BTV NEWS

មន្រ្ដីជាន់ខ្ពស់ក្រសួងធនធានទឹកចុះពិនិត្យវឌ្ឍនភាព និងវាយតម្លៃបញ្ចប់ការងារសាងសង់គម្រោងអភិវឌ្ឍន៍ប្រព័ន្ធធារាសាស្ត្រ និងកាត់បន្ថយទឹកជំនន់ ក្នុងខេត្តបន្ទាយមានជ័យ

ត្រីមាសទី១ឆ្នាំនេះ កម្ពុជាប្រមូលថវិកាពីដៃគូ និងការបោះលក់មូលបត្រមានទំហំជាង ៥៦១ លានដុល្លារ សម្រាប់តម្រូវការអភិវឌ្ឍ

ជនជាតិវៀតណាម ១៨០នាក់ទៀត ពាក់ព័ន្ធករណីឆបោកតាមប្រព័ន្ធបច្ចេកវិទ្យាត្រូវបានបណ្ដេញចេញពីកម្ពុជា

ឯកឧត្តម ហ៊ុន ម៉ានី អញ្ជើញផ្តល់បាឋកថាស្តីពី «បរិវត្តកម្មនៃរដ្ឋបាលសាធារណៈ ឬការកែទម្រង់រដ្ឋបាលសាធារណៈ» លើកទី៤ ជូនដល់គណៈគ្រប់គ្រង សិស្សមន្រ្តី និងកម្មសិក្សាការីនៃសាលាភូមិន្ទរដ្ឋបាល

ព័ត៌មានជាតិ

ក្រសួងអប់រំ សរុបលទ្ធផល វាយតម្លៃ និងរៀបចំរបាយការណ៍អនុវិស័យឆ្នាំសិក្សា២០២៥ និងលើកទិសដៅឆ្នាំសិក្សា២០២៦

