BTV NEWS

រដ្ឋសភាបញ្ជូនសេចក្តីស្នើច្បាប់ស្តីពីវិសោធនកម្មច្បាប់ស្តីពីការបោះឆ្នោតជ្រើសតាំងសមាជិកព្រឹទ្ធសភាទៅក្រុមប្រឹក្សាធម្មនុញ្ញ

រាជរដ្ឋាភិបាលកម្ពុជាបានតវ៉ាជាផ្លូវការជាថ្មីទៀត ចំពោះសកម្មភាពខុសច្បាប់របស់ថៃកាន់កាប់នៅតំបន់ភូមិជោគជ័យ និងច្រកទ្វារអន្តរជាតិអូរស្មាច់

ក្រសួងការងារលើកទឹកចិត្តអ្នកស្វែងរកការងាររៀនជំនាញទន់បន្ថែម ដើម្បីត្រៀមខ្លួនមុនចូលទីផ្សារការងារ

ក្រសួងកសិកម្មជំរុញលើកទឹកចិត្តឱ្យប្រជាកសិករប្រើប្រាស់ថាមពលសូឡា ក្នុងបរិបទតម្លែប្រេងឥន្ធនៈឡើងថ្លៃ

ព័ត៌មានជាតិ

រដ្ឋបាលខេត្តឧត្តរមានជ័យ ប្រកាសគាំទ្រ និងចូលរួមចំណែកជាមួយរាជរដ្ឋាភិបាលកម្ពុជា ក្នុងការស្នើសុំឱ្យប្រធានអាស៊ាន និងថ្នាក់ដឹកនាំពិភពលោក ជួយជំរុញឱ្យមានការគោរពយ៉ាងពេញលេញចំពោះលក្ខខណ្ឌបទឈប់បាញ់

រដ្ឋបាលខេត្តខេត្តឧត្តរមានជ័យ សូមប្រកាសគាំទ្រយ៉ាងពេញទំហឹង ចំពោះខ្លឹមសារទាំងស្រុងនៃ សេចក្តីប្រកាស ព័ត៌មានរបស់ ក្រសួងការបរទេស និងសហប្រតិបត្តិការអន្តរជាតិ របស់កម្ពុជា ដែលបានបញ្ជាក់ពីខ្លឹមសាររបស់សារលិខិត សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជាក្នុងការស្នើសុំការគាំទ្រ ពីប្រធានអាស៊ាន និងថ្នាក់ដឹកនាំកំពូលៗរបស់ពិភពលោក ដើម្បីជំរុញឱ្យមានការគោរពយ៉ាងពេញលេញចំពោះ លក្ខខណ្ឌបទឈប់បាញ់ និងកិច្ចព្រមព្រៀងទាំងអស់ដែលបានសម្រេចនៅក្នុងកិច្ចប្រជុំគណៈកម្មាធិការព្រំដែនទូទៅ (GBC) និងគណៈកម្មាធិការព្រំដែនថ្នាក់ភូមិភាគ (RBC) រវាងកម្ពុជា និងថៃ ប្រកបដោយប្រសិទ្ធភាពខ្ពស់។យើងខ្ញុំទាំងអស់គ្នា សូមប្រកាសគាំទ្រ និងចូលរួមចំណែកជាមួយរាជរដ្ឋាភិបាលកម្ពុជា ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត ក្នុងការស្នើសុំឱ្យប្រធានអាស៊ាន និងថ្នាក់ដឹកនាំពិភពលោកជួយគាំទ្រដល់ការជំរុញឱ្យមាន៖- ការប្រកាន់ខ្ជាប់យ៉ាងម៉ឺងម៉ាត់ចំពោះបទឈប់បាញ់ និងកិច្ចព្រមព្រៀងពាក់ព័ន្ធ ដែលសម្រេចបាននៅទីក្រុង ពុត្រាចាយ៉ា នៅថ្ងៃទី២៨ ខែកក្កដា ឆ្នាំ២០២៥ និងកិច្ចប្រជុំ GBC និងRBC នាពេលថ្មីៗនេះ ហើយបញ្ឈប់ជា បន្ទាន់នូវរាល់សកម្មភាពជាឯកតោភាគី ដែលអាចបង្កើនភាពតានតឹង និងពង្រីកទំហំ និងវិសាលភាពនៃជម្លោះ -ការហាមប្រើកម្លាំងប្រឆាំងជនស៊ីវិល និងទ្រព្យសម្បត្តិ- ការរុះរើឧបសគ្គដែលទើបដាក់ថ្មីៗ ដូចជាលួសបន្លា និងសំបកកង់រថយន្តក្នុងតំបន់ដែលពលរដ្ឋខ្មែរបាន និងកំពុង រស់នៅរាប់ទសវត្សរ៍ និងក្នុងតំបន់ដែលការកំណត់ខណ្ឌសីមាព្រំដែននៅមិនទាន់បានដោះស្រាយបញ្ចប់ - ការបញ្ឈប់ផែនការបណ្ដេញចេញដោយបង្ខំ និងអនុញ្ញាតឱ្យប្រជាពលរដ្ឋខ្មែរ ដែលត្រូវបានបណ្ដេញចេញរួចហើយ អាចវិលត្រឡប់ទៅកាន់លំនៅឋាន និងដីរបស់ពួកគេវិញ-ការបញ្ឈប់ការប្រើប្រាស់ឬគម្រោងប្រើប្រាស់កម្លាំងយោធា ដើម្បីធ្វើការកំណត់ខណ្ឌសីមាព្រំដែនជាឯកតោភាគី ហើយអនុញ្ញាតឱ្យយន្តការទ្វេភាគីដែលមានស្រាប់បន្តធ្វើការងារដោយសន្តិវិធី ផ្អែកលើមូលដ្ឋានកិច្ចព្រមព្រៀង អនុសញ្ញា សន្ធិសញ្ញា និងច្បាប់អន្តរជាតិដែលមានស្រាប់ និង- ការដោះលែងជាបន្ទាន់ដោយគ្មានលក្ខខណ្ឌ និងការធ្វើមាតុភូមិនិវត្តន៍យោធិនកម្ពុជាចំនួន ១៨រូប ដែលកំពុងស្ថិត ក្រោមការឃុំឃាំងនៅប្រទេសថៃ៕

កម្ពុជាតវ៉ា និងជំទាស់យ៉ាងខ្លាំងចំពោះចេតនារបស់ថៃក្នុងការអនុវត្តច្បាប់ក្នុងស្រុកមកលើពលរដ្ឋកម្ពុជា

