឺពឹងលើធនធានមនុស្ស

ប្រទេសជាតិរីកចម្រើន មានការអភិវឌ្ឍជឿនលឿនរឹងមាំ គឺពឹងលើធនធានមនុស្ស ដែលមានបញ្ញាញាណខ្ពង់ខ្ពស់។ ដូច្នេះ ប្អូនៗក្មួយៗនិស្សិតទាំងអស់ ត្រូវប្រឹងប្រែងសិក្សារៀនសូត្រឲ្យបានខ្លាំងក្លា ដើម្បីជាទំពាំងស្នងប្ញស្សី ក្នុងការអភិវឌ្ឍប្រទេសជាតិឲ្យមានការអភិវឌ្ឍរីកចម្រើនជឿនលឿន ក្លាយជាប្រទេសមានចំណូលខ្ពស់ នៅឆ្នាំ២០៥០ ដែលជាបំណងប្រាថ្នាពលរដ្ឋខ្មែរគ្រប់រូប។ ឯកឧត្តម វង សូត អនុប្រធានទី២រដ្ឋសភា បានលើកឡើងដូច្នេះក្នុងឱកាសដែលឯកឧត្តម អញ្ជើញជាអធិបតីក្នុងពិធីបើកបវេសនកាលឆ្នាំសិក្សា២០២៥-២០២៦ នៅសាកលវិទ្យាល័យ ហេង សំរិន ត្បូងឃ្មុំ ស្ថិតនៅភូមិនិគមលើ ឃុំស្រឡប់ ស្រុកត្បូងឃ្មុំ ខេត្តត្បូងឃ្មុំ នាព្រឹកថ្ងៃទី១២ ខែធ្នូ ឆ្នាំ២០២៥។ឯកឧត្តមអនុប្រធានទី២រដ្ឋសភា បានបន្តថា៖«ធនធានមនុស្ស គឺជាកត្តាសំខាន់ និងមិនអាចខ្វះបានសម្រាប់កសាង និងអភិវឌ្ឍសង្គមជាតិ។ ប្រទេសនីមួយៗអាចរីកចម្រីន ជឿនលឿនទៅបាន គឺអាស្រ័យដោយមានធនធានមនុស្ស ប្រកបដោយចំណេះវិជ្ជា គតិបណ្ឌិត និងសីលធម៌ល្អ ដែលចេះគិតគូរដោះស្រាយរាល់បញ្ហាប្រកបដោយភាពឆ្លាតវៃនិងអាចដឹកនាំប្រកបដោយភាពប៉ិនប្រសប់។រាជរដ្ឋាភិបាល កម្ពុជា អាចរីកចម្រើនជឿនលឿនអភិវឌ្ឍទៅបាន គឺពឹងលើក្មួយៗជំនាន់ក្រោយទាំងអស់នេះហើយ»។លោកសាស្រ្តាចារ្យរងបណ្ឌិត ពិន វណ្ណារ៉ូ សាកលវិទ្យាធិការសាកលវិទ្យាល័យ បានឱ្យដឹងថា៖ សាកលវិទ្យាល័យ ហេង សំរិន ត្បូងឃ្មុំ រួមមាន៖ មហាវិទ្យាល័យចំនួន០៤ វិទ្យាស្ថានចំនួន៣ ដេប៉ាតឺម៉ង់ចំនួន២១ ស្មើនឹងមុខជំនាញចំនួន៣៥។ ការបណ្តុះបណ្តាលនិស្សិតសាកលវិទ្យាល័យ ហេង សំរិន ត្បូងឃ្មុំ បានបណ្តុះបណ្តាលសិស្ស-និស្សិតបានបញ្ចប់ដោយជោគជ័យ ដែលមាននិស្សិតសរុបចំនួន ១,៤៤៧ នាក់ ស្រីសរុបចំនួន ៨៨៤ នាក់។ ក្នុងនោះមាន៖ បរិញ្ញាបត្រជាន់ខ្ពស់ចំនួន០៩នាក់ ស្រី០៧នាក់, ថ្នាក់បរិញ្ញាបត្រ ចំនួន ១០៤០ នាក់ ស្រី៦៥០នាក់ ,ថ្នាក់បរិញ្ញាបត្ររង ចំនួន ១៤៩ នាក់ ស្រី ៨១នាក់ និងនិស្សិតកំពុងសិក្សានៅសាកលវិទ្យាល័យ ហេង សំរិន ត្បូងឃ្មុំ បាននិងកំពុងបណ្តុះបណ្តាលសិស្ស-និស្សិតសរុបចំនួន ២៤១០ នាក់ ស្រីសរុបចំនួន ១៤៦៧ នាក់ ។ថ្នាក់បរិញ្ញាបត្រជាន់ខ្ពស់ចំនួន ៨៩នាក់ ស្រី២៥នាក់ ថ្នាក់បរិញ្ញាបត្រចំនួន ២០៧២នាក់ ស្រី១៣០៤នាក់ ថ្នាក់បរិញ្ញាបត្ររងចំនួន ២៩នាក់ ស្រី ១៤នាក់ ថ្នាក់អប់រំបច្ចេកទេសចំនួន២២០នាក់ ស្រី១២៤នាក់។ ក្នុងឱកាសនោះ ឯកឧត្តម វង សូត