BTV NEWS

ការរៀបចំសម្រាប់ព្រឹត្តិការណ៍ «នគរសង្ក្រាន្ត» វត្តភ្នំ មានភាពស្រស់ស្អាត និងទាក់ទាញទេសចរ

តំបន់ផ្លូវថ្មើរជើងកាន់តែបង្ហាញវត្តមានទេសចរអន្តរជាតិច្រើន ខណៈបុណ្យចូលឆ្នាំថ្មីចាប់ផ្ដើមនៅថ្ងៃស្អែក

សង្ក្រាន្តទួលទំពូង ទាក់ទាញអ្នកចូលរួម និងទេសចរ ជំរុញកំណើនការលក់ដូររបស់អាជីវករ

កម្មករ កម្មការិនីនៅតាមរោងចក្រសហគ្រាស រៀបចំ “ការលេងល្បែងប្រជាប្រិយ អាហារសាមគ្គី និងការរាំកម្សាន្តយ៉ាងរីករាយ” ដើម្បីអបអរសាទរបុណ្យចូលឆ្នាំថ្មីប្រពៃណីជាតិ

ព័ត៌មានជាតិ

អាកាសយានដ្ឋានអន្តរជាតិតេជោ កំពុងសាងសង់ឃ្លាំងនិងចំណត Cargo ដើម្បីជំរុញឱ្យក្លាយជា Logistic Hub

ក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក (CAIC) ចំណាយទុនវិនិយោគចំនួនប្រមាណ ៥០ លានដុល្លារអាមេរិក លើ គម្រោងសាងសង់ស្ថានីយ៍ឃ្លាំងទំនិញ (Cargo Terminal) ទី២ និងចំណតយន្តហោះ Cargo បន្ថែម ដើម្បីជំរុញឱ្យអាកាសយានដ្ឋាន អន្តរជាតិតេជោ (TIA) ក្លាយជាមជ្ឈមណ្ឌលដឹកជញ្ជូន និងការផ្ទេរមធ្យោបាយដឹកជញ្ជូន។ លោកអ្នកឧកញ៉ាបណ្ឌិត ពុង ឃាវសែ ប្រធានក្រុមប្រឹក្សាភិបាលក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក (CAIC) លើក ឡើងនៅក្នុងពិធីបើកសម្ពោធជាផ្លូវការនៃអាកាសយានដ្ឋានអន្តរជាតិតេជោ (TIA) នៅថ្ងៃទី ២០ ខែ តុលា ឆ្នាំ ២០២៥ នេះថា ការវិនិយោគសាងសង់ TIA (ដំណាក់កាលទី១) បានចំណាយថវិកាសរុប ២.៣០០ លានដុល្លារអាមេរិក រួមបញ្ចូលចំណាយសាង សង់ស្ថានីយ៍អ្នកដំណើរ ស្ថានីយ៍អ្នកដំណើរពិសេស (VVIP Terminal), ទីលានចុះចតយន្តហោះ, អគារ, និងហេដ្ឋារចនាសម្ព័ន្ធទ្រទ្រង់ប្រតិបត្តិការ អាកាសយានដ្ឋានរួមមាន៖ ផ្លូវ ស្ពានអាកាស ឃ្លាំងទំនិញ ចំណាយហិរញ្ញប្បទាន និងចំណាយសម្រាប់ការផ្ទេរប្រតិបត្តិការពីអាកាសយានដ្ឋានអន្តរជាតិភ្នំពេញមក TIA។ ទុនវិនិយោគ គឺប្រើដើមទុនផ្ទាល់របស់ក្រុមហ៊ុន OCIC និងការចូលរួមទុនតាមរយៈមូលបត្របំណុល ពីស្ថាប័នធនាគារ និងហិរញ្ញវត្ថុក្នុងស្រុក។លោកអ្នកឧកញ៉ាបណ្ឌិត បន្តឱ្យដឹងថា បច្ចុប្បន្នក្រុមហ៊ុនបាននិងកំពុងសាងសង់ស្ថានីយ៍ឃ្លាំងទំនិញ (Cargo Terminal) ទី២ និងចំណតយន្តហោះ Cargo បន្ថែម ដោយចំណាយទុនវិនិយោគចំនួន ៥០ លានដុល្លារអាមេរិក ដែលមានទំហំឃ្លាំងសរុប ៤០ ពាន់ម៉ែត្រការ៉េ ការវិនិយោគបន្ថែម គឺយោងទៅតាមកំណើនទំនិញ Cargo និងដើម្បីត្រៀមអាកាសយានដ្ឋានអន្តរជាតិតេជោ (TIA) ជាមជ្ឈមណ្ឌលដឹកជញ្ជូន (Logistic Hub) និងការផ្ទេរមធ្យោបាយដឹកជញ្ជូន (Transhipment)។ បន្ថែមពីនេះក្រុមហ៊ុន CAIC ក៏បានសហការជាមួយក្រុមហ៊ុន SIA Engineering Company (ពី Singapore Airlines) បង្កើតក្រុមហ៊ុនឈ្មោះ TIA Engineering Services Company Limited ដើម្បីផ្តល់សេវា ថែទាំដល់ក្រុមហ៊ុនអាកាសចរណ៍នៅ TIA។ ផែនការនាពេលអនាគតគឺ ក្រុម ហ៊ុននឹងសាងសង់ស្ថានីយ៍សម្រាប់សេវាថែទាំ និងជួសជុលយន្តហោះនៅ TIA ដោយសារតែរាជធានីភ្នំពេញជាទីតាំងកណ្តាល ដែល មានសក្តានុពលផ្តល់សេវាកម្ម នៅក្នុងតំបន់អាស៊ាន និងអាស៊ី។លោកអ្នកឧកញ៉ាបណ្ឌិត បន្ថែមឱ្យដឹងទៀតថា ក្រៅពីគម្រោងខាងលើ, ក្រុមហ៊ុន OCIC ក៏បានចាប់ផ្តើមអភិវឌ្ឍទីក្រុងរណប អាកាសយានដ្ឋាន រួមមានការសាងសង់លំនៅដ្ឋានតម្លៃសមរម្យសម្រាប់បុគ្គលិករាប់ពាន់នាក់នៅ TIA និងមជ្ឈមណ្ឌលពាណិជ្ជកម្ម នៅក្នុងទីក្រុងរណបអាកាសយានដ្ឋាននេះ។ ទីក្រុងរណបអាកាសយានដ្ឋាន មានផែនការរួម សម្រាប់អភិវឌ្ឍលំនៅដ្ឋាន តំបន់ពាណិជ្ជកម្ម មជ្ឈមណ្ឌលពិពណ៌អន្តរជាតិ រោងចក្រ និងឃ្លាំងរួមមាន៖ តំបន់សេដ្ឋកិច្ចពិសេស ក្នុងការលើកកម្ពស់ការផលិត និងការ នាំចេញទំនិញតាមរយៈ TIA ក្រៅពីនេះ, ក្រុមហ៊ុន OCIC ក៏បានសាងសង់ឧទ្យានវប្បធម៌នៅ TIA ដើម្បីផ្សព្វផ្សាយដល់ភ្ញៀវក្នុងស្រុក និងអន្តរជាតិ ឲ្យយល់ដឹងពីវប្បធម៌ខ្មែរ៕ អត្ថបទ៖ សុន រ៉ាឌី,

