BTV NEWS

សម្តេចតេជោ ហ៊ុន សែន ជួបសំណេះសំណាលជាមួយក្រុមប្រឹក្សា មន្ត្រីនៃមន្ទីរអង្គភាពនានាជុំវិញខេត្តកំពង់ធំ

ប្រធានអង្គការមូលនិធិអភិវឌ្ឍន៍មូស្លីមកម្ពុជា ផ្ដល់អំណោយជូនជនភៀសសឹកចំនួន ១៥០០គ្រួសារ នៅខេត្តបន្ទាយមានជ័យ

ប្រមុខការទូតកម្ពុជាធ្វើបទបង្ហាញជូនអង្គទូត ស្តីពីការសម្រេចចិត្តរបស់កម្ពុជា ពាក់ព័ន្ធនឹងតំបន់ទាមទារដែនសមុទ្រត្រួតគ្នាជាមួយ ប្រទេសថៃ

កម្ពុជា-ឥណ្ឌាដាក់ឱ្យដំណើរការទូទាត់ឆ្លងដែនតាមឃ្យូអរកូត ដើម្បីសម្រួលដល់ប្រជាជនឥណ្ឌាមកកម្ពុជា

ព័ត៌មានជាតិ

អតីតមន្ត្រីបក្សប្រឆាំង អំពាវនាវពលរដ្ឋខ្មែរកុំជឿក្រុមជ្រុលនិយមប្រឆាំងនៅក្រៅប្រទេសដែលប្រឌិតព័ត៌មានក្លែងក្លាយពាក់ព័ន្ធការបោះបង្គោលព្រំដែនបណ្ដោះអាសន្ន កម្ពុជា-ថៃ

បណ្តាអតីតបក្សប្រឆាំង អំពាវនាវពលរដ្ឋខ្មែរក្នុង និងក្រៅប្រទេស កុំជឿលើក្រុមបក្សប្រឆាំង និងក្រុមពួកជ្រុលនិយមនៅក្រៅប្រទេស ដែលបច្ចុប្បន្នកំពុងធ្វើសកម្មភាពញុះញុង ប្រឌិតព័ត៌មានក្លែងក្លាយ ដើម្បីទាញរកភាពទាក់ទាញ ការគាំទ្របក្ស កេងចំណិញផ្នែកនយោបាយ អំពីករណីការបោះបង្គោលព្រំដែនកម្ពុជា ថៃ នៅខេត្តបន្ទាយមានជ័យ និងនៅខេត្តបាត់ដំបង។ បើតាមអតីតមន្ត្រីជាន់ខ្ពស់បក្សប្រឆាំងលោក ស៊ុយ ឆៃលាង បានថ្លែងប្រាប់BTV នៅថ្ងៃទី២៦ ខែវិច្ឆិកានេះថា ក្នុងនាមលោកជាអតីតមន្ត្រីជាន់ខ្ពស់បក្សប្រឆាំងម្នាក់ បានមើលឃើញថា ដំណើរការដោះស្រាយបញ្ហាព្រំដែនកម្ពុជា ថៃ គឺជាបញ្ហាស្មុគស្មាញ ដែលបានបន្សល់ទុករាប់រយឆ្នាំមកហើយ ហើយប្រមុខថ្នាក់ដឹកនាំរាជរដ្ឋាភិបាលកម្ពុជាតាំងពីសម្តេចតេជោ ហ៊ុន សែន និងតរហូតមកដល់សម្តេចធិបតី ហ៊ុន ម៉ាណែត ជានាយករដ្ឋមន្ត្រី គឺបានប្រកាន់គោលជំហរ ដោះស្រាយបញ្ហាព្រំដែនដោយឈរតាមគោលការណ៍យន្តការច្បាប់អន្តរជាតិ និងរដ្ឋធម្មនុញ្ញនៃព្រះរាជាណាចក្រកម្ពុជា ហើយលោកក៏បានអំពាវនាវពលរដ្ឋខ្មែរនានាកុំជឿពួកបក្សប្រឆាំងនៅក្រៅប្រទេស ដែលតែងធ្វើនយោបាយទុច្ចរិត បំភ័នមហាជន ដើម្បីទាញរកការគាំទ្របក្សរបស់ខ្លួន ដោយមិនគិតពីផលប្រយោជន៍ជាតិ និងសេចក្តីសុខរបស់ពលរដ្ឋ។បណ្តាអតីតមន្ត្រីជាន់ខ្ពស់បក្សប្រឆាំងនៅតាមបណ្តាខេត្តនានាទៀត បានថ្លែងដែរថា ការចុះអនុវត្តការងារវាស់វែង និងបោះបង្គោលព្រំដែនបណ្តោះអាសន្ននៅកំណាត់ខ្សែព្រំដែនចន្លោះបង្គោលព្រំដែនលេខ៤២-៤៧ នៅខេត្តបន្ទាយមានជ័យ និង លេខ៥២-៥៩ នៅខេត្តបាត់ដំបង គឺធ្វើឡើងស្របតាមស្មារតីដែលបានឯកភាពគ្នារវាងគណៈកម្មការចម្រុះខណ្ឌសីមាព្រំដែនគោកកម្ពុជា-ថៃ (JBC) ហើយក្រុមការងារបច្ចេកទេសព្រំដែននៃប្រទេសទាំងពីរបានរួមគ្នាធ្វើជិត ២០ឆ្នាំមកហើយ ស្របតាមច្បាប់អន្តរជាតិ គោរពគោលការណ៍ព្រំដែនមិនកែប្រែ និងខ្សែព្រំដែនអន្តរជាតិ កម្ពុជា-ថៃ ដែលបន្សល់ទុកដោយគណៈកម្មការព្រំដែនរវាងឥណ្ឌូចិន-សៀម។ សូមបញ្ជាក់ថា ការខិតខំបំភ្លៃការពិត ប្រឌិតព័ត៌មានក្លែងក្លាយ ទាក់ទាញការគាំទ្រ របស់បណ្តាពួកបក្សប្រឆាំង និងក្រុមពួកជ្រុលនិយមនៅក្រៅប្រទេស បានកើតឡើងមានច្រើន បន្ទាប់ពីក្រុមវាស់វែងចម្រុះចុះអនុវត្តការងារវាស់វែងនិងបោះបង្គោលព្រំដែន បណ្តោះអាសន្ន កម្ពុជា ថៃ បាននិងកំពុងធ្វើការងារយ៉ាងសកម្មភាពចុះវាស់វែងបង្គោលព្រំដែននៅកំណាត់ខ្សែព្រំដែនចន្លោះបង្គោលព្រំដែនលេខ៤២-៤៧ នៅខេត្តបន្ទាយមានជ័យ និង លេខ៥២-៥៩ នៅខេត្តបាត់ដំបង៕ អត្ថបទ ស៊ុម សុខជា

