BTV NEWS

ក្នុងគោលបំណងមនុស្សធម៌! អាជ្ញាធរកម្ពុជាសម្រេចបើកច្រកទ្វារព្រំដែនអនុញ្ញាតដល់អនុព័ន្ធយោធាថៃប្រចាំនៅភ្នំពេញ និងមនុស្សពីរនាក់ធ្វើដំណើរតាមច្រកទ្វារអន្តរជាតិប៉ោយប៉ែត-ខ្លងលីកទៅព្យាបាលជំងឺនៅខេត្តស្រះកែវ

ចៅក្រមស៊ើបសួរសាលាដំបូងរាជធានីភ្នំពេញសម្រេចឃុំខ្លួនជនត្រូវចោទ៨នាក់ជាបណ្តោះអាសន្នពាក់ព័ន្ធអំពើឆបោកតាមឆបោកតាមប្រព័ន្ធអនឡាញ

ត្រឹមថ្ងៃទី១៩កក្កដា សមត្ថកិច្ចរាជធានី-ខេត្ត បង្រ្កាបករណីឆបោកតាមប្រព័ន្ធបច្ចេកវិទ្យា ៥២ទីតាំង ឃាត់ខ្លួនជនសង្ស័យ ២.៧៦៧ នាក់ មានជនជាតិចិនចំនួន ៨៤៣នាក់

សមាគមកាយឫទ្ធិនារីកម្ពុជាសាខាខេត្តមណ្ឌលគិរី បានចូលរួមសកម្មភាពជាច្រើននៅក្នុងសង្គមស្របតាមគម្រោងសកម្មភាពទាំង៥ របស់សមាគម

ព័ត៌មានជាតិ

សម្ដេចធិបតី ហ៊ុន ម៉ាណែត វាយតម្លៃខ្ពស់ចំពោះកិច្ចខិតខំប្រឹងប្រែងរបស់ CDRI ក្នុងការចូលរួមចំណែកអភិវឌ្ឍសង្គម-សេដ្ឋកិច្ចកម្ពុជា

នាព្រឹកថ្ងៃទី២៤ ខែធ្នូ ឆ្នាំ២០២៤ នៅវិមានសន្ដិភាព, សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជណាចក្រកម្ពុជា បានអនុញ្ញាតឱ្យ លោកស្រី អេវ៉ា មីស្លីវីក (Eva Mysliwiec) ស្ថាបនិក, អតីតសមាជិកក្រុមប្រឹក្សាភិបាល និងជាអតីតនាយិកាប្រតិបត្តិនៃវិទ្យាសា្ថនបណ្តុះបណ្តាល និងស្រាវជ្រាវដើម្បីអភិវឌ្ឍន៍កម្ពុជា (CDRI) និងគណៈគ្រប់គ្រង ចូលជួបសម្ដែងការគួរសម និងគោរពរាយការណ៍អំពីវឌ្ឍនភាព និងផែនការយុទ្ធសាស្ត្រថ្មីរបស់ CDRI។ក្នុងឱកាសនៃជំនួប, លោកស្រី អេវ៉ា មីស្លីវីក បានគោរពរាយការណ៍ជូនសម្ដេចបវរធិបតីអំពីវឌ្ឍនភាព នៃបេសកកម្មរបស់ CDRI ដែលផ្តោតលើការសិក្សាស្រាវជ្រាវបែបវិទ្យាសាស្ត្រទៅលើវិស័យជាច្រើនពាក់ព័ន្ធនឹងការអភិវឌ្ឍសង្គម-សេដ្ឋកិច្ចកម្ពុជា តាមរយៈការផ្ដល់ធាតុចូលផ្នែកគោលនយោបាយដល់រាជរដ្ឋាភិបាល ដើម្បីអនុវត្តគោលនយោបាយប្រកបដោយប្រសិទ្ធភាព និងភាពស័ក្ដិសិទ្ធិ ស្របតាមយុទ្ធសាស្ត្របញ្ចកោណ-ដំណាក់កាលទី១ របស់រាជរដ្ឋាភិបាល។ ទន្ទឹមនឹងនោះ, លោកស្រីក៏បានគោរពជម្រាបជូនសម្ដេចបវរធិបតីអំពីទិសដៅអនាគតរបស់ CDRI និងផែនការយុទ្ធសាស្ត្រថ្មីរបស់ CDRI ដែលផ្តោតលើ៖ ការប្រមូល និងវិភាគទិន្នន័យ, ការបោះពុម្ពផ្សាយឯកសារស្រាវជ្រាវ, ការលើកកម្ពស់ការសិក្សា និងកិច្ចសហប្រតិបត្តិការជាមួយស្ថាប័នស្រាវជ្រាវក្នុងតំបន់ និងការផ្តល់ការបណ្តុះបណ្តាល និងវិញ្ញាបនកម្មអំពីការស្រាវជ្រាវ និងការវិភាគ ជាដើម។សម្ដេចបវរធិបតីបានសម្ដែងនូវការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ CDRI ជាង៣ទសវត្សរ៍កន្លងមកនេះ ក្នុងការចូលរួមចំណែកអភិវឌ្ឍសង្គម-សេដ្ឋកិច្ចកម្ពុជា។សម្តេចបវរធិបតី បានគូសបញ្ជាក់ថា រាជរដ្ឋាភិបាលនឹងនៅតែបន្តការគាំទ្រដល់សកម្មភាព និងបេសកកម្មរបស់ CDRI និងលើកទឹកចិត្តឱ្យ CDRI បន្តចូលរួមសហការជាមួយ ក្រសួង-ស្ថាប័នរបស់រាជរដ្ឋាភិបាល និងស្ថាប័នស្រាវជ្រាវនានា ដើម្បីលើកស្ទួយវិស័យស្រាវជ្រាវនៅកម្ពុជាឱ្យមានការចូលរួមកាន់តែផុសផុល និងរីកលូតលាស់បន្ថែមទៀត។

កម្ពុជាកំពុងសហការជាមួយដៃគូពាក់ព័ន្ធ ជំរុញផ្គត់ផ្គង់ទឹកស្អាតឱ្យមានប្រើប្រាស់ទាំងអស់គ្នាត្រឹមឆ្នាំ២០៣០

