BTV NEWS

ព្រះអង្គម្ចាស់ នរោត្តម ចក្រាវុធ ជួបពិភាក្សាការងារជាមួយ ឯកឧត្តម Chen Zhou អនុរដ្ឋមន្រ្តី ក្រសួងទំនាក់ទំនងអន្តរជាតិចិន

សេដ្ឋកិច្ចកម្ពុជានៅបន្តរឹងមាំ៖ ២២ខែនៃរាជរដ្ឋាភិបាលអាណតិ្តទី៧របស់សម្តេចធិបតី រោងចក្រសហគ្រាសកើនជាង៥,៣ពាន់ដែលបង្ហាញពីភាពរឹងមាំ និងជំនឿទុកចិត្ត

លោកសាស្រ្តាចារ្យរង លូ លីឃាង អញ្ជើញសម្ពោធបើកជាផ្លូវការគ្លីនិកជំងឺភ្នែកស្ងួត នៃមនី្ទរពេទ្យព្រះអង្គឌួង

ក្រសួងធម្មការ បើកវគ្គបណ្ដុះបណ្ដាលស្ដីពីតួនាទី ភារកិច្ចនិងក្រមសីលធម៌អាចារ្យខ្មែរ (ជំនាន់ទី៥០)

ព័ត៌មានជាតិ

អតីតមន្ត្រីបក្សប្រឆាំងទូទាំងប្រទេស អបអរសាទរ«ទិវាសន្តិភាពនៅកម្ពុជា» ខណៈពួកគេស្អប់ខ្ពើមសង្រ្គាម

ភ្នំពេញ ÷ អតីតមន្ត្រីបក្សប្រឆាំងទូទាំងប្រទេសដែលបានចូលរួមជីវភាពនយោបាយជាមួយគណបក្សប្រជាជនកម្ពុជា បាននាំគ្នាចេញមកអបអរសាទរ«ទិវាសន្តិភាពនៅកម្ពុជា» ដោយប្រកាសចងចាំជានិច្ច មិនអាចបំភ្លេចនូវគុណូបការៈនិងគោលនយោបាយឈ្នះ-ឈ្នះរបស់សម្តេចតេជោ ហ៊ុន សែន បិតាស្ថាបនិកសន្តិភាពនៅកម្ពុជា។អតីតមន្ត្រីបក្សប្រឆាំងស្រុកសាលាក្រៅ ខេត្តប៉ៃលិនបានចេញវីឌីអូអបអរសាទរទិវាសន្តិភាពនៅកម្ពុជា ដោយលើកឡើងថា៖«យើងខ្ញុំទាំងអស់គ្នាចងចាំជានិច្ចចំពោះគុណបំណាច់របស់សម្ដេចតេជោ ហ៊ុន សែន ដែលជាស្ថាបនិកសន្ដិភាពនៅកម្ពុជា។ យើងខ្ញុំប្ដេជ្ញាគាំទ្រនូវគោលនយោបាយរាជរដ្ឋាភិបាលដែលដឹកនាំដោយសម្ដេចបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជាបច្ចុប្បន្ន»។ពួកគាត់បានប្តេជ្ញាគាំទ្រនូវរាជរដ្ឋាភិបាលអាណត្តិទី៧ នៃរដ្ឋសភា ដែលកើតចេញពីការបោះឆ្នោតដឹកនាំដោយសម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក្នុងការដឹកនាំជាតិកម្ពុជាតាមបែបប្រជាធិបតេយ្យ សេរីពហុបក្ស ដើម្បីគាំទ្រការពារនូវសុខសន្តិភាព និងការរីកចម្រើននៃសង្គមជាតិ សេចក្តីសុខសាន្ត និងសុភមង្គលរបស់ប្រជាពលរដ្ឋ។អតីតមន្ត្រីបក្សប្រឆាំងស្រុកកែវសីមា ខេត្តមណ្ឌលគិរីបានលើកឡើងថា៖«យើងខ្ញុំសូមប្រកាសគាំទ្រដល់រាជរដ្ឋាភិបាលនូវអាណត្តិទី៧ ដែលដឹកនាំដោយសម្ដេចបវរធិបតី ហ៊ុន ម៉ាណែត ដែលកើតចេញពីការបោះឆ្នោតគាំទ្រដោយឆន្ទៈប្រជាពលរដ្ឋទូទាំងប្រទេស ដើម្បីដឹកនាំតាមបែបប្រជាធិបតេយ្យ សេរីពហុបក្ស ជាពិសេសការពារសុខសន្ដិភាព និងស្ថិរភាពនយោបាយនៅកម្ពុជា»។អតីតថ្នាក់ដឹកនាំ និងសមាជិកបក្សប្រឆាំងនៅកម្ពុជា បានប្រកាសថ្កោលទោសជាដាច់ខាតចំពោះក្រុមអ្នកនយោបាយជ្រុលនិយម ជាពិសេសទណ្ឌិត សម រង្ស៊ី ដែលជាជនក្បត់ជាតិតជំនាន់ ដែលបានប្រកាសចេញនូវយុទ្ធនាការផ្ការីកតាមបែបបដិវត្តន៍ពណ៌ ដើម្បីបំផ្លាញសុខសន្តិភាព ស្ថេរភាពនយោបាយ និងឈានទៅដល់ការបង្ករចលាចលនៅក្នុងសង្គមជាតិ។ចំណែកអតីតមន្ត្រីបក្សប្រឆាំងស្រុកជាំក្សាន្ត ខេត្តព្រះវិហារបានលើកឡើងផងដែរថា៖«យើងខ្ញុំទាំងអស់គ្នាសូមប្រកាសមិនគាំទ្រជាដាច់ខាតចំពោះក្រុមអ្នកនយោបាយជ្រុលនិយមជាពិសេសទណ្ឌិត សម រង្ស៊ី ជនក្បត់ជាតិបីជំនាន់ដែលបានដាក់ចេញនៅនយោបាយផ្ការីកបដិវត្តន៍ពណ៌ ដើម្បីបំផ្លាញនូវសុខសន្តិភាព សេរីភាពនយោបាយ និងបំផ្លាញប្រជាធិបតេយ្យ បង្កចលាចលនៅក្នុងសង្គមជាតិកម្ពុជា»។ពួកគាត់បានប្តេជ្ញារួមសាមគ្គីគ្នាទប់ស្កាត់នូវនយោបាយជ្រុលនិយម តាមបែបបដិវត្តន៍ពណ៌របស់ជនក្បត់ជាតិបីជំនាន់ សម រង្ស៊ី ដើម្បីការពារនូវសុខសន្តិភាពជាមួយរាជរដ្ឋាភិបាល ដែលមានសម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាជាប្រមុខដឹកនាំប្រទេសជាតិ។លើសពីនេះ អតីតមន្ត្រីបក្សប្រឆាំងស្រុករតនមណ្ឌល ខេត្តបាត់ដំបងបានថ្លែងថា៖«យើងខ្ញុំទាំងអស់គ្នាសូមប្ដេជ្ញារួមសាមគ្គីគ្នា ទប់ស្កាត់នូវនយោបាយជ្រុលនិយមតាមបែបបដិវត្តន៍របស់ជនក្បត់ជាតិបីជំនាន់ សម រង្ស៊ី ដើម្បីការពារនូវសុខសន្តិភាពជាមួយរាជរដ្ឋាភិបាលដែលមានសម្ដេចបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាប្រមុខដឹកនាំប្រទេស»។ពួកគាត់បានចងចាំជាប់ជានិច្ចនូវគំរូវីរភាពដ៏អង់អាចក្លាហាន និងការធ្វើពលិកម្មគ្រប់បែបយ៉ាងរបស់វីរបុរសនិងវីរនារីស្នេហាជាតិរបស់កម្ពុជាដែលបានប្រយុទ្ធ និងតស៊ូយ៉ាងស្វិតស្វាញនៅគ្រប់សមរភូមិទាំងសមរភូមិសង្គ្រាមទាំងសមរភូមិការទូត ទាំងសមរភូមិនយោបាយរហូតសម្រេចបាននូវការបញ្ចប់ជាស្ថាពរនូវសង្គ្រាមនៅកម្ពុជា។អតីតថ្នាក់ដឹកនាំ និងសមាជិកបក្សប្រឆាំងនៅកម្ពុជា បានធ្វើការដាស់តឿនក្រើនរំលឹកដល់ប្រជាជនកម្ពុជាគ្រប់ជំនាន់ ទាំងបច្ចុប្បន្ន និងអនាគតឱ្យចងចាំពីមហាវិនាសកម្មរបស់ជាតិ និងទុក្ខលំបាកវេទនារបស់ប្រជាជនកម្ពុជា ព្រមទាំងផលវិបាកនានាដែលបង្កឡើងដោយសង្គ្រាម និងការបែកបាក់ជាតិ ព្រមទាំងបំផុសស្មារតីដល់ប្រជាជនកម្ពុជាគ្រប់ជំនាន់ឱ្យស្អប់ខ្ពើមនូវសង្គ្រាម៕

