BTV NEWS

កម្ពុជាតវ៉ាជាផ្លូវការចំពោះសកម្មភាពខុសច្បាប់របស់ថៃចូលកាន់កាប់នៅតំបន់ភូមិជោគជ័យ, ច្រកទ្វារអន្តរជាតិអូរស្មាច់ និងស្រុកអន្លង់វែង

ឯកឧត្តម ហួត ហាក់ ជួបពិភាក្សាការងារលើវិស័យទេសចរណ៍ ការការពារបេតិកភណ្ឌវប្បធម៌ និងធម្មជាតិនៅកម្ពុជា ជាមួយអ្នកស្រី Angelina Jolie

ឯកឧត្តម ហ៊ុន ម៉ានី អញ្ជើញជួបសំណេះសំណាលកងកម្លាំងខេត្តកំពង់ស្ពឺសម្រាប់ឱកាសចូលឆ្នាំប្រពៃណីជាតិខ្មែរ

«ព្រឹត្តិការណ៍សុខភាពតែមួយនៅកម្ពុជា»រយៈពេលពីរថ្ងៃពិភាក្សាគ្នាលើប្រធានបទសំខាន់ចំនួន៥

ព័ត៌មានជាតិ

ក្រសួងការបរទេសកម្ពុជាបើកប្រជុំជាមួយបណ្ដាស្ថានទូតនានាប្រចាំកម្ពុជា និងតំណាងទីភ្នាក់ងារអង្គការសហប្រជាជាតិពន្យល់អំពីការវិវត្តចុងក្រោយ នៃសភាពការណ៍ព្រំដែនកម្ពុជា-ថៃ

នៅព្រឹកថ្ងៃទី២៥ ខែកញ្ញា ឆ្នាំ២០២៥នេះ ក្រសួងការបរទេស និងសហប្រតិបត្តិការអន្តរជាតិកម្ពុជា បានធ្វើបទបង្ហាញអំពីការវិវត្ត នៃសភាពការណ៍ព្រំដែនកម្ពុជា-ថៃ រួមទាំងបញ្ហាមីន ជូនបណ្តាអង្គទូតបរទេស និងតំណាងទីភ្នាក់ងារអង្គការសហប្រជាជាតិប្រចាំកម្ពុជា នៅទីស្ដីការក្រសួងការបរទេស។កិច្ចប្រជុំនេះ មានការចូលរួមពីតំណាង៣០ស្ថានទូតប្រចាំនៅកម្ពុជា និងស្ថានទូតនៅក្រៅប្រទេសដែលទទួលបន្ទុកលើកិច្ចព្រំដែនកម្ពុជា-ថៃ និងអង្គការអន្តរជាតិចំនួន ៦ ក្នុងនោះក៏មានតំណាងស្ថានទូតថៃផងដែរ ដោយកិច្ចប្រជុំបានធ្វើឡើងនៅក្រសួងការបរទេស និងដឹកនាំដោយ លោកស្រី អ៊ាត សោភា រដ្ឋមន្រ្តីស្តីទីនៃក្រសួងការបរទេស និងសហប្រតិបត្តិការអន្តរជាតិ។

សមាគមក្នុងស្រុកកំពុងបង្កើនចំណេះដឹងដល់សហគ្រិន ក្នុងការទទួលបានហិរញ្ញប្បទានពង្រីកអាជីវកម្ម

