BTV NEWS

សម្តេចតេជោ ហ៊ុន សែន៖ «គ្មានការយោគយល់ណាមួយ ចំពោះទីកន្លែងណាក៏ដោយ ដែលបើកឱកាសឲ្យពួកឆបោកតាមប្រព័ន្ធអនឡាញ ធ្វើសកម្មភាព»

មេបញ្ជាការរងកងរាជអាវុធហត្ថលើផ្ទៃប្រទេសណែនាំឱ្យគ្រប់ជំនាញទាំងអស់បង្កើនការយកចិត្តទុកដាក់បង្ក្រាប Online Scams និងបទល្មើសផ្សេងៗ

ស្ថានទូតខ្មែប្រចាំនៅសាធារណរដ្ឋកូរ៉េ ចុះ MOU ជាមួយមន្ទីរពេទ្យដៃគូ ដើម្បីផ្ដល់អត្ថប្រយោជន៍ដល់ពលរដ្ឋខ្មែរនៅកូរ៉េ

ក្រុមការងារអភិវឌ្ឍវិស័យឯកជនប្រមូលធាតុចូល និងលក្ខខណ្ឌនានា គាំទ្រការផលិតស៊ីម៉ងត៍ក្នុងស្រុក

ព័ត៌មានជាតិ

ផលិតផលសក្តានុពលកម្ពុជាចំនួន២០ ត្រូវបានចុះបញ្ជីជាផលិតផលអត្តសញ្ញាណជាតិ

មន្រ្តីនាយកដ្ឋានកម្មសិទ្ធបញ្ញានៃក្រសួងពាណិជ្ជកម្មបានឲ្យដឹងថា គិតត្រឹមឆ្នាំ ២០២៥ មានផលិតផលចំនួន ២០ ត្រូវបានចុះបញ្ជីជាផលិតផលដ៏មានសក្តានុពលរបស់ប្រទេសកម្ពុជា ក្នុងនោះមានផលិតផលសមូហភាពចំនួន ១១ ផលិតផលសម្គាល់ភូមិសាស្រ្តចំនួន ៨ និងម៉ាកវិញ្ញាតិកម្មចំនួន ១។ ផលិតផលម៉ាកសមូហភាពដែលត្រូវបានចុះបញ្ជីរួមមាន៖ ១.ដូងខ្ទិះបាត់ដំបង ២. នំបញ្ចុកសៀមរាប ៣. ក្រូចថ្លុងកោះពីរ ៤. គុយទាវភ្នំពេញ ៥. អំបុកកំពង់ធំ ៦. អង្ករដំណើប DSMK ៧). អង្ករសែនក្រអូប SKO ៨. អង្ករព្រះវិហារ ៩. ចម្លាក់ប្រាក់ស្ពាន់ខេត្តកណ្តាល ១០. ថ្នាំជក់កម្ពុជា និង១១. សំបុកត្រចៀកកាំ។ ចំណែកផលិតផលម៉ាកសម្គាល់ភូមិសាស្រ្តមាន៖ ១. ម្រេចកំពត ២. ស្ករត្នោតកំពង់ស្ពឺ ៣. ក្រូចថ្លុងកោះទ្រង់ ៤. ទឹកឃ្មុំព្រៃមណ្ឌលគិរី ៥. ទឹកត្រីកំពតកែប ៦. អំបិលកំពតកែប ៧. បង្កងតាកែវ និង ៨. ប្រហុកសៀមរាប និង ផលិតផលម៉ាកវិញ្ញាតកម្មចំនួន ០១ គឺ MALYS ANGKOR។ ឯកឧត្តម វ៉ា រុតសាន រដ្ឋលេខាធិការក្រសួងពាណិជ្ជកម្ម ក្នុងឱកាសចូលរួមវេទិកានិងពិព័រណ៍កសិកម្មឆ្នាំ ២០២៥ បានលើកឡើងពីការធ្វើពិពិធកម្មមុខទំនិញយុទ្ធសាស្រ្តរបស់កម្ពុជា រួមទាំងដំណាំកសិកម្មមានសក្ដានុពលដូចជា ស្រូវ អង្ករ ស្វាយចន្ទី ដំឡូងមី ស្វាយ ម្រេច និងមៀនប៉ៃលិនជាដើម ដើម្បីពង្រីកទីផ្សារនាំចេញ៕

កីឡាករវាយកូនគោលលំដាប់ពិភពលោក មកប្រកួតវាយកូនគោលលំដាប់អន្តរជាតិ និងជាលើកដំបូងនៅកម្ពុជា

ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ រួមជាមួយ អ្នកឧកញ៉ា សំអាង វឌ្ឍនៈ នាយកប្រតិបត្តិក្រុមហ៊ុនវឌ្ឍនៈ ហ្គោល រីហ្សត បានអញ្ជើញទទួលស្វាគមន៍យ៉ាងកក់ក្តៅ ដល់កីឡាករវាយកូនគោលអាជីពថ្មីៗលំដាប់ពិភពលោកចំនួន ៦០នាក់ មកពី ១៦ប្រទេស ដើម្បីមកចូលរួមព្រឹត្តិការណ៍ប្រកួតវាយកូនគោលពានរង្វាន់ Vattanac Legends Championship ដែលជាការប្រកួតកម្រិតអន្តរជាតិ និងជាលើកដំបូងក្នុងប្រទេសកម្ពុជា។ថ្លែងនៅអាកាសយានដ្ឋានអន្តរជាតិតេជោ នាល្ងាចថ្ងៃទី១៧ ខែវិច្ឆិកា ឆ្នាំ២០២៥ នេះ ឯកឧត្តមរដ្ឋមន្ត្រី បានគូសបញ្ជាក់ថា ព្រឹត្តិការណ៍កីឡាលំដាប់អន្តរជាតិ នឹងបង្ហាញពិភពលោកឃើញថា កម្ពុជា ជាគោលដៅសុវត្ថិភាព, មានសមត្ថភាព និងសម្បទាគ្រប់គ្រាន់ក្នុងការរៀបចំព្រឹត្តិការណ៍លំដាប់អន្តរជាតិបាន ពោលគឺបានជួយលើកស្ទួយវិស័យទេសចរណ៍កម្ពុជា ព្រមទាំងកិត្តិនាមកម្ពុជានៅលើឆាកអន្តរជាតិផងដែរ។គួរបញ្ជាក់ថា កីឡាករវាយកូនគោលអាជីពលំដាប់ពិភពលោក ទាំង ១៦ប្រទេសនោះមានដូចជា អាហ្សង់ទីន, បារាំង, ស៊ុយអ៊ែត, អេស្ប៉ាញ, ហូឡង់, អៀរឡង់, ស្កុតលែន, ឥណ្ឌា, ណូវែលសេឡង់, ប្រេស៊ីល, អូទ្រីស, អង់គ្លេស, អាល្លឺម៉ង់, សាធារណរដ្ឋអាហ្រិចខាងត្បូង, អៀរឡង់ខាងជើង និងអ៉ីតាលី៕

