នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចាត់សហការីនាំយកអំណោយមនុស្សធម៌សម្រាលទុក្ខលំបាក ជូនលោកតាលោកយាយចាស់ជរាគ្មានទីពឹងនៅក្រុងច្បារមន ខេត្តកំពង់ស្ពឺ
កម្ពុជាបន្តស្នើទៅថៃឱ្យរៀបចំកិច្ចប្រជុំពិសេសបន្ទាន់ JBC និងជំរុញឱ្យបន្តអនុវត្តការងារនៅលើដីជាក់ស្តែង
គណៈកម្មការគ្រប់គ្រងល្បែងពាណិជ្ជកម្មកម្ពុជានឹងចាត់វិធានការ​តាមផ្លូវច្បាប់ចំពោះម្ចាស់កាស៊ីណូផ្តល់ទីតាំងឱ្យក្រុមឧក្រិដ្ឋជនប្រព្រឹត្តបទល្មើស Online Scams
សម្ដេចធិបតី នាយករដ្ឋមន្ត្រី អញ្ជើញចូលរួមកិច្ចប្រជុំចង្អៀតជាមួយ ប្រធានាធិបតីបារាំង, អគ្គនាយក WHO និងមេដឹកនាំប្រទេសមួយចំនួនទៀត

ព័ត៌មានជាតិ

ប្រធានក្រុមការងាររាជរដ្ឋាភិបាលចុះខេត្តកំពង់ឆ្នាំង និងថ្នាក់ដឹកនាំមន្ត្រីរាជការ កាន់បិណ្ឌវេនទី១២ នៅវត្តត្រពាំងស្នោ ឧទ្ទិសកុសលដល់វីរកងទ័ព ដែលពលីជីវិត​ក្នុង​បុព្វ​ហេតុ​ការពារ​បូរណភាពទឹកដី

2025/09/19 01:08:14 pm        150
Facebook Telegram Linkin
កំពង់ឆ្នាំង៖ ឯកឧត្តមបណ្ឌិតសភាចារ្យ អ៊ុក រ៉ាប៊ុន ប្រធានក្រុម​ការងារ​រាជ​រដ្ឋាភិបាលចុះ​ខេ​ត្ត​កំពង់​ឆ្នាំង​, ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង និងឯកឧត្តម​លោក​ជំទាវ​ជា​ក្រុម​ការងារ​ជាតិ ​ក្រោមជាតិ និងមន្ត្រីរាជការជុំវិញខេត្ត​ ព្រមទាំងប្រជាពុទ្ធបរិស័ទ្ធជិតឆ្ងាយនៅថ្ងៃទី១៩ ខែ​កញ្ញា ​ឆ្នាំ២០២៥នេះ បានអញ្ជើញចូលរួមកាន់បិណ្ឌវេនទី១២ នៅវត្តត្រពាំងស្នោ ឃុំ រលាប្អៀរ ស្រុក​រលាប្អៀរ ខេត្តកំពង់ឆ្នាំង ដើម្បីឧទ្ទិសកុសលផលបុណ្យ ជូនដល់ដួងវិញ្ញាណក្ខន្ធ ដល់​កម្មាភិបាល យុទ្ធជន ដែលបានពលីជីវិត ក្នុងបុព្វហេតុការពារជាតិមាតុភូមិ ពិសេសវីរកងទ័ព ដែល​បាន​ពលីជីវិត ក្នុងបុព្វហេតុការពារជាតិ ការពារទឹកដី ពីចោរសៀមឈ្លានពាន។ក្នុង​ពិធីកាន់បិណ្ឌវេនទី១២នេះ ថ្នាក់ដឹកនាំ ព្រះសង្ឃ គណៈកម្មការអាចារ្យវត្ត និង​ពុទ្ធ​បរិស័ទ​ចំណុះជើ​ង​វត្តត្រពាំងស្នោ បានរៀបចំពិធីសូត្រមន្ត ជាមួយគ្នានោះដែរ ឯកឧត្តមបណ្ឌិត អ៊ុក រ៉ាប៊ុន និង​អ្នកចូលរួមទាំងអស់បានអុចទៀនធូបថ្វាយគ្រឿងសក្ការៈបូជាព្រះ រាប់បាត្រ បង្សុកូល ដើម្បី​ឧទ្ទិស​កុសលផលបុណ្យ ជូនដល់ដួងវិញ្ញាណក្ខន្ធ ចំពោះមាតាបិតា ជីដូនជីតា និង​ញាតិ​កា​ទាំង​៧​សណ្តាន ដែលបានចែកឋានទៅកាន់បរលោកខាងមុខតាមពិធីព្រះពុទ្ធសាសនា។ ជាមួយគ្នានោះ ថ្នាក់​ដឹកនាំ ក្រុមការងារ និងពុទ្ធបរិស័ទ ក៏បានឧទ្ទិសផលបុណ្យជូនដួងវិញ្ញាណក្ខន្ធ ដល់​កម្មា​ភិបាល យុទ្ធជនដែលបានពលីជីវិតក្នុងបុព្វហេតុការពារជាតិមាតុភូមិ ពិសេសវីរកងទ័ព ដែល​បាន​ពលី​ជីវិត ក្នុងបុព្វហេតុការពារជាតិ ការពារទឹកដី ពីចោរសៀមឈ្លានពាន រួមនិង​សុំ​សេចក្តី​សុខ​ចម្រើន​ ដល់បងប្អូនប្រជាពលរដ្ឋនៅតាមព្រំដែន និងប្រទេសជាតិទាំងមូលផងដែរ។ក្រោយ​ចប់​កម្មវិធីតាមបែបសាសនា ឯកឧត្តមបណ្ឌិតសភាចារ្យ អ៊ុក រ៉ាប៊ុន ប្រធានក្រុម​ការងារ​រាជ​រដ្ឋាភិបាល​ចុះខេត្តកំពង់ឆ្នាំង, ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង និងឯកឧត្តម​លោក​ជំទាវ​ជាក្រុមការងារជាតិ ក្រោមជាតិ និងមន្ត្រីរាជការជុំវិញខេត្ត ព្រមទាំងប្រជាពុទ្ធបរិស័ទ្ធ ក៏បាន​វេរប្រគេននូវទេយ្យទាន ទេយ្យវត្ថុ គ្រឿងឧបភោគ-បរិភោគ និងបច្ច័យដល់ចៅអធិការវត្ត ដើមី្ប​បន្តកសាងសមិទ្ធផលនានា នៅក្នុងទីអារាមមួយនេះបន្ថែមទៀត៕ កាំង ហុងវាស្នា 

