BTV NEWS

ឯកឧត្តម គីម វីរៈ ដឹកនាំប្រតិភូទស្សនកិច្ចស្វែងយល់ពីការកាត់បន្ថយហានិភ័យនៅប្រទេសអ៉ីតាលី

អ្នកនាំពាក្យសម្ដេចតេជោ៖គ្មានសម័យកាលណាថៃញញើតខ្មែរជាងសម័យតេជោ និងសម័យធិបតីនេះទេ ខណៈលោកផ្ដាំទៅនាយករដ្ឋមន្រ្ដីថៃកុំបារម្ភពីប្រជាប្រិយភាពសម្ដេចតេជោគួរគិតគូរពីរឿងផ្ទៃក្នុងខ្លួនវិញ

អភិបាលខេត្តប៉ៃលិនជូនដំណើរពលករខ្មែរមកពីថៃទៅស្រុកកំណើតដោយរថយន្តក្រុងឥតគិតថ្លៃ

កាយឫទ្ធិនារីកម្ពុជា ធ្វើពិធីសច្ចាបញ្ចូលសមាជិកថ្មីលើកទី៣៣ចំនួន៣៨៤រូបដែលប្រារព្ធធ្វើឡើងនៅសាខាខេត្តកំពត

ព័ត៌មានជាតិ

CJCC ទទួលសិទ្ធិបកប្រែសៀវភៅ«មាគ៌ាជីវិត»ស្នាដៃនិពន្ធជនជាតិជប៉ុនល្បីឈ្មោះលំដាប់ពិភពលោក

ភ្នំពេញ ៖ សៀវភៅ មាគ៌ាជីវិត គឺជាស្នាដៃ អ្នកនិពន្ធ លោក អ៊ីណាម៉ូរី កាហ៊្សូអូ ជាអ្នកស្រាវជ្រាវវិទ្យាសាស្ត្រ និងជាអ្នកជំនួញជនជាតិជប៉ុនដ៏ល្បីឈ្មោះទាំងក្នុង និងក្រៅប្រទេស។ សៀវភៅ មាគ៌ាជីវិត ត្រូវបានក្រុមបញ្ញវន្តចាត់ទុកថាជាស្នាដៃដ៏សំខាន់មួយក្នុងការលើកស្ទួយស្មារតីសម្រាប់ការដឹកនាំតម្រង់ទិសជីវិតបុគ្គល គ្រួសារ ស្ថាប័ន និងសង្គម ដែលគ្រប់គ្នាបាននឹងកំពុងជួបប្រទះនាពេលសព្វថ្ងៃ។ឯកឧត្តម អ៊ីណូ អាត់ស៊ុស៊ី (Ueno Atsushi) ឯកអគ្គរាជទូតប្រទេសជប៉ុនប្រចាំនៅកម្ពុជា បានថ្លែងក្នុងពិធីសម្ពោធសៀវភៅ នាព្រឹកថ្ងៃទី១២ ខែធ្នូ ឆ្នាំ២០២៤ ដោយក្ដីអំណរដែលសៀវភៅដ៏ល្បីនៅប្រទេសជប៉ុន ដែលជាទស្សនវិជ្ជារបស់លោក អ៊ីណាម៉ូរី បានសាយភាយនៅក្នុងប្រទេសកម្ពុជាជាមួយនឹងការបោះពុម្ពផ្សាយជាភាសាខ្មែរនៃ "របៀបរស់នៅ" ហើយបានឈានដល់បេះដូងមនុស្សជាច្រើន។ លោកបង្ហាញជំនឿថាសៀវភៅនេះ នឹងក្លាយជាផ្នែកមួយក្នុងការជួយត្រួសត្រាយជីវិត និងការងាររបស់មនុស្សគ្រប់រូបនៅក្នុងប្រទេសកម្ពុជា និងរួមចំណែកដល់ភាពសុខដុមរមនា និងវឌ្ឍនភាពនៃសង្គមជាតិទាំងមូល។លោកបណ្ឌិត ឃឹម លាង នាយកគ្រប់គ្រងនៃមជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) បានថ្លែងថា ការសម្រេចបកប្រែសៀវភៅនេះជាភាសាខ្មែរ ព្រោះមជ្ឈមណ្ឌលចង់ផ្សាយនូវពុទ្ធិល្អៗ របស់អ្នកនិពន្ធ បានជ្រាបដល់ផ្នត់គំនិតប្រជាជនខ្មែរ។ឯកឧត្តមបណ្ឌិត ម៉ី កល្យាណ ប្រធានសមាគមវិនិយោគកម្ពុជា-ជប៉ុន បានអំពាវនាវ និងលើកទឹកចិត្តប្រជាជនខ្មែរ ឱ្យចាប់អារម្មណ៍អានសៀវភៅឱ្យបានច្រើនប្រភេទ ដើម្បីទទួលបានពុទ្ធិ និងទស្សនវិជ្ជាល្អក្នុងការបំភ្លឺផ្លូវជីវិត។សៀវភៅ «មាគ៌ាជីវិត» មានចំណងជើងដើមជាភាសាជប៉ុនថា អ៊ីគិកាតា ចេញផ្សាយលើកទី១ ជាភាសាជប៉ុននៅក្នុងឆ្នាំ២០០៤ រហូតមកដល់បច្ចុប្បន្ន សៀវភៅនេះត្រូវបានលក់អស់ចំនួនប្រមាណប្រាំពីរលានប្រាំមួយសែនបីម៉ឺនក្បាល នៅទូទាំងពិភពលោក។ ក្នុងនោះមួយលានប្រាំសែនក្បាល បានលក់ក្នុងប្រទេសជប៉ុន ព្រមទាំងត្រូវបានបកប្រែជាភាសាបរទេសផ្សេងទៀតចំនួនដប់ប្រាំបួនភាសា៕

សម្តេចតេជោ ហ៊ុន សែន ចាប់ផ្តើមបំពេញទស្សនកិច្ចផ្លូវការ និងមានជំនួបជាមួយថ្នាក់ដឹកនាំកំពូលប្រទេសតួកគី

