BTV NEWS

ឯកឧត្តម ចន ណារិទ្ធ ចុះសិក្សាពីស្ថានភាព និងតម្រូវការផ្តល់ការគាំពារជូនពលរដ្ឋ នៅតាមច្រកទ្វារជាប់ព្រំដែន

លទ្ធផលចរចាពាណិជ្ជកម្ម៖ កម្ពុជា-អាមេរិក វាយតម្លៃខ្ពស់លើវឌ្ឍនភាពជាវិជ្ជមាន នៃការចរចាកន្លងមក និងបានឯកភាពដាក់ចេញនូវសំណើរៀងៗខ្លួនបន្ថែមទៀត

សម្ដេចធិបតី៖ កងកម្លាំងនគរបាលជាតិដើរតួនាទី និងបំពេញភារកិច្ចសំខាន់ធានាសន្តិសុខ សុវត្ថិភាព

រោងចក្រសហគ្រាសជាច្រើនប្រកាសជ្រើសរើសកម្លាំងពលកម្មបន្ទាន់ និងលើកទឹកចិត្តខ្ពស់ដល់ពលករត្រឡប់ពីថៃ

ព័ត៌មានជាតិ

សម្តេចធិបតី ណែនាំឱ្យក្រសួងសុខាភិបាល ពិនិត្យការផ្ដល់អាជ្ញាបណ្ណសេវាសុខាភិបាលឱ្យបានច្បាស់លាស់

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានណែនាំឱ្យក្រសួងសុខាភិបាល ពិនិត្យ គ្រប់គ្រងការផ្ដល់អាជ្ញាបណ្ណសេវាសុខាភិបាលឱ្យបានច្បាស់លាស់ ដើម្បីបញ្ចៀសនូវការបង្កបញ្ហាគ្រោះថ្នាក់ដល់ប្រជាពលរដ្ឋដែលជាអ្នកទទួលសេវាសុខាភិបាល ។ក្នុងពេលអញ្ជើញជាអធិបតីបើកការដ្ឋានសាងសង់មន្ទីរពេទ្យសាកលវិទ្យាល័យវិទ្យាសាស្ត្រសុខាភិបាល នៅក្នុងខណ្ឌសែនសុខ នាព្រឹកថ្ងៃទី១០ ខែធ្នូ នេះ ជាមួយនឹងការកោតសរសើរពីវឌ្ឍនភាពខាងវិស័យសុខាភិបាល ជាពិសេសការបង្កើនគុណភាពសេវាសុខាភិបាល និងផ្តល់អាទិភាពឱ្យបង្កើនធនធានមនុស្សដល់វិស័យជាអាទិភាពមួយនេះ សម្តេចធិបតី ហ៊ុន ម៉ាណែត បានណែនាំថា ក្រសួងសុខាភិបាលត្រូវយកចិត្តទុកដាក់លើការគ្រប់គ្រងក្រមសីលធម៌ និងគ្រប់គ្រងការផ្ដល់អាជ្ញាបណ្ណសេវាសុខាភិបាលឱ្យបានច្បាស់លាស់ ព្រោះការគិតគូរអំពីសុខភាពមនុស្ស ជា កិច្ចការសំខាន់ ដោយគិតទាំងបរិមាណ គុណភាព ការពង្រឹងក្រមសីលធម៌វិជ្ជាជីវៈ ពង្រឹងក្រមប្រតិបត្តិ ជាពិសេស អ្នកផ្តល់សេវាសុខាភិបាល ទាំងរដ្ឋ និងឯកជន ។សូមបញ្ជាក់ថា ចាប់ពីខែធ្នូ ឆ្នាំ២០០១ រហូតដល់បច្ចុប្បន្ន រាជរដ្ឋាភិបាលកម្ពុជា បានសម្រេចឱ្យសាកលវិទ្យាល័យវិទ្យាសាស្រ្តសុខាភិបាល ប្រែក្លាយជាគ្រឹះស្ថានសាធារណៈរដ្ឋបាល និងបានខិតខំប្រឹងប្រែងអភិវឌ្ឍន៍ឥតឈប់ឈរ ទាំងធនធានសាស្រ្តាចារ្យ គ្រូឧទេ្ទស អគារសិក្សា និងសម្ភារ បរិក្ខារ សម្រាប់ការរៀន និងបង្រៀន។ សាកលវិទ្យាល័យ តែងតែសហការល្អជាមួយមន្ទីរពេទ្យជាតិ និងខេត្តធំៗ និងដៃគូរអន្តរជាតិ នានាដើម្បីបញ្ជូននិសិ្សតទៅធ្វើកម្ម សិក្សាគ្លីនិក និងអនុវត្តជាក់ស្តែង។ ក្នុងគោលបំណងចូលរួមពង្រឹងគុណភាពនៃការអប់រំក្នុងវិស័យសុខាភិបាលនិងលើកកម្ពស់គុណភាពនៃការផ្តល់សេវាសុខភាពនៅកម្ពុជាឱ្យកាន់តែមានស្តង់ដារខ្ពស់ថែមទៀត និងដោយមានការគាំទ្រពីក្រសួងសេដ្ឋកិច្ចនិង ហិរញ្ញវត្ថុ និងក្រសួងសុខាភិបាល នៅឆ្នាំ២០១៣ សាកលវិទ្យាល័យ វិទ្យាសាស្រ្តសុខាភិបាល(ស.វ.ស) បានស្នើសុំ បង្កើតនូវមន្ទីរពេទ្យសាកលវិទ្យាល័យ ដែលជាគ្រឹះស្ថានផ្តល់សេវាសុខាភិបាលមួយ ស្ថិតនៅក្រោមការគ្រប់គ្រង របស់សាកលវិទ្យាល័យ ហើយមានតួនាទីទាំងធ្វើការផ្តល់សេវា ថែទាំព្យាបាលផង ទាំងបណ្តុះបណ្តាលទ្រឹស្តី និង អនុវត្តផង និងទាំងធ្វើការងារស្រាវជ្រាវលើវិស័យសុខាភិបាលផងដែរ ៕ អត្ថបទ៖ មុត សុទ្ធ

សម្តេចធិបតី ប្រកាសថា រាជរដ្ឋាភិបាលនឹងពង្រីកវិសាលភាព សេវាសុខាភិបាលគ្រប់ទីកន្លែងទាំងអស់

សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានប្រកាសថា រាជរដ្ឋាភិបាលនឹងពង្រីកគ្របដណ្តប់វិសាលភាពផ្តល់សេវាសុខាភិបាលបន្ថែមទៀត ពោលគឺឲ្យគ្រប់ច្រកល្ហកទាំងអស់ ទៅតាមយន្តការជំនួយ សង្គមផ្សេងៗ បន្ថែមពីនេះទៀតនឹងខិងខំលើកកម្ពស់គុណភាពផ្តល់សេវាកម្មសុខាភិបាលជូនប្រជាពលរដ្ឋប្រកបដោយប្រសិទ្ធភាព គុណភាព ដូចជាការផ្តល់ផ្នែកឱសថស្ថាន និងបំពាក់នូវឧបករណ៍វេជ្ជសាស្ត្រទំនើបៗជាដើម។ក្នុងឱកាសអញ្ជើញជាអធិបតីភាពបើកការដ្ឋានសាងសង់មន្ទីរពេទ្យសាកលវិទ្យាល័យវិទ្យាសាស្រ្តសុខាភិបាល ដែលស្ថិតនៅតាមបណ្តោយមហាវិថីមិត្តភាពភ្នំពេញ-ហាណូយភូមិអន្លង់ក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ នាថ្ងៃទី១០ ខែធ្នូ ឆ្នាំ២០២៤នេះ សម្តេចធិបតី ហ៊ុន ម៉ាណែត បានលើកឡើងថា ក្នុងរយៈពេលជាង១៥ខែក្រោយរាជរដ្ឋាភិបាលអាណត្តិទី៧ កើតឡើង គឺរាជរដ្ឋាភិបាលបានពង្រីកវិសាលភាពសុខាភិបាលបានកាន់តែច្រើន ក្នុងនោះមានមន្ទីរពេទ្យបង្អែកចំនួន១២៥, មណ្ឌលសុខ ភាព និងប៉ុស្តិ៍សុខភាពជាច្រើនទៀត។ ប៉ុន្តែទោះបីជាយ៉ាងណាក៏ដោយរាជរដ្ឋាភិបាលនឹងខិតខំពង្រីកនូវ វិសាលភាពសេវាកម្មបម្រើសុខាភិបាលនេះឲ្យកាន់តែច្រើន និងកាន់តែទំនើបបន្ថែមទៀត ទាំងថ្នាំ ដង្កូវ សម្ភារបរិក្ខាជាដើម ដើម្បីធ្វើយ៉ាងណាឲ្យបងប្អូនប្រជាពលរដ្ឋ ទទួលបានសេវាសុខភាពនេះ ដូចប្រទេសជិតខាងយ៉ាងដូច្នេះដែរ។សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានបន្ថែមទៀតថា សេវាសុខាភិបាលគឺសំខាន់ខ្លាំងណាស់សម្រាប់ប្រជាពលរដ្ឋគ្រប់រូប មិនថាពួកគាត់នៅទីណានោះទេ គឺពួកគាត់ត្រូវការខ្លាំងបំផុតគឺសុខភាពនេះឯង ដោយត្រូវបង្ការ និងព្យាបាលឲ្យបានទាន់ពេលវេលា ដូច្នេះសេវាកម្មបម្រើសុខភាពជូនពួកគាត់គឺជាកត្តាចាំបាច់បំផុត ទាំងគុណភាព វិជ្ជាជីវៈ និងក្រមសីលធម៌។ ដើម្បីធានាសេវាកម្មបម្រើ សុខាភិបាលជូនប្រជាពលរដ្ឋឲ្យបានកាន់តែល្អប្រសើរបន្ថែមទៀតនោះ សម្តេចធិបតី នាយករដ្ឋមន្រ្តីនៃកម្ពុជា ក៏បានណែនាំឲ្យក្រសួងសុខាភិបាលបន្តយកចិត្តទុកដាក់លើការវិនិយោគ ថ្នាំព្យាបាលបន្ថែមទៀតដោយត្រូវធានាទាំងបរិមាណ និងគុណភាពថ្នាំសម្រាប់ការផ្គត់ផ្គង់ទៅតាមមន្ទីរពេទ្យនានា នៅទូទាំងប្រទេសផងដែរ៕ អត្ថបទ៖ បាន ចក់

សម្ដេចនាយករដ្ឋមន្រ្តី ណែនាំឲ្យក្រសួងសុខាភិបាល បន្តតាមដានត្រួតពិនិត្យបន្ថែមទៀត ចំពោះការលក់ផលិតផលតាមអនឡាញ

សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានណែនាំឲ្យក្រសួងសុខាភិបាលបន្តតាមដាន និង ត្រួតពិនិត្យបន្ថែមទៀតចំពោះផលិតផល ដែលលក់នៅតាមបណ្តាញសង្គមហ្វេសបុក ឬហៅថា អនឡាញ ខណៈផលិតផលខ្លះ ហាក់បីដូចជាមិនមានគុណភាព និងអាជ្ញាបណ្ណត្រឹមត្រូវនោះ។ក្នុងឱកាសអញ្ជើញជាអធិបតីភាពបើកការដ្ឋាន សាងសង់មន្ទីរពេទ្យសាកលវិទ្យាល័យវិទ្យាសាស្រ្តសុខាភិបាល ដែលស្ថិតនៅតាមបណ្តោយមហាវិថីមិត្តភាពភ្នំពេញ-ហាណូយភូមិអន្លង់ក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ នាថ្ងៃទី១០ ខែធ្នូ ឆ្នាំ២០២៤នេះ សម្តេចធិបតី ហ៊ុន ម៉ាណែត បានថ្លែងថា សូមឲ្យមានការចូលរួមពីគ្រប់ភាគីទំាងអស់ មុននឹងយកផលិផលអ្វីមកលក់គប្បីជួយត្រួតពិនិត្យឲ្យបានត្រឹមត្រូវ ដើម្បីបង្ការសុខភាពជូនដល់បងប្អូនប្រជាពលរដ្ឋ។សម្តេចធិបតីនាយករដ្ឋមន្រ្តី ក៏បានឲ្យដឹងផងដែរថា កាលពីសប្តាហ៍មុនសម្តេច បានសម្រេចឲ្យដក ច្បាប់មួយ (អាជ្ញាបណ្ណ) ដែលបំរុងឲ្យសម្តេចចុះហត្ថលេខាឆ្លង ដោយច្បាប់នោះ គឺការលក់ផលិតផលវិការៈ (ផលិតផលកែសម្ផស្ស)។ សម្តេចបានលើកឡើងទៀតថា ផលិតផលខ្លះយកមកពីស្រុកគេ ក្រោយមកត្រូវបានរកនូវ ភាពមិនប្រក្រតី ដោយអាចធ្វើឲ្យប៉ះពាល់ដល់អ្នកប្រើប្រាស់ ដូច្នេះត្រូវតែធ្វើការត្រួតពិនិត្យឲ្យបានត្រឹមត្រូវ និងត្រូវចាត់វិធានការជាបន្ទាន់ចំពោះផលិតផលទាំងនោះមិនថា ខាងផ្នែកឱសថ ផលិតផលកែសម្ផស្ស ឬអាហារបំប៉នអ្វីនោះទេ៕អត្ថបទបាន ចក់

ប្រសាសន៍សំខាន់ៗរបស់សម្តេចធិបតី ហ៊ុន ម៉ាណែត ក្នុងឱកាសអញ្ជើញបើកការដ្ឋានសាងសង់មន្ទីរពេទ្យសាកលវិទ្យាល័យ វិទ្យាសាស្រ្តសុខាភិបាល

