BTV NEWS

សម្ដេចធិបតី ហ៊ុន ម៉ាណែត អនុញ្ញាតឲ្យប្រធានក្រុមហ៊ុនខ្នាតយក្សមួយរបស់ចិនក្នុងវិស័យវិស្វកម្ម និងហេដ្ឋារចនាសម្ព័ន្ធ ចូលជួបសម្តែងការគួរសម និងពិភាក្សាការងារ

តុលាការខេត្តព្រះវិហារសម្រេចឃុំខ្លួន ជនសង្ស័យចំនួន៣នាក់ ដែលលួចកាប់ព្រៃខុសច្បាប់ នៅក្នុងតំបន់ការពារធម្មជាតិក្នុងខេត្តព្រះវិហារ

រដ្ឋមន្ត្រីការបរទេសកម្ពុជា- អគ្គនាយកអង្គការយូណេស្កូ ផ្លាស់ប្តូរទស្សនៈអំពីការវិវត្តន៍ថ្មីៗពាក់ព័ន្ធនឹងស្ថានការណ៍នៅព្រំដែនកម្ពុជា-ថៃ

អនុប្រធានទី២រដ្ឋសភា ចែករំលែកបទពិសោធនៃការរៀបចំគោនយោបាយគាំពាសង្គម ដល់និវត្តជននៃអគ្គលេខាធិការដ្ឋានដ្ឋានរដ្ឋសភា

ព័ត៌មានជាតិ

«ភាពយន្តខ្លីសរុប៧៧រឿង ពី២២ប្រទេស ត្រៀមចាក់បញ្ចាំងនៅមហោស្រពភាពយន្តខ្លីចតុមុខ លើកទី១៤»

មហោស្រពភាពយន្តខ្លីចតុមុខ (Chaktomuk Short Film Festival/ CSFF) ដែលជាមហោស្រពភាពយន្តខ្លី ដំបូងគេ និងមានតែមួយគត់នៅកម្ពុជា បានប្រកាសជាផ្លូវការ នៃការចាក់បញ្ចាំងខ្សែភាពយន្តខ្លីប្រតិដ្ឋ និងភាពយន្ត ឯកសារសរុប ៧៧រឿង មកពី២២ប្រទេស ដែលបានជ្រើសចេញពី១៩៦ចំណងជើងរឿង ដែលបានដាក់ពាក្យចូលរួមប្រកួតសម្រាប់ទស្សនិកជនកម្ពុជា នៅឆ្នាំ២០២៥នេះ។នៅព្រឹកថ្ងៃទី១៣ ខែតុលា ឆ្នាំ២០២៥ មហោស្រពភាពយន្តខ្លីចតុមុខ មានកិត្តិយសរៀបចំកម្មវិធីសន្និសីទសារព័ត៌មាន អំពីមហោស្រពរបស់ខ្លួននៅរោងភាពយន្ត Fable Cinema ដើម្បីផ្សព្វផ្សាយពីបេសកម្មរបស់យើង។ កម្មវិធីនេះមានការចូលរួមពីឯកឧត្តម ពេទ្យ អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន លោក ហួយ សុជាតិ អនុប្រធាននាយកដ្ឋាន សិល្បភាពយន្ត និងផ្សព្វផ្សាយវប្បធម៌ នៃក្រសួងវប្បធម៌ និងវិចិត្រសិល្បៈ សមិទ្ធករ ភ្ញៀវកិត្តិយស។ លោក ស៊ុំ ស៊ីថែន ប្រធានមហោស្រពឆ្នាំទី១៤នេះថ្លែងថា៖ មហោស្រពភាពយន្តខ្លីចតុមុខមានសារៈសំខាន់ ណាស់សម្រាប់ប្រទេសកម្ពុជាដើម្បី ជួយដល់ទស្សនិកជនរបស់យើងឱ្យទទួលបានបទពិសោធន៍ពីការស្រមើស្រមៃ ជាសកល និងគំនិតរបស់អ្នកផលិតភាពយន្តខ្មែរដែលនឹងជះឥទ្ធិពល មកលើប្រទេសរបស់យើង។ CSFF បានបង្កើតឡើង ដោយក្រុមយុវជនស្ម័គ្រចិត្តខ្មែរ ដោយដឹកនាំដោយ «ក្រុមភាពយន្តឈូករ័ត្ន» ហើយត្រូវបានទទួលស្គាល់ថាជាមហោស្រព ដែលលើកកម្ពស់ និងផ្ដល់រង្វាន់ដល់អ្នកផលិតភាពយន្តដែលមានទេពកោសល្យនៅកម្ពុជា ក៏ដូចជានៅអាស៊ីអាគ្នេយ៍ ជារៀងរាល់ឆ្នាំចាប់តាំងពីឆ្នាំ២០១២មក។ បន្ទាប់ពីការខិតខំប្រឹងប្រែងអស់រយៈពេល ១៤ឆ្នាំ CSFF មិនត្រឹមតែជាវេទិកាមួយដ៏សំខាន់សម្រាប់នាំយកភាពយន្តខ្លី អន្តរជាតិល្អៗមកកាន់កម្ពុជាដើម្បីតភ្ជាប់កម្ពុជា ទៅកាន់ពិភពលោកប៉ុណ្ណោះនោះទេ CSFFក៏ជាកន្លែងបង្ហាញទេពកោសល្យ របស់អ្នកផលិតភាពយន្តរបស់កម្ពុជាទៅកាន់ពិភពលោកផងដែរ ជាក់ស្តែងកាលពីឆ្នាំ២០២៤កន្លងទៅនេះភាពយន្តខ្មែរចំនួន២ ត្រូវបានយកទៅចាក់បញ្ចាំងមហោស្រពភាពយន្ត Asia-Pacific Youth Micro Movie Festival នៅទីក្រុងហុងកុងតួរយ៉ាងគឺរឿង «ស្នេហ៍ឆ្លងវេលា» និង «កញ្ញា អតិថិជន» ទៅដាក់ប្រកួតលើឆាកអន្តរជាតិ ហើយ ដែលនេះគឺជាការបន្តបេសកកម្មដ៏ចាំបាច់ របស់ CSFF ដើម្បីចូលរួមបង្ហាញភាពរឹងមាំរបស់កម្ពុជាក្នុងការចូលរួម យ៉ាងសកម្មជាអន្តរជាតិដើម្បីអភិវឌ្ឍន៍ភាពយន្តរបស់កម្ពុជា និងក្នុងតំបន់អាស៊ីអាគ្នេយ៍។ លោក បានបន្តថា នៅក្នុងឆ្នាំ២០២៥ នេះ CSFF នឹងរៀបចំឡើងរយៈពេល ៤ថ្ងៃជាប់ៗគ្នា គឺចាប់ពីថ្ងៃទី១៧ ដល់ថ្ងៃទី២០ ខែតុលា ដែលក្នុងនោះមានកម្មវិធីបើក និងបិទមហោស្រពផងដែរ។ ទស្សនិកជនដែលចង់លើកទឹកចិត្តយុវសមិទ្ធិករ និងចង់មានចូលចិត្តភាពយន្តខ្មែរក៏ដូចជាបរទេស និងអាចមកចូលរួមទស្សនារាល់រឿងខ្លី ជាប់ជម្រើសទាំងអស់នៅតាមរោងភាពយន្ត ដូចជា Legend Exchange Square, Fable Cinema, Meta House, and French Institute of Cambodia។ ជាមួយគ្នានេះដែរ មហោស្រពភាពយន្តខ្លីចតុមុខ (CSFF) ក៏កំពុងស្វែងរកការគាំទ្រផ្នែកហិរញ្ញវត្ថុបន្ថែមទៀត ដើម្បីរៀបចំកម្មវិធី និងរបស់របរផ្សព្វផ្សាយដល់សមិទ្ធករ សិស្សនិស្សិត និងមហាជន ក៏ដូចជាទំនុកបម្រុង ដល់ក្រុមការងារមហោស្រព និងការចាក់បញ្ចាំង ឡើងវិញតាមខេត្តនេះ។ លោក អ៊ុង ស៊ីវថុង ប្រធានក្រុមក៏បានបង្ហើបដែរថា៖ «CSFF ដើរតួនាទីយ៉ាងសំខាន់ក្នុងវិថីផលិត ភាពយន្ត។ ក្នុងឆ្នាំ២០២២ បានចូលរួមជាប្រធានផ្នែកផលិត ហើយមានឱកាសដកពិសោធរៀបចំមហោស្រពពីក្រោយឆាក។ តួនាទីនេះនាំឱ្យមើលឃើញ ទិដ្ឋភាពថ្មីមួយ ពីរបៀបរៀបចំមហោស្រព និងសារៈសំខាន់របស់មហោស្រព។ ឆ្នាំនេះត្រឡប់មកវិញ ដោយសារចង់រៀនបន្ថែម និងជំរុញខ្លួនឱ្យកាន់តែឆ្នៃ ប្រតិដ្ឋ និងបន្តលូតលាស់ជំនាញតាមរយៈសហគមន៍មួយនេះ។ CSFF មិនត្រឹមតែជា មហោស្រពទេ តែជាថ្នាលបណ្តុះយុវសមិទ្ធិករយើង និងជួយឱ្យពួកយើងមានការទទួលស្គាល់ទៀត លើឆាកអន្តរជាតិទៀត។លោក សុខ ច័ន្ទវាសនា ប្រធានផ្នែកក្រោយផលិតរបស់ CBS និងជាមេប្រយោគក្នុងស្រុក បានកត់សម្គាល់ ពីការរីកចម្រើន របស់ភាពយន្តខ្មែរតាមរយៈតួរនាទីរបស់លោក ក្នុងមហោស្រពនេះថា៖ សមត្ថភាពរបស់អ្នកផលិត ភាពយន្តក្នុងជំនាន់នេះ គឺកាន់តែប្រសើរឡើង ដោយសារតែផលិតករភាពយន្តជំនាន់មុនបានជួយបណ្តុះបណ្តាល ផលិតភាពយន្តជំនាន់ថ្មីដែលនេះឆ្លុះបញ្ចាំងពីភាពវិជ្ជមាន និងភាពធននៃកសាងធនធានមនុស្ស យើងក្នុងវិស័យនេះ។ជាមួយគ្នានោះដែរ លោក ហួយ សុជាតិ អនុប្រធាននាយកដ្ឋានសិល្បៈភាពយន្ត និងផ្សព្វផ្សាយវប្បធម៌ នៃក្រសួងវប្បធម៌ និងវិចិត្រសិល្បៈ បានលើកឡើងថា ជាការពិតណាស់ យើងឃើញថាពីមួយឆ្នាំទៅមួយឆ្នាំ មហោស្រពភាពយន្តខ្លីចតុម្មុខ ទទួលបាននូវការគាំទ្រពីសាធារណជនជាតិ និងអន្តរជាតិ កាន់តែច្រើនឡើងៗ ហើយបានក្លាយទៅជាព្រឹត្តិការណ៍វប្បធម៌មួយដ៏សំខាន់ ដែលជាចំណងទំនាក់ទំនងរវាងផលិតករចាស់-ថ្មី ក៏ដូចជាផលិតករជាតិ និងអន្តរជាតិ។ មួយវិញទៀត ព្រឹត្តិការណ៍នេះក៏ជាឱកាសសម្រាប់អ្នកដឹកនាំរឿង ផលិតករ សិល្បករ សិល្បការិនី និងយុវជនដែលស្រឡាញ់វិស័យភាពយន្ត ទទួលបាននូវចំណេះដឹង និងបទពិសោធន៍ថ្មីៗ ក្នុងការពង្រឹងសមត្ថភាព ជំនាញ និងគំនិតច្នៃប្រឌិត ដើម្បីបង្កើននូវគុណភាពផលិតស្នាដៃនាពេលក្រោយ។នាឱកាសនោះដែរ ឯកឧត្តម ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងក្រសួងព័ត៌មាន បានផ្តល់អនុសាសន៍ល្អៗមួយចំនួនដល់មហោស្រពសម្រាប់ពិចារណាបន្ថែមក្នុងការរៀបចំមហោស្រព ក្នុងពេលខាងមុខ ដើម្បីឆ្លើយតប នឹងគោលនយោបាយរបស់រដ្ឋាភិបាលក្នុងចូលរួមដោះស្រាយបញ្ហាសង្គម ដែលពាក់ព័ន្ធនឹងយុវជន និងជាពិសេសជួយទប់ស្កាត់ នៃការរីករាលដាល់ព័ត៌មានក្លែងក្លាយ។ លើសពីនេះឯកឧត្តម យល់ថា៖ការចូលរួមរបស់យុវជនយើងក្នុងការជួយផ្សព្វផ្សាយការពិតពីកម្ពុជា គឺពិតជាមានសារសំខាន់ណាស់។ ការរៀបចំឡើងនូវសន្និសីទសារព័ត៌មាននេះ គឺក្នុងគោលបំណងផ្សព្វផ្សាយព័ត៌មានទូលំទូលាយទៅកាន់សាធារណជន ឲ្យបានដឹងពីចក្ខុវិស័យរបស់មហោស្រព និងព័ត៌មានអំពីការចាក់បញ្ចាំងភាពយន្តដើម្បីអញ្ជើញទស្សនិកជន ឲ្យមកចូលរួមទស្សនា នូវភាពយន្តខ្លីរបស់ខ្មែរ និងបរទេសឲ្យបានច្រើនកុះករផងដែរ៕ អត្ថបទ រដ្ឋា