ក្រសួងវប្បធម៌ ថ្កោលទោស និងអំពាវនាវរកយុត្តិធម៌ ករណីក្រុមទាហានឈុតខ្មៅថៃ ប្រើហិង្សា និងរំលោភបូកលើពលករខ្មែរ

នៅថ្ងៃទី១៨ ខែវិច្ឆិកា ឆ្នាំ២០២៥ នេះ ក្រសួងវប្បធម៌ និងវិចិត្រសិល្បៈ បានចេញ សេចក្តីថ្លែងការណ៍ ថ្កោលទោសយ៉ាងដាច់អហង្ការ និងអំពាវនាវស្ថាប័នជាតិ អន្តរជាតិស្វែងរកយុត្តិធម៌ ចំពោះទង្វើដ៏សាហាវឃោរឃៅ ព្រៃផ្សៃ អមនុស្សធម៌របស់ក្រុមទាហានឈុតខ្មៅថៃ មកលើក្រុមពលករទេសន្តរប្រវេសន៍ខ្មែរចំនួន ១៣នាក់ និងបានប្រព្រឹត្តអំពើថោកទាប ស្មោកគ្រោក រំលោភសេពសន្ថវៈ (រំលោភបូក) មកលើពលករខ្មែរ ជាស្ត្រី ១នាក់ ដោយទាហានឈុតខ្មៅថៃ ៧នាក់។ថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់នៃក្រសួងវប្បធម៌ និងវិចិត្រសិល្បៈ សូមប្រកាស ថ្កោលទោសយ៉ាងដាច់អហង្ការបំផុតចំពោះទង្វើអមនុស្សធម៌ សាហាវឃោរឃៅ ព្រៃផ្សៃ ដែលគួរឱ្យស្អប់ខ្ពើម និងមិនអាច ទទួលយកបានរបស់ក្រុមទាហានឈុតខ្មៅថៃ ដោយបានប្រើប្រាស់អំពើហិង្សាយ៉ាងសាហាវយង់ឃ្នង និងវាយដំ ទាត់ធាក់ លើរូបរាងកាយ ជំរិតទារប្រាក់ គំរាមកំហែងយកទ្រព្យសម្បត្តិ ដែលបានប្រព្រឹត្តមកលើក្រុមពលករទេសន្តរប្រវេសន៍ខ្មែរ ចំនួន ១៣នាក់ ខណៈពេលធ្វើដំណើរត្រឡប់មកកាន់មាតុភូមិនិវត្តន៍វិញ ដោយនៅក្នុងនោះមានទាហានឈុតខ្មៅថៃ ៧នាក់ បានប្រព្រឹត្តអំពើថោកទាប ស្មោកគ្រោក រំលោភសេពសន្ថវៈ (រំលោភបូក) ទៅលើពលករខ្មែរ ជាស្ត្រី ១នាក់ ដែលមានវ័យត្រឹមតែ ១៨ឆ្នាំ កាលពីថ្ងៃទី១៥ ខែវិច្ឆិកា ឆ្នាំ២០២៥ កន្លងទៅថ្មីៗនេះ។នេះជាទង្វើដែលអមនុស្សធម៌ ឃោរឃៅ ព្រៃផ្សៃ គួរឱ្យស្អប់ខ្ពើម និងមិនអាចទទួលយកបាន ហើយជា បទឧក្រិដ្ឋ និងជាការរំលោភបំពានយ៉ាងធ្ងន់ធ្ងរលើសិទ្ធិមនុស្ស សិទ្ធិស្ត្រី និងសិទ្ធិពលករទេសន្តរប្រវេសន៍ ដែលមានចែងក្នុងច្បាប់ជាតិ និងលិខិតុបករណ៍របស់អង្គការសហប្រជាជាតិ (UN) អនុសញ្ញា ស្ដីពី ការលុបបំបាត់រាល់ទម្រង់នៃការរើសអើងប្រឆាំងនឹង ស្ត្រីភេទ (CEDAW) អង្គការអន្តរជាតិទេសន្តរប្រវេសន៍ (IOM) និងសមាគមប្រជាជាតិអាស៊ីអាគ្នេយ៍ (ASEAN)។ក្រសួងវប្បធម៌ សូមសម្ដែងនូវសេចក្ដីសោកស្តាយជាពន់ពេក ចំពោះហេតុការណ៍ដែលបានកើតឡើងទៅលើ ពលករខ្មែរទាំង ១៣នាក់ ជាពិសេស ករណីស្ត្រីរងគ្រោះ ដោយអំពើរំលោភសេពសន្ថវៈ (រំលោភបូក) ដែលប្រព្រឹត្តដោយ ពួកទាហានឈុតខ្មៅថៃទាំង ៧នាក់។ ជាមួយគ្នានេះ ក្រសួងវប្បធម៌ និងវិចិត្រសិល្បៈ សូមអំពាវនាវដល់គ្រប់ក្រសួង ស្ថាប័នពាក់ព័ន្ធ និងអាជ្ញាធរមានសមត្ថកិច្ចគ្រប់លំដាប់ថ្នាក់ បន្តតាមដានយ៉ាងយកចិត្តទុកដាក់ខ្ពស់ ក្នុងការចាត់វិធានការ តាមនីតិវិធីច្បាប់ដើម្បីផ្ដល់យុត្តិធម៌ជូនជនរងគ្រោះ និងសូមអំពាវនាវដល់សហគមន៍អន្តរជាតិ ការិយាល័យឧត្តមស្នងការ អង្គការសហប្រជាជាតិទទួលបន្ទុកសិទ្ធិមនុស្ស (OHCHR) ភ្នាក់ងារសហប្រជាជាតិលើកកម្ពស់សមភាពយេនឌ័រ និងបង្កើន ភាពអង់អាចដល់ស្ត្រី (UN Women) និងអង្គការអន្តរជាតិពាក់ព័ន្ធក្នុងការតាមដាន និងជំរុញឱ្យអាជ្ញាធរមានសមត្ថកិច្ចថៃធ្វើការ ស៊ើបអង្កេត និងចាត់វិធានការជាបន្ទាន់ ដើម្បីនាំយកឧក្រិដ្ឋជនមកផ្តន្ទាទោសតាមច្បាប់ និងផ្តល់យុត្តិធម៌ជូនជនរងគ្រោះ ដោយគ្មានការលើកលែង៕

ឧបនាយករដ្ឋមន្ត្រី ហង់ជួន ណារ៉ុន ដឹកនាំកិច្ចប្រជុំក្រុមការងារបច្ចេកទេសចម្រុះវិស័យអប់រំ ពិនិត្យវឌ្ឍនភាពការងារអប់រំ និងផ្តល់ការគាំទ្រឆ្លើយតបនឹងចក្ខុវិស័យលើកកម្ពស់គុណភាពអប់រំនៅកម្ពុជា

