BTV NEWS

អាល្លឺម៉ង់គាំទ្រកម្ពុជាលើវិធីសាស្ត្រដោះស្រាយជម្លោះព្រំដែនដោយសន្តិវិធី ខណៈសភាទាំងពីរប្តេជ្ញាពង្រីកកិច្ចសហប្រតិបត្តិការឱ្យកាន់តែស៊ីជម្រៅ តាមរយៈការផ្លាស់ប្ដូរទស្សនកិច្ចទៅវិញទៅមក

ទេសរដ្ឋមន្ដ្រី គន់ គីម ជំរុញឲ្យរដ្ឋបាលខេត្តឧត្តរមានជ័យត្រូវពិនិត្យសំណើផ្តល់ប័ណ្ណសម្គាល់ម្ចាស់អចលនវត្ថុជូនពលរដ្ឋ

កម្ពុជា និងចិន ចុះពិធីសារបើកផ្លូវនាំចេញ ផលិតផលសាច់គោ និងមៀនសម្ងួត ពីកម្ពុជាទៅកាន់ទីផ្សារប្រទេសចិន

ប្រាសាទតាសោម៖ ភាពសុខដុមរមនារវាងប្រាសាទបុរាណនិងបរិស្ថានធម្មជាតិ

ព័ត៌មានជាតិ

វិទ្យាស្ថាន NIEI និងស្ថានទូតឥណ្ឌា ចុះអនុស្សរណៈយោគយល់លេីការបណ្ដុះបណ្ដាលជំនាញធុរកិច្ចភេសជ្ជៈនៅកម្ពុជា

ភ្នំពេញ៖ វិទ្យាស្ថានជាតិសហគ្រិនភាព និងនវានុវត្តន៍ (NIEI) បានរៀបចំពិធីចុះហត្ថលេខាលើអនុស្សរណៈនៃការយោគយល់ ស្តីពីការផ្តល់គម្រោងលទ្ធកម្មឧបករណ៍ និងសម្ភារៈបណ្ដុះបណ្ដាលជំនាញធុរកិច្ចភេសជ្ជៈ ក្រោមគម្រោងទទួលផលឆាប់រហ័ស (Quick Impact Project) ដែលទទួលបានជំនួយឧបត្ថម្ភពីស្ថានទូតសាធារណរដ្ឋឥណ្ឌាប្រចាំប្រទេសកម្ពុជា។ពិធីនេះចុះអនុស្សរណៈនេះ បានប្រព្រឹត្តទៅកាលពីព្រឹកថ្ងៃទី ៣ ខែធ្នូ ឆ្នាំ២០២៥នេះ ក្រោមអធិបតីភាព ឯកឧត្តម ម៉ុល វិបុល អនុរដ្ឋលេខាធិការ និងជាតំណាងដ៏ខ្ពង់ខ្ពស់របស់ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈនិង ឯកឧត្តម VANLALVAWNA BAWITLUNG ឯកអគ្គរដ្ឋទូតឥណ្ឌាប្រចាំប្រទេសកម្ពុជា និងមានការចូលរួមពីថ្នាក់ដឹកនាំនៃអគ្គនាយកដ្ឋានអប់រំបណ្ដុះបណ្ដាលបច្ចេកទេស និងវិជ្ជាជីវៈ ព្រមទាំងថ្នាក់ដឹកនាំ និងមន្ត្រីរាជការរបស់វិទ្យាស្ថានសរុបចំនួន ១៣០នាក់។កិច្ចសហប្រតិបត្តិការនៃគម្រោងនេះ គឺជាប្រតិបត្តិការដ៏មានសារៈសំខាន់ ដើម្បីបន្តពង្រឹងគុណភាពបណ្ដុះបណ្ដាលវិជ្ជាជីវៈ និងបង្កើនសមត្ថភាពសហគ្រិនភាព ក្នុងវិស័យធុរកិច្ចភេសជ្ជៈនៅកម្ពុជា តាមរយៈការផ្ដល់ជំនួយជាឧបករណ៍ និងសម្ភារៈទំនើប តាមកម្រិតស្តង់ដារសម្រាប់ប្រើប្រាស់នៅក្នុងការបង្រៀន និងរៀនលើមុខជំនាញធុរកិច្ចភេសជ្ជៈ ដល់វិទ្យាស្ថានជាតិសហគ្រិនភាព និងនវានុវត្តន៍ ដែលនឹងជួយជម្រុញដល់យុវជន ជាពិសេសយុវជនដែលមកពីគ្រួសារក្រីក្រ និងគ្រួសារងាយរងហានិភ័យ អោយចុះឈ្មោះចូលរៀនកម្រិត C1 ១លាន ៥សែននាក់ ឱ្យបានច្រើននៅក្នុងឆ្នាំ២០២៦ និងឆ្នាំបន្តបន្ទាប់ទៀត៕អត្ថបទ៖ ឈិត បូរ៉ាវី

សិស្ស-និស្សិត ជិត ២ពាន់នាក់ នៃវិទ្យាស្ថានជាតិពហុបច្ចេកទេសកម្ពុជា កំពុងការពារសារណាបញ្ចប់ការសិក្សា

