BTV NEWS

ប្រធានអង្គការមូលនិធិអភិវឌ្ឍន៍មូស្លីមកម្ពុជា ផ្ដល់អំណោយជូនជនភៀសសឹកចំនួន ១៥០០គ្រួសារ នៅខេត្តបន្ទាយមានជ័យ

ប្រមុខការទូតកម្ពុជាធ្វើបទបង្ហាញជូនអង្គទូត ស្តីពីការសម្រេចចិត្តរបស់កម្ពុជា ពាក់ព័ន្ធនឹងតំបន់ទាមទារដែនសមុទ្រត្រួតគ្នាជាមួយ ប្រទេសថៃ

កម្ពុជា-ឥណ្ឌាដាក់ឱ្យដំណើរការទូទាត់ឆ្លងដែនតាមឃ្យូអរកូត ដើម្បីសម្រួលដល់ប្រជាជនឥណ្ឌាមកកម្ពុជា

គិតត្រឹមខែឧសភា ឆ្នាំ២០២៦ ក្រសួងបរិស្ថានបានបណ្តុះកូនឈើ បានចំនួនជាង៤លានដើម ក្នុងនោះដើមត្នោតចំនួនជាង១លានដើម ដើម្បីចែកជូនប្រជាពលរដ្ឋ យកទៅដាំនៅតាមទីសាធារណៈ និងដាំស្តារព្រៃ

ព័ត៌មានជាតិ

ក្រសួងបរិស្ថានថ្កោលទោសចំពោះបុគ្គលបោះសំរាមចោលក្នុងទឹកស្ទឹងព្រែកត្នោតក្នុងភូមិសាស្រ្តក្រុងតាខ្មៅ ខេត្តកណ្តាល

កាលពីពេលថ្មីៗនេះ មានការផ្សព្វផ្សាយតាមបណ្តាញសង្គម ក៏ដូចជាបណ្តាញសារព័ត៌មានមួយចំនួន ស្តីពីសកម្មភាពរបស់បុគ្គលចំនួន ២នាក់ ដោយម្នាក់ជាអ្នកបើកបរម៉ូតូសណ្តោងរ៉ឺម៉ក ដឹកស្បោងសំរាម សំណល់រឹង និងបុគ្គលម្នាក់ទៀត បានយកសំរាមក្នុងស្បោងសំរាមជាច្រើននៅលើរ៉ឺម៉ក បោះចូលទៅក្នុងស្ទឹងព្រែកត្នោត ចំណុចស្ពានព្រែកហូរ ក្នុងភូមិសាស្រ្តក្រុងតាខ្មៅ ខេត្តកណ្តាល។ ករណីនេះនាំឲ្យមានការរិះគន់យ៉ាងខ្លាំងពីសាធារណជន។ ក្រសួងបរិស្ថានសូមធ្វើការថ្កោលទោសចំពោះបុគ្គល ដែលបានបោះសំរាមចោលក្នុងទឹកស្ទឹងព្រែត្នោត ជាមួយគ្នានេះក្រសួងបរិស្ថាន ស្នើសុំការអន្តរាគមន៍ពីរដ្ឋបាលខេត្តកណ្តាល និងអាជ្ញាធរមានសមត្ថកិច្ច ចាត់វិធានការច្បាប់ ចំពោះអ្នកដែលបានប្រព្រឹត្តល្មើសច្បាប់។ អ្នកនាំពាក្យក្រសួងបរិស្ថាន ឯកឧត្តម ខ្វៃ អាទិត្យា កាលពីរសៀលថ្ងៃទី២២ ខែវិច្ឆិកា ឆ្នាំ២០២៥ បានឱ្យដឹងថា ចំពោះករណីខាងលើនេះ ក្រសួងបរិស្ថានបានសហការ ជាមួយរដ្ឋបាលក្រុងតាខ្មៅ និងអាជ្ញាធរមូលដ្ឋាន ដើម្បីស្វែងរកបុគ្គល ដែលបានប្រព្រឹត្តល្មើសច្បាប់ យកមកធ្វើការអប់រំ និងចាត់ការតាមនីតិវិធីច្បាប់។ ជាមួយគ្នានេះអ្នកនាំពាក្យក្រសួងបរិស្ថាន ស្នើសុំឱ្យបុគ្គលដែលបានប្រព្រឹត្តល្មើស ចេញមកសារភាព និងទទួលស្គាល់កំហុសចំពោះមុខអាជ្ញាធរមានសមត្ថកិច្ច និងបញ្ឈប់ការដឹកសំណល់រឹង ទៅចោលផ្តេសផ្តាស់ ដូចជាបោះចូលទៅក្នុងប្រព័ន្ធទឹកសាធារណៈ ដែលនាំឱ្យមានការបំពុលទឹក ប៉ះបាល់ដល់ការរស់នៅរបស់ប្រជាពលរដ្ឋ និងបរិស្ថានជាបន្តទៀត។យោងតាមប្រសាសន៍អ្នកនាំពាក្យ បុគ្គលបោះចោលសំរាមផ្តេសផ្តាស់ ចូលទៅក្នុងទន្លេ បានប្រព្រឹត្តល្មើសច្បាប់ ជាមួយអនុក្រឹត្យលេខ ១១៣ ស្តពី«ការគ្រប់គ្រងសំរាម សំណល់រឹងនៅទីប្រជុំជន» ។ ក្រមបរិស្ថាននិងធនធានធម្មជាតិ ត្រង់មាត្រា២៣០ ចំណុច១ ហាមឃាត់បណ្ដាច់ខាតការចោលសម្រាប់ប្លាស្ទិកនៅតាមផ្លូវទីសាធារណៈ ទីវាល ប្រព័ន្ធលូ ប្រភពទឹកសាធារណៈ។ មាត្រា២១៨ ត្រង់ចំណុច១ នៃក្រមបរិស្ថាននិងធនធានធម្មជាតិក៏មានចែង ហាមឃាត់ដាច់ខាតការបោះចោលសំរាម សំណល់រឹងទីប្រជុំជន នៅតាមដងផ្លូវ ទីសាធារណៈ និងទីវាល ប្រព័ន្ធទឹកលូប្រឡាយទឹក ប្រភពទឹកសាធារណៈឬក្នុងដីកម្មសិទ្ធិ ដែលមិនត្រូវបានអនុញ្ញាត ជាកន្លែងស្តុកទុកសំរាម ជាបណ្ដោះអាសន្នឬជាកន្លែងទុកដាក់ចុងក្រោយ៕

ជប៉ុនប្រកាសបន្តខិតខំប្រឹងប្រែងដើម្បីជំរុញការអនុវត្តយ៉ាងប្រាកដប្រជានៃកិច្ចព្រមព្រៀងបទឈប់បាញ់ និងបន្ថយភាពតានតឹងរវាងកម្ពុជា និងថៃ ដោយសហការជាមួយបណ្តាប្រទេសពាក់ព័ន្ធនានា

ភ្នំពេញ៖ នៅថ្ងៃទី ២២-២៣ ខែវិច្ឆិកា លោកវរសេនីយ៍ឯក HARA Takashi ជាទីប្រឹក្សា និងអនុព័ន្ធយោធា បានចូលរួមសកម្មភាពចុះពិនិត្យទីតាំងជាក់ស្តែងទាក់ទងនឹងស្ថានការណ៍ព្រំដែន ដែលរៀបចំដោយក្រសួងការពារជាតិ ក្នុងឋានៈជាសមាជិកនៃក្រុមអនុព័ន្ធយោធាបរទេស ប្រចាំព្រះរាជាណាចក្រកម្ពុជា(MACPP) ដើម្បីទទួលបានសេចក្តីសង្ខេបព័ត៌មានស្តីពីស្ថានភាពចុងក្រោយបង្អស់។តាមការបញ្ជាក់របស់ស្ថានទូតជប៉ុនប្រចាំកម្ពុជាបានឱ្យដឹងថា៖ជប៉ុនសូមសម្តែងការគោរពចំពោះក្រុមអ្នកសង្កេតការណ៍អាស៊ាន (AOT) ដែលដឹកនាំដោយប្រទេសម៉ាឡេស៊ី។ ជប៉ុននឹងបន្តខិតខំប្រឹងប្រែង ដើម្បីជំរុញការអនុវត្តយ៉ាងប្រាកដប្រជានៃកិច្ចព្រមព្រៀងបទឈប់បាញ់ និងបន្ថយភាពតានតឹង ដោយសហការជាមួយបណ្តាប្រទេសពាក់ព័ន្ធនានា»៕