នាព្រឹកថ្ងៃទី១៨ ខែវិច្ឆិកា ឆ្នាំ២០២៥ ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងជាប្រធានក្រុមការងារបច្ចេកទេសចម្រុះវិស័យអប់រំ បានដឹកនាំកិច្ចប្រជុំក្រុមការងារបច្ចេកទេសចម្រុះវិស័យអប់រំ (JTWG-Edu) ឆ្នាំ២០២៥ ដើម្បីពិនិត្យវឌ្ឍនភាពការងារអប់រំ និងផ្តល់ការគាំទ្រចំគោលដៅ ដោយមានការអញ្ជើញចូលរួមពី ឯកឧត្តមបណ្ឌិត Will Parks ប្រធានក្រុមសម្របសម្រួលដៃគូអភិវឌ្ឍន៍ និងជាអនុប្រធានក្រុមការងារបច្ចេកទេសចម្រុះវិស័យអប់រំ មន្រ្តីពាក់ព័ន្ធក្រោមឱវាទ និង ឯកឧត្តម លោកជំទាវថ្នាក់ដឹកនាំក្រសួងអប់រំ យុវជន និងកីឡា តំណាងដៃគូអភិវឌ្ឍជាច្រើនរូប មកពី GPE , UNESCO, EU, ADB, WB, UNICEF, WFP, JICA, NEP, KOICA និងភាគីពាក់ព័ន្ធ។កិច្ចប្រជុំនេះផ្ដោតពិភាក្សាទៅលើប្រធានបទសំខាន់ៗមួយចំនួន រួមមាន៖ (១). របាយការណ៍វឌ្ឍនភាពស្តីពីការអនុវត្តថវិកាកម្មវិធីឆ្នាំ២០២៥ (២) បទបង្ហាញនៃកម្មវិធីអនុវត្ត គម្រោងភាពជាដៃគូសកលសម្រាប់ការអប់រំ GPE៖ System Capacity Grant (SCG), System Transformation Grant (STG) ,Multiplier (៣).ការបង្ហាញ និងការយល់ព្រមលើអនុស្សរណៈនៃការពិនិត្យឡើងវិញពាក់កណ្តាលអាណត្តិនៃភាពជាដៃគូ (PC-MTR) (៤) វដ្តហិរញ្ញវត្ថុ GPE បន្ទាប់ (៥) ការដាក់ឱ្យដំណើរការថ្នាលឌីជីថល (CDP) ដើម្បីជំរុញការបណ្តុះបណ្តាលគ្រូបង្រៀន នៃគម្រោងលើកកម្ពស់វិស័យអប់រំនៅកម្ពុជា។មុនឈានចូលកិច្ចពិភាក្សា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានចែករំលែកវឌ្ឍនភាពនៃកំណែទម្រង់វិស័យអប់រំក្នុងអំឡុង១០ឆ្នាំចុងក្រោយ និងបច្ចុប្បន្នភាពការងារអប់រំ ដោយគូសបញ្ជាក់ថា កិច្ចប្រជុំថ្ងៃនេះ គឺជាឱកាសដ៏សំខាន់មួយដើម្បីបញ្ជាក់ឡើងវិញនូវការប្តេជ្ញាចិត្តរួមគ្នារបស់ក្រសួងអប់រំ យុវជន និងកីឡា និងដៃគូអភិវឌ្ឍន៍ និងភាគីពាក់ព័ន្ធ ក្នុងការធ្វើឱ្យប្រសើរឡើងនូវលទ្ធផលសិក្សាសិស្ស សំដៅធានាថាកុមារគ្រប់រូបនៅកម្ពុជាត្រូវបានបញ្ជូនទៅទទួលការអប់រំនៅសាលារៀន ដើម្បីក្លាយជាធនធានមនុស្សប្រកបដោយសក្តានុពល ចូលរួមចំណែកដល់ការអភិវឌ្ឍប្រទេសជាតិ។ សូមយកឱកាសនេះដែរ ស្វាគមន៍យ៉ាងកក់ក្តៅចំពោះវត្តមានជាលើកដំបូងរបស់ លោកជំទាវ Talia Miranda GPE Secretariat មកកាន់កិច្ចប្រជុំក្រុមការងារបច្ចេកទេសចម្រុះវិស័យអប់រំ ឆ្នាំ២០២៥ ដែលជាផ្នែកមួយនៃបេសកកម្ម GPE នៅកម្ពុជា បានឆ្លុះបញ្ចាំងពីការប្តេជ្ញាចិត្តរបស់ GPE ក្នុងការពង្រឹងប្រព័ន្ធអប់រំ និងគាំទ្រដល់កិច្ចខិតខំប្រឹងប្រែងថ្នាក់ជាតិ ដើម្បីធានាបាននូវការអប់រំប្រកបដោយគុណភាព សមធម៌ និងបរិយាបន្ន។បន្ទាប់ពីការធ្វើបទបង្ហាញ និងរបាយការណ៍វឌ្ឍនភាពគម្រោងអប់រំនានារបស់ក្រុមការងារជំនាញ និងដៃគូអភវិឌ្ឍ ក៏ដូចជាកិច្ចពិភាក្សាសំណេះសំណាលប្រកបដោយផ្លែផ្ការួចមក ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានលើកឡើងពីផែនការអាទិភាពគន្លឹះនៃកំណែទម្រង់វិស័យអប់រំសម្រាប់ជំហានបន្ទាប់ ដែលបាននិងកំពុងផ្តោតលើ៖ (១) ការបន្តអនុវត្ត និងពង្រីកស្តង់ដាសាលាគំរូ (២) កម្មវិធីជាតិផ្តល់អាហារតាមសាលារៀនដោយប្រើប្រាស់កសិផលសហគមន៍ ដែលបច្ចុប្បន្នបានផ្តល់អត្ថប្រយោជន៍ដល់សិស្សចំនួនប្រមាណ ២៣០,០០០នាក់ និងគម្រោងផ្ទេរចូលទៅក្នុងកម្មវិធីជាតិផ្តល់អាហារតាមសាលារៀន ទៅតាមដំណាក់កាលជាបន្តបន្ទាប់ និង ការព្រាងបញ្ចប់គោលនយោបាយសកម្មភាព ( School Feeding Policy Action Plan 2024-2030) (៣) ការអប់រំឌីជីថល និងការអប់រំបម្រែបម្រួលអាកាសធាតុ ដែលបង្កើតភាពធន់ ធានាបាននូវការអប់រំប្រកបដោយសមធម៌ និងការរៀនសូត្របែបទំនើប (៤) ពង្រីកការអប់រំក្រៅប្រព័ន្ធ (៥) កំណែទម្រង់ការបណ្ដុះបណ្ដាលគ្រូបង្រៀន និងការអភិវឌ្ឍវិជ្ជាជីវៈ បង្កើនគុណវុឌ្ឍិគ្រូបង្រៀន (៥) កំណែទម្រង់កម្មវិធីសិក្សានិងសៀវភៅសិក្សា ការអនុវត្តកញ្ចប់សម្ភារៈអំណាន និងគណិតវិទ្យាថ្នាក់ដំបូង (៦) ការរៀបចំផ្សព្វផ្សាយលទ្ធផលនៃតេស្ត Southeast Asia Primary Learning Metrics (SEA-PLM) 2024។តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និងថ្លែងអំណរគុណយ៉ាងជ្រាលជ្រៅដល់ដៃគូអភិវឌ្ឍ ក្រុមការងារគម្រោងកែលម្អវិស័យអប់រំក្រោមឱវាទក្រសួង និងភាគីពាក់ព័ន្ធទាំងអស់ ចំពោះកិច្ចខិតខំប្រឹងប្រែងបំពេញភារកិច្ចប្រកបដោយមនសិការទទួលខុសត្រូវខ្ពស់ និងការផ្តល់កិច្ចសហការគាំទ្រដោយយកចិត្តទុកដាក់ ដែលជំរុញឱ្យកំណែទម្រង់វិស័យអប់រំសម្រេចបានវឌ្ឍនភាពជាច្រើន និងស្នើសូមឱ្យក្រុមការងារបន្តកិច្ចសហការឱ្យកាន់តែប្រសើរឡើង ដោយរំពឹងថា តាមរយៈកិច្ចពិភាក្សានេះ ក្រុមការងារ JTWG ប្រមូលបាននូវមតិយោបល់ ធាតុចូលជាច្រើន និងរកឃើញនូវដំណោះស្រាយទៅលើបញ្ហាប្រឈមផ្សេងៗ ឆ្លើយតបនឹងចក្ខុវិស័យលើកកម្ពស់គុណភាពអប់រំនៅកម្ពុជា៕