ឯកឧត្តម ឡៅ ហ៊ីម រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ និងជាប្រធានគណៈកម្មការអប្បមាទនៃការប្រឡងបញ្ចប់របស់សិស្ស-និស្សិត នៃវិទ្យាស្ថានជាតិពហុបច្ចេកទេសកម្ពុជា (NPIC) រួមជាមួយគណៈគ្រប់គ្រងវិទ្យាស្ថាន បានអញ្ជើញចុះត្រួតពិនិត្យសកម្មភាពនានាក្នុងការការពារសារណា និងប្រឡងបញ្ចប់ការសិក្សារបស់ខ្លួន នាព្រឹកថ្ងៃទី៣ ខែធ្នូ ឆ្នាំ២០២៥។សិស្ស-និស្សិតដែលត្រូវប្រឡងបញ្ចប់សរុបមានចំនួន ១.៨៦៧នាក់ (ស្រី ២៨៨នាក់) ក្នុងនោះរួមមាន៖កម្រិតបរិញ្ញាបត្របច្ចេកទេស សរុប ១.០៦៧នាក់ (ស្រី ១៥៤នាក់)កម្រិតសញ្ញាបត្រជាន់ខ្ពស់បច្ចេកទេស សរុប ៦៩៤នាក់ (ស្រី ១២៥នាក់) កម្រិតសញ្ញបត្របច្ចេកទេស និងវិជ្ជាជីវៈ សរុប ១០៦នាក់ (ស្រី ៩នាក់)។ចំនួនសិស្ស-និស្សិត ដែលបានប្រឡងបញ្ចប់នាពេលនេះ គឺជាសក្ខីភាពមួយដែលបង្ហាញអំពីការកសាងបន្ថែមនូវមូលធនមនុស្សជំនាញបច្ចេកទេស និងវិជ្ជាជីវៈ ដែលនឹងចូលរួមទ្រទ្រង់ដល់សកម្មភាពសេដ្ឋកិច្ចជាតិ តាមរយៈការបំពេញការងារនៅតាមរោងចក្រ សហគ្រាស ក្រុមហ៊ុន និងគ្រឹះស្ថានពាក់ព័ន្ធ ក៏ដូចជាការចូលរួមបង្កើតនូវមុខរបរ និងការងារបន្ថែម៕

អំណោយ សម្តេចធិបតី និង លោកជំទាវ នាំយកដល់ដៃគ្រួសារអតីតយុទ្ធជនមានជំងឺប្រចាំកាយ នៅកំពង់ឆ្នាំង

នៅព្រឹកថ្ងៃពុធ ទី៣ ខែធ្នូ ឆ្នាំ២០២៥ នេះ ឧត្តមសេនីយ៍ត្រី អ៊ុ សុភា មេបញ្ជាការ តំបន់ប្រតិបត្តិការសឹករងកំពង់ឆ្នាំង បានដឹកនាំក្រុមការងារមនុស្សធម៌ របស់អង្គភាព នាំយក ស័ង្កសី ចំនួន ១០០សន្លឹក ស៊ីម៉ង់ត៍ចំនួន ០៤ការ៉ុង អង្ករ គ្រឿងឧបភោគបរិភោគ អាវរងា មុង រួមនឹងថវិកាមួយចំនួន ដែលជាអំណោយដ៏ថ្លៃថ្លារបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ឧបត្ថម្ភដល់គ្រួសារ លោក ញ៉ុញ ធុក និង ប្រពន្ធឈ្មោះ ព្រំ សុវណ្ណ ជាគ្រួសារអតីតយុទ្ធជន មានជំងឺប្រចាំកាយទាំងពីរប្តីប្រពន្ធ មិនអាចធ្វើស្រែចំការ និង ដាំដំណាំ បង្កបង្កើនផលបាន និង មានទីលំនៅមិនសមរម្យ រស់នៅភូមិស្តុក ឃុំសេដ្ឋី ស្រុកសាមគ្គីមានជ័យ ខេត្តកំពង់ឆ្នាំង។អញ្ជើញសំណេះសំណាលនាឱកាសនេះ ឯកឧត្តម មេបញ្ជាការ បាននាំប្រសាសន៍សាកសួរសុខទុក្ខ ពីសំណាក់ សម្តេចមហបវរធិបតី នាយករដ្ឋមន្ត្រី និង លោកជំទាវបណ្ឌិត ជូនដល់លោក ញ៉ុញ ធុក និង គ្រួសារ ។ ឯកឧត្តម បានបន្តថា សម្តេចធិបតី និង លោកជំទាវ តែងតែគិតគូរយកចិត្តទុកដាក់ខ្លាំងណាស់ ចំពោះសុខទុក្ខរបស់ បងប្អូនជាអតីតយុទ្ធជន នៅគ្រប់ទីកន្លែងទាំងអស់នៅទូទាំងប្រទេស និយាយជារួម ដោយឡែក ខេត្តកំពង់ឆ្នាំង តាមរយៈ ឯកឧត្តម ផ្ទាល់ សម្តេច តែងតែផ្តល់អំណោយមនុស្សធម៌ ដូចជា សម្ភារៈ សំណង់ គ្រឿងឧបភោគបរិភោគ ជាបន្តបន្ទាប់ ទុកសម្រាប់ចែកជូនដល់អតីតយុទ្ធជន និង គ្រួសារ ដែលជួបការលំបាកជីវភាព មានជំងឺប្រចាំកាយ ពិបាកក្នុងការប្រកបរបរចិញ្ចឹមជីវិត។ ឯកឧត្តម អ៊ុ សុភា បញ្ជាក់បន្ថែមថា សម្តេចធិបតី មិនបោះបង់បងប្អូនអតីតយុទ្ធជនចោលឡើយ ទោះបីស្ថិតក្នុងកាលៈទេសៈលំបាក ឬ មមាញឹកបែបណាក៏ដោយ ព្រោះបងប្អូនអតីតយុទ្ធជនទាំងអស់គ្នានោះហើយ ដែលជាកម្លាំងដ៏សំខាន់ ដែលបានចូលរួមបូជាសាច់ស្រស់ ឈាមស្រស់ជាមួយ សម្តេចតេជោ ក្នុងកិច្ចការរំដោះប្រទេសជាតិ ពីរបបប្រល័យពូជសាសន៍ដ៏ខ្មៅងងឹត និង បន្តចូលរួមអនុវត្ត នយោបាយ ឈ្នះឈ្នះ រហូតប្រទេសជាតិ បានបង្រួបបង្រួម និង អភិវឌ្ឍន៍ជាបន្តបន្ទាប់ មកដល់សព្វថ្ងៃនេះ។លោក ញ៉ុញ ធុក និង ភរិយា សូមគោរពថ្លែងអំណរគុណយ៉ាងជ្រាលជ្រៅជូនចំពោះ សម្តេចធិបតី និង លោកជំទាវបណ្ឌិត ដែលតែងតែយកចិត្តទុកដាក់ ចំពោះប្រជាពលរដ្ឋ គ្រប់ទីកន្លែង ជាពិសេស ពួកគាត់ដែលជាគ្រួសារអតីតយុទ្ធជន ទោះបីជាស្ថិតក្នុងកាលៈទេសៈដ៏លំបាក និង មមាញឹកចំពោះកិច្ចការងារការពារបូរណភាពទឹកដី ពីចោរឈ្លានពានយ៉ាងណាក៏ដោយ និង សូមជូនពរ សម្តេចធិបតី និង លោកជំទាវបណ្ឌិត សូមមានសុខភាពល្អបរិបូណ៌ និង ជួបនូវពុទ្ធពរ ទាំង៤ប្រការ គឺ អាយុ វណ្ណៈ សុខៈពលៈ កុំបីឃ្លៀងឃ្លាតឡើយ៕

