នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
អនុប្រធានទី២រដ្ឋសភា ចែករំលែកបទពិសោធនៃការរៀបចំគោនយោបាយគាំពាសង្គម ដល់និវត្តជននៃអគ្គលេខាធិការដ្ឋានដ្ឋានរដ្ឋសភា
ក្រុមប្រឹក្សាធម្មនុញ្ញប្រារព្ធពិធីសូត្រមន្តចម្រើនសិរីមង្គល ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ
ខែមីនា ឆ្នាំ២០២៦នេះ កម្ពុជាទទួលបានការចុះបញ្ជីតាមប្រព័ន្ធ CamDX មានទុនវិនិយោគ ២៩៤ លានដុល្លារ
ក្រុមការងារអន្តរក្រសួងចុះពិនិត្យផ្ទៀងផ្ទាត់ទីតាំងត្រៀមរៀបចំពិធីបើកការដ្ឋានសាងសង់គម្រោងគ្រប់គ្រងធនធានទឹកចម្រុះហ្វូណនតេជោ កំណាត់ទី២ នៅថ្ងៃទី១១ ខែមេសានេះ ក្រោមអធិបតីភាពសម្ដេចធិបតី

ព័ត៌មានជាតិ

កាកបាទក្រហមកម្ពុជា រត់ប្រណាំងចម្ងាយ ៥គីឡូម៉ែត ដើម្បីអបអរសាទរទិវាពិភពលោកសង្គ្រោះបឋម២០២៥

2025/10/12 04:22:19 pm        341
Facebook Telegram Linkin
កាកបាទក្រហមកម្ពុជា ក្រោមម្លប់គង់ប្រថាប់ដ៏ឧត្តុង្គឧត្តមនៃ សម្តេចព្រះមហាក្សត្រី ព្រះវររាជមាតាជាតិខ្មែរ ជាព្រះប្រធានកិត្តិយស និងមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន កាលពីព្រឹកថ្ងៃទី១២ ខែតុលា ឆ្នាំ២០២៥ បានរៀបចំកម្មវិធីរត់ប្រណាំងចម្ងាយ ៥គីឡូម៉ែត ដើម្បីអបអរសាទរទិវាពិភពលោកសង្គ្រោះបឋម ២០២៥ ក្រោមប្រធានបទ«រត់ដើម្បីសុខភាព សន្តិភាព និងការប្រែប្រួលអាកាសធាតុ» ដែលមានអ្នកចុះឈ្មោះចូលរួមប្រកួតប្រមាណជិត៨០០នាក់ ។កម្មវិធីនេះត្រូវបានប្រារព្ធធ្វើឡើងនាសួនច្បារជិតសណ្ឋាគារសុខាភ្នំពេញ ក្នុងខណ្ឌជ្រោយចង្វារ រាជធានីភ្នំពេញ ក្រោមអធិបតីភាពលោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា ព្រមទាំងវត្តមានអញ្ជើញចូលរួមពីឯកឧត្តម លោកជំទាវ លោក លោកស្រី ថ្នាក់ដឹកនាំ មន្ត្រីនៃទីស្នាក់ការកណ្តាល តំណាងក្រុមហ៊ុនដែលបានចូលរួមឧបត្ថម្ភ យុវជនកាកបាទក្រហមកម្ពុជា និងអ្នកចូលរួមប្រកួតប្រមាណជិត៨០០នាក់។ គោលបំណងនៃការប្រារព្ធពិធីនេះគឺដើម្បីលើកកម្ពស់ការយល់ដឹង និងការចូលរួមរបស់សហគមន៍លើការអនុវត្តសង្គ្រោះបឋមអាយុជីវិត និងផលប៉ះពាល់នៃការប្រែប្រួលអាកាសធាតុ ជាមួយនឹងការកៀរគរមូលនិធិដើម្បីគាំទ្រសេវាកម្មមនុស្សធម៌ និងកម្មវិធីកសាងភាពធន់។ លើកទឹកចិត្តដល់របៀបរស់នៅដែលមានសុខភាពល្អ បង្កើនការយល់ដឹងជា សាធារណៈអំពីការឆ្លើយតបគ្រាមានអាសន្ន និងបង្កើនធនធានដើម្បីពង្រឹងសមត្ថភាពក្នុងសហគមន៍ក្នុងការត្រៀមរៀប បង្ការ ឆ្លើយតបគ្រោះមហន្តរាយ(ទឹកជំនន់ ជម្លោះប្រដាប់អាវុធនៅតាមព្រំដែន និងអន្តរាគមន៍ផ្នែកសុខភាព។ លើកកម្ពស់ការយល់ដឹងអំពីសារៈសំខាន់នៃចំណេះដឹងសង្គ្រោះបឋម និងការប្រែប្រួលអាកាសធាតុ។ លើកទឹកចិត្តដល់អត្តពលិក គ្រូបង្វឹក និងអ្នកចូលចិត្តកីឡាគ្រប់វ័យ ឱ្យឆ្លងកាត់វគ្គបណ្តុះបណ្តាល បច្ចេកទេសសង្គ្រោះ បឋម និងបច្ចេកទេសធ្វើ CPR។ លើកកម្ពស់ឱ្យបានទូលំទូលាយ និងផ្តល់លទ្ធភាពប្រើប្រាស់ម៉ាស៊ីនឆក់បេះដូងខាងក្រៅដោយស្វ័យប្រវត្តិ (AEDs) នៅ ក្នុងកន្លែងកីឡា។ លើកទឹកចិត្តយុវជន និងអ្នកស្ម័គ្រចិត្តកាកបាទ ក្រហមកម្ពុជាឱ្យចូលរួមក្នុងសកម្មភាពសង្គ្រោះបឋម និងការប្រែប្រួល អាកាសធាតុ និងជួយសង្គ្រោះជីវិតមនុស្សបានទាន់ពេល។ មានមតិបើកកម្មវិធី លោកជំទាវអគ្គលេខាធិការ បានពាំនាំប្រសាសន៍ពី សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ផ្តាំផ្ញើសួរសុខទុក្ខដោយក្តីនឹករលឹក ថ្វីបើលោកមិនបានអញ្ជើញមកចូលរួមជាមួយយើងទាំងអស់គ្នាក៏ដោយ ក៏ទឹកចិត្តនិងមនោសញ្ចេតនា នៅជាមួយយើងគ្រប់គ្នា និងជានិច្ចកាលឧបត្ថម្ភគាំទ្រ កាកបាទក្រហមកម្ពុជា ឱ្យមានដំណើរការល្អ អាចឆ្លើយតប បានទាន់ពេលវេលាចំពោះប្រជាពលរដ្ឋងាយរងគ្រោះដែលត្រូវការឱ្យជួយ។ លោកជំទាវ ជម្រាបជូនថា អត្ថន័យនៃទិវាដ៏មានសារៈសំខាន់នៃទិវាពិភពលោកសង្គ្រោះបឋម គឺជាទិវាដែលគ្រប់សមាគមជាតិ កាកបាទក្រហម និងអឌ្ឍចន្ទក្រហម នៅលើពិភពលោកត្រូវតែប្រារព្វឡើង ដើម្បីផ្សព្វផ្សាយលើកកម្ពស់ នឹងទទួលស្គាល់ថា ជំនាញចំណេះដឹងវិជ្ជាសង្រ្គោះបឋមនេះ ជាជំនាញនិងចំណេះដឹងដ៏មានសារៈប្រយោជន៍ខ្លាំងណាស់ ចំពោះមនុស្សជាតិ ព្រោះការផ្តល់សេវាសង្គ្រោះបឋមជាទង្វើរបស់មនុស្សជាតិ ដែលផ្តល់អំណាចឱ្យយើងម្នាក់ៗ ក្នុងការជួយសង្គ្រោះជីវិត នៅពេលដែលមិនមានពេទ្យ ឬមុនពេលបញ្ជូនទៅដល់មន្ទីរពេទ្យ។ ជាមួយគ្នានេះ ដើម្បីអបអរ ទិវាពិភពលោក សង្គ្រោះបឋម ឆ្នាំ២០២៥នេះ កាកបាទក្រហមកម្ពុជា សូមលើកយកតែជំនាញ ធ្វើចលនាបេះដូងពីខាងក្រៅ(ស៊ីភីអរ) មួយមុខគត់ មកបង្ហាញអំពីបច្ចេកទេសជាក់ លាក់ ត្រឹមត្រូវ ដើម្បីចូលរួមកាត់បន្ថយអត្រាស្លាប់ភ្លាមៗ ដោយគាំងបេះដូង។ ទន្ទឹមនឹងនេះ គឺជាការលើកកម្ពស់សុខភាព និងពង្រឹងភាពធន់សហគមន៍ ព្រោះសុខភាពជាទ្រព្យសម្បត្តិ ដ៏ឧត្តុង្គឧត្តមរបស់មនុស្សជាតិ មនុស្សម្នាក់ៗ បុគ្គលម្នាក់ៗ នៅលើពិភពលោក។ មានភាពធន់សហគមន៍ គឺមានន័យថា បុគ្គលម្នាក់ៗទទួលខុសត្រូវលើសុខភាពដោយខ្លួនឯង គឺការពារខ្លួន មិនឱ្យមានជំងឺមិនឆ្លង ដែលជាជំងឺអាចការពារបានដល់ទៅ ៨០% មានដូចជា៖ ជំងឺទឹកនោមផ្អែម, ជំងឺឡើងសម្ពាធឈាម និងជំងឺបេះដូងសរសៃឈាម ជំងឺមហារីក និងជំងឺផ្លូវចិត្ត និងការញៀនគ្រឿងញៀន។ បន្ថែមលើនេះ ដើម្បីឱ្យមានភាពធន់សហគមន៍ គឺសហគមន៍មួយទទួលខុសត្រូវលើការងារគ្រប់គ្រងគ្រោះមហន្តរាយ រួមទាំងសុខភាពផងដោយខ្លួនឯង ដោយចេះទុកដាក់ថែរក្សាបរិស្ថានស្អាត បរិស្ថានបៃតង ចេះទុកដាក់សំរាម ចេះចូលរួមកាត់បន្ថយ និងបញ្ចប់ការបំពុលដោយផ្លាស្ទិក ដោយចូលរួមយុទ្ធនាការ “ថ្ងៃនេះ ខ្ញុំមិនប្រើថង់ផ្លាស្ទិកទេ” “កម្ពុជាស្អាត ខ្មែរធ្វើបាន” និង“ពន្លកបៃតង” ជាដើម។ល។ លើសពីនេះទៀត លោកជំទាវបានគូសបញ្ជាក់ថា ថ្ងៃនេះយើងជ្រើសយកមូលបទសន្តិភាព ព្រោះប្រជាជនកម្ពុជាគ្រប់រូបត្រូវការសន្តិភាពស្មើអាយុជីវិត សម្រាប់កម្ពុជាសន្តិភាពទាំងផ្លូវកាយនិងផ្លូវចិត្ត កាន់តែមិនអាចខ្វះបានឡើយ កីឡារស់ក្នុងសន្តិភាព។ ដូចនេះ ការរត់នៅថ្ងៃនេះ គឺដើម្បីកាយសម្បទាផង លើកកម្ពស់ការចូលរួមការពារសន្តិភាពផង និងដើម្បីបរិស្ថានផង។សូមបញ្ជាក់ អ្នករត់ដល់ទីមុនគេទទួលបានវត្ថុអនុស្សាវរីយ៍ពីកាកបាទក្រហមកម្ពុជា សម្រាប់ជ័យលាភីផ្នែកនារី គឺលេខ១ទទួលបានពានមាស១ ក្រមា១ ពែង១ កញ្ចប់សង្គ្រោះបឋម១ ថង់ កក្រក ១ និងថវិកា១០ម៉ឺនរៀល។ លេខ២ទទួលបានពានប្រាក់១ ក្រមា១ ពែង១ កញ្ចប់សង្គ្រោះបឋម១ ថង់ កក្រក ១ និងថវិកា១០ម៉ឺនរៀល។ និងលេខ៣ ទទួលបានពានសំរិទ្ធ១ ក្រមា១ ពែង១ កញ្ចប់សង្គ្រោះបឋម១ ថង់កក្រក ១ និងថវិកា១០ម៉ឺនរៀល។ ចំពោះជ័យលាភីផ្នែកបុរសគឺទទួលបានដូចជ័យលាភីនារីដែរ គឺលេខ១ ទទួលបានពានមាស១ ក្រមា១ ពែង១ កញ្ចប់សង្គ្រោះបឋម១ ថង់ កក្រក ១ និងថវិកា១០ម៉ឺនរៀល។ លេខ២ ទទួលបានពានប្រាក់១ ក្រមា១ ពែង១ កញ្ចប់សង្គ្រោះបឋម១ ថង់ កក្រក ១ និងថវិកា១០ម៉ឺនរៀល។ និងលេខ៣ ទទួលបានពានសំរិទ្ធ១ ក្រមា១ ពែង១ កញ្ចប់សង្គ្រោះបឋម១ ថង់កក្រក ១ និងថវិកា១០ម៉ឺនរៀល។ សូមរំលឹកផងដែរ ការរៀបចំទិវាពិភពលោកសង្គ្រោះបឋមឆ្នាំនេះ អាចប្រារព្ធទៅបាន អាស្រ័យដោយមានការឧបត្ថម្ភគាំទ្រពី ធនាគារពាណិជ្ជកម្មក្រៅប្រទេសនៃកម្ពុជា FTB, ក្រុមហ៊ុន FUTURE FOCUS SOLUTIONS & PHARMA CO.,LTD , KOI Thé Cambodia (ខយ តេ កម្ពុជា) , TUBE COFFEE (ធ្យូបកាហ្វេ), ក្រុមហ៊ុនត្រូពិខេមហ្វ៊្រត អេនវេជីថេបល (ចេកពិសិទ្ធ), ក្រុមPOCARI SWEAT, ក្រុមហ៊ុន វ័ន ហ្វ្រេតធើនីធី (វីតាល់), ទឹកបរិសុទ្ធឱរ៉ាល់, និងក្លឹបរត RUTT និងកិច្ចសហការពីអាជ្ញាធរខណ្ឌជ្រោយចង្វារ ដែលបានផ្តល់ទីកន្លែង រៀបចំសន្តិសុខ សណ្តាប់ធ្នាប់ និង អនាម័យ៕ អត្ថបទ: សំ ងីម