តំណាងសមាគមធំៗចំនួនពីរ កំពុងគិតគូរ និងដោះស្រាយដល់សហគ្រិនក្នុងស្រុក តាមរយៈការជំរុញបង្កើតចំណេះដឹង និងការទំនាក់ទំនងទៅនិងដៃគូផ្សេងៗ ដើម្បីទទួលបានហិរញ្ញប្បទាន សម្រាប់បង្កើត ឬពង្រីកអាជីវកម្មបន្ថែម ខណៈប្រជាពលរដ្ឋកំពុងគាំទ្រ ផលិតផលខ្មែរ។លោកជំទាវ ចាន់ ភារី ប្រធានសមាគមសហគ្រិនស្រ្តីកម្ពុជា លើកឡើងក្នុងកិច្ចសម្ភាសន៍ជាមួយ BTV ស្តីពីកិច្ចដំណើរការ ផលិត វេចខ្ចប់ និងតម្រូវការឥណទានសម្រាប់ពង្រីកអាជីវកម្ម នេះថា ជុំវិញផលិតផលក្នុងស្រុកឃើញថា ពីមួយឆ្នាំទៅមួយមានការរីក ចម្រើនគួរឱ្យកត់សម្គាល់ ជាក់ស្តែងសិប្បកម្មជាស្រ្តី កំពុងមានភាពមមាញឹកក្នុងខ្សែច្រវាក់ផលិតកម្មរបស់ខ្លួន លើកិច្ចដំណើរការផលិត និងវេចខ្ចប់ ដោយមានសម្ទុះកើនឡើងគួកត់សម្គាល់ ផលិតរុញចូលទីផ្សារ ឆ្លើយតបទៅនិងតម្រូវការប្រើប្រាស់ក្នុងស្រុក។លោកជំទាវបន្តថា ស្របពេលប្រជាពលរដ្ឋកំពុងងាកមកប្រើប្រាស់ផលិតផលក្នុងស្រុក សហគ្រិនជាស្រ្តីមួយចំនួននៅជួប បញ្ហាឥណទាននៅឡើយ សម្រាប់ពង្រីកអាជីវកម្មពួកគាត់បន្ថែម។ ចំពោះបញ្ហានេះ សមាគមបាននិងកំពុងយកចិត្តទុកដាក់ តាមរយៈ ការផ្តល់នូវចំណេះដឹង ការបង្កើតនូវទំនាក់ទំនងផ្សារភ្ជាប់រវាងសមាជិករបស់សមាគម ទៅនិងដៃគូអភិវឌ្ឍផ្តល់នូវហិរញ្ញប្បទានផ្សេងៗ ដើម្បីធ្វើយ៉ាងណាក្នុងការទទួលបានហិរញ្ញប្បទាន និងការយកទៅប្រើប្រាស់ឱ្យមានសុខភាពល្អ ក្នុងកិច្ចដំណើរការអាជីវកម្មរបស់ ពួកគាត់។ឧកញ៉ា ឈិន កេន អគ្គលេខាធិការសម្ព័ន្ធសមាគមសហគ្រាសធុនតូចនិងមធ្យមកម្ពុជា (FASMEC) លើកឡើងផងដែរថា កន្លងមកសហគ្រាសធុនតូច និងមធ្យម បានជួបបញ្ហាជាច្រើនដូចជា វិបត្តិនៃជំងឺកូវីដ-១៩, ការអូសបន្លាយនៃសង្រ្គាមរុស្សី-អ៊ុយក្រែន អ៊ីស្រាអ៊ែល-ហាម៉ាស់ និងការកាត់អត្រាការប្រាក់ដុល្លារនាពេលកន្លងមក ដោយនាំឱ្យមានការប៉ះពាល់ជាសកល ដែលបញ្ហានេះធ្វើឱ្យសហគ្រាសក្នុងស្រុកត្រូវការហិរញ្ញប្បទានសម្រាប់ជាទុនបង្វិលបន្ថែម។សូមបញ្ចាក់ថា ជុំវិញបញ្ហាឥណទាននេះ, ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី, រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លើកឡើងនៅក្នុងពិធីតាំងពិព័រណ៍ផលិតផលខ្មែរឆ្នាំ២០២៥ ថ្មីៗនេះថា រាជរដ្ឋាភិបាលបានកំពុងលើកកម្ពស់ការទទួល ហិរញ្ញប្បទាន និងឥណទាន តាមរយៈការបង្កើតធនាគារសហគ្រាសធុនតូច និងមធ្យមកម្ពុជា, ធនាគារអភិវឌ្ឍន៍ជនបទ និងកសិកម្ម, និងសាជីវកម្មធានាឥណទានកម្ពុជា ហើយតទៅមុខរាជរដ្ឋាភិបាលនឹងបន្តពិនិត្យលទ្ធភាព វិភាជកញ្ចប់ថវិកាជូន ធនាគារទាំងពីរនេះ បន្ថែមទៀត ដើម្បីបង្កលក្ខណៈងាយស្រួលដល់សហគ្រាសក្នុងស្រុក ដើម្បីទទួលបានកម្ចីក្នុងទំហំសមស្រប និងសម្រាប់រយៈពេល វែង៕ អត្ថបទ៖ សុន រ៉ាឌី

រដ្ឋមន្រ្ដីទេសចរណ៍កម្ពុជាជំរុញការធ្វើពិធិធកម្មទីផ្សារទេសចរណ៍បន្ថែមជាមួយខេត្តអៃឈិរបស់ជប៉ុន

ក្នុងដំណើរទស្សនកិច្ចការងារចូលរួមពិព័រណ៍ទេសចរណ៍ជប៉ុន ២០២៥ និងកិច្ចប្រជុំតុមូលថ្នាក់រដ្ឋមន្ត្រីទេសចរណ៍ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានជួបជាមួយ ឯកឧត្តម Hideaki Ōmura អភិបាលខេត្តអៃឈិ (Aichi Prefecture) ដើម្បីបង្កើតកិច្ចសហប្រតិបត្តិការទេសចរណ៍ថ្មីៗបន្ថែមទៀត ជំរុញការធ្វើពិធិធកម្មទីផ្សារទេសចរណ៍រវាងប្រទេសទាំងពីរ។តាមរយៈជំនួបនេះ ភាគីទាំងពីរ បានលើកឡើងអំពីការជំរុញការធ្វើពិពិធកម្មទីផ្សារទេសចរណ៍ថ្មីបន្ថែមរវាងប្រទេសកម្ពុជា និងខេត្តអៃឈិ (Aichi Prefecture) នៃប្រទេសជប៉ុន នឹងជួយឱ្យមានកំណើនភ្ញៀវទេសចររវាងប្រទេសទាំងពីរកម្ពុជា និងជប៉ុន។ក្នុងឱកាសនេះថ្នាក់ដឹកនាំវិស័យទេសចរណ៍កម្ពុជា និងខេត្តអៃឈិ របស់ប្រទេសជប៉ុនមានទស្សនៈរួមគ្នាថា ទាំងប្រទេសកម្ពុជាជាតារាទើបនឹងរះពោរពេញដោយកាលានុវត្ត និងខេត្តអៃឈិ (Aichi Prefecture) ដែលមានសេដ្ឋកិច្ចនាំមុខគេមួយដែរក្នុងប្រទេសជប៉ុន ហើយសុទ្ធតែមានសក្តានុពលទេសចរណ៍ និងបេតិកភណ្ឌពិភពលោកដូចៗគ្នា ប្រពៃណីទំនៀមទំលាប់គួរឱ្យចាប់អារម្មណ៍ ព្រមទាំងទំនាក់ទំនងការទូតរវាងកម្ពុជា និងជប៉ុនជាង៧២ឆ្នាំ ហើយដែលត្រូវបានតម្លើងកម្រិតជាដៃគូយុទ្ធសាស្រ្តគ្រប់ជ្រុងជ្រោយ គឺពិតជាកត្តាជួយបំពេញបន្ថែមគ្នាទៅវិញទៅមក ដើម្បីរួមគ្នាជំរុញវិស័យទេសចរណ៍រវាងប្រទេសទាំងពីរកម្ពុជា-ជប៉ុន។ ថ្នាក់ដឹកនាំទាំងពីរ បានលើកឡើងថា រវាងកម្ពុជា និងខេត្តអៃឈិ (Aichi Prefecture) រួមមាន ការផ្សព្វផ្សាយសក្តានុពលទេសចរណ៍ដល់ប្រជាជននៃគោលដៅទេសចរណ៍ទាំងពីរ ការពិនិត្យលទ្ធភាពរៀបចំព្រឹត្តការណ៍ជំរុញទេសចរណ៍ ការជំរុញជើងហោះហើរត្រង់ ដើម្បីឱ្យមានកំណើនការធ្វើទេសចរណ៍កើនឡើងជាលំដាប់ពីមួយឆ្នាំទៅមួយឆ្នាំ៕