ក្រោយពលរដ្ឋរាយការណ៍តាម App NoDrug កម្លាំងនគរបាលឃាត់ខ្លួនជនសង្ស័យ ៤នាក់ នៅស្រុកសង្កែ

អាជ្ញាធរជាតិប្រយុទ្ធប្រឆាំងគ្រឿងញៀន នៅថ្ងៃទី៣ ខែធ្នូ ឆ្នាំ២០២៥ បានឱ្យដឹងថា ក្រោយពីកម្លាំងសមត្ថកិច្ចរបស់អនុគណៈកម្មការប្រចាំបញ្ជា២៤ម៉ោង បានទទួលព័ត៌មានតាមរយៈកម្មវិធីទូរស័ព្ទដៃ NoDrug ថាមានករណី ប្រើប្រាស់ដោយខុសច្បាប់នូវសារធាតុញៀន នៅចំណុចភូមិច្រាបវាល ឃុំអន្លង់វិល ស្រុកសង្កែ ក្រុងបាត់ដំបង ខេត្តបាត់ដំបង បានទំនាក់ទំនងជាមួយកម្លាំងគណៈកម្មការគ្រប់គ្រងកម្មវិធីទូរស័ព្ទ NoDrug និងបញ្ជូនព័ត៌មានភ្លាមៗ ទៅកាន់សមត្ថកិច្ចជំនាញនៅមូលដ្ឋាន។ឯកឧត្តម ឧត្ដមសេនីយ៍ទោ ឃន តារាសម្បត្តិ អគ្គលេខាធិការរង និងជាប្រធានអនុគណៈកម្មការប្រចាំបញ្ជា២៤ម៉ោង បានបញ្ជាកម្លាំងអនុគណៈកម្មការសហការ និងផ្តល់ព័ត៌មានដល់កម្លាំងជំនាញដោយមានការដឹកនាំដោយលោក វរសេនីយ៍ឯក សុខ និមល ស្នងការរង ផែនការងារប្រឆាំងគ្រឿងញៀន សហការជាមួយ កម្លាំងជំនាញការិយាល័យប្រឆាំងគ្រឿងញៀន សហការជាមួយអធិការដ្ឋាននគរបាលស្រុកសង្កែ ចុះដល់ទីតាំងប្រតិបត្តិការបង្ក្រាបករណី ប្រើប្រាស់នូវសារធាតុញៀន ក្នុងបទល្មើសជាក់ស្ដែង និងបានឃាត់ខ្លួនជនសង្ស័យចំនួន ៤នាក់។ វត្ថុតាងចាប់យក៖ ថ្នាំញៀន ម៉ាទឹកកក (ICE)ចំនួន ១ថង់, ទូរសព្ទដៃចំនួន ២គ្រឿង, សម្ភារៈកែច្នៃសម្រាប់ប្រើប្រាស់ ថ្នាំញៀនមួយចំនួន, បារីអេឡិចត្រូនិចចំនួន ២ដើម, កាបូបដាក់ប្រាក់ចំនួនមួយ។ បច្ចុប្បន្នជនសង្ស័យខាងលើ និងវត្ថុតាងត្រូវបានកសាងសំណុំរឿង បញ្ជូនទៅតុលាការចាត់ការតាមនីតិវិធីច្បាប់៕

