BTV NEWS

នាវាចម្បាំងរុស្ស៊ី២គ្រឿង ចូលចតនៅកំពង់ផែក្រុងព្រះសីហនុ ដើម្បីបំពេញទស្សនកិច្ច៣ថ្ងៃ

ប្រមុខការពារជាតិកម្ពុជា បន្តចុះសួរសុខទុក្ខយោធិនកំពុងការពារបូរណភាពទឹកដីនៅទិសយោធភូមិភាគទី៣

ពលករ និងសហគមន៍ខ្មែរជាង ៤០០០នាក់នៅក្នុងក្រុងក្វាងជូនៃប្រទេសកូរ៉េខាងត្បូង ប្រារព្ធកម្មវិធីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ

មន្ត្រីនគរបាលព្រំដែនខេត្តកោះកុង ដែលបាញ់មនុស្សស្លាប់ចូលសារភាពហើយ

ព័ត៌មានជាតិ

រដ្ឋាករទឹកភ្នំពេញចុះហត្ថលេខាសាងសង់ពង្រីកប្រព័ន្ធផ្គត់ផ្គង់ទឹកភូមិព្រែក មានទឹកប្រាក់ ៤៣ លានដុល្លារ

រដ្ឋាករទឹកស្វយ័តក្រុងភ្នំពេញ ចុះហត្ថលេខាលើកិច្ចសន្យាសាងសង់ ដំណើរការថែទាំ និងការបណ្តុះបណ្តាលគម្រោងពង្រីកប្រព័ន្ធ ផ្គត់ផ្គង់ទឹកភូមិព្រែកបន្ថែម មានទំហំទឹកប្រាក់ប្រមាណ ៤៣ លានដុល្លារ ជាហិរញ្ញប្បទានឥតសំណងរបស់រដ្ឋាភិបាលជប៉ុន ដើម្បីបង្កើន ការចែកចាយទឹកស្អាតនៅរាជធានីភ្នំពេញ។ ឯកឧត្តម ឡុង ណារ៉ូ ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយក នៃរដ្ឋាករទឹកស្វយ័តក្រុងភ្នំពេញ លើកឡើងនៅក្នុង ពិធីចុះអត្ថលេខាលើកិច្ចសន្យាសាងសង់ ដំណើរការថែទាំ និងបណ្តុះបណ្តាលនៃគម្រោងពង្រីកសមត្ថភាព រោងចក្រប្រព្រឹត្តិកម្មទឹក ស្អាតភូមិព្រែក ដែលសមត្ថភាពប្រព្រឹត្តិកម្មទឹកស្អាតសរុប ៤៥ ពាន់ម៉ែត្រគូបក្នុងមួយថ្ងៃ ក្រោមហិរញ្ញប្បទានឥតសំណងរបស់រាជរដ្ឋាភិ បាលជប៉ុន មានការអញ្ជើញចូលរួម ឯកឧត្តម ឯក ស៊ុនចាន់ រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានក្រុមប្រឹក្សាភិបាលនៃរដ្ឋាករ- ទឹកស្វយ័តក្រុងភ្នំពេញ នៅថ្ងៃទី៣០ ខែកញ្ញា ឆ្នាំ២០២៥ នេះថា ដើម្បីបំពេញតម្រូវការជូនប្រជាពលរដ្ឋ រដ្ឋាករទឹកស្វយ័តក្រុងភ្នំពេញ ប្តេជ្ញាពង្រីកសមត្ថភាព ដើម្បីធានាបាននូវការផ្គត់ផ្គង់ទឹកគ្រប់គ្រាន់ និងស្ថិរភាពសម្រាប់ប្រជាពលរដ្ឋគ្រប់រូប។ ជាក់ស្តែងគម្រោងនេះ គឺជាគំនិតផ្តួចផ្តើមដ៏សំខាន់មួយនៃផែនការមេទីបី របស់រដ្ឋាករទឹកស្វយ័តក្រុងភ្នំពេញ (២០២១-២០៣០) ដែលបានបង្កើតឡើង ដោយមានការគាំទ្រផ្នែកបច្ចេកទេសដ៏មានតម្លៃ ពីទីភ្នាក់ងារសហប្រតិបត្តិការអន្តរជាតិជប៉ុន (JICA)។ គម្រោងពង្រីកប្រព័ន្ធផ្គត់ផ្គង់ ទឹកភូមិព្រែកនេះ ក្រោមភាពជាដៃគូជាមួយ KUBOTA និង CTII Consortium ដើម្បីជំរុញការបង្កើន ការចែកចាយទឹកស្អាតដែល អាចទុកចិត្តបាននៅកណ្តាលរាជធានីភ្នំពេញ។ ឯកឧត្តម បន្តឱ្យដឹងថា ការពង្រីកប្រព័ន្ធផ្គត់ផ្គង់ទឹកភូមិព្រែកនេះ មានទំហំទឹកប្រាក់សរុបប្រមាណ ៤២ លានដុល្លារ ជា ហិរញ្ញប្បទានឥតសំណងរបស់រដ្ឋាភិបាលជប៉ុន ក្នុងនោះសម្រាប់ការងារសាងសង់មានទឹកប្រាក់ ៣០.៧ លានដុល្លារ និងគម្រោងអ្នក ម៉ៅការ និងថែទាំ មានទឹកប្រាក់ជាង ១១ លានដុល្លារ គម្រោងសាងសង់នេះ មានរយៈពេល ៣៦ ខែ នឹងគ្រោងបញ្ចប់នៅចុងឆ្នាំ២០២៨ ដោយមានវិសាលភាពរួមមាន៖ ការសាងសង់អាងស្តុកទឹក ដែលមានសមត្ថភាពផលិតទឹកបានជាង ៤៧ ពាន់ម៉ែត្រគូប ក្នុងមួយថ្ងៃ, គម្រោងសាងសង់ប្រព័ន្ធចម្រោះទឹកច្រើនជាន់ មានសមត្ថភាពផលិតទឹកបាន ៤៥ ពាន់ម៉ែត្រគូបក្នុងមួយថ្ងៃ, និងប្រព័ន្ធ បញ្ជូនទឹកដែលបានកែច្នៃ Main DN ១ពាន់មីលីម៉ែត្រ ដើម្បីភ្ជាប់ជាមួយ Transmission Main ដែលមានស្រាប់របស់រដ្ឋាករទឹក ស្វយ័តក្រុងភ្នំពេញ។ឯកឧត្តម ឡុង ណារ៉ូ លើកឡើងឱ្យដឹងថា ជុំវិញការងារផ្គត់ផ្គង់ទឹកស្អាត, បច្ចុប្បន្នរដ្ឋាករទឹកស្វយ័តក្រុងភ្នំពេញ ផលិត ទឹកស្អាតបានប្រមាណជាង ៨៥ ម៉ឺន លើសមត្ថភាពផលិតសរុបជាង ១ លានម៉ែត្រគូបក្នុងមួយថ្ងៃ ក្នុងនោះចាប់ពីពេលនេះ រហូតដល់ ឆ្នាំ២០២៧ ក្រោយពីរោងចក្រប្រព្រឹត្តកម្មបាក់ខែងជំហានទី៣ ដាក់ឱ្យដំណើរការ, រដ្ឋាករទឹកស្វយ័តក្រុងភ្នំពេញនឹងបានបង្កើន សមត្ថភាពបន្ថែមទៀត លើការផ្គត់ផ្គង់ទឹកស្អាតជូនប្រជាពលរដ្ឋ ជាក់ស្តែងទាក់ទង់ការផ្គត់ផ្គង់ទឹកស្អាតនេះ រដ្ឋាករទឹកស្វយ័តក្រុង ភ្នំពេញ បានពង្រីកទៅតាមផែនការរបស់ខ្លួន បច្ចុប្បន្នបានរុញទៅកាន់តំបន់ជាយក្រុងប៉ែកខាងលិច និងខាងត្បូងទីក្រុងភ្នំពេញដែល នៅសេសសល់ ដើម្បីជំរុញឱ្យប្រជាពលរដ្ឋទទួលបានទឹកស្អាតប្រើប្រាស់៕ អត្ថបទ៖ សុន រ៉ាឌី