កសិករអ្នកចិញ្ចឹមជ្រូក៣៨គ្រួសារនៅសហគមន៍កសិកម្មចំណារលើរីកចម្រើនស្រុកស្ទោងទទួលបានជំនួយឥតសំណង ៣២៥០០ដុល្លារ ពីគម្រោង CASDP

2025/10/12 04:12:33 pm        301
Facebook Telegram Linkin
ជំនួយឥតសំណងចំនួន ៣២៥០០ដុល្លារ ត្រូវបានផ្តល់ជូនដល់បងប្អូនកសិករអ្នកចិញ្ចឹមជ្រូក៣៨គ្រួសារ មកពីសហគមន៍កសិកម្មចំណារលើរីកចម្រើន ស្រុកស្ទោង ខេត្តកំពង់ធំ តាមរយៈគម្រោងពិពិធកម្មកសិកម្មកម្ពុជា(CASDP)នៃក្រសួងកសិកម្ម សម្រាប់គាំទ្រជាទុនបដិភាគដល់ការទិញឧបករណ៍សម្ភារៈផលិតកម្មកូនជ្រូក និងជ្រូកសាច់ ដូចជា៖ សម្ភារៈសាងសង់ទ្រុងជ្រូក ម៉ាស៊ីនវ៉ៃកន្ទក់ ម៉ូទ័រហាន់ដើមចេក ម៉ូទ័របូមទឹក សម្ភារៈដាក់ចំណីជ្រូក និងមេ-បាជ្រូក។ នេះបើតាមឯកឧត្តម ឃឹម ហ្វីណង់ អ្នកនាំពាក្យក្រសួងកសិកម្ម។ ឯកឧត្តម ឃឹម ហ្វីណង់ បានឱ្យដឹងថា មរយៈផែនការពង្រឹងសមត្ថភាពផលិតកម្មនិងបង្កើនប្រសិទ្ធភាពសេដ្ឋកិច្ច ដែលគាំទ្រដោយគម្រោង CASDP សហគមន៍ដែលមានសមាជិកភាគច្រើនជាស្ត្រីនេះ គ្រោងនឹងផលិតកូនជ្រូកយ៉ាងតិច២០០០ក្បាល និងជ្រូកសាច់ជិត៧០០០ក្បាល ក្នុងរយៈពេល៣ឆ្នាំខាងមុខ។ សហគមន៍ក៏គ្រោងនឹងប្រែក្លាយខ្លួនទៅជាសហគមន៍កសិកម្មទំនើបក្នុងពេលអនាគត ដោយសិក្សាពិនិត្យលទ្ធភាពទិញធាតុចូលរួមគ្នា ផលិតពូជកូនជ្រូករួមគ្នាដើម្បីផ្គត់ផ្គង់ដល់សមាជិកយកទៅចិញ្ចឹម និងចុះកិច្ចសន្យាតភ្ជាប់ទីផ្សារទុកជាមុនផងដែរ៕