បាននាំនូវការផ្តាំផ្ញើសាកសួរសុខទុក្ខពីសំណាក់សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា សម្តេចអគ្គមហាពញាចក្រី ហេង សំរិន ប្រធានកិត្តិយសក្រុមឧត្តមប្រឹក្សាផ្ទាល់ព្រះមហាក្សត្រនិងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ជូនដល់សាស្រ្តាចារ្យ លោកគ្រូ អ្នកគ្រូ ប្អូនៗនិស្សិតទាំងអស់ដោយក្តីនឹករលឹក។ឯកឧត្តមបានសំណូមពរទាំងអស់គ្នា មេត្តាតស៊ូ អត់ធ្មត់និង ត្រូវជឿទុកចិត្តទៅលើថ្នាក់ដឹកនាំ និងរួមសាមគ្គីគ្នាជាធ្លុងមួយឱ្យបានរឹងមាំ ក្នុងគ្រាដែលប្រទេសជាតិកំពុងជួបប្រទះសង្រ្គាមឈ្លានពានពីកងទ័ពសៀម។ ឯកឧត្តមបានប្រកាសថ្កោលទោស ចំពោះថៃ ដែលឈ្លានពាន មកលើកម្ពុជាទាំងកំរោល ដែលចាត់ទុកជាឧក្រិដ្ឋកម្មសង្រ្គាម និងរំលោភច្បាប់អន្តរជាតិយ៉ាងធ្ងន់ធ្ងរ។ ឯកឧត្តម វង សូត បានបន្តទៀតថា ក្នុងកាលៈទេសៈដែលខ្មែររងការឈ្លានពានពីទាហានថៃ ឯកឧត្តមបានឱ្យនិស្សិតជឿជាក់លើថ្នាក់ដឹកនាំជាតិយើង ជាពិសេសសម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលពោរពេញដោយបទពិសោធ ប្រាជ្ញាស្មារតីវាងវៃ និងការលះបង់ខ្ពស់ក្នុងបុព្វហេតុបម្រើការពារជាតិមាតុភូមិ។ ឯកឧត្តម វង សូត នៅក្នុងឱកាសនោះ ក៏បានលើកឡើងពីវិស័យអប់រំ ក្រោយឆ្នាំ១៩៧៩ ដែលកម្ពុជាមិនមានអ្វីទាំងអស់ តែដោយការខិតខំប្រឹងប្រែងពីរាជរដ្ឋាភិបាលនាពេលនោះ ទើបធ្វើឲ្យវិស័យអប់រំ មានការអភិវឌ្ឍ រីកចម្រើន រហូតមកដល់បច្ចុប្បន្ននេះ។ ឯកឧត្តម សូមឱ្យកូនក្មួយ សិស្សានុសិស្ស និស្សិតទាំងអស់ ប្រឹងប្រែងសិក្សារៀនសូត្រឲ្យបានខ្លាំងក្លា ដើម្បីយកចំណេះវិជ្ជាទាំងនេះ មកបម្រើជាតិ មាតុភូមិ ធ្វើឲ្យសេដ្ឋកិច្ចជាតិរបស់យើងកាន់តែរីកចម្រើនមួយកម្រិតថែមទៀត ហើយចំណេះវិជ្ជាទាំងនេះ ក៏ជាខឿនការពារបូរណភាពទឹកដីរបស់យើងដ៏មានប្រសិទ្ធភាពផងដែរ។ ឯកឧត្តម បានផ្តល់អនុសាសន៍មួយចំនួនដល់គណៈគ្រប់គ្រងសាកលវិទ្យាល័យគ្រប់លំដាប់ថ្នាក់ ព្រមទាំងសាស្ត្រាចារ្យ និងនិស្សិត ដើម្បីជំរុញគុណភាព នៃការអប់រំ និងការសិក្សា។ ក្នុងឱកាសនោះ ឯកឧត្តម បានឧបត្ថម្ភថវិកាសម្តេចអគ្គមហាពញាចក្រី ហេង សំរិន និងសម្តេចវង្សា សៅ ទី ចំនួន៤០លានរៀលសម្រាប់កសាងសាកលវិទ្យាល័យបន្ត ឧបត្ថម្ភសាស្រ្តាចារ្យ លោកគ្រូ អ្នកគ្រូ ក្នុងម្នាក់ៗ៥ម៉ឺនរៀល សិស្ស និស្សិតក្នុងម្នាក់ៗ ២ម៉ឺនរៀល ឧបត្ថម្ភក្រុមគ្រូពេទ្យស្ម័គ្រចិត្ត ៥០ ម៉ឺនរៀលនិងឧបត្ថម្ភកម្លាំងការពារថវិកាចំនួន១ លានរៀលផងដែរ៕

