នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ក្រុមហ៊ុន VINCI Airports ប្ដេជ្ញាបន្តចូលរួមជាមួយរាជរដ្ឋាភិបាល ដើម្បីជំរុញ និងអភិវឌ្ឍឧស្សាហកម្មអាកាសចរណ៍នៅកម្ពុជា
អនុប្រធានប្រចាំការ គ.ប.ឆ.ប.៖ ច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា ជួយកម្ពុជាកម្ចាត់ឧក្រិដ្ឋកម្មបច្ចេកវិទ្យាឱ្យអស់ និងមិនឱ្យឧក្រិដ្ឋកម្មនេះវិលត្រលប់មកវិញឡើយ
អ្នកនាំពាក្យក្រសួងការបរទេសកម្ពុជា ៖ វាជារឿងគួរឱ្យសោក​ស្តាយយ៉ាងខ្លាំង ប្រសិនបើភាគីថៃសម្រេចដកខ្លួនជាឯកតោ​ភាគីពីអនុស្សរណៈឆ្នាំ២០០១
ក្រសួងការងារ និងក្រសួងឧស្សាហកម្ម រួមគ្នាជំរុញការអនុវត្តស្ដង់ដាសុវត្ថិភាពម្ហូបអាហារដល់ម្ចាស់សហគ្រាស SMEs ដើម្បីបង្កើនភាពប្រកួតប្រជែង និងបង្កើតការងារសមរម្យនៅកម្ពុជា

ព័ត៌មានជាតិ

ពីបិណ្ឌ១ដល់បិណ្ឌ៧ គ្រោះថ្នាក់ចរាចរណ៍ផ្ដាច់ជីវិតមនុស្ស៣៣នាក់ របួសជាង៥០នាក់

2025/09/16 11:49:53 am        286
Facebook Telegram Linkin
ក្នុងរយៈពេល៧ថ្ងៃ គិតចាប់តាំងពីថ្ងៃបុណ្យកាន់បិណ្ឌទី១ ដល់បិណ្ឌទី៧ ពោលគឺចាប់ពីថ្ងៃទី៨ ដល់​ថ្ងៃទី១៤ ខែកញ្ញា ឆ្នាំ២០២៥ នៅទូទាំងប្រទេសកម្ពុជាមានគ្រោះថ្នាក់ចរាចរណ៍ បន្ត​កើត​ឡើង​សរុប​ចំនួន៤៥ករណី បណ្តាលឱ្យមានមនុស្សស្លាប់៣៣នាក់ និងរងរបួសធ្ងន់​ស្រាល​ចំនួន​៥៤​នាក់​។ នេះបើតាមលោក ទូច សុឃៈ អ្នកនាំពាក្យរងក្រសួងមហាផ្ទៃ។ បើតាមអ្នកនាំ​ពាក្យរងក្រសួងមហាផ្ទៃ ករណីគ្រោះថ្នាក់ចរាចរណ៍ដែលបានកើតឡើង រួមមាន នៅថ្ងៃបិណ្ឌ១ មាន៨ករណី ស្លាប់៦នាក់ របួស១១នាក់ ថ្ងៃបិណ្ឌ២ មាន៧ករណី ស្លាប់៨នាក់ របួស៩នាក់ ថ្ងៃបិណ្ឌ៣ មាន៦ករណី ស្លាប់២នាក់ របួស១០នាក់ ថ្ងៃបិណ្ឌ៤ មាន៧ករណី ស្លាប់៦នាក់ របួស៩នាក់ ថ្ងៃបិណ្ឌ៥ មាន៧ករណី ស្លាប់២នាក់ របួស១០នាក់ ថ្ងៃបិណ្ឌ៦ មាន៥ករណី ស្លាប់៥នាក់ របសួស៤នាក់ និងថ្ងៃកាន់បិណ្ឌទី៧ មាន៥ករណី ស្លាប់៤នាក់ និងរបួស១នាក់។ ក្នុងចំណោមករណីគ្រោះថ្នាក់ចរាចរណ៍ទូទាំងប្រទេស នារយៈពេល៧ថ្ងៃនៃពិធីបុណ្យកាន់បិណ្ឌឆ្នាំ២០២៥នោះ លោក ទូច សុឃៈ បានលម្អិតបន្ថែមថា រាជធានីខេត្តដែលមានករណីគ្រោះថ្នាក់ច្រើនរួមមាន រាជធានីភ្នំពេញ ខេត្តកណ្តាល កំពង់ស្ពឺ តាកែវ ព្រះសីហនុ កំពង់ឆ្នាំង បាត់ដំបង ប៉ៃលិន បន្ទាយមានជ័យ ឧត្តរមានជ័យ សៀមរាប ព្រះវិហារ ក្រចេះ ស្ទឹងត្រែង ស្វាយរៀង និងខេត្តព្រៃវែង។ លោកបង្ហាញក្ដីព្រួយបារម្ភថាចំនួនគ្រោះថ្នាក់នឹងបន្តហក់ឡើងទៀត។ គួរកត់សម្គាល់ថា ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក បានដាក់បទបញ្ជាដល់អគ្គស្នងការដ្ឋាននគរបាលជាតិ ណែនាំមន្ត្រីនគរបាលចរាចរណ៍ផ្អាកអនុវត្តច្បាប់ចាប់តាំងពីអំឡុងពេលនៃការប្រយុទ្ធទប់ទល់អំពើឃ្លានពានពីកងទ័ពថៃមក។ ក្នុងស្ថានភាពនេះ ក្រសួងមហាផ្ទៃបានកត់សម្គាល់ពីកំណើនករណីគ្រោះថ្នាក់ចរាចរណ៍ ករណីស្លាប់ និងរបួស ធៀបនិងអំឡុងពេលអនុវត្តច្បាប់ជាធម្មតា។ ផ្អែកលើស្ថានភាព និងបទពិសោធជាក់ស្ដែងនេះ អ្នកនាំពាក្យរងក្រសួងមហាផ្ទៃ បានបង្ហាញការកត់សម្គាល់ថា ប្រជាពលរដ្ឋធ្វើដំណើរតាមដងផ្លូវ ដែលមួយចំនួនមានទម្លាប់មិនគោរពច្បាប់ស្រាប់មកហើយនោះ កាន់តែបង្ហាញឥរិយាបថនៃការបើកបរមិនគោរពច្បាប់ និងគ្មានរបៀបរៀបរយ ដែលធ្វើឱ្យស្ថានភាពចរាចរណ៍មានភាពស្មុគស្មាញ គ្រោះថ្នាក់កើតឡើងកាន់តែច្រើន ឬនិយាយមួយបែបទៀត គឺពួកគាត់កាន់តែបានដៃ ដោយសារមន្ត្រីនគរបាលចរាចរណ៍មិនអនុវត្តច្បាប់។ លោក ទូច សុឃៈ បានអះអាងថាប្រជាពលរដ្ឋកាន់តែច្រើន បានបញ្ចេញមតិយោបល់ និងទស្សនៈ ទទូចសុំឱ្យសមត្ថកិច្ចរឹតបន្តឹងច្បាប់ចរាចរណ៍ឡើងវិញ ជាពិសេសអនុវត្តឱ្យបានសកម្មនិងប្រកបដោយវិជ្ជាជីវៈ ទាំងយប់ទាំងថ្ងៃ ដើម្បីប្រែក្លាយស្ថានភាពចរាចរណ៍ឱ្យវិលទៅរកភាពធូរស្រាល និងកាន់តែប្រសើរដូចអំឡុងពេលនៃការអនុវត្តច្បាប់កន្លងមក។ ប្រមុខក្រសួងមហាផ្ទៃ បានដាក់ចេញគោលការណ៍ណែនាំមួយចំនួន រួចជាស្រេច។ បើតាមលោក ទូច សុឃៈ ក្នុងអំឡុងពេលនេះ មន្ត្រីនគរបាលចរាចរណ៍ នៅរាជធានីភ្នំពេញ និងតាមបណ្ដាខេត្ត កំពុងយកចិត្តទុកដាក់លើកិច្ចការសំខាន់២ បន្ថែមលើការងារសម្រួលចរាចរណ៍តាមដងផ្លូវ។ ការងារទាំងពីរនោះ គឺការធ្វើកំណត់សម្គាល់ចំពោះឥរិយាបថនៃការបើកបររបស់ពលរដ្ឋ ផ្ដោតលើការគោរពភ្លើងសញ្ញាចរាចរណ៍ និងផ្លាកសញ្ញាចរាចរណ៍ និងការងារមួយទៀតនៅតាមបណ្ដាខេត្ត គឺផ្ដោតលើការធ្វើកំណត់សម្គាល់អំពីការគោរពល្បឿន និងសិទ្ធិអាទិភាពរបស់អ្នកបើកបរ។ ការងារនេះគឺដើម្បីដឹងថា នៅពេលសមត្ថកិច្ចមិនអនុវត្តច្បាប់ តើអ្នកបើកបរគោរពច្បាប់បានកម្រិតណា។ អ្នកនាំពាក្យបានអះអាងទៀតថា ការអនុវត្តច្បាប់ស្ដីពីចរាចរណ៍ផ្លូវគោក ត្រូវធ្វើឡើងនាពេលខាងមុខ ហើយក្នុងកាលៈទេសៈនេះ ជាពិសេសក្នុងអំឡុងនៃពិធីបុណ្យកាន់បិណ្ឌភ្ជុំបិណ្ឌនេះ សូមបងប្អូនប្រជាពលរដ្ឋអ្នកបើកបរទាំងអស់ បង្កើនការគោរពច្បាប់ ប្រុងប្រយ័ត្ន និងមានការយល់អធ្យាស្រ័យគ្នាទៅវិញទៅមក ហើយជាមួយគ្នានេះ ម្ចាស់រោងចក្រសហគ្រាសអាជីវកម្ម និងក្រុមហ៊ុនទាំងឡាយ ត្រូវបង្កើនការអប់រំណែនាំដល់អ្នកបើកបររបស់ខ្លួន ជាពិសេសរថយន្តធុនធ្ងន់ ត្រូវប្រុងប្រយ័ត្ន និងគោរពច្បាប់ឱ្យបានខ្ជាប់ខ្ជួន ព្រមទាំងសម្របសម្រួលដឹកជញ្ជូនទំនិញរបស់ខ្លួនឱ្យបានមុន និងក្រោយពិធីបុណ្យភ្ជុំបិណ្ឌ ដែលចរាចរណ៍តាមដងផ្លូវមានភាពមមាញឹក៕ 