ឧបនាយករដ្ឋមន្ដ្រី នេត សាវឿន ទទួលជួបសម្ដែងការគួរសមជាមួយ ក្រុមកីឡាករវាយគោលលំដាប់ពិភព

ឯកឧត្តមសន្ដិបណ្ឌិត នេត សាវឿន ឧបនាយករដ្ឋមន្ដ្រី តំណាងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា នៅព្រឹកថ្ងៃទី១៨ ខែវិច្ឆិកា ឆ្នាំ២០២៥នេះ បានទទួលជួបសម្ដែងការគួរសម ជាមួយកីឡាករវាយកូនគោលអាជីពអន្តរជាតិ និងប្រតិភូនៃ LEGENDS TOUR ដែលនឹងចូលរួមប្រកួតកីឡាវាយកូនគោលពានរង្វាន់ VATTANAC LEGENDS CHAMPIONSHIP 2025 នៅប្រទេសកម្ពុជា ចាប់ពីថ្ងៃទី១៧ ដល់ថ្ងៃទី២៩ ខែវិច្ឆិកា ឆ្នាំ២០២៥។ថ្លែងក្នុងឱកាសនោះ ឯកឧត្តមឧបនាយករដ្ឋមន្រ្តី នេត សាវឿន ក្នុងនាមសម្ដេចមហាបវរធិបតី ហ៊ុន ម៉ាណែត បានស្វាគមន៍យ៉ាងកក់ក្ដៅចំពោះលោក DAVID ADAMS នាយកគ្រប់គ្រង LEGENDS TOUR និងកីឡាករឆ្នើមទាំងអស់ បានអញ្ជើញមកចូលរួមការប្រកួតនៅប្រទេសកម្ពុជា។ ឧបនាយករដ្ឋមន្ដ្រី ក៏បានកោតសរសើរអ្នកឧកញ៉ា សំ អាង ក៏ដូចជាក្រុមហ៊ុនវឌ្ឍនៈ ដែលបានចាត់ចែងសហការជាមួយ គណៈកម្មាធិការជាតិអូឡាំពិកកម្ពុជា ដើម្បីឲ្យមានកម្មវិធីប្រកួតនេះឡើងផងដែរ។ឧបនាយករដ្ឋមន្ដ្រី នេត សាវឿន បានជម្រាបជូនលោក DAVID ADAMS នាយកគ្រប់គ្រង LEGENDS TOUR និងកីឡាករទាំងអស់ថា កម្ពុជាទើបតែមានសន្តិភាពពេញលេញក្នុងរយៈពេល២៧ឆ្នាំចុងក្រោយ ហើយបើប្រៀបធៀបទៅបណ្ដាប្រទេសក្នុងពិភពលោក កម្ពុជាទទួលបានសន្តិភាពក្នុងរយៈពេលខ្លីជាងគេបំផុត ក្នុងរយៈពេល២៧ឆ្នាំចុងក្រោយ។ កម្ពុជា មានភព្វសំណាងដែលមានសម្ដេចតេជោ ហ៊ុន សែន អតីតនាយករដ្ឋមន្ដ្រី ក្រោយមកមានសម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រី ដែលបន្តវេនដឹកនាំកម្ពុជាឆ្ពោះទៅមុខយ៉ាងលឿន និងអភិវឌ្ឍរីកចម្រើនយ៉ាងឆាប់រហ័សលើគ្រប់វិស័យ។ឯកឧត្តមសន្ដិបណ្ឌិត ឧបនាយករដ្ឋមន្ដ្រី បានបន្ដថា គោលនយោបាយរបស់រាជរដ្ឋាភិបាលកម្ពុជា ក៏បានផ្ដល់អាទិភាពក្នុងការកសាងធនធានមនុស្ស និងជំរុញការលេងកីឡា ដោយពលរដ្ឋម្នាក់លេងកីឡាមួយយ៉ាងតិច ព្រោះដើម្បីលើកកម្ពស់សុខភាព លុបបំបាត់អំពើអបាយមុខផ្សេង និងរួមចំណែកដល់ការអភិវឌ្ឍប្រទេស។ ពាក់ព័ន្ធកីឡាវាយកូនហ្គោលនៅក្នុងប្រទេសកម្ពុជា ឧបនាយករដ្ឋមន្ដ្រី នេត សាវឿន បានគូសបញ្ជាក់ថា បច្ចុប្បន្ននេះមានការរីកចម្រើន និងក្លាយជាកីឡាមួយដែលពេញនិយមនូវគ្រប់ស្រទាប់វ័យទាំងអស់។បើតាមលោកសន្ដិបណ្ឌិត នេត សាវឿន, នៅក្នុងប្រទេសកម្ពុជា សព្វថ្ងៃមានតារាងវាយកូនគោលចំនួន១៤ទីតាំង និងទីលានហ្វឹកហាត់ជាច្រើនទីតាំងទៀតផងដែរ។ក្នុងកិច្ចជំនួបនោះដែរ លោក DAVID ADAMS បានថ្លែងអំណរគុណ លោកសន្តិបណ្ឌិត ឧបនាយករដ្ឋមន្ដ្រី ចំពោះការទទួលជួបប្រតិភូ LEGENDS TOUR ហើយលោកមានសេចក្ដីសោមនស្សរីករាយ ចំពោះការទទួលបដិសណ្ឋារកិច្ចយ៉ាងកក់ក្ដៅរបស់កម្ពុជា នៅពេលប្រតិភូកីឡាករមកដល់ តាំងពីនៅអាកាសយានដ្ឋានអន្ដរជាតិតេជោ ដោយនោះក៏បានបញ្ជាក់ថា អាកាសយានដ្ឋានអន្ដរជាតិតេជោ ជាអាកាសយានដ្ឋានមួយដ៏ស្រស់ស្អាតបំផុត ក្នុងចំណោមអាកាសយានដ្ឋានដែលលោក និងកីឡាទាំងអស់ធ្លាប់បានទៅពីមុនមក។ពាក់ព័ន្ធជាមួយពានរង្វាន់ LEGENDS TOUR នេះ លោក DAVID ADAMS បានបញ្ជាក់ថា ពានរង្វាន់ គឺជាពានរង្វាន់ដែលប្រតិភូ LEGENDS TOUR ធ្វើដំណើរទស្សនកិច្ចទូទាំងពិភពលោកតែម្ដង ប៉ុន្តែមានទីតាំងធំរបស់ខ្លួននៅប្រទេសអឺរ៉ុប ដូចេ្នះការធ្វើដំណើរចាកចេញពីទ្វីបអឺរ៉ុប គឺជាបេសកកម្មមួយដ៏រីករាយបំផុត ហើយការជ្រើសរើសការធ្វើដំណើរ គឺអាស្រ័យទៅលើទីតាំងដែលត្រូវទៅ ក៏ដូចជាប្រទេសដែលមានវប្បធម៌ដ៏ល្អផងដែរ។ លោកបន្ដថា អ្វីដែលប្រតិភូរំពឹងទទួលបានពីការប្រកួតអន្ដរជាតិនេះ គឺមិនត្រឹមតែទីតាំងប្រកួតដ៏ល្អនោះទេ ថែមទាំងឥទ្ធិពល និងកេរ្តិ៍ដំណែលមួយដែលបានពីប្រទេសកម្ពុជា។ លោកជឿជាក់ដែរថា ប្រតិភូ LEGENDS TOUR នឹងទទួលបានបទពិសោធន៍ល្អៗពីប្រទេសកម្ពុជា ដែលនឹងចូលរួមអភិវឌ្ឍវិស័យទាំងនេះឲ្យកាន់តែរីកចម្រើនបន្ថែមទៀតផងដែរ។ លោកបានគូសបញ្ជាក់ថា LEGENDS TOUR នឹងបង្ហាញអ្វីល្អៗ ឲ្យពិភពលោកទាំងមូលបានឃើញពីប្រទេសកម្ពុជា ដូចជាវប្បធម៌ អរិយធម៌របស់កម្ពុជាជាដើម៕

