នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ឯកឧត្តម ឌិត ទីណា បន្តជំរុញមន្ត្រីកសិកម្មឃុំ បង្កេីនការចុះផ្សព្វផ្សាយគោលនយោបាយកសិកម្មដល់ប្រជាកសិករដេីម្បីប្រយោជន៍រួមទាំងអស់គ្នា
សាខាកាកបាទក្រហមកម្ពុជាខេត្តកំពង់ឆ្នាំងប្រារព្ធព្រះរាជពិធីបុណ្យចម្រើនព្រះជន្មថ្វាយសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរគម្រប់៨៩ យាងចូល៩០ព្រះវស្សា
ប្រធានក្រុមមេធាវីស្មគ្រ័ចិត្តសម្តេចតេជោសែន ចែករំលែក«បទពិសោធន៍ដឹកនាំអង្គភាព និងបទពិសោធន៍ក្នុងការប្រកបវិជ្ជាជីវៈជាមេធាវី»
កម្ពុជាគ្រោងរៀបចំវេទិការពាណិជ្ជកម្មឌីជីថល និងពិព័រណ៍អនឡាញ លើកទី២ ដើម្បីជំរុញការនាំចេញផលិតផលជាតិ

ព័ត៌មានជាតិ

នាវាទេសចរណ៍បរទេស មួយគ្រឿង ផ្ទុកមនុស្សជិត ១.០០០នាក់ ចូលចតធ្វើទស្សនកិច្ច​នៅកម្ពុជា

2024/12/13 02:13:54 pm        89
Facebook Telegram Linkin
នាយនគរបាលអន្ដោប្រវេសន៍ច្រកទ្វារកំពង់ផែអន្ដរជាតិក្រុងព្រះសីហនុ ប្រាប់ឲ្យដឹងថា នាវា​ទេសចរណ៍​បរទេស មួយគ្រឿង ផ្ទុកអ្នកដំណើរចម្រុះជាតិសាសន៍ជិត ១.០០០នាក់ បាន​ចូលចត​ដល់កំពង់ផែស្វយ័តអន្តរជាតិក្រុងព្រះសីហនុ ថ្ងៃទី១៣ ខែធ្នូ ឆ្នាំ២០២៤ ក្នុង​ដំណើរ​ទេសចរណ៍​អន្តរជាតិ មកពីប្រទេសថៃ ចូលសំចតធ្វើទស្សនកិច្ចនៅខេត្តព្រះសីហនុ (កម្ពុជា) រួចនឹងបន្ត​ដំណើរ​ទៅប្រទេសវៀតណាម។ លោកបន្តថា នាវា នេះ ឈ្មោះ SEA BOURN ENCORE សញ្ជាតិ BAHAMAS ផ្ទុកអ្នកដំណើរ​ជម្រុះ​ជាតិសាសន៍សរុប ៩៤៤នាក់ ក្នុងនោះ មានភ្ញៀវទេសចរ ៥៤០នាក់ ៣៤ សញ្ជាតិ ជាតិ​សាសន៍​ដែលច្រើនជាងគេគឺជនជាតិអាមេរិកកាំង ។ នាវា មានបណ្តោយប្រវែងជាង ២០០ម៉ែត្រ ទទឹងជិត ៣០ម៉ែត្រ ជំរៅទឹក ៦ម៉ែត្រ។ នាវាមកពីប្រទេសថៃ នឹងបន្តទៅប្រទេសវៀតណាម នៅយប់ទីថ្ងៃដដែល។ លោកបន្ថែមថា ការចូលចតនាវាទេសចណ៍ បានផ្ដល់ឱកាសឱ្យភ្ញៀវទេសចរចម្រុះជាតិសាសន៍ បានទស្សនាពីវឌ្ឍនភាពខេត្ដព្រះសីហនុ និងបានស្វែងយល់​ពីវប្បធម៌រស់នៅ​របស់​ប្រជាពលរដ្ឋ​ខ្មែរ ជាមួយនិងធនធានធម្មជាតិដ៏សម្បូរបែបរបស់ខេត្ដព្រះសីហនុ ព្រមទាំងបានផ្ដល់អត្ថ​ប្រយោជន៍​មួយចំនួន​ដល់ប្រជាពលរដ្ឋខេត្ដព្រះសីហនុ ដែលជាអ្នកលក់ផលិតទេសចរណ៍ ពិសេសអ្នករត់តាក់ស៊ី ឬម៉ូតូកង់បី និងម៉ូតូឌុប ។ល។

ក្រុមមហ៊ុនប្រមាណជាង ៥០ ដែលជាសមាជិកវេទិកាសម្ព័ន្ធឧស្សាកម្មកូរ៉េ (KIAF) បង្ហាញបំណងវិនិយោគលើវិស័យសក្ដានុពលនៅកម្ពុជា