ភ្នំពេញ ៖ ក្រោយអញ្ជើញបន្តដំណើរទស្សនកិច្ចផ្លូវការនៅប្រទេសតួកគីកាលពីម្សិលមិញ, នៅថ្ងៃព្រហស្បតិ៍ ទី១២ ខែធ្នូ ឆ្នាំ២០២៤នេះ សម្តេចតេជោ ហ៊ុន សែន ប្រធានព្រឹទ្ធសភាកម្ពុជា និងគណៈប្រតិភូចាប់ផ្តើមបំពេញទស្សនកិច្ចផ្លូវការ និងមានចំនួបជាមួយថ្នាក់ដឹកនាំកំពូលប្រទេសតួកគីហើយនៅថ្ងៃនេះ។ ការផ្តើមដំណើរទស្សនកិច្ចនាព្រឹកថ្ងៃទី១២ ខែធ្នូនេះ សម្តេចតេជោ និងគណៈប្រតិភូជាន់ខ្ពស់ បានអញ្ជើញទស្សនាវិមានរំលឹកអនុស្សាវរីយ៍អានីតកាបៀរ, អញ្ជើញដាក់កម្រងផ្កាគោរពវិញ្ញាណក្ខន្ធលោកប្រធានាធិបតីទី១ នៃប្រទេសតួកគី លោក Mustafa Kemal Atatuk, អញ្ជើញចុះហត្ថលេខាលើសៀវភៅក្រាំងមាស និងអញ្ជើញទស្សនាសារមន្ទីរសង្រ្គាម ក្នុងរដ្ឋធានីអង់ការ៉ា។ បន្ទាប់មក សម្តេចតេជោ ហ៊ុន សែន ប្រធានព្រឹទ្ធសភា បានអញ្ជើញធ្វើកិច្ចប្រជុំចង្អៀតជាមួយ ឯកឧត្តមសាស្រ្តាចារ្យបណ្ឌិត នូម៉ាន់ តួទលមុស (Numan Kurtulmus) ប្រធានរដ្ឋសភា នៃសាធារណរដ្ឋតួ។ ក្នុងឱកាសកិច្ចប្រជុំចង្អៀតនេះ សម្តេចតេជោ ហ៊ុន សែន បានបង្ហាញចៅបង្កើត និងអនាគតចៅប្រសារ ក្នុងដល់ ឯកឧត្តមសាស្រ្តាចារ្យបណ្ឌិត នូម៉ាន់ តួទលមុស (Numan Kurtulmus) ប្រធានរដ្ឋសភា នៃសាធារណរដ្ឋតួកគីផងដែរ។ បន្ទាប់មក នៅថ្ងៃដដែលនេះសម្តេចតេជោ ហ៊ុន សែនប្រធានព្រឹទ្ធសភា និងគណៈប្រតិភូជាន់ខ្ពស់ កម្ពុជា បានអញ្ជើញកិច្ចប្រជុំពេញអង្គជាមួយ ឯកឧត្តមសាស្រ្តាចារ្យបណ្ឌិត នូម៉ាន់ តួទលមុស (Numan Kurtulmus) ប្រធានរដ្ឋសភា នៃសាធារណរដ្ឋតួកគី នៅរដ្ឋធានីអង់ការ៉ា ប្រទេសតួកគី។សូមជម្រាបថា កាលពីព្រឹកថ្ងៃអាទិត្យ ទី៨ ខែធ្នូ ឆ្នាំ២០២៤ សម្ដេចតេជោ ហ៊ុន សែន ប្រធានព្រឹទ្ធសភា បានអញ្ជើញដឹកនាំគណៈប្រតិភូជាន់ខ្ពស់កម្ពុជា បំពេញទស្សនកិច្ចផ្លូវការ នៅក្រៅប្រទេសរួមមាន ប្រទេសអារ៉ាប៊ីសាអូឌីត, រដ្ឋកាតា សាធារណរដ្ឋតួកគី និងអេមីរ៉ាតអារ៉ាប់រួម ចាប់ពីថ្ងៃទី៨ ដល់ថ្ងៃទី១៤ ខែធ្នូ ឆ្នាំ២០២៤។ដំណើរទស្សនកិច្ចផ្លូវការរបស់សម្តេចតេជោ គឺបានបង្ហាញយ៉ាងច្បាស់ពីសារៈសំខាន់ និងតួនាទីកាន់តែសកម្មនៃ “ការទូតសភា” ដែលជាអាទិភាពមួយនៃអាទិភាពទាំងពីររបស់ព្រឹទ្ធសភានីតិកាលទី៥ ក្រោមការដឹកនាំប្រកបដោយគតិបណ្ឌិតរបស់សម្តេចតេជោ ក្នុងការរួមចំណែកដល់ការពង្រឹង និងពង្រីកចំណងមិត្តភាព សាមគ្គីភាព និងកិច្ចសហប្រតិបត្តិការដ៏ល្អប្រសើររវាងស្ថាប័ននីតិប្បញ្ញត្តិរបស់កម្ពុជា ជាមួយស្ថាប័ននីតិប្បញ្ញត្តិនៃបណ្តាប្រទេសជាមិត្ត ដើម្បីជាគុណប្រយោជន៍ដល់ប្រជាជន ការអភិវឌ្ឍប្រទេសជាតិរីកចម្រើន និងដើម្បីសន្តិភាព ស្ថិរភាព និងសន្តិសុខ ក្នុងតំបន់ និងពិភពលោក៕

បុរសម្នាក់បានបើកម៉ូតូចូលផ្លូវល្បឿនលឿនយ៉ាងកំរោល ត្រូវបានឃាត់ខ្លួន ណែនាំ និងអនុវត្តតាមនីតិវិធីច្បាប់

