BTV NEWS

ឯកឧត្តម ឌិត ទីណា បន្តដំណើរចុះជួបសំណេះសំណាលជាមួយសហគមន៍ទំនើបស្វាយចន្ទីភ្នំគូលែន នៅខេត្តសៀមរាប

ក្រសួងសុខាភិបាល បើកយុទ្ធនាការផ្តល់ថ្នាំលេបសមូហភាព ដើម្បីបង្ការជំងឺគ្រុនចាញ់ នៅខេត្តស្ទឹងត្រែង

មេទ័ពជួរមុខប្រចាំទិសប្រាសាទតាក្របី៖ ការលើកទឹកចិត្តរបស់ពលរដ្ឋជាកម្លាំងស្មារតីដ៏រឹងមាំសម្រាប់ពលទាហាន

TOP STORY | ក្រសួងការពារជាតិកម្ពុជា ប្រកាសច្រានចោលការចោទប្រកាន់របស់ភាគីថៃមកលើកម្ពុជា ពាក់ព័ន្ធនឹងការរងរបួសរបស់ទាហានថៃដោយសារការដើរល្បាតលើតម្រាយផ្លូវថ្មីផ្ទុះគ្រាប់មីន

ព័ត៌មានជាតិ

នគរបាលប្រឆាំងបទល្មើសសេដ្ឋកិច្ចរាជធានីភ្នំពេញ បានបង្រ្កាបផលិតផលគ្រឿងក្នុងជ្រូកខូចគុណភាព គ្មានសុវត្ថិភាព ជាង៧០០គីឡូក្រាម

ភ្នំពេញ៖ កម្លាំងការិយាល័យនគរបាលប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលរាជធានីភ្នំពេញ ឆ្មុកចុះបង្រ្កាបករណីចែកចាយផលិតផលគ្រឿងក្នុងជ្រូក ខូចគុណភាព គ្មានសុវត្ថិភាព បង្កប៉ះពាល់សុខភាពដោយដកហូតបានជាង៧០០គីឡូក្រាម។ប្រតិបត្តិការនេះបានធ្វើឡើង នាព្រឹកថ្ងៃទី២៣ ខែធ្នូឆ្នាំ២០២៤ អនុវត្តតាមបទបញ្ជាផ្ទាល់របស់ឯកឧត្តម ឧត្តមសនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ចាត់ឲ្យផែនជំនាញ ដោយលោកឧត្តមសេនីយ៍ទោ ពិត បញ្ញា ស្នងការរង ផែនការងារប្រឆាំងបទល្មើសសេដ្ឋកិច្ច និងលោកវរសេនីយ៍ឯក យឹម សុជាតិ នាយការិយាល័យនគរបាលប្រឆាំងបទល្មើសសេដ្ឋកិច្ច ឆ្មក់ចុះបង្ក្រាប់ ជាក់ស្ដែង ដែលឈ្មួញដឹកតាមម៉ូតូរ៉ឺម៉កផ្ទុកក្នុងសង្កាត់ទួលសង្កែ១ ខណ្ឌប្ញស្សីកែវ រាជធានីភ្នំពេញ។លោកវរសេនីយ៍ទោ ម៉ៅ សុទ្ធាគុណ នាយរងការិយាល័យនគរបាលប្រឆាំងបទល្មើសសេដ្ឋកិច្ច បញ្ជាក់ឱ្យដឹងថា បើយោងតាមចម្លើយសារភាពពីបុរសម្ចាស់ម៉ូតូរ៉ឺម៉ក គឺផលិតផលគ្រឿងក្នុងជ្រូករូបគាត់គ្រាន់តែស៊ីឈ្នួលដឹកឱ្យគេតែប៉ុណ្ណោះមិនមែនរបស់ខ្លួននោះឡើយ។ខណៈនោះសមត្ថកិច្ចក៏បានធ្វើការអប់រំនិងឱ្យធ្វើកិច្ចសន្យាចំពោះម្ចាស់ម៉ូតូរ៉ឺម៉ក បញ្ឈប់ការដឹកជញ្ជូនផលិតផលគ្រឿងក្នុងជ្រូកដែលគ្មានប្រភព និងឯកសារច្បាស់លាស់នៅពេលក្រោយទៀត ហើយបានអនុញ្ញាតឱ្យត្រឡប់ទៅផ្ទះវិញ។នគរបាលដដែលបានបញ្ជាក់ទៀតថា ផលិតផលទាំងនេះនាំចូលពីប្រទេសជិតខាងដែលកន្លងមកសមត្ថកិច្ចតែងតែបង្រ្កាបបានជាបន្តបន្ទាប់។ផលិតផលគ្រឿងក្នុងជ្រូកជាង៧០០គីឡូក្រាម ត្រូវបានកម្លាំងនគរបាលជំនាញដកហូតយកទៅដុតបំផ្លាញចោលផងដែរ៕អត្ថបទ៖ កុម្ភះ

មហាជនប្រមាណ ៥ម៉ឺននាក់នឹងចូលរួមព្រឹត្តិការណ៍បាល់ទាត់មិត្តភាពអបអរសាទរ «ទិវាសន្តិភាពនៅកម្ពុជា»