កសិករ៣១គ្រួសារនៅសហគមន៍កសិកម្មអូរកន្ធរមានជ័យខេត្តកំពង់ធំ ទទួលបានជំនួយឥតសំណង ៥៣០០០ដុល្លារពីគម្រោងពិពិធកម្មកសិកម្មកម្ពុជា (CASDP)

2025/10/12 03:57:21 pm        282
Facebook Telegram Linkin
កំពង់ធំ៖ អបអរសាទរដល់បងប្អូនកសិករចំនួន ៣១គ្រួសារ មកពីសហគមន៍កសិកម្មអូរកន្ធរមានជ័យ នៅខេត្តកំពង់ធំ ដែលទទួលបានជំនួយឥតសំណងក្នុងទំហំទឹកប្រាក់ប្រមាណ ៥៣០០០ ដុល្លារ ពីគម្រោងពិពិធកម្មកសិកម្មកម្ពុជា (CASDP) សម្រាប់គាំទ្រជាទុនបដិភាគដល់ការទិញឧបករណ៍សម្ភារៈផលិតកម្មមួយចំនួន ដើម្បីអាចផលិតស្រូវពូជលក់បាន ដូចជា៖ ម៉ាស៊ីនច្រូត គោយន្ត ម៉ាស៊ីនប៉ូមទឹក ម៉ាស៊ីនព្រួសស្រូវ និងម៉ាស៊ីនស្ទូងស្រូវជាដើម។ នេះបើតាមឯកឧត្តម ឃឹម ហ្វីណង់ អ្នកនាំពាក្យក្រសួងកសិកម្ម។ ឯកឧត្តម ឃឹម ហ្វីណង់ បានឱ្យដឹងថា តាមផែនការ សហគមន៍នេះគ្រោងនឹងប្រែក្លាយខ្លួនជាក្រុមមួយ ស្ថិតក្រោមរចនាសម្ព័ន្ធនៃសហគមន៍កសិកម្មទំនើបអភិវឌ្ឍដំណាំស្រូវកំពង់ធំ ដែលជាសហគមន៍ទំនើបដែលមានស្រាប់នៅក្នុងតំបន់តែមួយ។ ជាមួុយនឹងការវិនិយោគថ្មីនេះ សហគមន៍នឹងមានសមត្ថភាពផលិតពូជសុទ្ធប្រភេទសែនក្រអូបនិងស្រង៉ែក្នុងបរិមាណប្រមាណជាង១០០០តោន ដោយផ្តោតលើការផ្គត់ផ្គង់ស្រូវពូជផ្ទាល់ដល់សហគមន៍កសិកម្មទំនើបតែម្តង។ បើតាម ឯកឧត្តម ឃឹម ហ្វីណង់ គម្រោងពិពិធកម្មកសិកម្មកម្ពុជា(CASDP) គឺជាកម្មវិធីរបស់ក្រសួងកសិកម្ម និងគាំទ្រថវិកាហិរញ្ញប្បទានដោយធនាគារពិភពលោក ដែលផ្តល់ទុនបដិភាគរហូតដល់៤០%ដល់សហគមន៍កសិកម្មនិងសមាជិក ដើម្បីគាំទ្រដល់ការវិនិយោគលើមុខរបរអាជីវកម្មរបស់ខ្លួន៕

ឯកឧត្ដម វង្សី វិស្សុត អញ្ជើញសម្ពោធជាផ្លូវការមន្ទីរពិសោធន៍នវានុវត្តន៍ខេត្តកំពង់ធំ (InnoLab Kampong Thom)

