BTV NEWS

វិស័យឯកជនសាធារណរដ្ឋកូរ៉េ ស្នើកម្ពុជា ពង្រឹងកិច្ចសហប្រតិបត្តិការលើវិស័យអាកាសចរណ៍បន្ថែមរវាងប្រទេសទាំងពីរ

ក្នុងមួយខែៗរដ្ឋចេញខាតជាង ៤៧លានដុល្លារ ដើម្បីជួយសម្រាលបន្ទុកអត្រាពន្ធ និងអាករពីវិបត្តិប្រេងឥន្ធនៈ

កម្ពុជា ផ្សព្វផ្សាយច្បាប់ស្ដីពីការឆបោកតាមប្រព័ន្ធបច្ចេកវិទ្យាដល់បណ្ដាអង្គទូត និងអង្គការអន្តរជាតិនានានៅកម្ពុជា

ប្រមុខការពារជាតិកម្ពុជាថា វត្តមាននាវាចម្បាំង និងកងទ័ពរុស្ស៊ីនៅកម្ពុជាពេលនេះនឹងលើកកម្ពស់កិច្ចសហប្រតិបត្តិការវិស័យការពារជាតិរវាងកម្ពុជា និងរុស្ស៊ីឲ្យកាន់តែប្រសើរបន្ថែមទៀត

ព័ត៌មានជាតិ

ឯកឧត្តម ហេង សួរ៖ ជប៉ុនជាដៃគូដ៏សំខាន់មិនអាចកាត់ផ្តាច់បានលើការអភិវឌ្ឍការអប់រំបណ្តុះបណ្តាលបច្ចេកទេស និងវិជ្ជាជីវៈ នៅកម្ពុជា

ភ្នំពេញ៖ ឯកឧត្ដម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ និងឯកឧត្តម អ៊ូអិណុ អាត់ស៊ូស៊ី (UENO Atsushi) ឯកអគ្គរាជទូតជប៉ុនប្រចាំកម្ពុជា បានអញ្ជើញចូលរួមជាសហអធិបតីក្នុងពិធីប្រគល់-ទទួលឧបករណ៍ សម្ភារៈ និងបរិក្ខារបច្ចេកទេសសម្រាប់បណ្តុះបណ្តាលជំនាញអគ្គិសនី ដែលជាជំនួយឥតសំណងរបស់រាជរដ្ឋាភិបាលជប៉ុនជូនដល់ក្រសួងការងារ និងបណ្តុះបណ្តាលវិជ្ជាជីវៈ នារសៀលថ្ងៃទី១៦ ខែកញ្ញា ឆ្នាំ២០២៥នេះ នៅវិទ្យាស្ថានជាតិបណ្តុះបណ្តាលបច្ចេកទេស។ថ្លែងក្នុងឱកាសនោះ ឯកឧត្ដមរដ្ឋមន្ត្រីបានថ្លែងអំណរគុណយ៉ាងជ្រាលជ្រៅទៅដល់រាជរដ្ឋាភិបាលជប៉ុន និងប្រជាជនជប៉ុនចំពោះការផ្តល់ជំនួយឥតសំណងដ៏មានសារៈសំខាន់ក្នុងការរួមចំណែកដល់ការអភិវឌ្ឍធនធានមនុស្សនៅកម្ពុជា និងលើកកម្ពស់គុណភាពនៃការបណ្តុះបណ្តាលជំនាញវិជ្ជាជីវៈ និងបច្ចេកទេស។ឯកឧត្ដមរដ្ឋមន្ត្រី ក៏បានលើកឡើងបន្ថែមថា ជំនួយរបស់ជប៉ុននៅក្នុងវិស័យអប់រំរបស់កម្ពុជានាពេលកន្លងមក បានរួមចំណែកកសាងសមត្ថភាពធនធានមនុស្សកម្ពុជា និងចូលរួមយ៉ាងសកម្មក្នុងការអភិវឌ្ឍ និងស្តារកម្ពុជាឡើងវិញ។ ប្រទេសជប៉ុន ជាដៃគូដ៏សំខាន់មិនអាចកាត់ផ្តាច់បានលើការអភិវឌ្ឍ ជាពិសេស លើការអប់រំបណ្តុះបណ្តាលបច្ចេកទេស និងវិជ្ជាជីវៈនៅកម្ពុជា។ឯកឧត្តមរដ្ឋមន្ត្រីបញ្ជាក់ថា ឧបករណ៍ សម្ភារៈ និងបរិក្ខារបច្ចេកទេស ដែលបានផ្តល់មកកម្ពុជា នឹងក្លាយជាវត្ថុទិព្វបន្ថែមទៀតដល់សិស្ស និសិ្សត TVET កម្ពុជាឱ្យមានឱកាសប្រើប្រាស់បច្ចេកវិទ្យារបស់ជប៉ុន ដើម្បីអនុវត្តលើទ្រឹស្តីដែលបានសិក្សា។ ជាមួយគ្នានេះ ឯកឧត្តម អ៊ូអិណុ អាត់ស៊ូស៊ី ឯកអគ្គរាជទូតជប៉ុនប្រចាំកម្ពុជា បានលើកឡើងថា នៅក្នុងវិស័យផលិតកម្មនៅកម្ពុជា ត្រូវការកម្លាំងពលកម្មជំនាញ។ ដូចនេះ ជំនួយនេះ នឹងជួយឱ្យយុវជនកម្ពុជាបង្កើននូវសមត្ថភាពជំនាញចាំបាច់ ដើម្បីចូលរួមចំណែកដល់កំណើនសេដ្ឋកិច្ចរបស់កម្ពុជា។ឯកឧត្តមឯកអគ្គរាជទូតបានបញ្ជាក់ អំពីការប្តេជ្ញាចិត្តរបស់រាជរដ្ឋាភិបាលជប៉ុនលើការពង្រឹងនូវទំនាក់ទំនងមិត្តភាពជាមួយកម្ពុជា និងបន្តផ្តល់ការគាំទ្រ ដើម្បីធានាដល់ការអភិវឌ្ឍទៅវិញទៅមកនៃប្រទេសទាំងពីរ។ការផ្តល់ឧបករណ៍ សម្ភារៈ និងបរិក្ខារបច្ចេកទេសក្នុងជំនាញអគ្គិសនី ដែលជាជំនួយឥតសំណងរបស់រាជរដ្ឋាភិបាលជប៉ុន មានតម្លៃសរុប ៤០០លានយ៉េន ស្មើនឹងប្រមាណ ៣,៦៣លានដុល្លារអាម៉េរិក បានប្រគល់ជូនវិទ្យាស្ថានចំនួន ៣ គឺវិទ្យាស្ថានជាតិពហុបច្ចេកទេសកម្ពុជា (NPIC), វិទ្យាស្ថានជាតិបណ្តុះបណ្តាលបច្ចេកទេស (NTTI), និង វិទ្យាស្ថានពហុបច្ចេកទេសព្រះកុសុមៈ (PPI)៕