គ.ស.ម.ក. រកឃើញ មន្ត្រីជាន់ខ្ពស់ថៃទី២ ទទួលស្គាល់ ការប្រើសំឡេងនៅព្រំដែន គឺជាការរំលោភបំពានអនុសញ្ញា CAT

គណៈកម្មាធិការសិទ្ធិមនុស្សកម្ពុជា (គ.ស.ម.ក.) ជូនដំណឹង អំពីការលើកឡើងរបស់ ឧត្តមមន្ត្រីនៃការិយាល័យមហាអយ្យការ ដែលជាមនុស្សទី២ បន្ទាប់ពីលោកជំទាវ Angkhana Neelapaijit សមាជិកព្រឹទ្ធសភាប្រទេសថៃ ក្នុងការទទួលស្គាល់ លើករណីការប្រើប្រាស់សំឡេងរំខាន ដែលជាទម្រង់ នៃការបំភិតបំភ័យ និងយាយីផ្លូវចិត្ត នៅតាមបណ្តោយព្រំដែនកម្ពុជា-ថៃ គឺជាការរំលោភបំពានអនុសញ្ញា ប្រឆាំងទារុណកម្ម និងការប្រព្រឹត្តមកលើខ្លួន ឬទណ្ឌកម្មឯទៀតដែលឃោរឃៅអមនុស្សធម៌ ឬបន្ថោកបន្ទាប (CAT) ហើយវាជាការរំលោភបំពានសិទ្ធិមនុស្សយ៉ាងធ្ងន់ធ្ងរ។គណៈកម្មាធិការសិទ្ធិមនុស្សកម្ពុជា (គ.ស.ម.ក.) នៅថ្ងៃទី១៣ ខែតុលា ឆ្នាំ២០២៥ នេះ បានចេញ សេចក្តីជូនដំណឹង ដល់សាធារណជនឱ្យបានជ្រាបថា យោងតាមការសែត The Nation Thailand ចុះថ្ងៃទី១៣ ខែតុលា ឆ្នាំ២០២៥ អំពីការលើកឡើងរបស់ ឧត្តមមន្ត្រីនៃការិយាល័យមហាអយ្យការ ដែលជាមនុស្សទី២ បន្ទាប់ពីលោកជំទាវ Angkhana Neelapajit សមាជិកព្រឹទ្ធសភាប្រទេសថៃ ក្នុងការទទួលស្គាល់ លើករណីការប្រើប្រាស់សំឡេងរំខាន ដែលជាទម្រង់ នៃការបំភិតបំភ័យ និងយាយីផ្លូវចិត្ត នៅតាមបណ្ដោយព្រំដែនកម្ពុជា-ថៃ គឺជាការរំលោភបំពានអនុសញ្ញា ប្រឆាំងទារុណកម្ម និងការប្រព្រឹត្តមកលើខ្លួន ឬទណ្ឌកម្មឯទៀតដែលឃោរឃៅ អមនុស្សធម៌ ឬបន្ថោកបន្ទាប (CAT) ហើយវាជាការរំលោភបំពានសិទ្ធិមនុស្សយ៉ាងធ្ងន់ធ្ងរ។គ.ស.ម.ក. បានដកស្រង់ខ្លឹមសារ ដូចខាងក្រោមនេះ៖ ឧត្តមមន្ត្រីនៃការិយាល័យមហាអយ្យការ ដែលសុំមិនបញ្ចេញឈ្មោះ ដោយសារភាពភ័យខ្លាចការ រិះគន់ពីសំណាក់ប្រជាជនថៃ បានលើកឡើងថា ការចាក់សំឡេងបន្លាច ដូចជាសំឡេងខ្មោចក្នុងភាពយន្ត សំឡេងរថក្រោះ និងសំឡេងយន្តហោះចម្បាំង F-16 ទៅលើប្រជាជនកម្ពុជា អាចនឹងត្រូវបកស្រាយថា ជា ការរំលោភកាតព្វកិច្ចក្នុងការអនុវត្តអនុសញ្ញាប្រឆាំងទារុណកម្ម និងការប្រព្រឹត្តមកលើខ្លួន ឬទណ្ឌកម្មឯទៀត ដែលឃោរឃៅ អមនុស្សធម៌ ឬបន្ថោកបន្ទាប (CAT) ដែលប្រទេសថៃជារដ្ឋភាគី៕

