BTV NEWS

ហ៊ុន ចាន់ បញ្ញាបុត្រ ចៅសម្តេចតេជោ ហ៊ុន សែន និស្សិតខ្មែរទី២ បញ្ចប់ការសិក្សាពីរាជបណ្ឌិតសភាយោធាសាន់ហឺស ក្នុងប្រទេសអង់គ្លេស

នាវាទេសចរណ៍ខ្នាតយក្ស VIKING VENUS នាំភ្ញៀវបរទេសជិត ៩០០ នាក់ ចូលចតនៅកំពង់ផែស្វយ័តក្រុងព្រះសីហនុ

ភ្ញៀវបរទេស ចាប់អារម្មណ៍ខ្លាំងចំពោះដំណើរកម្សាន្តនៅកម្ពុជា អំឡុងពិធីបុណ្យចូលឆ្នាំថ្មី

ក្រុមហ៊ុន CCCC បង្ហាញបំណងពង្រីកការវិនិយោគបន្ថែមនៅកម្ពុជា

ព័ត៌មានជាតិ

បងប្អូនពលករ! កុំភ្លេចចូលរួមពិព័រណ៍ការងារនៅខេត្តសៀមរាប នាចុងសប្ដាហ៍នេះ ដើម្បីទទួលបានឱកាសការងារធ្វើភ្លាមៗ

ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ នឹងបន្តរៀបចំពិព័រណ៍ការងារ សន្តិសុខសង្គម និងបណ្តុះបណ្តាលវិជ្ជាជីវៈ នៅខេត្តសៀមរាប នាចុងសប្ដាហ៍នេះ ដោយនាំយកឱកាសការងាររាប់ម៉ឺនកន្លែង ជូនបងប្អូនពលករត្រឡប់មកពីថៃ និងយុវជនដែលកំពុងស្វែងរកការងារធ្វើ។ នេះបើតាមការឱ្យដឹងពីលោក ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ។ លោក ស៊ុន មេសា បានឱ្យដឹងបន្តថា ពិព័រណ៍ការងារ សន្តិសុខសង្គម និងបណ្តុះបណ្តាលវិជ្ជាជីវៈ នៅខេត្តសៀមរាបនេះ នឹងត្រូវធ្វើឡើងរយៈពេល ៣ថ្ងៃ គឺនៅថ្ងៃទី ១៧ ខែតុលា រៀបចំនៅសាលាស្រុកអង្គរជុំ, ថ្ងៃទី ១៨ ខែតុលា នៅវិទ្យាល័យក្រឡាញ់ ស្រុកក្រឡាញ់ និងនៅថ្ងៃទី ១៩ ខែតុលា នៅមុខផ្សារកំពង់ក្តី ស្រុកជីក្រែង។ អ្នកនាំពាក្យក្រសួងការងារ បានឱ្យដឹងបន្ថែមថា នៅក្នុងពិព័រណ៍នេះ បងប្អូនពលករ ក៏ដូចជាយុវជនអាចដាក់ពាក្យ និងអាចសម្ភាសន៍ការងារភ្លាមៗ ហើយក៏អាចចុះឈ្មោះចូលរៀនជំនាញដែលស័ក្តិសម សម្រាប់បងប្អូនចំនួន ១២ជំនាញ ដោយឥតគិតថ្លៃ ហើយក៏ទទួលបាននូវព័ត៌មានអំពីអត្ថប្រយោជន៍ ប.ស.ស. នៅពេលចូលធ្វើការងារ ដែលរួមមាន៖ អត្ថប្រយោជន៍ហានិភ័យការងារ, ថែទាំសុខភាព និងប្រាក់សោធន។ សម្រាប់ពិព័រណ៍នៅខេត្តសៀមរាបនេះ លោក ស៊ុន មេសា បានអំពាវនាវដល់បងប្អូនពលករខ្មែរត្រឡប់មកពីថៃ ក៏ដូចជាយុវជនដែលមិនទាន់ទទួលបានការងារធ្វើ សូមទៅចូលរួមឱ្យបានគ្រប់ៗគ្នា ដើម្បីទទួលបានឱកាសការងារធ្វើក្នុងស្រុក ដែលមានអត្ថប្រយោជន៍ជាច្រើន។ គួរឱ្យដឹងថា ខេត្តសៀមរាប គឺជាខេត្តទី៣ ហើយ ដែលទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ បានរៀបចំពិព័រណ៍ការងារ សន្តិសុខសង្គម និងបណ្តុះបណ្តាលវិជ្ជាជីវៈ បន្ទាប់ពីខេត្តបាត់ដំបង និងខេត្តបន្ទាយមានជ័យ៕

រដ្ឋមន្ត្រីក្រសួងបរិស្ថាន៖ ចាប់ពីឆ្នាំក្រោយទៅរោងចក្រទាំងអស់ត្រូវតែបំពាក់ឧបករណ៍ស្វ័យត្រួតពិនិត្យតាមដានគុណភាពខ្យល់

ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន ក្នុងឱកាសអញ្ជើញជាអធិបតីបិទយុទ្ធនាការប្រចាំឆ្នាំផ្ទៃមេឃពណ៌ខៀវ និង ការបញ្ចេញឧស្មន័ស្មើសូន្យឆ្នាំ២០៥០ នាថ្ងៃទី១៦ ខែតុលា ឆ្នាំ២០២៥ នៅវិទ្យាស្ថានបច្ចេកវិទ្យាកម្ពុជា បានមានប្រសាសន៍ថា នៅឆ្នាំ២០២៦ រោងចក្រទាំងអស់ត្រូវតែបំពាក់ឧបករណ៍ស្វ័យត្រួតពិនិត្យ តាមដានគុណភាពខ្យល់។ ក្រសួងបរិស្ថាន នឹងធ្វើការសហការជាមួយក្រសួងពាណិជ្ជកម្ម ចាត់វិធានការច្បាប់ ប្រសិនបើក្រុមហ៊ុនណាល្មើសគុណភាពខ្យល់ ឬធ្វើឱ្យខ្យល់របស់យើងមិនស្អាត។ ឯកឧត្តមរដ្ឋមន្រ្តីបានថ្លែងថា អង្គការសហប្រជាជាតិ បានរកឃើញមូលហេតុចម្បងៗ នៃវិស័យចំនួន ៦ រួមមាន វិស័យថាមពល វិស័យឧស្សាហកម្ម វិស័យកសិកម្ម វិស័យព្រៃឈើ វិស័យគីមី និងវិស័យសំរាម ដែលធ្វើឱ្យមានការប្រែប្រួលអាកាសធាតុ និងមានការកើនឡើងកម្តៅផែនដី។ ឯកឧត្តម បានថ្លែងបន្ថែមថា កម្ពុជាបានចូលរួមឆ្លើយតបបញ្ហាការប្រែប្រួលអាកាសធាតុ ស្របតាមគោលនយោបាយយុទ្ធសាស្រ្តរបស់រាជរដ្ឋាភិបាល ក្នុងនោះសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ដែលបានចង្អុលបង្ហាញដល់ក្រសួងបរិស្ថាន ដាក់ចេញយុទ្ធសាស្រ្តចក្រាវិស័យបរិស្ថាន ឆ្នាំ២០២៣-២០២៨ ដែលមានសសរស្តម្ភ ចំនួន៣គឺភាពស្អាត ភាពបៃតង និងចីរភាព។ ភាពស្អាតនៃយុទ្ធសាស្រ្តចក្រាវិស័យបរិស្ថាន បានគ្របដណ្តប់លើវិស័យចំនួន ៥ ខាងលើដែលបង្កឱ្យមាន ឧស្ម័នផ្ទះកញ្ចក់ លើកលែងតែវិស័យព្រៃឈើ។ ឯកឧត្តមបណ្ឌិត អ៊ាង សុផល្លែត បានសង្កត់ធ្ងន់ថា ក្រសួងបរិស្ថានប្តេជ្ញាដោះស្រាយបញ្ហា នៃការប្រែប្រួលអាកាសធាតុលើវិស័យទាំងអស់នេះ ដើម្បីកម្ពុជាឈានឆ្ពោះទៅជាប្រទេសអព្យាក្រឹតកាបូន នៅឆ្នាំ២០៥០។ ជាមួយគ្នានេះ ក្រសួងបរិស្ថានកំពុងរៀបចំ កោះស្រឡៅ នៅក្នុងខេត្តតកោះកុង ជាកោះអាព្យាក្រឹតកាបូន។ ក្រសួងបរិស្ថាន នឹងផ្តល់ជូនប្រជាពលរដ្ឋនៅទីនោះប្រើប្រាស់អំពូលអគ្គិសនីដើរដោយពន្លឺព្រះអាទិត្យ និងរៀបចំដាក់ឧបករណ៍ត្រួតពិនិត្យគុណភាពខ្យល់ ការរៀបចំហេដ្ឋារចនាសម្ព័នគ្រប់គ្រងសំរាម សំណល់ប្លាស្ទិក និងជំរុញការគ្រប់គ្រងធនធានធម្មជាតិ ដាំស្តារព្រៃកោងកាងជាពិសេស។ ក្នុងឱកាសនេះដែរ ឯកឧត្តមរដ្ឋមន្រ្តី បានថ្លែងអំពាវនាវឱ្យមានការចូលរួមក្នុងយុទ្ធនាការ របស់ក្រសួងបរិស្ថាន ដែលបានអនុវត្តកន្លងមក និងរួមគ្នា "យកជំហានឆ្លាតវៃ រួបរួមគ្នា" (take smart, united steps) ឆ្ពោះទៅរកខ្យល់ស្អាត និងការគ្រប់គ្រងសំរាម និងសំណល់រឹងប្រកបដោយចីរភាព។ «ការចូលរួមពីគ្រប់ភាគីពាក់ព័ន្ធទាំងអស់នៅក្នុងសង្គមកម្ពុជា អាចធ្វើឱ្យផ្ទៃមេឃពណ៌ខៀវ និង ប្រែក្លាយកម្ពុជាជាប្រទេសអព្យាក្រឹតកាបូន នៅឆ្នាំ២០៥០។ វាក្លាយជាការពិត មិនមែនត្រឹមតែជាចក្ខុវិស័យ។» មានប្រសាសន៍បន្ថែម ឯកឧត្តមរដ្ឋមន្រ្តីក្រសួងបរិស្ថាន។ សូមបញ្ជាក់ថា ក្រមបរិស្ថាននិងធនធានធម្មជាតិ ត្រង់មាត្រា៣១៦ បានចែងស្តីពីការទទួលខុសត្រូវរបស់ម្ចាស់និងប្រតិបត្តិករ ចំពោះការបញ្ចេញសាធាតុនៃការបំពុលខ្យល់៕

បេក្ខជន និងសកម្មជនគណបក្សភ្លើងទៀនចំនួន៤នាក់នៅស្រុកកណ្តាលស្ទឹង ចូលរួមជីវភាពនយោបាយ ជាមួយគណបក្សប្រជាជនកម្ពុជា

បេក្ខជន និងសកម្មជនគណបក្សភ្លើងទៀននៅស្រុកកណ្តាលស្ទឹង ខេត្តកណ្ដាលចំនួន៤នាក់បានបន្តប្រកាសផ្តាច់ខ្លួនពីបក្សប្រឆាំង និងគោរពស្នើសម្តេចតេជោ ហ៊ុន សែន ប្រធានគណបក្សប្រជា ជនកម្ពុជា សុំចូលរួមជីវភាពនយោបាយជាមួយគណបក្សប្រជាជនកម្ពុជា។លោក វៃ ចាន់តូ, លោក ប៉ែន សំអាត និងលោក ជា សំណាង ជាសមាជិកក្រុមការងារចលនា កសាងសមាជិកគណបក្សប្រជាជនខេត្ត បានឱ្យដឹងនៅថ្ងៃទី១៦ ខែតុលា ឆ្នាំ២០២៥ ថា លោក ស៊ុយ ឆៃលាង ប្រធានក្រុមការងារចលនាកសាងសមាជិកគណបក្សប្រជាជនកម្ពុជាចុះមូលដ្ឋាន ខេត្ត កណ្ដាល និងដោយមានការយកចិត្តទុកដាក់ពីលោក គួច ចំរើន ប្រធានគណៈកម្មាធិការគណបក្សខេត្ត បានផ្ដល់ ភាពកក់ក្តៅដល់បេក្ខជនសកម្មជនរបស់គណបក្សនយោបាយនានានៅខេត្តកណ្ដាល ដែលបានចុះចូល រួមជីវភាពនយោបាយជាមួយគណបក្សប្រជាជនកម្ពុជា។ ក្រុមការងារ បានចុះជួបផ្ទាល់ជាមួយបងប្អូន។លោក សន រ៉ន បេក្ខជនក្រុមប្រឹក្សាស្រុកកណ្តាលស្ទឹង (បម្រុង) គណបក្សកម្លាំងជាតិ លេខរៀង ទី១០ បានប្រកាសឈប់មានទំនាក់ទំនងជាមួយបក្សប្រឆាំងបន្តទៀតហើយ បន្ទាប់ពីមើលឃើញថា សកម្មភាពនយោបាយរបស់បក្សប្រឆាំង មិនបានជួយអ្វីដល់ប្រទេសជាតិនោះឡើយ។ ពួកគេបានសុំការ អនុគ្រោះពីសម្តេចតេជោ ហ៊ុន សែន ប្រធានគណបក្សប្រជាជនកម្ពុជា ដើម្បីបានឱកាសធ្វើសកម្មភាព នយោបាយ ជាមួយបក្សប្រជាជនកម្ពុជាផងដែរ។ពេលនេះពួកគេ បានមើលឃើញច្បាស់ដោយឥតសង្ស័យថាគណបក្សប្រជាជនកម្ពុជា គឺជាបក្ស នយោបាយតែមួយគត់ ដែលមានគុណបំណាច់ដ៏ធំធេងសម្រាប់ជាតិ និងប្រជាជនកម្ពុជា, គណបក្សមាន គោលនយោបាយច្បាស់លាស់ក្នុងការដឹកនាំជាតិ និងកសាងជាតិឆ្ពោះទៅរកភាពរុងរឿង។ ជាពិសេស បក្សប្រជាជនកម្ពុជា ជាបង្អែក និងជាទីទុកចិត្តរបស់ប្រជាពលរដ្ឋក្នុងការធានារក្សាបានសុខសន្តិភាព និង ស្ថិរភាពសង្គមដែលជាលក្ខខណ្ឌដ៏ចាំបាច់សម្រាប់ធានាការរស់នៅដោយភាពរីករាយរបស់ប្រជាពលរដ្ឋ។ជាពិសេស សម្តេចតេជោ ហ៊ុន សែន ជាមេដឹកនាំដ៏ខ្លាំងពូកែ ដែលបានប្រឹងប្រែងរំដោះអាយុជីវិតជាតិ និង ប្រជាជន បានយកជីវិតធ្វើដើមទុន ដើម្បីបញ្ចប់សង្គ្រាម ហើយឈានដល់ការបង្រួបបង្រួមជាតិ និង កសាងជាតិឲ្យរីកចម្រើនដូចពេលបច្ចុប្បន្ន។ ចំណែក រាជរដ្ឋាភិបាលនីតិកាលទី៧ ដែលសម្តេចមហាបវរធិបតី ហ៊ុន ម៉ាណែត ជាប្រមុខដឹកនាំ មានយុទ្ធសាស្រ្តបញ្ចកោណជាគោលនយោបាយដំណាក់កាលទី១ ដើម្បី កំណើនការងារ សមធម៌ ប្រសិទ្ធភាព និងចីរភាព ឱ្យកាន់តែរីកចម្រើន និងអភិវឌ្ឍរុងរឿង៕

