BTV NEWS

ប្រមុខការពារជាតិកម្ពុជា បន្តចុះសួរសុខទុក្ខយោធិនកំពុងការពារបូរណភាពទឹកដីនៅទិសយោធភូមិភាគទី៣

ពលករ និងសហគមន៍ខ្មែរជាង ៤០០០នាក់នៅក្នុងក្រុងក្វាងជូនៃប្រទេសកូរ៉េខាងត្បូង ប្រារព្ធកម្មវិធីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ

មន្ត្រីនគរបាលព្រំដែនខេត្តកោះកុង ដែលបាញ់មនុស្សស្លាប់ចូលសារភាពហើយ

អាជ្ញាធរខេត្តព្រះសីហនុបើកប្រតិបត្តិការបង្ក្រាប online scam មួយកន្លែងឃាត់ខ្លួនជនបរទេស១២១នាក់

ព័ត៌មានជាតិ

ពិព័រណ៍ផលិតផលចិននៅកម្ពុជា ២០២៥ បង្ហាញពីភាពរីកចម្រើន នៃទំនាក់ទំនងសេដ្ឋកិច្ចពាណិជ្ជកម្មប្រទេសទាំងពីរ

ឯកឧត្តម សំហេង បូរ៉ា រដ្ឋលេខាធិការក្រសួងពាណិជ្ជកម្ម មានប្រសាសន៍ថា ពិព័រណ៍ផលិតផលចិននៅកម្ពុជា ២០២៥ បង្ហាញឱ្យឃើញពីភាពរីកចម្រើន នៃទំនាក់ទំនងសេដ្ឋកិច្ចពាណិជ្ជកម្មរវាងប្រទេសទាំងពីរ។ ការថ្លែងនេះធ្វើឡើងក្នុង ឱកាស ឯកឧត្ដម ជាតំណាង លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានអញ្ជើញចូលរួមជាគណអធិបតីក្នុងពិធីបើកសម្ពោធ «ពិព័រណ៍ផលិតផលចិននៅកម្ពុជា ២០២៥» ដែលរៀបចំដោយក្រុមហ៊ុន Cambodian Frank Inman Exhibition Co., Ltd និងមានរយៈពេល ៣ថ្ងៃ គឺចាប់ពីថ្ងៃទី២៨ ដល់៣០ ខែកញ្ញា ឆ្នាំ២០២៥ នៅមជ្ឈមណ្ឌលសន្និបាត និងពិព័រណ៍កោះពេជ្រ។ក្នុងឱកាសនោះ ឯកឧត្តមរដ្ឋលេខាធិការ បានកោតសរសើរ វាយតម្លៃខ្ពស់ និងថ្លែងអំណរគុណដល់ក្រុមហ៊ុន Cambodian Frank Inman Exhibition Co., Ltd ដែលបានរៀបចំព្រឹត្តិការណ៍នេះបានយ៉ាងល្អ និងបានជ្រើសរើសប្រទេសកម្ពុជាសម្រាប់រៀបចំព្រឹត្តិការណ៍នេះឡើង។ ឯកឧត្តមរដ្ឋលេខាធិការ បន្តថា ការដាក់តាំងបង្ហាញនូវផលិតផលចិននៅកម្ពុជា ក្នុងឱកាសនេះ បានបង្ហាញឱ្យឃើញពីភាពរីកចម្រើន នៃទំនាក់ទំនងសេដ្ឋកិច្ចពាណិជ្ជកម្មរវាងប្រទេសទាំងពីរ ក៏ដូចជាតម្រូវការរបស់ប្រជាជនកម្ពុជា ចំពោះផលិតផលចិននៅកម្ពុជា ជាពិសេសសម្ភារៈបរិក្ខារអគ្គិសនី គ្រឿងអេឡិចត្រូនិក សម្ភារៈសំណង់ គ្រឿងសង្ហារិម និងសម្ភារៈប្រើប្រាស់ក្នុងគេហដ្ឋាន ជាដើម។បន្ថែមលើនេះ ឯកឧត្តមរដ្ឋលេខាធិការ ក៏បានលើកឡើងពីទំនាក់ទំនងដ៏រឹងមាំជាប្រពៃណី នៃទំនាក់ទំនងការទូត សេដ្ឋកិច្ច និងពាណិជ្ជកម្មរវាងកម្ពុជា និងចិន ជាពិសេសតាមរយៈការផ្លាស់ប្តូរដំណើរទស្សនកិច្ចផ្លូវការ ផ្លូវរដ្ឋ និងការអញ្ជើញចូលរួមកិច្ចប្រជុំនានាទៅវិញទៅមករបស់ថ្នាក់ដឹកនាំកំពូលនៃប្រទេសទាំងពីរ ដែលជាការឆ្លុះបញ្ចាំងឱ្យឃើញនូវការយកចិត្តទុកដាក់ខ្ពស់ជាអាទិភាពរបស់ថ្នាក់ដឹកនាំកំពូល ក្នុងការបន្តពូនជ្រុំ និងពង្រឹងនូវមិត្តភាពដែកថែប កម្ពុជា-ចិន និងក្របខ័ណ្ឌកិច្ចសហប្រតិបត្តិការត្បូងពេជ្រ។គួរបញ្ជាក់ថា ពិធីបើកនេះ មានការអញ្ជើញចូលរួមពី ឯកឧត្តម លោកជំទាវ លោក លោកស្រី តំណាងក្រសួងវប្បធម៌និងវិចិត្រសិល្បៈ ក្រសួងការងារនិងបណ្តុះបណ្តាលវិជ្ជាជីវៈ ក្រុមប្រឹក្សាអភិវឌ្ឍន៍កម្ពុជា សភាពាណិជ្ជកម្មកម្ពុជា សភាពាណិជ្ជកម្មអាម៉េរិកប្រចាំកម្ពុជា សមាគមន៍ធុរកិច្ចបរទេសនៅកម្ពុជា និងធុរជន-វិនិយោគិនកម្ពុជា-ចិន ជាច្រើនរូប៕

