នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
មន្ត្រីជាន់ខ្ពស់ការបរទេសកម្ពុជា-អាម៉េរិក ពិភាក្សាអំពីការពង្រឹង​កិច្ចសហប្រតិបត្តិការទ្វេភាគីរវាងប្រទេសទាំងពីរ
ទូតសាធារណរដ្ឋកូរ៉េប្រចាំកម្ពុជា៖ប្រតិបត្តិការបោសសម្អាតការឆបោកតាមប្រព័ន្ធបច្ចេកវិទ្យារបស់កម្ពុជាអាចធ្វើជាគំរូសម្រាប់ប្រទេសដទៃទៀត
សម្ដេចតេជោ ហ៊ុន សែន កោតសរសើរថ្នាក់ដឹកនាំខេត្តកំពង់ធំដែលបានយកចិត្តទុកដាក់គ្រប់គ្រងអតីតយុទ្ធជន និងគ្រួសារយុទ្ធជនពលី បានយ៉ាងល្អ
អាល្លឺម៉ង់បង្ហាញសុឆន្ទៈ និងប្តេជ្ញាជួយជំរុញវិនិយោគិនពីប្រទេសខ្លួនមកបណ្តាក់ទុននៅកម្ពុជា

ព័ត៌មានជាតិ

​សាកលវិទ្យាល័យស្វាយរៀងខេត្តស្វាយរៀងរៀបចំពិព័រណ៍ការងារ

2025/12/01 04:06:09 pm        226
Facebook Telegram Linkin
ស្វាយរៀង ៖ សាកលវិទ្យាល័យស្វាយរៀងខេត្តស្វាយរៀង នៅថ្ងៃទី៣០ ខែវិឆ្ឆិកា ឆ្នាំ២០២៥នេះ មានរៀបចំពិព័រណ៍ការងារ ដែលពិធីនេះបានប្រព្រឹត្តទៅក្រោមវត្តមានឯកឧត្តម សោម រតនា អនុរដ្ឋលេខាធិការក្រសួងអប់រំយុវជននិងកីឡា និងលោក​ញ៉ែម សារី អភិបាលរងខេត្តស្វាយរៀង និងមានការអញ្ចើញ ចូលរួមពីលោក លោកស្រី ថ្នាក់ដឹកនាំ នៅក្នុង រដ្ឋបាលខេត្ត មន្ទីរ អង្គភាព ក្រសួងពាក់ពន្ធ័ គ្រឹះស្ថានមេក្រូហិរញ្ញវត្ថុ ក្រុមហ៊ុន រោងចក្រ សហគ្រាស​ និងសិស្ស និសិត្យប្រមាណជាង១ពាន់នាក់ ។កញ្ញា រដ្ឋ ចន្ទ័ស្រីនៅ អ្នកសម្របសម្រួល មជ្ឈមណ្ឌលការងារសាកលវិទ្យាល័យស្វាយរៀង បានបញ្ជាក់ថាការរៀបចំ​ពិព័រណ៍ការងារ ក្នុងឆ្នាំ២០២៥នេះគឺជាឆ្នាំទី២ កាលពីឆ្នាំមុនការរៀបចំរបស់សាកលវិទ្យាល័យស្វាយរៀងមានការគាំទ្រគម្រោងពី(យូ.អេស.អាយ.ឌី) ចំណែកឆ្នាំនេះសាកលវិទ្យាល័យស្វាយរៀងទទួលបានគាំទ្រពីគម្រោង​(ចាយការ) គោលបំណងរបស់ ពិព័រណ៍ការងារគឺ ទី១ ផ្តល់ឱកាសដល់ សិស្ស និស្សិត និងអតីតនិស្សិត បានយល់អំពី បរិបទការងារក្នុងក្រុមហ៊ុន ក៏ដូចជាបង្កើតឱកាសទទួលបានការងារ និងហាត់ការពិតប្រាកដ ។ ទី២ បំប៉នធនធានមនុស្សកម្ពុជាជំនាន់ថ្មី អោយមានជំនាញស្វែងរកការងារ .ការរៀបចំCV ការសម្ភាសន៍ជាមួយនិងការយល់ដឹងអំពីតម្រូវទីផ្សារការងារ ។ ទី៣ បង្កើតវេទិការអោយក្រុមហ៊ុន អាចចែករំលែកពី បរិបទការងាររបស់ខ្លួន និងអាចធ្វើសម្ភាសន៏ផ្ទាល់នៅទីតាំងសាកលកវិទ្យាល័យ និងទី៤ បង្កើតសហគមន៍រវាងសិស្ស និស្សិត អតីតនិស្សិត និងក្រុមហ៊ុន ដើម្បីជួយគ្នា និងគាំទ្រគ្នាទៅវិញទៅមកនាអនាគត ។​ ថ្លែងមានប្រសាសន៍បើកពិព័រណ៍ការងារ ក្នុងឱកាសនោះ ឯកឧត្តមសោម រតនា អនុរដ្ឋលេខាធិការក្រសួងអប់រំយុវជននិងកីឡា បានសំដែងអបអរសាទរចំពោះ សាកលវិទ្យាល័យស្វាយរៀង រដ្ឋបាលខេត្ត និងគ្រឹះស្ថាន សហគ្រាស ក្រុមហ៊ុន ដែលបានសហការរៀបចំពិព័រណ៍នេះឡើង ជូនដល់សិស្ស និស្សិត បានជួបជុំស្វែងយល់ពីតម្រូវការ ការងារ និងស្វែងរកការងារធ្វើ របស់សិស្ស និស្សិតនៅក្នុងខេត្តនិងខេត្តជិតៗ ។   ឯកឧត្តមរដ្ឋលេខាធិការក្រសួងបានបញ្ជាក់ថាការបណ្ដុះបណ្ដាលធនធានមនុស្ស រាជរដ្ឋាភិបាលបានយកចិត្តទុកដាក់ ឯការងារប្អូនៗជាសិស្ស និស្សិត ត្រូវស្វែងរកការងារធ្វើដោយខ្លួនឯង ជាក់ស្ដែងថ្ងៃនេះតាមរយះ ពិព័រណ៍ការងារ ជាឱកាសអោយប្អូនៗសិស្ស និស្សិត ដែលមានបំណងស្វែងរកការងារធ្វើ ត្រូវសិក្សា ស្វែងយល់ពីការងារដែលខ្លួនចង់ធ្វើ ជាមួយក្រុមហ៊ុនសហគ្រាសឬគ្រឹះស្ថានណាមួយ ឲ្យបានច្បាស់លាស់មុន និងចូលសម្ភាសន៍ដោយតាំងចិត្តចេះគឺជាប់។ សូមបញ្ជាក់ថាពិពណ៏ការងារដែលសាកលវិទ្យាលយ័ស្វាយរៀងរៀបចំនេះមានរយះពេល១ថ្ងៃពេញ ដោយមានក្រុមហ៊ុន រោងចក្រ សហគ្រាស និងគ្រឹះស្ថានផ្សេងៗជាង៧០នៅក្នុងខេត្តនិងរាជធានីបានមកចូលរួម ។ ដោយ ៖ ភា សារិត                                                                                          ​   

