នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ក្រុមហ៊ុន VINCI Airports ប្ដេជ្ញាបន្តចូលរួមជាមួយរាជរដ្ឋាភិបាល ដើម្បីជំរុញ និងអភិវឌ្ឍឧស្សាហកម្មអាកាសចរណ៍នៅកម្ពុជា
អនុប្រធានប្រចាំការ គ.ប.ឆ.ប.៖ ច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា ជួយកម្ពុជាកម្ចាត់ឧក្រិដ្ឋកម្មបច្ចេកវិទ្យាឱ្យអស់ និងមិនឱ្យឧក្រិដ្ឋកម្មនេះវិលត្រលប់មកវិញឡើយ
អ្នកនាំពាក្យក្រសួងការបរទេសកម្ពុជា ៖ វាជារឿងគួរឱ្យសោក​ស្តាយយ៉ាងខ្លាំង ប្រសិនបើភាគីថៃសម្រេចដកខ្លួនជាឯកតោ​ភាគីពីអនុស្សរណៈឆ្នាំ២០០១
ក្រសួងការងារ និងក្រសួងឧស្សាហកម្ម រួមគ្នាជំរុញការអនុវត្តស្ដង់ដាសុវត្ថិភាពម្ហូបអាហារដល់ម្ចាស់សហគ្រាស SMEs ដើម្បីបង្កើនភាពប្រកួតប្រជែង និងបង្កើតការងារសមរម្យនៅកម្ពុជា

ព័ត៌មានជាតិ

ក្រសួងអប់រំត្រៀមថវិកាប្រមាណ ៤ លានដុល្លារ​សម្រាប់​បង្កើត​សាលារៀន​ជំនាន់​ថ្មី​បន្ថែម​ចំនួន​៨ទៀត

2025/09/15 02:11:53 pm        341
Facebook Telegram Linkin
ក្រសួងអប់រំ យុវជន និងកីឡា នឹងបង្កើតសាលារៀនជំនាន់ថ្មី ចំនួន ៨ បន្ថែមទៀត សម្រាប់​ឆ្នាំ​សិក្សា​ថ្មី ដែលនឹងចាប់ផ្ដើមពីថ្ងៃទី ១ ខែវិច្ឆិកា ឆ្នាំ ២០២៥ខាងមុខ។ ការបង្កើត​សាលា​រៀន​ជំនាន់​ថ្មី ​ជាការចំណាយធំមួយផងដែរ ដោយតាមការគ្រោង គឺអាចប្រើប្រាស់ថវិកាប្រមាណ ៤លាន​ដុល្លារ​សម្រាប់​រយៈពេល ៤ឆ្នាំ។ នេះជាការបញ្ជាក់របស់ លោកស្រី ឃួន វិច្ឆិកា អ្នកនាំពាក្យ​ក្រសួអប់រំ យុវជន និងកីឡា។ឆ្នាំសិក្សាថ្មីខាងមុខនេះ ក្រសួងអប់រំ យុវជន និងកីឡា បានឯកភាព បង្កើតសាលារៀនជំនាន់ថ្មី ចំនួន ៨បន្ថែមទៀត ដែលសាលារៀនទាំង ៨នោះ មានទាំងនៅរាជធានីភ្នំពេញ និង​តាមប​ណ្ដាខេ​ត្ត​មួយ​ចំនួន។ សាលារៀនដែលនឹងវិវត្តខ្លួនទៅជាសាលារៀនជំនាន់ថ្មី រួមមាន វិទ្យាល័យ នេតយ៉ង់ ខេត្ត​បាត់ដំបង វិទ្យាល័យហ៊ុនសែន ស្គន់ ខេត្តកំពង់ចាម វិទ្យាល័យ ហ៊ុនសែន សេរីភាព វិទ្យាល័យ សម្ដេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ដើមឬស ខេត្តកណ្ដាល វិទ្យាល័យ​ព្រះ​យុគន្ធរ រាជធានីភ្នំពេញ វិទ្យាល័យសម្ដេចឪសម្ដេចម៉ែ ខេត្តរតនគីរី វិទ្យាល័យស្វាយរៀង និង​វិទ្យាល័យ ហ៊ុនសែន ប្រសូតិ ខេត្តស្វាយរៀង។ការវិវត្តប្រែក្លាយពីសាលារៀនធម្មតា ទៅជាសាលារៀនជំនាន់ថ្មីនេះ ពុំមែនគ្រប់សាលារៀន អាច​ទទួល​បាន​សិទ្ធិក្នុងការបង្កើតនោះទេ។ នេះជាការបញ្ជាក់របស់ លោកស្រី ឃួន វិច្ឆិកា អ្នកនាំ​ពាក្យ​ក្រសួង​អប់រំ យុវជន និងកីឡា។ លោកស្រីអ្នកនាំពាក្យលើកឡើងថា សាលារៀនត្រូវដាក់ពាក្យស្នើសុំ និងត្រូវឆ្លង​កាត់​ការ​ត្រួតពិ​និត្យ​វិនិច្ឆ័យ​ច្បាស់លាស់។និយាយពីការ​បង្កើតសាលារៀន ជំនាន់ថ្មី ក្រៅពីកម្រិតគុណភាពសិក្សា ការប្រើប្រាស់​ថវិកា​ទ្រទ្រង់​ដំណើរ​ការ​សិក្សាក៏ជាផ្នែកសំខាន់ផងដែរ។ សាលារៀនជំនាន់ថ្មី ជាក់ណាស់ប្រើប្រាស់ទំហំថវិកា លើស​ពី​សាលារៀនធម្មតា។ លោកស្រីអ្នកនាំពាក្យ បញ្ជាក់ថា ក្នុងរយៈពេល ៤ឆ្នាំ ការប្រើ​ប្រាស់​ថវិកា​ សម្រាប់សាលារៀនជំនាន់ថ្មី ទាំង ៨ ដែលនឹងបង្កើតថ្មីនោះ អាចប្រើប្រាស់ថវិកាប្រមាណ ៤​លាន​ដុល្លារ។ ការចំណាយចាំបាច់ និងដំបូងបំផុត គឺការបំពាក់ហេដ្ឋារចនាសម្ព័ន្ធ សម្រាប់​ការ​សិក្សា​ឱ្យ​ស្របតាមកម្មវិធីសិក្សាជំនាន់ថ្មី។តាមអ្នកនាំពាក្យ​បញ្ជាក់ដែរថា ការចាប់ផ្ដើមឆ្នាំសិក្សាដំបូងនៃ សាលារៀនទាំង ៨ ខ្លះអនុវត្តកម្ម​វិធី​ជំនាន់​ថ្មី​ទាំង​ស្រុង ១០០ភាគរយ និងសាលារៀនខ្លះអនុវត្តមិនទាន់ទាំងស្រុងនោះទេ។ ត្រង់នេះ​មាន​ន័យ​ថា សាលារៀននោះ អនុវត្តរួមគ្នា មានទាំងកម្មវិធីសិក្សាទូទៅ និងកម្មវិធីសិក្សាជំនាន់ថ្មី ក្នុង​សាលាតែមួយ។ តាមគោលដៅ ក្នុងរយៈពេល ៤ឆ្នាំ គឺរុញច្រានឱ្យសាលារៀនទាំង ៨នោះ អនុវត្ត​កម្ម​វិធីសិក្សាជំនាន់ថ្មី ១០០ភាគរយ។បច្ចុប្បន្នសាលា​រៀនជំនាន់ថ្មី នៅប្រទេសកម្ពុជា មានចំនួន ១៤សាលារៀន ដែលកំពុងដំណើរ​ការ​។​ សាលារៀនជំនាន់ថ្មី ជាសាលាមានស្វ័យភាព ជាសាលាដែលមានភាពមមាញឹក ទាមទារសិស្ស ទាម​ទារ​គ្រូ មានការអភិវឌ្ឍខ្លួនជាប្រចាំ មានគំនិតច្នៃប្រឌិត និងសិក្សាពេញ ៨ម៉ោង ក្នុងមួយថ្ងៃ៕ អត្ថបទ៖ គឹម ហុក 