ពិព័រណ៍សៀវភៅកម្ពុជាលើកទី១២ នឹងធ្វើនៅខែធ្នូខាងមុខ ដោយមានស្តង់សៀវភៅជិត ៣០០ស្តង់

ព្រឹត្តិការណ៍ពិព័រណ៍សៀវភៅកម្ពុជា ជាព្រឹត្តិការណ៍ប្រចាំឆ្នាំ នឹងត្រូវរៀបចំឡើងជាថ្មី ចាប់ពីថ្ងៃទី ១១ ដល់ថ្ងៃទី ១៤ ខែធ្នូ ឆ្នាំ ២០២៥ខាងមុខ។ ពិព័រណ៍សៀវភៅលើកទី ១២ ខាងមុខនេះ មានស្តង់សៀវភៅចូលរួមចំនួនជិត ៣០០ស្តង់ ចូលរួមដើម្បីលើកកម្ពស់ការងារតែងនិពន្ធ ក៏ដូចជាជំរុញការអានរបស់ប្រជាពលរដ្ឋកម្ពុជា។ពិព័រណ៍សៀវភៅកម្ពុជា នៅឆ្នាំ ២០២៥នេះ ជាលើកទី ១២ហើយ ដែលត្រូវបានរៀបចំឡើង។ ការរៀបចំជាថ្មីនេះ ធ្វើឡើងក្រោមប្រធានបទ “សៀវភៅជាជំនួយអាហារបញ្ញា ជាអាហារគំនិត” ដោយនឹងត្រូវរៀបចំឡើងនៅ ទីតាំងកោះពេជ្រ ដែលមានស្តង់សៀវភៅជិត ៣០០ស្តង់ចូលរួមដាក់តាំងបង្ហាញ ក៏ដូចជាលក់សៀវភៅជាស្នាដៃរបស់ខ្លួន។ ក្នុងឱកាសសន្និសីទសារព័ត៌មាននាថ្ងៃនេះ ឯកឧត្តម គឹម ពីនន់ អនុរដ្ឋលេខាធិការ នៃក្រសួងវប្បធម៌ និងវិចិត្រសិល្បៈ លើកឡើងការរៀបចំពិព័រណ៍សៀវភៅកម្ពុជានេះ ពិតជាមានសារៈសំខាន់ សម្រាប់អ្នកនិពន្ធ និងកាន់តែមានសារៈប្រយោជន៍នោះគឺសម្រាប់សង្គមជាតិកម្ពុជា ក្នុងការបណ្ដុះទម្លាប់អានរបស់ពលរដ្ឋកម្ពុជា ពិសេសចាប់ផ្ដើមអានតាំងពីវ័យកុមារ ដែលអាចឈានទៅផ្ដល់ផលជះជាវិជ្ជមានសម្រាប់ការអភិវឌ្ឍសង្គមជាតិកម្ពុជា។ឯកឧត្តម អនុរដ្ឋលេខាធិការលើកឡើងលម្អិតដែរថា ពិព័រណ៍សៀវភៅកម្ពុជានាពេលខាងមុខនេះ នឹងមានការរៀបចំឡើងនូវសកម្មភាពជាច្រើន ដើម្បីស្រូបទាញការចូលរួមពីសាធារណជនទូទៅ ទាំងយុវជន ជាសិស្សនិស្សិត ក៏ដូចជាអាណាព្យាបាល ក្នុងការជូនកូនតូចចូលរួម ដើម្បីបណ្ដុះការស្រឡាញ់ការអានសៀវភៅ។ការតាំងពិព័រណ៍សៀវភៅកម្ពុជា ទទួលបានការគាំទ្រពីសាធារណជន ពិសេសយុវជន កាន់តែច្រើនពីមួយឆ្នាំទៅមួយឆ្នាំ។ ព្រឹត្តិការណ៍នេះ បានក្លាយជាព្រឹត្តិការណ៍វប្បធម៌ ដ៏សំខាន់ ក្នុងការផ្សព្វផ្សាយ ជំរុញលើកទឹកចិត្តឱ្យប្រជាពលរដ្ឋខ្មែរមានទម្លាប់ក្នុងការអានសៀវភៅ ស្គាល់ពីគុណតម្លៃនៃការអាន ដើម្បីអភិវឌ្ឍចំណេះដឹង និងការងារ៕ អត្ថបទ៖ គឹម ហុក

អ្នករាយការណ៍ពិសេស UN ចេញសេចក្តីថ្លែងការណ៍គាំទ្រវិធានការសន្តិភាព និងការកសាងទំនុកចិត្តរវាងកម្ពុជា និងថៃ

អ្នករាយការណ៍ពិសេស អង្គការសហប្រជាជាតិសម្រាប់សិទ្ធិមនុស្សនៅកម្ពុជា (UN Special Rapporteur on the situation of human rights in Cambodia) បានចេញសេចក្តីថ្លែងការណ៍គាំទ្រវិធានការសន្តិភាព និងការកសាងទំនុកចិត្តរវាងកម្ពុជា និងថៃ។ លោក វីទិត ម៉ុនតាប៊ន (Vitit Muntarbhorn) អ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា នៅថ្ងៃទី២៥ វិច្ឆិកា ឆ្នាំ២០២៥ ម៉ោងនៅកម្ពុជាលោកបានចេញសេចក្តីប្រកាសគាំទ្រយ៉ាងពេញទំហឹងចំពោះ កិច្ចព្រមព្រៀងសន្តិភាព និងវិធានការកសាងទំនុកចិត្តរវាងកម្ពុជា និងថៃ។ ការប្រកាសនេះធ្វើឡើងក្រោយពីសម្តេច ហ៊ុន សែន ប្រធានព្រឹទ្ធសភាកម្ពុជា ប្រកាសសួររកមុខ បន្ទាប់ពីកងទ័ពថៃធ្វើសកម្មភាពល្មើសច្បាប់អន្តរជាតិជាបន្តបន្ទាប់មកលើជនស៊ីវិលកម្ពុជាដែលរំលោភសិទ្ធិមនុស្សយ៉ាងព្រៃផ្សៃ។លោក ម៉ុនតាប៊ន បានថ្លែងថា រាល់វិធានការកសាងទំនុកចិត្តដែលជួយផ្សារភ្ជាប់ទំនាក់ទំនងរវាងប្រជាជាតិទាំងពីរ គឺសមនឹងទទួលបានការគាំទ្រពីអង្គការសហប្រជាជាតិ។ លោកបន្ថែមថា «ជនស៊ីវិលដែលរងផលប៉ះពាល់ដោយសារស្ថានភាពនៅតាមព្រំដែន គួរតែទទួលបានជំនួយស្របតាមស្តង់ដារសិទ្ធិមនុស្ស»។អ្នករាយការណ៍ពិសេស ដែលជាជនជាតិថៃរូបនេះ ដែលបានចូលកាន់តំណែងជាអ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជាកាលពីខែមីនា ឆ្នាំ២០២១ ថ្មីៗនេះបានរងការចាប់អារម្មណ៍យ៉ាងខ្លាំងចំពោះភាពស្ងៀមស្ងាត់របស់លោកលើស្ថានភាពសិទ្ធិមនុស្សដែលកើតចេញពីជម្លោះព្រំដែនរវាងកម្ពុជា និងថៃ ជាពិសេសការបន្តឃុំខ្លួនទាហានកម្ពុជាចំនួន ១៨នាក់ដោយកងទ័ពថៃ។សម្ដេចតេជោ ហ៊ុន សែន ប្រធានព្រឹទ្ធសភា កាលពីពេលថ្មីៗនេះបានចោទសួរថា ហេតុអ្វីបានជាលោក ម៉ុនតាប៊ន មិនចេញមុខនិយាយអំពីការឃុំខ្លួនកងទ័ពកម្ពុជា ខណៈដែលឯកអគ្គរាជទូតកម្ពុជាប្រចាំអង្គការសហប្រជាជាតិនៅទីក្រុងហ្សឺណែវ បានបញ្ជាក់ថា កម្ពុជាអាចនឹងពិចារណាលើការឆ្លើយតបសមស្របណាមួយចំពោះភាពអសកម្មរបស់អ្នករាយការណ៍ពិសេសអង្គការសហប្រជាជាតិរូបនេះ។អ្នករាយការណ៍ពិសេសបានស្វាគមន៍ចំពោះកិច្ចព្រមព្រៀងឈប់បាញ់ដែលសម្រេចបានដោយភាគីពាក់ព័ន្ធក្នុងខែកក្កដា ឆ្នាំ២០២៥។ លោកបានមានប្រសាសន៍ថា ការអនុវត្តកិច្ចព្រមព្រៀងនោះប្រកបដោយប្រសិទ្ធភាព ដែលផ្អែកលើការប្ដេជ្ញារួម ការសន្ទនា និងការអនុវត្តមនុស្សធម៌ គឺមានសារៈសំខាន់ណាស់ ដោយអនុវត្តតាមរយៈការកាត់បន្ថយភាពតានតឹង និងការដោះស្រាយជម្លោះដោយសន្តិវិធីស្របតាមច្បាប់អន្តរជាតិ។អ្នកជំនាញរូបនេះបានអំពាវនាវឱ្យមានវិធានការដើម្បីទប់ស្កាត់ព័ត៌មានមិនពិត។ លោកក៏បានកត់សម្គាល់ពីវត្តមានរបស់ការិយាល័យឧត្តមស្នងការសិទ្ធិមនុស្ស និងភ្នាក់ងារផ្សេងទៀតដែលអាចផ្តល់ជំនួយផងដែរ។លោក ម៉ុនតាប៊ន បានសម្តែងការគាំទ្រចំពោះសេចក្តីប្រកាសរួមរវាងកម្ពុជា និងថៃនៅទីក្រុងកូឡាឡាំពួរ ក្នុងខែតុលា ឆ្នាំ២០២៥ ដោយបញ្ជាក់ពីបទឈប់បាញ់ពីមុន និងធ្វើការប្តេជ្ញាចិត្តលើបញ្ហាជាច្រើន រួមទាំងច្បាប់មនុស្សធម៌អន្តរជាតិ ដែលការពារជនស៊ីវិល និងអ្នកទោសសង្គ្រាម។អ្នករាយការណ៍ពិសេសបានសង្កត់ធ្ងន់លើសារៈសំខាន់នៃការលើកកម្ពស់សិទ្ធិមនុស្ស សន្តិភាព លទ្ធិប្រជាធិបតេយ្យ និងការអភិវឌ្ឍប្រកបដោយចីរភាពនៅកម្ពុជា ហើយបានបញ្ជាក់ជាថ្មីនូវការត្រៀមខ្លួនរបស់លោកក្នុងការផ្តល់ជំនួយ៕