2024/12/13 02:06:11 pm        51
Facebook Telegram Linkin
ភ្នំពេញ៖ នាព្រឹកថ្ងៃទី១៣ ខែធ្នូ ឆ្នាំ២០២៤, សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យលោក Marn-Ki Jeong ប្រធានវេទិកាសម្ព័ន្ធឧស្សាហកម្មនៃប្រទេសកូរ៉េ (KIAF) ចូលជួបសម្តែងការគួរសម និងពិភាក្សាការងារ នៅសាលសន្និបាតភីអេចហ្គ្រេនហល (បឹងស្នោ)។លោកប្រធានវេទិកាសម្ព័ន្ធឧស្សាហកម្ម បានសម្ដែងនូវក្ដីសោមនស្សរីករាយដែលបានជួបពិភាក្សាការងារជាមួយសម្ដេចបវរធិបតីសាជាថ្មីម្ដងទៀត បន្ទាប់ពីជំនួបលើកដំបូងនៅសាធារណរដ្ឋកូរ៉េ កាលពីប្រមាណ ៧ ខែមុន និងបានគោរពជម្រាបជូនសម្តេចបវរធិបតីថា លោកបានដឹកនាំគណៈប្រតិភូធុរកិច្ចកូរ៉េមកពីបណ្ដាក្រុមហ៊ុនចំនួន ៥០ មកកម្ពុជា ក្នុងគោលបំណងស្វែងយល់ពីកាលានុភាពវិនិយោគនៅកម្ពុជា តាមការសន្យានៅពេលដែលលោកបានជួបពិភាក្សាការងារជាមួយសម្តេចបវរធិបតីលេីកដំបូង។ លោកប្រធានបានបន្ថែមទៀតថាបណ្ដាក្រុមហ៊ុនដែលមកបំពេញបេសកកម្មនៅកម្ពុជា នាពេលនេះ បានបង្ហាញបំណងស្វែងរកឱកាសវិនិយោគលើវិស័យសំខាន់ៗរួមមាន៖ វិស្វកម្ម, ការកសាងហេដ្ឋារចនាសម្ព័ន្ធ, ការអភិវឌ្ឍធនធានមនុស្សលេីជំនាញយានយន្ត បច្ចេកទេស បច្ចេកវិទ្យា, សេវាថែទាំសុខភាពនិងកែសម្ផស្ស, ការវិនិយោគលើប្រព័ន្ធពាណិជ្ជកម្មទូទៅ និងប្រព័ន្ធផ្សព្វផ្សាយ ជាដើម។ ជាការឆ្លើយតប, សម្ដេចបវរធិបតីបានសម្ដែងនូវការរីករាយ និងស្វាគមន៍ចំពោះដំណើរទស្សនកិច្ចធុរកិច្ចរបស់វេទិកាសម្ព័ន្ធឧស្សាហកម្មកូរ៉េ នៅកម្ពុជា។ សម្ដេចបវរធិបតីបានបង្ហាញពីគោលនយោបាយជាអាទិភាពរបស់រាជរដ្ឋាភិបាលកម្ពុជា ដែលផ្ដោតលើការកសាងហេដ្ឋារចនាសម្ព័ន្ធ ក្នុងនោះមានការសាងសង់អាកាសយានដ្ឋានខ្នាតអន្តរជាតិ, ផ្លូវល្បឿនលឿន, ការកែលម្អ និងធ្វើឱ្យប្រសើរឡើងនូវផ្លូវរថភ្លើង និងកំពង់ផែទឹកជ្រៅ និងការកសាងហេដ្ឋារចនាសម្ព័ន្ធសំខាន់ៗជាច្រើនទៀត។ ជាមួយគ្នានោះ, សម្ដេចបវរធិបតីបានគូសបញ្ជាក់ថា ការកសាងមូលធនមនុស្សក៏ជាអាទិភាពរបស់រាជរដ្ឋាភិបាល ដែលបាន និងកំពុងយកចិត្តទុកដាក់លើជំនាញយានយន្ត និងបច្ចេកវិទ្យា ដើម្បីបម្រើដល់ទីផ្សារក្នុងស្រុក និងក្រៅប្រទេស។ សម្ដេចបវរធិបតីបានបង្ហាញពីគោលនយោបាយ និងយន្តការលើកទឹកចិត្តនានារបស់រាជរដ្ឋាភិបាលកម្ពជា ដែលធានាដល់បរិយាកាសវិនិយោគមួយដែលមានភាពប្រកួតប្រជែងខ្ពស់ ដោយក្នុងនោះសម្ដេចបវរធិបតីបានសង្កត់ធ្ងន់លើការតភ្ជាប់កម្ពុជាទៅកាន់ទីផ្សារតំបន់ និងសកលលោក តាមរយៈកិច្ចព្រមព្រៀងពាណិជ្ជកម្មសេរី ទាំងទ្វេភាគី និងពហុភាគី។ សម្ដេចបវរធិបតីបានលើកទឹកចិត្តដល់គណៈប្រតិភូវេទិកាសម្ព័ន្ធឧស្សាហកម្ម បន្តទំនាក់ទំនង និងពិភាក្សាការងារជាមួយក្រសួង ស្ថាប័នពាក់ព័ន្ធរបស់កម្ពុជា បន្ថែមទៀត ដើម្បីចាប់យកនូវកាលានុវត្តភាពវិនិយោគនៅកម្ពុជា ៕

សម្តេចតេជោ ហ៊ុន សែន ជំរុញឱ្យតួគីបន្តតួនាទីជួយផ្សះផ្សាបញ្ចប់សង្គ្រាមរុស្ស៉ី និងអ៊ុយក្រែន

2024/12/13 02:02:17 pm        66
Facebook Telegram Linkin
សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា នៅថ្ងៃទី១២ ខែធ្នូ ឆ្នាំ២០២៤ នៅចំពោះមុខប្រធានរដ្ឋសភាសាធារណរដ្ឋតួគី បានបង្ហាញនូវការពេញចិត្តចំពោះតួនាទី របស់តួគី ក្នុងការចូលរួមដំណោះស្រាយជាអន្តរជាតិ ពិសេសជម្លោះរវាងរុស្ស៉ី-អ៊ុយក្រែន។ សម្តេច បង្ហាញនូវក្តីសង្ឃឹមថា តួគីនឹងបន្តដើរតួនាទីនេះថែមទៀត ដើម្បីឈានដល់ការបញ្ចប់សង្គ្រាមរវាងរុស្ស៉ី និងអ៊ុយក្រែន ដោយមធ្យោបាយចរចា។សម្តេចតេជោ ហ៊ុន សែន មានប្រសាសន៍បែបនេះ ក្នុងសន្និសីទសារព័ត៌មានរួមគ្នាជាមួយលោកសាស្ត្រាចារ្យបណ្ឌិត នូម៉ាន គូទលមុស ប្រធានរដ្ឋសភាសាធារណរដ្ឋតួគី ក្នុងឱកាសសម្តេចបំពេញទស្សនកិច្ចនៅប្រទេសតួគីយេ។ សម្តេចថ្លែងថា សម្ដេចពិតជាមានការពេញចិត្តជាមួយតួនាទី នៅក្នុងដំណោះស្រាយជាអន្តរជាតិ ហើយចាប់តាំងពីគ្រាដំបូងនៃការចាប់ផ្តើមជម្លោះរុស្ស៉ី-អ៊ុយក្រែន តួគីបានដើរតួនាទីនេះ។ សម្ដេចសង្ឃឹមថា តួគី នឹងបន្តដើរតួនាទីនេះតទៅទៀត ដើម្បីឈានដល់ការបញ្ចប់សង្គ្រាមរវាងរុស្ស៉ី និងអ៊ុយក្រែន ដោយមធ្យោបាយចរចា។ សម្ដេចតេជោបញ្ជាក់ថា បញ្ហាប្រដាប់អាវុធ គេមិនអាចយកសង្គ្រាម ទៅបញ្ចប់សង្គ្រាមបានទេ គឺមានតែការចរាចមួយគត់ ដែលអាចឈានដល់ការបញ្ចប់សង្គ្រាម ដែលរឿងនេះបានបង្ហាញឱ្យពិភពលោកបានឃើញរួចមកហើយ។ក្នុងឱកាសនោះសម្តេចតេជោបានបញ្ជាក់ថា ដំណើរទស្សនកិច្ចរបស់សម្ដេចមកកាន់ទីក្រុងអង់ការ៉ា នៃប្រទេសតួគី សម្តេចទើបតែនឹងរៀនធ្វើជាប្រធានព្រឹទ្ធសភាទេ ចាប់ពីខែមេសា ដល់ពេលនេះ សម្តេចទើបតែធ្វើប្រធានព្រឹទ្ធសភា បាន៩ខែប៉ុណ្ណោះ ខណៈសម្តេចធ្លាប់ធ្វើជាឧបនាយករដ្ឋមន្ត្រី រដ្ឋមន្ត្រីការបរទេស និងធ្វើជានាយករដ្ឋមន្ត្រី គឺមានរយៈពេល៤៥ឆ្នាំ ដូច្នេះសម្តេចសុំរៀនសូត្រពី ប្រធានព្រឹទ្ធសភាតួគី។ ក្នុងឱកាសនោះ សម្តេចតេជោ ហ៊ុន សែន ក៏បានអញ្ជើញលោកសាស្ត្រាចារ្យបណ្ឌិត នូម៉ាន គូទលមុស ប្រធានរដ្ឋសភាតួគីយេ ធ្វើទស្សនកិច្ចនៅកម្ពុជា ក្នុងពេលវេលាសមស្របណាមួយ ដើម្បីពង្រឹងថែមទៀត នូវទំនាក់ទំនងរវាងប្រទេសទាំងពីរលើគ្រប់វិស័យ៕ អត្ថបទ៖ វ៉ន ដារ៉ា