សម្ដេចរដ្ឋសភាធិបតី ឃួន សុដារី អញ្ជើញដឹកនាំសម័យប្រជុំរដ្ឋសភាជាវិសាមញ្ញ នីតិកាលទី៧

សម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា អញ្ជើញជាអធិបតីដឹកនាំសម័យប្រជុំរដ្ឋសភាជាវិសាមញ្ញ នីតិកាទី៧ ដែលមានវត្តមានសមាជិក សមាជិកា ចំនួន ១០៥រូប នៅវិមានរដ្ឋសភា រាជធានីភ្នំពេញ នាព្រឹកថ្ងៃទី១៧ ខែតុលា ឆ្នាំ២០២៥ ដើម្បីពិនិត្យ និងអនុម័តលើសំណើរបស់រាជរដ្ឋាភិបាលលើសេចក្តីព្រាងច្បាប់ចំនួន៥។

កម្ពុជានៅតែបន្តទទូចឲ្យថៃដោះលែងទាហានខ្មែរ១៨នាក់ មកវិញប្រកបដោយសុវត្ថិភាព ខណៈពេលនេះ គឺ៨០ថ្ងៃហើយ

រាជរដ្ឋាភិបាលកម្ពុជា បាននឹងកំពុងធ្វើការយ៉ាងសស្រាក់សស្រាំឥតឈប់ឈរ នូវគ្រប់យន្តការដោះស្រាយទាំងអស់ដើម្បីឱ្យភាគីថៃ ដោះលែងវីរៈយុទ្ធជនកម្ពុជា១៨នាក់ វិលត្រលប់មកកម្ពុជាវិញប្រកបសុខសុវត្ថិភាព និងស្របតាមច្បាប់មនុស្សធម៌អន្តរជាតិ ខណៈក្រុមគ្រួសារជនរងគ្រោះកំពុងរងចាំទាំងយប់ទាំងថ្ងៃ។តាមឆាណែលតេលេក្រាមរបស់ក្រសួងការពារជាតិកម្ពុជា នាថ្ងៃទី១៧ ខែតុលា ឆ្នាំ២០២៥ នេះបានឲ្យដឹងថា ថ្ងៃនេះជា ថ្ងៃទី៨០ហើយ ដែលវីរៈកងទ័ពកម្ពុជាចំនួន១៨រូប ត្រូវបានចាប់ខ្លួន និងដាក់ឱ្យស្ថិតក្រោមការឃុំគ្រងរបស់យោធាថៃ។ ដូច្នេះកម្ពុជាសូមអំពាវនាវឱ្យភាគីថៃ ដោះលែងពួកគាត់ត្រឡប់មកវិញឱ្យបានឆាប់រហ័សជាទីបំផុត ដើម្បីឱ្យពួកគាត់អាចវិលត្រឡប់មកជួបជុំក្រុមគ្រួសាររបស់ពួកគាត់ និងប្រកបដោយសុខសុវត្ថិភាព ស្របតាមច្បាប់មនុស្សធម៌អន្តរជាតិ។ក្រសួងការពារជាតិកម្ពុជា បានបញ្ជាក់អះអាងទៀតថា«រាជរដ្ឋាភិបាលកម្ពុជា បាននឹងកំពុងធ្វើការយ៉ាងសស្រាក់សស្រាំឥតឈប់ឈរ នូវគ្រប់យន្តការដោះស្រាយទាំងអស់លើករណីនេះ ដើម្បីឱ្យភាគីថៃ ដោះលែងកងកម្លាំងរបស់យើងទាំង១៨នាក់នោះវិលត្រលប់មកវិញឱ្យបានឆាប់រហ័សជាទីបំផុតនិងដោយសុខសុវត្ថិភាព»។ ជាមួយគ្នានោះដែរក្រសួងការពារជាតិកម្ពុជាបានបញ្ជាក់ជាថ្មីម្តងទៀតថា រាជរដ្ឋាភិបាល ក្រសួងការពារជាតិ និងកងយោធពលខេមរភូមិន្ទ មិនដែលបោះបង់កងកម្លាំងរបស់យើងណាម្នាក់ចោលនោះឡើយ ទោះក្នុងកាលៈទេសៈណាក៏ដោយនោះ។ទាក់ទងនឹងហានខ្មែរទាំង១៨នាក់នេះដែរ កាលពីកន្លងទៅ លោក Jurg Montani ប្រធានប្រតិភូគណៈកម្មាធិការអន្តរជាតិនៃកាកបាទក្រហមប្រចាំភូមិភាគ បានអះអាងថា ទាហានខ្មែរទាំង១៨រូប ដែលទាហានថៃចាប់ទៅដោយខុសច្បាប់ ខណៈកំពុងអនុវត្តកិច្ចព្រមព្រៀងបទឈប់បាញ់នោះពួកគាត់មានសុវត្ថិភាព និងសុខភាពល្អធម្មតា៕ អត្ថបទបាន ចក់