អភិបាលខណ្ឌ៧មករា ជួបសំណេះសំណាលមន្ត្រី និងប្រជាការពារ ក្នុងឱកាសបុណ្យភ្ជុំបិណ្ឌ

2025/09/19 01:03:41 pm        102
Facebook Telegram Linkin
ភ្នំពេញ ៖ នាព្រឹកថ្ងៃទី១៩ ខែកញ្ញា ឆ្នាំ២០២៥នេះ រដ្ឋបាលខណ្ឌ៧មករា ក្រោមវត្តមានលោក សោម សុវណ្ណ ប្រធានក្រុមប្រឹក្សាខណ្ឌ៧មករា , លោក ថេង សុថុល អភិបាលខណ្ឌ៧មករា បានសំណេះសំណាលជាមួយមន្ដ្រី និងប្រជាការពារទូទាំងខណ្ឌ ក្នុងឱកាសបុណ្យភ្ជុំបិណ្ឌ ។ក្នុងឱកាសនោះលោក សោម សុវណ្ណ បានមានប្រសាសន៍ជូនពរដល់បងប្អូនមន្ត្រី និងប្រជាការពារនៅទូទាំងខណ្ឌ សូមឱ្យជួបតែភាពសុខសប្បាយ ក្នុងដំណើរទៅស្រុកកំណើត ទាំងនៅទីជិត និងទីឆ្ងាយ ពិសេសនោះ គឺការបើកបរគោរពច្បាប់ ឱ្យបានខ្ជាប់ខ្ជួន ដើម្បីសុវត្ថិភាពខ្លួនឯង និងក្រុមគ្រួសារផងដែរ ។ លោក ថេង សុថុល អភិបាលខណ្ឌ៧មករា បានលើកឡើងដែរថា មន្ត្រីរដ្ឋបាលខណ្ឌ ក៏ដូចជាបងប្អូនប្រជាការពារ តែងតែសស្រាក់សស្រាំណាស់ជាមួយការខិតខំបំពេញភារកិច្ច និងកិច្ចការងារក្នុងដែនរបស់ខ្លួន ដើម្បីបម្រើប្រជាពលរដ្ឋ ដូច្នោះហើយក្នុងនាមថ្នាក់ដឹកនាំខណ្ឌ គឺចាំបាច់ត្រូវគិតគូរជាមួយបងប្អូនតាមរយៈការឧបត្ថម្ភ ជាភេសជ្ជៈ និងលុយកាក់ បន្តិចបន្តួច សម្រាប់ ឱ្យបងប្អូនអាចយកទៅប្រើប្រាស់ ក្នុងរដូវកាលបុណ្យទាននេះ ។ សូមបញ្ជាក់ថា លោកអភិបាលខណ្ឌបានឧបត្ថម្ភមន្ត្រីសាលាខណ្ឌ និង កម្លាំងប្រជាការពារ ក្នុងម្នាក់ទទួលបាន ទឹកក្រូច១កេស និងថវិកាមួយចំនួនផងដែរ៕ អត្ថបទ៖ កុម្ភៈ

ក្រសួងអប់រំ៖ លទ្ធផល​បាក់ឌុបឆ្នាំនេះ បេក្ខជនប្រឡងជាប់សរុប ១២២ ៤៧៣ នាក់ ក្នុងនោះនិទ្ទេសA ៣០០៣នាក់

2025/09/19 12:59:33 pm        648
Facebook Telegram Linkin
យោងតាមសេចក្ដី​ប្រកាសព័ត៌មានរបស់ក្រសួងអប់រំយុវជន និងកីឡា​ ស្តីពី​ លទ្ធផល​នៃ​ការ​ប្រឡង​សញ្ញា​បត្រ​មធ្យមសិក្សាទុតិយភូមិ(បាក់ឌុប)​ សម័យប្រឡង៖ ២៨ សីហា ២០២៥ បាន​បង្ហាញ​ថា​​ បេក្ខជនប្រឡប់ជាប់សរុប ១២២ ៤៧៣ នាក់ ត្រូវជា ៨៤.៥៦% នៃចំនួនបេក្ខជនមកប្រឡង ក្នុង​នោះនិទ្ទេស A មានចំនួន ៣០០៣នាក់។ក្រសួងអប់រំ យុវជន និងកីឡា បានបញ្ជាក់ថា ការប្រកាសលទ្ធផល ប្រឡង​សញ្ញា​បត្រ​មធ្យម​សិក្សា​ទុតិយភូមិ សម័យប្រឡង៖ ២៨ សីហា ២០២៥ នឹងប្រព្រឹត្តទៅនៅថ្ងៃទី២០ ខែកញ្ញា ឆ្នាំ​២០២៥ នៅតាមមណ្ឌលសំណេរ នៃរាជធានី ខេត្តទាំង២៥ ទូទាំងប្រទេស។ក្រសួងអប់រំបានប្រកាសផងដែរថា ជាលទ្ធផល បេក្ខជនប្រឡងជាប់សរុប ១២២ ៤៧៣ នាក់ ត្រូវ​ជា​៨៤.៥៦ ភាគរយ នៃចំនួន បេក្ខជនមកប្រឡង។ បេក្ខជនជាប់និទ្ទេស A ចំនួន ៣ ០០៣ នាក់, និទ្ទេស B ចំនួន ៩ ៩០១ នាក់, និទ្ទេស C ចំនួន ២៨ ៨០១ នាក់, និទ្ទេស D ចំនួន ៤៥ ៨៥៩ នាក់, និងនិទ្ទេស E ចំនួន ៣៤ ៩០៩ នាក់៕

ព្រឹទ្ធសភាឯកភាពទាំងស្រុងលើសេចក្តីស្នើច្បាប់ស្តីពីការអនុម័តយល់ព្រមលើកិច្ចព្រមព្រៀងបន្ថែម ទៅលើសន្ធិសញ្ញាស្តីពីតំបន់អាស៊ី-អាគ្នេយ៍គ្មានអាវុធនុយក្លេអ៊ែរ

2025/09/19 12:21:30 pm        192
Facebook Telegram Linkin
នាព្រឹកថ្ងៃសុក្រ ទី១៩ ខែកញ្ញា ឆ្នាំ២០២៥ វេលាម៉ោង ៩:៣០នាទី ព្រឹទ្ធសភា នៃព្រះរាជាណាចក្រកម្ពុជា បានបើកសម័យប្រជុំព្រឹទ្ធសភាជាវិសាមញ្ញ នីតិកាលទី៥ ក្រោមអធិបតីភាពដ៏ខ្ពង់ខ្ពស់របស់ ឯកឧត្តម អ៊ុច បូររិទ្ធ ប្រធានស្តីទីព្រឹទ្ធសភា ដែលមានវត្តមានសមាជិកព្រឹទ្ធសភាចូលរួមចំនួន ៥៤រូប ដើម្បីពិនិត្យហើយឱ្យយោបល់លើ សេចក្តីព្រាងច្បាប់ស្តីពី ការអនុម័តយល់ព្រមលើកិច្ចព្រមព្រៀងបន្ថែម ទៅលើសន្ធិសញ្ញាស្តីពីតំបន់អាស៊ី-អាគ្នេយ៍គ្មានអាវុធនុយក្លេអ៊ែរ។ឯកឧត្តមបណ្ឌិត នាង ផាត ប្រធានគណៈកម្មការមហាផ្ទៃ ការពារជាតិ មុខងារសាធារណៈ និងកិច្ចការព្រំដែន នៃព្រឹទ្ធសភា បានអញ្ជើញឡើងរាយការណ៍អំពីលទ្ធផលនៃការពិនិត្យសិក្សាសេចក្តីព្រាងច្បាប់នេះ និងមានសមាជិកព្រឹទ្ធសភាចំនួន ៤រូប បានឡើងមានយោបល់ ព្រមទាំងមានការឆ្លើយបំភ្លឺជូនអង្គប្រជុំព្រឹទ្ធសភា ពីសំណាក់ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ។អង្គប្រជុំព្រឹទ្ធសភា បានពិនិត្យហើយឱ្យយោបល់ឯកភាពទាំងស្រុងលើសេចក្តីព្រាងច្បាប់ទាំងមូល ដោយឥតកែប្រែចំនួន ៥៤សំឡេង នៃចំនួនសមាជិកព្រឹទ្ធសភាទាំងមូល៕