ក្រសួងការបរទេស និងសហប្រតិបត្តិការអន្តរជាតិកម្ពុជា បានសម្តែងជាផ្លូវការនូវការតវ៉ា និងការ ជំទាស់យ៉ាងខ្លាំងរបស់រាជរដ្ឋាភិបាលកម្ពុជា ចំពោះចេតនារបស់ប្រទេសថៃក្នុងការអនុវត្តច្បាប់ក្នុង ស្រុករបស់ខ្លួន លើប្រជាពលរដ្ឋកម្ពុជា នៅភូមិជោគជ័យ និងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។ នេះបើយោងតាម សេចក្តីថ្លែងការណ៍របស់ក្រសួងការបរទេស កាលពីថ្ងៃទី២០ ខែកញ្ញានេះ។ក្រសួងការបរទេសកម្ពុជាបានឱ្យដឹងថាកាលពីថ្ងៃទី១៨ ខែកញ្ញា ឆ្នាំ២០២៥ អ្នកនាំពាក្យនៃយោធភូមិភាគទី១ នៃកងទ័ពភូមិន្ទ ថៃបានចេញសេចក្តីព្រមានជាសាធារណៈ ស្តីពីការអនុវត្តច្បាប់ក្នុងស្រុករបស់ថៃលើពលរដ្ឋកម្ពុជា ដែលរួមមានការដាក់ទោសទណ្ឌរហូតដល់ដាក់ពន្ធនាគារអស់មួយជីវិត ឬទោសប្រហារជីវិតចំពោះអ្វី ដែលហៅថា «សកម្មភាពប្រឆាំងនឹងអធិបតេយ្យរបស់ប្រទេសថៃ»។ ការប្រកាសប្រើច្បាប់នេះកើតឡើង បន្ទាប់ពីឧប្បត្តិហេតុ កាលថ្ងៃទី១៧ ខែកញ្ញា ឆ្នាំ ២០២៥ ដែលកងកម្លាំងសន្តិសុខថៃបានប្រើឧស្ម័ន បង្ហូរទឹកភ្នែក និងគ្រាប់កាំភ្លើងជ័រ លើប្រជាពលរដ្ឋកម្ពុជានៅភូមិព្រៃចាន់ ដែលថ្មីៗនេះ ប្រទេសថៃ បានប្រើកម្លាំង ដើម្បីអនុវត្តអធិបតេយ្យទឹកដី។ក្រសួងការបរទេសកម្ពុជាបញ្ជាក់ថា ការប្រកាសរបស់ថៃក្នុងការប្រើច្បាប់ក្នុងស្រុកនៅក្នុងទឹកដីដែលមានជម្លោះ បំពានលើ កាតព្វកិច្ចជាមូលដ្ឋាន ក្រោមមាត្រា ២ និង ២ នៃធម្មនុញ្ញអង្គការសហប្រជាជាតិដែល តម្រូវឱ្យមានការដោះស្រាយវិវាទដោយសន្តិវិធី និងមិនអនុញ្ញាតឱ្យប្រើកម្លាំងប្រឆាំងនឹងបូរណភាពទឹកដីរបស់រដ្ឋមួយផ្សេងទៀតឡើយ។ ការអនុវត្តទោសព្រហ្មទណ្ឌធ្ងន់ធ្ងររួមទាំងការដាក់ទោសប្រហារជីវិតលើប្រជាពលរដ្ឋកម្ពុជា ដែលចូលរួមក្នុងការតវ៉ាដោយសន្តិវិធី ក៏ជាការរំលោភយ៉ាងធ្ងន់ធ្ងរផងដែរលើសិទ្ធិមនុស្សជាមូលដ្ឋាន ដែលត្រូវបានធានាក្រោមច្បាប់អន្តរជាតិ។ សកម្មភាពបែបនេះ គឺជាការបំពានដោយផ្ទាល់លើសេរីភាពនៃការជួបប្រជុំ និងសមាគមដោយសន្ដិវីធីដែលជាបទដ្ឋានស្នូលមួយ ក្រោមសេចក្តីប្រកាសជាសកលស្តីពីសិទ្ធិមនុស្ស និងកតិកាសញ្ញាអន្តរជាតិ ស្តីពី សិទ្ធិស៊ីវិល និងសិទ្ធិនយោបាយ ដែលប្រទេសថៃជាភាគី។ សកម្មភាពរបស់ថៃក៏រំលោភបំពានផងដែរលើធម្មនុញ្ញអាស៊ាន និងសន្ធិសញ្ញាមិត្តភាព និងកិច្ចសហប្រតិបត្តិការដែលតម្រូវឱ្យរដ្ឋជាសមាជិកមិនត្រូវធ្វើសកម្មភាពបង្កហេតុ និងដោះស្រាយដោយសន្ដិវិធី។ក្រសួងការបរទេសកម្ពុជាបញ្ជាក់ថា ចេតនារបស់ប្រទេសថៃក្នុងការអនុវត្តច្បាប់ក្នុងស្រុករបស់ខ្លួនមកលើពលរដ្ឋកម្ពុជា ដែលតវ៉ាដោយសន្តិវិធី គឺជាការបង្ហាញយ៉ាងច្បាស់ពីការប្រើប្រាស់កម្លាំង ក្នុងការទាមទារយកដែន អធិបតេយ្យលើតំបន់ដែលមិនទាន់បានកំណត់ខណ្ឌសីមា ដោយបំពានលើកាតព្វកិច្ចនៃសន្ធិសញ្ញា និងការប្តេជ្ញាចិត្តរបស់ប្រទេសថៃផ្ទាល់ ក្រោមអនុស្សរណៈនៃការយោគយល់គ្នា រវាងរដ្ឋាភិបាលនៃ ព្រះរាជាណាចក្រកម្ពុជា និងរដ្ឋាភិបាលនៃព្រះរាជាណាចក្រថៃ ស្តីពីការវាស់វែង និងខណ្ឌសីមាព្រំដែន គោក (MoU 2000) ដែលជាក្របខ័ណ្ឌមូលដ្ឋានសម្រាប់ដោះស្រាយរាល់បញ្ហាព្រំដែន ដែលពុំទាន់ បានដោះស្រាយ។ លើសពីនេះ សកម្មភាពខាងលើបានជ្រៀតជ្រែកដោយផ្ទាល់ដល់អាណត្តិរបស់ គណៈកម្មការចម្រុះខណ្ឌសីមាព្រំដែនគោក ក្នុងការវាស់វែង និងកំណត់ព្រំដែនដូចមានចែងក្នុង ប្រការ២ នៃ MoU 2000 ។កម្ពុជាអំពាវនាវឱ្យថៃបញ្ឈប់សកម្មភាពនានា ដែលធ្វើឱ្យប៉ះពាល់ដល់កិច្ចខិតខំប្រឹង ប្រែង ដើម្បីបន្ធូរបន្ថយភាពតានតឹង ដូចដែលបានតាំងចិត្តរួម ក្រោមកិច្ចព្រមព្រៀងបទឈប់បាញ់ កាលពីថ្ងៃទី២៨ ខែកក្កដា ឆ្នាំ២០២៥ និងកំណត់ហេតុរបស់គណៈកម្មាធិការព្រំដែនទូទៅ (GBC) កាលពីថ្ងៃទី៧ ខែសីហា និងថ្ងៃទី ១០ ខែកញ្ញា ឆ្នាំ២០២៥។រាជរដ្ឋាភិបាលកម្ពុជា បញ្ជាក់សាជាថ្មីនូវការប្តេជ្ញាចិត្តយ៉ាងខ្ជាប់ខ្ជួន និងឥតងាករេ ក្នុងការ ស្វែងរកដំណោះស្រាយប្រកបដោយមិត្តភាព ចំពោះជម្លោះព្រំដែនជាមួយប្រទេសជិតខាងទាំងអស់ តាមរយៈមធ្យោបាយសន្តិវិធី ស្របតាមច្បាប់អន្តរជាតិ ខណៈរក្សាការប្តេជ្ញាចិត្តប្រកាន់ខ្ជាប់នូវ គោលជំហរជាគោលការណ៍ថា ព្រំដែនមិនត្រូវបានផ្លាស់ប្តូរដោយការប្រើកម្លាំង នោះឡើយ។ រាជរដ្ឋាភិបាលកម្ពុជា ក៏សូមរក្សាសិទ្ធិរបស់ខ្លួន ក្រោមច្បាប់អន្តរជាតិ និងមិនចាត់ទុកការប្រើប្រាស់ ច្បាប់ក្នុងស្រុករបស់ថៃ ថាមានប្រសិទ្ធភាពផ្លូវច្បាប់ ឬប៉ះពាល់ដល់ដំណើរការវាស់វែង និង ខណ្ឌសីមារួមនោះឡើយ៕

លេខាធិការដ្ឋានកិច្ចការព្រំដែនកម្ពុជា ច្រានចោលការផ្សាយលើផេកហ្វេសប៊ុករបស់ថៃ និងបញ្ជាក់ថា តំបន់ភូមិព្រៃចាន់ស្ថិតនៅចន្លោះបង្គោលព្រំដែនលេខ 42 និង 43 គឺជាតំបន់ដែលភាគីកម្ពុជា-ថៃពុំទាន់បានឯកភាពគ្នា