កំពង់ស្ពឺ ៖ កាលពីល្ងាចថ្ងៃទី១១ ខែធ្នូ ឆ្នាំ២០២៤នេះ នៅច្រកចូល កំពង់ស្ពឺកើត គ.ម ២៦ មានបុរសម្នាក់បានបើកម៉ូតូសម្រុកចូលផ្លូវល្បឿនលឿនយ៉ាងកំរោល ដែលជាប្រភេទម៉ូតូមិនអនុញ្ញាតឱ្យប្រើប្រាស់ផ្លូវល្បឿនលឿន ត្រូវបាននគរបាលចរាចរណ៍ផ្លូវល្បឿនលឿនឃាត់ខ្លួន ណែនាំ និងអនុវត្តតាមនីតិវិធីច្បាប់។សូមបញ្ជាក់ផងដែរថា ចំពោះទោចក្រយានយន្តដែលអាចធ្វើដំណើរលើផ្លូវលឿនលឿនបានលុះត្រាទោចក្រយានយន្តនោះមានទំហំស៊ីឡាំងចាប់ពី៥០០cc ឬកម្លាំងម៉ូទ័រ២៧kW ឡើងទៅ ដោយមានបិតនូវលតាបត្រដែលចេញដោយក្រសួងសាធារណការ និងដឹកជញ្ជូន ដែលអាចស្នើសុំបាននៅទីតាំង មណ្ឌលផ្ដល់សេវាសាធារណៈ ទីស្ដីការក្រសួង និងផ្សារទំនើបអ៊ីអនមានជ័យ ដោយឥតគិតថ្លៃ។ក្រសួងសាធារណការ និងដឹកជញ្ជូន ស្នើឱ្យប្រជាពលរដ្ឋគ្រប់រូបសូមកុំយកគំរូតាម និងចូលរួមស្វែងយល់ អនុវត្តតាមសេចក្តីណែនាំឱ្យបានម៉ឺងម៉ាត់ចំពោះគ្រប់លក្ខខណ្ឌក្នុងការបើកបរលើផ្លូវល្បឿនលឿននេះ និងគោរពច្បាប់ចរាចរណ៍ឱ្យបានខ្ជាប់ខ្ជួន ដើម្បីការធ្វើដំណើររបស់បងប្អូនប្រកបដោយភាពសប្បាយរីករាយ និងសុខសុវត្ថិភាព។

សម្ដេចតេជោ ហ៊ុន សែន អញ្ជើញកិច្ចប្រជុំពេញអង្គជាមួយ ប្រធានរដ្ឋសភា នៃសាធារណរដ្ឋតួកគី

ភ្នំពេញ ៖ នៅថ្ងៃទី១២ ខែធ្នូ ឆ្នាំ២០២៤នេះដែរ សម្តេចអគ្គមហាសេនាបតីតេជោ ហ៊ុន សែនប្រធានព្រឹទ្ធសភា នៃព្រះរាជាណាចក្រកម្ពុជា និងគណៈប្រតិភូជាន់ខ្ពស់ ព្រះរាជាណាចក្រកម្ពុជា អញ្ជើញកិច្ចប្រជុំពេញអង្គជាមួយ ឯកឧត្តមសាស្រ្តាចារ្យបណ្ឌិត នូម៉ាន់ តួទលមុស (Numan Kurtulmus) ប្រធានរដ្ឋសភា នៃសាធារណរដ្ឋតួកគីយ៉េ រដ្ឋធានីអង់ការ៉ា ប្រទេសតួកគី។

ប្រជាពលរដ្ឋ៨ភូមិ ក្នុងឃុំពង្រ ស្រុកចុងកាល់ ទទួលបានសេវាផ្គត់ផ្គង់ទឹកស្អាតប្រើប្រាស់ ក្នុងរយៈពេលខ្លីខាងមុខ

ឧត្តរមានជ័យ៖ ប្រជាពលរដ្ឋចំនួន៨ភូមិ ជិត២០០០ខ្នងផ្ទះ រស់នៅក្នុងឃុំពង្រ ស្រុកចុងកាល់ ខេត្តឧត្តរមានជ័យ និងទទួលបានសេវាផ្គត់ផ្គង់ទឹកស្អាតប្រើប្រាស់នាពេលឆាប់ៗនេះ ខណៈក្រុមហ៊ុនផ្គត់ផ្គង់ចែកចាយទឹកស្អាត ក្រុងសំរោង ខេត្តឧត្តរមានជ័យ បាននឹងកំពុងចាប់ផ្តើមធ្វើការដាក់ពង្រាយតភ្ជាប់បណ្តាញទុយោទឹកចូលតាម ខ្នងផ្ទះជាបណ្តើរៗហើយនោះ នាព្រឹកថ្ងៃទី១២ធ្នូឆ្នាំ២០២៤នេះ។អ្នកស្រី ឈន ថេន ប្រជាពលរដ្ឋរស់នៅចំណុចភូមិកណ្តោលដុំឃុំពង្រ ស្រុកចុងកាល់ ខេត្តឧត្តរមានជ័យ បានសម្តែងក្ដីរីករាយ និងត្រេកអរយ៉ាងខ្លាំង ខណៈពេលនេះ ក្នុងមូលដ្ឋានរបស់គាត់ ទទួលបានការតភ្ជាប់បណ្តាញទឹកស្អាតប្រើប្រាស់ហើយនោះ។ជាមួយគ្នានោះដែរលោក លី រដ្ឋា អភិបាលស្រុកចុងកាល់ បានបញ្ជាក់ថា កន្លងមកក្នុងមូលដ្ឋានស្រុកចុងកាល់ អ្នកដែលមានទឹកស្អាតប្រើប្រាស់គឺមានចំនួនតិចតួចសម្រាប់ក្នុងទីប្រជុំជនស្រុក ពុំមានច្រើននោះទេ។ ប៉ុន្តែមកដល់ពេលនេះ ក្នុងមូលដ្ឋានស្រុកចុងកាល់ ទាំងមូលកំពុងកែប្រែមុខមាត់ថ្មី និងមានការអភិវឌ្ឍរីកចម្រើនជាបន្តបន្ទាប់ ដោយក្នុងមូលដ្ឋានរស់នៅរបស់ប្រជាពលរដ្ឋ គឺមានប្រព័ន្ធទឹកស្អាត បានតភ្ជាប់បណ្តាញនៅតាមមូលដ្ឋាននានា ជាបណ្តើរៗហើយ និងមាន ភ្លើង ផ្លូវបេតុងល្អៗ បានប្រើប្រាស់ ក្នុងមូលដ្ឋានរបស់បងប្អូនប្រជាពលរដ្ឋផងដែរ។យ៉ាងណាម៉ិញលោកអភិបាលស្រុកចុងកាល់ សូមថ្លែងអំណរអរគុណដល់ម្ចាស់អាជីវកម្មក្រុមហ៊ុនផ្គត់ផ្គង់ទឹកស្អាតក្រុងសំរោង ដែលជានិច្ចកាលតែងតែបានខិតខំសហការជាមួយអាជ្ញាធរស្រុក ក្នុងការសម្របសម្រួលដល់ការតភ្ជាប់បណ្តាញទឹកស្អាតជូនដល់ប្រជាពលរដ្ឋក្នុងស្រុកចុងកាល់ បានប្រើប្រាស់ផងដែរ៕