ព្រឹកនេះ មន្ត្រីរាជការដែលជាតំណាងក្រសួង ស្ថាប័ន និងរដ្ឋបាលថ្នាក់ក្រោមជាតិ ព្រមទាំងប្រធានមន្ទីរពេទ្យទូទាំងប្រទេស បានមកជួបជុំគ្នានៅខេត្តកំពង់ចាម ដើម្បីចែករំលែកព័ត៌មានគ្នាទៅវិញទៅមកពីភាពជាគំរូនៃការផ្តល់សេវាសាធារណៈ

ភ្នំពេញ៖ ក្នុងពិធីនេះ ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ និងជាប្រធានគណៈកម្មការវាយតម្លៃអង្គភាពផ្តល់សេវាសាធារណៈថ្នាក់ជាតិ (គ.វ.ជ.) នឹងអញ្ជើញជាអធិបតីដ៏ខ្ពង់ខ្ពស់ ក្នុងពិធីបើកសិក្ខាសាលាចែករំលែកបទពិសោធនៃការគ្រប់គ្រង និងការផ្តល់សេវាសាធារណៈរបស់ជ័យលាភីអង្គភាពផ្តល់សេវាសាធារណៈគំរូក្នុងវិស័យសុខាភិបាល ឆ្នាំ២០២៤ សម្រាប់កម្រិតមន្ទីរពេទ្យបង្អែកផ្តល់សេវាសំណុំសកម្មភាពបង្គ្រប់កម្រិត៣ នៅសាលាខេត្តកំពង់ចាម ក្នុងពេលបន្តិចទៀត។

កិច្ចប្រជុំគណៈកម្មាធិការអចិន្ត្រៃយ៍ព្រឹទ្ធសភាសម្រេចបញ្ជូនសេចក្តីព្រាងច្បាប់ចំនួន៥សំណើររបស់រដ្ឋសភាឱ្យគណៈកម្មការកិច្ចការជំនាញពិនិត្យសិក្សា និងផ្តល់យោបល់

