BTV NEWS

ព្រះអង្គម្ចាស់ នរោត្តម ចក្រាវុធ ជួបពិភាក្សាការងារជាមួយ ឯកឧត្តម Chen Zhou អនុរដ្ឋមន្រ្តី ក្រសួងទំនាក់ទំនងអន្តរជាតិចិន

សេដ្ឋកិច្ចកម្ពុជានៅបន្តរឹងមាំ៖ ២២ខែនៃរាជរដ្ឋាភិបាលអាណតិ្តទី៧របស់សម្តេចធិបតី រោងចក្រសហគ្រាសកើនជាង៥,៣ពាន់ដែលបង្ហាញពីភាពរឹងមាំ និងជំនឿទុកចិត្ត

លោកសាស្រ្តាចារ្យរង លូ លីឃាង អញ្ជើញសម្ពោធបើកជាផ្លូវការគ្លីនិកជំងឺភ្នែកស្ងួត នៃមនី្ទរពេទ្យព្រះអង្គឌួង

ក្រសួងធម្មការ បើកវគ្គបណ្ដុះបណ្ដាលស្ដីពីតួនាទី ភារកិច្ចនិងក្រមសីលធម៌អាចារ្យខ្មែរ (ជំនាន់ទី៥០)

ព័ត៌មានជាតិ

គណៈកម្មាធិការគណបក្សប្រជាជនកម្ពុជា ឃុំតាំងក្រសាំងប្រកាសបញ្ចូលសមាជិកថ្មីជិតបីរយនាក់

កំពង់ឆ្នាំង ៖ គណៈកម្មាធិការគណបក្សប្រជាជនកម្ពុជា ឃុំតាំងក្រសាំង ស្រុកទឹកផុស ខេត្តកំពង់ឆ្នាំង នៅរសៀលថ្ងៃទី២៨ ខែធ្នូម្សិលមិញ បានរៀបចំពិធីប្រកាសបញ្ចូលសមាជិកថ្មី គណបក្សប្រជាជនកម្ពុជាសរុបចំនួន២៧៤នាក់ នៅឃុំតាំងក្រសាំង ក្រោមអធិបតីភាព ឯកឧត្តម ឈឹម សៅគី សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងារថ្នាក់កណ្តាលចុះជួយមូលដ្ឋាន ឃុំតាំងក្រសាំង។ពិធីនេះ រៀបចំធ្វើឡើងនៅទីស្នាក់ការគណបក្សប្រជាជនកម្ពុជា ឃុំតាំងក្រសាំង ស្រុកទឹកផុស ខេត្តកំពង់ឆ្នាំង។នៅក្នុងអង្គពិធីឯកឧត្តម ឈឹម សៅគី មានប្រសាសន៍ថា ក្នុងនាមគណបក្សប្រជាជនកម្ពុជា និងឯកឧត្តមផ្ទាល់ សូមស្វាគមន៍យ៉ាងកក់ក្ដៅ ចំពោះបងប្អូនប្រជាពលរដ្ឋ និងយុវជនទាំងអស់ ដែលបានស្ម័គ្រចិត្តសុំចូលរួមជាសមាជិករបស់គណបក្សនាពេលនេះ។ ការសម្រេចចិត្តចូលរួមជាសមាជិកគណបក្សប្រជាជនកម្ពុជានៅពេលនេះ គឺពិតជាការសម្រេចចិត្តដ៏ត្រឹមត្រូវ និងមានមោទនភាពជាទីបំផុត ពីព្រោះគណបក្សប្រជាជនកម្ពុជាជាគណបក្សមួយមានវ័យចំណាស់ជាងគេ មានការគាំទ្រពី ប្រជាជនច្រើនជាងគេ មានធនធានមនុស្សច្រើនជាងគេ មានស្នាដៃយ៉ាងច្រើនក្នុង ការអភិវឌ្ឍ និងការពារបូរណភាពទឹកដី។ក្រៅពីនេះឯកឧត្តម បានអំពាវនាវដល់សមាជិកាបក្សទាំងចាស់ទាំងថ្មីទាំងអស់ត្រូវប្រកាន់ខ្ជាប់នូវសាមគ្គីភាព ស្រលាញ់ថ្នាក់ដឹកនាំបក្ស និងជឿជាក់ លើថ្នាក់ដឹកនាំគណបក្សប្រជាជនកម្ពុជា ជាពិសេសសម្តេចអគ្គមហាសេនាបតីតេជោ ហ៊ុន សែន ស្ថាបនិកសន្តិភាព ប្រធានគណបក្សប្រជាជនកម្ពុជា និងសម្ដេចមហាបវរធិបតី ហ៊ុន ម៉ាណែត អនុប្រធានគណបក្ស និងជា នាយករដ្ឋមន្ត្រីកម្ពុជា ដែលបាននឹងកំពុងខិតខំប្រឹង ដឹកនាំប្រទេសឱ្យមានការអភិវឌ្ឍ រីកចម្រើនលើគ្រប់វិស័យ ប្រកបដោយកិត្យានុភាពជាតិនៅលើឆាកអន្ដរជាតិ។សមាជិកបក្សប្រជាជនកម្ពុជាថ្មី បានលើកឡើងថា ការសម្រេចចូលរួមជាសមាជិករបស់គណបក្សប្រជាជនកម្ពុជា ដោយមើលពីការដឹកនាំរបស់រាជរដ្ឋាភិបាលពីគណបក្សប្រជាជន នៅមូលដ្ឋានឃុំតាំងក្រសាំង ស្រុកទឹកផុស ខេត្តកំពង់ឆ្នាំង មានការអភិវឌ្ឍរីកច្រើន និងប្រទេសជាតិមានសុខសន្តិភាពពេញបរិបូណ៌។ លើសពីនេះ ពួកគេបានប្តេជ្ញា គោរពតាមបទបញ្ជារបស់គណបក្សជាជនកម្ពុជា និងបង្ហាញអារម្មណ៍រីករាយដែលបានចូលរួមជាសមាជិករបស់គណបក្សប្រជាជនកម្ពុជាផងដែរ។គួរបញ្ជាក់ដែរថា គណបក្សប្រជាជនកម្ពុជា ដែលកំពុងដឹកនាំរាជរដ្ឋាភិបាល តាមរយៈការបោះឆ្នោតផ្តល់ទំនុកចិត្តពីប្រជាពលរដ្ឋច្រើនលើសលុប ក្នុងរយៈពេល៧អាណត្តិនេះ បានអភិវឌ្ឍន៍ប្រទេសជាតិ រីកចំរើនលើគ្រប់វិស័យ និងជាពិសេសពលរដ្ឋរស់នៅក្នុងភាពសុខសាន្ត ក្រោមម្លប់សុខសន្តិភាពពេញបរិបូណ៍៕អត្ថបទ៖ ទូច សោភ័ណ