គ្រួសារយុទ្ធជនជួរមុខឈរជើងនៅទិសប្រាសាទតាក្របីក្នុងខេត្តបាត់ដំបង ទទួលបានផ្ទះ និងដីស្នាក់នៅពីសម្ដេចតេជោ

ឯកឧត្តម សុខ លូ អភិបាល នៃគណៈអភិបាលខេត្ត និងជាប្រធាន អ.ន.ក ខេត្តបាត់ដំបង កាលពីថ្ងៃទី២៤ ខែវិច្ឆិកា ឆ្នាំ២០២៥ បានចាត់ក្រុមការងារចុះប្រគល់ផ្ទះ ១ខ្នង និងដីលំនៅដ្ឋាន ១ហិកតា ដែលជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា ជាប្រធានសមាគមអតីតយុទ្ធជន និងនិវត្តជនកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី ជាអនុប្រធានទី១ សមាគម ជូនគ្រួសារយុទ្ធជនជួរមុខឈរជើងនៅទិសប្រាសាទតាក្របី គឺលោកព្រឹន្ទបាលឯក ពេជ្រ សុឃីម អាយុ៣៥ឆ្នាំ បច្ចុប្បន្នមានទីលំនៅភូមិនិគមក្រៅ ឃុំជ្រោយស្តៅ ស្រុកថ្មគោល ខេត្តបាត់ដំបង។ គ្រួសារយុទ្ធជនជួរមុខខាងលើ ទទួលបានផ្ទះ និងដីលំនៅដ្ឋាន ស្ថិតនៅចំណុចទាក់ធ្នឹម ភូមិគោករកា ឃុំដូនបា ស្រុកគាស់ក្រឡ ខេត្តបាត់ដំបង និងទទួលបានអំណោយបន្ថែមទៀតរួមមាន អង្ករ ៥០គីឡូក្រាម មី២កេស ទឹកត្រី២យួរ ទឹកស៊ីអ៊ីវ២យួរ ភួយ១ មុង១ ត្រីខ ២យួរ និងទឹកសុទ្ធ២កេស៕

ជនស៊ីវិលជាអង្គរក្ស២នាក់ ជិះម៉ូតូកាក់រថយន្តពលរដ្ឋបង្កភាពភ័យខ្លាចលើផ្លូវសាធារណៈ បានចូលខ្លួនបំភ្លឺ

ជនស៊ីវិលជាអង្គរក្ស២នាក់ ដែលបានជិះម៉ូតូកាក់រថយន្តពលរដ្ឋបង្កភាពភ័យខ្លាចលើផ្លូវសាធារណៈ បានចូលខ្លួនបំភ្លឺនៅស្នងការដ្ឋាននគរបាលរាជធានីភ្នំពេញហើយ នៅព្រឹកថ្ងៃទី២៦ ខែវិច្ឆិកា ឆ្នាំ២០២៥នេះ ។ ជនទាំង២នាក់ មានឈ្មោះយឿង វិចិត្រ ភេទប្រុស អាយុ២៩ឆ្នាំ និងម្នាក់ទៀងឈ្មោះ ឡូត សាន់ថុន ភេទប្រុស អាយុ៣២ឆ្នាំ ។ ពួកគេបានចូលខ្លួនទៅកាន់អធិការដ្ឋាននគរបាលខណ្ឌច្បារអំពៅ ហើយក៏ត្រូវនាំខ្លួនបន្តទៅកាន់ស្នងការដ្ឋាននគរបាលរាជធានីភ្នំពេញតែម្តង ។ ក្រោយការសាកសួរនាំ មន្រ្តីជំនាញព្រហ្មទណ្ឌនឹងធ្វើរបាយការណ៍រាយការណ៍សុំគោលការណ៍ពីឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ដើម្បីពិនិត្យនិងសម្រេច ។ គួររំលឹកថា ឧត្តមសេនីយ៍ឯកជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ កាលពីយប់ថ្ងៃទី២៥ ខែវិច្ឆិកា ឆ្នាំ២០២៥ បានដាក់បទបញ្ជាបន្ទាន់ ដល់កម្លាំងជំនាញឲ្យស្រាវជ្រាវតាមស្វែងរកជនស៊ីវិល០២នាក់ ជិះម៉ូតូកាក់រថយន្តពលរដ្ឋ បង្កភាពភ័យខ្លាចលើដងផ្លូវសាធារណៈ យកមកសួរនាំ ។ បទបញ្ជារបស់លោកឧត្តមសេនីយ៍ឯកស្នងការធ្វើឡើងបន្ទាប់ពី មានការបង្ហោះចែកចាយនៅលើបណ្តាញទំនាក់ទំនងសង្គម អំពីសកម្មភាព របស់បុរស០២នាក់ ដែលបានជិះម៉ូតូមួយគ្រឿងម៉ាកហុងដាឌ្រីមឌុបគ្នា ហើយជិះទៅកាក់ពីមុខរថយន្តពលរដ្ឋអ្នកដំណើរ និងប្រើពាក្យពេជន៍សម្លុតគំរាមលើអ្នកបើកបររថយន្ត ធ្វើឲ្យមានការភិតភ័យខ្លាច ។ ផ្អែកតាមវីឌីអូរដែលបានបែកធ្លាយ អាចបញ្ជាក់បានថា ៖ ជនស៊ីវិលទាំង០២នាក់ជាអង្គរក្ស កំពុងព្យាយាមការពារមេកើយរបស់ខ្លួន តាមរយៈការមិនឲ្យយានយន្តដទៃដែលកំពុងធ្វើដំណើរលើដងផ្លូវ អាចចូលទៅក្បែររថយន្តមេកើយរបស់ខ្លួន ដែលជារថយន្តស៊េរីទំនើបមួយគ្រឿងកំពុងធ្វើដំណើរស្របពេលជាមួយគ្នានោះ ៕ លីហេង