សម្តេចតេជោ៖ កម្ពុជានៅតែបន្តរក្សាកិច្ចខិតខំប្រឹងប្រែងជួយតួគីក្លាយជាដៃគូសន្ទនា​ពេញលេញរបស់អាស៊ាន

2024/12/13 01:53:03 pm        63
Facebook Telegram Linkin
ក្នុងឱកាសសន្និសីទសារព័ត៌មានរួមគ្នាជាមួយសាស្ត្រាចារ្យបណ្ឌិត នូម៉ាន គូទលមុស ប្រធានរដ្ឋសភាសាធារណរដ្ឋតួគី, សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានថ្លែងអំពីការប្តេជ្ញាចិត្តកិច្ចខិតខំប្រឹងប្រែងរបស់កម្ពុជា ជួយដល់ប្រទេសតួគី ក្នុងការពង្រីកភាពជាដៃគូសន្ទនាពេញលេញរបស់អាស៊ាន។សម្តេចតេជោ មានប្រសាសន៍បញ្ជាក់ថា តួនាទីរបស់តួគី គឺសំខាន់ណាស់ ក្នុងអាស៊ាន ដែលនឹងជួយតភ្ជាប់ទំនាក់ទំនងកាន់តែប្រើរវាងអាស៊ានអឺរ៉ុបផងដែរ។ សម្តេចបន្តថា ចំពោះកិច្ចសន្ទនាតាមវិស័យរវាងតួគី ជាមួយអាស៊ាន សម្ដេចបានខិតខំជំរុញទាំងនយោបាយ និងទំនាក់ទំនងតាំងពីពេលដែលសម្ដេចនៅកាន់តំណែងជានាយករដ្ឋមន្ត្រី ដើម្បីពង្រីកស្ថានភាពតួគីទៅជាដៃគូសន្ទនាពេញលេញរបស់អាស៊ាន។ ក្នុងឱកាសនោះសម្ដេចតេជោ បញ្ជាក់ថា ទោះបីជាការជួយតួគីក្លាយជាដៃគូសន្ទនាពេញលេញរបស់អាស៊ាន នេះត្រូវមានកុងសង់ស៊ីសនៃអាស៊ាន ក៏ប៉ុន្តែកម្ពុជា គឺជាសមាជិកម្នាក់ ដែលផ្តល់នូវការគាំទ្រ ហើយសម្រេច និងរួមជាមួយដៃគូដទៃទៀតជួយពង្រឹងការងារនេះ ព្រោះថាមានសារសំខាន់នៅក្នុងទំនាក់ទំនង រវាងតំបន់ពីរ ដែលតួគី គឺផ្នែកមួយរបស់អាស៊ីផង និងជាផ្នែកមួយរបស់អឺរ៉ុបផង ហើយសម្ដេចសង្ឃឹមថា ការតភ្ជាប់សម្រាប់តំបន់ទាំងពីរនេះ តាមរយៈតួនាទីរបស់តួគីនឹងធ្វើឱ្យទំនាក់ទំនងរវាងអាស៊ាន ជាមួយតួគីកាន់តែប្រសើរ។សូមម្រាបថា តួគីយេ បានចាប់ផ្តើមទំនាក់ទំនងជាមួយនឹងអាស៊ានតាំងពីឆ្នាំ ១៩៩៩ ដោយព្យាយាមពង្រីកទំនាក់ទំនងជាមួយអាស៊ានក្នុងកម្រិតកាន់តែជិតស្និទ្ធជាបន្តបន្ទាប់ តាមរយៈកិច្ចប្រជុំរបស់អាស៊ាន៕

សម្តេចតេជោ ជំរុញឱ្យពង្រីកទំនាក់ទំនងសេដ្ឋកិច្ច និងការវិនិយោគកម្ពុជា-តួគីឱ្យបានទំហំ ១ពាន់លានដុល្លារ