ភ្នំពេញ ៖ ព្រឹត្តិការណ៍បាល់ទាត់មិត្តភាពអបអរសាទរ «ទិវាសន្តិភាពនៅកម្ពុជា» នឹងធ្វើឡើងនៅពហុកីឡាដ្ឋានជាតិមរតកតេជោ នាថ្ងៃទី២៩ ខែធ្នូ ទៅតាមការគ្រោងទុក និងមានអ្នកចូលរួមប្រមាណ ៥ម៉ឺននាក់។ដើម្បីឱ្យព្រឹត្តិការណ៍បាល់ទាត់មិត្តភាពអបអរសាទរ «ទិវាសន្តិភាពនៅកម្ពុជា» ដែលគ្រោងនឹងធ្វើឡើងនៅពហុកីឡាដ្ឋានជាតិមរតកតេជោ នាថ្ងៃទី២៩ ខែធ្នូ ឆ្នាំ២០២៤ខាងមុខនេះ មានភាពរលូន និងទទួលបានជោគជ័យ រដ្ឋបាលរាជធានីភ្នំពេញបានបន្តរៀបចំកិច្ចប្រជុំជាថ្មីម្តងទៀត ដើម្បីពិនិត្យពីវឌ្ឍនៈភាពនៃគម្រោងនេះ ខណៈដែលគម្រោងនេះនឹងមានមហាជនចូលរួមប្រមាណជាង៥ម៉ឺននាក់។កិច្ចប្រជុំពីវឌ្ឍនៈភាពនៃព្រឹត្តិការណ៍បាល់ទាត់មិត្តភាពនេះបានធ្វើឡើងនារសៀលថ្ងៃទី២៣ ខែធ្នូ ឆ្នាំ២០២៤ នៅសាលារាជធានីភ្នំពេញ ក្រោមអធិបតីភាព ឯកឧត្តមសន្តិបណ្ឌិត នេត សាវឿន ឧបនាយករដ្ឋមន្ត្រី ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ និងជាប្រធានសហភាពសហព័ន្ធយុវជនកម្ពុជា ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស និងជាប្រធានសហព័ន្ធកីឡាបាល់ទាត់កម្ពុជា និងឯកឧត្តម ឃួង ស្រេង អភិបាលរាជធានីភ្នំពេញ។ឯកឧត្តមសន្តិបណ្ឌិត នេត សាវឿន មានប្រសាសន៍ថា ការរៀបចំឡើងនូវព្រឹត្តិការណ៍បាល់ទាត់នេះ គឺដើម្បីអបអរសាទរខួប២៦ឆ្នាំ ទិវាសន្តិភាពនៅកម្ពុជា ដូច្នេះព្រឹត្តិការណ៍បាល់ទាត់នេះត្រូវតែធ្វើឡើងដោយភាពគគ្រឹកគ្រេងជាមួយការប្រគុំតន្ត្រីបុរាណ សម័យ ដែលរៀបចំឡើងដោយអគ្គនាយកដ្ឋានវិទ្យុ និងទូរទស្សន៍បាយ័ន។ ចំពោះការងារសន្តិសុខសណ្តាប់ធ្នាប់វិញត្រូវតែពង្រឹងឱ្យបានម៉ឺងម៉ាត់បំផុត ដោយព្រឹត្តិការណ៍នេះនឹងមានមហាជនចូលរួមប្រមាណជាង៥ម៉ឺននាក់ តំណាងអង្គទូតនានាប្រចាំនៅកម្ពុជាក៏នឹងចូលរួម ក្រោមអធិបតីភាពដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ហើយសម្ដេចនឹងអញ្ជើញប្រគល់បាល់ជូនក្រុមកីឡា ថតរូបអនុស្សាវរីយ៍ និងសំណេះសំណាលក្នុងព្រឹត្តិការណ៍នេះ។ឯកឧត្តម ឃួង ស្រេង អភិបាលរាជធានីភ្នំពេញមានប្រសាសន៍ថា ចំពោះព្រឹត្តិការណ៍បាល់ទាត់នេះ រដ្ឋបាលរាជធានីភ្នំពេញបានត្រៀមរួចរាល់ ទាំងការរៀបចំសណ្តាប់ធ្នាប់របៀបរៀបរយ ការតុបតែង ការដាក់ភ្លើងបំភ្លឺសាធារណៈ ការរៀបចំចំណតយានយន្ត និងការត្រៀមកម្លាំងកម្មករដើម្បីសម្អាតអនាម័យបរិស្ថានជាដើម។ ព្រឹត្តិការណ៍នេះ មានអ្នកចូលរួមទស្សនាប្រមាណ៥ម៉ឺននាក់ រដ្ឋបាលរាជធានីភ្នំពេញក៏បានត្រៀមអាវយឺតចំនួន៥ម៉ឺនអាវ ដើម្បីចែកជូនផងដែរ។ឯកឧត្តម ឧបនាយករដ្ឋមន្ត្រី ហ៊ុន ម៉ានី បានស្នើឱ្យធ្វើការផ្សព្វផ្សាយពីព្រឹត្តិការណ៍បាល់ទាត់មិត្តភាពនេះឱ្យបានទូលំទូលាយ ដើម្បីឱ្យប្រជាពលរដ្ឋបានយល់ពីខ្លឹមសារនៃព្រឹត្តិការណ៍នេះច្បាស់ នោះគឺការអបអរសាទរ «ទិវាសន្តិភាពនៅកម្ពុជា» ថ្ងៃទី២៩ ខែធ្នូ ឆ្នាំ១៩៩៨ ២៩ ធ្នូ ២០២៤ ខួបទី២៦ឆ្នាំ។គួរបញ្ជាក់ថា ព្រឹត្តិការណ៍បាល់ទាត់មិត្តភាព ដើម្បីអបអរសាទរ «ទិវាសន្តិភាពនៅកម្ពុជា» ថ្ងៃទី២៩ ខែធ្នូ ឆ្នាំ២០២៤ សាលារាជធានីភ្នំពេញសហការជាមួយសហព័ន្ធកីឡាបាល់ទាត់កម្ពុជា សហភាពសហព័ន្ធយុវជនកម្ពុជា (ស.ស.យ.ក.) ក្រុមបាល់ទាត់តារាកម្ពុជា និងសហព័ន្ធកីឡាប្រដាល់គុនខ្មែរ នឹងរៀបចំព្រឹត្តិការណ៍បាល់ទាត់មិត្តភាព នៅពហុកីឡាដ្ឋានជាតិមរតកតេជោ ដោយមានការប្រកួតចំនួន២គូ ដោយគូទី១ ក្រុមបាល់ទាត់គុនខ្មែរ ប្រកួតជាមួយក្រុមបាល់ទាត់ តារាកម្ពុជា និងគូទី២ ក្រុមបាល់ទាត់ ស.ស.យ.ក ប្រកួតជាមួយក្រុមបាល់ទាត់តារាកម្ពុជា៕អត្ថបទ ៖ ប្រាក់ វ៉ាន់ដា

ឯកអគ្គរដ្ឋទូតឥណ្ឌាចប់អាណត្តិបង្ហាញសុទិដ្ឋិនិយមចំពោះទំនាក់ទំនងឥណ្ឌា-កម្ពុជា

ភ្នំពេញ ៖ នារសៀលថ្ងៃទី២៣ ខែធ្នូ ឆ្នាំ២០២៤ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យលោកជំទាវបណ្ឌិត Devyani Khobragade ឯកអគ្គរដ្ឋទូតចប់អាណត្តិនៃសាធារណរដ្ឋឥណ្ឌា ចូលជួបសម្ដែងការគួរសម និងជម្រាបលា នៅវិមានសន្ដិភាព។ក្នុងឱកាសនៃជំនួប លោកជំទាវបណ្ឌិតបានថ្លែងអំណរគុណយ៉ាងជ្រាលជ្រៅជូនចំពោះរាជរដ្ឋាភិបាលកម្ពុជា ដែលបានផ្ដល់ការគាំទ្រ និងកិច្ចសហការដ៏ល្អចំពោះលោកជំទាវ និងស្ថានទូតឥណ្ឌានៅកម្ពុជា ដែលបានធ្វើឱ្យបេសកកម្មការទូតរបស់លោកជំទាវទទួលបានជោគជ័យ និងរួមចំណែកធ្វើឱ្យទំនាក់ទំនងប្រទេសទាំងពីរកាន់តែរីកចម្រើន និងរឹងមាំថែមទៀត។ តាមរយៈភាពរីកចម្រើននៃទំនាក់ទំនងល្អប្រសើរនេះ លោកជំទាវបណ្ឌិតបានបង្ហាញសុទិដ្ឋិនិយមថា ទំនាក់ទំនងឥណ្ឌា-កម្ពុជា នឹងឈានឡើងដល់កម្រិតកាន់តែខ្ពស់ទៀត។ ជាការឆ្លើយតប សម្ដេចបវរធិបតីបានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែង និងការចូលរួមចំណែកយ៉ាងសំខាន់របស់លោកជំទាវបណ្ឌិតក្នុងការពង្រឹង និងពង្រីកទំនាក់ទំនង និងកិច្ចសហប្រតិបត្តិការប្រទេសទាំងពីរ ប្រកបដោយផ្លែផ្កា។ សម្ដេចបវរធិបតី និងលោកជំទាវបណ្ឌិតបានសម្ដែងនូវការពេញចិត្ត និងវាយតម្លៃខ្ពស់ចំពោះវឌ្ឍនភាពនៃទំនាក់ទំនង និងកិច្ចសហប្រតិបត្តិការរវាងប្រទេសទាំងពីរលើវិស័យសក្ដានុពលជាច្រើន មានជាអាទិ៍ ការផ្លាស់ប្តូរដំណេីរទស្សនកិច្ចថ្នាក់នាំគ្រប់កម្រិត វិស័យពាណិជ្ជកម្ម សេដ្ឋកិច្ច សន្ដិសុខនិងការពារជាតិ ឌីជីថល ការអភិវឌ្ឍធនធានមនុស្ស វប្បធម៌និងសាសនា ទេសចរណ៍ និងការភ្ជាប់ជើងហោះហើរត្រង់កម្ពុជា-ឥណ្ឌា ព្រមទាំងទំនាក់ទំនងប្រជាជននិងប្រជាជនរវាងប្រទេសទាំងពីរ៕