មន្ត្រីខុទ្ទកាល័យ សម្ដេចតេជោ ប្រធានព្រឹទ្ធសភា អញ្ជើញគោរពវិញ្ញាណក្ខន្ធសព ឧបាសិកាពុទ្ធសាសនូបត្ថម្ភ មាឃ ផល

ភ្នំពេញ ៖ នារសៀល ថ្ងៃចន្ទ ៧កើត ខែអស្សុជ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី២៩ ខែកញ្ញា ឆ្នាំ២០២៥ ឯកឧត្តម បណ្ឌិត ឈីវ យីស៊ាង នាយកខុទ្ទកាល័យសម្ដេចតេជោ ប្រធានព្រឹទ្ធសភា បានអញ្ជើញនាំយកសារលិខិតរំលែកមរណទុក្ខរបស់ សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទី នៃព្រះរាជាណាចក្រកម្ពុជា ជូនចំពោះ ឯកឧត្តម ឡាយ សំកុល អគ្គលេខាធិការនៃអគ្គលេខាធិការដ្ឋានព្រឹទ្ធសភា និងបានអញ្ជើញដឹកនាំគណៈប្រតិភូជាថ្នាក់ដឹកនាំ សមាជិកខុទ្ទកាល័យ គោរពវិញ្ញាណក្ខន្ធសព ឧបាសិកាពុទ្ធសាសនូបត្ថម្ភ មាឃ ផល ត្រូវជា ម្តាយក្មេក ឯកឧត្តម ឡាយ សំកុល អគ្គលេខាធិការព្រឹទ្ធសភា ដែលបានទទួលមរណភាព នៅថ្ងៃចន្ទ ៧កើត ខែអស្សុជ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី២៩ ខែកញ្ញា ឆ្នាំ២០២៥ ក្នុងជន្មាយុ ៧៩ឆ្នាំ ដោយជរាពាធ នៅគេហដ្ឋាននៃសព ស្ថិតក្នុងភូមិជ្រោយអំពិល សង្កាត់ក្បាលកោះ ខណ្ឌច្បារអំពៅ រាជធានីភ្នំពេញ៕

កម្ពុជា-អាម៉េរិកបើកកិច្ចសន្ទនាស្តីពីដំណើរឆ្ពោះទៅកាន់គំនិតផ្តួចផ្តើមលើយុទ្ធសាស្ត្រ គ្រប់គ្រងពាណិជ្ជកម្មអាវុធមហាប្រល័យ