រកឃើញថ្មី អ្នកជំងឺផ្តាសាយបក្សី ប្រភេទ H5N1 លើ កុមារី អាយុ ៣ឆ្នាំ

ក្រសួងសុខាភិបាល នៃព្រះរាជាណាចក្រកម្ពុជា នៅថ្ងៃទី១៦ ខែតុលា ឆ្នាំ២០២៥ បានចេញ សេចក្តីប្រកាសព័ត៌មាន ជម្រាបជូនសាធារណជនឱ្យបានជ្រាបថា៖ មានអ្នក ជំងឺផ្តាសាយបក្សីមួយករណីទៀត កើតលើកុមារីអាយុ ៣ឆ្នាំ ដែលបានបញ្ជាក់ថា វិជ្ជមានវីរុសផ្តាសាយបក្សី ប្រភេទហាស់៥ អ៊ុន១ (H5N1) ដោយ វិទ្យាស្ថានជាតិសុខភាពសាធារណៈ និង វិទ្យាស្ថានប៉ាស្ទ័រកម្ពុជា នៅថ្ងៃទី១៥ ខែតុលា ឆ្នាំ២០២៥។ អ្នកជំងឺមានទីលំនៅក្នុងភូមិចេក ឃុំស្វាយចចិប ស្រុកបរសេដ្ឋ ខេត្តកំពង់ស្ពឺ មានរោគ សញ្ញា គ្រុនក្តៅ រាក ក្អក និងឈឺពោះ។ បច្ចុប្បន្ន អ្នកជំងឺកំពុងទទួលបានការព្យាបាលដោយយកចិត្តទុកដាក់ពីក្រុមគូពេទ្យ។ តាមការសាកសួរបង្ហាញថា នៅផ្ទះអ្នកជំងឺ និងផ្ទះអ្នកជិតខាង មានមាន់ ទា ឈឺ និងងាប់ជាបន្តបន្ទាប់ ប្រហែលមួយសប្ដាហ៍មុនថ្ងៃកុមារឈឺ។ក្រុមឆ្លើយតបបន្ទាន់របស់ក្រសួងសុខាភិបាលថ្នាក់ជាតិ និងថ្នាក់ក្រោមជាតិ បាន និងកំពុងសហការ ជាមួយក្រុមការងារ នៃមន្ទីរកសិកម្មខេត្ត និងអាជ្ញាធរមូលដ្ឋានគ្រប់លំដាប់ថ្នាក់ ធ្វើការអង្កេតស្រាវជ្រាវយ៉ាងសកម្ម លើការកើតឡើងនូវជំងឺផ្ដាសាយបក្សី និងធ្វើការឆ្លើយតបទៅតាមវិធីសាស្ត្រ និងពិធីសារបច្ចេកទេស ស្វែងរក ប្រភពចម្លង ទាំងលើសត្វ និងមនុស្ស និងស្វែងរកករណីសង្ស័យនិងអ្នកប៉ះពាល់ ដើម្បីទប់ស្កាត់ការឆ្លងបន្តក្នុង សហគមន៍ ព្រមទាំងចែកជូនឱសថតាមីស្តូ (Tamiflu) ដល់អ្នកប៉ះពាល់ជិតស្និទ្ធ និងធ្វើយុទ្ធនាការអប់រំសុខភាព ប្រជាពលរដ្ឋនៅក្នុងភូមិដែលកើតហេតុខាងលើ។ក្រសួងសុខាភិបាល សូមក្រើនរំលឹកសារជាថ្មីម្តងទៀត ដល់បងប្អូនប្រជាពលរដ្ឋទាំងអស់ សូមយកចិត្តទុកដាក់ប្រុងប្រយ័ត្នលើជំងឺផ្តាសាយបក្សីជានិច្ច ពីព្រោះជំងឺផ្តាសាយបក្សី H5N1 នៅតែបន្តគំរាមកំហែងដល់ សុខភាពប្រជាពលរដ្ឋយើង ហើយក៏សូមជម្រាបដល់បងប្អូន ប្រសិនបើមានអាការៈក្តៅខ្លួន ក្អក ហូរសំបោរ ឬ ពិបាកដកដង្ហើម និងមានប្រវត្តិធ្លាប់បានប៉ះពាល់ជាមួយមាន់ទាឈឺ ឬងាប់ក្នុងអំឡុង១៤ថ្ងៃមុនថ្ងៃចាប់ផ្តើម មានរោគសញ្ញា សូមកុំទៅជួបជុំ ឬទីប្រជុំជនដែលមានមនុស្សច្រើន និងត្រូវស្វែងរកការពិគ្រោះយោបល់ និងការពិនិត្យព្យាបាលនៅមណ្ឌលសុខភាព ឬមន្ទីរពេទ្យ ដែលនៅជិតជាបន្ទាន់ ចៀសវាងការពន្យារពេល ធ្វើឱ្យប្រឈមនឹង ហានិភ័យខ្ពស់នៃការស្លាប់ជាយថាហេតុ។ព័ត៌មានពិស្តារ៖

លោកជំទាវអនុរដ្ឋមន្ត្រីការបរទេសទី២ នៃសាធារណរដ្ឋកូរ៉េ ថ្លែងអំណរគុណចំពោះកិច្ចសហការល្អ ដែលអាជ្ញាធរកម្ពុជាតែងផ្តល់ជូនអាជ្ញាធរកូរ៉េនាពេលកន្លងមក ក្នុងការប្រយុទ្ធប្រឆាំងឧក្រិដ្ឋកម្មឆ្លងដែន រួមទាំងការឆបោកតាមប្រព័ន្ធបច្ចេកវិទ្យា