ក្រសួងអភិវឌ្ឍន៍ជនបទ ប្រជុំបូកសរុបលទ្ធផលការងារគម្រោង ឥណទានទូទាំងប្រទេស នៅខេត្តពោធិ៍សាត់

ក្រសួងអភិវឌ្ឍន៍ជនបទ បានបើកកិច្ចប្រជុំបូកសរុបលទ្ធផលការងារគម្រោងឥណទាន ក្រសួង អភិវឌ្ឍន៍ជនបទប្រចាំ២០២៥ និងលើកទិសដៅបន្តឆ្នាំ២០២៦ ក្រោមវត្តមានឯកឧត្តមបណ្ឌិត លី ណារុន រដ្ឋលេខាធិការ និងជានាយកគម្រោង តំណាងដ៏ខ្ពង់ខ្ពស់ឯកឧត្ដម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ និងដោយមានអញ្ជើញចូលរួមពី លោក លោកស្រី មកពីមន្ទីរអភិវឌ្ឍន៍ជនបទរាជធានី-ខេត្តទាំង២៥ សរុបចំនួន៧២រូប ដែលបានរៀបចំឡើងដោយនាយកដ្ឋានអភិវឌ្ឍន៍សេដ្ឋកិច្ចជនបទ នៅសាលប្រជុំសាខាកាកបាទក្រហមកម្ពុជាខេត្តពោធិ៍សាត់ ស្ថិតក្នុងក្រុងពោធិ៍សាត់ ខេត្តពោធិ៍សាត់ ។លោក ធីម សុធារ៉ា ប្រធានមន្ទីរអភិវឌ្ឍន៍ជនបទខេត្តពោធិ៍សាត់ បានបញ្ជាក់ថា ដោយសារកិច្ចខិតខំប្រឹងប្រែងរបស់រាជរដ្ឋាភិបាល ក៏ដូចជាក្រសួងអភិវឌ្ឍន៍ជនបទ តាមរយៈនាយកដ្ឋានអភិវឌ្ឍន៍សេដ្ឋកិច្ចជនបទ ទើបមន្ទីរអភិវឌ្ឍន៍ជនបទខេត្តពោធិ៍សាត់ បានដំណើរការគម្រោងឥណទាន ដែលពិតជាមានសារៈសំខាន់ ក្នុងការចូលរួមលើកកម្ពស់សេដ្ឋកិច្ចគ្រួសាររបស់ប្រជាពលរដ្ឋ តាមរយៈការផ្តល់ប្រាក់កម្ចីដល់ សហគ្រិនខ្នាតគ្រួសារ និងខ្នាតតូចនៅជនបទដែលខ្វះដើមទុនក្នុងការបង្កើត ឬពង្រីអាជីវកម្ម។ ដោយបច្ចុប្បន្ន គម្រោងឥណទាននេះ បានផ្តល់កម្ចីជូនប្រជាពលរដ្ឋក្នុងខេត្តពោធិ៍សាត់មានចំនួន៩១៨គ្រួសារ ក្នុងនោះស្ត្រីចំនួន៨៤២នាក់ នៅតាមបណ្តាភូមិចំនួន៣៧ ស្ថិតក្នុងភូមិសាស្ត្រស្រុកចំនួន៦ ។ក្នុងឱកាសនោះ ឯកឧត្តមបណ្ឌិត លី ណារុន បានមានប្រសាសន៍បញ្ជាក់ថា គោលបំណងនៃកិច្ចប្រជុំនេះ ដើម្បីត្រួតពិនិត្យលើរបាយការណ៍គម្រោងឥណទានតាមបណ្ដារាជធានី-ខេត្តប្រចាំឆ្នាំ២០២៥ និងស្វែងរកបញ្ហាការប្រឈម និងដំណោះស្រាយដ៏សម ស្របឆ្លើយតបទៅនឹងបរិបទនានាឆ្នាំបន្តបន្ទាប់ ព្រមទាំងដាក់ចេញផែនការការងារអនុវត្តឲ្យសមស្របតាមគោលនយោបាយឥណទានជនបទ និងក្រុមសន្សំដែលបាននិងកំពុងរៀបចំផងដែរ។ ឯកឧត្តម រដ្ឋលេខាធិការ បានបន្ថែមថា គម្រោងឥណទានក្រសួងអភិវឌ្ឍន៍ជនបទ ជាផ្នែកមួយជួយសម្រួលដល់ជីវភាពប្រជាពលរដ្ឋ នៅជនបទ និងសម្រួលលើអាជីវកម្មខ្នាតតូច និងខ្នាតគ្រួសារនៅជនបទ តាមរយៈការផ្តល់កម្ចី ជួយបំផុស និងលើកទឹកចិត្តឲ្យ បង្កើតជាមុខរបរសហគ្រាសខ្នាតតូច ក៏ដូចជាបានជួយស្វែងរកទីផ្សារ សម្រាប់ដោះដូរផលិតផលនិងបង្កើតបណ្តាញទំនាក់ទំនងរវាង ផលិតករ និងទីផ្សារផលិតផលក្នុងគោលដៅចូលរួមចំណែកកាត់បន្ថយភាពក្រីក្រ និងជំរុញកំណើនសេដ្ឋកិច្ចកម្ពុជា សមស្របទៅនឹងបរិយាកាសសង្គម សេដ្ឋកិច្ចនាពេលបច្ចុប្បន្ន ។ ឯកឧត្តម រដ្ឋលេខាធិការ សង្ឃឹមយ៉ាងមុតមាំថា សិក្ខាកាមដែលមកពីរាជធានី-ខេត្តទាំង២៥ ក្រោយចូលរួមកិច្ចប្រជុំនេះរួច នឹងចេះរៀបចំជាយុទ្ធសាស្ត្រឬផែនការសកម្មភាពការងារ ដើម្បីឆ្លើយតបទៅនឹងអ្វីដែលបានកើតឡើង។ កិច្ចប្រជុំនាពេលបនេះ នឹងមានការចូលរួមជួយបំផុសនិងជំរុញឲ្យមានការពិភាក្សា និងផ្ដល់ព័ត៌មានជាក់ស្ដែង ដែលមានលក្ខណៈបែបវិទ្យាសាស្ត្រឆ្លុះបញ្ចាំងពីបច្ចុប្បន្នភាព សម្រាប់គាំទ្រដល់ការអនុវត្តសកម្មភាពការងារនាពេលអនាគត់៕

ផលិតផលខ្មែរក្នុងស្រុក បន្លែសុវត្ថិភាព ផ្លែឈើ សាច់សត្វ អង្ករ អាហារកែច្នៃនានា បាននិងកំពុងដាក់លក់ នៅផ្សារផលិតផលខ្មែរខេត្តសៀមរាប

ផ្សារផលិតផលខ្មែរ ខេត្តសៀមរាប បាននិងកំពុងដំណើរការលក់កសិផល ផលិតផលខ្មែរ ដែលបានដាំដុះ និងកែឆ្នៃដោយកសិករ និងផលិតករខ្មែរនៅខេត្តសៀមរាប នៅរៀងរាល់ថ្ងៃសៅរ៍-អាទិត្យ ចាប់ពីម៉ោង ៧ព្រឹក ដល់ ១២ថ្ងៃត្រង់ ដែលមានទីតាំងស្ថិតនៅភូមិមណ្ឌល២ សង្កាត់ស្វាយដង្គំ ក្រុងសៀមរាប នៅសួនច្បារហាត់ប្រាណ ជិតមាត់ស្ទឹងសៀមរាប ក្បែរសួនព្រះរាជដំណាក់ ឬស្វែងរកតាមតំណភ្ជាប់៖ស្វែងរកផ្សារផលិតផលខ្មែរ ខេត្តសៀមរាប៖ https://maps.app.goo.gl/xTVrLCxMaqCU9iuu5សូមបញ្ជាក់ថា ក្រោមការដឹកនាំ និងការគាំទ្ររបស់ក្រសួងពាណិជ្ជកម្ម និងការសម្របសម្រួលផ្តល់ទីតាំងរបស់រដ្ឋបាលខេត្ត មន្ទីរពាណិជ្ជកម្មខេត្តសៀមរាប ក្រោមគម្រោងជំរុញទីផ្សារសម្រាប់កសិកម្មខ្នាតតូច (AIMS) នៃក្រសួងពាណិជ្ជកម្ម បានរៀបចំ និងដាក់ឲ្យដំណើរការផ្សារលក់ផលិតផលខ្មែរ ចាប់តាំងពីឆ្នាំ២០១៩ រហូតមកដល់បច្ចុប្បន្ន។ ផ្សារផលិតផលខ្មែរនេះ មានគោលបំណងផ្ដល់ឱកាសទីផ្សារបន្ថែមដល់កសិករ ផលិតករអាជីវករខ្នាតតូច ជាតំណាងពីក្រុមកសិករផលិត និងជាការតភ្ជាប់ទំនាក់ទំនងទីផ្សារឱ្យកាន់តែប្រសើរ ដល់ក្រុមផលិតដែលអាចរកប្រាក់ចំណូល និងលើកកម្ពស់ជីវភាពរស់នៅពួកគេ។ ការចូលរួមលើកកម្ពស់ និងប្រើប្រាស់ផលិតផលខ្មែរ ជាការរួមចំណែកបង្កើនផលិតភាពផលិតផលក្នុងស្រុក បង្កើនប្រាក់ចំណូល និងលើកស្ទួយជីវភាពប្រជាជន និងជំរុញអភិវឌ្ឍន៍សេដ្ឋកិច្ច-សង្គមឲ្យកាន់តែប្រសើរឡើង។សូមចូលរួមគាំទ្រផ្សារផលិផលខ្មែរ ដើម្បីលើកស្ទួយជីវភាពកសិករ និងផលិតករខ្មែរ៕