សម្តេច ម៉ែន សំអន ៖ វិនាសកម្មនៃសង្គ្រាម បានបន្សល់ទុកនូវផលវិបាកយ៉ាងធ្ងន់ធ្ងរដល់កម្ពុជា

ភ្នំពេញ ៖ សម្តេចកិត្តិសង្គហបណ្ដិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ បានអញ្ជើញទស្សនាសារមន្ទីរតេជោសន្តិភាព ដោយសម្ដេចបានលើកឡើងថា វិនាសកម្មនៃសង្គ្រាម បានបន្សល់ទុកនូវផលវិបាកយ៉ាងធ្ងន់ធ្ងរ ទាំងខាងប្រជាសាស្រ្ត ភូមិសាស្រ្តនយោបាយ សេដ្ឋកិច្ច សង្គម និងវប្បធម៌ ។ការលើកឡើងបែបនេះ នៅក្នុងឱកាសសម្ដេចអញ្ជើញទៅទស្សនាសារមន្ទីរតេជោសន្ដិភាព នារសៀលថ្ងៃទី២៨ ខែធ្នូ ឆ្នាំ២០២៤នេះ។សម្តេចកិត្តិសង្គហបណ្ដិត ម៉ែន សំអន មានប្រសាសន៍ថា វត្តមានរបស់សារមន្ទីរ បានក្លាយទៅជាមជ្ឈមណ្ឌលប្រវត្តិសាស្ត្រសង្រ្គាម និងការដោះស្រាយវិបត្តិនៃសំណល់ជាតិផ្ទុះក្រោយសង្រ្គាម ហើយក៏ជាសក្ខីភាព និងបានរំលឹកពីអតីតកាលដែលកម្ពុជាបានឆ្លងកាត់នូវសង្គ្រាមដ៏រ៉ាំរ៉ៃ និងបង្ហាញពីវិនាសកម្មនៃសង្គ្រាមបាននាំមកនូវភាពឈឺចាប់ ការនិរាសព្រាត់ប្រាស់គ្រួសារ និងជនពិការ ហើយបានបន្សល់ទុកនូវផលវិបាកយ៉ាងធ្ងន់ធ្ងរ ទាំងខាងប្រជាសាស្រ្ត ភូមិសាស្រ្តនយោបាយ សេដ្ឋកិច្ច សង្គម និងវប្បធម៌ផងដែរ។សម្តេចបានមានប្រសាសន៍បន្តទៀតថា ប្រទេសមានសន្តិភាព គឺមានលទ្ធភាព ផ្តោតការយកចិត្តទុកដាក់លើកិច្ចអភិវឌ្ឍន៍សេដ្ឋកិច្ច សង្គម និងសុខមាល ភាពរបស់ប្រជាជន។ ផ្ទុយទៅវិញ បើបាត់បង់សន្តិភាព នោះអ្វីៗគ្រប់យ៉ាង «សុខសន្តិភាព និងស្ថេរភាពនយោបាយ គឺជាមូលដ្ឋានគ្រឹះដ៏ចាំបាច់ សម្រាប់ធ្វើការអភិវឌ្ឍប្រទេសជាតិរបស់រាជរដ្ឋាភិបាល»។សម្ដេចក៏បានថ្លែងនូវការកោតសសើរ និងវាយតម្លៃខ្ពស់ ចំពោះមជ្ឈមណ្ឌលសកម្មភាពកំចាត់មីនកម្ពុជា ក្រោមការដឹកនាំរបស់ ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកអគ្គនាយកមជ្ឈមណ្ឌលសកម្មភាពកំចាត់មីនកម្ពុជា ដែលបានផ្តួចផ្តើមគំនិតក្នុងការកសាងសារមន្ទីរតេជោសន្តិភាពនេះឡើង។មិនតែប៉ុណ្ណោះ ឯកឧត្តមក៏បានកសាងនូវស្នាដៃ រួមជាមួយសមិទ្ធិផលជាច្រើនដែលពាក់ព័ន្ធនឹងវិស័យមីននៅព្រះរាជាណាចក្រកម្ពុជា តាមរយៈការចូលរួមកែប្រែតំបន់សង្គ្រាមឲ្យទៅជាតំបន់អភិវឌ្ឍន៍ ស្របតាមប្រសាសន៍សម្តេចតេជោ ហ៊ុន សែន ប្រធានព្រឹទ្ធសភា អតីតនាយករដ្ឋមន្ត្រី និងជាប្រធានគណបក្សប្រជាជនកម្ពុជា។ទន្ទឹមនឹងនោះផងដែរក្រោមការដឹកនាំប្រកបដោយចក្ខុវិស័យវែងឆ្ងាយរបស់សម្តេចមហាបវរធិបតី ហ៊ុន ម៉ាណែ នាយករដ្ឋមន្ត្រី នៅក្នុងអណត្តិទី៧ ក៏បានជម្រុញអនុវត្តការងារនេះស្របតាមយុទ្ធសាស្ត្របញ្ចកោណដំណាក់ទី១ និងផែនការយុទ្ធសាស្ត្រជាតិសកម្មភាពមីន ២០១៨- ២០២៥ និងចក្ខុវិស័យ «កម្ពុជាគ្មានមីនឆ្នាំ២០២៥»។ថ្លែងក្នុងឱកាសនោះ ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកអគ្គនាយកមជ្ឈមណ្ឌលសកម្មភាពកំចាត់មីនកម្ពុជា (ស៊ីម៉ាក់) បានថ្លែងអំពីដំណើរការ និងវឌ្ឍនភាពការសាងសង់សារមន្ទីរតេជោសន្តិភាព។ សារមន្ទីរមួយនេះ ត្រូវសាងសង់ឡើងនៅលើផ្ទៃដី១២ហិកតា ស្ថិតឃុំត្រពាំងធំ ស្រុកបាគង ខេត្តសៀមរាប ហើយត្រូវបានសាងសង់ឡើង ក្រោមជំនួយឧបត្ថម្ភគាំទ្រពីប្រទេសជប៉ុន ដែលមានរូបរាងជាគ្រាប់មីនប្រឆាំងមនុស្សធំជាងគេនៅលើពិភពលោក។ ឯកឧត្តម បានបន្តទៀតថា រយៈពេលជាង៣២ឆ្នាំមកនេះ ប្រទេសជប៉ុន បានជួយដល់ស៊ីម៉ាក់ សម្រាប់វិស័យមីននៅកម្ពុជា ដែលជំនួយទាំងនោះមានជាសម្ភារមានជាថវិកា ក៏ដូចជាការផ្តល់ជំនួយប្រឹក្សាបច្ចេកទេសជាដើម៕