សិល្បៈគំនូរឌីជីថល គឺជាទម្រង់សិល្បៈថ្មី ជួយលើកតម្លៃមរតកវប្បធម៌របស់អ្នកស្រុកជាតិយើង

ភ្នំពេញ ៖ សិល្បៈគំនូរឌីជីថល គឺជាទម្រង់សិល្បៈថ្មី និងទាន់សម័យបច្ចេកវិទ្យា នៃសង្គមឌីជីថល និងទីផ្សារ និងបង្ហាញឱ្យឃើញពីគំនិតច្នៃ ប្រឌិតបង្កើតថ្មីក្នុងសិល្បៈគំនូរទំនើបឌីជីថល សិល្បៈវប្បធម៌ សិប្បកម្ម ប្រពៃណី និងជាការលើកតម្លៃមរតកវប្បធម៌របស់អ្នកស្រុកជាតិ ដើម។ឯកឧត្តម ខឹម ចន្ថា រដ្ឋលេខាធិការក្រសួងវប្បធម៌ និងវិចិត្រសិល្បៈ លើកឡើងក្នុងឱកាស «ពិធីប្រគល់ពានរង្វាន់ជ័យលាភី សិល្បៈគំនូរឌីជីថល ក្រោមប្រធានបទ "សម្រស់មាតុភូមិកម្ពុជាក្នុងសម័យសន្តិភាព" នៅថ្ងៃទី ២២ ធ្នូ ម្សិលមិញនេះថា ការរៀបចំព្រឹត្តិ ការណ៍នេះ គឺជាកម្មវិធីមួយដ៏ល្អ ដោយគោលបំណងផ្តល់ជូនសាធារណជន ពិសេសយុវជន សិស្ស និស្សិត បានស្វែងយល់អំពីស្នាដៃ សិប្បកម្មខ្មែរ តាមសហគមន៍នានាក្នុងប្រទេសកម្ពុជា និងទស្សនាសិល្បៈគំនូរឌីជីថល ដែលជាស្នាដៃរបស់បេក្ខជន-បេក្ខនារី ចូលរួម ប្រកួតប្រជែង ដែលកន្លែងមកក្រសួងបានរៀបចំមានតែ ពិព័រណ៍គំនូរ ចម្លាក់ និងសិប្បកម្មសូត្រ (សូន្យរូប និងសិប្បកម្មជាដើម)។ឯកឧត្តម បន្តថា ចំណែកនៅពេលនេះ ក្រសួងបានរៀបចំឱ្យមានការប្រកួតប្រជែងសិល្បៈគំនូរឌីជីថល ដែលជាប្រធានបទថ្មី មួយ ជាក់ស្តែងយើងបានរកឃើញអ្នកជាប់ជ័យលាភីនៅពេលនេះ ទោះបីផ្ទាំងគំនូរឌីជីថលអ្នកដែលជាប់ជ័យលាភីនៅមានកម្រិតក៏ ដោយ ក៏ចាត់ទុកជាស្នាដៃដ៏សំខាន់មួយ ដែលយុវជនយើងបានបញ្ចេញអស់ពីកំលាំងកាយចិត្ត លេចចេញជាផ្ទាំងគំនូរទំងនេះឡើង ដើម្បីបង្ហាញដល់គ្រប់មជ្ឈដ្ឋានឱ្យបានឃើញ អំពីកម្លាំងរួមមួយមកពីគ្រប់ជំនាញ គ្រប់វ័យ ដើម្បីបញ្ចេញនូវទេព្យកោសល្យរៀងៗខ្លួន។ ឯកឧត្តម ខឹម ចន្ថា ក៏បានស្ញើចសរសើរចំពោះស្នាដៃរបស់យុវជនយើង ដែលបានតស៊ូរហូតដណ្តើមបានជ័យលាភីផងដែរ ក្នុងនោះឯកឧត្តម ក៏បានផ្តាំផ្ញើរដល់អ្នកជាប់ជ័យលាភី និងអ្នកដែលមិនបានជាប់ជ័យលាភីនៅក្នុងការប្រកួតប្រជែងក្នុងកម្មវិធីនេះ សូមបន្តខិតខំប្រែងប្រែងបញ្ចេញសមត្ថភាព ទេពកោសល្យបន្ថែមទៀត នៅលើគំនិតច្នៃប្រឌិតបង្កើតថ្មី ក្នុងសិល្បៈគំនូរ, ការខិតខំ របស់ប្អូនៗ គឺជាការចូលរួមពង្រឹងកិច្ចការពារ អភិរក្ស និងអភិវឌ្ឍបេតិកភណ្ឌអរូបីដ៏ថ្លៃថ្លរបស់ជាតិយើង។សូមបញ្ជាក់ថា ក្នុងការប្រកួតប្រជែងនេះ ក្នុងនោះកញ្ញា សួស សុខសុជាតា និស្សិតនៃសកលវិទ្យាល័យភូមិន្ទវិចិត្រសិល្បៈ ជំនាញគំនូរ សារគមនាគមន៍ ទទួលបានជ័យលាភីលេខ១, ចំណែកជ័យលាភីលេខ២ បានទៅលើកញ្ញា ចាន់ អាដែត ជាសិស្សផ្នែកគំនូរ អានីម៉ាស្យុង នៃអង្គការហ្វាមពន្លឺសិល្បៈ និងជ័យលាភីលេខ ៣ បានទៅលើកញ្ញា ងួន រូហ្សា មកពីពន្លឺសិល្បៈខេត្តបាត់ដំបង៕អត្ថបទ៖ សុន រ៉ាឌី

សាលាដំបូងខេត្តស្វាយរៀងនិងតុលាការប្រជាជនខេត្តឡុងអានវៀតណាមប្រជុំបូកសរុបលទ្ធផលនៃកិច្ចសហប្រតិបត្តិការឆ្នាំ២០២៤