ភ្នំពេញ៖ លេខាធិការដ្ឋានកិច្ចការព្រំដែនរបស់កម្ពុជា ច្រានចោលការផ្សាយលើផេកហ្វេសប៊ុករបស់ថៃ និងបញ្ជាក់ថា ភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ជាភូមិសាស្ត្រដែលកម្ពុជា និងថៃ មិនទាន់បានឯកភាពពីការកំណត់ខណ្ឌសីមាដាច់ស្រេចនៅឡើយទេ។ រដ្ឋលេខាធិការដ្ឋានកិច្ចការព្រំដែន បានឱ្យដឹងថា ក្នុងពេលថ្មីៗនេះ បានសង្កេតឃើញការបង្ហោះផ្សាយព័ត៌មាន តាមរយៈគណនី Facebook Page មានឈ្មោះ «Royal Thai Army: Update» កាលពីថ្ងៃទី១៩ ខែកញ្ញា ឆ្នាំ២០២៥ ដោយប្រើប្រាស់ប្លង់បង្ហាញលក្ខណៈភូមិសាស្ត្រ និងទីតាំងបង្គោលព្រំដែន ដែលជាឧបសម្ព័ន្ធនៃ កំណត់ហេតុ ចុះថ្ងៃទី២៤ ខែវិច្ឆិកា ឆ្នាំ២០១៧ និងឧបសម្ព័ន្ធនៃកំណត់ហេតុ ចុះថ្ងៃទី២៨ ខែធ្នូ ឆ្នាំ២០១៦ របស់ក្រុមវាស់វែងចម្រុះកម្ពុជា-ថៃ ដែលជាលទ្ធផលនៃការរុករកទីតាំងពិតប្រាកដនៃបង្គោលព្រំដែនលេខ 42 និងលេខ43 នៅតំបន់ភូមិព្រៃចាន់ ដែលនាំឱ្យមានការភាន់ច្រឡំថា ថ្នាក់ដឹកនាំរបស់រដ្ឋលេខាធិការដ្ឋាន កិច្ចការព្រំដែន (ឯកឧត្តម ឡាយ សៀងលី) បានចុះហត្ថលេខាទទួលស្គាល់ខ្សែព្រំដែនជាផ្លូវការ នៅតំបន់ ភូមិព្រៃចាន់ ស្ថិតនៅចន្លោះបង្គោលព្រំដែនលេខ 42 និងលេខ 43។ រដ្ឋលេខាធិការដ្ឋានកិច្ចការព្រំដែន សូមប្រកាសបដិសេធ និងច្រានចោលទាំងស្រុង ចំពោះការផ្សព្វផ្សាយព័ត៌មានមិនពិត គ្មានវិជ្ជាជីវៈ និងមាន ចេតនាទុច្ចរិត ដែលបានប្រើប្រាស់ឯកសារ និងព័ត៌មានប្រាស់ចាកពីការពិតក្នុងចេតនាបំភាន់សាធារណជនជាតិ និងអន្តរជាតិ ឱ្យមានការភាន់ច្រឡំ។រដ្ឋលេខាធិការដ្ឋានកិច្ចការព្រំដែនបំភ្លឺ និងបញ្ជាក់ជូនសាធារណជនជាតិ និងអន្តរជាតិឱ្យបានជ្រាបពីការពិត៖ ១. ឯកសារដែលបានបង្ហាញក្នុងគណនីខាងលើនេះ គឺជាប្លង់បង្ហាញលក្ខណៈភូមិសាស្ត្រ និង ទីតាំងបង្គោលព្រំដែនដែលជាឧបសម្ព័ន្ធនៃកំណត់ហេតុ ចុះថ្ងៃទី២៤ ខែវិច្ឆិកា ឆ្នាំ២០១៧ និងឧបសម្ព័ន្ធនៃកំណត់ហេតុ ចុះថ្ងៃទី២៨ ខែធ្នូ ឆ្នាំ២០១៦ របស់ក្រុមវាស់វែងចម្រុះកម្ពុជា-ថៃ ស្តីពីលទ្ធផលនៃការរុករកទីតាំងពិតប្រាកដនៃបង្គោលព្រំដែនលេខ42 និងលេខ43 ដែលបានបោះនាសម័យបារាំងប៉ុណ្ណោះ ហើយពុំមែនជាផែនទី ឬជាឯកសារដែលបញ្ជាក់ពី ខ្សែព្រំដែនឡើយ។២. ម្ចាស់គណនី Facebook Page ខាងលើនេះ បានយកទិន្នន័យនៅក្នុងប្លង់បង្ហាញលក្ខណៈ ភូមិសាស្ត្រ និងទីតាំងបង្គោលព្រំដែនខាងលើមកគូសក្លែងបន្លំជាខ្សែព្រំដែននៅលើផែនទី រូបភាពផ្កាយរណប ដើម្បីបំភាន់សាធារណជនជាតិ និងអន្តរជាតិឱ្យមានការភាន់ច្រឡំថា ខ្សែបន្ទាប់ព្រំដែនដែលខ្លួនបានគូសក្លែងបន្លំនេះ គឺជាខ្សែព្រំដែនដែលបានឯកភាពដោយក្រុមវាសវែងចម្រុះកម្ពុជា-ថៃ។ ៣. តំបន់ភូមិព្រៃចាន់ ដែលស្ថិតនៅចន្លោះបង្គោលព្រំដែនលេខ 42 និង 43 គឺជាតំបន់ដែលភាគីទាំងពីរពុំទាន់បានឯកភាពគ្នាខណ្ឌសីមានៅលើដីជាក់ស្តែងនៅឡើយ ហើយកិច្ចការនេះ ត្រូវដោះស្រាយដោយគណៈកម្មការចម្រុះខណ្ឌសីមាព្រំដែនគោក (JBC) កម្ពុជា-ថៃ និង គ្មានយន្តការ ឬស្ថាប័នណាមួយមានសមត្ថកិច្ចលើកិច្ចការនេះឡើយ។ជាថ្មីម្តងទៀត រដ្ឋលេខាធិការដ្ឋានកិច្ចការព្រំដែន ប្រកាសបដិសេធ និងច្រានចោលទាំងស្រុង ចំពោះព័ត៌មានមិនពិត ក្លែងក្លាយ ដែលគណនី Facebook Page មានឈ្មោះ «Royal Thai Army: Update» បានបង្ហោះផ្សាយ និងអំពាវនាវដល់សាធារណជនជាតិ និងអន្តរជាតិទាំងអស់កុំជឿ និងកុំចែកចាយព័ត៌មានក្លែងក្លាយទាំងនេះ ហើយរដ្ឋលេខាធិការដ្ឋានកិច្ចការព្រំដែនសូមលើកទឹកចិត្តឱ្យមាន ការផ្សព្វផ្សាយ និងចែកចាយសេចក្តីប្រកាសបដិសេធព័ត៌មាននេះឱ្យបានទូលំទូលាយដើម្បីឱ្យមហាជន បានជ្រួតជ្រាបអំពីការពិតលើបញ្ហានេះ៕

បុណ្យភ្ជុំបិណ្ឌវេនទី១៤ ប្រជាពុទ្ធបរិស័ទនៅរាជធានីភ្នំពេញ កាន់តែច្រើនកុះករ យកទេយ្យទាន និងចង្ហាន់នានាទៅប្រគេនព្រះសង្ឃ