សម្ដេចតេជោ ហ៊ុន សែន អញ្ជើញធ្វើកិច្ចប្រជុំចង្អៀតជាមួយ ប្រធានរដ្ឋសភា នៃសាធារណរដ្ឋតួកគី

ភ្នំពេញ៖ សម្តេចអគ្គមហាសេនាបតីតេជោ ហ៊ុន សែនប្រធានព្រឹទ្ធសភា នៃព្រះរាជាណាចក្រកម្ពុជា អញ្ជើញធ្វើកិច្ចប្រជុំចង្អៀតជាមួយ ឯកឧត្តមសាស្រ្តាចារ្យបណ្ឌិត នូម៉ាន់ តួទលមុស (Numan Kurtulmus) ប្រធានរដ្ឋសភា នៃសាធារណរដ្ឋតួកគីយ៉េ រដ្ឋធានីអង់ការ៉ា ប្រទេសតួកគីយ៉េ ថ្ងៃទី១២ ខែធ្នូ ឆ្នាំ២០២៤។ ក្នុងដំណើរទស្សនកិច្ចផ្លូវការនៅតួកគី នៅថ្ងៃទី១២ ខែធ្នូនេះ សម្តេច តេជោ ហ៊ុន និងគណៈប្រតិភូជាន់ខ្ពស់ កម្ពុជា ក៏បានអញ្ជើញទស្សនាវិមានរំលឹកអនុស្សាវរីយ៍អានីតកាបៀរ អញ្ជើញដាក់កម្រងផ្កាគោរពវិញ្ញាណក្ខន្ធ លោកប្រធានាធិបតីទី១ នៃប្រទេសតួកគី គឺលោក Mustafa Kemal Atatuk, អញ្ជើញចុះហត្ថលេខាលើសៀវភៅក្រាំងមាស និងអញ្ជើញទស្សនាសារមន្ទីរសង្រ្គាម ក្នុងរដ្ឋធានីអង់ការ៉ា ប្រទេសតួកគីផងដែរ។សូមជម្រាបថា កាលពីព្រឹកថ្ងៃអាទិត្យ ទី៨ ខែធ្នូ ឆ្នាំ២០២៤ សម្ដេចតេជោ ហ៊ុន សែន ប្រធានព្រឹទ្ធសភា បានអញ្ជើញដឹកនាំគណៈប្រតិភូជាន់ខ្ពស់កម្ពុជា បំពេញទស្សនកិច្ចផ្លូវការ នៅក្រៅប្រទេសរួមមាន ប្រទេសអារ៉ាប៊ីសាអូឌីត, រដ្ឋកាតា សាធារណរដ្ឋតួកគី និងអេមីរ៉ាតអារ៉ាប់រួម ចាប់ពីថ្ងៃទី៨ ដល់ថ្ងៃទី១៤ ខែធ្នូ ឆ្នាំ២០២៤។ដំណើរទស្សនកិច្ចផ្លូវការរបស់សម្តេចតេជោ គឺបានបង្ហាញយ៉ាងច្បាស់ពីសារៈសំខាន់ និងតួនាទីកាន់តែសកម្មនៃ “ការទូតសភា” ដែលជាអាទិភាពមួយនៃអាទិភាពទាំងពីររបស់ព្រឹទ្ធសភានីតិកាលទី៥ ក្រោមការដឹកនាំប្រកបដោយគតិបណ្ឌិតរបស់សម្តេចតេជោ ក្នុងការរួមចំណែកដល់ការពង្រឹង និងពង្រីកចំណងមិត្តភាព សាមគ្គីភាព និងកិច្ចសហប្រតិបត្តិការដ៏ល្អប្រសើររវាងស្ថាប័ននីតិប្បញ្ញត្តិរបស់កម្ពុជា ជាមួយស្ថាប័ននីតិប្បញ្ញត្តិនៃបណ្តាប្រទេសជាមិត្ត ដើម្បីជាគុណប្រយោជន៍ដល់ប្រជាជន ការអភិវឌ្ឍប្រទេសជាតិរីកចម្រើន និងដើម្បីសន្តិភាព ស្ថិរភាព និងសន្តិសុខ ក្នុងតំបន់ និងពិភពលោក៕

ឯកឧត្តមរដ្ឋមន្រ្តី ឌិត ទីណា អញ្ជេីញជាអធិបតីក្នុងពិធីបេីកកិច្ចប្រជុំបូកសរុបការងារព្រៃឈេីប្រចាំឆ្នាំ២០២៤ និងទិសដៅអនុវត្តឆ្នាំ២០២៥

