នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេចតេជោ ហ៊ុន សែន ផ្ដាំផ្ញើ​ដល់​ឯកអគ្គរដ្ឋទូត​តួកគី​យ៉េ​ចប់​អាណត្តិ​ឱ្យបន្ត​ធ្វើ​ជា​ទូត​របស់​កម្ពុជា​ផ្សព្វ​ផ្សាយ​ពី​កម្ពុជា ដើម្បីទាក់ទាញវិនិយោគ និងទេសចរណ៍មកម្ពុជា
សម្តេចធិបតី អញ្ជើញចូលរួមកិច្ចពិភាក្សា និង​ថ្លែង​សុន្ទរ​គន្លឹះ​ក្នុង​កិច្ច​ប្រជុំ​កំពូល​ស្តីពី​សុខ​ភាព​តែមួ​យ និងជួ​បជាមួយបណ្ដាថ្នាក់ដឹកនាំប្រទេសមួយចំនួនទៀតនៅបារាំង​
វិស័យឯកជនសាធារណរដ្ឋកូរ៉េ ស្នើកម្ពុជា ពង្រឹងកិច្ច​សហប្រតិបត្តិការ​លើ​វិស័យ​អាកាស​ចរណ៍​បន្ថែម​រវាង​ប្រទេសទាំងពីរ
ក្នុងមួយខែៗរដ្ឋចេញខាតជាង ៤៧លានដុល្លារ ដើម្បីជួយសម្រាលបន្ទុកអត្រាពន្ធ និងអាករពីវិបត្តិប្រេងឥន្ធនៈ

ព័ត៌មានជាតិ

ប្រមុខការទូតកម្ពុជា អរគុណអង្គការយូណេស្កូបានផ្តល់ជំនួយបច្ចេកទេសការការពារ និងអភិរក្សប្រាសាទព្រះវិហារដែលរងការប៉ះពាល់ដោយសារជម្លោះព្រំដែនកម្ពុជា-ថៃ នាពេលថ្មីៗនេះ

2025/09/17 04:01:47 pm        354
Facebook Telegram Linkin
ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ បាន ទទួលជំនួបសម្តែងការគួរសម និងជម្រាបលារបស់ ឯកឧត្តម Sardar Umar Alam តំណាងអង្គការយូណេស្កូ ប្រចាំកម្ពុជា នៅថ្ងៃទី១៧ ខែកញ្ញា ឆ្នាំ២០២៥ នៅទីស្តីការក្រសួង ក្នុងឱកាសបញ្ចប់បេសកកម្មការងាររបស់ ឯកឧត្តម។ឯកឧត្តមឧបនាយករដ្ឋមន្ត្រី ប្រាក់ សុខុន បានកោតសរសើរ ឯកឧត្តម Sardar Umar Alam ចំពោះកិច្ចខិតខំប្រឹងប្រែង និងបន្តគាំទ្រកម្ពុជា ជាពិសេស ក្នុងការជំរុញអាទិភាពអភិវឌ្ឍន៍របស់កម្ពុជា លើវិស័យអប់រំ វប្បធម៌ បរិស្ថាន និងការអភិរក្សសម្បត្តិបេតិកភណ្ឌ។ ឯកឧត្តមឧបនាយករដ្ឋមន្ត្រី បានថ្លែងអំណរគុណចំពោះអង្គការយូណេស្កូ ដែលបានផ្តល់ជំនួយបច្ចេកទេសដល់កម្ពុជាក្នុងការការពារ និងអភិរក្ស ប្រាសាទព្រះវិហារ ដែលជាសម្បត្តិបេតិកភណ្ឌពិភពលោក ដែលបានទទួលរងនូវការប៉ះពាល់ដោយសារ ជម្លោះព្រំដែនកម្ពុជា-ថៃ នាពេលថ្មីៗនេះ និងបានបញ្ជាក់ជាថ្មីម្តងទៀតនូវការប្តេជ្ញាចិត្តមោះមុតរបស់កម្ពុដើម្បីបន្តពង្រឹងភាពជាដៃគូ និងកិច្ចសហប្រតិបត្តិការជាមួយអង្គការយូណេស្កូ នាពេលខាងមុខ។ឯកឧត្តម Sardar Umar Alam បានសម្តែងនូវអំណរគុណយ៉ាងជ្រាលជ្រៅចំពោះរាជរដ្ឋាភិបាល កម្ពុជា ជាពិសេស ឯកឧត្តមឧបនាយករដ្ឋមន្ត្រី ផ្ទាល់ ចំពោះការគាំទ្រ និងកិច្ចសហប្រតិបត្តិការជិតស្និទ្ធ ក្នុងអំឡុងបេសកកម្មការងាររបស់ឯកឧត្តមនៅកម្ពុជា ដែលនាំមកនូវសមិទ្ធផលគួរឱ្យកត់សម្គាល់ ក្នុងការពង្រឹងប្រព័ន្ធអប់រំ ការលើកកម្ពស់សន្តិភាពនិងការអភិវឌ្ឍដោយចីរភាព ព្រមទាំង ការអភិរក្សបេតិកភណ្ឌ វប្បធម៌។ ឯកឧត្តមក៏បានគូសបញ្ជាក់ពីសារៈសំខាន់នៃការរួមចំណែករបស់អង្គការយូណេស្កូក្នុងការធ្វើឱ្យ ជីវភាពរបស់ប្រជាពលរដ្ឋកម្ពុជាមានភាពប្រសើរឡើង។នាឱកាសជំនួបនេះដែរ ឯកឧត្តមឧបនាយករដ្ឋមន្ត្រី បានចូលរួមអបអរសាទរ ឯកឧត្តម Sardar Umar Alam ដែលត្រូវបានតែងតាំងជានាយកប្រចាំតំបន់សម្រាប់រដ្ឋប៉ាស៊ីហ្វិករបស់អង្គការយូណេស្កូ និង បានជូនពរ ឯកឧត្តម ទទួលបានជោគជ័យជាបន្តក្នុងភារកិច្ចថ្មី និងការងារនាពេលអនាគត៕

ចិនគាំទ្រហិរញ្ញវត្ថុប្រមាណ ២.៥ លានដុល្លារអាម៉េរិកសម្រាប់គម្រោងកិច្ចសហប្រតិបត្តិការ​មេគង្គ-ឡានឆាងដល់កម្ពុជា

2025/09/17 03:55:45 pm        400
Facebook Telegram Linkin
ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា និងឯកឧត្តម វ៉ាង វិនពីន (WANG Wenbin) ឯកអគ្គរដ្ឋទូតនៃសាធារណរដ្ឋ ប្រជាមានិតចិន ប្រចាំកម្ពុជា បានអញ្ជើញចុះហត្ថលេខារួមគ្នាលើកិច្ចព្រមព្រៀង ស្តីពីមូលនិធិពិសេស សម្រាប់គម្រោងកិច្ចសហប្រតិបត្តិការមេគង្គ-ឡានឆាង ឆ្នាំ២០២៥ ដែលនឹងប្រព្រឹត្តទៅនៅថ្ងៃទី១៧ ខែកញ្ញា ឆ្នាំ២០២៥ នៅទីស្តីការក្រសួងការបរទេស និងសហប្រតិបត្តិការអន្តរជាតិ។ក្នុងក្របខ័ណ្ឌមូលនិធិពិសេសនៃកិច្ចសហប្រតិបត្តិការមេគង្គ-ឡានឆាង ឆ្នាំ២០២៥ គម្រោងកម្ពុជាសរុបចំនួន ១១ នឹងទទួលបានការគាំទ្រហិរញ្ញវត្ថុពីរដ្ឋាភិបាល នៃសាធារណរដ្ឋប្រជាមានិតចិន ដែលមានទឹកប្រាក់ប្រមាណ ២.៥ លានដុល្លារអាម៉េរិក។ គម្រោងទាំងនោះនឹងផ្តល់ផលប្រយោជន៍ជា ច្រើននៅតាមវិស័យផ្សេងៗ រួមមាន៖ ទេសចរណ៍ សុខាភិបាល កសិកម្ម ការអភិរក្សនិងការស្តារឡើងវិញ នូវតំបន់វប្បធម៌ ការអភិវឌ្ឍសហគ្រិនភាពស្ត្រី ការអប់រំបណ្តុះបណ្តាលបច្ចេកទេស និងវិជ្ជាជីវៈ ការលើក កម្ពស់ផលិតភាព និងការចាប់យកបច្ចេកវិទ្យាសម្រាប់សហគ្រាសមីក្រូ ធុនតូច និងមធ្យម និងការលុប បំបាត់ព័ត៌មានក្លែងក្លាយ ក៏ដូចជាការលើកកម្ពស់ការយល់ដឹងពីកិច្ចសហប្រតិបត្តិការមេគង្គ-ឡានឆាង។គួរកត់សម្គាល់ផងដែរថា ក្នុងរយៈពេល ១០ឆ្នាំកន្លងមកនេះ មូលនិធិពិសេសសម្រាប់គម្រោង កិច្ចសហប្រតិបត្តិការមេគង្គ-ឡានឆាង បានផ្តល់ជំនួយហិរញ្ញវត្ថុសម្រាប់គម្រោងចំនួន ៩៥ នៅកម្ពុជា។ ការអនុវត្តគំនិតផ្តួចផ្តើមសហការទាំងនេះ បង្ហាញពីការប្តេជ្ញាចិត្តរបស់កម្ពុជា និងចិន ដើម្បីរួមចំណែក យ៉ាងសំខាន់ដល់ការកសាងសហគមន៍វាសនារួមនៃសន្តិភាព វិបុលភាព និងការអភិវឌ្ឍប្រកបដោយ ចីរភាព សម្រាប់បណ្តាប្រទេសមេគង្គ-ឡានឆាងទាំងអស់៕

