BTV NEWS

ហ៊ុន ចាន់ បញ្ញាបុត្រ ចៅសម្តេចតេជោ ហ៊ុន សែន និស្សិតខ្មែរទី២ បញ្ចប់ការសិក្សាពីរាជបណ្ឌិតសភាយោធាសាន់ហឺស ក្នុងប្រទេសអង់គ្លេស

នាវាទេសចរណ៍ខ្នាតយក្ស VIKING VENUS នាំភ្ញៀវបរទេសជិត ៩០០ នាក់ ចូលចតនៅកំពង់ផែស្វយ័តក្រុងព្រះសីហនុ

ភ្ញៀវបរទេស ចាប់អារម្មណ៍ខ្លាំងចំពោះដំណើរកម្សាន្តនៅកម្ពុជា អំឡុងពិធីបុណ្យចូលឆ្នាំថ្មី

ក្រុមហ៊ុន CCCC បង្ហាញបំណងពង្រីកការវិនិយោគបន្ថែមនៅកម្ពុជា

ព័ត៌មានជាតិ

កម្ពុជា-ថៃ គ្រោងពិភាក្សាលើសេចក្ដីព្រាង SOP ដើម្បីឈានដល់ការព្រមព្រៀង ឈរលើគោលការណ៍ការពារបូរណភាពទឹកដី

ភាគីកម្ពុជា-ថៃ នឹងបន្តពិភាក្សាគ្នានៅក្នុងកិច្ចប្រជុំលេីកក្រោយទៀតលើសេចក្ដីព្រាងនិយាមនីតិវិធីប្រតិបត្តិ (SOP) ដើម្បីឈានទៅដល់ការព្រមព្រៀងគ្នាមួយ ដោយឈរលើគោលការណ៍ការពារអធិបតេយ្យ និងបូរណភាពទឹកដី។នៅ រាត្រី ថ្ងៃទី១៦ ខែតុលា ឆ្នាំ២០២៥ នេះ លោកជំទាវ ឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ នៃព្រះរាជាណាចក្រកម្ពុជា បានឱ្យដឹងថា កិច្ចប្រជុំលើកទី៣ លើសេចក្ដីព្រាងនិយាមនីតិវិធីប្រតិបត្តិ (SOP) របស់ក្រុមការងារសម្របសម្រួលចម្រុះ (JCTF) កម្ពុជា-ថៃ លើការងារដោះមីនមនុស្សធម៌ ត្រូវបានបញ្ចប់នៅម៉ោង ១៨:០០នាទី ដោយភាគីទាំងពីរបានពិភាក្សាគ្នា និងទទួលបានលទ្ធផលជាវិជ្ជមានមួយចំនួនបន្ថែមទៀតគួរឱ្យកត់សម្គាល់។ ភាគីទាំងពីរនឹងបន្តពិភាក្សាគ្នានៅក្នុងកិច្ចប្រជុំលេីកក្រោយទៀតលើសេចក្ដីព្រាងនិយាមនីតិវិធីប្រតិបត្តិ (SOP) ដើម្បីឈានទៅដល់ការព្រមព្រៀងគ្នាមួយ ដោយឈរលើគោលការណ៍ការពារអធិបតេយ្យ និងបូរណភាពទឹកដី។គួរឱ្យដឹងថា ការរៀបចំឱ្យមាននិយាមនីតិវិធី ប្រតិបត្តិ (SOP) នេះគឺ ដើម្បីធានាបាននូវបែបបទការងារមួយដែលមានស្តង់ដារ ព្រមទាំងធានាបាននូវអធិបតេយ្យ និងបូរណភាពទឹកដី ដោយឈរលើគោលការណ៍គោរពគ្នាទៅវិញទៅមក ជាពិសេសកិច្ចការងារនេះនឹងចូលរួមចំណែកដល់ការអភិវឌ្ឍសេដ្ឋកិច្ច-សង្គម និងការពារអាយុជីវិតរបស់ប្រជាពលរដ្ឋនៅតំបន់ ដែលទទួលរងផលប៉ះពាល់ដោយសារគ្រាប់មីនដែលបន្សល់ទុកពីសង្គ្រាម។ គួររំលឹកថា កាលពីព្រឹក ថ្ងៃទី៩ ខែតុលា ឆ្នាំ២០២៥ ក្រុមការងារសម្របសម្រួលចម្រុះ (JCTF) កម្ពុជា-ថៃ លើកិច្ចការងារដោះមីនមនុស្សធម៌នៃប្រទេសទាំងពីរ បានជួបប្រជុំលើកទី២ តាមប្រព័ន្ធ VTC ដើម្បីបន្តពិភាក្សាក្នុងការរៀបចំបង្កើតនិយាមនីតិវិធីប្រតិបត្តិ (SOP) បន្ទាប់ពីភាគីទាំងពីរបានផ្លាស់ប្តូរកែសម្រួលលើឯកសារនេះចំនួន ២ លើករួចមកហើយ។គួរបញ្ជាក់ថា ក្រុមការងារសម្របសម្រួលចម្រុះ (JCTF) កម្ពុជា-ថៃ ត្រូវបានបង្កើតឡើងស្របតាមលទ្ធផលនៃកិច្ចប្រជុំពិសេសលើកទី១ នៃគណៈកម្មាធិការព្រំដែនទូទៅ (GBC) កាលពីថ្ងៃទី១០ ខែកញ្ញា ឆ្នាំ២០២៥ នៅខេត្តកោះកុង ព្រះរាជាណាចក្រកម្ពុជា៕

ការប៉ះទង្គិចគ្នា រវាងនគរបាល និងក្រុមបាតុករ Gen Z នៅប៉េរូ បណ្តាលឲ្យមានអ្នកស្លាប់ម្នាក់យ៉ាងតិច

