BTV NEWS

កាកបាទក្រហមកម្ពុជាផ្តល់អំណោយ និងរៀបចំអាហារមួយពេល ជូនអង្គការសង្គ្រោះជនអស់សង្ឃឹម

ឯកឧត្តមរដ្ឋមន្ត្រី ហេង សួរ ចែករំលែកបទពិសោធទាក់ទងក្របខណ្ឌអភិបាលកិច្ច និងការគ្រប់គ្រងគាំពារសង្គមនៅកម្ពុជាដល់គណៈប្រតិភូនៃប្រទេសឡាវ

អាជ្ញាធរក្រុងស្វាយរៀង ចាត់វិធានការទីតាំងចាក់សំរាមមួយកន្លែង ដែលបន្តចាក់សំរាមចោលបង្កផលប៉ះពាល់

ឧបនាយករដ្ឋមន្ត្រី ហ៊ុន ម៉ានី លើកឡើងថា អភិក្រមរបស់ក្រសួងមុខងារសាធារណៈគឺ ការពិគ្រោះយោបល់ឱ្យបានច្រើន

ព័ត៌មានជាតិ

ឧត្តមសេនីយ៍ទោ ហ៊ុល សំអុន៖កងពលតូចដឹកជញ្ជូនលេខ៩៩បានផ្តល់ឱកាសឲ្យយោធិននារីចូលរួមគ្រប់សកម្មភាពរួមទាំងការងារហ្វឹកហ្វឺន

ភ្នំពេញ ៖ ឧត្តមសេនីយ៍ទោ ហ៊ុល សំអុន មេបញ្ជាការកងពលតូចដឹកជញ្ជូនលេខ៩៩ បានលើកឡើងថា កងពលតូច ដឹកជញ្ជូនលេខ៩៩ បានផ្តល់ឱកាសឲ្យយោធិននារីជាច្រើនចូលរួមគ្រប់សកម្មភាព ក្នុងបេសកកម្មការងារ ការហ្វឹកហ្វឺន និងការរៀនសូត្រជំនាញជាច្រើនទៀត។ក្នុងឱកាសអញ្ជើញជាអធិបតីបើកកិច្ចប្រជុំបូកសរុបរបាយការណ៍ប្រចាំឆ្នាំ២០២៤ លើកិច្ចការងារយេនឌ័រក្នុងកងពលតូចដឹកជញ្ជូនលេខ៩៩ នៅថ្ងៃទី២០ ខែធ្នូ ឆ្នាំ២០២៤នេះ លោកឧត្តមសេនីយ៍ទោ បានលើកឡើងថា ក្រសួងការពារជាតិបានរៀបចំផែនការយុទ្ធសាស្ត្របញ្ជ្រាបយេនឌ័រ ក្នុងកងយោធពលខេមរភូមិន្ទ ដើម្បីជំរុញ និងធានាឲ្យមានសមភាពយេនឌ័រ ធ្វើឲ្យមានការកែប្រែលើវិសមភាពយេនឌ័ររវាងនារី ធ្វើឲ្យមានការកែប្រែរវាងនារី និងបុរសក្នុងការអនុវត្តន៍ការងារ ការទទួលបានឋានន្តរស័ក្តិ តួនាទីក្នុងការធ្វើសេចក្តីសម្រេចចិត្តផ្តល់លទ្ធភាព ដល់ការលើកកម្ពស់ស្ថានភាព និងសមត្ថភាពរបស់យោធិននារី ក្នុងការបំពេញការងារស្នូល នៅក្នុងអង្គភាពដើម្បីឆ្លើយតបសមភាព និងសមធម៌យេនឌ័រ ដើម្បីបង្កើនឲ្យមានការចូលរួមកាន់តែប្រសើរថែមទៀត រវាងនារី និងបុរសក្នុងកងយោធពលខេមរភូមិន្ទ។លោកឧត្តមសេនីយ៍ទោ ហ៊ុល សំអុន បានបន្តទៀតថា ដោយមានការគិតគូពីសំណាក់ថ្នាក់ដឹកនាំក្រសួងការពារជាតិ ស្ថានភាពយេនឌ័រនៅក្នុងកងពលតូចដឹកជញ្ជូនលេខ៩៩ កាន់តែមានភាពល្អប្រសើរឡើង យោធិននារី ត្រូវបានផ្តល់ឱកាសចូលរួមគ្រប់សកម្មភាពទាំងការងារហ្វឹកហ្វឺន រៀនសូត្រ សិក្ខាសាលា សកម្មភាពនានា និងត្រូវបានផ្តល់ឱកាសទទួលបានការតម្លើងឋានន្តរស័ក្តិ តួនារី តាមសមត្ថភាព ចំណេះដឹង និងជំនាញ ទទួលបានការលើកទឹកចិត្ត ព្រមទាំងមានសិទ្ធិស្មើគ្នាក្នុងការធ្វើសេចក្តីសម្រេចតាមតួនាទីដូចបុរសដែរ៕អត្ថបទ ៖ បាន ចក់