ប្រធានមន្ទីរកសិកម្មខេត្តកំពង់ឆ្នាំង បញ្ជាកម្លាំងឱ្យចុះរុះរើរបាំងកាត់ព្រែកនៅស្រុកជលគីរី

2025/12/01 03:58:47 pm        705
Facebook Telegram Linkin
កំពង់ឆ្នាំង៖ លោក ងិន ហ៊ុន ប្រធានមន្ទីរកសិកម្ម រុក្ខាប្រម៉ាញ់ និងនេសាទខេត្តកំពង់ឆ្នាំង នៅរសៀលថ្ងៃទី៣០ ខែវិច្ឆិកា ឆ្នាំ២០២៥នេះ បានបញ្ជាកម្លាំងផ្នែករដ្ឋបាលជលផលកំពង់ប្រសាទនៃខណ្ឌជលផលកំពង់ឆ្នាំងភ្លាមៗ ដោយសហការជាមួយកម្លាំងសឹករងកំពង់ឆ្នាំង ប្រចាំការនៅក្បាលកោះស្តីការទូ ឃុំពាមឆ្កោក ចុះបង្ក្រាបរុះរើរបាំងបិតកាត់ព្រែកមួយកន្លែងនៅចំណុចព្រែកសេះ ភូមិពាមឆ្កោក ឃុំពាមឆ្កោក ស្រុកជលគិរី ក្រោយទទួលព័ត៌មានពីប្រជានេសាទនៅថ្ងៃដដែលនោះ។ក្រោយប្រតិបត្តការចុះបង្ក្រាប និងរុះរើរបាំងបិតកាត់ព្រែកនេះ នាយសង្កាត់រដ្ឋបាលជលផលជលគិរី និងកងកម្លាំងសឹករងខេត្តកំពង់ឆ្ខាំង បានអប់រំធ្វើកិច្ចសន្យាអ្នកដាក់របាំងអោយបញ្ឈប់ការនេសាទខុសច្បាប់បែបនេះ គឺហាមដាច់ខាតការធ្វើនេសាទរបាំងបិតកាត់ព្រែក នៅចំណុចព្រែកសេះ ភូមិពាមឆ្កោក និងចំូចព្រែកផ្សេងៗទៀតដែលធ្លាប់ធ្វើពីមុនមក។ ក្នុងនោះវត្ថុតាងបានរុះរើ និងបំផ្លាញចោលនៅនឹងកន្លែងកើតហេតុ មានរបាំងសាច់អួនរាំងបិតផ្ជិតព្រែកជាច្រើនម៉ែត្រ, លបលូសាច់អួនចំនួន២មាត់, បង្គោលចំនួន៤០ដើម, ចាក់លែងត្រីមួយចំនួនចូលទន្លេវិញ។សូមបញ្ជាក់ជូនថា៖ កាលពីថ្ងៃទី២៥ ខែវិច្ឆិកា ឆ្នាំ២០២៥នេះ លោក ងិន ហ៊ុន ប្រធានមន្ទីរកសិកម្ម រុក្ខាប្រម៉ាញ់ និងនេសាទខេត្តកំពង់ឆ្នាំង បានព្រមានដាក់ទោសទណ្ឌដល់ជនទាំងឡាយណាដែលព្យាយាមដាក់របាំងបិទភ្ជិតកាត់ព្រែក រួមនិងអនុវត្តវិធានការច្បាប់អោយបានម៉ឺងម៉ាត់ផងដែរ៕ កាំង ហុងវាស្នា

កាកបាទក្រហមកម្ពុជា ពង្រឹងវិស័យអាទិភាពទាំង៤ ដល់មន្ត្រីប្រតិបត្តិសាខាខេត្តរតនគិរី

2025/12/01 03:58:05 pm        254
Facebook Telegram Linkin
ព្រឹកថ្ងៃចន្ទ ទី១ ខែធ្នូ ឆ្នាំ២០២៥ នេះ សាខាកាកបាទក្រហមកម្ពុជាខេត្តរតនគិរី បាន​រៀប​ចំ​សន្និបា​ត​សាខា អាណត្តិទី ៦ នៅសាលមហោស្រពរតនៈ នៃមន្ទីរវប្បធម៌ និងវិចិត្រ​សិល្បៈ​ខេត្ត​រតន​គិរី ក្រោមអធិបតីភាពលោកជំទាវ ពុំ ចន្ទីនី អគ្គលេខាធិការ និងមានការ​អញ្ជើញ​ចូល​រួម​ពី​ឯក​ឧត្តម ញ៉ែម សំអឿន ប្រធានគណ:កម្មាធិការ សាខាខេត្តអាណត្តិទី៥ និងជា​អភិបាល​នៃ​គណៈ​អភិបាល​ខេត្តរតនគិរី ព្រមទាំងគណ:កិត្តយសសាខា សមាជិក-សមាជិកាពេញសិទ្ធិ រួមមាន សមាជិក សមាជិកា គណៈកម្មាធិការសាខា អាណត្តិទី៥ សមាសភាព​គណៈកម្មាធិការ​សាខា​កាក​បាទ​ក្រហម​កម្ពុជា អាណត្តិទី៦ មន្ត្រីនៅមន្ទីរអង្គភាពជុំវិញខេត្ត មន្ត្រីអនុសាខា ទាំង៩ ក្រុង-ស្រុក និង​មន្ត្រីបច្ចេកទេសទីស្នាក់ការកណ្តាល ក្រុមប្រតិបត្តិសាខា យុវជន និងអ្នក​ស្ម័គ្រ​ចិត្ត​កាក​បាទ​ក្រហម​កម្ពុជា យុវជនកាយរិទ្ធ សរុប១៦៣នាក់ ក្នុងនោះមានសមាជិកពេញសិទ្ធិបោះឆ្នោតចំនួន ៤៨ នាក់។ គោលបំណងសំខាន់នៃសន្និបាតនេះគឺ៖ ១- ពិនិត្យ និងអនុម័តរបាយការណ៍សកម្មភាពការងារ ក្នុងអាណត្តិទី៥ និងផែនការទិសដៅអាណត្តិទី៦២- ពិនិត្យនិងអនុម័តរបាយការណ៍ហិរញ្ញវត្ថុក្នុងអាណត្តិទី៥ និងផែនការទិសដៅអាណត្តិទី៦ ៣- បោះឆ្នោតជ្រើសរើសគណៈកម្មាធិការសាខាអាណត្តិទី៦។បន្ទាប់ពីបញ្ចប់សន្និបាតសាខាកាកបាទក្រហមកម្ពុជា ខេត្តរតនគិរី អាណត្ដិទី៦ រួចមក​លោកជំទាវ ពុំ ចន្ទីនី អគ្គលេខាធិការ​តំណាង​កាក​បាទ​ក្រហម​កម្ពុជា បានចូលរួមកិច្ចប្រជុំតម្រង់ទិស ស្តីពី ការងារអភិបាលកិច្ច និងគ្រប់គ្រង ជាមួយសមាជិក សមាជិក​គណៈកម្មាធិការសាខា អាណត្ដិទី៦ និងអនុសាខាក្រុងស្រុកទាំង៩ ព្រមទាំង​មន្ត្រី​ប្រតិបត្តិ​សាខា​ខេត្តរតនគិរី ទាំងអស់ ដើម្បីបន្តពង្រឹង និងពង្រីកសកម្មភាពវិស័យអាទិភាពទាំង ៤ របស់​កាក​បាទក្រហមកម្ពុជា។សកម្មភាពវិស័យអាទិភាពទាំង៤ រួមមាន៖១- ការគ្រប់គ្រងគ្រោះមហន្តរាយ វិបត្តិភ័យ និងការប្រែប្រួលអាកាសធាតុ២- សុខភាពនិងការថែទាំសុខភាពក្នុងសហគមន៍៣- ការលើកកម្ពស់គោលការណ៍គ្រឹះ និងតម្លៃមនុស្សធម៌៤- ការអភិវឌ្ឍន៍ស្ថាប័នស្របតាមអនុសាសន៍របស់ សម្តេចកិត្តិព្រិទ្ធបណ្ឌិត ប៊ុន រ៉ានី ហ៊ុនសែន ប្រធាន​កាក​បាទ​ក្រហម​កម្ពុជា លោកជំទាវបានជំរុញឱ្យសាខាកាកបាទក្រហមកម្ពុជា ខេត្តរតនគិរី ត្រូវតែឈ្មុសឈ្មុល ស្វែង​រកអ្នកត្រូវការឱ្យជួយ នឹងជួយឱ្យបានទាន់ពេលវេលា, ការកាត់បន្ថយការប្រើប្រាស់ប្លាស្ទិក និង​ហានិភ័យក្នុងការប្រើប្រាស់ផ្លាស់ស្ទិក, ចូលរួមជាមួយក្រសួងបរិស្ថាន ដាំដើមឈើ ដើម្បី​អព្យា​ក្រឹត​បូន និងបន្តការផ្សព្វផ្សាយសារអប់រំអំពីជំងឺមិនឆ្លងសំខាន់ចំនួន៤ ដូចជា ជំងឺទឹកនោមផ្អែម ជំងឺបេះដូងសសៃឈាម ជំងឺមហារីក និងជំងឺរលាភផ្លូវដង្ហើមរាំរ៉ៃ ដែល​កំពុង​ប្រឈម​ក្នុង​ចំណោម​ប្រជា​ពលរដ្ឋទូទៅនាពេលបច្ចុប្បន្នតាមរយៈការបរិភោគមិនបានត្រឹមត្រូវដូចជាផ្អែកពេក ប្រៃពេក ខ្លាញ់ពេក អាហារកំប៉ុងច្រើនពេក ការផឹកគ្រឿងស្រវឹងនិងការជក់បារី។ល។ ឱ្យកាន់តែសកម្ម និង​ផុស​ផុលថែមទៀត ដើម្បីធ្វើឱ្យប្រជាជន ក្លាយជា​ធន​ធាន​ដ៏​មាន​សារៈ​សំខាន់​ដោយ​មាន​ទាំង​ចំណេះ​ជំនាញ និងសុខភាពល្អ ក្នុងការអភិវឌ្ឍសង្គមជាតិ។បន្ថែមពីនេះលោកជំទាវ ពុំ ចន្ទីនី បានគូសបញ្ជាក់ថា កាកបាទក្រហមកម្ពុជា ជាសមាគមឯករាជ្យ តែ​ស្ថិតក្រោមច្បាប់រដ្ឋាភិបាលកម្ពុជា គឺមានតួនាទី​ជា​ជំនួយ​ការ​ជូន​អាជ្ញាធរ​សាធារណៈលើ​វិស័យ​មនុស្សធម៌​៕ 