ឧបនាយករដ្ឋមន្រ្តី ហង់ជួន ណារ៉ុន ផ្តល់​អនុសាសន៍​បីចំណុច ដើម្បី​លើក​កម្ពស់​វិស័យ​អប់រំ​កសិកម្ម​ឱ្យ​មានប្រសិទ្ធិភាព

2025/09/16 11:45:32 am        276
Facebook Telegram Linkin
ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និង​កីឡា​ ក្នុងឱកាសអញ្ជើញជាអធិបតី ក្នុងពិធី​ប្រគល់​សញ្ញាបត្រ​ជូន​ដល់​និស្សិត​នៃ​គ្រឹះស្ថាន​ឧត្តម​សិក្សា​កសិកម្ម​ចំនួន៣ របស់ក្រសួងកសិកម្ម រុក្ខាប្រមាញ់ និងនេសាទ បានផ្តល់នូវ​អនុសាសន៍​សំខាន់​ៗ ៣ចំណុច ដល់គ្រឹះស្ថានឧត្តមសិក្សាកសិកម្ម និងនិស្សិត ដើម្បីជា​សក្ខីភាព​មួយ​ទៀត​នៃ​ជោគ​ជ័យ​របស់​គ្រឹះស្ថានអប់រំវិស័យកសិកម្មនៅកម្ពុជា។នៅក្នុងពិធីប្រគល់សញ្ញាបត្រជូនដល់និស្សិតជ័យលាភីចំនួន ១ ៤៨៧នាក់ នៃ​សាកល​វិទ្យាល័យ​ភូមិន្ទ​​កសិកម្ម វិទ្យាស្ថានជាតិកសិកម្មព្រែកលៀប និងវិទ្យាស្ថានជាតិកសិកម្មកំពង់ចាម នាព្រឹក​ថ្ងៃ​ទី១៦ ខែកញ្ញានេះ ឯកឧត្តមបណ្ឌិតសភាចារ្យ ឧបនាយករដ្ឋមន្រ្តី បាន​ផ្ដល់​នូវ​អនុសាសន៍​ទាំង​៣​ចំណុច​ឱ្យដឹងថា ទី១.ត្រូវបន្តជំរុញលើកកម្ពស់គុណភាពការសិក្សា ដោយធ្វើ​ទំនើប​កម្ម​កម្ម​វិធី​សិក្សា​ឆ្ពោះ​ទៅ​កាន់ការធ្វើកសិកម្មទំនើបឌីជីថល និងបច្ចេកវិទ្យាសិប្បនិម្មិត (AI) ជាដើម។ ទី២. ត្រូវ​បង្កើនការស្រាវជ្រាវ និងអនុវត្តផ្ទាល់ឱ្យបានកាន់តែច្រើនថែមទៀតសម្រាប់និស្សិត ដោយ​អភិវឌ្ឍ​មាតិកាស្រាវជ្រាវល្អៗលើមុខជំនាញឯកទេស ដើម្បីផ្សារភ្ជាប់ទ្រឹស្តី និងការអនុវត្តជាក់ស្តែង និង​បង្កើតជាកញ្ចប់បច្ចេកវិទ្យា និងសេវាកម្ម ដើម្បីជួយគាំទ្រ និងផ្តល់ដំណោះស្រាយដល់កសិករ និង​វិស័យឯកជន នៅក្នុងខ្សែច្រវាក់ផលិតកម្ម ចាប់តាំងពីការដាំដុះ រហូត​ដល់​ការ​កែ​ច្នៃ​ជា​ផលិត​ផល​សម្រាប់​ផ្គត់ផ្គង់តម្រូវការក្នុងស្រុក និងការនាំចេញ។ ទន្ទឹមនេះ ត្រូវបន្តពង្រឹង​កិច្ច​សហ​ប្រតិបត្តិ​ការ​ជាមួយក្រសួង-ស្ថាប័នពាក់ព័ន្ធ ដៃគូអភិវឌ្ឍន៍ និងវិស័យឯកជន ដើម្បីបង្កើន​ឱកាស​ដល់​និស្សិត​ក្នុងការចុះកម្មសិក្សា និង អនុវត្តផ្ទាល់។ និងទី៣.និស្សិតជ័យលាភីទាំងអស់ ត្រូវ​យក​ចំណេះ​ដឹង​ និងបច្ចេកទេសដែលទទួលបានពីការរៀនសូត្រ ទៅអនុវត្តក្នុង​ជំនាញ​វិជ្ជា​ជីវៈ​រប​ស់​ខ្លួន​ឱ្យ​បាន​ជោគជ័យ។ យោងតាមរបាយការណ៍របស់ ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និង​នេសាទ បានបញ្ជាក់ឱ្យដឹងថា គិតក្នុងរយៈពេល៤០ឆ្នាំកន្លងមកនេះ គ្រឹះស្ថាន​ឧត្តម​សិក្សា​កសិកម្ម​ទាំង​៣ខាងលើ បានរួមចំណែកកសាងធនធានមនុស្ស សរុបចំនួនជាង ៣ម៉ឺននាក់។ គ្រឹះស្ថានទាំង៣នេះ កំពុងបន្តបណ្តុះបណ្តាលនិស្សិតចំនួនជាង ៥ ៨០០នាក់ ក្នុង​ឆ្នាំ​សិក្សា​២០២៤- ២០២៥នេះ រួមទាំងនិស្សិតអាហារូបករណ៍ សម្តេចតេជោ និងសម្តេចកិត្តិព្រឹទ្ធបណ្ឌិត ចំនួន ១១៩នាក់ ផងដែរ។ ឯកឧត្តម​រដ្ឋមន្រ្តី បានបន្តថា ការស្ទង់មតិកន្លងមកបានឱ្យដឹងថា និស្សិតដែល​បាន​បញ្ចប់​ការ​សិក្សា​ប្រមាណជា​ង ៩៨% ទទួលបានការងារធ្វើ ក្នុងនោះភាគច្រើនលើស​លប់​បម្រើកា​រ​ក្នុង​វិស័យ​ឯកជន, ៩៨៣នាក់ បានប្រឡងជាប់ជាមន្រ្តីកសិកម្មឃុំ ខណៈដែល​មួយ​ចំនួន​ទៀត​បាន​បង្កើត​អាជីវកម្មដោយខ្លួនឯង៕ អត្ថបទ៖ ឈិត បូរ៉ាវី 