លោកជំទាវលីម ដារ៉ែន ជួន ណារិន្ទ បន្តឧបត្ថម្ភម៉ូតូ៣គ្រឿង និងសម្ភារ ជូនទៅ​វីរកងទ័ព​ប្រចាំ​ទិស​ខេត្ត​ព្រះវិហារ

2025/09/19 12:11:51 pm        315
Facebook Telegram Linkin
លោក​ជំទាវលីម ដារ៉ែន ជួន ណារិន្ទ បានបន្តការផ្តល់ជំនួយឧបត្ថម្ភម៉ូតូចំនួន៣គ្រឿង និងសម្ភារ ជូន​ទៅដល់វីរកងទ័ពដែលកំពុងឈរជើងការពារបូរណភាពទឹកដីកម្ពុជា ប្រចាំទិសខេត្តព្រះវិហារ ។ជំនួយឧបត្ថម្ភ ត្រូវបានផ្តល់ទៅ ទី១៖ វីរយុទ្ធជន ជឺ រិទ្ធី មេបញ្ជាការវរការពារព្រំដែនលេខ៣៧១ នៃ​​កង​ពលតូចអន្តរាគមន៍លេខ៧ ឈរជើងនៅទិសភ្នំខ្មោច ។ ទី២៖ វីរយុទ្ធជន អុំ ថេត មេបញ្ជា​ការ​កង​អនុ​សេនាធំលែខ៣ កងពលតូចអន្តរាគមន៍លេខ១ ឈរជើងនៅវាលឥន្ទ្រីយ៍ ។ ទី៣៖ វីរ​យុទ្ធជន សាន គឹមសៀង មេបញ្ជាការកងអនុសេនាធំទី៣ វរសេនាតូចលេខ៣៩២ នៃកង​ពល​តូច​អន្ត​រាគមន៍​លេខ៩ ឈរជើងនៅមុំបី។ ក្នុងកងអង្គភាពនីមួយៗ ទទួលបានម៉ូតូចំនួន០១គ្រឿង និង Power Bank ចំនួន២០ដុំផងដែរ ។ លោកជំទាវលីម ដារ៉ែន ជួន ណារិន្ទ ក៏សូមសម្តែងនូវទឹកចិត្តនឹករលឹក និង​ផ្ញើរ​ក្តី​ស្រលាញ់​ជ្រាល​ជ្រៅ​បំផុត​ចំពោះស្មារតីទទួលខុសត្រូវខ្ពស់ ក្នុងបុព្វហេតុការពារទឹកដីរបស់កងកម្លាំងទាំងអស់ នៅ​តាម​បន្ទាត់​ព្រំដែន។ ត្បិតលោកជំទាវ និងក្រុមគ្រួសារ មិនបានចូលរួមជាមួយ​សកម្ម​ភាព​ពិត​នៅ​ក្នុង​​សមរភូមិមុខក៏ពិតមែន ក៏ប៉ុន្តែក្នុងនាមជាអ្នកឈរជួរក្រោយ គឺនៅចាំផ្តល់​ជា​ជំនួយ​នានា​ជា​និច្ច​ទៅ​តាម​លទ្ធភាព ពិសេសការនៅពីចម្ងាយចាំគាំទ្រ និងលើកទឹកចិត្តឥតងាករេចំពោះ វីរ​ភាព​អង់​អាច​ហាន​ក្លា​របស់កងកម្លាំងការពារព្រំដែនទាំងអស់ មិនថាជាវីរកងនគរបាលជាតិ ឬ​យោធា​នោះ​ឡើយ​។ នេះមិនមែនជាលើកទី១នោះឡើយ កន្លងទៅលោកជំទាវ លីម ដារ៉ែន ជួន ណារិន្ទ តែង​តែ​បាន​ផ្តល់​ជំនួយ​ឧបត្ថម្ភ​ជាបន្តបន្ទាប់ មានម៉ូតូជាច្រើនគ្រឿង និងសម្ភារៈមួយចំនួនធំ ទៅកាន់ វីរកង​នគរបាល និងកងទ័ព ប្រចាំទិសខេត្តព្រះវិហារ៕ លីហេង

កម្មកររោងចក្រសប្បាយចិត្តក្រោយទទួលការបើកប្រាក់ឈ្នួលមុនថ្ងៃឈប់សម្រាកបុណ្យភ្ជុំបិណ្ឌ