ផ្លូវកៅស៊ូ និងគ្រួក្រហមរបស់សួងអភិវឌ្ឍន៍ជនបទ១៤ខ្សែក្នុងខេត្តកំពង់ឆ្នាំង កំពុងជួយសេដ្ឋកិច្ចគ្រួសារប្រជាពលរដ្ឋតាមជនបទ អោយរីកចំរើន

2025/12/01 03:50:40 pm        236
Facebook Telegram Linkin
កំពង់ឆ្នាំង៖ «ផ្លូវកៅស៊ូ និងផ្លូវក្រាលគ្រួសក្រហមចំនួន១៤ខ្សែ បាន និងកំពុងបំរើដល់ប្រយោជន៍ប្រជាពលរដ្ឋនៅតាមមូលដ្ឋានក្នុងខេត្តកំពង់ឆ្នាំង និងបានជួយបង្កើនជីវភាពគ្រួសារប្រជាពលរដ្ឋបានល្អជាងមុន» ប្រជាពលរដ្ឋដែលបានប្រើប្រាស់ផ្លូវទាំងនេះថ្លែងប្រាប់ ក្នុងពេលឯកឧត្តម ចាន់ ដារ៉ុង រដ្ឋលេខាធិការក្រសួងអភិវឌ្ឍន៍ជនបទ តំណាងឯកឧត្តម ឆាយ រិទ្ធីសែន រដ្ឋមន្រ្តីក្រសួងអភិវឌ្ឍន៍ជនបទ បានដឹកនាំអន្តរក្រសួងចុះត្រួតពិនិត្យ វាយតម្លៃដំណាក់កាលទី២ លើការងារថែទាំជាប្រចាំ នាថ្ងៃទី០១ ខែធ្នូ ឆ្នាំ២០២៥ ក្នុងស្រុកកំពង់ត្រឡាច ស្រុករលាប្អៀរ និងស្រុកសាមគ្គីមានជ័យ ខេត្តកំពង់ឆ្នាំង។ ប្រជាពលរដ្ឋបានថ្លែងថា៖ ក្រោមម្លប់សុខសន្តិភាព និងការអភិវឌ្ឍន៍ ផ្លូវក្នុងភូមិឃុំរបស់ពួកគាត់ បានអភិវឌ្ឍន៍ផ្លូវបានស្អាតគ្រប់ទីកន្លែង។ ពីមុនសុទ្ធតែជាផ្លូវរទេះ ពេលនេះបានប្រែក្លាយទៅជាផ្លូវក្រាលគ្រួសក្រហម និងផ្លូវកៅស៊ូDBST សំរាប់អោយប្រជាពលរដ្ឋនៅតាមជនបទធ្វើដំណើរបានងាយស្រួល កាត់បន្ថយការចំណាយប្រចាំថ្ងៃក្នុងគ្រួសារ និងដឹកអ្នកជំងឺទៅកាន់មណ្ឌលសុខភាព ឬមន្ទីរពេទ្យបានលឿនរហ័សទាន់ចិត្ត។ ផ្លូវកៅស៊ូ ផ្លូវបេតុង ផ្លូវគ្រួសក្រហមបានល្អស្អាតខ្វាត់ខ្វែងបែបនេះ ដោយសារគុណសម្តេចតេជោ ហ៊ុន សែន ប្រធានព្រឹទ្ធសភា, និងសម្តេចធិបតី ហ៊ុន ម៉ាណែត នាយករដ្ឋមន្ត្រី, បានខិតខំរក្សាសុខសន្តិភាពបានល្អ និងអភិវឌ្ឍផ្លូវនៅតាមជនបទអោយកាន់តែល្អ និងនៅជិតទីក្រុង ឬទីប្រជុំជន។ ក្រោយការចុះត្រួតពិនិត្យ វាយតម្លៃដំណាក់កាលទី២លើការថែទាំជាប្រចាំ ផ្លូវចំនួន១៤ខ្សែមានប្រវែង១០៤ ៦០០ម៉ែត្រ ស្ថិតក្នុងស្រុកសាមគ្គីមានជ័យ ស្រុកកំពង់ត្រឡាច ស្រុករលាប្អៀរ ខេត្តកំពង់ឆ្នាំងរួចមក ឯកឧត្តម ចាន់ ដារ៉ុង និងគណៈកម្មការអន្តរក្រសួង បានសម្រេចឯកភាពទទួលយក១០០% លើគុណភាព និងសោភ័ណភាពផ្លូវ។ ឯកឧត្តមក៏បានសំណូមពរដល់ប្រជាពលរដ្ឋទាំងអស់ជួយថែរក្សាផ្លូវ កុំកាយលុបប្រឡាយ ត្រូវដាក់លូបង្ហូរទឹកកុំអោយស្ទះ និងជួយមើលឡានដឹកធ្ងន់ៗផង ព្រោះថ្នាក់ដឹកនាំរាជរដ្ឋាភិបាលតែងតែគិតគូរដល់សុខទុក្ខ និងសេដ្ឋកិច្ចគ្រួសារបងប្អូនប្រជាពលរដ្ឋនៅតាមជនបទជានិច្ច។ មានផ្លូវល្អ ជួយសំរួលដល់ការធ្វើដំណើរ ចំណេញពេលវេលា សន្សំប្រាក់សំចៃប្រាក់កាស នាំអោយបងប្អូនប្រជាពលរដ្ឋទាំងអស់ មានសេដ្ឋកិច្ចគ្រួសារកាន់តែល្អ៕ កាំង ហុងវាស្នា