ស្វាយរៀង ៖ សាលាដំបូងខេត្តស្វាយរៀងនៃព្រះរាជាណាចក្រកម្ពុជា និងតុលាការប្រជាជនខេត្តឡុងអាន នៃសាធារណរដ្ឋសង្គមនិយមវៀតណាម នៅថ្ងៃទី២០ ខែធ្នូ ឆ្នាំ២០២៤នេះ បានរៀបចំប្រជុំបូកសរុបលទ្ធផល នៃការអនុវត្តកិច្ចព្រមព្រៀងសហប្រតិបត្តិការលើវិស័យច្បាប់ឆ្នាំ២០២៤ និងពិភាក្សាទិសដៅអនុវត្តបន្ត សម្រាប់ឆ្នាំ២០២៥ ដែលពិធីនេះបានប្រព្រឹត្តទៅនៅសាលប្រជុំគុជស្វាយព្រៃ សង្កាត់សង្ឃ័រ ក្រុងនិងខេត្តស្វាយរៀង ក្រោមវត្តមានឯកឧត្តម អ៊ាក ផល្លា ប្រធានសាលាដំបូងខេត្តស្វាយរៀងនិងលោកឡេ ហ្វុកយុង ប្រធានតុលាការប្រជាជនខេត្តឡុងអាន (វៀតណាម) ។តាមសុន្ទរកថាស្វាគមន៍របស់ឯកឧត្តម អ៊ាក ផល្លា ប្រធានសាលាដំបូងខេត្តស្វាយរៀង បានបញ្ជាក់អោយថា នៅក្នុងកិច្ចសហប្រតិបត្តិការលើវិស័យច្បាប់នៃខេត្តទាំង២ ស្វាយរៀង(កម្ពុជា) និងខេត្តឡុងអាន(វៀតណាម) ក្នុងរយៈពេល១ឆ្នាំ២០២៤ ទទួលបានលទ្ធផលល្អប្រសើរ តាមស្មារតីកិច្ចសហប្រតិបត្តិការចុះថ្ងៃទី ៣១ ខែឧសភាឆ្នាំ២០១៣ និងផ្អែកតាមកំណត់ហេតុនៃកិច្ចប្រជុំប្តូរវេន រវាងខេត្តនិងខេត្តចុះថ្ងៃទី២២ ខែធ្នូ ឆ្នាំ២០២៣ ក្នុងនោះតុលាការខេត្តស្វាយរៀង បានធ្វើការជំនុំជម្រះពាក់ព័ន្ធទៅនឹងប្រជាជនវៀតណាម ដែលបានប្រព្រឹត្តបទល្មើសនៅក្នុង ភូមិសាស្ត្រខេត្តស្វាយរៀង ចំនួន៧៩រឿង មានជនជាប់ចោទចំនួន២៤៩នាក់ ពាក់ព័ន្ធទៅនឹងបទល្មើសរក្សាទុកជួញដូរនិងប្រើប្រាស់ដោយខុសច្បាប់នូវសារធាតុញៀន ចំនួន៤៧សំណុំរឿង និងមានជនជាប់ចោទចំនួន១៤៥នាក់ ។ បន្ទាប់ពីអង្គប្រជុំបានធ្វើការពិភាក្សា និងចុះហត្ថលេខាផ្លាស់ប្ដូរឯកសារស្ដីពី កិច្ចសហប្រតិបត្តិការបន្តឆ្នាំ២០២៥ លោកឡេ ហ្វុកយុង ប្រធានតុលាការប្រជាជនខេត្តឡុងអាន វៀតណាម បានមានប្រសាសន៍ គោរពវាយតម្លៃខ្ពស់ ចំពោះការដឹកនាំរបស់រាជរដ្ឋាភិបាល សម្ដេចមហាបវរធិបតី ហ៊ុនម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាក្នុងកិច្ចការដឹកនាំការពារសន្តិភាព និងធ្វើការអភិវឌ្ឍន៍ជាតិមានការរីកចម្រើនលើគ្រប់វិស័យ ពិសេសនៅក្នុងខេត្តស្វាយរៀង។ លោកប្រធានតុលាការប្រជាជនខេត្តឡុងអានក៏បាន ថ្លែងនូវការកោតសរសើរ ចំពោះសាលាដំបូងខេត្តស្វាយរៀង ដែលកន្លងមកបានរួមសហការផ្ដល់ព័ត៌មានស្ដីពីការជំនុំជម្រះ ដល់ភាគីខេត្តឡុងអាន បន្ទាប់ពីសាលាដំបូងខេត្តស្វាយរៀង ធ្វើការជំនុំជម្រះរឿងក្តីរវាង ប្រជាជនវៀតណាម ដែលបានប្រព្រឹត្តបទល្មើសផ្សេងៗជូនភាគីពាក់ព័ន្ធបានទាន់ពេលវេលា និងតម្លាភាព។ ទន្ទឹមនិងនោះដែរ លោកប្រធានតុលាការប្រជាជនខេត្តឡុងអាន វៀតណាម នូវបានស្នើដល់ សាលាដំបូងខេត្តស្វាយរៀង ធ្វើការពិចារណា បង្កើនពេលវេលាប្រជុំពិភាក្សាលើកកិច្ចសហប្រតិបត្តិការបន្ថែម ឲ្យបានស៊ីជម្រៅលើប្រព័ន្ធច្បាប់ នៃប្រទេសទាំងពីរ សំដៅយកទៅអនុវត្តឱ្យមានប្រសិទ្ធភាព និងតម្លាភាពផ្ដល់ភាពយុត្តិធម៌ជូនដល់ជនរងគ្រោះដែលប្រឈមទៅនិងច្បាប់នៃប្រទេសទាំងពីរ ៕ដោយ ៖ ភា សារឹត

ផ្គាប់ចិត្តថៅកែរោងចក្រមួយកន្លែង អាជ្ញាធរពាក់ព័ន្ធសម្រេចដកបារាសការពារផ្លូវទៅដាក់កន្លែងផ្សេង