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅព្រឹកថ្ងៃទី១០ ខែធ្នូ ឆ្នាំ២០២៤ បានអញ្ជើញអធិបតីភាព បើកការដ្ឋានសាងសង់មន្ទីរពេទ្យសាកលវិទ្យាល័យ វិទ្យាសាស្រ្តសុខាភិបាល នៅខណ្ឌសែនសុខ ។ប្រសាសន៍សំខាន់ៗរបស់សម្តេចធិបតី ហ៊ុន ម៉ាណែត ដែលមានខ្លឹមសារដូចខាងក្រោម៖-សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបញ្ជាក់ថា ការកសាងទីតាំងទី៣ នៃសាកលវិទ្យាល័យវិទ្យាសាស្ត្រសុខាភិបាល ដើម្បីពង្រីកការផ្ដល់សេវាសុខភាព ការបណ្ដុះបណ្ដាល សំដៅកែលម្អស្ថានភាពសុខភាពពលរដ្ឋ នាពេលបច្ចុប្បន្ន ដើម្បីធានាបាននូវសុខភាពល្អ ។-សម្តេចធិបតីនាយករដ្ឋមន្រ្តីនៃកម្ពុជា ថ្លែងអំណរគុណ និងកោតសរសើរចំពោះកិច្ចខិតខំប្រឹងប្រែងរបស់លោកគ្រូ និងអ្នកគ្រូពេទ្យនាពេលកន្លងមក ដែលបានយកចិត្តទុកដាក់ ខ្ពស់ចំពោះការបម្រើសេវាសុខភាពជូនដល់ប្រជាពលរដ្ឋនោះ។-សម្តេចធិបតី ហ៊ុន ម៉ាណែត ប្រកាសជាថ្មីម្តងទៀតថា ធនធានមនុស្សគឺជា កត្តាអាទិភាពធំជាងគេ សម្រាប់អភិវឌ្ឍន៍របស់រាជរដ្ឋាភិបាលគ្រប់ជំនាន់ ហើយរាជរដ្ឋាភិបាលអាណត្តិទី៧នេះ គឺចាត់ទុកធនធានមនុស្សគឺជាទ្រព្យសម្បត្តិយ៉ាងធំ។-សម្តេចធិបតី ហ៊ុន ម៉ាណែត នាយករដ្ឋមន្រ្ដី ៖យើងចង់បានគោលនយោបាយសុខាភិបាលដែលរឹងមាំ គឺយើងត្រូវដាក់ចេញនូវគោលនយោបាយជាក់ស្ដែង គឺមិនមែនគ្រាន់តែចង់ហើយមិនធ្វើនោះទេ ខណៈមកដល់ម៉ោងនេះ កម្ពុជាមានមន្ទីរពេទ្យបង្អែក ១២៥ កន្លែង។-សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានប្រកាសជាថ្មីម្តងទៀតថា រាជរដ្ឋាភិបាលនឹងពង្រីកការផ្តល់សេវាសុខាភិបាលបន្ថែមទៀត ពោលគឺឲ្យគ្រប់ច្រកល្ហកទាំងអស់ ខណៈរាជរដ្ឋាភិបាលបានចាត់ទុកមនុស្សដែលមានសុខភាពល្អ គឺអាចជួយខ្លួនឯង ជួយគ្រួសារ និងសង្គមជាតិ។-សម្តេចធិបតី ហ៊ុន ម៉ាណែត នាយករដ្ឋមន្រ្ដី៖ រាជរដ្ឋាភិបាលបង្កើត របបសន្ដិសុខសង្គម ប.ស.ស គឺដូចជាការបង្កើតបណ្ណធានារ៉ាប់រងសុខភាពសម្រាប់ប្រជាពលរដ្ឋ និងមន្រ្ដីរាជការ ដើម្បីចូលរួមកាត់បន្ថយការចំណាយរបស់ប្រជាពលរដ្ឋ ក្នុងការចំណាយថ្លៃ សម្រាកព្យាបាលថ្លៃនៅមន្ទីរពេទ្យពេលត្រូវការសេវាព្យាបាល។-សម្តេចធិបតី ហ៊ុន ម៉ាណែត នាយករដ្ឋមន្រ្ដី៖ រយៈពេលជាងមួយឆ្នាំ គិតមកដល់បច្ចុប្បន្ន មានបងប្អូនប្រជាពលរដ្ឋកំពុងរស់នៅក្នុងសេដ្ឋកិច្ចក្រៅប្រព័ន្ធមានចំនួនជិត ៦០ ម៉ឺននាក់ បានចូលរួមជាសមាជិករបបសន្ដិសុខសង្គម ប.ស.ស។-សម្តេចធិបតី ហ៊ុន ម៉ាណែត នាយករដ្ឋមន្រ្ដី បញ្ជាក់ថា បច្ចុប្បន្នរាជរដ្ឋាភិបាលបានពង្រីកសេវាសុខាភិបាល មណ្ឌលសុខភាព ទៅដល់មូលដ្ឋានភូមិ ឃុំ អស់ហើយ ប៉ុន្ដែឥឡូវអ្វីដែលត្រូវពង្រឹងនោះ គឺគុណភាពក្នុងការផ្ដល់សេវាល្អដល់ប្រជាពលរដ្ឋ ដែលនេះគឺជាអ្វីដែលរាជរដ្ឋាភិបាលកំពុងពង្រឹងបន្ថែមទៀត។-សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី៖ មន្ទីរពេទ្យហ្លួងម៉ែ នឹងក្លាយជាមន្ទីរពេទ្យដែល មានឯកទេសព្យាបាលជំងឺមហារីកនាពេលឆាប់ៗខាងមុខនេះ។-សម្តេចធិបតី ហ៊ុន ម៉ាណែត នាយករដ្ឋមន្រ្ដី បានជំរុញឱ្យធ្វើទំនើបកម្មក្នុងការពិគ្រោះយោបល់ព្យាបាល ឬវះកាត់ពលរដ្ឋ ដែលមានជំងឺនៅតាមបណ្ដាខេត្ត ឱ្យបានទាន់ពេលវេលា ក្នុងនោះក្រសួងសុខាភិបាលត្រូវសហការជាមួយក្រសួងប្រៃសណីយ៍ និងទូរគមនាគមន៍ ក្នុងគោលដៅធ្វើយ៉ាងណាផ្ដល់សេវាល្អ ព្យាបាលប្រជាពលរដ្ឋឱ្យបានទាន់ពេលវេលា។-សម្តេចធិបតី ហ៊ុន ម៉ាណែត នាយករដ្ឋមន្រ្ដី បានបញ្ជាក់ថា រាជរដ្ឋាភិបាលអាណត្តិទី៧នេះ បន្តផ្ដល់អាទិភាពដល់វិស័យសុខាភិបាល និងវិស័យអប់រំ ខណៈសម្ដេចបានផ្ដល់គោលការណ៍ដល់ក្រសួងសុខាភិបាល ក្នុងការជ្រើសរើសគ្រូពេទ្យបន្ថែម សម្រាប់បម្រើការនៅតាមបណ្ឌលសុខភាពនៅតាមភូមិ ឃុំ ឱ្យបានគ្រប់គ្រាន់។-សម្តេចធិបតី ហ៊ុន ម៉ាណែត នាយករដ្ឋមន្រ្ដី ណែនាំឱ្យរដ្ឋមន្រ្ដីក្រសួងសុខាភិបាល យកចិត្តទុកដាក់លើការគ្រប់គ្រង អាជ្ញាបណ្ណមណ្ឌលសុខភាពឯកជន ជាពិសេសលើការអនុវត្តក្រមសីលធម៌ វិជ្ជាជីវៈរបស់គ្រូពេទ្យ។-សម្តេចធិបតី ហ៊ុន ម៉ាណែត នាយករដ្ឋមន្រ្ដី បានណែនាំដល់ក្រសួងអប់រំ យុវជន និងកីឡា ពិនិត្យមើលចំពោះការលក់ចំណីអាហារដល់កុមារតូចៗ នៅតាមសាលារៀន ជាពិសេសប្រភេទភេសជ្ជផ្អែម។-សម្តេចធិបតី ហ៊ុន ម៉ាណែត នាយករដ្ឋមន្រ្ដី ផ្ដាំមិនឱ្យមានការជ្រើរើសនិស្សិតពេទ្យជាប់ ដោយមិនមានការប្រឡងឡើយ។ សម្ដេច ណែនាំដល់និស្សិតពេទ្យ ត្រូវចង់ចាំថា គ្រូពេទ្យកំពុងដើរតួនាទី ជាទេវាតាសង្គ្រោះពលរដ្ឋ ដែលមានជំងឺ ដូច្នេះត្រូវប្រកាន់ភ្ជាប់នូវជំនាញបច្ចេកទេស និងក្រមសីលធម៌ វិជ្ជាជីវៈ។-សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី ប្រកាសស្វាគមន៍ចំពោះវិស័យឯកជនដែលចង់ វិនិយោគលើវិស័យសុខាភិបាលនៅកម្ពុជា។ សម្ដេចធិបតីបញ្ជាក់បន្ថែមថា ការវិនិយោគរបស់វិស័យ ឯកជនក្នុងផ្នែកសុខភាពសាធារណៈនេះ ត្រូវតែធានាឱ្យបាននូវគុណភាព។-សម្តេចធិបតី ហ៊ុន ម៉ាណែត នាយករដ្ឋមន្រ្ដី ស្នើទាំងវិស័យឯកជន និងរដ្ឋ ត្រូវវិនិយោគទៅលើការបណ្ដុះបណ្ដាលបន្ថែមដល់គ្រូពេទ្យឱ្យបានច្រើន ដើម្បីរួមគ្នាជួយការពារថែរក្សា ព្យាបាលដល់ប្រជាពលរដ្ឋឱ្យទទួលបានប្រសិទ្ធភាព និងគុណភាពរឹតតែល្អបន្ថែមទៀត។