អង្គការសង្គមស៊ីវិល ២២៤ស្ថាប័ន ជំរុញសហគមន៍អន្តរជាតិ ចាត់វិធានការភ្លាមៗ ចំពោះការឈ្លានពានរបស់យោធាថៃ

នៅថ្ងៃទី ១២ ខែធ្នូ ឆ្នាំ២០២៥ នេះ សហភាព សហព័ន្ធសហជីព អង្គការសង្គមស៊ីវិល សមាគម និងសហគមន៍ ២២៤ស្ថាប័ន បានចេញសេចក្តីថ្លែងការណ៍ ស្ដីពី ការបន្តអំពើឈ្លានពានដោយអាវុធគ្រប់ទម្រង់ដែលប្រព្រឹត្តិដោយកងកម្លាំងថៃ វាយប្រហារមកលើកម្ពុជា ដោយបាន ជំរុញយ៉ាងខ្លាំងក្លាដល់សហគមន៍អន្តរជាតិ រួមមាន អង្គការសហប្រជាជាតិ ស្ថាប័ន សិទ្ធិមនុស្សអន្តរជាតិ និងចលនាសហជីពសកល ឱ្យចាត់វិធានការភ្លាមៗ និងសម្របសម្រួលគ្នាដើម្បី បញ្ឈប់អំពើឈ្លានពានដោយអាវុធរបស់ថៃប្រឆាំងនឹងកម្ពុជា។ស្ថាប័នទាំងអស់ សម្តែងនូវការព្រួយបារម្ភយ៉ាងខ្លាំង និង ថ្កោលទោសយ៉ាងដាច់អហង្ការ ចំពោះអំពើ ឈ្លានពានដ៏ព្រៃផ្សៃរបស់យោធាថៃ ដោយប្រើអាវុធគ្រប់ទម្រង់និងវាយប្រហារដោយមិនរើសគោលដៅ មកលើដែនអធិបតេយ្យភាពរបស់កម្ពុជាជាថ្មីម្តងទៀត កាលពីរសៀលថ្ងៃទី៧ ខែធ្នូ ឆ្នាំ២០២៥ និងបន្តវាយប្រហារកាន់តែខ្លាំងឡើងៗរហូតមកដល់បច្ចុប្បន្ន។ ទង្វើនេះ គឺជាការបំពានយ៉ាងច្បាស់និងធ្ងន់ធ្ងរ បំផុតមកលើអធិបតេយ្យភាពនិងបូរណភាពទឹកដីរបស់កម្ពុជា ហើយបានធ្វើឱ្យប៉ះពាល់យ៉ាងធ្ងន់ធ្ងរ ដល់គោលការណ៍គ្រឹះនៃកិច្ចសហការវិជ្ជមានដោយសន្តិភាព ការគោរពគ្នាទៅវិញទៅមក និងទំនាក់ទំនងជាអ្នកជិតខាងល្អរវាងប្រទេសទាំងពីរ។ក្នុងស្មារតីលើកកម្ពស់ និងការពារសិទ្ធិមនុស្សនៅទូទាំងខ្សែសង្វាក់ផ្គត់ផ្គង់សកល និងដើម្បី ការពារជនស៊ីវិលស្លូតត្រង់ដែលរងផលប៉ះពាល់ដោយអរិភាពដែលកំពុងបន្ត សហភាព សហព័ន្ធសហជីព សមាគម និងសហគមន៍ សូមអំពាវនាវជាបន្ទាន់ដល់សហគមន៍អន្តរជាតិឱ្យបង្កើនសម្ពាធលើព្រះរាជាណាចក្រថៃដើម្បី៖- បញ្ឈប់ជាបន្ទាន់ នូវរាល់ទម្រង់ នៃការឈ្លានពានដោយអាវុធគ្រប់ទម្រង់ប្រឆាំងនឹងកម្ពុជា និងប្រជាជនស៊ីវិល- គោរពយ៉ាងពេញលេញ នូវព្រំដែនដែលទទួលស្គាល់ដោយអន្តរជាតិ និងបូរណភាពទឹកដីរបស់ កម្ពុជា- ចូលរួមក្នុងការសន្ទនាប្រកបដោយស្ថាបនា និងប្រើប្រាស់យន្តការដោះស្រាយដោយសន្តិវិធី ក្រោមការណែនាំរបស់អន្តរជាតិ ដើម្បីដោះស្រាយរាល់ជម្លោះ និង- ធានាការគោរពសិទ្ធិមនុស្ស សុវត្ថិភាព និងសេចក្តីថ្លៃថ្នូរ របស់កម្មករចំណាកស្រុកកម្ពុជាទាំង អស់ដែលរស់នៅ និងធ្វើការនៅក្នុងប្រទេសថៃ ស្របតាមច្បាប់អន្តរជាតិ និងបទដ្ឋានការងារ អន្តរជាតិ។អង្គភាពទាំង ២២៤ សូមជំរុញយ៉ាងខ្លាំងក្លាដល់សហគមន៍អន្តរជាតិ រួមមាន អង្គការសហប្រជាជាតិ ស្ថាប័ន សិទ្ធិមនុស្សអន្តរជាតិ និងចលនាសហជីពសកល ឱ្យចាត់វិធានការភ្លាមៗ និងសម្របសម្រួលគ្នាដើម្បី បញ្ឈប់អំពើឈ្លានពានដោយអាវុធរបស់ថៃប្រឆាំងនឹងកម្ពុជា និងលើកកម្ពស់គោលការណ៍នៃសន្តិភាព យុត្តិធម៌ និងសិទ្ធិមនុស្ស។ ព័ត៌មានពិស្ដារ៖

រដ្ឋមន្ត្រីអប់រំ ចូលរួមពិព័រណ៍សៀវភៅ លើកទឹកចិត្ត លើកកម្ពស់ ការអាន ការសរសេរ ស្រាវជ្រាវ នៅកម្ពុជា

ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា អញ្ជើញទស្សនាស្ដង់ពិព័រណ៍សៀវភៅកម្ពុជា លើកទី១២ នៅ Elysée កោះពេជ្រ ដើម្បីចូលរួមលើកទឹកចិត្ត និងលើកកម្ពស់ ការអាន ការសរសេរនៅកម្ពុជា ព្រមទាំងជំរុញដល់ កវី អ្នកនិពន្ធ អ្នកស្រាវជ្រាវ អ្នកចងក្រងសៀវភៅ បន្តការខិតខំប្រឹងប្រែង ក្នុងការសរសេរស្រាវជ្រាវស្នាដៃរបស់ខ្លួន ប្រកបដោយគុណភាព និង គុណតម្លៃ សំដៅចូលរួមអភិវឌ្ឍផ្នត់គំនិតអ្នកអានឱ្យរីកចម្រើន និងកាន់តែច្រើនសម្បូរបែប។គួរបញ្ជាក់ថា ពិព័រណ៍សៀវភៅកម្ពុជា លើកទី១២ ឆ្នាំ២០២៥ នេះ ប្រព្រឹត្តទៅរយៈពេល ៤ថ្ងៃ គឺថ្ងៃទី១១ ដល់ថ្ងៃទី១៤ ខែធ្នូ ឆ្នាំ២០២៥ ចាប់ពីម៉ោង ៨:០០ ព្រឹក ដល់ ៨:០០ យប់ ស្ថិតនៅ Elysée - កោះពេជ្រ ប្រមូលផ្ដុំទៅដោយសៀវភៅថ្មីៗ ជាច្រើនម៉ឺនក្បាលមានដូចជា សៀវភៅកុមារ សៀវភៅប្រវត្តិសាស្ត្រ ស្រាវជ្រាវ ប្រលោមលោក លើកទឹកចិត្ត និងបណ្តុះផ្នត់គំនិត និងសៀវភៅជាច្រើនភាសាសម្រាប់មនុស្សគ្រប់វ័យ ពីអ្នកនិពន្ធខ្មែរជើងចាស់ អ្នកនិពន្ធល្បីៗ និងអ្នកនិពន្ធជំនាន់ថ្មី៕

ឯកឧត្តមបណ្ឌិត អ៊ាង សុផល្លែត ចូលរួមជាមួយក្រុមការងារ អាជ្ញាធរមូលដ្ឋាន និងពលរដ្ឋបួងសួងសុំសេចក្តីសុខ និងដាល់អំបុកស្រូវថ្មីជូនវីរកងទ័ពកម្ពុជា

ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាននិងជាប្រធានក្រុមការងារថ្នាក់ជាតិចុះមូលដ្ឋានខេត្តត្បូងឃ្មុំ និងលោកជំទាវ ជា សុផាកន្នី ព្រមទាំងបុត្រ រួមជាមួយថ្នាក់ដឹកនាំ មន្រ្តីរាជការក្រសួងបរិស្ថាន ក្រុមការងាររាជរដ្ឋាភិបាលចុះមូលដ្ឋានខេត្តត្បូងឃ្មុំ ក្រុមការងារសហភាពសហព័ន្ធយុវជនកម្ពុជាក្នុងវិស័យបរិស្ថាន, សមាគមនារីកម្ពុជាដើម្បីសន្តិភាពនិងអភិវឌ្ឍន៍ក្រសួងបរិស្ថាន រួមជាមួយរដ្ឋបាលខេត្តត្បូងឃ្មុំ អាជ្ញាធរមូលដ្ឋានគ្រប់ថ្នាក់ក្នុងស្រុកអូររាំងឪ និងប្រជាពលរដ្ឋ នៅថ្ងៃទី១២ ខែធ្នូ ឆ្នាំ២០២៥ បានធ្វើពិធីបួងសួងសុំសេចក្តីសុខ សន្តិភាព ជូនដល់ជាតិមាតុភូមិ និងកងកំលាំងវិរកងទ័ពកម្ពុជាដ៏អង់អាចក្លាហាន កំពុងការពារទឹកដីនៃព្រះរាជាណាចក្រកម្ពុជា ប្រឆាំងសត្រូវឈ្លានពាន ព្រមទាំងប្រជាជនកម្ពុជានៅតាមបន្ទាត់ព្រំដែន។ជាមួយគ្នានេះ ឯកឧត្តមរដ្ឋមន្រ្តី និងលោកជំទាវ ព្រមទាំងក្រុមគ្រួសារ និងក្រុមការងារទាំងអស់ បានអញ្ជើញចូលរួមដាល់«អំបុកស្រូវថ្មី» និងវេចខ្ចប់ជាកញ្ចប់បានជាច្រើន ដើម្បីចែកជូនដល់វីរកងទ័ពជួរមុខ ផងដែរ។ ការរៀបចំផលិតអំបុកស្រូវថ្មីចែកជូនកងទ័ពនិងប្រជាជនភៀសសឹក បានឆ្លើយតបនឹងប្រសាសន៍ដឹកនាំដ៏ខ្ពង់ខ្ពស់ របស់សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា គឺ "ទទួលទានអំបុកស្រូវថ្មីវាយសត្រូវឈ្លានពាន’’។ លើសពីនេះ គឺគាំទ្រការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងមានជំនឿទុកចិត្តលើរដ្ឋាភិបាល និងកងកម្លាំងប្រដាប់អាវុធកម្ពុជាគ្រប់កាលៈទេសៈ។ ឯកឧត្តមបណ្ឌិត អ៊ាង សុផល្លែត បានទិញស្រូវពីប្រជាពលរដ្ឋនិងចែកជូនទៅតាមមូលដ្ឋានគ្រប់ឃុំ និងវិទ្យាល័យទាំងអស់ ក្នុង១កន្លែង១តោន ដើម្បីចែកជូនសិស្សនុសិស្ស លោកគ្រូអ្នកគ្រូ និងអាជ្ញាធរមូលដ្ឋាន នៅក្នុងមូលដ្ឋានស្រុកអូររាំងឪ ស្រុកពញាក្រែក និងស្រុកត្បូងឃ្មុំ ខេត្តត្បូងឃ្មុំ ផលិតអំបុក ដើម្បីចែកលជូនវីរកងទ័ពនៅសមរភូមិមុខ និងសម្រាប់ចែកជូនជនភៀសសឹកដោយសារសង្រ្គាមឈ្លានពានទឹកដីកម្ពុជា ពីកងទ័ពថៃ។សូមបញ្ជាក់ថា ឯកឧត្តមរដ្ឋមន្ត្រីក្រសួងបរិស្ថាននិងជាប្រធានក្រុមការងារថ្នាក់ជាតិចុះមូលដ្ឋានខេត្តត្បូងឃ្មុំ តែងតែបានចូលរួមជាមួយថ្នាក់ដឹកនាំ មន្រ្តីរាជការក្រសួងបរិស្ថាន ក្រុមការងាររាជរដ្ឋាភិបាលចុះមូលដ្ឋានខេត្តត្បូងឃ្មុំ ក្រុមការងារសហភាពសហព័ន្ធយុវជនកម្ពុជាក្នុងវិស័យបរិស្ថាន, សមាគមនារីកម្ពុជាដើម្បីសន្តិភាពនិងអភិវឌ្ឍន៍ក្រសួងបរិស្ថាន រួមជាមួយរដ្ឋបាលខេត្តត្បូងឃ្មុំ អាជ្ញាធរមូលដ្ឋានគ្រប់ថ្នាក់ក្នុងស្រុកអូររាំងឪ និងប្រជាពលរដ្ឋ គិតគូរអំពីសុខទុក្ខនៃការរស់នៅ ព្រមទាំងការគាំទ្រដល់ការដឹកនាំ របស់រាជរដ្ឋាភិបាលកម្ពុជា និងវីរកងទ័ពកម្ពុជា របស់យើងដែលបានកំពុងការពារយ៉ាងរឹងមាំ តាមបន្ទាត់ព្រំដែនកម្ពុជា និងបងប្អូនប្រជាពលរដ្ឋភៀសសឹក នៅតាមមណ្ឌលសុវត្ថិភាពនានា នៅអំឡុងពេលមានសត្រូវឈ្លានពានទឹកដី និងគ្រោះមហន្តរាយនានា។ ឯកឧត្តមរដ្ឋមន្រ្តី និងក្រុមការងារ បានគោរពបួងសួងសូមបារមី និងវត្ថុសក្តិសិទ្ធទាំងអស់ ក្នុងព្រះរាជាណាចក្រកម្ពុជា ព្រះធាតុបាស្រី ស្ថិតនៅក្នុងឃុំព្រះធាតុ ស្រុកអូររាំងឪ ខេត្តត្បូងឃ្មុំ មានបារមីមាឬទ្ធិ ព្រំទាំងព្រះអង្គព្រះនាម វេស្សវន្ត កុវេរោ លោកតាអង្ក្រងភ្លើង លោកយាយស្រីគ្រប់ល័ក្ខ លោកតាគុណដាល់ លោកយាយទេព និងលោកតាក្រហមក ព្រមទាំង មេទ័ពជាច្រើនទៀត ដែលមានបុណ្យបរមី ជួយការពារព្រះរាជាណាចក្រកម្ពុជា ធ្វើឱ្យសត្រូវឈ្លានពានទឹកដីវិនាសអន្តរាយនិង សូមជួយថែរក្សា និងការពារកងទ័ពនិងប្រជាជនកម្ពុជា ឱ្យមានសុវត្ថិភាព រួចផុតពីសង្គ្រាម និងជៀសផុតពីសត្រូវឈ្លានពានមកលើទឹកដីកម្ពុជា។