នៅព្រឹកថ្ងៃទី២១ ខែតុលា ឆ្នាំ២០២៥ វេលាម៉ោង ៨:៣០នាទី សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានអញ្ជើញជាអធិបតីភាពដ៏ខ្ពង់ខ្ពស់ក្នុងកិច្ចប្រជុំគណៈកម្មាធិការអចិន្ត្រៃយ៍ព្រឹទ្ធសភា នីតិកាលទី៥ ដើម្បីពិនិត្យសម្រេចលើរបៀបវារៈចំនួន៦។របៀបវារៈទាំង ៦ រួមមាន៖១-ពិនិត្យសំណើរបស់រដ្ឋសភា សុំពិនិត្យហើយឱ្យយោបល់លើសេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀង ស្តីពីក្របខ័ណ្ឌបទប្បញ្ញត្តិសុវត្ថិភាពម្ហូបអាហារអាស៊ាន។២-ពិនិត្យសំណើរបស់រដ្ឋសភា សុំពិនិត្យហើយឱ្យយោបល់លើសេចក្តីព្រាងច្បាប់ស្តីពី ការអនុម័តយល់ព្រមលើពិធីសារធ្វើវិសោធនកម្មកិច្ចព្រមព្រៀងអាស៊ាន ស្តីពីបម្លាស់ទីរូបវន្តបុគ្គល។៣-ពិនិត្យសំណើរបស់រដ្ឋសភា សុំពិនិត្យហើយឱ្យយោបល់លើសេចក្តីព្រាងច្បាប់ស្តីពី ការអនុម័តយល់ព្រមលើពិធីសារទីមួយ ធ្វើវិសោធនកម្មកិច្ចព្រមព្រៀងពាណិជ្ជកម្មសេរីអាស៊ាន-ហុងកុងនៃសាធារណរដ្ឋប្រជាមានិតចិន។៤-ពិនិត្យសំណើរបស់រដ្ឋសភា សុំពិនិត្យហើយឱ្យយោបល់លើសេចក្តីព្រាងច្បាប់ស្តីពីការអនុម័តយល់ព្រមលើពិធីសារទីពីរ ធ្វើវិសោធនកម្មកិច្ចព្រមព្រៀងបង្កើតតំបន់ ពាណិជ្ជកម្មសេរីអាស៊ាន-អូស្ត្រាលី-នូវែលសេឡង់។៥-ពិនិត្យសំណើរបស់រដ្ឋសភា សុំពិនិត្យហើយឱ្យយោបល់លើសេចក្តីព្រាងច្បាប់ស្តីពីការអនុម័តយល់ព្រមលើអនុសញ្ញា ស្តីពីការបង្កើតអង្គការអន្តរជាតិសម្រាប់សន្ធានកម្ម។៦-ផ្សេងៗ។បន្ទាប់ពីបានពិនិត្យ និងពិភាក្សារួចមក គណៈកម្មាធិការអចិន្ត្រៃយ៍ព្រឹទ្ធសភាបានសម្រេចបញ្ជូនសេចក្តីព្រាងច្បាប់ទាំង៥ខាងលើ ទៅឱ្យគណៈកម្មការកិច្ចការបរទេស សហប្រតិបត្តិការ អន្តរជាតិ និងព័ត៌មាន និងគណៈកម្មការសាធារណការ ដឹកជញ្ជូន អាកាសចរណ៍ស៊ីវិល ប្រៃសណីយ៍ទូរគមនាគមន៍ ឧស្សាហកម្ម វិទ្យាសាស្ត្រ បច្ចេកវិទ្យា នវានុវត្តន៍ រ៉ែថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ នៃព្រឹទ្ធសភា ដើម្បីពិនិត្យសិក្សា និងផ្តល់យោបល់៕

គណៈកម្មការរៀបចំការប្រឡងប្រជែង ប្រជុំពិនិត្យវឌ្ឍនភាពការងារដំណើរការឆ្ពោះទៅកាន់ការប្រឡងប្រជែងជ្រើសរើស «គ្រូបង្រៀនផ្អែកលើកិច្ចព្រមព្រៀងការងារ»

ដូចសព្វមួយដង មុនដំណើរការប្រឡងប្រជែងជ្រើសរើសមន្រ្តីរាជការ និងមន្រ្តីផ្អែកលើកិច្ចព្រមព្រៀងការងារ ឱ្យចូលបម្រើការងារនៅតាមក្រសួង ស្ថាប័ននានា គណៈកម្មការរៀបចំការប្រឡងប្រជែង ព្រមទាំងក្រសួង ស្ថាប័នពាក់ព័ន្ធ បានជួបជុំគ្នាដើម្បីពិនិត្យ និងពិភាក្សាលើវឌ្ឍនភាពការងារនៃដំណើរការឆ្ពោះទៅកាន់ការប្រឡងប្រជែង។ ជាក់ស្តែង នារសៀលថ្ងៃទី២០ ខែតុលា ឆ្នាំ២០២៥ នេះ ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ និងជាប្រធានគណៈកម្មការរៀបចំការប្រឡងប្រជែង បានដឹកនាំកិច្ចប្រជុំពិនិត្យនិងពិភាក្សាលើវឌ្ឍនភាពការងារនៃដំណើរការឆ្ពោះទៅកាន់ការប្រឡងប្រជែងជ្រើសរើស «គ្រូបង្រៀនផ្អែកលើកិច្ចព្រមព្រៀងការងារ» ឱ្យចូលបម្រើការងារនៅតាមគ្រឹះស្ថានបឋមសិក្សាសាធារណៈ ដែលនឹងប្រព្រឹត្តទៅនាថ្ងៃទី២៥ ខែតុលា ឆ្នាំ២០២៥ ខាងមុខនេះ។កិច្ចប្រជុំនេះ ទទួលបានការទទួលបានការអញ្ជើញចូលរួមពីថ្នាក់ដឹកនាំ និងមន្រ្តីបច្ចេកទេស តំណាងក្រសួងអប់រំ យុវជន និងកីឡា តំណាងក្រសួងសេដ្ឋកិច្ច និងហិរញ្ញវត្ថុ តំណាងអង្គភាពប្រឆាំងអំពើពុករលួយ ព្រមទាំង ប្រធាន អនុប្រធាន អនុគណៈកម្មការនានានៃគណៈកម្មការរៀបចំការប្រឡងប្រជែង ជាច្រើនរូប។ គណៈកម្មការនឹងរៀបចំការប្រឡងប្រជែងជ្រើសរើស «គ្រូបង្រៀនផ្អែកលើកិច្ចព្រមព្រៀងការងារ» ចំនួន ៣,២១៣កន្លែង ឱ្យចូលបម្រើការងារនៅតាមគ្រឹះស្ថានបឋមសិក្សាសាធារណៈ ស្ថិតក្នុងភូមិសាស្រ្តរដ្ឋបាលខេត្តចំនួន០៥ រួមមាន៖ (១)ខេត្តព្រៃវែង ចំនួន ៩៣៥កន្លែង (២)ខេត្តត្បូងឃ្មុំ ចំនួន ៦៣៨កន្លែង(៣)ខេត្តកំពង់ចាម ចំនួន ៥៦០កន្លែង(៤)ខេត្តបាត់ដំបង ចំនួន ៦៤៧កន្លែង(៥)ខេត្តតាកែវ ចំនួន ៤៣៣កន្លែង។សូមជម្រាបដែរថា សម្រាប់រាជរដ្ឋាភិបាលនីតិកាលទី៧ នៃរដ្ឋសភា គណៈកម្មការរៀបចំការប្រឡងប្រជែងក្រសួងមុខងារសាធារណៈ បានរៀបចំការប្រឡងប្រជែងជ្រើសរើសមន្រ្តី និងមន្រ្តីផ្អែកលើកិច្ចព្រមព្រៀងការងារ ជូនក្រសួងអប់រំ យុវជន និងកីឡា បានចំនួន ០៤លើក រួចមកហើយ៖ ទី១.ជ្រើសរើសគ្រូកីឡា, ទី២.ជ្រើសរើសគ្រូបង្រៀនបឋមសិក្សា, ទី៣.ជ្រើសរើសគ្រូបង្រៀនអនុវិទ្យាល័យ, ទី៤.ជ្រើសរើសគ្រូបង្រៀនវិទ្យាល័យ។ ទន្ទឹមនេះ ចំពោះការប្រឡងប្រជែងជ្រើសរើសលើកទី៥នេះ គឺជាការជ្រើសរើស «គ្រូបង្រៀនផ្អែកលើកិច្ចព្រមព្រៀងការងារ» ឱ្យចូលបម្រើការងារនៅតាមគ្រឹះស្ថានបឋមសិក្សាសាធារណៈ។