ភ្នំពេញ ៖ កម្ពុជាកំពុងសហការជាមួយដៃគូអភិវឌ្ឍន៍ និងភាគីពាក់ព័ន្ធ ឈានទៅសម្រេចចគោលដៅអភិវឌ្ឍន៍ប្រកបដោយចីរភាព ដើម្បីជំរុញ ការផ្គត់ផ្គង់ទឹកស្អាតដល់ប្រជាពលរដ្ឋ មានទឹកស្អាតប្រើប្រាស់ទាំងអស់គ្នាត្រឹមឆ្នាំ២០៣០ ដែលជាមូលដ្ឋានសំខាន់ នៃការសម្រេច បានចក្ខុវិស័យកម្ពុជានៅឆ្នាំ២០៥០។ឯកឧត្តម ស៊ឹម ស៊ីថា រដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើកឡើងនៅក្នុងពិធីបើក «សិក្ខាសាលាស្ដីពីទឹកស្អាត និងប្រព័ន្ធអនាម័យកម្ពុជា-ជប៉ុន ២០២៤ (លើកទី១៧) នៅថ្ងៃទី ២៤ ខែ ធ្នូ នេះថា ជុំវិញបញ្ហាទឹកស្អាត នេះ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដែលជាសេនាធិការឱ្យរាជរដ្ឋាភិបាល បានកំពុងខិតខំយកចិត្តទុកដាក់ អនុវត្តការងារគោលសំខាន់ៗជាច្រើន ជាក់ស្តែងមកដល់ចុងឆ្នាំ២០២៤ នេះ, ភូមិដែលក្រសួងបានផ្តល់អាជ្ញាប័ណ្ណមានជាង ១០ ពាន់ ភូមិ ក្នុងនោះរដ្ឋាករទឹក ជិត ២ ពាន់ភូមិ ស្មើជាង ១៨ ភាគរយ, និងប្រតិបត្តិករឯកជន ជាង ៨,៧ ពាន់ភូមិ ចំពោះចំនួនភូមិ មានបណ្តាញសរុបជាង ៧ ពាន់បណ្តាញ ក្នុងនោះរដ្ឋាករទឹកជាង ១.៤ ពាន់ភូមិ និងឯកជនជិត ៦ ពាន់ភូមិ។ នៅក្នុងឆ្នាំ ២០២៤ នេះដែរ, កម្ពុជាអាចផលិតទឹកស្អាតបានប្រមាណពី ៤០ ទៅ ៥០ លានម៉ែត្រគូបក្នុងមួយថ្ងៃ បើគិតត្រឹមខែធ្នូ ឆ្នាំ ២០២៤ នេះ បរិមាណទឹកផលិតសរុបបានប្រមាណ ៤៥ លានម៉ែត្រគូប ក្នុងនោះប្រតិបត្តិករឯកជនមានប្រមាណ ១៤ លានម៉ែត្រគូបក្នុងមួយថ្ងៃ ស្មើប្រមាណ ៣៥ ភាគរយនៃការផលិតទឹកសរុប។ទាក់ទិនបញ្ហាទឹកស្អាតនេះ, ឯកឧត្តម ស៊ឹម ស៊ីថា បន្តថា នៅក្នុងក្របខណ្ឌនៃទស្សនវិស័យ និងផ្អែកតាមកម្មវិធីនយោបាយរបស់ រាជរដ្ឋាភិបាលនីតិកាលទី៧ នៃរដ្ឋសភា, បានដាក់ចេញនូវយុទ្ធសាស្ត្របញ្ចកោណដំណាក់កាលទី១ ដើម្បីកំណើនការងារ សមធម៌ ប្រសិទ្ធភាព និងចីរភាព, អភិក្រម "ជវភាពនៃប្រព័ន្ធតួអង្គតែមួយ” ព្រមទាំងបានកំណត់យកអាទិភាពគន្លឹះ៥ គឺ “មនុស្ស ផ្លូវ ទឹក ភ្លើង និងបច្ចេកវិទ្យា”។ ដើម្បីសម្រេចឱ្យបានគោលដៅអភិវឌ្ឍន៍ប្រកបដោយចីរភាពកម្ពុជាឆ្នាំ ២០១៦-២០៣០ ពោលគឺ "ប្រជាពលរដ្ឋត្រូវ មានទឹកស្អាតប្រើទាំងអស់គ្នានៅត្រឹមឆ្នាំ២០៣០” ដែលជាមូលដ្ឋានសំខាន់នៃការសម្រេចបានចក្ខុវិស័យកម្ពុជាឆ្នាំ២០៥០។ ដើម្បី សម្រេចបានគោលដៅ និងនិងចក្ខុវិស័យខាងលើ យើងពិតជាមិនអាចខ្វះបានទេនូវកិច្ចសហការ និងការជួយជ្រោមជ្រែងពីក្រសួង ស្ថាប័ន ដៃគូអភិវឌ្ឍន៍ និងភាគីពាក់ព័ន្ធ ជាពិសេសការអនុវត្តកាតព្វកិច្ចប្រកបដោយការទួលខុសត្រូវ របស់ប្រតិបត្តិករទឹកស្អាតទាំង អស់ ដើម្បីផ្តល់សេវាផ្គត់ផ្គង់ទឹកស្អាតស្របតាមលក្ខខណ្ឌគោលទាំង៤គឺ៖ ទឹកមានគុណភាព សុវត្ថិភាព និរន្តរភាព និងថ្លៃសមរម្យ។ ជុំវិញបញ្ហាទឹកនេះដែរ, ឯកឧត្តម កឹម បូរី អនុរដ្ឋលេខាធិការក្រសួងសាធារណការ និងដឹកជញ្ជូន លើកឡើងថា ដោយសារការ រីកលូតលាស់នៃនគរូបនីយកម្មសេដ្ឋកិច្ច និងកំណើនប្រជាពលរដ្ឋនាប៉ុន្មានទសវត្សរ៍កន្លងមកនេះ បានបង្កើនឡើងនូវតម្រូវការទឹកស្អាត ប្រើប្រាស់យ៉ាងច្រើនសន្ធឹកសន្ធាប់ ហើយការបញ្ចេញមកវិញនូវទឹកកខ្វក់ បានធ្វើឱ្យប៉ះពាល់ភោគផលធម្មជាតិ ព្រមទាំងបំពុលបរិស្ថាន ទាំងផ្នែកខាងលើដី និងផ្នែកក្រោមដី បង្កើតជាឧបសគ្គដល់ការអភិវឌ្ឍប្រកបដោយចីរភាពបរិស្ថាន។ ដើម្បីសម្រេចឱ្យបាននូវក្របខណ្ឌ គោលដៅអភិវឌ្ឍន៍ប្រកបដោយចីរភាព រាជរដ្ឋាភិបាលបានប្តេជ្ញា ដាក់ចេញនូវវិធានការដើម្បីទប់ស្កាត់ការបង្ហូរទឹកកខ្វក់ ដែលមិនទាន់ ធ្វើប្រព្រឹត្តកម្ម ឬធ្វើប្រព្រឹត្តកម្មមិនទាន់បានត្រឹមត្រូវ ចូលក្នុងតំបន់ទឹកសាធារណៈដូចជា សមុទ្រ ទន្លេ ស្ទឹង បឹង ព្រែក ត្រពាំង ឱ្យសម្រេចបាន ៥០% ត្រឹមឆ្នាំ២០៣០ ស្របតាមគោលដៅអភិវឌ្ឍន៍ប្រកបដោយចីរភាពរបស់អង្គការសហប្រជាជាតិ។ បច្ចុប្បន្ននេះ យើងកំពុងបន្តធ្វើការសិក្សា និងពង្រីកតំបន់គ្រប់គ្រងទឹកកខ្វក់ និងទីលានទុកដាក់សម្រាម។ ក្រសួងក៏កំពុងបន្តពង្រឹងសមត្ថភាពមន្ត្រី ជំនាញ និងបន្តកិច្ចសហប្រតិបត្តិការជាមួយដៃគូអភិវឌ្ឍន៍ និងក្រុមហ៊ុនឯកជន ដើម្បីធានាស្តង់ដាបច្ចេកទេស និងការគ្រប់គ្រងប្រព័ន្ធ ទឹកកខ្វក់ឱ្យមានគុណភាពខ្ពស់នៅកម្ពុជាផងដែរ៕អត្ថបទ៖ សុន រ៉ាឌី