នារសៀលថ្ងៃទី៤ ខែធ្នូ ឆ្នាំ២០២៥ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្ត្រីក្រសួងអប់រំ យុវជន និងកីឡា បានអញ្ជើញជាអធិបតីក្នុងពីធីបិទ “សិក្ខាសាលាបូកសរុបលទ្ធផល វាយតម្លៃ និងរៀបចំរបាយការណ៍អនុវិស័យអប់រំកាយ និងកីឡា ឆ្នាំសិក្សា ២០២៤-២០២៥ និងលើកទិសដៅឆ្នាំសិក្សា២០២៥-២០២៦ ដោយមានការចូលរួមពីសំណាក់ ឯកឧត្តម លោកជំទាវ ថ្នាក់ដឹកនាំក្រសួងអប់រំ យុវជន និងកីឡា ឯកឧត្តម លោកជំទាវ លោក លោកស្រី តំណាងសហព័ន្ធកីឡា មន្ទីរអប់រំ យុវជន និងកីឡារាជធានី-ខេត្ត និងកីឡាករ កីឡាការិនី។នាឱកាសនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និងវាយតម្លៃខ្ពស់ចំពោះអគ្គនាយកដ្ឋានកីឡា គណៈកម្មការរៀបចំ អង្គភាពពាក់ព័ន្ធ និងសិក្ខាកាមទាំងអស់ ដែលបានចូលរួម និងរៀបចំកិច្ចប្រជុំដ៏មានសារៈសំខាន់នេះ ទទួលបានជោគជ័យតាមការគ្រោងទុក ដោយយោងតាមរបាយការណ៍របស់ ឯកឧត្តម អគ្គនាយកកីឡា បានបង្ហាញឱ្យឃើញថា កិច្ចប្រជុំរយៈពេលពីរថ្ងៃនេះ អង្គប្រជុំបានពិនិត្យ និងវាយតម្លៃការអនុវត្តការងារឆ្នាំសិក្សា២០២៤-២០២៥ កន្លងមកលើសមិទ្ធផលដែលសម្រេចបានតាមផែនការការងារសេសសល់ បញ្ហាប្រឈម សំណូមពរ និងវិធានការដោះស្រាយ ដើម្បីដាក់បញ្ចូលទៅក្នុងសន្និបាតបូកសរុបការងារអប់រំ យុវជន និងកីឡា ឆ្នាំសិក្សា២០២៥-២០២៦ និងលើកទិសដៅឆ្នាំសិក្សា២០២៥-២០២៦ នាខែកុម្ភៈ ឆ្នាំ២០២៦ខាងមុខនេះ។បន្ថែមលើនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានផ្តល់អនុសាសន៍មួយចំនួន ដើម្បីពង្រឹងវិស័យកីឡាបន្តរួមមាន៖ - ត្រូវរៀបចំផែនការសកម្មភាព ដើម្បីអនុវត្តគោលនយោបាយជាតិស្តីពីការអភិវឌ្ឍវិស័យអប់រំកាយ និងកីឡា និងបន្តពង្រឹងការកែទម្រង់ការប្រកួតកីឡាជាតិគ្រប់កម្រិត ទាំងកីឡាមហាជន កីឡាសិស្ស និងកីឡានិស្សិតឱ្យស្របតាមបរិបទតំបន់- សិក្សា តាមដានអំពីប្រភេទកីឡាដែលមានសក្តានុពលពីបណ្តាប្រទេសអាស៊ាន ដោយផ្តល់អាទិភាពទៅលើប្រភេទ និងវិញ្ញាសាកីឡាទាំងនោះ- ជំរុញក្នុងការបំពាក់សម្ភារហ្វឹកហាត់គ្រប់ប្រភេទ និងវិញ្ញាសាកីឡាអាទិភាព- បន្តផ្តល់ថវិកាគាំទ្រដល់សហព័ន្ធកីឡាជាតិដែលមានសក្តានុពលនិងសកម្ម- បំផុស និងលើកកម្ពស់សកម្មភាពកីឡាប្រពៃណី តាមរយៈការបញ្ចូលក្នុងការប្រកួតកីឡាជាតិ និងព្រឹត្តិការណ៍ផ្សេងៗ- បន្តបណ្តុះបណ្តាលកីឡាករថ្នាល និងកីឡាករជម្រើសជាតិដោយមានការតាមដាន និងវាយតម្លៃបច្ចេកទេសឱ្យបានត្រឹមត្រូវ- បន្តពង្រឹងការអប់រំកាយ និងកីឡាក្នុងសាលារៀនដោយយកចិត្តទុកដាក់លើការអនុវត្តម៉ោងអប់រំកាយ និងកីឡា ស្របតាមគោលការណ៍ណែនាំរបស់ក្រសួង- ពង្រីកការអប់រំកាយ និងកីឡានៅក្រៅសាលារៀន ដោយយកចិត្តទុកដាក់លើការអភិវឌ្ឍទីលានកីឡា ការជំរុញការហាត់ប្រាណ ដើម្បីសុខភាព ការបង្កើតក្លឹប និងសមាគមកីឡានៅតាមរាជធានី ខេត្ត- ស្នើឱ្យក្រុមកាងារនៃកិច្ចប្រជុំនេះ យកធាតុចូលដែលទទួលបានពីរាជធានី ខេត្ត និង សហព័ន្ធ កីឡាជាតិ ដាក់ចូលទៅក្នុងអង្គសន្និបាតអប់រំ យុវជន និងកីឡានាពេលខាងមុខ- សហព័ន្ធកីឡាជាតិត្រូវពង្រឹងការអនុវត្តការងារទៅតាមកិច្ចសន្យាឱ្យបាន ត្រឹមត្រូវស្របតាម គោលការណ៍ណែនាំ និងនីតិវិធី ដើម្បីទទួលបានលទ្ធផលតាមការគ្រោងទុក- ការិយាល័យកីឡារាជធានី ខេត្ត ត្រូវពង្រឹងការងារដែលស្ថិតក្រោមដែនសមត្ថកិច្ចរបស់ខ្លួន- មន្ទីរអប់រំ យុវជន និងកីឡារាជធានី ខេត្ត ត្រូវពង្រឹង និងពង្រីកសកម្មភាពកីឡាឱ្យបានខ្លាំងក្លា និងត្រូវរៀបចំឱ្យមានកញ្ចប់ថវិកា សម្រាប់សកម្មភាពកីឡា- កិច្ចការសហប្រតិបត្តិការ និងការទំនាក់ទំនងរវាងមន្ទីរអប់រំ យុវជន និងកីឡារាជធានី ខេត្ត និងសហព័ន្ធកីឡាជាតិជាកត្តាអភិវឌ្ឍវិស័យកីឡា។សូមជម្រាបថា អង្គសិក្ខាសាលានេះ មានគោលបំណងពិនិត្យ និងវាយតម្លៃលើរបាយការណ៍សមិទ្ធផលអនុវិស័យអប់រំកាយ និងកីឡា ដែលបានអនុវត្តក្នុងឆ្នាំសិក្សា២០២៤-២០២៥ និងលើកទិសដៅឆ្នាំសិក្សា២០២៥-២០២៦ ជាពិសេសផ្តល់ឱ្យកាសដល់រាជធានី-ខេត្ត និងសហព័ន្ធកីឡាជាតិ ផ្តល់ធាតុចូលនូវបញ្ហាប្រឈម និងសំណូមពរ ដើម្បីឱ្យរបាយការណ៍លទ្ធផល និងទិសដៅអនុវិស័យ បានពេញលេញ និងគ្រប់ជ្រុងជ្រោយ ព្រមទាំងឯកភាពគ្នាដាក់ចូលក្នុងសន្និបាតក្រសួងអប់រំ យុវជន និងកីឡា នាខែកុម្ភៈ ឆ្នាំ២០២៥ នាពេលខាងមុខ៕

ឯកឧត្តមរដ្ឋមន្ត្រី ជា វ៉ាន់ដេត ជួបពិភាក្សាការងារជាមួយរដ្ឋមន្រ្តីក្រសួងអភិវឌ្ឍន៍ឌីជីថល និងនវានុវត្តន៍បច្ចេកវិទ្យា នៃសាធារណរដ្ឋ កៀរហ្ស៉ីស៊ីស្ថាន

