នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ក្រសួងការងារ និងក្រសួងឧស្សាហកម្ម រួមគ្នាជំរុញការអនុវត្តស្ដង់ដាសុវត្ថិភាពម្ហូបអាហារដល់ម្ចាស់សហគ្រាស SMEs ដើម្បីបង្កើនភាពប្រកួតប្រជែង និងបង្កើតការងារសមរម្យនៅកម្ពុជា
គណៈកម្មការគ្រប់គ្រងល្បែងពាណិជ្ជកម្មកម្ពុជាដកហូតអាជ្ញាបណ្ណកាស៊ីណូពីក្រុមហ៊ុន ខេ ប៊ី អាយ (ខេមបូឌា) ភីអិលស៊ី
ថ្នាក់ដឹកនាំអាកាសចរណ៍ស៊ីវិល ចុះសួរសុខទុក្ខ និងនាំយកអំណោយសម្តេចធិបតីចែកជូនពលទាហានការពារនៅព្រំដែន ៥០៤ ក្នុងឱកាសចូលឆ្នាំថ្មី
ក្រសួងមុខងារសាធារណៈ និងក្រសួងការបរទេសនឹងរៀបចំការប្រឡងប្រជែងជ្រើសរើសមន្ត្រីក្របខ័ណ្ឌប្រភេទ “ក” ចំនួន ៥២កន្លែង

ព័ត៌មានជាតិ

លោកអ្នកឧកញ៉ាបណ្ឌិត ទ្រី ភាព និងអ្នកឧកញ៉ា គៀន ស្រីនាង កាន់បិណ្ឌវេនទី១០ នៅវត្តបទុមវតីរាជវរារាម

2025/09/17 01:37:58 pm        366
Facebook Telegram Linkin
ព្រឹកថ្ងៃពុធ១០រោច ខែភទ្របទ ឆ្នាំម្សាញ់ សប្ដស័ក ពុទ្ធសករាជ២៥៦៩ ត្រូវនឹងថ្ងៃទី១៧ ខែកញ្ញា ឆ្នាំ២០២៥ លោកអ្នកឧកញ៉ាបណ្ឌិត មហាករុណាធម្មសិរីវិសុទ្ធិមុនី អគ្គមហា​ឧបាសក ពុទ្ធសាសនូបត្ថម្ភក៍ ទ្រី ភាព អគ្គនាយក ក្រុមហ៊ុន ទ្រី ភាព គ្រុប និងលោកជំទាវ អ្នកឧកញ៉ា​មហា​ធម្មរតនវិសុទ្ធិ អគ្គមហាឧបាសិកា ពុទ្ធសាសនូបត្ថម្ភក៍ គៀន ស្រីនាង ព្រមទាំងបុត្រាបុត្រី និង​សហការី បានអញ្ជើញកាន់បិណ្ឌទី១០ នៅវត្តបទុមវតីរាជវរារាម រាជនីភ្នំពេញ ដោយ​មាន​ការចូលរួមពីបុគ្គលិកជាច្រើនអ្នកផងដែរ។ ពិធីកាន់បិណ្ឌទីនេះ បានប្រព្រឹត្តទៅតាមកន្លងប្រពៃណីព្រះពុទ្ធសាសនា ដោយមានធ្វើបទនមស្សការ សមាទានសីល ចម្រើនព្រះបរិត្ត រាប់បាត្រ ប្រគេនចង្ហាន់ព្រះសង្ឃជាង៤០០អង្គ បង្សុកូល វេរ ឧទ្ទិសកុសលផលបុណ្យជូនវិញ្ញាណក្ខន្ធបុព្វការីជន និងញាតិការទាំងប្រាំពីរសណ្ដាន ជាពិសេសយុទ្ធជន យុទ្ធនារី ដែលជាវីរកងទ័ព ដែលបានពលីក្នុងបុព្វហេតុជាតិព្រំដែនថៃកន្លងទៅ។ក្នុងឱកាសនេះដែរ លោកអ្នកឧកញ៉ា និងលោកជំទាវ អ្នកឧកញ៉ា បាននាំយកទេយ្យទានមាន អង្ករ២តោន មី ១៨កេស ស្ករស ៥បាវ ទឹកដោះគោ ៥កេស ទឹកសុទ្ធ ៥០កេស ទឹកក្រូច ២០កេស ទឹកផ្លែឈើ ២០កេស ទឹកត្រី ១០យួរ ទឹកស៊ីអ៊ីវ ១០យួរ អំបិល ២០គីឡូ បច្ច័យសម្រាប់តម្កល់ជើងបិណ្ឌការកសាង ៤០.០០០.០០០ រៀល។ ក្រៅពីនោះលោកទាំងពីរក៏បានប្រគេនបច្ច័យដល់ សម្ដេចព្រះមហាសុមេធាធិបតី នន្ទ ង៉ែត ១២.០០០.០០០ រៀល សម្តេចព្រះពុទ្ធជ័យមុនី ឃឹម សន ១៤.០០០.០០០ រៀល សម្ដេចព្រះមង្គលមុនីរង្សី ហ៊ូ ឈីវនាថ ២.០០០.០០០ រៀល ព្រះចរណវិជ្ជា ចេម ធីរៈ ២.០០០.០០០ រៀល ព្រមទាំងបច្ច័យប្រគេនព្រះសង្ឃ ជូនអាចារ្យ តាជី-យាយជី និងសិស្ស-និស្សិត ៤៩៧ អង្គ/នាក់ ក៏ដូចជាចំណាយផ្សេងៗក្នុងពិធីបុណ្យទាំងមូលអស់ថវិកាប្រមាណ ៣០០.០០០.០០០ រៀល។សូមបញ្ជាក់ផងដែរថា លោកអ្នកឧកញ៉ា បណ្ឌិត ទ្រី ភាព និងលោកជំទាវ អ្នកឧកញ៉ា គៀន ស្រីនាង បានចូលរួមកសាងក្នុងបទុមវត្តី រហូតដល់ពេលបច្ចុប្បន្ននេះ អស់ថវិកាប្រមាណ ១៤ ម៉ឺនដុល្លារអាមេរិកហើយ។ក្រៅពីពិធីបុណ្យកាន់បិណ្ឌខាងលើនេះ ក្រុមហ៊ុនបុត្រសម្ព័ន្ធ និងសាខានៃក្រុមហ៊ុន ទ្រី ភាព គ្រុប ក្រោមការដឹកនាំរបស់លោកទាំងពីរ ក៏បានប្រតិបត្តិពិធីកាន់បិណ្ឌតាមវេននៅទីវត្តអារាមក្នុងតំបន់ក្រុមហ៊ុននីមួយៗផងដែរ។ មិនត្រឹមតែប៉ុណ្ណោះ ក្នុងនាមក្រុមការងារគណបក្សចុះមូលដ្ឋានឃុំត្បែង ស្រុកកណ្ដាលស្ទឹង ខេត្តកណ្ដាល ក៏ដូចជាស្រុកប្រាសាទបល័ង្ក ខេត្តកំពង់ធំ លោកទាំងពីរក៏បានចូលរួមកាន់បិណ្ឌនៅវត្តអារាម តាមបណ្ដាឃុំមូលដ្ឋានជាច្រើនទៀតផងដែរ។តាងនាមឱ្យក្រុមការងារក្រុមហ៊ុន ក៏ដូចជាក្រុមការងារគណបក្សប្រជាជនកម្ពុជា លោកអ្នកឧកញ៉ា បណ្ឌិត ទ្រី ភាព និងលោកជំទាវ លោកអ្នកឧកញ៉ា គៀន ស្រីនាង ក៏ដូចជាសហការីទាំងអស់នៃក្រុមហ៊ុន ទ្រី ភាព គ្រុប សូមឧទ្ទិសបុណ្យកុសលជូនដល់បុព្វការីជន បុព្វបរសខ្មែរ ក៏ដូចជាវីរកងទ័ពដែលបានពលីក្នុងបុព្វហេតុការពារទឹកដី​ក្នុងជម្លោះព្រំដែនកម្ពុជា-ថៃ កន្លងមក៕

ឯកឧត្តម Wang Yi៖ កម្ពុជា និងថៃ គឺជា​អ្នកជិតខាងល្អ​ហើយ​មិន​មាន​ឧបសគ្គ ឬ​បញ្ហា​ណា​ដែល​មិន​អាច​ដោះស្រា​យបានរវាងប្រទេសទាំងពីរទេ ខណៈបេសកជន​ពិសេស​របស់​ចិន​កំពុង​បំពេញ​បេសក​កម្ម​សម្របសម្រួល