2025/09/19 11:54:55 am        339
Facebook Telegram Linkin
តបតាមការអំពាវនាវរបស់រាជរដ្ឋាភិបាលកម្ពុជា ម្ចាស់រោងចក្រ សហគ្រាសជាច្រើន បាន​សម្រប​សម្រួល​បើក​ប្រាក់​ឈ្នួល និងរោងចក្រមួយចំនួន​ផ្សេង​ទៀត​បាន​បើក​ប្រាក់​ឈ្នួល​បន្ថែម​ទៀត​ដល់​កម្មករ​និយោជិត មុនថ្ងៃឈប់សម្រាកបុណ្យភ្ជុំបិណ្ឌ ដែលនឹងឈានមកដល់នាពេលខាងមុខនេះ។លោក អ៊ុំ សុវណ្ណវឌ្ឍនា រដ្ឋបាលរោងចក្រផលិតថង់ ប្លាស្ទីក Rally Packaging Cambodia CO.,LTD នៅ​រាជ​ធានីភ្នំពេញបានឱ្យព័ត៌មាន ប៊ីធីវី ដឹងនៅព្រឹកថ្ងៃទី១៩ ខែកញ្ញានេះថា រោងចក្រ​នេះ ​បានផ្តល់ការឈប់សម្រាកដល់កម្មករនិយោជិតទាំងអស់ចំនួនមួយសប្តាហ៍ពេញ ចាប់ពី​ថ្ងៃ​ទី​២១​ ដល់ថ្ងៃទី២៨ និងចូលបំពេញការងារឡើងវិញនៅថ្ងៃទី២៩ ខែកញ្ញា ឆ្នាំ២០២៥ ដោយ​មិន​មាន​ការ​កាត់​ប្រាក់ឈ្នួលអ្វីទាំងអស់ផងដែរ។ លោកបានឱ្យដឹងទៀតថា ក្នុងឱកាសបុណ្យភ្ជុំបិណ្ឌនេះដែរ ភាគីនិយោជកបាន​បើក​ប្រាក់​ឈ្នួលដ​ល់​កម្មករនិយោជិតតាំងពីសប្តាហ៍មុនមកម្ល៉េះ។ ហើយដោយឡែកនៅក្នុងសប្តាហ៍នេះ និយោជក​ក៏​បាន​បើក​ថវិកា​មួយ​ចំនួនថែមទៀត ដើម្បីទុកជាសោហ៊ុយ​ដល់​កម្មករ​និយោជិត​ធ្វើ​ដំណើរ​ទៅ​ស្រុក​កំណើត ដើម្បីជួបជុំក្រុមគ្រួសារ។លោក ផាក សុភិក្ត កម្មកររោងចក្រខាងលើនេះ ដែលមានស្រុកកំណើតនៅខេត្តក្រចេះ បាន​និយាយ​ឱ្យ​ដឹង​ថា ជាទូទៅរាល់ពិធីបុណ្យជាតិធំៗ កម្មកររោងចក្រភាគ​ច្រើន​តែង​តែ​ទទួល​បាន​ការ​ឈប់​សម្រាក​ជា​ច្រើនថ្ងៃ និងមិនកាត់ប្រាក់ឈ្នួលផងដែរ។ លោកបន្តថា ឆ្នាំនេះក្រៅពីជួប​ជុំ​ក្រុម​គ្រួសារ និងនាំយកចង្កាន់ប្រគេនព្រះសង្ឃ គឺមិនមានគម្រោងទៅកម្សាន្តទីណានោះទេ ព្រោះរ​ដូវ​នេះ ​សំខាន់ជាងគេ គឺការធ្វើបុណ្យ ធ្វើទាន និងជួបជុំក្រុមគ្រួសារ សាច់ញាតិ ដែលខានជួបគ្នាយូរ ដោយ​សារ​ម្នាក់ៗមមាញឹកការងាររៀងៗខ្លួន។ស្រដៀងគ្នានេះ កម្មការិនី ឈៀង រៀម មានស្រុកកំណើតនៅខេត្តកំពង់ចាម និងកម្មករ ផាក សុភិក្ត មានស្រុកកំណើតនៅខេត្តកំពង់ឆ្នាំ បាននិយាយដោយទឹកមុខញញឹមថា ពួកគាត់​ពិត​ជា​សប្បាយ​ចិត្ត​ណាស់ ដែលបានទៅលេងស្រុកកំណើត ព្រោះបានទៅលេងឪពុកម្តាយ បងប្អូន និង​មិត្ត​ភ័ក្តិ ដែលខកខានជួបជុំគ្នាយ៉ាងយូរ ដោយសារជាប់រវល់ការងារ។ ពួកគាត់ បានលើកឡើងថា ការ​រស់​នៅក្រុងភ្នំពេញសព្វថ្ងៃនេះ ពិតជារវល់ និងមមាញឹកច្រើនក្នុងការបំពេញការងារ ដូច្នេះ​មិន​សូវ​មាន​ពេល​ទៅលេ​ង​ស្រុកឡើយ លុះត្រាតែមានបុណ្យទាន ឬបុណ្យជាតិធំៗទើបអាច​ធ្វើ​ដំណើរ​ទៅ​បាន​។យោងតាមសេចក្តីជូនដំណឹងរបស់ក្រសួងការងារ និងបណ្តុះបណ្តាលវិជ្ជាជីវៈ បានស្នើម្ចាស់ ឬ​នាយក​សហគ្រាស ក្រុមហ៊ុន រោងចក្រ អនុញ្ញាតឱ្យកម្មករនិយោជិត ឈប់សម្រាក​ដោយ​មាន​ប្រាក់​ឈ្នួល​នា​ឱកាសពិធីបុណ្យភ្ជុំបិណ្ឌខាងមុខនេះ រយៈពេល ៣ថ្ងៃ គឺថ្ងៃទី២១-២២-២៣ ខែ​កញ្ញា ឆ្នាំ២០២៥ និងត្រូវសម្របសម្រួលរៀបចំបើកប្រាក់ឈ្នួលខែកញ្ញា ដែលកម្មករ​និយោជិត​ត្រូវ​ទទួល​បាន​ឱ្យបានមុនថ្ងៃឈប់សម្រាកនេះ។ សូមបញ្ជាក់ថា ជារៀងរាល់ឆ្នាំ ឱ្យតែពិធីបុណ្យធំៗ ដូចជាបុណ្យចូលឆ្នាំប្រពៃជាតិខ្មែរ បុណ្យ​ភ្ជុំ​បិណ្ឌ​ និងពិធីបុណ្យអុំទូកជាដើម ប្រជាពលរដ្ឋចំណាកស្រុករស់នៅភ្នំពេញ ក៏ដូចជាកម្មករ កម្មការ​នី​ជាច្រើនសិបនាក់ តែងតែធ្វើដំណើរចេញ ដើម្បីជួបជុំក្រុមគ្រួសារ និងសាច់​ញាតិ​នៅ​ស្រុក​កំណើត​រៀង​ៗខ្លួន​៕ អត្ថបទ៖ ឈិត បូរ៉ាវី

អង្គការ River Ocean Cleanup រួមជាមួយក្រសួង៨ សហការរៀបចំទិវា​សំអាត​ពិភព​លោក​លើក​ទី៨ ទូទាំងប្រទេសកម្ពុជា ក្រោមមូលបទ “ស្អាតទឹក ស្អាតដី ស្អាតខ្យល់”