៣ថ្ងៃបុណ្យភ្ជុំបិណ្ឌអ្នកដំណើរលើផ្លូវល្បឿនលឿនកើនឡើង, គ្រោះថ្នាក់ថយចុះ

យោងតាមទិន្នន័យចរាចរណ៍លើផ្លូវល្បឿនលឿនភ្នំពេញ-ក្រុងព្រះសីហនុ ក្នុងថ្ងៃឈប់សម្រាកបុណ្យភ្ជុំបិណ្ឌ ៣ថ្ងៃ ចំនួនចរាចរណ៍សរុប ៦២ ២៩១ គ្រឿង កើនឡើងចំនួន ៣ ៨០២ គ្រឿង ស្មើនឹង ៦,៥% ឯគ្រោះថ្នាក់មាន ៥ករណី ថយចុះ ១ករណី(មិនមានអ្នករបួស និងអ្នកស្លាប់) នេះបើធៀបឆ្នាំ២០២៤។ទិន្នន័យចរាចរណ៍លើផ្លូវល្បឿនលឿនភ្នំពេញ-ក្រុងព្រះសីហនុ ថ្ងៃឈប់សម្រាកបុណ្យភ្ជុំបិណ្ឌ ៣ថ្ងៃ (២១-២២-២៣ ខែកញ្ញា ឆ្នាំ២០២៥) ធៀបឆ្នាំ២០២៤១/-ទិន្នន័យចំនួនចរាចរណ៍- ថ្ងៃទី១ ចំនួនចរាចរណ៍ មានចំនួន ២០ ១១៦ គ្រឿង កើនឡើងចំនួន ២ ៦៨១ គ្រឿង ស្មើនឹង ១៥,៣៧%។- ថ្ងៃទី២ ចំនួនចរាចរណ៍ មានចំនួន ១៨ ៣៦៦ គ្រឿង កើនឡើងចំនួន ៣៦០ គ្រឿង ស្មើនឹង ២%។- ថ្ងៃទី៣ ចំនួនចរាចរណ៍ មានចំនួន ២៣ ៨០៩ គ្រឿង កើនឡើងចំនួន ៧៦១ គ្រឿង ស្មើនឹង ៣,៣0%។សរុប៣ថ្ងៃ ចំនួនចរាចរណ៍ សរុប ៦២ ២៩១ គ្រឿង កើនឡើងចំនួន ៣ ៨០២ គ្រឿង ស្មើនឹង ៦,៥%។២/-ទិន្នន័យគ្រោះថ្នាក់ចរាចរណ៍- ថ្ងៃទី១ មាន ១ករណី ដូចគ្នានឹងឆ្នាំ២០២៤។- ថ្ងៃទី២ មានចំនួន ២ករណី ថយចុះ ១ករណីធៀបឆ្នាំ២០២៤ ។- ថ្ងៃទី៣ មានចំនួន ២ករណី ដូចគ្នានឹងឆ្នាំ២០២៤។សរុប៣ថ្ងៃ មានចំនួន ៥ករណី ថយចុះ ១ករណី(មិនមានអ្នករបួស និងអ្នកស្លាប់)។

កម្ពុជាបន្តសម្ដែងការព្រួយបារម្ភខ្លាំងចំពោះការផ្សព្វផ្សាយមិនពិតរបស់ភាគីថៃ ពាក់ព័ន្ធនឹងការរស់នៅរបស់ពលរដ្ឋខ្មែរក្នុងទីតាំងចំនួន១៧ ដែលទង្វើនេះ បង្កឱ្យមានជម្លោះ ឬការខ្វែងគំនិតគ្នារវាងប្រទេសទាំងពីរ