2025/09/17 01:28:09 pm        324
Facebook Telegram Linkin
ឯកឧត្តម វ៉ាង យី (Wang Yi) សមាជិកការិយាល័យនយោបាយ, ប្រធាន​ការិយាល័យ​គណៈកម្មការ​កិច្ច​ការបរទេសនៃគណៈកម្មាធិការមជ្ឈឹមបក្សកុម្មុយនីស្តចិន, និងជារដ្ឋមន្ត្រីការ​បរទេស​ចិនបានថ្លែងថា កម្ពុជា និងថៃ គឺជាអ្នកជិតខាងល្អ ហើយមិនមានឧបសគ្គ ឬបញ្ហា​ណា​ដែល​មិន​អាចដោះស្រាយបានរវាងប្រទេសទាំងពីរទេ ខណៈបេសកជន​ពិសេស​របស់​ចិន​កំពុង​បំពេញ​បេសក​កម្មសម្របសម្រួលលើកទី៣ចំពោះវិវាទព្រំដែននៃប្រទេសទាំងពីរ។ ឯកឧត្តម វ៉ាង យី (Wang Yi) បានមានប្រសាសន៍បញ្ជាក់បែបនេះ ក្នុង​ឱកាស​ជំនួប​ពិភាក្សា​ការងារ​ជាមួយ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍​កម្ពុជា និងជាសហប្រធានគណៈកម្មាធិការសម្របសម្រួលអន្តររដ្ឋាភិបាលកម្ពុជា-ចិន រដ្ឋធានី​ប៉េកាំង​, សាធារណរដ្ឋប្រជាមានិតចិន កាលពីថ្ងៃអង្គារ ទី១៦ ខែកញ្ញា ឆ្នាំ២០២៥។ឯកឧត្តម វ៉ាង យី បានថ្លែងថា៖«ភាគីចិនបានឃាត់និងជំរុញឱ្យមានពិភាក្សាយ៉ាងសកម្ម ចាប់តាំង​ពី​ជម្លោះ​បានកើតឡើង។ កម្ពុជានិងថៃ គឺជាអ្នកជិតខាងល្អ ហើយមិនមានឧបសគ្គ ឬបញ្ហាណា​ដែល​មិន​អាចដោះស្រាយបានរវាងប្រទេសទាំងពីរទេ។ យើងសង្ឃឹមថា​ភាគីទាំងពីរនឹងចាប់យកឱកាសនេះ ដើម្បីពន្លឿនដំណើរការផ្សះផ្សារ។ បេសកជនពិសេសរបស់ភាគីចិនកំពុងបំពេញបេសកកម្មសម្របសម្រួលលើកទី៣ ហើយរីករាយក្នុងការផ្តល់ជំនួយយ៉ាងសកម្មស្របតាមការចង់បានរបស់ភាគីទាំងពីរ»។កិច្ចប្រជុំនាឱកាសនេះកម្ពុជា និងចិនក៏បានពិភាក្សាលើប្រធានបទសំខាន់ៗក្នុងការជំរុញពង្រឹងកិច្ចសហប្រតិបត្តិការ និងការអនុវត្តគម្រោងផែនការនានាលើវិស័យហេដ្ឋារចនាសម្ព័ន្ធ វិនិយោគ ពាណិជ្ជកម្ម កសិកម្ម ឧស្សាហកម្ម សុខាភិបាល វប្បធម៍ និងបច្ចេកវិទ្យាជាដើម ដែលស្ថិតក្រោមក្របខណ្ឌនៃអនុស្សរណៈនៃការយោគយល់គ្នា និងកិច្ចព្រមព្រៀងពាណិជ្ជកម្មសេរីកម្ពុជា-ចិន។ គម្រោងគួរឱ្យកត់សម្គាល់ដែលបានលើកយកមកពិភាក្សាមានដូចជា គម្រោងព្រែកជីកហ្វូណនតេជោ, គម្រោងកែលំអផ្លូវជាតិលេខ៣ តភ្ជាប់កំពត-វាលរេញ, គម្រោងសាងសង់កំណាត់ផ្លូវជាតិលេខ៧ រមាត-ត្រពាំងគ្រៀល, គម្រោងទំនើបកម្មប្រព័ន្ធចម្រោះទឹកកខ្វក់ខេត្តព្រះសីហនុ, គម្រោងពង្រីកការនាំចេញពីកម្ពុជាទៅកាន់ប្រទេសចិនក្រោមកិច្ចព្រមព្រៀងពាណិជ្ជកម្មសេរី, និងគម្រោងច្រករបៀងត្រី និងអង្ករ ជាដើម។ក្នុងឱកាសនោះ ឯកឧត្តម វ៉ាង យី បានវាយតម្លៃខ្ពស់លើកិច្ចសហប្រតិបត្តិការត្បូងពេជ្រ ដែលរួមចំណែកដល់ការពង្រឹងមិត្តភាពដែកថែបឱ្យកាន់តែកក់ក្តៅ សំដៅបង្កើតសហគមន៍វាសនារួមនិងផលប្រយោជន៍ទៅវិញទៅមក។ឯកឧត្តមឧបនាយករដ្ឋមន្រ្តី បានថ្លែងអំណរគុណយ៉ាងជ្រាលជ្រៅចំពោះ ឯកឧត្តម វ៉ាង យី ដែលបានឆ្លៀតពេលវេលាដ៏មមាញឹកទទួលស្វាគមន៍យ៉ាងកក់ក្ដៅចំពោះដំណើរទស្សនកិច្ចរបស់គណៈប្រតិភូកម្ពុជានាឱកាសនេះ ខណៈឯកឧត្តមក៏ទើបអញ្ជើញត្រឡប់មកពីបំពេញទស្សនកិច្ចនៅតំបន់អ៊ឺរ៉ុបនាពេលថ្មីៗនេះ។ ការស្វាគមន៍នេះបានឆ្លុះបញ្ចាំងពីចំណងមិត្តភាពដ៏រឹងមាំរវាងឯកឧត្តម វ៉ាង យី និងឯកឧត្តមឧបនាយករដ្ឋមន្ត្រីផ្ទាល់ និងទំនាក់ទំនងដែកថែបរវាងកម្ពុជា-ចិន។ ឯកឧត្តមឧបនាយករដ្ឋមន្រ្តី បានអបអរសាទរចំពោះប្រទេសចិនដែលទទួលបានភាពជោគជ័យលើការរៀបចំកិច្ចប្រជុំកំពូលអង្គការសហប្រតិបត្តិការសៀងហៃបូកនាពេលថ្មីៗនេះ៕

ឯកឧត្តមអនុប្រធានរដ្ឋសភានៃសហព័ន្ធរុស្ស៊ីសន្យាថា នឹងជំរុញឱ្យមានជើងហោះហើរត្រង់រវាងកម្ពុជា-រុស្ស៊ី