ត្បូងឃ្មុំ ៖ បារាសការពារផ្លូវមួយកន្លែងស្ថិតនៅភូមិប្រស្រែលើ សង្កាត់វិហាលួង ក្រុងសួង ខេត្តត្បូងឃ្មុំ ត្រូវបានអាជ្ញាធរពាក់ព័ន្ធ មានអាជ្ញាធរក្រុង និងមន្ទីអភិវឌ្ឍន៍ជនបទ បានសម្រេចដក់ពីកន្លែងចាស់ នៅដើមផ្លូវថយទៅដាក់កន្លែងថ្មីចម្ងាយប្រម៉ាណ ៣០០ ម៉ែត្រ ដើម្បីផ្គាប់ចិត្តថៅកែរោងចក្រកែឆ្នៃដំឡូងមីមួយកន្លែង ពោលគឺងាយស្រួលឳ្យរថយន្តធំៗដឹកដំឡូងចេញចូលរោងចក្រមួយនេះមានភាពងាយស្រួលបើទោះបីប្រជាជនភាគច្រើននៅក្នុងភូមិ ប្រស្រែលើ មិនគាំទ្រក៏ដោយ ។លោក សរ គួន ប្រធានភូមិប្រស្រែលើ មានប្រសាសន៍ឳ្យដឹងថា ការដក់បារាសការពារផ្លូវដាក់ចូលមកក្នុងបែបនេះគឺដើម្បីឳ្យឡានដឹកដំឡូងចេញចូលបានស្រួល ខណៈការធ្វើបែបនេះគឺប្រជាជនភាគច្រើនមិនគាំទ្រនោះទេ ។ លោកថាការដកបារាសការពារផ្លូវនេះគឺខាងអាជ្ញាធរសង្កាត់ ក្រុង មន្ទីអភិវឌ្ឍន៍ជនបទ បានពិភក្សាសម្រេចដក ដោយលោកមិនមានសិទ្ធិ ជំទាស់នោះទេ ។លោក ហ៊ាន ហ៊ត់ ចៅសង្កាត់វិហាលួង មានប្រសាសន៍ឩ្យដឹងថា ការដក់បារាសខាងលើនេះគឺខាងសង្កាត់ បានស្នើទៅអាជ្ញាធរក្រុង និង មន្ទីអភិវឌ្ឍន៍ជនបទ មុនសម្រេចដក់ទៅដាក់កន្លែងថ្មី ដើម្បីបង្ករភាពងាយស្រូលសម្រាប់រថយន្តដឹកដំឡូងចេញចូលរោងចក្រកែឆ្នៃដំឡូងមីដែលនៅក្បែនោះ ។ លោកថាបើចង់ដឹងច្បាស់អាចទំនាក់ទំនងទៅខាងមន្ទីអភិវឌ្ឍន៍ជនបទបាន ។ជុំវិញករណីខាងលើនេះ លោក អាន ស៊ីណា ប្រធានមន្ទីអភិវឌ្ឍន៍ជនបទខេត្តត្បូងឃ្មុំ មានប្រសាសន៍ទទួលស្គាល់ថា ពិតជាបានដោះដូរប្រាកដមែន ដោយសារមានសំណូមពរពីម្ចាស់រោងចក្រ ចៅសង្កាត់ និងលោក អភិបាលក្រុងសួង ។ លោកថាបើបន្តដាក់នៅដើមផ្លូវ អាចបាំងបាន ប្រម៉ាណ ៣០០ ម៉ែត្រ តែខាងរោងចក្រនិងបើករថយន្តវាងពីច្រកខាងជើងមកវិញ ដែលអាចធ្វើឳ្យខូចផ្លូវប្រម៉ាណ ៣ គីឡូម៉ែត្រ ក្នុងនោះ ខាងចៅសង្កាត់ និងខាងរោងចក្រ ធានាជួសជុល បើសិនផ្លូវប្រម៉ាណ ៣០០ ម៉ែត្រ នេះខូចខាត ។ប្រជាពលរដ្ឋភូមិប្រស្រែលើ សុំមិនបញ្ជេញអត្តសញ្ញាណ បានរៀបរាប់ឳ្យដឹងថា អាជ្ញាធរក្រុងសួង និងមន្ទីអភិវឌ្ឍន៍ជនបទ គិតយ៉ាងម៉េចនោះទេ បានជាសុខចិត្ត ផ្គាប់ចិត្តថៅកែរោងចក្រម្នាក់ ដកបារាសការពារផ្លូវចេញ បំផ្លាញផលប្រយោជន៍ប្រជាជនទូទៅបែបនេះ ។ បំផ្លាញព្រោះថា រថយន្តធំៗអាចដឹកដំឡូងចេញចូលបានដោយសេរីលើផ្លូវ ងាយធ្វើឳ្យផ្លូវរងការខូចខាត ពិបាក់ធ្វើដំណើរ ។ជាមួយការលើកឡើងបែបនេះពួកគាត់ក៏បានសំណូមពរទៅឯកឧត្តមអភិបាលខេត្ត ប៉ែន កុសល្យ មេត្តាពិនិត្យលទ្ធភាពអន្តរាគមន៍រឿងនេះផង ព្រោះថាផ្លូវមួយខ្សែៗរាជរដ្ឋាភិបាលចំណាយលុយច្រើនណាស់កសាងឡើងដើម្បីសម្រួលដល់ការធ្វើដំណើរប្រកបរបររកស៊ីចិញ្ចឹមជីវិតប្រចាំថ្ងៃរបស់ប្រជាពលរដ្ឋ មិនមែនកសាងឡើងសម្រាប់ផលប្រយោជន៍បុគ្គលតែម្នាក់ឡើយ ។ដោយ ៖ ជឹង សេងឡុង

មន្រ្តីអធិការការងារ២៥៩នាក់ ត្រៀមខ្លួនបំពេញមុខងារជានគរបាលយុត្តិធម៌នាពេលខាងមុខ

ភ្នំពេញ៖ វិទ្យាស្ថានជាតិការងារនៃក្រសួងការងារ និងបណ្តុះបណ្តាលវិជ្ជាជីវៈ បានបើកវគ្គសុក្រឹតការស្តីពី "ច្បាប់និងលិខិតបទដ្ឋានគតិយុត្តក្នុងវិស័យការងារ និងសន្តិសុខសង្គម" ដល់អធិការការងារសរុបចំនួន២៥៩នាក់ ដែលត្រៀមខ្លួនបំពេញមុខងារជានគរបាលយុត្តិធម៌ នាពេលខាងមុខ។ ពិធីនេះបានប្រព្រឹត្តទៅក្រោមអធិបតីភាពឯកឧត្តម អ៉ិន ខេមរា រដ្ឋលេខាធិការ ក្រសួងការងារ និងបណ្តុះបណ្តាលវិជ្ជាជីវៈ។ វគ្គបណ្ដុះបណ្ដាលនេះ មានរយ:ពេល៥ថ្ងៃ ចាប់ពីថ្ងៃទី២៣-២៧ ខែធ្នូ ឆ្នាំ២០២៤ ផ្តោតលើប្រធានបទសំខាន់ៗចំនួន៨ រួមមាន៖ (១).លក្ខខណ្ឌការងារ និងលក្ខខណ្ឌស្ដីពីសុវត្ថិភាពនិងសុខភាពការងារ (Checklist) និងការដាក់កំហិត និងការពិន័យ (២).ជំនាញគន្លឹះនៃការសម្រុះសម្រួលផ្សះផ្សាវិវាទ (៣).តួនាទី ភារកិច្ច និងអំណាចអធិការការងារ (៤).អធិការកិច្ចសន្ដិសុខសង្គម (៥).អធិការកិច្ចការងារហត្ថពលកម្មបរទេស (៦).អធិការកិច្ចការងារកុមារ (៧)ការកំណត់ប្រាក់ឈ្នួលអប្បបរមា និង(៨)នីតិវិធីនៃការដោះស្រាយវិវាទការងារ។ តាមរយៈវគ្គបណ្ដុះបណ្ដាលនេះ ឯកឧត្តម អ៉ិន ខេមរា បានស្នើដល់សិក្ខាកាមទាំងអស់នូវចំណុចមួយចំនួនដូចជា (១).យកចិត្តទុកដាក់ស្តាប់ និងចាប់យកនូវខ្លឹមសារបច្ចេកទេសពីការធ្វើបទបង្ហាញ (២).លើកអំពីបញ្ហាប្រឈមក្នុងការអនុវត្តជាក់ស្តែងដើម្បីពិភាក្សា និងរកដំណោះស្រាយប្រកបដោយប្រសិទ្ធភាព (៣).អនុវត្តតួនាទីភារកិច្ចរបស់ខ្លួនជាអធិការការងារប្រកបដោយការទទួលខុសត្រូវ វិជ្ជាជីវៈ និងប្រសិទ្ធភាព ស្របតាមបទបញ្ជាផ្ទៃក្នុង ក្រមសីលធម៌ និងសៀវភៅគោលការណ៍ណែនាំស្តីពីអធិការកិច្ចការងារដែលជាគោលការណ៍គ្រឹះសម្រាប់មន្ត្រីអធិការកិច្ចការងារត្រូវអនុវត្ត (៤).បន្តអភិវឌ្ឍសមត្ថភាពខ្លួនឱ្យក្លាយជាមន្ត្រីអនុវត្តច្បាប់ប្រកបដោយសមត្ថភាព បុរេសកម្ម និងការទទួលស្គាល់ពីភាគីពាក់ព័ន្ធ និងពីបងប្អូនកម្មករនិយោជិតនៅតាមសហគ្រាស គ្រឹះស្ថាន និង(៥).បន្តចូលរួមអនុវត្តផែនការយុទ្ធសាស្ត្រអភិវឌ្ឍន៍វិស័យការងារ សន្តិសុខសង្គម និងបណ្តុះបណ្តាលវិជ្ជាជីវៈ ឆ្នាំ២០២៤-២០២៨ ជាពិសេសការពង្រឹងការអនុវត្តច្បាប់ពាក់ព័ន្ធនឹងវិស័យការងារ និងសន្តិសុខសង្គម៕