2025/10/12 03:40:21 pm        189
Facebook Telegram Linkin
កំពង់ធំ៖ កាលពីរសៀលថ្ងៃទី១១ ខែតុលា ឆ្នាំ២០២៥ ឯកឧត្តម វង្សី វិស្សុត ឧបនាយករដ្ឋមន្រ្តីប្រចាំការ រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំអញ្ជើញជាអធិបតីក្នុងពិធីសម្ពោធជាផ្លូវការ «គម្រោងមន្ទីរពិសោធន៍នវានុវត្តន៍កំពង់ធំ (InnoLab Kampong Thom)» ដោយរួមជាមួយនឹងការប្រកាសជាផ្លូវការនូវបេក្ខជនទាំង២០រូប ដែលជាសហគ្រិនក្នុងខេត្តកំពង់ធំ និងដែលត្រូវបានជ្រើសរើសដើម្បីផ្តល់ការបណ្តុះបណ្តាល និងបន្តធ្វើការប្រកួតប្រជែងក្នុងវគ្គបន្ត នៅក្នុងក្របខ័ណ្ឌគម្រោង។ ឯកឧត្តមឧបនាយករដ្ឋមន្រ្តីប្រចាំការ វង្សី វិស្សុត បានសម្តែងនូវការវាយតម្លៃខ្ពស់ចំពោះមូលនិធិអភិវឌ្ឍន៍ជំនាញ សហគ្រិនខ្មែរ ក៏ដូចជាឧទ្យាននវានុវត្តន៍សង្គមអង្គរ និងរដ្ឋបាលខេត្តកំពង់ធំ ព្រមទាំងភាគីពាក់ព័ន្ធទាំងអស់ ដែលបានរួមចំណែកធ្វើឱ្យ «មន្ទីរពិសោធន៍នវានុវត្តន៍កំពង់ធំ (InnoLab Kampong Thom)» លេចចេញជារូបរាងឡើង ដែលមានគោលដៅប្រែក្លាយខេត្តកំពង់ធំទៅជាប្រព័ន្ធអេកូឡូស៊ីនវានុវត្តន៍មួយ ដែលជាទីតាំងសម្រាប់សហគ្រិន អ្នកច្នៃប្រឌិត អ្នកស្រាវជ្រាវ និងមន្ត្រីចាប់ពីថ្នាក់មូលដ្ឋាន តាមរយៈការបញ្ចូលនវានុវត្តភាពទៅក្នុងប្រព័ន្ធទីផ្សារ និងប្រព័ន្ធអភិបាលកិច្ចនៅកម្ពុជា និងបង្ហាញអំពីសក្ដានុពលដែលមានក្នុងស្រុក ដើម្បីអនុញ្ញាតឱ្យសហគមន៍បានចូលរួមចំណែកក្នុងការសម្រេចបាននូវវឌ្ឍនភាព ប្រកបដោយនវានុវត្តន៍ ចីរភាព និងនិរន្តរភាព ស្របតាមគោលនយោបាយរបស់រាជរដ្ឋាភិបាល។ឯកឧត្តម វង្សី វិស្សុត បានលើកឡើងថា រាជរដ្ឋាភិបាលកម្ពុជាបានដាក់ចេញយុទ្ធសាស្រ្តចតុកោណ ទាំង៤ ដំណាក់កាល និងយុទ្ធសាស្រ្តបញ្ចកោណ ដែលផ្តោតទៅការកសាងប្រព័ន្ធអេកូឡូស៊ី ដើម្បីគាំទ្រដល់ការអភិវឌ្ឍសហគ្រាសធុនតូច និងមធ្យម (SMEs) ម្ខាងដើម្បីបង្កើនកម្លាំងផលិត និងម្ខាងទៀតជួយដោះស្រាយបញ្ហាធំៗដែល SMEs កំពុងប្រឈម រួមមានបញ្ហាហិរញ្ញវត្ថុ បញ្ហាបច្ចេកវិទ្យានិងជំនាញ និងបញ្ហាការគ្រប់គ្រង។ ឯកឧត្តមឧបនាយករដ្ឋមន្ត្រីប្រចាំការ បានបន្តថា នៅក្នុងសេដ្ឋកិច្ចរបស់យើង គឺសម្បូរតែសហគ្រាសខ្នាតធំ និងខ្នាតតូច ក៏ប៉ុន្តែសហគ្រាសធុនមធ្យមឬកណ្តាល មិនសូវមានឡើយ ដែលធ្វើឱ្យការវិនិយោគផ្ទាល់ពីបរទេស មិនសូវមានការតភ្ជាប់មកសេដ្ឋកិច្ចក្នុងស្រុក។ឯកឧត្តម វង្សី វិស្សុត បានគូសបញ្ជាក់ថា ក្នុងស្មារតីខាងលើនេះ រាជរដ្ឋាភិបាលបានខិតខំផ្គុំគោលនយោបាយជាច្រើន ទាំងគោលនយោបាយលើកទឹកចិត្តអ្នកវិនិយោគដែលផ្សារភ្ជាប់នឹង SMEs និងការកសាងសមត្ថភាព SMEs ដើម្បីផ្សារភ្ជាប់នឹងការវិនិយោគផ្ទាល់ពីបរទេស។ ជាក់ស្តែង រាជរដ្ឋាភិបាលក៏បានបង្កើត និងដាក់ឱ្យដំណើរការជាបន្តបន្ទាប់នូវមូលនិធិអភិវឌ្ឍន៍ជំនាញ, សហគ្រិនខ្មែរ, មជ្ឈមណ្ឌលបណ្តុះធុរកិច្ចថ្មី «តេជោ», មូលនិធិអភិវឌ្ឍន៍សហគ្រិនភាព, ធនាគារសហគ្រាសធុនតូច និងមធ្យម និងកម្មវិធីថ្នាលថ្នាក់ជាតិស្ដីពីធុរកិច្ចកម្ពុជា ថ្នាលផ្លាស់ប្ដូរទិន្នន័យកម្ពុជា (CamDX) និងប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន ព្រមទាំងការដាក់ឱ្យដំណើរការនូវគេហទំព័រព័ត៌មាន សម្រាប់សហគ្រាសធុនតូច និងមធ្យម (Khmer SME) ដើម្បីគាំទ្របន្ថែមដល់ការអភិវឌ្ឍប្រព័ន្ធអេកូឡូស៊ីសហគ្រិនភាព នៅកម្ពុជាទាំងមូល។ ឯកឧត្តមឧបនាយករដ្ឋមន្រ្តីប្រចាំការ បានបន្តថា ជារួមយើងបាន​និង​កំពុង​សម្រេច​បាន​នូវ​វឌ្ឍន​ភាព​ជា​ច្រើន ក៏ប៉ុន្តែក៏នៅមានភាពខ្វះចន្លោះខ្លះ ដែលទាមទារឱ្យយើងត្រូវបំពេញបន្ថែម ដូចជា​គម្រោង​មន្ទីរពិសោធន៍នវានុវត្តន៍កំពង់ធំ ដែលយើងសម្ពោធជាផ្លូវការនាពេលនេះ សំដៅ​ធ្វើ​យ៉ាង​ណា​ឱ្យ​ប្រព័ន្ធអេកូឡូស៊ីរបស់យើងមានភាពពេញលេញ និងគ្រប់ជ្រុងជ្រោយ ដើម្បីគាំទ្រ​ដល់​សហគ្រាស​ផលិត និងបញ្ហារៀបចំផលិតទៅដល់ទីផ្សារ ពិសេសនវានុវត្តន៍មានទាំងខាងផលិត ខាង​សេវាកម្ម ទាំងខាងដំណើរការធុរកិច្ច ដើម្បីឱ្យមានថ្លៃថោក និងផលិតទៅមានគុណភាពល្អ។ ប៉ុន្តែ​ដើម្បីមានវានុវត្តន៍ត្រូវមានកត្តាបី៖ ទី១.ការប្រើប្រាស់បច្ចេកវិទ្យាឌីជីថល ទី២.ការរៀបចំ និង​ការ​ស្រាវ​ជ្រាវម៉ូដែលធុរកិច្ច (Business Model) និង ទី៣.សហគ្រិនភាព។ កត្តាទាំង​បី​នេះ​បូក​បញ្ចូល​គ្នា បានចេញជានវានុវត្តន៍។ ឯកឧត្តម វង្សី វិស្សុត បានលើកឡើងផងដែរថា គម្រោងមន្ទីរពិសោធន៍នវានុវត្តន៍កំពង់ធំ (InnoLab Kampong Thom) នឹងជួយសម្រួលដល់បេក្ខជនទាំង២០រូប ឱ្យទៅមុខ និងចូលដល់កម្រិតនវានុវត្តន៍ តាមរយៈការបណ្តុះបណ្តាល និងការផ្សារភ្ជាប់ទៅបណ្តាញទីផ្សារ ទៅក្នុងប្រព័ន្ធអេកូឡូស៊ី។ លទ្ធផលនេះនឹងឈានទៅដល់ការបង្កើតសហគ្រាសដែលមានសមត្ថភាពឱ្យបានកាន់តែច្រើនក្នុងខេត្តកំពង់ធំ ដែលយើងហៅថាមេទ័ពក្នុងវិស័យឯកជនក្នុងការផលិត ការផ្ដល់សេវា និងការកសាងការងាររបស់ប្រជាជននៅទីនេះ ដែលជាការបង្កើតទ្រព្យ និងការបង្កើតមូលដ្ឋានសេដ្ឋកិច្ចរបស់ខេត្តកំពង់ធំ ឱ្យក្លាយជាកម្លាំងសេដ្ឋកិច្ចក្នុងស្រុក។ ឯកឧត្តមមានជំនឿជឿជាក់ថា គម្រោងនេះនឹងបង្ហាញពីភាពជោគជ័យនៃម៉ូដែលធុរកិច្ច (Business Model) ដែលកន្លែងផ្សេងអាចយកធ្វើជាគំរូ និងអនុវត្តតាម។ឯកឧត្តមឧបនាយករដ្ឋមន្រ្តីប្រចាំការ ក៏បានផ្តល់ការណែនាំឱ្យឧទ្យាននវានុវត្តន៍សង្គមអង្គរ (ASIP) គួរបង្កើតឱ្យមានយន្តការត្រួតពិនិត្យ និងវាយតម្លៃ (M&E) គម្រោង ហើយរដ្ឋបាលខេត្ត និង​មន្ទីរពាក់ព័ន្ធត្រូវផ្ដល់កិច្ចសហការ គាំទ្រ និងសម្របសម្រួលនានា ដើម្បី​ធានា​ដល់​ការ​អនុវត្ត​គម្រោង​នេះ​ប្រព្រឹត្តទៅដោយជោគជ័យ ព្រមទាំងបានលើកទឹកចិត្តដល់ SDF, KE និង​ដៃគូ​ភាគី​ពាក់​ព័ន្ធ ដោយរួមទាំងវិស័យឯកជន ដើម្បីគាំទ្រ​ការ​អនុវត្ដ​គម្រោង​មន្ទីរ​ពិសោធន៍​នវា​នុវត្ដន៍​កំពង់ធំ បន្តចំនួន ២ឆ្នាំបន្ថែមទៀត និងនៅឆ្នាំបន្តបន្ទាប់ និង​បន្ដ​កិច្ចគាំទ្រ​សកម្ម​ភាព​វគ្គ​បណ្តុះ​បណ្ដាល​ឱ្យ​ឡើង​ដល់ចំនួន១០០សហគ្រាស នៅក្នុងឆ្នាំ២០២៨៕ 

ចូលរួមគាំទ្រផលិផលខ្មែរ! បន្លែ ផ្លែឈើ ត្រីសាច់ ជាច្រើនមុខ បាននិងកំពុងដាក់លក់ក្នុងស្តង់ ផ្សារ​ផលិតផល​ខ្មែរខេត្តតាកែវ