សាលារៀនជំនាន់ថ្មីចាប់ផ្ដើមទទួលចុះឈ្មោះសិស្ស និងត្រៀមបើកបវេសនកាល​ឆ្នាំសិក្សា​ថ្មី​ខែ​ក្រោយ

2025/09/16 11:31:35 am        369
Facebook Telegram Linkin
សាលារៀនជំនាន់ថ្មី បានបញ្ចប់ការប្រឡងជ្រើសរើសសិស្សរួចរាល់ ដោយបច្ចុប្បន្ន សាលា​កំពុង​ទទួល​ពាក្យ​ចុះឈ្មោះសិក្សាក្នុងឆ្នាំសិក្សាថ្មី។ ការទទួលពាក្យសិក្សានៅសាលារៀនជំនាន់ថ្មី ក៏​ដូច​ជា​ការ​ចាប់​ផ្ដើមបវេសនកាលឆ្នាំសិក្សាថ្មី នៅសាលារៀនជំនាន់ថ្មី គឺធ្វើឡើង​លឿន​ជាង​សាលា​រៀន​រដ្ឋ​ទូទៅ។ ការសិក្សានៅសាលារៀនជំនាន់ថ្មី នឹងចាប់ផ្ដើមនៅថ្ងៃទី ១ ខែតុលាខាងមុខ។សាលារៀនជំនាន់ថ្មី ជាសាលាមានស្វ័យភាព ដែលមានការរៀបចំផ្សេងគ្នា ពីសាលារៀនរដ្ឋទូទៅ។ ជា​ការ​រៀបចំសម្រាប់បវេសនកាលឆ្នាំសិក្សាថ្មីខាងមុខនេះ សាលារៀនជំនាន់ថ្មី នឹង​ចាប់​ផ្ដើម​ការ​ចូល​រៀន មុនសាលារៀនរដ្ឋទូទៅរយៈពេលមួយខែ។ សាលារៀនរដ្ឋទូទៅចាប់ផ្ដើមសិក្សានៅថ្ងៃទី ១ ខែវិច្ឆិកា រីឯសាលាជំនាន់ថ្មី ចាប់ផ្ដើមសិក្សានៅថ្ងៃទី ១ ខែតុលា។សម្រាប់​វិទ្យាល័យព្រះស៊ីសុវត្ថិជំនាន់ថ្មី បានតម្រូវឱ្យសិស្សទើបប្រឡងជាប់ចូលរៀនថ្នាក់ទី ៧ថ្នាក់ទី ៨ និងថ្នាក់ទី ១០ ត្រូវដាក់ពាក្យចូលរៀនចាប់ពីថ្ងៃទី ៦ ដល់ថ្ងៃទី១០ ខែកញ្ញា​ជា​កំហិត​។ ការដាក់ពាក្យយឺតយ៉ាវជាងថ្ងៃកំណត់ គឺមានន័យថា ការបោះបង់ឱកាស។ សាលា​នឹង​ចាប់​ផ្ដើម​បវវេសន​កាល​ឆ្នាំសិក្សាថ្មី នៅថ្ងៃទី ១ ខែតុលា។សម្រាប់ការមក​ចុះឈ្មោះសិក្សាក្នុងថ្ងៃដំបូងនេះ អាណាព្យាបាលជាច្រើន បានជូនកូនទៅចុះ​ឈ្មោះ​តាម​លក្ខណ្ឌសាលាតម្រូវ។ ទាំងអាណាព្យាបាល ទាំងសិស្សដែល​ត្រៀម​ចូល​រៀន​សម្រាប់​ឆ្នាំ​សិក្សា​ថ្មី បានបង្ហាញនូវភាពសប្បាយចិត្តជាខ្លាំង។ សប្បាយចិត្ត ដែលកូនបានចូលរួមប្រឡង ប្រកួត​ប្រជែងជាមួយសិស្សដទៃ និងអាចទទួលបានលទ្ធផលជោគជ័យ មានសិទ្ធិ​ចូល​រៀន​នៅ​សាលា​រៀន​ជំនាន់ថ្មី។បច្ចុប្បន្នសាលារៀនជំនាន់ថ្មី នៅទូទាំងប្រទេសមានចំនួន ១៤សាលារៀន ដែល​បាន​នឹង​កំពុង​ដំណើរ​ការ​។ ឆ្នាំសិក្សាថ្មីខាងមុខនេះ ក្រសួងអប់រំ យុវជន និងកីឡា នឹងបង្កើតសាលា​រៀន​ជំនាន់​ថ្មី​ចំនួន ៨បន្ថែមទៀត។ សាលារៀនដែលនឹងវិវត្តខ្លួនទៅជាសាលារៀនជំនាន់ថ្មី រួមមាន វិទ្យាល័យ នេតយ៉ង់ ខេត្តបាត់ដំបង វិទ្យាល័យហ៊ុនសែន ស្គន់ ខេត្តកំពង់ចាម វិទ្យាល័យ ហ៊ុនសែន សេរីភាព វិទ្យាល័យ សម្ដេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ដើមឬស ខេត្តកណ្ដាល វិទ្យាល័យ​ព្រះយុគន្ធរ រាជធានីភ្នំពេញ វិទ្យាល័យសម្ដេចឪសម្ដេចម៉ែ ខេត្តរតនគីរី វិទ្យាល័យស្វាយរៀង និងវិទ្យាល័យ ហ៊ុនសែន ប្រសូតិ ខេត្តស្វាយរៀង។ នេះបើតាមការបញ្ជាក់របស់ លោកស្រី ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា។គួរបញ្ជាក់ដែរថា សាលារៀនជំនាន់ថ្មី ដែលត្រៀមដំណើរការនៅឆ្នាំសិក្សាថ្មី ក៏នឹងមាន​ការ​ប្រឡង​ជ្រើស​រើសសិស្សសម្រាប់ការចូលរៀនផងដែរ។ ជាក់ស្ដែងសម្រាប់វិទ្យាល័យហ៊ុនសែនសេរីភាព នឹង​រៀបចំការប្រឡងជ្រើសរើសសិស្សចូលរៀនកម្មវិធីជំនាន់ថ្មី នៅថ្ងៃទី ២៦ ខែកញ្ញា ឆ្នាំ ២០២៥​ខាង​មុខ​៕ អត្ថបទ៖ គឹម ហុក 

រដ្ឋមន្រ្តីក្រសួងសុខាភិបាលណែនាំដល់មន្ទីរពេទ្យទាំងអស់ត្រូវផ្តោតសំខាន់លើសុវត្ថិភាពអ្នកជំងឺ