រដ្ឋាភិបាលកម្ពុជាជំរុញអង្គការដៃគូពាក់ព័ន្ធឲ្យចូលរួមលើកកម្ពស់ “សហគ្រាសមួយជាសហគមន៍សុខសាន្តមួយ”

ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈ សហការជាមួយក្រុមប្រឹក្សាអាជ្ញាកណ្តាល បានរៀបចំសន្និសីទថ្នាក់ជាតិស្តីពីទំនាក់ទំនងវិជ្ជាជីវៈ ឆ្នាំ២០២៤ ក្រោមប្រធានបទ៖ “សហគ្រាសមួយជាសហគមន៍សុខសាន្តមួយ” ដែលមានការចូលរួមពីតំណាងក្រសួងស្ថាប័នពាក់ព័ន្ធ សមាគមនិយោជក សហជីព អង្គការអន្តរជាតិខាងការងារ ម្ចាស់ម៉ាក ស្ថានទូតបរទេស និងអ្នកសិក្សាស្រាវជ្រាវចំនួនជិត ១០០នាក់ នៅរាជធានីភ្នំពេញ។ក្នុងពិធីបើកសន្និសីទថ្នាក់ជាតិ នាព្រឹកថ្ងៃទី២៣ ខែធ្នូនេះ លោកជំទាវ សុវណ្ណ វណ្ណារតន៍ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា ការរៀបចំសន្និសីទនាពេលនេះ គឺជាការបន្តអនុវត្តនូវយន្តការត្រីភាគី និងការជំរុញកិច្ចសន្ទនាសង្គមសំដៅសម្រេចឱ្យបាននូវការពិគ្រោះយោបល់គ្រប់ជ្រុងជ្រោយនិងពេញលេញ ដែលជាតម្រូវការរបស់ត្រីភាគី និងភាគីពាក់ព័ន្ធក្នុងវិស័យការងារ ដើម្បីជួយឱ្យប្រែក្លាយ សហគ្រាសមួយជាសហគមន៍សុខសាន្តមួយ ។ លោកជំទាវ បានគូសបញ្ជាក់ថា ដើម្បីប្រែក្លាយសហគ្រាសមួយជាសហគមន៍សុខសាន្តមួយ ត្រូវបានផ្តោតជាសំខាន់លើការដោះស្រាយវិវាទការងារក្រៅប្រព័ន្ធតុលាការ គឺត្រូវបានបន្តគាំទ្រ និងជំរុញការអនុវត្តឱ្យកាន់តែមានប្រសិទ្ធភាពជាងមុន ដែលតម្រូវឱ្យមានការយកចិត្តទុកដាក់កាន់តែខ្លាំងនៅក្នុងការពង្រឹងយន្តការនេះ ទាំងនៅថ្នាក់សហគ្រាស គ្រឹះស្ថាន ការផ្សះផ្សានៅក្រសួងការងារ និងការដោះស្រាយដោយក្រុមប្រឹក្សាអាជ្ញាកណ្តាល។ លោក Finn Koh តំណាងអង្គការអន្តរជាតិខាងការងារ (ILO) ក្នុងអង្គប្រជុំនេះ បានវាយតម្លៃខ្ពស់ដល់ថ្នាក់ដឹកនាំរបស់ក្រសួងការងារ និងបណ្តុះបណ្តាលវិជ្ជាជីវៈ ដែលរៀបចំសន្និសីទនេះ ពិសេសបានលើកយកប្រធាន សហគ្រាសមួយជាសហគមន៍សុខសាន្តមួយ នេះឡើង។ លោកបន្ថែមថា ការឆ្លើយតបជំនួសបញ្ហាប្រឈមពាក់ព័ន្ធទំនាក់ទំនងវិជ្ជាជីវៈ គឺជាបញ្ហាដ៏សំខាន់នៅក្នុងរដ្ឋបាលការងារនិងអភិបាលកិច្ចទីផ្សារការងារ ទំនាក់ទំនងវិជ្ជាជីវៈ ហើយគោលបំណងក៏មិនមែនតែដើម្បីបង្កើនប្រាក់ឈ្នួល ឬលក្ខខ័ណ្ឌការងារប៉ុណ្ណោះទេ ប៉ុន្តែក៏ជាមធ្យោបាយដើម្បីបង្កើនផលិតភាពការងារ និងសមត្ថភាពក្នុងការប្រកួតប្រជែងរបស់សេដ្ឋកិច្ចផងដែរ។ យោងតាមក្រសួងការងារ និងបណ្តុះបណ្តាលវិជ្ជាជីវៈ គិតក្នុងរយៈពេល ១១ខែ ឆ្នាំ២០២៤នេះ ក្រសួងបានដោះស្រាយវិវាទការងារសរុបចំនួន ១ ៤៣៩ករណី ទទួលបានលទ្ធផលសះជា ១ ២៣៣ករណី ស្មើនឹងជាង ៨៥% ដែលក្នុងនោះវិវាទបុគ្គលចំនួន ១ ២៣៩ករណី ទទួលបានលទ្ធផលសះជា ១ ០៦២ករណី ស្មើនឹង ៨៥.៧១% និងវិវាទការងាររួមចំនួន ២០០ ករណី ទទួលបានលទ្ធផលសះជា ១៧១ករណី ស្មើនឹង ៨៥.៥០%៕អត្ថបទ ឈិត បូរ៉ាវី

សេវាសង្គ្រោះបន្ទាន់ផ្នែកសម្ភព និងការថែទាំទារកទើបកើត ជាអន្តាគមន៍គន្លឹះមួយដែលក្រសួងសុខាភិបាលបានដាក់ឱ្យអនុវត្តន៍តាំងពីឆ្នាំ២០០៩