2025/09/17 01:18:35 pm        204
Facebook Telegram Linkin
ឆ្លៀតក្នុងឱកាសចូលរួមមហាសន្និបាតអន្តរសភាអាស៊ានលើកទី៤៦ នៅទីក្រុងគូឡាឡំាពួ ប្រទេសម៉ាឡេស៊ី សម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា បានជួបពិភាក្សាការងារជាមួយ ឯកឧត្ដម KARA-OOL Shalban អនុប្រធានរដ្ឋសភានៃសហព័ន្ធរុស្ស៊ី (ឌូម៉ា)ដើម្បីពង្រឹងពង្រីកទំនាក់ទំនង រដ្ឋសភាប្រទេសទំាងពីរ ឱ្យកាន់តែរឹងមាំ ជិតស្និទ្ធ និងស៊ីជម្រៅបន្ថែមទៀត។នៅក្នុងឱកាសនោះ សម្តេចប្រធានរដ្ឋសភា បានថ្លែងអំណរគុណរុស្ស៊ីដែលតំាងពីអតីតសហភាពសូវៀត បានចូលរួមគំាទ្រ ដល់ការស្តារនិងអភិវឌ្ឍន៍សង្គមកម្ពុជាឡើងវិញក្រោយពីថ្ងៃទី៧មករាឆ្នាំ១៩៧៩ រហូតមកដល់ពេលនេះ។ ឆ្នាំ២០២៥ នេះ ជាខួបគម្រប់៦៩ ឆ្នាំ នៃការបង្កើតទំនាក់ទំនងការទូតរវាងប្រទេសទាំងពីរ ហើយឆ្នាំ២០២៦ នឹងឈានដល់គម្រប់ខួបទី៧០ឆ្នាំ។ ដូចនេះប្រទេសទំាងពីរគួររៀបចំបង្កើតព្រឹត្តិការណ៍រួមគ្នាអ្វីមួយ ដើម្បីអបអរសាទរនូវសមិទ្ធផលគួរជាទីមោទនៈជាច្រើន ដែលកើតចេញពីចំណង មិត្តភាព ទំនាក់ទំនងដ៏ល្អ យូរអង្វែង និងភាពជាដៃគូនៃប្រទេសទាំងពីរ។ឯកឧត្ដម KARA-OOL Shalban បានគំាទ្រប្រសាសន៍លើកឡើងរបស់សម្តេចប្រធានរដ្ឋសភានិងបានវាយតម្លៃខ្ពស់ចំពោះទំនាក់ទំនងដ៏ល្អរវាងប្រទេសទាំងពីរដោយបានគូសបញ្ជាក់ថាក្នុងឱកាសខួប ៧០ឆ្នាំនៃចំណងមិត្តភាពនេះប្រទេសទំាងពីរត្រូវតែពង្រឹងពង្រីកទំនាក់ទំនងគ្នាឱ្យកាន់តែជិតស្និទ្ធថែមទៀត ឯកឧត្តមបានសន្យាថានឹងខិតខំជំរុញឱ្យមានការជើងហោះហើរត្រង់រវាងកម្ពុជានិងរុស្ស៊ី ដើម្បីងាយស្រួលដល់ការភ្ជាប់ទំនាក់ទំនងប្រជាជននិងប្រជាជននិងបានអបអរសាទរចំពោះការគំាទ្រគ្នាទៅវិញទៅមករវាងសភាប្រទេសទំាងពីរនៅលើវេទិកាអន្តរជាតិនានា ហើយកម្ពុជានិងរុស្ស៊ី ក៏បានសិក្សាបទពិសោធន៍ពីគ្នាទៅវិញទៅមក ជាច្រើនវិស័យដែរ នៅក្នុងនោះមានការបោះឆ្នោតជាដើម។ជាចុងសញ្ចប់សម្តេចបានស្នើដល់រុស្ស៊ីជួយជំរុញការវិនិយោគ ពាណិជ្ជកម្ម និងទេសចរណ៍ប្រទេសទំាងពីរឱ្យមានកំណើនបន្តទៀត។ នៅក្នុងនោះសម្តេចក៏បានស្នើដល់រុស្ស៊ី បន្តផ្តល់អាហារូបករណ៍ដល់និស្សិតកម្ពុជាទៅសិក្សានៅសហព័ន្ធរុស្ស៊ីឱ្យបានកាន់តែច្រើនបន្ថែមទៀត ដើម្បីរួមចំណែកអភិវឌ្ឍមូលធនមនុស្សរបស់កម្ពុជា ស្របតាមយុទ្ធសាស្រ្តបញ្ចកោណដំណាក់កាលទី១ ដែលផ្តោតលើមនុស្ស ជាកត្តាអាទិភាពខ្ពស់បំផុត។ថ្នាក់ដឹកនាំសភាប្រទេសទាំងពីរ បានសន្យាថាបន្តរក្សាការផ្លាស់ប្តូរទស្សនកិច្ច គាំទ្រគ្នាទៅវិញទៅមក និងការពិគ្រោះយោបល់កម្រិតខ្ពស់។ ការពង្រឹងចំណងមិត្តភាពទាំងនេះ នឹងជួយជំរុញការយល់ដឹងគ្នាទៅវិញទៅមក កសាងទំនុកចិត្ត ដែលជាមូលដ្ឋានគ្រឹះសម្រាប់កិច្ចសហប្រតិបត្តិការផ្នែកនីតិប្បញ្ញត្តិកាន់តែរឹងមាំនិងស៊ីជម្រៅ៕

កម្ពុជា និងចិន ចុះហត្ថលេខាលើកិច្ចព្រមព្រៀងស្តីពីមូលនិធិពិសេសសម្រាប់គម្រោងកិច្ចសហប្រតិបត្តិការមេគង្គ-ឡានឆាង ឆ្នាំ២០២៥

2025/09/17 01:03:56 pm        249
Facebook Telegram Linkin
ឯកឧត្តម ប្រាក់ សុខុន ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងឯកឧត្តម វ៉ាង វិនពីន (Wang Wenbin) ឯកអគ្គរដ្ឋទូត នៃសាធារណរដ្ឋប្រជាមានិតចិន ប្រចាំនៅកម្ពុជា អញ្ជើញចុះហត្ថលេខាលើកិច្ចព្រមព្រៀងស្តីពីមូលនិធិពិសេសសម្រាប់គម្រោងកិច្ចសហប្រតិបត្តិការមេគង្គ-ឡានឆាង ឆ្នាំ២០២៥ នៅទីស្តីការក្រសួងការបរទេស និងសហប្រតិបត្តិការអន្តរជាតិ នាព្រឹកថ្ងៃទី១៧ ខែកញ្ញា ឆ្នាំ២០២៥។

មនុស្សជាងមួយពាន់នាក់ ចូលរួមរត់អបអរខួប២ឆ្នាំ ការដាក់ប្រាសាទកោះកេរ ក្នុង​បញ្ជី​បេតិក​ភណ្ឌ​ពិភពលោក

2025/09/17 12:46:20 pm        297
Facebook Telegram Linkin
មនុស្សជាងមួយពាន់នាក់ មកពីបណ្ដារាជធានីខេត្ត ជាពិសេសអ្នកនៅខេត្តព្រះវិហារ បាន​ចូល​រួម​រត់​សហគមន៍ “ផ្លូវលំកោះកេរ” ចម្ងាយជាង ៩គីឡូម៉ែត្រ ជុំវិញផ្លូវប្រាសាទកោះកេរ ដើម្បី​អបអរ​សាទរ​ខួប​២​ឆ្នាំ នៃការដាក់បញ្ចូលរមណីយដ្ឋានប្រាសាទកោះកេរ ក្នុងបញ្ជីបេតិកភណ្ឌពិភពលោក ។ក្នុងពិធីរត់សហគមន៍នៅព្រឹកថ្ងៃទី១៧ ខែកញ្ញា ឆ្នាំ២០២៥ ស្ថិតនៅក្នុងភូមិកោះកេរ ឃុំស្រយង់ ស្រុក​គូលែន ខេត្តព្រះវិហារ ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តី​ក្រសួង​មុខងារ​សាធារណៈ ​និងជាប្រធានសហភាពសហព័ន្ធយុវជកម្ពុជា (ស.ស.យ.ក) បានមានប្រសាសន៍ថា ការ​ជួប​ជុំគ្នារត់នៅថ្ងៃនេះ ក្រៅពីអបអរសាទរខួប២ឆ្នាំ នៃការចុះបញ្ជី​ជា​សម្បត្តិ​បេតិកភណ្ឌ​ពិភព​លោក​ ក៏ជាការរំលឹកដល់បុព្វបុរសរបស់យើង ខណៈជឿជាក់ថា លោកកំពុង​ស្ថិត​នៅ​ជាមួយ​យើង​ថែ​រក្សា​យើង។ឯកឧត្តមបានបន្តថា មួយវិញទៀត សម្រាប់ប្រាសាទកោះកេរ ជាសម្បត្តិ​បេតិក​ភណ្ឌ​ពិភព​លោក​នេះ ​គឺគួ​រតែអបអរសាទរ និងមានមោទនភាព ព្រោះជាមរតនៃដូនតាយើងបានបន្សល់ទុក គឺ​មាន​ការ​​ទទួល​ស្គាល់​ជា​សកល​លោក​តែម្ដង ដូចនេះយើងរត់ ឬដើរ ពោរពេញដោយមោទនភាព សម្រាប់​​អ្វី​ដែល​ខ្មែរមាន ខ្មែរធ្វើបាន ។ឯកឧត្តម គង់ ពុទ្ធិការ អគ្គនាយកអាជ្ញាធរជាតិព្រះវិហារ បានថ្លែងថា ចាប់ពីការ​ដាក់​បញ្ចូល​ក្នុង​បញ្ជី​បេតិក​ភណ្ឌពិភពលោក នៅឆ្នាំ២០២៣ ឃើញថាស្ថានភាពនៃភ្ញៀវទេសចរ មក​ទស្សនា​រមណីយ​ដ្ឋាន​ប្រាសាទ​កោះកេរ មានប្រមាណជាង ៣០ម៉ឺននាក់ ក្នុងនោះភ្ញៀវបរទេសមានជាង ៥ម៉ឺន​នាក់ ហើយកម្មវិធីរត់សហគមន៍នេះ នឹងកាន់តែជួយផ្សព្វផ្សាយបន្ថែមទៀត នៃ​រមណីយ​ដ្ឋាន​ប្រាសាទ​កោះកេរ ទៅកាន់ប្រជាពលរដ្ឋខ្មែរ និងសហគមន៍អន្តរជាតិ មកទស្សនាកាន់តែច្រើន ។សម្រាប់អ្នកចូលរួមរត់ហើយទទួលជ័យលាភីលេខ១ និងលេខ២ បានបង្ហាញ​នូវ​ការ​សប្បាយ​រីក​រាយ​​ដែ​ល​ជាចំណែក​ចូលរួមផ្សព្វផ្សាយពីប្រាសាទបុរាណរបស់ខ្មែរ ជាមួយ​នឹង​ការ​ប្ដេជ្ញា​ខិត​ខំ​ចូល​រួម​ថែរក្សា និងអភិរក្ស។កម្មវិធីរត់សហគមន៍នេះ ក៏មានការចូលរួមពីសំណាក់ គីម រិទ្ធី អភិបាលខេត្តខេត្តព្រះវិហារ ក្រុម​បាល់​ទាត់​ទាំង​៨ រួមមាន ក្រុមបាល់ទាត់ ស.ស.យ.ក. អលស្តារ ក្រុមបាល់ទាត់​សម្ព័ន្ធ​យុវជ​ន​ស្រលាញ់​សន្តិភាព ក្រុមបាល់ទាត់ Vlogger All Star ក្រុមបាល់ទាត់សហព័ន្ធ​យុវជន​បូជា​ការពារ​យុត្តិធម៌ ​ក្រុមបាល់ទាត់ពិធីករកីឡាកម្ពុជា ក្រុមបាល់ទាត់ផ្ការីកគ្រប់រដូវ ក្រុមបាល់ទាត់ តារា​កម្ពុជា​ ក្រុមបាល់ទាត់នៃសមាគមគ្រូពេទ្យស្ម័គ្រចិត្តសម្តេចតេជោ (TYDA) និងបងប្អូន​អ្នក​ខេត្ត​ព្រះវិហារ។ប្រាសាទកោះកេរ គឺជាទីតាំងបុរាណវត្ថុ ដែលដាច់ស្រយាលមួយនៅភាគខាងជើង នៅ​ខេត្ត​ព្រះវិហារ ដែលមានចម្ងាយប្រហែល ១២០គីឡូម៉ែត្រ ពីខេត្តសៀមរាប។ ប្រាសាទកោះកេរ បាន​កសាង​ឡើង​ក្នុង​រជ្ជកាលព្រះបាទជ័យវរ័្មនទី៤ ឧទ្ទិសថ្វាយព្រះឥសូរតាមបែបព្រហ្មញ្ញសាសនា៕ អត្ថបទ បាន សុខរិទ្ធិ

