នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ក្រុមហ៊ុន VINCI Airports ប្ដេជ្ញាបន្តចូលរួមជាមួយរាជរដ្ឋាភិបាល ដើម្បីជំរុញ និងអភិវឌ្ឍឧស្សាហកម្មអាកាសចរណ៍នៅកម្ពុជា
អនុប្រធានប្រចាំការ គ.ប.ឆ.ប.៖ ច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា ជួយកម្ពុជាកម្ចាត់ឧក្រិដ្ឋកម្មបច្ចេកវិទ្យាឱ្យអស់ និងមិនឱ្យឧក្រិដ្ឋកម្មនេះវិលត្រលប់មកវិញឡើយ
អ្នកនាំពាក្យក្រសួងការបរទេសកម្ពុជា ៖ វាជារឿងគួរឱ្យសោក​ស្តាយយ៉ាងខ្លាំង ប្រសិនបើភាគីថៃសម្រេចដកខ្លួនជាឯកតោ​ភាគីពីអនុស្សរណៈឆ្នាំ២០០១
ក្រសួងការងារ និងក្រសួងឧស្សាហកម្ម រួមគ្នាជំរុញការអនុវត្តស្ដង់ដាសុវត្ថិភាពម្ហូបអាហារដល់ម្ចាស់សហគ្រាស SMEs ដើម្បីបង្កើនភាពប្រកួតប្រជែង និងបង្កើតការងារសមរម្យនៅកម្ពុជា

ព័ត៌មានជាតិ

គណៈកម្មាធិការជាតិជំរុញចលនា ភូមិ១ ផលិតផល១ ចាប់ផ្តើមយុទ្ធនាការ​ផ្សព្វផ្សាយ​ផលិត​ផល​ខ្មែរ​

2026/03/21 04:27:18 pm        405
Facebook Telegram Linkin
គណៈកម្មាធិការជាតិជំរុញចលនាភូមិមួយផលិតផលមួយ (ភ១.ផ១) ឬ (OVOP) បានចាប់ផ្ដើម រៀបចំព្រឹត្តិការណ៍ផ្សព្វផ្សាយផលិតផលខ្មែរ ភូមិ១ ផលិតផល១ ទូទាំងប្រទេស អមដោយការបណ្តុះបណ្តាលសហគ្រិនខ្មែរទាំងអស់ឱ្យមានសមត្ថភាពពង្រីកមុខរបររបស់ខ្លួនផងដែរ។គណៈកម្មាធិការជាតិជំរុញចលនាភូមិមួយផលិតផលមួយ (ភ១.ផ១) ឬ (OVOP) សហការឧបត្ថម្ភដោយសហគ្រិនខ្មែរ (KE) បានរៀបចំព្រឹត្តិការណ៍ផ្សព្វផ្សាយផលិតផលខ្មែរ ភូមិ១ ផលិតផល១ នៅដីឡូត៍លេខ878 ផ្លូវវេងស្រេង រាជធានីភ្នំពេញ រយៈពេល៣ថ្ងៃចាប់ពីថ្ងៃទី២០ ដល់ថ្ងៃទី២២ ខែមីនា ឆ្នាំ២០២៦ ដែលមានផលិតផលដាក់តាំងបង្ហាញជិត១០០ស្តង់ អមដោយការប្រគុំតន្ត្រីខ្នាតធំ ដែលព្រឹត្តិ ការណ៍ផ្សព្វផ្សាយនេះ នឹងត្រូវធ្វើឡើងនៅតាមរាជធានីខេត្តទូទាំងប្រទេស។ឯកឧត្តម ផល សុជាតិ អគ្គលេខាធិការគណៈកម្មាធិការជំរុញចលនាភូមិ១ ផលិតផល១ បានឱ្យដឹងថា យុទ្ធនាការផ្សព្វផ្សាយផលិតផលខ្មែរ នឹងធ្វើឡើងនៅតាមរាជធានីខេត្តទូទាំងប្រទេស ព្រមជាមួយនឹងការបណ្តុះបណ្តាលសហគ្រិនខ្មែរឱ្យចេះធ្វើទីផ្សារផ្សព្វផ្សាយលក់ចែកចាយផលិតផលខ្លួន ជំនាញគ្រប់គ្រងអាជីវកម្ម លក់តាមប្រព័ន្ធអនឡាញ ជំនាញរៀបចំហិរញ្ញវត្ថុ និងជំនាញទន់នានាទៀត សំដៅឱ្យពួកគេទទួលបានតម្លៃបន្ថែម សិប្បកម្ម អាជីវកម្មមានភាពរឹងម៉ាំ។ឯកឧត្តម ផល សុជាតិ បន្តថា រហូតមកដល់បច្ចុប្បន្ន គណៈកម្មាធិការជាតិជំរុញចលនាភូមិ១ ផលិតផល១ បានទទួលស្គាល់ផលិតផលខ្មែរ ប្រមាណជិត១០០០ផលិតផល ក្នុងនោះ ផលិតផលជាទំនិញ មានជាង៧០០មុខ ហើយក្រៅពីនេះ ជាផលិតផលជាសេវាកម្ម កើតពីសហគ្រាស មីក្រូខា្នតតូចខ្នាតមធ្យម និងខ្លះកើតពីសិប្បកម្មលក្ខណៈគ្រួសារ ដែលមានភាពទន់ខ្សោយ ហើយត្រូវជំរុញបំពាក់បំប៉នបន្ថែម ដើម្បីកុំឲ្យសិប្បកម្មដួលរលំទៅវិញ។លោកស្រី តិមា វិច្ឆិកាល អភិបាលរងរាជធានីភ្នំពេញ បានឱ្យដឹងថា នៅរាជធានីភ្នំពេញ ឆ្នាំ២០២៦នេះ មានមូលដ្ឋានសហគ្រាសធន់តូច មធ្យម ប្រមាណជាង៦០០០កន្លែង បានស្រូបទាញពលករចូលបម្រើការជាង១១ម៉ឺននាក់ ហើយក្រៅពីនេះ ក៏មានរោងចក្រ ប្រមាណជាង៨០០កន្លែង បានស្រូបទាញកម្លាំងពលកម្មប្រមាណជាង៤២ម៉ឺននាក់ ដោយមិនបូកបញ្ចូលរោងចក្រនៅក្នុងតំបន់សេដ្ឋកិច្ចពិសេស និងរោងចក្រសហគ្រាសកម្រិតថ្នាក់ជាតិផ្សេងៗទៀត លោកស្រី បានបញ្ជាក់ថា រហូតមកដល់បច្ចុប្បន្នដែរ រដ្ឋបាលរាជធានីភ្នំពេញ បានជំរុញ និងបានចុះបញ្ជីម៉ាកផលិតផលប្រមាណ១៨០០ផលិតផល និងបានចងក្រងផលិតផលខ្មែរចូលក្នុងភូមិ១ផលិតផល១ ប្រមាណ៧៦មុខផលិតផល ដែលភាគច្រើន ជា ម្ហូបអាហារ សម្លៀកបំពាក់ តម្បាញ ចម្លាក់ វត្ថុអនុស្សាវរីយ៍ និងផលិតផលសម្រាប់ប្រើប្រាស់នានាទៀត៕ អត្ថបទ៖ ស៊ុម សុខជា

ឯកអគ្គរាជទូតកម្ពុជាប្រចាំប្រទេសកូរ៉េ ជួបជាមួយអាជ្ញាធរកូរ៉េ ដើម្បី​ពង្រឹង​សហ​ប្រតិបត្តិការ​ជួយ​ដល់​ពលករ​ខ្មែរ