អាជ្ញាធរ និងកងកម្លាំងចម្រុះ វាយកំទេច ឡធ្យូងខុសច្បាប់ ៥កន្លែង នៅស្រុកសណ្ដាន់ ខេត្តកំពង់ធំ

ដោយអនុវត្តតាមបទបញ្ជារបស់ថ្នាក់ដឹកនាំគ្រប់លំដាប់ថ្នាក់ នៃកងយោធពលខេមរភូមិន្ទ និងការដឹកនាំ ណែនាំដោយផ្ទាល់របស់ឯកឧត្តម នួន ផារ័ត្ន អភិបាលខេត្ត ប្រធានគណៈបញ្ជាការឯកភាពរដ្ឋបាលខេត្តកំពង់ធំ ស្ដីពីវិធានការម៉ឺងម៉ាត់ ក្នុងការការពារធនធានធម្មជាតិ, នៅព្រឹកថ្ងៃទី០៣ ខែធ្នូ ឆ្នាំ២០២៥ ឧត្តមសេនីយ៍ទោ សោម ស៊ុន មេបញ្ជាការ តំបន់ប្រតិបត្តិការសឹករងកំពង់ធំ អនុប្រធានអចិន្ត្រៃយ៍នៃគណៈកម្មការ ការពារ ទប់ស្កាត់ និងបង្ក្រាបបទល្មើសធនធានធម្មជាតិខេត្តកំពង់ធំ អមដំណើរដោយលោកទី ថាវី អភិបាលរងស្រុកសណ្តាន់ បានដឹកនាំកងកម្លាំងអន្តរាគមន៍ នៃបញ្ជាការដ្ឋានតំបន់ប្រតិបត្តិការសឹករងកំពង់ធំ រួមជាមួយអាជ្ញាធរដែនដី និងកងកម្លាំងចម្រុះ ដែលមានមន្ត្រីស្ថាប័នជំនាញរដ្ឋបាលព្រៃឈើ ទៅវាយកំទេច ៥ឡធ្យូងខុសច្បាប់ នៅឃុំមានរិទ្ធ និងឃុំសណ្ដាន់ ស្រុកសណ្ដាន់ ខេត្តកំពង់ធំ។ ឧត្តមសេនីយ៍ទោ សោម ស៊ុន បានបញ្ជាក់ថា សកម្មភាពលួចកាប់បំផ្លាញព្រៃឈើ ដើម្បីយកមកដុតធ្វើធ្យូងធ្វើអាជីវកម្មនៅតែមានកើតឡើង នៅតំបន់មួយចំនួនស្ថិតនៅក្នុងភូមិសាស្ត្រស្រុកសណ្ដាន់ ខេត្តកំពង់ធំ។ បើទោះបីកន្លងមកសមត្ថកិច្ចជំនាញ និងកងកម្លាំងចម្រុះការពារ ទប់ស្កាត់ និងបង្ក្រាបបទល្មើសព្រៃឈើ បានធ្វើការណែនាំ និងមានកិច្ចសន្យារួចហើយក្តី តែក្រុមជនល្មើសមួយចំនួននៅតែបំពានធ្វើសកម្មភាពដោយខុសច្បាប់។ ជាក់ស្ដែងនៅព្រឹកនេះ កងកម្លាំងចម្រុះ បានវាយបំផ្លាញចោលឡដុតធ្យូងខុសច្បាប់ចំនួនពីរទីតាំង ដែលមានចំនួន ៥ឡធ្យូង ស្ថិតនៅក្នុងឃុំមានរិទ្ធ និងឃុំសណ្ដាន់ ស្រុកសណ្ដាន់ ដែលក្រុមជនល្មើសបានលួចកាប់ឈើចម្រុះ ដើម្បីដុតធ្វើធ្យូង ក្នុងការធ្វើអាជីវកម្មខុសច្បាប់ ។ ឧត្តមសេនីយ៍ទោ សោម ស៊ុន ក្នុងនាមអនុប្រធានអចិន្ត្រៃយ៍ នៃគណៈកម្មការ ការពារ ទប់ស្កាត់ និងបង្ក្រាបបទល្មើសធនធានធម្មជាតិខេត្តកំពង់ធំ បានប្រគល់ភារកិច្ចជូនអាជ្ញាធរដែនដីស្រុកសណ្ដាន់ និងមន្ត្រីស្ថាប័នជំនាញរដ្ឋបាលព្រៃឈើ ត្រូវរួមគ្នាជាមួយកងកម្លាំងចម្រុះការពារ ទប់ស្កាត់ បង្ក្រាបបទល្មើសព្រៃឈើ ត្រូវបន្តធ្វើសកម្មភាពអប់រំ នឹងវាយកំទេចឡដុតធ្យូងខុសច្បាប់ ដែលនៅមានសេសសល់ឱ្យអស់ ដើម្បីកុំឱ្យពួកគាត់លួចកាប់ឈើមកដុតធ្វើធ្យូងលក់ជាអាជីវកម្មបន្តទៅទៀតបានជាដាច់ខាត។ ជាមួយនោះដែរ ត្រូវរួមគ្នាជាមួយប្រជាពលរដ្ឋ ក្នុងការថែរក្សាព្រៃឈើ ដែលជាធនធានធម្មជាតិ ឱ្យនៅគង់វង្ស ដើម្បីសង្គមជាតិយើងទាំងអស់គ្នា៕