ឯកឧត្តម ម៉ក់ ជីតូ ណែនាំអាជ្ញាធរខេត្តតាកែវ បន្តយកចិត្តទុកដាក់លើបញ្ហាក្មេងទំនើង

ឯកឧត្តម ម៉ក់ ជីតូ រដ្ឋលេខាធិការក្រសួងមហាផ្ទៃ បានធ្វើការណែនាំ និងក្រើនរំលឹកដល់អាជ្ញាធរខេត្តតាកែវ រួមនឹងមន្រ្តីពាក់ព័ន្ធទាំងអស់បន្តពង្រឹងការអនុវត្តគោលនយោបាយភូមិ-ឃុំសង្កាត់មានសុវត្ថិភាពឱ្យបានល្អប្រសើរ ពិសេសបញ្ហាក្មេងទំនើង ត្រូវដាក់ចេញវិធានការឱ្យបានតឹងរឹង និងបង្ក្រាបឱ្យបានទាន់ពេលវេលា។ ថ្លែងក្នុងឱកាសអញ្ជើញក្នុងកិច្ចប្រជុំបូកសរុបលទ្ធផល នៃការអនុវត្តគោលនយោបាយ ភូមិ-ឃុំសង្កាត់ មានសុវត្ថិភាព ប្រចាំនព្វមាស(៩ខែ) ឆ្នាំ២០២៥ និងលើកទិសដៅអនុវត្តបន្ត នៅខេត្តតាកែវ នៅសាលប្រជុំរដ្ឋបាលខេត្ត នៅរសៀលថ្ងៃទី១៣ ខែតុលា ឆ្នាំ២០២៥ ពិធីនេះក៏មានការចូលរួមពីឯកឧត្តម វ៉ី សំណាង អភិបាលខេត្តតាកែវ លោកអភិបាលរងខេត្ត កងម្លាំងទាំង៣ ប្រធានមន្ទីរជុំវិញខេត្ត អភិបាលក្រុង-ស្រុក អធិការនគរបាលក្រុង-ស្រុក មេឃុំចៅ-សង្កាត់ ប៉ុសិ៍តនគរបាលរដ្ឋបាលទាំង១០០ រួមនឹងមន្រ្តីពាក់ព័ន្ធជាច្រើនរូបទៀត។ឯកឧត្តម ម៉ក់ ជីតូ រដ្ឋលេខាធិការ ក្រសួងមហាផ្ទៃ បានថ្លែងថាបញ្ហាក្មេងទំនើងនេះ រាជរដ្ឋាភិបាលបានយកចិត្តទុកដាក់ និងបានដាក់វិធានការដ៏តឹងរឹងចំពោះជនបង្ករដែលជាក្រុមក្មេងទំនើង ដូច្នេះលោកស្នងការ អធិការនគរបាល រួមនឹងប៉ុសិ៍តរដ្ឋទាំងអស់ ត្រូវតែបង្កើនការយកចិត្តទុកដាក់ឱ្យបានខ្ពស់ និងត្រូវសហការជាមួយអាជ្ញាធរមូលដ្ឋានភូមិឃុំ ចុះតាមដានជាប្រចាំ និងកំណត់មុខសញ្ញាក្រុមក្មេងទំនើង បងតូបងធំ ដែលតែងតែបង្ករភាពអនាធិបតេយ្យតាមដងផ្លូវ និងទីប្រជុំជននានា ធ្វើឱ្យបាត់បង់សណ្ដាប់ធ្នាប់សង្គម និងប៉ះពាល់ដល់ការរស់នៅរបស់ប្រជាពលរដ្ឋ ត្រូវតែបង្ក្រាបឱ្យបានទាន់ពេលវេលា គ្មានការយោគយល់អ្វីទាំងអស់។ឯកឧត្តមនបានសង្កាត់ធ្ងន់ថាចំពោះក្រុមក្មេងទំនើងដែលមានវត្ថុតាង ត្រូវអនុវត្តច្បាប់ឱ្យបានតឹងរឹង និងចាត់បញ្ជូនទៅកាន់តុលាការ ឱ្យបានលឿនបំផុត ដើម្បីរួមចំណែកកាត់បន្ថយអត្រាក្មេងទំនើងក្នុងខេត្ត នឹងលើកកម្ពស់គោលនយោបាយភូមិឃុំសង្កាត់មានសុវត្ដិភាពបានកាន់ល្អប្រសើរថែមទៀត។ឆ្លៀតក្នុងឱកាសនោះដែរ ឯកឧត្តម វ៉ី សំណាង អភិបាលខេត្តតាកែវបានថ្លែងថាក្នុងរយៈពេល៩ខែ ដើមឆ្នាំ២០២៥នេះ អាជ្ញាធរខេត្តតាកែវ បានអនុវត្តគោលនយោបាយភូមិ-ឃុំសង្កាត់មានសុវត្ថិភាពទទួលបានលទ្ធផលជោគជ័យគួរជាទីមោទនៈ។ លទ្ធផលទាំងអស់នេះជោគជ័យទៅបានដោយមានការចូលរួមយ៉ាងសស្រាក់សស្រាំពីសំណាក់អាជ្ញាធរមូលដ្ឋាន រួមនឹងភាគ្គីពាក់ព័ន្ធទាំងអស់ផងដែរ។ទន្ទឹមនឹងនេះឯកឧត្តមក៏បានជំរុញដល់អាជ្ញាធរ រួមនឹងសមត្ថកិច្ចពាក់ព័ន្ធចូលរួមឱ្យសកម្មលើកិច្ចការងារនេះ ពិសេសត្រូវបង្កើនការបង្ក្រាបបទល្មើសគ្រឿងញៀន ក្មេងទំនើង ចោរលួច ឆក់ប្លន់ និងបទល្មើសផ្សេងៗទៀតដែលបង្កអសន្ដិសុខដល់សង្គមជាតិ។ ក្នុងនោះដែរក៏ត្រូវចូលរួមលើកកម្ពស់អនាម័យ បរិស្ថាន សុខុមាលភាពប្រជាពលរដ្ឋ និងកាត់បន្ថយគ្រោះថ្នាក់ដែលបណ្តាល មកពីគ្រោះមហន្តរាយនិងជំងឺរាតត្បាតនៅគ្រប់កាលៈទេសៈ ព្រមទាំងលើកទឹកចិត្តឱ្យមានការដោះស្រាយ វិវាទនៅមូលដ្ឋានក្រៅប្រព័ន្ធតុលាការ ប្រកបដោយប្រសិទ្ធភាព និងប្រសិទ្ធផលខ្ពស់ ដើម្បីធានាបាននូវសន្តិសុខ សណ្ដាប់ធ្នាប់ របៀបរៀបរយ និងសុខសុវត្ថិភាពជូនប្រជាពលរដ្ឋ៕

មន្ទីរប្រឆាំងបទល្មើសគ្រឿងញៀន បង្ក្រាបការជួញដូរគ្រឿងញៀន ឃាត់ខ្លួនជនល្មើសជនជាតិចិន២នាក់ ជាមួយនឹងថ្នាំញៀនជាង ២គីឡូក្រាម នៅខណ្ឌចំការមន

ភ្នំពេញ៖ អនុវត្តតាមបទបញ្ជារបស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និង ឯកឧត្តម ឧត្តមសេនីយ៍ឯក ប៊ុន ប៉ាម៉ារីលុច អគ្គស្នងការរងទទួលដឹកនាំ មន្ទីរប្រឆាំងបទល្មើសគ្រឿងញៀន និងឯកឧត្តម ឧត្តមសេនីយ៍ឯក ព្រុំ សន្ធរ អគ្គស្នងការរងទទួលសហការដឹកនាំមន្ទីរប្រឆាំងគ្រឿនញៀន និងដឹកនាំបញ្ជាផ្ទាល់ពី ឯកឧត្តម ឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀន កាលពីថ្ងៃទី០៩ ខែតុលា ឆ្នាំ២០២៥ វេលាម៉ោង១៩៖៣០នាទី កម្លាំងជំនាញ(ក១)នៃមន្ទីរប្រឆាំងបទល្មើសគ្រឿងញៀន សហការជាមួយស្នងការដ្ឋានរាជធានីភ្នំពេញ ដោយមានការដឹកនាំនិងសម្របសម្រួល ពីព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ លោក គឹម ហុងសាន បានចុះស្រាវជ្រាវស៊ើបអង្កេត រហូតឈានទៅបង្ក្រាប ករណីដឹកជញ្ជូនជួញដូរ និងរក្សាទុកដោយខុសច្បាប់នូវសារធាតុញៀន ស្ថិតនៅមុខក្លឹបកម្សាន្ត 88&F8 Club ផ្លូវ៩០៤ សង្កាត់ទន្លេបាសាក់ ខណ្ឌចំការមន រាជធានីភ្នំពេញ។ ប្រតិបត្តិការនេះ កម្លាំងជំនាញបានចាប់ខ្លួនជនល្មើស ០២នាក់ ឈ្មោះ ZOU XIAOBO ភេទប្រុស ជនជាតិចិន អាយុ៥១ឆ្នាំ និងឈ្មោះ HE TIANTIAN ភេទប្រុស ជនជាតិចិន អាយុ៣៦ឆ្នាំ។ វត្ថុតាង ចាប់យក៖ គ្រឿងញៀនប្រភេទ កេតាមីន (KETAMINE) ទម្ងន់ ១៩៩៤ក្រាម, គ្រឿងញៀនប្រភេទ អ៊ិចស្ត្រាស៊ី (MDMA) ទម្ងន់ ៤៣៧.៧១ក្រាម សរុបរួមសារធាតុញៀនទម្ងន់ ២,៤៣១.៧១ក្រាម (២គីឡូ ៤៣១.៧១ក្រាម)។បច្ចុប្បន្នជនល្មើស និងវត្ថុតាង ត្រូវបានកម្លាំងជំនាញកសាងសំណុំរឿងបញ្ជូនខ្លួន ទៅសាលាដំបូងរាជធានីភ្នំពេញ ដើម្បីចាត់ការតាមនីតិវិធី៕