2025/09/16 11:11:34 am        262
Facebook Telegram Linkin
ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល បានណែនាំដល់មន្ទីរពេទ្យត្រូវផ្តោតសំខាន់លើសុវត្ថិភាពអ្នកជំងឺ ខណៈសុវត្ថិភាពអ្នកជំងឺ គឺជាការងារខ្សែទទឹង ដែលត្រូវមានការទំនាក់ទំនងគ្នាជាប្រចាំ រវាងផ្នែកទាំងឡាយនៅក្នុងមន្ទីរពេទ្យឱ្យក្លាយជាវប្បធម៌ការងារ និងជាសញ្ញានូវទំនើបកម្មដែលត្រូវពង្រឹង ដើម្បីជំនឿទុកចិត្តរបស់ប្រជាជន។ការថ្លែងរបស់ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល យ៉ាងដូច្នេះក្នុងកិច្ចប្រជុំកម្រិតថ្នាក់ដឹកនាំលើកទី២ នៃខែកញ្ញា ដើម្បីពិនិត្យវឌ្ឍនភាពការងារ និងលើកទិសដៅការងារបន្ត ដែលមានការអញ្ជើញចូលរួមពី ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ ទីប្រឹក្សាក្រសួង អគ្គនាយក អគ្គនាយករង និងគ្រប់ប្រធានអង្គភាពថ្នាក់កណ្តាលក្រោមឱវាទក្រសួងសុខាភិបាល ប្រធានមន្ទីរសុខាភិបាលរាជធានីភ្នំពេញ និងតាមប្រព័ន្ធ Zoom ប្រធានមន្ទីរសុខាភិបាលខេត្ត មន្ទីរពេទ្យខេត្ត ស្រុកទាំងអស់, នារសៀលថ្ងៃទី១៥ ខែកញ្ញា ឆ្នាំ២០២៥នេះ។ជាកិច្ចចាប់ផ្តើម ឯកឧត្តមសាស្រ្តាចារ្យរដ្ឋមន្រ្តី បានណែនាំដល់មន្ទីរពេទ្យគ្រប់កម្រិត បង្កើនការយកចិត្តទុកដាក់ខ្ពស់ ការងារពិនិត្យ និងធ្វើរោគវិនិច្ឆ័យព្យាបាលជំងឺគ្រុនឈាមឱ្យបានទាន់ពេលវេលា។ មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្រ្ត និងបាណកសាស្រ្ត បង្កើនសកម្មភាពអប់រំសុខភាព និងការពារទប់ស្កាត់ជំងឺគ្រុនឈាម ក្នុងអំឡុងពេលរដូវវស្សានេះ ឱ្យកាន់តែសស្រាក់សស្រ៊ាំ និងរៀបចំយុទ្ធសាស្រ្តជាបន្តបន្ទាប់។ ឯកឧត្តមសាស្រ្តាចារ្យរដ្ឋមន្រ្តី បានណែនាំដល់មន្ទីរពេទ្យទាំងអស់ ត្រូវបង្កើនការយកចិត្តទុកដាក់ខ្ពស់ អំពីសុវត្ថិភាពអ្នកជំងឺ ដោយត្រូវពង្រឹងការបម្រើសេវា ទាំងការពិនិត្យពិគ្រោះ និងព្យាបាលនៅពេលមកទទួលសេវាពីមួយដំណាក់កាល ទៅមួយដំណាក់កាល ហើយជាពិសេសផ្នែកសម្ភព និងស្រ្តី (មុនក្នុងអំឡុងពេល និងក្រោយពេលសម្រាលកូន) ទារក កុមារ និងមនុស្សចាស់។ ឯកឧត្តមសាស្រ្តាចារ្យ បានជំរុញលើសុវត្ថិភាពអ្នកជំងឺ ដោយការពង្រឹងប្រព័ន្ធព័ត៌មាន ការកត់ត្រាទុក បង្កើនការស្រាវជ្រាវនៅតាមអង្គភាព និងរៀបចំផែនការបណ្តុះបណ្តាលទាំងបច្ចេកទេសព្យាបាល និងការគ្រប់គ្រងប្រើប្រាស់ឱសថឱ្យកាន់តែមានប្រសិទ្ធភាពខ្ពស់។ជាទីបញ្ចប់ ឯកឧត្តមសាស្រ្តាចារ្យ ឈាង រ៉ា បានណែនាំដល់ថ្នាក់ដឹកនាំ មន្រ្តី និងបុគ្គលិកសុខាភិបាល ត្រូវពន្លឿន និងជំរុញការងារឯកសាររដ្ឋបាល ឱ្យបានលឿនទាន់ពេលវេលា និងការបម្រើសេវាច្រកចេញចូលជូនដល់ប្រជាពលរដ្ឋ ឱ្យកាន់តែល្អប្រសើរ។ ផ្នែកទំនាក់ទំនងត្រូវបង្កើនកិច្ចសហការ និងសហប្រតិបត្តិការជាមួយដៃគូអភិវឌ្ឍឱ្យបានជាប់លាប់ និងកៀងគរឱ្យមានការចូលរួមពីដៃគូ៕ អត្ថបទ រដ្ឋា 

ដើម្បីជំរុញការរកការងារធ្វើដល់ពលករខ្មែរដែលមកពីថៃ ក្រសួង​ការងារ​បានដំឡើង​ផ្ទាំង​ផ្សព្វ​ផ្សាយ​ការរ​កការងារធ្វើលើផ្លូវជាតិចំនួន ៧ទីតាំង សម្រាប់ឱកាសបុណ្យភ្ជុំបិណ្ឌខាងមុខ