ការប៉ះទង្គិចគ្នា រវាងក្រុមបាតុករប្រឆាំងរដ្ឋាភិបាល និងនគរបាលកុបកម្ម នៅក្នុងរដ្ឋធានី Lima របស់ប្រទេសប៉េរូ បានបណ្តាលឲ្យបុរសអាយុ ៣២ឆ្នាំម្នាក់ស្លាប់ ហើយមនុស្សជាង ១០០នាក់ទៀតបានរងរបួស ក្នុងរួមមានទាំងមន្រ្តីនគរបាលជាច្រើននាក់ផងដែរ។ការតវ៉ានេះបានកើតឡើងមិនដល់មួយសប្តាហ៍ឡើយ បន្ទាប់ពីលោក José Jerí បានស្បថចូលកាន់តំណែងជាប្រធានាធិបតីបណ្តោះអាសន្ន ក្រោយមានការចោទប្រកាន់ទម្លាក់តំណែងលើអ្នកកាន់តំណែងមុនរបស់លោក គឺលោកស្រី Dina Boluarte។ ហើយបាតុកម្មកាលពីថ្ងៃពុធ (ទី១៥ ខែតុលា) ត្រូវបានរៀបចំឡើងដោយយុវជនប៉េរូភាគច្រើន (Gen Z) ដែលទាមទារឲ្យអ្នកនយោបាយរបស់ប្រទេសនេះធ្វើការបន្ថែមទៀត ដើម្បីប្រយុទ្ធប្រឆាំងនឹងឧក្រិដ្ឋកម្ម និងអំពើពុករលួយកម្រិតខ្ពស់។លោកប្រធានាធិបតី Jerí បានលើកឡើងថា ការតវ៉ានេះត្រូវបានជ្រៀតចូលដោយក្រុមឧក្រិដ្ឋជនដែលបង្កភាពចលាចល ហើយបានបើកការស៊ើបអង្កេតលើមូលហេតុ ជុំវិញការស្លាប់នោះ។ លោកបានសរសេរនៅលើបណ្ដាញសង្គម X ថា លោក «មានការសោកស្តាយ ដែលការស្លាប់នេះកើតឡើង»។លោកស្រី Ruth Luque សមាជិកសភារបស់ក្រុមឆ្វេងនិយម បានឲ្យដឹងថា «ព័ត៌មានបឋម» បង្ហាញថា តារាចម្រៀងហ៊ីបហបរូបនោះ ត្រូវបានសម្លាប់ដោយគ្រាប់កាំភ្លើងបាញ់ចំដើមទ្រូង។ លោកស្រី Luque បានបង្ហោះរូបថតរបស់លោកស្រីនៅលើបណ្ដាញសង្គម ដែលគេឃើញលោកស្រីកំពុងនិយាយទៅកាន់បុគ្គលិកនៅមន្ទីរពេទ្យ ដែលអ្នករបួសជាច្រើននាក់នៅក្នុងការប៉ះទង្គិចគ្នា ត្រូវបានថត។លោកប្រធានាធិបតី Jerí បានបញ្ជាក់ថា ការស៊ើបអង្កេតមួយនឹងត្រូវចាប់ផ្តើម «ដើម្បីកំណត់ឲ្យបានច្បាស់លាស់នូវអ្វីដែលបានកើតឡើង និងអ្នកណាជាអ្នកត្រូវទទួលខុសត្រូវ»។លោក Jerí បានស្បថចូលកាន់តំណែងកាលពីថ្ងៃសុក្រសប្តាហ៍មុន បន្ទាប់ពីប្រធានាធិបតីនាពេលនោះ គឺលោកស្រី Boluarte ត្រូវបានចោទប្រកាន់ទម្លាក់តំណែងក្រោមហេតុផល «អសមត្ថភាពខាងសីលធម៌មិនអាចបន្តតួនាទីបាន»។ លោក Jerí គឺជាប្រធានាធិបតីទី៧ ដែលដឹកនាំប្រទេសប៉េរូ ក្នុងរយៈពេល ៨ឆ្នាំ៕

កិច្ចប្រជុំរដ្ឋមន្រ្តីអាស៊ានគ្រោះមហន្តរាយ លើកទី១៣ បញ្ចប់ទៅដោយជោគជ័យ ហើយអាស៊ានប្តេជ្ញាជួយគ្នាត្រៀមឆ្លើយតបគ្រោះមហន្តរាយកើតឡើង

ភ្នំពេញ៖ រយៈពេល៤ថ្ងៃ ចាប់ពីថ្ងៃទី១៣ ដល់ថ្ងៃទី១៦ ខែតុលា ឆ្នាំ២០២៥ ព្រះរាជាណាចក្រកម្ពុជា បានបញ្ចប់តួនាទីជាប្រធានគណៈកម្មាធិការគ្រប់គ្រងគ្រោះមហន្តរាយអាស៊ាន លើកទី៤៧ និងភាពជាម្ចាស់ផ្ទះ ដឹកនាំកិច្ចប្រជុំរដ្ឋមន្រ្តីអាស៊ានគ្រោះមហន្តរាយ លើកទី១៣ និងកិច្ចប្រជុំពាក់ព័ន្ធ បានបញ្ចប់ទៅដោយផ្លែផ្កា និងជោគជ័យ។ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ និងជាប្រធានគណៈកម្មាធិការគ្រប់គ្រងគ្រោះមហន្តរាយអាស៊ាន លើកទី៤៧ និងក្រុមការងារ បានដឹកនាំកិច្ចប្រជុំរយៈពេល៤ថ្ងៃនេះ, អាស៊ានបានសម្រេចឯកភាពលើសេចក្តីថ្លែងការណ៍ក្នុងកិច្ចប្រជុំនីមួយៗប្រកបដោយលទ្ធផលផ្លែផ្កា និងឆ្លុះបញ្ចាំងពីសមាគ្គីភាពគ្រួសារអាស៊ាន និងស្របតាមគោលការណ៍ អាស៊ានតែមួយ ការឆ្លើយតបតែមួយ។ កិច្ចប្រជុំដែលបានបញ្ចប់ក្នុងរយៈពេល៤ថ្ងៃ រួមមាន៖-កិច្ចប្រជុំក្រុមប្រឹក្សាភិបាល នៃមជ្ឈមណ្ឌល-អាហា លើកទី២៣(23rd GB of AHÀ Center), កិច្ចប្រជុំនៃមេទិកាភាពធន់នឹងគ្រោះហន្តរាយអាស៊ាន លើកទី៨ (Bth ADRP)-កិច្ចប្រជុំចំហរ ACDM លើកទី ៤៧ ដែលមានកិច្ចសន្ទនាជាមួយដៃគូខាងក្រៅអាស៊ាន និងអង្គការសហប្រជាជាតិ-កិច្ចប្រជុំថ្នាក់រដ្ឋមន្ត្រីអាស៊ាន ស្តីពីការគ្រប់គ្រងគ្រោះមហន្តរាយ លើកទី ១៣ (13th AMMEM) និងសន្និសីទចំពោះភាគីអាត់ម៊ែរ លើកទី១៤(14th COP TO AADMER)-កិច្ចប្រជុំថ្នាក់រដ្ឋមន្ត្រីអាស៊ាន ស្តីពីការគ្រប់គ្រងគ្រោះមហន្តរាយ បូកចិន លើកទី៥ (5th AMMDM Plus China), កិច្ចប្រជុំថ្នាក់រដ្ឋមន្ត្រីអាស៊ាន ស្ដីពីការគ្រប់គ្រងគ្រោះមហន្តរាយ បូកជប៉ុនលើកទី៥ (5th AMMDM Plus Japan)-កិច្ចប្រជុំថ្នាក់រដ្ឋមន្ត្រីអាស៊ាន ស្ដីពីការគ្រប់គ្រងគ្រោះមហន្តរាយ បូកសាធារណរដ្ឋកូរ៉េលើកទី៤(4th AMMDM Plus ROK} ព្រមទាំងប្រារព្ធទិវាអាស៊ានគ្រប់គ្រងគ្រោះមហន្តរាយ និងទិវាអន្តរជាតិកាត់បន្ថយហានិភ័យគ្រោះមហន្តរាយ។អំឡុងកិច្ចប្រជុំនេះ បណ្តារដ្ឋមន្រ្តីទទួលបន្ទុកការងារគ្រោះមហន្តរាយអាស៊ាន លើកទី១៣ បានប្រកាសដាក់ឱ្យដំណើរការនូវគម្រោងរវាងអាស៊ាន និងដៃគូ ជាគម្រោង SICAP ដំណាក់កាលទី២។ទន្ទឹមគ្នានេះ កិច្ចប្រជុំថ្នាក់រដ្ឋមន្ត្រីអាស៊ាន ស្តីពីការគ្រប់គ្រងគ្រោះមហន្តរាយ លើក១៣ បានអញ្ជើញក្នុងពិធីចុះហត្ថលេខាលើអនុស្សារណៈនៃការបញ្ជាក់ពីបំណង (MOIs) រួមមាន ការចុះហត្ថលេខាលើ MOI រវាងមជ្ឈមណ្ឌល-អាហា និងប្រទេសលុចសំបួរ, ការចុះហត្ថលេខាលើ MOI រវាងមជ្ឈមណ្ឌល-អាហា និងអាជ្ញាធរគ្រប់គ្រងគ្រោះមហន្តរាយ និងគ្រោះអាសន្ន (AFAD), កម្មវិធីផ្លាស់ប្តូរលិខិតនៃការអនុវត្ត MOI រវាងមជ្ឈមណ្ឌល-អាហា និងគម្រោងសហប្រតិបត្តិការអភិវឌ្ឍន៍ស្វីស (SDC) ដំណាក់កាលទី៣។ក្រៅពីនេះ ឯកឧត្តម ទេសរដ្ឋមន្រ្តី គន់ គីម អនុប្រធានទី១ គណៈកម្មាធិការគ្រប់គ្រងគ្រោះមហន្តរាយ និង ឯកឧត្តម PHOSAY SAYASONE រដ្ឋមន្រ្តីក្រសួងការងារ និងសុខុមាលភាពសង្គមឡាវ បានអញ្ជើញចុះហត្ថលេខាលើអនុស្សារណៈនៃការយោគយល់គ្នារវាងកម្ពុជា និងឡាវ។បន្ទាប់ពីបិទបញ្ចប់កិច្ចប្រជុំថ្នាក់រដ្ឋមន្ត្រីអាស៊ាន ស្តីពីការគ្រប់គ្រងគ្រោះមហន្តរាយ លើក១៣ ឯកឧត្តម ទេសរដ្ឋមន្រ្តី គន់ គីម បានអញ្ជើញប្រគល់ញញួរប្តូរវេនទៅប្រធានរៀបចំកិច្ចប្រជុំថ្នាក់រដ្ឋមន្ត្រីអាស៊ាន ស្តីពីការគ្រប់គ្រងគ្រោះមហន្តរាយ លើក១៤ ដល់ ឯកឧត្តម រដ្ឋមន្រ្តីគ្រប់គ្រងគ្រោះមហន្តរាយ ប្រទេសឥណ្ឌូនេស៊ី៕