សម្តេចប្រធានរដ្ឋសភា បានជម្រាបជូនគណៈប្រតិភូសភាអូស្រ្តាលី ពីតម្លៃសន្តិភាព សម្រាប់កម្ពុជា តំបន់និងសកលលោក

2025/09/15 01:43:09 pm        96
Facebook Telegram Linkin
សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា បានទទួលជួបពិក្សាការងារជាមួយ លោកជំទាវ ហ្វីអូណា ហ្វីលីព (Fiona Phillip) ប្រធានគណៈកម្មាធិការ អចិន្ត្រៃយ៍ខាងវិស័យអភិវឌ្ឍន៍តំបន់ ហេដ្ឋារចនាសម្ព័ន្ធ និងដឹកជញ្ជូន នៃសភាអូស្រ្តាលី ក្នុងពេលដែលលោកជំទាវ ដឹកនាំគណៈប្រតិភូអញ្ជើញមកបំពេញទស្សនកិច្ចនៅកម្ពុជា។ជំនួបពិភាក្សាការងារនេះ បានធ្វើឡើងនៅព្រឹកថ្ងៃទី១៥ ខែកញ្ញាឆ្នាំ២០២៥ នៅវិមានរដ្ឋសភា ក្រោយពីរដ្ឋសភា បានពិភាក្សា និងអនុម័ត សេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀងបន្ថែមទៅលើសន្ធិសញ្ញាស្តីពីតំបន់អាស៊ី-អាគ្នេយ៍គ្មានអាវុធនុយក្លេអ៊ែរ ក្នុងការលើកកម្ពស់សន្តិភាព និងសន្តិសុខតំបន់ និងពិភពលោក។សម្តេចប្រធានរដ្ឋសភា បានស្វាគមន៍យ៉ាងកក់ក្តៅ ចំពោះវត្តមានដ៏មានតម្លៃរបស់គណៈប្រតិភូសភាអូស្រ្តាលីនៅក្នុងឱកាសនេះថា ពិតជាមានសារៈសំខាន់ជាសារវ័ន្ត ជាពិសេសក្នុងបរិបទ នៃកិច្ចសហប្រតិបត្តិការក្នុងក្របខណ្ឌស្ថាប័ននីតិប្បញ្ញត្តិរវាងរដ្ឋសភាកម្ពុជា និងអូស្រ្តាលី ក៏ដូចជាការពង្រឹងពង្រីកទំនាក់ទំនងដ៏ល្អនៃប្រទេសទំាងពីរដែលមានសា្រប់ឱ្យកាន់តែរឹងមាំបន្ថែមទៀត។សម្តេចប្រធានរដ្ឋសភា បានគូសបញ្ជាក់ថា កម្ពុជាស្រឡាញ់សន្តិភាព ដោយសារខ្លួនបានឆ្លងកាត់សង្រ្គាមជាច្រើនទសវត្សរ៍ហើយបានស្គាល់យ៉ាងច្បាស់ពីទុក្ខវេទនាពីសង្រ្គាម។ កម្ពុជាតែងតែចូលរួមជាមួយពិភពលោកក្នុងការលើកម្ពស់ និងការពារសន្តិភាព។ មានសន្តិភាពទើបមានការអភិវឌ្ឍន៍។ ដោយសារការស្រឡាញ់និងការថែរក្សាសន្តិភាពទំាងនៅក្នុងប្រទេស ក៏ដូចជានៅតំបន់ កម្ពុជាបានប្រកាន់ខ្ជាប់នូវធម្មនុញ្ញអង្គការសហប្រជាជាតិ និងគោលការណ៍ច្បាប់អន្តរជាតិ ជាពិសេសការរួមរស់ដោយភាពសុខដុមរមនាជាមួយប្រទេសជិតខាងគ្នា តាមរយៈស្មារតី “ភាពជាអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ និងយូរអង្វែង” នៅក្នុងការដោះស្រាយជម្លោះជាមួយប្រទេសថៃ។ សម្តេចរដ្ឋសភាធិបតី បានបន្តថា កម្ពុជាបានប្តេជ្ញាចិត្តអនុវត្តយ៉ាងម៉ឺងម៉ាត់ និងឈរលើការគោរពបទឈប់បាញ់ សំដៅដោះស្រាយបញ្ហាព្រំដែន តាមស្មារតីកិច្ចប្រជុំពិសេសកាលពីថ្ងៃទី២៨ ខែកក្កដា ឆ្នាំ២០២៥ នៅទីក្រុងគូឡាឡាំពួ។ សម្តេចរដ្ឋសភាធិបតី បានគូសបញ្ជាក់ថា កម្ពុជាយល់ច្បាស់ថា ដើម្បីអនុវត្តឱ្យបាននូវបទឈប់បាញ់ ការកសាងសន្តិភាពយូរអង្វែង និងការវិលត្រឡប់មកវិញនូវទំនាក់ទំនងជាអ្នកជិតខាងល្អ ចាំបាច់ត្រូវជំរុញការដាក់ពង្រាយក្រុមអ្នកសង្កេតការណ៍ឱ្យបានកាន់តែមានប្រសិទ្ធភាព។លោកជំទាវ ហ្វីអូណា ហ្វីលីព បានថ្លែងអំណរគុណជូនសម្តេចប្រធានរដ្ឋសភាដែលបានចំណាយពេលវេលាដ៏មាមាញឹក ទទួលស្វាគមន៍គណៈប្រតិភូយ៉ាងកក់ក្តៅនៅក្នុងឱកាសនេះ។ នៅក្នុងដំណើរទស្សនកិច្ចរយៈពេលខ្លីនៅកម្ពុជានេះ គណៈប្រតិភូបានធ្វើទស្សនកិច្ចនៅខេត្តសៀមរាបផងដែរ។ លោកជំទាវប្រធានគណៈប្រតិភូ បានជម្រាបជូនសម្តេចប្រធានរដ្ឋសភាអំពីកិច្ចសហប្រតិបត្តិការអូស្រ្តាលីជាមួយកម្ពុជា មានច្រើនវិស័យ នៅក្នុងនោះអ្នកស្ម័គ្រចិត្តអូស្រ្តាលី បានបញ្ជួនមកកម្ពុជា ជារៀងរាល់ឆ្នាំ ដើម្បីបំពេញបេសកកម្មលើការងារ សុខាភិបាល អប់រំសហគមន៍ ការបណ្តុះបណ្តាលជំនាញដល់កុមារនិងស្រ្តីរងគ្រោះពីអំពើហិង្សា ការអប់រំអំពីសមភាពយេនឌ័រ ការបណ្តុះបណ្តាលសហគមន៍ជនជាតិដើមភាពតិច ជាដើម។ លោកជំទាវ បានថ្លែងការកោតសរសើរអំពីការរីកចម្រើនរបស់កម្ពុជា ដែលកសាងបាននូវសមិទ្ធផលធំៗជាច្រើន នៅក្នុងនោះ អាកាសយានដ្ឋានធំ ទំនើប ដែលទើបបើកដំណើរការនេះ ទទួលបានការចាប់អារម្មណ៍ជាខ្លំាង។ លោកជំទាវ ហ្វីអូណា ហ្វីលីព បានយល់ស្របនឹងការលើកឡើងរបស់  សម្តេចប្រធានរដ្ឋសភា អំពីតម្លៃនៃសន្តិភាព។សម្តេចប្រធានរដ្ឋសភា បានបញ្ជាក់ថា រដ្ឋសភាកម្ពុជា គាំទ្រចំពោះអនុស្សរណៈនិងកិច្ចព្រមព្រៀងនានាដែលរដ្ឋាភិបាលប្រទេសទំាងពីរ(កម្ពុជា-អូស្រ្តាលី) បានធ្វើរួមគ្នាកន្លងមក។ មួយគ្នានេះ ក្នុងនាមរដ្ឋសភាកម្ពុជា ក៏ដូចជាប្រជាជនកម្ពុជាទាំងមូល សម្តេចប្រធានរដ្ឋសភា បានថ្លែងអំណរគុណយ៉ាងជ្រាលជ្រៅចំពោះ រដ្ឋាភិបាល សភា និងប្រជាពលរដ្ឋអូស្រ្តាលី ដែលបានផ្តល់ការជួយឧបត្ថម្ភគាំទ្រទាំងផ្នែកស្មារតី និងសម្ភារៈ រួមចំណែកដល់ការស្តារ ថែរក្សាសុខសន្តិភាព និងការកសាងអភិវឌ្ឍន៍ប្រទេសកម្ពុជារហូតដល់បច្ចុប្បន្ន។ សម្តេចបានស្នើអូស្រ្តាលី ពិនិត្យលទ្ធភាពបង្កើនការវិនិយោគ និងគំាទ្រដល់ការអភិវឌ្ឍន៍កម្ពុជាបន្ថែមទៀត ទំាងវិស័យពាណិជ្ជកម្ម សេដ្ឋកិច្ច អប់រំ បច្ចេកវិទ្យានិងទេសចរណ៍ ពិសេសជំរុញឱ្យមានជើងហោះហើរត្រង់រវាងកម្ពុជានិងអូស្រ្តាលី៕

អ្នកដំណើរជាតិអន្តរជាតិភាគច្រើនចង់ធ្វើដំណើរហោះត្រង់ចេញ-ចូល​កម្ពុជា​ តាម​ព្រលាន​យន្ត​ហោះថ្មី​លំដាប់ 4F