2025/09/16 11:02:12 am        239
Facebook Telegram Linkin
គិតត្រឹមថ្ងៃទី១៦ ខែកញ្ញា ឆ្នាំ២០២៥ នេះ ក្រសួងការងារ និងបណ្តុះបណ្តាលវិជ្ជាជីវៈ បាន​ដំឡើង​ផ្ទាំង​ផ្សព្វផ្សាយយុទ្ធនាការ “ខ្មែរជួយរកការងារ និងផ្តល់ការងារឱ្យខ្មែរ” នៅ ៧ទីតាំង ដើម្បី​សម្រួល​ដល់​ការរកការងារធ្វើដល់ពលរដ្ឋខ្មែរ ជាពិសេសពលករខ្មែរដែលបានត្រឡប់មកពីថៃ។ ទីតាំងទាំង៧​នោះរួមមាន ផ្លូវជាតិលេខ១ ខាងមុខភោជនីយដ្ឋានប្រណិត, ផ្លូវជាតិលេខ២ ហួស​រូប​សំណាក់​ស្ត្រី​បី​គួរស្រូវ, ផ្លូវជាតិលេខ៤ នៅព្រំប្រទល់ខណ្ឌពោធិ៍សែនជ័យ និងស្រុកអង្គស្នួល, ផ្លូវ​លេខ​២០១១ ផ្លូវឧកញ៉ា ទ្រី ហេង ខាងមុខផ្សារទំនើប ឡាក់គី ឈូកមាស, ផ្លូវជាតិលេខ៥ ខាង​​មុខ​វត្ត​ទេពប្រណំ ជិតដល់ចំណុចប្រសប់ផ្លូវ៥១, ផ្លូវជាតិលេខ៥ ខេត្តពោធិ៍សាត់ ជិ​​ត​ដល់​ផ្លូវ​បំបែក​រូប​សំណាក់ផ្តិល និងផ្លូវជាតិលេខ៦ ជិតវត្តគៀនឃ្លាំង។ជាមួយគ្នានេះ លោក ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បាន​លើក​ឡើងថា ការដំឡើងផ្ទាំងផ្សព្វផ្សាយទាំងនេះ គឺបង្ហាញ​ពី​ការ​យក​ចិត្ត​ទុក​ដាក់​របស់​រាជ​រដ្ឋាភិបាល ដែលមានក្រសួងការងារជាសេនាធិការ និងដើ​ម្បី​បង្កើន​ភាព​ងាយ​ស្រួល​បន្ថែម​ទៀត​ដល់​បង​ប្អូនពលរដ្ឋខ្មែរ ជាពិសេសពលករខ្មែរដែលទើបមកពីថៃក្នុងការរកការងារធ្វើ ឬសិក្សា​ជំនាញ​បន្ថែម​។អ្នកនាំពាក្យរូបនេះ គូសបញ្ជាក់ថា៖ “ការដំឡើងផ្ទាំងផ្សព្វផ្សាយការរកការងារធ្វើនេះ មិនត្រឹម​តែ​បង្ហាញ​ពី​ការ​យក​ចិត្ត​ទុក​ដាក់​របស់​រដ្ឋាភិបាល​កម្ពុជា​ដល់​ពលរដ្ឋ​ខ្មែរ​ដែល​ចង់​ស្វែង​រក​ការងារ​ធ្វើ​នោះ​ទេ តែវាផ្តល់ភាពងាយស្រួលបន្ថែមទៀតដល់បងប្អូនពលរដ្ឋខ្មែរក្នុងការចុះឈ្មោះចូលធ្វើការ ឬចុះឈ្មោះរៀនជំនាញ ដោយគ្រាន់តែស្កេនកូដ QR នៅលើផ្ទាំងផ្សព្វផ្សាយទាំងនោះ ដើម្បី​ចុះ​ឈ្មោះ​ជា​ការស្រេច”។បន្ថែមពីនេះ លោក ស៊ុន មេសា ក៏សូមអំពាវនាវ​ដល់​បង​ប្អូន​ពលរដ្ឋ​ខ្មែរ​គ្រប់​រូប​ដែល​ចង់​រក​ការងារ​ធ្វើ​សូមទាក់ទងមកលេខ ១២៩៧ ឬស្កេនកូដ QR រកការងារ ដែល​អាច​រក​បាន​នៅ​ក្នុង​បណ្តាញ​សង្គម​របស់​ក្រសួងការងារ និង NEA ដើម្បីចុះឈ្មោះចូលធ្វើការឱ្យបានគ្រប់ៗគ្នា។ គួរបញ្ជាក់ផងដែរថា ដើម្បី​ជួយ​ផ្តល់​ឱកាស​ការងារ​ជូន​ប្រជា​ពលរដ្ឋ​ខ្មែរ​ដែល​ត្រឡប់​មក​ពី​ប្រទេស​ថៃ រាជរដ្ឋាភិបាលកម្ពុជាតាមរយៈក្រសួងការងារ និងបណ្តុះបណ្តាល​វិជ្ជាជីវៈ​ដែល​ជា​សេនាធិការ​បាន​ដាក់​ចេញ​យុទ្ធ​នាការជាច្រើនដូចជា ការដាក់មណ្ឌលសំចត ឬកន្លែងទទួលពលករ​នៅ​តាម​ច្រក​ព្រំដែន​អន្តរជាតិកម្ពុជានិងថៃចំនួន ៦កន្លែង ការធ្វើវេទិកាការងារ​តាម​ភូមិ​ស្រុក​ដោយ​នាំ​យក​រោង​ចក្រ​សហគ្រាសទៅជាមួយ ការធ្វើវេទិកាការងារ​ជាប្រចាំ​នៅ​តាម​គ្រឹះ​ស្ថាន​បណ្តុះ​បណ្តាល​បច្ចេកទេស និង​វិជ្ជាជីវៈ និងទីស្នាក់ការប.ស.ស.ទូទាំងប្រទេស និងការសម្របសម្រួល​ជាមួយ​រោង​ចក្រ​សហគ្រាសសម្រាប់ការចូលបំពេញការងាររបស់បងប្អូនប្រជាពលរដ្ឋខ្មែរ។ បន្ថែមពីនេះ ក្រសួង​ការងារបានរៀបចំប្រព័ន្ធ hotline ១២៩៧ សម្រាប់សម្រួល​ដល់​ការ​ស្វែង​រក​ការងារ​ធ្វើ​របស់​ពលរដ្ឋ​ខ្មែរផងដែរ៕

ឯកឧត្តម គួច ចំរើន ណែនាំអាជ្ញាធរចុះធ្វើបច្ចុប្បន្នភាពពលរដ្ឋទើបត្រលប់ពីថៃ ដើម្បីងាយស្រួលជួយពួកគាត់ឱ្យទទួលបានការងារធ្វើ

2025/09/16 10:56:03 am        262
Facebook Telegram Linkin
ឯកឧត្តម គួច ចំរើន អភិបាលខេត្តកណ្តាល បានជំរុញដល់អាជ្ញាធរមូលដ្ឋាន រដ្ឋបាលក្រុង-ស្រុកទាំង១៣ និងអ្នកពាក់ព័ន្ធ ត្រូវជំរុញដល់ពលករដែលត្រឡប់មកពីប្រទេសថៃ ត្រូវមានការងារធ្វើឱ្យបានគ្រប់គ្នា ពិសេសការចុះបញ្ជីធ្វើអត្តសញ្ញាណប័ណ្ណ អាត្រានុកូលដ្ឋានជាដើមជូនពួកគាត់ ពិសេសកូនចៅរបស់ពួកគាត់បានចូលរៀនឱ្យបានគ្រប់គ្នា និងអ្វីដែលត្រូវយកចិត្តទុកដាក់គឺស្រង់ស្ថិតិបងប្អូនពលរដ្ឋដែលវិលត្រលប់ពីប្រទេសថៃ ដើម្បីងាយស្រួលជួយពួកគាត់ឱ្យទទួលបានការងារធ្វើនៅក្នុងស្រុកវិញ។ឯកឧត្តម អភិបាលខេត្ត មានប្រសាសន៍បែបនេះក្នុងកិច្ចប្រជុំត្រួតពិនិត្យ និងផ្សព្វផ្សាយព័ត៌មានឱកាសការងារ ជូនបងប្អូនប្រជាពលរដ្ឋ ជាពិសេសបងប្អូនពលករខ្មែរ ទើបត្រឡប់មកពីប្រទេសថៃ នៅក្នុងភូមិសាស្ត្រខេត្តកណ្តាល ក្រោមអធិបតីភាព ឯកឧត្តម សេង សក្កា រដ្ឋលេខាធិការ ក្រសួងការងារ និងបណ្តុះបណ្តាលវិជ្ជាជីវៈ ឯកឧត្តម ហោ សុខណាក់ អនុរដ្ឋលេខាធិការ ក្រសួងសេដ្ឋកិច្ច និងហិរញ្ញវត្ថុ នៅថ្ងៃទី១៥ ខែកញ្ញា ឆ្នាំ២០២៥ នៅសាលាខេត្តកណ្តាល។ឯកឧត្ដម គួច ចំរើន អភិបាលខេត្តកណ្ដាល បានមានប្រសាសន៍បន្ថែមថា ការជំរុញដល់អាជ្ញាធរមូលដ្ឋាន គ្រប់ជាន់ថ្នាក់ ត្រូវស្រង់ស្ថិតិឡើងវិញអោយបានច្បាស់ នូវបងប្អូនដែលជាពលករទើបនឹងវិលត្រឡប់មកពីប្រទេសថៃ គឺដើម្បីងាយស្រួលជួយដល់ពួកគាត់ក្នុងការស្វែងរកការងារធ្វើនៅក្នុងភូមិសាស្ត្រខេត្តកណ្តាលរបស់យើង។ឯកឧត្តម អភិបាលខេត្ត បន្តថា បន្ទាប់ពីមានការបង្កអរិភាព និងឈ្លានពានមកលើបូរណភាពទឹកដីកម្ពុជាពីសំណាក់ទាហានសៀម បងប្អូនចំណាកស្រុកបានវិលត្រឡប់ពីប្រទេសថៃ ចូលមកកម្ពុជាវិញ។ ការវិលត្រឡប់នេះ រាជរដ្ឋាភិបាលកម្ពុជា ក៏ដូចជាក្រសួងការងារ បានត្រៀមរួចជាស្រេចក្នុងផ្តល់ការបណ្តុះ បណ្តាលជំនាញវិជ្ជាជីវៈ ក៏ដូចជាផ្តល់ការងារជូនពួកគាត់។ ឯកឧត្តម អភិបាលខេត្ត បន្ថេមថា ខេត្តកណ្តាល មានបងប្អូនពលករបានវិលត្រលប់មកស្រុកវិញប្រមាណ ២៦៦៨នាក់។ ប៉ុន្តែបញ្ហានៅត្រង់ថា ក្នុងចំណោមអ្នកវិលមកវិញនេះ មានអ្នកមកចុះឈ្មោះរកការងារធ្វើតែជាង១ពាន់នាក់ប៉ុណ្ណោះ។ ដូច្នេះយើងត្រូវស្រង់ស្ថិតិពួកគាត់អោយបានច្បាស់ ដើម្បីដឹងថាពួកគាត់ដែលមកវិញ គាត់ធ្វើអ្វី នៅទីកន្លែងណា។សូមបញ្ជាក់ថា ពាក់ព័ន្ធអ្នកចំណាកស្រុកដែលវិលត្រលប់មកវិញនេះ តាមការឲ្យដឹងពីអាជ្ញាធរស្រុកនានា មួយចំនួនបានចេញពីមូលដ្ឋានដើម្បីស្វែងរកការងារធ្វើដោយខ្លួនឯង ទៅរស់នៅជាមួយក្រុមគ្រួសារនៅខេត្តផ្សេង រីឯពួកគាត់មួយចំនួនក៏បានរស់នៅបង្កបង្កើនផល នៅក្នុងភូមិរបស់ពួកគាត់ ដែលអាចជាមូលហេតុធ្វើឲ្យអ្នកស្វែងរកការងារធ្វើមានចំនួនតិច។បើទោះជាយ៉ាងនេះក្តី អាជ្ញាធរខេត្តនៅតែជំរុញឲ្យមានការចុះធ្វើសម្រង់ស្ថិតិនេះឲ្យបានច្បាស់លាស់ ដើម្បីងាយស្រួលក្នុងការជួយពួកគាត់ឲ្យចំគោលដៅ ហើយវាក៏ជាផ្នែកមួយក្នុងការជួយដល់រាជរដ្ឋាភិបាលអនុវត្តគោលនយោបាយកាត់បន្ថយភាពក្រីក្រ លើកកម្ពស់ជីវភាពប្រជាពលរដ្ឋ កាត់បន្ថយការធ្វើចំណាកស្រុកទៅកាន់ប្រទេសដទៃ ជាពិសេសប្រទេសថៃ។ បើតាមរបាយការណ៍របស់មន្ទីរការងារខេត្តកណ្តាល បានឱ្យដឹងថា បច្ចុប្បន្នខេត្តកណ្តាល មានសហគ្រាស គ្រឹះស្ថានចំនួន ២០៣១ ដែលមានកម្មករនិយោជិតសរុបចំនួន ២១៥,៤៧២ នាក់ ស្រី ១៤៣,០៦៧នាក់៕