អគ្គព្រះរាជអាជ្ញារងសាលាឧទ្ធរណ៍ភ្នំពេញ ស្នើមន្ត្រីខេត្តកំពង់ឆ្នាំង ត្រូវគោរពច្បាប់ កុំគោរពបុគ្គល នាំទុក្ខដល់រាស្ត្រ

2025/09/17 03:53:41 pm        204
Facebook Telegram Linkin
កំពង់ឆ្នាំង ៖ ឯកឧត្តម អ៊ឹម សុផាន អគ្គព្រះរាជអាជ្ញារង និងក្រុមការងារ នៃមហាអយ្យការអមសាលាឧទ្ទរណ៍ភ្នំពេញ បានស្នើមន្ត្រីនគរបាលយុត្តិធម៌នៅក្នុងខេត្តកំពង់ឆ្នាំង ត្រូវនាំគ្នាគោរពច្បាប់ឱ្យបានត្រឹមត្រូវ មិនត្រូវគោរពតែបុគ្គលចោលច្បាប់ នាំទុក្ខដល់រាស្ត្រ។ ការថ្លែងនេះ ធ្វើឡើងក្នុងឱកាសឯកឧត្តមចុះធ្វើអធិការកិច្ចនៅអយ្យការអមសាលាដំបូងខេត្ត ពន្ធនាគារ និងមន្ត្រីនគរបាលយុត្តិធម៌ក្នុងខេត្តកំពង់ឆ្នាំង នៅថ្ងៃទី១៦ ខែកញ្ញា ឆ្នាំ២០២៥ នេះ។ឯកឧត្តម អ៊ឹម សុផាន មានប្រសាសន៍ថា ឯកឧត្តមចុះមកធ្វើអធិការកិច្ចក្នុងខេត្តកំពង់ឆ្នាំងនាពេលនេះ គឺធ្វើអធិការកិច្ចលើភាពយឺតយ៉ាវ នៃសំណុំរឿង បញ្ហានីតិវិធី (បច្ចេកទេសអនុវត្ត សំណួរ ចម្លើយ) ការពិនិត្យសំណុំរឿង ការពិនិត្យសៀវភៅ បញ្ហាប្រឈម និងដំណោះស្រាយ។ ក្រុមការងារបានអធិការកិច្ចទៅលើពន្ធនាគារខេត្តកំពង់ឆ្នាំង ដោយពិនិត្យលើសាលក្រម សាលដីការ ការឃុំខ្លួនលើស អ្នកទោសអនីតិជន អ្នកទោសជាស្ត្រីមានកូននៅជាមួយ អ្នកទោសរោគចិត្ត ពិនិត្យសៀវភៅ និងស្ថានភាពអ្នកទោស។ ក្រុមការងារក៏បានដំណើរការអធិការកិច្ចនៅបញ្ជាការកងរាជអាវុធហត្ថខេត្ត និងស្នងការដ្ឋាននគរបាលខេត្ត លើបញ្ហាប្រឈម និងដំណោះស្រាយ ពិនិត្យសៀវភៅ និងពិនិត្យកន្លែងឃាត់ខ្លួន។​ឯកឧត្តម ឯក ស៊ុនរស្មី បានថ្លែងបន្តថា រយៈពេលកន្លងមកនេះ ការធ្វើការងារជាមួយនគរបាលយុត្តិធម៌ ក្នុងខេត្តកំពង់ឆ្នាំង គឺមាននគរបាលយុត្តិធម៌មួយចំនួនមិនទាន់អនុវត្តបានត្រឹមត្រូវ តាមមាត្រា៨៩ នៅក្នុងក្រមនីតិវិធីឡើយ ក៏ប៉ុន្តែ មួយរយៈពេលក្រោយមកនេះ ឃើញថាមានការគោរពច្បាប់បានច្រើនឡើងវិញគួរឱ្យកត់សម្គាល់ និងនៅមួយចំនួនតូចមិនទាន់ធ្វើបាន ១០០%នៅឡើយ។ ឯកឧត្តមចង់ឱ្យនគរបាលយុត្តិធម៌ គោរពច្បាប់ទាំងអស់គ្នា ដើម្បីកុំឱ្យមានការខុសឆ្គងក្នុងពេលអនុវត្តការងារ៕អត្ថបទ៖ កាំង ហុងវាស្នា 

ឧត្តមសេនីយ៍ឯក ឡាំង អូណា៖ កងពលតូច​ដឹក​ជញ្ជូន​លេខ​៩៩ បាន​រួម​ចំណែក​ក្នុង​បេសកកម្ម នៃ​ការ​ការពារបូរណភាពទឹកដី

2025/09/17 03:50:25 pm        490
Facebook Telegram Linkin
ឧត្ដមសេនីយ៍ឯក ឡាំង អូណា អគ្គលេខាធិការរងក្រសួងការពារជាតិ បានលើកឡើងថា កង​ពល​តូច​ដឹក​ជញ្ជូនលេខ៩៩ គឺជាមូលដ្ឋានដ៏សំខាន់ ដោយបានរួមចំណែកយ៉ាងសកម្ម ក្នុង​កិច្ច​ការពារ​នូវ​អធិបតេយ្យ និងបូរណភាពទឹកដី រួមទាំងបាន​រួម​ចំណែក​ក្នុង​ការ​ជួយ​សង្រ្គោះ​ពលរដ្ឋ​រង​គ្រោះ​ដោយ​​គ្រោះធម្មជាតិនានាដើម។ក្នុងឱកាសអញ្ជើញដឹកនាំនាយទាហាន នាយទាហានរង ពលទាហាន និ​ង​សិក្ខា​កាម​វគ្គ​បណ្តុះ​បណ្តាល​ការងាររដ្ឋបាលជំនាន់ទី៤ និងជំនាន់ទី៥ ចុះកម្មសិក្សាឈ្វេងយល់ពីរចនាសម្ព័ន្ធ​ តួនាទី​ភារកិច្ច​​របស់កងពលតូចដឹកជញ្ជូនលេខ ៩៩ នាព្រឹកថ្ងៃទី១៧ ខែកញ្ញា ឆ្នាំ២០២៥នេះ លោក​ឧត្តម​សេនីយ៍​ឯក ឡាំង អូណា បានលើកឡើងថា ស្របពេលដែលប្រទេសជាតិយើង ទទួល​រង​នូវ​ការ​ឈ្លាន​ពាន​ពី​បរទេស តួនាទីរបស់កងពលតូចដឹកជញ្ជូនលេខ៩៩ គឺពិតជាមានសារៈសំខាន់ តាម​រយៈការផ្គត់ផ្គង់ផ្នែកដឹកជញ្ជូន និងគាំទ្រគ្រប់យុទ្ធសាស្ត្រនៃកិច្ចការពារជាតិ។ នេះ​បង្ហាញ​ឱ្យ​ឃើញ​ថា កងពលតូចដឹកជញ្ជូនលេខ៩៩ ជាមូលដ្ឋានដ៏សំខាន់ រួមចំណែកក្នុង​បេសកកម្ម នៃ​ការ​ការពារ​អធិបតេយ្យ បូរណភាពទឹកដី។ ឧត្តមសេនីយ៍ឯក ឡាំង អូណា បានបន្ថែមទៀតថា ជម្លោះព្រំដែនកម្ពុជា-ថៃ ពិតមែនមាន​រយៈ​ពេល​ខ្លី ប៉ុន្តែជាព្រឹត្តិការណ៍ប្រវត្តិសាស្រ្តមួយ ដែលធ្វើឱ្យខ្មែរយើងចងចាំ និង​មិន​អាច​បំភ្លេច​បាន​ឡើយ​។ ការប្រយុទ្ធគ្នារយៈពេល ៥ថ្ងៃកន្លងមកនេះ វាបានបង្កនូវវិនាសកម្មយ៉ាងធំធេង និងធ្ងន់ធ្ងរ​បំផុត​លើ​ដែន​អធិបតេយ្យរបស់កម្ពុជា ពិសេសមកលើប្រាសាទព្រះវិហារ ប្រាសាទតាមាន់តូច តាមាន់​ធំ និងប្រាសាតាក្របី រួមជាមួយវត្តអារាម ផ្ទះសម្បែង ព្រមទាំង​បាន​សម្លាប់​ប្រជាជន​ខ្មែរ​ស្លូត​​ត្រង់ ដែលរស់នៅតាមបន្ទាត់ព្រំដែនផងដែរ។ លោកឧត្តមសេនីយ៍ បានលើកឡើងទៀតថា សង្រ្គាមបាន​បង្ក​ផល​លំបា​ក​ដល់​ជីវភាព​របស់​ប្រជា​ពលរដ្ឋ​ ដែលរស់នៅតាមបបន្ទាត់ព្រំដែន។ លោកបន្តថា បើទោះបីការប្រយុទ្ធគ្នាបានបញ្ចប់ តាម​រយៈ​កិច្ចព្រមព្រៀងបទឈប់បាញ់រវាងកម្ពុជា-ថៃ កាលពីថ្ងៃទី២៨ ខែកក្កដា ឆ្នាំ២០២៥ នៅ​ប្រទេស​ម៉ាឡេស៊ីក្ដី បញ្ហាជាច្រើននៅតែបន្តកើតមាន ដោយការធ្វើទុកបុកម្នេញរបស់កងទ័ពថៃ មក​លើក​ម្ពុជា តាមរយៈសកម្មភាពប្រើប្រាស់កងកម្លាំងប្រដាប់អាវុធ រាយរបងលួស ដាក់កង់ឡាន នៅ​តាមភូមិខ្មែរជាប់ព្រំដែន និងការផ្សព្វផ្សាយព័ត៌មានមិនពិត ពិសេសការថ្លែងសារញុះញុង របស់​មេទ័ពថៃនេះតែម្ដង។ទាក់​ទង​នឹងការចុះកម្មសិក្សាឈ្វេងយល់អំពី រចនាសម្ព័ន្ធ តួនាទី ភារកិច្ច​របស់​កង​ពលតូច​ដឹក​ជញ្ជូន​លេខ​៩៩នេះ លោកឧត្តមសេនីយ៍ឯក ឡាំ អូណាបានលើកឡើងថា ជាកម្មវិធីដ៏​មាន​សារៈ​សំខាន់​ ដែលផ្តល់ឱកាសឲ្យសិក្ខាកាមយើងទទួលបានចំណេះដឹង និងបទពិសោធថ្មីៗ ហើយ​វា​មិន​ត្រឹម​តែបំពេញបន្ថែមទៅលើការសិក្សានៅក្នុងថ្នាក់រៀនប៉ុណ្ណោះទេ ប៉ុន្តែវាជា​ការ​បញ្ចូល​គ្នា​រវាង​ការ​សិក្សា​ផ្នែកទ្រឹស្ដី និងការអនុវត្តជាក់ស្តែង។ បើតាមលោក​ឧត្តមសេនីយ៍ ហ៊ុល វណ្ណឌី មេបញ្ជាការរង និងជានាយសេនាធិការ កងពល​តូច​ដឹក​ជញ្ជូន​លេខ៩៩ បានឲ្យដឹងថា ដោយមានការជួយជ្រោគជ្រែង ពីឯកឧត្តម នាយឧត្តមសេនីយ៍ ម៉ឹង សំផន រដ្ឋលេខាធិការក្រសួងការពារជាតិ អង្គភាពមានការរីកចម្រើនយ៉ាងឆាប់រហ័ស ពី​កង​អ​នុ​សេនា​ធំ​ដឹកជញ្ជូន មកជាកងពលតូចដឹកជញ្ជូន ដែលដំបូងអង្គភាពមានរថយន្តត្រឹមតែ ៥គ្រឿង អ្នក​បើកបរ ៣៨នាក់ ទ័ព១០៧នាក់ប៉ុណ្ណោះ លុះដល់ឆ្នាំ២០១០ បាន​បង្កើត​ទៅ​ជា​កង​ពល​តូច​ដឹក​ជញ្ជូន​លេខ៩៩។ បច្ចុប្បន្ននេះ អង្គភាពមាន ៨ ការិយាល័យ.១គិលានដ្ឋាន. ១យានដ្ឋាន​ជួស​ជុល​រថយន្ត . ៣ វរសេនាតូច.និង៤កងអនុសេនាធំចំណុះ៕ អត្ថបទ៖ បាន ចក់