ភ្នំពេញ៖ នារសៀលថ្ងៃទី៤ ខែធ្នូ ឆ្នាំ២០២៥ ឯកឧត្តម ជា វ៉ាន់ដេត រដ្ឋមន្រ្តីក្រសួងប្រៃសណីយ៍និងទូរគមនាគមន៍ (ក.ប.ទ.) បានអញ្ជើញជួបពិភាក្សាការងារជាមួយ ឯកឧត្តម អាហ្សាម៉ាត់ ហ្សាម៉ាងហ្គូឡូវ (Azamat Zhamangulov) រដ្ឋមន្រ្តីក្រសួងអភិវឌ្ឍន៍ឌីជីថល និងនវានុវត្តន៍បច្ចេកវិទ្យា នៃសាធារណរដ្ឋ កៀរហ្ស៉ីស៉ីស្ថាន នៅទីស្តីការ ក.ប.ទ. ក្នុងអំឡុងពេលឯកឧត្តមអញ្ជើញចូលរួមកិច្ចប្រជុំលើកទី៩ នៃគណៈកម្មាធិការតម្រង់ទិសព័ត៌មានល្បឿនលឿនអាស៉ី-ប៉ាស៉ីហ្វិកនិងត្រួតពិនិត្យថ្នាក់តំបន់ នៃកិច្ចប្រជុំកំពូលពិភពលោកស្ដីពីសង្គមព័ត៌មាន ដែលបានសហការរៀបចំឡើងដោយ ក.ប.ទ. និង UN-ESCAP។

ក្រសួងការងារ និងស្ថានទូតខ្មែរនៅកូរ៉េខាងត្បូងរៀបចំការប្រកួតបាល់ទាត់សប្បុរសធម៌ដើម្បីរៃអង្គាសថវិកាជូនមន្ទីរពេទ្យកុមារគន្ធបុប្ជា

បងប្អូនពលករខ្មែរ និងនិស្សិតខ្មែរនៅកូរ៉េនឹងប្រកួតបាល់ទាត់ពានរង្វាន់សប្បុរសធម៌ ដើម្បីរៃអង្គាសថវិកាជូនមន្ទីរពេទ្យកុមារគន្ធបុប្ផា នាថ្ងៃទី៧ ខែធ្នូ ឆ្នាំ២០២៥ នៅកីឡដ្ឋាន ជីនឆុន ស្ព័តថោន ក្រោមការសហការរៀបចំដោយក្រសួងការងារ និងបណ្តុះបណ្តាលវិជ្ជាជីវៈ និងស្ថានឯកអគ្គរាជទូតកម្ពុជា ប្រចាំសាធារណរដ្ឋកូរ៉េ។ការប្រកួតនេះមានការចូលរួមពីក្រុមបាល់ទាត់ចំនួន ៨ក្រុម ដូចជា ក្រុមស្ថានឯកអគ្គរាជទូតកម្ពុជា, ហនុមាន អ៊ឹមសង ,សុចិបុលិ, យុវជនកម្ពុជា, ខ្មែរក្រោម, ស្មារតីកីឡា, ហនុមាន ខាសាន់ និងយុវជន ឥន្រ្ទីស៊ីហឹង។សូមបញ្ជាក់ថា ក្រសួងការងារតែងតែរៀបចំព្រឹត្តិការណ៍នានានៅសាធារណរដ្ឋកូរ៉េ ដើម្បីផ្សារភ្ជាប់ទំនាក់ទំនងគ្នារវាងពលរដ្ឋកម្ពុជាដែលនៅទីនោះ ក្នុងគោលបំណងពង្រឹងនូវកម្លាំងមិត្តភាព សាមគ្គីភាពរវាងខ្មែរនឹងខ្មែរដែលនៅក្រៅប្រទេស និងជាការបង្ហាញពីការយកចិត្តទុកដាក់យ៉ាងដិតដល់ពីសំណាក់ក្រសួងផងដែរ៕

កុមារី ១០ក្រុម ជាប់ជម្រុះ មកកាន់វគ្គផ្ដាច់ព្រ័ត្រ ការប្រកួតប្រជែងថ្នាក់ជាតិ ឆ្នាំ២០២៥ “កម្មវិធីអប់រំបង្កើតហ្គេម”