មន្រ្ដីជាន់ខ្ពស់ក្រសួងកសិកម្ម ទទួលជួបសំណេះសំណាលជាមួយគណៈប្រតិភូសមាគមនាវាយុវជនអាស៊ីអាគ្នេយ៍ និងជប៉ុន( SSEAYP)

នៅថ្ងៃទី១៧ ខែវិច្ឆិកា ឆ្នាំ២០២៤ ឯកឧត្តម ចាន់ សុវុឌ្ឍ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អញ្ជើញដឹកនាំក្រុមការងារ ដែលមាន ឯកឧត្តម សួន សេរី លោកជំទាវ ចាន់ ផលលឿន អនុរដ្ឋលេខាធិការ ឯកឧត្តម សរ ចិត្រា អគ្គលេខាធិការ លោក ទី ចាន់ណា ប្រធាននាយកដ្ឋានបុគ្គលិក និងអភិវឌ្ឈន៍ធនធានមនុស្ស បានទទួលជួបសំណេះសំណាល ជាមួយគណៈប្រតិភូសមាគមនាវាយុវជនអាស៊ីអាគ្នេយ៍ ដែលដឹកនាំដោយ លោកជំទាវ អ៊ឹម រចនា ប្រធានសមាគមនាវាយុវជនអាស៊ីអាគ្នេយ៍កម្ពុជា (SSEAYP) និងប្រតិភូយុវជនចំនួន១៧រូប ថ្នាក់ដឹកនាំក្រសួងអប់រំ យុវជន និងកីឡាចំនួន២រូប។ជំនួបនេះធ្វើឡើងនៅទីស្តីការក្រសួងកសិកម្ម ក្នុងគោលបំណង ដើម្បីសុំបទពិសោធន៍ និងអនុសាសន៍ណែនាំពីថ្នាក់ដឹកនាំក្រសួងកសិកម្ម រុក្ខាប្រមាញ់ និងនេសាទ មុននឹងចេញដំណើរចូលរួមកម្មវិធីនាវាយុវជនអាស៊ីអាគ្នេយ៍និងជប៉ុន (SSEAYP) ដែលជាកម្មវិធីផ្លាស់ប្តូរយុវជនអន្តរជាតិដ៏ធំបំផុតមួយ ក្នុងតំបន់អាស៊ីកម្មវិធី នឹងប្រព្រឹត្តទៅរយៈពេល៣៤ថ្ងៃ គឺចាប់ពីថ្ងៃទី១៥ ខែមករា ដល់ ថ្ងៃទី១៧ ខែកុម្ភៈ ឆ្នាំ២០២៦ ដោយធ្វើដំណើរតាមនាវានឹងចូលចតនៅប្រទេសចំនួន៣ គឺប្រទេសជប៉ុន ប្រទេសសឹង្ហបុរី និងប្រទេស ថៃ។ឯកឧត្តមរដ្ឋលេខាធិការ ចាន់ សុវុឌ្ឍ ក៏បានសម្តែងការស្វាគមន៍ និងកោតសរសើរចំពោះកិច្ចខិតខំប្រឹងប្រែងរបស់ប្អូនៗ រហូតទទួលបានលទ្ធផលចូលរួមជាលក្ខណៈអន្តរជាតិ ៣ប្រទេស ជប៉ុន សិង្ហបុរី និងថៃ ។ ជាមួយនឹងការចូលរួមជួបប្រទេសថៃ ឯកឧត្តមបានសង្កត់ធ្ងន់ក្នុងនាមតំណាងពីប្រទេសកម្ពុជា មិនអាចយករឿងនយោបាយទៅជជែកវែកញែកនាឱកាសនោះទេ ប៉ុន្តែយើងត្រូវតែមានឆន្ទៈការពារជាតិ ការពារទឹកដីរបស់ខ្លួនក្នុងនាមខ្មែរតែមួយ។ជាចុងបញ្ចប់ ឯកឧត្តមរដ្ឋលេខាធិការ បានជូនពរចំពោះការបំពេញភារកិច្ច កាតព្វកិច្ចរបស់ប្អូនៗ ទទួលបានជោគជ័យ ជាមួយនឹងការស្វែងយល់នូវបទពិសោធន៍ថ្មីៗបន្ថែមទៀត ពីបណ្តាប្រទេសផ្សេងៗ ដើម្បីកសាងសមត្ថភាពជំនាញបន្ថែម បំរើដល់ការអភិវឌ្ឍសង្គម និងសេដ្ឋកិច្ចកម្ពុជាក្នុងពេលបច្ចុប្បន្ន ជាពិសេសក្នុងពេលអនាគតឱ្យកាន់តែប្រសើរ៕