លោក សួន សេរីរដ្ឋា៖ក្រុមប្រឆាំងងងឹតភ្នែកមើលមិនឃើញពីការអភិវឌ្ឍន៍នៅក្រុងរុនតាឯកតេជោសែន

ភ្នំពេញ ៖ លោក សួន សេរីរដ្ឋា ប្រធានក្រុមប្រឹក្សាភិបាល វេទិកាសន្តិភាពកម្ពុជា បានលើកឡើងថា ជនអគតិនៃក្រុមប្រឆាំងងងឹតងងុល មើលមិនឃើញពីរាជរដ្ឋាភិបាលដែលបានខិតខំ ធ្វើឱ្យក្រុងរុនតាឯកតេជោសែន មានការអភិវឌ្ឍន៍រីកចំរើនគ្រប់វិស័យ។ លោកលើកឡើងបែបនេះ នៅកិច្ចការក្រុងពាលីបើកកម្មវិធីដារលាន ដាល់អំបុកឈ្នះឈ្នះ នាថ្ងៃទី២៨ខែធ្នូឆ្នាំ២០២៤នេះ។ លោកមានប្រសាសន៍ថា សុខសន្ដិភាពរបស់កម្ពុជា ដែលសម្ដេចតេជោហ៊ុន សែន អតីតនាយករដ្ឋមន្ដ្រី សម្ដេចបានលបានលះបង់គ្រប់យ៉ាងដើម្បីរកសន្តិភាពជូនប្រទេសជាតិ ហើយត្រូវបានប្រជាពលរដ្ឋទទូលស្គាល់ទូទាំងប្រទេសក៏ដូចជាមានការទទួលស្គាល់លើពិភពលោក ប៉ុន្ដែមានក្រុមជ្រុលនិយមនៃពួកប្រឆាំងមួយចំនួននៅតែញុះញង់និងមួលបង្កាច់រារដ្ឋាភិបាលកម្ពុជាថា យកប្រជាពលរដ្ឋដែលព្រមចាកចេញពីតំបន់រមណីយដ្ឋានអង្គរទៅទុកពួកគាត់ចោល មិនមានការមើលថែពីអាជ្ញាធរទៅវិញ។លោកបញ្ជាក់ថា ក្រុងរុនតាឯកតេជោសែន នាពេលបច្ចុប្បន្ន មានភាពរីកចំរើនគ្រប់វិស័យ ដូចជាផ្លូវថ្នល់បេតុងខ្វាត់ខ្វែង មានប្រព័ន្ធអគ្គិសនី មានទឹកស្អាតសាលារៀន ហើយប្រជាពលរដ្ឋក៍មានការរស់នៅប្រកបដោយសុខសន្ដិភាព។

ការទទួលពាន «ស៥» គឺជាការធ្វើឱ្យប្រសើរឡើងនូវផលិតភាព និងប្រសិទ្ធភាពការងារ

ភ្នំពេញ ៖ រដ្ឋមន្រ្តីក្រសួងឧស្សាហកម្ម លើកទឹកចិត្តដល់ក្រុមហ៊ុន សហគ្រាស មិនទាន់បានទទួលពាន «ស៥» ត្រូវខិតខំបន្តទៀត ដើម្បីធ្វើ ឱ្យប្រសើរឡើងនូវផលិតភាព និងប្រសិទ្ធភាពការងារ សម្រាប់បង្កើនផលិតភាព ដើម្បីកាត់បន្ថយថ្លៃដើមផលិត បង្កើនប្រាក់ចំណេញ ដោយមិនចាំបាច់ដំឡើងថ្លៃលក់ផលិតផល ដែលនាំប៉ះពាល់ដល់ការប្រកួតប្រជែង។ឯកឧត្តម ហែម វណ្ឌឌី រដ្ឋមន្រ្តីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ លើកឡើងនៅក្នុងកម្មវិធីប្រគល់ ពានរង្វាន់សមិទ្ធផលផលិតភាព «ស៥» ប្រចាំឆ្នាំ២០២៤ នៅថ្ងៃទី ២៧ ខែធ្នូ នេះថា ការអនុវត្តវិធីសាស្រ្ត «ស៥» ជាវិធីសាស្រ្ត សាមញ្ញ ដែលអាចអនុវត្តបាននៅគ្រប់ទីកន្លែង គ្រប់ប្រភេទ និងគ្រប់ទំហំក្រុមហ៊ុន-សហគ្រាស មិនថាតែឧស្សាហកម្មធុនស្រាល ឬធុនធ្ងន់ ផលិតម្ហូបអាហារ ឬមិនមែនអាហារ និងសេវាកម្ម ដោយសារតែវាមានចំណុចពិសេសមួយ «ស៥» ដែលជាមូលដ្ឋានគ្រឹះ សម្រាប់ការចាប់ផ្តើមនូវវិធីសាស្ត្រអភិវឌ្ឍផលិតភាពដទៃទៀត។ឯកឧត្តមរដ្ឋមន្រ្តី បានលើកឡើងពីការខិតខំប្រឹងប្រែងពីដ្ឋាភិបាលកម្ពុជា នាអណត្តទី ៧នេះ ក្រោមការដឹកនាំតាមមាគ៌ាដ៏ត្រឹម ត្រូវ ប្រកបដោយគតិបណ្ឌិត និងទស្សនៈវែងឆ្ងាយ របស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា, ប្រទេសកម្ពុជា មានការ អភិវឌ្ឍស្ទើរគ្រប់វិស័យ ក្នុងនោះវិស័យឧស្សាហកម្ម ជាវិស័យស្នូលសម្រាប់ជួយជម្រុញកំណើនសេដ្ឋកិច្ចជាតិ។ជុំវិញ «ស៥» នេះ, ឯកឧត្តម ង៉ែត វិបុល អគ្គនាយកឧស្សាហកម្ម នៃក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្ត លើកឡើងផងដែរថា ការអភិវឌ្ឍវិស័យឧស្សាហកម្ម គឺជាកត្តាគន្លឹះដ៏សំខាន់ ដែលមិនអាចខ្វះបាន ក្នុងការទ្រទ្រង់កំណើនសេដ្ឋកិច្ច របស់ប្រទេសជាតិយើង សម្រាប់ការដំណើរឆ្ពោះទៅ នៃការប្រែក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ ២០៣០ និងប្រែ ក្លាយជាប្រទេសមានចំណូលកម្រិតខ្ពស់នៅឆ្នាំ ២០៥០។ឯកឧត្តម បន្តថា ចំណែកការអនុវត្តវិធីសាស្រ្ត «ស៥» នេះ បានជួយបំបាត់ភាពអសកម្មនានាដូចជា ការខ្ជះខ្ជាយពេលវេលា, វត្ថុធាតុដើម, ផលិតផលខូច, ភាពគ្មានសណ្តាប់ធ្នាប់នៅកន្លែងការងារ និងភាពគ្មានអនាម័យ។ ដូច្នេះ «ស៥» បាននាំមកនូវ អត្ថប្រយោជន៍រួមមាន ប្រសិទ្ធភាពការងារ, ទីតាំងផលិតមានភាពស្រស់ស្រាយ, អនាម័យល្អ, កាត់ថ្លៃដើមផលិត, បង្កើនប្រាក់ ចំណេញ, ជួយពង្រឹងសមត្ថភាពអ្នកធុរកិច្ច ក្នុងដំណើរការអាជីវកម្មប្រកបដោយនិរន្តភាព។សូមបញ្ជាក់ថា៖ ជុំវិញការអនុវត្តន៍ ស៥ នេះរួមមាន៖ ១. សម្រិតសម្រាំង ២. សណ្តាប់ធ្នាប់ ៣. សម្អាត ៤. ស្តង់ដារ និង៥. ស្ថិតស្ថេរ៕អត្ថបទ៖ សុន រ៉ាឌី