សម្តេចរដ្ឋសភាធិបតី ឃួន សុដារី៖ អាកាសយានដ្ឋានអន្តរជាតិតេជោ លេចរូបរាងឡើងក្រោមម្លប់សុខសន្តិភាពជាមោទនភាពរបស់ខ្មែរគ្រប់រូប

2025/09/16 10:47:38 am        247
Facebook Telegram Linkin
នៅព្រឹកថ្ងៃអង្គារទី១៦ ខែកញ្ញា ឆ្នាំ២០២៥ មុនចេញដំណើរទៅចូលរួមមហាសន្និបាតអន្តរសភាអាស៊ាន(អាយប៉ា/AIPA) លើកទី៤៦ នៅប្រទេសម៉ាឡេស៊ី សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា ព្រមទំាងសមាជិកសមាជិកាគណៈកម្មាធិការអចិន្រ្តៃយ៍រដ្ឋសភា ក៏ដូចជាសមាជិកសមាជិការដ្ឋសភា បានអញ្ជើញទស្សនា ស្វែងយល់ អាកាសយានដ្ឋានអន្តរជាតិតេជោ ប្រកបដោយក្តីសប្បាយរីករាយ និងមានមោទនភាពជាទីបំផុត។ ការបើកដំណើរការអាកាសយានដ្ឋានអន្តរជាតិថ្មីខ្នាតធំ គឺជាការបោះជំហានដ៏សំខាន់មួយសម្រាប់វិស័យអាកាសចរណ៍ និងសេដ្ឋកិច្ចកម្ពុជា ដែលជាមោទនភាពបំផុតសម្រាប់កូនខ្មែរគ្រប់រូប។ សម្តេចរដ្ឋសភាធិបតី ក៏ដូចជា សមាជិកសមាជិការដ្ឋសភា បានបង្ហាញសេចក្តីរំភើបសប្បាយ រីករាយយ៉ាងក្រៃលែងជាមួយសមិទ្ធផលដ៏មហស្ចារ្យជាប្រវត្តិសាស្រ្តនេះ។ សម្តេចប្រធានរដ្ឋសភា បានមានប្រសាសន៍ថាសមិទ្ធផលនេះ បានប្រសូត្រឡើងនៅក្រោមម្លប់សុខសន្តិភាព ដែលមានសម្តេចតេជោ ហ៊ុន សែន ជាអគ្គមគ្គសទេសក៍សន្តិភាពដ៏ឆ្នើមរបស់កម្ពុជា បានលះបង់អ្វីៗគ្រប់យ៉ាង យកជីវិតជាដើមទុន ក្នុងការនាំមកនូវសុខសន្តិភាពនិងការអភិវឌ្ឍន៍ជូនប្រទេសជាតិដូចសព្វថ្ងៃនេះ។ សម្តេចប្រធានរដ្ឋសភា បានបន្តថាសុខសន្តិភាពនិងការអភិវឌ្ឍរបស់កម្ពុជា បានការពារលើកកម្ពស់ដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី ដែលជាអ្នកដឹកនាំវ័យក្មេង ប្រកបដោយថាមវន្ត មានឆន្ទៈមោះមុត ក្នុងការអភិវឌ្ឍប្រទេសជាតិឆ្ពោះនៅកាន់ប្រទេសមានចំណូលមធ្យមកម្រិតខ្ពស់នៅឆ្នាំ២០៣០និងប្រទេសមានចំណូលខ្ពស់នៅឆ្នាំ២០៥០។សម្តេចរដ្ឋសភាធិបតី បានសង្កត់ធ្ងន់ថា មានសុខសន្តិភាព ទើបមានការអភិវឌ្ឍន៍។ ដូច្នេះសូមពលរដ្ឋទំាងអស់នាំគ្នាបន្តថែរក្សា ការពារសុខសន្តិភាពនៅកម្ពុជាឱ្យបានគង់វង្សជារៀងរហូតតទៅ។សូមរំលឹកថាអាកាសយានដ្ឋានអន្តរជាតិតេជោ បានដាក់ឱ្យដំណើរការនៅថ្ងៃទី៩ ខែកញ្ញា ឆ្នាំ២០២៥ នឹងត្រូវសម្ពោធផ្លូវការនៅថ្ងៃទី២០ ខែតុលា ឆ្នាំ២០២៥ ខាងមុខ ក្រោមអធិបតីដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ។អាកាសយានដ្ឋានអន្តរជាតិតេជោ ត្រូវបានសាងសង់លើផ្ទៃដីប្រមាណ ២,៦០០ ហិកតា ស្ថិតនៅស្រុកកណ្ដាលស្ទឹង ខេត្តកណ្ដាល និងផ្នែកខ្លះនៃស្រុកបាទី ខេត្តតាកែវ។ អាកាសយានដ្ឋានអន្តរជាតិតេជោ ជាអាកាសយានដ្ឋានលំដាប់4F ដែលជាកម្រិតខ្ពស់បំផុតនៅក្នុងវិស័យអាកាសចរណ៍អន្តរជាតិ អាចទទួលយន្តហោះគ្រប់ប្រភេទ រួមទាំងយន្តហោះខ្នាតយក្សដូចជា Airbus A380 និង Boeing 747 ផងដែរ៕