ឯកឧត្តម ឃួង ស្រេង និងលោកជំទាវ អញ្ជើញកាន់បិណ្ឌវេនទី១០ នៅវត្តសុវណ្ណមុនីសាគរសំរោងអណ្តែត

2025/09/17 12:27:15 pm        114
Facebook Telegram Linkin
 ភ្នំពេញ៖ ឯកឧត្តម ឃួង ស្រេង អភិបាលរាជធានីភ្នំពេញ និងលោកជំទាវជា ស៊ីណា ឃួង ស្រេង នៅព្រឹកថ្ងៃពុធ ១០រោច ខែភទ្របទ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី១៧ ខែកញ្ញា ឆ្នាំ២០២៥នេះ បានដឹកនាំឯកឧត្ដម និងលោកជំទាវជាអភិបាលរងរាជធានី ឯកឧត្ដម លោកជំទាវសមាជិកក្រុប្រឹក្សារាជធានី លោក និងលោកស្រីជាគណៈអភិបាលខណ្ឌទាំង១៤ ព្រមទាំងមន្ត្រី និងមន្ទីរស្ថាប័នអង្គភាព មន្ត្រីរាជការជុំវិញរដ្ឋបាលរាជធានីភ្នំពេញអញ្ជើញចូលរួមកាន់បិណ្ឌវេនទី១០ នៅវត្តសុវណ្ណមុនីសាគរសំរោងអណ្តែត ខណ្ឌសែនសុខ។ឯកឧត្តម ឃួង ស្រេង អភិបាលរាជធានីភ្នំពេញ និងលោកជំទាវ រួមជាមួយឯកឧត្ដម និងលោកជំទាវអភិបាលរងរាជធានី ព្រមទាំងឯកឧត្ដម និងលោកជំទាវសមាជិកក្រុមប្រឹក្សារដ្ឋបាលរាជធានី បានអញ្ជើញរាប់បាត្រ បង្សុកូល ដើម្បីឧទ្ទិសកុសលផលបុណ្យជូនដល់ដួងវិញ្ញាណក្ខន្ធចំពោះមាតាបិតា ជីដូនជីតា និងញាតិការទាំង៧សណ្តាន ដែលបានចែកឋានទៅកាន់បរលោកខាងមុខ និងបានឧទ្ទិសដល់ដួងវិញ្ញាណក្ខន្ធដល់កម្មាភិបាល យុទ្ធជន ដែលបានពលីជីវិតក្នុងបុព្វហេតុការពារជាតិមាតុភូមិ ពិសេសឧទ្ទិសដល់ដួងវិញ្ញាណក្ខន្ធវីរៈកងទ័ពដែលបានពលីជីវិតក្នុងបុព្វហេតុការពារបូរណភាពទឹកដីក្នុងជម្លោះព្រំដែនកម្ពុជា-ថៃ។ក្រោយថ្ងៃរំដោះ ៧មករាឆ្នាំ១៩៧៩ បន្ទាប់ពីរបបប្រល័យពូជសាសន៍ ប៉ុល ពត បានរលំរលាយទៅពិធីបុណ្យភ្ជុំបិណ្ឌ ត្រូវបានប្រារព្ធឡើងវិញក្រោមការបើកទូលាយរបស់រាជរដ្ឋាភិបាលកម្ពុជា ក្រោមការដឹកនាំរបស់សម្តេចតេជោ ហ៊ុន សែន អតីតនាយករដ្ឋមន្ត្រី និងបន្តដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានធ្វើឲ្យប្រទេសជាតិមានការអភិវឌ្ឍន៍រីកចម្រើនលើគ្រប់វិស័យ ក្នុងនោះក៏បានធ្វើឲ្យវិស័យពុទ្ធចក្រមានការរីកចម្រើន ហើយប្រពៃណីព្រះពុទ្ធសាសនាក្នុងជំនឿកាន់បិណ្ឌ ត្រូវបានប្រជាពលរដ្ឋខ្មែរនាំគ្នាគោរពប្រតិបត្តិយ៉ាងខ្ជាប់ខ្ជួនតាំងពីសម័យបុរាណរហូតមកដល់សព្វថ្ងៃ។ ក្នុងឱកាសនៃពិធីបុណ្យភ្ជុំបិណ្ឌវេនទី១០ នាព្រឹកថ្ងៃទី១៧ កញ្ញា២០២៥នេះ ឯកឧត្តមឃួង ស្រេង និង លោកជំទាវ ក៏បានវេប្រគេននូវទ័យវត្ថុ និង គ្រឿងឧបភោគ បរិភោគជាច្រើន និងប្រគេនបច្ច័យដល់ព្រះសង្ឃ ដើមី្បយកទៅកសាងសមិទ្ធផលនានា នៅក្នុងទីអារាមនៃវត្តសុវណ្ណមុនីសាគរសំរោងអណ្តែតទៀតផង៕ ប្រាក់ វ៉ាន់ដា

ថ្នាក់ដឹកនាំរដ្ឋសភាកម្ពុជា និងឡាវ ប្តេជ្ញាបន្តរក្សានូវសន្ទុះវិជ្ជមាន​នៃទំនាក់ទំនងការទូតសភា​ក្នុង​ការផ្តល់​នូវលទ្ធផលវិជ្ជមានជានិច្ចដល់ប្រទេស និងពលរដ្ឋទាំងសងខាង