ក្រុមកុមារី ១០ក្រុមចុងក្រោយ មកពីខេត្ត សៀមរាប បាត់ដំបង កណ្ដាល កំពង់ចាម តាកែវ និងខេត្ត ស្វាយរៀង បានជាប់ការជម្រុះមកកាន់វគ្គផ្ដាច់ព្រ័ត្រ ការប្រកួតប្រជែងថ្នាក់ជាតិឆ្នាំ២០២៥ “កម្មវិធីអប់រំបង្កើតហ្គេម” (National Game Jam 2025) នៅរាជធានីភ្នំពេញ។ សិស្សានុសិស្សដែលបានចូលរួមកម្មវិធីនេះនឹងទទួលបានចំណេះដឹង បំណិនសតវត្ស២១ រួមមាន ការត្រិះរិះពិចារណា ការដោះស្រាយបញ្ហា ការធ្វើការងារជាក្រុម ការសហការបង្កើតគំនិតច្នៃប្រឌិតបែបថ្មី ជំនាញបច្ចេកទេសក្នុងការសរសេរកូដ (Coding) និងការរចនា (Design) ជាដើម។ លើសពីនេះកម្មវិធីសិក្សាបែបថ្មីនេះ ជាការបោះជំហានដ៏សំខាន់មួយក្នុងការចូលរួមជាមួយក្រសួងអប់រំ យុវជន និងកីឡា ដើម្បីលើកកម្ពស់កម្មវិធីអប់រំបច្ចេកវិទ្យាផ្ដល់នូវបរិយាកាសសិក្សាដែលកាន់តែទាក់ទាញ និងប្រកបដោយប្រសិទ្ធភាព។កម្មវិធីនេះ ក៏បានចូលរួមចំណែកលើកទឹកចិត្ត និងពង្រីកវិសាលភាពនៃការចូលរួមរបស់កុមារី ឱ្យចាប់យកការសិក្សាលើការអប់រំស្ទែម បច្ចេកវិទ្យានិងសហគ្រិនភាព ជំរុញលើកទឹកចិត្តកុមារីឱ្យក្លាយជាអ្នកអភិវឌ្ឍហ្គេមជាដំណោះស្រាយបញ្ហាក្នុងសហគមន៍ បានប្រែក្លាយពីអ្នកប្រើប្រាស់បច្ចេកវិទ្យាឱ្យទៅជាអ្នកបង្កើតថ្មីប្រកបដោយភាពច្នៃប្រឌិត និងនវានុវត្តន៍ លើកកម្ពស់ការសិក្សាបែបសកម្មដែលជាតម្រូវការចាំបាច់សម្រាប់ការបរិវត្តកម្មអប់រំ ជាពិសេសលុបបំបាត់គម្លាតយេនឌ័រផងដែរ។គួរបញ្ជាក់ថា ក្រសួងអប់រំ យុវជន និងកីឡា ក្រោមកិច្ចសហការជាមួយអង្គការយូនីសេហ្វ (UNICEF) បាន និងកំពុងអនុវត្តកម្មវិធីអប់រំបង្កើតហ្គេម (Game Changers Coalition) ដែលជាកម្មវិធីនវានុវត្តន៍បច្ចេកវិទ្យាផ្សារភ្ជាប់ការអប់រំ និងបំណិនជីវិត សម្រាប់លើកកម្ពស់ការអប់រំបែបឌីជីថល គាំទ្រដល់អាទិភាពនៃកំណែទម្រង់របស់ក្រសួង ក្រោមការដឹកនាំប្រកបដោយចក្ខុវិស័យ នៃឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា៕

នាយទាហានកងទ័ពជើងទឹកកម្ពុជា បន្តការសិក្សា នៅមហាវិទ្យាល័យកងទ័ពជើងទឹកអូស្ត្រាលី

នៅថ្ងៃព្រហស្បតិ៍ ទី០៤ ខែធ្នូ ឆ្នាំ២០២៥ បណ្ដាញសង្គម កងទ័ពជើងទឹកកម្ពុជា បានឱ្យដឹងថា លោកអនុនាវីត្រី អ៊ិន ម៉ូវីនសុផាត នាយទាហានកងទ័ពជើងទឹក ជាសិក្ខាកាមទី៣ តំណាងឱ្យកងទ័ពជើងទឹកកម្ពុជា ដែលបានទទួលសញ្ញាប័ត្រ បញ្ចប់ការសិក្សា វគ្គនាយទាហានចូលថ្មី នៃមហាវិទ្យាល័យកងទ័ពជើងទឹកអូស្ត្រាលី (New entry officer course) នៅ HMAS Creswell, Jervis Bay NSW ប្រទេសអូស្ត្រាលី។ នាយទាហានកងទ័ពជើងទឹកកម្ពុជាខាងលើ នឹងបន្តចូលសិក្សាវគ្គនាយទាហានប្រយុទ្ធលម្ហសមុទ្រ និងការអនុវត្តផ្ទាល់លើនាវា (Maritime warfare officer course) នៅថ្ងៃទី១៩ ខែមករា ឆ្នាំ២០២៦ ខាងមុខនេះ នៅ HMAS Waston, Waston Bay, NSW ប្រទេសអូស្ត្រាល៕

១១ខែ ឆ្នាំ២០២៥ កម្ពុជាទទួលបានការវិនិយោគជាង ៦០០គម្រោង លើសពេញ១ឆ្នាំ ២០២៤ ជិត ២០០គម្រោង