បច្ចុប្បន្ននេះតំបន់ «ឈើកាច់បាភ្នំ» ស្ថិតក្នុងស្រុកបាភ្នំ បានប្រែក្លាយជាគោលទេសចរណ៍ដ៏មានភាពទាក់ទាញ

បច្ចុប្បន្ននេះ តំបន់ «ឈើកាច់បាភ្នំ» ស្ថិតក្នុងស្រុកបាភ្នំ ខេត្តព្រៃវែង បានប្រែក្លាយជាគោលទេសចរណ៍ដ៏មានភាពទាក់ទាញ ស្របពេលដែលរដ្ឋបាលស្រុក ខេត្ត មន្ទីរជំនាញ និងអាជ្ញាធរ បានបង្កើនការយកចិត្តទុកដាក់ក្នុងការកែលម្អ និងអភិវឌ្ឍន៍ហេដ្ឋារចនាសម្ព័ន្ធសម្រាប់តំបន់រមណីយដ្ឋានប្រវត្តិសាស្ត្រ និងធម្មជាតិ «ឈើកាច់បាភ្នំ» នេះ ក្នុងគោលដៅជំរុញការទស្សនា មកលេងកំសាន្តពីសំណាក់ភ្ញៀវទេសចរជាតិ និងអន្តរជាតិឱ្យកាន់តែច្រើនកុះករ។ ជាមួយគ្នានេះ ដោយមានការសហការល្អរវាងអាជ្ញាធរមូលដ្ឋាន ជាមួយរដ្ឋបាលខេត្ត និងមន្ទីរទេសចរណ៍ខេត្ត ការរៀបចំសោភ័ណភាព បរិស្ថាន អនាម័យ និងសេវាកម្មនៅក្នុងតំបន់រមណីយដ្ឋាន ត្រូវបានលើកកម្ពស់ឱ្យកាន់តែប្រសើរ និងមានលក្ខណៈស្តង់ដារ។ តំបន់«ឈើកាច់បាភ្នំ» ទាំងមូលត្រូវបានថែរក្សា ការពារ ឲ្យស្ថិតស្ថេរគង់វង្សសម្រាប់បម្រើឲ្យសកម្មអភិវឌ្ឍន៍លើវិស័យនានា ជាពិសេសវិស័យទេសចរណ៍។ ការអភិវឌ្ឍន៍នេះ មិនត្រឹមតែជួយលើកកម្ពស់មុខមាត់តំបន់បាភ្នំ ដែលជាទីតាំងសក្ការៈ និងប្រវត្តិសាស្ត្រប៉ុណ្ណោះទេ ថែមទាំង ជួយជំរុញសេដ្ឋកិច្ចដល់ប្រជាពលរដ្ឋក្នុងមូលដ្ឋាន តាមរយៈវិស័យទេសចរណ៍នេះផងដែរ ។ សូមបញ្ជាក់ថា បាភ្នំ គឺជាតំបន់ដែលមានសក្ដានុពលខ្លាំងខាងទេសចរណ៍វប្បធម៌ និងជំនឿ ជាពិសេសពិធីឡើងអ្នកតាមេ ស ដ៏ល្បីល្បាញ៕

សម្តេចកិត្តិសង្គហបណ្ឌិត ម៉ែន សំអន អញ្ជើញប្រកាសទទួលស្គាល់ប្រធានកិត្តិយសគណៈកម្មការសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ ខេត្តស្វាយរៀង

សម្តេចកិត្តិសង្គហបណ្ឌិត ម៉ែន សំអន ប្រធានគណៈកម្មាធិការកណ្តាលសមាគមនារីកម្ពុជា ដើម្បីសន្តិភាព និងអភិវឌ្ឍន៍ បានប្រកាសទទួលស្គាល់សមាសភាពគណៈកម្មការសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ ខេត្តស្វាយរៀង និងកិច្ចប្រជុំបូក សរុបលទ្ធផលការងាររបស់សាខា សមាគមប្រចាំ ឆ្នាំ២០២៥និងលើក ទិសដៅអនុវត្តឆ្នាំ២០២៦។ពិធីប្រកាសសមាសភាពនេះបានត្រូវធ្វើឡើងនាព្រឹកថ្ងៃសៅរ៍ ទី២២ ខែវិច្ឆិកា ឆ្នាំ២០២៥ នៅសាលប្រជុំសាកលវិទ្យាលល័យ ស្វាយរៀង ដោយមានការអញ្ជើញចូលរួមពីសំណាក់ឯកឧត្តម លោកជំទាវជាតំណាងរាស្ត្រមណ្ឌលខេត្តស្វាយរៀង និងសមាជិកសមាជិកាសាខា សមា គម នារីកម្ពុជាដើម្បីសន្តិភាព និងអភិវឌ្ឍន៍ខេត្តស្វាយរៀង ។ឯកឧត្តម ម៉ែន វិបុល ប្រធានក្រុមប្រឹក្សាខេត្តស្វាយរៀងបានលើកឡើងអំពីការចូលរួមចំណែកក្នុងការបន្តពង្រឹងនូវភាពអង់អាចរបស់ស្ត្រី បង្កើនសក្តានុពលរបស់ស្ត្រីចូលក្នុងការអភិវឌ្ឍសង្គម លើកកម្ពស់ជីវភាពរស់នៅរបស់ស្ត្រីនៅតាមជនបទឲ្យមានអាជីវកម្ម ស្របតាមតម្រូវការទីផ្សារបច្ចុប្បន្នបន្តលើកកម្ពស់សុខុមាល ភាព និងគោលនយោបាយគាំពារសង្គមរបស់រាជរដ្ឋាភិបាល ចំពោះស្ត្រីមានផ្ទៃពោះ ក្មេងស្រី និងស្ត្រីងាយរងគ្រោះ បង្កើនការយកចិត្តទុកដាក់លើកកម្ពស់តួនាទីរបស់ស្ត្រី និងក្មេងស្រីនៅក្នុងបរិវត្តកម្មឌីជីថល។ ថ្លែងក្នុងក្នុងឱកាសនោះ សម្តេចកិត្តិសង្គហបណ្ឌិត បាននាំមកនូវការផ្តាំផ្ញើសាកសួរសុខទុក្ខ និងការនឹករលឹក សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកិត្តិយសសមាគមនារីកម្ពុជាដើម្បីសន្តិភាព និងអភិវឌ្ឍន៍ជូនដល់សមាជិកសមាជិកាទាំងអស់ ដែលបានចូលរួមក្នុងកម្មវិធីថ្ងៃនេះ។ សម្តេចកិត្តិសង្គហបណ្ឌិត ក៏បានថ្លែងនូវការកោតសរសើរចំពោះកិច្ចខិតខំប្រឹងប្រែងយកអស់ កម្លាំងកាយចិត្ត ស្មារតី និងទទួលខុសត្រូវ ក្នុងការបំពេញភារកិច្ចការងារចលនាស្រ្តី ក្នុងរយៈពេលកន្លងមក របស់លោកជំទាវ លោកស្រី ដែលជាថ្នាក់ដឹកនាំ គ្រប់លំដាប់ថ្នាក់ នៃខេត្តស្វាយរៀងទទួលបានជោគជ័យគួរឱ្យកត់សម្គាល់។ សម្តេចកិត្តិសង្គហបណ្ឌិត ក៏បានចូលរួមអបអរសាទរចំពោះ លោកជំទាវ អាយ កុសុមា ប៉េង ពោធិ៍សា ដែលត្រូវបានប្រកាសជាប្រធានកិត្តិយសគណៈកម្មការសាខាសាមគមនារីកម្ពុជា ដើម្បីសន្តិភាពនិងអភិវឌ្ឍន៍ ខេត្តស្វាយរៀង និងបានផ្តាំផ្ញើដល់គណៈកម្មការ សាខាសមាគមនារីខេត្តស្វាយរៀង ដែលបានប្រកាសកែ សម្រួលនិងបំពេញបន្ថែមសមាសភាពនាថ្ងៃនេះ ត្រូវបន្តការខិតខំប្រឹងប្រែងគ្រប់សកម្មភាព ដូចជាពង្រឹងរបៀបរបបធ្វើការ ចេះបែងចែកតួនាទីភារកិច្ចទទួលខុសត្រូវ ទៅដល់ថ្នាក់ដឹកនាំ នៃគណៈកម្មការសមាគមនារីសាខាអនុសាខា កាន់តែទូលំទូលាយ និងស៊ីជម្រៅទៅតាមគោលនយោបាយរបស់ប្រមុខរាជរដ្ឋាភិបាលកម្ពុជា ដែលបានទទួលស្គាល់ថា «ស្ត្រីគឺជាឆ្អឹងខ្នងដ៏រឹងមាំ នៃសេដ្ឋកិច្ច និងសង្គមជាតិ របស់យើងទាំងអស់គ្នា»៕

