BTV NEWS

សមត្ថកិច្ចរាជធានីភ្នំពេញ បន្តត្រួតពិនិត្យទីតាំងស្នាក់នៅប្រមូលផ្ដុំ ដើម្បីស្វែងរក និងបោសសម្អាតបទល្មើស Online Scams

រយៈពេលជាង ៥ខែ អគ្គនាយកដ្ឋានអន្តោប្រវេសន៍បណ្ដេញជនបរទេសជាង ៤ម៉ឺននាក់ចេញកម្ពុជាពាក់ព័ន្ធករណី Online Scams និងបទល្មើសផ្សេងៗទៀត

ត្រឹមរយៈពេល៥ខែ ពេទ្យគន្ធបុប្ផាពិនិត្យព្យាបាលជំងឺជាង ៥១ម៉ឺនករណី ខណៈការចូលរួមយុទ្ធនាការ «១ម៉ឺនរៀល ១ម៉ឺននាក់» កំពុងបន្ត

កម្លាំងចម្រុះរាជធានីភ្នំពេញ បន្តត្រួតពិនិត្យឃ្លាំង ៣៣ទីតាំងបន្ថែមទៀត ដោយបានរកឃើញ ៥ទីតាំងមានផលិតផលនាំពីប្រទេសថៃ និងសម្រេចនាំខ្លួនមនុស្ស ៥នាក់ទៅសាកសួរ

ព័ត៌មានជាតិ

អំណោយជាគ្រឿងឧបភោគបរិភោគ និងសម្ភារៈប្រើប្រាស់១០០០កញ្ចប់របស់សម្ដេចតេជោ និងសម្ដេចកិត្តិព្រឹទ្ធបណ្ឌិត,សម្ដេចធិបតី និងលោកជំទាវបណ្ឌិត ត្រូវបានបន្តផ្ដល់ពលរដ្ឋភៀសសឹកចំនួន១០០០គ្រួសារនៅខេត្តពោធិ៍សាត់

នៅថ្ងៃទី១២ ខែធ្នូ ឆ្នាំ២០២៥ នេះ អំណោយជាគ្រឿងឧបភោគបរិភោគ និងសម្ភារៈប្រើប្រាស់ចំនួន១០០០ កញ្ចប់ របស់សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន,សម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិតពេជ ចន្ទមុន្នី ហ៊ុនម៉ាណែត ត្រូវបានបន្តផ្ដល់អោយប្រជាពលរដ្ឋភៀសសឹកចំនួន១០០០គ្រួសារ នៅខេត្តពោធិ៍សាត់។ បងប្អូនប្រជាពលរដ្ឋ ដែលបានភៀសសឹកមកពីតាមបណ្តាខេត្តជាប់ព្រំដែន ខ្មែរ-សៀម ត្រូវបានទទួលការយកចិត្តទុកដាក់បំផុតពីសំណាក់សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងដោយមានរាជរដ្ឋាភិបាលកម្ពុជា ដឹកនាំដោយសម្ដេចមហាបវរធិបតី ហ៊ុន ម៉ាណែត ជានាយករដ្ឋមន្ត្រីនៃព្រះរាជាណាចក្រកម្ពុជា។ សម្រាប់អំណោយដែលផ្ដល់ជូនប្រជាពលរដ្ឋភៀសសឹក១គ្រួសាររួមមាន៖*ក្នុងកញ្ចប់ថង់១-ថ្នាំដុសធ្មេញ២-ច្រាសដុសធ្មេញ៣-សាប៊ូដុំ៤-ប្រេងខ្យល់៥-ប្រេងកូឡា៦-អង្រឹង ៧-អាវភ្លៀង៨-ពិល៩-កន្សែងធំ១០-ក្រមា ១១-ធូបមូស ១២-ថ្នាំពេទ្យ (៤មុខ)១៣-ទឹកដោះគោ (២កំប៉ុង)១៤-នំលីលី ១៥-កន្ទេល ១៦-ម៉ុង១៧-ភួយ ១៨-សារ៉ុង១៩-សំឡីអនាម័យ២០-សាប៊ូម្សៅ២១-ខោអាវឈុត*ដាក់ខាងក្រៅ២២-ទឹកសុីវអុីវ២៣-មី២៤-ត្រីខ២៥-តង់២៦-ធុងទឹក។ ជាមួយគ្នានេះផងដែរ ក៏មានអំណោយជាគ្រឿងឧបភោគបរិភោគ និងសម្ភារៈរបស់របរប្រើប្រាស់ផ្ដល់តាមរយៈអាជ្ញាធរទុកចែកជូនបន្ថែមដល់ប្រជាពលរដ្ឋ រួមមាន កញ្ចប់អំណោយសម្រាប់ប្រជាជន1000 កញ្ចប់,ទឹកសុីអុីវ1000 យួរ,,អង្ករ1000បេ,ត្រីខ1000យួរ,មី1000 កេស,តង់ 1000 តង់ធុងទឹក (35L) 500 ធុង,មី15កេស,ទឹកដោះគោកូនក្មេង 50កេស,ស្ករគ្រាប់ 5កេស,ខោទឹកនោម100កេស (៤០០យួរ)៕