អភិបាលខេត្តព្រះវិហារ អញ្ជើញសម្ពោធដាក់ឱ្យប្រើប្រាស់ជាផ្លូវការ អគារសិក្សាថ្មី ១ខ្នង ៤បន្ទប់ ជាអំណោយរបស់ក្រុមហ៊ុនម៉ាឃីតត្រាស់ នៅសាលាបឋមសិក្សាប្រាសាទខ្នា ស្រុកសង្គមថ្មី

2025/12/01 03:48:44 pm        294
Facebook Telegram Linkin
នៅព្រឹកថ្ងៃទី១ ខែឆ្នូ ឆ្នាំ២០២៥ ឯកឧត្តម គីម រិទ្ធី អភិបាលខេត្តព្រះវិហារ បានអញ្ជើញជាអធិបតីភាព ក្នុងពិធីសម្ពោធដាក់ឱ្យប្រើប្រាស់ជាផ្លូវការនូវអគារសិក្សាថ្មី ១ខ្នង ៤បន្ទប់ និងសមិទ្ធផលនានា នៅសាលាបឋមសិក្សាប្រាសាទខ្នារ ស្ថិតក្នុងភូមិស្វាយ ឃុំរណសិរ្ស ស្រុកសង្គមថ្មី ជាអំណោយរបស់ក្រុមហ៊ុនម៉ាឃីតត្រាស់ (Market Trust Co., Ltd) តាមរយៈអង្គការជប៉ុនសាងសង់សាលារៀនឲ្យកុមារ (JHP)។ អគារសិក្សាថ្មីនេះបានចាប់ផ្ដើមការសាងសង់ពីថ្ងៃទី០៧ ខែកក្កដា និងរួចរាល់ជាស្ថាពរនៅថ្ងៃទី១៨ ខែវិច្ឆិកា ឆ្នាំ២០២៥ ដែលចំណាយថវិកាប្រមាណជាង ៦ម៉ឺនដុល្លាអាមេរិច។លោក ជូនអ៉ិជិ ខាវ៉ាមារ៉ូ តំណាងលោក ខាណុ យូតាកា ប្រធានក្រុមហ៊ុនម៉ាឃីតត្រាស់ បានថ្លែងថា ដោយបានសង្កេតឃើញស្ថានភាពសាលាមានសភាពចាស់ទ្រុឌទ្រោម និងការខ្វះខាត បានជំរុញឱ្យលោកសម្រេចចិត្តគៀងគរសប្បុរសជន និងថវិកាផ្ទាល់ខ្លួន ដើម្បីសាងសង់អគារសិក្សាថ្មីនេះឡើង ដើម្បីឱ្យក្មួយៗសិស្សានុសិស្ស រៀនសូត្រប្រកបដោយផាសុកភាព សុវត្ថិភាព ដោយមិនបារម្ភពីបញ្ហាត្រូវទទឹកភ្លៀង ឬកម្ដៅថ្ងៃទៀតឡើយ។ ជាមួយនេះលោកក៏បានផ្តាំផ្ញើឱ្យសិស្សានុសិស្សទាំងអស់ខិតខំរៀនសូត្រឱ្យបានពូកែ ដើម្បីយកចំណេះជំនាញ មកអភិវឌ្ឍប្រទេសជាតិរបស់យើងទៅថ្ងៃអនាគត។ ថ្លែងក្នុងពិធីនោះដែរ ឯកឧត្តម គីម រិទ្ធី អភិបាលខេត្ត បានសម្តែងនូវការ អបអរសាទរជាមួយបងប្អូនប្រជាពលរដ្ឋ លោកគ្រូ អ្នកគ្រូ និងសិស្សានុសិស្សទាំងអស់ ដែលទទួលបានសមិទ្ធផលថ្មីនេះ ជាមួយនឹងការថ្លែងអំណរគុណ និងកោតសរសើរយ៉ាងស្មោះចំពោះទឹកចិត្តសប្បុរសធម៌របស់ក្រុមហ៊ុនម៉ាឃីតត្រាស់ និងសប្បុរសជននានា ដែលបានលះបង់ធនធានផ្ទាល់ខ្លួនជួយសាងសង់អគារ សាលាបឋមសិក្សានេះ ក៏ដូចជាការងារមនុស្សធម៌ជាច្រើនទៀតនៅតាមតំបន់ផ្សេងៗ។ ឯកឧត្តមបានបញ្ជាក់ថាកាយវិការដ៏ប្រពៃនេះ គឺជាការបង្ហាញនូវទឹកចិត្តសប្បុរសធម៌ និងការយកចិត្តទុកដាក់ខ្ពស់ ចំពោះអនាគតកុមារជំនាន់ក្រោយ ដែលនឹងក្លាយជាទំពាំងស្នងឬស្សីរបស់ប្រទេសជាតិ។ ជាមួយគ្នានេះ ឯកឧត្តមអភិបាលខេត្ត ក៏បានថ្លែងកោតសរសើរចំពោះ អាជ្ញាធរស្រុកសង្គមថ្មី ដែលបានខិតខំប្រឹងប្រែងយ៉ាងសកម្មក្នុងការគៀងគរ និងទាក់ទាញសប្បុរសជន ឱ្យចូលរួមចំណែកជួយសាងសង់ហេដ្ឋារចនាសម្ព័ន្ធអប់រំដ៏មានសារៈសំខាន់នេះ។ ទន្ទឹមនេះឯកឧត្តមក៏បានផ្ដាំផ្ញើដល់អាជ្ញាធរស្រុកសង្គមថ្មី លោកគ្រូ អ្នកគ្រូ ត្រូវថែទាំ និងសម្អាតបរិវេណសាលាទាំងក្នុង និងក្រៅ ពិនិត្យមើលបង្គន់អនាម័យ នឹងរួមគ្នាដាំដើមឈើដើម្បីទទួលបានបរិស្ថានបៃតងនៅក្នុងសាលា។