កម្ពុជា និងសហរដ្ឋអាមេរិកនៅព្រឹកថ្ងៃទី២៩ ខែកញ្ញា ឆ្នាំ២០២៥នេះ បានបើកកិច្ចសន្ទនា ស្តីពី«ដំណើរឆ្ពោះទៅកាន់គំនិតផ្តួចផ្តើមលើយុទ្ធសាស្ត្រ គ្រប់គ្រងពាណិជ្ជកម្មអាវុធមហាប្រល័យ» ដោយកិច្ចសន្ទនានេះ ធ្វើឡើងនៅសណ្ឋាគារ រ៉ាហ្វល ឡឺរ៉ូយ៉ាល់ ភ្នំពេញ ក្រោមអធិបតីភាព នាយឧត្តមសេនីយ៍ បណ្ឌិត ផន ណារ៉ា សមាជិកអចិន្ត្រៃយ៍ និងជាអគ្គលេខាធិការ អាជ្ញាធរជាតិទប់ស្កាត់ អាវុធគីមី នុយក្លេអ៊ែរ ជីវសាស្ត្រ និងវិទ្យុសកម្ម ក្រសួងការពារជាតិកម្ពុជា។ កិច្ចសន្ទនា កម្រិតមន្ត្រីជាន់ខ្ពស់នេះ គឺធ្វើឡើងមានរយៈពេល២ថ្ងៃ ដែលរៀបចំឡើងដោយអាជ្ញាធរជាតិទប់ស្កាត់ អាវុធគីមី នុយក្លេអ៊ែរ ជីវសាស្ត្រ និងវិទ្យុសកម្ម នៃព្រះរាជាណាចក្រកម្ពុជា រួមសហការជាមួយក្រសួងការបរទេស សហរដ្ឋអាម៉េរិក ដោយបានប្រមូលផ្តុំនូវអ្នកជំនាញនានាជាច្រើន មកពីបណ្តាស្ថាប័នជាតិនៃរាជរដ្ឋាភិបាល រួមមាន៖ មន្ត្រីគយ អ្នកជំនាញក្នុងវិស័យសន្តិសុខ អ្នកជំនាញផ្នែកច្បាប់ និងតំណាងមកពីអង្គការ-ស្ថាប័នអន្តរជាតិ សន្តិសុខ អ្នកជំនាញផ្នែកច្បាប់ និងតំណាងមកពីអង្គការ-ស្ថាប័នអន្តរជាតិនានា ហើយបានឆ្លុះបញ្ចាំងពីកិច្ចខិតខំប្រឹងប្រែងរួមគ្នារបស់កម្មវិធី EXBS ដើម្បីពង្រឹងកិច្ចសហប្រតិបត្តិការការកសាងសមត្ថភាព និងការបង្កើនភាពរឹងមាំរបស់ប្រទេសជាដៃគូ ក្នុងការប្រឆាំងនឹងការគំរាមកំហែងឆ្លងដែននូវអាវុធមហាប្រល័យ, ប្រព័ន្ធដឹកជញ្ជូនអាវុធទាំងនោះ ប្រភេទអាវុធទូទៅ ក៏ដូចជា ទំនិញទ្វេមុខ ជាដើម។ ថ្លែងនៅក្នុងកិច្ចសន្ទនានោះ នាយឧត្តមសេនីយ៍ បណ្ឌិត ផន ណារ៉ា បានលើកឡើងថា អស់រយៈពេលជាច្រើនឆ្នាំមកហើយ ដែលយើងគ្រប់គ្នាបានដឹងថា កម្មវិធីគ្រប់គ្រងការនាំចេញ និងសន្តិសុខព្រំដែន (EXBS Program) នេះ គឺជាគំនិតផ្តួចផ្តើមរបស់រដ្ឋាភិបាលនៃសហរដ្ឋអាម៉េរិក បានក្លាយទៅជាដៃគូ ដ៏សំខាន់មួយសម្រាប់ប្រជាជាតិនានានៅទូទាំងសកលលោក រួមទាំងប្រទេសកម្ពុជាផងដែរ។ ក្នុងភាពជាដៃគូនេះ កម្មវិធីEXBS បានផ្តល់នូវជំនាញ និងធនធានសំខាន់ៗក្នុងការពង្រឹងសមត្ថភាពជាតិ ដើម្បីការពារពីការរីកសាយភាយនៃអាវុធមហាប្រល័យ (WMD) និងប្រព័ន្ធដឹកជញ្ជូនអាវុធទាំងនោះ។ ស្របពេលជាមួយគ្នានេះដែរ កម្មវិធីនេះក៏បានគាំទ្រដល់ការធ្វើពាណិជ្ជកម្មស្របច្បាប់ និងជំរុញឱ្យមានសន្តិសុខនៅតាមព្រំដែន ដែលអាចការពារដល់ប្រជាជន សេដ្ឋកិច្ច និងអនាគតរួមគ្នារបស់ប្រជាជាតិ ទាំងអស់។នាយឧត្តមសេនីយ៍ ផន ណារ៉ា បានលើកឡើងទៀតថានៅក្នុងពិភពលោកនាពេលបច្ចុប្បន្ននេះ កត្តាលំហូរពាណិជ្ជកម្មសកលមាន ភាពស្មុគ្រស្មាញជាងពេលណាៗទាំងអស់ ដោយយើងត្រូវប្រឈមមុខនឹងហានិភ័យនានាដែលកើតមានឡើង ពេលពុំបានគ្រប់គ្រងត្រឹមត្រូវនៅតាមព្រំដែន។ ហេតុនេះហើយទើបវត្តមាននៃកម្មវិធីEXBSនេះ ពិតជាមានសារៈសំខាន់ណាស់ក្នុងការជួយប្រទេសយើងឱ្យមានតុល្យភាពក្នុងការសម្របសម្រួលពាណិជ្ជកម្ម ជាមួយនឹងការការពារសន្តិសុខជាតិ និងអន្តរជាតិ។ ឯកឧត្តមបានបញ្ជាក់ទៀតថា សម្រាប់ព្រះរាជាណាចក្រកម្ពុជា អត្ថប្រយោជន៍ដែលទទួលបានពី កិច្ចសហប្រតិបត្តិការជាមួយកម្មវិធី EXBS គឺមានច្រើនណាស់។ ជាក់ស្តែង តាមរយៈគំនិតផ្តួចផ្តើម PWMD-STMI ដែលស្ថិតនៅក្នុងក្របខណ្ឌនៃកម្មវិធីនេះ នឹងគាំទ្រដោយផ្ទាល់ដល់កិច្ចខិតខំប្រឹងប្រែងរបស់កម្ពុជា ដើម្បីពង្រឹងវិស័យសន្តិសុខជាតិ តាមរយៈការបង្កើតប្រព័ន្ធដ៏រឹងមាំមួយ ដើម្បីគ្រប់គ្រងពាណិជ្ជកម្មជាយុទ្ធសាស្ត្រ ការពារប្រជាជន និងព្រំដែន របស់យើងធ្វើជាចរន្តក្នុងការចរាចរទំនិញខុសច្បាប់នោះ៕អត្ថបទ ៖ បាន ចក់

អតីតយុទ្ធជនថ្លែងអំណរគុណសម្តេចតេជោដែលបានយកចិត្តទុកដាក់មើលថែនិងទំនុកបម្រុងពួកគេ

កំពង់ឆ្នាំង ៖ អតីតយុទ្ធជនកម្ពុជាខេត្តកំពង់ឆ្នាំង ដែលមានពិការភាព នៅថ្ងៃទី២៩ ខែកញ្ញា នេះ បានបង្ហាញការសប្បាយចិត្ត និងថ្លែង អំណរគុណដល់សម្តេចតេជោ ហ៊ុន សែន ប្រធានសមាគមអតីតយុទ្ធជនកម្ពុជា ដែលបានយកចិត្តទុកដាក់មើលថែ ទំនុកបម្រុង ទាំងដី ផ្ទះ សម្ភារៈ ដើម្បីឱ្យគ្រួសារអតីតយុទ្ធជនទាំងអស់ មានជីវភាពល្អប្រសើរ។អតីតយុទ្ធជនកម្ពុជាខេត្តកំពង់ឆ្នាំង បានលើកឡើងថា តាំងពីពួកគេក្លាយជាអតីតយុទ្ធជនមក សម្តេចតេជោ ហ៊ុន សែន ប្រធានសមាគមអតីតយុទ្ធជនកម្ពុជា និងសម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា តែងតែផ្តល់នូវ ភាពកក់ក្តៅជានិច្ច មិនទុកពួកគេចោលឡើយ ដោយបានមើលថែ ទំនុកបម្រុង ជាពិសេសបានចែកជូននូវដីលំនៅដ្ឋាន ដីកសិកម្ម ផ្ទះ និងសម្ភារៈផ្សេងៗទៀត។ អតីតយុទ្ធជនក្នុងខេត្តកំពង់ឆ្នាំងទាំងអស់ សូមថ្លែងអំណរគុណយ៉ាងជ្រៀលជ្រៅដល់សម្តេចទាំង ពីរ និងសមាគមអតីតយុទ្ធជនថ្នាក់ជាតិ ក្រោមជាតិ ដែលបានជួយដល់ពួកគេ ។សម្តេចតេជោ ហ៊ុន សែន ប្រធានសមាគមអតីតយុទ្ធជនកម្ពុជា និងសម្តេចធិបតី ហ៊ុន ម៉ាណែត នាយករដ្ឋមន្ត្រី តែងតែ នឹករលឹកដល់សមាជិកអតីតយុទ្ធជនទូទាំងខេត្តកំពង់ឆ្នាំង ដោយសម្តេចទាំងពីរ បានវាយតម្លៃខ្ពស់ ចំពោះការធ្វើពលីកម្មគ្រប់ បែបយ៉ាងរបស់អតីតយុទ្ធជន ក្នុងបុព្វហេតុសុខសន្តិភាពរបស់ប្រទេសជាតិទាំងមូល ហើយសម្ដេចតែងតែគិតគូរពីសុខទុក្ខរបស់ អតីតយុទ្ធជនគ្រប់ពេលវេលាទាំងអស់។ សម្តេចទាំងពីរ ក៏បានអរគុណចំពោះថ្នាក់ដឹកនាំសមាគមអតីតយុទ្ធជនក្រុង ស្រុក ខេត្ត និងសាខាឃុំ សង្កាត់ ដែលបានយកចិត្តទុក ដាក់មើលថែអតីតយុទ្ធជន និងសូមឲ្យខេត្តខិតខំគ្រប់គ្រងដីសម្បទានសម្រាប់អតីត យុទ្ធជនឲ្យបានល្អ ដើម្បីទុកសម្រាប់ដោះស្រាយជូនអតីតយុទ្ធជនជាបន្តទៀត និងបន្តដោះស្រាយជីវភាពអ្នកដែលជួបលំបាកឲ្យ ទាន់ពេលវេលា៕អត្ថបទ៖ កាំង ហុងវាស្នា