2025/09/19 11:40:06 am        133
Facebook Telegram Linkin
ទិវាសំអាតពិភពលោក World Cleanup Day បានប្រព្រឹត្តទៅជាផ្លូវការនៅប្រទេសកម្ពុជា នា​ថ្ងៃ​ទី១៨ ខែកញ្ញា ឆ្នាំ ២០២៥ នៅតាមបណ្ដោយទន្លេសាប នៃបរិវេណវត្តសុវណ្ណវារី ឃុំព្រែកតាទែន ស្រុក​ពញ្ញាឮ ខេត្តកណ្ដាល  ដោយអង្គការសំអាតទន្លេ សមុទ្រ (River Ocean Cleanup) សហការ​ជាមួយ​រដ្ឋបាលខេត្តកណ្ដាល និងមន្ទីរបរិស្ថាន ក្រោមការឧបត្ថម្ភរបស់ក្រុមហ៊ុន Leader Energy, ក្រុមហ៊ុន Naga World និងក្រុមហ៊ុន Cambrew រួមគ្នា ជាមួយ ១៩៨ប្រទេស ជុំវិញ​ពិភព​លោក ​ក្រោមមូលបទ “ស្អាតទឹក ស្អាតដី ស្អាតខ្យល់” ស្រប​តា​មយុ​ទ្ធ​សាស្ត្រ​បញ្ចកោណ​ដំណា​ក់​កាលទីមួយរបស់រាជរដ្ឋាភិបាលនីតិកាលទី៧ នៃរដ្ឋសភា និងគាំទ្រដល់​ការ​អនុវត្ត​យុទ្ធ​សាស្ត្រ​ចក្រា​វិស័យបរិស្ថានឆ្នាំ ២០២៣- ២០២៨ (ស្អាត បៃតង និងចិរភាព), យុទ្ធនាការ កម្ពុជា​ស្អាត ខ្មែរធ្វើបាន និង គោលនយោបាយភូមិឃុំមានសុវត្ថិភាពរបស់រាជរដ្ឋាភិបាលកម្ពុជា។ ទិវានេះ​ប្រារព្ធ​បានទៅដោយជោគជ័យ បង្កជាភាពសប្បាយរីករាយ ដោយមានសមាស​ភាព​ចូល​រួម ​១៩៣៦ អង្គ/នាក់ ក្រោមអធិបតីភាព ឯកឧត្តម គួច ចំរើន អភិបាល នៃគណៈ​អភិបាល​ខេត្ត​កណ្តាល ​ដោយមានការយាងនិមន្ត/អញ្ជើញចូលរួមពី សម្តេចព្រះឧត្តមមុនី ជា សំអាង ព្រះ​មេ​គុណ​ខេត្ត​កណ្តាល មន្ទីរជុំវិញខេត្តកណ្ដាល ថ្នាក់ដឹកនាំ មន្រ្តីស្រុកពញាឮ អាជ្ញាធរមូលដ្ឋាន ប្រជា​ពលរដ្ឋ ក្រុមហ៊ុនឯកជន សាលារៀន Happy Chandara School យុវជនសសយក យុវជន​កាក​បាទ​ក្រហម​កម្ពុជា យុវជនកាយរឹទ្ធិ ចូលរួមសំអាតសំរាមប្លាស្ទិកប្រមាណ ជាង ២តោន ចេញ​ពី​ច្រាំង​​ទ​ន្លេសាបតាមរយៈកម្មវិធីប្រឡងប្រណាំងរើសសំរាមយករង្វាន់ពិសេសៗដ៏សម្បូបែប រើស​ច្រើន ឱកាសឈ្នេះរង្វាន់ច្រើន ថែមទាំងមានការប្រគុំតន្រ្តីសម័យ ឆ៉ៃយាំ ទូកកំចាត់សំរាម និង​មាន​អាហារ​សំរន់ ភេសជ្ជៈផ្សេងៗ ដើម្បីបំផុសលើកទឹកចិត្តឲ្យ ប្រជាពលរដ្ឋ​ចូលរួម​រក្សា​អនាម័យ​នៅ​ក្នុង​ភូមិ ឃុំរបស់គាត់ ។ សូមបញ្ជាក់ផងដែរទិវាសំអាតពិភពលោក បាននឹងកំពុងប្រព្រឹត្តទៅចាប់ពីថ្ងៃទី១៥ ដល់ថ្ងៃទី ៣០​ខែ​កញ្ញា ឆ្នាំ២០២៥ នៅ ២៥រាជធានី/ខេត្ត ទូទាំងព្រះរាជាណាចក្រកម្ពុជា ក្រោមកិច្ច​សហការ​រវាង​អង្គការសំអាតទន្លេ សមុទ្រ River Ocean Cleanup ក្រសួងបរិស្ថាន ក្រសួងមហាផ្ទៃ ក្រសួង​អប់រំយុវជន និងកីឡា ក្រសួងទេសចរណ៍ ក្រសួងពាណិជ្ជកម្ម ក្រសួងការងារ​និង​បណ្ដុះ​បណ្ដាល​វិជ្ជាជីវៈ ក្រសួងធម្មការនិងសាសនា ក្រសួងធនធានទឹក និងឧតុនិយម។ នៅឆ្នាំ ២០២៤ ទិវា​​សម្អាតពិភពលោក នៅកម្ពុជាបានជាប់ចំណាត់ថ្នាក់លេខ៣ក្នុងចំណោម ១៩១​ប្រទេស​ដែល​បាន​ចូល​រួមក្នុងទិវាសំអាតពិភពលោក។ ជោគជ័យនេះបានបញ្ជូនសារយ៉ាងច្បាស់ដល់សហគមន៍អន្តរជាតិថា “កម្ពុជាស្អាតខ្មែរធ្វើបាន” ដែល​ជា​យុទ្ធនាការ របស់ក្រសួងបរិស្ថានផ្ទាល់។សកម្មភាព​សំអាតក្នុង១ថ្ងៃ មិនគ្រាប់គ្រាន់នោះទេ វាទាមទារនៅការ​ចូលរួម​គាំទ្រ​ជាប្រ​ចាំ​ពីគ្រ​ប់​ស្ថាប័ន​គ្រប់​ជាន់​ថ្នាក់​។ ក្រុម​ហ៊ុនឯកជ​ន​ដើរ​តួយ៉ាង​សំខាន់​ក្នុង​ការ​ចូល​រួម​ដោះ​ស្រាយ​បញ្ហា​បរិស្ថាន​ជា​ពិសេស សំរាមក្នុងទន្លេ និងសមុទ្រ ដែលកំពុងបង្ក​ផល​ប៉ះពា​ល់​គំរាម​កំហែង​ដល់​ជីវៈ​ចម្រុះ​ក្នុ​ងទឹក ទន្លេជាពាងទឹករបស់ប្រជាពលរដ្ឋ ជាប្រភពអាហាររបស់មនុស្ស និងសត្វ ។ សូម​អរគុណដល់ក្រុមហ៊ុន Leader Energy បានផ្តល់ជំនួយថវិការសម្រាប់រយៈពេល៥ឆ្នាំ ២០២៣ ដល់ ២០២៨ ដើម្បីសំអាតសំណល់ប្លាស្ទិកចេញពីទន្លេមេគង្គ ទន្លេសាប និងទន្លេបាសាក់ ហើ​យ​សូមស្វាគមន៍ចំពោះក្រុមហ៊ុន ទាំងអស់ដែលមានបំណងចង់ចូលរួមសំអាតទន្លេ និងសមុទ្រ សូម​ទាក់​ទង​មកកាន់ អង្គការសំអាតទន្លេ សមុទ្រផ្ទាល់ (Tel: 096 232 2333, Email: [email protected]) ជាកំលាំង ឫការគាំទ្រហិរញ្ញវត្ថុ ភស្តុភារផ្សេងៗ។ដើម្បីបង្កើន​ការ​ចូលរួមពីសំណាក់ប្រជាពលរដ្ឋ ក្រុមហ៊ុនឯកជនទូទាំងប្រទេស អង្គការសំអាត​ទន្លេ​សមុទ្រ River Ocean Cleanup សូមអំពាវនាវដល់ ប្រជាពលរដ្ឋ ក្រុមហ៊ុនឯកជន អង្គការ​ជាតិ អន្តរជាតិទាំងអស់ ចូលរួមចូលរួមថែរក្សាអនាម័យប្រទេសកម្ពុជាយើង កុំឲ្យមា​ន​សំណល់​ប្លាស្ទិក នៅក្នុងធម្មជាតិ ជាពិសេសទន្លេ និងសមុទ្រ សំដៅធ្វើយ៉ាង​ណា​ឲ្យប្រទេសក​ម្ពុជា​យើង​ឈា​ន​ទៅរ​ក ភាពស្អាត បៃតង និងចិរភាព ពិតប្រាកដ៕