គណៈកម្មការអន្តរក្រសួងចុះត្រួតពិនិត្យ និងវាយតម្លៃការងារផ្លូវថែទាំប្រចាំ ប្រភេទកៅស៊ូ និងល្បាយក្រួសក្នុងភូមិសាស្ត្រខេត្តកំពង់ចាម

កំពង់ចាម៖ គណៈកម្មការអន្តរក្រសួងចុះត្រួតពិនិត្យ និងវាយតម្លៃ ដើម្បីប្រគល់ទទួលបញ្ចប់ ១០០% ផ្លូវថែទាំលក្ខណប្រចាំកៅស៊ូ២ជាន់ និងល្បាយក្រួស ក្នុងផែនការឆ្នាំ២០២៥ ក្នុងភូមិសាស្ត្រខេត្តកំពង់ចាម អនុវត្តន៌ដោយមន្ទីរអភិវឌ្ឍន៌ជនបទខេត្តកំពងចាម។លោកជំទាវ ឯក គន្ធវារី អនុរដ្ឋលេខាធិការ និងជាតំណាងដ៏ខ្ពង់ខ្ពស់ ឯកឧត្តម ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ បានថ្លែងការកោតសរសើរ និងវាយតម្លៃខ្ពស់ចំពោះ ក្រុមការងារនៃមន្ទីរអភិវឌ្ឍន៍ជនបទខេត្តកំពង់ចាម ដែលបានយកចិត្តទុកដាក់អនុវត្តន៍លេីការងារថែទាំជាប្រចាំលេីផ្លូវប្រភេទកៅស៊ូ និងល្បាយក្រួសប្រកបដោយគុណភាព និងត្រឹមត្រូវតាមលក្ខណៈបច្ចេកទេស ប្រយោជន៍ធានាដល់ការប្រើប្រាស់បានយូអង្វែង។ ការលើកឡើងដូចនេះរបស់លោកជំទាវ គឺបានធ្វើឡើងនៅក្នុងឱកាសអញ្ជើញដឹកនាំគណៈកម្មការអន្តរក្រសួង រួមមានក្រសួងអភិវឌ្ឍន៏ជនបទ និងក្រសួងសេដ្ឋកិច្ច និងហិរញ្ញវត្ថុ ចុះត្រួតពិនិត្យ និងវាយតម្លៃការងារការងារថែទាំប្រចាំកៅស៊ូ និងល្បាយក្រួសក្នុងភូមិសាស្ត្រខេត្តកំពង់ចាមនៅថ្ងៃទី៣ ខែធ្នូ ឆ្នាំ២០២៥នេះ ដោយមានផ្លូវសរុបចំនួន១០ខ្សែ ក្នុងនោះផ្លូវកៅស៊ូ(DBST) ប្រវែង៤៧គីឡូម៉ែត្រ និងផ្លូវល្បាយក្រួស មានប្រវែង៣៨.៦០គីឡូម៉ែត្រដែលស្ថិតក្នុងស្រុកចំការលេី ស្រុកស្ទឹងត្រង់ ស្រុកព្រៃឈរ ស្រុកកងមាស និងស្រុកកំពង់សៀម ខេត្តកំពង់ចាម។ ក្រោយពីបានពិនិត្យយ៉ាងហ្មត់ចត់លើគ្រប់ផ្នែកនៃផ្លូវ លោកជំទាវ ឯក គន្ធវារី បានបង្ហាញក្តីរីករាយ និងបានគូសបញ្ជាក់ថា ការងារថែរទាំនេះពិតជាបានជួយឲ្យគុណភាពផ្លូវជនបទទាំងអស់នេះអាចសម្រួលដល់ការធ្វេីដំណេីរនិងជួយដល់ការដឹកជញ្ជូនកសិផលរបស់ប្រជាពលរដ្ឋក្នុងតំបន់ឱ្យកាន់តែស្រួលជាងមុន ទាំងអស់បានឆ្លុះបញ្ចាំងពីការទទួលខុសត្រូវខ្ពស់របស់អង្គភាពអនុវត្តគម្រោងជួសជុលថែរទាំដោយមានមន្ទីរអភិវឌ្ឍន៍ជនបទខេត្តកំពង់ចាមជាសេនាធិការបស់ក្រសួង។ លោកជំទាវ និងគណៈកម្មការអន្តរក្រសួង បានឯកភាពទទួលយកការងារនេះទាំងស្រុង ដោយចាត់ទុកថា បានអនុវត្តត្រឹមត្រូវតាមកិច្ចសន្យា និងស្តង់ដារដែលក្រសួងកំណត់។ជាមួយគ្នានោះលោកជំទាវក៏បានលើកឡើងដែរថា ការកសាងផ្លូវគឺជាផែនការអតិភាពមួយយ៉ាងសំខាន់ ដើម្បីបម្រើផលប្រយោជន៍របស់ប្រជាពលរដ្ឋក្នុងការងារធ្វើដំណើរប្រកបរបរចិញ្ចឹមជីវិតប្រចាំ ទាំងប្រជាពលរដ្ឋក្នុងមូលដ្ឋានផ្ទាល់ និងប្រជាពលរដ្ឋដែលធ្វើដំណើរឆ្លងកាត់។ ដូច្នេះដើម្បីធានាឳ្យការប្រើប្រាសបានយូអង្វែងសូមបងប្អូនប្រជាពលរដ្ឋ អាជ្ញាធរ ភូមិ ឃុំ ចូលរួមថែរក្សាទាំងអស់គ្នា៕ ដោយ ៖ ថុង សីហា