ចាប់ពីថ្ងៃទី១មករា២០២៥ នគរបាលចរាចរណ៍នឹងដកហូតបណ្ណបើកបរយានយន្តគ្រប់ប្រភេទដែលអស់ពិន្ទុ(ពិន្ទុសូន្យ) ខណៈបណ្ណអស់ពិន្ទុមានជាង មួយពាន់បណ្ណ

អគ្គស្នងការនគរបាលជាតិ នៅថ្ងៃទី២៣ ខែធ្នូ ឆ្នាំ២០២៤ បានប្រកាសចេញនូវសេចក្តីជូនដំណឹង ស្តីពីការអនុវត្តដកបណ្ណបើកបរយានយន្តដែលអស់ពន្ទុ ឬពិន្ទុសូន្យ ចាប់ថ្ងៃទី១ ខែមករា ឆ្នាំ២០២៥តទៅ ដោយអង្គភាពនគរបាលចរាចរណ៍ផ្លូវគោករាជធានី-ខេត្ត ខណៈបណ្ណបើកបរដែលពិន្ទុសល់សូន្យមានចំនួន ១២៣២បណ្ណ។ក្នុងសេចក្តីជូនដំណឹង អគ្គស្នងការនគរបាលជាតិ ក៏សំណូមពរដល់ម្ចាស់យានយន្តដែលមានបណ្ណបើកបរជិតអស់ពិន្ទុ ទៅដាក់ពាក្យសុំរៀនបំប៉ន ដើម្បីប្រឡងយកពិន្ទុបន្ថែម ឬបំពេញពិន្ទុឡើងវិញ នៅមណ្ឌលផ្តល់សេវារបស់ក្រសួងសាធារណការ និងដឹកជញ្ជូន។តាមរយៈហ្វេសប៊ុកឯកឧត្ដម ផន រឹម អ្នកនាំពាក្យក្រសួងសាធារណការ និងដឹកជញ្ជូនបានឲ្យដឹងថា ក្នុងការអនុវត្តការដកពិន្ទុបណ្ណបើកបរចាប់ពីថ្ងៃទី០១ ខែកញ្ញា ឆ្នាំ២០២២ មកទល់ថ្ងៃទី៣០ ខែវិច្ឆិកា ឆ្នាំ២០២៤ នគរបាលចរាចរណ៍បានអនុវត្តដកពិន្ទុបណ្ណបើកបរសរុបចំនួន ៧៤៥០៤ករណី។ ក្នុងនោះបណ្ណបើកបរមានពិន្ទុសល់សូន្យចំនួន ១២៣២ករណី។ឯកឧត្ដមអ្នកនាំពាក្យបានបន្ថែមឲ្យដឹងថា ចាប់ពីថ្ងៃទី០១ ខែកញ្ញា ឆ្នាំ២០២២ នៃការអនុវត្តការដកពិន្ទុ មណ្ឌលផ្តល់សេវារបស់ក្រសួងសាធារណការ និងដឹកជញ្ជូន មិនទាន់ទទួលបានការស្នើសុំពីប្រជាពលរដ្ឋក្នុងការបណ្តុះបណ្តាលដើម្បីបន្ថែមពិន្ទុ និងប្រឡងយកបណ្ណបើកបរសារជាថ្មីឡើងវិញនៅឡើយ។

ស្រូវនាំចេញទៅកាន់ទីផ្សារវៀតណាមតាមភូមិសាស្ត្រខេត្តស្វាយរៀង ហាក់នៅមានតម្លៃល្អប្រសើរខណះដែលកសិករត្រៀមបញ្ចប់ការប្រមូលផល

ស្វាយរៀង ៖ លោក សុខ សុទ្ធាវុធ ប្រធានមន្ទីរកសិកម្មរុក្ខាប្រមាញ់និងនេសាទខេត្តស្វាយរៀង នៅថ្ងៃទី២៤ ខែធ្នូ ឆ្នាំ២០២៤ នេះបានប្រាប់ទូរទស្សន៍ btv តាមរយៈសារតេឡេក្រាម ឱ្យដឹងថាគិតត្រឹមថ្ងៃទី២៣ ខែធ្នូ ឆ្នាំនេះ ទីផ្សារស្រូវនាំចេញទៅលក់នៅតាមខ្សែបន្ទាត់ព្រំដែន កម្ពុជា វៀតណាម នៅក្នុងភូមិសាស្ត្រខេត្តស្វាយរៀង ស្រូវចម្រុះក្នុងមួយគីឡូក្រាមមានតម្លៃចន្លោះពី៩៩០រៀលទៅ ១ពាន់ ១៤៩ រៀល បើប្រៀបធៀបទៅនិងតម្លៃស្រូវឆ្នាំមុន មានតម្លៃប្រហាក់ប្រហែលគ្នា ។លោកបានបញ្ជាក់បន្ថែមថា បើទោះជាខេត្តមួយចំនួននៅក្នុងព្រះរាជាណាចក្រកម្ពុជា បានប្រឈមទៅនិងតម្លៃស្រូវបន្តិច តែសម្រាប់ស្រូវរបស់កសិករ ខេត្តស្វាយរៀង ហាក់ដូចជាមិនសូវប្រឈមប៉ុន្មាននោះទេ ដោយការនាំស្រូវរបស់កសិករ និងក្រុមឈ្មួញទៅកាន់ទីផ្សារចំណាយសោហ៊ុយតិចតួច និងចំណេញពេលវេលាដឹកជញ្ជូនផងដែរ ។តាមរបាយការណ៏របស់មន្ទីរកសិកម្មរុក្ឋាប្រម៉ាញនិងនេសាទខេត្ត ដែល BTVទទួលបានតាមសារតេឡេក្រាម ថ្ងៃទី២៤ ខែធ្នូ ឆ្នាំ២០២៤ គិតត្រឹមសប្តាហ័ទី៤ ខែធ្នូ កសិករនៅស្វាយរៀងសម្រេចធ្វើការច្រូតកាត់ប្រមូលផលស្រូវវស្សាបានចំនួន១សែន៧ម៉ឺន៧៩០ហិចតា ដោយទទួលបានទិន្នផល៤សែន៧ម៉ឺន៦ពាន់១៤៤តោន ។ ដោយ ៖ ភា សារឹត

មន្រ្តីជាន់ខ្ពស់គណបក្សកុម្មុយនីស្តវៀតណាមអបអរសាទរចំពោះសមិទ្ធផលធំៗដែលកម្ពុជាសម្រេចបាន