លោកជំទាវសាស្រ្តាចារ្យ អ៊ឹម សិទិ្ធការ្យ រដ្ឋលេខាធិការ តំណាងដ៏ខ្ពង់ខ្ពស់ឯកឧត្តមសាស្ត្រាចារ្យ ឈាង រ៉ា រដ្ឋមន្រី្តក្រសួងសុខាភិបាល បានអៈអាងថា សេវាសង្គ្រោះបន្ទាន់ផ្នែកសម្ភព និងការថែទាំទារកទើបកើត ជាអន្តាគមន៍គន្លឹះមួយ ដែលក្រសួងសុខាភិបាល បានដាក់ឱ្យអនុវត្តន៍តាំងពីឆ្នាំ២០០៩។ការថ្លែងរបស់លោកជំទាវសាស្រ្តាចារ្យ អ៊ឹម សិទិ្ធការ្យ យ៉ាងដូច្នេះក្នុងពិធីបើក“សិក្ខាសាលាពិគ្រោះយោបល់ស្តីពីឧបករណ៍វាយតម្លៃកម្រិតស្រាល នៃសេវាសង្គ្រោះបន្ទាន់ផ្នែកសម្ភព និងការថែទាំទារកទើបកើត” ដែលរៀបចំដោយផែ្នកបណ្តុះបណ្តាល នៃមជ្ឈមណ្ឌលជាតិគាំពារមាតា និងទារក ដោយមានការគាំទ្រពីអង្គការ UNFPA, KOFIH, USADI-EQHA2, នាព្រឹកថ្ងៃទី២៣ ខែធ្នូ ឆ្នាំ២០២៤នេះ។លោកជំទាវ រដ្ឋលេខាធិការ បានបន្តថា គោលដៅអភិវឌ្ឍន៍ប្រកបដោយចីរភាពរបស់រាជរដ្ឋាភិបាលក្នុងឆ្នាំ២០៣០ កម្ពុជា បានកំណត់គោលដៅក្នុងការកាត់បន្ថយអត្រាមរណភាព មាតា មកនៅត្រឹម៧០ក្នុង ១សែនកំណើតរស់ និងកំណត់កាត់បន្ថយអត្រាមរណភាពទារកទើបកើតឲ្យមកនៅត្រឹម១២ ក្នុង១០០០កំណើតរស់។ ដែលលទ្ធផលគិតត្រឹមឆ្នាំ២០២១-២០២២ អត្រាសម្រេចបានចំនួន១៥៤ ក្នុង១សែនកំណើតរស់ និង៨ក្នុង១០០០កំណើតរស់។ នេះមានន័យថា កម្ពុជាយើងបានសម្រេចដល់គោលដៅ ៨ឆ្នាំមុនកាលកំណត់ សម្រាប់ អត្រាមរណភាពរបស់ទារកទើបកើតបាន នៅខណះពេលអត្រាមរណភាពមាតាមានការធ្លាក់ចុះយឺតយ៉ាវ ដែលទាមទារនូវកិច្ចខិតខំប្រឹងប្រឹងបន្ថែមចំនួន២៣ដង។ ទោះបីជា រាជរដ្ឋាភិបាល ក៏ដូចជាក្រសួងសុខាភិបាលសម្រេចបាននូវសូចនាករសំខាន់ៗនៃការថែទាំសុខភាពមាតា និងទារក ដូចសេវាផែនការគ្រួសារ/ពន្យាកំណើត ការថែទាំមុនពេលសម្រាល ការសម្រាលដោយឆ្មបជំនាញ ការថែទាំក្រោយសម្រាល សេវាសង្រ្គោះបន្ទាន់ផ្នែកសម្ភព និងការថែទាំទារកទើបកើត ដែលមានអត្រាប្រើប្រាស់កម្រិតខ្ពស់ក៏ដោយ អត្រាមរណភាពមាតារបស់យើងនៅមានអត្រាខ្ពស់ បើប្រៀបធៀបជាមួយប្រទេសក្នុងតំបន់។ ដូច្នេះយើងត្រូវតែពិនិត្យមើលឡើងវិញ និងពង្រឹងប្រព័ន្ធសុខាភិបាលរបស់យើង។ លោកជំទាវសាស្រ្តាចារ្យ អ៊ឹម សិទិ្ធការ្យ បានបញ្ជាក់ថា កិច្ចពិភាក្សានៅថ្ងៃនេះ មានសារះសំខាន់ណាស់ដើម្បីឲ្យលោក លោកស្រី អាចយកឧបករណ៍នេះទៅប្រើប្រាស់ ជាស្វ័យវាយតម្លៃ ដោយមូលដ្ឋានសុខាភិបាលខ្លួនឯង ក៏ដូចជាការពង្រឹងការតាមដាន និងវាយតម្លៃ និងធ្វើផែនការកែលម្អដោយស្រុកប្រតិបត្តិ និងមន្ទីរសុខាភិបាល ដើម្បីបំពេញចន្លោះខ្វះខាត ឲ្យបានទាន់ពេលវេលា ក្នុងការពង្រឹងគុណតាមនៃសេវាសង្គ្រោះបន្ទាន់ផ្នែកសម្ភព និងការថែទាំទារកទើបកើត ក៏ស្នើរសុំផងដែរ ដល់មជ្ឈមណ្ឌលជាតិគាំពារមាតា និងទារក មន្ទីរសុខាភិបាល មូលដ្ឋានសុខាភិបាល អង្គការក្រៅរដ្ឋាភិបាល និងដៃគូពាក់ព័ន្ធទាំងអស់ មេត្តាអនុវត្តការងារនេះឲ្យបានជោគជ័យ និងបន្តសហការណ៍ជាមួយក្រុមការងារបច្ចេកទេសនៃអង្គការUNFPA ប្រចាំតំបន់អាស៊ីប៉ាស៊ីហ្វិច និងទីប្រឹក្សានៃផ្នែកស្រាវជ្រាវ Oxord-Mahidol របស់សាកលវិទ្យាល័យ Mahidol ក្នុងការអនុវត្តនូវឧបករណ៍នេះ ឲ្យចំគោលដៅ និងមានប្រសិទ្ធិភាព ជាពិសេសការប្រើប្រាស់ទិន្នន័យទាំងនេះដើម្បីបង្កើតប្រព័ន្ធGIS សម្រាប់មូលដ្ឋានសុខាភិបាល អ៊ីម៉ុក (EmONC) សម្រាប់ខេត្តតំបន់ដាច់ស្រយាល៕ អត្ថបទ រដ្ឋា

មន្ត្រីជំនាញកម្ពុជា-ឡាវ និងវៀតណាម សន្យារួមគ្នាពង្រឹងការបង្ក្រាបល្មើសឆ្លងដែនខុសច្បាប់