សម្ដេចធិបតី នាយករដ្ឋមន្រ្ដី៖យុវជនខ្មែរសម័យនេះមានសំណាង ខណៈយុវជននៅបណ្ដាប្រទេសមួយចំនួននៅលើពិភពលោកកំពុងរងគ្រោះដោយសារសង្គ្រាម

ភ្នំពេញ៖សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃព្រះរាជាណាចក្រកម្ពុជា មានប្រសាសន៍បញ្ជាក់ថា យុវជនខ្មែរសម័យនេះមានសំណាង និងកំពុងសប្បាយរីករាយជាមួយសន្ដិភាពរបស់កម្ពុជា ខណៈដែលយុវជននៅបណ្ដាប្រទេសមួយចំនួននៅលើពិភពលោក កំពុងរងគ្រោះ ត្រូវស្លាប់ និងភ័យខ្លាចដោយសារសង្គ្រាម និងគ្រាប់ប្លោង។ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃព្រះរាជាណាចក្រកម្ពុជា មានប្រសាសន៍បែបនេះ ក្នុងឱកាសអញ្ជើញជាអធិបតីដ៏ខ្ពង់ខ្ពស់ ពិធីបើកព្រឹត្តិការណ៍បាល់ទាត់មិត្តភាព អបអរសាទរ «ទិវាសន្តិភាពនៅកម្ពុជា» នៅរសៀលថ្ងៃទី២៩ ខែធ្នូ ឆ្នាំ ២០២៤ នៅពហុកីឡដ្ឋានជាតិ មរតកតេជោ។សម្ដេចធិបតីថ្លែងថា៖«ថ្ងៃទី២៩ ខែធ្នូ ឆ្នាំ២០២៤នេះ គឺជាលើកដំបូងដែលកម្ពុជាបានជួបជុំគ្នាដើម្បីអបអរសាទរ «ទិវាសន្ដិភាពនៅកម្ពុជា» តាមរយៈការរៀបចំព្រឹត្តិការណ៍បាល់ទាត់មិត្តភាព»។ សម្ដេចធិបតីមានប្រសាសន៍ថា ជោគជ័យរបស់កម្ពុជា ដែលបានធ្វើនាពេលកន្លងមកតាមរយៈការរៀបចំព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេម រួមជាមួយនឹងកិច្ចប្រជុំថ្នាក់ជាតិ និងអន្តរជាតិជាច្រើនទៀត គឺអាចធ្វើទៅបានដោយសារតែកម្ពុជាមានសុខសន្ដិភាព និងស្ថិរភាពនៅក្នុងសង្គមជាតិ។ សម្ដេចធិបតីនាយករដ្ឋមន្រ្ដីថ្លែងថា៖«យុវជនកម្ពុជា មានសំណាង និងកំពុងសប្បាយរីករាយជាមួយសន្ដិភាពរបស់កម្ពុជា ខណៈដែលយុវជននៅបណ្ដាប្រទេសមួយចំនួននៅលើពិភពលោក កំពុងរងគ្រោះដោយសារសង្គ្រាម ដោយសារគ្រាប់ប្លោង»។ ក្នុងឱកាសនោះសម្ដេចធិបតី នាយករដ្ឋមន្រ្ដី អំពាវនាវដល់យុវជនយើង សូមរួមគ្នាថែរក្សាសន្ដិភាព របស់កម្ពុជា ដើម្បីរក្សាសំណាង គឺសន្ដិភាពនេះ ដល់កូនចៅខ្មែរយើងជំនាន់ក្រោយ៕

អបអរសាទរខួប២៦ឆ្នាំ នៃនយោបាយឈ្នះ-ឈ្នះ របស់សម្ដេចតេជោ ហ៊ុន សែន និងអបអរសាទរទិវាសន្តិភាពនៅកម្ពុជា ឆ្នាំ២០២៤ និងខួប៦ឆ្នាំនៃការបង្កើតវិមានឈ្នះឈ្នះ

ភ្នំពេញ ៖ នៅថ្ងៃទី២៩ ខែធ្នូ ឆ្នាំ២០២៤នេះ គឺជាខួប ២៦ឆ្នាំហើយ សម្រាប់ការអនុវត្តប្រកបដោយភាពជោគជ័យនូវនយោបាយឈ្នះ-ឈ្នះ ដែលដាក់ចេញដោយសម្តេចតេជោ ហ៊ុន សែន ក្នុងការបញ្ចប់សង្គ្រាមស៊ីវិលនៅក្នុងប្រទេសកម្ពុជា នាំមកនូវសុខសន្តិភាព និងការអភិវឌ្ឍន៍ពេញផ្ទៃប្រទេស និងអបអរសាទរ «ទិវាសន្តិភាពនៅកម្ពុជា» ដែលរាជរដ្ឋាភិបាលបានកំណត់យកថ្ងៃទី២៩ ខែធ្នូ ជារៀងរាល់ឆ្នាំ ជាថ្ងៃបុណ្យជាតិផ្លូវការមួយនៅព្រះរាជាណាចក្រកម្ពុជា ដើម្បីជាការឆ្លើយតបទៅនឹងបំណងប្រាថ្នាដ៏ពិសិដ្ឋរបស់ប្រជាជនកម្ពុជា គឺការស្រឡាញ់សន្តិភាព ហើយស្អប់ខ្ពើមសង្គ្រាម។ មាននយោបាយឈ្នះឈ្នះ មានសុខសន្តិភាព និងមានការអភិវឌ្ឍរីកចម្រើន អរគុណសន្តិភាព៕

យុវជនស្ម័គ្រចិត្ត៖ ព្រឹតិ្តការណ៍សាទរកម្ពុជា បានបង្ហាញអំពីភាពរុងរឿងរបស់ព្រះរាជាណាចក្រកម្ពុជា លេចធ្លោលើឆាកអន្តរជាតិ