ប្រជាពលរដ្ឋស្រុកប្រាសាទសំបូរ ថ្លែងនូវការដឹងគុណដល់រាជរដ្ឋាភិបាលដែលស្ថាបនាស្ពានជូនពួកគាត់

កំពង់ធំ ៖ ប្រជាពលរដ្ឋនៅស្រុកប្រាសាទសំបូរ ខេត្តកំពង់ធំ បានបង្ហាញនូវការសប្បាយរីករាយជាអនេក និងថ្លែងនូវការដឹងគុណ ចំពោះការ យកចិត្តទុកដាក់របស់រាជរដ្ឋាភិបាល បានជំរុញអភិវឌ្ឍន៍ហេដ្ឋរចនាសម្ព័ន្ធតាមជនបទ ជាពិសេសការស្ថាបនាស្ពាន ដែលជាសមិទ្ធផលថ្មី នៅក្នុងមូលដ្ឋានរបស់ពួគគាត់។ឯកឧត្តម ប៊ុន ច័ន្ទវណ្ណៈ រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ នៅថ្ងៃទី ១៧ ខែកញ្ញា ឆ្នាំ២០២៥នេះ បានដឹកនាំគណៈកម្មការអន្តរក្រសួងរួមមាន ក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ ចុះត្រួតពិនិត្យ វាយតម្លៃ លើការងារសាងសង់ស្ពានបេឡេតិ៍ កម្រាលដែកសាំសាំ ចំនួន ១ កន្លែង ប្រវែង ៣៦ ម៉ែត្រ ទទឹង ៤,២ ម៉ែត្រ និងសំណង់ផ្សេងៗទៀត ស្ថិតនៅភូមិជាំបឹង ឃុំស្រើង ឆ្លងទៅភូមិទឹកអណ្តូង ឃុំតាំងក្រសៅ ស្រុកប្រាសាទសំបូរ ខេត្តកំពង់ធំ, ក្នុងនោះប្រជាពលរដ្ឋរស់នៅក្នុងមូលដ្ឋាននោះ បានសម្តែងនូវការសប្បាយរីករាយ និងថ្លែងនូវដឹងគុណជានិច្ចចំពោះរាជរដ្ឋាភិបាល ដែលបានផ្តល់សមិទ្ធផលថ្មីមួយនេះនៅក្នុងមូលដ្ឋានរបស់ពួគគាត់ ដែលនេះគឺជាការចូលរួមចំណែកដ៏សំខាន់ លើកកម្ពស់ការរស់នៅ ខណៈដែលកន្លងមកប្រជាពលរដ្ឋនៅមូលដ្ឋាននេះ តែងតែជួបការលំបាកជាច្រើន នៅក្នុងការធ្វើដំណើរ ការដឹកជញ្ជូនកសិផល ជាពិសេសនៅពេលដែលមានបញ្ហាជំងឺដង្កាត់ ដែលត្រូវការដឹកជញ្ជូនទៅកាន់មន្ទីរពេទ្យជាដើម។ជុំវិញគម្រោងស្ពានខាងលើនេះ, ឯកឧត្តមរដ្ឋលេខាធិការ លើកឡើងថា ជុំវិញការអភិវឌ្ឍន៍នៅតាមជនបទ, ក្រសួងអភិវឌ្ឍន៍ ជនបទដែលជាសេនាធិការរបស់រាជរដ្ឋាភិបាល បាននិងកំពុងផ្ដោតការយកចិត្តទុកដាក់យ៉ាងខ្លាំង នៅលើការងារស្ថាបនាហេដ្ឋារចនា- សម្ព័ន្ធនានានៅតាមមូលដ្ឋានដូចជា ផ្លូវដីស ផ្លូវល្បាយក្រួស ផ្លូវកៅស៊ូពីរជាន់ និងផ្លូវក្រាលបេតុង និងការស្ថាបនាស្ពានជាដើម ដែល ស្ថិតនៅក្រោមក្របខណ្ឌក្រសួងអភិវឌ្ឍន៍ជនបទ ដោយបាននិងកំពុងផ្តល់អត្ថប្រយោជន៍ដល់ប្រជាជននៅតាមសហគមន៍ មានផ្លូវ និង ស្ពាន ដោបានកំពុងបង្កើតបរិយាកាសអំណោយផលដល់ការរស់នៅរបស់ប្រជាពលរដ្ឋ។ឯកឧត្តមរដ្ឋលេខាធិការ បន្ថែមថា ជុំវិញការស្ថាបនា ស្តារ និងថែទាំផ្លូវ និងស្ពាននៅតាមជនបទនេះ រាជរដ្ឋាភិបាលក្រោម ការដឹកនាំប្រកបដោយគតិបណ្ឌិត របស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភា បានសម្រេចនូវសមិទ្ធផលជាច្រើនរួចមកហើយ ដែលជាមូលដ្ឋានសម្រាប់រាជរដ្ឋាភិបាលបន្តវេន ដែលដឹកនាំដោយប្រកបដោយ ភាពវ៉ៃឆ្លាត និងប៉ិនប្រសព្វ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា, ដោយសម្តេចទាំងទ្វេ មានចក្ខុវិស័យច្បាស់លាស់ ក្នុងនោះក្រៅពីការរក្សាសន្តិភាព ស្ថិរភាពសង្គម គឺការជំរុញអភិវឌ្ឍដោយធ្វើឱ្យប្រទេសជាតិរីកចម្រើនលើ គ្រប់វិស័យ។ ចំពោះការស្ថាបនាស្ពានខាងលើនេះដែរ, ឯកឧត្តមរដ្ឋលេខាធិការ បានកោតសរសើរដល់នាយកដ្ឋានផ្លូវលំជនបទផងដែរ ដែលបានខិតខំប្រឹងប្រែងនៅលើការងារស្ថាបនា សម្រេចបានសមិទ្ធផលល្អប្រសើរ, ព្រោះការស្ថាបនាស្ពាននៅក្នុងតំបន់នេះ ពិតជា មានសារៈសំខាន់ណាស់ ដើម្បីលើកកម្ពស់ការរស់នៅរបស់ប្រជាពលរដ្ឋ មានស្ពានធ្វើដំណើរ កាត់បន្ថយពេលវេលា និងការជួបនូវ ឧបទ្ទវហេតុផ្សេងៗ ជាពិសេសនៅក្នុងរដូវវស្សានេះជាដើម៕អត្ថបទ៖ សុន រ៉ាឌី