មេបញ្ជាការសឹករងកំពង់ឆ្នាំង ព្រមានចាត់វិធានបង្ក្រាបភ្លាមៗប្រសិនរកឃើញការធ្វើបទល្មើសសម្រាស់

2025/12/01 03:46:35 pm        738
Facebook Telegram Linkin
កំពង់ឆ្នាំង៖ លោកឧត្តមសេនីយ៍ត្រី អ៊ុំ សុភា មេបញ្ជាការសឹករងកំពង់ឆ្នាំងនៅរសៀលថ្ងៃទី៣០ ខែវិច្ឆិកា ឆ្នាំ២០២៥នេះ បានព្រមានចាត់វិធានការបង្រ្កាប និងចាប់ខ្លួនជនទាំងឡាយណាដែលព្យាយាមប៉ុនប៉ងប្រព្រឹត្តបទល្មើសដាក់សម្រាស់ក្នុងខេត្តនាឆ្នាំនេះ។ លោកឧត្តមសេនីយ៍ត្រីបានថ្លែងបែបនេះ ក្រោយពេលពិនិត្យឃើញដើមឈើព្រៃលិចទឹកជាច្រើនក្នុងឃុំប្រឡាយមាស ស្រុកកំពង់លែង ត្រូវជនសង្ស័យលួចកាប់យកទៅដាក់បទល្មើសសម្រាស់។លោកឧត្តមសេនីយ៍ត្រីបន្តថា៖ ដោយគោរពតាមបទបញ្ជារបស់សម្តេចធិបតី ហ៊ុន ម៉ាណែត នាយករដ្ឋមន្ត្រី ឯកឧត្តម ម៉ៅ សុផាន់ អគ្គមេបញ្ជាការកងទ័ពជើងគោក និងឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង អោយបង្ក្រាបបទល្មើសនេសាទគ្រប់ប្រភេទនៅក្នុងដែនទឹកខេត្តកំពង់ឆ្នាំង ជាពិសេសគឺបទល្មើសសម្រាស់នេះតែម្តង។ បទល្មើសដាក់សម្រាស់ ជាបទល្មើសមួយដែលបានបំផ្លាញធនធានធម្មជាតិ(ព្រៃលិចទឹក)យ៉ាងស្ងាត់បំផុត និងធ្វើអោយទន្លេ បឹង ព្រែកគោករាក់ ផ្លាស់ចរន្តទឹកហូរ បំណាក់ដី បាត់បង់ទីជំរកត្រីពងកូន និងគ្មានរបាំងការពារខ្យល់កន្ត្រាក់ជាដើម។ ក្នុងពេលចុះពិនិត្យនេះ លោកមេបញ្ជាការបានរកឃើញ ដើមឈើព្រៃលិចទឹកជាច្រើនដើមនៅក្នុងឃុំប្រឡាយមាស ស្រុកកំពង់លែងដែលជាឃុំមានបទល្មើសកាប់ព្រៃលិចទឹកធ្វើសម្រាស់ច្រើនជាងគេ, មាននៅភូមិកោះកែវ ឃុំក្រាំងដីមាស ស្រុករលាប្អៀរ, និងមួយចំនួននៅក្នុងស្រុកជលគីរី និងក្រុងកំពង់ឆ្នាំង។ លោកឧត្តមសេនីយ៍ត្រី អ៊ុំ សុភា បានព្រមានចាត់វិធានការក្តៅ ប្រសិនបើកម្លាំងកងទ័ពពើបប្រទះឃើញជនសង្ស័យកំពុងប្រព្រឹត្តបទល្មើសនេះ គឺត្រូវចាប់ខ្លួនបញ្ជូនទៅតុលាការ ឧបករណ៍ទូកកាណូតត្រូវរឹបអូសផងដែរ។ លោកបានអំពាវនាវអោយអាជ្ញាធរភូមិឃុំស្រុក និងអង្គភាពពាក់ព័ន្ធជួយចូលរួមទប់ស្កាត់ជាមួយកម្លាំងខណ្ឌរដ្ឋបាលជលផល ដើម្បីទប់ស្កាត់នូវបទល្មើសដាក់សម្រាស់នេះ។ប្រជានេសាទលក្ខណៈគ្រួសារ បានអោយដឹងថា៖ បានជាជនសង្ស័យនៅតែមានការកាប់បំផ្លាញព្រៃលិចទឹកក្នុងឆ្នាំនេះ ដើម្បីយកទៅដាក់បទល្មើសសម្រាស់ទៀត មកពីជនសង្ស័យទាំងនោះមិនបានខ្លាចរអានឹងច្បាប់។ ពួកគេគិតថា អ្នកអនុវត្តច្បាប់ មិនបានអនុវត្តតាមអ្វីដែលច្បាប់បានចែងអោយម៉ឺងម៉ាត់នោះឡើយ។ ប្រជានេសាទបានសំណូមពរដល់ថ្នាក់ដឹកនាំ និងប្រធានមន្ទីរកសិកម្មកំពង់ឆ្នាំង ខណ្ឌរដ្ឋបាលជលផលកំពង់ឆ្នាំង រួមនិងមេបញ្ជាការសឹករងកំពង់ឆ្នាំង កុំអោយបង្ធូរដៃជាមួយជនសង្ស័យអោយសោះ ព្រោះថារាល់ថ្ងៃពួកគាត់ឃើញជនសង្សួមួយចំនួនក្នុងឃុំប្រឡាយមាស បានកាប់ព្រៃឈើលិចទឹកដឹកទាំងថ្ងៃត្រង់ គ្មានអ្នកណារំខានឡើយ៕ កាំង ហុងវាស្នា