2025/09/17 11:59:50 am        227
Facebook Telegram Linkin
ក្នុងឱកាសស្នាក់នៅទីក្រុងគូឡាឡំាពួ ប្រទេសម៉ាឡេស៊ី ដើម្បីចូលរួមមហាសន្និបាតអន្តរសភាអាស៊ានលើក (អាយប៉ា)លើកទី៤៦ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា នៅព្រឹកថ្ងៃទី១៧ ខែកញ្ញា ឆ្នាំ២០២៥ បានជួបពិភាក្សាការងារក្នុងពេលស្រស់ស្រូបអាហារពេលព្រឹក ជាមួយលោកជំទាវ សុធន់ សាយ៉ាចាក់ (Sounthone XAYACHACK) អនុប្រធានរដ្ឋសភា នៃសាធារណរដ្ឋប្រជាធិបតេយ្យប្រជាមានិតឡាវ។ក្នុងជំនួបនេះ សម្តេចប្រធានរដ្ឋសភានិងលោកជំទាវអនុប្រធានរដ្ឋសភាឡាវ បានសម្តែងនូវក្តីសោមនស្សរីករាយ ដែលបានជួបពិភាក្សាការងារជាមួយគ្នាជាថ្មី បន្ទាប់ពីជំនួបកាលពីទី២៩ ខែកក្កដា ឆ្នាំ២០២៥ ក្នុងអំឡុងពេលចូលរួមសន្និសីទកំពូលប្រធានសភាពិភពលោកលើកទី៦ នៅទីក្រុងហ្សឺណែវ ប្រទេសស្វីស។ សម្តេចប្រធានរដ្ឋសភា បានគូសបញ្ជាក់ថា កម្ពុជាតែងតែយកចិត្តទុកដាក់យ៉ាងខ្លាំង ចំពោះទំនាក់ទំនងជាមួយមិត្តជិតខាង ជាពិសេសមិត្តឡាវ និងតែងតែចាត់ទុកមិត្តឡាវជាប្រទេសជិតខាងដ៏សំខាន់សម្រាប់គោលនយោបាយការបរទេសរបស់ខ្លួន។ ទំនាក់ទំនងរវាង កម្ពុជា-ឡាវ គឺជាទ្រព្យដ៏មានតម្លៃនិងមិនអាចកាត់ថ្លៃបាន សម្រាប់ប្រជាជននៃប្រទេសទាំងពីរ ពីព្រោះទំនាក់ទំនងនេះ ត្រូវបានកសាងឡើងតាំងពីថ្នាក់ដឹកនាំជំនាន់មុន រហូតដល់បច្ចុប្បន្ន ប្រកបដោយភាពស្អិតរមួត រឹងមាំ និងយូរអង្វែង។ឆ្លៀតនៅក្នុងឱកាសនោះ សម្តេចរដ្ឋសភាធិបតី បានជម្រាបជូនលោកជំទាវអនុប្រធានរដ្ឋសភា ពីគំនិតផ្តួចផ្តើមរបស់កម្ពុជា ក្នុងការរៀបចំសេចក្តីព្រាងសេចក្តីសម្រេចមួយចំនួន ដើម្បីដាក់ក្នុងមហាសន្និបាតអាយប៉ាលើកទី៤៦នេះ រួមមាន ការបង្កើតវេទិកាថ្នាក់ដឹកនាំអាយប៉ា ដែលមានគោលបំណងលើកកម្ពស់កិច្ចសន្ទនាប្រកបដោយបរិយាបន្ន និងពហុភាគីលើបញ្ហាថ្មីៗក្នុងតំបន់ និងអន្តរជាតិ ក្នុងគោលបំណងកសាងការយល់ដឹងរួមគ្នា និងបង្កើតដំណោះស្រាយប្រកបដោយនវានុវត្តន៍។ សេចក្ដីព្រាងសេចក្ដីសម្រេចមួយទៀតស្ដីពីការបង្កើតភាពជាដៃគូអាយប៉ាដើម្បីពង្រឹងការចូលរួមរបស់សភាអាយប៉ា ជាមួយដៃគូខាងក្រៅសម្រាប់អាស៊ានប្រកបដោយបរិយាបន្ន និងចីរភាព មានគោលបំណងចម្បងដើម្បីពង្រឹងការចូលរួមជាមួយសភាសង្កេតការណ៍ ដែលរួមចំណែកដល់បេសកកម្មរបស់អាយប៉ា ក្នុងការបង្កើតក្របខ័ណ្ឌរួម និងឆ្ពោះទៅអនាគត ដើម្បីលើកកម្ពស់ការទូតសភា ធ្វើឱ្យការចូលរួមជាមួយសភាសង្កេតការណ៍ និងអង្គការដៃគូកាន់តែស៊ីជម្រៅ ដើម្បីពង្រឹងមជ្ឈភាពអាស៊ានដែលរួមចំណែកដល់ការរក្សាសន្តិភាព ស្ថិរភាព និងការអភិវឌ្ឍប្រកបដោយចីរភាពស្របតាមទស្សនវិស័យសហគមន៍អាស៊ានឆ្នាំ២០៤៥ និងមូលបទអាស៊ានឆ្នាំ២០២៥ របស់ប្រទេសម្ចាស់ផ្ទះម៉ាឡេស៊ីគឺ “បរិយាបន្ន និងចីរភាព” និងសេចក្តីព្រាងបន្ទាប់ទាក់ទងការលើកកម្ពស់សុខសន្តិភាព សាមគ្គីភាពនៅក្នុងតំបន់អាស៊ាន ហើយជាពិសេស ទាក់ទងនឹងជម្លោះរវាងព្រំដែនកម្ពុជានិងថៃ កម្ពុជាប្រកាន់យកនូវគោលការណ៍សន្តិភាព ដោះស្រាយបញ្ហាដោយសន្តិវិធី តាមរយៈការប្រើប្រាស់យន្តការមានស្រាប់ សំដៅធ្វើយ៉ាងណា ឱ្យបញ្ហាព្រំដែនវិលទៅរកប្រក្រតីភាពឡើងវិញ ធានាការពារសុខសុវត្ថិភាពជូនពលរដ្ឋ ដែលមិនត្រឹមសម្រាប់ពលរដ្ឋប្រទេសទំាងពីរប៉ុណ្ណោះទេ គឺសម្រាប់ពលរដ្ឋនៅក្នុងតំបន់ទំាងមូលផងដែរ។ លោកជំទាវ សុធន់ សាយ៉ាចាក់ បានវាយតម្លៃខ្ពស់ចំពោះចំណងមិត្តភាព កិច្ចសហប្រតិបត្តិដ៏ល្អរវាងប្រទេសទំាងពីរ។ លោកជំទាវបានគូសបញ្ជាក់ថា ការផ្លាស់ប្តូរដំណើរទស្សនកិច្ច ក៏ដូចជាការជួបប្រជុំគ្នាជាទៀងទាត់រវាងថ្នាក់ដឹកនាំនៃប្រទេសទំាងពីរទំាងស្ថាប័ននីតិប្បញ្ញត្តិនិងនីតិប្រតិបត្តិ បានឆ្លុះបញ្ចាំងឱ្យឃើញភាពស្និទ្ធស្នាល និងចំណងមិត្តភាពជ្រាលជ្រៅ សាមគ្គីភាពជាប្រពៃណី និងភាពជាអ្នកជិតខាងល្អ រវាងប្រទេសទាំងពីរ កម្ពុជា-ឡាវ ដែលមានប្រវត្តិជាយូរលង់មកហើយ។ ម្យ៉ាងវិញភាគីទំាងពីបានយល់ស្របដូចជាគ្នាថា តាមរយៈការផ្លាស់ប្តូរជាទៀតទាត់រវាងថ្នាក់ដឹកនាំ នៃប្រទេសទាំងពីរ ទាំងក្នុងក្របខណ្ឌសភា រដ្ឋាភិបាល បក្ស និងយុវជនពិតជាបានជួយជំរុញ និងលើកកម្ពស់ទំនាក់ទំនង “ភាពជាដៃគូយុទ្ធសាស្រ្ត យូរអង្វែង និងគ្រប់ជ្រុងជ្រោយ នាំមកនូវផលប្រយោជន៍រួមជូនប្រទេស និងប្រជាជនទាំងសងខាង។ លោកជំទាវអនុប្រធានរដ្ឋសភាឡាវ បានវាយតម្លៃខ្ពស់ចំពោះគំនិតផ្តួចផ្តើមដ៏មានសារៈសំខាន់លើសេចក្តីព្រាងសេចក្តីសម្រេចនានាដែលសំដៅដល់ការពង្រឹងមិត្តភាព កិច្ចសហប្រតិបត្តិការក្នុងការលើកកម្ពស់សុខសន្តិភាពនៅក្នុងតំបន់។ ថ្នាក់ដឹកនាំរដ្ឋសភាកម្ពុជានិងឡាវ បានឯកភាពថា ការទូតសភា និងកិច្ចសហប្រតិបត្តិការសភា មានសារៈសំខាន់ និងបាននិងកំពុងដើរតួនាទីយ៉ាងសំខាន់ក្នុងការធ្វើឱ្យកាន់តែស៊ីជម្រៅ នូវកិច្ចសហប្រតិបត្តិការរវាងប្រទេសទំាងពីរនិងភាពជាដៃគូកម្ពុជា-ឡាវ ដែលត្រូវតែរក្សានូវសន្ទុះវិជ្ជមាន នេះដើម្បីធានាថា ទំនាក់ទំនងរវាងប្រទេសទាំងពីរ នៅតែស្ថិតនៅលើគន្លងដ៏ត្រឹមត្រូវ ដែលផ្តល់នូវលទ្ធផលវិជ្ជមានជានិច្ចឱ្យប្រទេសទាំងសងខាង។ជាចុងបញ្ចប់ សម្តេចប្រធានរដ្ឋសភាបាន ថ្លែងអំណរគុណយ៉ាងជ្រាលជ្រៅចំពោះប្រទេសឡាវ ដែលបានគាំទ្រ ចូលរួម និងបន្តតាមដានយ៉ាងសកម្មលើការអនុវត្តបទឈប់បាញ់រវាងកម្ពុជា-ថៃ ដែលបានចូលជាធរមានកាលពីថ្ងៃទី២៨ ខែ កក្កដា ឆ្នាំ២០២៥ ។ ការចូលរួម និងតាមដានការអនុវត្តលើបទឈប់បាញ់នេះពិតជាមានសារៈសំខាន់ខ្លាំងណាស់ ដែលបានជួយស្ថានភាពនៅតំបន់ជម្លោះឱ្យមានភាពស្ងប់ស្ងាត់ ទប់ស្កាត់បាននូវការប៉ះទង្គិច និងកាត់បន្ថយផលប៉ះពាល់ដល់ប្រជាជននៅតាមតំបន់ព្រំដែនបានជាអតិបរមា ហើយសង្ឃឹមថា ទំនាក់ទំនងជាប្រក្រតីភាពនឹងត្រឡប់មកវិញក្នុងពេលឆាប់ៗ និងធានាបាននូវសន្តិភាពយូរអង្វែង។ កម្ពុជាតែងតែផ្តល់អាទិភាពដល់សន្តិសហវិជ្ជមាន និងភាពជាអ្នកជិតខាងល្អ។ កម្ពុជាបានខិតខំប្រឹងប្រែងនិងតែងតែផ្តល់តម្លៃខ្ពស់ដល់ការកសាងខ្សែបន្ទាត់ព្រំដែនឱ្យទៅជា “ព្រំដែនសន្តិភាព ស្ថិរភាព មិត្តភាព កិច្ចសហប្រតិបត្តិការ និងការអភិវឌ្ឍ”៕