2025/10/12 03:32:20 pm        182
Facebook Telegram Linkin
ផ្សារផលិតផលខ្មែរខេត្តតាកែវ បាននិងកំពុងដំណើរលក់កសិផល និងផលិតផលខ្មែរ ដែល​បាន​ដាំដុះ និងកែច្នៃដោយកសិករ ផលិតករ និងសិប្បករខ្មែរ នៅក្នុងខេត្តតាកែវ នៅរៀងរាល់ថ្ងៃសៅរ៍-អាទិត្យ ចាប់ពីម៉ោង ៦៖៣០ព្រឹក ដល់ម៉ោង១៨៖០០ល្ងាច ដែលមានទីតាំង​នៅបរិវេន​សួនច្បារ​មាត់​បឹងតាកែវ ទល់មុខមហោស្រពខេត្តតាកែវ។ សូមបញ្ជាក់ថា ក្រោមការដឹកនាំ និងការគាំទ្ររបស់ក្រសួងពាណិជ្ជកម្ម និងការ​សម្រប​សម្រួល​ផ្តល់​ទីតាំង​របស់រដ្ឋបាលខេត្ត មន្ទីរពាណិជ្ជកម្មខេត្តតាកែវ ក្រោមគម្រោង​ជំរុ​ញ​ទីផ្សារ​សម្រាប់​កសិកម្ម​ខ្នាត​តូច (AIMS) នៃក្រសួងពាណិជ្ជកម្ម បានរៀបចំ និងដាក់​ឲ្យ​ដំណើរ​ការ​ផ្សារ​លក់​ផលិត​ផល​ខ្មែរ ចាប់តាំងពីឆ្នាំ២០១៩ រហូតមកដល់បច្ចុប្បន្ន។ ផ្សារផលិតផលខ្មែរនេះ មានគោលបំណងផ្ដល់ឱកាសទីផ្សារបន្ថែមដល់កសិករ ផលិតករ​អាជីវករ​ខ្នាត​តូច​ ជាតំណាងពីក្រុមកសិករផលិត និងជាការតភ្ជាប់ទំនាក់ទំនងទីផ្សារឱ្យកាន់តែប្រសើរ ដល់​ក្រុម​ផលិតដែលអាចរកប្រាក់ចំណូល និងលើកកម្ពស់ជីវភាពរស់នៅពួកគេ។ ការចូលរួមលើកកម្ពស់ និងប្រើប្រាស់ផលិតផលខ្មែរ ជាការ​រួម​ចំណែក​បង្កើន​ផលិត​ភាព​ផលិត​ផលក្នុ​ង​ស្រុក បង្កើនប្រាក់ចំណូល និងលើកស្ទួយជីវភាពប្រជាជន និងជំរុញអភិវឌ្ឍន៍សេដ្ឋកិច្ច-សង្គម​ឲ្យកាន់តែប្រសើរឡើង។ សូមចូលរួមគាំទ្រផ្សារផលិផលខ្មែរ ដើម្បីលើកស្ទួយជីវភាពកសិករ និង​ផលិតករខ្មែរ៕  ស្វែងរកទីតាំងផ្សារផលិតផលខ្មែរខេត្តតាកែវ៖ https://maps.app.goo.gl/G8E4td1cw2gWxPTZ6?g_st=ipc

គ.ស.ម.ក.៖ សមាជិកព្រឹទ្ធសភាថៃបានជំរុញឱ្យក្រសួងការបរទេសថៃ​ពិនិត្យមើល​ករណី​ការប្រើប្រាស់សំឡេងរំខាន បំភិតបំភ័យ និងយាយីផ្លូវចិត្តពីយោធាថៃដល់ប្រជាជនកម្ពុជា

2025/10/12 03:10:54 pm        221
Facebook Telegram Linkin
ក្រោយពីបានឃើញញត្តិបន្ទាន់របស់ គណៈកម្មាធិការសិទ្ធិមនុស្សកម្ពុជា (គ.ស.ម.ក.) ដាក់​បណ្តឹង​ទៅ ឧត្តមស្នងការអង្គការសប្រជាជាតិទទួលបន្ទុកសិទ្ធិមនុស្ស (OHCHR) នៅទី​ក្រុង​ហ្សឺណែវ ប្រទេសស្វីស ពាក់ព័ន្ធទៅនឹងការប្រើប្រាស់សំឡេងរំខាន បំភិតបំភ័យ និងយាយី​ផ្លូវ​ចិត្ត​ដល់​ប្រជាជនកម្ពុជានៅភូមិព្រៃចាន់ និងភូមិជោគជ័យ ឃុំអូរបីជាន់ ស្រុកអូរជ្រៅ ខេត្ត​បន្ទាយ​មាន​ជ័យ​ នៅថ្ងៃទី១២ ខែតុលានេះ លោកជំទាវ Angkhana Neelapaijit សមាជិកព្រឹទ្ធសភាថៃ បាន​ជំរុញ​ឱ្យក្រ​សួងការបរទេសថៃ ពិនិត្យមើលករណីយនេះ។ តាមសេចក្ដីជូនដំណឹងរបស់ គណៈកម្មាធិការសិទ្ធិមនុស្សកម្ពុជា (គ.ស.ម.ក.) យោងតាម​កាសែត ​Khaosod English ចុះថ្ងៃទី១២ ខែតុលា ឆ្នាំ២០២៥ អំពីការលើកឡើងរបស់ លោក​ជំទាវ Angkhana Neelapaijit សមាជិកព្រឹទ្ធសភាប្រទេសថៃ ចំពោះញត្តិបន្ទាន់របស់ គ.ស.ម.ក. ប្តឹងទៅឧត្តមស្នងការអង្គការសប្រជាជាតិទទួលបន្ទុកសិទ្ធិមនុស្ស (OHCHR) ពាក់ព័ន្ធ​នឹងការប្រើប្រាស់ សំឡេងរំខាន ដែលជាទម្រង់នៃការបំភិតបំភ័យ និងយាយីផ្លូវចិត្ត នៅតាម​បណ្តោយព្រំដែនកម្ពុជា-ថៃ ពីសំណាក់កងទ័ពថៃ កាលពីថ្ងៃទី១១ ខែតុលា ឆ្នាំ២០២៥។គ.ស.ម.ក. បានដកស្រង់ខ្លឹមសារទាំងស្រុងរបស់ លោកជំទាវ Angkhana Neelapaijit សមាជិក​ព្រឹទ្ធ​សភា​ប្រទេសថៃដោយបានបញ្ជាក់ថា៖«រាជរដ្ឋាភិបាលថៃ គួរតែបាន​ដឹង​ថា​រាល់​សកម្មភាព​ទាំង​ឡាយ​ណា​បង្ក​ឱ្យ​មានអារម្មណ៍ភ័យខ្លាច ឬប៉ះពាល់ដល់ផ្លូវចិត្តរ​បស់​ប្រជាជន​ទោះ​បី​ជា​អ្នក​ស្ថិត​ក្នុង​ស្ថានភាពជម្លោះក៏ដោយ ជាពិសេសក្រុមងាយរងគ្រោះ ដែលអាច​ជា​ការ​ធ្វើ​ទារុណ​កម្ម​ផ្លូវ​ចិត្ត​ក្រោម​អនុសញ្ញាប្រឆាំងទារុណកម្ម និងការប្រព្រឹត្តមកលើខ្លួន ឬទណ្ឌកម្ម ឯទៀតដែល​ឃោរ​ឃៅ ​អមនុស្សធម៌ ឬបន្ថោកបន្ទាប (CAT) ដែលប្រទេសថៃជារដ្ឋភាគី។ លោកជំទាវ បានជំរុញ​ឱ្យ​ក្រសួង​ការ​បរទេសរបស់ប្រទេសថៃ ពិនិត្យមើលលើករណីដែលជនល្បីឈ្មោះតាមបណ្តាញសង្គម បាន​ប្រើ​ប្រាស់សំឡេងខ្មោច នៅតាមព្រំដែនថៃចូលទៅក្នុងប្រទេសកម្ពុជា»៕

គណៈកម្មាធិការសិទ្ធិមនុស្សកម្ពុជាដាក់ញត្តិបន្ទាន់ទៅការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សករណីការប្រើប្រាស់សំឡេងរំខានរបស់យោធាថៃមកលើប្រជាជនកម្ពុជានៅភូមិជោគជ័យ និងភូមិព្រៃចាន់