អគារពុទ្ធិកសិក្សារាជបូណ៌ បានសម្ពោធឱ្យប្រើប្រាស់ដើម្បីបណ្តុះបណ្តាលព្រះសង្ឃក្នុងព្រះពុទ្ធសាសនា

ភ្នំពេញ ៖ លោកជំទាវបណ្ឌិត ជា សិរី អញ្ជើញជាគណៈធិបតី ក្នុងដាក់សម្ពោធឱ្យប្រើប្រាស់អគារពុទ្ធិកសិក្សារាជបូណ៌ ដើម្បីបណ្តុះចំណេះ ដឹង ឱ្យកាន់តែប្រសើរឡើង ដល់ធនធានព្រះសង្ឃនៃព្រះពុទ្ធសាសនា ក៏ដូចជាថែរក្សាតម្លៃព្រះពុទ្ធសាសនា និងលើកតម្កើងមរតកវប្បធម៌ជាតិឱ្យរុងរឿង។ លោកជំទាវបណ្ឌិត ជា សិរី អគ្គទេសាភិបាលធនាគារជាតិនៃកម្ពុជា លើកឡើងក្នុងពិធីសម្ពោធដាក់ឱ្យប្រើប្រាស់អគារពុទ្ធិក សិក្សារាជបូណ៌ នៅខេត្តសៀមរាប នៅថ្ងៃទី២៧ ខែធ្នូនេះថា ជុំវិញវិស័យព្រះពុទ្ធសាសនានេះ ក្នុងរបបប្រល័យពូជសាសន៍ ព្រះពុទ្ធ សាសនាត្រូវបានបំផ្លិចបំផ្លាញ និងលុបបំបាត់យ៉ាងសាហាវនិងផ្តាច់ការ ដោយព្រះសង្ឃត្រូវបានបង្ខំឱ្យលាចាកសិក្ខាបទ ដើម្បីធ្វើ ការងារពលកម្មដូចប្រជាជនទូទៅ និងជាពិសេសក្បួនច្បាប់ និងគម្ពីរព្រះពុទ្ធសាសនាជាច្រើនត្រូវបានកំទេចចោល ប៉ុន្តែក្រោយជ័យជម្នះ ៧ មករា ១៩៧៩ ប្រទេសកម្ពុជាបានជ្រកក្រោមម្លប់សន្តិភាពពេញលេញ ដែលអនុញ្ញាតឱ្យប្រជាជនខ្មែរមានសិទ្ធិ ក្នុងការ គោរពបូជាសាសនា ធ្វើបុណ្យទានដោយចិត្តជ្រះថ្លា និងសេរីភាព ក្រោមការដឹកនាំប្រកបដោយគតិបណ្ឌិតរបស់ សម្តេចអគ្គមហា សេនាបតីតេជោ ហ៊ុន សែន ប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។លោកជំទាវបណ្ឌិត បន្តថា ចំណែកវត្តរាជបូណ៌ បច្ចុប្បន្នដែលមានសម្តេចព្រះព្រហ្មរតនមុនី ពិន សែម ជាព្រះគ្រូចៅអធិការ សម្តេចបានរៀបចំឱ្យមានសាលាពុទ្ធិកវិទ្យាល័យ ដែលមានបង្រៀនមុខវិជ្ជាអក្សរសាស្ត្រខ្មែរ បាលីសំស្ក្រឹត ព្រះពុទ្ធសាសនា សីលធម៌ រូបវិទ្យា គីមីវិទ្យា គណិតវិទ្យា សង្គមវិទ្យា វិទ្យាសាស្ត្រ និងមានសមណសិស្សប្រមាណជាង ៥០០ អង្គ បានធ្វើការសិក្សា ជារៀងរាល់ឆ្នាំ។ សម្តេចបានរៀបចំបង្កើតឱ្យមានស្ថានីយវិទ្យុ សម្រាប់ផ្សព្វផ្សាយដល់គ្រប់ទីកន្លែងទាំងវិស័យព្រះពុទ្ធសាសនាវប្បធម៌ និងការអប់រំនានា សំដៅរក្សា និងលើកតម្កើងតម្លៃព្រះពុទ្ធសាសនា និងអភិរក្សវប្បធម៌ព្រមទាំងបង្កើតមជ្ឈមណ្ឌលវប្បធម៌និងសិល្បៈ សម្រាប់បង្ហាត់ បង្រៀន ចំណេះដឹងខាងផ្នែករបាំ ផ្នែកចម្លាក់ក្បាច់និងគំនូរ ផ្នែកភ្លេងបុរាណមានទាំងស្បែកតូច ស្បែកធំ ភ្លេងពិណពាទ្យ និងភ្លេងប្រពៃណី ដើម្បីរក្សាវប្បធម៌ឱ្យផូរផង់រស់រវើកនិងថ្កុំថ្កើង។ ក្រៅពីនេះ សម្តេចបានផ្តួចផ្តើមកសាងព្រះវិហារ ឧបដ្ឋានសាលា កុដិ សាលាបាលី និងសាលា សិល្បៈ ដើម្បីទុកជាកេរ្តិ៍មរតកសម្រាប់កូនចៅជំនាន់ក្រោយផងដែរ។ ចំណែកអគារពុទ្ធិកសិក្សារាជបូណ៌ ដែលសម្ពោធដាក់ឱ្យប្រើប្រាស់នៅពេលនេះ, លោកជំទាវបណ្ឌិត សង្ឃឹមយ៉ាងមុតមំាថា ការបណ្តុះបណ្តាល និងការអប់រំផ្នែកព្រះពុទ្ធសាសនានៅខេត្តសៀមរាប ផ្តើមចេញពីវត្តរាជបូណ៌ ក្រោមការយកចិត្តទុកដាក់របស់ សម្តេចព្រះព្រហ្មរតនមុនី ពិន សែម ជាព្រះគ្រូចៅអធិការ នឹងរីកដុះដាលកាន់តែខ្លាំង ព្រមទាំងជំរុញឱ្យមានការកសាងពុទ្ធិកសិក្សា នៅតាមវត្តអារាមនានាជាបន្តបន្ទាប់ទាំងកម្រិតបឋម មធ្យម និងឧត្តមសិក្សា៕អត្ថបទ៖ សុន រ៉ាឌី