ឯកឧត្តម ហេង សួរ ទទួលជួបពិភាក្សាការងារជាមួយគណៈប្រតិភូក្រុមហ៊ុនជប៉ុន

ភ្នំពេញ៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានទទួលជួបសម្តែងការគួរសម និងពិភាក្សាការងារជាមួយគណៈប្រតិភូក្រុមហ៊ុន មីនេបៀ មីត្សូមី (Minebea Mitsumi) ដែលដឹកនាំដោយលោក យ៉ូស៊ីហ៊ីសា កៃនូម៉ា (Yoshihisa KAINUMA) អគ្គនាយកនៃក្រុមហ៊ុន Minebea Mitsumi។ នាឱកាសនោះឯកឧត្តម ហេង សួរ បានសម្តែងការស្វាគមន៍ និងអបអរសាទរចំពោះក្រុមហ៊ុន Minebea Mitsumi ដែលបង្កើតសាខាថ្មីរបស់ខ្លួននៅខេត្តពោធិ៍សាត់ ស្ថិតក្នុងស្រុកក្រគរ ដែលជារោងចក្រផលិត ដំឡើង និងបង្គុំសមាសធាតុជាក់លាក់គ្រឿងម៉ាស៊ីន និងមេកានិក។ ក្នុងន័យនេះ ឯកឧត្តម បានបញ្ជាក់ថា ក្រសួងត្រៀមរួចជាស្រេចក្នុងការផ្គត់ផ្គង់កម្លាំងពលកម្មសម្រាប់រោងចក្រថ្មីនេះ ក៏ដូចជាផ្តល់ការបណ្តុះបណ្តាលដល់កម្មករនិយោជិតរបស់ក្រុមហ៊ុនផងដែរ។ ឯកឧត្តមរដ្ឋមន្ត្រី ចាត់ទុកប្រតិបត្តិការអាជីវកម្មរបស់ក្រុមហ៊ុន Minebea Mitsumi គឺជាគំរូអាជីវកម្មដ៏សំខាន់នៅកម្ពុជា ខណៈដែលការរីកចម្រើនរបស់ក្រុមហ៊ុនក៏ជាការរីកចម្រើនរបស់កម្ពុជាដូចគ្នាដែរ។ ជាការឆ្លើយតប លោក Yoshihisa KAINUMA បានថ្លែងអំណរគុណចំពោះក្រសួងការងារ និងបណ្តុះបណ្តាលវិជ្ជាជីវៈ ក្នុងការគាំទ្រជាច្រើនសម្រាប់ប្រតិបត្តិការរបស់ក្រុមហ៊ុនជាបន្តបន្ទាប់ ជាពិសេសគម្រោងបង្កើតរោងចក្រថ្មី Minebea (Cambodia) នៅក្នុងខេត្តពោធិ៍សាត់ ដែលនឹងត្រូវចាប់ផ្តើមដំណើរការនាឆ្នាំ២០២៥ ខាងមុខនេះ។ លោកបានបញ្ជាក់ថា ក្រុមហ៊ុន Minebea Mitsumi នឹងបន្តធ្វើការជាមួយកម្ពុជាសម្រាប់ភាពរីកចម្រើន និងការអភិវឌ្ឍរួមគ្នា៕

ប្រជាសហគមន៍អេកូទេសចរណ៍ត្រពាំងសង្កែទទួលបានជំនាញ និងចំណេះដឹងថ្មីៗ ពីគម្រោង SCMF

កំពត ៖តាមរយៈគម្រោងជលផលសមុទ្រ និងតំបន់ឆ្នេរប្រកបដោយចីរភាព(SCMF) បានធ្វើឱ្យប្រជាសហគមន៍ត្រពាំងសង្កែមានជីវភាពធូធារជាងមុន តាមរយៈទទួលបានជំនាញ និងចំណេះដឹងថ្មីៗ។ ប្រជាពលរដ្ឋរស់នៅក្នុងសហគមន៍អេកូទេសចរណ៍ត្រពាំងសង្កែ ស្ថិតនៅខេត្តកំពត នៅល្ងាចថ្ងៃទី ០៩ ខែធ្នូ ឆ្នាំ២០២៤ បានប្រាប់BTVឱ្យដឹងថា បច្ចុប្បន្នជីវភាពរស់នៅរបស់ពួកគេធូធារជាងមុន បន្ទាប់ពីសហគមន៍ទទួលបានការជ្រោមជ្រែងពីគម្រោងជលផលសមុទ្រ និងតំបន់ឆ្នេរប្រកបដោយចីរភាព។ ពលរដ្ឋបន្តថា តាមរយៈគម្រោងនេះ ពួកគេទទួលបានចំណេះដឹងថ្មីៗ ពីរបៀបផ្តល់សេវាកម្មទេសចរណ៍ ការធ្វើវារីវប្បកម្ម និងការកែច្នៃផលនេសាទជាដើុំ ។ក្នុងពេលអញ្ជើញទស្សនកិច្ចនៅសហគមន៍អេកូទេសចរណ៍ត្រពាំងសង្កែ លោកស្រី Jyotsana Varma នាយិកាធនាគារអភិវឌ្ឍន៍អាស៊ីប្រចាំកម្ពុជា(ADB) មានប្រសាសន៍ថា ការពិតទៅ គម្រោង SCMF មានលក្ខណៈពិសេសណាស់ សម្រាប់ADB ដោយសារយុទ្ធសាស្រ្ត៥ឆ្នាំទៀតរបស់ ADB ផ្តោតទៅលើ៣ចំណុចរួមមាន៖ទី១.វិបុលភាព ទី២.ប្រជាពលរដ្ឋ និងទី៣.ភពផែនដី។ លើសពីនេះ លោកស្រីបន្តថា មូលហេតុដែលគម្រោង SCMF ជ្រើសរើសយកសហគមន៍អេកូទេសចរណ៍ត្រពាំងសង្កែសម្រាប់អនុវត្តគម្រោង ព្រោះសហគមន៍នេះ កន្លងទៅទទួលបានជោគជ័យ នឹងចង់ជួយឱ្យសហគមន៍នេះកាន់តែជោគជ័យបន្ថែមទៀត តាមរយៈការផ្តល់ជំនាញ និងចំណេះដឹង និងជាគំរូដល់សហគមន៍ដដៃទៀត។លោកបណ្ឌិត ខូវ គួង អគ្គនាយករងរដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ បានលើកឡើងដែរថា ដើម្បីបង្កើនភាពធន់នឹងអាកាសធាតុ និងនិរន្តរភាពនៃជលផលតំបន់ឆ្នេរ និងសមុទ្រ គម្រោង SCMF បានកំណត់អនុវត្តសកម្មភាពក្នុងសមាគមសហគមន៍នេសាទចំនួន ២៥ និងតំបន់ការពារសហគមន៍ចំនួន ១៥ ដែលស្ថិតនៅខេត្តជាប់មាត់សមុទ្រនៃប្រទេសកម្ពុជា។លើសពីនេះ លោកបណ្ឌិត បានអរគុណដល់ធនាគារអភិវឌ្ឍន៍អាស៊ី និងទីភ្នាក់ងារអភិវឌ្ឍន៍បារាំងដែលតែងតែ គាំទ្រដល់រាជរដ្ឋាភិបាលកម្ពុជា និងជាពិសេសរដ្ឋបាលជលផល។គួរបញ្ជាក់ដែរថា គម្រោងជលផលសមុទ្រ និងតំបន់ឆ្នេរប្រកបដោយចីរភាព (SCMF) បានចាប់អនុវត្តពីខែធ្នូ ឆ្នាំ ២០២២ រហូតដល់ខែសីហា ឆ្នាំ ២០២៩ ដោយប្រើប្រាស់កញ្ចប់ហិរញ្ញប្បទាន ៧៣លានដុល្លារពីធនាគារADB ក្នុងនោះ ៥១ លានដុល្លារជាប្រាក់កម្ចី និង ២២ លានដុល្លារជាជំនួយឥតសំណង និងទីភ្នាក់ងារអភិវឌ្ឍន៍បារាំង ២0 លានដុល្លារ។ អត្ថបទ៖ទូច សោភ័ណ