រដ្ឋមន្រ្តីសុខាភិបាល «មន្ទីរសុខាភិបាល ត្រូវដឹងពីសុខទុក្ខមន្រ្តីរបស់ខ្លួនពី ប៉ុស្តិ៍សុខភាព មណ្ឌលសុខភាព ដល់មន្ទីរពេទ្យគ្រប់កម្រិត ជាពិសេសសុខទុក្ខប្រជាពលរដ្ឋ»

ភ្នំពេញ ៖ នាថ្ងៃទី១៣ ខែតុលា ឆ្នាំ២០២៥ ឯកឧត្តមសាស្រ្តាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានអញ្ជើញជាអធិបតីក្នុងពិធីប្រកាសចូលកាន់មុខតំណែងប្រធានមន្ទីរសុខាភិបាល នៃរដ្ឋបាលខេត្តពោធិ៍សាត់។ ពិធីនេះរៀបចំឡើងនៅសាលាខេត្តពោធិ៍សាត់ មានការអញ្ជើញចូលរួមពី ឯកឧត្តម ខូយ រីដា អភិបាលខេត្តពោធិ៍សាត់ ឯកឧត្តម ម៉ក់ រ៉ា ប្រធានក្រុមប្រឹក្សាខេត្ត និងឯកឧត្តម លោកជំទាវ ថ្នាក់ដឹកនាំក្រសួងសុខាភិបាល លោក លោកស្រី ថ្នាក់ដឹកនាំខេត្តគ្រប់លំដាប់ថ្នាក់ និងមន្ត្រីរាជការសុខាភិបាល និងបណ្តាមន្ទីរ-ស្ថាប័នពាក់ព័ន្ធ។ឯកឧត្តមសាស្រ្តាចារ្យរដ្ឋមន្រ្តី បានណែនាំដល់ថ្នាក់ដឹកនាំ និងមន្រ្តីសុខាភិបាល ត្រូវចូលរួមក្នុងការខិតខំប្រឹងប្រែងបន្ថែមទៀត ដោយធ្វើយ៉ាងណាឱ្យមានការសហការសម្របសម្រួល និងឱ្យមានការចូលរួមយ៉ាងស្មោះស្ម័គ្រអស់ពីកម្លាំងកាយចិត្តពីសំណាក់មន្ត្រីរាជការ និងបុគ្គលិកសុខាភិបាលគ្រប់លំដាប់ថ្នាក់ ដើម្បីធានាបាននូវជោគជ័យក្នុងការលើកកម្ពស់សុខភាព និងសុខុមាលភាពជូនប្រជាជន ជាពិសេសនៅតាមទីជនបទដាច់ស្រយាល។បន្ថែមពីនេះដែរ ឯកឧត្តមសាស្រ្តាចារ្យ ឈាង រ៉ា បានណែនាំដល់លោកប្រធានមន្ទីរ និងមន្រ្តីសុខាភិបាលទាំងអស់ ត្រូវគោរពអនុវត្កតាមការណែនាំពីក្រសួងសុខាភិបាល និងត្រូវមានគណនេយ្យភាព ការទទួលខុសត្រូវចំពោះក្រុមប្រឹក្សាខេត្ត គណៈអភិបាលខេត្ត និងអាជ្ញាធរដែនដីពាក់ព័ន្ធ និងត្រូវយកចិត្តទុកដាក់អស់ពីកម្លាំងកាយចិត្ត និងពង្រឹងសមត្ថភាពក្នុងភាពជាអ្នកដឹកនាំ ប្រតិបត្តិមុខងារ តាមតួនាទីរបស់ខ្លួន ដោយប្រកាន់យកអាកប្បកិរិយាសមរម្យ ភាពថ្លៃថ្នូរ ប្រកបដោយកិត្កិយស គោរពការសម្ងាត់វិជ្ជាជីវៈ អព្យាក្រឹត្យក្នុងការងារ ភក្កីភាព និងគិតគូរដល់ប្រយោជន៍ជាតិ ចៀសវាងឱ្យបាននូវការធ្វើឱ្យប៉ះពាល់ដល់ផលប្រយោជន៍សាធារណៈ។ ឆ្លៀតក្នុងឱកាសនោះដែរ ឯកឧត្តមសាស្រ្តាចារ្យរដ្ឋមន្រ្តី បានចែករំលែកបទពិសោធន៍ និងមតិយោបល់ដល់ថ្នាក់ដឹកនាំ និងមន្រ្តីសុខាភិបាល ដោយត្រូវផ្តោតសំខាន់ ២ចំណុចគឺ៖ ១) សារគន្លឹះសម្រាប់ដំណើរការទៅមុខរបស់មូលដ្ឋានសុខាភិបាល ដោយ៖- ធានាឱ្យមាននិរន្តរភាព លំនឹង ភាពខ្លាំង រឹងមាំ និងបទបែន ដោយក្នុងនាមអ្នកដឹកនាំត្រូវធានាធ្វើឱ្យយ៉ាងណាសេវាមិនមានភាពយឺតយ៉ាវ អាក់ខាន ការដាច់ខ្សែចង្វាក់ ហើយត្រូវធ្វើការក្នុងវប្បធម៌ជោគជ័យ មានវិន័យច្បាស់លាស់ និងការទទួលខុសត្រូវខ្ពស់។- ត្រូវពង្រឹងការងារជាក្រុម មានសាមគ្គីភាព ភាពរួបរួម ចែករំលែក ផ្តល់ឱ្យគ្នាទៅវិញទៅមក និងជាស្មារតីផងកុំឱ្យបែកជាផ្នែក។ ហើយត្រូវមានការកិច្ចសហការ និងកិច្ចសហប្រតិបត្តិការ គ្រប់កម្រិត- ត្រូវបម្រើសេវាដោយ សុចិតភាពសំដៅលើប្រយោជន៍រួមដល់សាធារណជនការទទួលខុសត្រូវ ទាំងសាធារណៈ និងឯកជន- ថ្នាក់ដឹកនាំ ត្រូវចូលឱ្យដល់មូលដ្ឋានហើយនៅជាប់ជាមួយមន្រ្តីនៃមណ្ឌលសុខភាព មន្ទីរពេទ្យស្រុក ខេត្ត និងសុខទុក្ខប្រជាពលរដ្ឋជានិច្ច- ត្រូវគិតអំពីជំនាន់ក្រោយ ដោយចែករំលែកបទពិសោធន៍ ដល់មន្រ្តីសុខាភិបាល ជាពិសេសដល់អ្នកបន្តវេនជាបន្ត ចែករំលែកក្នុងភាពជាអ្នកដឹកនាំ- ត្រូវសហការការងារឱ្យបានល្អជាមួយស្ថាប័នពាក់ព័ន្ធ និងចេះកៀរគរធនធាន និងចេះប្រើប្រាស់ឱ្យអស់លទ្ធភាព- ការដឹកនាំត្រូវផ្តល់ជាគំរូ ជាលំនាំ បទពិសោធន៍ ក្រមសីលធម៌ វិជ្ជាជីវៈ ដោយគោរព និងឱ្យតម្លៃលើភារកិច្ចរបស់ខ្លួន។២) អនុសាសន៍ក្នុងការផ្តាំផ្ញើ និងលើកទឹកចិត្តជំរុញ កាន់តែទទួលបានសមិទ្ធផលល្អ ដើម្បីវឌ្ឍនភាពទៅមុខទៀតដោយ៖- ការដឹកនាំ មិនត្រូវចេះតែគ្រប់គ្រង ត្រូវទាញមានការសហការចូលរួមពីសហភារតៈរបស់យើងទាំងអស់ ដោយផ្សារភ្ជាប់ជាមួយអង្គតែមួយ ត្រូវមានចក្ខុវិស័យច្បាស់លាស់ ដើម្បីសុខុមាភាពប្រជាជន- គ្រប់អ្នកដឹកនាំ ចាប់ផ្តើមភារកិច្ចថ្មី ត្រូវបន្ថែមលើប្រវត្តិថ្មី បន្ថែមប្រវត្តិការងារចាស់ ដែលជាការចងចាំ ដល់អ្នកជំនាន់ក្រោយ- ថ្នាក់ដឹកនាំត្រូវនៅជាមួយមន្រ្តីរាជការ ដោយដើរជាមួយគ្នា កសាងជាមួយគ្នា និងទុក្ខលំបាកជាមួយគ្នា - លើកទឹកចិត្តឱ្យនៅតែជាអង្គតែមួយ នាំមានទឹកចិត្តទៅជាមួយគ្នា ហើយជំរុញឱ្យមានការទទួលលទ្ធផលល្អប្រកបមោទនភាព - ត្រូវចាំថា រាល់ការសម្រេចចិត្តរបស់យើង ត្រូវមានការគិតឱ្យបានម៉ត់ចត់ ភាពត្រឹមត្រូវ និងឆ្លុះបញ្ចាំងឱ្យមានភាពច្បាស់លាស់។សូមគូសរំលេចដែរ លោកវេជ្ជបណ្ឌិត តឹក សុភាព ជាប្រធានមន្ទីរសុខាភិបាលនៃរដ្ឋបាលខេត្តពោធិ៍សាត់ ដែលទទួលបានការតែងតាំងថ្មីពីរាជរដ្ឋាភិបាល ទទួលមុខតំណែងបន្តពី ឯកឧត្តមវេជ្ជបណ្ឌិត ខូយ ឌី ដែលបានចូលនិវត្តន៍ និងត្រូវទទួលភារកិច្ចថ្មី ជាអនុរដ្ឋលេខាធិការក្រសួងសុខាភិបាល៕អត្ថបទ រដ្ឋា