2025/09/15 12:25:09 pm        713
Facebook Telegram Linkin
បណ្តាអ្នកដំណើរជាតិ និងអន្តរជាតិ ដែលធ្វើដំណើរហោះចេញចូលកម្ពុជា នៅថ្ងៃនេះ គឺ​ច្រើ​ន​បាន​បង្ហាញ​ការ​ចាប់អារម្មរណ៍ខ្លាំង ចង់ធ្វើដំណើរតាមផ្លូវអាកាសហោះចេញចូលកម្ពុជាដោយត្រង់ មិន​ចង់​ចុះ​ឈប់​សំចតនៅប្រទេសណាឡើយ ខណៈការបើក​ដំណើរ​ការ​ផ្លូវការ​អាកាស​យាន​ដ្ឋាន​អន្តរជាតិ​តេជោលំដាប់4F របស់កម្ពុជា គឺអាចទទួលជើងយន្តហោះខ្នាតធំៗ គ្រប់ប្រភេទ​ទាំង​អស់​របស់​ពិភព​លោកអាចចុះចតបាន។អ្នកដំណើរជាតិ អន្តរជាតិ បានថ្លែងប្រាប់BTV នៅថ្ងៃទី១៥ ខែកញ្ញានេះថា អ្នក​ដំណើរ​ទាំង​អស់​គ្នា ​មានចិត្តសប្បាយរីករាយ និងអបអរសាទរកម្ពុជា ដែលមានព្រលាន​យន្តហោះ​ថ្មី​លំដាប់​ពិភព​លោក ​មានរចនាបថថ្មីប្លែកអស្ចារ្យ ដែលអាចទទួលជើង​យន្ត​ហោះ​គ្រប់​ប្រភេទ​ទាំង​អស់​របស់​ពិភព​លោក​ចុះចតបាន ហើយចាប់ពីពេលតទៅ មុននឹងធ្វើដំណើរចេញចូលកម្ពុជា គឺគេស្វែង​រក​ជើង​យន្ត​ហោះ​ត្រង់​មក​កម្ពុជា ក្នុងគោលបំណងសន្សំថវិកា និងធ្វើដំណើរលឿនឆាប់​មក​ដល់​កម្ពុ​ជា​តែ​ម្តង​។សូមញ្ជាក់ថា ក្នុងរយៈ៤ថ្ងៃដំបូងការបើកអាកាសយានដ្ឋានអន្តរជាតិតេជោ គឺបានទទួល​ជើង​ហោះ​ហើរ​ចេញ​ចូលសរុបប្រមាណ៥១៩ជើង ក្នុងនោះ ជើងយន្តហោះចូលកម្ពុជា មានចំនួន២៦៥ជើង ហោះ​មក​ពីបណ្តាប្រទេសចំនួន១៥ មានជាង៣០គោលដៅ ។សម្រាប់អ្នក​ដំណើរជាតិអន្តរជាតិវិញ ធ្វើដំណើរចូលកម្ពុជា ក្នុងរយៈពេល៤ថ្ងៃដំបូងនោះដែរ គឺ​មាន​ប្រមាណ ជាង៣ម៉ឺននាក់ ក្នុងនោះអ្នកដំណើរអន្តរជាតិមានប្រមាណជាង២៤,០០០នាក់ មាន ១១២សញ្ជាតិ និងអ្នកដំណើរជាតិអន្តរជាតិធ្វើដំណើរចេញ សរុបជាង ២៦,០០០នាក់ ក្នុង​នោះអ្នកដំណើរអន្តរជាតិមានប្រមាណជិត២ម៉ឺននាក់។ដោយ​ឡែកសម្រាប់រយៈពេល១ថ្ងៃចុងក្រោយនេះដែរ បើតាមមន្ត្រីនគរបាល​អន្តោប្រ​វេសន៍​បាន​ឲ្យដឹ​ងថា នៅថ្ងៃទី១៤ ខែកញ្ញាម្សិលមិញនេះ គឺមានកំណើនជើងហោះហើរ ហោះចេញចូល​កម្ពុជា​សរុប​មានចំនួន១០៥ជើង ក្នុងនោះជើងហោះចេញមានចំនួន៥២ជើង ហើយមានអ្នក​ដំណើរ​ជាតិ​អន្តរជាតិចេញចូលសរុប ចំនួន១២ ៦១៣នាក់ ដែលមានចំនួនជាង៧០សញ្ជាតិ៕ អត្ថបទ ស៊ុម សុខជា

ឯកឧត្តមបណ្ឌិត ម៉ៅ ហាវណ្ណាល់ អញ្ជើញចុះសួរសុខទុក្ខ និង​ចែក​អំណោយ​ជូន​កងទ័ព​នៃ​កង​ការ​ពារ​ព្រំដែន​លេខ៥០៤ ក្នុងឱកាសបុណ្យភ្ជុំបិណ្ឌ