ប្រទេសអារ៉ាប៊ីសាអូឌីត នឹងបើកស្ថានទូតនៅកម្ពុជាក្នុងពេលដ៏ខ្លីខាងមុខនេះ ដើម្បីពង្រឹងទំនាក់ទំនងទ្វេភាគី រវាងប្រទេសប្រទេសទាំងពីរ

ភ្នំពេញ ÷ នៅព្រឹក ថ្ងៃទី៩ ខែធ្នូ ឆ្នាំ២០២៤ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានអញ្ជើញជួបពិភាក្សាជាមួយ ឯកឧត្តមបណ្ឌិត អាប់ឌុលឡា ម៉ូហាម៉េដ អ៊ីប្រាហ៊ីម អាល-សេក្ខ (Abdullah Mohammed Ibrahim Al-Sheikh) ប្រធានសភា នៃព្រះរាជាណាចក្រអារ៉ាប៊ីសាអូឌីត នៅវិមានរដ្ឋសភា រាជធានីរីយ៉ាដ។ជាកិច្ចចាប់ផ្តើម ឯកឧត្តមប្រធានសភា បានស្វាគមន៍យ៉ាងកក់ក្ដៅចំពោះ សម្ដេចតេជោ និងគណៈប្រតិភូ និងបានអរគុណសម្តេចតេជោ ដែលបានអញ្ជើញមកបំពេញទស្សនកិច្ចនៅព្រះរាជាណាចក្រអារ៉ាប៊ីសាអូឌីត ។ ឯកឧត្តម បានសម្តែងក្តីរីករាយក្នុងការទទួល និងជួប សម្តេចតេជោ ដោយផ្ទាល់។ នាឱកាសនេះ សម្តេចតេជោ បានសម្តែងនូវសេចក្តីអំណរគុណដល់ ឯកឧត្តមប្រធានសភា ចំពោះ ការទទួលស្វាគមន៍ សម្តេច និងគណៈប្រតិភូ យ៉ាងកក់ក្តៅ ជាពិសេស ពេលសម្តេចអញ្ជើញមកដល់ នៅព្រលានយន្តហោះនៃរាជធានីរីយ៉ាដ។ សម្តេចតេជោ បន្ថែមថា ទស្សនកិច្ចពេលនេះនឹងជំរុញទំនាក់ទំនងទ្វេភាគីរវាងប្រទេសយើងទាំងពីរបន្ថែមទៀត ជាពិសេសការជំរុញការផ្លាស់ប្តូរប្រជាជន និងប្រជាជន ទេសចរណ៍ និងកីឡា ព្រមទាំងទំនាក់ទំនងពាណិជ្ជកម្ម និងវិនិយោគ។សម្តេចតេជោ ស្នើដល់ ឯកឧត្តមប្រធានសភា ថាប្រទេសយើងទាំងពីរគួរចាប់ផ្តើមធ្វើកិច្ចសហប្រតិបត្តិការស្នូល តាមរយៈកម្ពុជានាំចេញអង្ករមកអារ៉ាប៊ីសាអូឌីត ដោយសារកម្ពុជាមានប្រព័ន្ធស្រោចស្រពល្អជាងមុន និងមានអតិរេកស្រូវ។ សម្តេចតេជោ បានស្នើឯកឧត្តមប្រធានសភា ជំរុញវិនិយោគិនអារ៉ាប៊ីសាអូឌីត ឱ្យមកវិនិយោគរៀបចំម៉ាស៊ីនកិនស្រូវ ស្តុក និងវេចខ្ចប់ នៅកម្ពុជា សម្រាប់នាំចេញអង្ករមកប្រទេសអារ៉ាប៊ីសាអូឌីត និងប្រទេសនានាក្នុងតំបន់។ សម្តេចបាន បន្ថែមថាមិនមានប្រទេសច្រើនផ្តល់ឱកាសឱ្យវិនិយោគដោយផ្ទាល់ដូចនេះទេ។ សម្តេចតេជោ បានលើកឡើងថា អារ៉ាប៊ីសាអូឌីតមានសន្តិសុខថាមពល រីឯកម្ពុជា មានសន្តិសុខស្បៀង។ ប្រទេសយើងទាំងពីរអាចបំពេញបន្ថែមគ្នាទៅវិញទៅមក។ សម្តេចតេជោ បានលើកឡើងបន្ថែមថា ប្រទេសយើងទាំងពីរជាប្រទេសប្រកាន់របបរាជាធិបតេយ្យ អាស្រ័យហេតុនេះ ត្រូវរឹងចំណងមេត្រីភាព។ សម្តេចតេជោ បានថ្លែងអំណរគុណ ព្រះមហាក្សត្រ អារ៉ាប៊ីសាអូឌីត ដែលព្រះអង្គ ទ្រង់បានព្រះរាជប្រទាន ដល់សាសនិកអ៊ីស្លាមកម្ពុជា ពី២០ ទៅ១០០នាក់ បានចូលរួមបុណ្យហាជី (Hajj) ជារៀងរាល់ឆ្នាំ ហើយបានសព្វព្រះរាជហប្ញទ័យផ្តល់អាហារូបករណ៍ដល់យុវជនកម្ពុជា។ សម្តេចតេជោ បានលើកឡើងថា នៅកម្ពុជាព្រះពុទ្ធសាសនាជាសាសនារបស់រដ្ឋ ក៏ប៉ុន្តែយើងខ្ញុំមិនព្រងើយកន្តើយនឹងសហគមមូស្លីមឡើយ ដែលទទួលបានការយកចិត្តទុដាក់ខ្ពស់ ជាពិសេសការបញ្ចូលទៅក្នុងស្ថាប័នព្រឹទ្ធសភា រដ្ឋសភា រាជរដ្ឋាភិបាល កងទ័ព និង ថ្នាក់ក្រោមជាតិ។ សម្តេច បានបន្ថែមថា នៅកម្ពុជាមានការរៀបចំគណៈជាន់ខ្ពស់អ៊ីស្លាមដែលមានឋានៈស្មើនឹង សម្តេចព្រះសង្ឃរាជ។ កម្ពុជា គឺជាប្រទេសគំរូនៃការអនុវត្តគោលនយោបាយ សុខុដុមនីយកម្មសាសនា នៅអាស៊ីអាគ្នេយ៍ ។សម្តេចតេជោ បានគូសបញ្ជាក់ថា អារ៉ាប៊ីសាអូឌីត មានប្រជាប្រិយភាពកាន់តែខ្លាំងនៅក្នុងតំបន់ អាស្រ័យមានការប្រកួតកីឡាអន្តរជាតិ។ សម្តេច សូមជូនពរ អារ៉ាប៊ីសាអូឌីត ទទួលបានជោគជ័យនៅពេលធ្វើជាម្ចាស់ផ្ទះនៃ World Cup នាពេលខាងមុខ។ ឆ្លៀតក្នុងឱកាសនោះ សម្តេចតេជោ ក៏បានអញ្ជើញឯកឧត្តមប្រធានសភាមកបំពេញទស្សនកិច្ចនៅកម្ពុជា នាពេលខាងមុខ។ ជាកិច្ចឆ្លើយតប ឯកឧត្តមប្រធានសភា បានស្វាគមន៍ជាថ្មីដំណើរទស្សនកិច្ចរបស់សម្តេចតេជោ និង បានបញ្ជាក់ថាការលើកឡើងនេះរបស់ សម្តេចតេជោ មានសារៈសំខាន់ណាស់ ហើយ ឯកឧត្តម នឹងយកចិត្តទុកដាក់ និងយកទៅពិចារណា។ ឯកឧត្តម បានលើកឡើងថា ប្រទេសអារ៉ាប៊ីសាអូឌីត នឹងបើកស្ថានទូត នៅកម្ពុជាក្នុងពេលដ៏ខ្លីខាងមុខនេះ។ ការបើកស្ថានទូតទូតនេះ នឹងបង្កភាពងាយស្រួលដល់ការជំរុញ និងពង្រឹងបន្ថែមទៀតនូវទំនាក់ទំនងទ្វេភាគី រវាងប្រទេសប្រទេសទាំងពីរ។ ឯកឧត្តម បានគូសបញ្ជាក់ថា អារ៉ាប៊ីសាអូឌីត យកចិត្តទុកដាក់ខ្លាំងលើការលើកកម្ពស់សេដ្ឋកិច្ច និងសាសនា និង ការធ្វើកិច្ចសហប្រតិបត្តិការលើវិស័យផ្សេងៗទៀត ជាពិសេស វិស័យប្រេងដែលជាវិស័យសំខាន់បំផុតរបស់ អារ៉ាប៊ីសាអូឌីត។ ប្រទេសជាច្រើនមានទំនាក់ទនងជាមួយអារ៉ាប៊ីសាអូឌីត តាមរយៈការផ្សាភ្ជាប់វិស័យសេដ្ឋកិច្ច។ ឯកឧត្តម សូមស្វាគន៍ចំពោះសំណូមពររបស់សម្តេច ពាក់ព័ន្ធនឹងអាហារូបករណ៍ផ្តល់ដល់យុវជនកម្ពុជានឹងការរៀបចំឱ្យមានការប្រកួតកីឡារវាងប្រទេសទាំងពីរ នៅអារ៉ាប៊ីសាអូឌីត ព្រមទាំងរីករាយនឹងធ្វើការជាមួយសម្តេចតេជោ។ ឯកឧត្តម បន្ថែមថា នៅក្នុងរដ្ឋសភារបស់អារ៉ាប៊ីសាអូឌីត មានគណៈកម្មការទទួលបន្ទុកជាមួយនឹងកម្ពុជាក៏ប៉ុន្តែ ទំនាក់ទំនងមិនទាន់ស៊ីជម្រៅនៅឡើយទេ។ ឯកឧត្តម បញ្ជាក់ថាគណៈកម្មការទាំងសងខាង ត្រូវធ្វើកិច្ចសហប្រតិបត្តិការជាមួយគ្នាឱ្យបានច្រើននៅពេលអនាគត។ ឯកឧត្តមប្រធានសភាអារ៉ាប៊ីសាអូឌីត បានសម្តែងនូវក្តីរីករាយក្នុងការទទួលយកការអញ្ជើញរបស់សម្តេចតេជោ ក្នុងការបំពេញទស្សនកិច្ចនៅកម្ពុជា នាពេលសមស្រមខាងមុខ។សម្តេចតេជោ និង ឯកឧត្តមប្រធានសភាអារ៉ាប៊ីសាអូឌីត ក៏បានផ្លាស់ប្តូរយោបល់គ្នាលើស្ថានការណ៍តំបន់ និងអន្តរជាតិផងដែរ។ ជាទីបញ្ចប់ ឯកឧត្តម ប្រធានសភាអារ៉ាប៊ីសាអូឌីត បានជូនពរសម្ដេចតេជោ និងគណៈប្រតិភូទទួលបាននូវភាពជោគជ័យនៅក្នុងគ្រប់ភារកិច្ច៕

កម្ពុជាបង្កើនការយល់ដឹងនៃបច្ចេកវិទ្យា E-beam និង X-ray ដើម្បីពង្រឹងដល់វិស័យឧស្សាហកម្ម និង សន្តិសុខចំណីអាហារ