កម្ពុជា និងកូរ៉េ ប្ដេជ្ញាបន្តជំរុញទំនាក់ទំនង និងកិច្ចសហប្រតិបត្តិការល្អក្នុងក្របខណ្ឌភាពជាដៃគូយុទ្ធសាស្ត្រ

ភ្នំពេញ ៖ នាព្រឹក ថ្ងៃទី១៦ ខែតុលា ឆ្នាំ២០២៥ នៅវិមានសន្តិភាព, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានអនុញ្ញាតឱ្យ លោកជំទាវ KIM Jina អនុរដ្ឋមន្ត្រីទី២ នៃក្រសួងការបរទេសនៃសាធារណរដ្ឋកូរ៉េ ចូលជួបសម្តែងការគួរសម និងពិភាក្សាការងារ។ក្នុងឱកាសនៃជំនួប, លោកជំទាវអនុរដ្ឋមន្ត្រីទី២ បានថ្លែងអំណរគុណយ៉ាងជ្រាលជ្រៅចំពោះសម្ដេចបវរធិបតី ដែលបានអនុញ្ញាតឱ្យលោកជំទាវ និងគណៈប្រតិភូ ចូលជួបសម្ដែងការគួរសម និងពិភាក្សាការងារ។ លោកជំទាវបានកោតសរសើរ និងវាយតម្លៃខ្ពស់ចំពោះវឌ្ឍនភាពនៃទំនាក់ទំនង និងកិច្ចសហប្រតិបត្តិការដ៏ល្អប្រសើររវាងប្រទេសទាំងពីរ លើគ្រប់វិស័យ រួមទាំង ការប្រយុទ្ធប្រឆាំងឧក្រិដ្ឋកម្មឆ្លងដែន ជាពិសេសការឆបោកតាមប្រព័ន្ធបច្ចេកវិទ្យា នាពេលកន្លងមក។ លោកជំទាវបានគូសបញ្ជាក់ជូនសម្ដេចបវរធិបតីថា កន្លងមក នគរបាលនៃប្រទេសទាំងពីរបានសហការគ្នាជាច្រើន ប៉ុន្តែប្រព័ន្ធផ្សព្វផ្សាយពុំបានចុះផ្សាយព័ត៌មានទាំងនោះឱ្យបានពេញលេញ។ ដូច្នេះ ទស្សនកិច្ចការងាររបស់លោកជំទាវ និងគណៈប្រតិភូនាពេលនេះ នឹងរួមចំណែកកាត់បន្ថយនូវការភាន់ច្រឡំ តាមបណ្ដាញសារព័ត៌មាន ដោយសារការផ្សព្វផ្សាយព័ត៌មានមិនបានគ្រប់ជ្រុងជ្រោយ ក៏ដូចជានឹងរួមចំណែកពង្រឹង និងពង្រីកទំនាក់ទំនង និងកិច្ចសហប្រតិបត្តិការទ្វេភាគី ឱ្យកាន់រឹងមាំ ក្នុងគោលដៅរួមគ្នាក្នុងការប្រយុទ្ធប្រឆាំងឧក្រិដ្ឋកម្មឆ្លងដែន រួមទាំងការឆបោកតាមប្រព័ន្ធបច្ចេកវិទ្យា។ លោកជំទាវក៏បានថ្លែងអំណរគុណចំពោះកម្ពុជាដែលតែងតែផ្ដល់នូវកិច្ចសហប្រតិបត្តិការដ៏ល្អប្រសើរនាពេលកន្លងមក ក្នុងការប្រយុទ្ធប្រឆាំងឧក្រិដ្ឋកម្មឆ្លងដែន រួមទាំងការឆបោកតាមប្រព័ន្ធបច្ចេកវិទ្យា ប្រកបដោយលទ្ធផលល្អជាផ្លែផ្កា។ ក្នុងន័យនេះ, សាធារណរដ្ឋកូរ៉េប្ដេជ្ញាបន្តកិច្ចសហប្រតិបត្តិការជាមួយកម្ពុជាឱ្យកាន់តែស៊ីជម្រៅ និងល្អប្រសើរ ថែមទៀត។ ជាការឆ្លើយតប, សម្តេចបវរធិបតីបានវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការដ៏ល្អប្រសើររវាងកម្ពុជា និងសាធារណរដ្ឋកូរ៉េ ក្នុងក្របខណ្ឌភាពជាដៃគូយុទ្ធសាស្ត្រ ដែលប្រទេសទាំងពីរបានដំឡើង ក្នុងអំឡុងពេលដំណើរទស្សនកិច្ចផ្លូវការរបស់សម្ដេចបវរធិបតីនៅសាធារណរដ្ឋកូរ៉េ កាលពីឆ្នាំ២០២៤។ ចំពោះការប្រយុទ្ធប្រឆាំងឧក្រិដ្ឋកម្មឆ្លងដែន រួមទាំងការឆបោកតាមប្រព័ន្ធបច្ចេកវិទ្យា, អាជ្ញាធរកម្ពុជា និងអាជ្ញាធរកូរ៉េ បាននិងកំពុងមានកិច្ចសហប្រតិបត្តិការល្អ ប្រកបដោយលទ្ធផលជាច្រើន ហើយកិច្ចសហប្រតិបត្តិការនះនឹងនៅបន្តទៀត នាពេលអនាគត។ សម្ដេចបវរធិបតីក៏បានគូសរំលេចថា កម្ពុជាតែងតែចាត់វិធានការយ៉ាងសកម្ម និងបន្តបន្ទាប់ក្នុងការប្រយុទ្ធប្រឆាំងឧក្រិដ្ឋកម្មឆ្លងដែន រួមទាំងការឆបោកតាមប្រព័ន្ធបច្ចេកវិទ្យា ដោយភាពម្ចាស់ការ និងមានកិច្ចសហប្រតិបត្តិការជាមួយដៃគូជាច្រើន រួមទាំងសាធារណរដ្ឋកូរ៉េ។ មុននឹងបញ្ចប់, សម្តេចបវរធិបតី និងលោកជំទាវអនុរដ្ឋមន្ត្រីទី២ បានពិភាក្សាគ្នាអំពីទិសដៅបន្តនៃកិច្ចសហប្រតិបត្តិការទ្វេភាគី ហើយប្រទេសទាំងពីរប្ដេជ្ញាបន្តពង្រឹង និងពង្រីកទំនាក់ទំនង និងកិច្ចសហប្រតិបត្តិការឱ្យកាន់តែទូលំទូលាយ និងស៊ីជម្រៅ សំដៅធានាបាននូវសុខសុវត្ថិភាព និងទំនាក់ទំនងល្អប្រពៃរវាងប្រជាជននៃប្រទេសទាំងពីរ។គួរបញ្ជាក់ផងដែរថា កន្លងមក កម្ពុជាបានចាប់ខ្លួន និងបញ្ជូនជនជាតិកូរ៉េចំនួន១៨០នាក់ ដែលពាក់ព័ន្ធនឹងការ ឆបោកតាមប្រព័ន្ធបច្ចេកវិទ្យា ត្រឡប់សាធារណរដ្ឋកូរ៉េ វិញ។ បច្ចុប្បន្ននេះ, ជនជាតិកូរ៉េជាង ៦០នាក់ ដែលពាក់ព័ន្ធនឹងករណីឆបោកតាមប្រព័ន្ធបច្ចេកវិទ្យា កំពុងរង់ចាំការបញ្ជូនត្រឡប់ទៅសាធារណរដ្ឋកូរ៉េ វិញ ក្នុងពេលឆាប់ៗខាងមុខនេះ។