ប្រធានអាស៊ានប្រកាសបើកកិច្ចប្រជុំពិសេសរដ្ឋមន្រ្តីការបរទេសអាស៊ាននាពេលឆាប់ៗខាងមុខដើម្បីវាយតម្លៃស្ថានភាពតំបន់ និងពង្រឹងតួនាទីរួមអាស៊ានក្នុងការថែរក្សាសន្តិភាពតំបន់

,ឯកឧត្តម អាន់វ៉ា អ៊ីប្រាហ៊ីម (Anwar Ibrahim) នាយករដ្ឋមន្ត្រីម៉ាឡេស៊ី និងជាប្រធានប្ដូរវេនអាស៊ាន បានមានប្រសាសន៍បញ្ជាក់នៅយប់ថ្ងៃទី១២ ខែធ្នូនេះថា ឯកឧត្តមនឹងបើកកិច្ចប្រជុំពិសេសរដ្ឋមន្រ្តីការបរទេសអាស៊ាននាពេលឆាប់ៗខាងមុខដើម្បីវាយតម្លៃស្ថានភាពតំបន់ និងពង្រឹងតួនាទីរួមអាស៊ានក្នុងការថែរក្សាសន្តិភាពតំបន់។ឯកឧត្តមបានលើកឡើងដូច្នេះបន្ទាប់ពីបាន ទាក់ទងតាមទូរស័ព្ទជាមួយនាយករដ្ឋមន្ត្រីវៀតណាម ឯកឧត្តម ផាម មិញជីញ (Pham Minh Chinh) ដើម្បីពិភាក្សាអំពីការវិវឌ្ឍនានាក្នុងតំបន់ និងការខិតខំប្រឹងប្រែងរួមគ្នាដើម្បីធានាបាននូវសន្តិភាព និងស្ថិរភាពបន្ត។ក្នុងឱកាសនោះ ក្នុងនាមជាប្រធានអាស៊ាន ឯកឧត្តម អាន់វ៉ា អ៊ីប្រាហ៊ីម បានមានប្រសាសន៍ថា ម៉ាឡេស៊ី នឹងបើកកិច្ចប្រជុំពិសេសរដ្ឋមន្រ្តីការបរទេសអាស៊ាន នាពេលឆាប់ៗខាងមុខនេះ ដើម្បីវាយតម្លៃស្ថានភាពតំបន់ គាំទ្រការកាត់បន្ថយភាពតានតឹង និងការដាក់ចេញនូវវិធានការ និងពង្រឹងតួនាទីរួមរបស់អាស៊ានក្នុងការថែរក្សាសន្តិភាពតំបន់។ក្នុងនោះដែរ ឯកឧត្តម អាន់វ៉ា អ៊ីប្រាហ៊ីម ក៏បង្ហាញពីការប្តេជ្ញាចិត្តរបស់ម៉ាឡេស៊ីក្នុងការពង្រឹងកិច្ចសហប្រតិបត្តិការទ្វេភាគីជាមួយវៀតណាមក្នុងការដោះស្រាយបញ្ហាការចាប់ត្រីខុសច្បាប់ គ្មានការរាយការណ៍ និងគ្មានបទបញ្ញត្តិ (IUU) ។ឯកឧត្តមថ្លែងថា កិច្ចសហប្រតិបត្តិការនេះរួមមានការសម្របសម្រួលការអនុវត្ត ការចែករំលែកព័ត៌មាន និងវិធានការបង្ការ ហើយខ្ញុំមានទំនុកចិត្តថាតាមរយៈកិច្ចសន្ទនាកំពុងបន្ត និងយន្តការដែលមានស្រាប់ បញ្ហានេះអាចត្រូវបានដោះស្រាយដោយសម្ងាត់ ស្ងប់ស្ងាត់ និងការគោរពគ្នាទៅវិញទៅមក។

កម្ពុជាធ្វើសេចក្តីថ្លែងការណ៍អំពីការឈ្លានពានរបស់ថៃ ក្នុងកិច្ចប្រជុំ ក្នុងចំណោម ១៥០ប្រទេស

នៅថ្ងៃទី១២ ខែធ្នូ ឆ្នាំ២០២៥ ឯកឧត្តម ស៊ីយ៉ុន សុភារិទ្ធ អនុរដ្ឋលេខាធិការ នៃក្រសួងវប្បធម៌ និងវិចិត្រសិល្បៈ ដែលជាប្រធានគណៈប្រតិភូកម្ពុជា បានធ្វើសេចក្តីថ្លែងការណ៍អំពីការឈ្លានពានរបស់ថៃមកលើបូរណភាពទឹកដីកម្ពុជា ក្នុងសម័យប្រជុំលើកទី២០ នៃគណៈកម្មាការអន្តររដ្ឋាភិបាលដើម្បីការពារបេតិកភណ្ឌវប្បធម៌អរូបី របស់អង្គការយូណេស្កូ។កិច្ចប្រជុំនេះមានការចូលរួមពីរដ្ឋភាគីចំនួន ១៥0 ប្រទេស និងអ្នកចូលរួមចំនួន ១២៩០រូប។ សម័យប្រជុំនេះ ប្រព្រឹត្តទៅចាប់ពីថ្ងៃទី៨ ដល់ ១៣ ខែធ្នូ ឆ្នាំ២០២៥ នៅបន្ទាយក្រហម (Red Fort) ទីក្រុងញ៉ូដេលី សាធារណរដ្ឋឥណ្ឌា។