ភ្នំពេញ ÷ នាឱកាសនៃពិធីបុណ្យភ្ជុំបិណ្ឌវេនទី១៤ ត្រូវនឹងថ្ងៃទ២១ ខែកញ្ញា ឆ្នាំ២០២៥នេះ ប្រជាពុទ្ធបរិស័ទ រស់នៅក្នុងរាជធានីភ្នំពេញ កាន់តែច្រើនកុះករ បានបន្តយកទេយ្យទាន និងចង្ហាន់នានា ទៅប្រគេនព្រះសង្ឃ នៅតាមបណ្តាទីវត្តអារាម។ បងប្អូនប្រជាពុទ្ធបរិស័ទ ក្មេង ចាស់ ប្រុស ស្រី ជួបជុំក្រុមគ្រួសារ បានអញ្ជើញមកកាន់វត្តសន្សំកុសល ស្ថិតក្នុងសង្កាត់បឹងទំពន់ទី១ ខណ្ឌមានជ័យ រាជធានីភ្នំពេញ ដើម្បីចូលរួមក្នុងពិធីបុណ្យកាន់បិណ្ឌ-ភ្ជុំបិណ្ឌ វេនបិណ្ឌទី១៤ ព្រមទាំងបានអញ្ជើញអុជទៀនធូប ប្រគេនគន្ធពិដោរ ថ្វាយបង្គំព្រះពុទ្ធបដិមា និងព្រះសង្ឃ ព្រមទាំងសមាទានសីល រម្លឹកនឹកដល់គុណបុណ្យព្រះរតនៈត្រៃយ៍តាមគន្លងប្រពៃណីព្រះពុទ្ធសាសនា ពិសេសរម្លឹកដល់ព្រះសម្មាសម្ពុទ្ធព្រះបរមគ្រូ នៃយើង ដែលព្រះអង្គបានត្រាស់ដឹង នូវអនុត្តរៈសម្មាសម្ពុទ្ធធិញាណ និងព្រះធម៌វិន័យដ៏វិសេសវិសាល បន្សល់ទុកឱ្យពុទ្ធបរិស័ទគ្រប់ជំនាន់ បានគោរពប្រតិបត្តិជាដ៏រាបរៀងមក។នាឱកាសនោះបងប្អូនប្រជាពុទ្ធបរិស័ទ អញ្ជើញមកកាន់វត្តសន្សំកុសល បានបង្ហាញចំណាប់អារម្មណ៍របស់ខ្លួន តាមរយៈប្រាប់BTV ព័ត៌មានថា ថ្ងៃនេះ ក្នុងរដូវខែបុណ្យ ទាន ពួកគាត់គ្រប់គ្នា តែងមានសេចកី្តជ្រះថ្លាក្នុងចិត្ត សប្បាយរីករាយ បានជួបជុំបងប្អូនក្រុមគ្រួសាររៀងៗខ្លួន ហើយការធ្វើបុណ្យ គឺយើងធ្វើរដូវភ្ជុំ ហើយត្រូវដាក់នំអន្សមជ្រូក អន្សមចេក នំគម នំបត ទេយ្យទាន និងចង្ហាន់មកប្រគេនព្រះសង្ឃឲ្យត្រូវតាមប្រពៃណីនៃពិធីបុណ្យ។ ភ្ជាប់ជាមួយគ្នានេះ បើប្រទេសជាតិយើងគ្មានសុខសន្តិភាព យើងក៏មិនអាចមកជួបជុំគ្រួសារ បានធ្វើបុណ្យ ធ្វើទាននោះទេ មកដល់ពេលនេះប្រទេសយើងទូលំទូលាយខ្លាំងណាស់ កន្លែងណាក៏យើងអាចទៅធ្វើបុណ្យ ធ្វើទានបានផងដែរ មិនទីអារាមនៅទីជនបទ និងក្នុងរាជធានីនោះទេ កន្លែងណាក៏ស្អាត មានសណ្តាប់ធ្នាប់ និងសុវតិ្ថភាព និងឲ្យមានសុខសប្បាយដល់ប្រជាជនទូទាំងប្រទេស។ ជាពិសេសពួកគាត់ បានអញ្ជើញមកបំពេញបុណ្យកុសលនៅវត្តសន្សំកុសល ក៏ដើម្បីឧទ្ទេសបុណ្យកុសលនេះជូនដល់វីរកងទ័ព ដែលបានពលីជីវិត ដើម្បីមាតុភូមិ ទឹកដី និងប្រជាជនកម្ពុជា សូមឲ្យវីរកងទ័ពពលីទាំងអស់ទៅកាន់សុគតិភព ទីបរមសុខ ដ៏ខ្ពង់ខ្ពស់ផងដែរ ជាពិសេសបុណ្យនាថ្ងៃនេះ ក៏សូមគោរពជូនពរដល់រាជរដ្ឋាភិបាល សម្រេចរាល់កិច្ចការងារធំកី្ត-តូចកី្ត ក៏សូមឲ្យជោគជ័យគ្រប់ភារកិច្ច ហើយម្យ៉ាងវិញទៀត ក៏សូមជូនបុណ្យកុសលនេះទៅដល់ប្រជាពលរដ្ឋកម្ពុរដ្ឋទាំងអស់ សូមឲ្យបងប្អូនប្រជាពលរដ្ឋបាននូវសេចកី្តសុខ រួចចាកផុតទុក្ខ និងធ្វើដំណើរនៅថ្ងៃបុណ្យភ្ជុំបិណ្ឌនេះ ទីជិតទីឆ្ងាយ ក៏សូមឲ្យមានសេចកី្តសុខសុវតិ្ថភាពគ្រប់ទីកន្លែង សូមបញ្ជាក់ផងដែរថា ពិធីបុណ្យកាន់បិណ្ឌ-ភ្ជុំបិណ្ឌ គឺជាពិធីបុណ្យ នឹករលឹកសាច់ញាតិដែលបានស្លាប់របស់ជនជាតិខ្មែរ ដែលកំណត់តាមប្រតិទិនពុទ្ធសាសនា ដែលប្រារព្ធឡើងរៀងរាល់ថ្ងៃ១រោច ដល់ថ្ងៃ១៥រោច ខែភទ្របទ ចន្លោះខែកញ្ញា និងខែតុលា ដែលជាពិធីបុណ្យ មានរយៈពេលវែងជាងគេរហូតដល់១៥ថ្ងៃ ជារៀងរាល់ឆ្នាំនៅពេលដល់ថ្ងៃ ខែ ដែលត្រូវប្រារព្ធពិធីបុណ្យភ្ជុំបិណ្ឌ គ្រប់បងប្អូនកូនចៅ សាច់ញាតិនៅទីជិត ឬទីឆ្ងាយ តែងតែធ្វើដំណើរទៅជួបជុំគ្នា ជាពិសេសឪពុកម្ដាយ នៅស្រុកកំណើត ដើម្បីរៀបចំម្ហូបអាហារ បាយសម្ល ចង្ហាន់យកទៅប្រគេនព្រះសង្ឃ ដែលគង់នៅវត្តអារាម ដើម្បីឧទ្ទិសកុសលផលបុណ្យជូនដល់ដួងវិញ្ញាណក្ខន្ធ ញាតិការទាំង៧សណ្តាន រួមមាន មាតា បិតា ជីដូន ជីតា បងប្អូនកូនចៅ គ្រូឧជ្ឈាយាចារ្យ បុព្វការីជន-បុព្វបុរសជាតិ និងបងប្អូនជនរួមជាតិទាំងឡាយ ដែលបានលាចាកលោកនេះទៅកាន់លោកខាងមុខ ហើយនោះសូមអញ្ជើញមកទទួលយកផល្លានិសង្ឃបានគ្រប់ៗគ្នា។ ដោយឡែកសម្រាប់ឱកាសនៃពិធីបុណ្យកាន់បិណ្ឌ ភ្ជុំបិណ្ឌ ឆ្នាំ២០២៥នេះ នឹងប្រព្រឹត្តទៅពីថ្ងៃ១រោច ដល់ថ្ងៃ១៥រោច ខែភទ្របទ ចាប់ពីថ្ងៃទី៨ ខែកញ្ញា ដល់ថ្ងៃទី២២ ខែតុលា ឆ្នាំ២០២៥ ពុទ្ធបរិស័ទនៅទូទាំងប្រទេស គោរពប្រតិបត្តិ ទំនៀមទំលាប់ ប្រកាន់ភ្ជាប់ ប្រពៃណី ព្រះពុទ្ធសាសនា ហើយតែងតែធ្វើបុណ្យធ្វើទាន នៅគ្រប់រដូវកាលនៃពិធីបុណ្យនីមួយៗ ៕អត្ថបទ រដ្ឋា

សម្ដេចធិបតី រាជរដ្ឋាភិបាលកំពុងអនុវត្តគ្រប់មធ្យោបាយដើម្បីជួយឱ្យយោធិនទាំង១៨រូបបានត្រលប់មកវិញ