យុវជនជាងមួយពាន់នាក់ចុះឈ្មោះរៀនជំនាញបច្ចេកទេស និងវិជ្ជាជីវៈកម្រិតខ្ពស់

2025/12/01 03:40:57 pm        952
Facebook Telegram Linkin
វិទ្យាស្ថានបច្ចេកទេសឧស្សាហកម្ម (ITI) នៅព្រឹកថ្ងៃទី១ ខែធ្នូ ឆ្នាំ២០២៥នេះ បាន​រៀបចំ​កម្ម​វិធី​បើក​បវេសនកាល និងតម្រង់ទិសសិស្ស និស្សិត ឆ្នាំសិក្សា២០២៥-២០២៦។ បើតាម​ការ​ឱ្យ​ដឹង​របស់​វិទ្យាស្ថាន សម្រាប់ឆ្នាំនេះ ទទួលបានការចុះឈ្មោះពីសិស្ស និស្សិត ដើម្បីរៀន​ជំនាញ​បច្ចេក​ទេស និងវិជ្ជាជីវៈ (ធីវ៉េត) កម្រិតខ្ពស់លើគ្រប់មុខជំនាញ សរុបចំនួនប្រមាណ ១ ២០០នាក់។នៅក្នុងពិធីបើកបវេសនកាល និងតម្រង់ទិសសិស្ស និស្សិត ឆ្នាំសិក្សា២០២៥-២០២៦ ឯកឧត្តម ជិន តារ៉ា នាយកវិទ្យាស្ថានបច្ចេកទេសឧស្សាហកម្ម (ITI) បានមានប្រសាសន៍ថា ការ​អប់រំ​បណ្តុះ​បណ្តាលបច្ចេកទេស និងវិជ្ជាជីវៈ គឺជាកត្តាមិនអាចខ្វះបានក្នុងការអភិវឌ្ឍសេដ្ឋកិច្ច សង្គម និង​ជំរុញ​ឱ្យ​អ្នកសិក្សាទទួលបាននូវចំណេះដឹង ជំនាញបច្ចេកទេស ជាមួយសមត្ថភាព ដើម្បី​ក្លាយ​ខ្លួន​ជា​ពលករ​ជំនាញ អ្នកបច្ចេកទេស ដែលចូលរួមចំណែកយ៉ាងសំខាន់ក្នុងការអភិវឌ្ឍ សង្គម និង​សេដ្ឋកិច្ចជាតិ។ ឯកឧត្តមនាយក បានឱ្យដឹងទៀតថា នៅក្នុងឆ្នាំសិក្សាថ្មីនេះ ជាការកត់សម្គាល់យុវជន យុវនារី កាន់​តែច្រើនបានងាកមកចាប់អារម្មណ៍ក្នុងការសិក្សាជំនាញវិជ្ជាជីវៈ និងបច្ចេកទេស។ ក្នុងនោះ ទទួល​បានការចុះឈ្មោះចូលរៀនទៅលើមុខជំនាញផ្សេងៗ មានដូចជា វិស្វកម្ម, មេកានិករថយន្ត, បរិក្ខា​ត្រជាក់អគ្គិសនី, មេកានិកឧស្សាហកម្ម, ព័ត៌មានវិទ្យា និងបន្ស៊ីលោហៈ។ ឯកឧត្តម បាន​ប្តេជ្ញា​ចិត្ត​ថា នឹងពង្រឹងបន្ថែមនូវការបង្ហាត់បង្រៀនជំនាញវិជ្ជាជីវៈដល់សិស្សានុសិស្ស ឱ្យទទួល​បាន​ការ​អប់រំដែលមានស្តង់ដារ និងឱ្យក្លាយជាធនធានដែលមានជំនាញមួយច្បាស់លាស់ អាច​រក​ការ​ងារ​ធ្វើ និងជាការងារដែលមានតម្រូវការទីផ្សារបច្ចុប្បន្ន និងពេលអនាគត។ សូមជម្រាបជូនបន្ថែមថា នៅក្នុងកម្មវិធីបើកបវេសនកាល ឆ្នាំសិក្សា២០២៥-២០២៦ វិទ្យាស្ថាន​បច្ចេក​ទេស​ឧស្សាហកម្ម (ITI) ក៏មានរៀបចំពិធីចុះហត្ថលេខាជាមួយក្រុមហ៊ុនឯកជន និង​បាន​អញ្ជើញ​តំណាងក្រុមហ៊ុនដែលជាដៃគូ និងអង្គការនានា ដើម្បីធ្វើការតម្រង់ទិសជូនដល់សិស្ស និស្សិត និងអាណាព្យាបាល ដើម្បីបង្ហាញឱ្យឃើញថា ក្រៅពីការបណ្តុះបណ្តាលជំនាញ វិទ្យាស្ថាន​ក៏​មាន​កិច្ចសហការយ៉ាងល្អជាមួយបណ្តាក្រុមហ៊ុន និងអង្គការដែលជាដៃគូ ដើម្បី​ផ្តល់​ឱកាស​ដល់​សិស្ស និស្សិត ចុះហាត់ការដោយផ្ទាល់ និងមាន​ឱកាស​ការងារ​ដ៏​សម្បូរបែប​ផង​ដែរ​ក្រោយ​បញ្ចប់​ការ​សិក្សា ឬក៏អាចរៀនបណ្តើរ ធ្វើការបណ្តើរបានដូចគ្នាផងដែរ៕ អត្ថបទ៖ ឈិត បូរ៉ាវី 

ទេសចរជាតិ-អន្តរជាតិប្រមាណ ៣ម៉ឺននាក់ អញ្ជើញទៅទស្សនាព្រឹត្តិការណ៍​តារាសាគរ​សាទរ​ទេសចរណ៍​សមុទ្រនៅខេត្តកោះកុង