តម្លៃហាងឆេងមាសនិងបន្តធ្លាក់ចុះជាបន្ត ស្របពេលប្រាក់ដុល្លារបន្តឡើងថ្លៃ

ភ្នំពេញ ៖ តម្លៃទីផ្សារហាងឆេងមាសជាសកល បន្ទាប់ពីធនាគារកណ្តាលសហរដ្ឋអាមេរិក បានកាត់នូវអត្រាការប្រាក់ដុល្លារ តម្លៃមាស បានធ្លាក់ចុះយ៉ាងខ្លាំង ក្នុងរង្វង់ប្រមាណជាង ៥០ ដុល្លារក្នុងមួយអោន ហើយតម្លៃនេះនឹងអាចស្រុតចុះបន្តបន្ទាប់ទៀត ស្របពេលប្រាក់ ដុល្លាររំពឹងថា និងបន្តឡើងថ្លៃ។ លោក ឈា ឆាយហេង ប្រធានផ្នែកប្រឹក្សាយោបល់ហិរញ្ញវត្ថុ PP Link Securities ថ្លែងលើកឡើងក្នុងកិច្ចសម្ភាសន៍ជាមួយ BTV ស្តីអំពីតម្លៃទីផ្សារហាងឆេងមាសជាសកល ក្នុងពេលបច្ចុប្បន្ននេះថា តម្លៃហាងឆេងមាសមានភាពប្រែប្រួល គឺវាអាស្រ័យទៅលើ ប្រាក់ដុល្លារ ក្នុងនោះប្រសិនប្រាក់ដុល្លារឡើងថ្លៃ ចំណែកទីផ្សារមាសនឹងធ្លាក់ចុះ ជាក់ស្តែងនៅថ្ងៃ ១៨ ខែធ្នូ កន្លងមកនេះ ធនាគារ កណ្តាលសហរដ្ឋអាមេរិក បានប្រកាសកាត់អត្រាការប្រាក់ដុល្លារពី ៤.៧៥ ភាគរយ ទម្លាក់មកនៅត្រឹម ៤.៥០ ភាគរយប៉ុណ្ណោះ ដែលការប្រកាសកាត់អត្រាការប្រាក់នេះ បានធ្វើឱ្យរូបិយវត្ថុដុល្លារបានឡើងថ្លៃ ខណៈដែលតម្លៃហាងឆេងមាសបានធ្លាក់ចុះ។លោក បន្តឱ្យដឹងថា ជុំវិញប្រាក់ដុល្លារនេះ បើយោងតាមធនាគារកណ្តាលសហរដ្ឋអាមេរិក នៅក្នុងឆ្នាំ ២០២៥ ខាងមុខនេះ សហរដ្ឋអាមេរិកមិនមានគម្រោងកាត់អត្រាការប្រាក់បន្តទៀតឡើយ, ដូច្នេះនៅពេលធនាគារកណ្តាលសហរដ្ឋអាមេរិក លែងកាត់អត្រា ការប្រាក់ដុល្លារនោះ, ប្រាក់ដុល្លារនឹងឡើងថ្លៃ ហើយនៅក្នុងពេលតែមួយនេះ តម្លៃមាសនឹងធ្លាក់ចុះ។ ចំណែកតទៅមុខទៀត បើធៀប ប្រាក់ដុល្លារទៅនិងមាស ឃើញថា ប្រាក់ដុល្លារនិងអាចបន្តឡើង ចំណែកតម្លៃហាងឆេងមាសអាចនិងបន្តធ្លាក់ចុះថែមទៀត, នឹងអាច ធ្លាក់ចុះដោយសន្សឹមៗ ទៅតាមចំនួនវិនិយោគិនលក់មាសចេញផងដែរ។ ជាក់ស្តែងនៅចុងឆ្នាំនេះ តម្លៃហាងឆេងមាសនិងធ្លាក់ចុះ ចន្លោះពី ២,៦២០ ដល់ក្នុងរង្វង់ ២,៥៦០ ដុល្លារ ក្នុងមួយអោន។ ប៉ុន្តែ, ប្រសិនពិភពលោកមានភាពតាន់តឹងផ្នែកភូមិសាស្រ្ត, នយោបាយ និងការប៉ះទង្គិចសង្គ្រាមណាមួយ ទីផ្សារមាសនឹងអាចហក់ឡើងថ្លៃវិញជាមិនខាន។លោក ឈា ឆាយហេង លើកឡើងបន្ថែមថា ជុំវិញតម្លៃហាងឆេងមាសឡើងឬចុះ វាគឺជាសារមួយបង្ហាញឱ្យពិភពលោកដឹងថា នៅពេលដែលហាងឆេងមាសកើនឡើងខ្លាំង គឺបង្ហាញថា សេដ្ឋកិច្ចពិភពលោកកំពុងជួបវិបត្តិ, ពេលដែលមានសង្គ្រាមក៏តម្លៃហាង ឆេងមាសឡើងថ្លៃ, ពេលរីករាលដាលជំងឺកូវីដ-១៩ ក៏តម្លៃហាងឆេងមាសឡើង, វិបត្តិសេដ្ឋកិច្ចពិភព ក៏តម្លៃហាងឆេងមាសឡើង។ ប៉ុន្តែប្រសិនតម្លៃហាងឆេងមាសបន្តធ្លាក់ថ្លៃ វាក៏ជាសារល្អបង្ហាញពិភពលោកឱ្យដឹងថា ស្ថានភាពសេដ្ឋកិច្ចពិភពលោកបានងើបឡើង ល្អប្រសើរវិញ, តែចំណែកអ្នកអាជីវករ និងអ្នកវិនិយោគលើហាងឆេងមាស ប្រសិនដឹងអំពីទំនោរធ្លាក់ថ្លៃ ពួគគាត់គួរបញ្ចៀសនូវ ហានីភ័យ ដោយលក់នូវតម្លៃខ្ពស់ និងរង់ចាំទិញចូលនូវតម្លៃថោកមកវិញ៕អត្ថបទ៖ សុន រ៉ាឌី

ក្រសួងអភិវឌ្ឍន៍ជនបទចាត់ទុកការថែទាំផ្លូវ ជាការចូលរួមលើកកម្ពស់ជីវភាពប្រជាជនតាមជនបទ

កំពង់ធំ ៖ មន្រ្តីជាន់ខ្ពស់ក្រសួងអភិវឌ្ឍន៍ជនបទ កោតសរសើរដល់នាយកដ្ឋានផ្លូវលំជនបទ ដែលបានថែទាំខួបផ្លូវចំនួន ១ ខ្សែ ប្រវែងជាង ៦ គឺឡូម៉ែត្រ ស្ថិតក្នុងស្រុក ៣ នៃខេត្តកំពង់ធំ បានយ៉ាងល្អប្រសើរ សម្រាប់ការប្រើប្រាស់យូរអង្វែង និងជាការចូលរួមចំណែកជាមួយ រាជរដ្ឋាភិបាល ក្នុងការលើកកម្ពស់គុណភាពផ្លូវនៅជនបទជូនប្រជាពលរដ្ឋ។ឯកឧត្តម ផូ ផារិទ្ធ រដ្ឋលេខាធិការក្រសួងអភិវឌ្ឍន៍ជនបទ និងជាសមាជិកគណៈកម្មាធិការលទ្ធកម្ម លើកឡើងនៅក្នុងការចុះត្រួត ពិនិត្យ វាយតម្លៃបញ្ចប់សុពលភាព លើការងារថែខួបផ្លូវចំនួន ១ខ្សែ ប្រវែង ៦ ១១០ ម៉ែត្រ ក្នុងនោះក្រាលកៅស៊ូ DBST ចំនួន ៦ កំណាត់ ប្រវែងសរុបជិត ៦ ០០០ ម៉ែត្រ និងក្រាលបេតុងចំនួន ១ កំណាត់ ប្រវែង ២០០ ម៉ែត្រ នៅក្នុងស្រុកកំពង់ស្វាយ ប្រាសាទសំបូរ និងស្រុក សណ្តាន់ ខេត្តកំពង់ធំ នៅថ្ងៃទី ២០ ធ្នូ នេះថា ការស្ថាបនា ការស្តារ ការថែទាំ និងការកែលម្អហេដ្ឋារចនាសម្ព័ន្ធរូបវ័ន្ត គឺជាការវិនិយោគ ដ៍ចាំបាច់ ដើម្បីសម្រួលដល់គមនាគមន៍ និងការផ្តល់សេវាសាធារណៈផ្សេងៗ ជូនដល់ប្រជាជនគ្រប់ទិសទីនៅទូទាំងប្រទេស, តាមរយៈ នេះ ក្រសួងអភិវឌ្ឍន៍ជនបទ បានគិតគូរយកចិត្តទុកដាក់យ៉ាងខ្លាំង លើការអភិវឌ្ឍហេដ្ឋារចនាសម្ព័ន្ធរូបវ័ន្ត និងគមនាគមន៍ដឹកជញ្ជូន នៅជនបទ សម្រាប់ផ្តល់ជាប្រយោជន៍ជូនដល់ប្រជាជន។ឯកឧត្តម បន្តថា ជាក់ស្តែងការថែទាំខួបផ្លូវ របស់នាយកដ្ឋានផ្លូវលំជនបទខាងលើនេះ បើមិនមានការគិតគូរ និងដាក់ផែនការច្បាស់ លាស់របស់ក្រសួងនោះទេ ផ្លូវទាំងនេះក៏មិនមានភាពល្អប្រសើរបែបនេះឡើយ ហើយចំណែកអ្នកដែលពិបាក គឺប្រជាជពលរដ្ឋនៅតាម មូលដ្ឋាននេះឯង ។ ដូច្នេះការថែទាំផ្លូវពិតជាមានសារៈសំខាន់ណាស់ ក្នុងការចូលរួមថែទាំផ្លូវឱ្យបានល្អ គង់វង្សយូរអង្វែង ព្រោះ ផ្លូវគឺជា តម្រូវការចាំបាច់ បម្រើដល់ការធ្វើដំណើររបស់សាធារណៈជនគ្រប់ពេលវេលា ជាពិសេសជំរុញចលនាសេដ្ឋកិច្ចនៅតំបន់ជនបទផងដែរ។ទាក់ទិនផ្លូវទាំងនេះផងដែរ, ឯកឧត្តម ផូ ផារិទ្ធ ក៏បានអំពាវនាវដល់អាជ្ញាធរគ្រប់លំដាប់ថ្នាក់ ជាពិសេសអាជ្ញាធរនៅមូលដ្ឋាន និង ប្រជាពលរដ្ឋ សូមចូលរួមថែទាំផ្លូវទាំងនេះឱ្យបានល្អ សម្រាប់ជាប្រយោជន៍ខ្លួនឯង និងបង្ករលក្ខណៈងាយស្រួល សម្រាប់ធ្វើដំណើរទៅ ណាមកណា ក្នុងនោះប្រសិនបើមានផ្លូវល្អយើងអាចធ្វើដំណើរបានលឿន និងទាន់ពេលវេលា ជាពិសេសការកាត់បន្ថយនូវខ្ទង់ចំណាយ ផ្សេងៗផងដែរ។សូមបញ្ជាក់ថា ការអភិវឌ្ឍហេដ្ឋារចនាសម្ព័ន្ធផ្លូវជនបទ ជាតម្រូវការចាំបាច់សម្រាប់ជំរុញចលនាសេដ្ឋកិច្ចនៅតំបន់ជនបទ តាមរយៈការត ភ្ជាប់ផ្លូវជនបទឱ្យមានលក្ខណៈប្រទាក់ក្រឡាគ្នា ជាពិសេសនៅតំបន់ផលិតកម្ម ដើម្បីជួយសម្រួលដល់ការដឹកជញ្ជូន និងការធ្វើគមនាគមន៍ របស់ប្រជាពលរដ្ឋ សម្រាប់ការទំនាក់ទំនងសេដ្ឋកិច្ច និងសង្គម ព្រមទាំងទទួលបានសេវាសាធារណៈនានា នៅគ្រប់រដូវកាល ដោយ ចំណេញពេលវេលា និងកាត់បន្ថយការចំណាយ។ ការអភិវឌ្ឍហេដ្ឋារចនាសម្ព័ន្ធរូបវ័ន្ត និងគមនាគមន៍ជនបទ គឺជាគន្លឹះគាំទ្រដល់រាល់កម្ម វិធីកាត់បន្ថយភាពក្រីក្រនៅតំបន់ជនបទផងដែរ៕ អត្ថបទ៖ សុន រ៉ាឌី