ភ្នំពេញ៖ ក្រសួងការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជានៅព្រឹកថ្ងៃទី២៥ ខែកញ្ញា ឆ្នាំ២០២៥នេះ បានចេញសេចក្តីថ្លែងការណ៍មួយទៀតដោយ បន្តសម្ដែងការព្រួយបារម្ភចំពោះការផ្សព្វផ្សាយមិនពិតរបស់ភាគីថៃពាក់ព័ន្ធនឹងការរស់នៅរបស់ពលរដ្ឋខ្មែរក្នុងទីតាំងចំនួន១៧ ដែលទង្វើនៃការផ្សព្វផ្សាយនេះបង្កឱ្យមានជម្លោះ ឬការខ្វែងគំនិតគ្នារវាងប្រទេសទាំងពីរ។ តាមរយៈសេចក្ដីថ្លែងការណ៍ ក្រសួងការបរទេសកម្ពុជា សម្តែងនូវការព្រួយបារម្ភជាខ្លាំងចំពោះសេចក្តីរាយការណ៍ថ្មីៗនេះ នៅលើគេហទំព័រផ្លូវការនានារបស់ប្រទេសថៃ ជាពិសេសគេហទំព័ររបស់ការិយាល័យអ្នកនាំពាក្យកងទ័ពជើងទឹកថៃ និងទីបញ្ជាការដ្ឋានការពារព្រំដែនច័ន្ទបុរី-ត្រាត ព្រមទាំងកាសែត The Nation (ប្រទេសថៃ) ដែលហាក់ដូចបង្ហាញថា ប្រជាពលរដ្ឋខ្មែរកំពុងតែ «ឈ្លានពាន» ទឹកដីថៃ នៅទីតាំងចំនួន១៧ ស្ថិតនៅតំបន់ពីខេត្តពោធិ៍សាត់ ដល់ខេត្តកោះកុង រួមទាំងតំបន់ស្រុកវាលវែង ខេត្តពោធិ៍សាត់ នៃប្រទេសកម្ពុជា ដែលស្ថិតនៅទល់មុខ នឹងស្រុកមឿង ខេត្តត្រាត នៃប្រទេសថៃ។ក្រសួងការបរទេសកម្ពុជា បានបញ្ជាក់ថា ជារឿងសំខាន់ដែលត្រូវទទួលស្គាល់ការពិតថា ខណៈពេលដែលប្រទេសទាំងពីរមិនទាន់បានកំណត់ ខណ្ឌសីមានៅតំបន់មួយចំនួននៃព្រំដែនរួមគ្នា ប្រជាជនទាំងសងខាងបានរស់នៅ និងបង្កបង្កើនផល អស់ជាច្រើនទសវត្សរ៍មកហើយនៅលើដីក្នុងតំបន់ដែលមិនទាន់បានកំណត់ព្រំដែន។ ការណ៍នេះបានបង្កឱ្យមានជម្លោះ ឬការខ្វែងគំនិតគ្នា ដែលភាគីទាំងពីរបានដោះស្រាយប្រកបដោយស្មារតី មិត្តភាព តាមរយៈគណៈកម្មាធិការព្រំដែនទូទៅ និងបានឯកភាពបញ្ជូនបញ្ហាស្មុគស្មាញទាំងនេះទៅគណៈកម្មការចម្រុះខណ្ឌសីមា និងបោះបង្គោលព្រំដែនគោក (JBC) ដើម្បីដោះស្រាយ ស្របតាមអនុស្សរណៈនៃការយោគយល់គ្នាស្តីពីការវាស់វែង និងខណ្ឌសីមាព្រំដែនគោក ដែលត្រូវបានចុះ ហត្ថលេខាក្នុងឆ្នាំ២០០០ (MOU-2000)។បើតាម ក្រសួងការបរទេសកម្ពុជា បានលើកឡើងថា នៅក្នុងកិច្ចប្រជុំពិសេសគណៈកម្មាធិការព្រំដែនទូទៅ កាលពីថ្ងៃទី១០ ខែកញ្ញា ឆ្នាំ២០២៥ ភាគីទាំងពីរបានបញ្ជាក់ជាថ្មីនូវការប្តេជ្ញាចិត្ត ដែលបានធ្វើឡើងនៅក្នុងកិច្ចប្រជុំមុនៗ ដើម្បីបញ្ចៀសសកម្មភាព ដែលអាចបង្កើនភាពតានតឹងឬពង្រីកតំបន់ជម្លោះ។ កម្ពុជាបាននឹងកំពុងអត់ធ្មត់ជាទីបំផុត និងអនុវត្តយ៉ាងតឹងរ៉ឹងចំពោះលក្ខខណ្ឌនៃកិច្ចព្រមព្រៀងបទឈប់បាញ់តាមសេចក្ដីប្រាថ្នា ដែលភាគីទាំងពីរបានលើកឡើងដូចគ្នាថា នេះគឺជាពេលដែលទាំងសងខាងគួរតែរួមគ្នាខិតខំលើកកម្ពស់បរិយាកាសអំណោយផលសម្រាប់ការបន្ធូរបន្ថយភាពតានតឹងបន្ថែមទៀត កសាងទំនុកចិត្តរវាង គ្នាទៅវិញទៅមក ដើម្បីឆ្ពោះទៅរកប្រក្រតីភាពឡើងវិញ។ក្រសួងការបរទេសកម្ពុជា បានបញ្ជាក់ថា ហេតុនេះវាមិនមែនជាកាយវិការស្ថាបនាទេ ដែលមានការបំផុសបញ្ហាដូចបានប្រកាសជាសាធារណៈ ដោយកងទ័ពជើងទឹកថៃ ដែលបញ្ហានេះត្រូវបានដោះស្រាយសមស្របរួចហើយ ជាមួយនឹងការប្រាស្រ័យទាក់ទងគ្នាចុងក្រោយ នៅថ្ងៃទី១ ខែកុម្ភៈ ឆ្នាំ២០២២។ កម្ពុជាសូមអំពាវនាវឱ្យភាគីថៃលើកបញ្ហានេះមកដោះស្រាយនៅក្នុងកិច្ចប្រជុំគណៈកម្មការចម្រុះខណ្ឌសីមា និងបោះបង្គោលព្រំដែន គោក ដែលគ្រោងនឹងជួបគ្នានៅខែក្រោយ។ក្រសួងការបរទេស និងសហប្រតិបត្តិការអន្តរជាតិ បញ្ជាក់ឡើងវិញនូវការប្តេជ្ញាចិត្តដ៏ខ្ជាប់ខ្ជួន និងឥតងាករេរបស់កម្ពុជា ក្នុងការស្វែងរកដំណោះស្រាយប្រកបដោយមិត្តភាពចំពោះរាល់វិវាទ ព្រំដែនជាមួយប្រទេសថៃ ក៏ដូចជាជាមួយប្រទេសជិតខាងទាំងអស់ តាមសន្តិវិធី ស្របតាមច្បាប់ អន្តរជាតិ ទន្ទឹមនឹងការប្តេជ្ញាចិត្តរក្សាគោលជំហររបស់ខ្លួនថា ព្រំដែនមិនត្រូវបានផ្លាស់ប្តូរដោយការ ប្រើកម្លាំងនោះទេ៕