ភ្នំពេញ ៖ យុវជនស្ម័គ្រចិត្ត មកពីវិទ្យាស្ថានបច្ចេកវិទ្យាកម្ពុជា និងក្រុមយុវជនស្ម័គ្រចិត្ត ផ្នែកតុបតែងលម្អ ក្នុងព្រឹតិ្តការណ៍សាទរកម្ពុជា បានថ្លែងប្រាប់BTV ព័ត៌មាន នាល្ងាចថ្ងៃទី២៨ ខែធ្នូ ឆ្នាំ២០២៤ រួមគ្នាថា ព្រឹតិ្តការណ៍សាទរកម្ពុជា បានបង្ហាញអំពីភាពរុងរឿងរបស់ព្រះរាជាណាចក្រកម្ពុជា លេចធ្លោលើឆាកអន្តរជាតិ និងស្មើមុខស្មើមាត់និងបណ្តាប្រទេសផ្សេងៗផងដែរ។យុវជនស្ម័គ្រចិត្តរូបនោះបន្តថា ថ្ងៃនេះពិតជាមានអារម្មណ៍សប្បាយរីករាយខ្លាំងមែនទែន ដែលបានឃើញបងប្អូនប្រជាពលរដ្ឋក្មេង ចាស់ ប្រុស ស្រី មកចូលទស្សនាការរៀបចំព្រឹតិ្តការណ៍សាទរកម្ពុជា នៅបរិវេណសួនច្បារខាងមុខព្រះបរមរាជវាំង និងភ្ញៀវបរទេស បានមកចូលរួមជាច្រើន បានទស្សនា និងថតរូបភាពជាអនុស្សាវរីយ៍ពីទិដ្ឋភាពដ៏ស្រស់ស្អាត និងបានចូលរួមផ្សព្វផ្សាយពីទេសចរណ៍របស់ព្រះរាជាណាចក្រកម្ពុជា កាន់តែល្បីល្បាយ ទៅកាន់ពិភពលោក។ ជាពិសេសព្រឹតិ្តការណ៍សាទរកម្ពុជា បានបង្ហាញអំពីភាពរុងរឿងរបស់ព្រះរាជាណាចក្រកម្ពុជា លេចធ្លោលើឆាកអន្តរជាតិ និងស្មើមុខស្មើមាត់និងបណ្តាប្រទេសផ្សេងៗផងដែរ។ យើងទាំងអស់គ្នាបានដឹងហើយថា ប្រទេសកម្ពុជា ធ្លាប់ជាប្រទេសដែលទន់ខ្សោយ និងឆ្លងកាត់សង្រ្គាមជាច្រើន។ ដោយឡែកក្នុងឆ្នាំ២០២៤នេះ សហភាពសហព័ន្ធយុវជនកម្ពុជា ដែលដឹកនាំដោយឯកឧត្តម ហ៊ុន ម៉ាន បានរៀបចំឡើងយ៉ាងអធឹកអធម មានភាពអស្ចារ្យខ្លាំងមែនទែនចំពោះប្រជាជនកម្ពុជា។ ក្នុងការសាទរដល់សមិទ្ធផលផ្សេងៗរបស់ថ្នាក់ដឹកនាំ ក៏ដូចជាសមិទ្ធផលដែលពួកគាត់ខិតខំកសាងឡើងចាប់តាំងពី១៩៩០ជាងមកម្លេះ។ ទាំងអស់នេះ គឺជាស្នាដៃមួយដ៏ធំធេង ដែលលេចឡើងក្នុងឆ្នាំ២០២៤យើងនេះ។ ជាចុងក្រោយក្នុងនាមជាយុវជន ក៏ដូចជាទំពាំងស្នងឬស្សីរបស់កម្ពុជា សំណូមពរដល់យុវជនដទៃទៀត ក៏ដូចជាសិស្សានុសិស្ស និសិ្សត និងបងប្អូនប្រជាពលរដ្ឋ សូមមានមោទនភាពចំពោះខ្លួនឯង ដែលបានទទួលនូវសន្តិភាព រួចចាក់ផុតពីសង្រ្គាម ហើយមានមុខ មានមាត់នៅលើឆាកអន្តរជាតិ ហើយមានមោទនភាពចេញពីចិត្តតែម្តងបានកើតជាកូនខ្មែរ និងសង្ឃឹមថា បងប្អូនប្រជាពលរដ្ឋទាំងអស់ នាំគ្នាស្រលាញ់សន្តិភាព ការពារសន្តិភាព កុំឲ្យបាត់បង់។សូមបញ្ជាក់ផងដែរថា ព្រឹត្តិការណ៍សាទរកម្ពុជា នឹងធ្វើឡើងនៅថ្ងៃទី៣១ ខែធ្នូ ឆ្នាំ២០២៤ នៅបរិវេណសួនច្បារខាងមុខព្រះបរមរាជវាំង។ ព្រឹត្តិការណ៍ដ៏ធំនាចុងឆ្នាំនេះ នឹងមានកម្មវិធីកម្សាន្តបុរាណ-សម័យចម្រុះជាច្រើន ហើយនឹងមានការដង្ហែក្បួនដ៏ធំ មានមនុស្សចូលរួមប្រមាណ៣០០០នាក់។ «សាទរកម្ពុជា» ត្រូវបានផ្តួចផ្តើមឡើងក្នុងគោលបំណង ផ្សារភ្ជាប់ប្រជាជនទៅសង្គមជាតិទាំងមូល ដែលក្នុងនោះតាមរយៈការរៀបចំព្រឹត្តិការណ៍ និងកម្មវិធីនានា «សាទរកម្ពុជា» នឹងបង្ហាញក្នុងនាមជាប្រជាជាតិមានអាយុកាលដ៏យូរលង់ នៅថ្ងៃនេះកម្ពុជាកំពុងឈរដោយមោទនភាព ពោរពេញដោយក្តីសង្ឃឹម និងមានភាពជឿជាក់ រួមគ្នាឆ្ពោះទៅកាន់អនាគតដ៏រុងរឿងរបស់ជាតិយើង។ ផ្តល់ជាវេទិកា និងឱកាសដល់គ្រប់កោសិកា គ្រប់ស្រទាប់វណ្ណៈ គ្រប់សហគមន៍ និងមជ្ឈដ្ឋានផ្សេងៗ នៃសង្គម បង្ហាញនូវមោទនភាពចំពោះអត្តសញ្ញាណរបស់ខ្លួន និងជាពិសេសចំពោះអត្តសញ្ញាណជាតិជារួម ដែលជាអ្វីធ្វើឱ្យខ្លួនយើងមានមោទនភាពក្នុងនាមជាខ្មែរក្រោម «ទង់នៃព្រះរាជាណាចក្រកម្ពុជា» ដោយការរួបរួម សាមគ្គី ឯកភាព ជាកម្លាំងជាតិតែមួយ។ បង្កើនមនោសញ្ចេតនារវាងប្រជាជន និងនៃប្រជាជាតិកម្ពុជា ទោះនៅក្នុងប្រទេស ឬនៅឯនាយសមុទ្រ ក្នុងការអបអរសាទរក្នុងនាមជាមហាគ្រួសារខ្មែរតែមួយ អនាគតតែមួយដើម្បីកម្ពុជា នៅក្រោមទង់ជាតិតែមួយហើយដែលមានអនាគតតែមួយដើម្បីកម្ពុជា៕ អត្ថបទ រដ្ឋា

សន្តិសុខសុវត្ថិភាពក្នុងព្រឹត្តិការណ៍ធំៗចុងឆ្នាំនេះ ត្រូវធានាបានយ៉ាងតឹងរឹងពីនគរបាលរាជធានី និងកម្លាំងពាក់ព័ន្ធ