តម្លៃប្រាក់រៀលរក្សាបានលំនឹងល្អ នៅក្នុងរយៈពេល ២ ទសវត្សរ៍ចុងក្រោយនេះ

ក្នុងរយៈពេល ២ ទសវត្សរ៍ចុងក្រោយនេះ តម្លៃប្រាក់រៀលរក្សាបានលំនឹងល្អ ដោយមានតម្លៃក្នុងចន្លោះប្រមាណ ៤.០៥០ រៀល ក្នុងមួយដុល្លារ ដោយបានត្រឹមតែអាចទប់ស្កាត់ការប្រើប្រាស់ប្រាក់ដុល្លារមិនឱ្យកើនឡើងប៉ុណ្ណោះ ខណៈការប្រើប្រាស់ប្រាក់ដុល្លារនៅ កម្ពុជាមិនទាន់ថមថយនៅឡើយ។ឯកឧត្តម យឹម លាត ទេសាភិបាលរងធនាគារជាតិនៃកម្ពុជា ថ្លែងក្នុងសិក្ខាសាលាផ្សព្វផ្សាយស្ដីពី “ប្រាក់រៀល ប្រព័ន្ធបាគង និងខេអេចឃ្យូអរ” នៅខេត្តរតនគីរី នៅថ្ងៃទី ២០ ខែ ធ្នូ នេះថា ទាក់ទិនដុល្លារូបនីយកម្ម, ការប្រើប្រាស់ប្រាក់ដុល្លារអាមេរិកនៅកម្ពុជា បានចាក់ឫសយ៉ាងជ្រៅក្នុងជីវភាពរស់នៅប្រចាំថ្ងៃ ចាប់តាំងពីការមកដល់របស់អ៊ុនតាក់ ក្នុងអំឡុងទស្សវត្សរ៍ទី ៩០, អ៊ុនតាក់ បាននាំ មកនូវថវិកាចំនួន ១.៧ ពាន់លានដុល្លារអាមេរិកមកកម្ពុជា ហើយនៅពេលនោះ ជំនឿចិត្តលើប្រាក់រៀលរបស់ប្រជាជនកម្ពុជា ក៏មាន ភាពទន់ខ្សោយនៅឡើយដែរ។ ក៏ប៉ុន្តែក្នុងរយៈពេល ២ ទសវត្សរ៍ចុងក្រោយនេះតម្លៃប្រាក់រៀលរក្សាបានលំនឹងល្អ ហើយតែបានត្រឹមទប់ ស្កាត់ការប្រើប្រាស់ប្រាក់ដុល្លារមិនឱ្យកើនឡើងតទៅទៀតប៉ុណ្ណោះ។ឯកឧត្តម បន្តថា នេះគឺជាមេរៀនប្រវត្តិសាស្រ្ត ដែលបានបង្ហាញថាការបាត់បង់ទំនុកចិត្តលើប្រាក់រៀល ដែលកើតឡើងត្រឹម រយៈពេលដ៏ខ្លី តែការស្តារទំនុកចិត្តឡើងវិញគឺជាការលំបាក ដោយទាមទារនូវពេលវេលា និងការចូលរួមយ៉ាងសកម្មរបស់ក្រសួង-ស្ថាប័ន វិស័យឯកជន និងជាពិសេសប្រជាពលរដ្ឋយើងទាំងអស់គ្នា។ ដើម្បីឱ្យសេដ្ឋកិច្ចកម្ពុជារឹងមាំ, រាជរដ្ឋាភិបាលកម្ពុជាបានដាក់ចេញនូវ គោលនយោបាយជាច្រើន ជាពិសេសចាប់តាំងពីដើមទសវត្សរ៍ឆ្នាំ ២០០០ មក ក្នុងនោះក៏មានគោលនយោបាយលើកកម្ពស់ការប្រើ ប្រាស់ប្រាក់រៀលផងដែរ ស្របពេលដែលស្ថានភាពម៉ាក្រូសេដ្ឋកិច្ចមានលំនឹងល្អប្រសើរ ក្រោយកម្ពុជាទទួលបានសុខសន្តិភាពពេញ លេញនៅចុងឆ្នាំ ១៩៩៨ ក្រោមនយោបាយឈ្នះ-ឈ្នះ របស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី នៃព្រះ រាជាណាចក្រកម្ពុជា។សូមបញ្ជាក់ថា លទ្ធផលសិក្សាស្រាវជ្រាវរបស់ធនាគារជាតិនៃកម្ពុជា សហការជាមួយ JICA, កាលពីឆ្នាំ២០១៧ បានបង្ហាញថា ប្រាក់ រៀលបានទទួលការទុកចិត្តនិងការប្រើប្រាស់កាន់តែច្រើន ក្នុងជីវភាពប្រចាំថ្ងៃរបស់ប្រជាពលរដ្ឋ ជាពិសេសនៅតាមតំបន់ជនបទ ដែល ប្រាក់រៀលដើរតួនាទីចម្បង និងទូលំទូលាយទាំងក្នុងសកម្មភាពរកប្រាក់ចំណូល ចំណាយ និងសន្សំ។ ជាក់ស្តែងសម្រាប់ខេត្តរតនគិរី ទិន្នន័យស្រាវជ្រាវបង្ហាញថា ទាក់ទិនប្រាក់រៀលនេះ ជាមធ្យមប្រមាណ ៩១% នៃការចំណាយប្រចាំថ្ងៃរបស់ប្រជាជន ត្រូវបានធ្វើឡើង ជាប្រាក់រៀល។ ចំណែកការចំណាយជាប្រចាំ, ធនាគារជាតិនៃកម្ពុជា សហការជាមួយអង្គការ UNDP ក្នុងឆ្នាំ ២០២៣ បានបង្ហាញ ផងដែរថា កម្មករនិយោជិតរោងចក្រ ដែលរស់នៅតាមបណ្តាខេត្ត ចាយវាយប្រចាំថ្ងៃរហូតដល់ទៅ ៩២% នៃចំណាយសរុបជាប្រាក់ រៀល ជាពិសេសទៅលើការស្នាក់នៅ ថ្លៃទឹកភ្លើង ការធ្វើដំណើរជិតឆ្ងាយ អាហារ សំលៀកបំពាក់ និងថ្នាំសង្កូវ។ ចំណែកឯកម្មករ និយោជិត អ្នកដែលរស់នៅទីក្រុង ចាយវាយជាប្រាក់រៀលរហូតដល់ ៨២% នៃចំណាយសរុប។ ដូចនេះ ប្រសិនទាំងអ្នកលក់ និងអ្នក ទិញប្រើប្រាស់ប្រាក់រៀលតែមួយនោះ គឺនឹងអាចជួយដល់ការលក់ដូរ ឱ្យមានភាពឆាប់រហ័ស ងាយស្រួល និងមិនចាំបាច់ពិបាកគិតគូរ ដល់អត្រាប្តូរប្រាក់នោះទេ៕ អត្ថបទ៖ សុន រ៉ាឌី