គណៈកម្មការទី៨រដ្ឋសភា៖ មន្ទីរពេទ្យមិត្តភាពកម្ពុជា-ចិន ព្រះកុសមៈវិវត្តខ្លួនទៅជាមន្ទីរពេទ្យឯកទេស ទទួលបានការសាទរពីប្រជាពលរដ្ឋគ្រប់មជ្ឈដ្ឋាន

លោកជំទាវ ឡោក ខេង បានកោតសរសើរ ចំពោះភាពរីកចម្រើនរបស់មន្ទីរពេទ្យមិត្តភាពកម្ពុជា-ចិន ព្រះកុសមៈ ដែលបាន វិវត្តន៍ខ្លួនក្លាយទៅជាមន្ទីរពេទ្យឯកទេសមួយ ដែលនាពេលបច្ចុប្បន្នមានការសាទរពីបងប្អូនប្រជាពលរដ្ឋគ្រប់មជ្ឈដ្ឋាន។លោកជំទាវបានលើកឡើងដូច្នេះក្នុងឱកាស ដែលលោកជំទាវបានអញ្ជើញដឹកនាំគណៈប្រតិភូគណៈ កម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការ ងារ បណ្តុះបណ្តាលវិជ្ជាជីវៈ និងកិច្ចការនារី (គណៈកម្មការទី៨ ) នៃរដ្ឋសភា ចុះពិនិត្យឈ្វេងយល់ពីវឌ្ឍនភាពការងារ បញ្ហាប្រឈម ចក្ខុវិស័យនិងការផ្តល់សេវាសុខា ភិបាលនៅមន្ទីរពេទ្យមិត្តភាពកម្ពុជា-ចិន ព្រះកុសមៈរសៀលថ្ងៃទី២១ ខែវិច្ឆិកា ឆ្នាំ២០២៥។ ការចុះត្រួតពិនិត្យនិងឈ្វេងយល់នេះទទួលបានការស្វាគមន៍ពីសំណាក់ឯកឧត្តម ឡឹម តារា រដ្ឋលេខាធិការក្រសួង សុខាភិបាល និងជាប្រធានក្រុមប្រឹក្សាភិបាល តំណាងឯកឧត្តមសាស្ត្រាចារ្យ ឈាង រ៉ា រដ្ឋមន្រ្តីសុខាភិបាល និងឯកឧត្តមសាស្រ្តរាចារ្យជំនួយ តាន់ សុគុន នាយកមន្ទីរពេទ្យមិត្តភាពកម្ពុជា- ចិន ព្រះកុសមៈ។លោកជំទាវ ឡោក ខេង បានមាន ប្រសាសន៍ថា ក្នុងដំណើរទស្សនកិច្ចឈ្វេងយល់នេះធ្វើឡើងក្នុងគោល បំណងចម្បង ដើម្បីពិនិត្យលើកម្មវិធីនយោបាយអាទិភាពរបស់រាជរដ្ឋាភិបាលបន្តវេននីតិកាលទី៧ នៃរដ្ឋសភា និងគោលនយោបាយយុទ្ធសាស្ត្របញ្ចកោណដំណាក់កាលទី១ ចំពោះការផ្តល់ការថែទាំសុខភាពចម្បងឆ្ពោះទៅកម្មវិធីគ្របដណ្តប់សុខភាពជាសកល និងការពង្រីកការគាំពារថែទាំសុខភាពរបស់របបបេឡាជាតិសន្តិសុខសង្គម (ប.ស.ស.) ទាំងសម្រាប់កម្មករ និយោជិត និងមន្រ្តីសាធារណៈដែលគ្របដណ្តប់បន្ថែមដោយសមាជិកគ្រួសារនៅក្នុងបន្ទុក ការផ្តល់សេវាថែទាំសុខភាពជូនគ្រួសារងាយរងហានិភ័យ និងមូលនិធិសមធម៌ ដែលកម្មវិធីខាង ដើមកំពុងទទួលបានជំនឿទុកចិត្តគួរឱ្យកត់សម្គាល់ និងទទួលបានជោគជ័យប្រកបដោយលទ្ធផលជាផ្លែផ្កា។ លោកជំទាវប្រធានក៏បានសំណូមពរដល់ឯកឧត្តមវេជ្ជបណ្ឌិត សាស្ត្រាចារ្យ ទាំងអស់ខិតខំធ្វើកិច្ចសហការជាមួយបណ្តាមន្ទីរពេទ្យខេត្ត ស្រុក និងតាមមណ្ឌលសុខភាពឱ្យមានប្រសិទ្ធភាពខ្ពស់ទាំងគុណភាព និងសេវាធ្វើយ៉ាង ណាឱ្យបងប្អូនប្រជាពលរដ្ឋយើងមានជំនឿទុកចិត្តមកលើវិស័យសុខាភិបាលប្រកបដោយជំនាញវិជ្ជាជីវៈប៉ិនប្រសប់និងទទួលបានទំនុកទឹកចិត្តពីបងប្អូនប្រជាពលរដ្ឋដើម្បីប្រកួតប្រជែងក្នុងថ្នាក់ជាតិនិងថ្នាក់តំបន់ឱ្យបានល្អប្រសើរ។ ឯកឧត្តមសាស្រ្តរាចារ្យជំនួយ តាន់ សុគុន នាយកមន្ទីរពេទ្យមិត្តភាពកម្ពុជា- ចិន ព្រះកុសមៈ បានធ្វើរបាយការណ៍ពីវឌ្ឍនភាពការងារមួយចំនួនរបស់មន្ទីរ ពេទ្យ ក្រោមជំនួយឧបត្ថមគាំទ្រពីសាធារណរដ្ឋប្រជាមានិតចិន ដែល បានជួយកសាងអគារសម្រាកព្យាបាលជំងឺទូទៅ និងជំងឺវះកាត់ខ្នាតធំដោយមន្ទីរពេទ្យបានបំពាក់ឧបករណ៍ទំនើបៗ សម្រាប់ការផ្តល់សេវាព្យាបាលជូនបងប្អូនប្រជាពលរដ្ឋឱ្យទាន់ពេលវេលា។ មន្ទីរពេទ្យបានបណ្ដុះស្មារតីឥរិយាបថសីលធម៌គ្រូពេទ្យក្នុងការបម្រើសេវា និងការធ្វើការធ្វើបដិសណ្ឋារកិច្ចល្អគួរជាទីរួសរាយរាក់ ទាក់យ៉ាងកក់ក្ដៅដល់ប្រជាឯកឧត្តមបានបន្តថាៈពលរដ្ឋដែល មកទទួលសេវាព្យាបាលនិងពិនិត្យ សុខភាព ហើយមន្ទីរពេទ្យក៏បានត្រៀមបម្រុងគ្រប់ពេលក្នុងការឆ្លើយតបការផ្ទុះឡើងវិញនូវជំងឺឆ្លង និងប្ដេជ្ញាបន្ដផ្ដល់សេវាពិនិត្យព្យាបាល ជូនប្រជាពលរដ្ឋដែលមកទទួលសេវាព្យាបាលនៅមន្ទីរ ពេទ្យមិត្តភាពកម្ពុជា-ចិន ព្រះកុសមៈ ដោយមិនរើសអើងជាដាច់ខាត។ក្រោយពីបានស្តាប់នូវរបាយការណ៍បំភ្លឺអំពីវឌ្ឍនភាពការងារ ក៏ដូចជាបញ្ហាប្រឈមរួចមក លោកជំទាវឡោក ខេង បានកោតសរសើរដល់លោកនាយមន្ទីរពេទ្យ ក៏ដូចជាក្រុមគ្រូពេទ្យទាំងអស់ដែលបានលះបង់អស់ទាំងកម្លាំងកាយចិត្តក្នុងការផ្តល់សេវាព្យាបាលជូនដល់បងប្អូនប្រជាពលរដ្ឋឱ្យទាន់ពេលវេលា និងមានក្រមសីលធម៌វិជា្ជជីវៈឱ្យសក្តិសមទៅនឹងពាក្យថា "កងទ័ពទេវតា" ដែលជាអ្នកជួយសង្គ្រោះអាយុជីវិតរបស់ប្រជាពលរដ្ឋយើង ជាពិសេសគឺខិតខំអនុវត្តនូវយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានយកចិត្តទុក ដាក់លើសុខុមាលភាពរបស់បងប្អូនប្រជាពលរដ្ឋគ្រប់កាលៈទេសៈ។ លោក ជំទាវក៏បានផ្តល់អនុសាសន៍ដល់មន្ទីរពេទ្យព្រះកុសមៈ ខិតខំធ្វើការផ្សព្វ ផ្សាយឱ្យបានទូលំទូលាយរាល់បញ្ហាជំងឺមិនឆ្លងដល់បងប្អូនប្រជាពលរដ្ឋឱ្យយល់កាន់តែច្បាស់ផងដែរ៕