ភ្នំពេញ ៖ កិច្ចការងារសន្តិសុខសុវត្ថិភាព ក្នុងព្រឹត្តិការណ៍ធំៗនាចុងឆ្នាំ២០២៤នេះ ត្រូវធានាបានយ៉ាងតឹងរឹង និងល្អប្រសើរ ពីសំណាក់កម្លាំងនគរបាលទូទាំងរាជធានីភ្នំពេញ និងកងកម្លាំងពាក់ព័ន្ធជាច្រើនទៀត ។ ឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានប្រាប់ឱ្យដឹងថា ៖ ថ្ងៃនេះ គឺជា « ទិវាសន្តិភាពកម្ពុជា » ដែលជាថ្ងៃដ៏សម្ខាន់រំលឹកដល់ការមានសន្តិភាពបរិបូរណ៍យ៉ាងពេញលេញ ក្នុងរយះពេល២៦ឆ្នាំរបស់កម្ពុជា ពោលគឺ ពីឆ្នាំ១៩៩៨ ដល់ឆ្នាំ២០២៤នេះ ។ ទន្ទឹមនឹង ទិវាដ៏សម្ខាន់មួយនេះ ថ្ងៃនេះ ក៏មានព្រឹត្តិការណ៍បាល់ទាត់មិត្តភាពកម្ពុជា ដើម្បីអបអរសាទរសន្តិភាពកម្ពុជា ផងដែរ ដែលព្រឹត្តិការណ៍កីឡាមួយនេះ នឹងមានមហាជនជាជាច្រើនចូលរួមទស្សនា ពិសេសវត្តមានកំពូល និងខ្ពង់ខ្ពស់របស់សម្តេចតេជោ ហ៊ុនសែន ប្រធានព្រឹទ្ធសភាពជាតិ និងថ្នាក់ដឹកនាំ នៃរាជរដ្ឋាភិបាលជាច្រើនទៀតផងដែរ ទើបកម្លាំងសមត្ថកិច្ច មានកាតព្វកិច្ចត្រូវតែធានាឱ្យបាន១០០ភាគរយ លោកកិច្ចការងារសន្តិសុខសុវត្ថិភាព ។ សូមបញ្ជាក់ថា ៖ ការប្រកួតបាល់ទាត់មិត្តភាព អបអរសាទរ « ទិវាសន្តិភាពកម្ពុជា » នៅថ្ងៃទី២៩ ខែធ្នូ ឆ្នាំ២០២៤នេះ គឺជាគំនិតផ្តួចផ្តើមដ៏ខ្ពង់ខ្ពស់បំផុតរបស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា ដែលសម្តេចជាប្រធានគ្រូបង្វឹកកិត្តិយសក្រុមតារាបាល់ទាត់កម្ពុជា ( Cambodia Football Super Stars ) ។ ការបង្កើតព្រឹត្តិការណ៍នេះឡើងមក គឺដោយសម្តេចតេជោ ចង់ឃើញបរិយាកាសសប្បាយរីករាយ ក្រោមម្លប់ នៃសន្តិភាព នៅក្នុងថ្ងៃអនុស្សាវរីយ៍ នៃការបញ្ចប់សង្រ្គាមផ្ទៃក្នុងដែលបានហែកហួរប្រទេសជាតិដ៏កំសត់ អស់ជាង៣ទសវត្សរ៍កន្លងមក ៕ អត្ថបទ ៖ លីហេង

អគារអនុសាខាកាកបាទក្រហមកម្ពុជា ស្រុកសាលាក្រៅអំណោយសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ត្រូវបានសម្ពោធដាក់ឲ្យប្រើប្រាស់ជាផ្លូវការ ដើម្បីបម្រើវិស័យមនុស្សធម៍

ប៉ៃលិន៖ លោកជំទាវ ពៅ សុខ អនុប្រធានអចិន្ត្រៃយ៍គណៈកម្មាធិការសាខាកាតបាទក្រហមកម្ពុជាខេត្ត តំណាងលោកជំទាវបណ្ឌិត បាន ស្រីមុំ ប្រធានគណៈកម្មាធិការសាខាកាកបាទក្រហមកម្ពុជាខេត្តប៉ៃលិន បានអញ្ជើញជាគណៈអធិបតី ក្នុងពិធីខួប នៃការសាងសង់អាគារ អនុសាខាកាកបាទក្រហមស្រុក រយៈពេល១១ឆ្នាំ និងសម្ពោធដាក់ឲ្យប្រើប្រាស់ ជាផ្លូវការអាគារអនុសាខា។ ពិធីនេះ ក៍មានការនិមន្ត និងអញ្ជើញចូលរួមពីព្រះគ្រូ វ៉ែន ច័ន្ទសាម៉ៃ ព្រះអនុគណស្រុកសាលាក្រៅ ,ព្រះសង្ឃទាំងពីរគណៈ, លោកឧកញ្ញាប្រធានកិត្តិយសសាខាកាកបាទក្រហមកម្ពុជា ខេត្ត ,ប្រធានកិត្តិយសអនុសាខាកាកបាទក្រហមកម្ពុជាស្រុក លោកឧកញ៉ា លោក-លោកស្រី សមាជិកសភាពាណិជ្ជកម្មខេត្ត, លោក- លោកស្រី ជាសមាជិក សមាជិកា គណៈកម្មាធិការសាខា អនុសាខាក្រុង-ស្រុក និងលោក-លោកស្រីប្រធាន អនុប្រធានមន្ទីរ/អង្គភាពជុំវិញខេត្តជាច្រើនរូប។លោក ឡោ ស៊ុនជាង ប្រធានអនុសាខាកាកបាទក្រហមកម្ពុជា ស្រុកសាលាក្រៅ បានមានប្រសាសន៍លើកឡើងថា៖ អគារស្នាក់ការអនុសាខាកាកបាទក្រហមកម្ពុជាស្រុកសាលាក្រៅ មានទីតាំងនៅបណ្តោយផ្លូវលេខ ៥៧ ស្ថិតក្នុងភូមិអូរអិល ឃុំស្ទឹងកាច់ ស្រុកសាលាក្រៅ ដោយបានសាងសង់ ចាប់ពីថ្ងៃទី ១ ខែមិថុនា ឆ្នាំ២០១៣ និងបានបញ្ចប់ការសាងសង់រួចរាល់នៅថ្ងៃទី ១៨ ខែសីហា ឆ្នាំ ២០១៣ ដែលគិតមកទល់ពេលនេះ មានអាយុកាលជាង ១១ឆ្នាំ ហើយ ។ អគារនេះមានទំហំ បណ្តោយ ១២ម៉ែត្រ ទទឹង ៦ម៉ែត្រ លយចេញទៅខាងមុខ ប្រវែង ៤ម៉ែត្រ នៅខាងក្នុងមានបន្ទប់ឃ្លាំងមួយ បន្ទប់សាលប្រជុំមួយ ,បន្ទប់ការិយាល័យមួយបន្ទប់ និងបន្ទប់ទឹកមួយ រីឯខាងក្រៅអគារ មានបន្ទប់អនាម័យពីរ របងព័ទ្ធជុំវិញកម្ពស់ ២ម៉ែត្រ ដែលមានក្រឡាផ្ទៃដី សរុបចំនួន ៥៤៦ ម៉ែត្រការ៉េ ។ លោបន្តថា៖ ការសាងសង់ អគារស្នាក់ការអនុសាខានេះ ចំណាយថវិកា សរុបចំនួន ៣៤,៥០០ ដុល្លារអាមេរិក ដែលថវិកានេះ មានការឧបត្ថម្ភគាំទ្រ ដ៏ខ្ពង់ខ្ពស់ពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានគណៈកម្មាធិការកាកបាទក្រហមកម្ពុជា តាមរយៈលោកជំទាវបណ្ឌិត ប្រធានគណៈកម្មាធិការសាខា ចំនួន ១០,០០០ ដុល្លារមេរិក, លោកជំទាវបណ្ឌិត បាន ស្រីមុំ ប្រធានគណៈកម្មាធិការសាខា ឧបត្ថម្ភថវិកា ចំនួន ៩,១៦៨ ដុល្លារមេរិក,ថវិកាផ្ទាល់របស់ប្រធានគណៈកម្មាធិការអនុសាខាស្រុក និងសមាជិកសមាជិការចំនួន ៦,៣០០ ដុល្លារមេរិក និងថវិកាដែលបានមកពីការគៀងគរថវិកា ពីសប្បុរសជន បន្តនានា រហូតសាងសង់អគាររួចរាល់ និង បានធ្វើការសម្ពោធដាក់អោយប្រើប្រាស់ជាផ្លូវការ ផងដែរ ។មានប្រសាសន៍ក្នុងឪកាសនេះដែរលោកជំទាវ ពៅ សុខ អនុប្រធានអចិន្ត្រៃយ៍គណៈកម្មាធិការសាខាកាតបាទក្រហមកម្ពុជាខេត្ត តំណាងលោកជំទាវបណ្ឌិត បាន ស្រីមុំ ប្រធានគណៈកម្មាធិការសាខាកាកបាទក្រហមកម្ពុជាខេត្តប៉ៃលិន បានលើកឡើងថា៖ កាកបាទក្រហមកម្ពុជា ដែលមានសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ជាព្រះប្រធានកិត្តិយស និងស្ថិតក្រោមការដឹកនាំប្រកបដោយគតិបណ្ឌិត របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដោយស្របទៅតាមយុទ្ធសាស្ត្ររបស់សហព័ន្ធអន្តរជាតិ រួមជាមួយយុទ្ធសាស្ត្របញ្ជកោណ របស់រាជរដ្ឋាភិបាល បានរៀបចំយុទ្ធសាស្ត្ររបស់ខ្លួន គ្របដណ្តប់ទៅលើវិស័យអាទិភាពទាំងបួនគឺ១.ការគ្រប់គ្រងគ្រោះមហន្តរាយ ២.សុខភាព និងការថែទាំសុខភាពក្នុងសហគមន៍ ៣.ការលើកកម្ពស់ គោលការណ៍គ្រឹះ និងតម្លៃមនុស្សធម៌ ៤(ការអភិវឌ្ឍស្ថាប័ន និងអភិវឌ្ឍធនធាន។ ជាការពិតប្រទេសជាតិយើង មានសុខសន្តិភាព និងភាពរីកចម្រើនលើគ្រប់វិស័យ តែយ៉ាងណា ប្រជាជនមួយចំនួននៅតែប្រឈម និងរងគ្រោះ ដោយសារគ្រោះ មហន្តរាយផ្សេងៗ ដែលចាំបាច់ត្រូវការ ជួយសង្រ្គោះភ្លាមៗឲ្យទាន់ពេលវេលា ហេតុនេះហើយទើបសាខាកាកបាទក្រហមខេត្ត បានបង្កើតឲ្យមានបណ្តាញអ្នកស្ម័គ្រចិត្តគ្រប់ ភូមិ / ឃុំ ដើម្បីត្រៀម ប្រមូលព័ត៌មាន អំពីបញ្ហារបស់ប្រជាពលរដ្ឋ ដែលរងគ្រោះ និងងាយរងគ្រោះ ប្រយោជន៍ជួយ ពួកគាត់ឲ្យបានទាន់ពេលវេលា និងគ្រប់ទីកន្លែង ។ ជាក់ស្តែងនៅថ្ងៃនេះ យើងបានសម្ភោធអាគា អនុសាខាស្រុកសាលាក្រៅ ដើម្បីបង្ករភាពងាយស្រួល ដល់បុគ្គលិក និងអ្នកស្ម័គ្រចិត្តទាំងអស់ បម្រើការងារជូនប្រជាពលរដ្ឋផងដែរ៕