សម្តេចតេជោ ហ៊ុន សែន៖ ម្សិលម៉ិញខ្ញុំបង្ហោះសារមួយទាក់ទងដល់ការបាញ់ប្រហារ ដើម្បីសម្លាប់ខ្ញុំ មើលឃើញតែមួយជ្រុងនៃតួរនាទីរបស់ខ្ញុំ ពេលនេះ ខ្ញុំសូមផ្តល់នូវការវិភាគបន្ថែមដែលអាចកើតឡើងក្រោយការស្លាប់របស់ខ្ញុំ

នៅព្រឹកថ្ងៃទី២៥ ខែកញ្ញា ឆ្នាំ២០២៥នេះ សម្តេចតេជោ ហ៊ុន សែន ប្រមុខរដ្ឋស្ដីទីនៃកម្ពុជា និងជាប្រធានព្រឹទ្ធសភាកម្ពុជាបានបង្ហោះសារថា ម្សិលម៉ិញខ្ញុំបង្ហោះសារមួយទាក់ទងដល់ការបាញ់ប្រហារដើម្បីសម្លាប់ខ្ញុំថ្ងៃ២៤កញ្ញា១៩៩៨នៅទីរួមខេត្តសៀមរាប។សម្តេចតេជោ ហ៊ុន សែន៖ ខ្ញុំគិតថាអត្ថបទនេះមានកំហុសត្រង់ចំណុច(ប្រសិនខ្ញុំស្លាប់ឬរបួសប្រទេសកម្ពុជាយើង និងមិនមានសន្តិភាពនិងការអភិវឌ្ឍដូចសព្វថ្ងៃឡើយព្រោះម្ចាស់នៃនយោបាយឈ្នះ ឈ្នះបានស្លាប់ទៅហើយ)។ ការសរសេរបែបនេះគឺជាកំហុសដែលមើលឃើញតែមួយជ្រុងនៃតួរនាទីរបស់ខ្ញុំដោយមិនបានគិតដល់កត្តាដទៃទៀត។សម្តេចតេជោ ហ៊ុន សែន៖ ពេលនេះ ខ្ញុំសូមផ្តល់នូវការវិភាគបន្ថែមដែលអាចកើតឡើងក្រោយការស្លាប់របស់ខ្ញុំ។១.ក្រោយការស្លាប់របស់ខ្ញុំការបង្ហូរឈាមមួយកើតឡើងភ្លាមដែលធ្វើឲ្យមនុស្សយ៉ាងច្រើនស្លាប់នៅទីរួមខេត្តសៀមរាប។២.គ្រប់គ្រងសភាពការបានរដ្ឋសភាដំណើការប្រជុំធម្មតានិងឈានទៅបង្កើតរាជរដ្ឋាភិបាលថ្មីឬត្រូវជាប់គាំងបង្កើតរាជរដ្ឋាភិបាលមិនបាន។៣.ប្រទេសបន្តសង្រ្គាមដោយបែងចែកជាតំបន់ត្រួតត្រា២ម្ខាងរាជរដ្ឋាភិបាលនិងម្ខាងទៀតខ្មែរក្រហម។៤.មានអ្នកដឹកនាំនយោបាយឆ្នើមរកការស្រុះស្រួលផ្ទៃក្នុងផងនិងរកវិធីបញ្ចប់សង្គ្រាមបានផង។តាមរយៈការស្រុះស្រួលនេះសន្តិភាពកើតមាននាំមកនូវការអភិវឌ្ឍសេដ្ឋកិច្ច សង្គមដែលល្អលើសហ៊ុន សែនច្រើនដង។នៅមានកត្តាច្រើនទៀតដែលខ្ញុំសូមមិនលើកឡើងទុកជូនបងប្អូនវាយតម្លៃខ្លួនឯង។

កម្ពុជាបន្តអំពាវនាវឲ្យថៃដោះលែងទាហានខ្មែរ១៨នាក់មកវិញ ប្រកបដោយសុវត្ថិភាព ខណៈពេលនេះ៥៨ថ្ងៃហើយ បន្ទាប់ពីថៃចាប់ពួកគេទៅដោយខុសច្បាប់