ផ្លូវជនបទនៅក្នុងស្រុកក្រូចឆ្មារ កំពុងផ្តល់អត្ថប្រយោជន៍ដល់កសិករដែលប្រកបរបរកសិកម្ម

ផ្លូវជនបទនៅក្នុងស្រុកក្រូចឆ្មារ ខេត្តត្បូងឃ្មុំ ស្ថិតក្រោមក្របខណ្ឌក្រសួងអភិវឌ្ឍន៍ជនបទ បាននិងកំពុងផ្តល់អត្ថប្រយោជន៍ដល់ កសិករក្នុងការធ្វើដំណើរ ការដឹកជញ្ជូនសម្ភារៈកសិកម្មទៅកាន់ស្រែ-ចម្ការ និងការដឹកជញ្ជូនកសិផលពីចម្ការមកលំនៅឋាន ឬទៅកាន់ ទីផ្សារ ខណៈដែលស្រុកមួយនេះគឺជាស្រុកអភិវឌ្ឍន៍លើវិស័យកសិកម្ម។ឯកឧត្តម ជី ស៊ីថា រដ្ឋលេខាធិការ ក្រសួងអភិវឌ្ឍន៍ជនបទ នៅថ្ងៃទី១២ ខែធ្នូ ឆ្នាំ២០២៥នេះ បានដឹកនាំគណៈកម្មការអន្តរ ក្រសួងរួមមាន ក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ ចុះត្រួតពិនិត្យ និងវាយតម្លៃបញ្ចប់សុពលភាព លើការងារ ស្ដារឡើងវិញផ្លូវក្រាលដីល្បាយក្រួសចំនួន ១ ខ្សែ មាន ២ កំណាត់ ប្រវែងសរុប ១០ គីឡូម៉ែត្រ ទទឹង ៥ ម៉ែត្រ និងផ្លាកឈ្មោះផ្លូវ ចំនួន ២ កន្លែង ស្ថិតនៅភូមិស្វាយដំណាក់ និងភូមិព្រែកតាហ៊ុប ឃុំជំនីក ស្រុកក្រូចឆ្មារ ខេត្តត្បូងឃ្មុំ គម្រោងអនុវត្តដោយនាយកដ្ឋាន ស្ថាបនា និងវិស្វកម្ម នៃអគ្គនាយកដ្ឋានភស្តុភារ និងហិរញ្ញវត្ថុ ក្រសួងមហាផ្ទៃ។ឯកឧត្តមរដ្ឋលេខាធិការ លើកឡើងថា ការអភិវឌ្ឍហេដ្ឋារចនាសម្ព័ន្ធផ្លូវនៅតាមជនបទ រាជរដ្ឋាភិបាលបាននិងកំពុងបន្តកែលម្អនូវលក្ខខណ្ឌផ្សេងៗ ដើម្បីលើកកម្ពស់ការអភិវឌ្ឍនៅតាមមូលដ្ឋាន ជាពិសេសការលើកកម្ពស់ជីវភាពរស់នៅរបស់ ប្រជាជន និងការផ្តល់សេវាសង្គមនានា ឆ្លើយតបទៅនឹងតម្រូវការចាំបាច់នៅតាមជនបទ។ ដោយឡែកបណ្តាញផ្លូវខាងលើ ពិតជាមានសារៈសំខាន់ណាស់ ក្នុងនោះក្រៅពីការធ្វើដំណើរ ផ្លូវទាំងនេះបានបម្រើដល់អន្តរកម្មសេដ្ឋកិច្ចនៅជនបទ ព្រោះស្រុកក្រូចឆ្មារ គឺជាតំបន់ផលិតកម្មលើវិស័យកសិកម្ម ដោយកសិកផលមួយចំនួនដែលចេញពីស្រុកនេះ បានផ្គត់ផ្គង់លើទីផ្សារក្នុងស្រុក ក៏ដូច ជាការនាំចេញផងដែរ, ជាក់ស្តែងផ្លូវខាងលើនេះបាននិងកំពុងផ្តល់អត្ថប្រយោជន៍ដល់កសិករក្នុងការធ្វើដំណើរ ការដឹកជញ្ជូនសម្ភារៈ កសិកម្មទៅកាន់ស្រែ-ចម្ការ និងការដឹកជញ្ជូនកសិផលពីចម្ការមកលំនៅឋាន និងទៅកាន់ទីផ្សារ។ឯកឧត្តមរដ្ឋលេខាធិការ ក៏បានកោតសរសើរដល់នាយកដ្ឋានស្ថាបនា និងវិស្វកម្ម នៃអគ្គនាយកដ្ឋានភស្តុភារនិងហិរញ្ញវត្ថុ ក្រសួងមហាផ្ទៃ ដែលបានខិតខំប្រឹងប្រែងលើការងារស្ថាបនាផ្លូវ១ ខ្សែនេះ និងថែទាំរហូតបញ្ចប់សុពលភាព ដោយរក្សានូវគុណភាពល្អប្រសើរ ពោលគឺបានអនុវត្តស្របតាមកម្មវិធីនយោបាយរបស់ រាជរដ្ឋាភិបាលនីតិកាលទី៧ នៃរដ្ឋសភា, ដែលកំពុងជំរុញការអភិវឌ្ឍប្រទេសជាតិឱ្យកាន់តែរីកចម្រើន ជាពិសេសការបន្តជំរុញការលើកកម្ពស់ជីវភាពប្រជាជននៅជនបទ តាមរយៈការស្តារ ការស្ថាបនា ហេដ្ឋារចនាសម្ព័ន្ធគមនាគមន៍ដឹកជញ្ជូននៅជនបទ និងការលើកកម្រិតផ្លូវជនបទ ពីផ្លូវក្រាលក្រួសក្រហម ទៅជាផ្លូវក្រាលកៅស៊ូ ឬផ្លូវបេតុង សំដៅធានាបានការប្រើប្រាស់យូរអង្វែង៕អត្ថបទ៖ សុន រ៉ាឌី