អធិការដ្ឋាននគរបាលស្រុកសាមគ្គីមុនីជ័យ ឃាត់ខ្លួនយុវជន ២នាក់ ជិះម៉ូតូកាន់ដាវពេលយប់

អគ្គស្នងការដ្ឋាននគរបាលជាតិ នៅរសៀលថ្ងៃទី៣ ខែធ្នូ ឆ្នាំ២០២៥ នេះ បានឱ្យដឹងថា ដោយបានអនុវត្តតាមបទបញ្ជារបស់ លោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្ដកំពង់ស្ពឺ កម្លាំងអធិការដ្ឋាននគរបាលស្រុកសាមគ្គីមុនីជ័យ បានចេញល្បាតតាមភូមិសាស្រ្ត សហការជាមួយប៉ុស្តិ៍នគរបាលរដ្ឋបាលពាំងល្វា នៅវេលាម៉ោង ២៣ និង៣០នាទី នៅថ្ងៃទី០២ ខែធ្នូ ឆ្នាំ២០២៥ បានជួបក្រុមក្មេងទំនើង ១ក្រុម មានគ្នា ២នាក់ជិះម៉ូតូ ១គ្រឿង ប្រដាប់ដោយដាវ ១ដើម នៅចំណុចផ្លូវលំស្ថិតនៅភូមិឆ្វេក ឃុំពាំងល្វា ស្រុកសាមគ្គីមុនីជ័យ។កម្លាំងអធិការខាងលើ បានឃាត់ខ្លួនមនុស្សចំនួន ២នាក់៖១. ឈ្មោះ បូ ប៊ុនថាញ ភេទប្រុស អាយុ ២៧ឆ្នាំ រស់នៅភូមិអាយាន ឃុំពាំងល្វា ស្រុកសាមគ្គីមុនីជ័យ (កាន់ដាវ) ជាមុខសញ្ញាទើបចេញពី ពន្ធនាគារ ពាក់ព័ន្ធករណី ចោរកម្ម (លួចម៉ូតូ)២. ឈ្មោះ បឿន ម៉េងហុង ភេទប្រុស អាយុ ២៣ឆ្នាំ រស់នៅភូមិ អាយាន ឃុំពាំងល្វា ស្រុកសាមគ្គីមុនីជ័យ (មុខសញ្ញាប្រើប្រាស់គ្រឿងញៀនសកម្ម)វត្ថុតាងដកហូតមាន ម៉ូតូចំនួន ១គ្រឿង ដាវ ១ដើម និង ទូរស័ព្ទចំនួន ២គ្រឿង។បច្ចុប្បន្នក្រុមក្មេងទំនើងខាងលើ ត្រូវបានឃាត់ខ្លួននៅអធិការដ្ឋាននគរបាលស្រុកសាមគ្គីមុនីជ័យដើម្បីចាត់ការតាមនីតិវិធី៕