2025/10/12 02:19:05 pm        300
Facebook Telegram Linkin
ភ្នំពេញ៖ គណៈកម្មាធិការសិទ្ធិមនុស្សកម្ពុជា (គ.ស.ម.ក.) នៅថ្ងៃទី១១ ខែតុលា ឆ្នាំ២០២៥ គណៈកម្មាធិការសិទ្ធិមនុស្សកម្ពុជា បានដាក់ញត្តិបន្ទាន់ជូនចំពោះ ឯកឧត្តម Volker Türk ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សនៅទីក្រុងហ្សឺណែវ ប្រទេសស្វីស ពាក់ព័ន្ធនឹងការប្រើប្រាស់សំឡេងរំខាន ដែលជាទម្រង់នៃការបំភិតបំភ័យ និងយាយីផ្លូវចិត្ត នៅតាមបណ្តោយព្រំដែនកម្ពុជា-ថៃ ពីសំណាក់កងទ័ពថៃ និងបានអញ្ជើញឧត្តមស្នងការអង្គការសហប្រជាជាតិចុះមកសង្កេតការណ៍ដោយផ្ទាល់អំពីការរំលោភសិទ្ធិមនុស្សពីសំណាក់យោធាថៃ។គ.ស.ម.ក. បានជម្រាបទៅ ឯកឧត្តម Volker Türk ថា នៅថ្ងៃទី១០ ខែតុលា ឆ្នាំ២០២៥ គ.ស.ម.ក. បានទទួលរបាយការណ៍ពីអាជ្ញាធរមូលដ្ឋាន និងប្រជាជនរស់នៅក្នុងភូមិព្រៃចាន់ និងភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដោយបានអះអាងថា កងយោធាថៃបានចាក់សំឡេងខ្មោចលងតាមរយៈឧបករណ៍បំពងសំឡេងដែលឮខ្លាំងៗចាប់ពីម៉ោង ១០ និង៤៤ នាទី រសៀលរហូតដល់ម៉ោង ១២ និង៤នាទី កណ្តាលអធ្រាត្រ និងបានបន្តចាក់សំឡេងរំខានជាសំឡេងយន្តហោះពីម៉ោង ៣ និង ២២នាទី រហូតដល់ម៉ោង ៣ និង៥៣ នាទី ទាបភ្លឺដោយមានគោលបំណងរំខាន និងបំភ័យប្រជាជនកម្ពុជា ដែលរស់នៅក្នុងសហគមន៍ក្បែរៗនោះ។ សំឡេងទាំងនេះ ត្រូវបានចាត់ទុកជាសំឡេងខ្លាំង និងមានកម្រិតខ្ពស់ក្នុងរយៈពេលយូរបានបង្កជាការរំខានដល់ ការទទួលទានដំណេក ធ្វើឱ្យថប់អារម្មណ៍ និងបង្កឱ្យមានការមិនសុខស្រួលផ្លូវកាយដល់ប្រជាជនរស់នៅ ក្នុងតំបន់នោះរួមទាំងស្ត្រី កុមារ ចាស់ជរា ជនមានពិការភាព និងអ្នកជំងឺ។ គ.ស.ម.ក.បានបញ្ជាក់ថា សកម្មភាពបែបវិទ្ធង្សនា និងបង្កហេតុទាំងនេះ មិនត្រឹមតែបង្កគ្រោះថ្នាក់ដល់ផ្លូវកាយ និងផ្លូវចិត្តរបស់ប្រជាជនកម្ពុជានោះទេ ថែមទាំងជាការគំរាមកំហែង និងបង្កើនភាពតានតឹងរវាងប្រទេសទាំងពីរទៀតផង។ សកម្មភាពទាំងនេះមិនគួរមានក្នុងសង្គមដែលមានអរិយធម៌ និងផ្ទុយទាំងស្រុងទៅនឹងគោលការណ៍នៃធម្មនុញ្ញអង្គការសហប្រជាជាតិ ដែលប្រកាន់ខ្ជាប់សន្តិភាព សិទ្ធិមនុស្ស និងការគោលរពអធិបតេយ្យភាពរគ្នាទៅវិញទៅមកក្នុងចំណោមប្រជាជាតិទាំងអស់។គ.ស.ម.ក.បានបញ្ជាក់ថា សកម្មភាពខាងលើ គឺជាការរំលោភ យ៉ាងធ្ងន់ធ្ងរនូវស្មារតីកិច្ចព្រមព្រៀងស្តីពីបទឈប់បាញ់រវាង កម្ពុជានិងថៃ នៅថ្ងៃទី២៨ ខែកក្កដា ឆ្នាំ២០២៥ គោលការណ៍ព្រមព្រៀង ១៣ចំណុច នៃកិច្ចប្រជុំ វិសាមញ្ញរបស់គណៈកម្មាធិការកិច្ចការព្រំដែនទូទៅរវាងកម្ពុជានិងថៃ នៅថ្ងៃទី៧ ខែសីហា ឆ្នាំ២០២៥ និង បណ្តាលិខិតុបករណ៍សិទ្ធិមនុស្សអន្តរជាតិផ្សេងៗទៀត។តាមរយៈសកម្មភាពរំលោភបំពានសិទ្ធិមនុស្សយ៉ាងធ្ងន់ធ្ងរបែបនេះ គ.ស.ម.ក. បានស្នើសុំ ឯកឧត្តម Volker Türk ផ្តួចផ្តើមការស៊ើបអង្កេតជាបន្ទាន់អំពីការប្រើប្រាស់សំឡេងរំខាន ដោយកងទ័ពថៃ នៅតាមបណ្តោយព្រំដែន កម្ពុជា-ថៃ និងធានាឱ្យមានការទទួលខុសត្រូវចំពោះការរំលោភបំពានច្បាប់សិទ្ធិមនុស្សនេះ។ អំពាវនាវឱ្យបញ្ឈប់គ្រប់សកម្មភាពដែលគំរាមកំហែងផ្លូវចិត្តរបស់ប្រជាជនកម្ពុជាជា ពិសេសការប្រើប្រាស់សំឡេងរំខាននៅពេលយប់អាធ្រាតុ។ ធានាការការពារនិងការផ្តល់ជំនួយវេជ្ជសាស្ត្រ និងផ្លូវចិត្តចាំបាច់ផ្សេងៗ ដល់ជនរងគ្រោះ រួម ទាំងស្ត្រី កុមារ និងមនុស្សចាស់។ លើកទឹកចិត្តក្នុងការពង្រឹងកិច្ចសន្ទនាតាមព្រំដែនរវាងកម្ពុជានិងថៃ ដើម្បីទប់ស្កាត់ការកើត ឡើងវិញនូវភាពតានតឹង និងប្រកាន់ខ្ជាប់ការគោរពតាមស្មារតីកិច្ចព្រមព្រៀងស្តីពីបទ ឈប់បាញ់រវាងកម្ពុជានិងថៃ នៅថ្ងៃទី២៨ ខែកក្កដា ឆ្នាំ២០២៥ គោលការណ៍ព្រមព្រៀង ១៣ចំណុច នៃកិច្ចប្រជុំវិសាមញ្ញរបស់គណៈកម្មាធិការកិច្ចការព្រំដែនទូទៅរវាងកម្ពុជានិងថៃ។ ជាមួយគ្នានេះ គ.ស.ម.ក. ក៏បានអញ្ជើញឯកឧត្តម Volker Türk ចុះមកសង្កេតការណ៍ដោយផ្ទាល់ឱ្យបានឆាប់រហ័សបំផុតនៅតំបន់ព្រំដែនកម្ពុជា-ថៃ ដែលត្រូវបានរាយការណ៍អំពីការរំលោភសិទ្ធិមនុស្សយ៉ាងធ្ងន់ធ្ងរ។ គ.ស.ម.ក. នឹងធានារ៉ាប់រងរាល់ការចំណាយ និងសម្របសម្រួលជាមួយនឹងអាជ្ញាធរពាក់ព័ន្ធទាំងអស់។ ខណៈបេសកកម្មនេះ នឹងអនុញ្ញតឱ្យ OHCHR ចុះសង្កេតការណ៍ដោយផ្ទាល់អំពីស្ថានភាពនៅក្នុងតំបន់នោះនិងចូលរួមក្នុងការការពារសិទ្ធិមនុស្សនិងគោលការណ៍មនុស្សធម៌នៅនឹងកន្លែង។គ.ស.ម.ក. គូសបញ្ជាក់ថា សកម្មភាពគំរាមកំហែង ការយាយី ឬការប្រព្រឹត្តបែបឃោរឃៅ អមនុស្សធម៌ និងបន្ទាបបន្ថោកចំពោះប្រជាជនកម្ពុជា គឺមិនអាចទទួលយកបានឡើយ ទោះស្ថិតក្រោម កាលៈទេសៈណាក៏ដោយ។ ខណៈប្រទេសកម្ពុជានៅតែប្រកាន់ខ្ជាប់ដោយឥតងាករេចំពោះសិទ្ធិមនុស្ស អធិបតេយ្យភាព និងសន្តិភាព ស្របតាមច្បាប់អន្តរជាតិ។ ប៉ុន្តែ សកម្មភាពដោយបំពាននិងយាយីមកលើប្រជាជន គឺមិនអាចលើកលែង ឱ្យបានឡើយ។ គ.ស.ម.ក. នៅតែប្តេជ្ញាចិត្ត ក្នុងកិច្ចសហប្រតិបត្តិការជាមួយនឹងឯកឧត្តម ព្រមទាំងសហការី ឯកឧត្តម ក្នុងការដោះស្រាយបញ្ហា និងការពារសិទ្ធិមនុស្សរបស់ប្រជាជនស្លូតត្រង់រស់នៅតាមតំបន់ព្រំដែន កម្ពុជា-ថៃ៕