ផលប៉ះពាល់លើកម្ពុជា ពីអំពើឈ្លានពានរបស់ថៃ ចាប់ពីម៉ោង ៧ព្រឹក ដល់ ម៉ោង ១រសៀល ថ្ងៃនេះ

ក្រសួងមហាផ្ទៃ នៃរាជរដ្ឋាភិបាលកម្ពុជា បានចេញ សេចក្តីប្រកាសព័ត៍មាន ឱ្យដឹងថា គិតចាប់ពី ម៉ោង៧ព្រឹក រហូតដល់ ម៉ោង១ រសៀល ថ្ងៃទី១២ ខែធ្នូ ឆ្នាំ២០២៥ នេះ អំពើឈ្លានពានរំលោភច្បាប់អន្តរជាតិ និងក្បត់បទឈប់បាញ់មកលើដែន អធិបតេយ្យកម្ពុជារបស់ភាគីថៃ ដែលផ្តើមឡើងជាថ្មី កាលពីថ្ងៃទី៧ ខែធ្នូ បានបណ្តាលឱ្យប៉ះពាល់យ៉ាងធ្ងន់ធ្ងរ លើសុវត្ថិភាពប្រជាពលរដ្ឋ និងតំបន់ស៊ីវិលកម្ពុជា ដូចខាងក្រោម៖១- ករណីពលរដ្ឋស្លាប់ និងរបួស៖ ពុំមានករណីស្លាប់ និងរបួសថ្មីទេ។ ដូច្នេះ គិតមកដល់ពេលនេះ ករណីពលរដ្ឋស្លាប់មានចំនួន ១១នាក់ និងរបួសចំនួន ៥៩នាក់។២- ករណីពលរដ្ឋនៅជំរំសុវត្ថិភាព៖ ក្នុងខេត្តព្រះវិហារ ឧត្តរមានជ័យ បន្ទាយមានជ័យ បាត់ដំបង ពោធិ៍សាត់ និងខេត្តសៀមរាប មានជនភៀសសឹកសរុប ចំនួន ៨៩ ៦៨៧គ្រួសារ ស្មើនឹងមនុស្ស ចំនួន ៣០៣ ២១៣នាក់។ ករណីនេះ ពុំបានរាប់បញ្ចូលប្រជាពលរដ្ឋស្រុកមណ្ឌលសីមា ខេត្តកោះកុង ជាង២០០នាក់ ដែលបានភៀសខ្លួនចេញ ដោយភ័យខ្លាចការបង្ហោះដ្រូនរបស់ភាគីថៃ។៣- ករណ៍បំផ្លិចបំផ្លាញហេដ្ឋារចនាសម្ព័ន្ធរូបវន្តស៊ីវិល៖ តាមការវាយតម្លៃជាបឋម មានផ្ទះសំបែង និង សម្ភារប្រើប្រាស់របស់ប្រជាពលរដ្ឋ អគារក្រុមហ៊ុនឯកជន អគាររដ្ឋបាល សាលារៀន វត្តអារាម ប្រាសាទបុរាណ ផ្លូវថ្នល់ និងអង្គភាពសាធារណៈជាច្រើនកន្លែង បានកំពុងរងការខូចខាតជាបន្តបន្ទាប់ ខណៈសវាជាមូលដ្ឋាន ដូចជា សេវារដ្ឋបាល សុខាភិបាល និងអប់រំនៅតាមក្រុង ស្រុក ឃុំ-សង្កាត់ ត្រូវបានផ្អាកស្ទើរទាំងស្រុង ដោយសារតែភាគីថៃបង្កើនការវាយប្រហារដោយអាវុធគ្រប់ធុន និងគ្រប់ទម្រង់មកលើតំបន់ស៊ីវិល។ជាមួយគ្នានេះ ក្រសួងមហាផ្ទៃ នៃរាជរដ្ឋាភិបាលកម្ពុជា ប្រកាសគាំទ្រ និងជឿជាក់យ៉ាងមុតមាំលើយុទ្ធសាស្ត្រការពារ ជាតិរបស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាអគ្គភស្តុភារជាន់ខ្ពស់ នៃ កងកម្លាំងប្រដាប់អាវុធកម្ពុជា និង សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីដ៏អង់អាចស្វាហាប់ ដែលក្រោមការដឹកនាំបញ្ហាប្រកបដោយយុទ្ធសាស្ត្រ របស់ សម្ដេច ទាំងទ្វេ កម្លាំងកងយោធពលខេមរភូមិន្ទ និងនគរបាលការពារព្រំដែននៃក្រសួងមហាផ្ទៃ បានកំពុងប្រកៀកស្មារួមគ្នាការពារបូរណភាពទឹកដី និង អធិបតេយ្យភាពជាតិ ដោយម្ចាស់ការ អង់អាចក្លាហាន ឈរជើងយ៉ាងរឹងមាំ និងមានប្រៀបឈ្នះគ្រប់គោលដៅ នៃសមរភូមិប្រយុទ្ធ៕