ក្រសួងពាណិជ្ជកម្ម លើកយករបៀបវារៈចំនួន ៦សំខាន់ ប្រជុំប្រចាំសប្ដាហ៍

នាព្រឹកថ្ងៃព្រហស្បតិ៍ ទី៣ ខែធ្នូ ឆ្នាំ២០២៥ នៅទីស្ដីការក្រសួងពាណិជ្ជកម្ម ឯកឧត្តម កឹម ស៊ីថន រដ្ឋលេខាធិការប្រចាំការក្រសួងពាណិជ្ជកម្ម តំណាង លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានអញ្ជើញដឹកនាំកិច្ចប្រជុំប្រចាំសប្ដាហ៍របស់ក្រសួងពាណិជ្ជកម្ម ដែលមានវត្តមានចូលរួមពី ឯកឧត្តម លោកជំទាវរដ្ឋលេខាធិការ ឯកឧត្តម លោកជំទាវអនុរដ្ឋលេខាធិការ ឯកឧត្តមអគ្គនាយក លោកជំទាវអគ្គាធិការ លោក-លោកស្រីអគ្គនាយករង លោក-លោកស្រីអគ្គាធិការរង លោកប្រធាននាយកដ្ឋាន-វិទ្យាស្ថាន លោក-លោកស្រីអនុប្រធាននាយកដ្ឋាន-វិទ្យាស្ថាន លោក-លោកស្រីប្រធាន និងអនុប្រធានមន្ទីរ និងសាខា ក.ប.ប. រាជធានី-ខេត្តទាំងអស់ចំណុះឱ្យក្រសួងពាណិជ្ជកម្មផងដែរ។កិច្ចប្រជុំប្រចាំសប្ដាហ៍នេះ ត្រូវបានរៀបចំឡើងដោយផ្ទាល់ និងតាមប្រព័ន្ធអនឡាញ ក្រោមរបៀបវារៈរួមមាន៖១. របាយការណ៍ ស្ដីពី លទ្ធផលនៃការចូលរួមទស្សនកិច្ចសិក្សា ជាមួយគណៈប្រតិភូគណៈកម្មាធិការជាតិសម្រាប់ការចាកចេញរបស់កម្ពុជា ពីចំណាត់ថ្នាក់ក្រុមប្រទេសអភិវឌ្ឍនតិចតួច នៅប្រទេសបង់ក្លាដែស និងប្រទេសឡាវ ដើម្បីសិក្សាឈ្វេងយល់ អំពី បទពិសោធន៍ក្នុងការរៀបចំយុទ្ធសាស្រ្តអន្តរកាលដោយរលូន និងឈ្វេងយល់បន្ថែម អំពី ការកំណត់អាទិភាព និងយន្តការកាត់បន្ថយផលប៉ះពាល់លើវិស័យចម្បងៗ២. របាយការណ៍ ស្ដីពី លទ្ធផលនៃការចូលរួមកិច្ចសន្ទនាកម្រិតខ្ពស់ ស្តីពី ទំនាក់ទំនងសេដ្ឋកិច្ចអាស៊ាន-អ៊ីតាលី លើកទី៩ នៅទីក្រុងហូជីមីញ ប្រទេសវៀតណាម៣. របាយការណ៍ ស្តីពី វឌ្ឍនភាពនៃការអនុវត្តសូចនាករសមិទ្ធកម្មគន្លឹះទី៣១ «ចំនួនសហគ្រាសធុនតូច និងមធ្យម (SMEs) ផ្លូវការដែលធ្វើការនាំចេញ» និងវឌ្ឍនភាពនៃការអនុវត្តសូចនាករសមិទ្ធកម្មគន្លឹះទី៣៤ «ការយល់ឃើញរបស់ធុរជន និងសាធារណជនលើការអនុវត្តច្បាប់ ស្ដីពី ការប្រកួតប្រជែង ច្បាប់ស្ដីពីកិច្ចការពារអ្នកប្រើប្រាស់ និងបទប្បញ្ញត្តិពាក់ព័ន្ធ» ដោយមានមតិចូលរួមពី ឯកឧត្តម ប៉ែន សុវិជាតិ រដ្ឋលេខាធិការក្រសួងពាណិជ្ជកម្ម៤. របាយការណ៍ ស្តីពី វឌ្ឍនភាពនៃការកំណត់ និងការពិពណ៌នាអំពីមុខតំណែងវិជ្ជាជីវៈក្នុងក្រសួងពាណិជ្ជកម្ម៥. របាយការណ៍ ស្តីពី វឌ្ឍនភាពការងារទទួលបន្ទុកបច្ចុប្បន្នភាពរចនាសម្ព័ន្ធ និងជំរឿនមន្រ្តីជាក់ស្តែងនៅតាមរចនាសម្ព័ន្ធរបស់ក្រសួងពាណិជ្ជកម្ម៦. មតិចូលរួមផ្សេងៗ៕

នគរបាលមន្ទីរប្រឆាំងគ្រឿងញៀន ឃាត់ខ្លួនជនល្មើសជនជាតិចិន៦នាក់ និងខ្មែរម្នាក់ រឹបអូសបានថ្នាំញៀន ជិត៤០គីឡូក្រាម

ភ្នំពេញ៖ កម្លាំងនគរបាលមន្ទីរប្រឆាំងគ្រឿងញៀន នៃអគ្គស្នងការនគរបាលជាតិ បានស្រាវជ្រាវបង្ក្រាប់ន៨ងឃាត់ខ្លួនជនល្មើសជនជាតិចិន៦នាក់ និងខ្មែរម្នាក់ រឹបអូសបានថ្នាំញៀន ជិត៤០គីឡូក្រាម។កាលពីថ្ងៃទី២៩ ខែវិច្ឆិកា ឆ្នាំ២០២៥ អនុវត្តតាមបទបញ្ជារបស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងដឹកនាំបញ្ជាផ្ទាល់ពី ឯកឧត្តម ឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀន, កម្លាំងនៃមន្ទីរប្រឆាំងបទល្មើសគ្រឿងញៀន សហការជាមួយស្នងការដ្ឋានរាជធានីភ្នំពេញ ដោយមានការដឹកនាំសម្របសម្រួលពីព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ លោក សេង ម៉េងស្រ៊ុន បានបង្រ្កាបករណីផលិត កែច្នៃ ជួញដូរ រក្សាទុក និងប្រើប្រាស់ដោយខុសច្បាប់ នូវសារធាតុញៀន ប្រព្រឹត្តិនៅចំនួន៥គោលដៅ។ក្នុងរង្វង់ប្រតិបត្តិការកម្លាំងនគរបាលប្រឆាំងបទល្មើសគ្រឿងញៀនបានដកហូតវត្ថុតាង ប្រភេទកូកាអ៊ីន (Cocaine) ទម្ងន់ ១២,១៧៤.៨៩ក្រាម, គ្រឿងញៀនប្រភេទអ៊ិចស្ត្រាស៊ី (MDMA) ទម្ងន់៥,៨២១.៥៨ក្រាម, គ្រឿងញៀនប្រភេទ រុក្ខជាតិក្រៀម (កញ្ចា) ទម្ងន់ ៤៧៥.៤២ក្រាម, សារធាតុគីមីផ្សំ ទម្ងន់២២,៨៨៤ក្រាម។ សរុបរួមសារធាតុញៀនទម្ងន់ ១៧,៩៩៦.៤៧ក្រាម (១៧គីឡូ៩៩៦,៤៧ក្រាម), សរុបរួមសារធាតុគីមីផ្សំ ទម្ងន់២២,៨៨៤ក្រាម (២២គីឡូ ៨៨៤ក្រាម) ព្រមទាំងចាប់យកសម្ភារៈរួមមាន៖ ឧបករណ៍សម្រាប់ផលិត និងប្រើប្រាស់គ្រឿងញៀនមួយចំនួនធំ។បច្ចុប្បន្នជនល្មើស និងវត្ថុតាង ត្រូវបានកម្លាំងជំនាញកសាងសំណុំរឿងបញ្ជូនខ្លួន ទៅសាលាដំបូងរាជធានីភ្នំពេញ ដើម្បីចាត់ការតាមនីតិវិធី៕អត្ថបទ៖ កុម្ភៈ