ក្រសួងធម្មការ និងសាសនា ផ្សព្វផ្សាយខ្លឹមសារអនុសំវច្ឆរ មហាសន្និបាតមន្ត្រីសង្ឃ លើកទី៣២

ត្បូងឃ្មុំ ៖ ក្រសួងធម្មការ និងសាសនា សហការជាមួយ រដ្ឋបាលខេត្តត្បូងឃ្មុំ កាលពីថ្ងៃទី២៨ ខែធ្នូ ឆ្នាំ ២០២៤ បានប្រារព្ធពិធីផ្សព្វផ្សាយខ្លឹមសារអនុសំវច្ឆរ មហាសន្និបាតមន្ត្រីសង្ឃ លើកទី៣២ ក្រោមព្រះអធិបតីភាព ព្រះមេគណគណៈមហានិកាយ, ព្រះមេគណៈធម្មយុត្តិកនិកាយ និងឯកឧត្តម សេង សុមុនី រដ្ឋលេខាធិការ ក្រសួងធម្មការនិងសាសនា និង ឯកឧត្តម ប៉ែន កុសល្យ អភិបាលនៃគណៈអភិបាលខេត្តត្បូងឃ្មុំ នៅសាលប្រជុំសាលាខេត្តត្បូងឃ្មុំ។ឯកឧត្តម សេង សុមុនី មានប្រសាសន៍ថា ព្រះមន្ត្រីសង្ឃទាំងអស់ ត្រូវយកចិត្តទុក លើវិស័យពុទ្ធិកសិក្សា ឲ្យស្របទៅនិងផែនការយុទ្ធសាស្ត្របញ្ចកោណដំណាក់ទី៧ របស់រាជរដ្ឋាភិបាល។ ទន្ទឹមគ្នានេះ វត្តអារាម អាចារ្យ គណៈកម្មការ ត្រូវសហការជាមួយព្រះគ្រូចៅអធិការ ឈរលើស្មារតីសាមគ្គីគ្នា ជៀសវាងមានជម្លោះផ្ទៃក្នុង ហើយរាល់ការកសាងសមិទ្ធិផលនានាក្នុងវត្តអារាម ត្រូវពិភាក្សាគ្នា ឲ្យបានត្រឹមត្រូវ កុំមានជម្លោះកើតមានឡើង ធ្វើឲ្យពុទ្ធបរិស័យបាត់បង់សទ្ធារបស់ប្រជាពលរដ្ឋ គ្រប់សាសនាទាំងអស់ ត្រូវរួមគ្នាដើម្បីបន្តសុខដុមនីយកម្មសាសនា ដើម្បីរួមគ្នាថែរក្សាសន្តិភាព ក្រោយការដឹកនាំរបស់សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និង បន្តអនុវត្តគោលនយោបាយ របស់រាជរដ្ឋាភិបាល។ ឯកឧត្តម បានរម្លឹកថា អង្គសន្និបាត មន្ត្រីសង្ឃលើកទី៣២នេះ បន្តពិភាក្សាលើប្រធានបទចំនួន២ គឺ៖ វិស័យពុទ្ធិកសិក្សា និងតួនាទីភារកិច្ច របស់ព្រះចៅអធិការ អាចារ្យ និងគណៈកម្មការ ឲ្យបានផុលផុស ដើម្បីរកឲ្យឃើញនូវចំណុចខ្លាំង និងចំណុចខ្សោយ តាមវត្តនីមួយៗផងដែរ។ឯកឧត្តម ប៉ែន កុសល្យ អភិបាលនៃគណៈអភិបាលខេត្តត្បូងឃ្មុំ មានប្រសាសនថា ការពង្រឹងវិស័យសាសនា ត្រូវកែលម្អបន្ថែមលើវិន័យសង្ឃ បន្តលើទឹកចិត្តមន្រ្តីសង្ឃ និងព្រះសង្ឃនៅតាម ទីវត្តអារាមក្នុងខេត្ត ដើម្បីចុះអប់រំសីលធម៌ ចរិយាធម៌ និងធម្មវិជ្ជា ដល់កុលបុត្រ កុលធិតា ក្នុងស្ថាប័នអប់រំបង្កើតសាលាធម្មវិន័យ ពុទ្ធិកសិក្សា ពង្រឹងសាមគ្គីភាព ពិសេសវិស័យសង្ឃ ក្នុងការផ្សព្វផ្សាយគ្រប់រូបភាពតាមប្រព័ន្ធសង្គម។បើតាមលោក ហាក់ ហុន ប្រធានមន្ទីរធម្មការ និងសាសនាខេត្តត្បូងឃ្មុំ បានឱ្យដឹងថា រហូតមកដល់ពេល បច្ចុប្បន្ននេះ ក្នុងខេត្តត្បូងឃ្មុំទាំងមូលមានវត្តចំនួន ២៥៥ ព្រះសង្ឃចំនួន ៣,០៨១ អង្គ មានសាលាពុទ្ធិកសិក្សាចំនួន ១៤ កន្លែង និងសមណសិស្សសរុបចំនួន ១,៤១២ អង្គ ដែលកំពុងសិក្សារៀនសូត្រ នៅពុទ្ធិកបឋម អនុវិទ្យាល័យ និងវិទ្យាល័យ៕ដោយ ៖ ជឹង សេងឡុង