នាព្រឹកថ្ងៃទី១៦ ខែតុលា ឆ្នាំ២០២៥ ឯកឧត្តមសន្តិបណ្ឌិត ឆៃ ស៊ីណារិទ្ធ ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានលេខាធិការដ្ឋានគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប.) បានអនុញ្ញាតឱ្យ លោកជំទាវ Kim Jina អនុរដ្ឋមន្ត្រីទី២ នៃក្រសួងការបរទេសសាធារណរដ្ឋកូរ៉េ ចូលជួបសម្តែងការគួរសម និងពិភាក្សាការងារ។ក្នុងជំនួបនោះ ឯកឧត្តមសន្តិបណ្ឌិត ឆៃ ស៊ីណារិទ្ធ បានវាយតម្លៃខ្ពស់ចំពោះកិច្ចសហប្រតិបត្តិការរវាងកម្ពុជា និងសាធារណរដ្ឋកូរ៉េ ក្នុងវិស័យសំខាន់ៗ រួមមាន នយោបាយ ពាណិជ្ជកម្ម សេដ្ឋកិច្ច កិច្ចសហប្រតិបត្តិការអភិវឌ្ឍន៍ ទំនាក់ទំនងប្រជាជននិងប្រជាជន និងសន្តិសុខ ជាដើម។ ឯកឧត្តម បានជម្រាបជូនអំពីការប្តេជ្ញាចិត្ត និងកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការបង្ការ ប្រយុទ្ធប្រឆាំង និងបោសសម្អាតទីតាំងពាក់ព័ន្ធនឹងការឆបោកតាមប្រព័ន្ធបច្ចេកវិទ្យា ជាមួយនឹងលទ្ធផលជាក់ស្តែងដែលទទួលបានជាបន្តបន្ទាប់។ ក្នុងរយៈពេល៤ខែចុងក្រោយឆ្នាំ២០២៥នេះ សមត្ថកិច្ចកម្ពុជាបានបញ្ជូនមុខសញ្ញាមេខ្លោង និងបក្ខពួកសរុប ៧៥នាក់ទៅតុលាការ និងបានឃាត់ខ្លួនជនសង្ស័យជាង ៣ ៤០០នាក់ ពាក់ព័ន្ធបទល្មើសឆបោកតាមប្រព័ន្ធបច្ចេកវិទ្យា ដើម្បីអនុវត្តតាមនីតិវិធីច្បាប់ជាធរមាន។ ឯកឧត្តមសន្តិបណ្ឌិតបានគូសបញ្ជាក់ថា បញ្ហាការឆបោកតាមប្រព័ន្ធបច្ចេកវិទ្យាជាបញ្ហាសកល និងស្មុគស្មាញ ដែលតម្រូវឱ្យប្រទេសនីមួយៗមានភាពជឿជាក់ សហការគ្នាក្នុងការចូលរួមប្រយុទ្ធប្រឆាំង ក៏ដូចជាផ្សព្វផ្សាយអប់រំពលរដ្ឋឱ្យបានយល់ពីហានិភ័យ ទម្រង់នៃការឆបោក និងឧបាយកលរបស់ក្រុមឧក្រិដ្ឋជន ក្នុងការអូសទាញពលរដ្ឋឱ្យធ្លាក់ចូលកលល្បិចរបស់ឧក្រិដ្ឋជន។ ទំនុកចិត្ត និងកិច្ចសហប្រតិបត្តិការល្អជាមួយដៃគូ មានសារៈសំខាន់ក្នុងការធានាដល់ការលុបបំបាត់មិនឱ្យក្រុមឧក្រិដ្ឋជនកកើតឡើងវិញ ឬផ្លាស់ទីពីមួយកន្លែងទៅមួយកន្លែងទៀតបាន។ ជាកិច្ចឆ្លើយតប លោកជំទាវអនុរដ្ឋមន្ត្រីទី២ បានសម្តែងចំណាប់អារម្មណ៍ចំពោះការរីកចម្រើននៃទំនាក់ទំនងកម្ពុជា-សាធារណរដ្ឋកូរ៉េ ក្នុងរយៈពេល ២៨ឆ្នាំ ក្រោយការភ្ជាប់ទំនាក់ទំនងការទូតឡើងវិញ ដោយទំនាក់ទំនងរវាងប្រទេសទាំងពីរត្រូវបានដំឡើងកម្រិតដល់ភាពជា «ដៃគូយុទ្ធសាស្ត្រ» កាលពីឆ្នាំ២០២៤ កន្លងទៅ។ លោកជំទាវ បានសង្កត់ធ្ងន់ថា កន្លងមក សមត្ថកិច្ចកម្ពុជាបានសហការល្អជាមួយសមត្ថកិច្ចកូរ៉េ ប៉ុន្តែសារព័ត៌មានពុំបានផ្សព្វផ្សាយទេ។ លោកជំទាវបានថ្លែងអំណរគុណចំពោះកិច្ចសហការល្អ ដែលអាជ្ញាធរកម្ពុជាតែងផ្តល់ជូនអាជ្ញាធរកូរ៉េនាពេលកន្លងមក ក្នុងការប្រយុទ្ធប្រឆាំងឧក្រិដ្ឋកម្មឆ្លងដែន រួមទាំងការឆបោកតាមប្រព័ន្ធបច្ចេកវិទ្យា ជាពិសេស ការសម្របសម្រួលជូនគណៈប្រតិភូរបស់លោកជំទាវ ចុះពិនិត្យមើលទីតាំងមួយចំនួន និងការត្រៀមបញ្ជូនពលរដ្ឋកូរ៉េត្រលប់ទៅប្រទេសកំណើតវិញ ដែលតាមរយៈនេះបង្ហាញថា កម្ពុជាបានផ្តល់កិច្ចសហការយ៉ាងល្អ និងគ្រប់គ្រងទីតាំងបានប្រសើរ។ ឯកឧត្តមសន្តិបណ្ឌិត និងលោកជំទាវអនុរដ្ឋមន្ត្រីក៏បានពិភាក្សាលើទិសដៅបន្តសម្រាប់កិច្ចសហប្រតិបត្តិការរវាងប្រទេសទាំងពីរ រួមមានការផ្លាស់ប្តូរព័ត៌មាន ការទប់ស្កាត់មុខសញ្ញា ការសម្របសម្រួលទទួលពលរដ្ឋកូរ៉េត្រលប់ទៅវិញ និងកិច្ចសហការជាក់ស្តែងផ្សេងៗទៀត។នៅថ្ងៃដដែលនេះដែរ ក្រុមគណៈប្រតិភូកូរ៉េបានចុះពិនិត្យដល់ទីតាំងពាក់ព័ន្ធនឹងការប្រព្រឹត្តបទល្មើសឆបោកអនឡាញ នៅភូមិត្រយឹងខ្ពស់ ឃុំលំពង់ ស្រុកបាទី ខេត្តតាកែវ។ គណៈប្រតិភូកូរ៉េក៏បានជ្រាបផងដែរអំពីឆន្ទៈរបស់រាជរដ្ឋាភិបាលក្នុងការបោសសម្អាតបទល្មើសឆបោកអនឡាញឱ្យអស់ពីកម្ពុជា។ ក្នុងន័យនេះ ការអនុវត្តរបស់កម្ពុជាគឺត្រូវស្វែងរកដល់ឬសគល់និងប្រភពនៃការជាប់ពាក់ព័ន្ធក្នុងឧក្រិដ្ឋកម្មបែបឆ្លងដែនមួយនេះ។ ជាក់ស្តែង លេខាធិការដ្ឋានគ.ប.ឆ.ប. បាននិងកំពុងរួមគ្នាជាមួយបណ្តាដៃគូ និងប្រទេសពាក់ព័ន្ធ ដើម្បីស្រាវជ្រាវ សើបអង្កេតលើភ័ស្តុតាងទាំងអស់ ដែលបានរឹបអូសពីជនប្រព្រឹត្តបទល្មើស ក្នុងអំឡុងពេលនៃប្រតិបត្តិការបង្រ្កាបនាពេល៤ខែកន្លងមក។ សម្ភារដែលរឹបអូសទាំងអស់រួមមានទូរសព្ទដៃ កុំព្យូទ័រ លិខិតឆ្លងដែន ឧបករណ៍អេឡិកត្រូនិចជាច្រើនប្រភេទ និងច្រើនពាន់គ្រឿង សុទ្ធសឹងជា ភ័ស្តុតាង ដែលអាចផ្តល់ជាតម្រុយសម្រាប់ស្វែងរកក្រុមមេខ្លោង ដើម្បីឈានទៅវែកមុខបណ្តាញអង្គការចាត់តាំង ពាក់ព័ន្ធនឹងអំពើឆបោកទាំងនៅក្នុង និងក្រៅប្រទេសកម្ពុជា។ លទ្ធផលដែលនឹងទទួលបានពីការស្រាវជ្រាវ នឹងត្រូវប្រើប្រាស់សម្រាប់ សហការជាមួយក្រសួង ស្ថាប័ន អាជ្ញាធរ និងសមត្ថកិច្ចពាក់ព័ន្ធក្នុងរាជធានី ខេត្តនៃព្រះរាជាណាចក្រកម្ពុជា ដើម្បីដាក់ចេញវិធានការម៉ឺងម៉ាត់ និងអនុវត្តតាមច្បាប់ជាធរមាន។គួរបញ្ជាក់ផងដែរថា កន្លងមក កម្ពុជាបានចាប់ខ្លួន និងបញ្ជូនជនជាតិកូរ៉េចំនួន១៨០នាក់ ដែលពាក់ព័ន្ធនឹងការឆបោកតាមប្រព័ន្ធបច្ចេកវិទ្យា ត្រឡប់សាធារណរដ្ឋកូរ៉េ វិញ។ បច្ចុប្បន្ននេះ ជនជាតិកូរ៉េជាង ៦០នាក់ ដែលត្រូវបានសមត្ថកិច្ចកម្ពុជារកឃើញជាប់ពាក់ព័ន្ធនឹងករណីឆបោកតាមប្រព័ន្ធបច្ចេកវិទ្យា កំពុងរង់ចាំការបញ្ជូនត្រឡប់ទៅ សាធារណរដ្ឋកូរ៉េ វិញ ក្នុងពេលឆាប់ៗខាងមុខនេះ៕