ក្នុងរដូវបុណ្យភ្ជុំនេះការផ្គត់ផ្គង់ជ្រូករស់ហក់ឡើងដល់ ១ម៉ឺនក្បាលក្នុង១ថ្ងៃ ខណៈតម្លៃលក់​ចេញធ្លាក់​ចុះ

2025/09/16 10:45:33 am        274
Facebook Telegram Linkin
ប្រធានសមាគមអ្នកចិញ្ចឹមសត្វនៅកម្ពុជា ថ្លែងឱ្យដឹងថា ការ​ផ្គត់ផ្គង់​ជ្រូក​រស់​សម្រាប់​តម្រូវ​ការ​ម្ហូប​ចុក​នៅ​ក្នុង​រដូវបុណ្យភ្ជុំបិណ្ឌនេះ បាន ហក់ឡើងដល់ប្រមាណ១ម៉ឺនក្បាល ក្នុងមួយថ្ងៃ ខណៈ​ដែល​តម្លៃ​លក់ចេញនៅលើទីផ្សារបានធ្លាក់ចុះ គឺដោយសារ​នៅ​ក្នុង​រដូវ​នេះ​សម្បូរ​ទៅ​ដោយ​ត្រី​សាច់​នានា។លោក ស្រ៊ុន ពៅ ប្រធានសមាគមអ្នកចិញ្ចឹមសត្វនៅកម្ពុជា បានថ្លែងប្រាប់សារព័ត៌មាន ស្តីពី​ការ​ចិញ្ចឹម​ និងការផ្គត់ផ្គង់ជ្រូករស់ មាន់ ទា នៅក្នុងឱកាសរដូវបុណ្យភ្ជុំបិណ្ឌ នៅថ្ងៃទី១៧ ខែកញ្ញា ឆ្នាំ​២០២៥​នេះ​ថា ជុំវិញមុខរបរចិញ្ចឹមសត្វ នៅក្នុងរយៈពេលប៉ុន្មានឆ្នាំចុង ក្រោយនេះ កម្ពុជា​មាន​ការ​វិវត្តន៍​រីកចម្រើនយ៉ាងខ្លាំង ក្នុងនោះក្រៅពីការចិញ្ចឹមលក្ខណៈគ្រួសារ កម្ពុជាក៏មាន​កសិដ្ឋាន​ចិញ្ចឹម​ធំ​ៗ​ជាច្រើន កន្លែង ប្រកបដោយស្តង់ដារ, បានន័យថា វិស័យចិញ្ចឹមនៅកម្ពុជា ជា​ពិសេស​ការ​ចិញ្ចឹម​ជ្រូក​បាននិងកំពុងរីកចម្រើនគួរឲ្យកត់សម្គាល់។ចំពោះក្នុងឱកាសរដូវ​បុណ្យភ្ជុំបិណ្ឌនេះវិញ, លោកបានថ្លែងឱ្យដឹងថា តម្រូវការផ្គត់ផ្គង់ជ្រូក​រស់​នៅ​លើ​ទីផ្សារ​ក្នុងរដូវនេះ បានហក់ ឡើងដល់ប្រមាណក្នុងរង្វង់១ ម៉ឺនក្បាលក្នុងមួយថ្ងៃ ខណៈ​នៅ​ថ្ងៃ​ធម្មតា​ ការផ្គត់ផ្គង់លើទីផ្សារមានតម្រូវការប្រមាណ៩ ពាន់ក្បាល ក្នុងមួយ ថ្ងៃ។ ចំណែក​តម្លៃ​លក់​ចេញ​វិញ នៅក្នុងរដូវបុណ្យភ្ជុំបិណ្ឌនេះ បានស្រុតចុះខុសពីថ្ងៃធម្មតាផងដែរ ជាក់ស្តែងគិត​មក​ដល់​បិណ្ឌ៩នេះ ការលក់ជ្រូករស់លើទីផ្សារ មានតម្លៃប្រមាណជាង ៨ ពាន់រៀល ក្នុងមួយគីឡូក្រាម ខណៈ​នៅ​មុនរដូវបុណ្យភ្ជុំ តម្លៃជ្រូករស់កើនឡើងដល់ ប្រមាណជាង ១ម៉ឺន ១ពាន់រៀល នៅ​ក្នុង​មួយ​គីឡូក្រាម។ លោក ស្រ៊ុន ពៅ បញ្ជាក់ថា ចំពោះតម្លៃដែលស្រុតចុះក្នុងរដូវបុណ្យភ្ជុំនេះ អាច ស្មើ​តម្លៃដើមនៃផលិតកម្ម ឬអាចខាតបង់បន្តិចបន្តួច តែទោះជាយ៉ាងណា នេះ​ក៏​ជា​ផល​ល្អ​មួយ​ដែរ ​សម្រាប់ប្រជាពលរដ្ឋធ្វើបុណ្យក្នុងរដូវ បុណ្យភ្ជុំនេះ។ជុំវិញផលិតកម្មក្នុងវិស័យកសិកម្មនេះ, ឯកឧត្តម ឃឹម ហ្វីណង់ អ្នកនាំពាក្យក្រសួងកសិកម្ម រុក្ខា​ប្រមាញ់ និងនេសាទ ថ្មីៗនេះបានថ្លែង ផងដែរថា ទាក់ទិនផលិតកម្មក្នុងស្រុក រាជ​រដ្ឋាភិបាល​កម្ពុជា​បាន​កំពុងដើរលើផ្លូវត្រូវ ក្នុងការជម្រុញអភិវឌ្ឍន៍វិស័យកសិកម្ម ជាក់ស្តែង បច្ចុប្បន្ននេះ វិស័យ​កសិកម្មមានអតិរេកនៅក្នុងផលិតកម្មស្ទើរតែគ្រប់មុខ ក្នុងនោះសម្រាប់វិស័យដាំដុះ កម្ពុជា​ក៏​មាន​កសិផលជាច្រើន កំពុងផ្គត់ផ្គង់នៅលើទីផ្សារ និងបានកំពុង​ហៀរ​ទៅ​កាន់​ទីផ្សារ​ក្រៅ​ស្រុក​ជា​ច្រើន​ផង​ដែរ។ ចំណែកផលិតកម្មសត្វវិញ វិស័យនេះក៏បានកំពុង វិវត្តន៍រីកចម្រើនគួរកត់សម្គាល់ និង​បានកំពុងមានការចិញ្ចឹមក្នុងស្រុកយ៉ាងផុលផុស គាំទ្រដល់តម្រូវការទីផ្សារផងដែរ៕ អត្ថបទ៖ សុន រ៉ាឌី

ក្នុងឱកាសបុណ្យកាន់បិណ្ឌ-ភ្ជុំបិណ្ឌពលរដ្ឋច្រើនទៅលេងកម្សាន្តនៅទំនប់កប់សេះ ស្រុកកំពង់ត្រឡាច ខេត្តកំពង់ឆ្នាំង