អភិបាលខេត្តបន្ទាយមានជ័យជួបប្រជុំជាមួយអភិបាលខេត្តស្រះកែវដើម្បីស្វែងរកដំណោះស្រាយល្អជូនពលរដ្ឋខេត្តទាំងពីរ

នៅព្រឹកថ្ងៃទី១៧ ខែកញ្ញា ឆ្នាំ២០២៥ ឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យបានជួបប្រជុំជាមួយអភិបាលខេត្តស្រះកែវ នៅច្រកព្រំដែនអន្តរជាតិប៉ោយប៉ែត ដើម្បីពិភាក្សាសម្របសម្រួលស្វែងរកដំណោះស្រាយល្អជូនប្រជាពលរដ្ឋនៃខេត្តទាំងពីរ។ ក្នុងកិច្ចប្រជុំនោះ ឯកឧត្តម អ៊ុ រាត្រី អភិបាលខេត្តបន្ទាយមានជ័យបានលើកសំណើទៅភាគីថៃចំនួន ៤ ចំណុចរួមមាន៖ ១-ស្នើសុំរក្សាស្ថានភាពដើមដែលមាន កុំពង្រីកវិសាលភាពនៃបញ្ហា ឬខ្វែងគំនិតគ្នាហើយរង់ចាំការសម្រេចពីគណៈកម្មាធិការចម្រុះព្រំដែននៃប្រទេសទាំកម្ពុជាថៃ។ ២-ក្នុងករណីធ្វើទៅបាន ភាគីថៃត្រូវអនុញ្ញាតឱ្យប្រជាពលរដ្ឋចូលទៅរស់នៅក្នុងផ្ទះរបស់ពួកគាត់វិញ។ ភាគីថៃត្រូវដោះបន្លាលួស ស្បៃ និងកង់ឡាន ហើយរង់ចាំការសម្រេចរបស់ JBC ប្រទេសទាំងពីរដោយគោរពយ៉ាងខ្ជាប់ខ្ជួនតាម MOU ឆ្នាំ២០០០ និង TOR ឆ្នាំ២០០០។ ៣-ស្នើសុំភាគីថៃជៀសវាងសកម្មភាពផ្សេងៗក្នុងដំណាក់កាលដែលមិនទាន់មានការប្រជុំសម្រេចពីគណៈកម្មការចម្រុះព្រំដែន នៃប្រទេសទាំងពីរកម្ពុជា-ថៃដូចជា៖ ការដាក់បន្លាលួសបន្ថែម ការចេញបណ្ណកម្មសិទ្ធិ ការធ្វើឱ្យប៉ះពាល់ដល់ផ្ទះសម្បែង និងទ្រព្យសម្បតិ្តប្រជាពលរដ្ឋដែលនៅជាប់ក្នុងបន្លាលួស ការបញ្ជូនប្រជាជនថៃមកកាន់កាប់ទីតាំងដែលមិនទាន់មានភាពដាច់ស្រេច។ល។ ៤-ករណីដែលពុំមែនជាភារកិច្ច និងសមត្ថកិច្ច របស់រដ្ឋបាលខេត្តត្រូវបញ្ជូនទៅ GBC និង JBC។

កាកបាទក្រហមកម្ពុជា បើកយុទ្ធនាការផ្សព្វផ្សាយស្តីពីចរាចរណ៍ផ្លូវគោកក្នុងឱកាសពិធីបុណ្យកាន់បិណ្ឌ និងភ្ជុំបិណ្ឌ