ឯកឧត្តមបណ្ឌិតសភាចារ្យ ហង់ជួន ណារ៉ុន៖ មានកត្តាសំខាន់ៗចំនួន៥ ដែលជាផ្លូវឆ្ពោះទៅរកភាពជោគជ័យក្នុងវិស័យអប់រំ

ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានថ្លែងលើកឡើងថា មានកត្តាសំខាន់ៗចំនួន៥ ដែលជាផ្លូវឆ្ពោះទៅរកភាពជោគជ័យក្នុងវិស័យអប់រំ ក្នុងនោះរួមមាន៖ កត្តារាជរដ្ឋាភិបាល, កត្តាសាលារៀន រួមទាំងនាយកសាលា, កត្តាសិស្ស, កត្តាគ្រូបង្រៀន និងកត្តាឪពុកម្តាយ អ្នកអាណាព្យាបាល។ឯកឧត្ដមបណ្ឌិតសភាចារ្យ ឧបនាយករដ្ឋមន្ត្រី បានថ្លែងយ៉ាងដូច្នេះក្នុងឱកាសអញ្ជើញជាអធិបតីក្នុងពិធីប្រគល់រង្វាន់លើកទឹកចិត្តជូនសិស្សានុសិស្សឆ្នើមនិទ្ទេស A លំដាប់ពិន្ទុខ្ពស់ជាងគេនៅរាជធានីភ្នំពេញ និងសិស្សានុសិស្សដែលជាកូនៗ អតិថិជនគណនីក្មេងឆ្លាតរបស់គ្រឹះស្ថានអម្រឹត នារសៀលថ្ងៃទី២២ ខែវិច្ឆិកា ឆ្នាំ២០២៥ម្សិលមិញ។ ពិធីនេះក៏មានការចូលរួមពីសំណាក់ ឯកឧត្តម លោកជំទាវ ថ្នាក់ដឹកនាំក្រសួងអប់រំ យុវជន និងកីឡា អគ្គនាយក គ្រឹះស្ថានមីក្រូហិរញ្ញវត្ថុ អម្រឹត ភាគីពាក់ព័ន្ធជាតិនិងអន្តរជាតិ គណៈគ្រប់គ្រង លោកគ្រូអ្នកគ្រូ តំណាងសាលារៀនរដ្ឋ និងឯកជនមួយចំនួននៅរាជធានីភ្នំពេញ មាតាបិតា អ្នកអាណាព្យាបាល និងសិស្សានុសិស្សជ័យលាភី។ក្នុងឱកាសនោះដែរឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានអបអរសាទរដល់ក្មួយៗទាំងអស់ដែលបានខិតខំប្រឹងប្រែងរៀនសូត្ររហូតទទួលបាន និទ្ទេស A ដោយការជោគជ័យនេះ គឺជាផ្លែផ្កានៃការតាំងចិត្តខ្ពស់របស់ក្មួយៗផ្ទាល់ ព្រមទាំងការយកចិត្តទុកដាក់បណ្ដុះបណ្ដាលយ៉ាងស្ទាត់ជំនាញរបស់លោកគ្រូអ្នកគ្រូ និងការគាំទ្រយ៉ាងពេញទំហឹងពី មាតាបិតា និងអ្នកអាណាព្យាបាលផងដែរ។ ក្នុងបរិបទនៃការរីកចម្រើនផ្នែកវិទ្យាសាស្ត្រ និងបច្ចេកវិទ្យា ជាពិសេស បញ្ញាសិប្បនិម្មិត និងបរិវត្តកម្មបច្ចេកវិទ្យាឌីជីថល បានជះឥទ្ធិពលយ៉ាងខ្លាំងដល់ការអភិវឌ្ឍលើគ្រប់វិស័យ។ ចំណេះដឹងបញ្ញាសិប្បនិម្មិត នឹងក្លាយជាតម្លៃបន្ថែមសម្រាប់ជួយសមត្ថភាពគិត វិភាគ និងដោះស្រាយបញ្ហាជាក់លាក់ ដោយសារបច្ចេកវិទ្យានេះបានវិវត្តចេញពីការយកលំនាំតាមសមត្ថភាពខួរក្បាលរបស់មនុស្ស។ បច្ចុប្បន្ន បញ្ញាសិប្បនិម្មិតត្រូវបានប្រើប្រាស់ ក្នុងវិស័យជាច្រើនដូចជា វិស័យអប់រំ ជាដើម។ ក្នុងន័យនេះ ក្រសួងអប់រំ យុវជន និងកីឡាបាននិងកំពុងធ្វើការងារយ៉ាងសកម្ម ដើម្បីជំរុញឱ្យគ្រូបង្រៀន និងសិស្សានុសិស្សមានចំណេះដឹង និងសមត្ថភាពប្រើប្រាស់បច្ចេកវិទ្យាបញ្ញាសិប្បនិម្មិត ប្រកបដោយការទទួលខុសត្រូវខ្ពស់។ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានលើកឡើងពីកត្តាសំខាន់ៗចំនួន៥ ដែលជាផ្លូវឆ្ពោះទៅរកភាពជោគជ័យក្នុងវិស័យអប់រំ ដោយក្នុងនោះរួមមាន៖- កត្តារាជរដ្ឋាភិបាល៖ ក្រោមការដឹកនាំប្រកបដោយគតិបណ្ឌិតរបស់ សម្តេចមហាបវរធិបតី នាយករដ្ឋមន្ត្រី រាជរដ្ឋាភិបាលបានចាត់ទុកការអប់រំ និងការអភិវឌ្ឍធនធានមនុស្ស ជាអាទិភាពសំខាន់មួយ ក្នុងយុទ្ធសាស្ត្របញ្ចកោណ ដោយប្រទេសជាតិខ្លាំងដោយសារធនធានមនុស្សមានគុណភាព។- កត្តាសាលារៀន រួមទាំងនាយកសាលា៖ ត្រូវតែមានអគារហេដ្ឋារចនាសម្ព័ន្ធសមស្រប រៀបចំបរិស្ថានសាលារៀនស្អាត ដើម្បីទាក់ទាញសិស្សឱ្យចង់ទៅរៀន និងជាពិសេសការដឹកនាំគ្រប់គ្រងបានល្អពីសំណាក់នាយក នាយិកាសាលារៀន ដែលជំរុញបាននូវអភិបាលកិច្ចសាលារៀនប្រកបដោយប្រសិទ្ធភាពខ្ពស់ នាំឱ្យមានការគាំទ្រពីសហគមន៍។- កត្តាសិស្ស៖ សិស្សត្រូវមានសុខភាពរឹងមាំល្អ ខួរក្បាលឆ្លាតវៃទើបរៀនបានពូកែ ដែលទាមទារការយកចិត្តទុកដាក់អំពីការលូតលាស់របស់កូនពីសំណាក់ក្រុមគ្រួសារ ឪពុកម្តាយ និងអ្នកអាណាព្យាបាល តាំងពីវ័យកុមារ ក៏ដូចជាការបញ្ជូនកូនឱ្យចូលរៀនថ្នាក់មត្តេយ្យ ត្រៀមសម្រាប់កម្រិតសិក្សាបន្តបន្ទាប់ទៀតជាដើម។- កត្តាគ្រូបង្រៀន៖ គ្រូបង្រៀន ត្រូវមានសមត្ថភាពវិជ្ជាជីវៈខ្ពស់ មានសីលធម៌ល្អ ត្រូវបន្តអភិវឌ្ឍខ្លួនឯងជាប្រចាំ ពង្រឹងវិធីសាស្ត្របង្រៀនឱ្យកាន់តែសម្បូរបែប ស្របតាមបរិបទថ្មីៗនៃបច្ចេកវិទ្យា និងការផ្លាស់ប្តូរនៃកម្មវិធីសិក្សា។ ក្រសួងបាននិងកំពុងព្យាយាមបណ្ដុះបណ្តាលគ្រូបង្រៀនឱ្យមានគុណភាព ដោយផ្តោតលើស្តង់ដាវិជ្ជាជីវៈគ្រូ បន្តពង្រឹងគុណវុឌ្ឍិគ្រូបង្រៀន ដោយពង្រឹងការប្រឡងជ្រើសរើសគ្រូ និងបន្តលើកកម្ពស់តួនាទី កិត្តិយស និងជីវភាពគ្រូបង្រៀន ឱ្យកាន់តែមានតម្លៃក្នុងសង្គម។- កត្តាឪពុកម្តាយ អ្នកអាណាព្យាបាល៖ ត្រូវចូលរួមជំរុញកូនឱ្យទៅរៀន និងប្រឹងប្រែងសិក្សា។ ទន្ទឹមនឹងការខិតខំប្រឹងប្រែងរបស់សិស្សផ្ទាល់ ក៏ត្រូវមានការគាំទ្រទាំងផ្នែកស្មារតី និងធនធានពីសំណាក់ក្រុមគ្រួសារ ឪពុកម្តាយ អ្នកអាណាព្យាបាល និងសហគមន៍ផងដែរ។ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានថ្លែងអំណរគុណយ៉ាងជ្រាលជ្រៅចំពោះគ្រឹះស្ថានមីក្រូហិរញ្ញវត្ថុ អម្រឹត ដែលតែងតែមានឆន្ទៈចូលរួមសហការជាមួយក្រសួងអប់រំ យុវជន និងកីឡា ក្នុងការគាំទ្រ និងលើកទឹកចិត្តដល់ក្មួយៗសិស្សានុសិស្សឆ្នើមរបស់យើងតាមរយៈគណនីក្មេងឆ្លាត និងការរៀបចំពិធីដ៏មានអត្ថន័យនេះ ព្រមទាំងថ្លែងអំណរគុណដល់មាតាបិតា អ្នកអាណាព្យាបាល ដែលជឿជាក់ និងវិនិយោគលើការអប់រំសម្រាប់កូនៗ និងណែនាំឱ្យសិស្សានុសិស្សជ្រើសរើសមុខជំនាញឱ្យបានត្រឹមត្រូវ នៅពេលឈានដល់កម្រិតឧត្តមសិក្សា ដោយការជ្រើសរើសមុខជំនាញដែលត្រូវតាមទីផ្សារការងារនាពេលអនាគត និងត្រូវតាមចំណង់ចំណូលចិត្តរបស់ខ្លួន គឺដើរតួនាទីយ៉ាងសំខាន់ក្នុងដំណើរជីវិត និងភាពជោគជ័យរបស់ក្មួយៗ។សូមជម្រាបថា គណនីក្មេងឆ្លាត គឺជាគណនីសន្សំរួមគ្នារវាងឪពុកម្ដាយនិងបុត្រធីតា ដែលមានចក្ខុវិស័យលើកកម្ពស់ការសន្សំសម្រាប់ការអប់រំកម្រិតឧត្តមសិក្សា ជាមួយនឹងគោលបំណងសំខាន់ៗចំនួន ៣គឺ ៖- ចូលរួមលើកកម្ពស់ទម្លាប់សន្សំ និងការគ្រប់គ្រងហិរញ្ញវត្ថុដល់ក្រុមគ្រួសារ និងកុមារកម្ពុជា ជាពិសេសក្នុងចំណោមប្រជាពលរដ្ឋដែលរស់នៅទីជនបទ- ចូលរួមលើកទឹកចិត្តឪពុកម្តាយឱ្យចាប់ផ្តើមសន្សំតាំងពីដំបូងសម្រាប់គាំទ្រការសិក្សាអប់រំកម្រិតឧត្តមសិក្សានាពេលអនាគតរបស់កូនៗជាទីស្រលាញ់ - ចូលរួមចំណែកផ្លាស់ប្តូរជីវភាពរស់នៅរបស់កុមារកម្ពុជាតាមរយៈការផ្តល់លទ្ធភាពទទួលបានការអប់រំថ្នាក់មហាវិទ្យាល័យ៕