2025/09/15 12:05:56 pm        305
Facebook Telegram Linkin
នៅព្រឹកថ្ងៃទី១៥ ខែកញ្ញា ឆ្នាំ២០២៥ ឯកឧត្តមនាយឧត្តមសេនីយ៍បណ្ឌិត ម៉ៅ ហាវណ្ណាល់ រដ្ឋមន្ត្រី​ទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល បានដឹកនាំគណៈប្រតិភូ អញ្ជើញ​ចុះ​សួរសុខទុក្ខ និងចែកអំណោយជូន នាយទាហាន ពលទាហាន ក្នុងឱកាសបុណ្យភ្ជុំបិណ្ឌ នៅ​អង្គភាព​កង​ការពារព្រំដែនលេខ៥០៤ យោធភូមិភាគទី៥ ស្ថិតក្នុងភូមិសាស្ត្រស្រែម្អម ភូមិភ្នំស្ពង់ ឃុំ​សាលាក្រៅ ស្រុកសាលាក្រៅ ខេត្តប៉ៃលិន ដែលអង្គភាពនេះ មានសម្ព័ន្ធមេត្រីភាពជាមួយ រដ្ឋ​លេខាធិការដ្ឋានអាកាសចរណ៍ស៊ីវិល។ឯកឧត្ត​ម​នាយឧត្តមសេនីយ៍បណ្ឌិត ម៉ៅ ហាវណ្ណាល់ បានមានប្រសាសន៍លើកឡើងថា រាជ​រដ្ឋាភិបា​ល​កម្ពុជា បានគិតគូរខ្ពស់ពីសុខទុក្ខ និងជីវភាពរស់នៅ របស់កងកម្លាំងប្រដាប់អាវុធ ដែល​កំពុង​ឈរជើងការពារព្រំដែនគ្រប់ពេលវេលា និងបានផ្តាំផ្ញើ នាយទាហាន នាយទាហានរង និង​ពល​ទាហាន​ទាំង​អស់ ត្រូវពង្រឹងគោលជំហរឱ្យបានរឹងមាំ ដោយគោរពវិន័យ និងបទបញ្ជា​របស់​ថ្នាក់​លើឱ្យបានខ្ជាប់ខ្ជួន ដើម្បីពង្រឹងកិច្ចការពារបូរណៈភាពទឹកដី នៃព្រះរាជាណាចក្រកម្ពុជាយើង កុំ​ឱ្យ​ខ្មាំងសត្រូវចូលឈ្លានពានបានជាដាច់ខាត ជាពិសេសត្រូវពង្រឹងសាមគ្គីភាព ឯកភាព​គ្នា​ឱ្យ​បាន​ល្អ។​ លោកវរៈសេនីយ៍ឯក យ៉យ ស៊ីដូ មេបញ្ជាការកងការពារព្រំដែនលេខ ៥០៤ បានមាន​ប្រសាសន៍​ថ្លែង​អំណរគុណ ដល់គណៈប្រតិភូ រដ្ឋលេខាធិការដ្ឋានអាកាសចរណ៍ស៊ីវិល ដែលតែង​តែ​យក​ចិត្ត​ទុក​ដាក់​ចុះសាកសួរសុខទុក្ខ និងឧបត្ថម្ភដល់កម្លាំង កងការពារព្រំដែនគោក៥០៤ ជាបន្តបន្ទាប់។សូមបញ្ជាក់ថា នាឱកាសនោះដែរគណៈប្រតិភូ បានឧបត្ថម្ភ ជូនដល់អង្គភាពកងការពារព្រំដែនលេខ ៥០៤ រួមមាន អង្ករ ទឹកត្រី ទឹកស៊ីអ៊ីវ មីយើង និងគ្រឿង​ឧបភោគ បរិភោគផ្សេងៗទៀត ព្រមទាំងឧបត្ថម្ភថវិកាដល់នាយទាហាន នាយទាហានរង និង​ពល​ទាហាន ក៏ដូចជាអង្គភាពការពារព្រំដែនលេខ៥០៤៕

ក្រសួងការពារជាតិកម្ពុជា សម្របសម្រួលជូនក្រុមអ្នកសង្កេតការណ៍អន្តរកាល ចុះពិនិត្យនៅ​ច្រកបឹងត្រកួន ដើម្បីសង្កេតការណ៍ ផ្ទៀងផ្ទាត់ និងរាយការណ៍

2025/09/15 11:45:00 am        165
Facebook Telegram Linkin
នៅព្រឹកថ្ងៃទី១៥ ខែកញ្ញា ឆ្នាំ២០២៥នេះ ក្រសួងការពារជាតិ នៃព្រះរាជាណាចក្រកម្ពុជា បាន​សម្រប​សម្រួលជូនក្រុមអ្នកសង្កេតការណ៍អន្តរកាល (IOT) ដឹកនាំដោយ វរសេនីយ៍ឯក Mohd Farid Bin Mohd Yusop ប្រធានក្រុមអ្នកសង្កេតការណ៍អន្តរកាល ទីស្នាក់ការ២ ប្រចាំខេត្ត​បន្ទាយ​មានជ័យ អញ្ជើញចុះពិនិត្យទីតាំងជាក់ស្តែង ក្រោយបទឈប់បាញ់ នៅច្រកបឹងត្រកួន ខេត្ត​បន្ទាយមានជ័យ ដើម្បីសង្កេតការណ៍ ផ្ទៀងផ្ទាត់ និងរាយការណ៍។ នេះបើតាមការបញ្ជាក់របស់លោកជំទាវ ឧត្តមសេនីយ៍ឯក ម៉ាលី សុជាតា អ្នកនាំពាក្យ​ក្រសួង​ការ​ពារ​ជាតិ នៃព្រះរាជាណាចក្រកម្ពុជា។ សូមជម្រាបថា កាលពីរសៀលថ្ងៃទី១០ ខែកញ្ញា ឆ្នាំ២០២៥ ក្រសួងការពារជាតិកម្ពុជា បាន​សម្រប​សម្រួលទទួលដំណើរអញ្ជើញដល់របស់ក្រុមអ្នកសង្កេតកាណ៍អន្តរកាល (IOT) ដឹកនាំ​ដោយ​ឧត្តមសេនីយ៍ត្រី Dato’ Pahlawan Asri bin Shukor នាយក នាយកដ្ឋានបណ្តុះបណ្តាល នៃ​បញ្ជាការដ្ឋានកងទ័ពជើងគោកម៉ាឡេស៊ី និងជាប្រធានបេសកកម្ម IOT (HOM) និង​តំណាង​មក​ពី​ប្រទេសម៉ាឡេស៊ី ឥណ្ឌូនេស៊ី និងហ្វីលីពីន នៅអាកាសយាន្តដ្ឋានអន្តរជាតិតេជោ។វត្តមាន​របស់ក្រុមអ្នកសង្កេតការណ៍ (IOT) ដែលបានអញ្ជើញដល់ព្រះរាជាណាចក្រកម្ពុជា គឺជាការ​ចូលរួមយ៉ាងសកម្មរបស់បណ្តាប្រទេសជាសមាជិកក្នុងសមាគមអាស៊ាន ជាពិសេស​មាន​ប្រទេស​ម៉ាឡេស៊ី ជាប្រធានដឹកនាំសម្របសម្រួល ក្នុងការស្វែងរកដំណោះស្រាយដោយសន្តិវិធី សម្រាប់​ប្រជាជាតិទាំងពីរប្រទេស ទាំងនេះគឺជាការឆ្លុះបញ្ចាំងឱ្យឃើញអំពីបំណងប្រាថ្នារួម ក្នុង​ការ​ធ្វើ​ឱ្យបទឈប់បាញ់ទទួលបានជោគជ័យនិងយូរអង្វែង ជាមួយនឹង​គោល​ដៅ​នាំម​ក​វិញ​នូវ​សន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍ​សម្រាប់​ប្រជាជន​នៃប្រ​ទេស​ទាំង​ពីរ​កម្ពុ​ជា​-ថៃ​។ ក្រសួងការពារជាតិកម្ពុជាបញ្ជាក់ថា សកម្មភាព​នេះ​កើត​ចេ​ញ​ពី​លទ្ធផល​ដែលប​ន្តពី​កិច្ចប្រ​ជុំ​ពិសេស​កាល​ពីថ្ងៃទី២៨ ខែកក្កដា ឆ្នាំ២០២៥ នៅប្រទេសម៉ាឡេស៊ី និងកិច្ចប្រជុំវិ​សាមញ្ញ​នៃ​គណៈ​កម្មាធិការព្រំដែនទូទៅកម្ពុជា-ថៃ (Extraordinary GBC Meeting) នៅថ្ងៃទី៧ ខែសីហា ឆ្នាំ២០២៥ ទីក្រុង Kuala Lumpur ប្រទេសម៉ាឡេស៊ី ដែលបាន​នាំ​ទៅដ​ល់​ការ​ឯក​ភាព​គ្នា​លើ​បទ​ឈប់បា​ញ់៕