ដើម្បីចូលរួមទប់ស្កាត់គ្រោះថ្នាក់ចរាចរណ៍ផ្លូវគោក ពិសេសក្នុងឱកាសពិធីបុណ្យកាន់បិណ្ឌនិងភ្ជុំបិណ្ឌនេះ នាព្រឹកថ្ងៃទី១៧ ខែកញ្ញា ឆ្នាំ២០២៥ នេះ កាកបាទក្រហមកម្ពុជា បានសហការជាមួយអាជ្ញាធរមានសមត្ថកិច្ច បើកយុទ្ធនាការស្តីពី យុវជន និងការលើកកម្ពស់សុវត្ថិភាពចរាចរណ៍ផ្លូវគោក ក្រោមអធិបតីភាព លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា និងបានការអញ្ជើញពីឯកឧត្តមអគ្គលេខាធិការរងទី២ ព្រមទាំងវត្តមានចូលរួមពី ឯកឧត្តម លោកជំទាវ ថ្នាក់ដឹកនាំ មន្ត្រីបុគ្គលិកថ្នាក់កណ្តាល យុវជនកាកបាទក្រហមកម្ពុជា និងអាជ្ញាធរ សរុបចំនួន ១១១នាក់ ស្រី៤៥នាក់។ ក្នុងឱកាសនោះដែរ លោកជំទាវអគ្គលេខាធិការ បាននាំនូវប្រសាសន៍ផ្តាំផ្ញើសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងកោតសរសើរចំពោះឆន្ទៈរបស់ក្រុមប្រតិបត្តិ យុវជន និងអ្នកស្ម័គ្រចិត្តកាកបាទក្រហមកម្ពុជា ដែលបានលះបង់កម្លាំងកាយ កម្លាំងចិត្ត និងពេលវេលាផ្ទាល់ខ្លួន ដែលបានបំពេញការងារប្រកបដោយប្រសិទ្ធភាពខ្ពស់។ ក្នុងឱកាសបុណ្យកាន់បិណ្ឌនិងភ្ជុំបិណ្ឌនេះដែរ លោកជំទាវអគ្គលេខាធិការ បានផ្តាំផ្ញើជូនដល់ប្រជាពលរដ្ឋខ្មែរទាំងអស់ សូមជួបតែពុទ្ធពរទាំង៤ប្រការ និងសូមធ្វើដំណើរប្រកបដោយសុវត្ថិភាពគ្រប់ពេលវេលា និងទីកន្លែង ព្រមទាំងសំណូមពរដល់ប្រជាពលរដ្ឋចូលរួមគោរពច្បាប់ចរាចរណ៍ តាមការអំពាវនាវរបស់ក្រសួងសាធារណការ នឹងដឹកជញ្ជូន កាលពីថ្ងៃទី៧ ខែកញ្ញា មានចំនួន ៩ចំណុច៖ ១- កុំបើកបរលើសល្បឿនកំណត់ គោរពសិទ្ធិអាទិភាព បើកបរប្រកាន់ស្តាំ, ២- សូមកុំបើកបរក្រោមឥទ្ធិពលនៃគ្រឿងស្រវឹង ឬគ្រឿងញៀន, ៣- ត្រូវគោរពសិទ្ធិអាទិភាព គោរពភ្លើង-ផ្លាកសញ្ញាចរាចរណ៍ និងសញ្ញាបញ្ជារបស់មន្ត្រីនគរបាលចរាចរណ៍ផ្លូវគោក, ៤-ត្រូវបើកបរក្នុងគន្លងផ្លូវដែលកំណត់ដោយច្បាប់ស្តីពីចរាចរណ៍ផ្លូវគោក និងមិនត្រូវបើកបរជាន់លើគំនូសសញ្ញាបែងចែកគន្លងផ្លូវ, ៥-ត្រូវប្រុងប្រយ័ត្នជានិច្ចក្នុងការបត់ ការជែង ការចត និងការឈប់, ៦-ត្រូវត្រួតពិនិត្យយានយន្តមុនចេញដំណើរ ដូចជាសំបកកង់ ហ្វាំងភ្លើងបំភ្លឺ និងចង្កូត ជាដើម, ៧-ត្រូវពាក់មួកសុវត្ថិភាពឱ្យបានត្រឹមត្រូវជានិច្ច ក្នុងពេលធ្វើដំណើរតាមទោចក្រយានយន្តទោះជិត ឬឆ្ងាយ, ៨- បន្តអប់រំផ្សព្វផ្សាយស្តីពីសុវត្ថិភាពចរាចរណ៍នៅគ្រឹះស្ថានសិក្សា ផ្តោតលើសិស្ស និស្សិត អ្នកប្រើប្រាស់ម៉ូតូ, ៩-សូមកុំផ្ទុកអ្នកដំណើរ ឬទំនិញលើសចំណុះ។បន្ទាប់ពីពិធីបើកយុទ្ធនាការខាងលើនេះ ឯកឧត្តមអគ្គលេខាធិការរងទី២ កាកបាទក្រហមកម្ពុជា ដឹកនាំក្រុមការងារជាពីរក្រុមចុះអប់រំផ្សព្វផ្សាយលើកកម្ពស់សុវត្ថិភាពចរាចរណ៍ផ្លូវគោក នៅតាមគោលដៅចំនួន ២កន្លែងផ្សេងគ្នា ស្ថិតក្នុងខណ្ឌពោធិ៍សែនជ័យក្នុងរាជធានីភ្នំពេញ ក្នុងនោះគោលដៅទី១ ទល់មុខផ្សារស៊ិនជូរីផ្លាហ្សា និងគោលដៅទី២ នៅបរិវេណស្តុបទួលពង្រ។ សូមបញ្ជាក់ថា៖ ក្នុងយុទ្ធនាការនេះ ក៏មានកម្មវិធីឆ្លើយសំណួរយកវត្ថុអនុស្សវរីមានដូចជា ក្រមា សៀវភៅសរសេរ និងមួកសុវត្ថិភាព ព្រមទាំងចែកបណ្ណផ្សព្វផ្សាយអំពីច្បាប់ចរាចរណ៍ផ្លូវគោក និងបណ្ណផ្សព្វផ្សាយសារសុខភាពសហគមន៍មានសុខភាពល្អ ផងដែរ។គួរបញ្ជាក់ដែរថា៖ ក្នុងឆ្នាំ២០២៤កន្លងទៅ គ្រោះថ្នាក់ចរាចរណ៍បានកើតឡើង២,៨៤៤លើក និងមានអ្នករងរបួសស្រាលចំនួន១,៤៤៧នាក់ អ្នករងរបួសធ្ងន់ចំនួន២,២៧៣នាក់ និងមានអ្នកស្លាប់សរុបប្រមាណ១,៥០៩នាក់។ ក្នុងនោះមូលហេតុដែលបង្កឱ្យមានគ្រោះថ្នាក់រួមមាន៖ បើកបរល្មើសល្បឿន ៥០%, មិនគោរពសិទ្ធិ ២១%, មិនប្រកាន់ស្តាំ ១១% , ប្រជែងគ្រោះថ្នាក់ ៧%, ស្រវឹង ៥%, បត់ ២%, កត្តាយានយន្ត ២%, ងងុយ១% និង មិនគោរពសញ្ញាចរាចរណ៍ ១%។ ក្នុងចំណោមអ្នកស្លាប់ជាអ្នកជិះម៉ូតូមានចំនួន ៧៧% (៥៣៧/៦៩៤នាក់) មិនពាក់មួកសុវត្ថិភាពចំនួន៦២% (៣៣២/ ៥៣៧នាក់)។ គ្រោះថ្នាក់ភាគច្រើនកើតឡើងនៅរាជធានីភ្នំពេញ ៣៦០លើក ខេត្តព្រះសីហនុ ៨២លើក និងខេត្តកណ្តាល ៦៦លើក៕

ឯកឧត្តម ហ៊ុន ម៉ានី អរគុណ និងកោតសរសើរអាជ្ញាធរខេត្តព្រះវិហារបានរៀបចំកម្មវិធីរត់សហគមន៍ «ផ្លូវលំកោះកេរ» បង្កភាពសប្បាយរីករាយដល់បងប្អូនប្រជាពលរដ្ឋជាង១ពាន់នាក់បានចូលរួម

ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសារធារណៈ និងជាប្រធានសហភាពសហព័ន្ធយុវជនកម្ពុជា (ស.ស.យ.ក) នៅរសៀលថ្ងៃទី១៧ ខែកញ្ញានេះ បានផ្ញើសារថ្លែងអំណរគុណ និងកោតសរសើរចំពោះអាជ្ញាធរខេត្តព្រះវិហារ និងភាគីពាក់ព័ន្ធ ដែលបានរៀបចំកម្មវិធី រត់សហគមន៍ «ផ្លូវលំកោះកេរ» ដែលត្រូវបានប្រារព្ធធ្វើឡើងក្នុបរិវេណប្រាសាទកោះកេរផ្ទាល់ ស្ថិតក្នុងឃុំស្រយង់ ស្រុកគូលែន ខេត្តព្រះវិហារ ឡើងដែលបង្កជាភាពសប្បាយរីករាយ។ឯកឧត្តមបានថ្លែងថា៖«ព្រឹកនេះ ខ្ញុំរួមជាមួយឯកឧត្តមអភិបាលនៃគណៈអភិបាលខេត្តព្រះវិហារ ក្រុមការងារព្រមទាំងបងប្អូនប្រជាពលរដ្ឋជាង ១ពាន់នាក់ បានចូលរួមកម្មវិធីរត់សហគមន៍ «ផ្លូវកោះកេរ» ដែលត្រូវបានប្រារព្ធធ្វើឡើងក្នុបរិវេណប្រាសាទកោះកេរផ្ទាល់ ស្ថិតក្នុងឃុំស្រយង់ ស្រុកគូលែន ខេត្តព្រះវិហារ»។ ឯកឧត្តមបានបន្តថា កម្មវិធីនេះត្រូវបានរៀបចំឡើងដើម្បីអបអរសាទរខួប២ឆ្នាំ នៃការចុះបញ្ជីរមណីយដ្ឋានប្រាសាទកោះកេរ ក្នុងបញ្ជីបេតិកភណ្ឌពិភបលោក ដោយមានការចូលរួមពីបងប្អូនជាង ១០០០ នាក់និង ការរត់មានចំងាយជាង ៩គីឡូមែត្រ ជុំវិញផ្លូវប្រាសាទកោះកេរ ដើម្បីលើកស្ទួយវប្បធម៌ប្រពៃណី និងបេតិកភណ្ឌដូនតាយើងបានបន្សល់ទុកឱ្យយើង។ឯកឧត្តមបានបញ្ជាក់ថា៖«ខ្ញុំសូមអរគុណ និងកោតសរសើរចំពោះអាជ្ញាធរខេត្តដែលបានរៀបចំកម្មវិធីនេះឡើងដែលបង្កជាភាពសប្បាយរីករាយ និង សូមចូលរួមអបអរសាទរចំពោះអ្នកដែលទទួលបានជ័យលាភីក្នុងកម្មវិធី»៕

អាជ្ញាធរខេត្តប៉ៃលិន សំណេះសំណាលជាមួយពលករខ្មែរវិលមកពីប្រទេសថៃ

ប៉ៃលិន៖ ថ្ងៃទី១៧ ខែកញ្ញា នេះ លោកជំទាវបណ្ឌិត បាន ស្រីមុំ អភិបាលខេត្តប៉ៃលិន និងក្រុមការងារ ព្រម ទាំងអាជ្ញាធរមូលដ្ឋាន បានអញ្ជើញជួបសំណេះសំណាលសួរសុខទុក្ខដោយផ្ទាល់ជាមួយពលករខ្មែរដែល បានវិលត្រឡប់មកពីប្រទេសថៃ ចំនួន១៦០នាក់ នៅក្រុងប៉ៃលិន ដែលជាការបង្ហាញពីការយកចិត្តទុក ដាក់យ៉ាងកក់ក្ដៅពីសំណាក់អាជ្ញាធរខេត្ត និងរាជរដ្ឋាភិបាលកម្ពុជា។លោកជំទាវ បានមានប្រសាសន៍នាំមកនូវក្ដីនឹករលឹក និងសេចក្ដីស្រលាញ់របស់ សម្តេចតេជោ ហ៊ុន សែន និងសម្តេចធិបតី ហ៊ុន ម៉ាណែត ចំពោះប្រជាពលរដ្ឋដែលត្រឡប់មកពីប្រទេសថៃ ក្នុងគ្រានេះ ហើយសម្តេចទាំងពីរ តែងតែយកចិត្តទុកដាក់ចំពោះប្រជាពលរដ្ឋគ្រប់កាលទេសៈ ដោយ មិនទុកពលរដ្ឋ ណាម្នាក់ចោលដោយមិនបានដឹង និងមិនបានដោះស្រាយនោះឡើយ។លោកជំទាវ បានមានប្រសាសន៍អំពាវនាវដល់ពលករដែលទើបត្រឡប់មកពីប្រទេសថៃវិញ សូម បន្ដស្នាក់នៅ និងធ្វើការនៅក្នុងស្រុក ព្រោះបច្ចុប្បន្ននេះ ប្រទេសកម្ពុជា មានតម្រូវការបុគ្គលិកធ្វើការជា ច្រើនផ្នែកផងដែរ ក្នុងពេលដែលបញ្ហាព្រំដែន រវាងប្រទេសកម្ពុជា+ថៃ មិនទាន់ដោះស្រាយរួចរាល់ ដែល ការចំណាកស្រុកត្រឡប់ទៅធ្វើការនៅប្រទេសថៃវិញនោះ វាមិនមែនជារឿងងាយស្រួលឡើយ និងអាចជួប បញ្ហាប្រឈម ដូច្នេះត្រូវរួបរួមសាមគ្គីជាធ្លុងមួយ ក្នុងស្មារតីជាតិខ្មែរតែមួយ ដោយងាកមកស្វែងរកការងារ ធ្វើក្នុងប្រទេស ប្រើប្រាស់ផលិតផលក្នុងស្រុក រួមគ្នាពង្រឹងខឿនការពារជាតិ និងខឿនសេដ្ឋកិច្ចជាតិ ។ លោកជំទាវ បាន ស្រីមុំ បានមានប្រសាសន៍រំលឹកថា កន្លងមក រាជរដ្ឋាភិបាលកម្ពុជា បានណែនាំ ឱ្យក្រសួងការងារ និងបណ្ដុះបណ្ដាលវិជ្ជាជីវៈ ត្រៀមជួយស្វែងរកការងារក្នុងប្រទេសជូនពលករដែលត្រ លប់មកវិញ ដោយបច្ចុប្បន្ននៅក្នុងប្រទេស នៅខ្វះកម្លាំងពលកម្មជាមធ្យមជាង៧ម៉ឺននាក់ ហើយក្រសួង សេដ្ឋកិច្ច និងហិរញ្ញវត្ថុ ក្រសួង ស្ថាប័ន ពាក់ព័ន្ធ ត្រៀមលក្ខណៈក្នុងការជួយអន្តរាគមន៍ ដល់ពលករខ្មែរ ដែលត្រូវត្រឡប់មកវិញ ក្នុងការសម្រួលជីវភាពប្រចាំថ្ងៃ តាមរយៈកញ្ចប់អន្តរាគមន៍សេដ្ឋកិច្ច និងសង្គមកិច្ច មួយចំនួន ជាមួយគ្នានេះ សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា ពិនិត្យមើលលទ្ធ ភាពក្នុងការជួយសម្រាលបន្ទុកហិរញ្ញវត្ថុសម្រាប់ប្រជាពលករដែលត្រលប់មកពីថៃវិញ ចំពោះអ្នកដែល មានជាប់ជំពាក់បំណុលធនាគារ ឬគ្រឹះស្ថានមីក្រូហិរញ្ញវត្ថុ ទៅតាមលទ្ធភាព ឬក្នុងមួយរយៈពេលកំណត់ ណាមួយដែលអាចធ្វើទៅបាន។លោក ភី ឡងឌី ប្រធានមន្ទីរការងារ និងបណ្តុះបណ្តាលវិជ្ជាជីវៈ ខេត្តប៉ៃលិន បានឱ្យដឹងថា គិត មកដល់ពេលនេះ នៅខេត្តប៉ៃលិន មានពលករត្រឡប់មកពីប្រទេសថៃ ចំនួន១ ៥០២នាក់ និងទទួលបាន ការងារធ្វើ ចំនួន៧៥៩នាក់ ៕