ភ្នំពេញ ៖តាមរយៈសារពិសេសផ្ញើជូនជនរួមជាតិកម្ពុជា «ក្នុងឱកាសនៃពិធីបុណ្យភ្ជុំបិណ្ឌប្រពៃណីជាតិខ្មែរ» នៅថ្ងៃទី២១ កញ្ញា ២០២៥នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានបញ្ជាក់ជាថ្មីថា រាជរដ្ឋាភិបាលមិនដែលភ្លេចឡើយនូវយោធិនទាំង១៨រូប ដែលបច្ចុប្បន្នកំពុងស្ថិតនៅក្រោមការឃុំគ្រងដោយភាគីថៃ។ ខណៈរាជរដ្ឋាភិបាលកំពុងអនុវត្តគ្រប់មធ្យោបាយដើម្បីព្យាយាមជួយឱ្យពួកគាត់ធ្វើមាតុភូមិនិវត្ត និងជួបជុំគ្រួសារឱ្យបានឆាប់រហ័សជាទីបំផុត និងប្រកបដោយសុវត្ថិភាព។ បើតាមក្រសួងការពារជាតិកម្ពុជា គិតត្រឹមថ្ងៃទី២១ ខែកញ្ញានេះ គឺមានរយៈពេល ៥៤ ថ្ងៃហើយ ដែលវីរកងទ័ពកម្ពុជាចំនួន ១៨រូប ត្រូវបានចាប់ខ្លួន និងដាក់ឱ្យស្ថិតក្រោមការឃុំគ្រងរបស់យោធាថៃ។ កម្ពុជាបន្ត អំពាវនាវឱ្យភាគីថៃ ដោះលែងពួកគាត់ត្រឡប់មកវិញឱ្យបានឆាប់រហ័សជាទីបំផុត ដើម្បីឱ្យពួកគាត់អាចវិលត្រឡប់មកជួបជុំក្រុមគ្រួសាររបស់ពួកគាត់ និងប្រកបដោយសុខសុវត្ថិភាព ស្របតាមច្បាប់មនុស្សធម៌អន្តរជាតិ។រាជរដ្ឋាភិបាលកម្ពុជា បាននឹងកំពុងធ្វើការយ៉ាងសស្រាក់សស្រាំឥតឈប់ឈរ នូវគ្រប់យន្តការដោះស្រាយទាំងអស់លើករណីនេះ ដើម្បីឱ្យភាគីថៃ ដោះលែងកងកម្លាំងរបស់យើងទាំង១៨នាក់នោះ វិលត្រលប់មកវិញឱ្យបានឆាប់រហ័សជាទីបំផុត និងដោយសុខសុវត្ថិភាព។ រាជរដ្ឋាភិបាល ក្រសួងការពារជាតិ និងកងយោធពលខេមរភូមិន្ទ មិនដែលបោះបង់កងកម្លាំងរបស់យើងណាម្នាក់ចោលនោះឡើយ ទោះក្នុងកាលៈទេសៈណាក៏ដោយ។ក្នុងឱកាសភ្ជុំបិណ្ឌនេះ សម្ដេចធិបតី នាយករដ្ឋមន្រ្ដី បានកោតសរសើរ និងការដឹងគុណយ៉ាងជ្រាលជ្រៅបំផុតចំពោះបងប្អូនវីរកងទ័ព និងវីរនគរបាលដែលបានឃ្លាតចាកឆ្ងាយពីក្រុមគ្រួសារ និងស្រុកកំណើត ដើម្បីបម្រើ និងការពារជាតិមាតុភូមិនៅតាមខ្សែត្រៀមជួរមុខទាំងអស់។ដោយសារវីរភាពមិនអាចកាត់ថ្លៃបានរបស់បងប្អូនវីរកងទ័ព និងវីរនគរបាលគ្រប់រូប ទើបប្រជាជនខ្មែរយើងនៅទូទាំងប្រទេសអាចប្រារព្ធពិធីបុណ្យភ្ជុំបិណ្ឌនាពេលនេះបាន។

សម្ដេចធិបតី អំពាវនាវដល់ពលរដ្ឋគោរពច្បាប់ចរាចរណ៍ដើម្បីរក្សាសុវត្ថិភាពនៅតាមដងផ្លូវទាំងអស់គ្នា

ភ្នំពេញ ៖ តាមរយៈ សារពិសេសផ្ញើជូនជនរួមជាតិកម្ពុជា «ក្នុងឱកាសនៃពិធីបុណ្យភ្ជុំបិណ្ឌប្រពៃណីជាតិខ្មែរ នៅថ្ងៃអាទិត្យ ទី២១ កញ្ញា ២០២៥នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានអំពាវនាវដល់បងប្អូនប្រជាពលរដ្ឋទាំងអស់ប្រកាន់ខ្ជាប់នូវការគោរពច្បាប់ ជាពិសេសច្បាប់ចរាចរណ៍ផ្លូវគោកដើម្បីរក្សាសុវត្ថិភាពនៅតាមដងផ្លូវទាំងអស់គ្នា។ក្នុងឱកាសនៃពិធីបុណ្យភ្ជុំបិណ្ឌប្រពៃណីជាតិខ្មែរ ត្រូវនឹងថ្ងៃទី២២ ខែកញ្ញា ឆ្នាំ២០២៥នេះ សម្ដេចធិបតី នាយករដ្ឋមន្រ្ដី ចូលរួមជាមួយបងប្អូនជនរួមជាតិទាំងអស់ទាំងក្នុងប្រទេស និងក្រៅប្រទេស ប្រារព្ធពិធីបុណ្យភ្ជុំបិណ្ឌប្រពៃណីជាតិខ្មែរប្រកបដោយសេរីសួស្ដី និងជ័យមង្គល។ សម្ដេចធិបតីបានថ្លែងថា ពិធីបុណ្យភ្ជុំបិណ្ឌ គឺជាពិធីបុណ្យប្រពៃណីជាតិខ្មែរដែលតែងតែប្រារព្ធជារៀងរាល់ឆ្នាំតាំងពីបុរាណកាលមក សម្រាប់ប្រជាពលរដ្ឋខ្មែរធ្វើបុណ្យ សាងកុសលដើម្បីឧទ្ទិសជូនបុព្វការីជន និងអ្នកមានគុណ ព្រមទាំងជាឱកាសដ៏ថ្លៃថ្លាសម្រាប់ជួបជុំគ្រួសារ បងប្អូនញាតិមិត្តិជិតឆ្ងាយ។ សម្ដេចធិបតី នាយករដ្ឋមន្រ្ដី បានវាយតម្លៃខ្ពស់ចំពោះមន្រ្ដីរាជការគ្រប់លំដាក់ថ្នាក់ កម្លាំងសមត្ថកិច្ច និងអ្នកពាក់ព័ន្ធទាំអស់ដែលនៅប្រចាំការបម្រើការពារសុខសុវត្ថិភាពជូនបងប្អូនប្រជាពលរដ្ឋនៅក្នុងអំឡុងនៃការប្រារព្ធពិធីបុណ្យភ្ជុំបិណ្ឌនេះ។ បើតាមរបាយការណ៍របស់ស្នងការនគរបាលជាតិបានឱ្យដឹងថា រយៈពេល៧ថ្ងៃគិតចាប់តាំងពីថ្ងៃបុណ្យកាន់បិណ្ឌទី១ដល់បិណ្ឌទី៧ ពោលគឺចាប់ពីថ្ងៃទី៨ ដល់ថ្ងៃទី១៤ ខែកញ្ញានេះនៅទូទាំងប្រទេសកម្ពុជា គ្រោះថ្នាក់ចរាចរណ៍កើតឡើងសរុប៤៥ករណីបណ្តាលឱ្យមានមនុស្សស្លាប់៣៣នាក់ និងរងរបួសធ្ងន់ស្រាលចំនួន៥៤នាក់។ ដោយឡែកពីថ្ងៃទី១៨ខែកញ្ញាដល់ថ្ងៃទី១៩ ខែកញ្ញានេះនៅទូទាំងប្រទេសមានករណីគ្រោះថ្នាក់កើតឡើង១៤ករណី (យប់៨ករណី) បណ្ដាលឱ្យមានមនុស្សស្លាប់១២នាក់ និងរបួស ធ្ងន់ស្រាលចំនួន ២០ នាក់៕

សម្តេចរដ្ឋសភាធិបតី ឃួន សុដារី និងប្រធានគណៈប្រតិភូអាយប៉ា អញ្ជើញចុះហត្ថលេខាលើរបាយការណ៍លទ្ធផលមហាសន្និបាតលើកទី៤៦