2024/12/13 01:46:30 pm        91
Facebook Telegram Linkin
សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា កាល​ពីថ្ងៃ​ទី១២ ខែធ្នូ ឆ្នាំ២០២៤នេះ បានជំរុញឱ្យភាគីកម្ពុជា និងតួគី រួមគ្នាក្នុង​ការ​ជំរុញ​ទំនាក់​ទំនង​សេដ្ឋកិច្ច ពាណិជ្ជកម្ម និងវិនិយោគ ដើម្បីឈានទៅសម្រេចឱ្យបានគោលដៅទំហំពាណិជ្ជកម្ម ១ ពាន់​លានដុល្លារ។សម្ដេចតេជោ បានជំរុញបែបនេះ ក្នុងសន្និសីទ​សារព័ត៌​មាន​រួម​គ្នា​ជាមួយឯកឧត្តមសាស្ត្រាចារ្យ​បណ្ឌិត នូម៉ាន គូទលមុស ប្រធានរដ្ឋសភាសាធារណរដ្ឋតួគី ក្នុងឱកាសបំពេញ​ទស្សនកិច្ច​នៅ​ប្រទេស​តួគី។សម្តេចតេជោ ហ៊ុន សែន មានប្រសាសន៍ថា ក្នុងកាលៈទេសៈនេះ អ្វីដែលជាស្នូលនៃទំនាក់ទំនងនោះ គឺការពង្រីកនូវទំនាក់ទំនងសេដ្ឋកិច្ច ពាណិជ្ជកម្ម និងការវិនិយោគ ដែលប្រទេសទាំងពីរគួរតែផ្តោតការយកចិត្តទុកដាក់ជំរុញការងារនេះឱ្យសម្រេចគោលដៅ។ សម្ដេចបន្តថា ទំហំពាណិជ្ជកម្មប្រទេសទាំងពីរមានការកើនឡើងបន្តិចម្តងៗ ហើយគង់នឹងឈានទៅសម្រេចកម្រិត ១ពាន់លានដុល្លារ ខណៈប្រទេសកម្ពុជា និងតួកគី មានទំហំពាណិជ្ជកម្មជាមួយប្រទេសដទៃទៀត សម្រេចបានលើសពី ១ពាន់លាន ឬរហូតដល់៤ពាន់លាន ឬ ១០ ពាន់លានដុល្លារដែលអាចធ្វើទៅរួច។ ក្នុងឱកាសផងដែរនោះ សម្តេចតេជោ ហ៊ុន សែន បានថ្លែងអំណរគុណដល់ លោកសាស្ត្រាចារ្យបណ្ឌិត នូម៉ាន គូទលមុស ប្រធានរដ្ឋសភាសាធារណរដ្ឋតួគីយេ ដែលបានអញ្ជើញសម្តេចមកបំពេញទស្សនកិច្ចនៅតួគី ដោយទទួលបដិសណ្ឋារកិច្ចដ៏ល្អ និងការចរចាប្រកបដោយផ្លែផ្កា។ សម្តេចតេជោបង្ហាញនូវការពេញចិត្ត ចំពោះការថ្លែងរបស់លោកសាស្ត្រាចារ្យបណ្ឌិត អំពីទំនាក់ទំនងកម្ពុជា-តួគី ក៏ដូចជាការចែករំលែកនូវសភាពការណ៍អន្តរជាតិ និងតំបន់ ដែលភាគីទាំងពីរបានយកចិត្តទុកដាក់។សម្តេចបញ្ជាក់ថា សម្តេចពិតជាមានភាពរីករាយ ដែលបានមកទស្សនកិច្ចនៅតួគីយេ សារជាថ្មីម្តងទៀត បន្ទាប់ពីសម្តេចបានមកទស្សនកិច្ចកាលពីឆ្នាំ២០១៨ ដែលពេលនោះ សម្តេចនៅធ្វើជានាយករដ្ឋមន្ត្រី ហើយបង្កើតឱ្យមាននូវការរៀបចំស្ថានទូត នៅទីក្រុងអង់ការ៉ា ក្នុងឆ្នាំ២០១៩ បន្ទាប់ពីតួគីមានស្ថានទូតនៅទីក្រុងភ្នំពេញ ឆ្នាំ២០១៣៕ អត្ថបទ៖ វ៉ន ដារ៉ា

ប្រធានរដ្ឋសភាតួកគី៖ សម្តេចតេជោគឺជាឥស្សរជននយោបាយដ៏សំខាន់បំផុត និងស្ថាបនិក នៃកម្ពុជា​ទំនើប​បច្ចុប្បន្ន