ក្នុងរយៈពេល ១១ខែ នៃឆ្នាំ២០២៥ នេះ គណៈកម្មាធិការវិនិយោគកម្ពុជា បានសម្រេចចុះបញ្ជីគម្រោង វិនិយោគចំនួន ៦០៩គម្រោង ក្នុងទំហំទុនវិនិយោគសរុបប្រមាណ ៩,៥ប៊ីលានដុល្លារអាម៉េរិក គឺចំនួន គម្រោងវិនិយោគមានការកើនឡើង ២២០គម្រោង ស្មើនឹងប្រមាណ ៥៧% ខណៈទុនវិនិយោគមានការកើន ឡើងប្រមាណ ៣ប៊ីលានដុល្លារអាម៉េរិក ស្មើនឹងប្រមាណ ៤៧% បើប្រៀបធៀបនឹងរយៈពេលដូចគ្នាក្នុងឆ្នាំ ២០២៤ ដែលគណៈកម្មាធិការវិនិយោគកម្ពុជាបានចុះបញ្ជីគម្រោងវិនិយោគត្រឹមតែចំនួន ៣៨៩គម្រោង ក្នុង ទំហំទុនវិនិយោគប្រមាណ ៦,៥ប៊ីលានដុល្លារអាម៉េរិក។ ជាការកត់សម្គាល់ ក្នុងរយៈពេល ១១ខែ គណៈកម្មាធិការវិនិយោគកម្ពុជា បានចុះបញ្ជីគម្រោងវិនិយោគលើសការចុះបញ្ជីគម្រោងវិនិយោគពេញមួយឆ្នាំ២០២៤ រហូតដល់ទៅ ១៩៥គម្រោង។តាមរយៈ សេចក្តីប្រកាសព័ត៌មាន របស់ ក្រុមប្រឹក្សាអភិវឌ្ឍន៍កម្ពុជា នៅថ្ងៃទី៤ ខែធ្នូ ឆ្នាំ២០២៥ នេះ បានឱ្យដឹងថា ក្នុងខែវិច្ឆិកា ឆ្នាំ២០២៥ គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជាបានសម្រេច ចុះបញ្ជីគម្រោងវិនិយោគសរុបចំនួន ៣៤គម្រោង ក្នុងទំហំទុនវិនិយោគសរុបប្រមាណ ២៦២លានដុល្លារ អាម៉េរិក និងអាចបង្កើតការងារបានប្រមាណ ២៤ពាន់កន្លែង។ ក្នុងចំណោមគម្រោងវិនិយោគសរុប គម្រោងវិនិយោគដែលមានទីតាំងស្ថិតនៅក្រៅតំបន់សេដ្ឋកិច្ចពិសេសមានចំនួន ២២គម្រោង ក្នុងទំហំទុន វិនិយោគប្រមាណ ១៩៦លានដុល្លារអាម៉េរិក និងគម្រោងវិនិយោគដែលមានទីតាំងស្ថិតនៅក្នុងតំបន់សេដ្ឋកិច្ច ពិសេសមានចំនួន ១២គម្រោង ក្នុងទំហំទុនវិនិយោគប្រមាណ ៦៦លានដុល្លាវងាម៉េរិក។ព័ត៌មានពិស្ដារ៖

រដ្ឋមន្រ្តីប្រៃសណីយ៍ ពិភាក្សាការងារជាមួយ ប្រធានទីភ្នាក់ងារជាតិសម្រាប់សេវាសាធារណៈ អាហ្សាបៃហ្សង់

ព្រឹកថ្ងៃទី៤ ខែធ្នូ ឆ្នាំ២០២៥ ឯកឧត្តម ជា វ៉ាន់ដេត រដ្ឋមន្រ្តីក្រសួងប្រៃសណីយ៍ និងទូរគមនាគមន៍ (ក.ប.ទ.) បានអញ្ជើញទទួលពិភាក្សាការងារជាមួយ ឯកឧត្តម អ៊ុលវី មេឌីយ៉េវ ( Ulvi Mehdiyev) ប្រធានទីភ្នាក់ងារជាតិសម្រាប់សេវាសាធារណៈ និងនវានុវត្តន៍សង្គម នៃសាធារណរដ្ឋអាហ្សាបៃហ្សង់ នៅទីស្តីការ ក.ប.ទ.។ជំនួបពិភាក្សានេះ ធ្វើឡើងនៅក្នុងអំឡុងពេល ឯកឧត្តម អ៊ុលវី មេឌីយ៉េវ អញ្ជើញចូលរួមកិច្ចប្រជុំលើកទី៩ នៃគណៈកម្មាធិការតម្រង់ទិសព័ត៌មានល្បឿនលឿនអាស៊ី-ប៉ាស៊ីហ្វិក និងត្រួតពិនិត្យថ្នាក់តំបន់ នៃកិច្ចប្រជុំកំពូលពិភពលោក ស្ដីពី សង្គមព័ត៌មាន ដែលបានសហការរៀបចំឡើងដោយ ក.ប.ទ. និង UN-ESCAP៕

ក្រសួងបរិស្ថានគាំទ្រអង្គការ FAO លើគម្រោងសម្បូរត្រី លើកកម្ពស់ភាពស្អាត បង្កើនចំនួនត្រីក្នុងទន្លមេគង្គ និងទន្លេសាបដើម្បីសន្តិសុខស្បៀង