អ្នកតាមដានស្ថានការណ៍នយោបាយ៖ ការដោះស្រាយជម្លោះព្រំដែនកម្ពុជា និងថៃ កំពុងទទួលផលជាវិជ្ជមាន

អ្នកស្រាវជ្រាវ និងតាមដាន កិច្ចការនយោបាយជាតិ-អន្តរជាតិ មើលឃើញថារហូតមកដល់ពេលនេះ ការដោះស្រាយជម្លោះព្រំដែនរវាង កម្ពុជា និងថៃ កំពុងទទួលផលវិជ្ជមានជាបន្តបន្ទាប់ ទោះបីជាភាគីថៃមិនទាន់គោរពបាននូវកិច្ចព្រមព្រៀងឈប់បាញ់ និងកិច្ចព្រមព្រៀងសន្ដិភាពក៏ដោយ ប៉ុន្ដែការងារបច្ចេកទេសភាគីទាំងពីរបានឈានដល់ការបោះបង្គោលព្រំដែនបណ្ដោះអាសន្ននៅទីទាំងឯកភាពគ្នាមួយចំនួន និងទប់ស្កាត់បានការផ្ទុះអាវុធដាក់គ្នាទ្រង់ទ្រាយធំឡើងវិញ។ លោកបណ្ឌិត ឆេង គឹមឡុង ប្រធានវិទ្យាស្ថានចក្ខុវិស័យអាស៊ី (AVI) មើលឃើញថា កន្លងមកនេះ ប្រមុខដឹកនាំរាជរដ្ឋាភិបាលកម្ពុជា បានខិតខំប្រឹងប្រែងអស់ពីលទ្ធភាពលើការដោះស្រាយជម្លោះព្រំដែនជាមួយភាគីថៃ តាមយន្តការការទូត និងច្បាប់អន្តរជាតិ ដោយមិនឱ្យមានការផ្ទុះអាវុធឡើងវិញ ដែលអាចបង្កឱ្យការខូតខាត និងបាត់បង់អាយុជីវិតកងទ័ព និងប្រជាជនកម្ពុជា និងធ្វើយ៉ាងណាស្ដារឡើងវិញនូវទំនាក់ទំនងល្អរវាងប្រទេសទាំងពីរ ឈានទៅដល់ការដោះស្រាយជម្លោះព្រំដែននេះប្រកបទៅដោយប្រសិទ្ធភាព តាមយន្តការដែលមានស្រាប់ និងយន្តការគតិយុត្តអន្តរជាតិ។លោកបន្តថា រហូតមកទល់ពេលនេះ ចាប់តាំងពីការចុះហត្ថលេខាលើបទឈប់បាញ់គ្នារវាងកម្ពុជា និងថៃ កាលពីថ្ងៃទី២៨ ខែកក្កដា ឆ្នាំ២០២៥ កន្លងទៅ និងការចុះកិច្ចព្រមព្រៀងសន្ដិភាព នៅទីក្រុងកូឡាឡាំពួ កាលពីថ្ងៃទី២៦ ខែតុលា គឺស្ថានភាពការដោះស្រាយជម្លោះប្រទេសទាំងពីរទទួលបានលទ្ធផលជាវិជ្ជមានជាបន្តបន្ទាប់ទោះបីជាភាគីថៃមិនទាន់គោរពបានពេញលេញ និងប្រព្រឹត្តល្មើសជាបន្តបន្ទាប់មកលើកម្ពុជាក៏ដោយ។ ចំណែកលោកបណ្ឌិត ឈត ប៊ុនថង អ្នកស្រាវជ្រាវកិច្ចការនយោបាយជាតិ-អន្តរជាតិ មើលឃើញដែរថា ជម្លោះព្រំដែនរវាងកម្ពុជា និងថៃម្ដងនេះមានលក្ខណៈទ្រង់ទ្រាយធំជាងជម្លោះមុនៗចាប់តាំងពីឆ្នាំ២០១៣មក។ ជម្លោះទ្រង់ទ្រាយធំនោះគឺធំទាំងនៅសមរភូមិ ការប្រើប្រាស់អាវុធ ប្រើប្រាស់កម្លាំង និងធំទាំងនយោបាយការទូត ការផ្សព្វផ្សាយចេញនៅលើបណ្ដាញសារព័ត៌មានជាដើម។ ដូច្នេះលោកប្រៀបធៀបជម្លោះនេះ បើសិនជាជំងឺ គឺជាជំងឺធ្ងន់ដែលត្រូវការគ្រូពេទ្យដែលពូកែ ត្រូវការថ្នាំព្យាបាលដែលល្អ និងត្រូវការពេលវេលាយូរដើម្បីព្យាបាលឱ្យជាសះស្បើយឡើងវិញ។ សូមជម្រាបថា សម្ដេចធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បន្តអំពាវនាវដល់បងប្អូនជនរួមជាតិទាំងអស់មេត្តាជឿទុកចិត្តលើរាជរដ្ឋាភិបាលកម្ពុជា និងគណៈកម្មការចម្រុះខណ្ឌសីមាព្រំដែនគោក (JBC) កម្ពុជាដែលជានិច្ចកាលតែងប្រកាន់ខ្ជាប់នូវមនសិការវិជ្ជាជីវៈ និងការទទួលខុសត្រូវខ្ពស់បំផុត ដោយតម្កល់ឧត្តមប្រយោជន៍ជាតិជាធំ ជាពិសេសការការពារបូរណភាពទឹកដី និងអធិបតេយ្យជាតិ ដោយប្រកាន់ខ្ជាប់នូវការគោរពច្បាប់អន្តរជាតិ គោរពគោលការណ៍ព្រំដែនមិនកែប្រែ និងខ្សែព្រំដែនអន្តរជាតិ កម្ពុជា-ថៃ ដែលបន្សល់ទុកដោយគណៈកម្មការព្រំដែនរវាងឥណ្ឌូចិន-សៀម៕ អត្ថបទ៖ វ៉ន ដារ៉ា

អតីតយុទ្ធជនពិការដោយសារសង្គ្រាមនៅខេត្តកំពង់ធំមួយគ្រួសារ ទទួលបានអំណោយផ្ទះថ្មីពីសម្ដេចតេជោ និងសម្ដេចកិតិ្តព្រឹទ្ធបណ្ឌិត