កម្មវិធីជជែកលើវិថីទេសចរណ៍ នឹងមានសកម្មភាពសំខាន់ៗ នាចុងសប្ដាហ៍នេះ

កម្មវិធីជជែកលើវិថីទេសចរណ៍ ក្រោមប្រធានបទ “សិល្បៈជាជ្រុងមួយនៃទេសចរណ៍” និង “ទេសចរណ៍សម័យបច្ចេកវិទ្យា” កម្មវិធី នឹងប្រារព្ធ នៅថ្ងៃទី១៨-១៩ ខែតុលា ឆ្នាំ២០២៥ វេលាម៉ោង ១៨:០០នាទី ដល់ម៉ោង ២០:០០នាទី នៅផ្លូវថ្មើរជើងចតុមុខ រាជធានីភ្នំពេញ។សកម្មភាពសំខាន់ៗ កម្មវិធីជជែកលើវិថីទេសចរណ៍ រួមមាន៖- ការសម្តែងទស្សនីយភាពសិល្បៈដោយក្រុមតន្ត្រីយុវជនអង្គរ Angkor Youth Orchestra- កិច្ចពិភាក្សាជាមួយវាគ្មិនកិត្តិយស អំពីបទពិសោធន៍ចំពោះវិស័យទេសចរណ៍- ការច្រៀងចម្រៀងជាតិលើកទឹកចិត្តដល់វីរកងទ័ពជួរមុខកម្មវិធីជជែកលើវិថីទេសចរណ៍ ត្រូវបានផ្តួចផ្តើមរៀបចំឡើងក្នុងគោលបំណង ចូលរួមយុទ្ធនាការជំរុញផ្សព្វផ្សាយសក្តានុពលទេសចរណ៍កម្ពុជាក្នុងរដូវកាលគ្រប់រដូវកាល ក៏ដូចជារដូវកាលបៃតង ទៅកាន់ភ្ញៀវទេសចរជាតិ និងអន្តរជាតិយ៉ាងបានទូលំទូលាយ។ លើកពីនេះ ចូលរួមបំផុសស្មារតីប្រជាជនកម្ពុជា ឱ្យចេះសេ្នហាជាតិ ស្រឡាញ់មាតុភូមិ អភិរក្សអភិវឌ្ឍសិល្បៈវប្បធម៌ សម្បត្តិធម្មជាតិ ជាពិសេសលើកកម្ពស់កិត្យានុភាពជាតិ និងបង្ហាញទៅកាន់ពិភពលោកថាកម្ពុជា ជាគោលដៅទេសចរណ៍សុវត្ថិភាព (Cambodia Safe) ផ្ដល់នូវភាពកក់ក្ដៅ៕

នាយឧត្តមសេនីយ៍ ម៉ៅ សុផាន់ទទួលបានគ្រឿងឥស្សរិយយស Order of Valour -Gallant Commander ពីព្រះមហាក្សត្រម៉ាឡេស៊ី

នាព្រឹកថ្ងៃទី១៥ ខែតុលា ឆ្នាំ២០២៥ ក្នុងឱកាសនៃដំណើរបំពេញទស្សនកិច្ចផ្លូវការ នៅប្រទេសម៉ាឡេស៊ី នាយឧត្តមសេនីយ៍ ម៉ៅ សុផាន់ បានអញ្ជើញចូលរួមព្រះរាជពិធីបំពាក់គ្រឿងឥស្សរិយយស នៅព្រះបរមរាជវាំង ទីក្រុងកូឡាឡាំពួរ ក្រោមព្រះរាជាធិបតីភាព ព្រះចៅSultan Ibrahim ibni Almarhum Sultan Iskandar ព្រះមហាក្សត្រនៃប្រទេសម៉ាឡេស៊ី និងព្រះអគ្គមហេសី។ ដើម្បីអបអរសាទរ ខួបអនុស្សាវរីយ៍លើកទី៩២ ថ្ងៃកំណើតកងទ័ពម៉ាឡេស៊ី ព្រះចៅស៊ុលតង់ អ៊ីប្រាហ៊ីម បានសព្វព្រះរាជហឬទ័យ ប្រោសព្រះរាជទាន គ្រឿងឥស្សរិយយស Order of Valour - Gallant Commander ជូនដល់ ឯកឧត្តម នាយឧត្តមសេនីយ៍ Agus Subiyanto អគ្គមេបញ្ជាការកងទ័ពជាតិឥណ្ឌូណេស៊ី , ឯកឧត្តម នាយឧត្តមសេនីយ៍ ម៉ៅ សុផាន់ មេបញ្ជាការកងទ័ពជើងគោក ខ.ភ.ម , ឯកឧត្តម នាយឧត្តមសេនីយ៍ Mohamad Tonny Harjono មេបញ្ជាការកងទ័ពអាកាសជាតិឥណ្ឌូណេស៊ី និង ឯកឧត្តម ឧត្តមសេនីយ៍ទោ Kelvin Fan Sui Siong មេបញ្ជាការកងទ័ពអាកាសសិង្ហបុរី៕

ប្រជាពលរដ្ឋរងគ្រោះដោយទឹកជំនន់ ៧៦ គ្រួសារក្នុងស្រុកលេីកដែក ទទួលបានអំណោយសង្គ្រោះបន្ទាន់ពីប្រធានក្រុមការងាររាជរដ្ឋាភិបាលចុះមូលដ្ឋាន