2026/03/21 03:16:42 pm        196
Facebook Telegram Linkin
ភ្នំពេញ៖ ឯកឧត្តម ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ និងសហការី បាន​ជួប​សំណេះសំណាលនិងពិភាក្សាការងារជាមួយលោក Baek Seong Hyeon អភិបាល​ក្រុង​នន់​សាន​ នៅ​សាលាក្រុងនន់សាន់ ក្នុងខេត្តឈុងឆុងណាំដូ ដើម្បីពង្រឹងកិច្ចសហប្រតិបត្តិការ ផ្ដល់​ព័ត៌មាន​ដល់​គ្នា​ទៅវិញទៅមក​ជួយដល់ពលករខ្មែរ ដែលកំពុងបម្រើការងារក្នុងក្រុងមួយនេះ។ក្នុង​ជំនួបកាលពីថ្ងៃទី២០ ខែមីនា ឆ្នាំ២០២៦ ឯកឧត្តមឯកអគ្គរាជទូត បានថ្លែងអំណរគុណ លោក​អភិបាលក្រុងនន់សាន់ ដែលបានទទួលស្វាគមន៍ក្រុមការងារស្ថានទូតយ៉ាងកក់ក្តៅ ព្រម​ទាំង​ថ្លែង​អំណរគុណសាលាក្រុង ដែលតែងតែយកចិត្តទុកដាក់ខ្ពស់ ចំពោះសុខ​សុវត្ថិភាព​របស់​បង​ប្អូន​ពលករ​កម្ពុជា ដែលកំពុងបំរើការងារ និងរស់នៅក្នុងតំបន់នន់សាន់ ប្រមាណ ១ ៧០០​នាក់ ​ដែលជាចំនួនច្រើនជាងគេប្រៀបទៅនឹងពលករបរទេសដទៃទៀត។ជា​មួយគ្នានេះ ឯកឧត្តម ឃួន ផុនរតនៈ បានស្នើសាលាក្រុងនន់សាន់ បន្តពង្រឹង​កិច្ច​ស​ហ​ប្រតិបត្តិ​ការ​ល្អ​ជាមួយស្ថានទូត ក្នុងការផ្តល់ព័ត៌មានគ្នាទៅវិញទៅមក ដើម្បីរក្សាឱ្យបាននូវសុវត្ថិភាព និង​ដោះ​ស្រាយ​បញ្ហាឱ្យទាន់ពេលវេលា ជូនបងប្អូនពលករដែលកំពុងរស់នៅក្នុងតំបន់នេះ ។ដោយ​សំលឹងឃើញពីសក្តានុពលកសិកម្ម របស់ក្រុងនន់សាន់ ឯកឧត្តមឯកអគ្គរាជទូត ក៏បាន​ស្នើ​ឱ្យ​សាលា​ក្រុងនុនសាន់ ពិចារណាក្នុងការភ្ជាប់ទំនាក់ទំនងសហប្រត្តិបត្តិការរវាងក្រុងនន់សាន់ និង​ខេត្តក្រុងណាមួយរបស់ប្រទេសកម្ពុជា ជាពិសេសខេត្តបាត់ដំបង ដែលជា​ខេត្ត​មួយ​ដ៏​មាន​សក្តានុពល​លើ​វិស័យកសិកម្ម របស់កម្ពុជា ។ឯកឧត្តមឯកអគ្គរាជទូត ក៏បានអញ្ជើញលោកអភិបាលក្រុង មកបំពេញ​ទស្សន​កិច្ច​នៅ​ប្រទេស​កម្ពុជា​ ក្នុងឱកាសសមស្របណាមួយ ហើយជាការឆ្លើយតប លោកអភិបាលក្រុង មានប្រសាន៍ថា នឹងទៅទស្សនាប្រទេសកម្ពុជា ក្នុងឱកាសណាមួយក្នុងពេលខាងមុខ ។បន្ទាប់មកឯកឧត្តម ឃួន ផុនរតនៈ និងសហការី បានអញ្ជើញជួបសំណេះសំណាល និង​ពិភាក្សា​ការងារជាមួយលោក Yeo Sang-bong ស្នងការក្រុងនន់សាន ព្រមទាំងបាន​ថ្លែង​អំណរ​គុណ​ដល់​លោកស្នងការ ដែលតែងតែយក​ចិត្ត​ទុក​ដាក់ក្នុង​ការ​ថែ​រក្សា​សុខ​សុវត្ថិភាព​ជូន​ពលករ​ខ្មែរ និងសហគមន៍ខ្មែរ នៅតំបន់នន់សានកន្លងមក។ ភាគីទាំងពីរក៏បានពិភាក្សាអំពីការពង្រឹងកិច្ចសហប្រតិបត្តិការរវាងស្ថានទូតកម្ពុជា និង​ស្នងការក្រុងនន់សាន នាពេលខាងមុខ។នៅថ្ងៃដដែលនេះដែរ ឯកឧត្តម ឯកអគ្គរាជទូតកម្ពុជាប្រចាំសាធារណរដ្ឋកូរ៉េ និងសហការី ក៏បានអញ្ជើញជួបសំណេះសំណាល និងពិភាក្សាការងារជាមួយលោក Kim Seongsu ប្រធានមជ្ឈមណ្ឌល Nonsan Family Center តំបន់នួនសាន ព្រមទាំងបានថ្លែងអំណរគុណដល់លោកប្រធានមជ្ឈមណ្ឌល ដែលតែងតែជួយយកចិត្តទុកដាក់ដោះស្រាយរាល់បញ្ហាប្រឈមនានារបស់ពលករខ្មែរ និងសហគមន៍ខ្មែរនៅតំបន់នួនសានកន្លងមក។ក្នុងជំនួបនេះ ភាគីទាំងពីរ ក៏បានពិភាក្សាអំពីការពង្រឹងកិច្ចសហប្រតិបត្តិការដោយផ្តោតលើការផ្លាស់ប្តូរព័ត៌មានទៅវិញទៅមក ការរៀបចំកម្មវិធីវប្បធម៌ ការពិនិត្យសុខភាពដោយឥតគិតថ្លៃ ការផ្តល់សេវាសាធារណៈ និងប្រឹក្សាការងារចល័តរបស់ស្ថានទូត និងការផ្សព្វផ្សាយច្បាប់ការងារថ្មីៗរបស់កូរ៉េ ក៏ដូចជាការបន្តសម្របសម្រួលដោះស្រាយបញ្ហាប្រឈមនានារបស់ពលករខ្មែរឱ្យកាន់តែមានប្រសិទ្ធភាព និងចំណេញពេលវេលា៕ អត្ថបទ បាន សុខរិទ្ធិ 

គណៈកម្មាធិការអាយស៊ីស៊ី ព្រះវិហារ បើកកិច្ចប្រជុំពេញអង្គលើកទី១១ ដើម្បីពិភាក្សា​អំពី​វិធានការ​សង្រ្គោះបន្ទាន់នៅប្រាសាទព្រះវិហារ និងការអភិរក្ស អភិវឌ្ឍន៍​រមណីយ​ដ្ឋាន​ប្រាសាទកោះកេរ