មហាសន្និបាតអាយប៉ាក្នុងប្រទេសម៉ាឡេស៊ី បានអនុម័តគំាទ្រសេចក្តីព្រាងសេចក្តីសម្រេចចំនួនបីដែលស្នើឡើងដោយសភាកម្ពុជា ក្នុងការលើកកម្ពស់សន្តិភាព និងវិបុលភាពរបស់ប្រជាពលរដ្ឋក្នុងតំបន់

2025/09/19 11:15:10 am        245
Facebook Telegram Linkin
ជាជោគជ័យធំមួយនៃបេសកកម្មការទូតសភា នៅក្នុងមហាសន្និបាតអន្តរសភាអាស៊ាន(អាយប៉ា/AIPA )លើកទី៤៦ ដែលសភាប្រទេសម៉ាឡេស៊ី ធ្វើជាម្ចាស់ផ្ទះ នៅក្នុងទីក្រុងគូឡាឡំាពួ បានអនុម័តគំាទ្រសេចក្តីព្រាងសេចក្តីសម្រេចចំនួនបី ដែលផ្តួចផ្តើមឡើងដោយសភាកម្ពុជា ក្នុងការលើកកម្ពស់ សុខសន្តិភាព វិបុលភាព មិនសម្រាប់តែពលរដ្ឋកម្ពុជាប៉ុណ្ណោះទេ តែសម្រាប់ពលរដ្ឋនៅក្នុងតំបន់និងពិភពលោក។តាមរយៈគណៈកម្មាធិការជំនាញរបស់អាយប៉ា សេចក្តីព្រាងសេចក្តីសម្រេច ទំាងបីរបស់សភាកម្ពុជា បានលើកយកទៅពិភាក្សានៅក្នុងគណៈកម្មាធិការនយោបាយនិងគណៈកម្មាធិការរៀបចំរបស់អាយប៉ា ។ នៅក្នុងនោះគណៈកម្មាធិការនយោបាយអាយប៉ា នៅក្នុងកិច្ចប្រជុំព្រឹកថ្ងៃទី១៩កញ្ញានេះ បានពិភាក្សាអនុម័តគំាទ្រ ពេញទំហឹងលើសេចក្តីព្រាងសេចក្តីសម្រេច របស់សភាកម្ពុជា ស្តីពីការជំរុញគំនិតផ្ដួចផ្ដើមសន្តិភាព ដើម្បីមនុស្សជាតិ និងភពផែនដី។ការអនុម័តនេះ គឺជាការទទួលស្គាល់របស់អាយប៉ា ចំពោះកិច្ចខិតខំប្រឹងប្រែងរបស់កម្ពុជា ក្រោមការដឹកនាំរបស់សម្តេចតេជោ ហ៊ុន សែន ប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៅក្នុងការស្វែងរកសន្តិភាព ការពារ លើកកម្ពស់សុខសន្តិភាព ជូនពលរដ្ឋទំាងក្នុងប្រទេសនិងក្រៅប្រទេស ដូចជាការអនុម័តនូវ ធម្មនុញ្ញសន្តិភាពដើម្បីប្រជាជន និងភពផែនដី ដែលប្រកបដោយចក្ខុវិស័យវែងឆ្ងាយ និងដាក់ចេញដោយ សម្តេចតេជោ ហ៊ុន សែន បានអនុម័ត នៅសម័យប្រជុំពេញអង្គលើកទី១១ នៃសភាអន្តរជាតិដើម្បីភាពអត់ឱន និងសន្តិភាព ដែលសភាកម្ពុជាធ្វើជាម្ចាស់ផ្ទះកាលពីខែវិច្ឆិកា ឆ្នាំ២០២៤។ចំណែកសេចក្តីព្រាងសេចក្តីសម្រេចពីរទៀតដែលផ្តួចផ្តើមឡើងដោយសភាកម្ពុជា បានលើកយកមកពិភាក្សានៅក្នុងគណៈកម្មាធិការរៀបចំរបស់អាយប៉ា នៅព្រឹកថ្ងៃទី១៩ ដែរនោះ គឺសេចក្តីព្រាងសេចក្តីសម្រេច ស្តីពីការបង្កើតវេទិកាថ្នាក់ដឹកនាំអាយប៉ា និង សេចក្ដីព្រាងសេចក្ដីសម្រេចស្តីពីការបង្កើតភាពជាដៃគូអាយប៉ាដើម្បីលើកកម្ពស់ការចូលរួមរបស់អាយប៉ាជាមួយដៃគូពាក់ព័ន្ធ សម្រាប់ អាស៊ានប្រកបដោយបរិយាបន្ន និងចីរភាព។សេចក្ដីព្រាងសេចក្ដីសម្រេចស្ដីពីការបង្កើតវេទិកាថ្នាក់ដឹកនាំអាយប៉ាមាន គោលបំណងបង្កើតវេទិកាថ្នាក់ដឹកនាំអាយប៉ា សំដៅលើកកម្ពស់កិច្ចសន្ទនាប្រកបដោយបរិយាបន្ន និងពហុភាគីលើបញ្ហាថ្មីៗក្នុងតំបន់ និងអន្តរជាតិ ក្នុងគោលបំណងកសាងការយល់ដឹងរួមគ្នា និងបង្កើតដំណោះស្រាយប្រកបដោយនវានុវត្តន៍ ដែលចាំបាច់ត្រូវមានភាពរហ័សរហួន សម្របខ្លួន និងមានគំនិតច្នៃប្រឌិត ដើម្បីដោះស្រាយបញ្ហាប្រឈមថ្មីៗទាំងនេះប្រកបដោយប្រសិទ្ធភាព។ចំពោះសេចក្ដីព្រាងសេចក្ដីសម្រេចស្ដីពីការបង្កើតភាពជាដៃគូអាយប៉ាដើម្បីពង្រឹងការចូលរួមរបស់សភាអាយប៉ា ជាមួយដៃគូខាងក្រៅសម្រាប់អាស៊ានប្រកបដោយបរិយាបន្ន និងចីរភាព មានគោលបំណងចម្បង គឺដើម្បីពង្រឹងការចូលរួមជាមួយសភាសង្កេតការណ៍ ដែលរួមចំណែកដល់បេសកកម្មរបស់អាយប៉ា ក្នុងការបង្កើតក្របខ័ណ្ឌរួម និងឆ្ពោះទៅអនាគត ដើម្បីលើកកម្ពស់ការទូតសភា ធ្វើឱ្យការចូលរួមជាមួយសភាសង្កេតការណ៍ និងអង្គការដៃគូកាន់តែស៊ីជម្រៅ និងដើម្បីពង្រឹងមជ្ឈភាពអាស៊ាន និងរួមចំណែកដល់សន្តិភាព ស្ថិរភាព និងការអភិវឌ្ឍប្រកបដោយចីរភាពស្របតាមទស្សនវិស័យសហគមន៍អាស៊ានឆ្នាំ២០៤៥ និងមូលបទអាស៊ានឆ្នាំ២០២៥ របស់ប្រទេសម្ចាស់ផ្ទះម៉ាឡេស៊ីគឺ “បរិយាបន្ន និងចីរភាព”៕