ភ្នំពេញ៖ នៅព្រឹកថ្ងៃទី១២ ខែធ្នូ ឆ្នាំ២០២៤ ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានអញ្ជេីញជាអធិបតីភាពដ៏ខ្ពង់ខ្ពស់ក្នុងពិធីបេីកកិច្ចប្រជុំបូកសរុបការងារព្រៃឈេីប្រចាំឆ្នាំ២០២៤ និងទិសដៅអនុវត្តឆ្នាំ២០២៥ នៅទីស្តីការក្រសួងកសិកម្ម រុក្ខាប្រមាញ់ និងនេសាទ។ក្នុងឱកាសអញ្ជេីញជាអធិបតី ឯកឧត្តមរដ្ឋមន្រ្តី បានសម្តែងនូវក្តីសោមនស្សរីករាយ និងមានកត្តិយសក្នុងការចូលរួមពិធីនាថ្ងៃនេះ ដែលមានសារៈសំខាន់សម្រាប់ការអនុវត្តការងារវិស័យព្រៃឈេីឱ្យមានប្រសិទ្ធភាព និងនិរន្តរភាព។ លេីសពីនេះ ឯកឧត្តមរដ្ឋមន្រ្តី បានណែនាំដល់រដ្ឋបាលព្រៃឈេីត្រូវពង្រឹងការងារឱ្យកាន់តែប្រសេីរថែមទៀត មានភាពច្បាស់លាស់ ធ្វេីការតាមរយៈខ្សែបណ្តោយសហការជាមួយអជ្ញាធរខេត្ត និងមន្ទីរកសិកម្មរាជធានី-ខេត្ត អនុវត្តការងារឱ្យមានភាពសកម្ម និងចំគោលដៅ។នៅចំពោះមុខអង្គពិធី ឯកឧត្តមរដ្ឋមន្រ្តី បានផ្តល់អនុសាសន៍ដល់អង្គប្រជុំត្រូវផ្តោតសំខាន់ទៅលេីប្រព័ន្ធហរិញ្ញវត្ថុសាធារណៈ ដោយគិតគូរពិនិត្យរួមគ្នាអំពីផែនការថវិកា ផែនការសមិទ្ធកម្ម និងសមិទ្ធផលនានាដែលសម្រេចបាន បញ្ហាប្រឈមនានា និងសូចនាកររំពឹងទុកដែលជាពិសោធន៍ពីឆ្នាំចាស់ សម្រាប់ឆ្នាំថ្មីខាងមុខនេះប្រកបដោយប្រសិទ្ធភាព និងមានមូលដ្ឋានច្បាស់លាស់។ ឆ្លៀតក្នុងឱកាសនេះដែរ ឯកឧត្តមរដ្ឋមន្រ្តី បានថ្លែងបញ្ជាក់អំពីគោលយោបាយអាទិភាពក្នុងវិស័យកសិកម្មក្នុងការធានាឱ្យបាននូវសន្តិសុខស្បៀង និងនិរន្តរភាពសេដ្ឋកិច្ច និងបរិស្ថាន ធ្វេីយ៉ាងណាឱ្យប្រជាពលរដ្ឋ មានហូប មានប្រេី មានបាន និងមានរហូត ដែលរដ្ឋបាលព្រៃឈេីត្រូវស្វែងយល់ពីដំណាក់កាលនីមួយៗឱ្យបានសុីជម្រៅ និងគិតគូរស្របតាមគោលនយោបាយ មានតម្លៃបន្ថែមខ្ពស់ មានសេដ្ឋកិច្ចមាត្រដ្ឋាន និងមាននិរន្តរភាពសម្រាប់វិស័យព្រៃឈេី និងសត្វព្រៃ។ពាក់ព័ន្ធនឹងការអនុវត្តការងារ ឯកឧត្តមរដ្ឋមន្រ្តី បានលេីកទឹកចិត្តដល់អង្គប្រជុំបន្តជំរុញការងារសហគមន៍ព្រៃឈេីទំនេីប ដែលមានលក្ខខណ្ឌជាក់លាក់ មានភាពម្ចាស់ការពិតប្រាកដ និងមានចំនូលពីផលព្រៃឈេី និងកសិ-រុក្ខកម្ម ការផ្សាភ្ជាប់ការអភិរក្សនិងការអភិវឌ្ឍនូវធនធានព្រៃឈេីនិងសត្វព្រៃ និងចូលរួមទប់ស្កាត់ការទន្ទ្រានដីព្រៃឈេី ប្រកបដោយប្រសិទ្ធភាព និងប្រសិទ្ធផលខ្ពស់ ដោយតម្កល់ផលប្រយោជន៍ជាតិជាធំ៕

អ្នកផ្ទុកជម្ងឺអេដស៍ចំនួន១០០នាក់ ទទួលបានអំណោយមនុស្សធម៌ពីសាខាកាកបាទក្រហមកម្ពុជាខេត្តតាកែវ