ក្រុមសមាជិកព្រឹទ្ធសភាប្រចាំភូមិភាគទី២ អញ្ជើញជួបសំណេះសំណាលជាមួយមន្រ្តីរាជការ ប្រជាពលរដ្ឋនៅស្រុកកោះសូទិន ខេត្តកំពង់ចាម

នាព្រឹកថ្ងៃទី៣០ ខែកញ្ញា ឆ្នាំ២០២៥ ក្រុមសមាជិកព្រឹទ្ធសភាប្រចាំភូមិភាគទី២ (ខេត្តកំពង់ចាម និងខេត្តត្បូងឃ្មុំ) ដឹកនាំដោយ ឯកឧត្តម អ៊ុច បូររិទ្ធ ប្រធានស្តីទីព្រឹទ្ធសភា និងជាប្រធានក្រុមសមាជិកព្រឹទ្ធសភាប្រចាំភូមិភាគទី២ បានអញ្ជើញចុះជួបសំណេះសំណាលជាមួយមន្រ្តីរាជការ ប្រជាពលរដ្ឋចំនួន២១៦នាក់ នៅស្រុកកោះសូទិន ខេត្តកំពង់ចាម។ក្នុងឱកាសនោះ ឯកឧត្តមប្រធានក្រុមភូមិភាគទី២ បានពាំនាំការផ្តាំផ្ញើសួរសុខទុក្ខ និងពរជ័យរបស់សម្តេចតេជោប្រមុខរដ្ឋស្ដីទី និងសម្តេចកិត្តិព្រឹទ្ធបណ្ឌិត ជូនដល់បងប្អូនប្រជាពលរដ្ឋនៅស្រុកកោះសូទិន ព្រមទាំងបានជម្រាបអំពីប្រវត្តិ និងសភាពការណ៍វិវត្តថ្មីៗ នៃការឈ្លានពានយ៉ាងគឃ្លើនរបស់ប្រទេសថៃ មកលើទឹកដីកម្ពុជា ដែលមានតាំងពីយូរណាស់មកហើយរហូតមកដល់បច្ចុប្បន្ននេះ។ ឯកឧត្តមបានគូសបញ្ជាក់ថា កម្ពុជាជាប្រទេសតូចមិនចង់មានសង្រ្គាមជាមួយប្រទេសជិតខាងទេ ហើយប្រជាជនកម្ពុជាចង់បានសន្តិភាព ដោយប្រទេសកម្ពុជាបានប្រកាន់ខ្ជាប់នូវគោលនយោបាយការបរទេសឯករាជ្យ អព្យាក្រឹតជាអចិន្ត្រៃយ៍ និងមិនចូលបក្សសម្ព័ន្ធ។ក្នុងកាលៈទេសៈដែលប្រទេសជាតិកំពុងប្រឈមមុខនាពេលបច្ចុប្បន្ន ឯកឧត្តមប្រធានក្រុម ភូមិភាគទី២ បានអំពាវនាវឱ្យបងប្អូនប្រជាពលរដ្ឋនៅគ្រប់ស្រទាប់វណ្ណៈទាំងអស់ បន្តលើកកម្ពស់ស្មារតីសាមគ្គីភាព ឯកភាពជាតិ រួមគ្នាជាធ្លុងមួយជុំវិញសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងរាជរដ្ឋាភិបាលដែលមានសម្តេចមហាបវរធិបតី ហ៊ុន ម៉ាណែត ជាប្រមុខវាយបំបាក់ការឈ្លានពានលើបូរណភាពដែនដីកម្ពុជា ពីសំណាក់ប្រទេសថៃ។ ឆ្លៀតក្នុងឱកាសនោះ ឯកឧត្តមប្រធានក្រុមភូមិភាគទី២ បានវាយតម្លៃខ្ពស់ចំពោះវីរភាពដ៏អង់អាច ក្លាហានរបស់វីរយុទ្ធជនយើង ដែលបាននិងកំពុងលះបង់កម្លាំងកាយ ចិត្ត បូជាអាយុជីវិត តស៊ូ អត់ធ្មត់ ក្រាញននៀល ក្នុងការការពារជាតិមាតុភូមិកម្ពុជា។ ឯកឧត្តមប្រធានក្រុមភូមិភាគទី២ បានអំពាវនាវដល់ប្រជាពលរដ្ឋកុំជឿតាមការញុះញង់របស់ក្រុមជនជ្រុលនិយមមួយក្តាប់តូច ដែលតែងតែបកស្រាយព្រឹត្តិការណ៍ខុសស្រឡះពីការពិត បំបាក់ស្មារតីកងទ័ព គប់គិតជាមួយបរទេស និងធ្វើសកម្មភាពប៉ះពាល់យ៉ាងធ្ងន់ធ្ងរដល់ផលប្រយោជន៍ជាតិ និងប្រជាពលរដ្ឋ៕

សមាគមអ្នកចិញ្ចឹមសត្វ និងអគ្គនាយកដ្ឋានសុខភាពសត្វ ធ្វើសិក្ខាសាលាពង្រឹងផលិតកម្មចិញ្ចឹមសត្វឱ្យកាន់តែរីកចម្រើន