ភ្នំពេញ ៖ កម្ពុជារៀបចំសិក្ខាសាលាបង្កើនការយល់ដឹង និងការប្រើប្រាស់បរិក្ខារប្រព្រឹត្តកម្មវិទ្យុសកម្មពហុបំណង ដោយបច្ចេកវិទ្យា E-beam និង X-ray ដែលជាប្រព័ន្ធពហុបំណង ដើម្បីជំរុញការប្រើប្រាស់បច្ចេកវិទ្យានេះជួយដល់វិស័យឧស្សាហកម្ម ការពង្រឹងដល់ប្រព័ន្ធសន្តិ- សុខចំណីអាហារ និងវិស័យផ្សេងៗទៀតឱ្យរីកចម្រើនបានឆាប់រហ័ស។ ឯកឧត្តម ហែម វណ្ណឌី រដ្ឋមន្ត្រី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើកឡើងនៅក្នុងសិក្ខា សាលាបង្កើនការយល់ដឹង និងការប្រើប្រាស់បរិក្ខារប្រព្រឹត្តកម្មវិទ្យុសកម្មពហុបំណងដោយបច្ចេកវិទ្យា E-beam (អីបីម) និង X-ray (អេចសារ៉េ) នៅកម្ពុជា នៅថ្ងៃទី ៩ ខែ ធ្នូ នេះថា បច្ចេកវិទ្យា E-beam និង X-ray អាចត្រូវបានប្រើប្រាស់ទូលំទូលាយ នៅក្នុងវិស័យ ជាច្រើន ហើយពិតណាស់ការប្រើប្រាស់ទាំងអស់ គឺសម្រាប់តែគោលបំណងស៊ីវិលប៉ុណ្ណោះ, មិនថាប្រើដើម្បីសម្លាប់មេរោគលើឧបករណ៍ វេជ្ជសាស្ត្រ, វិស័យឧស្សាហកម្ម, ការបង្កើនសុវត្ថិភាពចំណីអាហារ, ឬជំរុញការកែច្នៃរូបធាតុនោះទេ ដោយបច្ចេកវិទ្យាទាំងនេះមាន សក្ដានុពលធំធេង និងអាចជំរុញវិស័យពាក់ព័ន្ធឱ្យរីកចម្រើនបានឆាប់រហ័ស។ឯកឧត្តម បន្តថា ក្រៅពីលើកកម្ពស់ការយល់ដឹងអំពីអត្ថប្រយោជន៍ទូលំទូលាយ នៃបច្ចេកវិទ្យា E-beam និង X-ray សិក្ខា សាលាក៏មានគោលដៅលើកកម្ពស់ភាពប្រកួតប្រជែងក្នុងវិស័យឧស្សាហកម្ម តាមរយៈការចាប់យកបច្ចេកវិទ្យាទាំងនេះទៅប្រើប្រាស់ ដើម្បីបង្កើនប្រសិទ្ធភាព និងគុណភាពផលិតផល។ លើសពីនេះសិក្ខាសាលាក៏ផ្តោតលើការប្រើប្រាស់បច្ចេកវិទ្យា ដែលមានមេត្រីភាព បរិស្ថាន ដើម្បីបង្កើតដំណោះស្រាយនិរន្តរភាព ដូចជាការគ្រប់គ្រងសំណល់ និងការកែច្នៃរូបធាតុ ដែលឆ្លើយតបទៅនឹងបញ្ហាបរិស្ថាន ដែលកាន់តែមានសភាពធ្ងន់ធ្ងរ។ឯកឧត្តម ហែម វណ្ណឌី លើកឡើងបន្ថែមថា យើងត្រូវចូលរួមលុបបំបាត់ការយល់ខុសជុំវិញវិទ្យុសកម្ម ចំណីអាហារ ដើម្បីធានា ដល់សាធារណជនថា នីតិវិធី និងបទប្បញ្ញត្តិសុវត្ថិភាពតឹងរ៉ឹង ស្តីពីប្រព្រឹត្តិកម្មវិទ្យុសកម្ម ត្រូវបានអនុវត្តដើម្បីធានាសុវត្ថិភាពចំណី អាហាររបស់យើង។ នេះគឺជាជំហានដំបូងហើយ ដែលក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្រោមកិច្ចសហការ ជាមួយការិយាល័យប្រចាំតំបន់ នៃកិច្ចព្រមព្រៀងសហប្រតិបត្តិការតំបន់ (RCARO) និងការិយាល័យសន្តិសុខវិទ្យុសកម្មរបស់ក្រសួង ថាមពលសហរដ្ឋអាមេរិក បានរៀបចំសិក្ខាសាលាបង្កើន ការយល់ដឹង និងការប្រើប្រាស់បរិក្ខារប្រព្រឹត្តកម្មវិទ្យុសកម្មពហុបំណង ដោយ បច្ចេកវិទ្យា E-beam និង X-ray នេះនៅកម្ពុជា៕អត្ថបទ៖ សុន រ៉ាឌី

វិថីតេជោសន្តិភាពឆ្នេរអង្កោលបានរួមចំណែកលើកស្ទួយជីវភាពពលរដ្ឋនៅក្នុងសហគមន៍

កែប ៖ ប្រជាពលរដ្ឋរស់នៅឃុំអង្កោល ស្រុកដំណាក់ចង្អើរ ខេត្តកែប មានជីវភាពសមរម្យជាងមុន បន្ទាប់ពីវិថីតេជោសន្តិភាពឆ្នេរអង្កោល បានដាក់សម្ពោធឱ្យប្រើប្រាស់នាពេលថ្មីៗ។ នេះបើតាមការឱ្យដឹងពីលោក ប៊ុន យោង អភិបាលរងខេត្តកែប បានផ្តល់បទសម្ភាសជាមួយក្រុមអ្នកសារព័ត៌មាន នៅថ្ងៃទី០៩ ខែធ្នូនេះ ក្នុងពេលលោកស្រី Jyots ana Varma នាយិកាធនាគារអភិវឌ្ឍន៍អាស៊ីប្រចាំកម្ពុជា (ADB) បានដឹកនាំក្រុមការងារ ADB និងអ្នកសារព័ត៌មានចុះទស្សនកិច្ចនៅខេត្តកែប។នៅក្នុងបទសម្ភាស លោកបានបន្តថា វិថីតេជោសន្តិភាពឆ្នេរអង្កោល បានផ្តល់ផលប្រយោជន៍ជាច្រើនដល់ពលរដ្ឋរស់នៅខេត្តកែប ដែលក្នុងនោះរួមមាន៖ជាប្រព័ន្ធទំនាក់ទំនងចរាចរណ៍ងាយស្រួលតភ្ជាប់ពីស្រុកទៅទីរួមខេត្ត,បានទាក់ទាញភ្ញៀវទេសចរជាតិ និងអន្តរជាតិមកដើរលេងកំសាន្តនៅឆ្នេរអង្កោល,បានផ្លាស់ប្តូរមុខរបរប្រជាពលរដ្ឋមួយចំនួនក្នុងសហគមន៍ពីមុខរបរនេសាទ និងមុខរបរមានហានិភ័យមកប្រកបមុខរបរការផ្តល់សេវាទេសចរវិញ ធ្វើឱ្យជីវភាពរបស់ពួករស់នៅសមរម្យជាងមុនផងដែរ។ លើសពីនេះ លោកបានអរគុណដល់រាជរដ្ឋាភិបាលតាមរយៈក្រសួងសាធារណៈការ និងដឹកជញ្ជូន និងធនាគារ ADB ដែលកសាងវិថីតេជោសន្តិភាពឆ្នេរអង្កោលនេះឡើង។ពលរដ្ឋបានឱ្យដឹងដែរថា បច្ចុប្បន្នការប្រកបមុខរបរនៅឆ្នេរអង្កោលមានភាពមមាញឹកគួរសម បន្ទាប់ពីវិថីតេជោសន្តិភាពឆ្នេរអង្កោលបានធ្វើរួចរាល់ ព្រោះមានភ្ញៀវទេសចរជាតិ និងអន្តរជាតិ មកដើរលេងនៅតាមឆ្នេរនេះ។លោកស្រី Jyotsana Varma នាយិកាធនាគារអភិវឌ្ឍន៍អាស៊ីប្រចាំកម្ពុជា បានឱ្យដឹងដែរថា គម្រោងហេដ្ឋារចនាសម្ព័ន្ធទេសចរណ៍មហានុតំបន់ទន្លេមេង្គដើម្បីកំណើនប្រកបដោយបរិយាបន្ន ជំហានទី២ ធនាគារអភិវឌ្ឍន៍អាស៊ី បានគាំទ្ររាជរដ្ឋាភិបាលកម្ពុជាក្នុងការផ្តល់កម្ចីឥណទានសម្បទាន ប្រមាណ១០លានដុល្លា សម្រាប់សាងសង់វិថីតេជោសន្តិភាពឆ្នេរអង្កោលប្រវែងជាង១២គីឡូមែត្រ។ ហើយគម្រោងនេះ បានផ្តល់ផលវិជ្ជាមានជាច្រើនដល់ពលរដ្ឋក្នុងសហគមន៍រាប់បញ្ចូលទាំងស្រ្តីផងដែរ។គួរបញ្ជាក់ដែរថា វិថីតេជោសន្តិភាពឆ្នេរអង្កោល បានសម្ពោធដាក់ឱ្យប្រើប្រាស់ជាផ្លូវការនៅថ្ងៃទី១១ ខែវិច្ឆិកា ឆ្នាំ២០២៤ ក្រោមអធិបតីភាពដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា។ វិថីនេះ ប្រើប្រាស់រយៈពេលសាងសង់ចំនួន ២៤ខែ ចាប់ផ្ដើមក្នុងខែមករា ឆ្នាំ២០២២ និងបញ្ចប់ក្នុងខែមករា ឆ្នាំ២០២៤ ដោយចំណាយថវិកាសរុបប្រមាណ ១០លានដុល្លារអាមេរិក ជាកម្ចីឥណទានសម្បទានពីធនាគារអភិវឌ្ឍន៍អាស៊ី និងថវិកាបដិភាគមួយចំនួនរបស់រាជរដ្ឋាភិបាល សម្រាប់ការដោះស្រាយផលប៉ះពាល់ និងពន្ធអាករផ្សេងៗ។ អត្ថបទ៖ទូច សោភ័ណ