សមាជិក គណៈលេខាធិការមជ្ឈិមបក្ស និងជាប្រធានគណៈទាក់ទងបរទេសមជ្ឈិមបក្សកុម្មុយនីស្តវៀតណាម ឡេ ហាយជុង (Le Haoi Trung) បានអបអរសាទរចំពោះសមិទ្ធផលធំៗ ដែលកម្ពុជាសម្រេចបាន និងបានធ្វើឲ្យកម្ពុជាកាន់តែត្រូវបានលើកកម្ពស់លើឆាកអន្តរជាតិ ក្រោមការដឹកនំារបស់គណបក្សប្រជាជនកម្ពុជានោះ។ក្នុងឱកាសជួបសម្តែងការគួរសម និងពិភាក្សាការងារមួយចំនួន ជាមួយសម្តេចតេជោ ហ៊ុន សែន ប្រធានគណបក្សប្រជាជនកម្ពុជា នាថ្ងៃទី២៤ ខែធ្នូ ឆ្នាំ២០២៤នេះ នៅវិមាន៧មករា លោក ឡេ ហាយជុង «បានអបអរសាទរចំពោះសមិទ្ធផលធំៗដែលកម្ពុជាសម្រេចបានក្រោមការដឹកនាំរបស់ គណបក្សប្រជាជនកម្ពុជា ដែលមានសម្តេចតេជោជាប្រធាន និងសម្តេចធិបតី ហ៊ុន ម៉ាណែត ជានាយករដ្ឋមន្ត្រី ដែលធ្វើឱ្យប្រទេសកម្ពុជាមានសុខសន្តិភាព និងការអភិវឌ្ឍន៍យ៉ាងខ្លាំងក្លាលើគ្រប់វិស័យ ជីវភាពរស់នៅរបស់ប្រជាជនកាន់តែល្អប្រសើរ ព្រមទាំងកិត្យានុភាពរបស់កម្ពុជាកាន់តែត្រូវបានលើកកម្ពស់លើឆាកអន្តរជាតិ»។ថ្លែងនៅក្នុងកិច្ចជំនួបនោះដែរ សម្តេចតេជោ ហ៊ុន សែន បានសម្តែងនូវការស្វាគមន៍និង ជឿជាក់ថា ដំណើរទស្សនកិច្ចរបស់គណៈប្រតិភូ នឹងចូលរួមចំណែកពូនជ្រុំនូវទំនាក់ទំនងដ៏ល្អ និងលើកកម្ពស់កិច្ចសហប្រតិបត្តិការគ្រប់ជ្រុងជ្រោយរវាងគណបក្ស និងប្រទេសទាំងពីរឱ្យឡើងមួយកម្រិតទៀត។ សម្តេចតេជោ ក៏បានគូសបញ្ជាក់ឱ្យឃើញនូវការប្តេជ្ញាចិត្តរួមគ្នាក្នុងស្មារតី «ពង្រឹងទំនាក់ទំនងជាអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ ស្ថិរភាពយូរអង្វែង» និងការជឿជាក់ទុកចិត្តគ្នាទៅវិញទៅមកកាន់តែខ្លាំងឡើង។សម្ដេចតេជោ ក៏បានមានប្រសាសន៍បន្ថែមថា កម្ពុជាបានរក្សាចំណងមិត្តភាពជាប្រពៃណីដ៏ល្អនេះតាំងពីថ្នាក់ដឹកនាំជំនាន់មុន ហើយថ្នាក់ថ្នមថែរក្សាទំនាក់ទំនងនេះឱ្យមានភាពរឹងមាំជារៀងរហូតមក។ សម្ដេចជឿជាក់ថា ក្រោមការដឹកនាំដ៏ត្រឹមត្រូវ និងភ្លឺស្វាងរបស់បក្សកុម្មុយនីស្តវៀតណាម ដែលមានឯកឧត្តម តូ ឡឹម ជាប្រមុខប្រទេសវៀតណាម នឹងសម្រេចបាននូវគោលដៅ «ក្លាយទៅជាប្រទេសអភិវឌ្ឍន៍ មានចំណូលខ្ពស់នៅឆ្នាំ២០៤៥ »៕ អត្ថបទបាន ចក់

ក្រសួងការងារ ស្នើភាគីពាក់ព័ន្ធរួមគ្នាសម្រេចឲ្យបាននូវ “សហគ្រាសមួយជាសហគមន៍សុខសាន្តមួយ”

ភ្នំពេញ៖ មន្រ្តីជាន់ខ្ពស់នៃក្រសួងការងារ និងបណ្តុះបណ្តាលវិជ្ជាជីវៈ បានស្នើឱ្យគ្រប់ភាគីពាក់ព័ន្ធចូលរួមសហការគ្នា ដើម្បីឈានសម្រេចឲ្យបាន “សហគ្រាសមួយជាសហគមន៍សុខសាន្តមួយ” ក្នុងគោលដៅធានាបានសុខដុមនីយកម្មនៃទំនាក់ទំនងវិជ្ជាជីវៈនៅកម្ពុជា ក៏ដូចជាបង្កើនការទាក់ទាញអ្នកវិនិយោគកាន់តែមកកាន់កម្ពុជា។លើកឡើងក្នុងពិធីបិទសន្និសីទថ្នាក់ជាតិស្ដីពី ទំនាក់ទំនងវិជ្ជាជីវៈ ឆ្នាំ២០២៤ ក្រោមប្រធានបទ “សហគ្រាសមួយជាសហគមន៍សុខសាន្តមួយ” កាលពីរសៀលថ្ងៃទី២៣ ខែធ្នូកន្លងទៅ លោកជំទាវ សុវណ្ណ វណ្ណារតន៍ រដ្ឋលេខាធិការប្រចាំការ ក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍ថា កម្មវិធីប្រកួតប្រជែងលើ “សហគ្រាសមួយជាសហគមន៍សុខសាន្តមួយ” ត្រូវបានបង្កើតឡើងក្នុងឆ្នាំ២០២៤ ដោយកម្មវិធីនេះ គឺជាយន្តការនៃការត្រួតពិនិត្យលើវប្បធម៌អនុលោមភាពនៃសហគ្រាសគ្រឹះស្ថាន ដើម្បីទទួលបានពានរង្វាន់ និងវិញ្ញាបនបត្រ “សហគ្រាសមួយជាសហគមន៍សុខសាន្តមួយ” ដោយសហគ្រាស គ្រឹះស្ថាន ដែលទទួលបានពានរង្វាន់ និងវិញ្ញាបនបត្រនឹងត្រូវប្រកាសនៅក្នុងទិវាពលកម្មអន្តរជាតិ ដែលនឹងប្រារព្ធធ្វើឡើងនាថ្ងៃទី១ ខែឧសភា ជារៀងរាល់ឆ្នាំ។ ដូចគ្នានេះ ការរៀបចំសន្និសីទនាពេលនេះ គឺជាការបន្តអនុវត្តនូវយន្តការត្រីភាគី និងការជំរុញកិច្ចសន្ទនាសង្គមសំដៅសម្រេចឱ្យបាននូវការពិគ្រោះយោបល់គ្រប់ជ្រុងជ្រោយ និងពេញលេញដែលជាតម្រូវការរបស់ត្រីភាគី និងភាគីពាក់ព័ន្ធក្នុងវិស័យការងារ ដើម្បីជួយប្រែក្លាយសហគ្រាសមួយជាសហគមន៍សុខសាន្តមួយ។លោកជំទាវរដ្ឋលេខាធិការ បានបញ្ជាក់បន្ថែមថា ក្រសួងការងារ និងបណ្តុះបណ្តាលវិជ្ជាជីវៈ សូមស្វាគមន៍រាល់កិច្ចសហប្រតិបត្តិការជាមួយគ្រប់ដៃគូពាក់ព័ន្ធ ដើម្បីផ្លាស់ប្តូរបទពិសោធន៍ ចំណេះដឹង មតិយោបល់ និងស្វែងរកដំណោះស្រាយទាន់ពេលវេលា និងមានប្រសិទ្ធភាព សម្រាប់បញ្ហាទាំងឡាយស្របតាមតួនាទីភារកិច្ចរបស់ក្រសួងការងារ និងក៏ស្វាគមន៍រាល់សកម្មភាពរួបរួមគ្នា ដើម្បីជាប្រយោជន៍ជូនដល់កម្មករនិយោជិត និងសង្គមទាំងមូល ដោយប្រើប្រាស់កិច្ចសន្ទនាសង្គម និងយន្តការត្រីភាគីក្នុងការអភិវឌ្ឍសុខដុមនីយកម្មក្នុងទំនាក់ទំនងវិជ្ជាជីវៈ ដែលធ្វើឱ្យសហគ្រាសមួយក្លាយជាសហគមន៍សុខសាន្តមួយ ។ សូមជម្រាបថា “សហគ្រាសមួយជាសហគមន៍សុខសាន្តមួយ” គឺផ្ដើមចេញពីការអនុវត្តអនុសាសន៍រួមគ្នារបស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្តី បច្ចុប្បន្នជា ប្រធានក្រុមឧត្ដមប្រឹក្សាផ្ទាល់ព្រះមហាក្សត្រ និងជា ប្រធានព្រឹទ្ធសភានៃព្រះរាជាណាចក្រកម្ពុជា និងសម្ដេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា ក្នុងអំឡុងពេលចុះជួបសំណេះសំណាល ជាមួយបងប្អូនកម្មករនិយោជិត ឆ្នាំ២០២៣ នាពេលកន្លងទៅ៕ អត្ថបទ ឈិត បូរ៉ាវី