2025/09/16 10:38:25 am        379
Facebook Telegram Linkin
កំពង់ឆ្នាំង៖ ក្នុងឱកាសបុណ្យកាន់បិណ្ឌ-ភ្ជុំបិណ្ឌ មានប្រជាពលរដ្ឋជាច្រើន បានទៅលេងកម្សាន្តនៅទំនប់កប់សេះ ស្រុកកំពង់ត្រឡាច ខេត្តកំពង់ឆ្នាំង ខណៈតំបន់នេះ គឺជាទីតាំងកម្សាន្តទេសចរណ៍ធម្មជាតិដ៏ទាក់ទាញក្នុងខេត្តកំពង់ឆ្នាំង។ បើតាមរដ្ឋបាលខេត្តកំពង់ឆ្នាំង ទំនប់កប់សេះនេះ គឺជាកន្លែងកម្សាន្តមួយដែលស្ថិតនៅភូមិឈូកក្រញ៉ាស់ ឃុំឈូកស ស្រុកកំពង់ត្រឡាច ខេត្តកំពង់ឆ្នាំង ជាទីកន្លែងដែលមានទឹកហូរកាត់ផ្លូវ ថ្លាត្រជាក់ ទាក់ទាញបងប្អូនប្រជាពលរដ្ឋជិតឆ្ងាយឃើញហើយចង់ងូតទឹកលេងកំសាន្តមិនដាច់ជារៀងរាល់ថ្ងៃ។នៅទីនេះ ក៏មានបងប្អូនលក់ម្ហូបអាហារ ភេសជ្ជៈផ្សេងៗ ព្រមទាំងមានកងកម្លាំងប៉ូលិស និងប្រជាការពារនៅប្រចាំការដើម្បីរៀបចំសណ្ដាប់ធ្នាប់ និងការពារសុវត្ថិភាពជូនបងប្អូនផងដែរ៕

នគរបាលជាតិកម្ពុជា និងនគរបាលភូមិន្ទថៃនឹងជួបប្រជុំគ្នា​នៅខេត្តស្រះកែវ ដើម្បី​ពិនិត្យ​លើ​ការ​ពង្រឹង​​កិច្ច​សហការទប់ស្កាត់ និងបង្ក្រាបបទល្មើសឆ្លងដែន

2025/09/16 10:22:18 am        322
Facebook Telegram Linkin
នៅព្រឹកថ្ងៃទី១៦ ខែកញ្ញា ឆ្នាំ២០២៥ នគរបាលជាតិកម្ពុជា ដែលដឹកនាំដោយ ឯកឧត្តម ឧត្តម​សេនីយ៍​ឯក ស៊ាង ធារិទ្ធ អគ្គស្នងការរងនគរបាលជាតិកម្ពុជា នឹងជួបប្រជុំ​ជាមួយ​នគរបាល​ភូមិន្ទ​ថៃ ​នៅខេត្តស្រះកែវ ប្រទេសថៃ ដើម្បីពិនិត្យលើការពង្រឹងកិច្ចសហការទប់ស្កាត់ និង​បង្ក្រាប​បទ​ល្មើស​ឆ្លងដែន។ ក្នុង​កិច្ចប្រជុំនេះផងដែរ ភាគី​ទាំង​ពីរ​ក៏​គ្រោង​នឹង​ពិភាក្សា​គ្នា​ពាក់​ព័ន្ធ​នឹង​ការ​ឆបោក​តាម​ប្រព័ន្ធ​បច្ចេក​វិទ្យា (Online Scams)។ កិច្ចប្រជុំនេះ ត្រូវ​បាន​រៀបចំ​ឡើង​ស្រប​តាម​ស្មារតី នៃ​កិច្ច​ប្រជុំ​ពិសេស​លើក​ទី១ របស់គណៈកម្មាធិការព្រំដែនទូទៅ (GBC) នៅខេត្តកោះកុង កាលពីថ្ងៃទី១០ ខែ​កញ្ញា ឆ្នាំ២០២៥ ដែលបានបញ្ជាក់ថា ក្រសួងមហាផ្ទៃ និងនគរបាលជាតិនៃប្រទេសទាំងពីរ នឹង​ជួប​ប្រជុំ​គ្នា​ក្នុង​រយៈពេល ១សបា្តហ៍ ដើម្បីបង្កើត​ក្រុម​ការងារ​ចម្រុះ​ដែល​ទទួល​ភារកិច្ច​លើ​ការ​រៀបចំ​ផែន​ការសកម្មភាពពាក់ព័ន្ធនឹងការទប់ស្កាត់ និងការបង្ក្រាបបទល្មើសឆ្លងដែន។ រាជ​រដ្ឋាភិបាលកម្ពុជា បានប្តេជ្ញាប្រយុទ្ធប្រឆាំងរាល់បទល្មើសឧក្រិដ្ឋកម្មឆ្លងដែន រួម​ទាំង​ការ​ឆបោក​តាម​ប្រព័ន្ធបច្ចេកវិទ្យា។ ជាមួយគ្នានេះ កម្ពុជាសង្ឃឹមថា រដ្ឋាភិបាលថៃនឹង​ធ្វើ​ការ​ប្តេជ្ញា​ចិត្ត​ដូច​កម្ពុជា​ផងដែរ ដើម្បីធានាសុខសុវត្ថិភាពដល់ប្រជាពលរដ្ឋរៀងៗខ្លួន៕

បណ្ដាញសង្គម

ព័ត៌មានថ្មីៗ

អគ្គិភ័យឆាបឆេះរោងចក្រចម្រាញ់ប្រេង Lavan របស់អ៊ីរ៉ង់ រយៈពេលប៉ុន្មានម៉ោងក្រោយមានបទឈប់បាញ់
04/08/2026 09:04 PM
Facebook Telegram Linkin
អារ៉ាប់រួម គូវ៉ែត បារ៉ែន រាយការណ៍ការវាយប្រហារ បើទោះបីជាមានបទឈប់បាញ់អ៊ីរ៉ង់-អាមេរិក
04/08/2026 08:04 PM
Facebook Telegram Linkin
ក្រុមហ៊ុន VINCI Airports ប្ដេជ្ញាបន្តចូលរួមជាមួយរាជរដ្ឋាភិបាល ដើម្បីជំរុញ និងអភិវឌ្ឍឧស្សាហកម្មអាកាសចរណ៍នៅកម្ពុជា
04/08/2026 08:04 PM
Facebook Telegram Linkin
អនុប្រធានាធិបតីអាមេរិក លោក Vance បញ្ជាក់ថា ជម្លោះអ៊ុយក្រែន គឺ «ពិបាកដោះស្រាយបំផុត»
04/08/2026 08:04 PM
Facebook Telegram Linkin
លោក Trump ប្រាប់ថា គ្មានការបង្កើនសារធាតុអ៊ុយរ៉ានីញ៉ូមនៅអ៊ីរ៉ង់ទេ និងសន្យាដាក់ពន្ធ ៥០% លើអ្នកផ្គត់ផ្គង់អាវុធ
04/08/2026 08:04 PM
Facebook Telegram Linkin
បែលហ្ស៊ិកក្លាយជាចំណុចចេញដំណើរថ្មីសម្រាប់ជនអន្តោប្រវេសន៍ទៅកាន់អង់គ្លេស
04/08/2026 08:04 PM
Facebook Telegram Linkin
ជប៉ុនអះអាងថា ការបាញ់មីស៊ីលចុងក្រោយរបស់កូរ៉េខាងជើងពិតជាមិនអាចទទួលយកបាននោះទេ
04/08/2026 08:04 PM
Facebook Telegram Linkin
អារម្មណ៍ច្របូកច្របល់នៅទីក្រុងតែល អាវីវ ចំពោះការប្រកាសបទឈប់បាញ់សង្រ្គាមអ៊ីរ៉ង់របស់លោក Trump
04/08/2026 08:04 PM
Facebook Telegram Linkin
ពលរដ្ឋលីបង់សង្ឃឹមថា នឹងមានការរាប់បញ្ចូលពួកគេនៅក្នុងបទឈប់បាញ់សហរដ្ឋអាមេរិក-អ៊ីរ៉ង់
04/08/2026 08:04 PM
Facebook Telegram Linkin
អគារនៅក្នុងទីក្រុងបាកដាដ ប្រទេសអ៊ីរ៉ាក់ រងការខូចខាតដោយសាការវាយប្រហាររបស់កាំជ្រួចផ្លោង
04/08/2026 08:04 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.