2026/03/21 02:10:42 pm        202
Facebook Telegram Linkin
គណៈកម្មាធិការសម្របសម្រួលអន្តរជាតិ សម្រាប់ការអភិរក្សប្រាសាទព្រះវិហារ (ICC-Preah Vihear) កាលពីថ្ងៃទី១៩ ខែមីនា ឆ្នាំ២០២៦កន្លងទៅនេះ បានរៀបចំកិច្ចប្រជុំពេញអង្គលើកទី១១ ក្រោមអធិបតីភាពលោកជំទាវបណ្ឌិតសភាចារ្យ ភឿង សកុណា រដ្ឋមន្រ្តីក្រសួងវប្បធម៌និងវិចិត្រសិល្បៈ និងមានការសម្របសម្រួលពីសហប្រធានចិន-ឥណ្ឌា ដើម្បីពិនិត្យ និងពិភាក្សាអំពីវិធានការបន្ទាន់ សង្រ្គោះប្រាសាទព្រះវិហារដែលរងគ្រោះយ៉ាងធ្ងន់ធ្ងរដោយជម្លោះប្រដាប់អាវុធទាំងពីរលើកកាលពីឆ្នាំ២០២៥កន្លងទៅ និងការអភិរក្ស និងអភិវឌ្ឍន៍រមណីយដ្ឋានប្រាសាទកោះកេរ។មុននឹងឈានដល់កិច្ចប្រជុំនេះ អ្នកជំនាញការអាដហុក អាយស៊ីស៊ី ព្រះវិហារ កាលពីថ្ងៃទី១៦-១៧ ខែមីនា ឆ្នាំ២០២៦កន្លងទៅ ក៏បានចុះពិនិត្យការងារអភិរក្ស និងអភិវឌ្ឍន៍រមណីយដ្ឋានប្រាសាទកោះកេរ និងពិនិត្យផលប៉ះពាល់នៅប្រាសាទព្រះវិហារ។ ក្នុងបេសកកម្មនោះ អ្នកជំនាញការអាដហុក បានផ្តល់អនុសាសន៍ណែនាំសម្រាប់រមណីយដ្ឋានប្រាសាទកោះកេររួមមាន៖ ការរៀបចំចំណតនៅប្រាសាទប្រាំ ការរៀបចំចងក្រងឯកសារស្ថាបត្យកម្ម និងរៀបចំសុវត្ថិភាពថ្មប្រាសាទខ្នារ ដើម្បីការងារអភិរក្ស ជួសជុលនៅពេលខាងមុខ។ ការអភិរក្ស ជួសជុល និងចងក្រងទិន្នន័យ នៅប្រាសាទគោកគ្រង ប្រាសាទបល្ល័ង្កត្បូង ជួសជុលគោបុរៈខាងលិចប្រាសាទក្រចាប់ ជួសជុលច្រកចូលខាងជើងនិងត្បូងនៃប្រាសាទក្រហម។ ចំណែកប្រាសាទព្រះវិហារ អ្នកជំនាញការបានផ្តល់អនុសាសន៍សម្រាប់កិច្ចអន្តរាគមន៍បន្ទាន់ទៅលើទីតាំងដែលរងគ្រោះដោយគ្រោប់ផ្លោង និងមានហានិភ័យខ្ពស់ចាប់ពីចំណុចពើយតាឌី ដល់ស្ពាននាគគោបុរៈទី៥ និងពិនិត្យការខូចខាតបញ្ជរលក់សំបុត្រនៅជើងភ្នំប្រាសាទព្រះវិហារផងដែរ។សូមបញ្ជាក់ថា លទ្ធផលនៃកិច្ចប្រជុំពេញមួយថ្ងៃ អង្គប្រជុំ សហប្រធានចិន-ឥណ្ឌា ព្រមទាំងបណ្តារដ្ឋសមាជិក(ICC-Preah Vihear) និងអ្នកជំនាញការអន្តរជាតិ បានប្តេជ្ញាបន្តចូលរួមជាមួយរាជរដ្ឋាភិបាលកម្ពុជាក្នុងកិច្ចការពារនិងថែរក្សាបេតិកភណ្ឌពិភពលោកប្រាសាទព្រះវិហារ សម្រាប់មនុស្សជាតិជំនាន់ក្រោយៗទៀត ជាពិសេសសហប្រធានទាំងពីរបានបង្ហាញជំហរបន្តកិច្ចការអភិរក្សប្រាសាទព្រះវិហារតាមរយៈវេទិការពិគ្រោះយោបល់នេះនៅពេលដែលស្ថានភាពវិលមករកប្រក្រតីភាពវិញ៕ 

ធនាគារជាតិផ្តល់សន្ទនីយភាពចាំបាច់ សម្រាប់ជាជម្រើសកាន់តែរឹងមាំ ដល់​គ្រឹះស្ថាន​ធនាគារ​និងហិរញ្ញវត្ថុ

2026/03/21 02:03:52 pm        213
Facebook Telegram Linkin
ធនាគារជាតិនៃកម្ពុជា ផ្តល់សន្ទនីយភាពចាំបាច់ (ឥណទាន) សម្រាប់ជាជម្រើសកាន់តែរឹងមាំ ដល់គ្រឹះស្ថានធនាគារ និងហិរញ្ញវត្ថុ ទទួលប្រាក់បញ្ញើ ដែលនឹងក្លាយជាមធ្យោបាយកាន់តែមានប្រសិទ្ធភាព ក្នុងការទប់ស្កាត់ហានិភ័យនានា និងរក្សាស្ថិរភាពហិរញ្ញវត្ថុ។ ធនាគារជាតិនៃកម្ពុជា ដាក់ចេញប្រកាសលេខ ធ៣៧.០២៦.២០៤ ប្រ.ក ចុះថ្ងៃទី២០ ខែមីនា ឆ្នាំ២០២៦ ស្តីពីការផ្តល់ សន្ទនីយភាពចាំបាច់ ចំពោះគ្រឹះស្ថានធនាគារ និងហិរញ្ញវត្ថុ ទទួលប្រាក់បញ្ញើ ឱ្យប្រើប្រាស់ជំនួសប្រកាសលេខ ធ៧-០១៥-១៥៣ ប្រ.ក ចុះថ្ងៃទី១៧ ខែមីនា ឆ្នាំ២០១៥ ស្តីពី ការផ្តល់សន្ទនីយភាពចំពោះគ្រឹះស្ថានធនាគារនិងហិរញ្ញវត្ថុ។ ប្រកាសនេះ មានគោលបំណងបង្កើតក្របខ័ណ្ឌក្នុងការផ្តល់សន្ទនីយភាពចាំបាច់ សម្រាប់ជាជម្រើសកាន់តែរឹងមាំ ដល់គ្រឹះ ស្ថានធនាគារ និងហិរញ្ញវត្ថុទទួលប្រាក់បញ្ញើ ដែលនឹងក្លាយជាមធ្យោបាយកាន់តែមានប្រសិទ្ធភាព ក្នុងការទប់ស្កាត់ហានិភ័យនានា និងរក្សាស្ថិរភាពហិរញ្ញវត្ថុ។ ប្រកាសនេះដែរ និងអនុញ្ញាតឱ្យគ្រឹះស្ថានធនាគារ និងហិរញ្ញវត្ថុ ទទួលប្រាក់បញ្ញើ ដែលកំពុងជួបបញ្ហាសន្ទនីយភាពបណ្ដោះ អាសន្ន ស្នើសុំសន្ទនីយភាពចាំបាច់ជាជម្រើសចុងក្រោយ ក្នុងគោលដៅទប់ស្កាត់ហានិភ័យជាប្រព័ន្ធ និងរក្សាស្ថិរភាពហិរញ្ញវត្ថុ។ ទន្ទឹមនេះ ក្រោមក្របខ័ណ្ឌនៃប្រកាសថ្មីនេះ ធនាគារជាតិនៃកម្ពុជា នឹងបន្តអនុវត្តតួនាទី ជាអាជ្ញាធរអាណាព្យាបាល និងគាំទ្រស្ថិរភាព ហិរញ្ញវត្ថុដោយធានាថា ការផ្តល់សន្ទនីយភាពចាំបាច់ ត្រូវបានអនុវត្តដោយប្រុងប្រយ័ត្ន មានលក្ខខណ្ឌច្បាស់លាស់ និងផ្អែកលើគោល ការណ៍គ្រប់គ្រងហានិភ័យសម្រាប់ប្រព័ន្ធធនាគារទាំងមូល៕ អត្ថបទ៖ សុន រ៉ាឌី 

រដ្ឋមន្រ្តីក្រសួងវប្បធម៌ អញ្ជើញពិនិត្យ និងវាយតម្លៃការខូចខាតប្រាសាទព្រះវិហារ ដែល​រង​គ្រោះ​ដោយ​ជម្លោះ​ប្រដាប់​អាវុធកាលពីឆ្នាំ២០២៥