ពន្លាជាតិកម្ពុជា ទទួលបាន “ពានរង្វាន់សំរឹទ្ធ” លំដាប់ពិភពលោកផ្នែករចនា នាព្រឹត្តិការណ៍ពិព័រណ៍ពិភពលោក

ពន្លាជាតិកម្ពុជា ទទួលបានកិត្តិយសលើឆាកអន្តរជាតិ ដោយទទួលបាន ”ពានរង្វាន់សំរឹទ្ធ” លំដាប់ពិភពលោកផ្នែករចនាការតាំងបង្ហាញ ក្នុងក្រុមប្រភេទពន្លាជាតិប្រភេទ B និង X នាកម្មវិធីប្រគល់ពានរង្វាន់ កាលពីទី១២ ខែតុលា ឆ្នាំ២០២៥ ក្នុងព្រឹត្តិការណ៍ពិព័រណ៍ពិភពលោក ២០២៥ អូសាកា កាន់សៃ ប្រទេសជប៉ុន។ ព្រឹត្តិការណ៍នេះ ត្រូវបានរៀបចំឡើងដោយការិយាល័យពិព័រណ៍អន្តរជាតិ ក្នុងគោលបំណងដើម្បីប្រកាសនិងផ្តល់ពានរង្វាន់ដល់បណ្តាប្រទេសនិងអង្គការអន្តរជាតិដែលបានចូលរួម ដែលក្នុងនោះ មានពានរង្វាន់សរុបចំនួន ៤៩ (ពានរង្វាន់មាស ប្រាក់ និងសំរិទ្ធ ចំនួន ៤៥ និងពានរង្វាន់និរន្តរភាព ចំនួន ៤)។ សូមបញ្ជាក់ផងដែរថា ព្រឹត្តិការណ៍ពិព័រណ៍ពិភពលោកនេះ មានការចូលរួមពីបណ្តាប្រទេស និងអង្គការអន្តរជាតិផ្សេងៗ សរុបចំនួន ១៦៥ ហើយការវាយតម្លៃពានរង្វាន់នេះ ត្រូវបានធ្វើឡើងដោយការិយាល័យពិព័រណ៍អន្តរជាតិប្រកបដោយភាពសុក្រិតនិងតម្លាភាព ដែលក្នុងនោះប្រទេសចូលរួមផ្លូវការត្រូវផ្តល់ជូននូវឯកសារពាក់ព័ន្ធនឹងការវាយតម្លៃដូចជា៖ សេចក្ដីថ្លែងការណ៍ប្រធានបទ, គំនិតរចនា, ស្ថាបត្យកម្ម, ការរចនាខាងក្រៅ, ខ្លឹមសារ និងការអភិវឌ្ឍមូលបទ។ ក្នុងពេលវិនិច្ឆ័យមានពីរវគ្គ លើកទី១ កំណត់ចុះវាយតម្លៃនៅពន្លាជាតិកម្ពុជា ដែលមានគណៈវិនិច្ឆ័យចំនួន៩រូប និងលើកទី២ គណៈវិនិច្ឆ័យអញ្ជើញចុះមកពន្លាជាតិដោយមិនជូនដំណឹង។ នៅក្នុងព្រឹត្តិការណ៍ពិព័រណ៍រយៈពេល៦ខែនេះ កម្ពុជាបាន ជ្រើសរើស “ប្រាសាទកោះកេរ” ជាស្នូលក្នុងការសាងសង់ “ពន្លាជាតិ” ដែលឆ្លុះបញ្ចាំងពីការយកចិត្តទុកដាក់របស់កម្ពុជា ក្នុងការអភិរក្សបេតិភណ្ឌវប្បធម៌ ស្នាដៃស្ថាបត្យកម្ម និងសិល្បៈបុរាណខ្មែរ ដ៏សម្បូរបែប។ ព្រឹត្តិការណ៍ពិភពលោកនេះ ត្រូវបានបិទបញ្ចប់នៅថ្ងៃទី១៣ ខែតុលា ឆ្នាំ២០២៥ ក្រោមព្រះរាជាធិបតី ព្រះអង្គម្ចាស់ Akishino។ នាកម្មវិធីបិទនេះផងដែរ ក៏មានការប្រគល់ទង់ BIE ជូន ប្រទេសស៊ែបី ក្នុងការរៀបចំពិព័រណ៍អន្តរជាតិ Specialized Expo 2027 Belgrade និងប្រទេសជប៉ុន ក្នុងការរៀបចំពពិព័រណ៍អន្តរជាតិ International Horticultural Expo 2027 Yokohama ៕

ឯកឧត្ដម ហ៊ុន ម៉ានី លើកទឹកចិត្តដល់ក្រុមការងារចុះមូលដ្ឋានខេត្តកំពង់ស្ពឺ រៀបចំវេទិកាសាធារណៈ ស្ដាប់កង្វល់ប្រជាពលរដ្ឋ

តាមរយៈរបាយការណ៍នៃកិច្ចប្រជុំត្រីមាសទី៣ ឆ្នាំ២០២៥ និងលើកទិសដៅអនុវត្តបន្ត របស់ក្រុមការងាររាជរដ្ឋាភិបាលចុះមូលដ្ឋានខេត្តកំពង់ស្ពឺ នារសៀល ថ្ងៃទី១៣ ខែតុលា ឆ្នាំ២០២៥ នេះ ឯកឧត្ដម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានក្រុមការរាជរដ្ឋាភិបាលចុះមូលដ្ឋានខេត្តកំពង់ស្ពឺ បានលើកទឹកចិត្តដល់ក្រុមការងារចុះមូលដ្ឋានខេត្តកំពង់ស្ពឺ ឱ្យបន្តរៀបចំវេទិកាសាធារណៈ ដើម្បីជួបផ្ទាល់ជាមួយប្រជាពលរដ្ឋ ស្តាប់ពីកង្វល់ និងសំណូមពររបស់ពួកគាត់។ការជួបទាំងនេះ ក៏ជាឱកាសផ្សព្វផ្សាយកម្មវិធី និងគោលនយោបាយរបស់រាជរដ្ឋាភិបាលផង និងជាឱកាសពន្យល់បកស្រាយ និងផ្តល់ព័ត៌មានដែលចាំបាច់ និងមានអត្ថប្រយោជន៍ជូនដល់ប្រជាពលរដ្ឋនូវស្ថានភាពនៃការវិវត្តរបស់សង្គម រួមទាំងប្រធានបទផ្សេងៗ ដូចជាការផ្សព្វផ្សាយព័ត៌មាន ការទទួលព័ត៌មាន និងការវាយតម្លៃព័ត៌មានពិត ព័ត៌មានមិនពិត ព័ត៌មានក្លែងក្លាយ ឬព័ត៌មានញុះញង់ជាដើម ជៀសវាងការនាំមកនូវការភ័ន្តច្រឡំ ការបោកបញ្ឆោត ឬការបង្កនូវភាពវឹកវរនានា។ឯកឧត្ដម ហ៊ុន ម៉ានី បានផ្ដាំផ្ញើ ក្រុមការងារទាំងអស់ត្រូវបន្តតាមដានយកចិត្ត ទុកដាក់ និងត្រៀមលក្ខណៈដោះស្រាយបញ្ហាតាមមូលដ្ឋាននីមួយៗជាមួយស្ថានភាព និងការប្រឈមនានាចំពោះមុខដូចជាគ្រោះមហន្តរាយ គ្រោះទឹកជំនន់ កត្តាសន្តិសុខសង្គម និងភូមិឃុំមានសុវត្ថិភាពជាដើម។ ទន្ទឹមនេះ សូមក្រុមការងារបន្តសហការជាមួយអាជ្ញាធរមូលដ្ឋានជាប្រចាំ លើស្ថានភាព នៃការវិលត្រឡប់របស់បងប្អូនប្រជាពលរដ្ឋខ្មែរពីប្រទេសថៃ ហើយបន្តស្វែងរកការងារ និងដោះស្រាយបញ្ហាជូនពួកគាត់ឱ្យបានល្អប្រសើរ។គួរបញ្ជាក់ថា ឯកឧត្ដម ហ៊ុន ម៉ានី បានវាយតម្លៃខ្ពស់ និងសូមកោតសរសើរក្រុមការងារគ្រប់ជាន់ថ្នាក់ព្រមទាំងគណៈបញ្ជាការឯកភាពរដ្ឋបាលខេត្ត ក្រុង ស្រុក ឃុំ សង្កាត់ទាំងអស់ ដែលបានអនុវត្តការងារយ៉ាងសកម្មនូវគោលនយោបាយអាទិភាពទាំង៦ វិធានការគន្លឹះទាំង៥ និងការងារផ្សេងទៀតដែលគាំទ្រដល់ការអនុវត្តយុទ្ធសាស្ត្របញ្ចកោណដំណាក់ទី១ របស់រាជរដ្ឋាភិបាល ព្រមទាំងបានដោះស្រាយបញ្ហាជូនប្រជាជនជាបន្តបន្ទាប់៕