កម្ពុជា ការប្តេជ្ញាចិត្តយ៉ាងមុតមាំ ក្នុងការសម្រេច បាននូវប្រទេសកម្ពុជាគ្មានមីន

នាព្រឹកថ្ងៃទី១៦ ខែតុលា ឆ្នាំ២០២៥ តាងនាមឱ្យ សម្តេចមហាបវរធិបតី ហ៊ុន ម៉ាណត នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានអាជ្ញាធរមីន ឯកឧត្តមបណ្ឌិត លី ធុជ ទេសរដ្ឋមន្រ្តី និងជា អនុប្រធានទី១ អាជ្ញាធរមីន បានអញ្ជើញដឹកនាំកិច្ចប្រជុំក្រុមការងារបច្ចេកទេសចម្រុះរាជរដ្ឋាភិបាល ដៃគូអភិវឌ្ឍវិស័យ មីន (TWG-MA) ក្រោមប្រធានបទ “កិច្ចប្រឹងប្រែងរួមគ្នាឆ្ពោះទៅកម្ពុជាមួយគ្មានផលប៉ះពាល់ពីមីននិងសំណល់ជាតិ ផ្ទុះពីសង្គ្រាម” ដោយ បានបញ្ជាក់ជាថ្មីពីការប្តេជ្ញាចិត្តយ៉ាងមុតមាំរបស់រាជរដ្ឋាភិបាលកម្ពុជា ក្នុងការសម្រេច បាននូវប្រទេសកម្ពុជាគ្មានមីន។កិច្ចប្រជុំនេះ មានការចូលរួមពី ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ឯកឧត្តម Enrico Gaveglia អ្នកតំណាងកម្មវិធីអភិវឌ្ឍន៍អង្គការសហប្រជាជាតិ (UNDP) ប្រចាំកម្ពុជា តំណាងក្រសួង -ស្ថាប័នពាក់ព័ន្ធ ប្រទេសម្ចាស់ជំនួយ ដៃគូអភិវឌ្ឍន៍ ប្រតិបត្តិករសកម្មភាពមីន វិស័យឯកជន អង្គការសង្គមស៊ីវិល និង ភាគីពាក់ព័ន្ធដទៃទៀត។ក្នុងឱកាសបើកកិច្ចប្រជុំ TWG-MA ឯកឧត្តម ទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន បានសម្តែងនូវការអរគុណ និងកោតសរសើរជូនចំពោះក្រសួងស្ថាប័នពាក់ព័ន្ធ ប្រទេសម្ចាស់ជំនួយ ដៃគូអភិវឌ្ឍន៍ ប្រតិបត្តិករសកម្មភាពមីន វិស័យឯកជន អង្គការសង្គមស៊ីវិល និងភាគីពាក់ព័ន្ធដទៃទៀត ដែលបានយកចិត្តទុកដាក់ និងរួមចំណែកប្រកបដោយ ទឹកចិត្តសប្បុរស ក្នុងបុព្វហេតុមនុស្សធម៌ចូលរួមដោះស្រាយបញ្ហាមីន និងសំណល់ជាតិផ្ទុះពីសង្គ្រាមនៅកម្ពុជា។ ការរួម ចំណែកដ៏មានសារៈសំខាន់នេះ រយៈពេលជាង ៣៣ឆ្នាំ ចាប់តាំងពីឆ្នាំ១៩៩២ កម្ពុជា បានរំដោះផ្ទៃដីមានមីននិង សំណល់ជាតិផ្ទុះពីសង្គ្រាមជាង ៣៤០០ គីឡូម៉ែត្រការ៉េ ដោយរកឃើញនិងកម្ទេចចោលគ្រាប់មីននិងសំណល់ជាតិផ្ទុះ ពីសង្គ្រាមជាង ៤,៤ លានគ្រាប់ និងកាត់បន្ថយចំនួនអ្នកស្លាប់ និងរបួសស្ថិតនៅក្រោម ១០០នាក់ ក្នុងរយៈពេល ៥ឆ្នាំ ចុងក្រោយ។ឯកឧត្តមទេសរដ្ឋមន្ត្រី លី ធុជ បានបញ្ជាក់ជាថ្មីពីការប្តេជ្ញាចិត្តយ៉ាងមុតមាំរបស់រាជរដ្ឋាភិបាលកម្ពុជា ក្នុងការសម្រេច បាននូវប្រទេសកម្ពុជាគ្មានមីន ក្រោមការដឹកនាំប្រកបដោយចក្ខុវិស័យវែងឆ្ងាយរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី។ ការបន្តគាំទ្រក្នុងគោលដៅរួមគ្នាពីប្រទេសជាមិត្ត ដៃគូអភិវឌ្ឍន៍ វិស័យឯកជន និងភាគីពាក់ព័ន្ធ នឹងនាំ ឱ្យកម្ពុជាខិតកាន់តែជិតដល់គោលដៅអនាគតកម្ពុជាមួយគ្មានផលប៉ះពាល់ពីមីននិងសំណល់ជាតិផ្ទុះ ពីសង្គ្រាម។ព័ត៌មានពិស្ដារ៖