2024/12/13 01:21:00 pm        197
Facebook Telegram Linkin
កាលពីព្រឹកថ្ងៃទី១២ ខែធ្នូ ឆ្នាំ២០២៤ សម្តេចអគ្គមហាសេនាបតីតេជោ ហ៊ុន សែន ប្រធាន​ព្រឹទ្ធសភា​នៃ​ព្រះរាជាណាចក្រកម្ពុជា បានអញ្ជើញជួបពិភាក្សាជាមួយ ឯកឧត្តម Numan Kurtulmuş ប្រធានរដ្ឋសភា តួកគី នៅវិមានរដ្ឋសភា រដ្ឋធានីអង់ការ៉ា។ជា​កិច្ចចាប់ផ្តើម ឯកឧត្តម ប្រធានសភា បានសម្តែងក្តីរីករាយ និងស្វាគមន៍យ៉ាងកក់ក្ដៅចំពោះ សម្ដេច​តេជោ និងគណៈប្រតិភូ ដែលបានអញ្ជើញមកបំពេញទស្សនកិច្ចនៅតួកគីយេ។ ឯកឧត្តម បាន​ចាត់ទុក សម្តេចតេជោ គឺជាឥស្សរជននយោបាយដ៏សំខាន់បំផុត និងស្ថាបនិក​នៃកម្ពុជា​ទំនើប​បច្ចុប្បន្ន ហើយបានគូសបញ្ជាក់ថា ទស្សនកិច្ចរបស់សម្តេចតេជោ មានសារៈសំខាន់ពិសេស ខណៈ​ពេលដែលប្រទេសកម្ពុជា និងតួកគី ប្រារព្ធខួបលើកទី៦៥ នៃទំនាក់ទំនងកាទូត។ ឯកឧត្តម បានបន្តថា សកលលោក កំពុងចូលក្នុងយុគសម័យថ្មី ដែលគេសម្គាល់ថា មាន​ការ​ផ្លាស់​ប្តូរ​លឿន និងបង្កើតតុល្យភាពថ្មី។ ក្នុងបរិបទនេះ តួកគី ផ្តល់សារៈសំខាន់ពិសេស ដល់ទ្វីបអាស៊ី ដែល​ក្នុង​នោះ មានកម្ពុជាផងដែរ។ ជាមួយគ្នានេះដែរ ឯកឧត្តមប្រធានសភា បានលើកឡើងថា តួកគី នឹងបន្តកសាងស្ពានសហប្រតិបត្តិការថ្មីៗទៀតជាមួយកម្ពុជា។ តួកគីយេបានបើកមជ្ឈមណ្ឌលវប្បធម៌នៅទីក្រុងភ្នំពេញ ហើយ ដោយសហការ​ជាមួយ​ទីភ្នាក់​ងារ​ជំនួយ​អភិវឌ្ឍន៍តួកគី (TIKA) បានចុះហត្ថលេខាខាងវិស័យអប់រំ សិក្សាធិការ។ ជាក់ស្តែង និស្សិត​​កម្ពុជា ២៥ នាក់កំពុង​សិក្សា​នៅ​តួកគី​ហើយ​សង្ឃឹម​ថា​នឹង​មាន​ច្រើន​ទៀត​នៅ​ពេល​អនាគត​។ឯកឧត្តមបន្ថែមថា កម្ពុជាមានសក្តានុពលធំធេងខាងវិស័យពាណិជ្ជកម្ម ក៏ប៉ុន្តែ​ទំហំ​នៃ​ការ​ផ្លាស់​ប្តូរ​ពាណិជ្ជ​កម្ម​រវាងប្រទេសទាំងពីរ សម្រេចបានប្រមាណ ៣៥០ លានដុល្លារនៅឆ្នាំ២០២៤ លើ​ផែន​ការ​សម្រេចឱ្យបាន១ពាន់លានដុល្លារ។ ឯកឧត្តម បានបន្តថា ទស្សនកិច្ចរបស់ សម្តេចតេជោ នា​ពេលនេះសំខាន់ណាស់សម្រាប់កសាងទំនាក់ទំនងអន្តរសភាទ្វេភាគី និងពហុភាគី ដែល​ក្នុង​នោះ ​មានសន្និបាតអន្តរសភាអាស៊ាន (IPA) ផងដែរ។ នាឱកាស​នោះសម្តេចតេជោ បានថ្លែងអំណរគុណ ឯកឧត្តម ប្រធានសភាតួកគីយេ ចំពោះ​ការ​អញ្ជើញ និងស្វាគម៍យ៉ាងកក់ក្តៅ ព្រមទាំង ការលើកឡើងយ៉ាងស៊ីជម្រៅអំពីទំនាក់ទំនង រវាង​ប្រទេស​ទាំង​ពីរ។ សម្តេច បានលើកឡើងថា ទស្សនកិច្ចរបស់សម្តេច នាពេលនេះ ចំពេល នៃ​ខួប​៦៥​ឆ្នាំ នៃទំនាក់ទំនងការទូតនៃប្រទេសទាំងពីរ និងបន្ទាប់ពី តួកគីយេ និងកម្ពុជា បានដាក់​ស្ថាន​ទូត​ទៅ​វិញទៅមក។ សម្តេចតេជោ បានអរគុណ ឯកឧត្តមប្រធានសភា ដែលបាន​លើក​សរសើរ​គុណ​សម្បត្តិ​ដឹក​នាំ​របស់​សម្តេច​យ៉ាងខ្លាំង។ ក្នុងឋានៈជាប្រធានព្រឹទ្ធសភាថ្មី សម្តេចនឹងបន្តធ្វើអ្វីៗទាំងអស់ ដើម្បី​កម្ពុជា​បន្ត​រក្សា​បាននូវសន្តិភាព និង ស្ថិរភាពយូរអង្វែង។ សម្តេចតេជោបានអរគុណតួកគីផងដែរ ដែល​បានបញ្ជូនអនុប្រធានគណបក្សយុត្តិធម៌ និងអភិវឌ្ឍន៍តួកគី ទទួលបន្ទុកកិច្ចការបរទេស (AKP) ទៅចូលរួមមហាសន្និបាត ICAPP លើកទី១២ នៅទីក្រុងភ្នំពេញ កាលពីខែវិច្ឆិកា កន្លង​ទៅ​នេះ​។ សម្តេចតេជោ បានគូសបញ្ជាក់ថា សម្តេច ជាអ្នកផ្តល់សម្ទុះដល់ទំនាក់ទំនងទ្វេភាគីជាមួយតួកគី។ នៅ​ក្នុងពេលបំពេញទស្សនកិច្ចការងារនៅតួកគីឆ្នាំ២០១៨ សម្តេចតេជោ និងប្រធានាធិបតី Erdoğan បានដាក់​ផែន​ការ​សម្រេច​ឱ្យ​បាន​១ពាន់​លាន​ដុល្លារ​ក្នុង​ការ​ផ្លាស់​ប្តូរ​ពាណិជ្ជ​កម្ម​ទៅ​វិញ​ទៅ​មក​។ សម្ទុះ​កំណើនទំហំពាណិជ្ជកម្មទ្វេភាគីរវាងប្រទេសទាំងពីរ នៅមិន​ទាន់​ខិត​ជិត​ដល់​គោលដៅ​នៅ​ឡើយ​។ អាស្រ័យហេតុនេះ ទស្សនកិច្ចរបស់សម្តេច និងកិច្ចប្រឹងប្រែងរួម របស់គណបក្ស​ដឹកនាំ​ប្រទេស​ទាំង​ពីរ នឹងជំរុញផែនការនេះឱ្យបានសម្រេច ដោយផ្តល់អាទិភាព​លើ​កាលា​នុវត្តន៍​ភាព​សេដ្ឋកិច្ច​ពាណិជ្ជកម្ម និងវិនិយោគ។ សម្តេចតេជោ និងឯកឧត្តមប្រធានរដ្ឋសភា ក៏បាន​ប្តូរ​យោបល់ និងទស្សនៈវិភាគលើបញ្ហាតំបន់ និងអន្តរជាតិ។ ភាគីទាំងពីរ បានសង្ក​ត់​ធ្ងន់​លើ​ភាព​ចាំ​បាច់​នៃ​ការគោរពអធិបតេយ្យភាព និងបូរណភាពទឹកដីនៃប្រទេសនានាក្នុងសកលលោក។សម្តេចតេជោ គាំទ្រតួនាទីសំខាន់របស់តួកគីយេ ជាអ្នកសម្របសម្រួលនៅក្នុងកិច្ចការអន្តរជាតិ ហើយ​សម្តេច គូសបញ្ជាក់ថា «មិនអាចយកសង្គ្រាម បញ្ចប់សង្គ្រាមបានទេ មានតែកិច្ចសន្ទនា និង​ការ​ចរចា»។ ភាគីទាំងពីរបានឯកភាពគ្នា មិនគាំទ្រទណ្ឌកម្មជាឯកតោភាគី។ សម្តេចបានលើកទឹកចិត្តឱ្យតួកគីសម្លឹងបែរទៅទិសខាងកើត ពោលគឺ ទ្វីបអាស៊ី ហើយកម្ពុជា នឹង​សម្រប​សម្រួល​ជាមួយបណ្តាប្រទេសអាស៊ាន ដើម្បីឱ្យតួកគីក្លាយ​ជាដៃគូ​សន្ទនា​ពេ​ញ​សិទ្ធិ​របស់​អាស៊ាន។​ ឆ្លៀតក្នុងឱកាសនោះ សម្តេចតេជោបានអញ្ជើញ ឯកឧត្តមប្រធាន​រដ្ឋសភាតួកគី​មក​បំពេញ​ទស្សន​កិច្ចនៅកម្ពុជា នាពេលខាងមុខ។ ឯកឧត្តមប្រធានរដ្ឋសភាបានវាយតម្លៃខ្ពស់ចំពោះការលើកឡើងរបស់សម្តេចតេជោ និង​សូម​អរគុណ និងទទួលដោយក្តីរីករាយ នូវការអញ្ជើញរបស់សម្តេចតេជោ និងរកពេលវេលាជាក់ស្តែង ក្នុង​ការមកបំពេញទស្សនកិច្ចនៅកម្ពុជា៕

សម្តេចធិបតី ណែនាំឲ្យក្រសួងពាណិជ្ជកម្មត្រូវពង្រឹងទីផ្សាចាស់ និងពង្រីកទីផ្សាថ្មីសម្រាប់ផលិតផលខ្មែរ