ក្រុមយុវជនសង្គមស៊ីវិល ស្នើដល់រាជរដ្ឋាភិបាលពន្លឿនច្បាប់ដាក់ក្រុមជ្រុលនិយមនៅក្រៅប្រទេសជាក្រុមភេរវកម្ម

ដើម្បីធានានិរន្តរភាពសុខសន្តិភាពនៅក្នុងប្រទេសកម្ពុជា ក្រុមយុវជនសង្គមស៊ីវិល បានស្នើដល់រាជរដ្ឋាភិបាលពន្លឿនការបង្កើតច្បាប់ដាក់ក្រុមជ្រុលនិយមនៅក្រៅប្រទេសជាក្រុមភេរវកម្ម ខណៈក្រុមជ្រុលនិយមនេះបានបង្កើតយុទ្ធនាការផ្ការីកក្នុងបំណងចង់ផ្ដួលរំលំរាជរដ្ឋាភិបាលស្របច្បាប់។លោក ហេង សំណាង ប្រធានក្រុមយុវជនសង្គមស៊ីវិល នៅថ្ងៃទី២០ ខែធ្នូនេះ បានប្រាប់BTVឱ្យដឹងថា កន្លងមក និងបច្ចុប្បន្ន ក្រុមជ្រុលនិយមមួយក្តាប់តូចនៅក្រៅប្រទេស បានបង្កើតនូវចលនាខុសច្បាប់នានា និងជាពិសេសនៅពេលថ្មីៗនេះ បានបង្កើតយុទ្ធនាការផ្ការីកក្នុងគោលបំណងចង់ផ្ដួលរំលំរាជរដ្ឋាភិបាលស្របច្បាប់ ដែលបានកើតចេញពីឆន្ទះប្រជាពលរដ្ឋខ្មែរបោះឆ្នោតជូន។ លោកបន្តថា ដើម្បីធានានិរន្តរភាពសុខសន្តិភាពក្នុងប្រទេសកម្ពុជាឱ្យនៅស្ថិតស្ថេរគង់វង្ស លោកគាំទ្រពេញទំហឹងចំពោះគំនិតផ្ដួចផ្តើមរបស់សម្តេចតេជោ ហ៊ុន សែន ប្រធានព្រឹទ្ធសភាឱ្យបង្កើតច្បាប់ដាក់ក្រុមជ្រុលនិយមនៅក្រៅប្រទេសជាក្រុមភេរវកម្ម និងស្នើដល់រាជរដ្ឋាភិបាលគួរពន្លឿនការបង្កើតច្បាប់នេះឱ្យបានឆាប់តាមដែលអាចធ្វើទៅបាន ដើម្បីទប់ស្កាត់ចលនាក្រុមជ្រុលនិយម។អ្នកសេដ្ឋកិច្ចក្រៅប្រព័ន្ធបានអះអាងថា ពួកគេមិនស្តាប់តាមការញុះញង់របស់ក្រុមជ្រុលនិយមនៅក្រៅប្រទេសចូលប្រឆាំងរាជរដ្ឋាភិបាលកម្ពុជាស្របច្បាប់នោះទេ ព្រោះក្រោមការដឹកនាំរបស់សម្តេចតេជោ ហ៊ុន សែន អតីតនាយករដ្ឋមន្រ្តីកម្ពុជា និងបច្ចុប្បន្នបន្តមកដល់សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា បានធានានិរន្តរភាពសុខសន្តិភាព ប្រជាពលរដ្ឋរស់នៅសុខស្រួល។ លើសពីនេះ ពួកគេបង្ហាញការគំាទ្រចំពោះគំនិតផ្តួចផ្តើមរបស់សម្តេចតេជោឱ្យបង្កើតច្បាប់ដាក់ក្រុមជ្រុលនិយមនៅក្រៅប្រទេសជាក្រុមភេរវកម្ម។ថ្លែងក្នុងពិធីបើកមហាសន្និបាតមន្ត្រីសង្ឃទូទាំងប្រទេសលើកទី៣២ កាលពីខែវិច្ឆិកាកន្លងទៅ សម្តេចតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា ដែលបានថ្លែងថា «តើគួរដល់ពេលហើយឬនៅ? បងប្អូនជនរួមជាតិ និងក្រុមអ្នកច្បាប់ តាក់តែងច្បាប់ ដើម្បីរៀបចំនូវច្បាប់ដាក់ក្រុមជ្រុលនិយមក្រៅប្រទេស ជាក្រុមភេរវកម្ម»។ បន្ទាប់ពីការថ្លែងនេះ ក្រុមអង្គការស៊ីវិល ប្រជាពលរដ្ឋ និងស្ថានប័នពាក់ព័ន្ធនានា បានប្រកាសគាំទ្រជាបន្តបន្ទាប់ពីគំនិតផ្តួចផ្ដើមរបស់សម្តេចតេជោក្នុងការបង្កើតច្បាប់ដាក់ក្រុមជ្រុលនិយមនៅក្រៅប្រទេសជាក្រុមភេរវកម្ម។ យ៉ាងណាក្តី គិតមកដល់ពេលនេះ ការបង្កើតច្បាប់ដាក់ក្រុមជ្រុលនិយមនៅក្រៅប្រទេសជាក្រុមភេរវកម្ម មិនទាន់បានរាជរដ្ឋាភិបាលយកមកពិភាក្សាក្នុងប្រជុំគណៈរដ្ឋមន្រ្តីនៅឡើយនោះទេ៕ អត្ថបទ៖ទូច សោភ័ណ

ឯកឧត្តម ឌិត ទីណា បន្តលើកទឹកចិត្តដល់ដៃគូអភិវឌ្ឍនានាឲ្យចូលរួមអភិវឌ្ឍន៍វិស័យកសិកម្មកម្ពុជាកាន់តែមានប្រសិទ្ធិភាព

ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានស្នើដៃគូអភិវឌ្ឍនានា ចូលរួមសហការជាមួយក្រសួងកសិកម្ម ក្នុងការធានាសន្តិសុខស្បៀង និងការផ្តល់ផលចំណេញសេដ្ឋកិច្ចដល់ប្រជាកសិករ សំដៅសម្រេចបាននូវគោលនយោបាយរបស់រាជរដ្ឋាភិបាល។ក្នុងឱកាសអញ្ជើញជាអធិបតីក្នុងពិធីសម្ពោធបើកដំណើរការក្របខ័ណ្ឌកម្មវិធីប្រចាំប្រទេសរយៈពេល៥ឆ្នាំ ស្តីពី "Country Programming Framework (CPF 2024-2028)" របស់អង្គការស្បៀង និងកសិកម្មនៃសហប្រជាជាតិប្រចាំកម្ពុជា (FAO) កាលពីល្ងាចថ្ងៃទី១៩ ខែធ្នូកន្លងទៅ ឯកឧត្តមរដ្ឋមន្រ្តី បានសម្តែងនូវការស្វាគមន៍យ៉ាងកក់ក្តៅ និងក្តីសោមនស្សរីករាយក្នុងការចូលរួមកម្មវិធីនេះ និងការចូលរួមពីសំណាក់ថ្នាក់ដឹកនាំក្រសួង តំណាងក្រសួងភាគីពាក់ព័ន្ធ អង្គការដៃគូអភិវឌ្ឍ និងវិស័យឯកជន ដែលជាដៃគូសហប្រតិបត្តិការពេញលេញ និងមានសារៈសំខាន់ក្នុងការគិតគូរពីវិស័យស្បៀង និងកសិកម្មប្រកបដោយប្រសិទ្ធភាព និងមានភាពម្ចាស់ការពិតប្រាកដ។ឯកឧត្តមរដ្ឋមន្ដ្រី បានថ្លែងអំណរគុណយ៉ាងជ្រាលជ្រៅដល់ដៃគូអភិវឌ្ឍទាំងអស់ ដែលជានិច្ចជាកាលបានផ្តល់ការគាំទ្រ និងសហការជាមួយគ្នាសម្រេចបានសមិទ្ធផលជាច្រើនគួរឱ្យកត់សម្គាល់ក្នុងវិស័យកសិកម្មកម្ពុជា។ ឯកឧត្តម បានបញ្ជាក់បន្ថែមថា ក្នុងឆ្នាំ២០២៥ ខាងមុខនេះគឺជាគម្រប់ខួប ៨០ឆ្នាំនៃអង្គការស្បៀង និងកសិកម្មនៃសហប្រជាជាតិ និងគម្រប់ខួប ៧៥ឆ្នាំដែលកម្ពុជាបានចូលជាសមាជិកនៃអង្គការ (FAO) ផងដែរ។នៅចំពោះមុខអង្គពិធី ឯកឧត្តមរដ្ឋមន្ដ្រី បានលើកឡើងពីគោលនយោបាយអាទិភាពក្នុងវិស័យកសិកម្មក្នុងធានាឱ្យបាននូវសន្តិសុខស្បៀង និងនិរន្តរភាពសេដ្ឋកិច្ច និងបរិស្ថានធ្វើយ៉ាងណាឱ្យប្រជាពលរដ្ឋ មានហូប មានប្រើ មានបាន និងមានរហូត ដែលជាការអភិវឌ្ឍកសិកម្ម ដោយគិតគូរច្បាស់លាស់ មានចក្ខុវិស័យវែងឆ្ងាយ និងស្របតាមបរិបទនាពេលបច្ចុប្បន្ន។ ជាយន្តការបន្ទាប់ ឯកឧត្តមរដ្ឋមន្ដ្រី បានលើកទឹកចិត្តដល់ដៃគូអភិវឌ្ឍនានា ចូលរួមសហការជាមួយក្រសួងកសិកម្ម ក្នុងការធានាសន្តិសុខស្បៀង ការផ្តល់អាហារូបត្ថម្ភ ផ្តល់ផលចំណេញសេដ្ឋកិច្ចដល់ប្រជាកសិករ កាត់បន្ថយថ្លៃដើមផលិត ការការពារសុខភាពសាធារណៈ និងនិរន្តរភាពបរិស្ថាន សំដៅសម្រេចបាននូវគោលនយោបាយរបស់រាជរដ្ឋាភិបាល និងមានភាពបន្ស៊ីគ្នាជាមួយគោលដៅរបស់អង្គការសហប្រជាជាតិប្រកបដោយប្រសិទ្ធភាពខ្ពស់៕

សម្ដេចតេជោ ហ៊ុន សែន ទទួលជួបឯកឧត្តម អាគីបា តាខេអូ (Akiba Takeo)ទីប្រឹក្សាសន្តិសុខជាតិ និងជាអគ្គលេខាធិការ នៃអគ្គលេខាធិការដ្ឋានសន្តិសុខជាតិជប៉ុន