រាជរដ្ឋាភិបាលកម្ពុជា បាននឹងកំពុងធ្វើការយ៉ាងសស្រាក់សស្រាំឥតឈប់ឈរ នូវគ្រប់យន្តការដោះស្រាយទាំងអស់ដើម្បីឱ្យភាគីថៃ ដោះលែងកងកម្លាំងកម្ពុជា១៨នាក់វិលត្រលប់មកវិញឱ្យបានឆាប់រហ័សជាទីបំផុត និងដោយសុខសុវត្ថិភាព ខណៈរហូតដល់ពេលនេះគឺមានរយៈពេល៥៨ថ្ងៃហើយក្រោយថៃចាប់ពួកគេទៅដោយខុសច្បាប់នោះ។យោងតាមឆាណែលតេលេក្រាមរបស់ក្រសួងការពារជាតិកម្ពុជា នាថ្ងៃទី២៥ ខែកញ្ញា ឆ្នាំ២០២៥ នេះបានឲ្យដឹងថា ថ្ងៃនេះជា ថ្ងៃទី៥៨ហើយ ដែលវីរកងទ័ពកម្ពុជាចំនួន១៨រូប ត្រូវបានចាប់ខ្លួន និងដាក់ឱ្យស្ថិតក្រោមការឃុំគ្រងរបស់យោធាថៃ។ ដូច្នេះកម្ពុជាសូមអំពាវនាវឱ្យភាគីថៃ ដោះលែងពួកគាត់ត្រឡប់មកវិញឱ្យបានឆាប់រហ័សជាទីបំផុត ដើម្បីឱ្យពួកគាត់អាចវិលត្រឡប់មកជួបជុំក្រុមគ្រួសាររបស់ពួកគាត់ និងប្រកបដោយសុខសុវត្ថិភាព ស្របតាមច្បាប់មនុស្សធម៌អន្តរជាតិ។ក្រសួងការពារជាតិកម្ពុជា បានបញ្ជាក់អះអាងទៀតថា«រាជរដ្ឋាភិបាលកម្ពុជា បាននឹងកំពុងធ្វើការយ៉ាងសស្រាក់សស្រាំឥតឈប់ឈរ នូវគ្រប់យន្តការដោះស្រាយទាំងអស់លើករណីនេះ ដើម្បីឱ្យភាគីថៃ ដោះលែងកងកម្លាំងរបស់យើងទាំង១៨នាក់នោះ វិលត្រលប់មកវិញឱ្យបានឆាប់រហ័សជាទីបំផុត និងដោយសុខសុវត្ថិភាព»។ ជាមួយគ្នានោះដែរ ក្រសួងការពារជាតិកម្ពុជា បានបញ្ជាក់ជាថ្មីម្តងទៀតថា រាជរដ្ឋាភិបាល ក្រសួងការពារជាតិ និងកងយោធពលខេមរភូមិន្ទ មិនដែលបោះបង់កងកម្លាំងរបស់យើងណាម្នាក់ចោលនោះឡើយ ទោះក្នុងកាលៈទេសៈណាក៏ដោយនោះ។សូមបញ្ជាក់ថា ក្នុងឱកាសអញ្ជើញជួបសាកសួរសុខទុក្ខជាមួយក្រុមគ្រួសាររបស់វីរកងទ័ពកម្ពុជា ទាំង១៨រូប កាលពីថ្ងៃទី១៩ ខែកញ្ញា ឆ្នាំ២០២៥កន្លងទៅនេះ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានអះអាងចំពោះមុខក្រុមគ្រួសារវីរកងទ័ពទាំង១៨រូបនោះថា រាជរដ្ឋាភិបាលបានកំពុងធ្វើការយ៉ាងសកម្មលើគ្រប់យន្តការទាំងអស់ ដើម្បីធ្វើយ៉ាងណាស្វែងរកដំណោះស្រាយក្នុងការការពារអាយុជីវិតសុខសុវត្ថិភាព និងព្យាយាមឱ្យថៃធ្វើការដោះលែងកងកម្លាំងរបស់យើងទាំង១៨នាក់នោះ វិលត្រឡប់មកកម្ពុជាវិញឱ្យបានឆាប់រហ័ស៕ អត្ថបទបាន ចក់

លោកជំទាវបណ្ឌិត ពេជ ចន្ទមុន្នី បួងសួងថ្វាយ សម្តេចព្រះមហាក្សត្រី នរោត្តម មុនិនាថ សូមទ្រង់ប្រកបដោយព្រះរាជសុខភាពល្អមាំមួន

ភ្នំពេញ ៖ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អគ្គស្នងការសមាគមកាយឬទិ្ធកម្ពុជា នៅរាត្រីថ្ងៃទី២៤ ខែកញ្ញា ឆ្នាំ២០២៥ នេះ បានបង្ហោះសារលើបណ្ដាញសង្គមហ្វេសប៊ុក បួងសួងថ្វាយ «សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ» សូមទ្រង់ប្រកបដោយព្រះរាជសុខភាពល្អមាំមួន ព្រះកម្លាំងកាយខ្លាំងក្លា។សាររបស់ មានខ្លឹមសារទាំងស្រុងដូចខាងក្រោម៖ខ្ញុំម្ចាស់សូមព្រះបរមរាជានុញ្ញាតលើកហត្ថប្រណម្យបួងសួងដល់គុណបុណព្រះរតនត្រ័យ វត្ថុស័ក្តិសិទ្ធិក្នុងលោក ទេវតាថែរក្សាព្រះមហាសេ្វតច្ឆត្រ ជាពិសេសព្រះបារមីនៃដួងវិញ្ញាណក្ខន្ធអតីតព្រះមហាក្សត្រខ្មែរគ្រប់ព្រះអង្គ ព្រមទាំង ព្រះករុណាព្រះបាទសម្តេចព្រះ នរោត្តម សីហនុ "ព្រះបរមរតនកោដ្ឋ" សូមតាមជួយបីបាច់ថែរក្សា ការពារ និងប្រោសប្រទានព្រះរាជសព្ទសាធុការពរ បវរសួស្តី ជ័យមង្គល វិបុលសុខ មហាប្រសើរគ្រប់ប្រការថ្វាយ «សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ» សូមទ្រង់ប្រកបដោយព្រះរាជសុខភាពល្អមាំមួន ព្រះកម្លាំងកាយខ្លាំងក្លា ទ្រង់ចៀសចាកឆ្ងាយពីជំងឺយាយីនានា និងសូមទ្រង់ប្រកបដោយពុទ្ធពរទាំង ៤ប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ដើម្បីព្រះអង្គបន្តគង់ជាម្លប់ដ៏ត្រជាក់ត្រជុំដល់មហាគ្រួសារខ្មែរ និងជាព្រះប្រធានកិត្តិយស នៃកាកបាទក្រហមកម្ពុជា ក្រុមប្រឹក្សាជាតិដើម្បីស្ត្រី និងសមាគមកាយឫទ្ធិនារីកម្ពុជា ក្នុងការរួមចំណែកដ៏ធំធេងលើកស្ទួយព្រះពុទ្ធសាសនា វប្បធម៌ប្រពៃណីជាតិ វិស័យអប់រំ សុខុមាលភាពសង្គម និងលើកកម្ពស់ជីវភាពប្រជានុរាស្ត្ររបស់ព្រះអង្គឱ្យមានភាពរីកចម្រើន រុងរឿងជាដរាបតរៀងទៅ។គួរបញ្ជាក់ថា ក្រសួងព្រះបរមរាជវាំង នៅថ្ងៃទី២៤ ខែកញ្ញា ឆ្នាំ២០២៥នេះ បានជម្រាបជូនសាធារណជន មេត្តាជ្រាបជាព័ត៌មានថា ក្នុងពេលបច្ចុប្បន្ននេះ ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត និងសម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត ព្រះអង្គកំពុងគង់ប្រថាប់នៅរដ្ឋធានីប៉េកាំង នៃសាធារណរដ្ឋប្រជាមានិតចិន តាមសំណូមពររបស់ថ្នាក់ដឹកនាំមិត្តចិន និងវេជ្ជបណ្ឌិតនៃមន្ទីរពេទ្យប៉េកាំង ដើម្បីពិនិត្យព្រះរាជសុខភាពតាមពេលវេលាដែលពេទ្យបានកំណត់។ ពេលនេះ សម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុតមានព្រះជន្មច្រើន និងព្រះប្រឈួន ក្រុមគ្រូពេទ្យថ្វាយព្រះអង្គសម្រាកនៅមន្ទីរពេទ្យ ដើម្បីព្យាបាលព្រះរាជសុខភាព។ ក្រុមគ្រូពេទ្យបានយកចិត្តទុកដាក់ថែរក្សាថ្វាយបានល្អណាស់ មកដល់បច្ចុប្បន្ន សម្ដេច ព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុតកំពុងគង់ប្រថាប់នៅមន្ទីរពេទ្យនៅឡើយ៕