(កណ្តាល): ថ្នាក់ដឹកនាំក្រុមការងាររាជរដ្ឋាភិបាលចុះមូលដ្ឋានស្រុកលេីកដែក និងអាជ្ញាធរមូលដ្ឋានភូមិឃុំស្រុកនិងក្រុមគ្រូពេទ្យ,យុវជនសសយក និងកាកបាទក្រហមកម្ពុជាបានចុះជួបផ្ទាល់ សួរសុខទុក្ខ និងនាំយកនូវអំណោយសង្គ្រោះបន្ទាន់ ចែកជូនដល់ប្រជាពលរដ្ឋដែលរងគ្រោះដោយសារទឹកជំនន់ចំនួន ៧៦ គ្រួសារ ស្ថិតក្នុងមូលដ្ខានស្រុកលេីកដែកខេត្តកណ្តាល នាថ្ងៃទី១៦ ខែតុលា ឆ្នាំ ២០២៥ នេះ។ ក្នុងឱកាសនេះឯកឧត្តម ហេងរតនា ប្រធានក្រុមការងាររាជ រដ្ឋា ភិបាលចុះមូលដ្ឋានស្រុកលើកដែកខេត្តកណ្តាលបានលើកឡើងបណ្តាំផ្ញើការសួរសុខទុក្ខពីសំណាក់សម្តេចធិបតីនាយករដ្ឋមន្រ្តីនៃកម្ពុជា ដែលតែងតែគិតគូរ និងយក ចិត្តទុកដាក់អំពីសុខទុក្ខ និង ការលំបាករបស់ប្រជាពលរដ្ឋទូទាំងប្រទេស ក៏ដូចជាប្រជាពលរដ្ឋនៅក្នុងស្រុកលេីកដែកផងដែរ។ ក្នុងនាមក្រុមការងាររាជរដ្ឋាភិបាល ឯកឧត្តម ហេង រតនា បានចូលរួមសោកស្តាយចំពោះប្រជាពលរដ្ឋដែលរងគ្រោះដោយសារទឹកជំនន់លិចលង់ផ្ទះសម្បែង ដី ស្រែ ចម្ការ និងខូចខាតភោគផលដំណាំ ។ ដោយបានលេីកទឹកចិត្តបង ប្អូនប្រជាពលរដ្ឋត្រូវខិតខំបន្ដការដាំដុះដំណាំឡេីងវិញក្រោយរដូវទឹកសម្រកដេីម្បីបានចំណូលផ្គត់ផ្គង់ជីវភាពគ្រួសារ ។ក្រៅពីកោតសរសើរដល់អាជ្ញាធរស្រុកស្រុកលេីកដែកគ្រប់លំដាប់ថ្នាក់ កងកម្លាំងប្រដាប់អាវុធគ្រប់ប្រភេទ ព្រះសង្ឃ ក្រុមយុវជនទាំងអស់ដែលបានចូលរួមជួយសង្រ្គោះប្រជាជននៅតំបន់រងគ្រោះ ដែលជាការបង្ហាញនូវកម្លាំងសាមគ្គីភាពដ៏រឹងមាំ និងទូលំទូលាយនោះ ឯកឧត្តម ហេងរតនាក៏បានជម្រុញឲ្យប្រជាពលរដ្ឋទាំងអស់ត្រូវបង្កើនការប្រុងប្រយត្ន័ឲ្យបានខ្ពស់នៅក្នុងរដូវទឹកឡើងនេះ ជាពិសេសក្មេងតូចៗ ប្រុងប្រយ័ត្នកុំឲ្យធ្លាក់ទឹកនិងលេងទឹកអាចបណ្ដាលឲ្យមានគ្រោះថ្នាក់ដល់អាយុជីវិត ។ ព្រមទាំងបានអំពាវនាវដល់អាជ្ញាធរ និងបងប្អូនប្រជាពលរដ្ឋទាំងអស់សូមប្រកាន់ខ្ជាប់នូវការអនាម័យដើម្បីជៀសវាងកើតមានជំងឺផ្សេងៗ។ជាមួយគ្នានេះផងដែរ សូមអាជ្ញាធរមូលដ្ឋានបន្តតាមដាន និងជួយដល់គ្រួសារដែលនៅតែជួបការលំបាក ព្រមទាំងត្រៀមបន្តជួយផ្តល់ការគាំទ្រដល់គ្រួសាររងផលប៉ះពាល់ទាំងអស់ក្រោយទឹកសម្រកដើម្បីស្តារជីវភាពឡេីងវិញ ។សូមជម្រាបថា ក្នុងអំឡុងពេលនៃដើមខែតុលា ឆ្នាំ២០២៥ នេះ ក្នុងមូលដ្ឋានស្រុកលើកដែក ក៏មិនខុសពីតាមបណ្តាស្រុក-ខេត្តមួយ ចំនួនដែលនៅស្របតាមបណ្តោយដងទន្លេមេគង្គ គឺមានភ្លៀងធ្លាក់ខ្លាំងជាប់គ្នាច្រើនថ្ងៃបណ្តាលឲ្យទឹកទន្លេ និងបឹងឡើងលើសកម្រិតធម្មតា ដែលបណ្តាលឲ្យមានជំនន់ទឹកភ្លៀងនៅតំបន់ជាច្រើនក្នុងឃុំទាំង ៧ របស់ស្រុកលើក ដែកខេត្តកណ្តាលនេះ។បើតាមរបាយការណ៍ពីអាជ្ញាធរស្រុកលើកដែកខេត្តកណ្តាលបានឲ្យដឹងថា ផលប៉ះពាល់ និង ការខូចខាតបណ្តាមកពីទឹកជំនន់នេះបានប៉ះពាល់ផ្នែកសង្គមកិច្ចចំនួនភូមិរងគ្រោះ២៤ភូមិ លើ ៧ ឃុំ។ គ្រួសាររងគ្រោះសរុប ២៦៣គ្រួសារ ក្នុងនោះគ្រួសាររងគ្រោះលិច លង់កម្រិតស្រាល មានចំនួន ១៨៧ គ្រួសារ ។ គ្រួសាររងគ្រោះលិចលង់កម្រិតធ្ងន់មានចំនួន៧៦ គ្រួសារនិងមានគ្រួសារជម្លៀស ៣២ គ្រួសារ។រីឯផលប៉ះពាល់ផ្នែកហេដ្ឋារចនាសម្ព័ន្ធវិញ គឺលិចផ្លូវកៅស៊ូប្រវែង ៧០ ម៉ែត្រ,លិចផ្លូវបេតុង ប្រវែង ៨៥០ ម៉ែត្រ,លិចផ្លូវដី ក្រហមប្រវែង ៨,៥៦៧ ម៉ែត្រ,លិចផ្លូវដីស ប្រវែង ជិត១៩ ពាន់ ម៉ែត្រ,។និង ផលប៉ះពាល់ផ្នែកកសិកម្មដំណាំ រួមផ្សំរងការប៉ះពាល់ចំនួន១,២៨៥ ហិកតា និង រងការខូចខាតចំនួន ១០៨ ហិកតា។ដំណាំបន្លែរងការប៉ះពាល់ចំនួន ១៣៣ ហិកតានិងរងការខូចខាតចំនួន ៣៥ ហិកតា៕ អត្ថបទ. ភារម្យ

រដ្ឋមន្រ្តីក្រសួងយុត្តិធម៌ ធ្វើអធិបញ្ជាឱ្យព្រះរាជអាជ្ញាប្តឹងឧទ្ធរណ៍ចំពោះសាលក្រមព្រហ្មទណ្ឌ ករណី ជនជាប់ចោទ ឈ្មោះ ហ៊ុន ហេង