រដ្ឋបាលរាជធានីភ្នំពេញប្រគល់ដីទំហំជាង ៤៣០០ម៉ែត្រការ៉េ ទៅសមាគមជាតិក្រុមប្រឹក្សារាជធានី ខេត្ត ដើម្បីកសាងអគាររដ្ឋបាល

ភ្នំពេញ ៖ រដ្ឋបាលរាជធានីភ្នំពេញ បានសម្រេចប្រគល់ដីទំហំជាង ៤៣០០ម៉ែត្រការ៉េ នៅក្នុងសង្កាត់គោករកា ខណ្ឌព្រែកព្នៅ ឱ្យទៅសមាគមជាតិក្រុមប្រឹក្សារាជធានី ខេត្ត ដើម្បីកសាងអគាររដ្ឋបាល បំពេញការងារកាន់តែល្អប្រសើរមួយកម្រិតថែមទៀត។នេះបើតាមការលើកឡើងរបស់ឯកឧត្ដម ឃួង ស្រេង អភិបាលនៃគណៈអភិបាលរាជធានីភ្នំពេញក្នុងឱកាសអញ្ជើញជាអធិបតីភាពក្នុងពិធីបើកមហាសន្និបាតអាណត្តិទី៣ របស់សមាគមជាតិក្រុមប្រឹក្សារាជធានី ខេត្តនៃព្រះរាជាណាចក្រកម្ពុជា នាព្រឹកថ្ងៃទី២៤ ខែធ្នូ ឆ្នាំ២០២៤ ជាមួយឯកឧត្ដម ម៉ប់ សារិន ប្រធានក្រុមប្រឹក្សារាជធានីភ្នំពេញ និងជាប្រធានសមាគមជាតិក្រុមប្រឹក្សារាជធានី ខេត្ត នៅមជ្ឈមណ្ឌលសន្និបាតនិងពិព័រណ៍កោះពេជ្រ។ ឯកឧត្ដម ឃួង ស្រេង លើកឡើងថា សមាជិកក្រុមប្រឹក្សារាជធានីភ្នំពេញ ជាតំណាងប្រជាពលរដ្ឋនៅថ្នាក់ក្រោមជាតិ លើកិច្ចការងារបម្រើផលប្រយោជន៍ជូនប្រជាពលរដ្ឋ។ ដូច្នេះដើម្បីឱ្យការងារកាន់តែល្អប្រសើរនោះ រដ្ឋបាលរាជធានីភ្នំពេញ បានសម្រេចប្រគល់ដីទំហំជាង ៤៣០០ម៉ែត្រការ៉េ នៅក្នុងសង្កាត់គោករកា ខណ្ឌព្រែកព្នៅ ដើម្បីកសាងអគាររដ្ឋបាលសមាគមជាតិក្រុមប្រឹក្សារាជធានី ខេត្តនេះឡើង។ឯកឧត្ដម ឃួង ស្រេង បានមានប្រសាសន៍បន្តថា សន្តិបាតនេះមានគោលបំណងសរុបវាយតម្លៃ ពិនិត្យវឌ្ឍនៈភាពការងារ និងបញ្ហាប្រឈមនានារបស់សមាគមក្រុមប្រឹក្សារាជធានី ខេត្ត ដែលសម្រេចបានកន្លងមក។ សមាគមក្រុមប្រឹក្សារាជធានី ខេត្ត ត្រូវបានបង្កើតឡើងតាមរយៈអង្គសន្និបាតនាថ្ងៃទី២៧ និង២៨ ខែមីនា ឆ្នាំ២០១៣ នៅរាជធានីភ្នំពេញ ដោយគិតមកដល់ពេលនេះបានរយៈពេល ១១ឆ្នាំហើយ។ឯកឧត្ដម ឃួង ស្រេង បន្តទៀតថា វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានីភ្នំពេញ អាណត្តិទី៤ ឆ្នាំ២០២៤ បានបញ្ចប់ទៅដោយទទួលបានមតិ យោបល់ សំណើ និងសំណូមពរជាច្រើនពីប្រជាពលរដ្ឋ ដើម្បីដោះស្រាយជាមួយ និងការអភិវឌ្ឍរាជធានីភ្នំពេញឱ្យរីកចម្រើនបន្ថែមទៀត ដែលនេះពិតជាបានបង្ហាញឱ្យឃើញពីការយកចិត្តទុកដាក់របស់រាជរដ្ឋាភិបាលចំពោះប្រជាពលរដ្ឋ។ឯកឧត្ដម ម៉ប់ សារិន ប្រធានក្រុមប្រឹក្សារាជធានីភ្នំពេញ និងជាប្រធានសមាគមជាតិក្រុមប្រឹក្សារាជធានី ខេត្ត បានមានប្រសាសន៍ថា អង្គមហាសន្និបាតនេះនឹងប្រព្រឹត្តទៅមានរយៈពេលមួយថ្ងៃកន្លះ ដោយមានការបោះឆ្នោត និងប្រកាសលទ្ធផលបោះឆ្នោតជ្រើសរើសប្រធាន អនុប្រធាន សមាជិកក្រុមប្រឹក្សាជាតិ និងសមាជិកគណៈកម្មាធិការប្រតិបត្តិជាតិ របស់សមាគមជាតិក្រុមប្រឹក្សារាជធានី ខេត្ត។ឯកឧត្ដមម៉ប់ សារិន បានបន្តថា ដោយមានការគាំទ្រពីរាជរដ្ឋាភិបាល និងជាពិសេសគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) សមាគមជាតិក្រុមប្រឹក្សារាជធានី ខេត្ត ត្រូវបានបង្កើតឡើងតាមរយៈមហាសន្និបាត នាថ្ងៃទី២៧-២៨ ខែមីនា ឆ្នាំ២០១៣ ហើយត្រូវបានចុះបញ្ជីទទួលស្គាល់ដោយក្រសួងមហាផ្ទៃនៅថ្ងៃទី១៣ ខែឧសភា ឆ្នាំ២០១៣។ ផ្នែកតាមមាត្រាទី ៨ នៃលក្ខន្តិកៈដែលបានកំណត់ថា មហាសន្និបាតសមាគមជាតិត្រូវរៀបចំឡើងរៀងរាល់ ៥ ឆ្នាំម្តងនៅប្រទេសកម្ពុជា។ មហាសន្និបាតសមាគមជាតិសម្រាប់អាណត្តិទី៣នេះ មានគោលបំណង បូកសរុបសមិទ្ធផលការងារសម្រេចបានក្នុងអាណត្តិទី ២ រយៈពេល ៥ ឆ្នាំកន្លងមក គឺឆ្នាំ ២០១៩-២០២៤។ បោះឆ្នោតជ្រើសរើសប្រធាន អនុប្រធាន សមាជិកគណៈកម្មាធិការប្រតិបត្តិជាតិ និងសមាជិកក្រុមប្រឹក្សា ជាតិរបស់សមាគមជាតិ។រៀបចំកិច្ចប្រជុំក្រុមប្រឹក្សាជាតិលើកទី១ សម្រាប់អាណត្តិទី៣ របស់សមាគមជាតិ។ជាមួយគ្នានេះឯកឧត្ដម ម៉ប់ សារិន ក៏បានថ្លែងនូវការអរគុណយ៉ាងជ្រាលជ្រៅចំពោះ ឯកឧត្ដម ឃួង ស្រេង អភិបាលនៃគណៈអភិបាលរាជធានីភ្នំពេញ ដែលបានផ្តល់ដីទំហំជាង ៤៣០០ម៉ែត្រការ៉េ ដើម្បីសាងសង់អគាររដ្ឋបាលសមាគមជាតិក្រុមប្រឹក្សារាជធានី ខេត្ត ក្នុងការបំពេញការងាររបស់សមាគម ដោយគ្រោងសាងសង់នៅក្នុងឆ្នាំ២០២៥។ ឯកឧត្ដម ម៉ប់ សារិន ក៏បានថ្លែងនូវការគោរពអរគុណយ៉ាងជ្រាលជ្រៅបំផុតចំពោះសម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងជាប្រធានឧត្ដមប្រឹក្សាផ្ទាល់ព្រះមហាក្សត្យនៃព្រះរាជាណាចក្រកម្ពុជា ដែលបានបរិច្ចាកថវិកាចំនួន ៣ម៉ឺនដុល្លារ សម្រាប់ចូលរួមសាងសង់អគាររដ្ឋបាលសមាគមជាតិក្រុមប្រឹក្សារាជធានី ខេត្តនេះផងដែរ៕ អទ្ថបទ ៖ ប្រាក់ វ៉ាន់ដា