សមាគមអ្នកចិញ្ចឹមសត្វកម្ពុជា សហការជាមួយអគ្គនាយកដ្ឋានសុខភាពសត្វ និងផលិតកម្មសត្វ នៃក្រសួងកសិកម្ម រួមទាំងកសិករ ក្រុមហ៊ុន និងម្ចាស់កសិដ្ឋាននានា បានមកជួយជុំគ្នា បើកសិក្ខាសាលា ស្តីពី៖ “ការពង្រឹងផលិតកម្មចិញ្ចឹមសត្វ” នៅកម្ពុជាឱ្យកាន់តែប្រសើរដើម្បីឆ្ពោះទៅការ នាំចេញទៅក្រៅប្រទេសឱ្យបានកាន់តែច្រើនថែមទៀត។ សិក្ខាសាលានេះ បានធ្វើឡើង នៅសណ្ឋាគារសាន់វ៉េភ្នំពេញ ព្រឹកថ្ងៃទី៣០ ខែកញ្ញា ឆ្នាំ២០២៥ ចាប់ពីម៉ោង ៨៖០០ព្រឹក ដល់ ១២៖០០ថ្ងៃត្រង់។ លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា បានថ្លែងក្នុងឱកាសនោះថា លោកសូមការកោតសរសើរយ៉ាងខ្លាំងចំពោះការខិតខំប្រឹងប្រែងរបស់ក្រុមហ៊ុន និងម្ចាស់កសិដ្ឋាននានា ដែលបានប្រឹងអភិវឌ្ឍខ្លួន ដែលភាគច្រើនចាប់តាំងីចិញ្ចឹមលក្ខណៈគ្រួសារ រហូតបានក្លាយជាកសិដ្ឋាន និងក្រុមហ៊ុនធំៗ ដោយបានរីកចម្រើនរហូតមានការនាំចេញ។ ចំណែកសិក្ខាសាលាថ្ងៃនេះ សង្ឃឹមថា ទាំងមន្ត្រីជំនាញ ក្រសួងកសិកម្ម និងអ្នកចិញ្ចឹម សត្វទាំងអស់ នឹងទទួលបានបទពិសោធន៍ថ្មីៗ តាមរយៈការផ្លាស់ប្តូរបទពិសោធន៍ល្អៗដល់គ្នាទៅវិញទៅមកនៅថ្ងៃនេះ ធ្វើយ៉ាងណាដើម្បីភាពរីកចម្រើនឱ្យកាន់ខ្លាំងជាមួយគ្នា ពិសេសការធានាការផ្គត់ផ្គង់ ការនាំចេញការប្រកួតប្រជែង និងការធ្វើឱ្យកាន់តែមានសុវត្ថិភាពចំណីអាហារ៕ អត្ថបទ៖ ពៅយី

រដ្ឋមន្ត្រីទេសចរណ៍អាស៊ាន បេ្តជ្ញារួមគ្នាពង្រឹង និងពង្រីកកិច្ចសហប្រតិបត្តិការក្នុងវិស័យទេសចរណ៍ ដើម្បីធានាភាពប្រកួតប្រជែងរបស់អាស៊ាន និងភាពធន់ នៃវិស័យទេសចរណ៍អាស៊ាន នៅក្នុងកម្រិតតំបន់និងសកលលោក

នៅទីក្រុងម៉ាឡាកា ប្រទេសម៉ាឡេស៊ី នាថ្ងៃទី២៩ ខែកញ្ញា ឆ្នាំ២០២៥ កិច្ចប្រជុំចង្អៀតរដ្ឋមន្ត្រីទេសចរណ៍អាស៊ាន បានរៀបចំជាលើកដំបូង នៅទីក្រុងម៉ាឡាកា ក្រោមគំនិតផ្តួចផ្តើមរបស់ប្រទេសម៉ាឡេស៊ីដែលជាប្រទេសម្ចាស់ផ្ទះ និងប្រធានកិច្ចប្រជុំរដ្ឋមន្ត្រីទេសចរណ៍អាស៊ាននៅឆ្នាំ២០២៥ ដោយមានការចូលរួមពីឯកឧត្តម លោកជំទាវរដ្ឋមន្ត្រីទេសចរណ៍ និងតំណាងប្រធានស្ថាប័នទេសចរណ៍នៃប្រទេសសមាជិកអាស៊ានទាំង១០ ប្រទេសសង្កេតការណ៍ទីម័រឡេស្តេ និងឯកឧត្តមអគ្គលេខាធិការអាស៊ានផងដែរ។កិច្ចប្រជុំចង្អៀតរដ្ឋមន្ត្រីទេសចរណ៍អាស៊ាន បានផ្តោតលើកិច្ចពិភាក្សាក្រោមប្រធានបទសំខាន់ៗចំនួនពីរ គឺ៖ (១) ការអភិវឌ្ឍទេសចរណ៍ដោយឈរលើគោលការណ៍និរន្តភាព ភាពធន់ និងបរិយាបន្ន, និង (២) ការលើកកម្ពស់ការតភ្ជាប់ក្នុងតំបន់ និងសកលលោក ដើម្បីជំរុញកំណើនភ្ញៀវទេសចរនៅក្នុងអាស៊ាន ក៏ដូចជាភ្ញៀវទេសចរអន្តរជាតិពីគ្រប់ទិសទីនៅក្នុងពិភពលោកមកកាន់អាស៊ាន។ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានធ្វើបទអន្តរាគមន៍នៅក្នុងប្រធានបទទាំងពីរខាងលើ ដោយបានអំពាវនាវប្រទេសសមាជិកអាស៊ាន និងដៃគូសន្ទនា ត្រូវអនុវត្តសកម្មភាពជាក់ស្តែងរួមគ្នាជាមួយនឹងចក្ខុវិស័យរួម ឈរលើស្មារតីឯកភាពផ្ទៃក្នុងអាស៊ាន និងការបេ្តជ្ញាចិត្តរួមគ្នាដើម្បីលើកកម្ពស់កិច្ចសហប្រតិបត្តិការទេសចរណ៍ក្នុងតំបន់បន្ថែមទៀត សំដៅជំរុញកំណើនភ្ញៀវទេសចរអន្តរជាតិមកកាន់តំបន់អាស៊ាន។ ឯកឧត្តមរដ្ឋមន្ត្រី បានគូសរំលេចអំពីសារៈសំខាន់នៃកត្តាសុខសន្តិភាពតំបន់ និងស្ថិរភាពនយោបាយ គឺជាមូលដ្ឋានគ្រឹះចាំបាច់ក្នុងការអភិវឌ្ឍទេសចរណ៍ប្រកបដោយនិរន្តភាព ភាពធន់ និងបរិយាបន្ន។ជាមួយគ្នានេះ, ការវិនិយោគនៅក្នុងរចនាសម្ព័ន្ធតភ្ជាប់, ការសម្រួលការធ្វើដំណើរឱ្យមានភាពល្អប្រសើររវាងប្រជាជន និងប្រជាជន និងការសម្រួលនីតិវិធីនៃការធ្វើដំណើរនៅក្នុងតំបន់អាស៊ាន និងសកលោក ពិតជាមានភាពចាំបាច់នៅក្នុងការជំរុញកំណើនភ្ញៀវទេសចរ និងរក្សាភាពប្រកួតប្រជែងរបស់អាស៊ាននៅក្នុងតំបន់។សូមបញ្ជាក់ជូនថា វេទិកាទេសចរណ៍អាស៊ាននៅឆ្នាំ២០២៦ និងកិច្ចប្រជុំរដ្ឋមន្ត្រីទេសចរណ៍អាស៊ាន ព្រមទាំងកិច្ចប្រជុំពាក់ព័ន្ធ នឹងប្រព្រឹត្តទៅទីក្រុងសេប៊ូ ប្រទេសហ្វីលីពីន។

ផលិតផលខ្មែរធ្វើពីកក់ និងល្ពាក់ជាច្រើនកុងតឺនឺរបន្ថែមទៀតគ្រោងនឹងនាំចេញទៅទីផ្សារសហរដ្ឋអាម៉េរិកនៅដើមខែតុលា