អ្នកតំណាងរាស្ត្រខេត្តពោធិ៍សាត់ចុះសួរសុខទុក្ខវីរៈកងទ័ពជួរមុខដែលរងរបួសកំពុងសម្រាកព្យាបាលនៅមន្ទីរពេទ្យខេត្ត

ពោធិ៍សាត់៖ នារសៀលថ្ងៃទី១២ ខែធ្នូ ឆ្នាំ២០២៥ ឯកឧត្តម ស៊ុយ សែម សមាជិករដ្ឋសភានិងជាអ្នកតំណាងរាស្ត្រខេត្តពោធិ៍សាត់ បានអញ្ជើញជួបសួរសុខទុក្ខ បងប្អូនវីរៈកងទ័ពសមរភូមិជួរមុខឈរជើងនៅថ្មដា ស្រុកវាលវែង ព្រំដែនកម្ពុជា-ថៃ ដែលមានរបួស កំពុងសម្រាកព្យាលបាលនៅមន្ទីរពេទ្យបង្អែកខេត្តពោធិ៍សាត់ ក្នុងក្រុងពោធិ៍សាត់ ។ក្នុងឱកាសនោះ ឯកឧត្តម ស៊ុយ សែម បានសម្តែងក្តីសោកស្តាយចំពោះបងប្អូនវីរៈកងទ័ពដែលបានរងរបួស ហើយសូមកោតសរសើរនិងថ្លែងអំណរគុណយ៉ាងជ្រាលជ្រៅចំពោះបងប្អូនវីរៈកងទ័ពដែលមានលះបង់ពលីដើម្បីជាតិមាតុភូមិ និងប្រជាជន និងសូមជូនពរឲ្យបងប្អូនវីរៈកងទ័ពឆាប់បានជាសះស្បើយឡើងវិញ ។ ជាមួយគ្នានោះ ឯកឧត្តម ស៊ុយ សែម បានប្រគល់ជូនថវិកាមួយចំនួនលើទឹកចិត្តដល់បងប្អូនវីរៈកងទ័ពដែលកំពុងសម្រាកព្យាលផងដែរ ។ បើតាមតំណាងមន្ទីរពេទ្យបង្អែកខេត្តពោធិ៍សាត់បានបញ្ជាក់ឲ្យដឹងថា ត្រឹមថ្ងៃទី១២ ខែធ្នូ ឆ្នាំ២០២៥ មានបងប្អូនវីរៈកងទ័ពមកពីថ្មដា ស្រុកវាលវែង ចំនួន១១នាក់កំពុងសម្រាកព្យាលបាលនៅមន្ទីរពេទ្យខេត្ត និងចំនួន៥រូបបញ្ជូនបន្តទៅរាជធានីភ្នំពេញ ។បើតាមការសាកសួរ បងប្អូនវីរៈកងទ័ព ទោះជាពេលនេះពួកគាត់កំពុងសម្រាកព្យាលបាលរបួសក៏ពិតមែន តែបេះដូងរបស់ពួកគាត់គឺនៅសមរភូមិជួរមុខជានិច្ច ឲ្យតែបានជាសះស្បើយពេលណាពួកគាត់ប្តជ្ញានឹងត្រឡប់ទៅចូលរួមការពារទឹកដីជូនជាតិវិញភ្លាម ៗ ។

មន្ទីរកសិកម្ម ខេត្តឧត្តរមានជ័យ បន្តនាំយកស៊ុតទា សម្រាប់ចែកជូនជនភៀសសឹក ស្ថិតក្នុងស្រុកចុងកាល់