អតីតយុទ្ធជននិងនិវត្តជន៖ ផ្ទះនិងដីកសិកម្មដែលរាជរដ្ឋាភិបាលផ្ដល់ជូនបានជួយកែប្រែជីវភាពគ្រួសារ

ស្វាយរៀង ៖ តំណាងអតីតយុទ្ធជន គ្រួសារពលី ពិការ មរណៈ និងនិវត្តជន ខេត្តស្វាយរៀង ថ្លែងអំណរគុណចំពោះ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា ប្រធានសមាគមអតីតយុទ្ធជន និងនិវត្តជនកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដែលសម្តេចទាំងទ្វេរ បានគិតគូរ លើជីវភាព តាមរយះ ផ្ដល់ផ្ទះស្នាក់ ពិសេសដីកសិកម្ម អោយពួកគាត់ប្រើប្រាស់និងបង្កបង្កើនផលបន្ថែមលើរបបសោធន៏ដែលរាជរដ្ឋាភិបាលបានឧបត្ថម្ភប្រចាំខែ ។ លោកទូច សារ៉ាវុធ អតីតយុទ្ធជនរបួសពិការ និងលោក ម៉ៅ សាវ៉ាន់ អតីតនគរបាលជាតិចូលនិវត្ត នៅថ្ងៃទី២៩ ខែកញ្ញា ឆ្នាំ ២០២៥នេះបានមានចំណាប់អារម្មណ៍ ដោយគោរពថ្លៃអំណរគុណយ៉ាងជ្រាលជ្រៅចំពោះប្រមុខរាជរដ្ឋាភិបាល ពិសេសសម្ដេចអគ្គមហាសេនាបតីតេជោហ៊ុន សែន ប្រធានព្រឹទ្ធសភា ប្រធានសមាគមអតីតយុទ្ធជនកម្ពុជា ដែលសម្ដេចបានគិតគូរ ផ្ដល់ផ្ទះ និងដីកសិកម្ម តាមរយៈក្រសួងសង្គមកិច្ចអតីតយុទ្ធជននិងយុវនីតិសម្បទាឲ្យពួកគាត់រស់នៅនិងបង្កបង្កើនផល ។ លោកបានបញ្ជាក់បន្ថែមថាបន្ទាប់ពី រាជរដ្ឋាភិបាល ពិសេសសម្ដេចអគ្គមហាសេនាបតីតេជោហ៊ុន សែនប្រធានព្រឹទ្ធសភា ប្រធានសមាគមអតីតយុទ្ធជនកម្ពុជាផ្ដល់ដី និងផ្ទះដល់ពួកគាត់ រហូតមកដល់បច្ចុប្បន្ននេះ គ្រួសារអតីតយុទ្ធជន ពលី ពិការ និងរមរណៈ នៅភូមិជីកដី ឃុំអណ្តូងត្របែក ស្រុករមាសហែក ពួកគាត់រស់នៅបានសមរម្យ ហើយជាពិសេសបំផុតគឺជីវភាព ហូបចុកបានគ្រប់គ្រាន់តាមរយៈបង្កបង្កើនផលដាំដំណាំនិងចិញ្ចឹមសត្វ រូមផ្សំនិងប្រាក់បៀវត្ស ចូលសោធន៍បើកផ្ដល់ឲ្យពួកគាត់បានទាន់ពេលវេលាផងនោះ។តាមរបាយការណ៍របស់មន្ទីរសង្គមកិច្ចអតីតយុវជននិងយុវនីតិសម្បទាខេត្តស្វាយរៀងបញ្ជាក់ឲ្យដឹងថា គិតមកដល់ឆ្នាំ២០២៥ នេះ អតីតយុទ្ធជន គ្រួសារអតីតយុទ្ធជន គ្រួសារពលី គ្រួសារមរណៈ និងនិវត្ដជនជាមន្ត្រីនគរបាលជាតិ និងកងយុទ្ធពលខេមរៈភូមិនបានចំនួនផ្ទះ៥២៥ខ្នង ក្នុងនោះនៅស្រុករមាសហែក មានចំនួន៤០០ខ្នង និងនៅតាមព្រុំដែន វៀតណាម ក្នុងស្រុកកំពង់រោទិ៍ និងស្រុកចន្ទ្រា មានចំនួន ២២៥ខ្នង បច្ចុប្បន្នក្រុមការងារកំពង់សាងសងផ្ទះ បន្តចែកដល់អតីតយុទ្ធជន គ្រួសារអតីតយុទ្ធជន ពលី និង មរណះចំនួន២១៦ខ្នង ៕ ដោយ ៖ ភា សារិទ្ធ