តាកែវ៖ នៅរសៀលថ្ងៃពុធ ទី១១ ខែធ្នូ ឆ្នាំ២០២៤នេះ សាខាកាកបាទក្រហមកម្ពុជាខេត្តតាកែវ បានរៀបចំពិធីសំណេះសំណាល និងនាំយកអំណោយមនុស្សធម៌របស់សាខាចែកជូនពលរដ្ឋដែលផ្ទុកជម្ងឺអេដស៍ និងជម្ងឺអេដស៍ចំនួន១០០នាក់មកពី៣សង្កាត់ ក្នុងក្រុងដូនកែវ ដើម្បីចូលរួមអបអរសាទរទិវាពិភពលោកប្រយុទ្ធប្រឆាំងជម្ងឺអេដស៍ ១ធ្នូ ឆ្នាំ២០២៤ ក្រោមប្រធានបទ(សិទ្ធជាមាគា៌ឆ្ពោះទៅបញ្ចប់អេដស៍)។ពិធីនេះស្ថិតក្រោមអធិបតីភាព លោក ម៉ឹង វុធី អនុប្រធានអចិន្រ្តៃយ៍គណៈកម្មាធិការសាខាកាកបាទក្រហមកម្ពុជាខេត្តតាកែវ តំណាងឯកឧត្តម វ៉ី សំណាង ប្រធានគណៈកម្មាធិការសាខា ក៏មានការចូលរួមពីលោក លោកស្រី សមាជិកគណៈកម្មាធិការសាខា មន្រ្តីសាខា ជាច្រើនរូបទៀត។មានប្រសាសន៍នៅក្នុងឱកាសនោះ លោក ម៉ឹង វុធី អនុប្រធានអចិន្រ្តៃយ៍គណៈកម្មាធិការសាខាកាកបាទក្រហមកម្ពុជាខេត្តតាកែវក៏បានសម្ដែងការកោតសសើរនិងថ្លែងអំណរគុណយ៉ាងជ្រាលជ្រៅដល់សម្ដេចកិត្តិព្រឹត្តបណ្ឌិត ប៊ុន រ៉ានីហ៊ុនសែន ប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិ នៃវេទិកាភាពជាអ្នកដឹកនាំតំបន់អាស៊ី-ប៉ាស៊ីហ្វិកឆ្លើយតបមេរោគអេដស៍ ជម្ងឺអេដស៍ និងការអភិវឌ្ឍនៅកម្ពុជា ដែលសម្ដេចតែងតែយកចិត្តទុកដាក់ចំពោះគ្រួសារពលរដ្ឋដែលងាយរងគ្រោះ និងរងគ្រោះគ្រប់ប្រភេទ ដោយមិនប្រកាន់ជាតិសាសន៍ ពណ៌សម្បុរ សាសនា ឫនិន្នាការនយោបាយឡើយ ជាពិសេសអ្នកផ្ទុកមេរោគអេដស៍ និងជម្ងឺអេដស៍ជាក់ស្ដែងដូចថ្ងៃនេះជាដើម។បើតាមលោក ម៉ឹង វុធី អនុប្រធានអចិន្រ្តៃយ៍គណៈកម្មាធិការសាខាបានគូរបញ្ជាក់ថា យោងតាមរបាយការណ៍របស់មន្ទីរសុខាភិបាលខេត្តបានឲ្យដឹងថាគិតត្រឹមត្រីមាសទី៣ ឆ្នាំ២០២៤នេះ ខេត្តតាកែវមានអ្នកផ្ទុកមេរោគអេដស៍ សរុបចំនួន២,៨១៤នាក់ ដែលកំពុងប្រើថ្នាំប្រឆាំងមេរោគអេដស៍នៅតាមបណ្ដាសេវាសុខភាពសាធារណៈ ក្រុងស្រុកទាំង១០ ក្នុងខេត្តតាកែវ។លោកក៏បានអំពាវនាវដល់ប្រជាពលរដ្ឋ យុវជន ពិសេសអ្នកដែលមានដៃគូច្រើនមិនត្រូវភ្លេចខ្លួនពីជម្ងឺអេដស៍នោះទេ ពោលត្រូវបង្កើនការប្រុងប្រយ័ត្ន និង ការពារជានិច្ច តាមរយៈការប្រើប្រាស់ស្រោមអនាម័យពេលរួមភេទ ដើម្បីកាត់បន្ថយអត្រាការកើនឡើងនៃអ្នកឆ្លងមេរោគអេដស៍ ផ្ទុកជម្ងឺអេដស៍ ដើម្បីឈានទៅដល់ការលុបបំបាត់ជម្ងឺអេដស៍នៅឆ្នាំ២០៣០។ក្នុងឱកាសនោះលោក ម៉ឹង វុធី អនុប្រធានអចិន្រ្តៃយ៍ និងសមាជិកគណៈកម្មាធិការសាខាក៏បានចែកជូនអំណោយដល់អ្នកផ្ទុកមេរោគអេដស៍ និងជម្ងឺអេដស៍ទាំង១០០នាក់ដោយក្នុងមួយនាក់ៗទទួលបានអង្ករ២៥ គីឡូក្រាម មុង១ ភួយ១ សារុង១ ក្រម៉ា១ ទឹកដោះគោឆៅ១ឡូ ស្ករស ១គីឡូ ត្រីខ១យួរ និងថវិកា២ម៉ឺនរៀលផងដែរ៕

គណៈទន្តពេទ្យកម្ពុជា រៀបចំសិក្ខាសាលផ្សព្វផ្សាយនូវដែនកំណត់បទដ្ឋាន និង និយាមវិជ្ជាជីវៈដល់អ្នកប្រកបវិជ្ជាជីវៈទន្តសាស្ត្រនៅខេត្តកំពង់ឆ្នាំង