រយៈពេល១ឆ្នាំ គណៈមេធាវីនៃព្រះរាជាណាចក្រកម្ពុជាការពារក្តីជូនជនក្រីក្រជាង៨៥០០ករណី

ភ្នំពេញ ÷ រយៈពេល១ឆ្នាំ គណៈមេធាវីនៃព្រះរាជាណចក្រកម្ពុជា បានចាត់តាំងមេធាវីឱ្យការពារក្តីជូនជនក្រីក្រចំនួន ៨,៥៨៤ករណី មានកូនក្តីសរុប ១៤,៨២៥នាក់ ក្នុងនោះមានរឿងក្តីអនីតិជនទំនាស់នឹងច្បាប់ចំនួន ២,៩៨៦ករណី មានកូនក្ដីជាអនីតិជនចំនួន ៥,៣៩១នាក់ និងការផ្តល់ប្រឹក្សាយោបល់ផ្នែកច្បាប់ដោយឥតគិតកម្រៃបានចំនួន ៤៥៦ករណី។ឯកឧត្តម សាំង វណ្ណៈ ប្រធានគណៈមេធាវីនៃព្រះរាជាណាចក្រកម្ពុជា បានឱ្យដឹងថា តាមរយៈសមិទ្ធផលខាងលើនេះ គណៈមេធាវី សូមសំដែងនូវការថ្លែងអំណរគុណយ៉ាងជ្រាលជ្រៅបំផុត គោរពជូនដល់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា, អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងឧបនាយករដ្ឋមន្ត្រី កើត រិទ្ធ រដ្ឋមន្ត្រីក្រសួងយុត្តិធម៌ ព្រមទាំងលោកស្រី អ៉ឹង កន្ថាផារី រដ្ឋមន្ត្រីក្រសួងកិច្ចការនារី ដែលបានផ្តល់ និងជួយសម្របសម្រួលថវិកានេះជូនគណៈមេធាវី សម្រាប់ចំណាយលើសកម្មភាពការពារក្តីជូនជនក្រីក្រ និងក្មេងស្រីក្រីក្រដែលរងគ្រោះដោយសារអំពើហិង្សា។ដោយអនុវត្តតាមគោលនយោបាយដែលបានដាក់ចេញ គណៈមេធាវីនៅតែបន្តយកចិត្តទុកដាក់ក្នុងការផ្តល់ជំនួយផ្នែកច្បាប់ដល់ជនក្រីក្រទូទាំងប្រទេស ដែលមាននាយកដ្ឋានការពារក្តីជូនជនក្រីក្រ ជាសេនាធិការ និងមានមេធាវីស្ម័គ្រចិត្តចូលរួមចំនួន ៦២៤រូប។ ដើម្បីឱ្យការផ្តល់ជំនួយផ្នែកច្បាប់ជូនជនក្រីក្រ បានឆាប់រហ័ស ទាន់ពេលវេលា និងមានប្រសិទ្ធភាព នោះរាល់ការបញ្ជូនឯកសារស្នើសុំមេធាវី និងលិខិតចាត់តាំងមេធាវី គឺធ្វើឡើងតាមរយៈប្រព័ន្ធតេឡេក្រាម ជាបឋម ឯសំណៅដើមនឹងបញ្ជូននៅពេលក្រោយ។ចំពោះការគ្រប់គ្រងទិន្នន័យរឿងក្ដីជនក្រីក្រ គឺធ្វើការគ្រប់គ្រងតាមប្រព័ន្ធព័ត៌មានវិទ្យា ដោយគ្រប់ការិយាល័យប្រតិភូប្រចាំរាជធានី-ខេត្ត សាលាឧទ្ធរណ៍ភ្នំពេញ សាលាឧទ្ធរណ៍តំបន់ និងតុលាការកំពូល ត្រូវបានតម្លើងឱ្យប្រើប្រាស់ប្រព័ន្ធនេះ ដោយរាល់ទិន្នន័យត្រូវបញ្ជូនមកគ្រប់គ្រងរួម នៅនាយកដ្ឋានការពារក្តីជូនជនក្រីក្រ របស់គណៈមេធាវី។តួយ៉ាងក្នុងឆ្នាំ២០២៥ រាជរដ្ឋាភិបាលកម្ពុជាក្រោមការដឹកនាំដ៏ប៉ិនប្រសព្វ និងស្វាហាប់ ប្រកបដោយ គតិបណ្ឌិតដ៏ខ្ពង់ខ្ពស់បំផុតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះ រាជាណាចក្រកម្ពុជា បានបន្តផ្តល់ថវិកាសរុបចំនួន ២,៩០០លានរៀល ជូនគណៈមេធាវី សម្រាប់ពង្រីកការចូលរួមបម្រើវិស័យយុត្តិធម៌ និងការលើកកម្ពស់យុត្តិធម៌សង្គម ផ្តោតសំខាន់លើសកម្មភាពចំនួន២ គឺការការពារក្តីនិងការប្រឹក្សាយោបល់ផ្នែកច្បាប់ជូនជនក្រីក្រ និងការកាពារក្តីជូនស្ត្រី និងក្មេងស្រីក្រីក្រ ដែលរងគ្រោះដោយអំពើហិង្សាក្នុងនោះថវិកាជំនួយឧបត្ថម្ភពីរាជរដ្ឋាភិបាលកម្ពុជា តាមរយៈក្រសួងយុត្តិធម៌ ចំនួន២,៦០០លានរៀល ក្នុង មួយឆ្នាំ ដែលថវិកានេះអាចទូទាត់ចំណាយបានចំនួន ៦,១៥៦សំណុំរឿង និងការប្រឹក្សាយោបល់បានចំនួន ៤៥៦ករណី៕អត្ថបទ៖សូដាវណ្ណ