ផ្លូវបេតុងចំនួន១ខ្សែស្ថិតនៅសង្កាត់បាវិតក្រុងបាវិតខេត្តស្វាយរៀងត្រៀមដាក់ជូនពលរដ្ឋប្រើប្រាស់

ស្វាយរៀង ៖ ផ្លូវបេតុងឆ្អឹងដែកចំនួន១ខ្សែប្រវែងជាង៤០០ម៉ែត្រ ស្ថិតនៅក្នុងសង្កាត់បាវិត ក្រុងបាវិត ខេត្តស្វាយរៀងសម្រេចបានប្រមាណ៥០% និងត្រៀមដាក់ជូនពលរដ្ឋប្រើប្រាស់ បន្ទាប់ពីបញ្ចប់ការងារស្ថាបនា ដែលប្រើប្រាស់ថវិកាមូលនិធិឃុំ/សង្កាត់ឆ្នាំ២០២៥។លោក សាញ់ សាខុន ចៅសង្កាត់បាវិត ក្រុងបាវិត ខេត្តស្វាយរៀង នៅថ្ងៃទី២៩ ខែកញ្ញា ឆ្នាំ២០២៥នេះបានប្រាប់ទូរទស្សន៏ btv អោយដឹងថាផ្លូវដែលក្រុមម៉ៅការស្ថាបនានេះ គឺជាផ្លូវប្រភេទបេតុង ស្ថិតនៅក្នុង ភូមិបាវិតកណ្តាល សង្កាត់បាវិត មានប្រវែងជាង៤០០ម៉ែត្រ ទទឹង៧ម៉ែត្រ ប្រើប្រាស់ថវិកាមូលនិធីឃុំ សង្កាត់ ឆ្នាំ២០២៥។ លោកបានបញ្ជាក់បន្ថែមថា ក្រៅពីការងារស្ថាបនាផ្លូវនៅក្នុងសង្កាត់នេះដែរ សាលាក្រុងបាវិត និង មន្ទីរសាធារណៈការនិងដឹកជញ្ជូនខេត្ត ក៏បានធ្វើការកែលំអរប្រពន្ធ័រំដោះទឹក និងសំណល់រាវ ចេញពីភូមិមួយចំនួនរបស់សង្កាត់ ចំនួន ១ខ្សែបន្ថែមទៀតផងដែរ ។ អបអរសាទរទទួលអំណោយផ្លូវថ្នល់ថ្មីពីរាជរដ្ឋាភិបាលតំណាងពលរដ្ឋរស់នៅក្នុងសង្កាត់ បានមានចំណាប់អារម្មណ៏ ដោយគោរពសម្ដែងនូវអំណរគុណយ៉ាងជ្រាលជ្រៅចំពោះរាជរដ្ឋាភិបាល សម្ដេចនាយករដ្ឋមន្ត្រី ដែលសម្តេច តែងតែបានយកចិត្តទុកដាក់គិតគួធ្វើការអភិវឌ្ឍន៏ប្រទេសជាតិលើគ្រប់វិស័យ ពិសេសថ្ងៃនេះពលរដ្ឋក៏ដូចរូបខ្ញុំផ្ទាល់បានទទួលផ្លូវដ៏ល្អប្រណិតសម្រាប់ប្រើប្រាស់ ខណៈដែលផ្លូវនេះពីមុនមានភាពទ្រុតទ្រោមមិនអាចបន្តចរាចរណ៍បានស្រួលដូចផ្លូវបច្ចុប្បន្ននេះ។សូមបញ្ជាក់ថាសង្កាត់បាវិតជាទីប្រជុំជនរបស់ក្រុង ដែលមានពលរដ្ឋ និងជាបណ្តុំរោងចក្រ សហគ្រាស និងក្រុមអាជីវកររស់នៅប្រកបរបបយ៉ាងច្រើនកុះករ ពិសេស កម្មករ បំរើការងារនៅតាមរោងចក្រ សហគ្រាសរាប់ម៉ឺននាក់ បន្ទាប់ពីរាជរដ្ឋាភិបាលបង្កើតអោយមានតំបន់សេដ្ឋកិច្ចពិសេស នៅឆ្នាំ២០០៥ក្នុងខេត្តកន្លងមក រាល់រចនាសម្ព័ន្ធ ផ្លូវថ្នល់ ប្រព័ន្ធរំដោះទឹក និងសំណល់រាវមិនអាចឆ្លើយតប បង្កឲ្យកកស្ទះ ទាំងចរាចរ និងប្រពន្ធ័រំដោះទឹក ស្ទើរាល់ថ្ងៃ ក្រោយពីកម្មករកម្មការិនីបញ្ចប់ការងារចាកចេញទៅតាមគេហដ្ឋានវិញ ។ ដោយ ៖ ភា សារិទ្ធ