ក្រុមយុវជនប្រមាណ៣០០០នាក់នាំគ្នាបោះជំរំដើម្បីអបអរសាទរទិវាសន្តិភាពលើកទី២៦ នៅស្តូបអនុស្សាវរីយ៍ឈ្នះឈ្នះលើភ្នំ២០០ស្រុកអន្លង់វែង

ឧត្តរមានជ័យ÷ក្រុមយុវជនប្រមាណ៣០០០នាក់បាននាំគនាបោះជំរំដើម្បីអបអរសាទរទិវាសន្តិភាពនៅកម្ពុជាលើកទី២៦ នៅស្តូបអនុស្សាវរីយ៍ ឈ្នះឈ្នះ លើទីតាំងភ្នំ២០០ ស្ថិតនៅភូមិជើងភ្នំ ឃុំត្រពាំងប្រិយ៌ ស្រុកអន្លង់វែង ខេត្តឧត្តរមានជ័យ នារាត្រីយប់ថ្ងៃទី២៨ ខែធ្នូ ឆ្នាំ២០២៤ ។ស្តូបអនុស្សាវរីយ៍ឈ្នះឈ្នះ នៅទីតាំងភ្នំ២០០គឺជាកន្លែងមូលដ្ឋានកែច្នៃគ្រាប់កាំភ្លើងមួយ របស់អតីតយោធាខ្មែរក្រហមចុងក្រោយបំផុត ក្នុងចំណោមទីតាំងចំនួន១៤ កន្លែង ដែលរាជរដ្ឋាភិបាលកម្ពុជាបានកំណត់តំបន់ទាំងនោះ ប្រែក្លាយជាតំបន់ទេសចរណ៍ប្រវត្តិសាស្ត្រ នៅព្រំដែន នូវថ្ងៃទី២៣ ខែមិនា ឆ្នាំ២០១០ ដោយក្រសួងទេសចរណ៍មានសមត្ថកិច្ចរៀបចំ និងគ្រប់គ្រងតំបន់ទេសចរណ៍ប្រវត្តិសាស្ត្រអន្លង់វែង សហការជាមួយ ក្រសួងស្ថាប័នពាក់ព័ន្ធ និងអាជ្ញាធរមូលដ្ឋាន ធ្វើការអភិរក្ស និងការអភិវឌ្ឍសម្រាប់ជីវភាពរស់នៅរបស់ប្រជាពលរដ្ឋក្នុងតំបន់នោះឲ្យកាន់តែមានការអភិវឌ្ឍរីកចម្រើនបន្ថែមទៀត។សូមបញ្ជាក់ថា ក្នុងអនុក្រឹត្យរបស់រាជរដ្ខាភិបាលកម្ពុជា គោលបំណងធ្វើការអភិរក្សនៅទីតាំងសំខាន់ៗ ដែលជាមជ្ឈមណ្ឌលនយោបាយចុងក្រោយបង្អស់របស់អតីតអង្គការចាត់តាំងនយោបាយ និងយោធានៃកម្ពុជាប្រជាធិបតេយ្យ ដើម្បីឱ្យសាធារណជនជាតិ និងអន្តរជាតិ បានយល់ដឹង និងចងចាំអំពីនយោបាយ មេដឹកនាំរបស់បនប្រល័យពូជសាសន៍ផងដែរ។ហើយការកំណត់តំបន់ទេសចរណ៍ប្រវត្តិសាស្រ្តទាំងនោះបែងចែកជា២តំបន់គឺ តំបន់លើភ្នំ(តំបន់ក) និងតំបន់ជើងភ្នំ(តំបន់ខ)។ក្នុងនោះតំបន់(ក)ក៏មានតំបន់ទេសចរណ៍ប្រវត្តិសាស្ត្រតូចៗចំនួន៦ទីតាំងនិងតំបន់(ខ)ជាតំបន់ស្ថិតនៅក្នុងភូមិសាស្ត្រលើខ្ពង់រាប និងជើងភ្នំដងរែកដែលមានតំបន់ទេសចរណ៍ប្រវត្តិសាស្ត្រតូចៗចំនួន៨កន្លែងផងដែរ។កក្តាទាំងអស់នេះ គឺសបញ្ជាក់ឲ្យឃើញកាន់តែច្បាស់បន្ថែមទៀតពីកក្តាសុខសន្តិភាពពេញលេញទើបយើងអាចមានឱកាសមានការរៀបចំនូវកម្មពិធីផ្សេងៗប្រកបដោយភាពរលូនដូច្នេះយើងត្រូវរក្សាសុខសន្តិភាពឲ្យបានស្ថិតស្ថេរគង់វង្សជារៀងរហូតផងដែរ៕

២៩ ធ្នូ ២០២៤ គឺជា «ទិវាសន្តិភាពនៅកម្ពុជា» និងខួបលើកទី២៦ នៃការបញ្ចប់សង្គ្រាមស៊ីវិលនៅកម្ពុជា, ផែនមហាជនជាង ១ម៉ឺននាក់ ចូលរួមព្រឹត្តិការណ៍ជាប្រវិត្តសាស្ត្រមួយនេះ