ឯកឧត្តមកើត រិទ្ធ ៖ មេធាវីជាតួអង្គសំខាន់ក្នុងវិស័យយុត្តិធម៌ និង សង្គមនីតិរដ្ឋ

ភ្នំពេញ ៖ នៅក្នុងឱកាសអញ្ជើញបិទមហាសន្និបាតប្រចាំឆ្នាំលើកទី៣០ និង ជាខួប៣០ឆ្នាំ នៃការបង្កើតគណៈមេធាវីនៃព្រះរាជាណាចក្រកម្ពុជា នៅថ្ងៃទី១៦ ខែតុលា ឆ្នាំ២០២៥រដ្ឋមន្ត្រីក្រសួងយុត្តិធម៌ បានថ្លែងថា វិជ្ជាជីវៈមេធាវី គឺជាវិជ្ជាជីវៈសេរី និង ឯករាជ្យ។ប្រាក់ចំណូលដែលមេធាវីទទួលបាន គឺតាមរយះ អតិថិជនរបស់ខ្លួនផ្អែកទៅតាមការព្រមព្រៀងគ្នា សម្រាប់បម្រើឱ្យសេវាផ្នែកច្បាប់ជូនដល់អតិថិជន។ ឯកឧត្តម ឧបនាយករដ្ឋមន្ត្រី កើត រិទ្ធ រដ្ឋមន្ត្រីក្រសួងយុត្តិធម៌ បានថ្លែងបញ្ជាក់ថា ត្បិតតែមេធាវីបំពេញជីវៈដោយសេរី និង ឯករាជ្យក៏ពិតមែនប៉ុន្តែ មេធាវីតួអង្គដ៏សំខាន់ដែលមិនអាចខ្វះបានមួយក្នុងចំណោមតួអង្គពាក់ព័ន្ធដទៃទៀតនៅក្នុងវិស័យយុត្តិធម៌ ដែលមានបេសកកម្មចូលរួមក្នុងកិច្ចដំណើរការលើកកម្ពស់សង្គមនីតិរដ្ឋ ការពង្រឹងយុត្តិធម៌នៅក្នុងសង្គមទាក់ទងនឹងការអនុវត្តច្បាប់ក៏ដូចជាការការពារនូវសិទ្ធិរបស់ប្រជាពលរដ្ឋតាមផ្លូវច្បាប់ និងនៅក្នុងនីតិវិធីនានានៅតុលាការ។ឧបនាយករដ្ឋមន្ត្រី កើត រិទ្ធ បានគូសបញ្ជាក់ថា នៅក្នុងករណីវិវាទដែលត្រូវបានប្តឹងដល់តុលាការ ជំនួយរបស់មេធាវី ក្នុងការការពារក្តីជូនប្រជាពលរដ្ឋ ក្នុងដំណើរនីតិវិធីតុលាការ រឹតតែមានភាពចាំបាច់ និងមានសារៈសំខាន់ថែមទៀត ដោយសារតែនីតិវិធីក្នុងប្រព័ន្ធតុលាការមានច្រើនប្រភេទ និងមានលក្ខណៈបច្ចេកទេសស៉ីជម្រៅ ម្យ៉ាងវិញទៀតវត្តមានរបស់មេធាវី កាន់តែមានភាពចាំបាច់ ដើម្បីជួយដល់ប្រជាពលរដ្ឋក្នុងការការពារសិទ្ធិស្របច្បាប់នៅក្នុងកិច្ចដំណើរការនៃនីតិវិធីនានារបស់តុលាការ។ បន្ថែមលើសពីនេះ មេធាវីបានដើរតួនាទីក្នុងការធានានូវសុវត្ថិភាពគតិយុត្ត សម្រាប់សកម្មភាពពាណិជ្ជកម្ម សកម្មភាពរបស់នៅប្រចាំថ្ងៃរបស់ប្រជាពលរដ្ឋនៅក្នុងសង្គម ក្នុងបរិបទនៃការវិវត្តន៍យ៉ាងខ្លាំងរបស់ច្បាប់ និងលិខិតបទដ្ឋានគតិយុត្ត ដែលមានលក្ខណៈកាន់តែស្មុគស្មាញឡើងៗ។ តាមរយៈការផ្តល់សេវាប្រឹក្សាយោបល់ និងការរៀបចំឯកសារផ្លូវច្បាប់នានា ដើម្បីធានាបាននូវសុវត្ថិភាពខ្ពស់ និងតាមរយៈការចូលរួមការពារសិទ្ធិពលរដ្ឋតាមផ្លូវច្បាប់នៅក្នុងនីតិវិធីនានារបស់ផ្លូវតុលាការនៅករណីដែលមានវិវាទកើតឡើង។ឧបនាយករដ្ឋមន្ត្រី កើត រិទ្ធ បានបន្តថា មេធាវី គឺជាតួអង្គដ៏សំខាន់ក្នុងការបញ្ជ្រៀបនៃការយល់ដឹងអំពីច្បាប់ជូនដល់ប្រជាពលរដ្ឋ ពិសេសកូនក្តីរបស់ខ្លួន ដើម្បីលើកកម្ពស់វប្បធម៌នៃការគោរពច្បាប់ក្នុងសង្គមកម្ពុជា តាមរយៈការផ្សព្វផ្សាយច្បាប់ដល់សាធារណជន តាមគ្រប់មធ្យោបាយទាំងអស់។ ដូច្នេះ តួនាទីរបស់មេធាវី កាន់តែមានភាពចាំបាច់ដើម្បីធានាឱ្យបាននូវសុវត្ថិភាពគតិយុត្ត ក៏ដូចជាការយល់ដឹងអំពីច្បាប់សង្គមជាតិផងដែរ៕ អត្ថបទ សូដាវណ្ណ

បណ្ដាញសង្គម

ព័ត៌មានថ្មីៗ

មេដឹកនាំអូស្រ្តាលី និងសិង្ហបុរី សន្យាជំរុញទំនាក់ទំនងថាមពល ដើម្បីធានាការផ្គត់ផ្គង់សកល

EU អំពាវនាវឲ្យបញ្ឈប់ការវាយប្រហារជាបន្ទាន់ នៅលីបង់ និងជំរុញឲ្យការការពារជនស៊ីវិល

វិមានក្រឹមឡាំង៖ ទស្សនកិច្ចដោយប្រេសិត នៅអាមេរិក មិនមានន័យថា ការចរចាអ៊ុយក្រែន ចាប់ផ្តើមវិញឡើយ

អ៊ីស្រាអែលគំរាមវាយប្រហាររថយន្តសង្គ្រោះបន្ទាន់ នៅលីបង់ ដោយចោទថា ត្រូវបានក្រុមហេសបូឡាប្រើប្រាស់

អនុប្រធានាធិបតីសហរដ្ឋអាមេរិកនិយាយថា លោករំពឹងថាជំនួបអ៊ីរ៉ង់នឹងវិជ្ជមាន

ហេតុការណ៍លិចទូកក្រោយបុកស្ពានបណ្តែតនៅភាគខាងជើងឥណ្ឌាសម្លាប់មនុស្សយ៉ាងហោច ១០នាក់

អ៊ីរ៉ង់ខាតបង់ ១៤៥ពាន់លានដុល្លារ និងរងការបំផ្លិចបំផ្លាញយ៉ាងធំធេង ក្រោយសង្គ្រាម ៤០ថ្ងៃ

សាធារណជនកោះតៃវ៉ាន់មានការបែងចែកចំពោះដំណើរទស្សនកិច្ចរបស់មេដឹកនាំប្រឆាំងទៅកាន់ចិនដីគោក

លោក Macron ចង់បញ្ចុះបញ្ចូលលោក Trump នៅ G7 ដោយការអញ្ជើញក្រោយកិច្ចប្រជុំកំពូលឲ្យទៅវិមាន Versailles

ការវាយប្រហារយានដ្រូនរុស្ស៊ីបណ្តាលឲ្យកើតមានអគ្គិភ័យនៅតំបន់ Odesa របស់អ៊ុយក្រែន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877