នៅរសៀលថ្ងៃទី២០ ខែកញ្ញា ឆ្នាំ២០២៥ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា បានដឹកនាំគណៈប្រតិភូសភាកម្ពុជា ចូលរួមកិច្ចប្រជុំពេញអង្គលើកទី២ នៃមហាសន្និបាតអន្តរសភាអាស៊ានលើកទី៤៦ ដែលសភាប្រទេសម៉ាឡេស៊ីធ្វើជាម្ចាស់ផ្ទះ នៅក្នុងទីក្រុងគូឡាឡាំពួ។ កិច្ចប្រជុំពេញអង្គលើកទី២ បានស្តាប់របាយការណ៍ លទ្ធផលការងារដែលគណៈកម្មាធិការនានា របស់អាយប៉ាលើកទី៤៦ បានប្រជុំពិភាក្សា អនុម័តសេចក្តីព្រាងសេចក្តីសម្រេចចំនួន៤៣ ក្នុងនោះមាន គណៈកម្មាធិការនយោបាយចំនួន៩ ក្នុងចំណោមសេចក្តីសម្រេចទំាង៩នេះ សភាកម្ពុជាអ្នកផ្តួចផ្តើមសេចក្តីស្នើចំនួន១និងសហគំាទ្រចំនួន១, គណៈកម្មាធិការសេដ្ឋកិច្ចបានអនុម័តសេចក្ដីសម្រេចចំនួន៧ ក្នុងនោះសភាកម្ពុជាជាសហគំាទ្រចំនួន៣, គណៈកម្មាធិការសង្គមកិច្ចចំនួន៥ ក្នុងនោះ សេចក្តីសម្រេចដែលសភាកម្ពុជាជាសហគំាទ្រចំនួន២, គណៈកម្មាធិការសមាជិកសភាស្ត្រីអាយប៉ាចំនួន៣ សភាកម្ពុជាធ្វើជាសហគំាទ្រចំនួន៣, គណៈកម្មាធិការសមាជិកសភាវ័យក្មេងអាយប៉ាចំនួន៣ សេចក្តីសម្រេចដែលសភាកម្ពុជាជាសហគំទ្រចំនួន២ និងគណៈកម្មាធិការរៀបចំចំនួន១៥។សូមជម្រាបថានៅក្នុងសេចក្តីព្រាងសេចក្តីសម្រេចទំាង៤៣ ដែលបានអនុម័តនាពេលនេះ មានសេចក្តីព្រាងសេចក្តីសម្រេចចំនួន៣ ដែលសភាកម្ពុជាបានផ្តួចផ្តើមឡើង មានសេចក្តីសម្រេចស្តីពី ការជំរុញគំនិតផ្ដួចផ្ដើមសន្តិភាព ដើម្បីមនុស្សជាតិ និងភពផែនដី សេចក្ដីសម្រេចស្តីពីការបង្កើតវេទិកាថ្នាក់ដឹកនាំអាយប៉ា និង សេចក្ដីព្រាងសេចក្ដីសម្រេចស្តីពីការបង្កើតភាពជាដៃគូអាយប៉ាដើម្បីលើកកម្ពស់ការចូលរួមរបស់អាយប៉ាជាមួយដៃគូពាក់ព័ន្ធ សម្រាប់អាស៊ានប្រកបដោយបរិយាបន្ន និងចីរភាព។នៅក្នុងកិច្ចពិភាក្សាការងាររវាងសភាសង្កេតការណ៍អាយប៉ា និងអាយប៉ាក្រោមប្រធានបទស្ដីពី “មជ្ឈភាពអាស៊ាន៖ ការកសាងនិម្មាបនកម្មតំបន់ប្រកបដោយបរិយាបន្នដើម្បីអនាគតមានចីរភាព” អាយប៉ាបានជួបសន្ទនាជាមួយសភាសង្កេតការណ៍ចំនួន១៦ប្រទេស។ក្នុងក្របខណ្ឌនីតិប្បញ្ញត្តិ អាយប៉ាបានរៀបចំមហាសន្និបាតប្រចាំឆ្នាំជាទៀងទាត់ ដើម្បីពង្រឹងវិស័យការទូតសភាក្នុងការប្រមូលផ្តុំនូវមតិ យោបល់ ទស្សនៈតំណាងពលរដ្ឋ ក្នុងការគំាទ្រនិងរួមសហប្រតិបត្តិការយ៉ាងជិតស្និទ្ធជាមួយអាស៊ានដើម្បីជំរុញឱ្យសម្រេចបាននូវចក្ខុវិស័យសហគមន៍អាស៊ាន និងការរីកចម្រើនប្រកបដោយចីរភាព វិបុលភាព និងបរិយាបន្នជូនប្រជាពលរដ្ឋនៅក្នុងតំបន់និងអន្តរជាតិ។ជាការកត់សម្គាល់នៅក្នុងការចូលរួមមហាសន្និបាតអាយប៉ាលើកទី៤៦ ចាប់ពីថ្ងៃទី១៧ ខែកញ្ញាមកដល់ថ្ងៃនេះ គណៈប្រតិភូសភាកម្ពុជា បានចូលរួមវេទិកានិងកិច្ចប្រជុំពាក់ព័ន្ធទំាងអស់នៃមហាសន្និបាត។ នៅក្នុងនោះ សម្តេចប្រធានរដ្ឋសភា ក៏បានឆ្លៀតឱកាសជួបពិភាក្សាការងារជាមួយបណ្តាគណៈប្រតិប្រទេសជាមិត្តមួយចំនួនទៀត ដើម្បីពង្រឹងពង្រីកចំណងមិត្តភាព កិច្ចសហប្រតិបត្តិការទំាងក្របខណ្ឌទ្វេភាគីនិងពហុភាគី ក្នុងនាំមកនូវយកផលប្រយោជន៍ជូនប្រទេសជាតិ ទំាងការងាររដ្ឋសភា វិស័យសង្គមកិច្ច សេដ្ឋកិច្ច ពាណិជ្ជកម្ម អប់រំ វប្បធម៌ ទេសចរណ៍ជាពិសេសការភ្ជាប់ទំនាក់ទំនងប្រជាជននិងប្រជាជន។មុនបញ្ចប់កិច្ចប្រជុំ សម្តេចរដ្ឋសភាធិបតី ឃួន សុដារី ប្រធានរដ្ឋសភាកម្ពុជា រួមជាមួយប្រធានគណៈប្រតិភូសភាសមាជិកអាយប៉ា បានអញ្ជើញចុះហត្ថលេខាលើរបាយការណ៍បូកសរុបលទ្ធផលមហាសន្និបាតអាយប៉ាលើកទី៤៦ ប្រកបដោយផ្លែផ្កានិងអត្ថន័យ នៅក្នុងការលើកកម្ពស់ការទូតសភា ពង្រឹងកិច្ចសហប្រតិបត្តិការអាយប៉ានិងអាស៊ាន ដើម្បីសម្រេចចក្ខុវិស័យអាស៊ាន ដោយយកប្រជាពលរដ្ឋជាស្នូល៕

ហូលីវីតចិន គ្រោងផលិតភាពយន្តភាគខ្លីៗ និងអភិវឌ្ឍទេសចរណ៍ជាមួយបច្ចេកវិទ្យាទំនើប នៅកម្ពុជា