ក្រសួងការពារជាតិ៖ រាជរដ្ឋាភិបាលកម្ពុជាបានបន្តធ្វើការយ៉ាងសស្រាក់សស្រាំដើម្បីឲ្យភាគីថៃ ដោះលែងទាហានកម្ពុជា១៨នាក់មកវិញ ខណៈមកដល់ថ្ងៃនេះមានរយៈពេល១១៧ថ្ងៃហើយ

រាជរដ្ឋាភិបាលកម្ពុជា បានបន្តធ្វើការយ៉ាងសស្រាក់សស្រាំ ដោយឥតឈប់ឈរដើម្បីធ្វើយ៉ាងណាឲ្យភាគីថៃ ធ្វើការដោះលែងទាហានកម្ពុជា១៨នាក់ មកកម្ពុជាវិញប្រកប ដោយសុវត្ថិភាព និងស្របទៅតាមមនុស្សធម៌អន្តរជាតិ ខណៈមកដល់ថ្ងៃនេះ គឺមានរយៈពេល១១៧ថ្ងៃហើយក្រោយថៃចាប់ពួកគេទៅដោយខុសច្បាប់។តាមរយៈបណ្ដាញសង្គមរបស់ក្រសួងការពារជាតិកម្ពុជា បានលើកឡើងថា ថ្ងៃនេះជាថ្ងៃទី១១៧ហើយដែលវីរកងទ័ពកម្ពុជាចំនួន១៨រូប ត្រូវបានចាប់ខ្លួន និងដាក់ឱ្យស្ថិតក្រោមការឃុំគ្រងរបស់យោធាថៃ។ ក្រសួងការពារជាតិកម្ពុជា បានបញ្ជាក់ថា «រាជរដ្ឋាភិបាលកម្ពុជា បាននឹងកំពុងធ្វើការយ៉ាងសស្រាក់សស្រាំឥតឈប់ឈរដោយបានប្រើប្រាស់គ្រប់មធ្យោបាយ និងយន្តការដោះស្រាយទាំងអស់ ដើម្បីទាមទារឱ្យភាគីថៃដោះលែងវីរកងទ័ពរបស់យើងទាំង១៨នាក់នោះ ឱ្យបានឆាប់រហ័សជាទីបំផុត និងដោយសុខសុវត្ថិភាព»។ក្រសួងការពារជាតិកម្ពុជាបានបញ្ជាក់ទៀតថា រាជរដ្ឋាភិបាល ក្រសួងការពារជាតិ និងកងយោធពលខេមរភូមិន្ទ មិនដែលបោះបង់កងទ័ពរបស់យើងណាម្នាក់ចោលនោះឡើយ មិនថាក្នុងកាលៈទេសៈណាក៏ដោយ។ជាមួយគ្នានោះដែរ កម្ពុជាក៏បានបន្តអំពាវនាវឱ្យភាគីថៃគោរពឱ្យបានម៉ឺងម៉ាត់ ស្មោះត្រង់ និងដោយសុច្ឆន្ទៈពិតប្រាកដ នូវសេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជា និងថៃ ត្រង់កថាខណ្ឌទី៥ បានគូសបញ្ជាក់ថា «ភាគីថៃត្រូវដោះលែងយោធិនទាំង១៨នាក់របស់កម្ពុជាជាបន្ទាន់ដោយមិនបង្អែបង្អង់» ព្រមទាំងគោរព និងអនុវត្តនូវរាល់កាតព្វកិច្ចទាំងឡាយនៅក្រោមច្បាប់អន្តរជាតិ ជាពិសេសច្បាប់មនុស្សធម៌អន្តរជាតិ ដោយដោះលែងវីរកងទ័ពកម្ពុជាឱ្យបានឆាប់រហ័សជាទីបំផុត ដើម្បីពួកគាត់អាចវិលត្រឡប់មកជួបជុំក្រុមគ្រួសារវិញ ប្រកបដោយសុខសុវត្ថិភាព៕