តំណាងអយ្យការសម្រេចចោទបុរសម្នាក់ បើកបរក្នុងស្ថានភាពស្រវឹង បណ្ដាលឲ្យមានមនុស្សស្លាប់ និងរបួស

ភ្នំពេញ៖ យោងតាមសេចក្ដីប្រកាសព័ត៌មាន របស់អយ្យការអមសាលាដំបូងរាជធានីភ្នំពេញ នាល្ងាចថ្ងៃទី០៩ ខែធ្នូ ឆ្នាំ២០២៤ បានឲ្យដឹងថា តំណាងអយ្យការសម្រេចចោទ បុរសម្នាក់ ដែលបើករថយន្តម៉ាក lexus Nx200T បុករះ បណ្ដាលឲ្យមនុស្សម្នាក់ស្លាប់ និង០២នាក់ទៀតរបួសធ្ងន់ ពីបទ បើកបរបង្កគ្រោះថ្នាក់ចរាចរណ៍បណ្ដាលឲ្យរបួសនិងស្លាប់អ្នកដទៃ តាមមាត្រា៨៣ និងមាត្រា៨៥ នៃច្បាប់ចរាចរណ៍ផ្លូវគោក។យោងតាមសមត្ថកិច្ចបានបញ្ជាក់ឲ្យដឹងថា ជនត្រូវចោទមានឈ្មោះ ស្រី ឧត្តម ភេទប្រុស អាយុ៣០ឆ្នាំ បើកបរក្រោមស្ថានភាពស្រវឹងមានអត្រាជាតិអាលកុល ០.៦២mg/l ។គួរបញ្ជាក់ដែរ កាលពីវេលាម៉ោង ១១និង៣៥នាទីយប់ ថ្ងៃទី០៧ ខែធ្នូ ឆ្នាំ២០២៤ ចំណុចស្តុបសំណង់១២ ស្ថិតនៅតាមបណ្ដោយផ្លូវលេខ១៨២ កែងផ្លូវលេខ២៦១ ភូមិ៨ សង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ មានបុរសម្នាក់បានបើករថយន្តម៉ាក lexus Nx200T តាមបណ្ដោយផ្លូវទេពផនក្នុងល្បឿនយ៉ាងលឿនបានបុករះម៉ូតូចំនួន ០២គ្រឿង ដើមឈើមួយដើមបាក់ដល់គល់ បណ្ដាលឲ្យមនុស្សស្លាប់ម្នាក់ និងរបួសធ្ងន់០២នាក់។ប្រភពព័ត៌មានបានឲ្យដឹងថានៅមុនពេលកើតហេតុមានបុរសម្នាក់ដែលបើករថយន្តម៉ាក lexus Nx200t ពណ៌ស ពាក់ស្លាកលេខ ភ្នំពេញ 2BT-4562 ធ្វើដំណើរតាមបណ្ដោយផ្លូវលេខ១៨២ ក្នុងទិសដៅពីលិចទៅកើត ក្នុងល្បឿនយ៉ាងលឿន ខណៈមកដល់ចំណុចកែងផ្លូវលេខ២៦១ រថយន្តបានបុកម៉ូតូ ពីរគ្រឿង កំពុងបើកឆ្លងភ្លើងស្តុប (ភ្លើងស្តុបពណ៌ខៀវ) មួយគ្រឿង ម៉ាក PCX ពណ៌ស ពាក់ស្លាកភ្នំពេញ 1KF-2588 និង ម៉ូតូមួយគ្រឿងទៀតម៉ាក Let បណ្ដាលឲ្យម៉ូតូ PCX និង ម្ចាស់ម៉ូតូ ជាប់លើកញ្ចក់រថយន្តរហូតមកបុក ផ្តាច់ដើមឈើមួយដើមបាក់ដល់ដី បណ្ដាលឲ្យបុរសម្ចាស់ម៉ូតូ PCX ស្លាប់ភ្លាមៗនៅក្បែររថយន្ត និង មានមនុស្ស០២នាក់ផ្សេងទៀតរងរបួសធ្ងន់។ ចំណែករថយន្តរងការខូចខាត ខ្ទេចមួយកំណាត់មុខនិង ដាច់ម៉ូតូ PCX ជាពីរកំណាត់ផងដែរ៕អត្ថបទ៖ កុម្ភះ

បណ្ដាញសង្គម

ព័ត៌មានថ្មីៗ

ប្រធានអាជ្ញាធរប៉ាឡេស្ទីន បង្ហាញការត្រៀមសហការជាមួយអាមេរិក ដើម្បីសម្រេចបានសន្តិភាពក្នុងតំបន់

អ៊ីស្រាអែល ថាខ្លួននឹងផ្អាកការផ្តល់ជំនួយនៅហ្កាហ្សា ដើម្បីរកវិធីកុំឱ្យក្រុមហាម៉ាស លួចគ្រឿងផ្គត់ផ្គង់

លោក Trump ស្នើកញ្ចប់ថវិកាការពារជាតិតម្លៃ ៨៩៣ពាន់លានដុល្លារ ផ្ដោតលើមីស៊ីល និងដ្រូនទំនើបៗ

លោក Trump ឱ្យសញ្ញាថា អាមេរិកអាចបន្ធូរទណ្ឌកម្មប្រេងលើអ៊ីរ៉ង់ ដើម្បីជួយកសាងប្រទេសនេះឡើងវិញ

ប្លុកអឺរ៉ុប ចង់បានចម្លើយពីមេដឹកនាំក្នុងកិច្ចប្រជុំកំពូល អំពីការដោះស្រាយជម្លោះពន្ធរបស់អាមេរិក

ប្រជាជនអ៊ីរ៉ង់ បារម្ភចំពោះការបន្តបាត់មុខរបស់លោក Khamenei ពីក្រសែភ្នែកសាធារណៈ

ប្រមុខរបបសឹកមីយ៉ាន់ម៉ា បញ្ជាក់ពីផែនការបោះឆ្នោតនៅអំឡុងចុងឆ្នាំ២០២៥នេះ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877