គម្រោងអភិវឌ្ឍន៍សុខភាពសិក្សាសម្រាប់កុមារកម្ពុជា ដំណាក់កាលទី១ បានបញ្ចប់ដោយភាពជោគជ័យ

នៅថ្ងៃទី១២ ខែធ្នូ ឆ្នាំ២០២៥ នេះ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានអញ្ជើញជាអធិបតីក្នុងពិធីបិទបញ្ចប់ដោយជោគជ័យនូវ គម្រោងអភិវឌ្ឍន៍សុខភាពសិក្សាសម្រាប់កុមារកម្ពុជា របស់សាកលវិទ្យាល័យ តូក្យូ ហ្គាគឺហ្គេ នៃប្រទេសជប៉ុន ដំណាក់កាលទី១ (២០២០-២០២៥) និងមានការអញ្ជើញចូលរួមពីសំណាក់ ឯកឧត្តម លោកជំទាវ ថ្នាក់ដឹកនាំក្រសួងអប់រំ យុវជន និងកីឡា លោក ARIKAWA TAKASHI នាយកប្រតិបត្តិនៃ មូលនិធិ Nippon (The Nippon Foundation) សាស្ត្រាចារ្យបណ្ឌិត ASAKURA TAKASHI ប្រធានគម្រោង SHCC នាយកវិទ្យាស្ថានគរុកោសល្យភ្នំពេញ និងបាត់ដំបង សាស្ត្រាចារ្យពី សាកលវិទ្យាល័យ តូក្យូ ហ្គាគីហ្គេ និងសាកលវិទ្យាល័យដៃគូ អង្គការនិងដៃគូពាក់ព័ន្ធ និងមន្ត្រីក្រោមឱវាទ។ក្នុងឱកាសនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានថ្លែងអំណរគុណយ៉ាងជ្រាលជ្រៅដល់មូលនិធិនីបប៉ុន សាស្តាចារ្យប្រធានគម្រោង និងភាគីពាក់ព័ន្ធទាំងអស់ដែលបានសម្រេចបាននូវគម្រោងនេះ ដែលបានជួយលើកកម្ពស់សុខភាពកុមារ និងលទ្ធផលសិក្សាឱ្យទទួលបានលទ្ធផលជាវិជ្ជមាន។ គម្រោងអភិវឌ្ឍន៍សុខភាពសិក្សាសម្រាប់កុមារកម្ពុជា(SHCC) ដឹកនាំដោយសាកលវិទ្យាល័យ តូក្យូ ហ្គាគឺហ្គេ នៃប្រទេសជប៉ុនក្រោមកិច្ចសហការជាមួយស្ថាប័នពាក់ព័ន្ធរួមមាន នាយកដ្ឋានសុខភាពសិក្សា វិទ្យាស្ថានគរុកោសល្យរាជធានីភ្នំពេញ និងវិទ្យាស្ថានគរុកោសល្យបាត់ដំបង ក្រោមឱវាទក្រសួងអប់រំ យុវជន និងកីឡា និងការគាំទ្រដ៏ថ្លៃថ្លារបស់មូលនិធិនីបប៉ុន បានអនុវត្ត និងបញ្ចប់ដោយភាពជោគជ័យ ហើយសូមបញ្ជាក់ដែរថា គម្រោងនេះរៀបចំឡើងក្នុងគោលបំណង៖ - ការគាំទ្រដល់ការអភិវឌ្ឍន៍វគ្គសិក្សាសុខភាពសិក្សា និងមុខវិជ្ជាសិក្សានៅគ្រឹះស្ថានឧត្តមសិក្សារួមមាន វិទ្យាស្ថានគរុកោសល្យ និងសាលាគរុកោសល្យ និងវិក្រឹត្យការ។- ការផ្តល់ការបណ្តុះបណ្តាលសុខភាពសិក្សាដល់គ្រូនៅមូលដ្ឋាន បឋមសិក្សា និងមធ្យមសិក្សា និងការលើកកម្ពស់សកម្មភាពសុខភាពសិក្សា។- ការប្រមូលទិន្នន័យ និងការតាមដានដំណើរការសិក្សា និងការស្រាវជ្រាវតាមភាពចាំបាច់ ដើម្បីបង្កើតសៀវភៅសិក្សាគោល និង ការផ្តល់ក្នុងបណ្តុះបណ្តាលសុខភាពសិក្សាដល់គ្រូឧទ្ទេស។រាជរដ្ឋាភិបាល នៃព្រះរាជាណាចក្រកម្ពុជា បានដាក់ចេញចក្ខុវិស័យក្នុងការប្រែក្លាយទៅជាប្រទេសដែលមានប្រាក់ចំណូលមធ្យមកម្រិតខ្ពស់ក្នុងឆ្នាំ២០៣០ និងជាប្រទេសដែលមានប្រាក់ចំណូលខ្ពស់ក្នុងឆ្នាំ២០៥០ តាមរយៈការកំណត់សំណុំយុទ្ធសាស្ត្រ ដើម្បីអភិវឌ្ឍធនធានមនុស្សប្រកបដោយគុណភាព ផលិតភាពការងារខ្ពស់ និងសុខភាពរឹងមាំ។ ក្នុងបរិបទនេះ ការលើកកម្ពស់សុខភាពសិក្សា គឺជាកត្តាដ៏សំខាន់ និងមិនអាចខ្វះបានក្នុងការចូលរួមចំណែកដល់ការធានាបាននូវការសិក្សារបស់សិស្ស ប្រកបដោយគុណភាព និងបង្កើនអត្រាបញ្ចប់ការសិក្សារបស់ពួកគេ ដើម្បីឈានទៅដល់ការសម្រេចគោលដៅនៃការអប់រំ និងចក្ខុវិស័យរបស់ជាតិ។ សុខភាព គឺជាកត្តាស្នូលក្នុងការកំណត់ការសិក្សារបស់សិស្ស និងជាមូលដ្ឋានសម្រាប់ ការអភិវឌ្ឍសង្គមជាតិ ប្រកបដោយចីរភាព។ ដោយមើលឃើញពីទំនាក់ទំនងយ៉ាងជិតស្និទ្ធ រវាងសុខភាព និងការអប់រំ ការដាក់បញ្ចូលមុខវិជ្ជាសុខភាពសិក្សា ទៅក្នុងកម្មវិធីអប់រំគ្រូ បង្រៀន គឺជាជំហានដ៏សំខាន់ក្នុងការអប់រំគរុនិស្សិត ដែលអនាគតនឹងក្លាយជាគ្រូបង្រៀន ឱ្យទទួលបាននូវវិជ្ជាសម្បទា បំណិនសម្បទា និងចរិយាសម្បទា ដែលចាំបាច់ក្នុងការជំរុញ សុខុមាលភាពរបស់សិស្សនៅក្នុងថ្នាក់រៀន និងសហគមន៍ឱ្យល្អប្រសើរ។ជាថ្មីម្តងទៀត តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានថ្លែងអំណរគុណយ៉ាងជ្រាលជ្រៅដល់ គម្រោងអភិវឌ្ឍន៍សុខភាព សិក្សាសម្រាប់កុមារកម្ពុជា (SHCC) ដឹកនាំដោយ សាស្ត្រាចារ្យបណ្ឌិត (Asakura Takashi) និងក្រុមសាស្ត្រាចារ្យមកពីសាកលវិទ្យាល័យ តូក្យូ ហ្គាគឺហ្គេ និងសាស្ត្រាចារ្យនៅសាកលវិទ្យាល័យដៃគូ ៤ ទៀត រួមមាន សាកលវិទ្យាល័យ អីបារ៉ាគី សាកលវិទ្យា- ល័យ ដូមុនជិ សាកលវិទ្យាល័យ សៃតាម៉ា និង សាកលវិទ្យាល័យជាតិ យ៉ូកូហាម៉ា នៃប្រទេសជប៉ុន ដែលបានរៀបចំតាក់តែងសៀវភៅសិក្សាគោល មុខវិជ្ជាអប់រំសុខភាពនេះឡើង និងសូមថ្លែងអំណរគុណចំពោះកិច្ចសហការដ៏ល្អពីថ្នាក់ដឹកនាំ និងមន្ត្រីនៃនាយកដ្ឋាន សុខភាពសិក្សា រួមជាមួយគណៈគ្រប់គ្រង និងគ្រូឧទ្ទេស នៃវិទ្យាស្ថានគរុកោសល្យរាជធានីភ្នំពេញ និងបាត់ដំបង ដែលបានខិតខំប្រឹងប្រែងអស់ពីលទ្ធភាព និងសមត្ថភាពក្នុងការអនុវត្តគម្រោង SHCC ប្រកបដោយស្មារតីទទួលខុសត្រូវខ្ពស់ និងសម្រេចបាននូវសមិទ្ធផលជាផ្លែផ្កា៕