គណៈកម្មការចម្រុះព្រំដែនគោក កម្ពុជា-ថៃ (JBC) បានឯកភាពគ្នាជាគោលការណ៍ក្នុងការកំណត់កាលបរិច្ឆេទនៃកិច្ចប្រជុំពិសេស JBC នៅថ្ងៃទី២១ និង ២២ ខែតុលា ឆ្នាំ២០២៥ ដែលភាគីថៃធ្វើជាម្ចាស់ផ្ទះ

កិច្ចប្រជុំពិសេសគណៈកម្មការចម្រុះព្រំដែនគោកកម្ពុជាថៃ (JBC) នេះ ធ្វើឡើងដើម្បីបន្តជជែកពិភាក្សានិងជំរុញការងារខណ្ឌសីមា និងបោះបង្គោលព្រំដែនគោករវាង ប្រទេសកម្ពុជានិងថៃ ដែលភាគីទាំងពីរឯកភាពគ្នានៅក្នុងកិច្ចប្រជុំគណៈកម្មការចម្រុះព្រំដែនគោកកម្ពុជាថៃលើកទី៦ ដែលបានប្រព្រឹត្តទៅកាលពីថ្ងៃទី១៤ និង១៥ ខែមិថុនា ឆ្នាំ២០២៥ កន្លងទៅនៅរាជធានីភ្នំពេញ ដែលកម្ពុជាធ្វើជាម្ចាស់ផ្ទះ។ ដំណើរការនៃកិច្ចប្រជុំJBC ដែលចាប់ផ្តើមនៅថ្ងៃទី ២១ ខែតុលា ឆ្នាំ២០២៥ នឹងរៀបចំឡើងនៅ សណ្ឋគារ Maneechan Resort Chanthaburi ប្រទេសថៃ។ យោងតាមរបៀបវារៈ កិច្ចប្រជុំនឹងចាប់ផ្តើមនៅម៉ោង១១ និង ៣០នាទីព្រឹក បន្តរហូតដល់ម៉ោង៦ល្ងាច ដែលចន្លោះម៉ោងនេះ ភាគីទាំង២ ក៏មានពេលវេលាសម្រាកខ្លះ ផងដែរ។ ដោយឡែកនៅថ្ងៃឺទី ២២ ខែតុលា ឆ្នាំ២០២៥ គណៈប្រតិភូពីកម្ពុជា ក៏នឹងធ្វើដំណើរច្រកអន្តរជាតិព្រំនៃខេត្តប៉ៃលិន ឆ្ពោះទៅកាន់Maneechan Resort Chanthaburi ប្រទេសថៃ ដើម្បីបន្តកិច្ចប្រជុំនៅម៉ោង ៩និង ៣០នាទី រហូតដល់ម៉ោង ៦ល្ងាចជាពិធីបិទកិច្ចប្រជុំពិសេស JBC។

សម្ដេចតេជោ ប្រាប់ឲ្យបុគ្គលឈ្មោះ Ko1 និងបក្សពួកបញ្ឈប់សកម្មភាពបែបឆ្កួតៗដុតទំនិញថៃជាបន្ទាន់ និងចូលរួមពង្រឹងតម្លៃសីលធម៌ សុជីវធម៌ គុណធម៌និងភាពថ្លៃថ្នូររបស់ជាតិ