សម្តេចរដ្ឋសភាធិបតី ឃួន សុដារី ជម្រាបប្រធានគណៈប្រតិភូសភាសមាជិកអាស៊ានពីការចង់បានសន្តិភាពក្នុងសហគមន៍អាស៊ានរបស់កម្ពុជា

2025/09/17 03:35:11 pm        335
Facebook Telegram Linkin
នៅចំពោះមុខថ្នាក់ដឹកនាំគណៈប្រតិភូសមាជិកអន្តរសភាអាស៊ាន(អាយប៉ា) ក្នុងកិច្ចប្រជុំគណៈកម្មាធិការប្រតិបត្តិអាយប៉ាយ លើកទី៤៦ នៅទីក្រុងគូឡាឡាំពួ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានិងជាប្រធានគណៈប្រតិភូសភានៃព្រះរាជាណាចក្រកម្ពុជា បានបញ្ជាក់ពីជំហរនិងឆន្ទៈរបស់កម្ពុជាក្នុងការលើក កម្ពស់សន្តិភាព សុខដុមនីយកម្មនៅក្នុងអាស៊ាន តាមរយៈការដោះស្រាយជម្លោះព្រំដែនកម្ពុជានិងថៃដោយសន្តិវិធី។ សម្តេចប្រធានរដ្ឋសភា បានលើកឡើងបន្តថា កម្ពុជាគោរពបទឈប់បាញ់យ៉ាងម៉ឹងម៉ាត់ គោរពធម្មនុញ្ញអាស៊ាន ធម្មនុញ្ញអង្គការសហប្រជាជាតិ និងច្បាប់អន្តរជាតិនានា។ កម្ពុជាដោះស្រាយបញ្ហាតាមរយៈការចរចាដោយសន្តិវិធីឈរលើយន្តការដែលមានស្រាប់ដើម្បីធ្វើយ៉ាងណាឱ្យស្ថានភាពព្រំដែនកម្ពុជានិងថៃវិលទៅរកភាពប្រក្រតីឡើងវិញ។ សុខសន្តិភាពតាមបន្ទាត់ព្រំដែនកម្ពុជានិងថៃ ក៏ជាសុខសន្តិភាពរបស់សហគមន៍អាស៊ាន ឈានឆ្ពោះទៅសម្រេចបាននូវចក្ខុវិស័យអាស៊ានឆ្នាំ២០៤៥ ក្នុងការកសាងសហគមន៍រួម ប្រកបដោយចីរភាពនិងបរិយាបន្នដោយយកពលរដ្ឋជាស្នូល។ កិច្ចប្រជុំគណៈកម្មាធិការប្រតិបត្តិអាយប៉ាលើកទី៤៦ បានប្រារព្ធធ្វើឡើងនៅព្រឹក ថ្ងៃទី១៧ ខែកញ្ញា ឆ្នាំ២០២៥ នេះ ដើម្បីពិភាក្សា អនុម័តកម្មវិធីនិងរបៀបវារៈនៃមហាសន្និបាតលើកទី៤៦ និងសកម្មភាពការងារមួយចំនួនទៀតរបស់លេខាធិការដ្ឋានអាយប៉ា។ ក្នុងនាមសភាប្រទេសដែលបានផ្តួចផ្តើមសេចក្តីព្រាងសេចក្តីសម្រេចមួយចំនួន សម្រាប់ដាក់ជូនមហាសន្និបាតពិភាក្សាអនុម័តនោះ សម្តេចប្រធានរដ្ឋសភា បានលើកឡើងថាសេចក្តីព្រាងសេចក្តីសម្រេចរបស់កម្ពុជាមានគោលបំណងលើកកម្ពស់សុខសន្តិភាព ការអភិវឌ្ឍនិងសុខដុមនីយកម្មដូចជាសេចក្តីព្រាងសេចក្តីសម្រេច ស្ដីពីការបង្កើតវេទិកាថ្នាក់ដឹកនាំអាយប៉ា មានគោលបំណងលើកកម្ពស់កិច្ចសន្ទនាប្រកបដោយបរិយាបន្ន និងពហុភាគីលើបញ្ហាថ្មីៗក្នុងតំបន់ និងអន្តរជាតិ ក្នុងគោលបំណងកសាងការយល់ដឹងរួមគ្នា និងបង្កើតដំណោះស្រាយប្រកបដោយនវានុវត្តន៍។ សម្តេចរដ្ឋសភាធិបតី ឃួន សុដារី មានប្រសាសន៍បន្តថា អាយប៉ាចាំបាច់ត្រូវមានភាពរហ័សរហួន សម្របខ្លួន និងមានគំនិតច្នៃប្រឌិត ដើម្បីដោះស្រាយបញ្ហាប្រឈមថ្មីៗទាំងនេះប្រកបដោយប្រសិទ្ធភាព។ សេចក្ដីព្រាងសេចក្ដីសម្រេចស្ដីពីការបង្កើតភាពជាដៃគូអាយប៉ាដើម្បីពង្រឹងការចូលរួមរបស់សភាអាយប៉ា ជាមួយដៃគូខាងក្រៅសម្រាប់អាស៊ានប្រកបដោយបរិយាបន្ន និងចីរភាព មានគោលបំណងចម្បងដើម្បីពង្រឹងការចូលរួមជាមួយសភាសង្កេតការណ៍ ដែលរួមចំណែកដល់បេសកកម្មរបស់អាយប៉ា ក្នុងការបង្កើតក្របខ័ណ្ឌរួម និងឆ្ពោះទៅអនាគត ដើម្បីលើកកម្ពស់ការទូតសភា ធ្វើឱ្យការចូលរួមជាមួយសភាសង្កេតការណ៍ និងអង្គការដៃគូកាន់តែស៊ីជម្រៅ និងដើម្បីពង្រឹងមជ្ឈភាពអាស៊ាន ដែលរួមចំណែកដល់សន្តិភាព ស្ថិរភាព និងការអភិវឌ្ឍប្រកបដោយចីរភាពស្របតាមទស្សនវិស័យសហគមន៍អាស៊ានឆ្នាំ២០៤៥ ព្រមទាំងមូលបទអាស៊ានឆ្នាំ២០២៥ របស់ប្រទេសម្ចាស់ផ្ទះម៉ាឡេស៊ី គឺ “បរិយាបន្ន និងចីរភាព”។សូមជម្រាបថា កិច្ចប្រជុំគណៈកម្មាធិការប្រតិបត្តិអាយប៉ា ប្រារព្ធធ្វើឡើងក្រោមអធិបតីភាព ឯកឧត្តមបណ្ឌិត តាន់ស៊ី ដាតូ ហ្សូហារី ប៊ីន អាប់ឌុល (Tan Sri Dato (Dr.) Johari Bin Abdul) ប្រធានរដ្ឋសភាប្រទេសម៉ាឡេស៊ី និងជាប្រធានអន្តរសភាអាស៊ាន(អាយប៉ា/AIPA) លើកទី៤៦ ដោយមានការអញ្ជើញចូលរួមពីប្រធានគណៈប្រតិភូសភាសមាជិកអាយប៉ា រួមមាន ព្រុយណេដារូស្សាឡាម ព្រះរាជាណាចក្រកម្ពុជា ម៉ាឡេស៊ី ឥណ្ឌូណេស៊ី ហ្វីលីពីន សឹង្ហបូរី ថៃ វៀតណាម និងឡាវ។ ក្រៅពីការពិភាក្សានិងអនុម័តលើកម្មវិធីនិងរបៀបវារៈមហាសន្និបាតលើកទី៤៦ហើយ កិច្ចប្រជុំគណៈកម្មាធិការប្រតិបត្តិអាយប៉ា បានស្តាប់របាយការណ៍សកម្មភាពការងាររបស់អគ្គលេខាធិកាដ្ឋានអាយប៉ាប្រចំាឆ្នាំ២០២៤-ឆ្នាំ២០២៥ និងពិភាក្សានិងអនុម័តផែនការបន្តរបស់អាយប៉ាផងដែរ។        គណៈកម្មាធិការប្រតិបត្តិអាយប៉ាបានអនុម័តជូនសភាប្រទេសហ្វីលីពីនធ្វើជាម្ចាស់ផ្ទះមហាសន្និបាតអាយប៉ាលើកទី៤៧ នៅឆ្នាំ២០២៦ និងប្រទេសសឹង្ហបុរី ត្រៀមធ្វើជាម្ចាស់ផ្ទះអាយប៉ាលើកទី៤៨ នៅឆ្នាំ២០២៧។ ចំណែកកិច្ចប្រជុំក្រុមអ្នកនយោបាយអាយប៉ា (AIPA Caucus)លើកទី១៧ ក្នុងឆ្នាំ២០២៦ នៅប្រទេសឥណ្ឌូណេស៊ី។ សូមជម្រាបថា អន្តរសភាអាស៊ាន ហៅកាត់ (អាយប៉ា/AIPA) ជាវេទិកាសភានៃបណ្ដាប្រទេសជាសមាជិកអាស៊ាន ដែលតំណាងឱ្យប្រជាពលរដ្ឋប្រមាណជិត៧០០លាននាក់ ។ ក្នុងក្របខ័ណ្ឌនីតិប្បញ្ញត្តិ មហាសន្និបាតប្រចាំឆ្នាំរបស់អាយប៉ា រៀបចំឡើងក្នុងគោលបំណងលើកកម្ពស់យន្តការសភា បង្កើនកិច្ចសហប្រតិបត្តិការជាមួយអាស៊ានដើម្បីសម្រេចបានចក្ខុវិស័យសហគមន៍មួយ ដែលយកប្រជាពលរដ្ឋជាស្នូល។មហាសន្និបាតអន្តរសភាអាស៊ានលើកទី៤៦ ឆ្នាំ២០២៥ ដែលសភាប្រទេសម៉ាឡេស៊ីធ្វើជាម្ចាស់ផ្ទះ ប្រារព្ធធ្វើឡើងក្រោមប្រធានបទ “សភាទៅមុខសម្រាប់កំណើនប្រកបដោយបរិយាបន្ន និងអាស៊ានប្រកបដោយចីរភាព” ចាប់ពីថ្ងៃទី១៧ដល់ថ្ងៃទី២១ ខែកញ្ញា៕