នៅថ្ងៃទី១២ ខែធ្នូ ឆ្នាំ២០២៥ ក្រុមការងាររបស់មន្ទីរកសិកម្ម រុក្ខាប្រមាញ់ និងនេសាទ ខេត្តឧត្តរមានជ័យ បានបន្តចុះប្រមូលស៊ុតទា ដែលបានចិញ្ចឹមនៅស្ថានីយ៍កសិកម្មកូនក្រៀលដើម្បីជូនដល់រដ្ឋបាលខេត្តឧត្តរមានជ័យសម្រាប់ចែកជូនដល់ជនភៀសសឹកស្ថិតនៅទីតាំងវត្តបាត់ថ្កៅ នូវស៊ុតទាចំនួន ១ ២០០គ្រាប់។សូមជម្រាបជូនថា គិតត្រឹមថ្ងៃទី១២ ខែធ្នូ ឆ្នាំ២០២៥ ក្រោមស្មារតី «ខ្មែរតែមួយ» ដែលជាអំណោយរបស់ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បាននាំយកស្បៀងបរិភោគមកផ្ដល់ជូនដល់រដ្ឋបាលខេត្តឧត្តរមានជ័យសម្រាប់ចែកជូនដល់ជនភៀសសឹកស្ថិតក្នុងខេត្តឧត្តរមានជ័យសរុបចំនួន២លើករួមមាន៖ ស៊ុតទាចំនួន ២ ២២០គ្រាប់៕

អាជីវករ៖ តម្លៃទំនិញសំខាន់ៗលើទីផ្សាររក្សានៅដដែល បើទោះបីកំពុងជួបបញ្ហាបិទព្រំដែនកម្ពុជា-ថៃ

ភ្នំពេញ ៖ ក្រុមអាជីវករផ្សារនៅរាជធានីភ្នំពេញ បាននិយាយឲ្យដឹងថា សព្វថ្ងៃនេះ មុខទំនិញសំខាន់ៗមួយចំនួនដែលពាក់ព័ន្ធទៅនឹងការហូបចុក និងប្រើប្រាស់ប្រចាំថ្ងៃ មិនមានការដំឡើងថ្លៃនោះទេ ជាពិសេសបន្ទាប់ពីថៃបិទព្រំដែន ខណៈការផ្គត់ផ្គង់ទំនិញនៅលើទីផ្សារក៏ពុំមានបញ្ហាដូចគ្នា។នៅក្នុងបទសម្ភាសន៍ជាមួយក្រុមអាជីវករផ្សារធំថ្មី កាលពីព្រឹកថ្ងៃទី១២ ខែធ្នូនេះ ពួកគាត់បានឱ្យព័ត៌មាន ប៊ីធីវី ដឹងថា ក្នុងនាមជាអាជីករផង និងក្នុងនាមជាស្រី្តមេផ្ទះផង ជាការកត់សម្គាល់តម្លៃទំនិញទូទៅលើទីផ្សារសព្វថ្ងៃនេះ មិនមានការប្រែប្រួលទេ ប៉ុន្តែបើនិយាយដល់បន្លែបង្ការ ត្រីសាច់ក្នុងស្រុក ពិតជាមានការឡើងចុះជាធម្មតាទៅតាមរដូវកាល ដោយសារអាស្រ័យតាមអាកាសធាតុ និងរដូវការប្រមូលផលជាដើម។ ពួកគាត់ បានឱ្យដឹងស្រដៀងគ្នាទៀតថា បើនិយាយចំពោះការលក់ដូរសព្វថ្ងៃនេះវិញ គឺមានសកម្មភាពជាធម្មតា ពេលខ្លះក៏ដាច់អស់ច្រើន និងពេលខ្លះទៀតលក់ដាច់មួយៗ ដោយសារបច្ចុប្បន្ននេះ អ្នកទិញមានភាពមមាញឹកច្រើនក្នុងការងារ និងមួយវិញទៀត ផ្សារក៏មានច្រើនជាមុន ទាំងផ្សារធម្មតា និងផ្សារទំនើបនានា។ជុំវិញតម្លៃទំនិញនេះដែរ ប្រជាពលរដ្ឋដែលអ្នកទិញ បាននិយាយឱ្យដឹងដែរថា ជាធម្មតានិងជារៀងរាល់ឆ្នាំ តម្លៃទំនិញតែងតែមានឡើងចុះ ទៅតាមស្ថានភាពជាក់ស្តែង ប៉ុន្តែការតម្លើងថ្លៃមុខទំនិញសំខាន់ៗមួយចំនួន គឺអាចទទួលយកបាន។ ជាមួយគ្នានេះ ក្រុមប្រជាពលរដ្ឋក៏បានអំពាវនាវ ទាំងអាជីវករ និងអ្នកទិញទាំងអស់ បន្តចូលរួមគាំទ្រប្រើប្រាស់ផលិតផលរបស់ខ្មែរ ដើម្បីស្ទួយសេដ្ឋកិច្ចជាតិកាន់តែរីកចម្រើនបន្ថែមទៀត។យោងតាមរបាយការណ៍ថ្លៃទំនិញសំខាន់ៗរបស់រដ្ឋាករស្វយ័តផ្សារធំថ្មី សម្រាប់ថ្ងៃទី១២ ខែធ្នូ ឆ្នាំ២០២៥នេះ បានបង្ហាញឱ្យដឹងថា បច្ចុប្បន្នមាន់ស្រែ ថ្លៃ ២៨ ០០០រៀល, សាច់ជ្រូក ២២ ០០០រៀល, សាច់គោ ៤២ ០០០រៀល, ស្ពៃតឿ ៧ ០០០រៀល , ស្ពៃបូកគោ ៥ ០០០រៀល, ផ្កាខាត់ណា ១០ ០០០រៀល, ដើមខាត់ណា ១២ ០០០រៀល, ខ្ទឹមបារំាង ៤ ០០០រៀល និងការ៉ុត ៥ ០០០រៀល ក្នុង១គីឡូ។ល៕អត្ថបទ៖ ឈិត បូរ៉ាវី