មកទល់រសៀលនេះយោធាថៃបន្តការបាញ់ប្រហារមកលើកងកម្លាំងកម្ពុជាជាច្រើនទីតាំងនៅយោធភូមិភាគទី៥

ក្រសួងការពារជាតិកម្ពុជា បានឱ្យដឹងថា មកទល់ថៃ្ងទី១២ ខែធ្នូ ឆ្នាំ២០២៥ ចាប់ពីម៉ោង ៨:០០នាទីព្រឹក ដល់ម៉ោង ១៣:០០នាទីជ យោធាថៃបន្តការបាញ់ប្រហារ មកលើកងកម្លាំងកម្ពុជាជាច្រើនទីតាំងនៅយោធភូមិភាគទី៥។ក្នុងនោះរួមាន៖- ម៉ោង ៨:៣៨នាទី កម្លាំងថ្មើរជើងរបស់យោធាថៃ អមដោយរថក្រោះបានធ្វើការរុលចូលភូមិសាស្ត្រភូមិ ព្រៃចាន់។ - ម៉ោង ៩:១០នាទី យោធាថៃបានប្រើប្រាស់ដ្រូនស៊ើបការណ៍ហោះក្តាប់សភាពការណ៍ នៅលើភូមិសាស្ត្រ ភូមិព្រៃចាន់។ - ម៉ោង ១០:២៦នាទី យោធាថៃបានប្រើប្រាស់ដ្រូនពាំគ្រាប់ទម្លាក់ចូលភូមិសាស្ត្រអូរភ្លុកដំរី។ - ម៉ោង ១០:៣៤នាទី យោធាថៃបានប្រើប្រាស់ដ្រូនស៊ើបការណ៍ហោះក្តាប់សភាពការណ៍ នៅលើភូមិ សាស្រ្តភូមិព្រៃចាន់។ - ម៉ោង ១១:៣៧នាទី យោធាថៃបានបាញ់ផ្សែងពុល នៅភូមិសាស្ត្រព្រៃចាន់។ - ម៉ោង ១១:៥៨នាទី យោធាថៃបានប្រើប្រាស់ដ្រូនពាំគ្រាប់ទម្លាក់ នៅភូមិសាស្ត្រអូរភ្លុកដំរី។ - ម៉ោង ១២:១៣នាទី យោធាថៃបានបាញ់ផ្សែងពុល នៅភូមិសាស្ត្រព្រៃចាន់ និងភូមិជោគជ័យ។ - ម៉ោង ១២:៤៥នាទី យោធាថៃបានប្រើប្រាស់ដ្រូនបន្តហោះស៊ើបការណ៍លើភូមិសាស្ត្រអូរភ្លុកដំរី។ - ម៉ោង ១២:៥៣នាទី យោធាថៃបានបាញ់ផ្លោងចូលភូមិសាស្ត្រភូមិព្រៃចាន់។

មកទល់រសៀលនេះ យោធាថៃបន្តការបាញ់ប្រហារមកលើកងកម្លាំងកម្ពុជាជាច្រើនទីតាំងក្នុងភូមិសាស្រ្ដយោធភូមិភាគទី៤