ឯកឧត្តម កើត រិទ្ធ ឧបនាយករដ្ឋមន្រ្តី រដ្ឋមន្រ្តីក្រសួងយុត្តិធម៌ បានធ្វើអធិបញ្ជាឱ្យព្រះរាជអាជ្ញាប្តឹងឧទ្ធរណ៍ចំពោះសាលក្រមព្រហ្មទណ្ឌលេខ ៣៨០៩ "ភ" ចុះថ្ងៃទី ១៤-១០-២០២៥ របស់សាលាដំបូងរាជធានីភ្នំពេញ ដែលសម្រេចផ្តន្ទាទោសលើជនជាប់ចោទឈ្មោះ ហ៊ុន ហេង ភេទប្រុស អាយុ ៦១ឆ្នាំ ដាក់ពន្ធនាគារ កំណត់រយៈពេល ០៣ (បី) ឆ្នាំ ដោយទោសនេះត្រូវអនុវត្តទោសក្នុងពន្ធនាគាររយៈពេល ១ឆ្នាំ ទោសសល់ពីនេះ ត្រូវព្យួរ និងពិន័យជាប្រាក់ចំនួន ៤ ០០០ ០០០ (បួនលាន) រៀល ពីបទ បើកបរបង្កគ្រោះថ្នាក់ចរាចរណ៍ បណ្តាលឱ្យស្លាប់ និងរបួសអ្នកដទៃ ប្រព្រឹត្តនៅចំណុចមុខ ក្រសួងវប្បធម៌ និងវិចិត្រសិល្បៈ មហាវិថីព្រះនរោត្តម ភូមិ១០ សង្កាត់ទន្លេបាសាក់ ខណ្ឌចំការមន រាជធានីភ្នំពេញ កាលពីថ្ងៃទី១៥ ខែឧសភា ឆ្នាំ២០២៥ ។ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ បានជម្រាបមក ឯកឧត្តម ច្រឹង ខៅ្ម ព្រះរាជអាជា្ញ នៃអយ្យការអមសាលាដំបូងរាជធានីភ្នំពេញ តាម កម្មវត្ថុ៖ ការធ្វើអធិបញ្ញាឱ្យប្តឹងឧទ្ធរណ៍តាមកំណត់ច្បាប់ចំពោះសាលក្រមព្រហ្មទណ្ឌលេខ ៣៨០៩ ”ភ” ចុះថ្ងៃទី ១៤-១០-២០២៥ របស់សាលាដំបូងរាជធានីភ្នំពេញ។យោង ៖ មាត្រា ២៩ នៃក្រមនីតិវិធីព្រហ្មទណ្ឌ នៃព្រះរាជាណាចក្រកម្ពុជា។ តបតាមកម្មវត្ថុ និងយោងខាងលើ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ បានជម្រាប ឯកឧត្តម ព្រះរាជអាជា្ញ ជ្រាបថា កាលពីថ្ងៃទី ១៥-០៥-២០២៥ ស្ថិតនៅចំណុចមុខក្រសួងវប្បធម៌ និងវិចិត្រសិល្បៈ មហាវិថីព្រះនរោត្តម ភូមិ១០ សង្កាត់ទន្លេបាសាក់ ខណ្ឌ ចំការមន រាជធានីភ្នំពេញ, ឈ្មោះ ហ៊ុន ហេង ភេទប្រុស បានបើករថយន្តមួយគ្រឿងម៉ាក Lexus RX4ooh ពណ៌ទឹកមាស ពាក់ផ្លាកលេខ ភ្នំពេញ ២AQ-២១៨៨ ស្ថិតក្នុងស្ថានភាពស្រវឹង ដោយបានបុកពីក្រោយយានយន្ត ចំនួន ៥គ្រឿង បណ្តាលឱ្យមានមនុស្សស្លាប់ចំនួន ១នាក់ និងរងរបួសធ្ងន់និងស្រាលមួយចំនួន ព្រមទាំង បង្កឱ្យមានការខូចខាតដល់យានយន្ត និងទ្រព្យសម្បត្តិមួយចំនួនផងដែរ។ ចំពោះសំណុំរឿងនេះ, សាលាដំបូង រាជធានីភ្នំពេញបានសម្រេចផ្តន្ទាទោសឈ្មោះ ហ៊ុន ហេង ដាក់ពន្ធនាគារកំណត់ ៣ឆ្នាំ តែទោសនេះអនុវត្តក្នុង ពន្ធនាគារ ១ឆ្នាំ ទោសសល់ពីនេះត្រូវព្យួរ និងពិន័យជាប្រាក់ចំនួន ៤លានរៀល ពីបទបើកបរបង្កគ្រោះថ្នាក់ចរាចរណ៍ បណ្តាលឱ្យស្លាប់ និងរបួសអ្នកដទៃ តាមសាលក្រមព្រហ្មទណ្ឌលេខ ៣៨០៩ "ភ” ចុះថ្ងៃទី ១៤-១០-២០២៥។ក្រសួងយុត្តិធម៌ ពិនិត្យឃើញថា អង្គហេតុខាងលើមានមនុស្សស្លាប់ និងរងរបួសច្រើននាក់ ព្រមទាំងយានយន្ត និងទ្រព្យសម្បត្តិជាច្រើនរងការខូចខាត ដែលបានបង្កឱ្យមានភាពវឹកវរដល់សណ្ដាប់ធ្នាប់សាធារណៈ។អាស្រ័យហេតុនេះ, យោងតាមមាត្រា ២៩ នៃក្រមនីតិវិធីព្រហ្មទណ្ឌនៃព្រះរាជាណាចក្រកម្ពុជា, ក្រសួងយុត្តិធម៌ សូមចេញអធិបញ្ញាឱ្យ ឯកឧត្តម ធ្វើបណ្ដឹងឧទ្ធរណ៍ចំពោះសាលក្រមព្រហ្មទណ្ឌលេខ ៣៨០៩ “ភ” ចុះថ្ងៃទី ១៤-១០-២០២៥ របស់សាលាដំបូងរាជធានីភ្នំពេញខាងលើ ស្របតាមនីតិវីធីជាធរមាន ដើម្បីធានាដល់ការពង្រឹងការអនុវត្តច្បាប់នៅព្រះរាជាណាចក្រកម្ពុជា៕

ក្រសួងសាធារណការ និងដឹកជញ្ជូន បានដាក់ឱ្យប្រើប្រាស់ជាផ្លូវការ «ប្រព័ន្ធស្វ័យប្រវត្តិកម្មនៃការដាក់ពាក្យស្នើសុំលិខិត អនុញ្ញាតធ្វើអាជីវកម្មដឹកជញ្ជូនក្នុងប្រទេស និងឆ្លងដែនតាមផ្លូវគោក»