សៀមរាប៖ ស្ថាប័នប្រឆាំងអំពើជួញដូរមនុស្ស នៃប្រទេសកម្ពុជា ឡាវ និងវៀតណាម បានបើកកិច្ចប្រជុំពង្រឹងកិច្ចសហប្រតិបត្តិការ បង្ក្រាបបទល្មើសឆ្លងដែនខុសច្បាប់ ដែលឈានទៅដល់បទល្មើសជួញដូរមនុស្ស ។ក្នុងកិច្ចប្រជុំត្រីភាគី កម្ពុជា ឡាវ វៀតណាម ស្ដីពី កិច្ចសហប្រតិបត្តិការក្នុងការគ្រប់គ្រងលំហូរទេសន្តរប្រវេសន៍ឆ្លងកាត់ព្រំដែន ដើម្បីប្រយុទ្ធប្រឆាំងអំពើជួញដូរមនុស្ស នៅថ្ងៃទី២៣ ខែធ្នូ ឆ្នាំ២០២៤ លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍គណៈកម្មាធិការជាតិប្រយុទ្ធអំពើជួញដូរមនុស្ស មានប្រសាសន៍ថា បទល្មើសជួញដូរមនុស្ស រួមទាំងការធ្វើចំណាកស្រុកមិនស្របច្បាប់ ពលកម្មដោយបង្ខំ និងការបង្ខំប្រព្រឹត្តបទល្មើស នៅតែជាបញ្ហាប្រឈមសំខាន់ មានលក្ខណៈស្មុគស្មាញ និងត្រូវការយកចិត្តទុកដាក់បន្ថែម នៅក្នុងតំបន់អាស៊ីអាគ្នេយ៍។ លោកជំទាវបានបន្តថា ដោយសារឥទ្ធិពលនៃជំងឺរាតត្បាត និងវិបត្តិសេដ្ឋកិច្ច បានធ្វើឱ្យប្រជាពលរដ្ឋទន់ខ្សោយ ដោយមានជីវភាពខ្វះខាត ខ្វះព័ត៌មានគ្រប់គ្រាន់ រួមទាំងមានចំណេះដឹងផ្នែកបច្ចេកវិទ្យា និងភាសាមានកម្រិត ខ្វះការយល់ដឹងពីល្បិចកល នៃជនល្មើស និងហានិភ័យ ក្នុងការជ្រើសរើសការងារ ដែលអាចទុកចិត្តបាន ដូច្នេះបានធ្វើឱ្យកើនឡើងការធ្វើចំណាកស្រុក ស្វែងរកការងារ នៅបរទេសប្រថុយប្រថាន ។ លោកជំទាវ ជូ ប៊ុនអេង បន្ថែមថា និន្នាការថ្មីៗ បរិវត្តកម្មនៃប្រព័ន្ធបច្ចេកវិទ្យាព័ត៌មាន និងការប្រែប្រួល នៃស្ថិរភាពសេដ្ឋកិច្ច នយោបាយសាកលលោក កិច្ចសហប្រតិបត្តិការ និងការគ្រប់គ្រងព្រំដែនរួមគ្នានៅមានកម្រិត ធ្វើឱ្យជនល្មើសឆ្លៀតឱកាស ក្នុងការឆបោកតាមប្រព័ន្ធអ៊ីនធឺណិត ធ្វើប្រតិបត្តិការឆបោកជ្រើសរើសការងារខុសច្បាប់ និងបង្ខំឱ្យប្រព្រឹត្តបទល្មើស ធ្វើឱ្យមានភាពស្មុគស្មាញបន្ថែមទៀត សម្រាប់អាជ្ញាធរមានសមត្ថកិច្ច ដែលបង្កផលប៉ះពាល់ដល់សន្តិសុខជាតិ សន្តិសុខក្នុងតំបន់ និងសាកលលោក ហេតុដូចនេះទើបប្រទេសទាំងបី ចាំបាច់បង្កើតឱ្យមានកិច្ចប្រជុំដ៏មានសារៈសំខាន់នេះឡើង ។គួរបញ្ជាក់ថា គោលបំណងសំខាន់ នៃកិច្ចប្រជុំនេះ រួមមាន ទី១. សិក្សាអំពីស្ថានភាព នៃភាពងាយរងគ្រោះរបស់ជនទេសន្តរប្រវេសន៍ឆ្លងកាត់ព្រំដែននៃប្រទេសទាំងបី, ទី២. ពិនិត្យមើលយន្តការឆ្លើយតបរបស់រដ្ឋាភិបាល នៃប្រទេសទាំងបី ទី៣. ស្វែងរកដំណោះស្រាយរួមត្រីភាគី ដើម្បីបង្កើនប្រសិទ្ធិភាពក្នុងការគ្រប់គ្រងព្រំដែន និងពង្រឹងកិច្ចសហប្រតិបត្តិការអន្តរជាតិ និងទី៤. បង្កើតយន្តការត្រីភាគីរួម រៀបចំកិច្ចប្រជុំទៀងទាត់ ដើម្បីធានាការចែករំលែកព័ត៌មាន និងកិច្ចសហការបន្ត ។កិច្ចប្រជុំនេះ មានការចូលរួមពីតំណាង និងជាសមាជិកនៃស្ថាប័នពាក់ព័ន្ធ នៃប្រទេសទាំង៣ កម្ពុជា ឡាវ វៀតណាម រួមមាន ក្រសួងមហាផ្ទៃ/សន្តិសុខសង្គម ក្រសួងការងារ និងបណ្ដុះបណ្ដាលវិជ្ជាជីវៈ ក្រសួងសង្គមកិច្ច អតីតយុទ្ធជន និងយុវនិតិសម្បទា ក្រសួងកិច្ចការនារី សហព័ន្ធនារី/សមាគមនារី ក្រសួងការបរទេស និងសហប្រតិបត្តិការអន្តរជាតិ ក្រសួងយុត្តិធម៌ ក្រសួងអប់រំ យុវជន និងកីឡា តំណាងស្ថានទូតប្រចាំកម្ពុជា អាជ្ញាធរពាក់ព័ន្ធ តំណាងអង្គការទេសន្តរប្រវេសន៍អន្តរជាតិ (IOM) នៃប្រទេសទាំងបី ក៏ដូចជាអង្គការជាតិ និងអន្តរជាតិ ៕

បណ្ដាញសង្គម

ព័ត៌មានថ្មីៗ

លោក Trump ទទូចថាទីតាំងនុយក្លេអ៊ែរអ៊ីរ៉ង់ត្រូវបានបំផ្លាញស្របពេលមានរបាយការណ៍មួយចំនួនថាបានរួចផុតពីការបំផ្លាញ

ពលរដ្ឋជប៉ុនបោះឆ្នោតក្នុងការសាកល្បងដ៏សំខាន់សម្រាប់នាយករដ្ឋមន្ត្រី Shigeru Ishiba

អ្នកស្លាប់ក្នុងជំនន់ទឹកភ្លៀងនៅកូរ៉េខាងត្បូងសប្តាហ៍នេះ កើនឡើងដល់១៤ នាក់

ការប៉ះទង្គិចបានផ្ទុះឡើងក្នុងការតវ៉ាប្រឆាំងនឹងជនអន្តោប្រវេសន៍ក្នុងប្រទេសប៉ូឡូញ

[UPDATE] ការប្រកាសអាសន្នរលកយក្សស៊ូណាមិ ក្រោយការរញ្ជួយដីដ៏ខ្លាំងក្លា៣លើក វាយប្រហារឆ្នេរប៉ាស៊ីហ្វិករបស់រុស្ស៊ី

BREAKING NEWS ការប្រកាសអាសន្នរលកយក្សស៊ូណាមិ ក្រោយការរញ្ជួយដីដ៏ខ្លាំងក្លា បានវាយប្រហារឆ្នេរប៉ាស៊ីហ្វិករបស់រុស្ស៊ី

ពលរដ្ឋអង់គ្លេសប្រមូលផ្ដុំគ្នាទាំងភ្លៀង ក្នុងទីក្រុងឡុងដ៍្រ បង្ហាញការគាំទ្រពលរដ្ឋប៉ាឡេស្ទីន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877