កំពឆ្នាំង៖ គណៈទន្តពេទ្យកម្ពុជា នៅរសៀលថ្ងៃទី១១ ខែធ្នូ ឆ្នាំ២០២៤នេះសហការជាមួយមន្ទីរសុខាភិបាលខេត្ត បានរៀបចំសិក្ខាសាលាផ្សព្វផ្សាយដែនកំណត់វិជ្ជាជីវៈបទដ្ឋាន និងនិយាមវិជ្ជាជីវៈ ទន្តសាស្ត្រ ដល់អ្នកប្រកបវិជ្ជាជីវៈទន្តសាស្ត្រនៅខេត្តកំពង់ឆ្នាំង។ ក្រោមការអធិបតីភាព លោកសាស្រ្តាចារ្យ ប៉ូច សុភារ័ត្ន ប្រធានគណៈទន្តពេទ្យកម្ពុជា ព្រមទាំងមានការអញ្ជើញចូលរួមពីសំណាក់លោក វេជ្ជបណ្ឌិតប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំង និង ក្រុមប្រឹក្សាគណៈទន្តពេទ្យជាតិ, រួមទាំងទន្ដពេទ្យជាច្រើនរូបមកពីខេត្តកំពង់ឆ្នាំង ខេត្តពោធិសាត់ និង ខេត្តកំពង់ស្ពឺ ។មានប្រសាសន៍នៅក្នុងឱកាសនោះលោកវេជ្ជបណ្ឌិត ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំង បានបញ្ជាក់ឱ្យដឹងថា សិក្ខាសាលាដែលបានរៀបចំឡើងនាពេលនេះ ពិតជាមានសារៈសំខាន់សម្រាប់អ្នកប្រកបវិជ្ជាជីវៈទន្តសាស្ត្រនៅក្នុងមូលដ្ឋានរបស់ខ្លួន ដើម្បីយល់កាន់តែច្បាស់អំពីនីតិវិធីនិងនិយាមវិជ្ជាជីវៈ ក្នុងនាមជាអ្នកប្រកបវិជ្ជាជីវៈទន្តសាស្រ្តស្របតាមច្បាប់របស់គណទន្តពេទ្យនៅកម្ពុជា ។ លោកវេជ្ជបណ្ឌិត ប្រាក់ វ៉ុន បានបញ្ជាក់ទៀតថា កន្លងមកនៅខេត្តកំពង់ឆ្នាំងតែងតែបានយកចិត្តទុកដាក់ និង ផ្សព្វផ្សាយនូវដែនកំណត់បទដ្ឋាន និង និយាមវិជ្ជាជីវៈដល់អ្នកប្រកបវិជ្ជាជីវៈទន្តសាស្ត្រនៅខេត្តកំពង់ឆ្នាំងឱ្យយល់ដឹង និងពង្រឹងនូវការអនុវត្តបានល្អនូវក្រមសីលធម៌វិជ្ជាជីវៈទាំងវិស័យឯកជន សាធារណៈរបស់រដ្ឋ ។លោកសាស្រ្តាចារ្យ ប៉ូច សុភារ័ត្ន ប្រធានគណៈទន្តពេទ្យកម្ពុជា បានបញ្ជាក់ថា បទដ្ឋាន និងនិយាមវិជ្ជាជីវៈ ជាឯកសារគតិយុត្តិសម្រាប់ដឹកនាំ និងការគ្រប់គ្រងការប្រកបវិជ្ជាជីវៈ ដែល ពិពណ៌នាអំពីកម្រិតអប្បបរមា នៃការប្រតិបត្តិដែលអាចទទួលយកបានរបស់អ្នកប្រកបវិជ្ជាជីវៈ ជាខ្នាតវាស់វែងសម្រាប់ទន្តពេទ្យម្នាក់ៗ ប្រើប្រាស់ក្នុងការវាយតម្លៃលើ ការប្រតិបត្តិរបស់ខ្លួនផងដែរ។ បទដ្ឋាន និងនិយាមវិជ្ជាជីវៈរួមមាន បង្ហាញទៅសាធារណជននូវកម្រិតអប្បបរមា នៃការពិនិត្យព្យាបាល ថែទាំសុខភាព មាត់ធ្មេញមានគុណភាព និងសុវត្ថិភាព ។ ជាឧបករណ៍សម្រាប់ពិនិត្យតាមដាន និងវាយតម្លៃការប្រកបវិជ្ជាជីរៈទន្តសាស្ត្រ ។ ផ្តល់ការបង្ហាញផ្លូវក្នុងការរៀបចំកម្មវិធីសិក្សាផ្នែកទន្តសាស្ត្រ។ ប្រើប្រាស់ជាគម្រោងការក្នុងការអភិវឌ្ឍវិជ្ជាជីវៈបន្ត។លោកសាស្រ្តាចារ្យ ប៉ូច សុភារ័ត្ន បានអំពាវនាវដល់អ្នកប្រកបវិជ្ជាជីវៈទន្តសាស្ត្រទាំងអស់ ដែលមិនទាន់មានអាជ្ញាបណ្ណវិជ្ជាជីវៈត្រូវ រួសរាន់ចុះបញ្ជិកា ស្នើសុំអាជ្ញាបណ្ណឱ្យបានគ្រប់គ្នា ដើម្បីមាននីតិសម្បទាគ្រប់គ្រាន់ អាចប្រកបវិជ្ជាជីវៈទន្តសាស្ត្រស្របច្បាប់។ហើយទន្តពេទ្យដែលប្រកបវិជ្ជាជីវៈទន្តសាស្រ្តទាំងអស់ត្រូវគោរពក្រមសីលធម៌ទន្តពេទ្យ និងត្រូវស្វែងយល់ពីឯកសារគតិយុត្តនានា ពិសេសច្បាប់ស្តីពី ការគ្រប់គ្រងអ្នកប្រកបវិជ្ជាជីវៈវិស័យសុខាភិបាល ។ ត្រូវចូលរួមទាំងអស់គ្នា ដើម្បីលុបបំបាត់សេវាខុសច្បាប់ សេវាដែលផ្តល់ដោយអ្នកដែលគ្មានសញ្ញាបត្រទទួលស្គាល់ដោយក្រសួងសុខាភិបាល ឬក្រសួងអប់រំយុវជន និងកីឡា។ ត្រូវផ្តល់ការព្យាបាល ជូនប្រជាពលរដ្ឋដោយផ្អែកលើលក្ខណៈវិទ្យាសាស្ត្រ គុណធម៌ សមធម៌ និងគិតពីសុខមាលភាពប្រជាពលរដ្ឋជាចម្បង៕ កាំង ហុងវាស្នា

សហគមន៍តំបន់ការពារធម្មជាតិត្មាតប៉ើយ ត្រូវបានកែលម្អឱ្យកាន់តែមានសោភណ្ឌភាព ដើម្បីទាក់ទាញភ្ញៀវទេសចរណ៍