ភ្នំពេញ៖ ឆ្នាំ២០២៤នេះ គឺជាខួបលើកទី២៦ នៃការបញ្ចប់សង្គ្រាមស៊ីវិលនៅកម្ពុជា តាមរយៈការអនុវត្តដោយជោគជ័យ នូវនយោបាយឈ្នះឈ្នះ នាំមកនូវសុខសន្តិភាព និងការផ្សះផ្សារ ជាតិជូនមាតុភូមិកម្ពុជារហូតមកដល់បច្ចុប្បន្ន។ ខួប២៦ឆ្នាំនៃការបញ្ចប់ភ្លើងសង្គ្រាមនៅកម្ពុជា មានរៀបចំព្រឹត្តិការណ៍ជាច្រើន ដើម្បីអបអរសាទរថ្ងៃដ៏រីករាយជាប្រវត្តិសាស្ត្រក្នុងសង្គមខ្មែរ។ព្រឹត្តិការណ៍នេះ ធ្វើឡើងរយៈពេល៣ថ្ងៃ ពោលគឺចាប់ពីថ្ងៃទី២៩, ៣០ និងថ្ងៃទី៣១ ខែធ្នូ ឆ្នាំ២០២៤ អមជាមួយនឹងមានបាញ់កាំជ្រួច តាំងពិព័រណ៍ និងកម្មវិធីជាច្រើនទៀត។សម្រាប់ពិធីអបអរសាទរខួបលើកទី២៦ ទិវា «សន្តិភាពនៃកម្ពុជា» ធ្វើឡើងក្រោមអធិបតីភាពនាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ តំណាងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។ ក្នុងព្រឹត្តិការណ៍ជាប្រវត្តិសាស្ត្រនេះ មានកម្លាំងចូលរួមពិធីធ្វើពិធីមិទិ្ទញប្រមាណជាង ១ម៉ឺននាក់។សូមបញ្ជាក់ថា ការរៀបចំខួបលើកទី២៦ នៃទិវា «សន្តិភាពនៅកម្ពុជា» (២៩ ធ្នូ ១៩៩៨ - ២៩ ធ្នូ ២០២៤) ជាទិវានយោបាយឈ្នះឈ្នះ របស់សម្ដេចតេជោ ហ៊ុន សែន ត្រូវបានកំណត់យកថ្ងៃទី២៩ ខែធ្នូ ជារៀងរាល់ឆ្នាំ ជា «ទិវាសន្តិភាពនៅកម្ពុជា» ជាថ្ងៃបុណ្យជាតិផ្លូវការមួយនៅកម្ពុជា ដើម្បីជាការឆ្លើយតបទៅនឹងបំណងប្រាថ្នាដ៏ពិសិដ្ឋរបស់ប្រជាជនកម្ពុជា គឺការស្រឡាញ់សន្តិភាព និងការស្អប់ខ្ពើមសង្គ្រាម។ទិវានេះក៏ជាការរំលឹកដល់ការសម្រេចបាននូវការបញ្ចប់សង្គ្រាមទាំងស្រុង និងការកសាងបាននូវសន្តិភាព និងឯកភាពជាតិពេញលេញនៅកម្ពុជា ដោយនយោបាយឈ្នះឈ្នះ កាលពីថ្ងៃទី២៩ ខែធ្នូ ឆ្នាំ១៩៩៨។ ទន្ទឹមនឹងនេះដែរ ទិវា «សន្តិភាពនៅកម្ពុជា» ក៏ជាការរម្លឹកដឹងគុណ និងចងចាំជាប់ជានិច្ចនូវគំរូវីរភាពដ៏អង់អាចក្លាហាន និងការធ្វើពលិកម្មគ្រប់បែបយ៉ាងរបស់វីរបុរស និងវីរនារីស្នេហាជាតិរបស់កម្ពុជា ដែលបានប្រយុទ្ធ និងតស៊ូយ៉ាងស្វិតស្វាញនៅគ្រប់សមរភូមិ ទាំងសមរភូមិសង្គ្រាម សមរភូមិការទូត និងសមរភូមិ នយោបាយ រហូតសម្រេចបាននូវការបញ្ចប់ជាស្ថាពរសង្គ្រាមនៅកម្ពុជា ហើយសម្រេចបាននូវការបង្រួបបង្រួមជាតិ ឯកភាពជាតិ និងនាំមកជូនជាតិ និងប្រជាជនកម្ពុជា នូវសុខសន្តិភាពពេញ ផ្ទៃប្រទេសនៅកម្ពុជា។ការរៀបចំទិវា «សន្តិភាពនៅកម្ពុជា» នាឆ្នាំ២០២៤នេះ គឺជាការដាស់តឿនក្រើនរំលឹកដល់ប្រជាជនកម្ពុជាគ្រប់ជំនាន់ ទាំងក្នុងពេលបច្ចុប្បន្ន ទាំងក្នុងពេល អនាគតឱ្យចងចាំជានិច្ចអំពីមហាវិនាសកម្មរបស់ជាតិ និងទុក្ខសោកលំបាកវេទនារបស់ប្រជាជនកម្ពុជា ព្រមទាំងផលវិបាកនានា ដែលបង្កឡើងដោយសង្គ្រាម និងការបែកបាក់ជាតិ ព្រមទាំងបំផុសស្មារតីដល់ប្រជាជនកម្ពុជាគ្រប់ជំនាន់ឱ្យស្អប់ខ្ពើមនូវសង្គ្រាម ហើយក៏ជាការបំផុសស្មារតីដល់ប្រជាជនកម្ពុជាគ្រប់ជំនាន់ ឱ្យយល់ដឹងច្បាស់អំពី «គុណតម្លៃនៃសុខសន្តិភាព» ហើយរួមគ្នាលើកកម្ពស់ «វប្បធម៌សន្តិភាព» នៅកម្ពុជា ពិសេសការចូលរួមការពារ និងថែរក្សាឱ្យបានដាច់ខាតនូវ «សុខសន្តិភាព» ដែលជាអាយុជីវិត របស់ជាតិ និងជាគ្រឹះដ៏មានតម្លៃបំផុតសម្រាប់ការអភិវឌ្ឍប្រទេសជាតិ និងភាពសុខសាន្តរបស់ប្រជាជនកម្ពុជា ប្រកបដោយចីរភាព និងភិយ្យោភាព។ការប្រារព្ធទិវានេះគឺបានរំលេចអំពីគុណបំណាច់ និងការលះបង់របស់សម្តេចតេជោ ហ៊ុន សែន អតីតនាយករដ្ឋមន្រ្តីនៃកម្ពុជាដែលបានដាក់ចេញនូវគោលនយោបាយឈ្នះឈ្នះ ហើយបានធ្វើឱ្យកម្ពុជាទទួលបានសុខសន្តិភាពពិតប្រាកដនៅថ្ងៃទី២៩ ខែធ្នូ ឆ្នាំ១៩៩៨។សម្តេចតេជោ ហ៊ុន សែន វីរបុរសសង្គ្រោះជាតិ និងជាបិតាសន្តិភាពកម្ពុជា បានចំណាយពេលជាង១៩ឆ្នាំ គិតពីថ្ងៃ៧ ខែមករា ឆ្នាំ១៩៩៧ រហូតដល់ថ្ងៃ២៩ ខែធ្នូ ឆ្នាំ១៩៩៨ ដើម្បីស្វែងរកការឯកភាពជាតិមួយពេញលេញ។ ជាភ័ព្វសំណាងរបស់កម្ពុជា នៅថ្ងៃទី២៩ធ្នូ១៩៩៨ សម្តេចតេជោ ស្ថាបនិកនយោបាយឈ្នះឈ្នះ បានដាក់ចេញ និងអនុវត្តប្រកបដោយជោគជ័យនយោបាយឈ្នះឈ្នះ ដែលបាននាំមកនូវការឯកភាពជាតិរវាងខ្មែរនិងខ្មែរ ពីច្រើនក្រុម ច្រើនពណ៌ មកជាខ្មែរតែមួយ រហូតនាំមកនូវសុខសន្តិភាពពេញលេញ ការឯកភាពជាតិជាធ្លុងមួយដ៏រឹងមាំ រហូតមកដល់សព្វថ្ងៃនេះ។ទិវាសន្តិភាពនៅកម្ពុជា ថ្ងៃទី២៩ធ្នូ គឺជាសច្ចភាពនៃប្រវត្តិសាស្ត្រ ដែលកម្ពុជាទទួលបានសន្តិភាពពេញផ្ទៃប្រទេសទាំងស្រុង ក្រោមរូបមន្តឈ្នះឈ្នះ គឺឈ្នះទាំងអស់គ្នា។សន្តិភាពមានតម្លៃលើសលុប ដែលមិនអាចកាត់ថ្លៃបាន ប្រជាជនកម្ពុជាបានរស់នៅក្នុងសេចក្តីសុខសាន្តរហូតមកដល់សព្វថ្ងៃនេះ ក៏ព្រោះតែការបញ្ចប់បាននូវសង្គ្រាមទាំងស្រុង និងការរកឃើញនូវការឯកភាពជាតិមួយពេញលេញ។ ជាមួយគ្នានេះ ដើម្បីឆ្លើយតបនឹងបំណងប្រាថ្នាដ៏ពិសិដ្ឋ របស់ប្រជាជនកម្ពុជាទូទាំងប្រទេស ដែលស្រលាញ់សន្តិភាព និងចង់ថែរក្សាសន្តិភាពឱ្យបានគង់វង្សយូរអង្វែងតរៀងទៅ រាជរដ្ឋាភិបាលបន្តវេន្ត ដែលដឹកនាំដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលមានចក្ខុវិស័យថែរក្សាសន្តិភាពពីថ្នាក់ដឹកនាំជំនាន់មុនឱ្យបានស្ថិតស្ថេរគង់វង្សទោះក្នុងតម្លៃណាក៏ដោយ ដូច្នេះនៅថ្ងៃទី១ ខែមករា ឆ្នាំ២០២៤ សម្តេចធិបតី បានចេញអនុក្រឹត្យកំណត់ យកថ្ងៃទី២៩ ខែធ្នូ រៀងរាល់ឆ្នាំ ជា «ទិវាសន្តិភាពនៅកម្ពុជា» ដែលជាថ្ងៃបុណ្យជាតិផ្លូវការមួយនៅព្រះរាជាណាចក្រកម្ពុជា ជាថ្ងៃឈប់សម្រាកសាធារណៈចាប់ពីឆ្នាំ២០២៤តទៅ។សូមបញ្ជាក់ថា ក្នុងពិធីប្រារព្ធខួបលើកទី២៦ នៃការបញ្ចប់សង្រ្គាមស៊ីវិលនៅកម្ពុជា និងការអនុវត្តប្រកបដោយជោគជ័យនយោបាយឈ្នះឈ្នះ និងខួប ៦ឆ្នាំ នៃការកសាងវិមានឈ្នះឈ្នះ ក៏បានរៀបចំពិធីតាំងពិព័រណ៍ដោយមានការចូលរួមពីស្ថាប័ន ក្រសួងនានា៕