2026/03/21 01:54:54 pm        274
Facebook Telegram Linkin
កាលពីថ្ងៃទី២០ ខែមីនា ឆ្នាំ២០២៦ លោកជំទាវបណ្ឌិតសភាចារ្យ រដ្ឋមន្រ្តីក្រសួងវប្បធម៌​និង​វិចិត្រ​សិល្បៈ ​បានអញ្ជើញពិនិត្យ និងវាយតម្លៃការខូចខាតប្រាសាទព្រះវិហារ ដោយសារ​ជម្លោះ​ប្រដាប់​អាវុធ​កាលពីខែកក្កដា​ និងខែធ្នូឆ្នាំ២០២៥កន្លងទៅ​ ដោយមានការចូលរួមពីឯកឧត្តម គីម រិទ្ធី អភិបាលខេត្តព្រះវិហារ ឯកឧត្តម គង់ ពុទ្ធិការ អគ្គនាយកអាជ្ញាធរជាតិព្រះវិហារ ឯកឧត្តម ហង់ ពៅ អគ្គនាយកអាជ្ញាធរជាតិអប្សរា និងមន្ត្រីជំនាញ។ ក្នុងបេសកកម្មខាងលើនេះ លោកជំទាវបណ្ឌិតសភាចារ្យរដ្ឋមន្រ្តី និង​ប្រតិភូ​ទាំង​អស់​បាន​សម្តែង​នូវ​មនោសញ្ចេតនារន្ធត់ ក្តុកក្តួល និងតក់ស្លុតយ៉ាង​ខ្លាំង​ចំពោះ​ការ​បំផ្លិច​បំផ្លាញ​ដ៏​ធំធេង​បំផុត​ចំពោះ​បេតិក​ភណ្ឌពិភពលោកប្រាសាទព្រះវិហារដែលជាសម្បត្តិរបស់មនុស្សជាតិ។ "ការខូចខាត​ បាក់បែក​ ដែលបាន​ពិនិត្យ​ឃើញ​ដោយ​ផ្ទាល់​ភ្នែក​នេះ​មាន​ទំហំ​រាប់​រយ​ដង​លើស​ពី​របាយ​ការណ៍​ខូច​ខាត​រៀប​ចំដោយអាជ្ញាធរជាតិព្រះវិហារកន្លងទៅដែលបានកត់ត្រាការខូចខាតសរុបចំនួន​ ៥៦២​កន្លែង"​ នេះជាការគូសបញ្ជាក់បន្ថែមរបស់លោកជំទាវរដ្ឋមន្ត្រី។ គ្រប់​ប្រទេស​ទាំង​អស់​មាន​ភារ​កិច្ច​ក្នុង​ការការពារសម្បត្តិវប្បធម៌​ ហើយ​សម្បត្តិ​បេតិក​ភណ្ឌ​មិន​ត្រូវ​ក្លាយ​ជា​គោល​ដៅ​នៃ​ការ​វាយ​ប្រហារ​​ ទោះក្នុងកាលៈទេសៈណាក៏ដោយ​ ផ្អែកតាមអនុសញ្ញាឆ្នាំ១៩៧២​ ស្តីពីបេតិក​ភណ្ឌ​ពិភព​លោក​​ និងអនុសញ្ញាឆ្នាំ១៩៥៤​ ស្តីពីកិច្ចការពារសម្បត្តិ​បេតិក​ភណ្ឌ​វប្បធម៌​ក្នុង​ជម្លោះ​ប្រដាប់​អាវុធ​។ គួរបញ្ជាក់ថា​ ប្រាសាទព្រះវិហាររងការខូចខាតចំនួន​ ១៤២កន្លែង​ នៅក្នុង​ការ​វាយ​ប្រហារ​ដោយ​ប្រដាប់​អាវុធ​កាលពីខែកក្កដា​ និងខូចខាតបន្ថែមចំនួន​ ៤២០កន្លែងទៀតក្រោយខែធ្នូឆ្នាំ២០២៥​ ដោយ​រាប់ចាប់ពីចំណុចពើយតាឌី គោបុរៈទី១ រហូតដល់គោបុរៈទី៥ ការខូច​ខាត​ការ​ដ្ឋាន​គម្រោង​សហ​ប្រតិបត្តិការរបស់ប្រទេសឥណ្ឌានៅគោបុរៈទី៥ និងការដ្ឋានជួសជុលជណ្តើរខាងជើង ដែល​ជា​ជំនួយ​របស់​ស្ថានទូតអាមេរិក និងការខូចខាតវត្តកែវសិក្ខាគិរីស្វរៈ៕ 

មនុស្សប្រុសស្រីពាក់ព័ន្ធករណីបង្កគ្រោះថ្នាក់ចរាចរណ៍នៅខណ្ឌឫស្សីកែវ បណ្តាល​ឲ្យ​ក្មេង​ម្នាក់​រង​របួស​ធ្ងន់​នឹងត្រូវបញ្ចូនទៅតុលាការទាំង ២នាក់

2026/03/21 01:38:47 pm        390
Facebook Telegram Linkin
ឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជា​ស្នង​ការ​នគរបាល​រាជ​ធានី​ភ្នំពេញ​នៅថ្ងៃទី២១ ខែមីនា ឆ្នាំ២០២៦នេះ បានបញ្ជាក់ថា ជនប្រុសស្រី០២នាក់ ដែល​ពាក់​ព័ន្ធ​ក្នុង​គ្រោះថ្នាក់ចរាចរណ៍បណ្តាលឲ្យក្មេងប្រុសម្នាក់រងរបួសធ្ងន់ នៅក្នុងខណ្ឌឫស្សីកែវ នឹ​ង​ត្រូវ​កសាង​សំណុំ​រឿងបញ្ចូនទៅតុលាការ ចាត់ការទៅតាមនីតិវិធីច្បាប់ទាំង០២នាក់ ។ ឧត្តមសេនីយ៍ឯក ជួន ណារិន្ទ បានបញ្ជាក់ថា ក្រោយ​ការ​ពិនិត្យតាម​ជំនាញរបស់​សមត្ថកិច្ច​ល្អិត​ល្អន់​មក​បានរកឃើញថា អ្នកបើកបររថយន្តបង្កហេតុ គឺជាមនុស្សស្រី ខណៈ​ភាគី​បុរស​ជា​អ្នក​រួម​ដំណើរ​ឋិត​ក្នុង​ស្ថាន​ភាព​ស្រវឹងជោគជាំ ប៉ុន្តែដោយសារ​រូប​គេ​ប្រើ​ប្រាស់​ពាក្យ​សម្តី​តិះ​ដៀល​ប្រមាថ​ធ្ងន់​ធ្ងរ​ម៉ាក់​ងាយ​ដល់អាយុជីវិតមនុស្សផងនោះ សមត្ថកិច្ច​ក៏​ប្រមូល​ភស្តុតាង​ដើម្បី​កសាង​សំណុំ​រឿង​បញ្ចូន​ខ្លួន​អ្នក​ទាំង០២ទៅតុលាការ ដើម្បីចាត់វិធានការទៅតាមផ្លូវច្បាប់ជាធរមាន។ ផ្អែកតាមរយៈវីឌីអូរកាមេរ៉ាសុវត្ថិភាពដែលស្នងការដ្ឋាននគរបាលរាជធានីភ្នំពេញបានបញ្ចេញ ឃើញ​ថា​ ភាគីអ្នករួមដំណើរជាបុរសត្រូវបានគេគ្រាដាក់ក្នុងរថយន្តដោយសភាពស្រវឹង ហើយ​អ្នក​បញ្ជា​យាន្ត​គឺ​ជា​មនុស្ស​ស្រី​បានបើកឌុបគ្នាចេញពីហាងផឹកស៊ីមួយកន្លែងនៅខណ្ឌសែនសុខ លុះ​ធ្វើ​ដំណើរ​ដល់​កន្លែង​កើត​ហេតុ​ក៏កើតមានគ្រោះថ្នាក់ចរាចរណ៍ឡើងតែម្តង។ ករណីនេះ មានប្រតិកម្មរិះគន់ជាច្រើនពីសំណាក់មហាជនអ្នកលេងបណ្តាញទំនាក់ទំនងសង្គម ចោទ​ទៅ​លើសមត្ថកិច្ចថា បាន​ប្រឌិតព័ត៌មាន ដើម្បីលាក់​អត្តសញ្ញាណ​ពិត​ប្រាកដ​របស់​ជន​បើក​រថយន្ត​ប​ង្ក​ហេតុ​ថាជាមនុស្សប្រុស។ លោកឧត្តមសេនីយ៍ ជួន ណារិន្ទ បញ្ជាក់ថា​ ច្បាប់ គឺជាច្បាប់ មិនមានការលើកលែង ឬ​ប្រឌិត​ព័ត៌​មាន​ណា​មួយ ​ដើម្បីលាក់បំបាំងអត្តសញ្ញាណជនដែលប្រព្រឹត្តិខុសទៅនឹងច្បាប់នោះឡើយ ទោះ​បុគ្គល​នោះ​ឋិត​ក្នុងតួនាទី ឬឋានៈណាក៏ដោយ។គួររំលឹកថា គ្រោះថ្នាក់ចរាចរណ៍ខាងលើបានកើតឡើងកាលពីយប់ថ្ងៃទី១៨ ខែមីនា ឆ្នាំ២០២៦ នៅ​តាមបណ្តោយផ្លូវបេតុងមួយកន្លែង ក្នុងសង្កាត់គីឡូម៉ែត្រលេខ៦ ខណ្ឌឫស្សីកែវ ដោយ​រថយន្ត​បង្ក​បាន​បើក​បុក​ម៉ូតូ​ម៉ាកធូ​ដេមួយគ្រឿងពេញទំហឹង បណ្តាលឲ្យក្មេងប្រុសម្នាក់ជាអ្នកបើកម៉ូតូ ត្រូវ​រង​របួសធ្ងន់ធ្ងរ។ ក្នុងហេតុការណ៍ដដែលនេះ ប្រជាពលរដ្ឋនៅកន្លែងកើតហេតុ ក៏​បាន​ផ្ទុះ​កំហឹង​ខ្លាំង​ទៅ​លើ​ភាគី​បុរស​ដែល​ជា​អ្នក​រួម​ដំណើរ ដោយបានប្រើប្រាស់ហិង្សាទៅលើរូបគេ រហូតត្រូវរងរបួសផងដែរ ព្រោះ​តែ​ខឹងសម្បាលើពាក្យសម្តីរបស់ជនរូបនេះនិយាយថា « បុកស្លាប់មនុស្ស សង​ត្រឹម​២​ម៉ឺន​ដុល្លារ​ទៅ​ចប់រឿងហើយ»៕ លីហេង 