ឯកឧត្តម វង្សី វិស្សុត អញ្ជើញចុះពិនិត្យ និងលើកកម្ពស់ទេសចរណ៍វប្បធម៌ បេតិកភណ្ឌ និងធម្មជាតិ, តំបន់ប្រាសាទសំបូរព្រៃគុក និងតំបន់ជុំវិញ

នាព្រឹកថ្ងៃទី២២ ខែវិច្ឆិកា ឆ្នាំ២០២៥ ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្រ្តីទទួលបន្ទុកទីស្តីការគណៈរដ្ឋមន្ត្រី និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ បានអញ្ជើញដឹកនាំក្រុមការងារចុះពិនិត្យ និងទស្សនាតំបន់ប្រាសាទសំបូរព្រៃគុក និងតំបន់ជុំវិញ ព្រមទាំងជួបសំណេះសំណាលជាមួយសហគមន៍ទេសចរណ៍សំបូរព្រៃគុកសហគមន៍ស្វាយចន្ទី ដំឡូងមី និងចិញ្ចឹមជ្រូក ក្នុងមូលដ្ឋានស្រុកប្រាសាទសំបូរដោយមានការអញ្ជើញចូលរួមពីសំណាក់ ឯកឧត្តម នួន ផារ័ត្ន អភិបាលនៃគណៈអភិបាលខេត្តកំពង់ធំ, ឯកឧត្តម លោកជំទាវ លោក លោកស្រី អនុប្រធាននិងសមាជិកក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ តំណាងអាជ្ញាធរជាតិសំបូរព្រៃគុក ព្រមទាំងអាជ្ញាធរមូលដ្ឋាននិងមន្ត្រីជំនាញពាក់ព័ន្ធជាច្រើនរូប ក្នុងគោលដៅឈ្វេងយល់អំពីជីវភាពរបស់ប្រជាជនក្នុងមូលដ្ឋាន និងដោះស្រាយបញ្ហាប្រឈមជាក់ស្តែង ដើម្បីរួមចំណែកធ្វើឱ្យប្រជាជនមានជីវភាពកាន់តែធូរធារ មានប្រាក់ចំណូល និងប្រាក់ចំណេញច្រើនជាងមុន មានសុខភាពល្អ និងមានលទ្ធភាពអាចឱ្យកូនចៅរៀនសូត្របានខ្ពង់ខ្ពស់។នៅក្នុងជំនួបសំណេះសំណាលជាមួយប្រជាពលរដ្ឋ ឯកឧត្តម វង្សី វិស្សុត បានលើកឡើងថា ដោយមានការគាំទ្រពីរាជរដ្ឋាភិបាល ដែលមានសម្ដេចមហាបវរធិបតី ហ៊ុន ម៉ាណែត ជាប្រមុខ ក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ រួមជាមួយរដ្ឋបាលខេត្ត ក៏ដូចជាអាជ្ញាធរដែនដីគ្រប់លំដាប់ថ្នាក់ សម្រេចបាននូវវឌ្ឍនភាពនិងសមិទ្ធផលជាច្រើន ស្របតាមចក្ខុវិស័យ «លែងឱ្យខេត្តកំពង់ធំ ជាកន្លែងទៅហួសមកហួស ទាំងទេសចរណ៍ វិនិយោគ ពាណិជ្ជកម្ម និងគម្រោងអភិវឌ្ឍ» និង«លែងឱ្យខេត្តកំពង់ធំជាខេត្តក្រីក្រជាងគេទៀត»។ ជាក់ស្តែង ថ្មីៗនេះ រាជរដ្ឋាភិបាល តាមរយៈក្រសួងទេសចរណ៍ បានរៀបចំ និងដាក់ឱ្យអនុវត្ត «ផែនការអភិវឌ្ឍន៍វិស័យទេសចរណ៍ខេត្តកំពង់ធំ ២០២៦-២០៣០» ដែលបានកំណត់តំបន់ប្រាសាទសំបូរព្រៃគុក តំបន់ព្រៃប្រស់ ក្រុងស្ទឹងសែន និងភ្នំសន្ទុក ជាប៉ូលទេសចរណ៍អាទិភាពដ៏សំខាន់ ក្នុងគោលដៅលើកកម្ពស់វិស័យទេសចរណ៍ក្នុងខេត្តកំពង់ធំ។ ជាមួយគ្នានេះ អនុវត្តតាមចក្ខុវិស័យដ៏ខ្ពង់ខ្ពស់របស់ សម្តេចធិបតីក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំផ្ទាល់ក៏តែងតែខិតខំប្រឹងប្រែងស្វែងរកវិធីសាស្ត្រផ្សេងៗ ដើម្បីរួមចំណែកលើកកម្ពស់ជីវភាពរបស់បងប្អូនប្រជាពលរដ្ឋក្នុងមូលដ្ឋាន តាមរយៈការខិតខំប្រឹងប្រែងទាក់ទាញវិនិយោគិន ការកសាងហេដ្ឋារចនាសម្ព័ន្ធគាំទ្រ ការស្វែងរកទីផ្សារពាណិជ្ជកម្ម ការរៀបចំកម្មវិធីបណ្តុះបណ្តាល និងយន្តការគាំទ្រផ្សេងៗ និងការដោះស្រាយបញ្ហាប្រឈមក្នុងវិស័យសំខាន់ៗពាក់ព័ន្ធនឹងជីវភាពរបស់ប្រជាជន។ក្រោយពីបានពិនិត្យស្ថានភាពអជីវកម្មក្នុងមូលដ្ឋាន ឯកឧត្តម វង្សី វិស្សុត បានកោតសរសើរចំពោះប្រជាពលរដ្ឋ ដែលបានបង្ហាញនូវភាពម្ចាស់ការក្នុងការធ្វើពិពិធកម្មអាជីវកម្ម និងប្រភពចំណូលរបស់ខ្លួន ថែមទាំងបានវាយតម្លៃខ្ពស់ចំពោះអាជ្ញាធរមូលដ្ឋាន ដែលបានរួមចំណែកលើកកម្ពស់ជីវភាពរបស់ប្រជាពលរដ្ឋ។ ក្នុងគោលដៅគាំទ្រដល់ការខិតខំប្រឹងប្រែងរបស់ប្រជាពលរដ្ឋបន្ថែមទៀត ឯកឧត្តម ក៏បានណែនាំឱ្យក្រុមការងារ អាជ្ញាធរមូលដ្ឋាន និងស្ថាប័នពាក់ព័ន្ធខិតខំប្រឹងប្រែងបន្ថែមទៀត ក្នុងការចុះជួយពិនិត្យ ណែនាំ និងផ្តល់យោបល់ជូនប្រជាពលរដ្ឋពាក់ព័ន្ធនឹងការធ្វើនវានុវត្តន៍ផលិតផល ផលិតកម្ម និងសេវាកម្ម ធ្វើយ៉ាងណាឱ្យកាន់តែមានគុណភាព មានភាពទាក់ទាញ និងថ្លៃដើមទាបជាងមុន និងមានស្តង់ដាខ្ពស់ ក្នុងគោលដៅលើកកម្ពស់តម្លៃបន្ថែម និងទាក់ទាញភ្ញៀវទេសចរឱ្យបានកាន់តែច្រើន។ជាមួយគ្នានេះ ឯកឧត្តម ក៏បានរំលឹក និងលើកទឹកចិត្តឱ្យបងប្អូនប្រជាពលរដ្ឋត្រូវចេះជួយខ្លួនឯង និងអាស្រ័យលើខ្លួនឯង ដោយត្រូវកំណត់ទស្សនវិស័យ ព្រមទាំងគោលដៅអាជីវកម្មរបស់ខ្លួនឱ្យបានច្បាស់លាស់ ក្នុងខណៈដែលរាជរដ្ឋាភិបាល ក៏ដូចជាក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ និងរដ្ឋបាលខេត្តនឹងចូលរួមចំណែកសម្រេចគោលដៅទាំងនេះ តាមរយៈការរៀបចំយន្តការគាំទ្រមួយចំនួន ដូចជាវគ្គបណ្តុះបណ្តាល ការសាងសង់ហេដ្ឋារចនាសម្ព័ន្ធគាំទ្រ និងការជួយស្វែងរកធនធានជាដើម ។ល។ក្នុងគោលដៅពង្រឹងទេសចរណ៍ក្នុងតំបន់ប្រាសាទសំបូរព្រៃគុក ឯកឧត្តម វង្សី វិស្សុត ក៏បានស្តាប់ និងដោះស្រាយនូវកង្វល់សំខាន់ៗរបស់ប្រជាជនពាក់ព័ន្ធនឹង ហេដ្ឋារចនាសម្ព័ន្ធគាំទ្រ ដូចជាផ្លូវថ្នល់ ទឹកស្អាត អគ្គិសនី និងអ៊ីនធឺណិត ក្នុងតំបន់ប្រាសាទសំបូរព្រៃគុក ថែមទាំងបានណែនាំឱ្យមានការគិតគូររៀបចំកែលម្អ និងបង្កើតផលិតផលទេសចរណ៍ផ្សេងៗទៀតក្រៅពីប្រាសាទ ដូចជារោងតម្បាញ កន្លែងធ្វើនំបញ្ចុក នំជាល នំនាលិ ផ្ទះស្នាក់(Homestay) ម្ហូបអាហារប្រកបដោយស្ដង់ដា និងចងក្រងទេសចរណ៍វប្បធម៌ ទំនៀមទំលាប់ និងបឹងធម្មជាតិជាដើម ឱ្យក្លាយជាកញ្ចប់ ឬ ប្រព័ន្ធអេកូឡូស៊ីទេសចរណ៍ប្រកបដោយភាពទាក់ទាញ។ ទន្ទឹមនេះ ឯកឧត្តមក៏បានណែនាំឱ្យអាជ្ញាធរដែនដីយកចិត្តទុកដាក់ខ្ពស់លើការពង្រឹងសន្តិសុខ សុវត្ថិភាព និងសណ្ដាប់ធ្នាប់ឱ្យបានល្អ ជាពិសេសស្នើឱ្យក្រុមការងារពាក់ព័ន្ធ ក៏ដូចជាប្រជាពលរដ្ឋក្នុងមូលដ្ឋានគិតគូរចាប់ផ្តើមយុទ្ធនាការផ្សព្វផ្សាយតាមពាក្យស្លោក «ប្រជាជនសំបូរព្រៃគុកម្នាក់ អ្នកផ្សព្វផ្សាយទេសចរណ៍សំបូរព្រៃគុកម្នាក់» ដើម្បីទាក់ទាញភ្ញៀវទេសចរជាតិ និងអន្តរជាតិមកទស្សនាប្រាសាទសំបូរព្រៃគុកឱ្យកាន់តែច្រើន។លើសពីនេះ ឯកឧត្តម វង្សី វិស្សុត បានណែនាំក្រុមការងារលើកកម្ពស់ជីវភាពប្រជាជន និងក្រុមការងារអភិវឌ្ឍន៍សេដ្ឋកិច្ចមូលដ្ឋាន និងទីផ្សារផលិតផលខ្មែរខេត្តកំពង់ធំសហការជាមួយរដ្ឋបាលខេត្ត មូលនិធិអភិវឌ្ឍន៍ជំនាញ (SDF) និងសហគ្រិនខ្មែរ (KE) រៀបចំវគ្គបណ្ដុះបណ្ដាល ឬសិក្ខាសាលាអំពីជំនាញសំខាន់ៗដូចជា ជំនាញទេសចរណ៍និងបដិសណ្ឋារកិច្ច លទ្ធភាពទទួលបានហិរញ្ញប្បទាន ការគ្រប់គ្រងអាជីវកម្ម ជំនាញជ្រើសរើសពូជដំណាំ បច្ចេកទេសកសិកម្ម និងកសិឧស្សាហកម្ម និងជំនាញផ្សេងៗទៀតជាច្រើន សំដៅលើកកម្ពស់ជំនាញសម្រាប់សហគមន៍ទូទៅ ទាំងសហគមន៍ទេសចរណ៍សំបូរព្រៃគុក និងសហគមន៍កសិកម្មដំឡូងមី ស្វាយចន្ទី និងចិញ្ចឹមជ្រូក។ចុងបញ្ចប់ ឯកឧត្តម វង្សី វិស្សុត បានណែនាំឱ្យក្រុមការងារចុះមូលដ្ឋានស្រុកប្រាសាទសំបូរ បន្តចុះស្វែងយល់ពីសុខទុក្ខនិងផលលំបាកទាំងឡាយ ដែលបងប្អូនប្រជាពលរដ្ឋជួបប្រទះ និងបន្តសហការជាមួយក្រសួង ស្ថាប័នពាក់ព័ន្ធ និងអាជ្ញាធរមូលដ្ឋាន និងផ្នែកពាក់ព័ន្ធ ដើម្បីធ្វើការដោះស្រាយជាប្រចាំទៅតាមលទ្ធភាពជាក់ស្ដែង និងបន្តរាយការណ៍ជូនថ្នាក់ដឹកនាំពិនិត្យ និងដោះស្រាយនូវបញ្ហាដែលពុំទាន់អាចដោះស្រាយបាន ស្របតាមអភិក្រម «ជវភាពនៃប្រព័ន្ធតួអង្គតែមួយ» ដែលជាការឆ្លើយតបទៅនឹងបំណងប្រាថ្នា និងជំនឿទុកចិត្តពីសំណាក់របស់ប្រជាជន។ ឯកឧត្តម វង្សី វិស្សុត ក៏បានផ្តាំផ្ញើឱ្យសហគមន៍ទាំងមូលនៅក្នុងមូលដ្ឋានខិតខំបន្តសហការ ជួយគ្នាទៅវិញទៅមក និងការពារប្រយោជន៍រួមរបស់សហគមន៍ ដោយគិតគូរអំពីសេដ្ឋកិច្ច និងជីវភាពរបស់ប្រជាជនជាធំ ដើម្បីធានាការអភិវឌ្ឍជាបន្តបន្ទាប់នៅក្នុងសហគមន៍៕