ឧត្តមសេនីយ៍ទោ សោម ស៊ុន មេបញ្ជាការ តំបន់ប្រតិបត្តិការសឹករងកំពង់ធំ តំណាងគណៈកម្មាធិការសមាគមអតីតយុទ្ធជន និងនិវត្តជនកម្ពុជា ខេត្តកំពង់ធំ ជាមួុយលោក ជួន សិលាវិត ប្រធានសាខាមូលនិធិជាតិជំនួយសង្គម ខេត្តកំពង់ធំ និងលោក យ៉ុម ហឿន អភិបាលរង ស្រុកប្រាសាទបល្ល័ង្ក កាលពីថ្ងៃទី២៥ ខែវិច្ឆិកា ឆ្នាំ២០២៥ បានដឹកនាំសហការី និងអាជ្ញាធរដែនដី ចុះប្រគល់ផ្ទះថ្មី ដែលជាអំណោយដ៏ថ្លៃថ្លារបស់សម្ដេចតេជោ ហ៊ុន សែន និងសម្ដេចកិតិ្តព្រឹទ្ធបណ្ឌិត ព្រមទាំងសម្តេចមហាបវរធិបតី ហ៊ុន ម៉ាណែត និងលោកជំទាវ ជូនអតីតយុទ្ធជនពិការដោយសារសង្គ្រាមមួយគ្រួសារ ដែលមានដីតែមានជម្រកស្នាក់នៅមិនសមរម្យ ស្ថិតនៅភូមិថ្នល់ ឃុំទួលគ្រើល ស្រុកប្រាសាទបល្ល័ង្ក ខេត្តកំពង់ធំ។ អតីតយុទ្ធជនពិការខាងលើឈ្មោះ សេង ផល អាយុ ៦៤ឆ្នាំ មានឋានន្តរសក្ដិពលបាលឯក បានរៀបរាប់ថា គាត់ធ្លាប់បានចូលបម្រើក្នុងជួរកងទ័ពឆ្នាំ១៩៨៤ នៅអង្គភាពយោធាស្រុកកំពង់ស្វាយ ខេត្តកំពង់ធំ។ នៅឆ្នាំ ១៩៨៩ បានរងរបួសចង្កេះស្ដាំ និងជើងខាងស្ដាំ បច្ចុប្បន្នមានកូននៅក្នុងបន្ទុកចំនួន ៥នាក់ រស់នៅក្នុងផ្ទះតូចចង្អៀត ហើយមានជីវភាពលំបាកខ្វះខាត ព្រមទាំងមានជំងឺប្រចាំកាយផងដែរ។ ក្នុងឱកាសនោះ ឧត្តមសេនីយ៍ទោ សោម ស៊ុន បានបញ្ជាក់ថា ផ្ទះថ្មី ដែលទើបសាងសង់រួចនេះ មានទំហំ ៥ម៉ែត្រ គុណនឹង៧ម៉ែត្រ សាងសង់ពីសសរបេតុង ឆ្អឹងដែក ដំបូលប្រក់ស័ង្កសីកិនភ្លី ជញ្ជាំងស្មាតប៊ត រនាបក្រាលក្តារ ដោយមានតសំយ៉ាបផ្ទះបាយទៅក្រោយប្រវែង ៣ម៉ែត្រ ព្រមទាំងមានបង្គន់អនាម័យសម្រាប់ប្រើប្រាស់ ដែលជាអំណោយដ៏ថ្លៃថ្លារបស់សម្ដេចតេជោ ហ៊ុន សែន ប្រធានសមាគមអតីតយុទ្ធជន និងនិវត្តជនកម្ពុជា និងសម្ដេចមហាបវរធិបតី ហ៊ុន ម៉ាណែត តាមរយៈឯកឧត្តមទេសរដ្ឋមន្ត្រី នាយឧត្តម សេនីយ៍កិត្តិសង្គហបណ្ឌិត គន់ គីម អនុប្រធាន និងជាអគ្គលេខាធិការសមាគមអតីតយុទ្ធជន និងនិវត្តជនកម្ពុជា ទុកជាចំណងដៃជូនក្រុមគ្រួសារអតីតយុទ្ធជនពិការដោយសារសង្គ្រាមខាងលើ បានរស់នៅសមរម្យជារៀងរហូតតទៅ។ ក្រៅពីនេះ ឧត្តមសេនីយ៍ទោ សោម ស៊ុន ក៏បាននាំយកនូវស្បៀងអាហារ គ្រឿងឧបភោគបរិភោគ សម្ភារប្រើប្រាស់ មានមុង ភួយ កន្ទេល ខ្នើយ សំលៀកបំពាក់ ចាន ឆ្នាំង ព្រមទាំងសម្ភារប្រើប្រាស់ផ្សេងៗមួយចំនួនទៀត ដែលជាអំណោយដ៏ថ្លៃថ្លារបស់សម្ដេចមហាបវរធិបតី ហ៊ុន ម៉ាណែត និងលោកជំទាវ ជូនដល់ក្រុមគ្រួសារអតីតយុទ្ធជនសម្រាប់ដោះស្រាយជីវភាពប្រចាំថ្ងៃ និងសម្រាប់ប្រើប្រាស់ក្នុងឱកាសទទួលបានផ្ទះថ្មីនេះផងដែរ។ជាមួយគ្នានោះ លោកពលបាលឯក សេង ផល បានសូមគោរពថ្លែងអំណរគុណដ៏ជ្រាលជ្រៅជាទីបំផុត ចំពោះសម្ដេចតេជោ ហ៊ុន សែន និងសម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំងសម្ដេចមហាបវរធិបតី ហ៊ុន ម៉ាណែត និងលោកជំទាវ ដែលបានផ្ដល់ផ្ទះថ្មីមួយខ្នងជូនលោក និងគ្រួសារ ដែលកំពុងមានជីវភាពលំបាកខ្វះខាត និងមានជម្រករស់នៅមិនសមរម្យ និងសូមគោរពជូនពរសម្ដេច ឯកឧត្តម លោកជំទាវ និងថ្នាក់ដឹកនាំគណៈកម្មាធិការសមាគមអតីតយុទ្ធជន និងនិវត្តជនកម្ពុជា នៅគ្រប់ជាន់ថ្នាក់ សូមទទួលបាននូវពុទ្ធពរទាំង ៤ប្រការ កុំបីឃ្លៀងឃ្លាតឡើយ៕

មន្ត្រីជាន់ខ្ពស់ធនាគារជាតិ ក្រើនរំលឹកដល់សាធារណជន លើការឆបោកកម្ចីខុសច្បាប់ និង តាមប្រព័ន្ធបច្ចេកវិទ្យា