មកទល់ថ្ងៃនេះទង្វើឈ្លានពានរបស់យោធាថៃបណ្ដាលឱ្យជនស៊ីវិលកម្ពុជាស្លាប់១១នាក់ របួស៥៩ នាក់

មកទល់រសៀលថ្ងៃទី១២ ខែធ្នូ ឆ្នាំ២០២៥នេះ យោធាថៃ នៅបន្តសកម្មភាពឈ្លានពានមកលើជនស៊ីវិលកម្ពុជា បានឱ្យបាត់បង់ជីវិតកើនឡើងដល់១១នាក់ ក្នុងនោះមានកុមារមួយនាក់ផងដែរ។ ក្រៅពីនេះមានពលរដ្ឋស៊ីវិលរងរបួសចំនួន ៥៩ នាក់ផងដែរ។លោកជំទាវ ឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិកម្ពុជា បានថ្លែងឱ្យដឹងតាមរយៈ សន្និសីទសារព័ត៌មាន អំពី «ស្ថានការណ៍ព្រំដែនកម្ពុជា-ថៃ បន្ទាប់ពីកងទ័ពថៃបានបើកការវាយប្រហារមុនមកលើកងទ័ព និងជនស៊ីវិលកម្ពុជា» នៅរសៀលនេះថា ទាមទារឱ្យយោធាថៃបញ្ឈប់នូវរាល់ទង្វើឈ្លានពានរបស់ខ្លួន, បញ្ឈប់ការផ្សព្វផ្សាយព័ត៌មានបំភ្លៃ, បញ្ឈប់ការវាយប្រហារដោយមិនរើសអើង ជាពិសេសទៅលើប្រជាជនស៊ីវិល និងហេដ្ឋារចនា សម្ព័ន្ធស៊ីវិល, បញ្ឈប់ការវាយប្រហារបំផ្លិចបំផ្លាញទីតាំងប្រវត្តិសាស្ត្រដែលមិនត្រឹមតែជាសម្បត្តិវប្បធម៌ដ៏មានតម្លៃបំផុតសម្រាប់កម្ពុជាប៉ុណ្ណោះទេប៉ុន្តែសម្រាប់មនុស្សជាតិទាំងមូល, បញ្ឈប់ការផ្សព្វផ្សាយព័ត៌មានមិនពិតសប្រែទៅជាខ្មៅ។អ្នកនាំពាក្យក្រសួងការពារជាតិកម្ពុជាបញ្ជាក់ថា យោធាថៃត្រូវបង្ហាញពីភាពស្មោះត្រង់ និងសុច្ឆន្ទៈ ប្រសិនបើថៃពិតជាចង់បានសន្តិភាពពិតប្រាកដមែន ព្រោះសន្តិភាព មិនអាចកើតមានតែតាមរយៈការនិយាយប៉ុណ្ណោះទេ ប៉ុន្តែតាមរយៈសកម្មភាពជាក់ស្តែង ហើយកងទ័ពថៃអាចចាប់ផ្តើមជាមួយនឹងការបញ្ឈប់រាល់សកម្មភាពខុសច្បាប់របស់ខ្លួន។ សូមបញ្ជាក់ថា ផលប៉ះពាល់លើប្រជាពលរដ្ឋ និងតំបន់ស៊ីវិល ពីអំពើឈ្លានពានរបស់ភាគីថៃ លើដែនអធិបតេយ្យកម្ពុជាគិតត្រឹមរសៀលថ្ងៃទី១២ ខែធ្នូ ឆ្នាំ២០២៥នេះ មានពលរដ្ឋស្លាប់សរុបចំនួន១១នាក់ និងរងរបួសចំនួន៥៩នាក់ ភាគច្រើនកំពុងបន្តសង្គ្រោះបន្ទាន់ដោយក្រុមគ្រូពេទ្យ។