សមាគមសហគ្រិនក្នុងស្រុកជំរុញម្ចាស់សហគ្រាសបង្កើនការផលិត ខណៈពលរដ្ឋ​កំពុង​ងាក​មក​ប្រើ​ប្រាស់​​ផលិតផលខ្មែរ

2025/09/15 11:33:05 am        236
Facebook Telegram Linkin
ប្រធានសមាគមក្នុងស្រុក អំពាវនាវដល់ម្ចាស់ក្រុមហ៊ុន ឬសហគ្រាសអ្នកផលិត ជាពិសេស​ការ​ផលិត​ចំណីអាហារ ត្រូវពង្រឹក និង ពង្រីងខ្សែច្រវាក់ផលិតកម្មបន្ថែម និងជាផលិតផល​មាន​គុណ​ភាព​ ដើម្បីជំរុញផ្គត់ផ្គង់ និងចាប់យកទីផ្សារឱ្យបាន ខណៈប្រជាពល- រដ្ឋកម្ពុជា​កំពុង​ងាកមក​ប្រើ​ប្រាស់​ផលិត​ផលក្នុងស្រុក។ឯកឧត្តមបណ្ឌិត សួន ម៉ិ ប្រធានសមាគមសហគ្រិនវីម៉ូកម្ពុជា លើកឡើងក្នុងកិច្ចសម្ភាសន៍ជាមួយ BTV ស្តីពីខ្សែច្រវាក់ផលិត កម្មក្នុងស្រុក និងការផ្គត់ផ្គង់ចូលទីផ្សារ នេះថា ខណៈ​ដែល​កម្ពុជា​មាន​ជម្លោះ​ព្រំដែន​ជាមួយប្រទេសជិតខាង, ខ្សែច្រវាក់ផលិតកម្មក្នុង ស្រុកបានចាប់​ផ្តើម​ងើប​ឡើង​ជា​បណ្តើរ​ៗ​, នៅក្នុងអន្តរកាលនេះឃើញថា កម្ពុជាបាន​និង​កំពុង​ការ​ផលិត​ទំនិញ​បម្រើ​តម្រូវ​ការ​ក្នុង​ស្រុក​ ចាប់ផ្តើមមាននិន្នាការកើនឡើង ខណៈក្រុមហ៊ុន ឬសហគ្រាសកាន់តែមានមូលដ្ឋានរឹងមាំ នៅ​ក្នុងកិច្ចដំណើរការផលិត និងវេចខ្ចប់ ជាពិសេសការផលិត និងវេច​ខ្ចប់​របស់​របរ​បម្រើ​ដល់​ការ​ហូប​ចុក​ប្រចាំថ្ងៃដូចជា ការផលិត និងកែច្នៃម្ហូបអាហារ, ចំណីអាហារ, គ្រឿងទេស, គ្រឿង​ឧបភោគ-បរិភោគផ្សេងៗជាដើម។ឯកឧត្តមបណ្ឌិត បន្តថា នៅក្នុងអន្តរកាលនេះ គឺជាពេលវេលាមួយ​ដ៏​ល្អស​ម្រាប់​សហ​គ្រាស​ក្នុង​ស្រុក​ ត្រូវតែបញ្ចេញស្នាដៃ ក្នុងការបង្ហាញនូវផលិតផលរបស់ខ្លួន ស្របពេលដែលប្រជាជនកម្ពុជា បាន​ចាប់ផ្តើមឱ្យតម្លៃដល់ផលិតផលក្នុងស្រុក ខ្ពស់ជាងផលិត- ផលនាំចូលពីបរទេស។ បញ្ហានេះ ឯកឧត្តមបណ្ឌិត ក៏បានអំពាវនាវបន្ថែម ដល់សមាជិករបស់សមាគម ក៏ដូចជាក្រុមហ៊ុន និង សហ​គ្រាស​ផលិតផ្សេងៗទៀត ត្រូវបង្កើន ពង្រឹងនិងពង្រីកខ្សែច្រវាក់ផលិតកម្មបន្ថែម និងត្រូវផលិត​ជា​ផលិត​ផល​ដែលមានគុណភាព បង្កើនទំនុកចិត្តដល់អ្នកប្រើប្រាស់ ដើម្បីចាប់យកទីផ្សារឱ្យបាន ខណៈ​តម្រូវការទីផ្សារក្នុងស្រុកបច្ចុប្បន្ន កំពុងមាននិន្នាការកើន។ឯកឧត្តម​អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្ត្រីក្រសួងសេដ្ឋកិច្ច និង​ហិរញ្ញវត្ថុ បានលើកឡើង ក្នុងពិធីតាំងពិព័រណ៌ផលិតផលខ្មែរ ឆ្នាំ២០២៥ ថ្មីៗនេះថា រាជ​រដ្ឋាភិបា​ល​ទទួលស្គាល់សហគ្រាសក្នុងស្រុកធុនមីក្រូ តូច មធ្យម និងធំ គឺជាឆ្អឹង​ខ្នង​ដ៏​រឹងមាំ​នៃ​សង្គម​សេដ្ឋ​កិច្ច​ជាតិ​, ការណ៍នេះគឺជាកាលានុវត្តភាពមួយដ៏វិសេស សម្រាប់ការអភិវឌ្ឍសមត្ថភាព ការធ្វើ ពិពិធ​កម្មផលិតផលក្នុងស្រុក និងការពង្រឹងឧត្តមភាពប្រកួតប្រជែងរបស់កម្ពុជា ដែលនឹង​រួម​ចំណែក​ដល់​ការជំរុញកំណើន សេដ្ឋកិច្ច និងការពង្រឹងឯករាជ្យភាពនៃសេដ្ឋកិច្ចជាតិ។ បញ្ហានេះ​សហគ្រាស​ក្នុង​ស្រុក ត្រូវខិតខំម្ចាស់ការ និងប្រឹ​ង​ប្រែង​ក្ដាប់​ឲ្យជាប់​នូវ​កាលា​នុវត្ដ​ភាព​ដ៏​មាន​តម្លៃ​នេះ ដោយត្រូវឆ្លើយតបឲ្យបានជាអតិបរមា ទៅនឹងការរំពឹងទុករបស់ប្រជាពលរដ្ឋ ទាំងក្នុង​រយៈ​ពេល​ខ្លី មធ្យម និងវែងខាងមុខ៕ អត្ថបទ៖ សុន រ៉ាឌី