ឯកឧត្តម ស៊ុន ចាន់ថុល ជួបពិភាក្សាការងារជាមួយ ឯកឧត្តម វ៉ាង យី លើការជំរុញពង្រឹងកិច្ចសហប្រតិបត្តិការ និងការអនុវត្តគម្រោងផែនការនានាលើវិស័យហេដ្ឋារចនាសម្ព័ន្ធ វិនិយោគ ពាណិជ្ជកម្ម កសិកម្ម ឧស្សាហកម្ម សុខាភិបាល វប្បធម៍ និងបច្ចេកវិទ្យាជាដើម

2025/09/17 11:24:40 am        202
Facebook Telegram Linkin
នៅថ្ងៃទី១៦ ខែកញ្ញា ឆ្នាំ២០២៥ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា និងជាសហប្រធានគណៈកម្មាធិការសម្របសម្រួលអន្តររដ្ឋាភិបាលកម្ពុជា-ចិន បានជួបពិភាក្សាការងារជាមួយ ឯកឧត្តម វ៉ាង យី (Wang Yi) សមាជិកការិយាល័យនយោបាយ, ប្រធានការិយាល័យគណៈកម្មការកិច្ចការបរទេសនៃគណៈកម្មាធិការមជ្ឈឹមបក្សកុម្មុយនីស្តចិន, និងជារដ្ឋមន្ត្រីការបរទេសចិន។ ក្នុងកិច្ចប្រជុំនេះមានការចូលរួមពីលោកជំទាវ សឿង រដ្ឋចាវី ឯកអគ្គរាជទូតកម្ពុជាប្រចាំសាធារណរដ្ឋប្រជាមានិតចិន, លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម, ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន, ឯកឧត្តម គង់ វិមាន អគ្គលេខាធិការនៃអគ្គលេខាធិការដ្ឋានក្រុមប្រឹក្សាអភិវឌ្ឍន៍កម្ពុជា, ឯកឧត្តម មាស សុខសេនសាន រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ, ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងមន្ត្រីជំនាញរបស់កម្ពុជាជាច្រើនរូប។កិច្ចប្រជុំនាឱកាសនេះបានពិភាក្សាលើប្រធានបទសំខាន់ៗក្នុងការជំរុញពង្រឹងកិច្ចសហប្រតិបត្តិការ និងការអនុវត្តគម្រោងផែនការនានាលើវិស័យហេដ្ឋារចនាសម្ព័ន្ធ វិនិយោគ ពាណិជ្ជកម្ម កសិកម្ម ឧស្សាហកម្ម សុខាភិបាល វប្បធម៍ និងបច្ចេកវិទ្យាជាដើម ដែលស្ថិតក្រោមក្របខណ្ឌនៃអនុស្សរណៈនៃការយោគយល់គ្នា និងកិច្ចព្រមព្រៀងពាណិជ្ជកម្មសេរីកម្ពុជា-ចិន។ គម្រោងគួរឱ្យកត់សម្គាល់ដែលបានលើកយកមកពិភាក្សាមានដូចជា គម្រោងព្រែកជីកហ្វូណនតេជោ, គម្រោងកែលំអផ្លូវជាតិលេខ៣ តភ្ជាប់កំពត-វាលរេញ, គម្រោងសាងសង់កំណាត់ផ្លូវជាតិលេខ៧ រមាត-ត្រពាំងគ្រៀល, គម្រោងទំនើបកម្មប្រព័ន្ធចម្រោះទឹកកខ្វក់ខេត្តព្រះសីហនុ, គម្រោងពង្រីកការនាំចេញពីកម្ពុជាទៅកាន់ប្រទេសចិនក្រោមកិច្ចព្រមព្រៀងពាណិជ្ជកម្មសេរី, និងគម្រោងច្រករបៀងត្រី និងអង្ករ ជាដើម។លើកឡើងក្នុងកិច្ចប្រជុំនេះ ឯកឧត្តមឧបនាយករដ្ឋមន្រ្តី បានថ្លែងអំណរគុណយ៉ាងជ្រាលជ្រៅចំពោះ ឯកឧត្តម វ៉ាង យី ដែលបានឆ្លៀតពេលវេលាដ៏មមាញឹកទទួលស្វាគមន៍យ៉ាងកក់ក្ដៅចំពោះដំណើរទស្សនកិច្ចរបស់គណៈប្រតិភូកម្ពុជានាឱកាសនេះ ខណៈឯកឧត្តមក៏ទើបអញ្ជើញត្រឡប់មកពីបំពេញទស្សនកិច្ចនៅតំបន់អ៊ឺរ៉ុបនាពេលថ្មីៗនេះ។ ការស្វាគមន៍នេះបានឆ្លុះបញ្ចាំងពីចំណងមិត្តភាពដ៏រឹងមាំរវាងឯកឧត្តម វ៉ាង យី និងឯកឧត្តមឧបនាយករដ្ឋមន្ត្រីផ្ទាល់ និងទំនាក់ទំនងដែកថែបរវាងកម្ពុជា-ចិន។ ឯកឧត្តមឧបនាយករដ្ឋមន្រ្តី បានអបអរសាទរចំពោះប្រទេសចិនដែលទទួលបានភាពជោគជ័យលើការរៀបចំកិច្ចប្រជុំកំពូលអង្គការសហប្រតិបត្តិការសៀងហៃបូក និងពិធីរំលឹកខួបលើកទី៨០ នៃជ័យជម្នះរបស់ប្រជាជនចិនតស៊ូប្រឆាំងការឈ្លានពានរបស់ជប៉ុន និងសង្គ្រាមប្រឆាំងហ្វាស៊ីសពិភពលោកនាពេលថ្មីៗនេះ។ ជាមួយគ្នានេះដែរ ភាគីមិត្តបានវាយតម្លៃខ្ពស់លើកិច្ចសហប្រតិបត្តិការត្បូងពេជ្រ ដែលរួមចំណែកដល់ការពង្រឹងមិត្តភាពដែកថែបឱ្យកាន់តែកក់ក្តៅ សំដៅបង្កើតសហគមន៍វាសនារួម និងផលប្រយោជន៍ទៅវិញទៅមក។តាមរយៈកិច្ចប្រជុំនេះ ឯកឧត្តមឧបនាយករដ្ឋមន្ត្រី ក៏បានថ្លែងអំណរគុណយ៉ាងជ្រាលជ្រៅចំពោះការគាំទ្រឥតឈប់ឈររបស់ ប្រទេសចិនក្នុងការចូលរួមអភិវឌ្ឍន៍សេដ្ឋកិច្ចសង្គមកម្ពុជា។ ចំពោះកិច្ចសហប្រតិបត្តិការវិនិយោគរវាងប្រទេសទាំងពីរបានមានភាពរីកចម្រើនគួរឱ្យកត់សម្គាល់ ពោលលំហូរវិនិយោគផ្ទាល់ពីបរទេស (FDI) កាលពីឆ្នាំ២០១២មានទំហំតិចជាង ៥០០លានដុល្លារអាម៉េរិក ហើយក្នុងឆ្នាំ២០២៤កើនឡើងដល់ប្រមាណ ៣,៤ពាន់លានដុល្លារអាម៉េរិក។ តំបន់សេដ្ឋកិច្ចពិសេសបានដើរតួនាទីយ៉ាងសំខាន់ក្នុងការទាក់ទាញវិនិយោគផ្ទាល់ពីបរទេសពិសេសពីប្រទេសចិន។ បច្ចុប្បន្នកម្ពុជាបានអនុម័តតំបន់សេដ្ឋកិច្ចពិសេសចំនួន ៥៧តំបន់ ហើយក្នុងនោះមាន ១១តំបន់គឺជាការវិនិយោគរបស់វិនិយោគិនចិន។ គិតចាប់ពីឆ្នាំ២០២០ ដល់ខែកក្កដា ឆ្នាំ២០២៥ មានគម្រោងវិនិយោគប្រមាណ ៤០០គម្រោង បានចូលមកបណ្ដាក់ទុនវិនិយោគរួចរាល់នៅក្នុងតំបន់សេដ្ឋកិច្ចទាំងនោះ។ ជាមួយគ្នានេះដែរចំពោះការវិនិយោគផ្ទាល់ពីបរទេស គិតត្រឹមរយៈពេល ៨ខែ នៃឆ្នាំ២០២៥នេះ មានគម្រោងវិនិយោគចំនួន ៤៩១គម្រោងហើយដែលក្រុមប្រឹក្សាអភិវឌ្ឍន៍កម្ពុជាបានអនុម័តជូនវិនិយោគិនដើម្បីបណ្ដាក់ទុនវិនិយោគនៅកម្ពុជា៕