សម្តេចតេជោ ប្រាប់ប្រធាន JICA ថា ជំហររបស់កម្ពុជាគឺធ្វើយ៉ាងណាចង់ឱ្យដោះស្រាយបញ្ហាព្រំដែនកម្ពុជា-ថៃ ដោយសន្តិវិធី និងវិលត្រឡប់ទៅរកប្រក្រតីភាពឡើងវិញ

នៅវិមានព្រឹទ្ធសភា នារសៀល ថ្ងៃចន្ទ ៦រោច ខែអស្សុជ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី១៣ ខែតុលា ឆ្នាំ២០២៥ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានអនុញ្ញាតឱ្យឯកឧត្តម TANAKA Akihiko ប្រធានទីភ្នាក់ងារសហប្រតិបត្តិការអន្តរជាតិជប៉ុន (JICA) ចូលជួបសម្ដែងការគួរសម និងពិភាក្សាការងារ។ យោងតាម ឯកឧត្តម ជា ធីរិទ្ធ អ្នកនាំពាក្យព្រឹទ្ធសភា នៅក្នុងជំនួបនេះ សម្ដេចតេជោ ហ៊ុន សែន បានសម្ដែងនូវការស្វាគមន៍ចំពោះឯកឧត្តម TANAKA Akihiko និងសហការី ដែលបានអញ្ជើញមកបំពេញទស្សនកិច្ចនៅកម្ពុជា។ សម្ដេចបានបង្ហាញនូវក្តីរីករាយដែលបានជួបឯកឧត្តមជាថ្មីម្ដងទៀតបន្ទាប់ពីបានជួបគ្នាកាលពី១០ឆ្នាំមុន នៅពេលដែលឯកឧត្តមបានអញ្ជើញមកកាន់ព្រះរាជាណាចក្រកម្ពុជា ដើម្បីសម្ពោធស្ពានមិត្តភាព កម្ពុជា-ជប៉ុន អ្នកលឿង កាលពីឆ្នាំ២០១៥។ សម្ដេចតេជោសង្ឃឹមថា វត្តមានរបស់ឯកឧត្តមមកកាន់កម្ពុជាសារជាថ្មីនេះ នឹងបានឃើញពីការអភិវឌ្ឍ និងភាពរីកចម្រើនរបស់កម្ពុជា ជាពិសេសតាមរយៈការជួយជ្រោមជ្រែងរបស់ជប៉ុនក្នុងការអភិវឌ្ឍន៍ហេដ្ឋារចនាសម្ព័ន្ធនៅកម្ពុជា។ នៅក្នុងឱកាសនោះឯកឧត្តម TANAKA Akihiko បានសម្ដែងនូវក្តីរីករាយដែលបានជួបសម្ដេចតេជោសារជាថ្មី ហើយឯកឧត្តមបានលើកឡើងថា ១០ឆ្នាំមុន និងមកដល់ពេលបច្ចុប្បន្ននេះ ហាក់បីដូចជាលឿនណាស់។ ឯកឧត្តមក៏បានមើលឃើញពីការប្រែប្រួលរបស់ព្រះរាជាណាចក្រកម្ពុជាផងដែរ ហើយឯកឧត្តមបានសរសើរអំពីការអភិវឌ្ឍរីកចម្រើនរបស់កម្ពុជា។ ឯកឧត្តមបានបញ្ជាក់អំពីតួនាទីរបស់កម្ពុជាក្នុងការចូលរួមចំណែក ជាពិសេសការសហការជាមួយស៊ីម៉ាក់ក្នុងសកម្មភាពដោះមីននៅក្រៅប្រទេស រួមទាំងតួនាទីរបស់ JICA ក្នុងការជួយអភិវឌ្ឍហេដ្ឋារចនាសម្ព័ន្ធនៅកម្ពុជា ដូចជាការសាងសង់ស្ពានមិត្តភាព កម្ពុជា-ជប៉ុន ជ្រោយចង្វារ, ស្ពានគីសូណា, ស្ពានអ្នកលឿង, ការជួយកំពង់ផែស្វយ័តព្រះសីហនុ រួមទាំងផ្លូវជាតិមួយចំនួនដូចជាផ្លូវជាតិលេខ១ ផ្លូវជាតិលេខ៥ ជាដើម។ល។ សម្ដេចតេជោ ហ៊ុន សែន បានសម្ដែងនូវក្តីរីករាយ ចំពោះការចាប់អារម្មណ៍របស់ឯកឧត្តម នូវតួនាទីរបស់សម្ដេចកាលនៅជានាយករដ្ឋមន្ត្រី។ សម្ដេចតេជោក៏បានមានប្រសាសន៍ អំពីតួនាទីរបស់ JICA ដែលបានចូលរួមចំណែក ក្នុងការអភិវឌ្ឍន៍នៅព្រះរាជាណាចក្រកម្ពុជា និយាយជារួមតួនាទីរបស់ជប៉ុនក្នុងការជួយដល់ប្រទេសកម្ពុជានាពេលកន្លងមក។ សម្ដេចតេជោបានបញ្ជាក់ថាភាពរីកចម្រើននៅកម្ពុជាមិនអាចកាត់ផ្ដាច់បានឡើយនូវតួនាទីរបស់ជប៉ុន រាប់ទាំងការចូលរួមចំណែករកសន្តិភាពនៅកម្ពុជា រួមទាំងការចូលរួមចំណែកអភិវឌ្ឍន៍ប្រទេសជាតិ ។ សម្ដេចតេជោបានចែករំលែកនូវទស្សនៈទានមួយចំនួនដែលជាចក្ខុវិស័យ និងរំលឹកអំពីស្ថានភាពប្រវត្តិសាស្ត្រ និងការតស៊ូរបស់សម្ដេចក្នុងការរំដោះប្រទេសជាតិចេញពីរបបប្រល័យពូជសាសន៍ រួមទាំងការនាំកម្ពុជាមករកសន្តិភាពនៅចុងឆ្នាំ១៩៩៨ និងការអភិវឌ្ឍន៍ប្រទេសជាតិឱ្យមានការរីកចម្រើនជាបន្តបន្ទាប់។ ជាមួយគ្នានេះផងដែរសម្ដេចតេជោក៏បានជម្រាបជូនប្រធានJICA ពីស្ថានភាពព្រំដែន កម្ពុជា-ថៃ ដែលជំហររបស់កម្ពុជា គឺធ្វើយ៉ាងណាចង់ឱ្យដោះស្រាយបញ្ហាដោយសន្តិវិធី និងការវិលត្រឡប់ទៅរកប្រក្រតីភាពឡើងវិញ។ សម្ដេចតេជោក៏បានមានប្រសាសន៍លើកឡើងអំពីទំហំពាណិជ្ជកម្មរវាងប្រទេសទាំងពីរ កម្ពុជា-ជប៉ុន ដែលប្រទេសទាំងពីរគួរតែជំរុញបន្ថែមទៀត ក្នុងតួនាទីរបស់JICA ក្នុងការរួមចំណែកពង្រីកទំនាក់ទំនង នឹងទៅលើវិស័យសំខាន់ៗជាច្រើនទៀត រវាងកម្ពុជា និងជប៉ុន។ឯកឧត្តម TANAKA Akihiko បានសម្ដែងនូវក្តីរីករាយ និងអរគុណចំពោះសម្ដេចតេជោដែលបានមានប្រសាសន៍អំពីប្រវត្តិនៃការតស៊ូ នាំប្រទេសកម្ពុជាមករកសុខសន្តិភាព និងការរីកចម្រើន។ ឯកឧត្តមក៏បានរំលេចអំពីការពង្រីកកិច្ចសហប្រតិបត្តិការ ដែល JICA នឹងធ្វើបន្ថែមទៀត ជាមួយនឹងរាជរដ្ឋាភិបាលកម្ពុជា ហើយពាក់ព័ន្ធទៅនឹងបញ្ហាព្រំដែន ឯកឧត្តមសង្ឃឹមថា ភាគីទាំងពីរ នឹងអាចឈានទៅរកការដោះស្រាយបញ្ហាដោយសន្តិវិធីនៅពេលខាងមុខ ហើយស្ថានភាពទំនាក់ទំនងរវាងប្រទេសទាំងពីរ នឹងវិលមករកប្រក្រតីភាពឡើងវិញ ។ជាចុងក្រោយ សម្ដេចតេជោ ហ៊ុន សែន បានជូនពរឯកឧត្តម TANAKA Akihiko និងសហការី ឱ្យបំពេញទស្សនកិច្ចនៅព្រះរាជាណាចក្រកម្ពុជាប្រកបដោយភាពជោគជ័យ៕