ទស្សនៈនិងមតិ៖ បទឈប់បាញ់មានប្រយោជន៍ធំធេងដែលមិនគួរមើលរំលង

2025/09/17 03:26:29 pm        504
Facebook Telegram Linkin
ប្រជាពលរដ្ឋខ្មែរនៅគ្រប់ទិសទីរាប់ទាំងអ្នកនៅតាមបណ្តាខេត្តជាយដែនផង កំពុងប្រារព្ធពិធីបុណ្យកាន់បិណ្ឌជារៀងរាល់ថ្ងៃ។ ទីវត្តអារាមនានាប្រមូលផ្តុំដោយប្រជាពុទ្ធបរិស័ទដែលកាន់បិណ្ឌតាមវេនរបស់ខ្លួនជាទៀងទាត់។ ទោះបីជាប្រជាពលរដ្ឋមួយចំនួនបន្តរស់នៅក្នុងជំរុំជនភៀសសឹកនៅឡើយក៏ដោយ ក៏យ៉ាងហោចណាស់ក៏ពួកគេមានលំនឹងចិត្តជាងពេលផ្ទុះអាវុធដែរ ហើយអ្នកខ្លះក៏អាចឆ្លៀតទៅវត្តបានដែរ។ ចាប់តាំងពីបទឈប់បាញ់ចូលជាធរមាននាពាក់កណ្តាលអាធ្រាត្រថ្ងៃទី២៨ ខែកក្កដា ឆ្នាំ២០២៥ មក ក្តីមហន្តរាយ និងសោកនាដកម្មនានា រាប់តាំងពីការបាត់បង់ជីវិតមនុស្ស រហូតដល់ការខូចខាតហេដ្ឋារចនាសម្ព័ន្ធសង្គមនានា ត្រូវបានបញ្ចៀស ពោលគឺជីវិតមនុស្សច្រើនណាស់ដែលត្រូវបានជួយសង្គ្រោះកុំឱ្យស្លាប់ និងរងរបួស ក៏ដូចជាទប់កុំឱ្យមានជនភៀសសឹកកើនឡើងថែមទៀត។ នៅលើវិស័យសេដ្ឋកិច្ច ការចំណាយដ៏មហាសាលទៅលើសព្វាវុធ គ្រាប់រំសេវ និងយោធោបករណ៍គ្រប់ប្រភេទសម្រាប់បាញ់ប្រហារដាក់គ្នា ក៏ត្រូវបានបញ្ចៀស។ ការជួបជុំនៅតាមទីអារាមក្តី ឬតាមគេហដ្ឋាន និងរមណីយដ្ឋាននានាក្តី នៅតែអាចប្រព្រឹត្តិទៅជាធម្មតា បើទោះបីជាចិត្តមិនទាន់ស្ងប់ ដោយសារតែបញ្ហាប្រឈមនៅមិនទាន់ត្រូវបានដោះស្រាយក្តី។ សង្គ្រាមការទូត និងពាក្យសម្តីនៅតែមានសភាពស្រួចស្រាល់ខ្លាំង ប៉ុន្តែមិនបានបណ្តាលឱ្យមានការបង្ហូរឈាម និងមនុស្សស្លាប់ ដូចសង្គ្រាមប្រដាប់អាវុធទេ។ ទោះបីជាបញ្ហាព្រំដែននៅមិនទាន់មានដំណោះស្រាយ ប៉ុន្តែយ៉ាងហោចណាស់ការចរចាបានធ្វើឡើងយ៉ាងសកម្ម ក្នុងអំឡុងពេលឈប់បាញ់និងសម្រេចបានលទ្ធផលជាវិជ្ជមានជាបន្តបន្ទាប់ ក្នុងនោះពាក្យថា «សន្តិភាព» និង «ដំណោះស្រាយដោយសន្តិវិធី» ត្រូវបានភាគីទាំងពីរលើកមកនិយាយជាញឹកញាប់។ចាប់តាំងពីថ្ងៃទី៩ ខែកញ្ញា ឆ្នាំ២០២៥ មក កម្ពុជាមានឱកាសដាក់ឱ្យដំណើរការព្រលានយន្តហោះអន្តរជាតិតេជោដ៏ទំនើបខ្នាតអន្តរជាតិ ដែលទទួលបានការកោតស្ញប់ស្ញែងយ៉ាងខ្លាំងពីមនុស្សម្នាគ្រប់ទិសទី។ ប្រជាពលរដ្ឋខ្មែរបាននាំគ្នាបង្ហោះរូបភាព និងឃ្លីបវីដេអូព្រោងព្រាតតាមបណ្តាញសង្គម និងបណ្តាញផ្សព្វផ្សាយព័ត៌មាន។ មានប្រជាពលរដ្ឋខ្មែរជាច្រើនទាំងក្មេង ចាស់ ប្រុស ស្រី ដែលមក ពីគ្រប់រាជធានី ខេត្ត បាននាំគ្នាផ្អើលទៅមើល និងអបអរសាទរសមិទ្ធផលថ្មីដ៏អស្ចារ្យ ដែលមាន អត្ថន័យជាប្រវត្តិសាស្ត្រ ប្រកបដោយមោទនភាពក្រៃលែង។ អ្វីៗទាំងអស់នេះអាចកើតឡើងបាន ដោយសារតែមានបទឈប់បាញ់រវាងកម្ពុជានិងថៃ។ ប្រសិនបើគ្មានបទឈប់បាញ់នេះទេ ម៉្លេះសមម៉ោងនេះមិនដឹងជាសោកនាដកម្ម និងវិនាសកម្មមានទំហំធំធេងប៉ុណ្ណាទេ? ហើយសកម្មភាពដូចបានរៀបរាប់ត្រួសៗខាងលើក៏មិនអាចកើតមានបានដែរ។ នេះគឺជាលទ្ធផលនៃការអត់ធ្មត់របស់រាជរដ្ឋាភិបាលនិងថ្នាក់ដឹកនាំកម្ពុជា។ ពិតណាស់ មានអ្នកខ្លះរអ៊ូរទាំ ឬរហូតដល់ស្តីបន្ទោសរាជរដ្ឋាភិបាលថា ទុកបណ្តោយឱ្យកងទ័ពថៃដាក់របងលួសព័ទ្ធយកដីដោយមិនចាត់វិធានការប្រឆាំងភ្លាមៗក្រោមលេសថាអត់ធ្មត់។ ប៉ុន្តែ លទ្ធផលជាក់ស្តែង ដែលទទួលបានពីការអត់ធ្មត់នេះ មានទំហំធំធេងណាស់។ ផ្ទុយទៅវិញ ប្រសិនបើរាជរដ្ឋាភិបាលប្រើយុទ្ធសាស្ត្រកំហឹងទល់កំហល់ ការផ្ទុះអាវុធប្រាកដជាកើតមានឡើងវិញយូរមកហើយ។ សំណួរសួរថា តើក្រោយការផ្ទុះអាវុធ ដែលបង្កវិនាសកម្មយ៉ាងធ្ងន់ធ្ងររួចហើយ បញ្ហាព្រំដែនអាចដោះស្រាយបានដែរឬទេ? ចម្លើយគឺ មិនបានទេ ពោលគឺភាគីទាំងពីរនៅតែងាកមករកការចរចាដោយប្រើយន្តការទ្វេភាគីដែលមានស្រាប់ និងយន្តការបច្ចេកទេសនិងច្បាប់អន្តរជាតិដដែល។ បើដូច្នេះ តើជម្រើសផ្ទុះអាវុធដ៏គ្រោះថ្នាក់ និងជម្រើសការអត់ធ្មត់ដោយរង់ចាំដំណោះស្រាយដោយសន្តិវិធី តើមួយណាប្រសើរជាង? ច្បាស់ណាស់ថា បើទីបំផុតគង់តែវិលទៅរកការចរចាដដែល ការអត់ធ្មត់គឺជាជម្រើសដ៏ត្រឹមត្រូវបំផុត ពីព្រោះរបងលួសមិនមែនជាការកំណត់ខ្សែបន្ទាត់ព្រំដែនទេ។ ការប្រើប្រាស់កម្លាំងយោធា ដើម្បីកាន់កាប់ ក៏មិនអាចចាត់ទុកជាការកាន់កាប់ស្របច្បាប់បានដែរ។ មកដល់ចំណុចនេះទើបយើងអាចមើលឃើញយ៉ាងច្បាស់ពីផលប្រយោជន៍ដ៏ធំធេងនៃការអត់ធ្មត់ និងការប្រកាន់គោលជំហរស្រឡាញ់សន្តិភាព និងចង់បានដំណោះស្រាយដោយសន្តិវិធីរបស់រាជរដ្ឋាភិបាលកម្ពុជា។ ជំហរនេះត្រូវបានអ្នកការទូត និងមេដឹកនាំបណ្តាប្រទេសនានាក្នុងពិភពលោកគាំទ្រគ្រប់ៗគ្នា ដែលធ្វើឱ្យកម្ពុជាឈរនៅក្នុងប្រៀបខ្លាំងផ្នែកនយោបាយការទូត និងព័ត៌មាន។ សរុបមកវិញ គេអាចសន្និដ្ឋានដោយខ្លីថា កិច្ចព្រមព្រៀងឈប់បាញ់ដែលត្រូវបានថែរក្សាមកដល់ពេលនេះ ក្រោមនយោបាយអត់ធ្មត់របស់រាជរដ្ឋាភិបាលកម្ពុជា ពិតជាមានគុណតម្លៃដ៏បរិសុទ្ធ ហើយបានផ្តល់នូវផលប្រយោជន៍ដ៏ធំធេងណាស់ ដែលមិនអាចកាត់ថ្លៃបានសម្រាប់ប្រទេសជាតិ និងប្រជាពលរដ្ឋ ប៉ុន្តែមនុស្សមួយចំនួន ជាពិសេសក្រុមដែលមាននិន្នាការប្រឆាំងនឹងរាជរដ្ឋាភិបាល បាននិងកំពុងមើលស្រាលផង និងឆ្លៀតធ្វើអាជីវកម្មនយោបាយផង ដើម្បីបម្រើមហិច្ឆតាអំណាច របស់ពួកខ្លួនមួយក្តាប់តូច។ ទោះជាយ៉ាងណាក៏ដោយ ថ្នាក់ដឹកនាំកម្ពុជាពិតជាមិនបានមើលរំលងលើរឿងទាំងអស់នេះឡើយ៕ ដោយវង្ស មករា សាស្ត្រាចារ្យ និងជាអ្នកវិភាគនយោបាយ