2025/12/01 03:31:56 pm        453
Facebook Telegram Linkin
រយៈពេល៤ថ្ងៃ នៃព្រឹត្តិការណ៍តារាសាគរសាទរទេសចរណ៍សមុទ្រ នៅស្រុកគិរីសាគរ ខេត្តកោះកុង មានភ្ញៀវទេសចរសរុប៣ម៉ឺននាក់ បានចាប់អារម្មណ៍ទៅទស្សនាកម្សាន្ត ក្រោមបរិយាកាសលើកស្ទួយទាក់ទាញវិស័យកីឡា និងទេសចរណ៍។ចាប់ពីថ្ងៃទី២៧ដល់ថ្ងៃទី៣០ ខែវិច្ឆិកា ឆ្នាំ២០២៥ មានភ្ញៀវទេសចរជាតិ និងអន្តរជាតិសរុបប្រមាណជា៣ម៉ឺននាក់ បានចាប់អារម្មណ៍នាំគ្នាសម្រុកទៅទស្សនាកម្សាន្តយ៉ាងច្រើនកុះករនៅព្រឹត្តិការណ៍តារាសាគរសាទរទេសចរណ៍សមុទ្រ។លោក លី ម៉េងឈិន ប្រធានក្រុមប្រឹក្សាភិបាលក្រុមហ៊ុនខូលថល ស៊ីធី បានឱ្យដឹងក្នុងពិធីបិទព្រឹត្តិការណ៍តារាសាគរសាទរទេសចរណ៍សមុទ្រ យប់ថ្ងៃទី៣០ ខែវិច្ឆិកា ថា រយៈពេលប៉ុន្មានថ្ងៃនេះ ទឹកដីដ៏ស្រស់ស្អាតនៃតារាសាគរ បានប្រែជាមានភាពរស់រវើកយ៉ាងខ្លាំងដែលមិនធ្លាប់មានពីមុនមក ដោយសារវត្តមានរបស់ ថ្នាក់ដឹកនាំ និងភ្ញៀវទេសចរមកពីគ្រប់ទិសទីទាំងអស់។ យើងបានរួមគ្នាធ្វើជាសាក្សីនៃការប្រណាំងប្រជែងល្បឿន និងភាពរំភើបរបស់កីឡាករដែលបានពុះជ្រែករលកសមុទ្រក្រោមផ្ទៃមេឃពណ៌ខៀវក្នុងការប្រកួតម៉ូតូទឹក, យើងបានទទួលបទពិសោធន៍នៃភាពអត់ធ្មត់ និងបញ្ញាវៀងវៃក្នុងការប្រកួតស្ទូចត្រី និងរីករាយជាមួយផលដែលទទួលបាន។លោក លី ម៉េងឈិន បានបន្តទៀតថា ពេលព្រឹកព្រលឹម មានការរត់ប្រណាំងពាក់កណ្តាលម៉ាឡាតុង និងការប្រកួតជិះកង់ បានប្រើប្រាស់ជំហានជើងដើម្បីវាស់វែងសម្រស់អេកូឡូស៊ីនៃតារាសាគរ និងបង្ហាញពីស្មារតីកីឡាដែលហ៊ានយកឈ្នះលើខ្លួនឯង និងមិនបោះបង់។ ដូច្នេះលោក ចាត់ទុកថា សកម្មភាពដ៏សម្បូរបែបទាំងនេះ មិនត្រឹមតែបង្ហាញពីភាពទាក់ទាញនៃការប្រកួតកីឡាប៉ុណ្ណោះទេ ថែមទាំងបានបកស្រាយយ៉ាងល្អឥតខ្ចោះនូវសក្តានុពលធំធេងនិងគ្មានដែនកំណត់នៃកីឡា និងទេសចរណ៍ ដែលធ្វើឱ្យអ្នកចូលរួមគ្រប់រូបដក់អារម្មណ៍យ៉ាងជ្រាលជ្រៅពីភាពស្រស់ស្អាត និងបរិយាកាសល្អឯកនៃតារាសាគរ ក្នុងនាមជាគោលដៅទេសចរណ៍លំហែជាប់មាត់សមុទ្រលំដាប់ថ្នាក់ពិភពលោកមួយ។លោកប្រធានក្រុមប្រឹក្សាភិបាលក្រុមហ៊ុនខូលថល ស៊ីធី ក៏បានរំលេចដែរថា ភាពរីកចម្រើនយ៉ាងឆាប់រហ័សនៃគម្រោងតារាសាគរ គឺជាសក្ខីភាពយ៉ាងច្បាស់នៃចំណងមិត្តភាព ដែកថែប ដ៏យូរអង្វែងរវាងកម្ពុជា និងចិន។ ក្រោមការផ្សារភ្ជាប់យ៉ាងស៊ីជម្រៅរវាងគំនិតផ្ដួចផ្ដើម ខ្សែក្រវាត់ និងផ្លូវ និងយុទ្ធសាស្ត្របញ្ចកោណ របស់ប្រទេសចិន និងកម្ពុជា លោកពិតជាមានសំណាងណាស់ដែលបានក្លាយជាអ្នកចូលរួមចំណែកនៅក្នុងដំណើរការប្រវត្តិសាស្ត្រ។ដោយឡែកលោកជំទាវ ឈី វ៉ា អភិបាលខេត្តកោះកុង លើកឡើងថា រាជរដ្ឋាភិបាលកម្ពុជានីតិកាលទី៧ នៃរដ្ឋសភា បានខិតខំលើកកម្ពស់ និងជំរុញវិស័យទេសចរណ៍កម្ពុជាឆ្ពោះទៅកាន់អនាគតថ្មី ដោយក្រសួងទេសចរណ៍ បានដាក់ចេញនូវគំនិតផ្តួចផ្តើមយុទ្ធសាស្ត្រក្រោមចក្ខុវិស័យអភិវឌ្ឍវិស័យទេសចរណ៍កម្ពុជា ប្រកបដោយគុណភាព ភាពរស់រវើក ភាព ប្រកួតប្រជែង ចីរភាព និងបរិយាបន្ន សំដៅឆ្ពោះទៅកាន់អនាគតថ្មី ដោយឈរលើគោលការណ៍គ្រឹះ “ទេសចរណ៍ផ្សារភ្ជាប់ទឹក ដី និងធម្មជាតិ” សំដៅធ្វើឱ្យកម្ពុជាក្លាយជាគោលដៅទេសចរណ៍សកល ឈានមុខប្រកបដោយភាពសម្បូរបែប ពោរពេញដោយកាលានុវត្តភាព និងភាពកក់ក្តៅ ក្នុងការរួមចំណែកលើកកម្ពស់កិត្យានុភាព និងភាពធន់របស់កម្ពុជា។លោកជំទាវអភិបាលខេត្ត បង្ហាញថា ខេត្តកោះកុង ជាខេត្តមួយ សម្បូរទៅដោយតំបន់ទេសចរណ៍ដែលមានសក្តានុពល រួមមាន៖ តំបន់សមុទ្រ កោះ ឆ្នេរ ព្រៃភ្នំ ទឹកជ្រោះ និងរីសត រមណីយដ្ឋាននានាជាច្រើន និងមានក្រុមហ៊ុនតូចធំជាច្រើន បាននិងកំពុងបណ្តាក់ទុនវិនិយោគ លើការផ្តល់ផលិតផលសេវាកម្មទេសចរណ៍៕

ប្រធាន AmCham ៖ អាមេរិកនឹងបញ្ចុះពន្ធបដិការបន្ថែមដល់ការនាំចេញវិស័យអាទិភាពកម្ពុជា

2025/12/01 03:27:30 pm        761
Facebook Telegram Linkin
ប្រធានសភាពាណិជ្ជកម្មអាម៉េរិកប្រចាំនៅកម្ពុជា (AmCham) រំពឹងថា សហរដ្ឋអាមេរិក​នឹងបន្ត​បញ្ចុះអត្រាពន្ធបដិការដល់កម្ពុជា បន្ថែម នៅលើវិស័យកាត់ដេរ វាយនភណ្ឌ ស្បែកជើង និងសម្ភារៈធ្វើដំណើរ ដោយវិស័យទាំងនេះមិនសូវមានអ្នកប្រកួតប្រជែង និង ខណៈដែលសហរដ្ឋអាមេរិកក៏មានការផលិតបន្តិចបន្ទួច។ លោក ខេស៊ី បាណេត ប្រធានសភាពាណិជ្ជកម្មអាម៉េរិកប្រចាំនៅកម្ពុជា (AmCham) លើកឡើងក្នុងកិច្ចសម្ភាសន៍ជាមួយ BTV ស្តីពីការបន្តចរចារកិច្ចព្រមព្រៀងពាណិជ្ជកម្មរវាងកម្ពុជា-អាមេរិក នៅក្នុងកម្មវិធីប្រកួតភាពជាសហគ្រិនភាពប្រចាំឆ្នាំ២០២៥ ថា ជុំវិញការចរចារពន្ធបដិការនេះឃើញថា រាជរដ្ឋាភិបាលកម្ពុជាបានយកចិត្តទុកដាក់ យ៉ាងខ្លាំង ចាប់តាំងពីដំណាក់កាលដំបូង ពីប្រមាណ ៤៩ ភាគរយ មកនៅត្រឹម ៣៦ ភាគរយ និងបានបន្តទម្លាក់មកនៅត្រឹម ១៩ ភាគរយ ហើយមកដល់នេះឃើញថា ក្រុមការងារចំពោះ កិច្ចលើការចរចារកិច្ចព្រមព្រៀងពាណិជ្ជកម្មរវាងកម្ពុជា-អាមេរិក នៅតែបន្តចរចារ ដើម្បីបញ្ចុះពន្ធបដិការបន្ថែមទៀត នៅលើវិស័យ អាទិភាពទាំង៤ សម្រាប់ការនាំចេញរបស់កម្ពុជា។ទាក់ទងការរចរចារនេះ, លោក ខេស៊ី បាណេត មានសុទិដ្ឋិនិយមខ្ពស់ នឹងរំពឹងថា កម្ពុជានឹងទទួលបានអត្ថប្រយោជន៍នៅលើ ការខិតខំប្រឹងប្រែងនេះជាមិនខាន ខណៈដែលសហរដ្ឋអាមេរិកមិនស្រូវមានរោងចក្រផលិតមុខទំនិញទាំងនេះ និងខណៈដែលការប្រកួត ប្រជែងនាំចូលទំនិញលើវិស័យកាត់ដេរ វាយនភណ្ឌ ស្បែកជើង និងសម្ភារៈធ្វើដំណើរ ទៅកាន់ទីផ្សារសហរដ្ឋអាមេរិក ក៏មានចំនួនតិច តួចផងដែរ។ជុំវិញពន្ធបដិការនេះដែរ, ថ្មីៗនេះ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានលើក ឡើងក្នុងសិក្ខាសាលាផ្សព្វផ្សាយរបាយការណ៍ វឌ្ឍនភាពនៃការអនុវត្តវិធានការកែទម្រង់មុតស្រួចជាកញ្ចប់ ដែលដាក់ចេញក្នុងវេទិកា រាជរដ្ឋាភិបាល-ផ្នែកឯកជនលើកទី១៩ ប្រចាំឆមាសទី១ ឆ្នាំ២០២៥ ថា កម្ពុជាបាននិងកំពុងបន្តដើម្បីចរចាបញ្ចុះពន្ធបដិការបន្តទៀត ជាមួយសហរដ្ឋអាម៉េរិកបន្ថែមទៀត លើវិស័យអាទិភាពមួយចំនួនរួមមាន៖ វិស័យកាត់ដេរ វាយនភណ្ឌ ស្បែកជើង និងសម្ភារៈធ្វើដំណើរ ដែលវិស័យទាំងនេះបាននិងកំពុងស្រូបទាញកម្លាំងពលកម្ម និងផ្តល់ឱកាសការងារយ៉ាងច្រើន។ តាមរយៈកិច្ចចរចានេះដែរ ឯកឧត្តម រំពឹងថា កម្ពុជានឹងអាចទទួលបានការបញ្ចុះពន្ធបដិការក្រោម ១៩% បន្ថែមទៀត ឬអាចដល់ ០% ព្រោះសហរដ្ឋអាមេរិកមិនសូវមាន រោងចក្រកាត់ដេរលើប្រភេទទំនិញមួយចំនួននេះ ដែលកម្ពុជាបានកំពុងនាំចេញនោះឡើយ៕ អត្ថបទ៖ សុន រ៉ាឌី