ថ្នាក់ដឹកនាំធនាគារជាតិចូលរួមកាន់បិណ្ឌទី១០ នៅវត្តឧណ្ណាលោម ឧទ្ទិសកុសលជូនបុព្វការីជន និងវីរជនស្នេហាជាតិ

ថ្នាក់ដឹកនាំ និងមន្រ្តីរាជការធនាគារជាតិនៃកម្ពុជា ទទួលកាន់បិណ្ឌវេនទី១០ នៅវត្តឧណ្ណាលោម ប្រគេនចង្ហាន់ និងបច្ច័យ៤ ដល់ព្រះសង្ឃគង់ចាំព្រះវស្សា និងដើម្បីឧទ្ទិសកុសលជូនបុព្វការីជន វីរជនស្នេហាជាតិ ញាតិកាទាំងប្រាំពីរសន្តាន ពិសេសវីរកងទ័ពដែល ពលីការពារបូរណភាពទឹកដីជាដើម។ លោកជំទាវអគ្គមហាឧបាសិកាពុទ្ធសាសនូបត្ថម្ភក៍ ខៀវ ស៊ីណា និងលោកជំទាវបណ្ឌិត ជា សិរី ទេសាភិបាលធនាគារជាតិ នៃកម្ពុជា បានទទួលកាន់បិណ្ឌវេនទី១០ និងចាត់ចែងចង្ហាន់ប្រគេនព្រះសង្ឃគង់នៅវត្តឧណ្ណាលោម រាជធានីភ្នំពេញ ត្រូវនៅថ្ងៃទី១៧ ខែកញ្ញា ឆ្នាំ២០២៥ ដោយមានការចូលរួមពីថ្នាក់ដឹកនាំ ក្រុមគ្រួសារ និងមន្ត្រី-បុគ្គលិក ធនាគារជាតិនៃកម្ពុជា។ នៅក្នុងពិធីបុណ្យ កាន់បិណ្ឌទី១០នេះ លោកជំទាវអគ្គមហាឧបាសិកាពុទ្ធសាសនូបត្ថម្ភក៍ និងលោកជំទាវបណ្ឌិត ទេសាភិបាលធនាគារជាតិនៃកម្ពុជា ព្រមទាំងពុទ្ធបរិស័ទទាំងអស់ បានអញ្ជើញប្រតិបត្ដិព្រះធម៌ សូត្រមន្ដ នមស្ការ ចម្រើនព្រះបរិត្ដ រាប់បាត្រ ប្រគេនព្រះសង្ឃ តាមគន្លង ប្រពៃណីព្រះពុទ្ធសាសនា។ ពិធីបុណ្យកាន់បិណ្ឌនេះ ត្រូវបានរៀបចំឡើងតាមប្រពៃណីព្រះពុទ្ធសាសនា ក្នុងគោលបំណងទំនុកបម្រុងនិងចាត់ចែងចង្ហាន់ និងបច្ច័យ៤ ប្រគេនព្រះសង្ឃគង់ចាំព្រះវស្សា និងឧទ្ទិសមហាកុសលផលបុណ្យដល់ដួងវិញ្ញាណខន្ធ ឯកឧត្តម ជា ចាន់តូ អតីតទេសា- ភិបាលកិត្តិយសធនាគារជាតិនៃកម្ពុជា និងបុព្វការីជនទាំងឡាយមានមាតា-បិតា ជីដូន-ជីតាជាដើម។ក្រៅពីការឧទ្ទិសកុសលជូនបុព្វការីជន សាច់សារលោហិត, អ្វីដែលថ្នាក់នាំ មន្រ្តីរាជការ បុគ្គលិក និងប្រជាពលរដ្ឋ មិនអាច បំភ្លេចបានគឺគុណបំណាច់ និងការលះបង់ដ៏ធំធេងរបស់វិរះយុទ្ធជនកម្ពុជា ដែលបានពលីជីវិតដើម្បីជាតិមាតុភូមិ និងសាសនា ជាពិសេសចំពោះវិរះយុទ្ធជនពលីជីវិតលើកិច្ចការការពារទឹកដី នៃការប៉ះទង្គិចក្នុងជម្លោះព្រំដែនកម្ពុជា-ថៃ នាពេលថ្មីៗ ក្នុងនោះ លោកជំទាវបានឧទ្ទិសមហាកុសលផលបុណ្យ ជូនដល់វិញ្ញាណក្ខ័នអស់លោកទាំងនោះ បានសោយសុខនាឋានបុរមសុខកុំបីឃ្លៀង ឃ្លាតឡើយ។ ក្រៅពីនេះ លោកជំទាវក៏បានជូនពរដល់វិរះយុទ្ធជនកំពុងសម្រាកព្យាបាល ឱ្យបានឆាប់ជាសះស្បើយ និងមានសុខភាព ល្អបរិបូរណ៍ ប្រកបដោយកំលាំងខ្លាំងក្លា ដើម្បីបន្តបំពេញភារកិច្ចដ៏ឧត្ដង្គឧត្ដមជូនជាតិមាតុភូមិ ព្រមទាំងបបួងសួង សូមឲ្យមនុញ្ញផល កើតចេញពីបុណ្យ ផ្ដល់នូវសេចក្ដីសុខចម្រុងចម្រើន ដល់ថ្នាក់ដឹកនាំនៃប្រទេសកម្ពុជាគ្រប់លំដាប់ថ្នាក់។សូមបញ្ជាក់ថា នៅក្នុងថ្ងៃកាន់បិណ្ឌទី១០នេះ លោកជំទាវ ខៀវ ស៊ីណា និងលោកជំទាវបណ្ឌិត ជា សិរី បានប្រគេនគ្រឿងបរិភោគ-ឧបភោគមួយចំនួនដល់ព្រះសង្ឃរួមមាន៖ អង្ករចំនួន ១០ បាវ, មីជាតិ ១៨ កេស, ស្ករស ៥ បាវ, ទឹកដោះគោ ៥កេស, ទឹកសុទ្ធ ៥០ កេស, ទឹកក្រូច ២៥ កេស, ទឹកផ្លែឈើ ២៥ កេស, ទឹកត្រីនិងទឹកស៊ីអ៊ីវ ២០ យួរ, អំបិល ២០ គីឡូ និងត្រីខ ៥ កេស សរុបបច្ច័យ ទាំងអស់មានទឹកប្រាក់សរុបជាង ៦៤ លានរៀល៕ អត្ថបទ៖ សុន រ៉ាឌី