នៅព្រឹកថ្ងៃសុក្រ ទី២០ ខែធ្នូ ឆ្នាំ២០២៤ សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រកម្ពុជា បានទទួលជួប ឯកឧត្តម អាគីបា តាខេអូ ទីប្រឹក្សាសន្តិសុខជាតិ និងជាអគ្គលេខាធិការ នៃអគ្គលេខាធិការដ្ឋានសន្តិសុខជាតិជប៉ុន នៅវិមានព្រឹទ្ធសភា រាជធានីភ្នំពេញ។ ជាកិច្ចចាប់ផ្តើម សម្ដេចតេជោ ហ៊ុន សែន បានស្វាគមន៍យ៉ាងកក់ក្តៅចំពោះ ឯកឧត្តម Akiba Takeo និង ប្រតិភូទាំងអស់ ដែលបានអញ្ជើញមកបំពេញទស្សនកិច្ចនៅកម្ពុជា។ សម្តេចតេជោបានសម្តែងនូវក្តីសង្ឃឹមថា ទំនាក់ទំនង និងកិច្ចសហប្រតិបត្តិការរវាងកម្ពុជា-ជប៉ុន នឹងកាន់តែមានការរីកចម្រើន ហើយឈានទៅដល់ការយោគយល់គ្នាកាន់តែច្រើនឡើង តាមរយៈទស្សនកិច្ច និងការពិភាក្សាគ្នានាពេលនេះ។ នៅក្នុងឱកាសជំនួបនេះ ឯកឧត្តម Akiba Takeo បានសម្តែងនូវក្តីសោមនស្សរីករាយ និងការគោរពថ្លែងអំណរគុណយ៉ាងជ្រាលជ្រៅចំពោះ សម្តេចតេជោ ដែលបានឆ្លៀតពេលដ៏មមាញឹកអនុញ្ញាតឱ្យគណៈប្រតិភូ ចូលជួបពិភាក្សាការងារ។ ឯកឧត្តម បានវាយតម្លៃខ្ពស់ចំពោះតួនាទីរបស់សម្តេចតេជោ ក្នុងការដឹកនាំកម្ពុជា ឱ្យមានសន្តិភាព ស្ថិរភាព និងភាពសម្បូររុងរឿង បន្ទាប់ពីកម្ពុជាបានឆ្លងកាត់នូវប្រវត្តិសាស្រ្តសោកដនាកម្មដ៏ជូរចត់កាលពីអតីតកាល។ ឯកឧត្តម បានលើកបន្តដែរថា ក្រោមការដឹកនាំរបស់សម្តេចតេជោ ទំនាក់ទំនងរបស់កម្ពុជា បានបន្តរីកចម្រើន និងពង្រឹងពង្រីកលើគ្រប់វិស័យ រួមទាំងវិស័យសន្តិសុខផងដែរ។ ឆ្លៀតនៅក្នុងឱកាសនោះ ឯកឧត្តមបានជម្រាបជូនសម្តេចតេជោ អំពីការពិនិត្យឡើងវិញនូវយុទ្ធសាស្រ្តសន្តិសុខជាតិរបស់ជប៉ុន ដែលធ្វើឡើងដើម្បីឱ្យស្របទៅតាមការវិវឌ្ឍសភាពការណ៍របស់តំបន់។ យុទ្ធសាស្រ្តនោះក៏នឹងផ្តោតទៅលើកការពង្រឹងកិច្ចសន្ទនាស្ថាបនាជាមួយប្រទេសដៃគូ និងប្រទេសមហាអំណាចធំៗ ដូចជាប្រទេសចិនជាដើម។ នៅក្នុងន័យនេះ ឯកឧត្តម បានគូសបញ្ជាក់ថា បើគ្មានកិច្ចសន្ទនា និងកិច្ចសហការរវាងគ្នា ជាពិសេសជាមួយប្រទេសចិននោះទេ ស្ថិរភាព វិបុលភាព និងការអភិវឌ្ឍនានា ក៏នឹងមិនអាចសម្រេចបានដែរ។ នៅក្នុងបរិបទនេះ ឯកឧត្តម បានលើកឡើងពីការប្តេជ្ញាចិត្តរបស់ជប៉ុន ក្នុងការពង្រឹងកិច្ចសហប្រតិបត្តិការជាមួយកម្ពុជា ក៏ដូចជាជាមួយអាស៊ាន និងបណ្តាប្រទេសមហាអំណាចនានា ដើម្បីស្ថិរភាព និងការអភិវឌ្ឍនៅក្នុងតំបន់។ជាការឆ្លើយតប សម្តេចតេជោ បានថ្លែងអំណរគុណ ឯកឧត្តម Akiba Takeo ចំពោះការវាយតម្លៃខ្ពស់ចំពោះតួនាទីរបស់សម្តេចតេជោ ជាពិសេសនៅក្នុងការបង្រួបបង្រួមជាតិ និងការកសាងនិងរក្សាសន្តិភាព ដែលពុំធ្លាប់មាននៅក្នុងប្រវត្តិសាស្រ្តកម្ពុជាកន្លងមក។ សម្តេចតេជោ បានវាយតម្លៃខ្ពស់ចំពោះភាពរីកចម្រើនជាលំដាប់រវាងកម្ពុជា-ជប៉ុន នៅលើវិស័យនានា និងក្នុងន័យនេះ សម្តេចតេជោ បានសម្តែងនូវក្តីអំណរគុណចំពោះជប៉ុន ក្នុងការគាំទ្រ និងការរួមចំណែកអភិវឌ្ឍកម្ពុជា តាំងពីពេលកម្ពុជាទទួលបានឯករាជ្យ និងពេលបច្ចុប្បន្ន មិនថាជាការកសាងហេដ្ឋារចនាសម្ព័ន្ធ និងការអភិវឌ្ឍប្រព័ន្ធភស្តុភារកម្ម ដូចជាការអភិវឌ្ឍកំពង់ផែក្រុងព្រះសីហនុជាដើម។ ជាមួយនឹងការលើកឡើងនេះ សម្តេចតេជោ បានគូសបញ្ជាក់អំពីតម្លៃសន្តិភាពដែលជាមូលដ្ឋានគ្រឹះបម្រើឱ្យការសម្រេច និងការបន្តការអភិវឌ្ឍសង្គមជាតិ។ សម្តេចតេជោបានលើកឡើងបន្តដោយគូសបញ្ជាក់ថា ការពិនិត្យឡើងវិញនូវយុទ្ធសាស្រ្តសន្តិសុខជាតិរបស់ជប៉ុន ក៏មិនខុសគ្នាអំពីទស្សនទានរបស់កម្ពុជាដែរ ពោលគឺប្រទេសទាំងពីរបានបំណងប្រាថ្នាពង្រឹងសន្តិភាពដូចគ្នា។ សម្តេចតេជោ បានសង្កត់ធ្ងន់ថា បើគ្មានសន្តិភាពនោះទេ យើងមិនចាំចាច់និយាយពីបញ្ហាសិទ្ធិមនុស្ស ប្រជាធិបតេយ្យនិងការអភិវឌ្ឍនោះឡើយ។ នៅក្នុងកិច្ចសហប្រតិបត្តិការវិស័យសន្តិសុខវិញ សម្តេចតេជោ បានថ្លែងអំណរគុណចំពោះជប៉ុន ដែលបានបញ្ជូនកងស្វ័យការពារជប៉ុន (JSDF) ចូលរួមនៅក្នុងប្រតិបត្តិការរក្សាសន្តិភាព (PKO) អង្គការសហប្រជាជាតិ នៅកម្ពុជានៅឆ្នាំ១៩៩២ ដែលកាលនោះ សម្តេចតេជោ បានចេញមុខគាំទ្រ ទោះបីជាទទួលរងនូវការទិតៀនពីមជ្ឈដ្ឋាន និងពីប្រទេសមួយចំនួននៅក្នុងតំបន់ក៏ដោយ។ សម្តេចតេជោ បានលើកបន្តថា ទំនាក់ទំនងនៅក្នុងវិស័យការពារជាតិ ទាំងជើងទឹក និងជើងគោក ក៏មានភាពកាន់តែល្អប្រសើរឡើង ដែលទាំងអស់នេះបានឆ្លុះបញ្ចាំងអំពីភាពជាដៃគូយុទ្ធសាស្រ្តគ្រប់ជ្រុងជ្រោយរវាងប្រទេសទាំងពីរ។ ជាមួយគ្នានេះ សម្តេចតេជោ បានលើកឡើងថា កម្ពុជានឹងអនុញ្ញាតឱ្យនាវាជប៉ុនចូលចតមុនគេនៅកំពង់ផែរាម បន្ទាប់ពីការសាងសង់រួចរាល់ហើយ។ បន្ថែមពីលើនេះ សម្តេចតេជោ បានវាយតម្លៃខ្ពស់ចំពោះតួនាទីរបស់ជប៉ុននៅក្នុងតំបន់ ដោយសង្កេតឃើញថា ប្រទេសក្នុងតំបន់បានចាត់ទុកជប៉ុនជាដៃគូល្អ និងបានគិតគូរអំពីផលប្រយោជន៍របស់ប្រទេសនានាក្នុងតំបន់ រួមទាំងការគោរពនូវមជ្ឈភាពអាស៊ាន។ នៅក្នុងន័យនេះ សម្តេចតេជោ បានលើកឡើងអំពីការគំាទ្ររបស់កម្ពុជាចំពោះយុទ្ធសាស្រ្តឥណ្ឌូ-ប៉ាស៊ីហ្វិកសេរី និងបើកចំហរបស់ជប៉ុន។ ដោយសង្កេតឃើញថា មានប្រទេសជាច្រើនបានដាក់ចេញនូវយុទ្ធសាស្រ្តឥណ្ឌូ-ប៉ាស៊ីហ្វិក និងគំនិតផ្តួចផ្តើមផ្សេងៗ មកក្នុងតំបន់នោះ សម្តេចតេជោ បានបញ្ជាក់ឡើងវិញថា កម្ពុជានឹងគាំទ្រនូវរាល់យុទ្ធសាស្រ្តនិងគំនិតផ្តួចផ្តើមនានា ឱ្យតែយុទ្ធសាស្រ្តនិងគំនិតផ្តួចផ្តើមទាំងនោះ ផ្អែកទៅលើគោលការណ៍៣ នោះគឺ៖ (១) បម្រើឱ្យសន្តិភាព ការអភិវឌ្ឍនិងកិច្ចសហប្រតិបត្តិការ មិនបម្រើឱ្យការច្បាំងគ្នា (២) មិនក្លាយជាឧបករណ៍ប្រឆាំងនឹងប្រទេសណាមួយ និង (៣) ត្រូវគោរពមជ្ឈភាពរបស់អាស៊ាន។ នៅក្នុងស្មារតីនេះ សម្តេចបានបន្ថែមថា កម្ពុជាមានឯករាជ្យភាពក្នុងការសម្រេចចិត្តនយោបាយនៅក្នុងទំនាក់ទំនងអន្តរជាតិ។ ពាក់ព័ន្ធនឹងការវិវឌ្ឍស្ថានភាពនៅក្នុងតំបន់ ដែលកាន់តែមានភាពតានតឹងនោះ សម្តេចតេជោ បានធ្វើការវាយតម្លៃថា ឫសគល់នៃបញ្ហាគឺកើតឡើងមកពីការមិនជឿទុកចិត្តគ្នារវាងប្រទេសធំៗ និងការលូកដៃជ្រុលរបស់ប្រទេសខាងក្រៅទៅក្នុងកិច្ចការតំបន់។ ការណ៍នេះបានធ្វើឱ្យប្រទេសនីមួយៗ ខិតខំពង្រឹងសមត្ថភាពយោធាខ្លួន ដែលបណ្តាលឱ្យមានការរត់ប្រណាំងសព្វាវុធនៅក្នុងតំបន់។ នៅក្នុងបរិបទនេះ សម្តេចតេជោ បានលើកទឹកចិត្តឱ្យមានការសន្ទានាឱ្យបានច្រើនរវាងជប៉ុន និងចិន ដើម្បីបង្កើននូវការជឿទុកចិត្តគ្នាទៅវិញទៅមក។ សម្តេចតេជោ និងឯកឧត្តម អាគីបា តាខេអូ ក៏បានពិភាក្សា និងចែករំលែកទស្សនៈគ្នាអំពីបញ្ហាអន្តរជាតិផ្សេងៗ ដូចជាករណីសង្គ្រាមរវាងរុស្សី និងអ៊ុយក្រែនផងដែរ។ នៅចុងបញ្ចប់ សម្តេចតេជោ បានជូនពរឯកឧត្តម និងគណៈប្រតិភូ ទទួលបាននូវភាពរីករាយក្នុងការស្នាក់នៅប្រទេសកម្ពុជា៕