ព្រឹត្ដិការណ៍ថ្ងៃរះចំកំពូលប្រាសាទអង្គរ ថ្ងៃដំបូង ទាក់ទាញ​ភ្ញៀវទេសចរ​ជាង ​២ម៉ឺន​៤ពាន់​នាក់​ឱ្យ​មក​ទស្សនា

2026/03/21 01:20:14 pm        325
Facebook Telegram Linkin
អ្នកជំនាញទេសចរណ៍នៃអាជ្ញាធរជាតិអប្សរា បានឱ្យដឹងថា ភ្ញៀវទេសចរជាតិ និង​អន្ដរជាតិ​ប្រមាណ​ជាង​២​ម៉ឺន៤ពាន់នាក់ បានទៅទស្សនាព្រឹត្តិការណ៍ព្រះអាទិត្យរះចំកំពូលប្រាសាទអង្គរវត្ត នៅ​ថ្ងៃ​ទី២១ ខែមីនា នេះ ដែលព្រឹកថ្ងៃនេះ មានអាកាសធាតុល្អ ធ្វើឱ្យមើល​ឃើញ​ព្រះអាទិត្យ​រះ​យ៉ាង​ស្អាត​គួរ​គយគន់។ភ្ញៀវទេសចរជាតិ អន្តរជាតិ បានលើកឡើងថា ទោះបីជាធ្លាប់បានមក​ទស្សនា​ប្រាសាទ​អង្គរវត្ត​ជា​ច្រើន​លើក​ក៏ដោយ តែនេះជាលើកទីមួយហើយ បានចូលមកទស្សនា​ថ្ងៃ​រះ​ចំ​កំពូល​ប្រាសាទ​អង្គរ​វត្ត​ ដែលពួកគេត្រូវរង់ចាំតាំងពីម៉ោង៥ព្រឹក ដើម្បីបានឃើញភាពស្រស់ស្អាតនៃថ្ងៃរះនេះ ឆ្លុះ​ជាមួយ​ស្រះ​ទឹកបញ្ចេញពន្លឺពណ៌មាស ស្របជាមួយទេសភាពសម្រស់ខៀខ្ចី នៃ​រុក្ខជាតិ​ស្មៅ​ក្នុង​បរិវេណ​អង្គរ​។អ្នកទេសចរខ្លះដែលធ្លាប់បានទៅទស្សនាជាច្រើនលើក ក៏នៅតែចំណាយ​ពេលដើម្បី​រង់ចាំ​ទស្សនា​ថ្ងៃ​រះ​នៅ​ប្រាសាទអង្គរវត្តទៀត។ ពួកគេមានមោទនភាព ដែលឃើញភ្ញៀវ​ទេសចរ​ជា​ច្រើន​ជាតិ​សាសន៍ ​ទៅទស្សនាព្រឹត្ដិការណ៍សមរាត្រី ដោយអ្នកទេសចរខ្លះក្រោកតាំងពីម៉ោង៣ទាបភ្លឺ ដើម្បី​អង្គុយ​រង់ចាំ ដើម្បីទស្សនាទិដ្ឋភាព និងផ្តិតយករូបភាព ដ៏អស្ចារ្យថ្ងៃរះនៅប្រាសាទអង្គរវត្ត។ដោយ​ឡែក អ្នកទេសចរអន្ដរជាតិ មកពីប្រទេសអ៊ីតាលី មកទស្សនាជាលើកដំបូង បានបង្ហាញ​អារម្មណ៍​ភ្ញាក់​ផ្អើលនិងសប្បាយចិត្ដយ៉ាងខ្លាំង ពេលមកដល់ប្រាសាទអង្គរ ដោយបានលើក​ឡើង​ថា ​ព្រះអាទិត្យរះចំកណ្ដាលកំពូលប្រាសាទ ពិតជាអស្ចារ្យ និងមានភាពស្រស់ស្អាត ដែល​ប្រទេស​ដទៃ​ទៀត​មិន​អាចប្រៀបផ្ទឹមបាន។លោក សេង សុធារ៉ា ប្រធាននាយកដ្ឋានអភិវឌ្ឍន៍ទេសចរណ៍ និងវប្បធម៌អង្គរ នៃអាជ្ញាធរជាតិ​អប្សរា​​បានឱ្យដឹងថា ព្រឹត្ដិការណ៍ថ្ងៃរះចំកណ្ដាលកំពូលប្រាសាទអង្គរ ឬហៅថាសមរាត្រី នា​ថ្ងៃ​ទី២១​​ ខែមីនា នេះ មានភ្ញៀវទេសចរជាតិ និងអន្ដរជាតិ ជាង២ម៉ឺន៤ពាន់នាក់ ដោយពួក​គេ​បាន​ទៅ​ទស្សនា​ចាប់ពីម៉ោង៥:០០នាទី រហូតដល់ម៉ោង៧:៣០នាទី។ ក្នុងចំណោម​ភ្ញៀវ​ទេសចរ​ជាង​២ម៉ឺន​៤ពា​ន់នាក់នោះ មានភ្ញៀវទេសចរអន្ដរជាតិ ២៦១០នាក់ និងភ្ញៀវទេសចរជាតិ ២១ ៥៣៥​នាក់​៕​ អត្ថបទ៖ សាវី 

សិស្សានុសិស្ស លោកគ្រូអ្នកគ្រូ រួមទាំងអាណាព្យាបាល នៅក្រុងបាត់ដំបង ទទួលបានសេវាព្យាបាលពីក្រុមគ្រូពេទ្យ TYDA