ក្រោមគំនិតផ្ដួចផ្ដើមរបស់អាជ្ញាធរខេត្តព្រះវិហារ និងការជួយជ្រោមជ្រែងទាំងផ្នែកបច្ចេកទេស និងថវិការបស់ក្រុមហ៊ុន សំវាសនា ខន់សឺវេនសិនស្ដេយ នាថ្ងៃទី១១ ខែធ្នូ ឆ្នាំ២០២៤នេះ បានរៀបចំ ពិធីបញ្ចុះបឋមសិលាបើកការដ្ឋានស្ដារ និងកែលម្អផ្ទះសំណាក់ត្មាតប៉ើយ នៅសហគមន៍តំបន់ការពារធម្មជាតិត្មាតប៉ើយធឿនក្រសាំង ក្រោមអធិបតីភាព ឯកឧត្តម គីម រិទ្ធី អភិបាលខេត្តព្រះវិហារ លោក Robb Menzi នាយកប្រតិបត្តិស្តីទីនៃអង្គការ WCS។ ការកែលម្អសហគមន៍តំបន់ការពារធម្មជាតិត្មាតប៉ើយ មានដូចជា ផ្ទះស្នាក់សហគមន៍មានទទឹងប្រវែង ០៨ម៉ែត្រ និងបណ្តោយ ប្រវែង ៨,៨ ម៉ែត្រ ចំនួន៦ខ្នង ព្រមទាំងអគារសម្រាប់ទទួលភ្ញៀវ និងកន្លែងទទួលទានអាហារទទឹង ប្រវែង ១០ម៉ែត្រ និងបណ្តោយប្រវែង ២០ម៉ែត្រ ចំនួន១ខ្នង។លោក Robb Menzi បានគូសបញ្ជាក់ថា នៅក្នុងរយៈពេល២៥ឆ្នាំ វត្តមានរបស់អង្គការ WCSនៅក្នុងប្រទេសកម្ពុជា បានក្លាយជាប្រទេសឈានមុខគេ ដែលមានបុគ្គលិករហូតដល់ ២៥០នាក់ ដែលធ្វើការលើការងារអភិរក្សធនធានធម្មជាតិ ជាពិសេស គឺការសិក្សាស្រាវជ្រាវអភិរក្សសត្វត្រយងយក្ស នៅក្នុងខេត្តព្រះវិហារ ដែលជាសត្វតំណាងឱ្យប្រទេសកម្ពុជា។លោកបន្តថា ការបើកដ្ឋានកែលម្អហេដ្ឋារចនាសម្ព័ន្ធផ្ទះសំណាក់«ត្មាតប៉ើយ»នៅសហគមន៍តំបន់ការពារធម្មជាតិត្មាតប៉ើយធឿនក្រសាំងនេះ មិនត្រឹមតែជាទីតាំង សម្រាប់ភ្ញៀវអ្នកទេសចរណ៍មកស្នាក់នៅប៉ុណ្ណោះទេ ប៉ុន្តែក៏ជាទីតាំងសម្រាប់ភ្ញៀវទេសចរណ៍ មកលេងប្រាសាទកោះកេរ និងប្រាសាទព្រះវិហារ បានចូលមកទស្សនាកេរដំណែលធម្មជាតិដ៏សម្បូរបែបនៅក្នុងតំបន់មួយនេះ ដើម្បីផ្សារភ្ជាប់ទំនាក់ទំនងធម្មជាតិជាមួយអ្នកទេសចរណ៍ផងដែរ។នាកាសនោះ ឯកឧត្តម គីម រិទ្ធី បានសម្តែងនូវការកោតសរសើរ និងវាយតម្លៃខ្ពស់ចំពោះគណៈកម្មការសហគមន៍អង្គការអភិរក្សសត្វព្រៃ WCS ក្រុមហ៊ុន សំវាសនា ខន់សឺវេសិន ស្ដេយ អង្គការដៃគូ និងមន្ទីរអង្គភាពពាក់ព័ន្ធទាំងអស់ ដែលបានខិតខំសហការ ក្នុងការអភិរក្ស និងអភិវឌ្ឍន៍នៅក្នុងសហគមន៍ តំបន់ការពារធម្មជាតិត្មាតប៉ើយធឿនក្រសាំងនេះ សម្រេចបានលទ្ធផលជាច្រើនគួរឱ្យកត់សម្គាល់ ជាពិសេស គឺការស្តារ និងកែលម្អផ្ទះសំណាក់របស់សហគមន៍ “ត្មាតប៉ើយ” ដែលជាគំរូអគារ ស្នាក់នៅសម្រាប់ភ្ញៀវទេសចរធម្មជាតិក្នុងស្រុក និងបរទេសក្រោមការចាត់ចែង និងគ្រប់គ្រងដោយផ្ទាល់របស់គណៈកម្មការសហគមន៍តំបន់ការពារធម្មជាតិត្មាតប៉ើយធឿនក្រសាំង។ជាមួយនេះ ឯកឧត្តមក៏បានស្នើអ្នកពាក់ព័ន្ធទាំងអស់ បន្តគាំទ្រ និងបំពេញការងារជាមួយសហគមន៍តំបន់ការពារធម្មជាតិនៅកម្ពុជាបន្តទៀត ដើម្បីអប់រំបរិស្ថាន ធម្មជាតិដល់ក្មេងជំនាន់ក្រោយ និងកិច្ចគាំពារបរិស្ថាន ការអភិរក្សសត្វព្រៃ និងធនធានធម្មជាតិ និងជួយបង្កើតទេសចរណ៍ធម្មជាតិជូនសហគមន៍ ដើម្បីលើកកម្ពស់ជីវភាពប្រជាជនក្នុងមូលដ្ឋាន ផ្សារភ្ជាប់នឹងការលើកកម្ពស់ការយល់ដឹងរបស់ប្រជាពលរដ្ឋអំពីការការពារធនធានធម្មជាតិ ក្នុងការលើកកម្ពស់វិស័យទេសចរណ៍ តាមរយៈការជម្រុញការអភិវឌ្ឍទេសចរណ៍វប្បធម៌ និងធម្មជាតិ ដោយបន្ថែមទេសចរណ៍បៃតងស្អាត និងវៃ ឆ្លាត ជម្រុញការបង្កើតប្រភេទទេសចរណ៍ថ្មីៗ ដែលមានតម្លៃបន្ថែមខ្ពស់ ទេសចរណ៍ធុរកិច្ច និងការរៀបចំដាក់ចេញគោលនយោបាយ និងផែនការមេសម្រាប់អភិវឌ្ឍន៍វិស័យទេចរណ៍នានា គឺជាការចាំបាច់ដែលតម្រូវឱ្យមានការយកចិត្តទុកដាក់ខ្ពស់៕

បណ្ដាញសង្គម

ព័ត៌មានថ្មីៗ

មនុស្សយ៉ាងហោច ៣នាក់ស្លាប់ និង ៤នាក់បាត់ខ្លួន ក្រោយទឹកជំនន់ហូរនាំយករថយន្តមួយគ្រឿងនៅឥណ្ឌា

កងទ័ពអ៊ីស្រាអែលថា ខ្លួនវាយប្រហារចូលជ្រៅនៅអ៊ីរ៉ង់ដោយមានគោលដៅលើសមត្ថភាពនុយក្លេអ៊ែររបស់ពួកគេ

ទីក្រុងប៉េកាំងនិយាយថា ពលរដ្ឋចិនជិត ៨០០នាក់ ត្រូវបានជម្លៀសចេញពីប្រទេសអ៊ីរ៉ង់

ឯកឧត្តម ទេសរដ្ឋមន្រ្តី គន់ គីម អញ្ជើញទទួលអំណោយពីសប្បុរសជនសម្រាប់ផ្តល់ជូនកងទ័ពជួរមុខ និងពលរដ្ឋ

អូស្ត្រាលីនឹងចាប់ផ្តើមកិច្ចពិភាក្សា ស្តីពីបញ្ហាសន្តិសុខ និងការពារជាតិជាមួយ EU

អ៊ីរ៉ង់បង្ហាញមីស៊ីលដែលកងកម្លាំងឆ្មាំបដិវត្តន៍អ៊ិស្លាមបាញ់សំដៅអ៊ីស្រាអែល

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877