នាយកដ្ឋានស្រាវជ្រាវ និងអភិវឌ្ឍន៍ នៃគណៈកម្មការជាតិជំរុញចលនាភូមិមួយផលិតផលមួយ បានឱ្យដឹងថា នៅដើមខែតុលាខាងមុខនេះ ផលិតផលខ្មែរមានដូចជាកាបូប និងកន្រ្តកជាដើម ធ្វើអំពីកក់ និងល្ពាក់គ្រោងនឹងនាំចេញទៅទីផ្សារសហរដ្ឋអាម៉េរិក ដើម្បីដាក់តាំងបង្ហាញលក់ និងផ្គត់ផ្គង់លក់បន្តថែមទៀតនៅខាងប៉ែកអឺរ៉ុប។លោក វ៉ៅ សុវ៉ាង ប្រធាននាយកដ្ឋានស្រាវជ្រាវ និងអភិវឌ្ឍន៍នៃគណៈកម្មការជាតិជំរុញចលនាភូមិមួយផលិតផលមួយ នៃទីស្ដីការគណៈរដ្ឋមន្ត្រី បានមានប្រសាសន៍ប្រាប់ព័ត៌មាន ប៊ីធីវី ឱ្យដឹងថា រហូតមកដល់ពេលនេះ ផលិតផលខ្មែរកាន់តែច្រើនត្រូវបាននាំចេញទៅទីផ្សារក្រៅស្រុក ក៏ដូចជាមានការបញ្ជាទិញជាបន្តបន្ទាប់ផងដែរ ដោយសារតែការខិតខំប្រឹងប្រែងរបស់កូនខ្មែរ ក្រោមពាក្យថា “ខ្មែរអាចធ្វើបាន” ទាំងគុណភាព និងស្តង់ដារសម្រាប់ទីផ្សារអន្តរជាតិ។ លោកបានបន្តថា កន្លងមកការនាំចេញផលិតផលខ្មែរទៅកាន់ទីផ្សារអន្តរជាតិមានចំនួនតិចតួចប៉ុណ្ណោះ ប៉ុន្តែនៅពេលនេះមានមូលដ្ឋានសិប្បកម្មមួយស្ថិតនៅខេត្តសៀមរាប ដែលមានលក្ខណៈជាប្រព័ន្ធ រៀបចំតាំងពីមូលដ្ឋានរហូតទៅដល់ទីផ្សារក្នុងប្រទេស និងទីផ្សារអន្តរជាតិ ដោយមើលឃើញថា វប្បធម៌នៃការផលិតនេះ នឹងពង្រីកទៅដល់ទីកន្លែងជាច្រើនទៀត ដើម្បីពង្រីកនូវឱកាសការងារ បង្កើតប្រាក់ចំណូលដល់ប្រជាពលរដ្ឋនៅតាមមូលដ្ឋានផ្សេងៗថែមទៀត ក្រៅពីផលិតផ្គត់ផ្គង់លក់ទីផ្សារក្នុងស្រុក។កញ្ញា ឃុន សុខបាន ប្រធានទីផ្សារនៃក្រុមហ៊ុននាំចេញនៅកម្ពុជា បានឱ្យ ប៊ីធីវី ដឹងថា គិតចាប់តាំងពីក្រុមហ៊ុនដំណើរការក្នុងឆ្នាំ១៩៩៦ រហូតមកដល់បច្ចុប្បន្ននេះ ការនាំចេញផលិតផលជាកាបូប កន្រ្តក ដែលធ្វើពីកក់ និងល្ពាក់នេះ ក្នុងមួយខែៗ មានចំនួនប្រមាណ ៣ ឬ ៤កុងតឺនឺ ដោយសារសន្ទុះនៃការគាំទ្រពីសំណាក់បរទេសនៅសហរដ្ឋអាម៉េរិក ក៏ដូចជានៅទីផ្សារប្រទេសផ្សេងៗទៀតខាងប៉ែកអឺរ៉ុប ដូចជាកាណាដា និងអាល្លីម៉ង់ជាដើម ដែលនាំចេញតាមរយៈក្រុមហ៊ុននៅសហរដ្ឋអាម៉េរិក។ ជាមួយនេះ កញ្ញាបានសម្តែងការអរគុណជូនចំពោះរាជរដ្ឋាភិបាលកម្ពុជា ដោយសារមានការជួយជ្រោមជ្រែង និងលើកស្ទួយជាខ្លាំងនូវផលិតផលជាស្នាដៃកូនខ្មែរ ក៏ដូចជាការជួយសម្របសម្រួលក្នុងការបើកទីផ្សារជូនដល់ប្រជាពលរដ្ឋជាសហគមន៍មូលដ្ឋាន។គណៈកម្មាធិការជាតិជំរុញចលនាភូមិមួយផលិតផលមួយ ដើរតួនាទីយ៉ាងសំខាន់ក្នុងកិច្ចសហការជាមួយក្រសួងស្ថាប័នពាក់ព័ន្ធ ក្នុងការចងក្រងបណ្ដុំអ្នកផលិត ក៏ដូចជា ដាក់បញ្ចូលផលិតផលសក្តានុពលនានារបស់ផលិតផលខ្មែរ ជាសមាជិកភូមិមួយផលិតផលមួយ ដើម្បីងាយស្រួលផ្ដល់នូវការគាំទ្រផ្នែកបច្ចេកទេស ក៏ដូចជាស្វែងរកទីផ្សារជូនអ្នកផលិត។ គណៈកម្មាធិការនេះ បានអំពាវនាវដល់ប្រជាពលរដ្ឋខ្មែរទាំងអស់ ចូលរួមគាំទ្រផលិតផលក្នុងស្រុកឱ្យបានច្រើន ដើម្បីជាការលើកទឹកចិត្តទៅដល់កសិករ ក៏ដូចជាលើកស្ទួយផលិតផលរបស់ខ្មែរឱ្យកាន់តែរីកចម្រើន ជាពិសេសបង្ហាញទៅកាន់ភ្ញៀវទេសចរអន្តរជាតិ ឲ្យបានដឹងពីគុណតម្លៃ និងគុណភាពរបស់ផលិតផលក្នុងស្រុក៕ អត្ថបទ៖ ឈិត បូរ៉ាវី