2026/03/21 12:37:08 pm        366
Facebook Telegram Linkin
ខេត្តបាត់ដំបង៖ នៅព្រឹកថ្ងៃទី២១ ខែមីនា ឆ្នាំ២០២៦ នេះ សមាគមគ្រូពេទ្យស្ម័គ្រចិត្តយុវជនសម្តេចតេជោ (TYDA) បានចុះពិនិត្យ និងព្យាបាលជំងឺទូទៅ ជំងឺមាត់ធ្មេញ ជំងឺភ្នែក ជំងឺសន្លាក់ ជំងឺរោគស្រ្តី និងជំងឺផ្សេងៗ ជូនដល់សិស្សានុសិស្ស លោកគ្រូអ្នកគ្រូ រួមទាំងអាណាព្យាបាលមកពីសាលាបឋមសិក្សាចំនួនប្រាំ ស្មើនឹងចំនួន ៣ ៣៩០នាក់ ដោយមានទាំងការបណ្ដុះបណ្ដាលអំពីការថែទាំសុខភាពបឋមដល់លោកគ្រូ អ្នកគ្រូ ដើម្បីយកទៅបន្តអប់រំសុខភាពដល់សិស្សានុសិស្ស។ កម្មវិធីពិនិត្យព្យាបាលនេះ ប្រព្រឹត្តទៅក្នុងបរិវេណសាលាបឋមសិក្សារំចេក៣ ភូមិរំចេក៣ សង្កាត់រតនៈ ក្រុងបាត់ដំបង ខេត្តបាត់ដំបង ក្រោមអធិបតីភាពដ៏ខ្ពង់ខ្ពស់របស់ ឯកឧត្តមបណ្ឌិត ពេជ សោភ័ន ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានលេខាធិការដ្ឋាន គណៈកម្មាធិការជាតិជំរុញការអនុវត្តវិធានការគន្លឹះក្នុងវិស័យអប់រំ «គ.វ.អ.» តំណាងដ៏ខ្ពង់ខ្ពស់ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អនុប្រធានក្រុមប្រឹក្សាភិបាល សមាគមគ្រូពេទ្យស្ម័គ្រចិត្តយុវជនសម្តេចតេជោ (TYDA) ។ ជាកិច្ចចាប់ផ្តេីម ឯកឧត្ដមវេជ្ជបណ្ឌិត ស៊ឹម ស៊ូយេង អនុប្រធានប្រតិបត្តិសមាគមគ្រូពេទ្យស្ម័គ្រចិត្តយុវជនសម្តេចតេជោ (TYDA) បានពាំនាំបណ្តាំសួរសុខទុក្ខពីសំណាក់ សម្តេចមហាបវរធិបតី ហ៊ុន ម៉ាណែត និង លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជូនលោកគ្រូ អ្នកគ្រូ ក្មួយៗដែលមកទទួលសេវានាឱកាសនេះ។ ឯកឧត្ដមវេជ្ជបណ្ឌិត បានឱ្យដឹងទៀតថា សមាគម TYDA ដឹកនាំដោយ សម្តេចធិបតី និង លោកជំទាវបណ្ឌិត អស់រយៈពេល១៤ឆ្នាំមកហើយ ប្រកបដោយក្តីស្រឡាញ់យកចិត្តទុកដាក់យ៉ាងជ្រាលជ្រៅចំពោះសុខភាពរបស់ប្រជាពលរដ្ឋទូទៅនៅទូទាំងប្រទេស។ ជាក់ស្តែងថ្ងៃនេះ ក្រោមការចង្អុលបង្ហាញដ៏ខ្ពង់ខ្ពស់របស់ សម្តេចធិបតី និង លោកជំទាវបណ្ឌិត ឯកឧត្តមវេជ្ជបណ្ឌិតបានដឹកនាំគ្រូពេទ្យជិត ៣០០នាក់ ចុះមកព្យាបាលជំងឺទូទៅ ជំងឺភ្នែក ជាពិសេសសុខភាពមាត់ធ្មេញ ជូនលោក អ្នកគ្រូ សិស្សានុសិស្ស និងអាណាព្យាបាលនៅទីនេះ ដោយមិនមានការគិតថ្លៃអ្វីទាំងអស់ ប្រកបដោយក្តីស្រឡាញ់ និងស្នាមញញឹម ក្នុងន័យជំរុញ លើកកម្ពស់សុខភាពសហគម ជាពិសេសគឺការបង្ខិតសេវាសុខភាពមកកៀកផ្ទះប្រជាពលរដ្ឋតែម្តង។ ឯកឧត្តមបណ្ឌិត ពេជ សោភ័ន ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានលេខាធិការដ្ឋាន «គ.វ.អ.» សូមកោតសសើរចំពោះក្រុមគ្រូពេទ្យ TYDA ទាំងអស់ ដែលបានលះបង់កម្លាំងកាយចិត្តខិតខំចុះព្យាបាលជំងឺជូនប្រជាពលរដ្ឋអស់រយៈពេលជាងច្រើនឆ្នាំកន្លងមកនេះ មិនថាព្យុះភ្លៀង រងាក្តៅយ៉ាងណាទេ គឺដើម្បីសុខមាលភាពប្រជាពលរដ្ឋ។ ទន្ទឹមនឹងនេះដែរ ឯកឧត្តមបណ្ឌិតទេសរដ្ឋមន្ត្រី បានលើកឡើងថា រាជរដ្ឋាភិបាលកម្ពុជា នីតិកាលទី៧ នៃរដ្ឋសភា បានបង្កើតគណៈកម្មាធិការជាតិ ដើម្បីជំរុញការអនុវត្តវិធានការគន្លឹះក្នុងវិស័យអប់រំ (គ.វ.អ.) ហើយគណៈកម្មាធិការជាតិនេះមាន សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ជាប្រធាន។ ឯកឧត្តមបណ្ឌិតទេសរដ្ឋមន្ត្រី បានបញ្ជាក់ផងដែរថា នៅក្នុងការអនុវត្តការងារ លេខាធិការដ្ឋាននេះដើរតួនាទីជាសេនាធិការរបស់ (គ.វ.អ.) ក្នុងគោលបំណងជួយគាំទ្រដល់ការលើកកម្ពស់ ការអប់រំតាមរយៈការពង្រឹងអភិបាលកិច្ចសាលារៀន ការពិនិត្យកែលម្អកម្មវិធីសិក្សានិងរៀបចំកម្មវិធីសិក្សា និងសកម្មភាពក្រៅម៉ោងសិក្សាឱ្យស្របតាមតម្រូវការក្នុងការពង្រឹងចំណេះដឹង វិន័យ សីលធម៍ និងឥរិយាបថសិស្ស, ការយកចិត្តទុកដាក់ លើសុខភាពសិស្សតាមរយៈកម្មវិធីអាហារូបត្ថម្ភដល់កុមារ និងការត្រួតពិនិត្យគុណភាពចំណីអាហារនៅតាមសាលារៀន និងការជំរុញ លើកទឹកចិត្ត ការចូលរួមរបស់មាតាបិតា អាណាព្យាបាល និងសហគមន៍ក្នុងការអប់រំ។ រចនាសម្ព័ន្ឋលេខាធិការដ្ឋាន (គ.វ.អ) រួមមានផ្នែកចំណុះចំនួន ០៤ ៖ ផ្នែកគោលនយោបាយ, ផ្នែកគាំទ្រសាលារៀន, ផ្នែកតាមដាន ត្រួតពិនិត្យ និងវាយតម្លៃ, និង ផ្នែករដ្ឋបាល ហិរញ្ញវត្ថុ និងទំនាក់ទំនងសាធារណៈ។ ឯកឧត្តមបណ្ឌិត បានបង្ហាញអំពីការប្តេជ្ញាចិត្តដ៏មោះមុតក្នុងការអនុវត្តការងារនេះ និងជាពិសេសគឺការជឿជាក់ និងគាំទ្ររាជរដ្ឋាភិបាលកម្ពុជា ដែលមាន សម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី ក្នុងការដោះស្រាយបញ្ហាជាតិ និងការថែរក្សាសន្តិភាពយ៉ាងរឹងមាំពិតប្រាកដរបស់ជាតិ។ លោកគ្រូអ្នកគ្រូដែលជាគណៈគ្រប់គ្រងសាលាបឋមខាងលើ សូមគោរពថ្លែងអំណរគុណដល់ក្រុមគ្រូពេទ្យ TYDA ក្រោមការដឹកនាំប្រកបដោយគតិបណ្ឌិតឈ្លាសវៃរបស់ សម្តេចធិបតី និង លោកជំទាវបណ្ឌិត ដោយចាត់អោយក្រុមគ្រូពេទ្យជំនាញ ចុះមកព្យាបាលជំងឺជូនសិស្សានុសិស្សដល់សាលារៀន ក្នុងការរួមចំណែកលើកកម្ពស់សុខភាពសហគមន៍ជាពិសេសកុមារ ដែលជាទំពាំងស្នងឫស្សី។ សូមជម្រាបថាសកម្មភាពពិនិត្យ និងព្យាបាលជំងឺទូទៅ និងសុខភាពមាត់ធ្មេញជូន លោកគ្រូ អ្នកគ្រូ សិស្សានុសិស្ស និងអាណាព្យាបាលនៅថ្ងៃនេះ សរុបចំនួន ៣ ៣៩០នាក់ ក្រោមជំនួយឧបត្ថមដោយផ្ទាល់ និងទាំងស្រុងពី សម្តេចធិបតី និងលោកជំទាវបណ្ឌិត។ ក្នុងថ្ងៃនេះដែរក៏មានការអប់រំ និងបណ្ដុះបណ្ដាលអំពីការថែទាំសុខភាពបឋម ដល់លោកគ្រូ អ្នកគ្រូ ចំនួន ៥០នាក់ ដេីម្បីយកទៅអប់រំសុខភាពបន្តដល់សិស្សានុសិស្ស៕