ទីស្តីការក្រសួងបរិស្ថាន៖ នៅរសៀលថ្ងៃទី៤ ខែធ្នូ ឆ្នាំ២០២៥ ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថានបានទទួលជួបលោកស្រី Rebekah Bell តំណាងអង្គការ FAO ប្រចាំនៅកម្ពុជា ដើម្បីពិភាក្សាអំពី គម្រោងសម្បូរត្រី (SAMBO TRIEI Program)។ គម្រោងនេះ មានគោលបំណង លើកកម្ពស់ភាពស្អាត និងការបង្កើនចំនួនត្រីនៅក្នុងបឹងទន្លេសាប និងទន្លមេគង្គ ធានាសន្តិសុខស្បៀងជូនប្រជាសហគមន៍ ក្នុងខេត្តគោលដៅចំនួន ១៥ខេត្ត។ ស្របនឹងការលើកឡើងរបស់គម្រោងសម្បូរត្រី ឯកឧត្តមរដ្ឋមន្រ្តីក៏បានសង្កត់ធ្ងន់លើសមិទ្ធផលការងារ និងបានគាំទ្រដល់ការអនុវត្តគម្រោងនេះ ដើម្បីធានាសន្តិសុខស្បៀងជូនប្រជាជនកម្ពុជា ហើយត្រូវធ្វើយ៉ាងណាឱ្យបឹងទន្លេសាប និងទឹកទន្លមេគង្គមានភាពស្អាត ធានាបាននូវការបំពុលពីសំរាម សំណល់ប្លាស្ទិក ដែលអាចជាមូលហេតុធ្វើឱ្យ ត្រីស្លាប់ និងថយចុះ។ គួរជម្រាបជូនដែរថា គម្រោងសម្បូរត្រី (SAMBO TRIEI Program) ទទួលបានការគាំទ្រពីមូលនិធិអាកាសធាតុបៃតង (GCF) ក្រោមកិច្ចសហប្រតិបត្តិការពីក្រសួងស្ថាប័នចំនួន ៤ ដែលមានក្រសួងសេដ្ឋកិច្ច និងហិរញ្ញវត្ថុ ក្រសួងកសិកម្មរុក្ខាប្រមាញ់ និងនេសាទ ក្រសួងបរិស្ថាន និងក្រសួងធនធានទឹក និងឧតុនិយម ក្នុងការអនុវត្តសកម្មភាពនៅខេត្តគោលដៅចំនួន ១៥ ខេត្ត រួមមាន ៦ ខេត្តជុំវិញទន្លេសាប និង ៦ ខេត្តទៀតតាមបណ្តោយទន្លេមេគង្គ បូករួមនឹងតំបន់ខាងជើងទន្លេមេគង្គ និងខេត្តតាកែវ។