អ្នកនាំចេញរំពឹងថាការនាំចេញផលិតផលធ្វើដំណើរ និងស្បែកជើងនឹងមានកំណើន ខណៈ​ការ​បញ្ជា​ទិញ​កើន

2025/09/15 11:17:40 am        340
Facebook Telegram Linkin
សមាគមសហព័ន្ធអ្នកវិនិយោគកម្ពុជា បានឱ្យដឹងថា គិតក្នុងរយៈពេល៧ខែ ឆ្នាំ២០២៥កន្លងទៅ ការ​​នាំចេញផលិតផលធ្វើដំណើរនិងស្បែករបស់កម្ពុជា គិតជាទឹកប្រាក់ចំនួនប្រមាណជាង ១៧​ពាន់​លាន​ដុល្លារអាម៉េរិក ដោយក្នុងនោះផលិតផលស្បែកជាងមានជាង ១,២ពាន់លានដុល្លារ។អ្នកឧកញ៉ា លី ឃុនថៃ ប្រធានសមាគមសហព័ន្ធអ្នកវិនិយោគកម្ពុជា និង​ជា​ប្រធាន​សមាគម​ស្បែក​ជើង​ បានមានប្រសាសន៍ប្រាប់ព័ត៍មាន ប៊ីធីវី ឱ្យដឹងថា បើគិតក្នុងរយៈពេលដូចគ្នានេះដែរ ការ​បញ្ជា​ទិញមានការកើនឡើង ដោយសារ​នៅ​តាម​បណ្តារោ​ង​ចក្រ​មាន​ការ​បង្កើន​ចង្វាក់​ផលិត​កម្ម​របស់​រោងចក្ររបស់ខ្លួន និងកំពុងតែធ្វើការពង្រីកនូវចង្វាក់ផលិតកម្មរបស់ខ្លួនថែមទៀត រួម​ទាំង​ស្រូប​យកកម្លាំងកម្មករ កម្មការិនីបន្ថែមផងដែរ ជាពិសេសពលករខ្មែរមកពីប្រទេសថៃ។នៅសល់តែប្រមាណជា ៤ខែទៀតប៉ុណ្ណោះ នឹងដាច់ឆ្នាំ២០២៥ ប្រធាន​សមាគម​សហព័ន្ធ​អ្នក​វិនិយោគ​កម្ពុជា​រូបនេះ បានបង្ហាញការរំពឹងថា ការនាំចេញផលិតផលធ្វើដំណើរ និងស្បែកជើង​នឹង​មាន​ការ​កើនឡើង ខណៈលោកអះអាងថា នៅឆ្នាំ២០២៦ ការនាំចេញ​ផលិត​ផល​ទាំង​នេះ​នៅ​តែ​បន្ត​ការ​កើនឡើងជាបន្តបន្ទាប់ផងដែរ។យោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា គិតចាប់ពីខែមករា ដល់ខែកក្កដា ឆ្នាំ​២០២៥ ការនាំទំនិញចេញ-ចូល របស់ប្រទេសកម្ពុជាទៅកាន់ទីផ្សារអន្តរជាតិ សម្រេច​បាន​នូវ​ទំហំ​ទឹក​ប្រាក់​ជាង ៣៦,៣ ពាន់លានដុល្លារ កើនឡើង ១៦,៥% បើធៀបទៅ​នឹង​រយៈ​ពេល​ដូច​គ្នា​ក្នុង​ឆ្នាំ​២០២៤។ ក្នុងនោះកម្ពុជានាំចេញ ១៧,១៦ ពាន់លានដុល្លារ កើនឡើង ១៦,២% ចំណែក​ទំនិញ​នាំទំនិញចូលមកវិញមានទំហំទឹកប្រាក់ ១៩,១៥ ពាន់លានដុល្លារ កើនឡើង ១៦,៧%​។ សូមជំរាបជូនទៀតថា ទំនិញដែលកម្ពុជានាំចេញទៅទីផ្សារអន្តរជាតិ រួមមាន៖ សម្លៀក​បំពាក់ ស្បែកជើង ម៉ាស៊ីន និងឧបករណ៍អគ្គិសនី វត្ថុធាតុធ្វើអំពីស្បែក បរិក្ខារ​ធ្វើ​ពី​រោម​សត្វ​ធញ្ញជាតិ កៅស៊ូ និងផលិតផលធ្វើអំពីកៅស៊ូ និងគ្រឿងសង្ហារឹមជាដើម៕ អត្ថបទ៖ ឈិត បូរ៉ាវី 