សហគមន៍ខ្មែរឥស្លាមធ្វើបុណ្យស្រាយបួស និងអរគុណ​រាជរដ្ឋាភិបាល​អនុញ្ញាត​អនុវត្ត​ប្រពៃណី​បាន​ពេញលេញ

2026/03/21 12:05:14 pm        158
Facebook Telegram Linkin
ភ្នំពេញ៖ ឯកឧត្ដម បណ្ឌិតរដ្ឋមន្ត្រី អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស បាន​អញ្ជើញអបអរសាទរ និងថ្វាយបង្គំក្នុងឱកាសនៃពិធីបុណ្យរ៉យ៉ាហ្វីទ្រី ឬបុណ្យស្រាយបួស នៅ​វិហារ​ធំ​គីឡូម៉ែត្រ៩ សង្កាត់ច្រាំងចំរេះ១ ខណ្ឌឫស្សីកែវ ជាមួយនឹង​ការ​ថ្លែង​អំណរ​គុណ​យ៉ាងជ្រាល​ជ្រៅ ដល់រាជរដ្ឋាភិបាល និងប្រជាជនកម្ពុជា ដែលមិនរើសអើង ហើយបានអនុញ្ញាត​ឲ្យ​សាសនិក​ឥស្លាមនៅកម្ពុជា អនុវត្តប្រពៃណីសាសនាបានយ៉ាងពេញលេញ ។ឆ្លៀតឱកាស សំណេះសំណាល ជាមួយបងប្អូនសាសនិកឥស្លាម ដែលបាន​អញ្ជើញ​ចូល​រួម​ថ្វាយ​បង្គំ​នៅ​ទី​នោះ នៅថ្ងៃទី២១ ខែមីនា ឆ្នាំ២០២៦ ឯកឧត្តមបណ្ឌិត អូស្មាន ហាស្សាន់ មាន​ប្រសាសន៍​ថា ​បងប្អូនសាសនិកឥស្លាមកម្ពុជានៅទូទាំងប្រទេស មានឱកាស​ចូល​រួម​យ៉ាង​សប្បាយ​រីក​រាយ​ក្នុង​ពិធីបុណ្យនេះ គឺជាចំណែកមួយ ដែលបានកើតឡើងដោយសារកត្តាសុខសន្តិភាព។ឯកឧត្តម បានបន្តថា កម្ពុជាក្រោមការដឹកនាំរបស់សម្ដេចតេជោ ហ៊ុន សែន អតីតនាយករដ្ឋមន្ត្រី និង​សម្តេចធិបតី ហ៊ុន ម៉ាណែត នាយករដ្ឋមន្ត្រី បានដឹកនាំ​ប្រទេស​ដោយ​ប្រកាន់​លើគោ​ល​នយោបាយ​ប្រកាន់​លើសច្ចធម៌ សន្តិភាព និងតែងតែរួមសុខរួមទុក្ខជាមួយបងប្អូនប្រជាពលរដ្ឋ ដោយ​មិនប្រកាន់ពូជសាសន៍ តាំងពីសម័យសង្គ្រាម រហូតដល់កម្ពុជាមានសុខសន្តិភាព មាន​ការ​អភិវឌ្ឍ​ និងរៀបចំលើហេដ្ឋារចនាសម្ព័ន្ធបានល្អ ដូចពេលបច្ចុប្បន្ន ។ លើសពីនោះទៅទៀត រដ្ឋាភិបាល​កម្ពុជា តែងតែចូលរួមដោះស្រាយរាល់ទុក្ខកង្វល់ និងតម្រូវការ ជូនដល់សហគមន៍​ឥស្លាម​កម្ពុជា​ផងដែរ។ឯកឧត្ដមទេសរដ្ឋមន្ត្រី អូស្មាន ហាស្សាន់ សង្កត់ធ្ងន់ថា ទាំងនេះគឺជាសមិទ្ធផល​ដែល​កើត​ឡើង​ដោយ​កត្តា​សុខសន្តិភាព ដែលរកមកដោយលំបាកដោយរាជរដ្ឋាភិបាល ក្រោមការ​ដឹកនាំ​ប្រកប​ដោយ​គតិ​បណ្ឌិតរបស់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ។ ដូចច្នេះ យើង​ទាំង​អស់​គ្នា ​ត្រូវអរគុណសន្តិភាព ព្រមទាំងបន្តគាំទ្រចំពោះរាជរដ្ឋាភិបាល ដើម្បីបន្តរក្សា​បាន​នូវ​សុខ​សន្តិភាព​នេះ​ឲ្យបានយូរអង្វែងតទៅមុខទៀត។គួជម្រាបផងដែរថា ពិធីបុណ្យរ៉យ៉ាហ្វីទ្រី ឬបុណ្យស្រាយបួស គឺជាពិធីបុណ្យ​ដ៏​ធំមួយ​នៅ​ក្នុង​សាសនា​ឥស្លាម ដែលត្រូវប្រារព្ធឡើងជារៀងរាល់ឆ្នាំ បន្ទាប់ពីបានបញ្ចប់​ការ​បួស​តម​អាហារ​រយៈ​ពេល​មួយ​ខែពេញនៃខែរ៉ាម៉ាឌន ។ នៅក្នុងពិធី​បុណ្យនេះ សាសនិកឥស្លាមទាំងប្រុសទាំងស្រី ទាំងក្មេងទាំងចាស់ ត្រូវរៀបចំ​សម្អិត​សម្អាង​កាយ​ពីព្រលឹម ដោយស្លៀកសម្លៀកបំពាក់ថ្មីៗស្អាតៗ ។ បន្ទាប់ពីបានស្រស់​ស្រូប​អាហា​រ​រួច​ពួកគាត់ត្រូវទៅចូលរួមថ្វាយបង្គំ និងស្តាប់ធម្មទេសនានៅតាមវិហារនានា។ បន្ទាប់​មក​គឺ​ជា​ឱកាស​រីករាយដោយពួកគាត់ត្រូវសាកសួរសុខទុក្ខគ្នា និងសុំអភ័យទោសពីគ្នាទៅវិញទៅមក រវាង​សមាជិកគ្រួសារ ព្រមទាំងញាតិមិត្តជិតឆ្ងាយ ។ ក្នុងឱកាសនោះ សាសនា​ឥស្លាម​ក៏​បាន​ជំរុញ​ឲ្យ​សាសនិក​របស់ខ្លួន បង្កើនការបរិច្ចាគទាន ទៅដល់អ្នកទីទាល់ក្រ ចាស់ជរាផងដែរ ៕ អត្ថបទ បាន សុខរិទ្ធិ

ជនភៀសសឹកនៅវត្តកណ្តោលខេត្តបន្ទាយមានជ័យ ពេញចិត្តទៅរស់នៅផ្ទះបណ្តោះអា​សន្ន​ដែល​រដ្ឋាភិបាល​រៀបចំ