បច្ចុប្បន្នភាពព្រំដែនកម្ពុជា-ថៃ៖ ស្ថានភាពនៅភូមិជោគជ័យ បានស្ងប់ស្ងាត់ទៅវិញហើយ

គិតត្រឹមម៉ោង១១និង០០នាទីព្រឹកថ្ងៃទី៣០ ខែកញ្ញា ឆ្នាំ២០២៥ ស្ថានភាពនៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ស្ថានភាពបានស្ងប់ស្ងាត់ទៅវិញហើយ បន្ទាប់ពីទាហានថៃបាននាំអ្នកវាស់ដីចូលមកជិតបង្គោលព្រំដែនលេខ ៤៦ បំណងចង់វាស់ដីនៅចំណុចចំការអំពៅ កាលពីវេលាម៉ោងប្រមាណ៧ព្រឹកថ្ងៃទី៣០ ខែកញ្ញា ឆ្នាំ២០២៥នេះ ប៉ុន្តែសកម្មភាពនេះត្រូវបានរារាំងដោយកងកម្លាំងកម្ពុជាដែលមិនមានប្រដាប់អាវុធ រួមជាមួយវត្តមានប្រជាពលរដ្ឋដែលសុទ្ធតែជាម្ចាស់ដី ជាអ្នករស់នៅ និងអាស្រ័យផលនៅលើដីទីនេះផ្ទាល់ បានចូលមកតវ៉ា រារាំង និងបញ្ជាឱ្យទាហានថៃ និងក្រុមអ្នកវាស់ដីរបស់ភាគីថៃដកថយទៅវិញភ្លាមៗ ដោយមិនអនុញ្ញាតឱ្យអាចធ្វើសកម្មភាពវាស់ដីបាននោះទេ។ សូមបញ្ជាក់ថាមកដល់ម៉ោងនេះកងកម្លាំងកម្ពុជាដែលមិនមានប្រដាប់អាវុធ គឺនៅតែបន្តឈរការពារសុវត្ថិភាពដល់ប្រជាពលរដ្ឋ និងត្រៀមខ្លួនជានិច្ច ដើម្បីការពារបូរណភាពទឹកដី។គួររំលឹកថា កាលពីថ្ងៃទី២៨ ខែកញ្ញា ឆ្នាំ២០២៥ ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ នៃព្រះរាជាណាចក្រកម្ពុជា បានផ្ញើលិខិតតវ៉ាទៅកាន់អភិបាលខេត្តស្រះកែវ នៃព្រះរាជាណាចក្រថៃ ដោយប្រឆាំងនឹងករណីរដ្ឋបាលខេត្តស្រះកែវលើកបដា នៅថ្ងៃទី២៨ ខែកញ្ញា ឆ្នាំ២០២៥ ដោយមានខ្លឹមសារប្រកាសអនុវត្តច្បាប់ក្នុងស្រុកថៃលើប្រជាពលរដ្ឋកម្ពុជារស់នៅក្នុងភូមិជោគជ័យ និងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។កិច្ចប្រជុំពិសេសលើកទី១ របស់គណៈកម្មាធិការព្រំដែនទូទៅ (GBC) កាលពីថ្ងៃទី១០ ខែកញ្ញា ឆ្នាំ២០២៥ ចំណុច៨ នៃកំណត់ហេតុកិច្ចប្រជុំពិសេស GBC លើកទី១ បានលើកឡើងថាពាក់ព័ន្ធនឹងឧបទ្ទវហេតុនៅក្នុងតំបន់ភូមិជោគជ័យ ឃុំអូរបីជាន់ ស្រុកអូរជ្រៅខេត្តបន្ទាយមានជ័យ ប្រទេសកម្ពុជា ទល់មុខភូមិណងចាន់ ស្រុកខូកសួង ខេត្តស្រះកែវ ប្រទេសថៃ ភាគីទាំងពីរបានព្រមព្រៀងគ្នាដូចខាងក្រោម៖១៖ ភាគីទាំងពីរបានទទួលស្គាល់ថា គណៈកម្មការចំរុះព្រំដែន (JBC) ជាយន្តការដោះស្រាយបញ្ហាដែលទាក់ទងនឹងការវាស់វែងរួម និងខ័ណ្ឌសីមាព្រំដែន ព្រមទាំងបានឯកភាពដាក់បញ្ហានេះជារបៀបវារៈអាទិភាព នៅកិច្ចប្រជុំបន្ទាប់នៃ គណៈកម្មការចំរុះព្រំដែន (JBC)។ ២៖ ភាគីទាំងពីរបានប្រគល់ភារកិច្ចដល់គណៈកម្មាធិការព្រំដែនថ្នាក់យោធភូមិភាគ (RBC) ដើម្បីពិភាក្សាអំពីការគ្រប់គ្រងបញ្ហានេះឱ្យបានឆាប់បំផុត ស្របតាមលទ្ធផលនៃកិច្ចពិភាក្សារបស់គណៈកម្មការចំរុះព្រំដែន (JBC)។នៅក្នុងរយៈពេលនេះ អភិបាលខេត្តបន្ទាយមានជ័យ និងអភិបាលខេត្តស្រះកែវ នឹងសម្របសម្រួលជាមួយគ្នាយ៉ាងជិតស្និទ្ធ ដើម្បីគ្រប់គ្រងស្ថានការណ៍នៅទីតាំងផ្ទាល់ប្រកបដោយសន្តិវិធី រួមបញ្ចូលទាំងការបញ្ឈប់រាល់សកម្មភាពដែលពង្រីកទំហំវិវាទ និងបង្កើនភាពតានតឹង៕