រដ្ឋាភិបាល កំណត់យក ថ្ងៃទី១២ ខែឧសភា ជាទិវាអតីតយុទ្ធជន និង និវត្តជនកម្ពុជា

នៅក្នុងលទ្ធផល នៃអង្គមហាសន្និបាតវិសាមញ្ញ តំណាងសមាគមអតីតយុទ្ធជនកម្ពុជាទូទាំងប្រទេស ដែលរៀបចំដោយសមាគមអតីតយុទ្ធជន កម្ពុជា នាព្រឹកថ្ងៃទី២៩ ខែកញ្ញា ឆ្នាំ២០២៥ សន្និបាតវិសាមញ្ញ បានថ្លែងអំណរគុណចំពោះ សម្តេចមហាបវរធិបតី ហ៊ុន ម៉ាណែត នាយករដ្ឋ មន្ត្រីនៃព្រះរាជាណាចក្រកម្ពុជា ដែលបានកំណត់យក ថ្ងៃទី១២ ខែឧសភា ជាទិវាអតីតយុទ្ធជន និង និវត្តជនកម្ពុជា ដែលត្រូវប្រារព្ធធ្វើជារៀងរាល់ឆ្នាំ។ទិវានេះ អនុវត្ត តាមរយៈអនុក្រឹត្យលេខ ១៤៥អនក្រ.បក ចុះថ្ងៃ ទី១១ ខែសីហា ឆ្នាំ២០២៥ ដើម្បីលើកទឹកចិត្តដល់អតីតយុទ្ធជន និងនិវត្តជនកម្ពុជា និងជំរុញ ណែនាំគ្រប់ក្រសួង ស្ថាប័នរដ្ឋ អង្គការមិនមែនរដ្ឋាភិបាល និងសាធារណជនឱ្យចូលរួមអបអរសាទរ ទិវាដ៏ថ្លៃថ្លានេះ។គួរបញ្ជាក់ថា សម្តេចអគ្គមហាសេនាបតីតេជោ នាយឧត្តមសេនីយ៍ផុតលេខ ផ្កាយមាស៥ ហ៊ុន សែន ប្រមុខរដ្ឋស្តីទី និងជា ប្រធានសមាគមអតីតយុទ្ធជន និងនិវត្តជនកម្ពុជា បានអញ្ជើញជាអធិបតីដ៏ខ្ពង់ខ្ពស់បំផុត ដឹកនាំអង្គមហា សន្និបាតវិសាមញ្ញតំណាងសមាគមអតីតយុទ្ធជនកម្ពុជាទូទាំងប្រទេស នេះ ដែលរៀបចំដោយសមាគមអតីតយុទ្ធជនកម្ពុជា ដោយមានការអញ្ជើញចូលរួមពីថ្នាក់ដឹកនាំ និងសមាជិក សមាជិកា ជាតំណាងនៃគណៈកម្មាធិការកណ្តាល អ.ន.ក. គ្រប់ថ្នាក់។អង្គមហាសន្និបាតវិសាមញ្ញបានប្រព្រឹត្តទៅដោយរលូនតាមរបៀបវារៈដែលបានកំណត់ក្នុងបរិយាកាស សាមគ្គីភាព ភាតរភាព ក្នុងស្មារតីទទួលខុសត្រូវខ្ពស់ និងបានអនុម័តជាឯកច្ឆន្ទនូវរបាយការណ៍បូកសរុប លទ្ធផលការងាររយៈពេល ១០ឆ្នាំ (២០១៥-២០២៥) និងទិសដៅអនុវត្តបន្តរបស់សមាគម និងលក្ខន្តិកៈ សមាគមអតីតយុទ្ធជន និងនិវត្តជនកម្ពុជា ដោយបានប្តូរឈ្មោះសមាគមអតីតយុទ្ធជនកម្ពុជា មកជា សមាគមអតីតយុទ្ធជន និងនិវត្តជនកម្ពុជា និងបានពង្រីកសមាជិកភាពរបស់សមាគមគ្របដណ្តប់ទាំង និវត្តជន ដែលជាបុគ្គលធ្លាប់បានបម្រើការងារក្នុងវិស័យសាធារណៈ ហើយបានបញ្ចប់ការងាររបស់ខ្លួន ត្រឹមត្រូវតាមច្បាប់ ព្រមទាំងបានកំណត់អំពីថ្នាក់ដឹកនាំសមាគម ដែលក្នុងនោះ សម្តេចអគ្គមហាសេនាបតី តេជោ នាយឧត្តមសេនីយ៍ផុតលេខ ផ្កាយមាស៥ ហ៊ុន សែន ប្រមុខរដ្ឋស្តីទី ជាប្រធានសមាគមអតីតយុទ្ធជន និងនិវត្តជនកម្ពុជា ជារៀងរហូត។

ពលរដ្ឋភៀសសឹក ៨៦គ្រួសារ ត្រូវបានវិលត្រឡប់មកទីតាំងសុវត្ថិភាព ក្នុងភូមិសាស្ត្រខេត្តសៀមរាប

យោងតាមរបាយការណ៍ រដ្ឋបាលខេត្ដសៀមរាប បានបង្ហាញថា គិតត្រឹមល្ងាចថ្ងៃទី២៨ ខែកញ្ញា ឆ្នាំ២០២៥ ប្រជាជនភៀសសឹកចេញពីតំបន់ជម្លោះព្រំដែនកម្ពុជាថៃ មានចំនួន៨៦គ្រួសារ ស្មើនឹង២០៨នាក់ បានចូលមកស្នាក់នៅក្នុងភូមិសាស្ត្រខេត្តសៀមរាប បានកើនឡើងជនភៀសសឹកកើនចំនួន ១ ១៥៤គ្រួសារ ស្មើនឹង ៣ ៧០១នាក់ ខណៈដែលមានយកចិត្តទុកដាក់ខ្ពស់ពីថ្នាក់ដឹកនាំខេត្ត អាជ្ញាធរមូលដ្ឋាន និងមន្ត្រីពាក់ព័ន្ធ។របាយការណ៍របស់រដ្ឋបាលខេត្តសៀមរាប ក្នុងចំណោម១ ១៥៤គ្រួសារខាងលើ កំពុងស្នាក់នៅទីតាំងសុវត្ថិភាពចំនួន១៤១ទីតាំង ក្នុងនោះមាន ៦៥៦គ្រួសារកំពុងស្នាក់នៅតាមទីតាំងសុវត្ថិភាពដែលរៀបចំដោយរដ្ឋបាលក្រុងស្រុក និងចំនួន ៤៩៨គ្រួសារ បានស្នាក់នៅតាមផ្ទះប្រជាពលរដ្ឋ។បើតាមរបាយការណ៍នៃជនភៀសសឹកនេះ អាជ្ញាធរក៏បានជួបបញ្ហាមួយចំនួន ដូចជាពុំមានសម្ភារប្រើប្រាស់គ្រប់គ្រាន់ ដូចជាមុង ភួយ ថ្នាំមូស ធុងទឹក សម្ភារផ្ទះបាយ ខ្វះខាតបន្ទប់ទឹក បង្គន់អនាម័យ ទឹកស្អាត អគ្គិសនី និងការពារសត្វអាសិរពិសដើម។រដ្ឋបាលខេត្តសូមអំពាវនាវ ដល់សប្បុរសជន បន្ដជួយឧបត្ថម្ភ ជាសម្ភារ គ្រឿងឧបភោគ បរិភោគជាដើម ដើម្បីជួយសម្រាលការលំបាករបស់បងប្អូនជាជនភៀសសឹក៕