2024/12/13 11:23:25 am        164
Facebook Telegram Linkin
សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានណែនាំឲ្យក្រសួងពាណិជ្ជកម្ម​គប្បីបន្ត​ពង្រឹងទីផ្សារចាស់ និងត្រូវពង្រីកទីផ្សារថ្មី ​ដោយគប្បីត្រូវខិតខំធ្វើយ៉ាងណានាំផលិតផលខ្មែរ​យកទៅខាងក្រៅឲ្យកាន់តែច្រើនបន្ថែមទៀត ជាមួយនឹងការធានានូវគុណភាព និងប្រសិទ្ធភាព។ក្នុងឱកាសអញ្ជើញជាអធិបតីក្នុងពិធីបើកសម្ពោធពិព័រណ៍ពាណិជ្ជកម្មកម្ពុជា ​លើកទី១៧ នៅថ្ងៃទី ១៣ ខែធ្នូ ឆ្នាំ២០២៤នេះ ​សម្តេចធិបតី ហ៊ុន ម៉ាណែត ​បានលើកឡើងថា ​ដើម្បី​លើកកម្ពស់​នូវ​ផលិតផលខ្មែរនាំទៅក្រៅស្រុក​បន្ថែមទៀតនោះ ក្រសួងពាណិជ្ជកម្មគប្បី​បង្កើន​សកម្មភាព​បន្ថែមទៀត ​ក្នុងការជួបដោយផ្ទាល់​ និយាយដោយផ្ទាល់​ជាមួយ​វិស័យ​ឯកជន។សម្តេចធិបតី ​បានបន្ថែម​ទៀតថា​ ការប្រកួតប្រជែងទីផ្សារវាបានដើរលឿនណាស់ ដូច្នេះ​យើងត្រូវ​តែធ្វើខ្លួនឲ្យសកម្មបន្ថែម ដើម្បីធ្វើការប្រកួតប្រជែងជា​មួយគេ ​ប្រសិន​យើង​ធ្វើ​ហ្នឹង​ថ្កល់គេនឹង​ដើរលឿន​ជាង​យើងជាក់ជាមិនខាននោះឡើយ។សម្តេចធិបតី ​នាយករដ្ឋមន្រ្តី បានបន្ថែមទៀតថា ​ការធានានូវគុណភាព ​ និង​ការធានា​នូវទីផ្សារចាស់ ម៉ូយចាស់នេះ វាជាកិច្ចការសំខាន់ខ្លាំងណាស់​សម្រាប់កម្ពុជា​ ហើយ​ក្នុងរយៈពេលមួយ​ឆ្នាំ​មកនេះ រាជរដ្ឋាភិបាលបានអនុវត្តបែបនេះ បានល្អ និងប្រសើរខ្លាំងណាស់ ជាក់ស្តែងកាលពីមុន​ក្រុមប្រឹក្សាអភិវឌ្ឍន៍កម្ពុជា​ដែលហៅកាត់ថា CDCគឺមានកិច្ចសហប្រតិបត្តិការជាមួយតែវិស័យឯជន​ជប៉ុន​ប៉ុណ្ណោះ (ជួបពិគ្រោះ​យោបល់ ​និងដោះស្រាយ​រាល់បញ្ហាលំបាក) តែពេលនេះយើង​បាន​ពង្រីកជាមួយប្រទេសកូរ៉េ ​ជាមួយអាមេរិក ជាមួយអឺរ៉ុបមួយឆ្នាំ រហូតដល់ពីរដងឯណោះ៕អត្ថបទ៖ បាន ចក់

ក្រសួងប្រៃសណីយ៍ ​រៀបចំកម្មវិធីជំនួបរវាងក្រុមហ៊ុន Plug and Play ជាមួយនឹង​ធុរកិច្ច​ថ្មី និងសហគ្រិនឌីជីថលកម្ពុជា

2024/12/13 10:22:05 am        148
Facebook Telegram Linkin
ក្រសួងប្រៃសណីយ៍និងទូរគមនាគមន៍ សហការជាមួយក្រុមហ៊ុន Plug and Play ដែលជា​ក្រុម​ហ៊ុន​អភិវឌ្ឍធុរកិច្ចថ្មីឌីជីថលដ៏ល្បីមួយរបស់សហរដ្ឋអាមេរិក មានទីស្នាក់ការកណ្តាលនៅ Silicon Valley (ជាមជ្ឈមណ្ឌលប្រមូលផ្ដុំដោយក្រុមហ៊ុន​បច្ចេកវិទ្យាធំៗ និង​ល្បីល្បាញ​កម្រិត​ពិភពលោក) ​រដ្ឋ California ​រៀបចំកម្មវិធីជំនួបរវាងក្រុមហ៊ុន Plug and Play ជាមួយនឹង​ធុរកិច្ច​ថ្មី និងសហគ្រិនឌីជីថលកម្ពុជា ដើម្បីផ្តល់ឱកាសដល់ធុរកិច្ចថ្មី និងសហគ្រិនឌីជីថលកម្ពុជា ទទួល​បាន​ការចែករំលែកបទពិសោធន៍ទាក់ទងជាមួយនឹង​ការអភិវឌ្ឍ​ធុរកិច្ច​ថ្មី​ពី​អ្នក​ជំនាញ​របស់​ក្រុមហ៊ុន​ Plug and Play។កម្មវិធីជំនួបនេះនឹងរៀបចំឡើង នៅថ្ងៃទី១៦ ខែធ្នូ ឆ្នាំ២០២៤ ចាប់ពីម៉ោង ៣:០០ រសៀលតទៅ នៅសាកលវិទ្យាល័យអាមេរិកាំងភ្នំពេញ(AUPP)។

ប្រសាសន៍សំខាន់ៗរបស់សម្តេចធិបតី ហ៊ុន ម៉ាណែត ក្នុងឱកាសអញ្ជើញបើកព្រឹត្តិការណ៍ពិព័រណ៍ពាណិជ្ជកម្មកម្ពុជា លើកទី១៧ ឆ្នាំ២០២៤