រាជរដ្ឋាភិបាលលើកទឹកចិត្តដល់វិនិយោគិន ដែលធ្វើការវិនិយោគនៅភូមិភាគឦសាន

វិនិយោគិនដែលវិនិយោគនៅភូមិភាគឦសាន និងទទួលបានការគាំទ្រគ្រប់ជ្រុងជ្រោយពីរាជរដ្ឋាភិបាល តាមរយៈការលើកទឹកចិត្ត ផ្នែកពន្ធដារ និងពន្ធគយ, ការផ្តល់ហិរញ្ញប្បទានក្រោមអត្រាការប្រាក់សមរម្យ, ការជួយកាត់បន្ថយថ្លៃដើមផលិតកម្ម, ការសម្រួលនីតិវិធី និងការគាំទ្រសកម្មភាពវិនិយោគឯកជន។ ឯកឧត្តមបណ្ឌិតសភាចារ្យ ហ៊ាន សាហ៊ីប ទីប្រឹក្សាសម្តេចធិបតីនាយករដ្ឋមន្ត្រី, រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារជំរុញការវិនិយោគ ក្នុងភូមិភាគឦសាន (ក.វ.ឦសាន) លើកឡើងក្នុងវេទិកាជំនួបរវាងក្រុមការងារ ជំរុញ ការវិនិយោគក្នុងភូមិភាគឦសាន និងវិនិយោគិន នៅថ្ងៃទី២៩ ខែកញ្ញា ឆ្នាំ២០២៥ ថា កម្មវិធីពិសេសជំរុញការវិនិយោគក្នុងភូមិភាគ ឦសាន មិនត្រឹមតែជាគោលនយោបាយលើកទឹកចិត្តប៉ុណ្ណោះទេ ប៉ុន្តែគឺជាយុទ្ធសាស្ត្រឆ្លើយតបទៅនឹងបញ្ហាប្រឈម នៅក្នុងបរិការណ៍ បច្ចុប្បន្នរបស់វិនិយោគិន ព្រមទាំងជំរុញឱ្យក្រសួង-ស្ថាប័នពាក់ព័ន្ធ ផ្ដល់ការសម្រួល និងភាពកក់ក្ដៅជាអតិបរមាជូនវិនិយោគិន។ឯកឧត្តមបណ្ឌិតសភាចារ្យ ចែករំលែកនូវអនុសាសន៍គន្លឹះមួយចំនួន ដើម្បីឱ្យកម្មវិធីពិសេសជំរុញការវិនិយោគក្នុងខេត្តនៅភូមិ ភាគឦសាន ឱ្យដំណើរការទៅមុខប្រកបដោយជោគជ័យ ស្របតាមចក្ខុវិស័យរបស់ប្រមុខរាជរដ្ឋាភិបាលរួមមាន៖ ការបន្តពង្រឹងយន្តការ «សេវាច្រកចេញចូលតែមួយ» ដោយពង្រឹងសិទ្ធិអំណាចប្រតិភូកម្មរបស់ក្រុមការងារជំរុញការវិនិយោគក្នុងភូមិភាគឦសាន ដែលជាក្រុមការងារអន្តរក្រសួង ដើម្បីសម្រួលនីតិវិធីពិនិត្យ អនុម័ត និងតាមដានការអនុវត្តគម្រោងវិនិយោគ ក៏ដូចជាលុបបំបាត់ការ ចំណាយធនធានមិនចាំបាច់ និងភាពយឺតយ៉ាវខាងផ្នែកនីតិវិធី និងរដ្ឋបាលដែលបង្កឱ្យមានភាពរារែកពីវិនិយោគិន។ ការពង្រឹង សមត្ថភាពតួអង្គពាក់ព័ន្ធ រួមទាំងរដ្ឋបាល និងមន្ទីរជំនាញខេត្ត អំពីកម្មវិធីពិសេស, នីតិវិធីប្រតិបត្តិនានាពាក់ព័ន្ធនឹងការវិនិយោគ និងសក្តានុពលវិនិយោគរបស់ភូមិភាគឦសាន តាមសិទ្ធិអំណាចនៃស្ថាប័នរៀងៗខ្លួន។ ការជំរុញនៃការចូល រួមពីសំណាក់ភាគីពាក់ព័ន្ធ តាមរយៈការពង្រឹង និងការរក្សាទំនាក់ទំនងសកម្មរវាង ក.វ.ឦសាន, រដ្ឋបាល និងមន្ទីរជំនាញខេត្ត, សហគមន៍មូលដ្ឋាន និង វិនិយោគិនជាតិ និងអន្តរជាតិនានា ដើម្បីបង្កើតនូវប្រព័ន្ធគាំទ្រ ដែលការពារ និងធានានិរន្តរភាពនៃការវិនិយោគនៅភូមិភាគឦសាន សំដៅជំរុញការពង្រីកមូលដ្ឋានសេដ្ឋកិច្ច ចំពោះបណ្តាខេត្តដែលនៅឆ្ងាយពីមជ្ឈមណ្ឌលកំណើន, ជំរុញការតភ្ជាប់នៃចរន្តសេដ្ឋកិច្ចជាតិ និងបំពេញ បន្ថែមលើយុទ្ធសាស្ត្រ និងគោលនយោបាយនានារបស់រាជរដ្ឋាភិបាល តាមរយៈការដាក់ចេញនូវវិធានការ និងយន្តការមាន លក្ខណៈជាកញ្ចប់ និងប្រទាក់ក្រឡា ប្រកបដោយតម្លាភាព និងប្រសិទ្ធភាព។កម្មវិធីពិសេសជំរុញការវិនិយោគក្នុងភូមិភាគឦសាន បានកំពុងទទួលបានការចាប់អារម្មណ៍កាន់តែច្រើនពីសំណាក់វិនិយោ- គិន និងធុរជន តាមរយៈការលើកទឹកចិត្តពិសេសផ្សេងៗសម្រាប់ការវិនិយោគ គួបផ្សំនឹងការដោះស្រាយបញ្ហាប្រឈមនានារបស់ វិនិយោគិន, ការបំពេញបន្ថែមពីគោលនយោបាយអភិវឌ្ឍសេដ្ឋកិច្ចរបស់រាជរដ្ឋាភិបាល ក៏ដូចជាការអភិវឌ្ឍហេដ្ឋារចនាសម្ព័ន្ធជាយុទ្ធសាស្ត្រសំខាន់ៗ រួមទាំងការកសាងផ្លូវក្រវាត់ព្រំដែន, ព្រែកជីកហ្វ៊ូណនតេជោ, កំពង់ផែពហុបំណង និងព្រលានយន្តហោះជាដើម ដែលនឹងជួយដល់កម្មវិធីពិពិធកម្មផលិតផល, ពង្រឹងភាពតភ្ជាប់ហេដ្ឋារចនាសម្ព័ន្ធបន្ថែមទៀត និងប្រព័ន្ធឡូជីស្ទិក ដើម្បីគាំទ្រដល់ បរិយាកាសវិនិយោគទាំងមូលនៅកម្ពុជា។ គួរបញ្ជាក់ថា ក្រោមក្របខ័ណ្ឌនៃកម្មវិធីពិសេសនេះ, វិនិយោគិនអាចទទួលបានការគាំទ្រគ្រប់ជ្រុងជ្រោយតាមរយៈ៖ ការលើកទឹកចិត្តផ្នែកពន្ធដារនិងពន្ធគយ, ការផ្តល់ហិរញ្ញប្បទានក្រោមអត្រាការប្រាក់សមរម្យ តាមរយៈ ធនាគារអភិវឌ្ឍន៍ជនបទ និងកសិកម្ម (ARDB) និងធនាគារសហគ្រាសធុនតូច និងមធ្យមកម្ពុជា (SME Bank), និងការជួយកាត់ បន្ថយថ្លៃដើមផលិតកម្ម, ការសម្រួលនីតិវិធី និងការគាំទ្រសកម្មភាពវិនិយោគឯកជន៕ អត្ថបទ៖ សុន រ៉ាឌី

លទ្ធផលនៃការអញ្ជើញចូលរួមរបស់ប្រមុខការទូតកម្ពុជា ក្នុងកិច្ចពិភាក្សាទូទៅនៃមហាសន្និបាតអង្គការសហប្រជាជាតិ លើកទី៨០ នៅទីក្រុងញូវយ៉ក

តាមការចាត់តាំងរបស់ សម្ដេចធិបតីនាយករដ្ឋមន្ត្រី, ឯកឧត្ដម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ បានដឹកនាំគណៈប្រតិភូជាន់ខ្ពស់កម្ពុជា ចូលរួមកិច្ចពិភាក្សាទូទៅ នៃមហាសន្និបាតអង្គការសហប្រជាជាតិ (អ.ស.ប.) លើកទី៨០ ដែលប្រព្រឹត្តទៅនៅថ្ងៃទី២៣-២៩ ខែកញ្ញា ឆ្នាំ២០២៥ នៅទីក្រុង ញូវយ៉ក ក្រោមមូលបទ «រួមគ្នាដើម្បីភាពប្រសើរឡើង៖ ៨០ឆ្នាំ និងច្រើនឆ្នាំទៀត ដើម្បីសន្តិភាព ការអភិវឌ្ឍ និងសិទ្ធិមនុស្ស»។ខាងក្រោមនេះជាលទ្ធផលនៃការអញ្ជើញចូលរួមរបស់ឯកឧត្ដម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ នៅក្នុងកិច្ចពិភាក្សាទូទៅនៃមហាសន្និបាតអង្គការសហប្រជាជាតិ (អ.ស.ប.) លើកទី៨០ នៅទីក្រុងញូវយ៉ក៖

ជនបរទេស ២៤នាក់ ត្រូវបានឃាត់ខ្លួនក្រោយកម្លាំងសមត្ថកិច្ចចុះបង្ក្រាបទីតាំង៣កន្លែង ជាប់ពាក់ព័ន្ធបទល្មើសឆបោកតាមប្រព័ន្ធបច្ចេកវិទ្យា