មន្ត្រីជាន់ខ្ពស់ស្នើឲ្យគិលានុបដ្ឋាកផ្តល់សេវាគ្រប់ពេល ដើម្បីសេចក្តីពេញចិត្ត និងទំនុកចិត្តពីអតិថិជន និងអ្នកជំងឺ

ភ្នំពេញ ៖ មន្ត្រីជាន់ខ្ពស់ក្រសួងសុខាភិបាល បានស្នើឲ្យគិលានុបដ្ឋាកទាំងអស់ យកចិត្តទុកដាក់ឲ្យកាន់តែខ្លាំងលើការពង្រឹងទាំងសមត្ថភាព និងក្រមសីលធម៌វិជ្ជាជីវៈ ក្នុងការផ្តល់សេវាគ្រប់ពេលវេលា ដើម្បីសេចក្តីពេញចិត្ត និងទំនុកចិត្តពីអតិថិជន ជាអ្នកជំងឺ រួមទាំងក្រុមគ្រួសារអ្នកជំងឺ។ការថ្លែងរបស់លោកជំទាវសាស្ត្រាចារ្យ អ៊ឹម សិទ្ធិការ្យ រដ្ឋលេខាធិកាក្រសួងសុខាភិបាល យ៉ាងដូច្នេះក្នុងពិធីប្រកាសបើកសន្និសីទគិលានុបដ្ឋាក ប្រចាំឆ្នាំ២០២៤ នៃសមាគមគិលានុបដ្ឋាកកម្ពុជា ក្រោមប្រធានបទ “ការកែលម្អគុណភាព និងនវានុវត្តន៍ក្នុងការថែទាំ” រៀបចំដោយសមាគមគិលានុបដ្ឋាកកម្ពុជា នាថ្ងៃទី២៨ ខែធ្នូ ឆ្នាំ២០២៤ នៅក្នុងមន្ទីរពេទ្យកុមារជាតិ។ លោកជំទាវសាស្ត្រាចារ្យ បានបន្តថា ការប្រតិបត្តិផ្តល់ការថែទាំប្រកបដោយមេត្តាធម៌ គុណធម៌ និងទំនួលខុសត្រូវខ្ពស់របស់គិលានុបដ្ឋាក គឺជាការលើកកិត្តិយសសេចក្តីថ្លៃថ្នូរ របស់បុគ្គលផ្ទាល់ ស្ថាប័ន និងគុណតម្លៃរបស់វិជ្ជាជីវៈថែទាំ ព្រមទាំងក្រសួងសុខាភិបាលទាំងមូល។ជាងនេះទៅទៀត លោកជំទាវសូមឲ្យប្រើប្រាស់ធនធានដែលមានស្រាប់ប្រកបដោយភាពច្នៃប្រឌិត និងរកដំណោះស្រាយ ដើម្បីភាពរីកចម្រើនទាំងអស់គ្នា ភាពរីកចម្រើនសម្រាប់ស្ថាប័ន និងប្រទេសជាតិ។ ទន្ទឹមនេះតាងនាមឲ្យក្រសួងសុខាភិបាល លោកជំទាវសូមសំដែងនូវការកោតស្ញប់ស្ញែងដោយមោទភាព ចំពោះការសម្រចបាននូវបេសកម្មរបស់សមាគមគិលានុបដ្ឋាកកម្ពុជា ដែលផ្តល់នូវការបណ្តុះបណ្តាលបានជាប់ជាប្រចាំសម្រាប់គិលានុបដ្ឋាក និងសូមអបអរចំពោះការគាំទ្រនានារបស់គណៈគិលានុបដ្ឋាកកម្ពុជា និងក្រសួងសុខាភិបាលក្នុងទិសដៅលើកកម្ពស់គុណភាពសេវាសុខាភិបាលក្នុងប្រទេសកម្ពុជា ដើម្បីធានាបាននូវការផ្តល់ជូនសេវាថែទាំព្យាបាល បង្ការ ប្រកបដោយគុណភាព សុវត្ថិភាពជូនដល់ប្រជាពលរដ្ឋ ទៅតាមតំរូវការរបស់ពួកគេដោយមិនមានការរើសអើង។ បើតាមលោកស្រី ប៉ៃ សុខលីម ប្រធានសមាគមគិលានុបដ្ឋាកកម្ពុជា ឲ្យដឹងថា គោលបំណងរួមនៃសន្និសីទគិលានុបដ្ឋាកប្រចាំឆ្នាំ២០២៤នាថ្ងៃនេះ គឺដើម្បីលើកកម្ពស់ការ អភិវឌ្ឍន៍សមត្ថភាពវិជ្ជាជីវៈរបស់គិលានុប ដ្ឋាកឲ្យមានជាបន្ត ដើម្បីពង្រឹងចំណេះដឹង ជំនាញ និងឥរិយាបថ ក្រមសីលធម៌វិជ្ជាជីវៈ ដោយផ្តោតការយកចិត្តទុក ដាក់លើការផ្តល់សេវាថែទាំសុខភាព ប្រកបដោយគុណភាព សុវត្ថិភាពសម្រាប់អ្នកជំងឺ និងដោយសេចក្តីថ្លៃថ្នូរនៃវិជ្ជាជីវៈ ដើម្បីជាទំនុកចិត្ត និងភាពពេញចិត្តរបស់ប្រជាជនឲ្យសាកសម នឹងប្រសាសន៍របស់ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល (គិលានុបដ្ឋាក និងឆ្មប) គឺជាសម្រស់ និងមុខមាត់របស់ស្ថាប័ន៕អត្ថបទ ៖ រដ្ឋា