សម្ដេចតេជោ ហ៊ុន សែន ប្រធានព្រឹទ្ធសភាកម្ពុជានៅយប់ថ្ងៃទី២០ ខែតុលានេះ បានប្រាប់ឲ្យបុគ្គលឈ្មោះ Ko1 និងបក្សពួកបញ្ឈប់សកម្មភាពបែបឆ្កួតៗដុតទំនិញថៃជាបន្ទាន់ និងចូលរួមពង្រឹងតម្លៃសិលធម៌ សុជីវធម៌ គុណធម៌និងភាពថ្លៃថ្នូររបស់ជាតិ។សម្ដេចតេជោ បានសរសេរថា ទើបបានមើលវីដេអូមានរយៈពេលជាង៨នាទីរបស់ក្រុមដែលដឹកនាំដោយលោកKO1ទាក់ទងដល់ការធ្វើពហិការឈប់ប្រើប្រាស់ទំនិញថៃ។សម្ដេចតេជោ បានបង្ហាញការការខកចិត្តចំពោះអំពើមិនគប្បីរបស់បងប្អូនទាំងនេះពិសេសសម្រាប់លោកKO1តែម្តង។ ការដុតចោលទំនិញថៃ ការដាក់បណ្តាសាចំពោះអ្នកលក់ទំនិញថៃដែលនៅសេសសល់លក់មិនទាន់អស់គឺជាអំពើទៅហួសពីស្នេហាជាតិនិងជារបៀបក្រុមនិយមជ្រុលហួសហេតុ។សម្ដេចតេជោ បានបង្ហាញ ប្រជាជនកម្ពុជាច្រើនណាស់ដែលធ្វើពហិការមិនប្រើប្រាស់ទំនិញថៃមានស្ទើរតែ៩៩ភាគរយទៅហើយមិនថាប្រជាជននៅក្នុងប្រទេសឬបងប្អូនខ្មែរនៅក្រៅប្រទេសនោះទេ។ ចំណោទបញ្ហានៅត្រង់អាជីវកលក់ដូរដែលមានទំនិញថៃនៅសល់តើឲ្យពួកគាត់យកទៅណា? ដុតបំផ្លាញចោលឬបន្តលក់ដើម្បីប្រម៉ូលដើមទុនមកវិញ?ប្រសិនបើKo1មានប្រាក់សូមយកទៅទិញទំនិញដែលនៅសេសសល់ទាំងនេះធ្វើជាចំណីសត្វប្រសើរជាងដុតចោលដូចKo1បានធ្វើដែលមានក្នុងវីដេអូនេះ។បើមនុស្សមិនទទួលទាន ទុកឲ្យសត្វសុីប្រសើរជាងដុតឬកំទេចចោល។សម្ដេចតេជោថ្លែងថា ខ្ញុំសូមឲ្យKo1បញ្ឈប់សកម្មភាពបែបឆ្កួតៗនេះជាបន្ទាន់និងចូលរួមពង្រឹងតម្លៃសិលធម៌ សុជីវធម៌ គុណធម៌និងភាពថ្លៃថ្នូររបស់ជាតិ៕

កម្ពុជា-ថៃ ត្រៀម កិច្ចប្រជុំពិសេសលើកទី២ GBC នៅសប្តាហ៍នេះ ដើម្បីជំរុញស្ថិរភាពរវិលរកប្រក្រតីភាព

កម្ពុជា-ថៃ ត្រៀមរៀបចំ កិច្ចប្រជុំពិសេសលើកទី២ នៃគណៈកម្មាធិការព្រំដែនទូទៅកម្ពុជា-ថៃ (GBC) ដែលនឹងប្រព្រឹត្តនៅថ្ងៃទី២៣ ខែតុលា ឆ្នាំ២០២៥ ខាងមុខនេះ ដើម្បីជំរុញបន្ថែមការអនុវត្តបទឈប់បាញ់ឱ្យបានពេញលេញ និងប្រកបដោយប្រសិទ្ធភាព ព្រមទាំងស្វែងរកកិច្ចសហប្រតិបត្តិការជាក់ស្តែងសំដៅលើកកម្ពស់សន្តិភាព និងស្ថិរភាពរវាងប្រទេសទាំងពីរ ក៏ដូចជាការវិលត្រឡប់ទៅរកប្រក្រតីភាពឡើងវិញ។ពីទីក្រុងកូឡាឡាំពួរ ប្រទេសម៉ាឡេស៊ី លោកជំទាវ ឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ នៃព្រះរាជាណាចក្រកម្ពុជា នៅ រាត្រីថ្ងៃទី២០ ខែតុលា ឆ្នាំ២០២៥ បានឱ្យដឹងថា កិច្ចប្រជុំក្រុមលេខាធិការដ្ឋាននៃ គណៈកម្មាធិការព្រំដែនទូទៅកម្ពុជា-ថៃ (GBC) បានចាប់ផ្តើមកិច្ចប្រជុំហើយ នាវេលាម៉ោង ១៨:០០នាទី នៅទីក្រុងកូឡាឡាំពួ ប្រទេសម៉ាឡេស៊ី។ នៅក្នុងកិច្ចប្រជុំនេះ ភាគីទាំងពីរបានធ្វើការពិភាក្សានូវខ្លឹមសារ និងធ្វើការផ្លាស់ប្តូរឯកសារគ្នាទៅវិញទៅមក ដើម្បីត្រៀមរៀបចំ កិច្ចប្រជុំពិសេសលើកទី២ នៃគណៈកម្មាធិការព្រំដែនទូទៅកម្ពុជា-ថៃ (GBC) ដែលនឹងប្រព្រឹត្តនៅថ្ងៃទី២៣ ខែតុលា ឆ្នាំ២០២៥ ខាងមុខនេះ ដើម្បីជំរុញបន្ថែមការអនុវត្តបទឈប់បាញ់ឱ្យបានពេញលេញ និងប្រកបដោយប្រសិទ្ធភាព ព្រមទាំងស្វែងរកកិច្ចសហប្រតិបត្តិការជាក់ស្តែងសំដៅលើកកម្ពស់សន្តិភាព និងស្ថិរភាពរវាងប្រទេសទាំងពីរ ក៏ដូចជាការវិលត្រឡប់ទៅរកប្រក្រតីភាពឡើងវិញ។ គណៈប្រតិភូក្រុមលេខាធិការរបស់កម្ពុជា ដឹកនាំដោយ ឧត្តមសេនីយ៍ទោ ញ៉ែម បូរ៉ាដែន ប្រធានក្រុមលេខាធិការ (GBC) កម្ពុជា និងគណៈប្រតិភូក្រុមលេខាធិការរបស់ថៃ ដឹកនាំដោយ ឧត្តមសេនីយ៍ ឯក ណាត់ថាផុង ប្រាវកែវ ប្រធានក្រុមលេខាធិការ (GBC ) ថៃ។ សូមគូសបញ្ជាក់ផងដែរថា កិច្ចប្រជុំក្រុមលេខាធិការដ្ឋាននៃ គណៈកម្មាធិការព្រំដែនទូទៅកម្ពុជា-ថៃ (GBC) នឹងប្រព្រឹត្តទៅចាប់ពីថ្ងៃទី២០ ដល់ថ្ងៃទី២២ ខែតុលា ឆ្នាំ២០២៥ ក្រោមការសង្កេតការណ៍ពីប្រធានក្រុមអ្នកសង្កេតការណ៍អន្តរកាល (IOT) របស់កម្ពុជា និងថៃ តំណាងការិយាល័យអនុព័ន្ធយោធាអាមេរិកប្រចាំនៅប្រទេសកម្ពុជា ប្រទេសថៃ និងប្រទេសម៉ាឡេស៊ី រួមទាំងតំណាងភាគីម៉ាឡេស៊ីចូលរួមផងដែរ៕