ទីលានទុកដាក់សំរាមខេត្តកំពង់ចាមថ្មី ត្រូវបានសម្ពោធដាក់ឲ្យដំណើរការជាផ្លូវការ

ទីលានទុកដាក់សំរាមខេត្តកំពង់ចាមថ្មី ត្រូវបានសម្ពោធដាក់ឲ្យដំណើរការជាផ្លូវការ នៅថ្ងៃទី២៤ ខែធ្នូ ឆ្នាំ២០២៤នេះស្ថិតនៅភូមិកោះរកា ឃុំកោះរកា ស្រុកកំពង់សៀម។ឯកឧត្តម រស់ វណ្ណា រដ្ឋលេខាធិការតំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានថ្លែងថាទីលានទុកដាក់សំរាមមានសារៈសំខាន់ណាស់ ព្រោះសំរាមជាវត្ថុធាតុដើមដ៏មានសារៈសំខាន់ ដែលអាចបង្កើតការងារជូនដល់ប្រជាពលរដ្ឋ តាមរយៈការញ៉ែកសំរាម និងកែច្នៃទៅជា គុណប្រយោជន៍ សម្រាប់ការប្រើប្រាស់ផ្សេងៗ។ ជាងនេះទៅទៀត ទីលានទុកដាក់សំរាមនេះ នឹងចូលរួមចំណែកក្នុងការលើកកម្ពស់គុណភាពការរស់នៅក្នុងតំបន់ និងតំបន់ជុំវិញទីតាំងទុកដាក់សំរាមនេះ ជាពិសេសការកាត់បន្ថយបញ្ហាប្រឈមទៅលើកត្តាសុខភាព និងការបំពុលបំផ្លាញបរិស្ថានផងដែរ។ឯកឧត្តម រស់ វណ្ណា បន្តទៀតថា ដោយមានការយកចិត្តទុកដាក់ពីសំណាក់រាជរដ្ឋាភិបាលកម្ពុជា និងក្រសួងពាក់ព័ន្ធ ក្នុងការ ដោះស្រាយផលប៉ះពាល់បរិស្ថាន ក្នុងន័យដំណើរប្រទេសជាតិឆ្ពោះទៅរក “បរិស្ថានរូបវន្ត និង ធម្មជាតិប្រកបដោយ សុខដុមភាព, ភាពធន់, បរិយាបន្ន” សម្រាប់ការរស់នៅប្រកបដោយ ផាសុកភាព ទើបរាជរដ្ឋាភិបាល តាមរយៈក្រសួងសាធារណៈការ និងដឹកជញ្ជូន បានជ្រើសរើសយកខេត្តកំពង់ចាម អនុវត្តគម្រោងអភិវឌ្ឍន៍ក្រុងរបៀងមហាអនុតំបន់មេគង្គ ជំហានទី៤ ដែលបានសម្រេចសាងសង់ទីលានទុកដាក់សំរាមក្រុងកំពង់ចាម ស្របតាមស្តង់បច្ចេកទេសក្នុងការកាត់ បន្ថយផលប៉ះពាល់បរិស្ថាន។ពិធីខាងលើនេះ ក៏មានការអញ្ជើញចូលរួមពី ឯកឧត្តម ឯកឧត្តម អ៊ុន ចាន់ដា អភិបាលខេត្តកំពង់ចាម និងលោកស្រី យូសាណា វ៉ាម៉ា នាយិកាធនាគារអភិវឌ្ឍន៍អាស៊ី (ADB)ប្រចាំព្រះរាជាណាចក្រកម្ពុជា។ គូសបញ្ជាក់ផងដែរថា ទីលានទុកដាក់សំរាមក្រុងកំពង់ចាម នៃគម្រោងអភិវឌ្ឍន៍ក្រុងរបៀងមហាអនុតំបន់មេគង្គជំហានទី៤ ក្រោមកម្ចីឥណទានសម្បទាន ពីធនាគារអភិវឌ្ឍន៍អាស៊ី ត្រូវបានសាងសង់រយៈពេល១៧ខែ ដោយគិតចាប់ពី ថ្ងៃទី០៥ ខែមករា ឆ្នាំ២០២៤ ទីលានទុកដាក់សំរាមនេះ ត្រូវបានសាងសង់លើផ្ទៃដីទំហំ ១៨,៦៨ហិកតា ស្ថិតនៅក្នុងភូមិកោះរកា ឃុំកោះរកា ស្រុកកំពង់សៀមដែលមានចម្ងាយប្រហែល ២៥គីឡូម៉ែត្រ ពីក្រុងកំពង់ចាម៕