ទីស្តីការក្រសួង៖ នារសៀលថ្ងៃព្រហស្បតិ៍ ទី១៦ ខែតុលា ឆ្នាំ២០២៥ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីប្រកាសដាក់ឱ្យប្រើប្រាស់ជាផ្លូវការ «ប្រព័ន្ធស្វ័យប្រវត្តិកម្មនៃការដាក់ពាក្យស្នើសុំលិខិត អនុញ្ញាតធ្វើអាជីវកម្មដឹកជញ្ជូនក្នុងប្រទេស និងឆ្លងដែនតាមផ្លូវគោក» ដោយមានការចូលរួមពី ឯកឧត្តម លោកជំទាវ ថ្នាក់ដឹកនាំក្រសួង មន្រ្តីពាក់ព័ន្ធ ភ្ញៀវកិត្តិយស និងបណ្តាញអ្នកសារព័ត៌មានជាច្រើនរូប។ប្រព័ន្ធស្វ័យប្រវត្តិកម្មនៃការដាក់ពាក្យស្នើសុំលិខិត អនុញ្ញាតធ្វើអាជីវកម្មដឹកជញ្ជូនក្នុងប្រទេស និងឆ្លងដែនតាមផ្លូវគោក ជាប្រព័ន្ធបច្ចេកវិទ្យា ដែលអនុញ្ញាតឱ្យអ្នកប្រើប្រាស់ធ្វើការស្នើរសុំលិខិតអនុញ្ញាតតាមប្រព័ន្ធអនឡាញ ក្នុងនោះមានលិខិតអាជីវកម្មដឹកជញ្ជូនផ្លូវគោកក្នុងប្រទេស (ដឹកទំនិញ) អាជីវកម្មដឹកជញ្ជូនផ្លូវគោកឆ្លងដែន និងអាជីវកម្មដឹកជញ្ជូនសាធារណៈ(ដឹកអ្នកដំណើរ)។ នេះជាសមិទ្ធផលថ្មីមួយទៀតរបស់ក្រសួងសាធារណការ និងដឹកជញ្ជូន ក្នុងការធ្វើទំនើបកម្ម ការផ្តល់សេវាសាធារណៈជូនប្រជាពលរដ្ឋ ដោយផ្តោតលើប្រតិបត្តិករដឹកជញ្ជូន ដែលនេះមិនត្រឹមតែជាការធ្វើឱ្យប្រសើរឡើងនូវនីតិវិធីរដ្ឋបាលប៉ុណ្ណោះទេ តែជាការបោះជំហានដ៏ធំមួយក្នុងការធ្វើបរិវត្តកម្មឌីជីថលនៅសម័យកាលបដិវត្តន៍ឧស្សាហកម្មទី៤ នៅក្នុងវិស័យសាធារណការ និងដឹកជញ្ជូន ស្របតាមមាគ៌ាដឹកនាំដ៏ឈ្លាសវៃរបស់ប្រមុខរាជរដ្ឋាភិបាលកម្ពុជា។ថ្លែងក្នុងអង្គពិធី ឯកឧត្តមរដ្ឋមន្ត្រី បានលើកឡើងថា ប្រវត្តិកម្មថ្មីនេះ គឺជាសមិទ្ធផលថ្មីមួយទៀតរបស់ក្រសួងសាធារណការ និងដឹកជញ្ជូនក្នុងការ ធ្វើទំនើបកម្មការផ្តល់សេវាសាធារណៈ ជូនប្រជាពលរដ្ឋដោយផ្តោតលើប្រតិបត្តិករដឹកជញ្ជូន ដែលនេះមិនត្រឹមតែជាការធ្វើឱ្យប្រសើរឡើងនូវនីតិវិធីរដ្ឋបាលប៉ុណ្ណោះទេ តែជាការបោះជំហាន ដ៏ធំមួយក្នុងការធ្វើបរិវត្តកម្មឌីជីថលនៅសម័យកាលបដិវត្តន៍ឧស្សាហកម្មទី៤ នៅក្នុងវិស័យ សាធារណការនិងដឹកជញ្ជូន ស្របតាមមាគ៌ាដឹកនាំដ៏ឈ្លាសវៃរបស់ប្រមុខរាជរដ្ឋាភិបាលកម្ពុជា។ឯកឧត្តមរដ្ឋមន្ត្រីបានថ្លែងអំណរគុណ និងវាយតម្លៃខ្ពស់ចំពោះកិច្ចខិតខំប្រឹងប្រែង របស់ថ្នាក់ដឹកនាំទទួលបន្ទុក អគ្គនាយកដ្ឋានដឹកជញ្ជូនផ្លូវគោក អគ្គនាយកដ្ឋានបច្ចេកវិទ្យា និង ទំនាក់ទំនងសាធារណៈ ព្រមទាំងមន្ត្រីបច្ចេកទេសរបស់ក្រសួង ដែលបានយកចិត្តទុកដាក់ចូលរួម អនុវត្តការងាររបស់ក្រសួងនាពេលកន្លងមក ជាពិសេស បានចូលរួមសហការគ្នាយ៉ាងល្អប្រសើរ ក្នុងការគ្រប់គ្រង និងធ្វើបច្ចុប្បន្នភាពប្រព័ន្ធស្វ័យប្រវត្តិកម្មដែលមានស្រាប់ និងការរិះរកវិធីសាស្ត្រ ថ្មីៗបង្កើតនូវប្រព័ន្ធស្វ័យប្រវត្តិកម្មថ្មីនេះ ដែលមានមុខងារគ្របដណ្តប់ និងសុវត្ថិភាពខ្ពស់សម្រាប់ បម្រើដល់ សេវាសាធារណៈរបស់ក្រសួងប្រកបដោយប្រសិទ្ធភាព។គួរបញ្ជាក់ថា៖ ក្រសួងបានដាក់ដំណើរការប្រព័ន្ធស្វ័យប្រវត្តិកម្មចាប់ពីឆ្នាំ២០១៧ ដែលមានដូចជា ប្រព័ន្ធដាក់ពាក្យចុះបញ្ជី យានជំនិះ ប្រព័ន្ធត្រួតពិនិត្យលក្ខណៈបច្ចេកទេសយានជំនិះ ប្រព័ន្ធដាក់ពាក្យប្រឡងយកបណ្ណបើកបរ រួមជាមួយនឹងប្រព័ន្ធលេខពិសេសផ្ទាល់ខ្លួនសម្រាប់រថយន្ត និងលេខពិសេសផ្ទាល់ខ្លួនសម្រាប់ទោចក្រយានយន្ត ត្រីចក្រយានយន្ត និងម៉ូតូកង់បួន ដែលបាននិង កំពុងធ្វើការផ្លាស់ប្តូររបៀបរបបការងារ និងការផ្តល់សេវាសាធារណៈនៅក្នុងវិស័យសាធារណការ និងដឹកជញ្ជូន ឆ្ពោះទៅកាន់ការធ្វើបរិវត្តកម្មឌីជីថលពេញលេញ ក្នុងគោលដៅផ្តល់ភាពងាយស្រួល ដល់បងប្អូនប្រជាពលរដ្ឋ កាត់បន្ថយនីតិវិធីស្មុគស្មាញ ចំណេញពេលវេលា និងលុបបំបាត់ ចំណាយក្រៅផ្លូវការប្រកបដោយជំនឿទុកចិត្ត និងប្រសិទ្ធភាពខ្ពស់។

កិច្ចប្រជុំថ្នាក់រដ្ឋមន្ត្រីអាស៊ាន ស្តីពីការគ្រប់គ្រងគ្រោះមហន្តរាយអាស៊ានបូកជប៉ុន លើកទី៥ ផ្តល់មូលដ្ឋានគ្រឹះរឹងមាំសម្រាប់កិច្ចសហការការងារគ្រោះមហន្តរាយ នាពេលខាងមុខ