2024/12/13 10:10:35 am        152
Facebook Telegram Linkin
ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅព្រឹកថ្ងៃទី១៣ ខែធ្នូ ឆ្នាំ២០២៤ នេះ បានអញ្ជើញជាអធិបតីបើកព្រឹត្តិការណ៍ពិព័រណ៍ពាណិជ្ជកម្មកម្ពុជា លើកទី១៧ ឆ្នាំ២០២៤ ។ ប្រសាសន៍សំខាន់ៗរបស់សម្តេចធិបតី ហ៊ុន ម៉ាណែត ដែលមានខ្លឹមសារដូចខាងក្រោម៖-សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី៖ មានមោទនភាព ចំពោះនិស្សិតខ្មែរ ដែលបាន បង្កើតឧបករណ៍ទំនើបនានា ដើម្បីបម្រើដល់សាធារណជន ក្នុងនោះមានដូចជា ការស្កេន ដើម្បីទិញ តែក្រូចឆ្មារ និងប្រព័ន្ធបញ្ជាទិញទំនើបៗនានាជាច្រើនទៀត។ -សម្ដេចធិបតី ក៏បានបង្ហាញនូវមោទន ភាព ចំពោះសិប្បករខ្មែរនានាជាច្រើន ដែលបានប្រឹងប្រែងផលិតនូវផលិតផលកែច្នៃជាច្រើនសម្រាប់ បម្រើទីផ្សារក្នុងប្រទេស និងនាំចេញ។-សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានថ្លែងកោតសរសើរចំពោះក្រសួងពាណិជ្ជកម្ម ដែលបានរៀបចំការតាំងពិព័រណ៍បានយ៉ាងល្អ ខណៈការរៀបនេះ បានធ្វើទំនើបកម្មច្រើន មានទាំងផលិតផលក្នុងស្រុក និងក្រៅស្រុក។-សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា៖ ការភ្ជាប់ទំនាក់ទំនងទីផ្សារក្នុងស្រុក និងផលិតផលក្រៅស្រុក តាមបច្ចេកវិទ្យាតាមប្រព័ន្ធអ៊ីនធឺណេត ជាកាលានុវត្តភាពដ៏ល្អ សម្រាប់អ្នកវិនិយោគ និងជាការសម្រួលពាណិជ្ជកម្មដ៏ល្អរវាងអ្នកលក់ និងអ្នកទិញ ។ -សម្តេចធិបតី ហ៊ុន ម៉ាណែត បានណែនាំដល់ក្រសួងពាណិជ្ជកម្មពិនិត្យឡើងវិញ ឱ្យបានត្រឹមត្រូវនូវច្បាប់លិខិត​បទដ្ឋាន​គតិយុត្តិ ​ដែលមានស្រាប់បន្តធ្វើទៅទៀត ដើម្បីអនុវត្តទៅឲ្យមានប្រសិទ្ធភាពខ្ពស់ ។ -សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានណែនាំឲ្យរដ្ឋមន្រ្តីក្រសួងពាណិជ្ជកម្ម បង្កើនសកម្មភាពបន្ថែមទៀត ក្នុងការនាំផលិតផលខ្មែរទៅក្រៅស្រុក ហើយគប្បីត្រូវជួបផ្ទាល់ និយាយផ្ទាល់ ជាមួយវិស័យឯកជន ដើម្បីធ្វើយ៉ាងណាធ្វើឲ្យបរិយាកាសពាណិជ្ជកម្ម និងវិនិយោគពីក្រៅប្រទេសមកកម្ពុជា កាន់តែច្រើនទៀតនោះ។-សម្តេចធិបតីនាយករដ្ឋមន្រ្តីនៃកម្ពុជា បានណែនាំឲ្យក្រសួងពាណិជ្ជកម្មគប្បីបន្តពង្រឹងទីផ្សារចាស់ ពង្រីកទីផ្សារថ្មី ហើយគប្បីត្រូវខិតខំធ្វើយ៉ាងណា នាំផលិតផលខ្មែរ យកទៅខាងក្រៅឲ្យកាន់តែច្រើន បន្ថែមទៀត ជាមួយនឹងការធានានូវគុណភាព និងប្រសិទ្ធភាព។-សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី មានមោទនភាពចំពោះការនាំចេញរបស់កម្ពុជា ដែលមានទំហំកើនឡើងជាលំដាប់ពីមួយឆ្នាំទៅមួយឆ្នាំ ជាក់ស្ដែងដូចក្នុងរយៈពេល ១១ ខែនៃឆ្នាំ២០ ២៤ នេះ ទំហំពាណិជ្ជកម្មអន្តរជាតិរបស់កម្ពុជា គឺកើនជិតហាសិបពាន់លានដុល្លារ។