សូមប្រុងប្រយ័ត្ន! ពីថ្ងៃបិណ្ឌ១ដល់បិណ្ឌ៧ ទូទាំងប្រទេស​មានករណី​អគ្គិភ័យ​កើត​ឡើង ១២ករណី

2025/09/17 03:13:33 pm        308
Facebook Telegram Linkin
គិតចាប់ពីថ្ងៃកាន់បិណ្ឌទី១ រហូតដល់កាន់បិណ្ឌ៧ ពោលគឺពីថ្ងៃទី៨ រហូតដល់ថ្ងៃទី១៤ ខែកញ្ញា ឆ្នាំ​២០២៥នេះ នៅកម្ពុជាមានគ្រោះអគ្គិភ័យកើតឡើងចំនួន១២ករណី។ នេះបើតាម​អ្នក​នាំពាក្យ​រង​ក្រសួង​មហាផ្ទៃ លោក ទូច សុឃៈ។ លោក ទូច សុឃៈ បានលម្អិតថាគ្រោះភ័យនេះ បានបណ្ដាលឱ្យឆាបឆេះផ្ទះ៩ខ្នង អគារ​ស្នាក់​នៅ​របស់​កម្មករ​៤ខ្នង តូបលក់កាហ្វេ១ និងក្បាលរថភ្លើង១គ្រឿង ព្រមទាំងសម្ភារ​ប្រើ​ប្រាស់​មួយ​ចំនួន​ទៀត។ បើតាមអ្នកនាំ​ពាក្យ ទីតាំងកើតមានអគ្គិភ័យ រួមមាននៅរាជធានីភ្នំពេញ កំពត កំពង់ចាម កំពង់ធំ ត្បូងឃ្មុំ និងខេត្តប៉ៃលិន។ លោកសម្ដែងការសោកស្ដាយជាមួយពលរដ្ឋរងគ្រោះ និងបាន​លើក​ទឹក​ចិត្ត​ខ្ពស់​ចំពោះការខិតខំអន្តរាគមន៍សង្គ្រោះរបស់សមត្ថកិច្ច។ ទោះបីជា​ស្ថិតក្នុងរដូវវស្សា ករណីគ្រោះអគ្គីភ័យបានបន្តកើតឡើងស្ទើររាល់ថ្ងៃ។ កត្តានេះ ភាគ​ច្រើន​បណ្ដាល​មកពីការធ្វេសប្រហែស ដូចជា ភ្លើងទៀន ធូប និងភ្លើងចង្ក្រាន ខណៈករណីខ្លះ​បណ្ដាល​មក​ពីបញ្ហាបច្ចេកទេស ដូចជាឆ្លងចរន្តអគ្គិសនីជាដើម។ អ្នកនាំពាក្យរង​ក្រសួងមហាផ្ទៃ លោក ទូច សុឃៈ បានអំពាវនាវប្រជាពលរដ្ឋ​បង្កើន​ការ​ប្រុង​ប្រយ័ត្ន​ជា​និច្ច​ ជាពិសេសក្នុងរដូវកាលបុណ្យទានដូចកាន់បិណ្ឌ និងភ្ជុំបិណ្ឌនាពេលនេះ ជាអាទិ៍ភ្លើង​ទៀន​ធូប​ ភ្លើងចង្ក្រាន គឺត្រូវតែពន្លត់ មុនពេលចាកចេញពីផ្ទះសម្បែង។ គួររម្លឹក​ថា រយៈពេល១៥ថ្ងៃ នៃពិធីកាន់បិណ្ឌ និងភ្ជុំបិណ្ឌឆ្នាំ២០២៤ នៅកម្ពុជា​មាន​គ្រោះ​អគ្គិភ័យ​កើត​ឡើង​ចំនួន​១៣លើក បណ្ដាលឱ្យឆេះផ្ទះ៨ខ្នង បន្ទប់១បន្ទប់ កុដិលោក១ខ្នង ឃ្លាំង១ខ្នង រោង​ចក្រ១ខ្នង និងរថយន្ដ១គ្រឿង៕

ឧបនាយករដ្ឋមន្ត្រីប្រចាំការ វង្សី វិស្សុត៖ ពិព័រណ៍ចិន-អាស៊ានបានក្លាយ​ជាវេទិកា​ដ៏មាន​សារៈ​សំខាន់​មួយ​ក្នុងការលើកកម្ពស់វិស័យពាណិជ្ជកម្ម និងវិនិយោគ