ភ្នំពេញ៖ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្ដ្រី អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ និងជាប្រធានAMMDM លើកទី៤៧ និង ឯកឧត្តម KAMBARA NORIFUMI អនុរដ្ឋមន្រ្តី ក្រសួងគ្រប់គ្រងគ្រោះមហន្តរាយ ប្រទេសជប៉ុន ជាសហប្រធាន បានអញ្ជើញដឹកនាំ និងសម្របសម្រួលក្នុងកិច្ចប្រជុំថ្នាក់រដ្ឋមន្ត្រីអាស៊ាន ស្តីពីការគ្រប់គ្រងគ្រោះមហន្តរាយអាស៊ានបូកជប៉ុន លើកទី៥ នៅរាជធានីភ្នំពេញ។ថ្លែងមុនបញ្ចប់កិច្ចប្រជុំនេះ ឯកឧត្តម ទេសរដ្ឋមន្រ្តី បានសម្តែងនូវអំណរគុណ ចំពោះការចូលរួមចំណែកនូវទស្សនៈដ៏មានតម្លៃរបស់ ឯកឧត្តម លោកជំទាវ អស់លោក លោកស្រី និងភ្ញៀវកិត្តិយសទាំងអស់ ទៅលើវឌ្ឍនភាពដែលទទួលបាន ក្នុងការពង្រឹងភាពជាដៃគូ ដែលជាសក្ខីភាពសម្រាប់ការប្តេជ្ញាចិត្តរួមគ្នាយ៉ាងសកម្មពីបណ្តារដ្ឋមន្រ្តីទាំងអស់។ ឯកឧត្តម ទេសរដ្ឋមន្រ្តី មានប្រសាសន៍ទៀតថា លទ្ធផលនៃកិច្ចប្រជុំនៅថ្ងៃនេះនឹងផ្តល់នូវមូលដ្ឋានគ្រឹះដ៏រឹងមាំ សម្រាប់កិច្ចសហការនាពេលអនាគត និងវឌ្ឍនភាពលើការគ្រប់គ្រងគ្រោះមហន្តរាយ។ ឯកឧត្តម ទេសរដ្ឋមន្រ្តី លើកឡើងថា អស់រយៈពេលប៉ុន្មានឆ្នាំកន្លងមកនេះ អាស៊ានបានធ្វើសាក្សីលើភាពរីកចម្រើនសំខាន់ៗ ទាំងកិច្ចសហប្រតិបត្តិការក្នុងតំបន់ និងសមត្ថភាពក្នុងការដោះស្រាយបញ្ហាប្រឈមលើការងារគ្រប់គ្រងគ្រោះមហន្តរាយ។ ក្នុងនោះ ការអនុវត្តជោគជ័យ នៃគម្រោងសំខាន់ៗស្ថិតក្រោមអាស៊ាន ដូចជាប្រព័ន្ធភស្តុភាសង្គ្រោះបន្ទាន់ គ្រោះមហន្តរាយសម្រាប់អាស៊ាន (DELSA) និងក្រុមប៉ាន់ប្រមាណ និងឆ្លើយតប គ្រោះអាសន្នអាស៊ាន (ASEAN-ERAT) គឺជាសក្ខីភាពមួយចំពោះការប្តេជ្ញាចិត្តរួមលើសន្តិភាព វិបុលភាព និងការអភិវឌ្ឍន៍ប្រកបដោយចីរភាពនៅក្នុងតំបន់ ជាពិសេសក្នុងការ គ្រប់គ្រងគ្រោះមហន្តរាយ។ឯកឧត្តម ទេសរដ្ឋមន្ត្រី បានធ្វើការកត់សម្គាល់ចំពោះវឌ្ឍនភាពដែលបានអនុវត្ត ក្នុងការធ្វើឱ្យប្រសើរឡើងនូវសមាហរណកម្មប្រព័ន្ធព័ត៌មាន ទូរគមនាគមន៍ និងបច្ចេកវិទ្យា (ICT) របស់មជ្ឈមណ្ឌល-អាហា និង កម្មវិធីប្រតិបត្តិនៃមជ្ឈមណ្ឌលអាហា៖ ភាពជាអ្នកដឹកនាំក្នុងកម្មវិធីគ្រប់គ្រងគ្រោះគ្រោះមហន្តរាយ និងគ្រោះអាសន្ន (ACE-LEDMP) ព្រមទាំងបានឆ្លុះបញ្ចាំងពីការតភ្ជាប់គ្នារបស់អាស៊ាន ដែលដើរតួនាទីយ៉ាងសំខាន់ ក្នុងការប្រាស្រ័យទាក់ទង និងការសម្របសម្រួលប្រកបដោយប្រសិទ្ធភាព ក្នុងចំណោមភ្នាក់ងារឆ្លើយតបគ្រោះមហន្តរាយ និងសហគមន៍ដែលរងផលប៉ះពាល់។ឯកឧត្តម ទេសរដ្ឋមន្រ្តី ថ្លែងថា កិច្ចខិតខំប្រឹងប្រែងរួមគ្នា និងភាពជាដៃគូយុទ្ធសាស្ត្ររវាងអាស៊ាន និង ជប៉ុន ក្នុងរយៈពេលប៉ុន្មានឆ្នាំកន្លងមកនេះ បានពង្រឹង និងជួយជំរុញឱ្យមានការ ជឿនលឿនយ៉ាងសំខាន់ ក្នុងការសម្របសម្រួល និងកិច្ចសហប្រតិបត្តិការលើការងារគ្រប់គ្រងគ្រោះមហន្តរាយ ខណៈកិច្ចសហប្រតិបត្តិការនេះនឹងមានលទ្ធភាពបន្តបន្ថែមទៀតសម្រាប់វឌ្ឍនភាព ក៏ដូចជាត្រួសត្រាយផ្លូវដ៏លំបាកឆ្ពោះទៅកាន់អនាគតប្រកបដោយសុវត្ថិភាព, ភាពធន់ជាងមុន និងចីរភាព។ក្នុងនាមប្រទេសជាសមាជិកអាស៊ាន ឯកឧត្តម ទេសរដ្ឋមន្រ្តី សូមថ្លែងអំណរគុណចំពោះរដ្ឋាភិបាលជប៉ុន និងសូមប្តេជ្ញាចិត្តធ្វើការយ៉ាងជិតស្និទ្ធជាមួយប្រទេសជប៉ុន ដើម្បីធានាបាននូវការអនុវត្តប្រកបដោយជោគជ័យស្របតាមស្មារតីនៃកិច្ចសហប្រតិបត្តិការ អាស៊ាន-ជប៉ុនដើម្បីជាលទ្ធភាពគាំទ្រដល់ការរៀបចំបង្កើតផែនការសម្រាប់ការគ្រប់គ្រងគ្រោះនៃការងារអាស៊ាន-ជប៉ុន មហន្តរាយ ឆ្នាំ២០២៦-២០៣០ ស្របតាមកម្មវិធីការងារអាត់ម៊ែរ ឆ្នាំ២០២៦-២០៣០៕

បណ្ដាញសង្គម

ព័ត៌មានថ្មីៗ

មេដឹកនាំអូស្រ្តាលី និងសិង្ហបុរី សន្យាជំរុញទំនាក់ទំនងថាមពល ដើម្បីធានាការផ្គត់ផ្គង់សកល

EU អំពាវនាវឲ្យបញ្ឈប់ការវាយប្រហារជាបន្ទាន់ នៅលីបង់ និងជំរុញឲ្យការការពារជនស៊ីវិល

វិមានក្រឹមឡាំង៖ ទស្សនកិច្ចដោយប្រេសិត នៅអាមេរិក មិនមានន័យថា ការចរចាអ៊ុយក្រែន ចាប់ផ្តើមវិញឡើយ

អ៊ីស្រាអែលគំរាមវាយប្រហាររថយន្តសង្គ្រោះបន្ទាន់ នៅលីបង់ ដោយចោទថា ត្រូវបានក្រុមហេសបូឡាប្រើប្រាស់

អនុប្រធានាធិបតីសហរដ្ឋអាមេរិកនិយាយថា លោករំពឹងថាជំនួបអ៊ីរ៉ង់នឹងវិជ្ជមាន

ហេតុការណ៍លិចទូកក្រោយបុកស្ពានបណ្តែតនៅភាគខាងជើងឥណ្ឌាសម្លាប់មនុស្សយ៉ាងហោច ១០នាក់

អ៊ីរ៉ង់ខាតបង់ ១៤៥ពាន់លានដុល្លារ និងរងការបំផ្លិចបំផ្លាញយ៉ាងធំធេង ក្រោយសង្គ្រាម ៤០ថ្ងៃ

សាធារណជនកោះតៃវ៉ាន់មានការបែងចែកចំពោះដំណើរទស្សនកិច្ចរបស់មេដឹកនាំប្រឆាំងទៅកាន់ចិនដីគោក

លោក Macron ចង់បញ្ចុះបញ្ចូលលោក Trump នៅ G7 ដោយការអញ្ជើញក្រោយកិច្ចប្រជុំកំពូលឲ្យទៅវិមាន Versailles

ការវាយប្រហារយានដ្រូនរុស្ស៊ីបណ្តាលឲ្យកើតមានអគ្គិភ័យនៅតំបន់ Odesa របស់អ៊ុយក្រែន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877