បណ្តាញយុវជន និងពលរដ្ឋនៅសេដ្ឋកិច្ចក្រៅប្រព័ន្ធរួមគ្នាអបអរ ទិវាសន្តិភាពនៅកម្ពុជា ២៩ ធ្នូ

ភ្នំពេញ ៖ តំណាង ថ្នាក់ដឹកនាំ ប្រធានក្រុម ប្រធានផ្នែកទាំងអស់ នៃបណ្តាញក្រុមយុវជនសង្គមស៊ីវិល និងពលរដ្ឋប្រកបរបរសេដ្ឋកិច្ចប្រព័ន្ធ បានជួបជុំគ្នាអបអរសាទរ ទិវាសន្តិភាពនៅកម្ពុជា ២៩ ធ្នូ ឆ្នាំ១៩៩៨ -២៩ ធ្នូ ឆ្នាំ២០២៤ នៅសង្កាត់អូឡាំពិក រាជធានីភ្នំពេញ ដើម្បីបង្ហាញពីការដឹងគុណស្ថាបនិកមគ្គុទេសក៍ឯក សម្តេចតេជោ ហ៊ុន សែន និងអរគុណសន្តិភាព និងប្រឆាំងដាច់ខាតចំពោះជនណាប៉ុនប៉ងបំផ្លាញសន្តិភាពនៅកម្ពុជា។តំណាងបណ្តាញក្រុមយុវជន និងអ្នកប្រកបរបរសេដ្ឋកិច្ចសេដ្ឋកិច្ចក្រៅ បានថ្លែងប្រាប់ BTV ថា នៅថ្ងៃទី២៩ ធ្នូ ឆ្នាំ១៩៩៨ គឺថ្ងៃវិសេសសាលបំផុតសម្រាប់ប្រជាជនខ្មែរទាំងអស់គ្នា ដែលប្រទេសកម្ពុជា បានទទួលឯកភាពជាតិពេញលេញបញ្ចប់ជម្លោះសង្គ្រាមស៊ីវិលក្នុងស្រុករវាងខ្មែរ និងខ្មែរគ្នាឯង តាមរយៈនយោបាយឈ្នះ ឈ្នះ របស់សម្តេចតេជោ ហ៊ុន សែន អតីតនាយករដ្ឋមន្រ្តីនៃកម្ពុជា ហើយបានបង្កលក្ខណៈឲ្យកម្ពុជាទាំងមូលមានការអភិវឌ្ឍរីកចម្រើនជាបន្តបន្ទាប់រហូតដល់សព្វថ្ងៃនេះ។តាមរយៈទិវាសន្តិភាពនៅកម្ពុជានេះ រាជរដ្ឋាភិបាលកម្ពុជា ក៏បានសាងសង់វិមានឈ្នះ ឈ្នះ ដែលជានិមិ្មតរូបដ៏ធំ នៃការបញ្ចប់សង្គ្រាមស៊ីវិលទាំងស្រុង និងសម្រេចបាននូវសន្តិភាពពេញលេញនៅកម្ពុជា និងជំរុញពលរដ្ឋខ្មែរគ្រប់ស្រទាប់ទាំងអស់ មានការចងចាំជានិច្ចពីគុណតម្លៃសន្តិភាព រួមគ្នាស្រឡាញ់វប្បធម៌សន្តិភាព ស្រឡាញ់សាមគី្គគ្នាក្នុងភាពជាខ្មែរតែមួយ មិនបង្កជម្លោះ មិនបង្កសង្គ្រាម ហើយនឹងជំរុញកម្ពុជា បន្តការអភិវឌ្ឍ រីកចម្រើនស្មើមុខមាត់លើឆាកអន្តរជាតិ។តាមរយៈទិវាសន្តិភាពនៅកម្ពុជានេះទៀត បណ្តាញក្រុមយុវជនសេដ្ឋកិច្ចក្រៅប្រព័ន្ធទាំងអស់គ្នា បានសម្តែងការប្រឆាំងដាច់ខាតចំពោះក្រុមជ្រុលនិយម នៅក្រៅប្រទេស នៅក្នុងប្រទេសមួយក្តាប់តូច ដែលតែងតែញុះញុង ប៉ុនប៉ងផ្តួលរំលំរាជរដ្ឋាភិបាលស្របច្បាប់ បំផ្លិញបំផ្លាញសន្តិភាពដែលពិបាករកបានក្នុងប្រវត្តិអតីតកាលជូរចត់របស់កម្ពុជា៕ អត្ថបទ ស៊ុម សុខជា

ក្រសួងមុខងារសាធារណៈចាប់ផ្ដើមធ្វើកំណែសន្លឹកកិច្ចការប្រឡងមន្ត្រីចូលបម្រើការងារ អគ្គនាយកដ្ឋានពន្ធដារ