នាយឧត្តមសេនីយ សៅ សុខា ជំរុញមន្ត្រីគណបក្សបន្តឧបត្ថម្ភគ្រួសារ​វីរយុទ្ធជនដែល​ឈរជើងនៅ​សមរភូមិមុខ

2025/10/12 01:59:56 pm        292
Facebook Telegram Linkin
ឯកឧត្តម នាយឧត្តមសេនីយ៍ សៅ សុខា អនុប្រធានក្រុមការងារគណបក្សប្រជាជនកម្ពុជា​ចុះជួយ​ខេត្តស្វាយរៀង និងប្រធានក្រុមការងារ ចុះជួយស្រុក ស្វាយទាប បានជំរុញនឹងណែនាំដល់មន្ត្រី​គណបក្ស ត្រូវបន្តឧបត្តម្ភទាំង ស្មារតី គ្រឿងឧបភោគ បរិភោគ ថវិកា ជូនដល់គ្រួសារ ឪពុក ម្តាយ របស់ វីរយុទ្ធជន ដែលរស់នៅតាមមូលដ្ឋានក្នុងស្រុកដើម្បីផ្តល់កម្លាំងចិត្តជូនដល់ វីរយុទ្ធជន​ដែលកំពុងឈរការពាររក្សាទឹកដីពីចោរឈ្លានពាន។ឯកឧត្តម នាយឧត្តមសេនីយ៍ សៅ សុខា ថ្លែងបែបនេះក្នុងឱកាសអញ្ជើញប្រជុំបូកលទ្ធផលសកម្មភាពការងាររបស់គណបក្សចុះជួយស្រុក ត្រីមាសទី៣ ឆ្លងទិសដៅអនុវត្តបន្តនៅត្រីមាសទី៤ ឆ្នាំ២០២៥ និងប្រកាសក្រុមការងារចុះជួយស្រុក នៅស្រុកស្វាយទាប ខេត្តស្វាយរៀងថ្ងៃទី១១ ខែតុលា ឆ្នាំ២០២៥នេះដោយមានការអញ្ជើញចូលរួមពី ឯកឧត្តម លោកជំទាវ លោក លោកស្រី ជាក្រុមការងារថ្នាក់កណ្ដាលចុះ ជួយឃុំគោលដៅ និងមន្ត្រីនៅក្នុងគណបក្សស្រុក ឃុំប្រមាណជាង២០០នាក់ផងដែរ។ក្នុងនាមប្រធានក្រុមការងារចុះជួយខេត្ត ឯកឧត្តមបានសម្ដែងនូវការកោតសរសើរ ចំពោះមន្ត្រីក្រុមការងារថ្នាក់កណ្ដាល ថ្នាក់ខេត្ត ថ្នាក់ស្រុក និងឃុំ ដែលកន្លងបានចូលរួមអនុវត្តគោលនយោបាយគណបក្ស ឆ្ពោះទៅអភិវឌ្ឍន៍មូលដ្ឋានបានល្អលើគ្រប់វិស័យ ពិសេសជីវភាពពលរដ្ឋត្រូវបានលើកកំពស់ រួមនិងមធ្យោបាយសម្ភារៈប្រើប្រាស់ផងដែរ ។ទន្ទឹមក្នុងនោះដែរ ឯកឧត្តម នាយឧត្តមសេនីយ៍ក៏បានណែនាំដល់មន្ត្រីបក្សគ្រប់ឋានានុក្រមបន្តដឹកនាំពលរដ្ឋ អនុវត្តគោលនយោបាយភូមិឃុំមានសុវត្ថិភាព ដើម្បីរក្សាភាពសុខសាន្តភូមិឋាន ពិសេសឆ្លើយតបរាល់សេវាតម្រូវការដែលពលរដ្ឋស្នើសុំតាម   រយៈរៀបចំវេទិការពន្យល់ ជូនពលរដ្ឋ អោយអស់កង្វល់លើសេវា ដែលពលរដ្ឋបានស្នើសុំ ដល់រាជរដ្ឋាភិបាលក៏ដូចជាក្រុមការងារជួយគាំទ្រលើសេវាទាំងនោះ ឲ្យបានទាន់ពេលវេលាពោលគឺកុំទុកផ្អាប់ចោល សំណើនិងសំណូមពរទាំងនោះដែលនាំឲ្យពលរដ្ឋគាត់មានការថ្នាំថ្នាក់មកលើការដឹកនាំរបស់គណបក្សក៏ដូច ជារាជរដ្ឋាភិបាល ដែលដឹកនាំដោយ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៅក្នុងអណត្តិទី៧នេះ។ពាក់ព័ន្ធទៅនឹងការងារ បរិស្ថាន អនាម័យ ឯកឧត្តមប្រធានក្រុមការងារ បានណែនាំដល់មន្ត្រីគណបក្សនៅតាមឃុំត្រូវចលនាពលរដ្ឋធ្វើការប្រមូលទុកដាក់កែច្នៃសម្រាមឲ្យអស់លទ្ធភាព ដើម្បីទាញយកផលមកប្រើប្រាស់ ពិសេសដាំដើមឈើនៅតាមទីទួលសាធារណៈវត្តអារាម សាលារៀន ដើម្បីប្រើប្រាស់ ហូបផ្លែ ក៏ដូចេជាបង្កើនបរិស្ថាន ទាក់ទាញទឹកភ្លៀង និងបង្ហាញដល់ភ្ញៀវដែលបានធ្វើដំណើរឆ្លងកាត់ភូមិឋានរបស់យើងទស្សនាកំសាន្តលេងផងដែរ៕

កម្ពុជាត្រៀមខ្លួនជាគោលដៅទេសចរណ៍មូស្លីមប្រកបដោយភាពកក់ក្ដៅ សុវត្ថិភាព និងទំនុកចិត្ត

2025/10/12 01:39:11 pm        305
Facebook Telegram Linkin
ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានអញ្ជើញជាគណៈអធិបតី និងក្នុង​ពិធី​បើក​សម្ពោធ​ពិព័រណ៍ឧបករណ៍ផ្ទះបាយសម្រាប់ផ្ទះ និងពាណិជ្ជកម្មអន្តរជាតិ រួមនឹងសេវា​កម្ម​ទេសចរណ៍​នៅ​សណ្ឋាគារហ៊ីម៉ាវារី នាព្រឹកថ្ងៃទី១១ ខែតុលា ឆ្នាំ២០២៥ នេះ។ កម្មវិធីពិព័រណ៍ដែលផ្តោតលើការបង្ហាញនូវឧបករណ៍ផ្ទះបាយទំនើប និងបច្ចេកវិទ្យា​ចុង​ក្រោយ​សម្រាប់​វិស័យ​សណ្ឋាគារ និង ភោជនីយដ្ឋាន ព្រមទាំងការបង្ហាញពីស្តង់ ដារអាហារហាឡា សម្រាប់​ជួយលើសុវត្ថិភាពម្ហូបអាហារ មានការចូលរួមពីសំណាក់ឯកឧត្តម Shaharuddin Bin Onn ឯកអគ្គរដ្ឋទូតវិសាមញ្ញ និងពេញសមត្ថភាពម៉ាឡេស៊ីប្រចាំកម្ពុជា,ឯកឧត្តមបណ្ឌិត Santo Darmo Sumarto ឯកអគ្គរដ្ឋទូតវិសាមញ្ញ និងពេញសមត្ថភាពឥណ្ឌូណេស៊ីប្រចាំកម្ពុជា,ឯកឧត្តម-លោក ជំទាវ ជារដ្ឋលេខាធិការ- អនុរដ្ឋលេខាធិការ និងតំណាងអង្គ ទូតវៀតណាម សិង្ហបូរី ចុងភៅប្រចាំសណ្ឋាគារល្បីៗ ពីប្រទេសម៉ាឡេស៊ីនិងកម្ពុជា ភ្ញៀវកិត្តយសជាតិនិងអន្តរជាតិជាង១០០នាក់ ។ ថ្លែងក្នុងឱកាសដ៏មានសារៈសំខាន់សម្រាប់វិស័យទេសចរណ៍កម្ពុជា ឯកឧត្តមរដ្ឋមន្រ្តី បានគូសបញ្ជាក់ថា ពិព័រណ៌អន្តរជាតិនៅថ្ងៃនេះ ពិតជាបានបង្ហាញឱ្យឃើញពីកាលានុ វត្តភាពកាន់តែប្រសើរឡើងសម្រាប់កម្ពុជាក្នុងការច្បាមយកឱកាស និងធ្វើពិពិធកម្មទីផ្សារទេសចរណ៍ ដើម្បីពង្រឹង និងពង្រីកសក្ដានុពលវិស័យទេសចរណ៍កម្ពុជាឱ្យកាន់តែទូលំទូលាយ ការត្រៀមខ្លួនជាស្រេចដើម្បីចាប់យកទីផ្សារទេសចរណ៍មូស្លីមដែលជាទីផ្សារប្រកបដោយសក្តានុពលមួយ មកបំពេញបន្ថែមទីផ្សារអន្តរជាតិដែលមានស្រាប់ សំដៅជំរុញការអភិវឌ្ឍទេសចរណ៍ប្រកបដោយចីរភាព បរិយាបន្ន និងភាពធន់ ។ លោក អ៊ារីក លីម នាយកប្រតិបត្តិ ADVANTAGE នៃ Universal Alliance Co., Ltd.បានថ្លែង វិស័យទេសចរណ៍ គឺជាផ្នែកទីពីរដែលចូលរួមចំណេញសេដ្ឋកិច្ចកម្ពុជា ដូច្នេះយើងទាំងអស់គ្នាត្រូវរួមចំណែកស្វែងរកទីផ្សារថ្មី ដើម្បីបន្ថែមជីវភាព និងទ្រព្យសម្បត្តិប្រជាជនកម្ពុជា។ ខណៈ Universal Alliance នឹងបានរៀបចំ និងទទួលសិទ្ធិក្នុងការនាំ United World Halal Day មកកម្ពុជានៅក្នុងមីនា ២០២៦ ដែលនឹងនាំមកជាប្រទេសអ៊ិស្លាមចំនួន ៥៧ ប្រទេស៕ អត្ថបទ.ភារម្យ