រដ្ឋសភា ថ្កោលទោសដាច់អហង្កការ ចំពោះការរំលោភដ៏សាហាវយង់ឃ្នងរបស់ទាហានឈុតខ្មៅថៃ មកលើពលការិនីកម្ពុជា

រដ្ឋសភានៃព្រះរាជាណាចក្រកម្ពុជា នៅថ្ងៃទី១៨ ខែវិច្ឆិកា ឆ្នាំ២០២៥ នេះ បានសម្តែងការសោកស្តាយជាខ្លាំង និងចេញញត្តិថ្កោលទោសដាច់អហង្ការ ចំពោះអំពើហិង្សា និងការរំលោភបំពានផ្លូវភេទជាក្រុម ដ៏សាហាវយង់ឃ្នងរបស់ទាហានឈុតខ្មៅថៃ ដែលបាន ប្រព្រឹត្តមកលើពលការិនីចំណាកស្រុកកម្ពុជា កាលពីថ្ងៃទី១៥ ខែវិច្ឆិកា ឆ្នាំ២០២៥ ខណៈពេលដែលនារីរងគ្រោះ និងពលករផ្សេងទៀតបានកំពុងធ្វើដំណើរចូលមកប្រទេសកម្ពុជាវិញ តាមខ្សែបន្ទាត់ព្រំដែនកម្ពុជា-ថៃ។ សកម្មភាព ដ៏ព្រៃផ្សៃ និងអនុស្សធម៌នេះ គឺជាការរំលោភបំពានធ្ងន់ធ្ងរលើសិទ្ធិមនុស្ស សិទ្ធិស្ត្រី ច្បាប់មនុស្សធម៌អន្តរជាតិ អនុសញ្ញាស្តីពីការលុបបំបាត់រាល់ទម្រង់នៃការរើសអើងប្រឆាំងនឹងស្ត្រី (CEDAW) ធម្មនុញ្ញ និងលិខិតុបករណ៍ អាស៊ាន និងច្បាប់អន្តរជាតិនានា។រដ្ឋសភាកម្ពុជាមានការព្រួយបារម្ភយ៉ាងខ្លាំងចំពោះសុខសុវត្ថិភាពពលករចំណាកស្រុកកម្ពុជា ដែលកំពុង បម្រើការងារនៅក្នុងប្រទេសថៃ។ អំពើហិង្សា ការរំលោភសិទ្ធិមនុស្សដ៏ធ្ងន់ធ្ងរពីសំណាក់យោធាឈុតខ្មៅថៃមកលើ ពលការិនី និងពលរដ្ឋស្លូតត្រង់កម្ពុជាជាបន្តបន្ទាប់មកនេះ ផ្តើមចេញពីការរើសអើង ការគំរាមកំហែង ការបង្កអំពើ ហិង្សាគ្រប់រូបភាពរបស់ភាគីថៃ ក្នុងការឈ្លានពានលើអធិបតេយ្យកម្ពុជា។ អំពើហិង្សានេះ បានកើតឡើងក្រោយ ពីការរំលោភកិច្ចព្រមព្រៀងសន្តិភាព របស់ភាគីថៃ។រដ្ឋសភាកម្ពុជាសូមអំពាវនាវដល់សហគមន៍អន្តរជាតិ រួមមានអង្គការសហប្រជាជាតិ (UN) អាស៊ាន (ASEAN) គណៈកម្មការអន្តររដ្ឋាភិបាលអាស៊ានស្តីពីសិទ្ធិមនុស្ស (AICHR), អង្គការសហប្រជាជាតិទទួលបន្ទុក ស្ត្រី (UN Women) និងគណៈកម្មការទទួលបន្ទុកអនុសញ្ញា CEDAW ជាដើម សូមចាត់វិធានការច្បាស់លាស់ និងបន្ទាន់ ដើម្បីផ្តល់យុត្តិធម៌ដល់នារីរងគ្រោះ និងបញ្ឈប់អំពើហិង្សា និងការរំលោភសិទ្ធិស្ត្រី កុំឱ្យករណីដូចនេះ កើតមានជាថ្មីទៀត។ រដ្ឋសភាកម្ពុជាក៏សូមអំពាវនាវដល់អង្គការសិទ្ធិមនុស្ស ស្ថាប័នលើកកម្ពស់សិទ្ធិស្ត្រីជាតិ និង អន្តរជាតិជំរុញឱ្យរាជរដ្ឋាភិបាលថៃ អនុវត្តច្បាប់ឱ្យបានម៉ឺងម៉ាត់ ដើម្បីចាប់ជនល្មើសមកផ្តន្ទាទោសតាមផ្លូវច្បាប់ ផ្តល់យុត្តិធម៌ជូនជនរងគ្រោះ ជាពិសេសត្រូវលុបបំបាត់វប្បធម៌និទណ្ឌភាព និងការរំលោភសិទ្ធិនារី ដែលប្រព្រឹត្ត ឡើងដោយកងកម្លាំងយោធាឈុតខ្មៅថៃ។រដ្ឋសភានៃព្រះរាជាណាចក្រកម្ពុជា សូមថ្លែងអំណរគុណយ៉ាងជ្រាលជ្រៅជូន ចំពោះរាជរដ្ឋាភិបាល កម្ពុជា ដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី ដែលបានចាត់វិធានការ និងអន្តរាគមន៍ ភ្លាមៗ ក្នុងការជួយសង្គ្រោះនារីរងគ្រោះ ការយកចិត្តទុកដាក់ព្យាបាល និងថែទាំទាំងរាយកាយ និងផ្លូវចិត្ត រួមនឹង វិធានការនានា ដើម្បីស្វែងរកយុត្តិធម៌ជូននារីរងគ្រោះដែលជាជនស៊ីវិលស្លូតត្រង់៕

ធនាគារជាតិ ប្ដូរប្រាក់រៀលថ្មីជូនប្រជាពលរដ្ឋរងគ្រោះអគ្គិភ័យជាង ៦លានរៀល

ធនាគារជាតិនៃកម្ពុជា សាខាខេត្តបាត់ដំបង បានប្តូរប្រាក់រៀលថ្មី ជូនម្ចាស់ហាងលក់ទំនិញ ហេង ឆាយលី ក្នុងបុរីព្រែកមហាទេព ភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ខេត្តបាត់ដំបង ដែលប្រាក់របស់គាត់បានឆេះខូចខាត ដោយសារគ្រោះអគ្គិភ័យ សរុបចំនួន ៦ ៣៨៨ ៥០០ រៀលគត់ នាថ្ងៃទី១៨ ខែវិច្ឆិកា ឆ្នាំ២០២៥។ ការប្តូរជូននេះធ្វើឡើងដោយអនុលោមតាមលក្ខខណ្ឌជាក្រដាសប្រាក់រៀលពិតប្រាកដ មិនក្លែងក្លាយ និងគោលការណ៍វាយតម្លៃដែលរក្សាទ្រង់ទ្រាយដើមនៃក្រដាសប្រាក់លើសពី ៧០%។គួរបញ្ជាក់ថា ធនាគារជាតិនៃកម្ពុជា បន្តប្តូរប្រាក់រៀលចាស់ ទក់ ឬរហែក ជាប់ជាប្រចាំនៅតាមបណ្តាសាខាធនាគារជាតិនៃកម្ពុជា រាជធានី-ខេត្ត ទូទាំងប្រទេស។ សាធារណជនអាចបន្តប្តូរក្រដាសប្រាក់រៀលចាស់ ទក់ ឬរហែក យកប្រាក់រៀលថ្មីដោយមិនគិតកម្រៃសេវា នៅតាមសាខាធនាគារជាតិនៃកម្ពុជា រាជធានី-ខេត្ត ដែលនៅជិតផ្ទះ រៀងរាល់ម៉ោងធ្វើការ៕