មហាសន្និបាតវិសាមញ្ញ តំណាងសមាគមអតីតយុទ្ធជនកម្ពុជា អនុម័តសេចក្តីសម្រេច ៩ចំណុច

សម្តេចអគ្គមហាសេនាបតីតេជោ នាយឧត្តមសេនីយ៍ផុតលេខ ផ្កាយមាស៥ ហ៊ុន សែន ប្រមុខរដ្ឋស្តីទី និងជា ប្រធានសមាគមអតីតយុទ្ធជន និងនិវត្តជនកម្ពុជា បានអញ្ជើញជាអធិបតីដ៏ខ្ពង់ខ្ពស់បំផុត ដឹកនាំអង្គមហា សន្និបាតវិសាមញ្ញតំណាងសមាគមអតីតយុទ្ធជនកម្ពុជាទូទាំងប្រទេស ដែលរៀបចំដោយសមាគមអតីតយុទ្ធជន កម្ពុជា នាព្រឹកថ្ងៃទី២៩ ខែកញ្ញា ឆ្នាំ២០២៥ ដោយមានការអញ្ជើញចូលរួមពីថ្នាក់ដឹកនាំ និងសមាជិក សមាជិកា ជាតំណាងនៃគណៈកម្មាធិការកណ្តាល អ.ន.ក. គ្រប់ថ្នាក់។អង្គមហាសន្និបាតវិសាមញ្ញបានប្រព្រឹត្តទៅដោយរលូនតាមរបៀបវារៈដែលបានកំណត់ក្នុងបរិយាកាស សាមគ្គីភាព ភាតរភាព ក្នុងស្មារតីទទួលខុសត្រូវខ្ពស់ និងបានអនុម័តជាឯកច្ឆន្ទនូវរបាយការណ៍បូកសរុប លទ្ធផលការងាររយៈពេល ១០ឆ្នាំ (២០១៥-២០២៥) និងទិសដៅអនុវត្តបន្តរបស់សមាគម និងលក្ខន្តិកៈ សមាគមអតីតយុទ្ធជន និងនិវត្តជនកម្ពុជា ដោយបានប្តូរឈ្មោះសមាគមអតីតយុទ្ធជនកម្ពុជា មកជា សមាគមអតីតយុទ្ធជន និងនិវត្តជនកម្ពុជា និងបានពង្រីកសមាជិកភាពរបស់សមាគមគ្របដណ្តប់ទាំង និវត្តជន ដែលជាបុគ្គលធ្លាប់បានបម្រើការងារក្នុងវិស័យសាធារណៈ ហើយបានបញ្ចប់ការងាររបស់ខ្លួន ត្រឹមត្រូវតាមច្បាប់ ព្រមទាំងបានកំណត់អំពីថ្នាក់ដឹកនាំសមាគម ដែលក្នុងនោះ សម្តេចអគ្គមហាសេនាបតី តេជោ នាយឧត្តមសេនីយ៍ផុតលេខ ផ្កាយមាស៥ ហ៊ុន សែន ប្រមុខរដ្ឋស្តីទី ជាប្រធានសមាគមអតីតយុទ្ធជន និងនិវត្តជនកម្ពុជា ជារៀងរហូត។ជាមួយគ្នានេះ អង្គមហាសន្និបាតវិសាមញ្ញក៏បានអនុម័តនូវ សេចក្តីសម្រេចចិត្តមហាសន្និបាត ដែល មានខ្លឹមសារសំខាន់ៗចំនួន ៩ចំណុច។ព័ត៌មានពិស្តា៖

ស្ថានទូតចិននៅកម្ពុជា បង្ហាញសមិទ្ធិផលជាច្រើន ការអនុវត្តយុទ្ធនាការឆ្នាំទេសចរណ៍ កម្ពុជា ចិន ២០២៥