ប្រធានរដ្ឋសភាវៀតណាម អបអរសាទរ​ចំពោះការបើកដំណើរការ​ព្រលានយន្ត​ហោះ​អន្តរជាតិ​តេជោ ដែលមានលក្ខណៈទំនើប និងខ្នាតធំ

2025/09/17 11:18:45 am        199
Facebook Telegram Linkin
សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណា​ចក្រកម្ពុជា​នៅ​ព្រឹក​ថ្ងៃទី១៧ ខែកញ្ញាឆ្នាំ២០២៥ ក្នុងពេលដឹកនាំគណៈប្រតិភូជាន់ខ្ពស់សភាកម្ពុជា ចូលរួមមហា​សន្និបាត​អាយប៉ាលើកទី៤៦ នៅទីក្រុងគូឡាឡំាពួ ប្រទេសម៉ាឡេស៊ី បានជួបពិភាក្សាការងារ​ជាមួយ ឯកឧត្តម ជិន ថាញ់មិន ប្រធានរដ្ឋសភាសាធារណរដ្ឋសង្គមនិយមវៀតណាម ។ប្រធានរដ្ឋសភាប្រទេសទំាងពីរ បានសម្តែងនូវការស្វាគមន៍យ៉ាងកក់ក្តៅជូនគ្នាទៅវិញទៅមក និងវាយតម្លៃខ្ពស់អំពីការជួបប្រាស្រ័យទាក់ទងគ្នាជាទៀងទាត់ នៅពេលមានការបំពេញបេសកកម្មការទូតសភា នៅលើឆាកអន្តរជាតិ តែងតែមានការផ្លាស់ប្តូរគ្នាពីសភាពការណ៍នយោបាយ សង្គម សេដ្ឋកិច្ច ទៅវិញទៅមក។ ថ្នាក់ដឹកនាំប្រធានរដ្ឋសភាទាំងពីរបានវាយតម្លៃខ្ពស់ចំពោះការរីកចម្រើននិងភាពរឹងមាំនៃទំនាក់ទំនងប្រទេសទំាងពីរ និងបានថ្លែងអំណរគុណដល់គ្នាទៅវិញទៅមក ដែលប្រទេសទំាងពីរតែងតែជួយគាំទ្រគ្នាទៅវិញទៅមកនៅគ្រប់កាលៈទេសៈទំាងកម្រិតទ្វេភាគីនិងពហុភាគី។ វៀតណាមបានជួយដល់ការរំដោះប្រទេសកម្ពុជាចេញពីរណ្តៅមរណៈនៃរបបប៉ុលពតប្រល័យពូជសាសន៍ក្នុងឆ្នាំ១៩៧៩។ ចំណែកកម្ពុជាបានជួយជ្រោមជ្រែង ដល់ការទទួលបានឯករាជ្យនិងការបង្រួបបង្រួមជាតិវៀតណាម កាលពី៥០ឆ្នាំមុន។ជាមួយគ្នានេះ ឯកឧត្តម ជិន ថាញ់មិន បានថ្លែងអំណរគុណ ចំពោះសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា ដែលបានអញ្ជើញ ចូលរួមអបអរសាទរទិវាខួបឯករាជ្យជាតិវៀតណាម លើកទី៨០ កាលពីដើមខែកញ្ញានេះ។ ឯកឧត្តមបានបញ្ជាក់ថាទំនាក់ទនងល្អនៃប្រទេសទំាងពីរបានផ្តល់ផលប្រយោជន៍ជូនពលរដ្ឋទំាងសងខាង ដែលជាបច្ច័យនាំឱ្យទំហំពាណិជ្ជកម្មកម្ពុជា-វៀតណាម មានការកើនជាលំដាប់។ ឯកឧត្តមក៏បានអបអរសាទរចំពោះការបើកដំណើរការព្រលានយន្តហោះអន្តរជាតិតេជោ ដែលមានលក្ខណៈទំនើបនិងខ្នាតធំ។ នៅក្នុងឱកាសនោះ សម្តេចរដ្ឋសភាធិបតី បានជម្រាបជូនឯកឧត្តមប្រធានរដ្ឋសភា ពីការផ្តួចផ្តើមរបស់កម្ពុជា ក្នុងការរៀបចំសេចក្តីព្រាងសេចក្តីសម្រេចមួយចំនួន ដើម្បីដាក់ក្នុងមហាសន្និបាតអាយប៉ាលើកទី៤៦នេះ រួមមាន ការបង្កើតវេទិកាថ្នាក់ដឹកនាំអាយប៉ា ដែលមានគោលបំណងលើកកម្ពស់កិច្ចសន្ទនាប្រកបដោយបរិយាបន្ន និងពហុភាគីលើបញ្ហាថ្មីៗក្នុងតំបន់ និងអន្តរជាតិ ក្នុងគោលបំណងកសាងការយល់ដឹងរួមគ្នា និងបង្កើតដំណោះស្រាយប្រកបដោយនវានុវត្តន៍។ សម្តេចរដ្ឋសភាធិបតី បានបន្តថាសេចក្ដីព្រាងសេចក្ដីសម្រេចមួយទៀតស្ដីពីការបង្កើតភាពជាដៃគូអាយប៉ាដើម្បីពង្រឹងការចូលរួមរបស់សភាអាយប៉ា ជាមួយដៃគូខាងក្រៅសម្រាប់អាស៊ានប្រកបដោយបរិយាបន្ន និងចីរភាព មានគោលបំណងចម្បងដើម្បីពង្រឹងការចូលរួមជាមួយសភាសង្កេតការណ៍ ដែលរួមចំណែកដល់បេសកកម្មរបស់អាយប៉ា ក្នុងការបង្កើតក្របខ័ណ្ឌរួម និងឆ្ពោះទៅអនាគត ដើម្បីលើកកម្ពស់ការទូតសភា ធ្វើឱ្យការចូលរួមជាមួយសភាសង្កេតការណ៍ និងអង្គការដៃគូកាន់តែស៊ីជម្រៅ ដើម្បីពង្រឹងមជ្ឈភាពអាស៊ានដែលរួមចំណែកដល់ការរក្សាសន្តិភាព ស្ថិរភាព និងការអភិវឌ្ឍប្រកបដោយចីរភាពស្របតាមទស្សនវិស័យសហគមន៍អាស៊ានឆ្នាំ២០៤៥។ កម្ពុជាប្រកាន់យកនូវគោលការណ៍សន្តិភាព ដោះស្រាយបញ្ហាដោយសន្តិវិធី តាមរយៈការប្រើប្រាស់យន្តការមានស្រាប់ សំដៅធ្វើយ៉ាងណា ឱ្យបញ្ហាព្រំដែនវិលទៅរកប្រក្រតីភាពឡើងវិញ ធានាការពារសុខសុវត្ថិភាពជូនពលរដ្ឋ ដែលមិនត្រឹមសម្រាប់ពលរដ្ឋប្រទេសទំាងពីរប៉ុណ្ណោះទេ គឺសម្រាប់ពលរដ្ឋនៅក្នុងតំបន់ទំាងមូលផងដែរ៕