ព្រះសង្ឃនិងពលរដ្ឋធ្វើបុណ្យឧទ្ទិសកុសលដល់យុទ្ធជនពលី និងអំពាវនាវឱ្យថៃដោះលែងកងទ័ព១៨រូប

ស្វាយររៀង ៖ ព្រះសង្ឃ និងពលរដ្ឋ ក្នុងខេត្តស្វាយរៀងបានរួមគ្នាធ្វើបុណ្យឧទ្ទិសកុសលដល់យុទ្ធជនពលី និងអំ ពាវនាវឱ្យថៃដោះលែងកងទ័ពកម្ពុជា១៨រូបត្រឡប់មកវិញ ។ព្រះសង្ឃ ពុទ្ធបរិស័ទ និងពលរដ្ឋ វត្តព្រះពន្លា ឃុំព្រះពន្លា ស្រុកកំពង់រោទិ៍ ខេត្តស្វាយរៀង នៅក្នុង ថ្ងៃបុណ្យកាន់បិណ្ឌទី១០ ត្រូវថ្ងៃទី១៧ ខែកញ្ញា នេះ បានបន្តអំពាវនាវដល់រាជរដ្ឋាភិបាលថៃ កងទ័ពថៃ ធ្វើការដោះលែងវីរយុទ្ធជនកម្ពុជាទាំង១៨នាក់ ដែលថៃបានចាប់ខ្លួនទៅ ដោយខុសច្បាប់ ក្រោយបទឈប់ បាញ់ចូលជាធរមាន ឲ្យមកជួបជុំគ្រួសារ និងសង្គមជាតិកម្ពុជាវិញ ដោយឥតលក្ខខណ្ឌ។តំណាងព្រះសង្ឃ និងពលរដ្ឋ បានបញ្ជាក់ថា ប្រទេសកម្ពុជាត្រូវការសន្តិភាព និងការអភិវឌ្ឍប្រ ទេសក្រោមម្លប់សន្តិភាព មិនត្រូវការសង្គ្រាម។ កម្ពុជា ត្រូវការសាមគ្គីភាព ជាមួយនឹងប្រទេសជិតខាង ពិសេសប្រទេសនៅក្នុងសកលលោក ដូច្នេះភាគីថៃត្រូវប្រកាន់ភ្ជាប់ និងគោរពបូរណភាពទឹកដីរបស់កម្ពុជា ដើម្បីឲ្យពលរដ្ឋកម្ពុជារស់នៅក្នុងសេចក្តីសុខ ជួបជុំគ្រួសារដើម្បីស្ដារកសាងជីវភាពឡើងវិញ៕អត្ថបទ៖ ភា សារិត

ប្រមុខការទូតកម្ពុជា អរគុណអង្គការយូណេស្កូបានផ្តល់ជំនួយបច្ចេកទេសការការពារ និងអភិរក្សប្រាសាទព្រះវិហារដែលរងការប៉ះពាល់ដោយសារជម្លោះព្រំដែនកម្ពុជា-ថៃ នាពេលថ្មីៗនេះ

ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ បាន ទទួលជំនួបសម្តែងការគួរសម និងជម្រាបលារបស់ ឯកឧត្តម Sardar Umar Alam តំណាងអង្គការយូណេស្កូ ប្រចាំកម្ពុជា នៅថ្ងៃទី១៧ ខែកញ្ញា ឆ្នាំ២០២៥ នៅទីស្តីការក្រសួង ក្នុងឱកាសបញ្ចប់បេសកកម្មការងាររបស់ ឯកឧត្តម។ឯកឧត្តមឧបនាយករដ្ឋមន្ត្រី ប្រាក់ សុខុន បានកោតសរសើរ ឯកឧត្តម Sardar Umar Alam ចំពោះកិច្ចខិតខំប្រឹងប្រែង និងបន្តគាំទ្រកម្ពុជា ជាពិសេស ក្នុងការជំរុញអាទិភាពអភិវឌ្ឍន៍របស់កម្ពុជា លើវិស័យអប់រំ វប្បធម៌ បរិស្ថាន និងការអភិរក្សសម្បត្តិបេតិកភណ្ឌ។ ឯកឧត្តមឧបនាយករដ្ឋមន្ត្រី បានថ្លែងអំណរគុណចំពោះអង្គការយូណេស្កូ ដែលបានផ្តល់ជំនួយបច្ចេកទេសដល់កម្ពុជាក្នុងការការពារ និងអភិរក្ស ប្រាសាទព្រះវិហារ ដែលជាសម្បត្តិបេតិកភណ្ឌពិភពលោក ដែលបានទទួលរងនូវការប៉ះពាល់ដោយសារ ជម្លោះព្រំដែនកម្ពុជា-ថៃ នាពេលថ្មីៗនេះ និងបានបញ្ជាក់ជាថ្មីម្តងទៀតនូវការប្តេជ្ញាចិត្តមោះមុតរបស់កម្ពុដើម្បីបន្តពង្រឹងភាពជាដៃគូ និងកិច្ចសហប្រតិបត្តិការជាមួយអង្គការយូណេស្កូ នាពេលខាងមុខ។ឯកឧត្តម Sardar Umar Alam បានសម្តែងនូវអំណរគុណយ៉ាងជ្រាលជ្រៅចំពោះរាជរដ្ឋាភិបាល កម្ពុជា ជាពិសេស ឯកឧត្តមឧបនាយករដ្ឋមន្ត្រី ផ្ទាល់ ចំពោះការគាំទ្រ និងកិច្ចសហប្រតិបត្តិការជិតស្និទ្ធ ក្នុងអំឡុងបេសកកម្មការងាររបស់ឯកឧត្តមនៅកម្ពុជា ដែលនាំមកនូវសមិទ្ធផលគួរឱ្យកត់សម្គាល់ ក្នុងការពង្រឹងប្រព័ន្ធអប់រំ ការលើកកម្ពស់សន្តិភាពនិងការអភិវឌ្ឍដោយចីរភាព ព្រមទាំង ការអភិរក្សបេតិកភណ្ឌ វប្បធម៌។ ឯកឧត្តមក៏បានគូសបញ្ជាក់ពីសារៈសំខាន់នៃការរួមចំណែករបស់អង្គការយូណេស្កូក្នុងការធ្វើឱ្យ ជីវភាពរបស់ប្រជាពលរដ្ឋកម្ពុជាមានភាពប្រសើរឡើង។នាឱកាសជំនួបនេះដែរ ឯកឧត្តមឧបនាយករដ្ឋមន្ត្រី បានចូលរួមអបអរសាទរ ឯកឧត្តម Sardar Umar Alam ដែលត្រូវបានតែងតាំងជានាយកប្រចាំតំបន់សម្រាប់រដ្ឋប៉ាស៊ីហ្វិករបស់អង្គការយូណេស្កូ និង បានជូនពរ ឯកឧត្តម ទទួលបានជោគជ័យជាបន្តក្នុងភារកិច្ចថ្មី និងការងារនាពេលអនាគត៕