កម្ពុជាកំពុងពង្រឹងផែនការសកម្មភាពសម្រាប់ការអភិរក្ស និងស្តារសត្វក្តាន់ដែលកំពុងរងគ្រោះថ្នាក់ជិតផុតពូជនៅលើពិភពលោក

បច្ចុប្បន្ននេះ ប្រភេទសត្វក្តាន់នេះត្រូវបានចាត់ទុកជាប្រភេទកំពុងរងគ្រោះថ្នាក់ជិតផុតពូជ នៅក្នុងបញ្ជីក្រហមនៃអង្គការសហភាពអន្តរជាតិសម្រាប់ការពារធម្មជាតិIUCN។ សត្វក្តាន់មានវត្តមាននៅក្នុងប្រទេសកម្ពុជាប្រមាណ១០០ក្បាល នៅក្នុងដែនជម្រកសត្វព្រៃព្រែកប្រសព្វ នៃខេត្តក្រចេះ និងនៅតាមតំបន់ការពារធម្មជាតិ មួយចំនួនទៀតមាននៅក្នុងភូមិសាស្រ្តខេត្តកោះកុង។ដើម្បីពង្រឹងការគ្រប់គ្រងនិងស្តារប្រភេទសត្វក្តាន់ តំណាងសហគមន៍តំបន់ការពារធម្មជាតិ អាជ្ញាធរមូលដ្ឋាន មន្ត្រីជំនាញ និងអ្នកពាក់ព័ន្ធនានា បានជួបពិភាក្សាគ្នា លើសេចក្តីព្រាងផែនការសកម្មភាព សម្រាប់ពង្រឹងការអភិរក្ស និងស្តារសត្វក្តាន់ឆ្នាំ ឆ្នាំ ២០២៥-២០៣៥ នៅក្នុងប្រទេសកម្ពុជា» នាថ្ងៃទី២៣ ខែធ្នូ ឆ្នាំ២០២៤ នៅខេត្តសៀមរាប។ ឯកឧត្តម ស្រី ស៊ុនលាង អគ្គនាយកនៃអគ្គនាយកដ្ឋានតំបន់ការពារធម្មជាតិ បានលើកឡើងថា ការរៀបចំផែនការសកម្មភាពសម្រាប់ការអភិរក្ស និងស្តារសត្វក្តាន់នេះ គឺស្របទៅនឹងគោលដៅរបស់យុទ្ធសាស្ត្រចក្រាវិស័យបរិស្ថាន២០២៣-២០២៨ ដែលជាផែនការយុទ្ធសាស្ត្ររយៈពេលវែងក្នុងការការពារប្រភេទសត្វកំពុងរងគ្រោះថ្នាក់ជិតផុតពូជ និងជាសម្បត្តិធម្មជាតិដ៏មានតម្លៃរបស់ប្រទេសកម្ពុជា និងពិភពលោក។មន្រ្តីជាន់ខ្ពស់របស់ក្រសួងបរិស្ថាន បានឱ្យដឹងដែរថា ផែនការការសកម្មភាពនេះក៏ស្របទៅនឹងផែនការយុទ្ធសាស្រ្តជាតិសម្រាប់ជីវៈចម្រុះរបស់រាជរដ្ឋាភិបាលកម្ពុជា ក្នុងការប្តេជ្ញាចិត្តការការពារធនធានជីវៈចម្រុះ ដូចជា ប្រភេទសត្វក្តាន់ និងទីជម្រករបស់វាមិនឱ្យបាត់បង់។ ជាពិសេសការរៀបចំនៃកម្មវិធីស្តារឡើងវិញ គឺជួយធានាបាននូវការរក្សាសេនេទិច ប្រភេទនេះបានគង់វង្សយូរអង្វែង។សូមបញ្ជាក់ថា សិក្ខាសាលាពិគ្រោះយោបល់ស្តីពី «ការរៀបចំផែនការសកម្មភាពសម្រាប់ការអភិរក្ស និងស្តារសត្វក្តាន់ ២០២៥-២០៣៥ នៅក្នុងប្រទេសកម្ពុជា» បានប្រព្រឹត្តទៅ ដោយក្រសួងបរិស្ថាន សហការជាមួយអង្គការWWF-កម្ពុជា និងមានការអញ្ជើញចូលរួមពី ថ្នាក់ដឹកនាំ និងមន្រ្តីក្រសួងបរិស្ថាន តំណាងគណៈអភិបាលខេត្តក្រចេះ តំណាងនាយកដ្ឋានចំណុះនៃអគ្គនាយកដ្ឋានតំបន់ការពារធម្មជាតិ មន្ទីរបរិស្ថានខេត្តក្រចេះ មន្ទីរបរិស្ថានខេត្តស្ទឹងត្រែង តំណាងសហគមន៍មូលដ្ឋាន និងអង្គការដៃគូពាក់ព័ន្ធមួយចំនួនទៀត៕

ក្រសួងទេសចរណ៍ប្រកាសដាក់ឱ្យដំណើរការជាផ្លូវការ នូវកម្មវិធីអភិវឌ្ឍន៍ជំនាញដំណាក់កាលទី៣ ដល់ខេត្តកំពង់ឆ្នាំង ដើម្បីអោយយុវជនគ្រួសារក្រីក្រមានការងារធ្វើ