មកទល់រសៀលនេះយោធាថៃនៅបន្តឈ្លានពានមកលើដែនអធិបតេយ្យភាពរបស់កម្ពុជាមិនរើសទីតាំង

ភ្នំពេញ ៖ មកទល់រសៀលថ្ងៃទី១២ ខែធ្នូ ឆ្នាំ២០២៥នេះ យោធាថៃ នៅបន្តសកម្មភាពឈ្លានពានមកលើដែនអធិបតេយ្យភាពរបស់កម្ពុជា នៅក្នុងយោធភូមិភាគទី៤ និងយោធភូមិភាគទី៥ ក្នុងនោះយោធាថៃបានបាញ់ស្រោចមកលើភូមិសាស្រ្ដជាច្រើននៅភូមិជោគជ័យ និងភូមិព្រៃចាន់។ លោកជំទាវ ឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិកម្ពុជា បានថ្លែងឱ្យដឹងតាមរយៈ សន្និសីទសារព័ត៌មាន អំពី «ស្ថានការណ៍ព្រំដែនកម្ពុជា-ថៃ បន្ទាប់ពីកងទ័ពថៃបានបើកការវាយប្រហារមុនមកលើកងទ័ព និងជនស៊ីវិលកម្ពុជា» នៅរសៀលនេះថា ការបាញ់ប្រហាររបស់យោធាថៃមកលើកម្ពុជា ចាប់តាំងពីថ្ងៃទី៧ ដល់រសៀលថ្ងៃទី១២ខែធ្នូនេះ យោធាថៃបន្តបាញ់ប្លោងយ៉ាងសន្ធឹក ជាមួយនឹងការបាញ់ផ្សែងពុល និងប្រើដ្រូនស៊ើបការណ៍នៅលើតំបន់ភូមិព្រៃចាន់ ខណៈកម្លាំងថ្មើរជើងរបស់ថៃ អមដោយរថក្រោះរុលចូលតំបន់បឹងត្រកួន។អ្នកនាំពាក្យក្រសួងការពារជាតិកម្ពុជា បានបញ្ជាក់ថា សកម្មភាពរបស់យោធាថៃនេះ បានរំលោភបំពានលើបទឈប់បាញ់ និង «សេចក្តីថ្លែងការណ៍រួមស្តីពីកិច្ចព្រមព្រៀង សន្តិភាព រវាងកម្ពុជានិងថៃ» ដែលភាគីកម្ពុជានិងភាគីថៃបានចុះហត្ថលេខា កាលពីថ្ងៃទី២៦ ខែតុលា ឆ្នាំ២០២៥ ដោយបន្តធ្វើសកម្មភាពឈ្លានពានប្រដាប់អាវុធសាជាថ្មីមកលើបូរណភាពទឹកដីរបស់កម្ពុជា ដោយការប្រើ ប្រាស់កម្លាំងយោធា។ គួរឱ្យកត់សម្គាល់ផងដែរថា សកម្មភាពដ៏កំរោលរបស់យោធាថៃនេះ ជាការបើកការបាញ់ប្រហារដោយមិនរើសគោលដៅ បាញ់ចូលទីប្រជុំជនភូមិដ្ឋានរបស់ប្រជាពលរដ្ឋស៊ីវិលរស់នៅ ពិសេសជាសាលារៀនរបស់កុមារ និងបានបាញ់បំផ្លាញប្រាសាទតាក្របី, ប្រាសាទព្រះវិហារជាទី សក្ការៈ របស់កម្ពុជា និងបេតិកភណ្ឌរបស់មនុស្សជាតិ។ ទង្វើដ៏សាហាវនេះបង្ហាញពីភាពអសីលធម៌ដែល បង្ហាញពីការប្រមាថមាក់ងាយដល់វប្បធម៌ អរិយធម៌ និងទីសក្ការៈដែលជាមរតក មនុស្សជាតិជា ពិសេស មរតកវប្បធម៌ដែលដូនតាខ្មែរបានកសាងបន្សល់ទុកមានតម្លៃមិនអាចកាត់ថ្លៃបាន៕

បណ្ដាញសង្គម

ព័ត៌មានថ្មីៗ

ប្រព័ន្ធផ្សព្វផ្សាយ៖ កូរ៉េខាងជើងថ្កោលទោសការអនុម័តលក់មីស៊ីលរបស់អាមេរិកទៅឲ្យកូរ៉េខាងត្បូង

នាយករដ្ឋមន្ត្រីអ៊ីស្រាអែល អះអាងថានឹងមិនអនុញ្ញាតឱ្យអ៊ីរ៉ង់ មានអាវុធនុយក្លេអ៊ែរឡើយ

សហភាពអឺរ៉ុប ព្រមព្រៀងចាប់ផ្តើមដំណើរការចូលជាសមាជិកសម្រាប់អ៊ុយក្រែន និងម៉ុលដាវី

BBC៖ រុស្ស៊ី បានបាត់បង់កងទ័ពជាង ២២០.០០០នាក់ក្នុងអំឡុងពេលវាយលុកនៅអ៊ុយក្រែន

TOP STORY | សម្ដេចតេជោ ហ៊ុន សែន៖ «ពេលណាព្រំដែនគោកកម្ពុជា-ថៃនៅតែបន្តបិទ គ្រប់មុខទំនិញទាំងអស់ដែលនាំចូលឆ្លងកាត់ព្រំដែនគោកគឺទំនិញខុសច្បាប់ ជាទំនិញរត់ពន្ធ ជាទំនិញបំផ្លាញជាតិ និងប្រមាថជាតិ

អារ៉ាប់រួម នឹងបញ្ចេញមូលនិធិអ៊ីរ៉ង់ដែលត្រូវបានបង្កក ក្នុងពេលមានការជំរុញបទឈប់បាញ់របស់អាមេរិក

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877