ចិនគាំទ្រហិរញ្ញវត្ថុប្រមាណ ២.៥ លានដុល្លារអាម៉េរិកសម្រាប់គម្រោងកិច្ចសហប្រតិបត្តិការមេគង្គ-ឡានឆាងដល់កម្ពុជា

ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា និងឯកឧត្តម វ៉ាង វិនពីន (WANG Wenbin) ឯកអគ្គរដ្ឋទូតនៃសាធារណរដ្ឋ ប្រជាមានិតចិន ប្រចាំកម្ពុជា បានអញ្ជើញចុះហត្ថលេខារួមគ្នាលើកិច្ចព្រមព្រៀង ស្តីពីមូលនិធិពិសេស សម្រាប់គម្រោងកិច្ចសហប្រតិបត្តិការមេគង្គ-ឡានឆាង ឆ្នាំ២០២៥ ដែលនឹងប្រព្រឹត្តទៅនៅថ្ងៃទី១៧ ខែកញ្ញា ឆ្នាំ២០២៥ នៅទីស្តីការក្រសួងការបរទេស និងសហប្រតិបត្តិការអន្តរជាតិ។ក្នុងក្របខ័ណ្ឌមូលនិធិពិសេសនៃកិច្ចសហប្រតិបត្តិការមេគង្គ-ឡានឆាង ឆ្នាំ២០២៥ គម្រោងកម្ពុជាសរុបចំនួន ១១ នឹងទទួលបានការគាំទ្រហិរញ្ញវត្ថុពីរដ្ឋាភិបាល នៃសាធារណរដ្ឋប្រជាមានិតចិន ដែលមានទឹកប្រាក់ប្រមាណ ២.៥ លានដុល្លារអាម៉េរិក។ គម្រោងទាំងនោះនឹងផ្តល់ផលប្រយោជន៍ជា ច្រើននៅតាមវិស័យផ្សេងៗ រួមមាន៖ ទេសចរណ៍ សុខាភិបាល កសិកម្ម ការអភិរក្សនិងការស្តារឡើងវិញ នូវតំបន់វប្បធម៌ ការអភិវឌ្ឍសហគ្រិនភាពស្ត្រី ការអប់រំបណ្តុះបណ្តាលបច្ចេកទេស និងវិជ្ជាជីវៈ ការលើក កម្ពស់ផលិតភាព និងការចាប់យកបច្ចេកវិទ្យាសម្រាប់សហគ្រាសមីក្រូ ធុនតូច និងមធ្យម និងការលុប បំបាត់ព័ត៌មានក្លែងក្លាយ ក៏ដូចជាការលើកកម្ពស់ការយល់ដឹងពីកិច្ចសហប្រតិបត្តិការមេគង្គ-ឡានឆាង។គួរកត់សម្គាល់ផងដែរថា ក្នុងរយៈពេល ១០ឆ្នាំកន្លងមកនេះ មូលនិធិពិសេសសម្រាប់គម្រោង កិច្ចសហប្រតិបត្តិការមេគង្គ-ឡានឆាង បានផ្តល់ជំនួយហិរញ្ញវត្ថុសម្រាប់គម្រោងចំនួន ៩៥ នៅកម្ពុជា។ ការអនុវត្តគំនិតផ្តួចផ្តើមសហការទាំងនេះ បង្ហាញពីការប្តេជ្ញាចិត្តរបស់កម្ពុជា និងចិន ដើម្បីរួមចំណែក យ៉ាងសំខាន់ដល់ការកសាងសហគមន៍វាសនារួមនៃសន្តិភាព វិបុលភាព និងការអភិវឌ្ឍប្រកបដោយ ចីរភាព សម្រាប់បណ្តាប្រទេសមេគង្គ-ឡានឆាងទាំងអស់៕

បណ្ដាញសង្គម

ព័ត៌មានថ្មីៗ

FFC បន្ថែមលីគយុវជនមួយកម្រិតទៀត សម្រាប់ក្រុមនៅភ្នំពេញ និងតំបន់ជុំវិញ

ប្រជាជនអ៊ីរ៉ង់ប្ដេជ្ញាដើរតាមលោក Mojtabaបន្ទាប់ពីបទឈប់បាញ់ត្រូវបានប្រកាសជាមួយអាមេរិក និងអ៊ីស្រាអែល

កូរ៉េខាងជើងបាញ់អាវុធសង្ស័យថាជាមីស៊ីល ខណៈទីក្រុងព្យុងយ៉ាងបដិសេធក្តីសង្ឃឹមការទូតរបស់ទីក្រុងសេអ៊ូល

ប្រទេសប៉ាគីស្ថាន បិទហាង និងផ្សារ មុនម៉ោងកកំណត់ ដើម្បីសន្សំសំចៃថាមពល

ទស្សនកិច្ចរបស់ប្រមុខ NATO ទៅទីក្រុងវ៉ាស៊ីនតោន មានបំណងរក្សាអឺរ៉ុបឲ្យនៅលើផែនទីរបស់លោក Trump

ប្រជាជនអ៊ីរ៉ង់ បានប្រមូលផ្តុំគ្នា និងគ្រវីទង់ជាតិ បន្ទាប់ពីការប្រកាសបទឈប់បាញ់

នាយករដ្ឋមន្ត្រីប៉ាគីស្ថាន៖ បទឈប់បាញ់រវាងអាមេរិក និងអ៊ីរ៉ង់ គ្របដណ្តប់ «គ្រប់ទីកន្លែង» រួមទាំងប្រទេសលីបង់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877