ភ្នំពេញ ៖ ក្រសួងមុខងារសាធារណៈ នៅថ្ងៃទី ២៩ ខែធ្នូ ឆ្នាំ ២០២៤នេះ បានចាប់ផ្ដើមធ្វើកំណែលើសន្លឹកកិច្ចការ របស់បេក្ខជនប្រឡងប្រជែងធ្វើជាមន្ត្រី ចូលបម្រើការងារនៅ អគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ។ ការចាប់ធ្វើកំណែនេះ ធ្វើឡើងក្រោមវត្តមាន ឯកឧត្តម ឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ ដែលឯកឧត្តមបានចុះត្រួតពិនិត្យដោយផ្ទាល់។ ក្រោយបញ្ចប់ការប្រឡងកាលពីម្សិលម៉ិញ ក្រសួងមុខងារសាធារណៈនៅថ្ងៃនេះ បានចាប់ផ្ដើមដំណើការកំណែលើសន្លឹកកិច្ចការរបស់បេក្ខជនទាំងជាង ៥ ០០០ នាក់ដែលប្រឡងជាមន្ត្រីចូលបម្រើការងារ នៅអគ្គនាយកដ្ឋានពន្ធដារ។ រាល់ដំណើរការប្រឡង និងការកែសន្លឹកកិច្ចការបេក្ខជន ក្រសួងមុខងារសាធារណៈ តែងតែអនុវត្តតាមគោលការច្បាប់នៃនីតិវិធីប្រតិបត្តិ ស្តីពីការប្រឡងប្រជែងជ្រើសរើសមន្ត្រីរាជការស៊ីវិល ដែលបានកំណត់ថាបន្ទាប់ពីការប្រឡងចប់បានមួយថ្ងៃដំណើរការកែសន្លឹកកិច្ចនឹងចាប់ផ្តើមនៅថ្ងៃបន្ទាប់។ការចាប់ផ្ដើមធ្វើកំណែនេះ ធ្វើឡើងក្រោមវត្តមានឯកឧត្តម ឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ រួមទាំងវត្តមានមន្ត្រីអង្គភាពប្រឆាំងអំពើពុករលួយ និងវត្តមានអ្នកសង្កេតការណ៍ស្ម័គ្រចិត្តជាច្រើនរូប។ ការធ្វើកំណែសន្លឹកកិច្ចការ ចាប់ផ្តើមពីព្រឹកព្រលឹម តាមរយៈការកាត់ក្បាលសន្លឹកកិច្ចការ ការចុះលេខ និងនីតិវិធីនានា ដែលស្ថិតក្រោមការឃ្លាំមើលជាប់ជាប្រចាំពីអង្គភាពប្រឆាំងអំពើពុករលួយ និងអនុគណៈកម្មការត្រួតពិនិត្យ និងវាយតម្លៃ ដោយមានការចូលរួមពីពីអ្នកសង្កេតការណ៍តំណាងសកលវិទ្យាល័យ និងសាធារណជនស្ម័គ្រចិត្តផងដែរ។សម្រាប់ការធ្វើកំណែនេះ គឺប្រើប្រាស់គរុនិស្សិតចំនួន ១៣០នាក់។ ការប្រើប្រាស់ចំនួនអ្នកកែច្រើន គឺក្នុងគោលដៅបញ្ចប់ឱ្យបានលឿន និងប្រកាសលទ្ធផលឱ្យបានមុនបំណាច់ឆ្នាំ ២០២៤នេះ។ គួរបញ្ជាក់ថា វិញ្ញាសានៃការប្រឡងមន្ត្រីអគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ លើវិញ្ញាសាសរសេរលើកទី១នេះ ជាវិញ្ញាសាបែបជ្រើស MCQ ដែលអាចលឿនសម្រាប់ការកែ។សូមជម្រាបថា ការប្រឡងជ្រើសរើសមន្ត្រីអគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ គឺមាន ៣ដំណាក់។ ដំណាក់កាលទី ១ ជាការប្រឡងលើវិញ្ញាសាសរសេរលើកទី ១ ដែលចាប់ផ្ដើមធ្វើកំណែនៅថ្ងៃនេះ។ បេក្ខជនដែលទទួលបានពិន្ទុខ្ពស់ ជាប់ក្នុងការប្រឡងលើកទី ១នេះ ត្រូវត្រៀមរៀបចំខ្លួន ចូលរួមប្រឡងក្នុងវិញ្ញាសារសរសេរលើកទី ២ ដែលក្រសួងមុខងារសាធារណៈ នឹងជូនដំណឹងកាលបរិច្ឆេទនាពេលបន្ទាប់។ បេក្ខជនដែលប្រឡងជាប់ក្នុងវិញ្ញាសាសរសេរលើកទី ២ ត្រូវឈានដល់វគ្គចុងក្រោយ ដែលជាការសម្ភាសន៍ផ្ទាល់មាត់។ ចំនួនជ្រើសរើសចុងក្រោយសម្រាប់ការបំពេញការងារក្នុងអគ្គនាយកដ្ឋានពន្ធដារ គឺចំនួន ២៥៧នាក់ប៉ុណ្ណោះ៕អត្ថបទ៖គឹមហុក

សម្តេចតេជោផ្ញើសារបីចំណុចចុងក្រោយនៃការអនុវត្តនយោបាយឈ្នះ ឈ្នះទៅកាន់សហគមជាតិ និងអន្តរជាតិ