មន្រ្តីជាន់ខ្ពស់ធនាគារជាតិនៃកម្ពុជា ក្រើនរំលឹកដល់សាធារជន ឱ្យមានការប្រុងប្រយ័ត្នខ្ពស់ ចំពោះល្បិចកលជនឆបោក និងបែង ចែកឱ្យដាច់ រវាងកម្ចីជាមួយស្ថាប័នស្របច្បាប់ និងកម្ចីខុសច្បាប់ ជាពិសេសល្បិចកលជនឆបោកតាមប្រព័ន្ធបច្ចេកវិទ្យា ដែលបាននិង កំពុងកើតឡើង។ឯកឧត្តម យឹម លាត ទេសាភិបាលរងធនាគារជាតិនៃកម្ពុជា លើកឡើងនៅក្នុងសិក្ខាសាលាស្តីពី “ចំណេះដឹងផ្នែកហិរញ្ញវត្ថុ និង កិច្ចការពារអតិថិជន” ខេត្តកំពង់ឆ្នាំង ថ្មីនេះថា ជុំវិញបញ្ហាហិរញ្ញវត្ថុប្រកបដោយចីរភាព ធនាគារជាតិនៃកម្ពុជា បាននិងកំពុងយកចិត្ត ទុកដាក់ និងចាត់ទុកកិច្ចការពាក់ព័ន្ធនិងការជំរុញហិរញ្ញវត្ថុប្រកបដោយចីរភាព លើសពីនេះធនាគារ ជាតិនៃកម្ពុជាបានយកចិត្តទុកដាក់ ផងដែរ ចំពោះប្រជាពលរដ្ឋដែលរងគ្រោះពីកម្ចីខុសច្បាប់ ដោយត្រូវបង់ការប្រាក់ខ្ពស់ហួសហេតុ និងត្រូវបានគេគំរាមកំហែងគ្រប់រូប ភាព បង្ខំឲ្យសងប្រាក់ខុសគោលការណ៍ និងបណ្តាលឱ្យធ្លាក់ខ្លួនកើតវិបត្តិផ្លូវចិត្ត ដោយសារបំណុលវ័ណ្ឌក និងត្រូវគេរឹបអូសទ្រព្យអស់ គ្មានសេសសល់។ដើម្បីឆ្លើយតបនឹងបញ្ហាប្រឈមខាងលើនេះ ឯកឧត្តមបានលើកទឹកចិត្ត និងអំពាវនាវដល់សិក្ខាកាមដែលចូលរួម ជួយផ្សព្វ ផ្សាយនិងក្រើនរំលឹកដល់សាធារណជន ឱ្យមានការប្រុងប្រយ័ត្នចំពោះល្បិចកលជនឆបោក និងបែងចែកឱ្យដាច់រវាងកម្ចីជាមួយ ស្ថាប័ន ស្របច្បាប់ និងកម្ចីខុសច្បាប់។ជុំវិញបញ្ហានេះដែរ, ថ្មីៗនេះ លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា នៅក្នុងពិធីសម្ភោធដាក់ឱ្យប្រើ ប្រាស់ទីស្នាក់ការគណបក្សឃុំតាំងក្រសៅ ស្រុកប្រាសាទសំបូរ ខេត្តកំពង់ធំ ក៏បានអំពាវនាវដល់ប្រជាជន ឲ្យមានការប្រុងប្រយត្ន័ចំពោះ ការប្រើប្រាស់បច្ចេកវិទ្យា ព្រោះមានជនខិលខូចប្រើប្រាស់បច្ចេកវិទ្យាទំនើបដើម្បីឆបោក, ជាក់ស្តែងកន្លងមកនេះ មានជនមួយចំនួនដើរ ឃោសនាលើការវិនិយោគយកការប្រាក់ខ្ពស់ជាដើម ដោយយកឈ្មោះថ្នាក់ និងស្ថាប័នហិរញ្ញវត្ថុ និងធនាគារផងដែរ។សូមបញ្ជាក់ថា ទាក់ទងនិងកម្ចី, ក្នុងនោះចំពោះកម្ចីជាមួយស្ថាប័នស្របច្បាប់ គឺខ្ចីពីគ្រឹះស្ថានធនាគារនិងមីក្រូហិរញ្ញវត្ថុ ដែលមានទីតាំង ច្បាស់លាស់មានអត្រាការប្រាក់សមរម្យ និងស្របតាមច្បាប់ គិតអត្រាជាភាគរយប្រចាំឆ្នាំ អតិថិជនទទួលបានការការពារត្រឹមត្រូវ។ ចំណែកកម្ចីខុសច្បាប់, កម្ចីពីអ្នកចងការប្រាក់៖ គឺការខ្ចីពីមិត្តភក្តិ ឬអ្នកស្គាល់គ្នា ការខ្ចីកម្ចីតាមអនឡាញ ដែលបានផ្សព្វផ្សាយនៅតាម បណ្តាញសង្គម (Facebook, Telegram, TikTok) ការរាប់លុយការខ្ចីលុយពីជនបរទេស ការខ្ចីលុយពីក្រុមឯកជនដោយប្រើឈ្មោះ ជាអង្គការ ដែលមានការប្រាក់ខ្ពស់ខ្លាំង គិតសេវាផ្សេងៗខុសគោលការណ៍ គិតការជាថ្ងៃ ទារលុយរាល់ថ្ងៃ គ្មានទីតាំងច្បាស់លាស់ ប្រកបជារបរឱ្យលុយគេខ្ចីជាប្រចាំ និងមិនមានការទទួលស្គាល់ ឬការអនុញ្ញាតពីធនាគារជាតិនៃកម្ពុជា គឺជាប្រាក់កម្ចីដែលធ្វើឡើង ដោយបុគ្គល ឬអង្គភាពដែលគ្មានអាជ្ញាបណ្ណ ដែលប្រតិបត្តិការនៅក្រៅក្របខ័ណ្ឌច្បាប់ ហើយគិតអត្រាការប្រាក់ហួសហេតុ ឬប្រើល្បិច បង្ខិតបង្ខំ ដើម្បីប្រមូលបំណុលជាដើម៕ អត្ថបទ៖ សុន រ៉ាឌី

រាជរដ្ឋាភិបាលលើកទឹកចិត្តផ្នែកពន្ធដារចំពោះសហគ្រាសដាំដុះ ផលិត ផ្គត់ផ្គង់ក្នុងស្រុក និងនាំចេញ