មន្រ្ដីច្រកព្រំដែនក្នុងស្រុកមេមត់ បន្តរឹតបន្តឹងត្រួតពិនិត្យទំនិញចេញចូលតាមច្រកព្រំដែនកម្ពុជា-វៀតណាម

2025/10/12 12:41:38 pm        1307
Facebook Telegram Linkin
សកម្មភាពផ្លាសប្តូរទំនិញតាមច្រក ទ្វេភាគី កម្ពុជា-វៀតណាម នៅក្នុងស្រុកមេមត់ ខេត្តត្បូងឃ្មុំ មានដំណើរការល្អ តាមរយៈការសម្របសម្រួលពីមន្ត្រីមានសមត្ថកិច្ចពាក់ព័ន្ធប្រចាំច្រក ខណៈមន្រ្ដីបន្តការត្រួតពិនិត្យយ៉ាងតឹងរឹង ចំពោះទំនិញខុសច្បាប់ផ្សេងៗមិនឱ្យចររាចឆ្លងកាត់ឡើយ។លោក ហាស ពណ្ណរិទ្ធិ ប្រធានច្រកទ្វេភាគីដា បានឱ្យដឹងថា បច្ចុប្បន្នប្រជាពលរដ្ឋដឹកកសិផល ពិសេសដំឡូងយកទៅលក់នៅប្រទេសវៀតណាមក្នុងមួយថ្ងៃៗប្រម៉ាណជាង៨០រថយន្ដ ក្នុងនោះកម្ពុជាបានសម្របសម្រួលជាមួយភាគីវៀតណាម ជាប្រចាំដើម្បីបង្ករលក្ខណៈងាយស្រួលដល់បងប្អូនប្រជាពលរដ្ឋ។លោក អេង ចាន់ណា នាយប៉ុស្តិ៍នគរបាលច្រកទ្វាទ្វេភាគីដា បានឱ្យដឹងថា មន្រ្ដីនគរបាលច្រក មានតួនាទីសម្របសម្រួល បើកច្រក និងត្រួតពិនិត្យលើលិខិតស្នាមចេញចូលរបស់ភ្ញៀវដែលធ្វើដំណើរឆ្លងដែនចេញចូលប្រទេសទាំង២ សម្រាប់ការងារត្រួតពិនិត្យទំនិញចេញចូល គឺខាងគយ និងប្រធានច្រក។ ក្នុងនោះមន្ត្រីពាក់ព័ន្ធប្រចាំការនៅច្រក បានធ្វើការត្រួតពិនិត្យយ៉ាងម៉ត់ចត់ ហើយនៅវេលាម៉ោង ៥ ល្ងាចភាគីទាំងសងខាងបិទច្រកលែងឱ្យឆ្លងកាត់។សូមជម្រាបថា ក្នុងមួយថ្ងៃៗនៅរដូវវស្សានេះ មានរថយន្តដឹកកសិផលប្រម៉ាណ ៨០ គ្រឿងដែលភាគច្រើនដឹកដំឡូងមីចូលទៅលក់នៅប្រទេសវៀតណាមតាមច្រកទ្វេភាគីដា និងមានទំនិញពីទេសវៀតណាមមួយចំនួន ដូចជាជី ចូលមកប្រទេសកម្ពុជាវិញផងដែរ ក្រោមការត្រួតពិនិត្យយ៉ាងតឹងរឹងពីមន្រ្ដីច្រកប្រចាំព្រំដែនកម្ពុជា-វៀតណាម៕ដោយ ៖ ជឹង សេងឡុង 

បណ្ដាញសង្គម

ព័ត៌មានថ្មីៗ

កសិករបង់ក្លាដែសជួបការលំបាកហិរញ្ញវត្ថុ ស្របពេលវិបត្តិអ៊ីរ៉ង់បង្កឲ្យមានវិបត្តិប្រេងឥន្ធនៈ
04/09/2026 09:04 PM
Facebook Telegram Linkin
អនុរដ្ឋមន្រ្តីការបរទេសអ៊ីរ៉ង់៖ អាមេរិកគួរជំរុញអ៊ីស្រាអែលឲ្យគោរពបទឈប់បាញ់
04/09/2026 08:04 PM
Facebook Telegram Linkin
មនុស្ស ៤នាក់ស្លាប់ ពេលជនអន្តោប្រវេសន៍ព្យាយាមឡើងជិះទូកនៅជិតតំបន់ឆ្នេរភាគខាងជើងបារាំង
04/09/2026 08:04 PM
Facebook Telegram Linkin
មន្ត្រីអ៊ីរ៉ង់ព្រមានថា ការវាយប្រហាររបស់អ៊ីស្រាអែលលើលីបង់ បង្កហានិភ័យដល់កិច្ចព្រមព្រៀងបទឈប់បាញ់
04/09/2026 08:04 PM
Facebook Telegram Linkin
ការផ្អាកសង្គ្រាម នៅអ៊ីរ៉ង់ មានន័យថា ការកាត់ក្ដីពុករលួយរបស់លោក Netanyahu នឹងបន្តឡើងវិញនៅថ្ងៃអាទិត្យ
04/09/2026 08:04 PM
Facebook Telegram Linkin
របាយការណ៍៖ លោក Trump ចេញ «ឱសានវាទ» ដល់សម្ព័ន្ធមិត្តអឺរ៉ុប ជុំវិញការធានាសុវត្ថិភាពច្រកសមុទ្រ Hormuz
04/09/2026 08:04 PM
Facebook Telegram Linkin
ស្ថាប័នឃ្លាំមើលការដឹកជញ្ជូនសកល៖ ការយកថ្លៃរបស់អ៊ីរ៉ង់ នៅច្រកសមុទ្រ Hormuz និងបង្កើតគំរូគ្រោះថ្នាក់
04/09/2026 08:04 PM
Facebook Telegram Linkin
ឯកអគ្គរដ្ឋទូតអ៊ីស្រាអែលប្រចាំនៅឥណ្ឌានិយាយថា ប៉ាគីស្ថានមិនមែនជាតួអង្គគួរឲ្យទុកចិត្តនោះទេ
04/09/2026 08:04 PM
Facebook Telegram Linkin
អេក្វាទ័រកោះហៅឲ្យមកវិញឯកអគ្គរដ្ឋទូតរបស់ខ្លួនប្រចាំនៅកូឡុំប៊ី នៅក្នុងជម្លោះការទូតចុងក្រោយ
04/09/2026 08:04 PM
Facebook Telegram Linkin
ចក្រភពអង់គ្លេសបានដាក់ពង្រាយយោធា ដើម្បីរារាំងនាវាមុជទឹករុស្ស៊ីកុំឲ្យចូលដែនទឹករបស់ខ្លួន
04/09/2026 08:04 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.