សម្តេចតេជោ ហ៊ុន សែន៖ ទណ្ឌកម្មមិនមែនជាមធ្យោបាយសម្រាប់ដោះស្រាយបញ្ហានោះទេ

2024/12/13 09:31:31 am        304
Facebook Telegram Linkin
សម្តេចតេជោ ហ៊ុន សែន ប្រធានព្រឹទ្ធសភាកម្ពុជា បានធ្វើការអំពាវនាវដល់បណ្តាប្រទេសមួយចំនួន​គប្បី បញ្ឈប់ការដាក់ទណ្ឌកម្មដល់ប្រទេសដទៃបន្តទៀត ខណៈការដាក់ទណ្ឌកម្មនេះ គឺមិនមែនជាមធ្យោបាយ សម្រាប់ការដោះស្រាយបញ្ហានោះទេ ផ្ទុយទៅវិញការដាក់ទណ្ឌកម្ម ជាឯកតោភាគីនេះ វាបានធ្វើឲ្យប្រជាជន នៅលើពិភពលោករាប់លាននាក់ រងគ្រោះទៅវិញ។ក្នុង​សន្និសីទ​សារព័ត៌មានរួមគ្នាជាមួយឯកឧត្តម ​សាស្ត្រាច្ចារ្យបណ្ឌិត នូម៉ាន គូទលមុស ប្រធានរដ្ឋសភាសាធារណរដ្ឋតួគីយេ នៅប្រទេសតួគីយេ នាថ្ងៃទី១២ ខែធ្នូ ឆ្នាំ២០២៤នេះ សម្តេចតេជោ ​ហ៊ុន សែន បានមានប្រសាសន៍ថា «ក្នុងនាមជាជនជាតិកម្ពុជាមួយរូប ដែលធ្លាប់ឆ្លង​កាត់នូវទណ្ឌកម្មខាងសេដ្ឋកិច្ច និងនយោបាយចំពោះខ្លួនឯង ហើយក៏ធ្លាប់ឃើញ​ទណ្ឌកម្មសេដ្ឋកិច្ច និងនយោបាយចំពោះប្រទេសនានា សូមបញ្ឈប់ទៅនូវនយោបាយទណ្ឌកម្មសម្រាប់ប្រទេសនេះ ឬប្រទេសនោះ ដែលធ្វើជាមធ្យោបាយ ពីព្រោះថា​ គេមិនអាចលក់នូវ​អធិបតេយ្យ​គេទៅ​ដោះដូរ​ជាមួយជំនួយ ឬការអនុគ្រោះណាមួយនោះកើតទេ..ទណ្ឌកម្មគ្រាន់តែបង្កើតនូវការឈឺចាប់​បន្ថែម​សម្រាប់ប្រជាជនតែប៉ុណ្ណោះ វាមិនត្រូវជាមួយមេដឹកនាំនោះទេ...»។សម្តេចតេជោ ហ៊ុន សែន បានលើកឡើងទៀតថា ​ការដាក់ទណ្ឌកម្មដល់ប្រទេសដទៃ ដូចជាប្រ ទេសរុស្ស៊ីជាដើមនោះ វាមិនបានធ្វើឲ្យប្រទេសរុស្ស៊ីស្លាប់នោះទេ ផ្ទុយទៅវិញបានធ្វើឲ្យប្រជាជន​នៅលើពិភពលោករួមទាំងប្រជាជននៃប្រទេសកម្ពុជាផង បានរងគ្រោះផ្នែកសេដ្ឋកិច្ចទៅវិញ។នៅចំពោះមុខប្រធានរដ្ឋសភាសាធារណរដ្ឋតួគីយេ សម្តេចតេជោ ហ៊ុន សែន ប្រធានព្រឹទ្ធសភា​នៃកម្ពុជា ហើយក៏ជាបិតាស្ថាបនិកសន្តិភាពរបស់កម្ពុជាផងដែរនោះ ក៏បានលើកឡើងអំពីបញ្ហា​សង្រ្គាមក្នុងតំបន់និងពិភពលោកផងដែរ ជាពិសេសបញ្ហារុស្ស៊ី ​និងអ៊ុយក្រែនតែម្តង ដោយសម្តេច​លើកឡើងថា​ប្រទេសតួកគីយេ នឹងក្លាយជាតួអង្គមួយដ៏សំខាន់ក្នុងការសម្របសម្រួលើបញ្ហាទាំង​ឡាយ​នេះដើម្បីឈានទៅរក ភាពចចារដោយសន្តិវិធី។សម្តេចបានលើកឡើងថា​ គេមិនអាចយកសង្រ្គាមទៅបញ្ចប់សង្រ្គាមបាននោះទេ គឺមានតែការចចារ​មួយគតដែលអាចឈានទៅដល់ការបញ្ចប់សង្រ្គាមបាន ​ដោយរឿងនេះវាបានបង្ហាញឲ្យពិភពលោក បានឃើញរួចមកហើយ។ សម្តេចក៏បានលើកឡើងទៀតថា ​បញ្ហាថ្មីៗដែលបានកើតឡើងនៅលើទឹកដីស៊ីរី និងប្រទេសមួយ​ចំនួនទៀត​បានកំពុង​ស្មុគស្មាញ​យ៉ាងខ្លាំង ប៉ុន្តែសម្តេចបានសម្តែងនូវ​សុទិដ្ឋិនិយមថា​វានឹងមាន​ដំណោះស្រាយ​នាពេលឆាប់ៗ​ខាងមុខនេះ​ ហើយដំណោះស្រាយនោះនឹងមានការចូលរួមពីភាគី តួគីយេផងដែរ។ដោយឡែកសម្រាប់ទំនាក់ទំនងទ្វេភាគីរវាងកម្ពុជា និងតួគីយេវិញ សម្តេចតេជោ ហ៊ុន សែន រំពឹង កិច្ចសហប្រតិបត្តិទ្វេភាគីរវាងប្រទេសទាំងពីរ ​នឹងកាន់តែល្អប្រសើបន្ថែមទៀត​នាពេលខាងមុខ ហើយ ​សម្តេចរំពឹងថា ​ទំហំពាណិជ្ជកម្មរវាងកម្ពុជា និងតួគីយេ នឹងឡើង​ដល់មួយពាន់លានដុល្លារ​អាមេរិកនាពេល ខាងមុខនេះផងដែរ។ ឆ្លៀតក្នុងឱកាសនោះដែរ សម្តេចតេជោ ​ហ៊ុន សែន ក៏បានថ្លែងអំណរអរគុណដល់ប្រជាជន និងប្រទេសតួគីយេ ដែលបានផ្តល់ជំនួយដល់ប្រទេសកម្ពុជា ជាពិសេសផ្នែកអាហារូបករណ៍នេះតែ ម្តង៕អត្ថបទ ៖ បាន ចក់

បណ្ដាញសង្គម

ព័ត៌មានថ្មីៗ

ឯកឧត្តម ឌិត ទីណា បន្តជំរុញមន្ត្រីកសិកម្មឃុំ បង្កេីនការចុះផ្សព្វផ្សាយគោលនយោបាយកសិកម្មដល់ប្រជាកសិករដេីម្បីប្រយោជន៍រួមទាំងអស់គ្នា
06/18/2025 10:06 PM
Facebook Telegram Linkin
សាខាកាកបាទក្រហមកម្ពុជាខេត្តកំពង់ឆ្នាំងប្រារព្ធព្រះរាជពិធីបុណ្យចម្រើនព្រះជន្មថ្វាយសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរគម្រប់៨៩ យាងចូល៩០ព្រះវស្សា
06/18/2025 08:06 PM
Facebook Telegram Linkin
រដ្ឋាភិបាលសំឡេងភាគតិចរបស់ព័រទុយហ្គាល់ ឡើងកាន់អំណាច
06/18/2025 08:06 PM
Facebook Telegram Linkin
ការស្ទង់មតិ៖ បក្ស Tisza នាំមុខ ១៥ពិន្ទុ លើបក្សកាន់អំណាច Fidesz របស់លោក Orban
06/18/2025 08:06 PM
Facebook Telegram Linkin
ជម្រកការពារគ្រាប់បែកអ៊ីស្រាអែលនៅស្ថានីយរថភ្លើងក្រោមដី ខណៈការវាយប្រហារមីស៊ីលអ៊ីរ៉ង់
06/18/2025 08:06 PM
Facebook Telegram Linkin
មេដឹកនាំកំពូលអ៊ីរ៉ង់ច្រានចោលការអំពាវនាវរបស់លោក Trumpឲ្យចុះចាញ់ដោយឥតលក្ខខណ្ឌ
06/18/2025 08:06 PM
Facebook Telegram Linkin
រដ្ឋមន្ត្រីអាល្លឺម៉ង់ និយាយទៅកាន់អ៊ីរ៉ង់ថា មិនយឺតពេលពេកនោះទេ ក្នុងការចរចា
06/18/2025 08:06 PM
Facebook Telegram Linkin
ប្រធានក្រុមមេធាវីស្មគ្រ័ចិត្តសម្តេចតេជោសែន ចែករំលែក«បទពិសោធន៍ដឹកនាំអង្គភាព និងបទពិសោធន៍ក្នុងការប្រកបវិជ្ជាជីវៈជាមេធាវី»
06/18/2025 07:06 PM
Facebook Telegram Linkin
លោក Zelenskiy ចាកចេញពីកិច្ចប្រជុំ G7ដោយមិនបានជួបលោក Trump ឬអាវុធថ្មីពីអាមេរិក
06/18/2025 07:06 PM
Facebook Telegram Linkin
កម្ពុជាគ្រោងរៀបចំវេទិការពាណិជ្ជកម្មឌីជីថល និងពិព័រណ៍អនឡាញ លើកទី២ ដើម្បីជំរុញការនាំចេញផលិតផលជាតិ
06/18/2025 07:06 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.