រាជរដ្ឋាភិបាលបានដាក់ចេញនូវវិធានការលើកទឹកចិត្តពន្ធដារ ចំពោះវិស័យកសិកម្ម ដែលនឹងចាប់ផ្តើមអនុវត្តចាប់ពីថ្ងៃទី១ ខែមករា ឆ្នាំ២០២៦ ដល់បំណាច់ឆ្នាំ២០២៧ សម្រាប់សហគ្រាសដែលធ្វើការដាំដុះ ផលិត សហគ្រាសផ្គត់ផ្គង់កសិផលក្នុងស្រុក និងការនាំចេញ។ ក្រសួងសេដ្ឋកិច្ច និងហិរញ្ញវត្ថុ នៅថ្ងៃទី១៩ ខែវិច្ឆិកា ឆ្នាំ២០២៥ នេះ ចេញប្រកាស ស្តីពីការលើកទឹកចិត្តពន្ធដារចំពោះវិស័យ កសិកម្ម ដោយប្រកាសនេះមានវិសាលភាពអនុវត្តចំពោះការដាំដុះ ការផលិត ការផ្គត់ផ្គង់ក្នុងស្រុក ឬការនាំចេញ ស្រូវ អង្ករ ពោត សណ្តែក ម្រេច ដំឡូងមី គ្រាប់ស្វាយចន្ទី ជ័រកៅស៊ូ មៀនប៉ៃលិន ស្វាយ ចេក ការចិញ្ចឹមសត្វ វារីវប្បកម្ម និងផលិតផលដូងប្រេងក្នុង ស្រុក ដែលជាវត្ថុធាតុដើមសម្រាប់ផលិតចំណីសត្វ ត្រូវបានចាត់ទុកជាបន្ទុករបស់រដ្ឋនូវអាករលើតម្លៃបន្ថែម ចំពោះការផ្គត់ផ្គង់ក្នុងស្រុក នូវទំនិញ ឬសេវាដល់សហគ្រាសដែលធ្វើការដាំដុះ ផលិត ផ្គត់ផ្គង់ក្នុងស្រុកដូចខាងលើ និងរួមជាមួយការផ្គត់ផ្គង់ផលិតផលដូងប្រេង ក្នុងស្រុក ដែលជាវត្ថុធាតុដើមសម្រាប់ផលិតចំណីសត្វ។ វិធានការនេះ មិនត្រូវគិតអាករលើតម្លៃបន្ថែមលើការផ្គត់ផ្គង់របស់ខ្លួនទេ ប៉ុន្តែ ត្រូវបានអនុញ្ញាតឥណទានអាករលើធាតុចូល ដែលទាក់ទិននឹងការផ្គត់ផ្គង់។ចំពោះសហគ្រាសដែលធ្វើការដាំដុះ ផលិត ផ្គត់ផ្គង់ក្នុងស្រុកខាងលើនេះដែរ និងការផលិតផលដូងប្រេងក្នុងស្រុក ដែលជាវត្ថុ ធាតុដើមសម្រាប់ផលិតចំណីសត្វ ត្រូវទទួលបានការអនុគ្រោះដូចជា៖ ១- ព្យួរទុកការបង់ពន្ធអប្បបរមា, ២- ព្យួរទុកការបង់ប្រាក់រំដោះ ពន្ធលើប្រាក់ចំណូល, ៣- រួចផុតពីកាតព្វកិច្ចកាត់ទុកប្រាក់ពន្ធលើការទូទាត់ ចំពោះការផ្គត់ផ្គង់សេវាដោយបុគ្គលមិនស្ថិតក្នុងរបបស្វ័យ ប្រកាស។ ដើម្បីទទួលបានការលើកទឹកចិត្តពន្ធដារចំពោះវិស័យកសិកម្មនេះ សហគ្រាសត្រូវបំពេញលក្ខខណ្ឌដូចជា៖ ស្នើសុំវិញ្ញាបន បត្រអាករលើតម្លៃបន្ថែមជាបន្ទុករបស់រដ្ឋ ពីអគ្គនាយកដ្ឋានពន្ធដារ, ភ្ជាប់បញ្ជីឈ្មោះអ្នកផ្គត់ផ្គង់ទំនិញ ឬសេវាជាមួយនឹងលិខិតប្រកាស អាករលើតម្លៃបន្ថែមប្រចាំខែ, កាន់បញ្ជីគណនេយ្យស្របតាមច្បាប់ និងលិខិតបទដ្ឋានគតិយុត្តជាធរមាន, ដាក់លិខិតប្រកាសសារពើពន្ធ ជូនរដ្ឋបាលសារពើពន្ធប្រចាំខែ ប្រចាំឆ្នាំទៅតាមទម្រង់ ពេលវេលា និងទីកន្លែងដែលរដ្ឋបាលសារពើពន្ធកំណត់។ ចំណែកសហគ្រាស ដែលធ្វើការផ្គត់ផ្គង់ផលិតផលដូងប្រេងក្នុងស្រុកដែលជាវត្ថុធាតុដើមសម្រាប់ផលិត ត្រូវភ្ជាប់បញ្ជីឈ្មោះសហគ្រាសទទួលការផ្គត់ផ្គង់ ជាមួយនឹងលិខិតប្រកាសអាករលើតម្លៃបន្ថែម។សូមបញ្ជាក់ថា ជុំវិញវិស័យកសិកម្មនេះ កម្ពុជានាំចេញកសិផលជាច្រើនប្រភេទ ក្នុងរយៈពេល ១0 ខែ ឆ្នាំ២០២៥, មានបរិមាណសរុប ជិត ១១,៩ លានតោន កើនឡើងជាង ៣០ ភាគរយ ធៀបរយៈពេលដូចគ្នានិងឆ្នាំមុន មានទំហំទឹកប្រាក់សរុបប្រមាណជាង ៤ ១៨៣ លានដុល្លារអាម៉េរិក ក្នុងនោះកសិកផលដែលគាំទ្រដល់ការនាំចេញរួមមាន៖ ស្រូវជាង ៥,៤ លានតោន កើនឡើង ៥៧%, ចំណិត ដំឡូងក្រៀមជិត ១,៤ លានតោន កើនឡើង ៦០%, អង្ករ ៦៩៨ ពាន់តោន កើនជិត ៣៨%, គ្រាប់ស្វាយចន្ទីជាង ៦៣៤ ពាន់តោន កើនជិត ១០%, ចេកស្រស់ ២៩០ ពាន់តោន កើន ៣៧%, គ្រាប់ពោតជិត ១៧០ ពាន់តោន កើន ១៣២% ធៀបរយៈ ពេលដូចគ្នាឆ្នាំ២០២៤ ក្រៅពីនេះនៅមានកសិផលជាច្រើនទៀត បានគាំទ្រដល់កំណើននាំចេញរបស់កម្ពុជា៕ អត្ថបទ៖ សុន រ៉ាឌី

ក្រសួងបរិស្ថាន និង EU ជំរុញការគ្រប់គ្រងសំណល់ប្លាស្ទិក តាមរយៈគម្រោងប្លាស្ទិកឆ្លាតវៃកម្ពុជា

នៅរសៀលថ្ងៃអង្គារ ទី២៥ ខែវិច្ឆិកា ឆ្នាំ២០២៥ ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន និង ឯកឧត្តម អ៊ីហ្គោរ៍ ឌ្រីសម៉ាន់ (Igor DRIESMANS) ឯកអគ្គរដ្ឋទូតសហភាពអឺរ៉ុបប្រចាំកម្ពុជា បានអញ្ជើញជាអធិបតីភាពក្នុងកិច្ចប្រជុំលើកទី១ គណៈកម្មការដឹកនាំតម្រង់ទិសគម្រោងប្លាស្ទិកឆ្លាតវៃកម្ពុជា ដោយការអញ្ជើញចូលរួមពីឯកឧត្តម ស៊ុ ធី អគ្គនាយក នៃអគ្គនាយកដ្ឋានគោលនយោបាយនិងយុទ្ធសាស្រ្ត និងលោក Koen Everaet អនុប្រធានផ្នែកកិច្ចសហប្រតិបត្តិការសហភាពអឺរ៉ុបប្រចាំកម្ពុជា តំណាងក្រសួងបរិស្ថាន តំណាងសហភាពប្រចាំកម្ពុជា និងអង្គការក្រៅរដ្ឋាភិបាល សរុបចំនួន ២០រូប។កិច្ចប្រជុំនេះរៀបចំឡើងក្នុងគោលបំណង ពិនិត្យ និងអនុម័តលើផែនការសកម្មភាព និងផែនការថវិកាក្នុងឆ្នាំ២០២៦ របស់គម្រោងប្លាស្ទិកឆ្លាតវៃកម្ពុជា និង បង្ហាញពីទិដ្ឋភាពទូទៅរបស់គម្រោងប្លាស្ទិកឆ្លាតវៃកម្ពុជា។ ឆ្លៀតក្នុងឱកាសនេះ ឯកឧត្តមឯកអគ្គរដ្ឋទូតសហភាពអឺរ៉ុប បានកោតសរសើរ និងសាទរចំពោះកិច្ចខិតខំប្រឹងប្រែងរបស់ក្រសួងបរិស្ថាន ក្នុងការពង្រឹងការគ្រប់គ្រងសំណល់ប្លាស្ទិក និង មីក្រូប្លាស្ទិក។ ជាមួយគ្នានេះ សហភាពអឺរ៉ុបនឹងចូលរួមពង្រឹងការគ្រប់គ្រង ការកែច្នៃ និងការទាក់ទាញការវិនិយោគបន្ថែមទៀត ដើម្បីលើកកម្ពស់ភាពស្អាតនៅកម្ពុជា។ ស្របនឹងការលើកឡើងនេះ ឯកឧត្តមរដ្ឋមន្ត្រី ក៏បានថ្លែងអំណរគុណដល់សហភាពអឺរ៉ុប ក្នុងការគាំទ្រ និងសហការយ៉ាងជិតស្និតជាមួយក្រសួងបរិស្ថាន ដើម្បីដោះស្រាយសំណល់ប្លាស្ទិក ដែលជាក្តីកង្វល់របស់ពិភពលោកដោយមិនចំពោះតែកម្ពុជា និងតំបន់នោះទេ។ ជាក់ស្តែងការប្រយុទ្ធប្រឆាំងសំណល់ សំរាមប្លាស្ទិកនេះក្រសួងបានដាក់ចេញនូវយុទ្ធសាស្រ្តជាជំហានៗ រាប់ចាប់តាំងពីយុទ្ធនាការបន្តរហូតមកដល់ចលនា ដោយផ្តើមចេញពីការប្តេជ្ញាចិត្តរបស់ប្រជាពលរដ្ឋប្រមាណជាង១៤លាននាក់ នៅក្នុងយុទ្ធនាការ “ថ្ងៃនេះ ខ្ញុំមិនប្រើថង់ប្លាស្ទិកទេ” និងប្រមាណជាង ៧លាននាក់នៅក្នុងយុទ្ធនាការ “កម្ពុជាស្អាត ខ្មែរធ្វើបាន” និង “ផ្លូវជាតិស្អាត គ្មានសំរាម និងសំណល់ប្លាស្ទិក” ដែលទទួលបានភាពស្អាតប្រមាណជាង ៨០%។លើសពីនេះ ក្រសួងបរិស្ថានក៏បានដាក់ចេញនូវយន្តការ និងដំណោះស្រាយជាច្រើន ដែលក្នុងនោះរួមមាន ការផ្តល់ជូនធុងសំរាមឱ្យប្រជាពលរដ្ឋបែងចែក និងទុកដាក់សំរាម ជាពិសេសការរៀបចំឱ្យមានទីលានទុកដាក់សំរាមឱ្យត្រឹមត្រូវ និងសមស្របតាមលក្ខណៈបច្ចេកទេស ដែលជាការការពារដល់សុខមាលភាពប្រជាពលរដ្ឋនៅតាមមូលដ្ឋាន។ ជាមួយគ្នានេះ ឯកឧត្តមរដ្ឋមន្រ្តី បានផ្តល់អនុសាសន៍ដល់អង្គការដៃគូសូមចូលរួមជាមួយក្រសួងបរិស្ថាន ដើម្បីឆ្ពោះទៅការគ្រប់គ្រងសំណល់ប្លាស្ទិកដ៏ប្រសើរ ដែលស្របទៅនឹងយុទ្ធសាស្ត្រចក្រាវិស័យបរិស្ថានដែលមាន ភាពស្អាត ភាពបៃតង និងចីរភាព៕