ភ្នំពេញ៖ គណៈបញ្ជាការដឹកនាំស្រាវជ្រាវ ស៊ើបអង្កេត និងបង្ក្រាបបទល្មើសគ្រប់ប្រភេទនៃក្រសួងមហាផ្ទៃបានចុះឡោមព័ទ្ធ បង្ក្រាប់ទីតាំងលួចលាក់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យាចំនួន០៣ទីតាំងផ្សេងគ្នាក្នងភូមិសាស្រ្តរាជធានីភ្នំពេញ និងបានឃាត់ខ្លួនជនបរទេស២៤នាក់។នៅថ្ងៃទី២៩ ខែកញ្ញា ឆ្នាំ២០២៥ កម្លាំងជំនាញរបស់អគ្គស្នងការដ្ឋាននគរបាលជាតិ ដោយមានការចូលរួមសហការពីអាជ្ញាធរមូលដ្ឋាន បានធ្វើការចុះត្រួតពិនិត្យទីតាំងជាប់ពាក់ព័ន្ធបទល្មើសឆបោកតាមប្រព័ន្ធបច្ចេកវិទ្យាចំនួន ០២កន្លែង និងបង្ក្រាបទីតាំង ០១កន្លែង ដែលលួចលាក់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា បន្ទាប់ពីសមត្ថកិច្ចបានស្រាវជ្រាវ ស៊ើបអង្កេតបញ្ជាក់ និងឃ្លាំមើលទីតាំងខាងលើប្រមាណ ០៣ខែកន្លងមក។ការបង្ក្រាប ធ្វើឡើងដោយអនុវត្តតាមបទបញ្ជាដ៏ម៉ឺងម៉ាត់របស់រាជរដ្ឋាភិបាល ក្នុងការទប់ស្កាត់ និងបង្ក្រាបបទល្មើសឆបោកតាមប្រព័ន្ធបច្ចេកវិទ្យា រួមទាំងគោលការណ៍ ណែនាំពី លោកអភិសន្តិបណ្ឌិត ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងការចង្អុលដឹកនាំដោយផ្ទាល់ពី នាយឧត្តមសេនីយ៍ អគ្គស្នងការនគរបាលជាតិ។សមត្ថកិច្ចជំនាញ បានរកឃើញជនបរទេសសរុបចំនួន ២៤នាក់ (ស្រី ០៣នាក់) លើ ០៣សញ្ជាតិ កំពុងស្នាក់នៅ និងបម្រើការងារក្នុងទីតាំងខាងលើ ដែលបានដកហូតវត្ថុតាងដូចជា កុំព្យូទ័រយួរដៃ Tablet Ipad ទូរសព្ទដៃ និងSim card បរទេស ដែលជាមធ្យោបាយសម្រាប់ប្រព្រឹត្តបទល្មើសឆបោកតាមប្រព័ន្ធ បច្ចេកវិទ្យា។បច្ចុប្បន្នជនសង្ស័យជាជនបរទេសទាំងអស់ខាងលើ ត្រូវបាននាំខ្លួនមកនាយកដ្ឋានជំនាញ បន្តនីតិវិធីសាកសួរ ឈានទៅស្រាវជ្រាវកំណត់ស្វែងរកមុខសញ្ញាមេខ្លោង ដើម្បីអនុវត្តតាមនីតិវិធី៕ អត្ថបទ៖ កុម្ភៈ

អគ្គលេខាធិការUNរំពឹងថា កម្ពុជា-ថៃនឹងរកដំណោះស្រាយគ្នាដោយសន្តិវិធីខណៈពេលមានជម្លោះនៅទីបញ្ចប់មានតែប្រជាជនទេជាអ្នករងគ្រោះ