នៅក្នុងពិធីអបអរសាទរព្រឹត្តិការណ៍ ពពកកំដរក្បែរព្រះច័ន្ទ នៅរាជធានីភ្នំពេញ ល្ងាចថ្ងៃទី២៨ ខែកញ្ញានេះ ឯកឧត្តម វ៉ាង វិនពីន អគ្គរដ្ឋទូតចិន នៅកម្ពុជា បានថ្លែងថា នៅក្នុងដំណើរអនុវត្តយុទ្ធនាការ ឆ្នាំទេសចរណ៍ចិន កម្ពុជា គឺភាគីកម្ពុជា ទទួលបានសមិទ្ធិផលច្រើន និងការទាក់ទាញទេសចរចិន និងវិនិយោគទុនចិន មកកម្ពុជាកើនឡើងជាលំដាប់។ឯកឧត្តម វ៉ាង វិនពីន ថ្លែងថា កម្ពុជា ចិន កំណត់យកឆ្នាំ២០២៥ ជាឆ្នាំទេសចរណ៍កម្ពុជា ចិន ២០២៥ ហើយចាប់តាំងពីខែមេសារហូតមកដល់ពេលនេះ ភាគីទាំងពីរ កម្ពុជា ចិន បានរៀបចំដោយជោគជ័យនូវ ឆ្នាំទេសចរណ៍ចិន កម្ពុជា ២០២៥ អមដោយមានសម្តែងរបាំសិល្បៈពិសេស៖ សម្រស់កម្ពុជា ជាំងស៊ូ ហើយខេត្ត និងតំបន់ជាច្រើនទៀតរបស់ចិន ដូចជា ស៊ីនជាំង សានទុង និងយូណានជាដើម ក៏បានរៀបចំកម្មវិធីផ្សព្វផ្សាយវប្បធម៌ និងទេសចរណ៍នៅប្រទេសកម្ពុជា ហើយក្រសួងទេសចរណ៍កម្ពុជា ក៏បានរៀបចំកម្មវិធីផ្សព្វផ្សាយទេសចរណ៍ជាច្រើនទៀត នៅប្រទេសចិន និងបានចុះហត្ថលេខាលើកិច្ចព្រមព្រៀងសហប្រតិបត្តិការជាច្រើនក្នុងវិស័យទេសចរណ៍ជាមួយខេត្តជាំងស៊ូ យូណាន និងខេត្តហៃណាន ។ឯកឧត្តម វ៉ាង វិនពីន បន្តថា ក្នុងដំណាក់កាលខាងមុខទៀត ភាគីចិន នឹងបង្កើនកិច្ចខិតខំប្រឹងប្រែងធ្វើការជាមួយកម្ពុជា ក្នុងក្របខណ្ឌ ឆ្នាំទេសចរណ៍ចិន កម្ពុជា ឲ្យកាន់តែរឹងម៉ាំ និងបន្តបង្កើតទម្រង់ថ្មីៗ នៃកិច្ចសហប្រតិបត្តិការទេសចរណ៍ទ្វេភាគី និងផ្លាស់ប្តូរវប្បធម៌ ព្រមទាំងរួមចំណែកកសាងសហគមន៍វាសនារួមរវាងចិនកម្ពុជា គ្រប់រដូវកាល។លោកបណ្ឌិត ជា មុនីឫទ្ធិ ប្រធានសមាគមអ្នកស្រាវជ្រាវវឌ្ឍនភាពកម្ពុជាចិន ថ្លែងថា តាមរយៈការរៀបចំព្រឹត្តិការណ៍ និងការបង្កើតទម្រង់ថ្មីនៃការផ្លាស់ប្តូរវប្បធម៌ ទំនាក់ទំនង កិច្ចសហប្រតិបត្តិការកម្ពុជា ចិន គឺសកម្មភាពដ៏ល្អមួយក្នុងការផ្សព្វផ្សាយនឹងទាក់ទាញទេសចរ អ្នកវិយោគទុនចិនមកកម្ពុជាកាន់តែច្រើន។ឯកឧត្តម ប៉ាក សុខុម រដ្ឋលេខាធិការក្រសួងទេសចរណ៍ថ្លែងថា ព្រឹត្តិការណ៍ ពពករកំដរក្បែរព្រះច័ន្ទ គឺជាព្រឹត្តិការណ៍មានសារៈសំខាន់ក្នុងការជួយគាំទ្រដល់យុទ្ធនាការ ឆ្នាំទេសចរណ៍កម្ពុជា ចិន ២០២៥ ហើយនឹងជួយផ្សព្វផ្សាយកាន់តែទូលំទូលាយនូវវប្បធម៌ អរិយធម៌ ប្រពៃណី ម្ហូបអាហារ និងសក្តានុពលទេសចរណ៍ដ៏សំបូរបែបរវាងប្រទេសទាំងពីរកម្ពុជាចិន។ឯកឧត្តម បានលើកឡើងដែរថា ក្នុងរយៈពេល៨ខែ ដើមឆ្នាំ២០២៥នេះ កម្ពុជា ទទួលបានភ្ញៀវទេសចរអន្តរជាតិអញ្ជើញមកទស្សនាមានប្រមាណជាង៤លាននាក់ ធ្លាក់ចុះ៥.៦% ប៉ុន្តែសម្រាប់ទេសចរចិនវិញ គឺបានអញ្ជើញមកទស្សនាកម្ពុជា មានប្រមាណជិត៨០ម៉ឺននាក់ កើនឡើង៤៥.៧% ហើយភ្ញៀវទេសចរចិនគឺជាប្រភពនៃកំណើនទេសចរដ៏សំខាន់របស់កម្ពុជា៕ អត្ថបទ ស៊ុម សុខជា

បណ្ដាញសង្គម

ព័ត៌មានថ្មីៗ

ព្រះខ័នរាជ ត្រូវការ ១ពិន្ទុទៀតប៉ុណ្ណោះ ដើម្បីគ្រងជើងឯកលីគកំពូលកម្ពុជា ឆ្នាំ២០២៥/២៦

លោក Trump ប្រកាសជ័យជម្នះក្រោយជួយសង្គ្រោះអ្នកបើកយន្តហោះអាមេរិក ខណៈគំរាមកម្ទេចអ៊ីរ៉ង់ក្នុងឱសានវាទថ្មី

មន្ត្រីនគរបាលព្រំដែនខេត្តកោះកុង ដែលបាញ់មនុស្សស្លាប់ចូលសារភាពហើយ

ក្រុមហេសបូឡា អះអាងថា ខ្លួនបានវាយប្រហារនាវាចម្បាំងអ៊ីស្រាអែលដោយមីស៊ីលតម្រង់គោលដៅ

អាជ្ញាធរអាមេរិកចាប់ខ្លួនសាច់ញាតិរបស់អតីតមេបញ្ជាការយោធាអ៊ីរ៉ង់ ដែលរស់នៅក្រុង Los Angeles

មន្ត្រី៖ ភ្លៀង និងព្យុះ សម្លាប់មនុស្សយ៉ាងតិច ១២១នាក់ នៅអាហ្វហ្គានីស្ថាន និងប៉ាគីស្ថាន រយៈពេល ២សប្តាហ៍

ស្ថាប័នការពារជនស៊ីវិល នៅហ្កាហ្សា ឲ្យដឹងថា ការវាយប្រហាររបស់អ៊ីស្រាអែល សម្លាប់មនុស្ស ៤នាក់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877