មន្ត្រីជាន់ខ្ពស់ក្រសួងការងារជួបសួរសុខទុក្ខពលការិនីខ្មែរដែលត្រូវក្រុមទាហានឈុតខ្មៅថៃចាប់រំលោភយ៉ាងព្រៃផ្សៃ

នៅព្រឹកថ្ងៃទី១៨ ខែវិច្ឆិកា ឆ្នាំ២០២៥ នៅមន្ទីរពេទ្យបង្អែកខេត្តបាត់ដំបង ឯកឧត្តម សេង សក្តា រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ តំណាងដ៏ខ្ពង់ខ្ពស់ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ព្រមទាំងមានការចូលរួមពីតំណាងសមាគមទីភ្នាក់ងារជ្រើសរើសពលករកម្ពុជា (ACRA), មណ្ឌលធនធានពលករទេសន្តរប្រវេសន៍ (MRC) របស់គម្រោង ILO-PROTECT និងតំណាងក្រុមការងារយុវជន ESEA អញ្ជើញជួបសួរសុខទុក្ខពលការិនីខ្មែរម្នាក់ដែលត្រូវបានក្រុមទាហានឈុតខ្មៅថៃចាប់រំលោភបូកយ៉ាងសាហាវព្រៃផ្សៃយង់ឃ្នង គ្មានមនុស្សធម៌ កាលពីថ្ងៃទី១៥ ខែវិច្ឆិកា ឆ្នាំ២០២៥ ខណៈពេលដែលពលការិនីរងគ្រោះ និងពលរដ្ឋកម្ពុជា ១២នាក់ផ្សេងទៀតធ្វើដំណើរឆ្លងដែនពីប្រទេសថៃចូលមកទឹកដីកម្ពុជា។ឯកឧត្តម សេង សក្តា បានពាំនាំការផ្តាំផ្ញើសួរសុខទុក្ខពីសំណាក់ ឯកឧត្តមរដ្ឋមន្ត្រី ដោយបានតាមដានយ៉ាងយកចិត្តទុកដាក់ចំពោះសុខទុក្ខរបស់ពលការិនីខ្មែរ បន្ទាប់ពីមានការរំលោភបំពានសិទ្ធិមនុស្ស សិទ្ធិស្រ្តី និងសិទ្ធិពលករទេសន្តរប្រវេសន៍យ៉ាងធ្ងន់ធ្ងរ។ឯកឧត្តមរដ្ឋលេខាធិការ ក៏បានបញ្ជាក់ជូនថា ឯកឧត្តមរដ្ឋមន្រ្តី បានសម្តែងនូវការសោកស្តាយ និងថ្កោលទោសយ៉ាងដាច់អហង្ការចំពោះទង្វើអមនុស្សធម៌ ដែលក្រុមទាហានឈុតខ្មៅថៃបានធ្វើមកលើក្រុមពលករទេសន្តរប្រវេសន៍ខ្មែរចំនួន ១៣នាក់ ដោយបានប្រើអំពើហិង្សាយ៉ាងសាហាវយង់ឃ្នងនិងអំពើថោកទាបរំលោភសេពសន្ថវៈ (រំលោភបូក) ដោយក្រុមទាហានឈុតខ្មៅថៃទៅលើពលករខ្មែរជាស្រ្តី ១រូប។ក្រសួងនឹងបន្តយកចិត្តទុកដាក់ខ្ពស់ក្នុងការតាមដានការវិវត្តលើករណីនេះ និងករណីពាក់ព័ន្ធផ្សេងទៀត ដើម្បីធានាការការពារ និងលើកកម្ពស់សិទ្ធិនិងសេចក្ដីថ្លៃថ្នូររបស់ពលករទេសន្តរប្រវេសន៍ខ្មែរ ដោយអនុលោមតាមលិខិតបទដ្ឋានអន្តរជាតិ។ឆ្លៀតក្នុងឱកាសនេះ ក្រសួងបានណែនាំនិងក្រើនរំលឹកសារជាថ្មីដល់បងប្អូនពលករខ្មែរ ដែលកំពុងធ្វើការនិងស្នាក់នៅប្រទេសថៃសូមបង្កើនការប្រុងប្រយ័ត្នខ្ពស់ចំពោះសុខសុវត្ថិភាពផ្ទាល់ខ្លួនក្នុងការប្រឈមនឹងការរងនូវអំពើហិង្សា និងការរើសអើងនានា និងសូមជ្រើសរើសការទាក់ទងមកស្ថាប័នមានសមត្ថកិច្ចរបស់កម្ពុជា និងអង្គការអន្តរជាតិជាដៃគូរបស់កម្ពុជាក្នុងការធ្វើមាតុភូមិនិវត្តន៍ប្រកបដោយសុវត្ថិភាព៕

គណៈកម្មាធិការអចិន្ត្រៃយ៍រដ្ឋសភា គោរពជូនពរសម្តេចរដ្ឋសភាធិបតី ក្នុងឱកាសដ៏មហានក្ខត្តឫក្ស នៃពិធីចម្រើនជន្មាយុ គម្រប់ ៧៣ឆ្នាំ ឈានចូល ៧៤ឆ្នាំ