អគ្គលេខាធិការអង្គការសហប្រជាជាតិ(UN) ឯកឧត្តម António Guterres បានបង្ហាញក្តីរំពឹងថាកម្ពុជា និងថៃ នឹងស្វែងរកដំណោះស្រាយជម្លោះព្រំដែនជាមួយគ្នាដោយសន្តិវិធី ហើយឯកឧត្តមអគ្គលេខាធិការ ក៏បានប្រាប់ទៅសមភាគីថៃផងដែរថា បញ្ហាជម្លោះនៅទីបញ្ចប់គឺមានតែប្រជាជនទេដែលជាអ្នករងគ្រោះ។យោងតាមសេចក្ដីប្រកាសព័ត៌មាន ស្ដីពីជំនួបរវាងឯកឧត្តម ប្រាក់ សុខុនឧបនាយករដ្ឋមន្ត្រីរដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ជាមួយឯកឧត្តម António Guterres អគ្គលេខាធិការអង្គការសហប្រជាជាតិ ដែលបានជួបគ្នាក្រៅកិច្ចពិភាក្សាទូទៅនៃសម័យប្រជុំលើកទី៨០ នៃមហាសន្និបាតអង្គការសហប្រជាជាតិ(UNGA8o) នៅទីក្រុងញូវយ៉ក កាលពីថ្ងៃទី២៦ ខែកញ្ញា ឆ្នាំ២០២៥កន្លងទៅនេះបានបញ្ជាក់ថា«ពាក់ព័ន្ធនឹងជម្លោះព្រំដែនកម្ពុជា-ថៃ ឯកឧត្តមអគ្គលេខាធិការ អ.ស.ប. បានបង្ហាញក្តីសង្ឃឹមយ៉ាងមុតមាំថា ប្រទេសជិតខាងទាំងពីរ(កម្ពុជា-ថៃ)នឹងអាចដោះស្រាយបញ្ហាប្រឈមដោយសន្តិវិធីតាមរយៈការសន្ទនា និងការប្តេជ្ញាចិត្តទៅវិញទៅមក។ ឯកឧត្តមបានជម្រាបថា ឯកឧត្តមបានប្រាប់ពីកង្វល់របស់កម្ពុជាទៅសមភាគីថៃ ហើយចង់បានដំណោះស្រាយចំពោះជម្លោះនេះ ព្រោះនៅទីបញ្ចប់ប្រជាជនជាអ្នករងទុក្ខ»។នៅក្នុងកិច្ចជំនួបនោះដែរ ឯកឧត្តមឧបនាយករដ្ឋមន្ត្រី ប្រាក់ សុខុន ក៏បានថ្លែងអំណរគុណឯកឧត្តមអគ្គលេខាធិការ អ.ស.ប. និងបានពាំនាំអំណរគុណរបស់ររាជរដ្ឋាភិបាលកម្ពុជា ដែលបានបន្តចូលរួមគាំទ្រដល់ការបន្ថយភាពតានតឹងក្នុងជម្លោះព្រំដែនកម្ពុជា-ថៃ ជាពិសេសតាមរយៈសេចក្ដីថ្លែងការណ៍ជាវិជ្ជមានរបស់ឯកឧត្តមដែលអំពាវនាវឱ្យភាគីទាំងសងខាង ឈប់ប្រើប្រាស់កម្លាំង ហើយបានស្នើឱ្យ ឯកឧត្តមអគ្គលេខាធិការបន្តប្រឹងប្រែងជួយក្នុងកិច្ចការនេះ។ កម្ពុជានឹងបន្តខិតខំប្រឹងប្រែងបន្ថែមទៀត ដើម្បីកាត់បន្ថយភាពតានតឹង កសាងទំនុកចិត្តឡើងវិញ និងស្តារប្រក្រតីភាពក្នុងទំនាក់ទំនងរបស់យើងជាមួយប្រទេសថៃឡើងវិញ។នៅចំពោះមុខអគ្គលេខាធិការ អ.ស.ប. ឯកឧត្តម ប្រាក់ សុខុន បានគូសទៀតថា«កម្ពុជាមិនប្រើអំណាចទៅបំពានប្រទេសណាមួយនោះទេ ទោះតូចជាងកម្ពុជាក៏ដោយ ព្រោះអ្វីដែលកម្ពុជាចង់បានគឺសន្តិភាព»។ ឯកឧត្តមបានបន្ថែមទៀតថា«កម្ពុជាបានឆ្លងកាត់សង្គ្រាមបីទសវត្សរ៍រួចមកហើយ និងសោកនាដកម្មអំពើប្រល័យពូជសាសន៍ ។ ដូច្នេះយើងបានយល់ច្បាស់ពីសង្គ្រាម ហើយអ្វីដែលយើងចង់បាន គឺសន្តិភាព ដូចយើងបានធ្វើនៅក្នុងការបញ្ជូនកងកម្លាំងថែរក្សាសន្តិភាព»។ យ៉ាងណាក៏ដោយឯកឧត្តម អគ្គលេខាធិការ អ.ស.ប. បានជូនពរឲ្យកម្ពុជាឱ្យទទួលបាន ជោគជ័យក្នុងការសន្ទនាជាមួយភាគីថៃ ដើម្បីស្វែងរកដំណោះស្រាយវិជ្ជមានក្នុងផ្លូវសន្តិភាព។សូមបញ្ជាក់ថា នៅក្នុងកិច្ចជំនួបនោះ ប្រមុខការទូតកម្ពុជា និងអគ្គលេខាធិការអ.ស.ប. ក៏បាន ពិភាក្សាអំពីកិច្ចសហប្រតិបត្តិការល្អរវាងកម្ពុជា និងអង្គការសហប្រជាជាតិផងដែរ ដោយក្នុងនោះ ឯកឧត្តមអគ្គលេខាធិការ អ.ស.ប. បានសម្តែងការកោតសរសើរចំពោះភាពជាដៃគូដ៏ល្អរវាងអង្គការសហប្រជាជាតិ និងកម្ពុជា ជាពិសេសតួនាទីរបស់កម្ពុជាក្នុងនាមជាប្រទេសដែលផ្តល់កងកម្លាំងថែរក្សាសន្តិភាព និងការចូលរួមយ៉ាងសកម្មក្នុងកិច្ចសហប្រតិបត្តិការបណ្តុះបណ្តាលត្រីភាគី។ ឯកឧត្តមក៏បានកោតសរសើរចំពោះវឌ្ឍនភាពដ៏គួរឱ្យកត់សម្គាល់របស់កម្ពុជាឆ្ពោះទៅរកគោលដៅអភិវឌ្ឍន៍ប្រកបដោយចីរភាព និងបានគូសបញ្ជាក់ពីការចូលរួមប្រកបដោយស្ថាបនា និងការគាំទ្ររបស់កម្ពុជានៅក្នុងដំណើរការពហុភាគីនេះផងដែរ។ទាក់ទងនឹងកងទ័ពមួកខៀវនេះដែរ ឯកឧត្តមឧបនាយករដ្ឋមន្ត្រី បានបញ្ជាក់ជាថ្មីថា កម្ពុជាផ្តល់ទំនុកចិត្តយ៉ាងខ្លាំងចំពោះអង្គការសហប្រជាជាតិ ក្នុងការលើកកម្ពស់ពហុភាគីនិយម សណ្ដាប់ធ្នាប់អន្តរជាតិដែលផ្អែកលើច្បាប់ ការគ្រប់គ្រង និងដោះស្រាយវិវាទដោយសន្តិវិធី ព្រមទាំងការគោរពគោលការណ៍នៃធម្មនុញ្ញអង្គការសហប្រជាជាតិ និងច្បាប់អន្តរជាតិ។ ឯកឧត្តមក៏បានបញ្ជាក់ជាសារជាថ្មីពីការប្តេជ្ញាចិត្តរបស់កម្ពុជាក្នុងការបន្តផ្តល់ការរួមចំណែកដ៏យ៉ាងសកម្មចំពោះប្រតិបត្តិការថែរក្សាសន្តិភាព និងត្រៀមខ្លួនជាស្រេចក្នុងការចូលរួមក្នុងបេសកកម្មណា មួយដែលស្នើដោយអង្គការសហប្រជាជាតិ និងរួមចំណែកដល់ជំនួយមនុស្សធម៌ និងប្រយុទ្ធប្រឆាំងផលប៉ះពាល់នៃការប្រែប្រួលអាកាសធាតុជាដើម៕ អត្ថបទ៖ បាន ចក់

បណ្ដាញសង្គម

ព័ត៌មានថ្មីៗ

អ៊ីរ៉ង់ព្រមានថាសកម្មភាពខ្វះការប្រុងប្រយ័ត្នរបស់លោកTrump កំពុងទាញអាមេរិកចូលក្នុងល្បែងដ៏គ្រោះថ្នាក់

អ៊ីរ៉ាក់ ជំរុញឱ្យអតិថិជនផ្ញើផែនការដឹកប្រេង ក្រោយទទួលបានការលើកលែងពីអ៊ីរ៉ង់ នៅច្រកសមុទ្រហ័រមូស

ភាពតានតឹងពាណិជ្ជកម្មរបស់លោក Trump ជាមួយចិន ក្លាយជាចំណុចផ្ដោត មុនកិច្ចប្រជុំកំពូលខែឧសភា

លោក Trump ព្រមានវាយស្រោចកាន់តែខ្លាំងលើអ៊ីរ៉ង់ ប្រសិនបើច្រកសមុទ្រហ័រមូស នៅតែបន្តបិទ

យានដ្រូនរបស់អ៊ុយក្រែន ត្រូវបានដាក់កំហុសចំពោះការលិចនាវាដឹកទំនិញ ខណៈការនាំចេញប្រេងរបស់រុស្ស៊ីត្រូវបានរំខាន

ស្លាបប្រដាប់អាវុធក្រុមហាម៉ាស៖ ការអំពាវនាវឱ្យមានការរំសាយអាវុធ មិនអាចទទួលយកបានទេ

មេដឹកនាំអ៊ុយក្រែន បង្ហាញក្ដីបារម្ភជាថ្មីថាការអូសបន្លាយសង្គ្រាមមជ្ឈិមបូព៌ាអាចប៉ះពាល់ការគាំទ្រពីអាមេរិកលើប្រទេសខ្លួន

ឡាយហ្វ និងISI បន្ដប្រទាញប្រទុងនៅបាតតារាងលីគ ខណៈកងយោធពលខេមរភូមិន្ទ ក៏មិនទាន់សុវត្ថិភាព

ព្រះខ័នរាជ ត្រូវការ ១ពិន្ទុទៀតប៉ុណ្ណោះ ដើម្បីគ្រងជើងឯកលីគកំពូលកម្ពុជា ឆ្នាំ២០២៥/២៦

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877