កំពង់ឆ្នាំង ៖ ក្រសួងទេសចរណ៍ នៅថ្ងៃទី២៣ ខែធ្នូ ឆ្នាំ១០២៤នេះ បានប្រកាសដាក់ឱ្យដំណើរការជាផ្លូវការ នូវកម្មវិធីអភិវឌ្ឍន៍ជំនាញ ដំណាក់កាលទី៣រយៈពេល៤ឆ្នាំ (២០២៤-២០២៨) ដើម្បីអោយយុវជនគ្រួសារក្រីក្រមានការងារធ្វើសម្រាប់ខេត្តកំពង់ឆ្នាំង ។ កម្មវិធីនេះបានធ្វើឡើងក្រោមកអធិបតីភាព ឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍ និងជាប្រធានគណៈកម្មការគ្រប់គ្រងគម្រោង ហូកា និង លោក យិន សាវ៉េន អភិរបាលរងខេត្តកំពង់ឆ្នាំង រួមនិងមានការអញ្ជើញចូលរួមពីសណាក់ ប្រតិ្តករទេសចរណ៍ក្នុងខេត្តកំពង់ឆ្នាំង ។ឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍ និងជាប្រធានគណៈកម្មការគ្រប់គ្រងគម្រោងហូកាបានសំដែងនូវអំណរគុណ ដល់អង្គការ ស្វីសខន់ថាក់ Swiss contact ដែលបានសហការយ៉ាងជិតស្និតជាមួយក្រសួងទេសចរណ៍ក្នុងការគាំទ្រលើកម្មវិធីបណ្តុះបណ្តាលបដិសណ្ឋារកិច្ចហូកា (HoKa) ដែលកន្លងមកកម្មវិធីបណ្តុះបណ្តាលនេះបានធ្វើការបណ្តុះបណ្តាល អ្នកជំនាញទេសចរណ៍ នៅតាមខេត្តគោលដៅនៃគម្រោង។ កម្មវិធីបណ្តុះបណ្តាលបដិសណ្ឋារកិច្ច ធ្វើដោយឥតគិតថ្លៃ ដើម្បីអោយយុវជនក្រីក្រមកពីគ្រួសារងាយរងគ្រោះ អ្នកជំនាញកម្រិតទាប សហគមន៍ទេសចរណ៍ បានដាក់ពាក្យចូលរៀនជំនាញនេះ មានការងារធ្វើ មានប្រាក់ចំណូល និងអ្នកប្រតិបត្តិករនៅក្នុងវិស័យទេសចរណ៍ ពង្រឹងបាននូវគុណភាពសេវាកម្មឲ្យបានកាន់តែល្អប្រសើរ ។ ដូចនេះចាប់ពីពេលនេះទៅ មន្ទីរទេសចរណ៍ត្រូវរៀបចំផែនការក្នុងការបណ្តុះបណ្តាលជំនាញក្នុងវិស័យទេសចរណ៍ ដល់អ្នកជំនាញដល់យុវជនក្រីក្រមកពីគ្រួសារងាយរងគ្រោះ និងប្រតិបត្តិករ បានសិក្សាររៀនសូត្រកាន់តែច្រើន ក្រោមការគាំទ្រអង្គការដៃគូរ។លោក ជួប រតនា ប្រធាននាយកដ្ឋានផែនការអភិវឌ្ឍន៍ទេសចរណ៍ បានឲ្យដឹងថា៖ ការប្រកាសដាក់ឱ្យដំណើរការជាផ្លូវការ នូវកម្មវិធីអភិវឌ្ឍន៍ជំនាញដំណាក់កាលទី៣នៅខេត្តកំពង់ឆ្នាំងនាពេលនេះ ក្នុងគោលដៅគម្រោងសម្រាប់ការបណ្តុះបណ្តាលបដិសណ្ឋារកិច្ចនេះ ដើម្បីជំរុញលើកកម្ពស់គុណភាពសេវាកម្មទេសចរណ៍ក្នុងខេត្ត ឲ្យបានកាន់ល្អប្រសើរតាមរយៈការពង្រឹងសមត្ថភាពវិជ្ជាជីវៈរបស់យុវជនក្រីក្រ បុគ្គលិក ប្រតិបត្តិករទេសចរណ៍ ដែលគម្រោងមានរយៈពេល៤ឆ្នាំចាប់ពីឆ្នាំ២០២៤នេះរហូតដល់ឆ្នាំ២០២៨ ដោយធ្វើកការបណ្តុះបណ្តាល លើជំនាញទេសចរណ៍ ជំនាញសេវាកម្មម្ហូបអាហារ និងភេសជ្ជៈ ការិយាល័យជួរមុខ គេហកិច្ច និងជំនាញឆុងកាហ្វេជាដើម ៕ កាំង ហុងវាស្នា

បណ្ដាញសង្គម

ព័ត៌មានថ្មីៗ

ឯកឧត្តម ឌិត ទីណា បន្តដំណើរចុះជួបសំណេះសំណាលជាមួយសហគមន៍ទំនើបស្វាយចន្ទីភ្នំគូលែន នៅខេត្តសៀមរាប

លោក Trump ទទូចថាទីតាំងនុយក្លេអ៊ែរអ៊ីរ៉ង់ត្រូវបានបំផ្លាញស្របពេលមានរបាយការណ៍មួយចំនួនថាបានរួចផុតពីការបំផ្លាញ

ពលរដ្ឋជប៉ុនបោះឆ្នោតក្នុងការសាកល្បងដ៏សំខាន់សម្រាប់នាយករដ្ឋមន្ត្រី Shigeru Ishiba

អ្នកស្លាប់ក្នុងជំនន់ទឹកភ្លៀងនៅកូរ៉េខាងត្បូងសប្តាហ៍នេះ កើនឡើងដល់១៤ នាក់

ការប៉ះទង្គិចបានផ្ទុះឡើងក្នុងការតវ៉ាប្រឆាំងនឹងជនអន្តោប្រវេសន៍ក្នុងប្រទេសប៉ូឡូញ

ក្រសួងសុខាភិបាល បើកយុទ្ធនាការផ្តល់ថ្នាំលេបសមូហភាព ដើម្បីបង្ការជំងឺគ្រុនចាញ់ នៅខេត្តស្ទឹងត្រែង

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានជាតិ

កម្ពុជាកំពុងសហការជាមួយដៃគូពាក់ព័ន្ធ ជំរុញផ្គត់ផ្គង់ទឹកស្អាតឱ្យមានប្រើប្រាស់ទាំងអស់គ្នាត្រឹមឆ្នាំ២០៣០

មន្រ្តីជាន់ខ្ពស់គណបក្សកុម្មុយនីស្តវៀតណាមអបអរសាទរចំពោះសមិទ្ធផលធំៗដែលកម្ពុជាសម្រេចបាន

ក្រសួងការងារ ស្នើភាគីពាក់ព័ន្ធរួមគ្នាសម្រេចឲ្យបាននូវ “សហគ្រាសមួយជាសហគមន៍សុខសាន្តមួយ”

ទីលានទុកដាក់សំរាមខេត្តកំពង់ចាមថ្មី ត្រូវបានសម្ពោធដាក់ឲ្យដំណើរការជាផ្លូវការ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានជាតិ

កម្ពុជាកំពុងសហការជាមួយដៃគូពាក់ព័ន្ធ ជំរុញផ្គត់ផ្គង់ទឹកស្អាតឱ្យមានប្រើប្រាស់ទាំងអស់គ្នាត្រឹមឆ្នាំ២០៣០

មន្រ្តីជាន់ខ្ពស់គណបក្សកុម្មុយនីស្តវៀតណាមអបអរសាទរចំពោះសមិទ្ធផលធំៗដែលកម្ពុជាសម្រេចបាន

ក្រសួងការងារ ស្នើភាគីពាក់ព័ន្ធរួមគ្នាសម្រេចឲ្យបាននូវ “សហគ្រាសមួយជាសហគមន៍​សុខសាន្តមួយ”

ទីលានទុកដាក់សំរាមខេត្តកំពង់ចាមថ្មី ត្រូវបានសម្ពោធដាក់ឲ្យដំណើរការជាផ្លូវការ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ក្រសួងការងារ ស្នើភាគីពាក់ព័ន្ធរួមគ្នាសម្រេចឲ្យបាននូវ “សហគ្រាសមួយជាសហគមន៍សុខសាន្តមួយ”