ប្រជាពលរដ្ឋនៅស្រុកពាមជរ ទទួលបានផ្លូវក្រាលកៅស៊ូ ជាសមិទ្ធផលថ្មីក្នុងមូលដ្ឋានរបស់ពួកគាត់

ព្រៃវែង ៖ ប្រជាពលរដ្ឋនៅឃុំក្រាំងតាយ៉ង ស្រុកពាមជរ ខេត្តព្រៃវែង បានបង្ហាញនូវការសប្បាយរីករាយជាអនេក ចំពោះការយកចិត្តទុកដាក់ របស់រាជរដ្ឋាភិបាល លើការងារអភិវឌ្ឍន៍ផ្លូវនៅជនបទក្នុងមូលដ្ឋានពួកគាត់ ដែលនេះជាសមិទ្ធផលថ្មី ក្នុងការរួមលើកកម្ពស់ជីវភាព រស់នៅរបស់ប្រជាពលរដ្ឋ។ឯកឧត្តមបណ្ឌិត ចាន់ ដារ៉ុង រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ នៅថ្ងៃទី១៣ ខែតុលា ឆ្នាំ២០២៥នេះ បានដឹកនាំគណៈកម្មាការអន្តរក្រសួងរួមមាន ក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ ចុះត្រួតពិនិត្យ និងវាយតម្លៃ លទ្ធផលការងារលើកកម្រិតគុណភាពផ្លូវក្រាលកៅស៊ូពីរជាន់ (DBST) ចំនួន១ខ្សែ ប្រវែង ២ ៧០០ ម៉ែត្រ, ទទឹង ៦ ម៉ែត្រ, សាងសង់លូមូលមុខពីរចំនួន២កន្លែង និងលូមូលមុខមួយ ចំនួន ៤ កន្លែង ស្ថិតនៅភូមិពងទឹក ទៅ ភូមិក្រាំងតាយ៉ង ឃុំក្រាំងតាយ៉ង ស្រុកពាមជរ ខេត្តព្រៃវែង, ក្នុងនោះប្រជាពលរដ្ឋដែលរស់នៅក្នុងមូលដ្ឋានខាងលើនេះ បានសម្តែង នូវការសប្បាយរីករាយ និងថ្លែងនូវការដឹងគុណជានិច្ចចំពោះរាជរដ្ឋាភិបាល ដែលតែងតែគិតគូរ និងយកចិត្តទុកដាក់អភិវឌ្ឍន៍នៅតាម តំបន់ជនបទ ជាក់ស្តែងការទទួលបានផ្លូវក្រាលកៅស៊ូពីរជាន់ (DBST) នាពេលនេះ គឺជាសមិទ្ធផលថ្មីនៅក្នុងមូលដ្ឋានរបស់ពួគគាត់។ឯកឧត្តមរដ្ឋលេខាធិការ លើកឡើងបន្តថា ជុំវិញការអភិវឌ្ឍន៍នៅតាមជនបទនេះ ក្រសួងអភិវឌ្ឍន៍ជនបទដែលជាសេនាធិការ របស់រាជរដ្ឋាភិបាល បាននិងកំពុងផ្ដោតការយកចិត្តទុកដាក់យ៉ាងខ្លាំង នៅលើការងារស្ថាបនាហេដ្ឋារចនាសម្ព័ន្ធនានានៅតាមមូលដ្ឋាន ជាក់ស្តែងផ្លូវជនបទជាច្រើនដូចជា ផ្លូវដីស ផ្លូវល្បាយក្រួស ផ្លូវកៅស៊ូពីរជាន់ និងផ្លូវក្រាលបេតុង ដែលស្ថិតនៅក្រោមក្របខណ្ឌក្រសួង អភិវឌ្ឍន៍ជនបទ បានកំពុងផ្តល់ប្រយោជន៍ដល់ប្រជាជនក្នុងសហគមន៍មូលដ្ឋាន និងសាធារណជនទូទៅ មានផ្លូវល្អសម្រាប់ធ្វើដំណើរ និងការរកស៊ីទទួលទានផ្សេងៗ ដែលមានភាពប្រទាក់ក្រឡា ដោយបានបង្កើតជាបរិយាកាសអំណោយផលដល់ការរស់នៅរបស់ ប្រជាពលរដ្ឋនៅក្នុងសង្គម។ជុំវិញផ្លូវខាងលើនេះ, ឯកឧត្តមរដ្ឋលេខាធិការ បានកោតសរសើរដល់នាយកដ្ឋានស្ថាបនា និងវិស្វកម្ម នៃអគ្គនាយកដ្ឋាន ភស្តុភារ និងហិរញ្ញវត្ថុ ក្រសួងមហាផ្ទៃ ដែលបានខិតខំប្រែងនៅលើការងារស្ថាបនាផ្លូវនេះ សម្រេចបានប្រកបដោយគុណភាព, ព្រោះ ផ្លូវមានសារៈសំខាន់ណាស់ មិនថាផ្លូវមួយខ្សែនេះ ឬបណ្តាញផ្លូវផ្សេងៗទៀតនោះឡើយ ដែលនេះគឺជាការចូលរួមចំណែកលើកកម្ពស់ ការរស់នៅរបស់ប្រជាពលររដ្ឋនៅតាមមូលដ្ឋាន ស្របតាមការយកចិត្តទុកដាក់របស់ក្រសួងអភិវឌ្ឍន៍ជនបទ និងការអភិវឌ្ឍរបស់ រាជរដ្ឋាភិបាល៕អត្ថបទ៖ សុន រ៉ាឌី

អ្នកនាំពាក្យក្រសួងព័ត៌មាន៖ មហោស្រពភាពយន្តខ្នាតខ្លីចតុមុខបានរួមចំណែកអភិវឌ្ឍវិស័យសិល្បៈភាពយន្ត និងលើកកម្ពស់សេរីភាពបញ្ចេញមតិនៅកម្ពុជា