កម្មវិធីជជែកលើវិថីទេសចរណ៍ ចូលរួមចំណែកជំរុញយុទ្ធនាការទស្សនាកម្ពុជា និងស្រឡាញ់ជាតិ

ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងលោកជំទាវ នាចុងសប្ដាហ៍នេះ បានអញ្ជើញជាអធិបតីក្នុង ពិធីជជែកលើវិថីទេសចរណ៍ ក្រោមប្រធានបទ “សិល្បៈជាជ្រុងមួយនៃទេសចរណ៍” និង “ទេសចរណ៍សម័យបច្ចេកវិទ្យា” ជាកម្មវិធីកម្សាន្តថ្មីមួយដែលនឹងផ្ដល់នូវអត្ថប្រយោជន៍ជាច្រើនក្នុងវិស័យទេសចរណ៍មានជាអាទិ៍ ការចូលរួមចំណែកក្នុងយុទ្ធនាការជំរុញយុទ្ធនាការទស្សនាកម្ពុជានៅរដូវកាលបៃតង, ការផ្សព្វផ្សាយអំពីសក្តានុពលទេសចរណ៍កម្ពុជា ការបំផុសស្មារតីសេ្នហាជាតិ ស្រឡាញ់មាតុភូមិ ចូលរួមអភិរក្សសម្បត្តិបេតិកភណ្ឌរូបិយ និងអរូបិយ សម្បត្តិធម្មជាតិ មរតកវប្បធម៌ប្រវត្តិសាស្ត្រ សិល្បៈ ជាពិសេសលើកកម្ពស់កិត្តិនាមកម្ពុជានៅលើឆាកអន្តរជាតិ។ក្នុងពិធីដ៏អធិកអធមនាពេលនោះ មានការអញ្ជើញចូលរួមពីឯកឧត្ដម លោកជំទាវថ្នាក់ដឹកនាំក្រសួងទេសចរណ៍, អ្នកឧកញ៉ា ឧកញ៉ា លោក លោកស្រីតំណាង ដៃគូសហការឧបត្ថម្ភ, វាគ្មិនកិត្តិយស, លោកសាស្ត្រាចារ្យ, សិល្បៈករ សិល្បៈការិនី, អ្នកផលិតមាតិកាព័ត៌មាន, Influencers, KOLs ព្រមទាំងបងប្អូន អ៊ំ ពូ មីង ភ្ញៀវកិត្តិយសជាតិ និងអន្តរជាតិយ៉ាងច្រើនកុះករ។ឆ្លៀតក្នុងឱកាសនេះ ឯកឧត្តមរដ្ឋមន្ត្រី បានគូសបញ្ជាក់ថា យើងទាំងអស់គ្នាអាចជួបជុំគ្នា រៀបចំកម្មវិធីសប្បាយរីករាយដូចថ្ងៃនេះគឺ ដោយសារប្រទេសយើងស្ថិតនៅក្នុងម្លប់ដ៏ត្រជាក់នៃសន្តិភាពពេញលេញ ស្ថិរភាពនយោបាយ សន្តិសុខសណ្តាប់ធ្នាប់សាធារណៈមានភាពរឹងមាំ ស្ថិរភាពម៉ាក្រូសេដ្ឋកិច្ច និងសុខដុមនីយកម្មនៅក្នុងសង្គម បានកើតឡើងក្រោមការដឹកនាំប្រកបដោយគតិបណ្ឌិត និងចក្ខុវិស័យវែងឆ្ងាយរបស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភានៃព្រះរាជាណាចក្រកម្ពុជា បន្តមកដល់រាជរដ្ឋាភិបាលនីតិកាលទី៧ នៃរដ្ឋសភា ក្រោមការដឹកនាំពោរពេញដោយថាមពល និងសន្ទុះនៃការបំពេញបេសកកម្មប្រកបដោយស្វាហាប់របស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។ជាក់ស្តែង ឯកឧត្តមរដ្ឋមន្ត្រី ក៏បានគូសបញ្ជាក់បន្ថែមថា កម្មវិធីជជែកលើវិថីទេសចរណ៍ នេះ បានឆ្លុះបញ្ចាំងយ៉ាងច្បាស់ពីឆន្ទៈចូលរួម គំនិតផ្តួចផ្តើម ស្មារតីរួបរួមគាំទ្រពីគ្រប់ភាគីពាក់ព័ន្ធទាំងផ្នែករដ្ឋ ឯកជន ប្រជាជន និងដៃគូសហការនានាបានរួបរួមគ្នាបង្កើតព្រឹត្តិការណ៍ដ៏មានសារៈសំខាន់នេះឡើង។ទន្ទឹមនឹងនេះ ឯកឧត្តមរដ្ឋមន្ត្រី បានអំពាវនាវដល់ភ្ញៀវទេសចរជាតិ និងអន្តរជាតិ សូមអញ្ជើញមកដើរកម្សាន្តនៅផ្លូវថ្មើរជើងចតុមុខ (Walk Street) ក៏ដូចជាគោលដៅទេសចរណ៍នានា ឱ្យបានច្រើនកុះករ និងដើរកម្សាន្តប្រកបដោយទំនុកចិត្ត កម្ពុជាជាគោលដៅទេសចរណ៍ដែលមានសុវត្ថិភាព មានការទទួលស្វាគមន៍រាក់ទាក់កក់ក្ដៅ ព្រមជាមួយនឹងសក្ដានុពលទេសចរណ៍សម្បូរបែប, គួបផ្សំនឹងវប្បធម៌ ប្រពៃណី ទំនៀមទំលាប់ដ៏យូរលង់, ម្ហូបអាហារឆ្ងាញ់ពិសារ និងភាពរួសរាយរាក់ទាក់របស់ប្រជាជនកម្ពុជា ដែលត្រូវបានទទួលស្គាល់ថាជា «ស្នាមញញឹមកម្ពុជា» ភាពស្លូតបូត និងការស្រលាញ់រាប់អានរបស់ប្រជាជនកម្ពុជាគ្រប់ៗគ្នា៕