បណ្ដាញសង្គម

ព័ត៌មានថ្មីៗ

UNICEF ៖ សង្រ្គាមអ៊ីរ៉ង់គំរាមកំហែងដល់ការចែកចាយគ្រឿងផ្គត់ផ្គង់សង្រ្គោះជីវិតកុមារ

ក្រុមហ៊ុន Moderna និងក្រុមហ៊ុនផ្សេងទៀត ទទួលបានប្រាក់ ៦០លានដុល្លារ ដើម្បីផលិតវ៉ាក់សាំងបង្ការជំងឺអេបូឡា

កូដកម្មរថភ្លើងក្រោមដីធ្វើឲ្យប៉ះពាល់ដល់អ្នកដំណើរនៅទីក្រុងឡុងដ្រ៍ ចក្រភពអង់គ្លេស

របាយការណ៍៖ EU ពិចារណាដាក់ទណ្ឌកម្មរដ្ឋមន្ត្រីអ៊ីស្រាអែល ជុំវិញការប្រព្រឹត្តិ ចំពោះនាវាមនុស្សធម៌ឆ្ពោះទៅហ្កាហ្សា

WHO៖ ករណីសង្ស័យជំងឺ Ebola ធ្លាក់ចុះ ក្រោយមនុស្សរាប់រយនាក់ត្រូវបានដកចេញ

ប្រធានគ្លីនិករងការខូចខាតដោយសារការវាយប្រហាររុស្ស៊ីនិយាយថា ទីក្រុងមូស្គូ មិនចង់បញ្ចប់សង្រ្គាមនោះទេ

អគ្គិភ័យដ៏ធំមួយ បានឆាបឆេះផ្សារមួយកន្លែងស្ថិតក្នុងទីក្រុងហ្សាកាតា ប្រទេសឥណ្ឌូនេស៊ី

មនុស្សយ៉ាងតិច ១៥នាក់រងរបួស ដោយសារព្យុះនៅជប៉ុន ខណៈមានការអំពាវនាវឲ្យជម្លៀស

លោក Trump ថាលោកបាននិយាយជាមួយក្រុមហេសបូឡា តាមរយៈអន្តរការី

លោក Netanyahu ប្រាប់លោក Trump ថា អ៊ីស្រាអែលនឹងវាយប្រហារទីក្រុងបេរូត បើសិនការវាយប្រហាររបស់ក្រុមហេសបូឡានៅតែបន្ត

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877