ឯកឧត្ដមកិត្តិសេដ្ឋាបណ្ឌិត ជាម យៀប អនុប្រធានទី១រដ្ឋសភា នៅព្រឹកថ្ងៃទី១៨ ខែវិច្ឆិកា ឆ្នាំ២០២៥ បានអញ្ជើញដឹកនាំគណៈកម្មាធិការអចិន្ត្រៃយ៍រដ្ឋសភា ចូលគោរពជូនពរសម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា នៅវិមានរដ្ឋសភា នៅក្នុងឱកាសដ៏មហានក្ខត្តឫក្សឧត្ដុងឧត្តម ប្រកបដោយសេចក្តីសោមនស្សរីករាយ នៃពិធីចម្រើនជន្មាយុ សម្តេចរដ្ឋសភាធិបតី គម្រប់ ៧៣ឆ្នាំ ឈានចូល ៧៤ឆ្នាំ នៅថ្ងៃទី១៨ ខែវិច្ឆិកា ឆ្នាំ២០២៥ នេះ។ក្នុងនាមគណៈកម្មាធិការអចិន្ត្រៃយ៍រដ្ឋសភា ឯកឧត្ដមកិត្តិសេដ្ឋាបណ្ឌិត បានអាននូវសារលិខិតប្រសិទ្ធពរជ័យ បវរសួស្តី សិរីមង្គល វិបុលសុខមហាប្រសើរគ្រប់ប្រការជូនចំពោះ សម្តេចរដ្ឋសភាធិបតី សូមមានសុខភាពល្អបរិបូរណ៍ កម្លាំងមាំមួន បញ្ញាញាណភ្លឺថ្លា ជន្មាយុយឺនយូរ ដើម្បីបន្តដឹកនាំស្ថាប័នរដ្ឋសភា ឱ្យទទួលបាននូវវឌ្ឍនភាពថ្មីៗជាបន្តបន្ទាប់ទៀត។ឆ្លៀតក្នុងឱកាសនេះ ឯកឧត្ដមកិត្តិសេដ្ឋាបណ្ឌិត ជាម យៀប បានគោរពសម្តែងនូវការកោតសរសើរចំពោះការខិតខំប្រឹងប្រែងបំពេញភារកិច្ច របស់សម្តេចរដ្ឋសភាធិបតី ដែលតែងតែលះបង់អស់ពីកម្លាំងកាយចិត្ត ប្រាជ្ញាស្មារតី និងទេពកោសល្យដ៏ប៉ិនប្រសប់ បំពេញបេសកកម្មបម្រើជាតិ និងបានបន្តដឹកនាំស្ថាប័នរដ្ឋសភាក៏ដូចជាទំនាក់ទំនងការទូតសភាដ៏ប៉ិនប្រសប់ ទាំងក្នុងតំបន់ និងនៅលើឆាកអន្តរជាតិ ជាពិសេសបង្កើតចំណងមិត្តភាព សាមគ្គីភាព និងកិច្ចសហប្រតិបត្តិការរវាងរដ្ឋសភាកម្ពុជា និងរដ្ឋសភានៃបណ្ដាប្រទេសនានានៅលើសកលលោក។ ជាក់ស្តែងនាពេលថ្មីៗកន្លងមកនេះ សម្តេចរដ្ឋសភាធិបតី បានបំពេញបេសកកម្ម និងទទួលលទ្ធផលដ៏ត្រចះត្រចង់ជូនជាតិមាតុភូមិ ដូចជាការអញ្ជើញចូលរួមក្នុងមហាសន្និបាតអន្តរសភាអាស៊ានលើកទី៤៦ (APA-46) នៅប្រទេសម៉ាឡេស៊ី កិច្ចប្រជុំថ្នាក់ដឹកនាំពិភពលោក ស្តីពីស្ត្រីនៅរដ្ឋធានីប៉េកាំង ដំណោះរទស្សនកិច្ច និងចូលរួមកិច្ចប្រជុំនៅប្រទេសហុងគ្រី-បារាំងជាដើម។ សម្តេច រដ្ឋសភាធិបតី បានរួមចំណែកយ៉ាងសកម្មជាមួយប្រមុខដឹកនាំរាជរដ្ឋាភិបាលក្នុងការធ្វើឱ្យអន្តរជាតិយល់ពីការពិត នៃជម្លោះនៅតាមព្រំដែនកម្ពុជា-ថៃ បានធ្វើឱ្យអន្តរជាតិទទួលស្គាល់ និងគាំទ្របទឈប់បាញ់រវាងកម្ពុជា-ថៃ ព្រមទាំងបានជំរុញឱ្យមានកិច្ចព្រមព្រៀងសន្តិភាពរវាងកម្ពុជា-ថៃ ដែលបានចុះហត្ថលេខាជាផ្លូវការ កាលពីថ្ងៃទី២៦ ខែតុលា ឆ្នាំ២០២៥ នៅទីក្រុងគូឡាឡាំពួ ប្រទេសម៉ាឡេស៊ី។ ជាមួយគ្នានេះ សម្តេចរដ្ឋសភាធិបតី បានដើរតួនាទីយ៉ាងសំខាន់ និងឈានមុខគេក្នុងការលើកស្ទួយសមភាពយេនឌ័រ បង្កើនភាពអង់អាចដល់ស្ត្រី ជួយជំរុញ និងលើកទឹកចិត្តដល់ស្ត្រី ឱ្យចូលរួមយ៉ាងពេញទំហឹងលើឆាកនយោបាយជាតិ-អន្តរជាតិ ក៏ដូចជាការចូលរួមកសាងប្រទេសជាតិ អោយមានភាពរីកចំរើន និងអភិវឌ្ឍន៍ ប្រកបដោយចីរភាព។ជាថ្មីម្ដងទៀត ឯកឧត្ដមកិត្តិសេដ្ឋាបណ្ឌិត និងគណៈកម្មាធិការអចិន្ត្រៃយ៍រដ្ឋសភា បានលើកហត្ថប្រណមបួងសួងដល់គុណបុណ្យព្រះរតនត្រ័យ និងវត្ថុស័ក្តិ សិទ្ធិទាំងឡាយក្នុងលោក ទេវតាថែរក្សាព្រះរាជាណាចក្រកម្ពុជា សូមតាមជួយបីបាច់ថែរក្សាការពារ និងប្រទាន ពរជ័យ សិរីសួស្តី ជ័យមង្គល គ្រប់ប្រការជូនចំពោះ សម្តេចរដ្ឋសភាធិបតី ប្រធានរដ្ឋសភា ព្រមទាំងក្រុមគ្រួសារ សូមបានសមប្រកបទៅនឹងព្រះពុទ្ធពរទាំងបួនប្រការគឺ អាយុ វណ្ណៈ សុខៈ និងពលៈ កុំបីប្រែក្លាយទៅជាប្រការដទៃឡើយ។

បណ្ដាញសង្គម

ព័ត៌មានថ្មីៗ

រុស្ស៊ី៖ UN និង IAEA កំពុងប្រកាន់យកជំហរអព្យាក្រឹតចំពោះបញ្ហារោងចក្រនុយក្លេអ៊ែរ ZAPOROZHYE

ក្រុមហាម៉ាសនិយាយថា ខ្លួនត្រៀមរួចជាស្រេចដើម្បីប្រគល់ការគ្រប់គ្រងនៅក្នុងតំបន់ហ្កាហ្សា

កម្ពុជាបញ្ជូនអត្តពលិកបាល់បោះអង្គុយជនពិការចំនួន៣២នាក់ចូលរួមប្រកួតជើងឯកអាស៊ីលើកទី២ នៅប្រទេសម៉ាឡេស៊ី

ក្រុមជម្រើសជាតិបារាំងជួបប្រធានាធិបតីបារាំង Emmanuel Macron មុនចេញដំណើរទៅ World Cup

តេជោលីគ រកឃើញក្រុមខ្លាំងឡើងជុំទី២ ខណៈបញ្ជាការដ្ឋានអង្គរក្ស ជាក្រុមតែមួយគត់ មិនស្គាល់ចាញ់

សម្ដេចធិបតី៖ រាជរដ្ឋាភិបាលមានលទ្ធភាពគ្រប់គ្រាន់បង្កើនថវិកាការពារជាតិមិនចាំបាច់កាត់ពីវិស័យផ្សេងទេ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877