សម្តេចតេជោ ហ៊ុន សែន អនុញ្ញាតឱ្យឯកឧត្តមឧត្តមសេនីយ៍ទោ មេបញ្ជាការកងយោធពលភូមិន្ទ នៃប្រទេសប្រ៊ុយណេ ចូលជួបសម្តែងការគួរសម

2025/09/19 11:03:11 am        116
Facebook Telegram Linkin
សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទី នៃព្រះរាជាណាចក្រកម្ពុជា បានអនុញ្ញាតឱ្យឯកឧត្តម ឧត្តមសេនីយ៍ទោ Dato Paduka Seri Haji Muhammand Haszaimi Bin Bol Hassan មេបញ្ជាការកងយោធពលភូមិន្ទ នៃប្រទេសប្រ៊ុយណេ ចូលជួបសម្តែងការគួរសម។ជំនួបខាងលើនេះ ប្រព្រឹត្តទៅនៅវិមានព្រឹទ្ធសភា នាព្រឹកថ្ងៃសុក្រ ទី១៩ ខែកញ្ញា ឆ្នាំ២០២៥ វេលាម៉ោង ១០:០០នាទី...។

សម្តេចអគ្គមហាពញាចក្រី ហេង សំរិន និងសម្តេចធម្មវិសុទ្ធវង្សា អញ្ជើញកាន់បិណ្ឌវេនទី១២ នៅវត្តថ្កូវ ស្ថិតនៅក្នុងឃុំកក់ ស្រុកពញាក្រែក ដែលជាស្រុកកំណើតរបស់សម្តេច

2025/09/19 10:57:43 am        81
Facebook Telegram Linkin
សម្តេចអគ្គមហាពញាចក្រី ហេង សំរិន ប្រធានកិត្តិយសឧត្តមក្រុមប្រឹក្សាព្រះមហាក្សត្រ និងសម្តេចធម្មវិសុទ្ធវង្សា សៅ ទី ហេង សំរិន ឯកឧត្តម វង សូត អនុប្រធានទី២ រដ្ឋសភា និងលោកជំទាវ ហេង ពៅ ព្រមទាំងបុត្រ និងចៅ ឯកឧត្តម ប៉ែន កុសល្យ អភិបាល នៃគណ:អភិបាលខេត្តត្បូងឃ្មុំ ឯកឧត្តម ឡុង ធាម ប្រធានក្រុមប្រឹក្សាខេត្ត រួមនឹងឯកឧត្តម លោកជំទាវ ជាសមាជិក សមាជិការដ្ឋសភាទីប្រឹក្សា ជំនួយការ នៅព្រឹកថ្ងៃទី១៩ ខែកញ្ញា ឆ្នាំ២០២៥នេះ បានអញ្ជើញចូលរួមជាអធិបតីភាពក្នុងពិធីបុណ្យកាន់បិណ្ឌវេនទី១២ នៅវត្តគីរីសុវណ្ណរាម ហៅវត្តថ្កូវ ស្ថិតក្នុងឃុំកក់ ស្រុកពញាក្រែក ខេត្តត្បូងឃ្មុំ ជាមួយបងប្អូនប្រជាពុទ្ធបរិស័ទចំណុះជើងវត្តប្រកបដោយទឹកចិត្តជ្រះថ្លាបំផុត។ មុននឹងអញ្ជើញចូលរួមក្នុងពីធីបុណ្យកាន់បិណ្ឌ សម្តេចអគ្គមហាពញាចក្រី ហេង សំរិន និងសម្តេចធម្មវិសុទ្ធវង្សា ឯកឧត្តម វង សូត និងលោកជំទាវព្រមទាំងបុត្រាបុត្រី ចៅប្រុសចៅស្រី បានប្រារព្ធពិធីបង្សុកូលនៅចេតិយអ្នកមានគុណ ស្ថិតនៅក្នុងបរិវេណវត្តគីរីសុវណ្ណរាម ដើម្បីជាកិច្ចឧទ្ទិសកុសលដល់បុព្វការីជន មាតាបិតា ជីដូន ជីតា និងញាតកាទាំងប្រាំពីរសណ្តានក្នុងឱកាសរដូវបុណ្យ ភ្ជុំបិណ្ឌ។ បន្ទាប់មក សម្តេចអគ្គមហាពញាចក្រី ហេង សំរិន និងសម្តេចធម្មវិសុទ្ធវង្សា សៅ ទី ព្រមទាំង ឯកឧត្តម វង សូត និងលោកជំទាវ ហេង ពៅ ព្រមទាំងបុត្រ និងចៅ រួមនឹងឯកឧត្តម លោកជំទាវជាសមាជិក សមាជិកា ទីប្រឹក្សា ជំនួយការ នៃរដ្ឋសភា បានអញ្ជើញចូលរួមពិធីបុណ្យកាន់បិណ្ឌវេនទី១២ មានប្រារព្ធពិធីរាប់បាត ប្រគេនភត្តហារ បវរណាចតុបច្ឆ័យប្រគេនព្រះសង្ឃ ដើម្បីជាកិច្ចឧទ្ទិសកុសលផលបុណ្យ ជូនចំពោះដួងវិញ្ញាណក្ខ័ន្ធបុព្វការីជន មានមាតាបិតា ជីដូនជីតា និងញាតកាទាំងប្រាំពីរសន្តាន ដែលបានចែកឋានទៅកាន់លោកខាងមុខ សូមឱ្យមកទទួលនូវផល្លានិសង្ឃដ៏ជ្រះថ្លានេះ សូមជួយទ្រទ្រង់ឱ្យវិញ្ញាណក្ខ័ន្ធបុព្វការីជន ញាតកាទាំងប្រាំពីរសន្តានទំាងអស់ បានទៅសោយសុខក្នុងសុគតិភពកុំបីឃ្លៀងឃ្លាតឡើយ។ សូមជម្រាបថា វត្តគីរីសុវណ្ណរាម ហៅវត្តថ្កូវ ជាវត្តមានវ័យចំណាស់មួយក្នុងឃុំកក់ ស្រុកពញាក្រែក ខេត្តត្បូងឃ្មុំ ដែលសម្តេចអគ្គមហាពញាចក្រី ហេង សំរិន ធ្លាប់បានបួសរៀនកាលពីកុមារភាព។ បច្ចុប្បន្នទីអារាមវត្តទាំងមូលមានការរីកចម្រើន យ៉ាងខ្លាំងអាស្រ័យដោយទទួលបានការជួយឧបត្ថម្ភគាំទ្រយ៉ាងខ្លាំងក្លាពីសំណាក់សម្តេចអគ្គមហាពញាចក្រី ហេង សំរិន និងសម្តេចធម្មវិសុទ្ធវង្សា សៅ ទី ហេង សំរិន ព្រមទាំងបុត្រាបុត្រីចៅប្រុសចៅស្រី និងក្រុមការងារទំាងអស់។ វត្តនេះ មានសមិទ្ធផលគ្រប់គ្រាន់ក្នុងការឆ្លើយតបទៅនឹងតម្រូវការខាងវិស័យព្រះពុទ្ធសាសនា ។ព្រះសង្ឃ រួមជាមួយគណៈកម្មការវត្តគីរីសុវណ្ណារាម ប្រជាពលរដ្ឋបានថ្លែងអំណរគុណយ៉ាងជ្រាលជ្រៅបំផុត ចំពោះសម្តេចអគ្គមហាពញាចក្រី ហេង សំរិន និងសម្តេចធម្មវិសុទ្ធវង្សា សៅ ទី ដែលសម្តេចទាំងទ្វេ បានជួយកសាងសមិទ្ធផលជាច្រើនបម្រើឱ្យវិស័យពុទ្ធចក្រ ហើយសម្តេចតែងតែអញ្ជើញមកចូលរួមក្នុងពិធី បុណ្យកាន់បិណ្ឌនិងភ្ជុំបិណ្យ នៅវត្តគីរីសុវណ្ណរាម ហៅវត្តថ្កូវនេះជារៀងរាល់ឆ្នាំមិនដែលខកខានឡើយ។ នៅក្នុងឱកាសនោះ សម្តេចអគ្គមហាពញាចក្រី ហេង សំរិន បានប្រគេនបច្ច័យដល់ព្រះចៅអធិការវត្ត ចំនួន១លានរៀល និងប្រគេនបច្ច័យចំនួន ១០ លានរៀល ទុកសម្រាប់កសាងសមិទ្ធផលនានាក្នុងវត្ត និងបានប្រគេនបច្ច័យព្រះសង្ឃ១១អង្គ ក្នុង១អង្គៗ សាដក១ និងបច្ច័យ១០ម៉ឺនរៀល។ដោយឡែក យាយជីតាជី២០០នាក់ ក្នុងម្នាក់ៗ ក្រម៉ា ១ និងថវិកា២ម៉ឺនរៀល។ ចំពោះទេយ្យវត្ថុ និងគ្រឿងឧបភោគ បរិភោគ ដែលបានប្រគេន ព្រះសង្ឃនៅវត្តគីរីសុវណ្ណរាម ហៅវត្តថ្កូវ រួមមាន៖ អង្ករ៥ បាវ ទឹកបរិសុទ្ធ ៥កេស ទឹកត្រី៥យួរ ទឹកស៊ីអ៊ីវ២យួរ ទឹកដោះគោខាប់ចំនួន១កេស ស្ករសរ ១បេ តែ៥គីឡូក្រាម ត្រីខ១កេស មីជាតិ១កេសធំ ទឹកផ្លែឈើ៥កេស ផ្លែឈើ៥កន្ត្រក រួមនិងទេយ្យវត្ថុ និងគ្រឿងឧបភោគ បរិភោគ របស់សាលាខេត្តត្បូងឃ្មុំមួយចំនួនផងដែរ៕