គណៈកម្មាធិការវិនិយោគកម្ពុជា ពិភាក្សាលើវិស័យផ្គុំ និងដំឡើងសម្រាប់ទីផ្សារនាំចេញ

2025/09/17 11:13:04 am        184
Facebook Telegram Linkin
គណៈកម្មាធិការវិនិយោគកម្ពុជា បើកកិច្ចប្រជុំពិភាក្សាពាក់ព័ន្ធនឹងសកម្មភាពវិនិយោគ ក្នុងការផ្គុំ និង​ដំឡើងសម្ភារៈបរិក្ខារផ្សេងៗ សំដៅលើកកម្ពស់បរិស្ថានវិនិយោគ និង​ដើម្បី​ធានា​ភាព​ប្រកួត​ប្រជែង សម្រាប់បម្រើទីផ្សារនាំចេញ ជាពិសេសការនាំចេញទៅទីផ្សារ សហរដ្ឋអាម៉េរិក។ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា នៅ​ថ្ងៃ​ទី១៦ ខែកញ្ញា ឆ្នាំ ២០២៥ ម្សិលមិញនេះ បានអញ្ជើញជាអធិបតី ក្នុងកិច្ចប្រជុំពិភាក្សា ស្តីពី​ការវិវត្តថ្មីៗនៃការវិនិយោគក្នុងសកម្មភាពផ្គុំ ដំឡើងសម្ភារៈ បរិក្ខារផ្សេងៗ នៃ​គម្រោង​វិនិយោគ​មាន​លក្ខណៈសម្បត្តិគ្រប់គ្រាន់ លើការធ្វើពាណិជ្ជ​កម្ម​សម្រាប់​ការ​នាំ​ចេញ​ទំនិញ​ទៅ​កាន់​ប្រទេស​ដៃគូ ជាពិសេសការនាំចេញទៅទីផ្សារសហរដ្ឋអាម៉េរិក ដែលជាទីផ្សារ​ដ៏​សំខាន់​សម្រាប់​ការ​នាំ​ចេញ​ទំនិញរបស់កម្ពុជា។កិច្ចប្រជុំពិភាក្សានេះមានគោលបំណងប្រមូលធាតុចូល សម្រាប់ជាមូលដ្ឋាន​ក្នុង​ការ​គិត​គូរ​ស្វែង​រក​ដំណោះ​ស្រាយ ចំពោះបញ្ហា ប្រឈមមួយចំនួន ដែលវិនិយោគិនក្នុងវិស័យផ្គុំ និងដំឡើង​សម្ភារៈ​បរិក្ខារ​ផ្សេង​ៗសម្រាប់នាំចេញ ជាពិសេសការនាំចេញទៅទីផ្សារ សហរដ្ឋអាមេរិក ដែលកំពុង​ជួប​ប្រទះ​ សំដៅលើកកម្ពស់បរិស្ថានវិនិយោគនៅកម្ពុជា និងដើម្បី​ធានា​ភាព​ប្រកួត​ប្រជែង​ក្នុង​ការ​ទាក់​ទាញ វិនិយោគថ្មី និងថែទាំវិនិយោគដែលស្រាប់។សូម​បញ្ជាក់ថា ក្នុងរយៈពេល ៨ ខែ ឆ្នាំ២០២៥នេះ, បើយោងតាមអគ្គនាយកដ្ឋានគយ និង​រដ្ឋាករ​កម្ពុជា​ បានបង្ហាញស្ថិតិពាណិជ្ជកម្ម នៃការធ្វើពាណិជ្ជកម្មលើទីផ្សារអន្តរជាតិរបស់កម្ពុជា ក្នុង​នោះ​ការ​ធ្វើ​ពាណិជ្ជកម្មទំនិញជាមួយប្រទេសដៃគូរសំខាន់ៗរបស់កម្ពុជា មាន ទំហំទឹក​ប្រាក់​សរុប​ប្រមាណ​ជិត ៤៣ ពាន់លានដុល្លារអាមេរិក កើនឡើងជាង ១៦% ក្នុងនោះការធ្វើ​ពាណិជ្ជកម្ម​ទ្វេភាគី​រវាង​កម្ពុជា-អាម៉េរិក មានទំហំទឹកប្រាក់ជាង ៨ ៥៥៥ លានដុល្លារដុល្លារអាម៉េរិក កើន​ឡើង​ជាង ២៣ ភាគរយ បើប្រៀបធៀបរយៈពេលដូចគ្នានិង ឆ្នាំ២០២៤៕ អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

ផែនការចំណុចរបស់អ៊ីរ៉ង់ បញ្ជាក់ថា អាមេរិកត្រូវទទួលយកការបង្កើនអ៊ុយរ៉ានីញ៉ូម និងលុបគ្រប់ទណ្ឌកម្ម
04/08/2026 05:04 PM
Facebook Telegram Linkin
អ៊ីស្រាអែលបន្តវាយប្រហារលើភាគខាងត្បូងលីបង់ ខណៈដែលបទឈប់បាញ់អ៊ីរ៉ង់មិនរាប់បញ្ចូលប្រទេសលីបង់ទេ
04/08/2026 05:04 PM
Facebook Telegram Linkin
ក្រសួងការងារ និងក្រសួងឧស្សាហកម្ម រួមគ្នាជំរុញការអនុវត្តស្ដង់ដាសុវត្ថិភាពម្ហូបអាហារដល់ម្ចាស់សហគ្រាស SMEs ដើម្បីបង្កើនភាពប្រកួតប្រជែង និងបង្កើតការងារសមរម្យនៅកម្ពុជា
04/08/2026 05:04 PM
Facebook Telegram Linkin
អូស្ត្រាលី និងចិន យល់ព្រមស្វែងរកសន្តិសុខថាមពលក្នុងតំបន់
04/08/2026 05:04 PM
Facebook Telegram Linkin
រដ្ឋឈូងសមុទ្រកំពុងសម្លឹងរកយានដ្រូនស្ទាក់ចាប់អាវុធពីអ៊ុយក្រែនមានតម្លៃទាប ខណៈស្តុកមីស៊ីលខើចអំឡុងសង្គ្រាមអ៊ីរ៉ង់
04/08/2026 05:04 PM
Facebook Telegram Linkin
ប្រភព៖ លោក Lam គ្រោងទស្សនកិច្ច នៅចិន សប្តាហ៍ក្រោយ ក្រោយឡើងកាន់តំណែងមេដឹកនាំកំពូលវៀតណាម
04/08/2026 05:04 PM
Facebook Telegram Linkin
លោក ហ្សេឡិនស្គី៖ អាស៊ីបង្ហាញចំណាប់អារម្មណ៍លើជំនាញការពារដែនសមុទ្ររបស់អ៊ុយក្រែន
04/08/2026 05:04 PM
Facebook Telegram Linkin
បេសកជនប្រធានាធិបតីរុស្ស៊ី៖ វិបត្តិអ៊ីរ៉ង់បង្ហាញពីភាពទន់ខ្សោយរបស់ NATO និង EU
04/08/2026 05:04 PM
Facebook Telegram Linkin
លោក ហ្សេឡិនស្គី៖ អ៊ុយក្រែនកំពុងជួយប្រទេសចំនួន ៥ ក្នុងការទប់ទល់នឹងយានដ្រូនរបស់អ៊ីរ៉ង់
04/08/2026 05:04 PM
Facebook Telegram Linkin
មេដឹកនាំប្រឆាំងតៃវ៉ាន់ សន្យាផ្សះផ្សា នៅឯវិមានរំលឹកវិញ្ញាណក្ខន្ធបិតាស្ថាបនិក នៅចិន
04/08/2026 05:04 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.