ក្រសួងការពារជាតិកម្ពុជា បានឱ្យដឹងថា នៅថៃ្ងទី១២ ខែធ្នូ ឆ្នាំ២០២៥ ចាប់ពីម៉ោង ៧:០៥នាទីព្រឹក ដល់ម៉ោង ១៣:០០នាទី យោធាថៃបន្តការបាញ់ប្រហារមកលើកងកម្លាំងកម្ពុជាជាច្រើនទីតាំងក្នុងភូមិសាស្រ្ដយោធភូមិភាគទី៤។ក្នុងនោះរួមមាន៖- ម៉ោង ៧:៤០នាទី យោធាថៃបន្តវាយប្រហារឈ្លានពានមកលើកម្ពុជាកាន់តែកំរោលខ្លាំង នៅភូមិសាស្រ្ត ជប់អង្គុញ និងថ្មឆត្រ។ - ម៉ោង ៨:២០នាទី យោធាថៃបន្តការវាយប្រហារឈ្លានពានមកលើកម្ពុជាដោយប្រើប្រាស់រថក្រោះ អម ដោយកម្លាំងថ្មើរជើងបានបាញ់ចូលភូមិសាស្ត្រថ្មឆត្រ និងប្រាសាទតាក្របី។ - ម៉ោង ៨:៤១នាទី យោធាថៃបន្តវាយប្រហារឈ្លានពានមកលើកម្ពុជាកាន់តែកំរោលខ្លាំង នៅភូមិសាស្រ្ត បុស្សស្បូវ-ជាំតែ។ - រហូតមកដល់វេលាម៉ោង ៩:០០នាទី យោធាថៃបន្តវាយប្រហារឈ្លានពានមកលើកម្ពុជាកាន់តែកំរោល ខ្លាំង នៅភូមិសាស្រ្តអានសេះ និងបន្តវាយលុកនៅភូមិសាស្ត្រថ្មដូន, ជប់អង្គុញ, ថ្មឆត្រ, ភ្នំ៣៣៣, ប្រាសាទតាក្របី និងប្រាសាទតាមាន់។ - ម៉ោង ១០:១២នាទី យោធាថៃបានបន្តប្រើប្រាស់ដ្រូនបាញ់ផ្សែងពុលយ៉ាងច្រើនចូលភូមិសាស្ត្រភ្នំខ្មោច និងបុស្សស្បូវ-ជាំតែ។ - ម៉ោង ១១:០០នាទី យោធាថៃបន្តវាយប្រហារឈ្លានពានមកលើកម្ពុជាកាន់តែកំរោលខ្លាំង នៅភូមិ សាស្រ្តអានសេះ និងបានបាញ់ផ្សែងពុលយ៉ាងច្រើនសន្ធឹកសន្ធាប់។- រហូតមកវេលាម៉ោង ១២:០០នាទី យោធាថៃបានចាប់ផ្តើមវាយបន្ថែមប្រហារនៅភូមិសាស្ត្រតាស៊ឹម, គោល៨, ភ្នំខ្មោច និងជាំតែ ដោយបានប្រើប្រាស់កាំភ្លើងធំ, ដ្រូន, បាញ់ផ្សែងពុល និងរថក្រោះបាញ់បុក និងបន្តវាយប្រហារនៅភូមិសាស្ត្រប្រាសាទតាក្របី, ភ្នំ៣៣៣, ជប់អង្គុញ, ថ្មដូន, ដំណាក់ស្ដេច, ប្រាសាទតាមាន់ និងជប់គគីរ។ - ម៉ោង ១២:៣២នាទី យោធាថៃបានប្រើប្រាស់ដ្រូនទម្លាក់គ្រាប់បែក នៅភូមិសាស្ត្រប្រាសាទព្រះវិហារ។

ពានរង្វាន់ឧស្សាហកម្មបៃតងបានជ្រើសរើសក្រុមហ៊ុន២១ ដែលរួមចំណែកអភិវឌ្ឍឧស្សាហកម្មបៃតងនៅកម្ពុជា