អន្តរភាគីពិនិត្យលើផែនការអភិវឌ្ឍហេដ្ឋារចនាសម្ព័ន្ធរូបវន្ត នៅវិទ្យាល័យបឹងត្របែក

នាព្រឹកថ្ងៃទី៤ ខែធ្នូ ឆ្នាំ២០២៥ នៅទីស្តីការក្រសួង ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្រ្តីក្រសួងអប់រំ យុវជន និងកីឡា បានដឹកនាំកិច្ចប្រជុំស្តីពី ការពិនិត្យលើផែនការអភិវឌ្ឍហេដ្ឋារចនាសម្ព័ន្ធរូបវន្ត នៅវិទ្យាល័យបឹងត្របែក ដោយមានការចូលរួមពីសំណាក់ ឯកឧត្តម លោកជំទាវ ថ្នាក់ដឹកនាំ ក្រសួងអប់រំ យុវជន និងកីឡា និងមន្ត្រីពាក់ព័ន្ធក្រោមឱវាទ។ កិច្ចប្រជុំបានពិនិត្យពិភាក្សាផ្លាស់ប្តូរយោបល់ប្រមូលធាតុចូលដើម្បីកែលម្អលើ របាយការណ៍គម្រោងផែនការមេ ដែលបានសហការគ្នាព្រាងដោយ ក្រុមការងារជំនាញមកពី អគ្គនាយកដ្ឋានកីឡា នាយកដ្ឋានមធ្យមសិក្សាចំណេះទូទៅ នាយកដ្ឋានតម្រង់ទិសវិជ្ជាជីវៈ នាយកដ្ឋានសំណង់ និងទ្រព្យសម្បត្តិរដ្ឋ មន្ទីរអប់រំ យុវជន និងកីឡា រាជធានីភ្នំពេញ និងកម្មវិធីសាលារៀនជំនាន់ថ្មី និងសម្របសម្រួលដោយអគ្គលេខាធិការដ្ឋាន។បន្ទាប់ពីមតិសំណេះសំណាលពាក់ព័ន្ធនឹង របាយការណ៍វឌ្ឍនភាពការងារ នៃការរៀបចំផែនការអភិវឌ្ឍ ទស្សនទានផែនការអភិវឌ្ឍហេដ្ឋារចនាសម្ព័ន្ធរូបវន្ត ប្លង់លម្អិត និងផែនការចំណាយរួចមក ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានផ្តល់អនុសាសន៍មួយចំនួនជូនក្រុមការងារដើម្បីអនុវត្តបន្ត រួមមាន៖ ១. សូមពិភាក្សាគ្នាឱ្យលម្អិតបន្ថែមទៀត ដើម្បីរៀបចំផែនការអភិវឌ្ឍសាលារៀនបឹងត្របែកទាំងមូល ទាំងផ្នែករឹង និងផ្នែកទន់ ២. លម្អិត និងពន្យល់ឱ្យច្បាស់ពីលទ្ធផលរំពឹងទុកដែលទទួលបាន ត្រូវឆ្លើយតបនឹងទំហំនៃការវិនិយោគ ៣. រៀបចំគម្រោងជាដំណាក់កាល សម្រាប់ផែនការអនុវត្តអំឡុង ៥ឆ្នាំ ទៅ១០ឆ្នាំ ៤. កំណត់អាទិភាពគម្រោង និងការងារចាំបាច់ដែលត្រូវចាប់ផ្តើមមុន ដើម្បីគាំទ្រដល់ការរៀន និងបង្រៀនសំដៅលើកកម្ពស់លទ្ធផលសិក្សារបស់សិស្ស ៥. សូមប្រើប្រាស់ធនធានឱ្យមានប្រសិទ្ធភាព ដោយបែងចែកជាគម្រោងដែលត្រូវប្រើថវិកា និងគម្រោងដែលមិនចាំបាច់ប្រើថវិកាគាំទ្រ ៦. ពាក់ព័ន្ធនឹងការអនុវត្តសាកល្បងគន្លងអប់រំថ្មី សូមពិនិត្យមើលនិងកំណត់ឱ្យច្បាស់ពីគន្លងអប់រំដែលត្រូវផ្តោតអនុវត្ត។សូមបញ្ជាក់ដែរថា គំនិតផ្តួចផ្តើមរៀបចំផែនការអភិវឌ្ឍហេដ្ឋារចនាសម្ព័ន្ធរូបវន្ត នៅវិទ្យាល័យបឹងត្របែក ត្រូវបានធ្វើឡើង ឆ្លើយតបនឹងបរិការណ៍ដែលកម្ពុជាត្រូវរៀបចំគន្លងអប់រំថ្មី ស្របតាម “អនុសាសន៍គន្លឹះ៨ចំណុច” ដូចជា៖ ១. មានទីធ្លាធំទូលាយ ហ៊ុមព័ទ្ធដោយប្រព័ន្ធអេកូឡូស៊ីសេដ្ឋកិច្ច ២. ពង្រឹងការប្រឡងមធ្យមសិក្សាបឋមភូមិ និងលក្ខណៈវិនិច្ឆ័យ ៣. កែប្រែទស្សនៈចំពោះការបណ្តុះបណ្តាលបច្ចេកទេសវិជ្ជាជីវៈ ៤. ផ្សារភ្ជាប់កម្មវិធីសិក្សាទៅនឹងឧត្តមសិក្សា សាស្ត្រាចារ្យឧត្តមសិក្សា ជួយបង្រៀន សិស្សដែលរៀនពូកែបន្តទៅសាកលវិទ្យាល័យ ៥. បញ្ចូលយុទ្ធសាស្ត្របង្រៀន និងកម្មវិធីសាលារៀនជំនាន់ថ្មី ៦. សហការជាមួយគម្រោងកែលម្អកម្មវិធីអប់រំនានា ៧. បង្កើតភាពជាដៃគូជាមួយដៃគូអភិវឌ្ឍនានា ៨. បន្តសិក្សាបន្ថែមពីទីផ្សារការងារ និងជំនាញដែលមានតម្រូវការ៕

រាជរដ្ឋាភិបាលកម្ពុជា អំពាវនាវអាជីវករប្រកាន់ខ្ជាប់លើភាពស្មោះត្រង់ក្នុងការប្រកបអាជីវកម្ម