នាព្រឹកថ្ងៃទី២០ ខែកញ្ញា ឆ្នាំ២០២៥ នេះ ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ បានអនុញ្ញាតជូនលោក Johnny Mo ប្រធានក្រុមប្រឹក្សាភិបាលសមាគមពាណិជ្ជកម្មអន្តរជាតិកម្ពុជា ដឹកនាំផលិតករភាពយន្តហូលីវូតចិន ពីស្ទូឌីយូ Heng Dian World Studios ទីក្រុង Dong Yang នៃខេត្ត Zhenjiang និងសហការី ចូលជួបសម្តែងការគួរសម និងពិភាក្សាការងារ ព្រមទាំងស្នើសុំអនុសាសន៍លើគម្រោងអភិវឌ្ឍទេសចរណ៍ និងថតភាពយន្តទេសចរណ៍នៅប្រទេសកម្ពុជា នាទីស្តីការក្រសួងទេសចរណ៍។ ក្នុងជំនួបផ្តោតលើគម្រោងដ៏មានសារៈសំខាន់ និងអនុវត្តជាក់ស្តែងដល់វិស័យទេសចរណ៍កម្ពុជា ឯកឧត្តមរដ្ឋមន្រ្តី បានថ្លែងអំណរគុណ និងកោតសរសើរវាយតម្លៃខ្ពស់លើគំនិតផ្តួចផ្តើមប្រកបដោយភាពច្នៃប្រឌិតខ្ពស់ ទាក់ទាញ និងស្របតាមនិន្នាការថ្មីៗរបស់ប្រជាជន និងយុវជនចិនដែលកំពុងពេញនិយមធ្វើដំណើរទេសចរណ៍តាមរយៈរឿងភាគខ្លីៗ និងគោលដៅទេសចរណ៍ផ្សារភ្ជាប់ធម្មជាតិ និងបច្ចេកវិទ្យាទំនើបជាមួយបញ្ញាសប្បនិមិត្ត។ ទន្ទឹមនឹងដែរ ឯកឧត្តមរដ្ឋមន្រ្តី ក៏បានគាំទ្រ និងផ្តល់អនុសាសន៍បន្ថែមលើគម្រោងផ្សព្វផ្សាយសក្តានុពលទេសចរណ៍ និងកាលានុវត្តវិនិយោគរបស់សមាគម និងការថតវីដេអូទេសចរណ៍ដល់ប្រជាជនចិន និងពិភពលោក ដោយត្រូវឆ្លុះបញ្ចាំងពីកត្តាសុខសន្តិភាព សុវត្ថិភាពដល់ភ្ញៀវទេសចរ និងអ្នកដំណើរ សណ្តាប់ធ្នាប់សង្គមល្អប្រសើរ ការអភិវឌ្ឍលើគ្រប់វិស័យរបស់កម្ពុជានាពេលបច្ចុប្បន្ន រួមទាំងយន្តការលើកទឹកចិត្ត និងការផ្តល់អាទិភាពដល់វិនិយោគិនបរទេសនៅកម្ពុជា។គូភាគី បានឯកភាពអនុវត្តកិច្ចសហប្រតិបត្តិជាក់ស្តែង និងចេញជាលទ្ធផលលើគម្រោង ដោយចាប់ផ្តើមលើទស្សនកិច្ចសិក្សាឈ្វេងយល់ពីការផលិតភាពយន្តទេសចរណ៍ ព្រមទាំងការរៀបចំវេទិកាផ្សព្វផ្សាយសក្តានុពលទេសចរណ៍ឱ្យបានទូលំទូលាយ និងជាប្រចាំទាំងនៅប្រទេសចិន និងកម្ពុជា។ សូមបញ្ជាក់ជូនថា Hengdian World Studios ជាកន្លែងផលិតភាពយន្ត និងកម្មវិធីទូរទស្សន៍ដ៏ធំមួយដែរក្នុងពិភពលោក ស្ថិតនៅទីក្រុង Hengdian តំបន់ Dongyang ខេត្ត Zhejiang សាធារណរដ្ឋប្រជាមានិតចិន ដែលត្រូវគេហៅថា ហូលីវូតចិន៕

សភាសហភាពអឺរ៉ុប កំពុងតាមដានដោយយកចិត្តទុកដាក់ការអនុវត្តបទឈប់បាញ់

សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា នៅព្រឹកថ្ងៃទី២០ ខែកញ្ញា ឆ្នាំ២០២៥ បានជួបពិភាក្សាការងារជាមួយ ឯកឧត្តម វ៉ូកធឺ បេក គី (Wouter Beke) ប្រធានគណៈប្រតិភូសភាអឺរ៉ុប និងជា សមាជិកសភាអឺរ៉ុប នៅក្នុងឱកាសចូលរួមមហាសន្និបាតអាយប៉ាលើកទី៤៦ នៅទីក្រុងគូឡាឡំាពួ ប្រទេសម៉ាឡេស៊ី។ នៅក្នុងឱកាសនោះ តាងនាមប្រជាជនកម្ពុជាចំនួន ១៧ លាននាក់ សម្តេចរដ្ឋសភាធិបតី បានថ្លែងអំណរគុណយ៉ាងជ្រាលជ្រៅជូនចំពោះសភាអឺរ៉ុប ដែលបានចេញនូវសេចក្ដីថ្លែងការណ៍គាំទ្រកិច្ចព្រមព្រៀងបទឈប់បាញ់កម្ពុជា-ថៃ និងបានតាមដានដោយយកចិត្តទុកដាក់លើការអនុវត្តកិច្ចព្រមព្រៀងបទឈប់បាញ់ ចាប់តាំងពីថ្ងៃទី២៨ ខែកក្កដា ឆ្នាំ២០២៥ មក។សម្តេចបានគូសបញ្ជាក់ថា កម្ពុជាបានគោរពយ៉ាងម៉ឺងម៉ាត់ចំពោះកិច្ចព្រមព្រៀងបទឈប់បាញ់ ដែលបានសម្រេចបន្ថែមនៅក្នុងកិច្ចប្រជុំពិសេសនៃគណៈកម្មាធិការព្រំដែនទូទៅ កាលពីថ្ងៃទី៧ ខែសីហា ឆ្នាំ២០២៥ និងថ្ងៃទី១០ ខែកញ្ញា ឆ្នាំ២០២៥ កន្លងទៅនេះ។ កម្ពុជាប្តេជ្ញាចិត្តឥតងាករេ ក្នុងការដោះស្រាយជម្លោះដោយសន្តិវិធី ដោយផ្អែកតាមច្បាប់អន្តរជាតិ គោលការណ៍ធម្មនុញ្ញអង្គការសហប្រជាជាតិ សន្ធិសញ្ញាមិត្តភាព និងកិច្ចសហប្រតិបត្តិការអាស៊ីអាគ្នេយ៍ ។ជាមួយគ្នានេះ សម្តេចប្រធានរដ្ឋសភា និង ឯកឧត្តម វ៉ូកធឺ បេកគី បានរំលឹកពីខួបអនុស្សាវរីយ៍លើកទី៣១ នៃទំនាក់ទំនងការទូតរវាងកម្ពុជា និងសភាអឺរ៉ុប។ អស់រយៈពេលជាង៣ទសវត្សរ៍កន្លងមកនេះ ទំនាក់ទំនង ភាពជាដៃគូកម្ពុជា អឺរ៉ុប មានភាពរឹងមាំ និងរីកចម្រើន រួមនឹងកិច្ចសហប្រតិបត្តិការដ៏ច្រើនស្ទើរតែគ្រប់វិស័យរួមមាន៖ ពាណិជ្ជកម្ម វិនិយោគ កសិកម្ម ថាមពល អប់រំ ការអភិវឌ្ឍធនធានមនុស្ស ទេសចរណ៍ បច្ចេកវិទ្យា ការតភ្ជាប់ ហេដ្ឋារចនាសម្ព័ន្ធ និងសន្តិសុខ។ឯកឧត្តម វ៉ូកធឺ បេកគី ថ្លែងអំណរគុណសម្តេចប្រធានរដ្ឋសភា ដែលបានផ្តល់ព័ត៌មាន ពីជម្លោះព្រំដែនកម្ពុជានិងថៃ។ សភាសហភាពអឺរ៉ុបនឹងតាមដានករណីនេះដោយយកចិត្តទុកដាក់។សម្តេចរដ្ឋសភាធិបតី និង ប្រធានគណៈប្រតិភូសភាអឺរ៉ុប ដែលទទួលបន្ទុកលើការងារ ទំនាក់ទំនងជាមួយបណ្តាប្រទេសអាស៊ីអាគ្នេយ៍ បានគូសបញ្ជាក់ថាទំនុកចិត្តនិងការជឿជាក់គ្នាទៅវិញទៅមកជាធ្លុងមួយ ជាកាតាលីករ កសាងពិភពលោកមួយប្រកបដោយបរិយាន្ន និងចីរភាព។ ការពង្រឹងកិច្ចការការទូតសភា និងកិច្ចសហប្រតិបត្តិការពាក់ព័ន្ធ ដើរតួនាទីកាន់តែសំខាន់ឡើង ក្នុងការកសាងទំនុកចិត្ត ពង្រឹងកិច្ចសហប្រតិបត្តិការ និងការឯកភាពគ្នា ដើម្បីជំរុញការផ្លាស់ប្តូរវិជ្ជមាន និងស្វែងរកដំណោះស្រាយរួម ដែលមានលក្ខណៈគ្រប់ជ្រុងជ្រោយ៕

ផ្ទះអតីតយុទ្ធជន ៣៥ខ្នង ស្ថិតនៅឃុំក្រយា ស្រុកសន្ទុក ខេត្តកំពង់ធំ រងផលប៉ះពាល់ដោយជំនន់ទឹកភ្លៀង