រដ្ឋមន្រ្តីក្រសួងសាធារណការទទួលជួបពិភាក្សាការងារជាមួយគណៈប្រតិភូក្រុមប្រឹក្សាធុរកិច្ចអាម៉េរិក-អាស៊ាន (US-ABC)

2025/12/01 03:21:47 pm        183
Facebook Telegram Linkin
ទីស្តីការក្រសួង៖ នាព្រឹកថ្ងៃទី១ ខែធ្នូ ឆ្នាំ២០២៥ ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន បានអនុញ្ញាតិឱ្យប្រតិភូក្រុមប្រឹក្សាធុរកិច្ចអាម៉េរិក-អាស៊ាន ដឹកនាំដោយឯកអគ្គរដ្ឋទូត TED Osius អនុប្រធានជាន់ខ្ពស់ និងជានាយកគ្រប់គ្រងតំបន់ ជួបសម្តែងការគួរសម និងពិភាក្សាការងារដោយមានការចូលរួមពី ឯកឧត្តម លោកជំទាវថ្នាក់ដឹកនាំក្រសួង និងមន្រ្តីមន្រ្តីពាក់ព័ន្ធ។ជំនួបនេះមានគោលបំណងពិភាក្សាអំពីការពង្រីកទំនាក់ទំនងអាជីវកម្មរវាងសហរដ្ឋអាម៉េរិក និងកម្ពុជា និងស្វែងយល់ពីឱកាសក្នុងការវិនិយោគបន្ថែមរបស់ក្រុមហ៊ុនអាម៉េរិក ដើម្បីគាំទ្រដល់ការអភិវឌ្ឍន៍សេដ្ឋកិច្ច និងលើកិច្ចសហប្រតិបត្តិការជាមួយកម្ពុជា៕

បណ្ដាញសង្គម

ព័ត៌មានថ្មីៗ

អេស្ប៉ាញរកឃើញមនុស្សស្លាប់ខ្ពស់បំផុតពាក់ព័ន្ធនឹងកម្តៅក្នុងខែឧសភា ចាប់តាំងពីឆ្នាំ ២០១៥
06/03/2026 09:06 PM
Facebook Telegram Linkin
អគ្គិភ័យ និងការខូចខាត បានកើតមាននៅអាកាសយានដ្ឋានគូវែត ក្រោយការវាយប្រហាររបស់អ៊ីរ៉ង់
06/03/2026 08:06 PM
Facebook Telegram Linkin
ឥណ្ឌាអនុម័តមូលនិធិជាង ១ពាន់លានដុល្លារ ដើម្បីជួយក្រុមហ៊ុនអាកាសចរណ៍ ស្របពេលប្រេងយន្តហោះឡើងថ្លៃ
06/03/2026 08:06 PM
Facebook Telegram Linkin
ក្រុមអ្នកតាំងលំនៅនិគមន៍អ៊ីស្រាអែលវាយប្រហាររថយន្តដឹកគ្រួសារប៉ាឡេស្ទីននៅតំបន់វ៉េសប៊ែង
06/03/2026 08:06 PM
Facebook Telegram Linkin
ឈីលីកម្ទេចបណ្តាញលាងលុយកខ្វក់ដែលមានការជាប់ពាក់ព័ន្ធនឹងក្រុមឧក្រិដ្ឋជន Tren de Aragua
06/03/2026 08:06 PM
Facebook Telegram Linkin
អរិភាពនៅតំបន់ឈូងសមុទ្រឡើងកម្តៅជាថ្មី ខណៈកិច្ចប្រជុំសន្តិភាពអាមេរិក-អ៊ីរ៉ង់ជាប់គាំង
06/03/2026 08:06 PM
Facebook Telegram Linkin
កូដកម្មជុំវិញកំណែទម្រង់ការងារ ធ្វើឲ្យប៉ះពាល់ដល់រថភ្លើង ជើងហោះហើរ និងសាលារៀននៅព័រទុយហ្គាល់
06/03/2026 08:06 PM
Facebook Telegram Linkin
ចិនច្រានចោលអំណះអំណាងការងារដោយបង្ខំ ជាការឆ្លើយតបនឹងសំណើពន្ធអាមេរិក
06/03/2026 08:06 PM
Facebook Telegram Linkin
វិមានក្រឹមឡាំង៖ រុស្ស៊ីនឹងបន្តវាយប្រហារអ៊ុយក្រែនជាប្រព័ន្ធ ក្រោយការវាយប្រហារដ្រូននៅទីក្រុង St Petersburg
06/03/2026 08:06 PM
Facebook Telegram Linkin
អ្នកវិទ្យាសាស្រ្តព្រមានថា បាតុភូតអែល នីញ៉ូ អាចនឹងវាយប្រហារតំបន់ភាគខាងត្បូងប្រេស៊ីលក្នុងឆ្នាំនេះ
06/03/2026 08:06 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.