កម្ពុជា និងថៃមានមូលដ្ឋានគ្រប់គ្រាន់ និងច្បាស់លាស់ សម្រាប់ដោះស្រាយបញ្ហាព្រំដែនប្រទេសទាំងពីរ

ឧត្តមសេនីយ៍ទោ ឆេង ឃុន នាយករងនាយកដ្ឋានភូមិសាស្រ្ត នៃក្រសួងការពារជាតិ នៅថ្ងៃទី២៤ ខែកញ្ញា ឆ្នាំ២០២៥ នេះ បានគូសបញ្ជាក់ជារួមថា កម្ពុជា និងថៃមានមូលដ្ឋាន គ្រប់គ្រាន់ និងច្បាស់លាស់ ទាំងមូលដ្ឋានច្បាប់ យន្តការស្ថាប័ន និងវិធានបច្ចេកទេសសម្រាប់ដោះស្រាយបញ្ហា ព្រំដែនរវាងប្រទេសទាំងពីរ ជាពិសេសផែនទីមាត្រដ្ឋាន ១/២០០.០០០ យោងតាមអនុសញ្ញាឆ្នាំ១៩០៤ និងសន្ធិសញ្ញាឆ្នាំ១៩០៧ ព្រមទាំងមានការបោះបង្គោលព្រំដែនជាមួយគ្នាចំនួន ៧៤បង្គោល ហើយភាគីទាំងពីរ កម្ពុជា-ថៃ បានទទួលស្គាល់ និងបញ្ជាក់ឡើងវិញនៅក្នុង MOU ឆ្នាំ២០០០។ ឧត្តមសេនីយ៍ទោ ឆេង ឃុន អះអាងបន្តថា ក្នុងការដោះស្រាយបញ្ហាព្រំដែននេះ កម្ពុជាប្រកាន់ជំហរការពារអធិបតេយ្យរបស់ខ្លួនដោយគោរពតាមផែនទីមាត្រដ្ឋាន ១/២០០ ០០០ និង មិនចង់បានទឹកដីថៃឡើយ ហើយស្នើភាគីថៃគោរពនូវអធិបតេយ្យរបស់កម្ពុជាវិញដូចគ្នា។ ក៏ប៉ុន្តែ កិច្ចការនេះ តម្រូវឱ្យមានការគិតគូរ និងចរចាជាមួយគ្នាឱ្យបានច្បាស់លាស់ ដោយប្រើប្រាស់លក្ខណៈបច្ចេកទេសត្រឹមត្រូវតាមកិច្ចព្រមព្រៀងដែលប្រទេសទាំងពីរបានឯកភាពគ្នាជាង ២០ឆ្នាំ មកហើយ គឺតាមរយៈយន្តការ JBC និងផ្អែកលើគោលការណ៍ MOU ឆ្នាំ២០០០ ព្រមទាំងបែបបទបច្ចេកទេសអនុវត្ត TOR ឆ្នាំ២០០៣"។ក្រសួងការពារជាតិ នៃព្រះរាជាណាចក្រកម្ពុជា សំណូមពរយោធាថៃ អាជ្ញាធរខេត្តថៃ ព្រមទាំងស្ថាប័នពាក់ព័ន្ធរបស់ថៃ បញ្ឈប់ការប្រើប្រាស់ផែនទីមិនផ្លូវការ ឬរូបភាពផែនទីផ្កាយរណបដែលគូសខ្សែព្រំដែន ជាឯកតោភាគី ដែលនាំឱ្យមានការភាន់ច្រឡំ បង្កើតជាព័ត៌មានមិនត្រឹមត្រូវតាមលក្ខណៈបច្ចេកទេស និងស្នើ ភាគីថៃគោរពរាល់កិច្ចព្រមព្រៀង និងគោលការណ៍ទាំងឡាយដែលភាគីថៃបានឯកភាពគ្នាជាមួយកម្ពុជា ជាពិសេសស្មារតីកិច្ចប្រជុំពិសេស GBC នាថ្ងៃទី១០ ខែកញ្ញា ឆ្នាំ២០២៥ ចំណុច ៨.១.១ ដែលប្រគល់សមត្ថកិច្ច ឱ្យគណៈកម្មការចម្រុះខណ្ឌសីមាព្រំដែនគោក (JBC) នៃប្រទេសទាំងពីរ ដើម្បីស្វែងរកដំណោះស្រាយលើកិច្ចការព្រំដែន និងចៀសវាងនូវសកម្មភាពដែលធ្វើឱ្យបាត់បង់នូវជំនឿទុកចិត្ត បង្កើតឱ្យមានការយល់ច្រឡំគ្នា បង្កឱ្យមានភាពតានតឹង ឬពង្រីកវិសាលភាពជម្លោះនៅតាមបណ្តោយព្រំដែនរវាងប្រទេសទាំងពីរ៕