ផ្ទះចំនួន ៣៥ ខ្នង របស់បងប្អូនអតីតយុទ្ធជន នៅលើដីសម្បទានសង្គមកិច្ច ស្ថិតនៅឃុំក្រយា ស្រុកសន្ទុក ខេត្តកំពង់ធំ ត្រូវបានរងផលប៉ះពាល់ដោយជំនន់ទឹកភ្លៀង ។ ភ្លៀងបានធ្លាក់ជាប់ៗគ្នាក្នុងរយៈពេល ៤ថ្ងៃ បួនយប់ កន្លងមកនេះ បណ្ដាលឱ្យផ្ទះក្រុមគ្រួសារអតីតយុទ្ធជន ដែលកំពុងរស់នៅលើដីសម្បទានសង្គមកិច្ច ស្ថិតនៅឃុំក្រយា ស្រុកសន្ទុក ខេត្តកំពង់ធំ ត្រូវបានលិចលង់រងផលប៉ះពាល់ ដោយសារជំនន់ទឹកភ្លៀង មិនអាចហូរតាមប្រព័ន្ធលូ និងប្រឡាយ ដែលមានស្រាប់ទាន់ពេលវេលា បណ្ដាលឲ្យផ្ទះក្រុមគ្រួសារតីតយុទ្ធជនចំនួន ៣៥ខ្នង រងផលប៉ះពាល់ផលដំណាំផ្សេងៗ ដោយជំនន់ទឹកភ្លៀងនេះ ។ភ្លាមៗបន្ទាប់ពីទទួលបានព័ត៌មាននេះ នៅព្រឹកថ្ងៃទី២០ ខែកញ្ញា ឆ្នាំ២០២៥ ឧត្តម សេនីយ៍ទោ សោម ស៊ុន មេបញ្ជាការ តំបន់ប្រតិបត្តិការសឹករង និងជាប្រធានគណៈកម្មការសមាគមអតីតយុទ្ធជនកម្ពុជា ខេត្តកំពង់ធំ បានដឹកនាំសហការី ចុះត្រួតពិនិត្យ និងជួបសំណេះសំណាលជាមួយក្រុមគ្រួសារអតីតយុទ្ធជនដែលរងផលប៉ះពាល់ដោយជំនន់ទឹកភ្លៀង ដើម្បីរកវិធានការរំដោះទឹកចេញឲ្យនបាទាន់ពេលវេលាកុំឲ្យបន្តលិចលង់ បន្តទៅទៀត។ ឧត្តមសេនីយ៍ទោ សោម ស៊ុន បានបញ្ជាក់ថា កន្លងមក ផ្ទះចំនួន ២០៦ខ្នង ដែលជាអំណោយដ៏ថ្លៃថ្លារបស់សម្ដេចតេជោ ហ៊ុន សែន និងសម្ដេចមហាបវរធិបតី ហ៊ុន ម៉ាណែត ត្រូវបានសាងសង់ឡើង នៅលើដីសម្បទានសង្គមកិច្ច សម្រាប់ផ្ដល់ជូនដល់ក្រុមគ្រួសារអតីតយុទ្ធជន ដែលគ្មានដីគ្មានផ្ទះ នៅឃុំក្រយា ស្រុកសន្ទុក ខេត្តកំពង់ធំ ក្នុងនោះផ្ទះចំនួន ១៤១ខ្នង និងដីចំនួនមួយហិកតាកន្លះ ក្នុងមួយគ្រួសារ ត្រូវបានសាងសង់ប្រគល់ជូនអតីតយុទ្ធជន នៅឆ្នាំ២០២១ ។ ដោយឡែកផ្ទះចំនួន ៦៥ខ្នងទៀត និងដីមួយហិកតា ក្នុងមួយគ្រួសារ ត្រូវបានសាងសង់ប្រគល់ជូនក្រុមគ្រួសារតីតយុទ្ធជននៅដើមឆ្នាំ ២០២៥ កន្លងទៅនេះ។ ឧត្តមសេនីយ៍ទោ សោម ស៊ុន បានបញ្ជាក់បន្ថែមទៀតថា ជំនន់ទឹកភ្លៀងដែលកំពុងជន់លិចធ្វើឲ្យរងផលប៉ះពាល់ដំណាំ បន្លែបង្ការផ្សេងៗ និងការរស់នៅរបស់បងប្អូនអតីតយុទ្ធជននៅពេលនេះ មានចំនួន ៣៥ខ្នងផ្ទះ ក្នុងនោះមានចំនួន ១៨ខ្នងផ្ទះ រងផលប៉ះពាល់ខ្លាំង និងចំនួន ១៧ខ្នងផ្ទះទៀត រងផលប៉ះពាល់មធ្យម ដែលបានបណ្ដាលឲ្យខូចខាតផលដំណាំរបស់ពួកគាត់ ។ ដេីម្បីជួយសម្រាលដល់ការលំបាកនេះ ឧត្ដមសេនីយ៍ សោម ស៊ុន ប្រធានសមាគមបតីតយុទ្ធជនកម្ពុជា ខេត្តកំពង់ធំ ក៏បាននាំយកនូវអំណោយមនុស្សធម៌របស់សម្ដេចមហាបវរធិបតី ហ៊ុន ម៉ាណែត និងលោកជំទាវ ឧបត្ថម្ភជូនដល់ក្រុមគ្រួសារអតីតយុទ្ធជនមួយចំនួន ដែលកំពុងជួបការលំបាកដោយគ្រោះទឹកជំនន់នេះផងដែរ។ ឧត្តមសេនីយ៍ទោ សោម ស៊ុន បានសន្យាថា និងរាយការណ៍ជូនឯកឧត្ដមអភិបាលខេត្ត ប្រធានកិត្តិយសគណៈកម្មាការសមាគមអតីតយុទ្ធជនកម្ពុជា ខេត្តកំពង់ធំ និងសំណូមពរដល់ស្ថាប័ន មន្ទីរ អង្គភាព ដែលមានការពាក់ព័ន្ធ ដើម្បីសម្របសម្រួលជួយកាយប្រឡាយបន្ថែម តាមស្ថានភាពជាក់ស្ដែង ដើម្បីរំដោះទឹកឱ្យហូរបានលឿន ជៀសវាងរងផលប៉ះពាល់បន្ថែមទៀត ដល់ផលដំណាំ និងការរស់នៅប្រចាំថ្ងៃរបស់បងប្អូនអតីតយុទ្ធជន ។ ព្រមជាមួយនោះក៏បានសំណូមពរដល់ក្រុមគ្រួសារអតីតយុទ្ធជន ត្រូវខិតខំថែរក្សាសុខភាព ក្នុងការហូបស្អាត រស់នៅស្អាត និងប្រុងប្រយ័ត្នក្មេងតូចៗ ដែលងាយបណ្ដាលឲ្យរងគ្រោះថ្នាក់ដោយជំនន់ទឹកភ្លៀងនេះ៕

បណ្ដាញសង្គម

ព័ត៌មានថ្មីៗ

ពលរដ្ឋអាល្លឺម៉ង់កាន់តែច្រើនចាប់អារម្មណ៍ទិញរថយន្តអគ្គិសនី(EVs) ដោយសារតែតម្លៃប្រេងខ្ពស់

អ្នកគាំទ្រក្រុមហ៊ូទីរាប់ពាន់នាក់នៅទីក្រុងសាណា បានប្រមូលផ្តុំគ្នាក្នុងសាមគ្គីភាពជាមួយអ៊ីរ៉ង់

អង្គការWHO ព្រមានអំពីការវាយប្រហារលើមណ្ឌលសុខភាពអ៊ីរ៉ង់ និងការគំរាមកំហែងក្នុងតំបន់

មន្ទីរបញ្ចកោណ៖ កងទ័ពអាមេរិកជាង៣៦០នាក់ រងរបួសក្នុងសង្គ្រាមជាមួយអ៊ីរ៉ង់

យោធាអ៊ីស្រាអែលនិយាយថា ខ្លួនកំពុងវាយប្រហារទីតាំងក្រុមហេសបូឡា នៅទីក្រុងបេរូត

អាហ្វហ្គានីស្ថាន រងការវាយប្រហារដោយរញ្ជួយដីកម្រិត ៥,៩ រ៉ិចទ័រ បណ្តាលឲ្យមនុស្សមួយចំនួនស្លាប់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877