ក្រសួងកសិកម្ម និងអង្គការ FAO គ្រោងរៀបចំកម្មវិធីការអភិវឌ្ឍវិស័យកសិកម្មបន្តទៀតដើម្បីជំរុញការវិនិយោគនៅកម្ពុជា

ក្រសួងកសិកម្ម រុក្ខាប្រមាញ់ និងនេសាទ នៅឆ្នាំ២០២៥ខាងមុខនេះ នឹងបន្តសហការជាមួយអង្គការស្បៀង និងកសិកម្ម (FAO) ដើម្បីប្រារព្ធកម្មវិធីការអភិវឌ្ឍវិស័យកសិកម្មផ្សាភ្ជាប់ការវិនិយោគទៅនឹងពាណិជ្ជកម្ម (CAFE-2025) ដើម្បីជំរុញការវិនិយោគក្នុងវិស័យកសិកម្មកម្ពុជាទៅកាន់ទីផ្សារអន្តរជាតិ និងជំរុញការវិនិយោគលើកសិផលសក្តានុពលរបស់កម្ពុជាប្រកបដោយប្រសិទ្ធភាព និងប្រសិទ្ធផលខ្ពស់។ក្នុងជំនួបការងារជាមួយ លោកស្រី Rebekah Bell នាយិកាអង្គការស្បៀង និងកសិកម្ម នៃអង្គការសហប្រជាជាតិប្រចាំប្រទេសកម្ពុជា ស្តីពីកិច្ចសហប្រតិបត្តិការក្របខ័ណ្ឌកម្មវិធីប្រចាំប្រទេសរយៈពេល ៥ឆ្នាំ កាលពីល្ងាចថ្ងៃទី១៩ ធ្នូ ឆ្នាំ២០២៤កន្លងទៅ ឯកឧត្តម ឌិត ទីណា រដ្ឋមន្ត្រី ក្រសួងកសិកម្ម រុក្ខាប្រមាញ់ និងនេសាទ បានសម្តែងនូវការស្វាគមន៍ និងក្តីរីករាយចំពោះកិច្ចសហប្រតិបត្តិការជាមួយអង្គការស្បៀងនិងកសិកម្ម នាពេលបច្ចុប្បន្ន និងបន្តពង្រឹងកិច្ចសហប្រតិបត្តិការជាមួយគ្នាបន្ថែមទៀតនាពេលអនាគត។ ឯកឧត្តមរដ្ឋមន្ដ្រី បានគូសបញ្ជាក់ថា វិស័យកសិកម្មមានសារៈសំខាន់យ៉ាងខ្លាំង ក្នុងការធានាសន្តិសុខស្បៀង លើកកម្ពស់ជីវភាពប្រជាកសិករ មាននិរន្តរភាពសេដ្ឋកិច្ចនិងបរិស្ថាន និងជួយដល់កំណើនសេដ្ឋកិច្ចជាតិ។ទន្ទឹមនឹងនេះ ឯកឧត្តមរដ្ឋមន្ដ្រី ក៏បានលើកឡើងពីកម្មវិធីការអភិវឌ្ឍវិស័យកសិកម្ម ផ្សាភ្ជាប់ការវិនិយោគទៅនឹងពាណិជ្ជកម្ម (CAFE-2025) ដែលបានសហការយ៉ាងជិតស្និតជាមួយអង្គការ FAO ក្នុងការប្រារព្ធក្នុងឆ្នាំ២០២៥ខាងមុខនេះ ដើម្បីជំរុញការវិនិយោគក្នុងវិស័យកសិកម្មកម្ពុជា ទៅកាន់ទីផ្សារអន្តរជាតិ និងជំរុញការវិនិយោគលើកសិផលសក្តានុពលរបស់កម្ពុជាប្រកបដោយប្រសិទ្ធភាព និងប្រសិទ្ធផលខ្ពស់៕

ការប្រឡងប្រជែងជ្រើសរើសសិស្សមន្ត្រីជាន់ខ្ពស់ ជំនាន់ទី១៣ នៃសាលាភូមិន្ទរដ្ឋបាល «វិញ្ញាសាសួរផ្ទាល់មាត់» ចាប់ផ្តើម

បេក្ខជន ៦៨រូប ដែលបានឆ្លងកាត់ការប្រឡងប្រជែងលើវិញ្ញាសាសរសេរលើកទី១ និងវិញ្ញាសាសរសេរលើកទី២ ដោយជោគជ័យ ត្រូវបន្តចូលរួមប្រឡងប្រជែងលើ «វិញ្ញាសាសួរផ្ទាល់មាត់» ដែលចាប់ផ្តើមនៅម៉ោង ៧:៣០នាទីព្រឹកនេះ។ខណៈនេះ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការប្រឡងប្រជែង កំពុងមានវត្តមាននៅមណ្ឌលប្រឡងសាលាភូមិន្ទរដ្ឋបាល ដើម្បីពិនិត្យ និងណែនាំដល់អនុគណៈកម្មការមេប្រយោគ ពីយន្តការ និងនីតិវិធីដែលកំណត់ក្នុងដំណើរការប្រឡងប្រជែងជ្រើសរើសសិស្សមន្ត្រីជាន់ខ្ពស់ ជំនាន់ទី១៣ នៃសាលាភូមិន្ទរដ្ឋបាល។ ការប្រឡងប្រជែងនេះ មានការអញ្ជើញចូលរួមតាមដានដោយក្រុមប្រឹក្សាភិបាលសាលាភូមិន្ទរដ្ឋបាល តំណាងក្រសួងសេដ្ឋកិច្ចនិងហិរញ្ញវត្ថុ តំណាងអង្គភាពប្រឆាំងអំពើពុករលួយ រួមទាំងអ្នកសង្កេតការណ៍សាធារណជន និងសហភាពសហព័ន្ធយុវជនកម្ពុជា (ស.ស.យ.ក.) ព្រមទាំងក្រុមការងារត្រួតពិនិត្យនិងវាយតម្លៃ។

នាយឧត្តមសេនីយ ណឹម សុវត្ថិ ធ្វើបាឋកថា ស្តីពីដំណើរស្វែងរកសន្តិភាពជូនជាតិ ដល់យុវជនបោះជំរំជាសកលលើកទី១០