2025/09/17 03:07:29 pm        252
Facebook Telegram Linkin
ទីក្រុងណាននីង៖ នាព្រឹកថ្ងៃទី១៧ ខែកញ្ញា ឆ្នាំ២០២៥នេះ ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី តំណាងដ៏ខ្ពង់ខ្ពស់របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងសុន្ទរកថាសម្ពោធបើកពិព័រណ៍ចិន-អាស៊ាន លើកទី២២ ដែលប្រព្រឹត្តទៅចាប់ថ្ងៃទី១៧-២១ ខែកញ្ញា ឆ្នាំ២០២៥ នៅទីក្រុងណាននីង តំបន់ស្វយ័តក្វាងស៊ី សាធារណរដ្ឋប្រជាមានិតចិន។ សម្ពោធបើកពិព័រណ៍ចិន-អាស៊ានលើកទី២២នេះ ក៏មានការចូលថ្លែងសុន្ទរកថាគន្លឹះពីសំណាក់ឯកឧត្តម Han Zheng អនុប្រធានាធិបតីចិន និងសុន្ទរកថាបើកពីសំណាក់ឯកឧត្តម U Nyo Saw នាយករដ្ឋមន្រ្តីសហភាពមីយ៉ាន់ម៉ា និងឯកឧត្តម Bounthong Chitmany អនុប្រធានាធិបតីឡាវ ព្រមទាំងថ្នាក់ដឹកនាំនៃបណ្តាប្រទេសជាសមាជិកអាស៊ានមួយចំនួនទៀត អគ្គលេខាធិការអាស៊ាន និងថ្នាក់ដឹកនាំវិស័យឯកជន។ឯកឧត្ដមឧបនាយករដ្ឋមន្ត្រីប្រចាំការ វង្សី វិស្សុត បានលើកឡើងថា ពិព័រណ៍ចិន-អាស៊ានបានក្លាយជាវេទិកាដ៏មានសារៈសំខាន់មួយ ក្នុងការលើកកម្ពស់វិស័យពាណិជ្ជកម្ម និងវិនិយោគ ហើយការរៀបចំព្រឹត្តិការណ៍ដ៏សំខាន់នេះ ប្រកបដោយជោគជ័យអស់រយៈពេលជាងពីរទសវត្សរ៍មកនេះ បានចូលរួមចំណែកធ្វើឱ្យចំណងមិត្តភាព សន្តិភាព និងកិច្ចសហប្រតិបត្តិការ រវាងចិននិងអាស៊ានកាន់តែមានភាពជិតស្និទ្ធ និងស៊ីជម្រៅថែមទៀត។ ស្ថិតក្នុងយុគសម័យនៃនវានុវត្តន៍ឌីជីថលដែលមានភាពរីកចម្រើនយ៉ាងឆាប់រហ័សនៃបញ្ញាសិប្បនិមិត្ត (AI) ស្របជាមួយនឹងការកើនឡើងនៃភាពមិនប្រាកដប្រជានៃស្ថានភាពភូមិសាស្ត្រនយោបាយ និងសេដ្ឋកិច្ច ព្រមទាំងហានិភ័យនៃការបែកបាក់ជាសកល, ប្រធានបទឆ្នាំនេះ «បញ្ញា និងនវានុវត្តន៍ឌីជីថលជួយជំរុញការអភិវឌ្ឍ-ការប្រើប្រាស់កាលានុវត្តភាពថ្មីៗនៃតំបន់ពាណិជ្ជកម្មសេរីចិន-អាស៊ាន ៣.០ ដើម្បីកសាងសហគមន៍ចិន-អាស៊ាន ដែលកាន់តែជិតស្និទ្ធ និងមានអនាគតរួម» គឺពិតជាសមស្រប និងត្រូវចំកាលៈទេសៈ។ ព្រឹត្តិការណ៍នេះ គូសបញ្ជាក់យ៉ាងច្បាស់អំពីតម្រូវការបន្ទាន់នៃកិច្ចសហប្រតិបត្តិការក្នុងការកសាងតំបន់មួយប្រកបដោយវិបុលភាពនិងសន្តិភាពពេញលេញ តាមរយៈការប្រើប្រាស់បច្ចេកវិទ្យាឌីជីថលនិងនវានុវត្តន៍ ក៏ដូចជាការលើកកម្ពស់វិស័យពាណិជ្ជកម្មនិងវិនិយោគ ដើម្បីកសាងសហគមន៍អាស៊ាន-ចិនមួយ ដែលមានភាពជិតស្និទ្ធ និងអនាគតរួម - ដែលអាចចាក់គ្រឹះយ៉ាងរឹងមាំក្នុងសន្តិភាព វិបុលភាព និងជោគវាសនារួម។ ឯកឧត្ដមឧបនាយករដ្ឋមន្ត្រីប្រចាំការ វង្សី វិស្សុត បានបន្តលើកឡើងថា ព្រឹត្តិការណ៍នេះ ក៏ជាសក្ខីភាពនៃការប្តេជ្ញាចិត្តរួមគ្នារបស់យើងក្នុងការធ្វើសមាហរណកម្ម និងការតភ្ជាប់កាន់តែស៊ីជម្រៅ ដោយប្រែក្លាយទស្សនវិស័យទៅជាកាលានុវត្តភាពនិងភាពជោគជ័យរួមគ្នា តាមរយៈការប្រមូលផ្តុំវិស័យសាធារណៈ វិស័យឯកជន បុគ្គលនវានុវត្តន៍ និងសហគមន៍ ហើយតាមរយៈកិច្ចខិតខំប្រឹងប្រែងរួមគ្នានេះ ប្រទេសចិននឹងបន្តដើរតួជាដៃគូពាណិជ្ជកម្ម និងវិនិយោគដ៏ធំបំផុតរបស់អាស៊ាន។ ពាណិជ្ជកម្មទ្វេភាគីនិងការវិនិយោគផ្ទាល់ពីបរទេសរវាងអាស៊ាននិងចិន បានកើនឡើងជាលំដាប់ ទោះបីជាមានភាពមិនច្បាស់លាស់នៃសេដ្ឋកិច្ចសាកលក៏ដោយ។ ជាមួយនឹងការប្តេជ្ញាចិត្តរួមគ្នារបស់យើងចំពោះ សន្តិភាព កិច្ចសហប្រតិបត្តិការ និងការគោរពគ្នាទៅវិញទៅមក តំបន់របស់យើងនឹងកាន់តែជិតស្និទ្ធថែមទៀត នាពេលអនាគតខាងមុខ។ឯកឧត្ដមឧបនាយករដ្ឋមន្ត្រីប្រចាំការ វង្សី វិស្សុត បានគូសបញ្ជាក់ថា តំបន់ពាណិជ្ជកម្មសេរីអាស៊ាន-ចិន ៣.០ (ACFTA 3.0) គឺជាការបើកទំព័រថ្មីក្នុងភាពជាដៃគូសេដ្ឋកិច្ចក្នុងតំបន់ ខណៈពេលដែលប្រព័ន្ធពាណិជ្ជកម្មពិភពលោកប្រឈមមុខនឹងការបែកខ្ញែក និងការកើនឡើងនូវនិន្នាការគាំពារនិយមកាន់តែខ្លាំង។ ក្របខ័ណ្ឌដែលបានដំឡើងកម្រិតនេះ ផ្តល់នូវកាលានុវត្តភាពយ៉ាងទូលំទូលាយដល់ធុរកិច្ច និងប្រជាជនទាំងអស់ តាមរយៈការពង្រីកទីផ្សារ និងការបង្កើតលំហថ្មីៗបន្ថែមទៀតសម្រាប់កិច្ចសហប្រតិបត្តិការក្នុងវិស័យដែលមានសក្តានុពល ជាពិសេសលើកកម្ពស់ការផ្តល់តម្លៃបន្ថែមលើសេដ្ឋកិច្ចឌីជីថល, សេដ្ឋកិច្ចបៃតង, ការតភ្ជាប់ខ្សែច្រវាក់ផ្គត់ផ្គង់ និងការសម្របសម្រួលផ្នែកពាណិជ្ជកម្ម។ លើសពីនេះទៀត ក្របខ័ណ្ឌនេះក៏ឆ្លុះបញ្ចាំងយ៉ាងច្បាស់អំពីគោលដៅរួមគ្នារបស់យើង ក្នុងការគាំទ្រប្រព័ន្ធពាណិជ្ជកម្មពហុភាគី ដោយបើកចំហ យុត្តិធម៌ និងផ្អែកលើច្បាប់។ ក្នុងន័យនេះ កម្ពុជាប្តេជ្ញាចិត្តដោយឥតងាករេ ក្នុងការបន្តកិច្ចសហការយ៉ាងរឹងមាំជាមួយបណ្តាដៃគូអាស៊ាននិងប្រទេសចិន ដើម្បីធានាការអនុវត្ត CAFTA 3.0 ប្រកបដោយប្រសិទ្ធភាព ក៏ដូចជាដើម្បីទាញយកសក្តានុពលពេញលេញនៃ CAFTA 3.0 សម្រាប់ជាប្រយោជន៍ដល់តំបន់របស់យើង។ឯកឧត្ដមឧបនាយករដ្ឋមន្ត្រីប្រចាំការ បានគូសរំលេចថា ក្រោមការដឹកនាំប្រកបដោយចក្ខុវិស័យវែងឆ្ងាយ និងប្រាកដនិយមរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា, កម្ពុជាបានដាក់ចេញនូវ យុទ្ធសាស្ត្របញ្ចកោណ ដំណាក់កាលទី១ ដោយផ្តល់អាទិភាពលើ «បច្ចេកវិទ្យាឌីជីថល» ជាអាទិភាពគន្លឹះថ្មីមួយ និងបានដាក់ចេញនូវ «ការអភិវឌ្ឍសេដ្ឋកិច្ច និងសង្គមឌីជីថល» ជារបៀបវារៈគោលនយោបាយស្នូលដ៏សំខាន់។ កិច្ចខិតខំប្រឹងប្រែងដែលគួរឱ្យកត់សម្គាល់គិតមកទល់ពេលនេះ រួមមាន៖ ការដាក់ឱ្យដំណើរការនូវការចុះបញ្ជីអាជីវកម្មតាមរយៈថ្នាលបច្ចេកវិទ្យាព័ត៌មាន (CamDX), ការពង្រីកយ៉ាងឆាប់រហ័សនូវសេវាកម្មអាជីវកម្មអនឡាញសម្រាប់សហគ្រាសធុនតូចនិងមធ្យម, ប្រព័ន្ធគ្រប់គ្រងគម្រោងវិនិយោគកម្ពុជា (cdcIPM), ការធ្វើបរិវត្តកម្មឌីជីថលនៃនីតិវិធីពន្ធដារនិងគយ, ការអនុវត្តប្រព័ន្ធទូទាត់ឌីជីថល «បាគង» ដែលជាប្រព័ន្ធទូទាត់អេឡិចត្រូនិកទំនើប និងបច្ចេកវិទ្យាហិរញ្ញវត្ថុជាច្រើនទៀតដែលកំពុងជំរុញបរិយាបន្ន និងប្រសិទ្ធភាពហិរញ្ញវត្ថុ។ លើសពីនេះ ច្បាប់ស្ដីពីវិនិយោគកម្ពុជាផ្តល់អាទិភាពខ្ពស់បំផុត ក្នុងវិស័យឧស្សាហកម្ម និងវិស័យពាក់ព័ន្ធនានា តាមរយៈការផ្តល់នូវការលើកទឹកចិត្តដែលមានភាពទាក់ទាញ និងភាពប្រកួតប្រជែង ដើម្បីជំរុញកំណើនឧស្សាហកម្មដែលមានបច្ចេកវិទ្យាខ្ពស់ និងវិស័យឌីជីថល។ ទន្ទឹមនេះ កម្ពុជាក៏បានចាប់យកនូវបញ្ញាឌីជីថល ជាពិសេសបញ្ញាសិប្បនិមិត្ត (AI) ដែលឥទ្ធិពលរបស់វាលាតសន្ធឹងហួសពីវិស័យបច្ចេកវិទ្យា ដើម្បីធ្វើបរិវត្តកម្មសង្គម និងសេដ្ឋកិច្ចទាំងមូល តាមរយៈការវិនិយោគដ៏ច្រើនសន្ធឹកសន្ធាប់លើហេដ្ឋារចនាសម្ព័ន្ធរឹង ដូចជា ការអភិវឌ្ឍមជ្ឈមណ្ឌលទិន្នន័យជាតិ, ការពង្រីកបណ្តាញខ្សែកាបអុបទិក, និងការត្រៀមរៀបចំសម្រាប់ការដាក់ឱ្យដំណើរការសេវាកម្ម 5G ។ ក្នុងន័យនេះ ឯកឧត្ដមឧបនាយករដ្ឋមន្ត្រីប្រចាំការ វង្សី វិស្សុត បានលើកទឹកចិត្តយ៉ាងមុតមាំចំពោះវិនិយោគិនទាំងអស់ ឱ្យចាប់យកកាលានុវត្តភាពទាំងអស់នេះជាមួយកម្ពុជា ដើម្បីអាចដើរតួនាទីនៅក្នុងការកសាងសង្គមឌីជីថលកម្ពុជាមួយដ៏ទំនើប៕