សម្តេចតេជោ ហ៊ុន សែន អតីតនាយករដ្ឋមន្រ្តីនៃកម្ពុជា និងជាបិតាស្ថាបនិកសន្តិភាពកម្ពុជា បានផ្ញើសារទៅកាន់សហគមន៍ជាតិ និងអន្តរជាតិដ៏សំខាន់ចំនួនបីចំណុច នៃការអនុវត្តនយោបាយឈ្នះ ឈ្នះ ខណៈ សារទាំងបីចំណុចនេះសុទ្ធតែនាំមកនូវផលប្រយោជន៍ចំពោះប្រជាជន និងប្រទេសកម្ពុជា។ក្នុងសំណេរ តាមហ្វេសបុក និងតេលេក្រាម នាថ្ងៃទី២៩ ខែធ្នូ ឆ្នំា២០២៤នេះ ចំនឹងថ្ងៃអបអរ សាទរខួប២៦ ឆ្នាំនៃការបញ្ចប់សង្រ្គាមស៊ីវិលនៅកម្ពុជា និងខួប១ឆ្នាំនៃ«ទិវាសន្តិភាពនៅកម្ពុជា» សម្តេច តេជោ ហ៊ុន សែន បានរំលឹកថា« ២៦ឆ្នាំមុនថ្ងៃនេះ២៩ធ្នូ១៩៩៨មេដឹកនាំខ្មែរក្រហមរួមមានខៀវ សំផន នួន ជា អៀង សារីនិងសមាជិកគណៈរដ្ឋមន្ត្រី ផ្សេងទៀត បានមកទទួលទានអាហារ នៅផ្ទះខ្ញុំដែលជាដំណាក់កាលបញ្ចប់ សង្រ្គាមទាំងស្រុងនាំមកនូវការបង្រួប បង្រួមជាតិ ឯកភាពទឹកដីជាលើកដំបូង ក្នុងប្រវត្តិសាស្ត្ររាប់រយឆ្នាំរបស់កម្ពុជា»។ សម្តេចតេជោ អតីតនាយករដ្ឋមន្រ្តីនៃកម្ពុជា បានបញ្ជាក់បន្ថែមទៀតថា« ខ្ញុំសម្រេចទទួលខៀវ សំផន នួន ជា និងមេដឹកនាំខ្មែរក្រហមផ្សេងទៀតនៅផ្ទះរបស់ខ្ញុំនៅតាខ្មៅដោយចង់ផ្ញើសារ៣ចេញទៅកាន់៖១.ផ្ញើសារទៅកាន់កងកម្លាំងប្រដាប់អាវុធខ្មែរក្រហមដែលនៅសេសសល់ សូមបញ្ឈប់ការប្រយុទ្ធ ព្រោះមេដឹកនាំ របស់ពួកគេបានមកចុះចូលដល់ផ្ទះនាយករដ្ឋមន្ត្រីហើយ។ ២.ផ្ញើសារទៅកាន់ប្រជាជនកម្ពុជាថាសង្រ្គាមបានបញ្ចប់ទាំងស្រុងហើយ។ ៣.ផ្ញើសារទៅកាន់សហគមន៍អន្តរជាតិ សូមមកវិនិយោគនិងមកទេសចរណ៍នៅ កម្ពុជាព្រោះកម្ពុជាមានសន្តិភាពពេញលេញហើយ។ នេះជាសារចុងក្រោយនៃការអនុវត្តនយោបាយឈ្នះ ឈ្នះ»(ផ្ការីកគ្រប់រដូវក្រោមម្លប់សន្តិភាព)»៕អត្ថបទបាន ចក់រូបភាពហ្វេសបុក និងតេលេក្រាមសម្តេច និងរូបភាពឯកសារសម្តេចពិសារហារជាមួយ អតីតមេដឹកនាំខ្មែរក្រហម

អបអរសាទរខួប២៦ឆ្នាំ នៃនយោបាយឈ្នះ-ឈ្នះ របស់សម្ដេចតេជោ ហ៊ុន សែន និងអបអរសាទរទិវាសន្តិភាពនៅកម្ពុជាលើកទី១ ឆ្នាំ២០២៤

នៅថ្ងៃទី២៩ ខែធ្នូ ឆ្នាំ២០២៤នេះ គឺជាខួប ២៦ឆ្នាំហើយ សម្រាប់ការអនុវត្តប្រកបដោយភាពជោគជ័យនូវនយោបាយឈ្នះ-ឈ្នះ ដែលដាក់ចេញដោយសម្តេចតេជោ ហ៊ុន សែន ក្នុងការបញ្ចប់សង្គ្រាមស៊ីវិលនៅក្នុងប្រទេសកម្ពុជា នាំមកនូវសុខសន្តិភាព និងការអភិវឌ្ឍន៍ពេញផ្ទៃប្រទេស និងអបអរសាទរ «ទិវាសន្តិភាពនៅកម្ពុជាលើកទី១» ដែលរាជរដ្ឋាភិបាលបានកំណត់យកថ្ងៃទី២៩ ខែធ្នូ ជារៀងរាល់ឆ្នាំ ជាថ្ងៃបុណ្យជាតិផ្លូវការមួយនៅព្រះរាជាណាចក្រកម្ពុជា ដើម្បីជាការឆ្លើយតបទៅនឹងបំណងប្រាថ្នាដ៏ពិសិដ្ឋរបស់ប្រជាជនកម្ពុជា គឺការស្រឡាញ់សន្តិភាព ហើយស្អប់ខ្ពើមសង្គ្រាម៕

បណ្ដាញសង្គម

ព័ត៌មានថ្មីៗ

ការពិនិត្យឡើងវិញ៖ ភាពយន្តឯកសារពីតំបន់ហ្កហ្សារបស់ BBC បំពានគោលការណ៍ណែនាំអំពីភាពត្រឹមត្រូវ

មនុស្សជាច្រើននាក់ស្លាប់ក្នុងអគ្គិភ័យនៅមជ្ឈមណ្ឌលសង្គ្រោះ ក្នុងរដ្ឋ Massachusetts

ជំនួយការរបស់លោក Netanyahu ប្រឈមនឹងការចោទប្រកាន់ផ្លូវការ ជុំវិញការបែកធ្លាយព័ត៌មានយោធា

រដ្ឋមន្ត្រីការបរទេសអ៊ីស្រាអែល និងប៉ាឡេស្ទីន នឹងចូលរួមកិច្ចប្រជុំរបស់ EU

អ៊ីរ៉ង់៖ ការដាក់ទណ្ឌកម្មជាថ្មីរបស់ UN នឹងជួបជាមួយការឆ្លើយតបយ៉ាងសមស្រប

វិមានក្រឹមឡាំង៖ ការបញ្ជូនអាវុធ និងគ្រាប់រំសេវទៅអ៊ុយក្រែនពីអាមេរិក កំពុងបន្តមានធម្មតា

នគរបាលឃាត់ខ្លួនមនុស្ស ៨នាក់ ក្រោយមានការប៉ះទង្គិចរបស់ក្រុមប្រឆាំងជនអន្តោប្រវេសន៍ ក្នុងទីក្រុងនៅអេស្ប៉ាញ

EU នឹងត្រៀមបញ្ជីពន្ធ ២៤,៥២ពាន់លានដុល្លារ សម្រាប់ទំនិញរបស់អាមេរិក

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877