ក្រសួងការពារជាតិ បង្ហាញមូលហេតុ កម្ពុជាមិនបកស្រាយ កិច្ចការចរចាបញ្ហាព្រំដែនកម្ពុជាថៃ កន្លងមក

ឧត្តមសេនីយ៍ទោ ឆេង ឃុន នាយករងនាយកដ្ឋានភូមិសាស្រ្ត នៃក្រសួងការពារជាតិកម្ពុជា នាថ្ងៃទី២៤ ខែកញ្ញា ឆ្នាំ២០២៥ បានបកស្រាយ ពាក់ព័ន្ធ សាធារណជនអាចលើកជាសំណួរសួរថា ហេតុអ្វីបានជាយើងដឹង កិច្ចការចរចាពាក់ព័ន្ធនឹងបញ្ហាព្រំដែនរវាងប្រទេសកម្ពុជាថៃនេះហើយ ប៉ុន្តែមិនចេញបកស្រាយបំភ្លឺជូនសាធារណជនឱ្យបានជ្រាបនាពេលកន្លងមក?ឧត្តមសេនីយ៍ទោ ឆេង ឃុន បញ្ជាក់ថា តាមពិតគឺ៖ ទី១. ផ្អែកតាមយន្តការ និងគោលការណ៍របស់ JBC ភាគីទាំងពីរឯកភាពគ្នារក្សាការសម្ងាត់លើរាល់ កិច្ចការចរចាពាក់ព័ន្ធនឹងបញ្ហាព្រំដែនរវាងប្រទេសទាំងពីរ។ ផ្អែកលើគោលការណ៍នេះ កម្ពុជាតែងប្រកាន់ខ្ជាប់នូវការរក្សាការសម្ងាត់នៃកិច្ចការចរចាលើបញ្ហាព្រំដែន ដោយសារការងារនេះកំពុងស្ថិតនៅក្នុងដំណាក់កាល នៃការចរចា។ ជាក់ស្តែង ផែនទី និងទិន្នន័យដែលបង្ហាញនាពេលនេះ ក៏ដូចជាផែនទីដែលភាគីថៃបាន បង្ហាញ និងបង្ហោះផ្សាយនាពេលកន្លងមក មិនមែនជាផែនទីផ្លូវការដែលមានការឯកភាពពីភាគីទាំងពីរនោះទេ គឺគ្រាន់តែជាផែនទីរូបភាពផ្កាយរណប ហើយយកមកបញ្ចូលនូវប្លង់ និងទិន្នន័យខ្លះដែលជាជំនួយលើ ការងារបច្ចេកទេសមួយចំនួនប៉ុណ្ណោះ។ទី២. កម្ពុជាតែងតែប្រកាន់ខ្ជាប់គោលការណ៍ដោះស្រាយបញ្ហាព្រំដែនដោយសន្តិវិធី ដោយផ្អែកតាម គោលការណ៍ច្បាប់អន្តរជាតិ ក្នុងគោលបំណងធានាបាននូវដំណោះស្រាយលើបញ្ហាព្រំដែនរវាងប្រទេស ទាំងពីរ ដែលផ្តល់ជូនដល់ប្រជាជាតិកម្ពុជា និងថៃ នូវសុខសន្តិភាព ភាពជាអ្នកជិតខាងល្អ និងការអភិវឌ្ឍ ប្រកបដោយចីរភាព។ ប៉ុន្តែ គួរឱ្យសោកស្តាយ ភាគីថៃតែងតែយកកិច្ចការព្រំដែន ដែលចរចាដោះស្រាយ មិនទាន់ចប់នេះ មកបង្ហាញ ពន្យល់ និងបកស្រាយ ដោយបំភ្លៃការពិតម្តងហើយម្តងទៀត ធ្វើឱ្យសាធារណជន មានការយល់ច្រឡំ។ ហេតុនេះ យើងចាំបាច់ត្រូវតែចេញមកបង្ហាញ និងបញ្ជាក់ការពិតនៅពេលនេះ។

បណ្ដាញសង្គម

ព័ត៌មានថ្មីៗ

គំនិតផ្តួចផ្តើមរបស់វិចិត្រករ បានគាំទ្រក្មេងៗជម្លៀសខ្លួននៅលីបង់ឲ្យគូរគំនូរតាមអារម្មណ៍របស់ខ្លួន

អ៊ីរ៉ង់អះអាងពីការបាញ់ទម្លាក់យន្តហោះចម្បាំង F-35 ទី២ របស់អាមេរិក ក្នុងរយៈពេល ២សប្តាហ៍

សហភាពអាហ្វ្រិក គាំទ្រការជំរុញសន្តិភាពចិន-ប៉ាគីស្ថាន ជុំវិញបញ្ហាមជ្ឈិមបូព៌ា និងជំរុញឲ្យបន្ថយភាពតានតឹង

មេបញ្ជាការយោធាប៊ូគីណា ហ្វាសូ និយាយថា បំភ្លេចចោលទៅលទ្ធិប្រជាធិបតេយ្យ

WTO ព្រមានអំពី «ការវាយប្រហារជាច្រើនដងលើទីតាំងសេវាសុខភាព» នៅអ៊ីរ៉ង់

មនុស្សម្នាក់ស្លាប់នៅជិតទីក្រុងគីវ ខណៈរុស្ស៊ីប្តូរមកវាយប្រហារទ្រង់ទ្រាយធំនៅពេលថ្ងៃ

របាយការណ៍៖ អាមេរិកបណ្តេញបេសកជនរងរបស់អ៊ីរ៉ង់ ប្រចាំនៅ UN ដោយសារក្តីបារម្ភពីសន្តិសុខជាតិ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877