បណ្ដាញសង្គម

ព័ត៌មានថ្មីៗ

ប្រភពប៉ាគីស្ថាន៖ កិច្ចប្រឹងប្រែង ដើម្បីសម្រួលដល់ការចរចា រវាងសហរដ្ឋអាមេរិក និងអ៊ីរ៉ង់ កំពុងបន្ត
04/07/2026 08:04 PM
Facebook Telegram Linkin
អាមេរិកវាយប្រហារគោលដៅយោធាលើកោះ Kharg របស់អ៊ីរ៉ង់ ខណៈលោក Vance ប្រាប់ថា គ្មានការប្តូរយុទ្ធសាស្ត្រទេ
04/07/2026 08:04 PM
Facebook Telegram Linkin
ប្រេងឡើងថ្លៃ និងកង្វះខាតប្រេង រុញច្រានឲ្យអ្នកប្រើប្រាស់ប៉ាគីស្ថានងាកមករកម៉ូតូអគ្គិសនី
04/07/2026 08:04 PM
Facebook Telegram Linkin
លោក Trumpថា សង្គមមនុស្សទាំងមូលនឹងត្រូវស្លាប់នៅយប់នេះ បើសិនជាអ៊ីរ៉ង់មិនបង្កើតកិច្ចព្រមព្រៀង
04/07/2026 08:04 PM
Facebook Telegram Linkin
[UPDATE] លោក Trump បញ្ជាក់ថា «អារ្យធម៌ទាំងមូលនឹងលែងមាននៅយប់នេះ» បើអ៊ីរ៉ង់មិនធ្វើកិច្ចព្រមព្រៀង
04/07/2026 08:04 PM
Facebook Telegram Linkin
ចិនសង្ឃឹមថា ភាគីពាក់ព័ន្ធនឹងសង្រ្គាមអ៊ីរ៉ង់អាចក្តាប់ឱកាស ដើម្បីសន្តិភាព និងចាប់ផ្តើមកិច្ចពិភាក្សាឡើងវិញ
04/07/2026 08:04 PM
Facebook Telegram Linkin
អ៊ីរ៉ង់គំរាមរំខានការផ្គត់ផ្គង់ប្រេង និងឧស្ម័ន ក្នុងតំបន់ «ជាច្រើនឆ្នាំ» បើហេដ្ឋារចនាសម្ព័ន្ធស៊ីវិលត្រូវបានវាយប្រហារ
04/07/2026 08:04 PM
Facebook Telegram Linkin
WHO ៖ ការជម្លៀសផ្នែកវេជ្ជសាស្រ្តនៅតំបន់ហ្កាហ្សា បានផ្អាក ក្រោយកម្មករជាប់កិច្ចសន្យាម្នាក់ត្រូវបានសម្លាប់
04/07/2026 08:04 PM
Facebook Telegram Linkin
BREAKING NEWS ៖ សង្គមមនុស្សទាំងមូលនឹងត្រូវស្លាប់នៅយប់នេះ បើសិនជាអ៊ីរ៉ង់មិនបង្កើតកិច្ចព្រមព្រៀង
04/07/2026 08:04 PM
Facebook Telegram Linkin
សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចាត់សហការីនាំយកអំណោយមនុស្សធម៌សម្រាលទុក្ខលំបាក ជូនលោកតាលោកយាយចាស់ជរាគ្មានទីពឹងនៅក្រុងច្បារមន ខេត្តកំពង់ស្ពឺ
04/07/2026 08:04 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.