ថ្នាក់ដឹកនាំអង្គភាពប្រឆាំងអំពើពុករលួយ និងពុទ្ធបរិស័ទ អញ្ជើញកាន់បិណ្ឌវេនទី១០ ឧទ្ទិស​កុសល​ដល់វីរកងទ័ព ដែលពលីជីវិតក្នុងបុព្វហេតុការពារបូរណភាពទឹកដី

2025/09/17 02:59:57 pm        255
Facebook Telegram Linkin
កំពង់ឆ្នាំង៖ ឯកឧត្តម យ៉ិនទៀង ពុទ្ធិរិទ្ធ អនុប្រធានទី១នៃអង្គភាពប្រឆាំងអំពើពុករលួយ តំណាង​ឯកឧត្តម​កិត្តិនីតិកោសល្យបណ្ឌិត ឱម យ៉ិនទៀង ទេសរដ្ឋមន្ត្រី និងជាប្រធាន​អង្គ​ភាព​ប្រឆាំង​អំពើ​ពុក​រលួយ​, ក្រុមការងារ និងពុទ្ធបរិស័ទជិតឆ្ងាយ នៅព្រឹកថ្ងៃទី១៧ ខែកញ្ញា ឆ្នាំ២០២៥នេះ បាន​អញ្ជើញ​កាន់​បិណ្ឌវេនទី១០ នៅវត្តវិហារលើ ស្ថិតក្នុងស្រុកពញាព្ ខេត្តកណ្តាល ដើម្បី​ឧទ្ទិស​កុសល​ផល​បុណ្យដល់វីរៈយុទ្ធជនជាតិកម្ពុជា ដែលបានពលីក្នុងបុព្វហេតុបេសកកម្ម ការពារ​បូរណភាពទឹកដី និងអធិបតេយ្យជាតិកម្ពុជា តស៊ូប្រយុទ្ធជាមួយសត្រូវឈ្លានពាន។ ឯកឧត្តមបានថ្លែងថា បុណ្យកាន់បិណ្ឌបានព្រឹត្តិទៅតាមទំនៀមទម្លាប់ព្រះពុទ្ធសាសនា ជា​បន្ត​បន្ទាប់ ដោយក្តីសប្បាយរីករាយជ្រះថ្លា។ ជារៀងរាល់ឆ្នាំ សាសនិក​ជន​ទាំង​អស់​ដែល​កាន់​ព្រះពុទ្ធ​សាសនា តែងតែគោរពប្រណិបត្តិនូវពិធីបុណ្យកាន់បិណ្ឌតាមទំនៀមទំលាប់ តាំង​ពី​បុរាណ​ដែល​មាន​រយៈ​ពេល១៥ថ្ងៃ នៅគ្រប់ទីវត្តអារាមទូទាំងប្រទេស ដែលចាប់ផ្តើមពីថ្ងៃទី០១រោច ខែ​ភទ្រ​បទ​ រហូតដល់ថ្ងៃទី១៤រោច និងថ្ងៃ១៥រោច ខែភទ្របទ គឺជាថ្ងៃបុណ្យភ្ជុំបិណ្ឌធំតែម្តង។ គណៈ​កម្មការ អាចារ្យវត្ត និងពុទ្ធ​បរិស័ទ​ជិត​ឆ្ងាយ​ទាំង​អស់​ដែល​បាន​ខិតខំ​ប្រឹង​ប្រែង​លះបង់​ធន​ធាន​ផ្ទាល់​ខ្លួន​ចូលរួមក្នុងវេនកាន់បិណ្ឌ ដើម្បីប្រគេនដល់ព្រះសង្ឃសម្រាប់ប្រើប្រាស់ និងដើម្បីកសាង​នូវ​សមិទ្ធផល​ក្នុងវត្តជាប្រយោជន៍ទ្រទ្រង់ទាំងផ្នែកពុទ្ធចក្រ និងផ្នែកអាណាចក្រ សម្រាប់កូនចៅ​ជំនាន់​ក្រោយ​ៗទៀតគោរពប្រណិបត្តិតាម។ ទឹកចិត្តសទ្ធាជ្រះថ្លា​របស់ពុទ្ធបរិស័ទ ដែលបានប្រគេនជូនតាមរយៈព្រះសង្ឃក្នុងថ្ងៃនេះ គឺជាស្រែ​បុណ្យ ​ក្នុងគោលបំណង ដើម្បីឧទ្ទិសកុសលផលបុណ្យជូនដល់ដួងវិញាណក្ខន្ធបុព្វការីជនជីដូន ជីតា ញាត្តិការទាំងប្រាំពីរសន្តាន ដែលបានចែកឋានទៅកាន់លោកខាងមុខ, ការសុំ​សេចក្តី​សុខ​ចំរើន​ដល់​ប្រជាជនកម្ពុជាគ្រប់រូប ជាពិសេសបាន​ឧទ្ទិសកុ​សល​ផល​បុណ្យ​ដល់​វីរៈ​យុទ្ធជន​ជាតិ​កម្ពុជា ដែលបានពលីក្នុងបុព្វហេតុបេសកកម្ម ការពារបូរណភាពទឹកដី និងអធិបតេយ្យជាតិកម្ពុជា តស៊ូ​ប្រយុទ្ធជាមួយសត្រូវឈ្លានពាន និងសូមវិញ្ញាណក្ខន្ធរបស់វីរៈយុទ្ធជនទាំងអស់បាន​ទៅ​កាន់​សុគតិភព កុំបីអាក់ខានឡើយ៕ កាំង ហុងវាស្នា 

កម្មករក្នុងវិស័យកាត់ដេររីករាយ អបអរសាទរ និងអរគុណរាជរដ្ឋាភិបាល ដែល​បាន​ជួយ​ឱ្យ​ប្រាក់​ឈ្នួល​ពួក​គាត់ឡើងជារៀងរាល់ឆ្នាំ