ក្រសួងពាណិជ្ជកម្ម ស្ដាប់បញ្ហាប្រឈម សំណូមពររបស់វិស័យជន ដើម្បីជំរុញការផលិតក្នុងស្រុក

ក្រសួងពាណិជ្ជកម្ម ពិភាក្សាការងារជាមួយតំណាងសមាគមអ្នកផលិតចំណីអាហារកម្ពុជាស្ដាប់បញ្ហាប្រឈម សំណូមពរផ្សេងៗរបស់វិស័យជន ដើម្បីចូលរួមជំរុញការផលិតកែច្នៃផលិតផលក្នុងស្រុក។នាព្រឹកថ្ងៃចន្ទ ទី២០ ខែតុលា ឆ្នាំ២០២៥ នៅទីស្ដីការក្រសួងពាណិជ្ជកម្ម ឯកឧត្តម បួន សារៈមុនី រដ្ឋលេខាធិការក្រសួងពាណិជ្ជកម្ម បានដឹកនាំកិច្ចប្រជុំពិភាក្សាការងារជាមួយតំណាងសមាគមអ្នកផលិតចំណីអាហារកម្ពុជា តំណាងសហគ្រាសធុនតូច និងមធ្យម ក្នុងគោលបំណងទទួលស្ដាប់បញ្ហាប្រឈម សំណូមពរផ្សេងៗរបស់វិស័យជន។កិច្ចប្រជុំពិភាក្សានេះ ក៏ដើម្បីចូលរួមជំរុញការផលិតកែច្នៃផលិតផលក្នុងស្រុក ក៏ដូចជាកាត់បន្ថយអនុលោមភាពមិនចាំបាច់នានា ព្រមទាំងជម្រាបជូនអំពីការរៀបចំវេទិកាផ្គូផ្គងរវាងអ្នកផលិតជាមួយផ្សារទំនើប និងម៉ាតនៅកម្ពុជា សំដៅជម្រុញការលើកកម្ពស់ផលិតផលខ្មែរ៕

ផ្លូវជនបទ១ខ្សែក្នុងស្រុកសំឡូត បាននិងកំពុងសម្រួលដល់ការដឹកជញ្ជូនកសិផល ខណៈស្រុកនេះជាស្រុកកសិកម្ម