ភ្នំពេញ៖ ឯកឧត្តម ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មានបានចាត់ទុកមហោស្រពភាពយន្តខ្នាតខ្លីចតុមុខ បានរួមចំណែកអភិវឌ្ឍវិស័យភាពយន្ត ព្រមទាំងចូលរួមលើកកម្ពស់សិទ្ធិសេរីភាពបញ្ចេញមតិ និងការផ្សព្វផ្សាយនៅកម្ពុជា។ ថ្លែងក្នុងសន្និសីទសារព័ត៌មានស្តីពីមហោស្រពភាពយន្តខ្នាតខ្លីចតុមុខ នាព្រឹកថ្ងៃទី១៣ ខែតុលា ឆ្នាំ២០២៥ នៅរោងភាពយន្ត Fable ឯកឧត្តម ទេព អស្នារិទ្ធ តំណាង ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានមានប្រសាសន៍ថា មហោស្រពភាពយន្តខ្នាតខ្លីអនុញ្ញាត និងបង្កឱកាសដល់ដៃគូ ភាគីពាក់ព័ន្ធ ពិសេសអ្នកមានចំណូលចិត្តស្រលាញ់ផ្នែកផលិតកម្មភាពយន្តមកជួបគ្នា ហើយប្រើប្រាស់ទម្រង់សិល្បៈភាពយន្តខ្នាតខ្លីនេះជាមធ្យោបាយសម្រាប់ការបញ្ចេញមតិយ៉ាងទូលំទូលាយ ដើម្បីឆ្លុះបញ្ចាំងទិដ្ឋភាពនានាក្នុងសង្គម តាមរយៈការលើកយកប្រធានបទតថភាពពិតក្នុងសង្គម ហើយផលិតជាខ្សែសាច់រឿងខ្លីៗ សម្រាប់ការប្រកួតប្រជែង និងការចូលរួមបង្ហាញដល់សាធារណជនជាតិ និងអន្តរជាតិ។ឯកឧត្តមបានមានប្រសាសន៍បន្ថែមថា មហោស្រពភាពយន្តខ្នាតខ្លីចតុមុខ បានផ្តល់ឱកាសដល់យុវជនក្នុងការបញ្ចេញគំនិត ទស្សនៈ ទេពកោសល្យ និងការប្រើប្រាស់បច្ចេកទេសចម្រុះ រួមចំណែកលើកកម្ពស់សិទ្ធិសេរីភាពនៃការបញ្ចេញមតិ និងការផ្សព្វផ្សាយ ស្របតាមសេចក្តីត្រូវការក្នុងយុគសម័យឌីជីថល និងការវិវត្តសង្គម។ក្នុងឱកាសនោះដែរ ឯកឧត្តមបានថ្លែងកោតសរសើរដល់ការរៀបចំឱ្យមានមហោស្រពនេះឡើង ជាមួយនឹងសមិទ្ធផលជាច្រើនអស់រយៈពេល១៣ឆ្នាំកន្លងទៅ ដែលបានប្រមូលស្នាដៃប្រមាណជិត១ពាន់ចំណងជើង ក្នុងនោះមានមកពីកម្ពុជាផ្ទាល់ និងប្រទេសនានាលើពិភពលោក ហើយការវិវត្តចូលឆ្នាំទី១៤របស់មហោស្រពមួយនេះ បាន និងកំពុងទាក់ទាញការចូលរួមពីសំណាក់ផលិតករកម្ពុជា ពិសេសក្នុងចំណោមយុវវ័យ និងមកពីបណ្តាប្រទេសជាង២០លើពិភពលោក។ ឯកឧត្តម ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន៖ «ទាំងនេះជាគុណតម្លៃរបស់មហោស្រពភាពយន្តខ្នាតខ្លីចតុមុខគឺ មិនត្រឹមផ្តល់សារៈប្រយោជន៍រួមចំណែកក្នុងសង្គមនិងវិស័យសិល្បៈភាពយន្តប៉ុណ្ណោះទេ តែមហោស្រពក៏បានចូលរួមពង្រឹងទំនាក់ទំនងរវាងកម្ពុជា ជាមួយបណ្តាប្រទេសនៅលើពិភពលោកថែមទៀត ពិសេសតាមរយៈការផ្លាស់ប្តូរបទពិសោធន៍ គំនិត និងសិល្បៈនៃការច្នៃប្រឌិតដ៏សម្បូណ៍បែប»។ ជាមួយនឹងសមិទ្ធផលទាំងនេះ ឯកឧត្តមបានប្រៀបប្រដូចមហោស្រពនេះថាជាច្រកទ្វារមួយដ៏សំខាន់ធ្វើឱ្យពិភពលោកស្គាល់អត្តសញ្ញាណជាតិ និងស្គាល់កម្ពុជាដែលពោរពេញដោយសក្តានុពលកាន់តែច្បាស់៖ ពោលគឺតាមរយៈភាពយន្តនេះសហគមន៍ជាតិ និងអន្តរជាតិបានស្គាល់កាន់តែច្បាស់នូវឧត្តមភាព អត្តសញ្ញាណជាតិ វប្បធម៌ សីលធម៌ ប្រជាជន ព្រមទាំងសក្តានុពលរបស់យុវជនកម្ពុជា យុវផលិតករដែលពោរពេញដោយសមត្ថភាពនិងថាមពល។ឯកឧត្តមបានស្នើដល់កម្មវិធីមហោស្រពសម្រាប់ឆ្នាំខាងមុខទៀត ក្រៅពីផ្តោតលើរឿងបែបមនោសញ្ចេតនា រន្ធត់ កម្សាន្ត ភាពជូរចត់ គួរដាក់បញ្ចូលអក្ខរកម្មឌីជីថលតួយ៉ាងការបញ្ជ្រាបការអប់រំអំពីគ្រោះថ្នាក់នៃការប្រើប្រាស់បណ្តាញសង្គម ដោយសារការសាយភាយព័ត៌មានក្លែងក្លាយ ការបង្ហាញក្នុងសាច់រឿងអំពីរបៀបនៃការផ្ទៀងផ្ទាត់ព័ត៌មានមុនជឿលើព័ត៌មានណាមួយពីបណ្តាញសង្គម ដើម្បីចូលរួមប្រឆាំងព័ត៌មានក្លែងក្លាយក្នុងសង្គមឌីជីថល និងលើកកម្ពស់ការប្រើប្រាស់បណ្តាញសង្គមដោយការទទួលខុសត្រូវជាពលរដ្ឋឌីជីថលល្អ។ ជាមួយគ្នានេះ ឯកឧត្តមបានលើកទឹកចិត្តដល់ផលិតករទាំងអស់ ឱ្យផ្តោតផងដែរលើការផលិតរឿងលើប្រធានបទបំណិនជីវិត ដោយរំលេចរបៀបនៃការសម្រេចចិត្តត្រឹមត្រូវប្រកបដោយការទទួលខុសត្រូវ សម្រាប់ជីវិត ការជ្រើសរើសអាជីព និងការការគ្រប់គ្រងហិរញ្ញ ភាពជាអ្នកដឹកនាំវត្ថុជាដើម។លោក ហួយ សុជាតិ អនុប្រធាននាយកដ្ឋាន សិល្ប:ភាពយន្ត និងផ្សព្វផ្សាយវប្បធម៌ នៃក្រសួងវប្បធម៌ និងវិចិត្រសិល្បៈបានគាំទ្រ ចំពោះមហោស្រពភាពយន្តខ្នាតខ្លីចតុមុខនេះ ព្រោះបានចូលរួមលើកកម្ពស់វិស័យភាពយន្តនៅកម្ពុជា ជាពិសេសបើកឱកាសយុវជនបានបញ្ចេញស្នាដៃផលិតភាពយន្តកាន់តែច្រើន។ លោកស៊ុ ស៊ីថែន ប្រធានគម្រោងមហោស្រពភាពយន្តខ្លីចតុមុខ មានប្រសាសន៍ថា មហោស្រពភាពយន្តខ្លីចតុមុខមានសារៈសំខាន់ណាស់សម្រាប់ប្រទេសកម្ពុជា។ មហោស្រពភាពយន្តខ្លីចតុមុខ ជាកម្មវិធីប្រកួតប្រជែងភាពយន្តខ្នាតខ្លី ដើម្បីរួមចំណែកធ្វើឱ្យគុណភាពនៃភាពយន្តនៅកម្ពុជា ប្រសើរឡើង។ មហោស្រពនេះបានអនុញ្ញាតឱ្យផលិតករខ្មែរអភិវឌ្ឍខ្លួនទាំងផ្នែកគំនិត និងបច្ចេកទេសជំនាញក្នុងការផលិត ប្រកបដោយភាពច្នៃប្រឌិតទាន់សម័យកាល ហើយពីមួយឆ្នាំទៅមួយឆ្នាំស្នាដៃរបស់ផលិតករខ្មែរមានការវិវត្តឈានឡើងគួរឱ្យកត់សម្គាល់ ព្រមទាំងបានការទទួលស្គាល់ទាំងកម្រិតជាតិ និងអន្តរជាតិ។ លោកបានមានប្រសាសន៍មហោស្រពលើកទី១៤នេះនឹងចូលរួមចំណែកដ៏សំខាន់ធ្វើឱ្យអន្តរជាតិបានស្គាល់ច្បាស់បន្ថែមទៀតពីសមត្ថភាព និងភាពធន់កម្ពុជា ព្រមទាំងសក្តានុពលនៃវិស័យភាពយន្តកម្ពុជាដែលមានភាពរីកចម្រើនឥតឈប់ឈរ។

បណ្ដាញសង្គម

ព័ត៌មានថ្មីៗ

លោក Trump៖ អ៊ីរ៉ង់កំពុងធ្វើការងារមិនល្អដើម្បីអនុញ្ញាតឱ្យប្រេងឆ្លងកាត់ច្រកសមុទ្រ Hormuz

រុស្ស៊ី និងអ៊ុយក្រែនយល់ព្រមលើបទឈប់បាញ់សម្រាប់ថ្ងៃបុណ្យ Easter នៅចុងសប្តាហ៍នេះ

អាមេរិកនឹងធ្វើជាម្ចាស់ផ្ទះការពិភាក្សាលីបង់-អ៊ីស្រាអែល ខណៈការវាយប្រហារគំរាមកំហែងដល់បទឈប់បាញ់អ៊ីរ៉ង់

កសិករបង់ក្លាដែសជួបការលំបាកហិរញ្ញវត្ថុ ស្របពេលវិបត្តិអ៊ីរ៉ង់បង្កឲ្យមានវិបត្តិប្រេងឥន្ធនៈ

អនុរដ្ឋមន្រ្តីការបរទេសអ៊ីរ៉ង់៖ អាមេរិកគួរជំរុញអ៊ីស្រាអែលឲ្យគោរពបទឈប់បាញ់

មនុស្ស ៤នាក់ស្លាប់ ពេលជនអន្តោប្រវេសន៍ព្យាយាមឡើងជិះទូកនៅជិតតំបន់ឆ្នេរភាគខាងជើងបារាំង

មន្ត្រីអ៊ីរ៉ង់ព្រមានថា ការវាយប្រហាររបស់អ៊ីស្រាអែលលើលីបង់ បង្កហានិភ័យដល់កិច្ចព្រមព្រៀងបទឈប់បាញ់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877