១០ខណ្ឌ ភ្នំពេញ និង ២ស្រុក/ក្រុង ខេត្តកណ្ដាល នឹងដាច់អគ្គិសនី តាមម៉ោង ៤ថ្ងៃ

នៅថ្ងៃទី៣ ខែធ្នូ ឆ្នាំ២០២៥ នេះ អគ្គិសនីកម្ពុជា បានជូនសេចក្ដីជូនដំណឹងថា អគ្គិសនីកម្ពុជា នឹងអនុវត្តការងារជួសជុលផ្លាស់ប្ដូរដំឡើងបរិក្ខារ និងរុះរើគន្លងខ្សែបណ្ដាញបង្កលក្ខណៈដល់ការដ្ឋានពង្រីកផ្លូវ ចាប់ពីថ្ងៃទី៤ ដល់ថ្ងៃទី៧ ខែធ្នូ នេះ ចាប់ពីម៉ោង ៨:០០ព្រឹក ដល់ម៉ោង ១៣:០០ ឬម៉ោង ១៦:០០។ការណ៍នេះ នឹងធ្វើឱ្យ មានការរអាក់រអួលក្នុងការផ្គត់ផ្គង់អគ្គិសនីចំពោះអតិថិជនខ្លះក្នុងកំឡុងពេលជួលជុល ក្នុង ១០ខណ្ឌ នៅភ្នំពេញ និង ២ស្រុកក្រុង ខេត្តកណ្ដាល ដូចជា៖ ខណ្ឌសែនសុខ ខណ្ឌច្បារអំពៅ ខណ្ឌ៧មករា ខណ្ឌមានជ័យ ខណ្ឌដង្កោ ខណ្ឌកំបូល ខណ្ឌដូនពេញ ខណ្ឌឫស្សីកែវ ខណ្ឌពោធិ៍សែនជ័យ ខណ្ឌជ្រោយចង្វា នៃរាជធានីភ្នំពេញ, ស្រុកអង្គស្នួល និងក្រុងតាខ្មៅ នៃខេត្តកណ្ដាល។ព័ត៌មានពិស្ដារ៖

បណ្ដាញសង្គម

ព័ត៌មានថ្មីៗ

ប្រាសាទតាសោម៖ ភាពសុខដុមរមនារវាងប្រាសាទបុរាណនិងបរិស្ថានធម្មជាតិ

អេស្ប៉ាញរកឃើញមនុស្សស្លាប់ខ្ពស់បំផុតពាក់ព័ន្ធនឹងកម្តៅក្នុងខែឧសភា ចាប់តាំងពីឆ្នាំ ២០១៥

អគ្គិភ័យ និងការខូចខាត បានកើតមាននៅអាកាសយានដ្ឋានគូវែត ក្រោយការវាយប្រហាររបស់អ៊ីរ៉ង់

ឥណ្ឌាអនុម័តមូលនិធិជាង ១ពាន់លានដុល្លារ ដើម្បីជួយក្រុមហ៊ុនអាកាសចរណ៍ ស្របពេលប្រេងយន្តហោះឡើងថ្លៃ

ក្រុមអ្នកតាំងលំនៅនិគមន៍អ៊ីស្រាអែលវាយប្រហាររថយន្តដឹកគ្រួសារប៉ាឡេស្ទីននៅតំបន់វ៉េសប៊ែង

ឈីលីកម្ទេចបណ្តាញលាងលុយកខ្វក់ដែលមានការជាប់ពាក់ព័ន្ធនឹងក្រុមឧក្រិដ្ឋជន Tren de Aragua

អរិភាពនៅតំបន់ឈូងសមុទ្រឡើងកម្តៅជាថ្មី ខណៈកិច្ចប្រជុំសន្តិភាពអាមេរិក-អ៊ីរ៉ង់ជាប់គាំង

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877