ភ្នំពេញ ៖ ពានរង្វាន់ឧស្សាហកម្មបៃតងឆ្នាំ២០២៥ ត្រូវបានជ្រើសរើសយកក្រុមហ៊ុន ២១ ដែលបានរួមចំណែកដល់ការអភិវឌ្ឍឧស្សាហកម្ម បៃតងនៅកម្ពុជា នៅក្នុងផលិតកម្មស្អាត និរន្តរភាព និងនវានុវត្តន៍ឧស្សាហកម្ម ប្រកបដោយការទទួលខុសត្រូវ។ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើកឡើងក្នុង កម្មវិធីប្រកួតប្រជែង ពានរង្វាន់ឧស្សាហកម្មបៃតងឆ្នាំ២០២៥ នៅថ្ងៃទី១១ ខែធ្នូ ឆ្នាំ២០២៥ នេះថា ផលិតកម្មបៃតងមិនមែនត្រឹមតែជាការចំណាយទេ តែជា ការវិនិយោគដែលនាំមកនូវការសន្សំសំចៃ នវានុវត្តន៍ និងភាពប្រកួតប្រជែងនៃអាជីវកម្មសម្រាប់រយៈពេលវែង។ ឯកឧត្តមក៏លើកទឹកចិត្ត ឱ្យក្រុមហ៊ុនរោងចក្រ-សហគ្រាសទាំងអស់ បន្តនវានុវត្តន៍ថ្មីៗ ដោយមិនត្រូវស្កប់ស្គល់ នឹងការអនុវត្តបច្ចុប្បន្នរបស់ខ្លួនឡើយ ពោលគឺ ត្រូវខិតខំកែលម្អប្រព័ន្ធផលិតកម្ម ការពារបរិស្ថាន ប្រើប្រាស់ធនធានឱ្យកាន់តែមានប្រសិទ្ធភាព និងធ្វើឱ្យខ្សែច្រវាក់ផលិតកម្មកាន់តែ ស្អាត ដោយរៀនសូត្រពីឧត្តមានុវត្តន៍ទាំងនៅក្នុងប្រទេស និងអន្តរជាតិ។ឯកឧត្តមរដ្ឋមន្ត្រី បញ្ជាក់ឱ្យដឹងថា ពានរង្វាន់ឧស្សាហកម្មបៃតងកម្ពុជាឆ្នាំ២០២៥ បានជ្រើសរើសម្ចាស់ជ័យលាភី ដែលមាន ពានមាសចំនួន ៣, ពានប្រាក់ចំនួន ១១, និងពានសំរឹទ្ធចំនួន៧ ។ ម្ចាស់ជ័យលាភីទាំង ២១ ក្រុមហ៊ុននេះ ត្រូវបានជ្រើសរើសតាមរយៈ ការវាយតម្លៃលើទិដ្ឋភាព៤ គឺទិដ្ឋភាពបរិស្ថាន នវានុវត្តន៍និងចីរភាព ទិដ្ឋភាពសេដ្ឋកិច្ច និងទិដ្ឋភាពសង្គមនិងសមភាពយេនឌ័រ។ឯកឧត្តម Igor Driesmans ឯកអគ្គរដ្ឋទូតសហភាពអឺរ៉ុប បានកោតសរសើរ ចំពោះការប្តេជ្ញាចិត្តរបស់កម្ពុជា ក្នុងការអភវិឌ្ឍ ឧស្សាហកម្មបៃតង និងកត់សម្គាល់ថា គោលការណ៍និរន្តរភាព បច្ចុប្បន្នកាន់តែមានសារៈសំខាន់ សម្រាប់ភាពប្រកួតប្រជែងជាសកល ជាពិសេសសម្រាប់ទីផ្សារធំៗដូចជាសហភាពអឺរ៉ុប។ ឯកឧត្តមបន្ថែមថា ឧស្សាហកម្មជាកម្លាំងជំរុញស្នូលសម្រាប់កំណើនសេដ្ឋកិច្ច ប៉ុន្តែ វាក៏បង្កើតសំណល់ផងដែរ ដែលត្រូវតែគ្រប់គ្រងប្រកបដោយការទទួលខុសត្រូវ។ បរិវត្តកម្មបៃតង គឺជាគន្លឹះសម្រាប់ភាពប្រកួតប្រជែង របស់កម្ពុជា ជាពិសេសខណៈដែលទីផ្សារសកលលោក រួមទាំងសហភាពអឺរ៉ុប បាននិងកំពុងបង្កើនស្តង់ដារខ្ពស់លើនិរន្តរភាព។ឯកឧត្តម បានបន្ថែមទៀតថា យុទ្ធសាស្ត្រ Global Gateway របស់សហភាពអឺរ៉ុប បានកៀរគរថវិកាជាង ៣៦០ ពាន់លានអឺរ៉ូ ចន្លោះពីឆ្នាំ២០២១ ដល់២០២៤ ដើម្បីគាំទ្រការវិនិយោគប្រកបដោយនិរន្តរភាពនៅទូទាំងពិភពលោក ក្នុងនោះក៏មានការវិនិយោគលើ ហេដ្ឋារចនាសម្ព័ន្ធ ការផ្គត់ផ្គង់ទឹកស្អាត និងថាមពលស្អាតនៅក្នុងប្រទេសកម្ពុជាផងដែរ។ ពានរង្វាន់ឧស្សាហកម្មបៃតងកម្ពុជា ជាផ្លែផ្កា នៃគម្រោង ការអភិវឌ្ឍដែលបញ្ចេញកាបូនតិច ដើម្បីបង្កើនផលិតភាពនិងកាត់បន្ថយការប្រែប្រួលអាកាសធាតុ តាមរយៈការផ្ទេរ បច្ចេកវិទ្យា អំណោយផលល្អដល់បរិស្ថាន ដែលបានបង្កើតមូលដ្ឋានគ្រឹះសម្រាប់បរិវត្តកម្មឧស្សាហកម្មបៃតងរយៈពេលវែងរបស់កម្ពុជា។សូមបញ្ជាក់ថា កម្មវិធីនេះប្រកួតប្រជែងនេះ ត្រូវបានជ្រើសរើសក្រុមហ៊ុនដែលបានបង្កើតវឌ្ឍនភាពជាក់ស្តែង ក្នុងការកាត់បន្ថយផលប៉ះ ពាល់បរិស្ថាន ទន្ទឹមនឹងនោះបង្កើនប្រសិទ្ធភាព និងភាពប្រកួតប្រជែងរបស់អាជីវកម្ម។ គំនិតផ្តួចផ្តើមនេះ សហការអនុវត្តដោយក្រសួង ឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងអង្គការសហប្រជាជាតិ ដើម្បីអភិវឌ្ឍន៍ឧស្សាហកម្ម (UNIDO) ដោយមាន ការគាំទ្រពីសហភាពអឺរ៉ុប តាមរយៈកម្មវិធី UN PAGE៕អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

អាមេរិក ទទូចថាបទឈប់បាញ់នៅតែបន្ត ទោះបីមានការវាយប្រហារការពារខ្លួនទៅលើកោះ Qeshm របស់អ៊ីរ៉ង់ក៏ដោយ

តើមានអ្វីកើតឡើងនៅថ្ងៃទី៩៦នៃសង្គ្រាមនៅអ៊ីរ៉ង់ ខណៈអាមេរិកនិងអ៊ីរ៉ង់ មានការវាយប្រហារថ្មី

មេដឹកនាំថ្មីរបស់សូឡូម៉ុន ពិនិត្យកតិកាសញ្ញាសន្តិសុខជាមួយចិន និងស្វែងរកសន្ធិសញ្ញាជាមួយអូស្ត្រាលី

ជប៉ុនបដិសេធការទាមទាររបស់កោះតៃវ៉ាន់ សម្រាប់ការពិភាក្សា ជុំវិញការកំណត់ព្រំដែនជាមួយហ្វីលីពីន

អាមេរិកស្នើដាក់អត្រាយ៉ាងហោចណាស់ ១០% ខណៈលោក Trump កំពុងសាងជញ្ជាំងពន្ធឡើងវិញ

ក្រសួងរតនាគារអាមេរិកចេញទណ្ឌកម្មថ្មីលើអ៊ីរ៉ង់ ដោយផ្តោតលើការដោះដូររូបិយប័ណ្ណគ្រីបតូ

អាមេរិកសម្លឺងដល់ការបើកច្រកសមុទ្រ Hormuz ដោយទម្រង់ស្ងាត់ៗ សម្រាប់គម្រោង Project Freedom

ក្រុមប្រដាប់អាវុធអ៊ីរ៉ាក់ចំនួន ២ ប្រកាសពីការកំណត់អាវុធឲ្យស្ថិតនៅក្រោមការគ្រប់គ្រងរបស់រដ្ឋ

ឥណ្ឌាដករូបសំណាក Messi ចេញនៅទីក្រុង Kolkata ដោយសារបារម្ភពីបញ្ហាសុវត្ថិភាព

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877