បាត់ដំបង ៖ ផ្លូវជនបទក្រាលកៅស៊ូពីរជាន់ (DBST) ចំនួន១ខ្សែ ប្រវែង៤ ពាន់ម៉ែត្រ នៅស្រុកសំឡូត ស្ថិតក្រោមក្របខណ្ឌក្រសួងអភិវឌ្ឍន៍ ជនបទ បានកំពុងស្ថាបនា ដើម្បីសម្រួលដល់ការរស់នៅ ការផ្តល់សេវាសាធារណៈ ជាពិសេសការដឹកជញ្ជូន កសិផលផ្សេងៗ ខណៈស្រុកមួយនេះគឺជាស្រុកអភិវឌ្ឍន៍វិស័យកសិកម្ម។ឯកឧត្តម ជី ស៊ីថា រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ លើកឡើងនៅ ក្នុងការត្រួតពិនិត្យ វាយតម្លៃ លើការងារលើកកម្រិតគុណភាពផ្លូវក្រាលកៅស៊ូពីរជាន់ (DBST) ចំនួន១ខ្សែ ប្រវែង ៤ ពាន់ម៉ែត្រ, ទទឹង ៦ម៉ែត្រ ស្ថិតនៅភូមិអូររាំងខេន ឃុំស៊ុង ទៅភូមិអន្លង់ពួក ឃុំតាសាញ ស្រុកសំឡូត ខេត្តបាត់ដំបង នៅថ្ងៃទី២០ ខែតុលា ឆ្នាំ២០២៥ នេះថា ជុំវិញការស្ថាបនាផ្លូវនៅតាមជនបទ រាជរដ្ឋាភិបាលបានផ្តោតយកចិត្តទុកដាក់យ៉ាងខ្លាំង ដោយបានជំរុញការអភិវឌ្ឍន៍នៅតាម មូលដ្ឋានទូទាំងប្រទេស និងប្រទាក់ក្រឡាគ្នា ជាពិសេសការប្រែក្លាយពីផ្លូវក្រាលក្រួស ទៅជាផ្លូវក្រាលកៅស៊ូ DBST និង ផ្លូវក្រាលបេតុងជាដើម។ជុំវិញគម្រោងផ្លូវខាងលើនេះ, ឯកឧត្តមរដ្ឋលេខាធិការ បានឯកភាព និងវាយតម្លៃខ្ពស់ដល់នាយកដ្ឋានស្ថាបនា និងវិស្វកម្ម នៃអគ្គនាយកដ្ឋានភស្តុភារនិងហិរញ្ញវត្ថុ ក្រសួងមហាផ្ទៃ ចំពោះការយកចិត្តទុកដាក់លើការងារលើកកម្រិតគុណភាពផ្លូវក្រាលកៅស៊ូពីរ ជាន់ (DBST) និងសូមជំរុញការស្ថាបនាផ្លូវនេះឲ្យបានចប់ទៅតាមផែនការ ឬបានមុនផែនការ ព្រោះផ្លូវជាសរសៃរឈាមនៃសេដ្ឋកិច្ច មិនថាផ្លូវនៅតាមជនបទ ទីប្រជុំជន ឬនៅទីក្រុងឡើយ ដែលបញ្ហានេះ រាជរដ្ឋាភិបាលក្នុងមួយឆ្នាំៗបានវិនិយោគអស់ទឹកប្រាក់ដ៏ច្រើនសន្ធឹកសន្ធាប់ ក្នុងគោលដៅសម្រួលដល់គមនាគមន៍ជនបទ និងការផ្តល់សេវាសាធារណៈផ្សេងៗជូនប្រជាជនគ្រប់ទិសទីនៅទូទាំងប្រទេស និងជា ការរួមចំណែកលើកកម្ពស់ជីវភាពរស់នៅរបស់ប្រជាពលរដ្ឋផងដែរ។ឯកឧត្តមរដ្ឋលេខាធិការ បន្ថែមថា ជាក់ស្តែងការស្ថាបនាផ្លូវខាងលើនេះ ពិតជាមានសារៈសំខាន់ណាស់ សម្រាប់បងប្អូនប្រជា- ពលរដ្ឋដែលរស់នៅក្នុងមូលដ្ឋានខាងលើនេះផ្ទាល់ តាមរយៈការដឹកជញ្ជូនសម្ភារៈទៅកាន់ចម្ការ ឬដឹកជញ្ជូនកសិផលមកលំនៅឋាន ក៏ដូចទៅកាន់ទីផ្សារជាដើម ព្រោះនៅក្នុងស្រុកសំឡូត ខេត្តបាត់ដំបងនេះ គឺជាស្រុកមួយដែលប្រជាពលរដ្ឋភាគច្រើនធ្វើចម្ការ និងមាន ការលក់ដូរមានបន្ទាប់បន្សុំ។ ដូច្នេះតាមរយៈការងារលើកកម្រិតគុណភាពផ្លូវនេះ គឺជាការចាំបាច់ដើម្បីឆ្លើយតបទៅនិងតម្រូវការជាក់ ស្តែងនៅមូលដ្ឋាន និងក៏ជាការចូលរួមចំណែកជាមួយរាជរដ្ឋាភិបាល លើកកម្ពស់គុណភាព និងគុណតម្លៃនៃការរស់នៅរបស់ប្រជាជន ប្រកបដោយបរិយាបន្ន ទាំងផ្នែកសេដ្ឋកិច្ច សង្គមកិច្ច និងវប្បធម៌៕អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

នាយករដ្ឋមន្ត្រីអេស្ប៉ាញ ហៅអតុល្យភាពពាណិជ្ជកម្មរបស់ចិនជាមួយ EUថា «មិននាំមកនូវវឌ្ឍនភាពទេ »

លោក TRUMP និយាយថា អាមេរិកនឹងពិនិត្យឡើងវិញយ៉ាងហ្មត់ចត់នូវគោលនយោបាយរបស់ខ្លួន នៅក្នុងណាតូ

ស្វ៊ីសត្រៀមខ្លួនរួចជាស្រេច ដើម្បីធ្វើជាអ្នកសម្របសម្រួលរវាងអាមេរិក និងអ៊ីរ៉ង់ បន្ទាប់ពីកិច្ចចរចានៅប៉ាគីស្ថាន

នាយករដ្ឋមន្ត្រីលីបង់និយាយថា លោកកំពុងធ្វើការ ដើម្បីសម្រេចបាននូវការដកកងទ័ពអ៊ីស្រាអែល

មនុស្ស ២៤ នាក់ ត្រូវបានចាប់ខ្លួននៅគូវ៉ែតពីបទ «ផ្តល់ហិរញ្ញប្បទានដល់ភេរវកម្ម»

រដ្ឋមន្ត្រីការពារជាតិអ៊ីស្រាអែល៖ ប្រតិបត្តិការរុះរើ កំពុងដំណើរការតាមបណ្តោយព្រំដែនអ៊ីស្រាអែល-លីបង់

ប្រធានាធិបតីគុយបាព្រមានអាមេរិកកុំឲ្យវាយប្រហារកោះនេះ ឬព្យាយាមទម្លាក់លោកពីតំណែង

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877