2025/09/17 02:43:21 pm        376
Facebook Telegram Linkin
ក្រុមកម្មករ-កម្មការិនីក្នុងវិស័យកាត់ដេរ បានសម្ដែងអារម្មណ៍រីករាយ អបអរសាទរ និងអរគុណ​រាជ​រដ្ឋាភិបាល ដែលជួយឱ្យប្រាក់ឈ្នួលគោលរបស់ខ្លួន ទទួលបានការដំឡើងជារៀងរាល់ឆ្នាំ ហើយ​នៅឆ្នាំ២០២៦ខាងមុខនេះ ពួកគាត់នឹងទទួលបានការដំឡើងប្រាក់ឈ្នួលចំនួន ២ដុល្លារ​បន្ថែម​ទៀត​។ ការបង្ហាញអារម្មណ៍រីករាយ និងសាទរបែបនេះ គឺបន្ទាប់ពីក្រុមប្រឹក្សាជាតិប្រាក់ឈ្នួលអប្បបរមា បាន​បើក​កិច្ច​ប្រជុំលើកចុងក្រោយរបស់ខ្លួន នៅថ្ងៃទី ១៧ ខែកញ្ញានេះ ដើម្បីពិនិត្យ​សម្រេច​លើ​លទ្ធ​ផល​ នៃកិច្ចប្រជុំពិភាក្សាកំណត់ប្រាក់ឈ្នួលអប្បបរមា សម្រាប់កម្មករ​និយោជិត​ផ្នែក​វាយន​ភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូបសម្រាប់ ឆ្នាំ២០២៦។ ជាលទ្ធផលសម្តេចធិបតី ហ៊ុន ម៉ាណែត នាយករដ្ឋមន្ត្រី បានសម្រេចបន្ថែម ២ដុល្លារ លើតួលេខ ២០៨​ដុល្លារ ដែលធ្វើឱ្យប្រាក់ឈ្នួលអប្បបរមារបស់កម្មករ-និយោជិតផ្នែក វាយនភណ្ឌ កាត់ដេរ ផលិត​ស្បែកជើង និងផលិតផលិតផលធ្វើដំណើរ និងកាបូប សម្រាប់ឆ្នាំ ២០២៦ មានចំនួន ២១០ដុល្លារ ក្នុងមួយខែ។ អ្នកស្រី នៅ រ៉ានី កម្មការិនីមកពីខេត្តព្រៃវែង ប្រាប់ថា អ្នកស្រី បាន​ធ្វើ​ការងារ​នៅ​រោង​ចក្រ​កាត់​ដេរ​តាំង​ពី​មាន​ប្រាក់ឈ្នួលគោលត្រឹម ៨០ដុល្លារ មកដល់ឆ្នាំ ២០២៥នេះ អ្នកស្រីទទួលបាន ២០៨​ដុល្លារ​។ ​អ្នកស្រី រីករាយដែលប្រាក់ឈ្នួលរបស់អ្នកស្រី ក៏ដូចជាបងប្អូនកម្មករ-និយោជិត​ផ្សេង​ទៀត​មានការដំឡើងជារៀងរាល់ឆ្នាំ។ អ្នកស្រី នៅ រ៉ានី ប្រាប់បែបនេះថា «មានការសប្បាយចិត្ត ព្រោះអីទោះឡើងតិចក៏ដោយ ក៏​បាន​លុយ​ថែម​ម៉ោង​ក៏យើងកើនតាមហ្នឹង ចឹងបើយើងថែមឡើងបន្តិចទៅ លុយម៉ោងយើង​ក៏​គុណ​ទៅ​តាម​ហ្នឹង​ទៅ​ចឹងក៏បានច្រើនទៅតាមហ្នឹង»។ កម្មការិនីរូបនេះ បានថ្លែងអំណរគុណដល់ថ្នាក់ដឹកនាំរាជរដ្ឋាភិបាលទាំងអស់ ដែល​បាន​ជួយ​សម្រប​សម្រួល​ឱ្យ​បងប្អូនកម្មករ-និយោជិតមានការងារធ្វើ ហើយក៏បានអរគុណ​ដែល​តែង​តែ​ជួយ​សម្រប​សម្រួល ឱ្យមានការដំឡើងប្រាក់ឈ្នួលជារៀងរាល់ឆ្នាំ។ ចំណែកលោក ហ៊ិន យ៉ាន់ កម្មករមកពីខេត្តតាកែវ ប្រាប់ថា លោក​ចូលធ្វើ​ការងារ​ជា​កម្មករ​រោង​ចក្រ​កាត់​ដេរ​រយៈពេល ៥ឆ្នាំមកហើយ តាំងពីប្រាក់ឈ្នួលមិនទាន់បាន ២០០ដុល្លារមកម្លេះ។ មក​ដល់​ឆ្នាំ២០២៥នេះ លោកទទួលបានប្រាក់ឈ្នួលចំនួន ២០៨ដុល្លារ។ លោក រីករាយ​ដែល​ប្រាក់​ឈ្នួល​រប​ស់​លោក ក៏ដូចជាបងប្អូនកម្មករ-និយោជិតផ្សេងទៀត ទទួលបាន​ការ​ដំឡើង​ជា​រៀង​រា​​ល់​ឆ្នាំ​។ លោក ហ៊ិន យ៉ាន់ និយាយបែបនេះថា «មានអារម្មណ៍ថា សប្បាយចិត្តដោយសារថា ថ្នាក់ដឹកនាំ​យើង​គាត់​គិតដល់កម្មករ-កម្មការិនីរោងចក្រយើង»។ មិនខុសពីកម្មការិនីខាងលើទេ លោក ហ៊ិន យ៉ាន់ ក៏បានថ្លែងអំណរគុណដល់រាជរដ្ឋាភិបាល ក៏ដូចជាក្រសួងការងារ និងបណ្ដុះ​បណ្ដាល​វិជ្ជា​ជីវៈ​ ដែលបានជួយសម្របសម្រួលឱ្យមានការដំឡើងប្រាក់ឈ្នួលជូនកម្មករជារៀងរាល់ឆ្នាំ។ រីឯលោក ស៊ឹម ចិន្តា កម្មករមកពីខេត្តព្រៃវែង ប្រាប់ដែរថា លោក​ធ្វើ​ការងារ​ក្នុង​រោង​ចក្រ​កាត់​ដេរ​រយៈ​ពេល ៣ឆ្នាំមកហើយ តាំងពីប្រាក់ឈ្នួលជាង ១៩០ដុល្លារ មកដល់បច្ចុប្បន្នឡើងដល់ ២០៨​ដុល្លារ។ លោក សាទរ និងរីករាយដែលប្រាក់ឈ្នួលរបស់លោក និងបងប្អូនកម្មករ-និយោជិត​ផ្សេង​ទៀត​ត្រូវបានដំឡើងជារៀងរាល់ឆ្នាំ។ លោក ស៊ឹម ចិន្តា និយាយបែបនេះថា «មានអារម្មណ៍ថា សប្បាយ សប្បាយ​ដោយ​សារ​បាន​ឡើង​ប្រាក់​ខែ​រាល់​ឆ្នាំ​។ មិនខុសពីកម្មករ-កម្មការិនីខាងនោះទេ លោក ស៊ឹម ចិន្តា បានថ្លែងអំណរគុណ​ដល់​ស​ម្ដេចធិបតី ហ៊ុន ម៉ាណែត នាយករដ្ឋមន្ត្រី ដែលតែងតែ​គិតគូរ​អំពី​សុខ​ទុក្ខ​របស់​ប្រជា​ពលរដ្ឋ ក៏ដូចជាកម្មករ-និយោជិតទាំងអស់គ្នា៕

បណ្ដាញសង្គម

ព័ត៌មានថ្មីៗ

ឯកឧត្តមបណ្ឌិតសភាចារ្យ ហង់ជួន ណារ៉ុន តំណាងដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត អញ្ជើញជាអធិបតីក្នុងពិធីអបអរសាទរ “ទិវាព្រះពុទ្ធសាសនាអន្តរជាតិ” ​ឆ្នាំ២០២៦
04/08/2026 01:04 PM
Facebook Telegram Linkin
សម្ដេចតេជោ ហ៊ុន សែន ផ្ដាំផ្ញើ​ដល់​ឯកអគ្គរដ្ឋទូត​តួកគី​យ៉េ​ចប់​អាណត្តិ​ឱ្យបន្ត​ធ្វើ​ជា​ទូត​របស់​កម្ពុជា​ផ្សព្វ​ផ្សាយ​ពី​កម្ពុជា ដើម្បីទាក់ទាញវិនិយោគ និងទេសចរណ៍មកម្ពុជា
04/08/2026 12:04 PM
Facebook Telegram Linkin
សម្តេចធិបតី អញ្ជើញចូលរួមកិច្ចពិភាក្សា និង​ថ្លែង​សុន្ទរ​គន្លឹះ​ក្នុង​កិច្ច​ប្រជុំ​កំពូល​ស្តីពី​សុខ​ភាព​តែមួ​យ និងជួ​បជាមួយបណ្ដាថ្នាក់ដឹកនាំប្រទេសមួយចំនួនទៀតនៅបារាំង​
04/08/2026 11:04 AM
Facebook Telegram Linkin
នាយករដ្ឋមន្ត្រីអូស្ត្រាលី រិះគន់វោហារសាស្ត្ររបស់លោក Trump ខណៈបានស្វាគមន៍បទឈប់បាញ់
04/08/2026 11:04 AM
Facebook Telegram Linkin
ស្ត្រីនៅគុយបា តវ៉ាប្រឆាំងការរឹតត្បិតរបស់អាមេរិក ដោយនិយាយថា «កុមារគ្រប់រូបកើតមកនៅគុយបា គឺជាជ័យជម្នះ»
04/08/2026 11:04 AM
Facebook Telegram Linkin
Harry Marguire សុខចិត្តកាត់បន្ថយប្រាក់ឈ្នួលបន្តកិច្ចសន្យាជាមួយ Manchester United មួយឆ្នាំទៀត
04/08/2026 11:04 AM
Facebook Telegram Linkin
អ៊ីស្រាអែលគាំទ្របទឈប់បាញ់រយៈពេលពីរសប្តាហ៍របស់លោក Trump លើអ៊ីរ៉ង់ តែមិនរាប់បញ្ជូលប្រទេសលីបង់ទេ
04/08/2026 11:04 AM
Facebook Telegram Linkin
វិស័យឯកជនសាធារណរដ្ឋកូរ៉េ ស្នើកម្ពុជា ពង្រឹងកិច្ច​សហប្រតិបត្តិការ​លើ​វិស័យ​អាកាស​ចរណ៍​បន្ថែម​រវាង​ប្រទេសទាំងពីរ
04/08/2026 11:04 AM
Facebook Telegram Linkin
ក្នុងមួយខែៗរដ្ឋចេញខាតជាង ៤៧លានដុល្លារ ដើម្បីជួយសម្រាលបន្ទុកអត្រាពន្ធ និងអាករពីវិបត្តិប្រេងឥន្ធនៈ
04/08/2026 11:04 AM
Facebook Telegram Linkin
FFC បន្ថែមលីគយុវជនមួយកម្រិតទៀត សម្រាប់ក្រុមនៅភ្នំពេញ និងតំបន់ជុំវិញ
04/08/2026 11:04 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.