យុវជនកម្ពុជា បង្ហាញមោទនភាព ដែលបានចូលរួមហាត់សមត្រៀមដង្ហែក្បួនសាទរកម្ពុជា

ភ្នំពេញ ៖ សម្រាប់ក្រុមការងារយុវជនស្ម័គ្រចិត្តទាំងប្រមាណ ៣ ០០០នាក់ បានមកប្រមូលផ្ដុំគ្នា តាមក្បូននីមួយៗ ដើម្បីហាត់សម ត្រៀមសម្តែងក្នុងក្បួនដង្ហែសាទរកម្ពុជា នាថ្ងៃទី៣១ធ្នូ នៅមុខព្រះបរមរាជវាំង ក្នុងនេះយុវជន បានបង្ហាញមោទនភាពជាខ្លាំង ដែលបានចូលរួមហាត់សម ត្រៀមចូលរួមដង្ហែក្បួនសាទរកម្ពុជាដ៏មហស្ចារ្យ។ផ្តល់បទសម្ភាសន៍ឱ្យ BTV តំណាងយុវជនស្ម័គ្រចិត្តចំនួន៣រូប បានប្រាប់ថា ពួកគេពិតជាសប្បាយរីករាយ ដែលបានចូលរួមហាត់សម ត្រៀមចូលរួមសម្តែងក្នុងក្បួនដង្ហែសាទរកម្ពុជា នាថ្ងៃទី៣១ធ្នូ។ ពួកគេបន្តថា នៅពេលនេះពួកគេ កំពុងហាត់សម ទៅតាមក្បួនដង្ហែនីមួយៗដោយយកចិត្តទុកដាក់ ហើយពួកគេនឹងប្តេជ្ញាខិតខំហាត់សមឱ្យបានល្អ ដើម្បី សម្តែជូនបងប្អូនប្រជាពលរដ្ឋ និងភ្ញៀវទេសចរជុំវិញពិភពលោកបានទស្សនាដោយភាពសប្បាយរីករាយ ហើយសង្ឃឹម និងជឿជាក់ថា ព្រឹត្តិការណ៍សាទរកម្ពុជា នឹងធ្វើឱ្យកម្ពុជា កាន់តែល្បីល្បាញថែមទៀត ក្នុងនេះពួកគេ សូមថ្លែងអំណរគុណដល់រាជរដ្ឋាភិបាល ក៏ដូចសហភាពសហព័ន្ធយុវជនកម្ពុជា ដែលបានរៀបចំព្រឹត្តិការណ៍មួយនេះ និងថ្លែអំណរគុណដល់រាជរដ្ឋាភិបាល ដែលបានធ្វើឱ្យប្រទេសជាតិមានសុខសន្តិភាព។សូមបញ្ជាក់ថា ព្រឹត្តិការណ៍សាទរកម្ពុជា ជាព្រឹត្តិការណ៍លើកដំបូង ដែលសហភាពសហព័ន្ធយុវជនកម្ពុជា ជាអ្នករៀបចំ ហើយក្នុងព្រឹត្តិការណ៍មួយនេះ រៀបចំឡើង ដោយចាប់ផ្តើមពីការតាំងលម្អ រចនាតុបតែង និងផ្សារភ្ជាប់ គំនិតច្នៃប្រឌិតសិល្បៈបុរាណនិងសហសម័យ នៅតាមសួនច្បារមាត់ទន្លេចតុមុខ រហូតមកដល់សួនច្បារមុខប្រាសាទច័ន្ទឆាយានៃព្រះបរមរាជវាំង បន្ថែមពីនេះទៀត ក៏មានការរៀបចំទីតាំងស្តង់ម្ហូបអាហារប្រពៃណី ដែលជាឱជារសនៃអនុស្សាវរីយ៍ ដែលមិនអាចបំភ្លេចបាននៃមាតុភូមិកម្ពុជា ហើយអ្នករៀបចំព្រឹត្តិការណ៍នឹងសហការជាមួយវិចិត្រករដើម្បីនាំ យកនូវគំនិតច្នៃប្រឌិតនៃការរចនាគំនូរ ការតុបតែងភ្លើងពណ៌ និងសកម្មភាពរីករាយចម្រុះ ជាច្រើនទៀត លើសពីនេះទៀតក នៅវេលាអស្តង្គត គឺមាន “ក្បួនដង្ហែសាទរកម្ពុជា” ដ៏ធំ ដែលមានការចូលរួមពីពលរដ្ឋប្រមាណ ៣ ០០០នាក់ មកកាន់សួនច្បារមុខព្រះ បរមរាជវាំង ដោយក្បួនដង្ហែនេះ មានទាំងតួយក្សរហូតដល់ ២០០នាក់ ទីងមោងចំនួន ៨៥ ស្គរទម្ងន់ ៣តោន ពោងបណ្ដែតយក្ស គោមយក្ស ជាដើមផងដែរ៕ផលិត គង់ រ៉េន

បណ្ដាញសង្គម

ព័ត៌មានថ្មីៗ

ការពិនិត្យឡើងវិញ៖ ភាពយន្តឯកសារពីតំបន់ហ្កហ្សារបស់ BBC បំពានគោលការណ៍ណែនាំអំពីភាពត្រឹមត្រូវ

មនុស្សជាច្រើននាក់ស្លាប់ក្នុងអគ្គិភ័យនៅមជ្ឈមណ្ឌលសង្គ្រោះ ក្នុងរដ្ឋ Massachusetts

ជំនួយការរបស់លោក Netanyahu ប្រឈមនឹងការចោទប្រកាន់ផ្លូវការ ជុំវិញការបែកធ្លាយព័ត៌មានយោធា

រដ្ឋមន្ត្រីការបរទេសអ៊ីស្រាអែល និងប៉ាឡេស្ទីន នឹងចូលរួមកិច្ចប្រជុំរបស់ EU

អ៊ីរ៉ង់៖ ការដាក់ទណ្ឌកម្មជាថ្មីរបស់ UN នឹងជួបជាមួយការឆ្លើយតបយ៉ាងសមស្រប

វិមានក្រឹមឡាំង៖ ការបញ្ជូនអាវុធ និងគ្រាប់រំសេវទៅអ៊ុយក្រែនពីអាមេរិក កំពុងបន្តមានធម្មតា

នគរបាលឃាត់ខ្លួនមនុស្ស ៨នាក់ ក្រោយមានការប៉ះទង្គិចរបស់ក្រុមប្រឆាំងជនអន្តោប្រវេសន៍ ក្នុងទីក្រុងនៅអេស្ប៉ាញ

EU នឹងត្រៀមបញ្ជីពន្ធ ២៤,៥២ពាន់លានដុល្លារ សម្រាប់ទំនិញរបស់អាមេរិក

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877