នៅក្នុងបរិការណ៍ដែលកំពុងមានការគាំទ្រផលិតក្នុងស្រុក មន្រ្តីជាន់ខ្ពស់នៃរាជរដ្ឋាភិបាលកម្ពុជា បានអំពាវនាវទៅដល់អាជីវករ ក្រុមហ៊ុន សហគ្រាស សូមប្រកាន់ខ្ជាប់ទៅលើភាពស្មោះត្រង់ក្នុងការប្រកបអាជីវកម្ម ពិសេសគោលការណ៍សុច្ចរិតភាព។ក្នុងឱកាសអញ្ជើញបើកព្រឹត្តិការណ៍ពិព័រណ៍ពាណិជ្ជកម្មកម្ពុជា លើកទី១៨ កាលពីព្រឹកថ្ងៃទី៤ ខែធ្នូនេះ ឯកឧត្តម ស៊ុន ចាន់ថុល ឧបនាយករដ្ឋមន្រ្តី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានមានប្រសាសន៍ថា ដើម្បីរក្សាបានកេរ្តិ៍ឈ្មោះ ពាណិជ្ជនាម និងការគាំទ្រពីអ្នកប្រើប្រាស់ អាជីវករ ក្រុមហ៊ុន សហគ្រាស គួរណាស់ក្នុងការផ្តល់ភាពស្មោះត្រង់ត្រឡប់ទៅវិញ ទាំងការផ្តល់សេវាកម្ម ការលក់ដូរ និងគោលការណ៍សុច្ចរិតភាព និងសច្ចភាពចៀសវាងជាកំហិត និងលុបបំបាត់ឱ្យខានតែបាននូវការក្លែងបន្លំគុណភាព និងប្រភពជាដើម។ជាមួយនេះ ឯកឧត្តម ឧបនាយករដ្ឋមន្រ្តី ក៏បានលើកទឹកចិត្តឱ្យវិស័យឯកជនជំរុញការផលិត ដោយគិតគូរអំពីគុណភាព សុវត្ថិភាព និងសោភ័ណភាពនៃការវេចខ្ចប់តាមស្តង់ដារ ដើម្បីទទួលបានការគាំទ្រនៅលើទីផ្សារក្នុងស្រុក និងជាជំហានៗ ឈានទៅរកការនាំចេញ និងម្យ៉ាងទៀតសូមពិចារណាពង្រីកមូលដ្ឋានផលិតកម្មឱ្យបានសមស្រប ដើម្បីឆ្លើយតបទៅនឹងតម្រូវការទីផ្សារបច្ចុប្បន្នផងដែរ។នៅក្នុងព្រឹត្តការណ៍ពិព័រណ៍ពាណិជ្ជកម្មនេះ ឯកឧត្តម ស៊ុន ចាន់ថុល បានកោតសរសើរចំពោះកិច្ចខិតខំប្រឹងប្រែងរបស់ក្រសួងពាណិជ្ជកម្ម ក្រុមប្រឹក្សាអភិវឌ្ឍន៍កម្ពុជា ក្រសួង-ស្ថាប័ន ពាក់ព័ន្ធ និងវិស័យឯកជន ដែលជានិច្ចកាលមានកិច្ចសហប្រតិបត្តិការល្អ ក្នុងការចរចាពាណិជ្ជកម្ម ទាក់ទាញវិនិយោគ និងរុញច្រាន កំណើនសេដ្ឋកិច្ច-ពាណិជ្ជកម្ម តាមរយៈបង្កើនការនាំចេញ និងជំរុញវត្តមានផលិតផលកម្ពុជា នៅលើទីផ្សារតំបន់ និងពិភពលោក។សូមបញ្ជាក់ថា គិតក្នុងរយៈពេល១០ខែ ក្នុងឆ្នាំ២០២៥នេះទំហំពាណិជ្ជកម្មសរុបរបស់កម្ពុជា មានទំហំ ៥៣,៥៨ ប៊ីលានដុល្លារអាម៉េរិក កើនឡើងប្រមាណ ១៧ភាគរយ ធៀបនឹងរយៈពេលដូចគ្នាក្នុងឆ្នាំ២០២៤។ ដោយឡែក យោងតាមទិន្នន័យការអនុម័តគម្រោងវិនិយោគនៅកម្ពុជា នៅក្នុងឆ្នាំ២០២៥នេះ រាជរដ្ឋាភិបាលកម្ពុជា នឹងអនុម័តគម្រោងវិនិយោគលើសពី ៦០០គម្រោង ខណៈគិតត្រឹមដំណាច់ខែវិច្ឆិកាឆ្នាំ២០២៥ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគមានលក្ខណៈសម្បត្តិគ្រប់គ្រាន់ (QIPs) ចំនួន ៦០៩គម្រោង ដែលមានទុនវិនិយោគសរុបប្រមាណ៩.៥ពាន់លានដុល្លារអាម៉េរិក និងអាចបង្កើតការងារបានជាង ៤០០ ពាន់កន្លែង៕អត្ថបទ៖ ឈិត បូរ៉ាវី

បណ្ដាញសង្គម

ព័ត៌មានថ្មីៗ

Napoli ទិញផ្តាច់ Rasmus Hojlund ពី Manchester United តម្លៃ ៥០ លានអឺរ៉ូ

មនុស្សរាប់ពាន់នាក់នៅអាហ្សង់ទីន តវ៉ាប្រឆាំងអំពើហិង្សាលើស្ត្រី ក្នុងពេលមានកំហឹងចំពោះការសម្លាប់ស្ត្រីជំទង់ម្នាក់

វត្ថុអនុស្សាវរីយ៍បាល់ទាត់ពិភពលោកតម្លៃជាង ២លានផោនត្រូវដាក់ដេញថ្លៃនៅទីក្រុងឡុងដ៍

នគរបាល បណ្តេញក្រុមអ្នកតវ៉ា ចេញពីរោងចក្រប្រេងនៅប្រទេសបូលីវី

ទីក្រុងម្ចាស់ផ្ទះបាល់ទាត់ពិភពលោក បង្ហាញមុខម្ហូបល្បីៗទាក់ទាញអ្នកគាំទ្រ មកពីជុំវិញពិភពលោក

ក្រុមប្រឹក្សាសម្ព័ន្ធយោធា NATO ធ្វើទស្សនកិច្ចទីក្រុងគីវ បន្ទាប់ពីការវាយប្រហាររបស់រុស្ស៊ី

កម្ពុជាត្រូវការជ័យជម្នះដើម្បីស្ដារប្រជាប្រិយ ខណៈគ្រូប៊ូតង់ ចាត់ទុកជារឿងល្អ ក្នុងជំនួបមិត្តភាពអន្ដរជាតិយប់នេះ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877