បណ្ដាញសង្គម

ព័ត៌មានថ្មីៗ

អាមេរិកវាយប្រហារកោះ Qeshm របស់អ៊ីរ៉ង់ ខណៈទីក្រុងតេអេរ៉ង់បាញ់មីស៊ីលទៅលើកូវ៉ែត និងបារ៉ែន

អ៊ីរ៉ង់ កំពុងសិក្សាកិច្ចព្រមព្រៀងផ្អាកសង្គ្រាម ខណៈភាពជាប់គាំងនៅតែបន្ត

UNICEF ៖ សង្រ្គាមអ៊ីរ៉ង់គំរាមកំហែងដល់ការចែកចាយគ្រឿងផ្គត់ផ្គង់សង្រ្គោះជីវិតកុមារ

ក្រុមហ៊ុន Moderna និងក្រុមហ៊ុនផ្សេងទៀត ទទួលបានប្រាក់ ៦០លានដុល្លារ ដើម្បីផលិតវ៉ាក់សាំងបង្ការជំងឺអេបូឡា

កូដកម្មរថភ្លើងក្រោមដីធ្វើឲ្យប៉ះពាល់ដល់អ្នកដំណើរនៅទីក្រុងឡុងដ្រ៍ ចក្រភពអង់គ្លេស

របាយការណ៍៖ EU ពិចារណាដាក់ទណ្ឌកម្មរដ្ឋមន្ត្រីអ៊ីស្រាអែល ជុំវិញការប្រព្រឹត្តិ ចំពោះនាវាមនុស្សធម៌ឆ្ពោះទៅហ្កាហ្សា

WHO៖ ករណីសង្ស័យជំងឺ Ebola ធ្លាក់ចុះ ក្រោយមនុស្សរាប់រយនាក់ត្រូវបានដកចេញ

ប្រធានគ្លីនិករងការខូចខាតដោយសារការវាយប្រហាររុស្ស៊ីនិយាយថា ទីក្រុងមូស្គូ មិនចង់បញ្ចប់សង្រ្គាមនោះទេ

អគ្គិភ័យដ៏ធំមួយ បានឆាបឆេះផ្សារមួយកន្លែងស្ថិតក្នុងទីក្រុងហ្សាកាតា ប្រទេសឥណ្ឌូនេស៊ី

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានជាតិ

ពិព័រណ៍សៀវភៅកម្ពុជាលើកទី១២ នឹងធ្វើនៅខែធ្នូខាងមុខ ដោយមានស្តង់សៀវភៅជិត ៣០០ស្តង់

អ្នករាយការណ៍ពិសេស UN ចេញសេចក្តីថ្លែងការណ៍គាំទ្រវិធានការសន្តិភាព និងការកសាងទំនុកចិត្តរវាងកម្ពុជា និងថៃ

គ្រួសារយុទ្ធជនជួរមុខឈរជើងនៅទិសប្រាសាទតាក្របីក្នុងខេត្តបាត់ដំបង ទទួលបានផ្ទះ និងដីស្នាក់នៅពីសម្ដេចតេជោ

ជនស៊ីវិលជាអង្គរក្ស២នាក់ ជិះម៉ូតូកាក់រថយន្តពលរដ្ឋបង្កភាពភ័យខ្លាចលើផ្លូវសាធារណៈ បានចូលខ្លួនបំភ្លឺ

អ្នកតាមដានស្ថានការណ៍នយោបាយ៖ ការដោះស្រាយជម្លោះព្រំដែនកម្ពុជា និងថៃ កំពុងទទួលផលជាវិជ្ជមាន

មន្ត្រីជាន់ខ្ពស់ធនាគារជាតិ ក្រើនរំលឹកដល់សាធារណជន លើការឆបោកកម្ចីខុសច្បាប់ និង តាមប្រព័ន្ធបច្ចេកវិទ្យា

រាជរដ្ឋាភិបាលលើកទឹកចិត្តផ្នែកពន្ធដារចំពោះសហគ្រាសដាំដុះ ផលិត ផ្គត់ផ្គង់ក្នុងស្រុក និងនាំចេញ

ក្រសួងបរិស្ថាន និង EU ជំរុញការគ្រប់គ្រងសំណល់ប្លាស្ទិក តាមរយៈគម្រោងប្លាស្ទិកឆ្លាតវៃកម្ពុជា

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានជាតិ

ពិព័រណ៍សៀវភៅកម្ពុជាលើកទី១២ នឹងធ្វើនៅខែធ្នូខាងមុខ ដោយមានស្តង់សៀវភៅជិត ៣០០ស្តង់

ជនស៊ីវិលជាអង្គរក្ស២នាក់ ជិះម៉ូតូកាក់រថយន្តពលរដ្ឋបង្កភាពភ័យខ្លាចលើផ្លូវសាធារណៈ បានចូលខ្លួនបំភ្លឺ

អ្នកតាមដានស្ថានការណ៍នយោបាយ៖ ការដោះស្រាយជម្លោះព្រំដែនកម្ពុជា និងថៃ កំពុង​ទទួ​ល​ផល​ជាវិជ្ជមាន

មន្ត្រីជាន់ខ្ពស់ធនាគារជាតិ ក្រើនរំលឹកដល់សាធារណជន លើការឆបោកកម្ចីខុសច្បាប់ និង តាមប្រព័ន្ធបច្ចេកវិទ្យា

រាជរដ្ឋាភិបាលលើកទឹកចិត្តផ្នែកពន្ធដារចំពោះសហគ្រាសដាំដុះ ផលិត ផ្គត់ផ្គង់ក្នុងស្រុក និងនាំចេញ

ក្រសួងបរិស្ថាន និង EU ជំរុញការគ្រប់គ្រងសំណល់ប្លាស្ទិក តាមរយៈគម្រោងប្លាស្ទិកឆ្លាតវៃកម្ពុជា

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

អ្នកតាមដានស្ថានការណ៍នយោបាយ៖ ការដោះស្រាយជម្លោះព្រំដែនកម្ពុជា និងថៃ កំពុងទទួលផលជាវិជ្ជមាន