នាថ្ងៃទី២០ ខែធ្នូ ឆ្នាំ២០២៤ ឯកឧត្តម នាយឧត្តមសេនីយ៍ ណឹម សុវត្តិ បានធ្វើបាឋកថា ស្តីពីដំណើរស្វែងរកសន្តិភាពជូនជាតិ ដល់ប្រតិភូបោះជំរំជាសកលលើកទី១០ឆ្នាំ២០២៤ ដើម្បីឱ្យយុវជន មកពីតាមបណ្តាសកលវិទ្យាល័យនានាក្នុង ព្រះរាជាណាចក្រកម្ពុជា បានដឹង និងបានយល់ពីដំណើរស្វែងរកសន្តិភាពរបស់ថ្នាក់ដឹកនាំកម្ពុជា។ផ្តល់បទសម្ភាសន៍ក្រោយធ្វើបាឋកថា ឯកឧត្តម នាយឧត្តមសេនីយ៍ ណឹម សុវត្តិ អគ្គនាយក អគ្គនាយកដ្ឋាននយោបាយ និងកិច្ចការបររទេស នៃក្រសួងការពារជាតិ និងជាប្រធានក្រុមការងារប្រវត្តិសាស្ត្រយោធា បានប្រាប់ថា ដំណើរស្វែងរកសន្តិភាព ពិតជាលំបាកណាស់ ទំរំាដល់ថ្ងៃនេះ ហើយអ្វីដែលឯកឧត្តម បានធ្វើបាឋកថា ស្តីពីដំណើរស្វែងរកសន្តិភាពនេះ គឺចង់ឱ្យប្អូនៗ ដែលជាយុវជនជំនាន់ក្រោយ បានដឹង និងបានយល់ថាឱ្យច្បាស់ថា ទំរំាប្រទេសជាតិបានសុខសន្តិភាព ដូចបច្ចុប្បន្ននេះ គឺមានការលះបង់ច្រើន ណាស់ លះបង់ទំាងអាយុជីវិត ឈាមស្រស់ សាច់ស្រស់គ្រប់បែបយ៉ាង ពិសេសគឺថ្នាក់ដឹកនាំប្រទេសតែម្តង ក្នុងនេះគឺចង់សំដៅដល់សម្តេចតេជោ ហ៊ុន សែន អតីតនាយករដ្ឋមន្ត្រី ដែលសម្តេចបានលះបង់គ្រប់បែប យ៉ាង ដើម្បីស្វែងរកសុខសន្តិភាពឱ្យប្រជាជនកម្ពុជា និងយុវជនកម្ពុជា។ ឯកឧត្តមបន្តទៀតថា កម្ពុជា ត្រូវបន្តដឹកនាំដោយសម្តេចធិបតី ហ៊ុន ម៉ាណែត ក្នុងនេះមាន បងប្អូនប្រជាពលរដ្ឋ និងយុវជនគ្រប់ ទីកន្លែង បានស្រឡាញ់ និងគំាទ្រចំពោះការដឹកនាំរបស់សម្តេចធិបតីបន្ត ដូចនេះឯកឧត្តម នាយឧត្តម សេនីយ៍ ចង់ឱ្យយុវជនគ្រប់ជំនាន់នាំគ្នាថែរក្សាសុខសន្តិភាពនេះឱ្យបាន គង់វង្សបន្ត ដើម្បីធ្វើឱ្យប្រទេស ជាតិកាន់តែរីកចម្រើន។គួរបញ្ជាក់ថា សម្រាប់យុវជនជាសកលលើកទី១០ឆ្នាំ២០២៤នេះ នឹងរៀបចំពិធីបិទជំរំជាផ្លូវការនៅរាត្រីថ្ងៃទី២០ធ្នូនេះ ក្រោមអធិបតីភាពឯកឧត្តមបណ្ឌិតសភាចារ្យ ហង់ ជួនណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំយុវជននិងកីឡា រួមនឹងក្រសួងស្ថាប័នអន្តរក្រសួង៕ អត្ថបទ៖ គង់ រ៉េន

បណ្ដាញសង្គម

ព័ត៌មានថ្មីៗ

អត្រាអាពាហ៍ពិពាហ៍កុមារនៅបង់ក្លាដែស កើនឡើងដល់កម្រិតខ្ពស់បំផុត នៅអាស៊ីខាងត្បូង

មន្ត្រី៖ ជនអន្តោប្រវេសន៍ជាង ១០០នាក់ ត្រូវបានដោះលែងនៅលីប៊ី បន្ទាប់ពីក្រុមជនអន្ធពាល ចាប់ជាចំណាប់ខ្មាំង

គោព្រៃជំទង់កម្ពុជា ចេញទៅប្រកួតជើងឯក U23 អាស៊ាន នៅឥណ្ឌូនេស៊ី ខណៈត្រូវជួបឡាវស្អែក

សម្តេច ឃួន សុដារី៖ កម្ពុជាមានឆន្ទៈមោះមុតចូលរួមការពារសុខសន្តិភាពតំបន់ ពិភពលោក តាមការសន្ទនា និងកិច្ចសហប្រតិបត្តិការដោយយកពលរដ្ឋជាស្នូល

សម្តេចប្រធានរដ្ឋសភាកម្ពុជា និងប្រធានរដ្ឋសភាទីម័រឡេស្តេពិភាក្សាគ្នាជំរុញទំនាក់ទំនងការទូតសភា ពង្រីកវិស័យទេចរណ៍ ពាណិជ្ជកម្ម និងអប់រំប្រទេសទាំងពីរ

ក្រសួងការងារកម្ពុជា និងអង្គការសហប្រជាជាតិ ឯកភាពបន្តលើកកម្ពស់ការងារសមរម្យ និងការគាំពារសង្គមនៅកម្ពុជា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានជាតិ

តម្លៃហាងឆេងមាសនិងបន្តធ្លាក់ចុះជាបន្ត ស្របពេលប្រាក់ដុល្លារបន្តឡើងថ្លៃ

ក្រសួងអភិវឌ្ឍន៍ជនបទចាត់ទុកការថែទាំផ្លូវ ជាការចូលរួមលើកកម្ពស់ជីវភាពប្រជាជនតាមជនបទ

តម្លៃប្រាក់រៀលរក្សាបានលំនឹងល្អ នៅក្នុងរយៈពេល ២ ទសវត្សរ៍ចុងក្រោយនេះ

ក្រុមយុវជនសង្គមស៊ីវិល ស្នើដល់រាជរដ្ឋាភិបាលពន្លឿនច្បាប់ដាក់ក្រុមជ្រុលនិយមនៅក្រៅប្រទេសជាក្រុមភេរវកម្ម

នាយឧត្តមសេនីយ ណឹម សុវត្ថិ ធ្វើបាឋកថា ស្តីពីដំណើរស្វែងរកសន្តិភាពជូនជាតិ ដល់យុវជនបោះជំរំជាសកលលើកទី១០

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានជាតិ

តម្លៃហាងឆេងមាសនិងបន្តធ្លាក់ចុះជាបន្ត ស្របពេលប្រាក់ដុល្លារបន្តឡើងថ្លៃ

ក្រសួងអភិវឌ្ឍន៍ជនបទចាត់ទុកការថែទាំផ្លូវ ជាការចូលរួមលើកកម្ពស់ជីវភាពប្រជាជនតាមជនបទ

តម្លៃប្រាក់រៀលរក្សាបានលំនឹងល្អ នៅក្នុងរយៈពេល ២ ទសវត្សរ៍ចុងក្រោយនេះ

ក្រុមយុវជនសង្គមស៊ីវិល ស្នើដល់រាជរដ្ឋាភិបាលពន្លឿនច្បាប់ដាក់ក្រុមជ្រុលនិយមនៅក្រៅប្រទេស​ជាក្រុមភេរវកម្ម

នាយឧត្តមសេនីយ ណឹម សុវត្ថិ ធ្វើបាឋកថា ស្តីពីដំណើរស្វែងរកសន្តិភាពជូនជាតិ ដល់​យុវជន​បោះជំរំជាសកលលើកទី១០

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ក្រុមយុវជនសង្គមស៊ីវិល ស្នើដល់រាជរដ្ឋាភិបាលពន្លឿនច្បាប់ដាក់ក្រុមជ្រុលនិយមនៅក្រៅប្រទេសជាក្រុមភេរវកម្ម

នាយឧត្តមសេនីយ ណឹម សុវត្ថិ ធ្វើបាឋកថា ស្តីពីដំណើរស្វែងរកសន្តិភាពជូនជាតិ ដល់យុវជនបោះជំរំជាសកលលើកទី១០