2026/03/21 11:56:46 am        203
Facebook Telegram Linkin
ខេត្តបន្ទាយមានជ័យ៖ ជនភៀសសឹងដែលមិនទាន់អាចទៅផ្ទះវិញ ដែលស្នាក់នៅជំរំវត្តកណ្តោល ពេញចិត្តរស់នៅផ្ទះបណ្តោះអាសន្ន ដែលសម្តេចធិបតី ហ៊ុន ម៉ាណែត នាយករដ្ឋមន្ត្រី ផ្តល់​ជូន​ពួក​គាត់​។ ទោះបីយ៉ាងណា ពួកគាត់នូវតែបង្ហាញភាពឈឺចាប់នៃការឈ្លានពានរបស់យោធាថៃ ដែល​បាន​បំផ្លេច​បំផ្លាញភូមិឋានរបស់ពួកគាត់ក្រោយមានបទឈប់បាញ់ កាលឆ្នាំមុន ហើយ​ពួក​គាត់​នូវ​តែ​ទាមទារ​អោយរដ្ឋាភិបាលថៃចូលមកដោះស្រាយជាមួយរដ្ឋាភិបាលកម្ពុជាអោយឆាប់ ដើម្បី​ពួក​គាត់​អាច​វិលទៅភូមិឋានវិញ។ទីតាំងផ្ទះបណ្តោះអាសន្ន ស្ថិតនៅភូមិចក់ពួក ឃុំស្លក្រាម ស្រុកស្វាយចេក ខេត្តបន្ទាយមានជ័យ ដែលមានចម្ងាយប្រមាណ ១៥គីឡូម៉ែត្រពីជំរំចាស់ និងប្រមាណ ៥០គីឡូម៉ែត្រពីព្រំដែនកម្ពុជា-ថៃ​។ជន​ភៀសសឹកដែលមិនបានទៅផ្ទះទាំងអស់នោះ ត្រូវបាន​ជម្លៀស​ចេញ​ពី​តំបន់​ក្រហម​ដែល​យោធា​ថៃ​ដាក់​ទូកុងតឺន័រ និងរាយបន្លាលួសព័ន្ធយកផ្ទះរបស់ពួកគាត់នៅតំបន់បឹងត្រកួន។ជ​ន​ភៀសសឹក លើកឡើងនៅថ្ងៃទី២១ មីនានេះ ថា ផ្ទះបណ្តោះអាសន្ន ដែលគាត់កំពុងរស់នៅ ស្អាត រឹងមាំ មានទីធ្លាធំទូលាយ និងដីសម្រាប់ដាំដុះដំណាំបាន ហើយ ថែមទាំង មាន ទឹក ភ្លើង ប្រើប្រាស់ដោយឥតគិតថ្លៃ។ ពួកគាត់ បានថ្លែងអំណរ​គុណ​រាជ​រដ្ឋាភិបាល​ដែល​បាន​ផ្តល់​ផ្ទះ​ស្នាក់​នៅ​សមរម្យ​ជូនពួកគាត់នាពេលនេះ។ ប៉ុន្តែពួកគាត់ នូវតែឈឺចាប់ពីការឈ្លា​ន​ពាន​របស់​យោធា​សៀម​ មកទឹកដីកម្ពុជា ដែលពួកវាបានយកទូកុងតឺន័រ និងរាយបន្លាលួសព័ន្ធយកផ្ទះរបស់ពួកគាត់ ក្រោយ​មានបទឈប់បាញ់ចូលជាធរមាន កាលពីថ្ងៃទី២៧ ខែធ្នូ ឆ្នាំ២០២៥។ ពួកគាត់ ទាមទារដោយទទូច អោយរដ្ឋាភិបាលថៃ ត្រូវចូលខ្លួនមក​ដោះ​ស្រាយ​ជាមួយ​រដ្ឋាភិបាល​កម្ពុជា​អោយ​បាន​ឆាប់ ដើម្បីអាចអោយពួកគាត់វិលត្រឡប់ទៅកសាងភូមិកំណើតរបស់ពួកគាតវិញ។លោក ឃ្លោក នួយ អភិបាលរងខេត្តបន្ទាយមានជ័យ បានប្រាប់អ្នកសារព័ត៌មានថា ដំណាក់​កាល​ដំបូង ជនភៀសសឹកប្រមាណ ៥០៤ គ្រួសារ ដែលជម្លៀសចេញភូមិមានរិទ្ធ និង ៣១៨ គ្រួសារ មក​ពី​ភូមិសាមគ្គី នៃតំបន់បឹងត្រកួន ត្រូវបានផ្លាស់ទីពីជំរំវត្តកណ្តោល មកជម្រកបណ្តោះអាសន្នថ្មី ចាប់​តាំងពីថ្ងៃទី២០ ដល់ ថ្ងៃទី២១ ខែមីនា ឆ្នាំ២០២៦។ សម្រាប់ដំណាក់កាលទី២ ជនភៀស​សឹក​នឹង​ផ្លាស់មកនៅទីតាំងថ្មីនេះនៅខែមេសាខាងមុខនេះ។ដោយឡែក ក្រុមជាងសាងសង់ផ្ទះបណ្តោះអាសន្ន បានបញ្ចប់ថា ពួកគាត់កំពុង​ពន្លឿន​ការ​ងារ​សាង​សង់ ​ដើម្បីអោយរួចរាល់តាមផែនការកំណត់។បច្ចុប្បន្ន ការ​សាងសង់ផ្ទះសម្រាប់ជនភៀសសឹកស្នាក់នៅបណ្តោះអាសន្ន សម្រេចបានប្រមាណ ៤០០​ខ្នងផ្ទះហើយ នៃចំនួនផ្ទះសរុប ៣ ,០០០ខ្នង ដែលរួច​រាល់​មុន​ចូល​ឆ្នាំ​ថ្មី​ប្រពៃណី​ជាតិ​នា​ពេល​ខាង​មុខនេះ៕ អត្ថបទ៖ ធូ វិរៈ

បណ្ដាញសង្គម

ព័ត៌មានថ្មីៗ

អគ្គិភ័យឆាបឆេះរោងចក្រចម្រាញ់ប្រេង Lavan របស់អ៊ីរ៉ង់ រយៈពេលប៉ុន្មានម៉ោងក្រោយមានបទឈប់បាញ់
04/08/2026 09:04 PM
Facebook Telegram Linkin
អារ៉ាប់រួម គូវ៉ែត បារ៉ែន រាយការណ៍ការវាយប្រហារ បើទោះបីជាមានបទឈប់បាញ់អ៊ីរ៉ង់-អាមេរិក
04/08/2026 08:04 PM
Facebook Telegram Linkin
ក្រុមហ៊ុន VINCI Airports ប្ដេជ្ញាបន្តចូលរួមជាមួយរាជរដ្ឋាភិបាល ដើម្បីជំរុញ និងអភិវឌ្ឍឧស្សាហកម្មអាកាសចរណ៍នៅកម្ពុជា
04/08/2026 08:04 PM
Facebook Telegram Linkin
អនុប្រធានាធិបតីអាមេរិក លោក Vance បញ្ជាក់ថា ជម្លោះអ៊ុយក្រែន គឺ «ពិបាកដោះស្រាយបំផុត»
04/08/2026 08:04 PM
Facebook Telegram Linkin
លោក Trump ប្រាប់ថា គ្មានការបង្កើនសារធាតុអ៊ុយរ៉ានីញ៉ូមនៅអ៊ីរ៉ង់ទេ និងសន្យាដាក់ពន្ធ ៥០% លើអ្នកផ្គត់ផ្គង់អាវុធ
04/08/2026 08:04 PM
Facebook Telegram Linkin
បែលហ្ស៊ិកក្លាយជាចំណុចចេញដំណើរថ្មីសម្រាប់ជនអន្តោប្រវេសន៍ទៅកាន់អង់គ្លេស
04/08/2026 08:04 PM
Facebook Telegram Linkin
ជប៉ុនអះអាងថា ការបាញ់មីស៊ីលចុងក្រោយរបស់កូរ៉េខាងជើងពិតជាមិនអាចទទួលយកបាននោះទេ
04/08/2026 08:04 PM
Facebook Telegram Linkin
អារម្មណ៍ច្របូកច្របល់នៅទីក្រុងតែល អាវីវ ចំពោះការប្រកាសបទឈប់បាញ់សង្រ្គាមអ៊ីរ៉ង់របស់លោក Trump
04/08/2026 08:04 PM
Facebook Telegram Linkin
ពលរដ្ឋលីបង់សង្ឃឹមថា នឹងមានការរាប់បញ្ចូលពួកគេនៅក្នុងបទឈប់បាញ់សហរដ្ឋអាមេរិក-អ៊ីរ៉ង់
04/08/2026 08:04 PM
Facebook Telegram Linkin
អគារនៅក្នុងទីក្រុងបាកដាដ ប្រទេសអ៊ីរ៉ាក់ រងការខូចខាតដោយសាការវាយប្រហាររបស់កាំជ្រួចផ្លោង
04/08/2026 08:04 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.