កម្ពុជាទទួលបានការវិនិយោគពីបារាំងសរុប ៤៤ គម្រោង មានទុនវិនិយោគ ៣៨០ លានដុល្លារ ខណៈពាណិជ្ជកម្មទ្វេភាគីត្រឹម៨ខែឆ្នាំនេះមានទឹកប្រាក់ជាង ៣៨៤ លានដុល្លារកើន១១%

2025/09/15 10:52:05 am        355
Facebook Telegram Linkin
គិតមកដល់បច្ចុប្បន្ននេះ ក្រុមប្រឹក្សាអភិវឌ្ឍន៍កម្ពុជា បាន​អនុម័ត​គម្រោង​វិនិយោគ​មក​ពី​ប្រទេស​បារាំង​សរុប​ចំនួន ៤៤ មានទុន វិនិយោគប្រមាណ ៣៨០ លានដុល្លារអាម៉េរិក ដែលសកម្មភាព​វិនិយោគ​ទាំង​នោះបាននាំមកនូវបច្ចេកវិទ្យា, ការផ្ទេរនូវចំណេះដឹង ជំនាញ និងនវានុវត្តន៍ និង​ស្មារតី​សហគ្រិនភាពដល់កម្ពុជា។ ឯកឧត្តម នុត អ៊ុនវ័ណរ៉ា អគ្គលេខាធិការរងគណៈកម្មាធិការវិនិយោគកម្ពុជា នៅថ្ងៃទី១២ ខែកញ្ញា នៃ​ចុងសប្តាហ៍កន្លងមក នេះ បានទទួលជួបពិភាក្សាការងារជាមួយ លោក François Corbin ប្រធាន​ក្រុម​ប្រឹក្សាធុរកិច្ចកម្ពុជា-បារាំង នៃសហព័ន្ធនិយោជក បារាំងអន្តរជាតិ និងជាប្រេសិត​ពិសេស​របស់​រដ្ឋមន្ត្រីអឺរ៉ុប និងការបរទេសបារាំង សម្រាប់ទំនាក់ទំនង​សេដ្ឋកិច្ច​ជា​មួយ​បណ្តា​ប្រទេសអាស៊ាន ក្នុងគោលបំណងពិភាក្សាអំពីលទ្ធភាពនៃការពង្រឹង និងពង្រីក​កិច្ច​សហ​ប្រតិបត្តិការវិនិយោគរវាងព្រះរាជាណាចក្រកម្ពុជា និង សាធារណរដ្ឋបារាំង។ ឯកឧត្តម​អគ្គលេខាធិការរង បានសម្តែងនូវការស្វាគមន៍ចំពោះគណៈប្រតិភូ ដែលបាន​ធ្វើ​ដំណើរ​មក​កាន់​កម្ពុជា ដើម្បីស្វែង យល់អំពីបច្ចុប្បន្នភាពនៃការអភិវឌ្ឍសង្គម-សេដ្ឋកិច្ច និងបានរំលឹក​ឡើង​វិញ អំពីផ្លែផ្កានៃវេទិកាធុរកិច្ចកម្ពុជា-បារាំង ដែលបានរៀបចំ ឡើង នាឱកាស​ដំណើរ​ទស្សន​កិច្ច​ផ្លូវ​ការ​ទៅ​កាន់ប្រទេសបារាំង របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី កាល​ពី​ខែមករា ឆ្នាំ២០២៤ និងលទ្ធផលនៃជំនួបទ្វេភាគីរវាងឯកឧត្តម ស៊ុន ចាន់ថុល ជាមួយលោក François Corbin ប្រធានក្រុមប្រឹក្សា ធុរកិច្ចកម្ពុជា-បារាំង។ ឯកឧត្តមបានសម្តែងនូវការពេញចិត្តចំពោះវឌ្ឍនភាពឥតឈប់ឈរនៃទំនាក់ទំនង និងកិច្ច​សហ​ប្រតិ​បត្តិការរវាងបារាំងនិងកម្ពុជាលើគ្រប់វិស័យ ជាពិសេសការផ្សារភ្ជាប់ទំនាក់ទំនងរវាងវិស័យឯកជននៃប្រទេសទាំងពីរ និងបានថ្លែងអំណរគុណ ចំពោះរដ្ឋាភិបាល និងវិស័យឯកជនបារាំង ដែលជានិច្ចកាល​តែង​តែ​ផ្តល់ការ​គាំទ្រ​ក្នុង​ដំណើរ​បើក​ទំព័រ​ថ្មី​នៃ​សហសម័យកម្ពុជា។ទាក់ទងការ​វិនិយោគវិញ, បើគិតពីឆ្នាំ១៩៩៤ មកដល់បច្ចុប្បន្ន ក្រុមប្រឹក្សាអភិវឌ្ឍន៍​កម្ពុជា​បាន​អនុម័ត​គម្រោងវិនិយោគមាន លក្ខណៈសម្បត្តិគ្រប់គ្រាន់ មកពីប្រទេសបារាំងសរុបចំនួន ៤៤ គម្រោង​រួចហើយមានទុនវិនិយោគប្រមាណ ៣៨០ លានដុល្លារអាម៉េរិក។ ឯកឧត្តមបាន បង្ហាញ​សុទិដ្ឋិនិយមថា សមភាគីនឹងបន្តរួមចំណែកជាមួយកម្ពុជា ក្នុងការលើកកម្ពស់ ការឈ្វេង​យល់​អំពី​បរិយាកាស​យោគ និងឧត្តម- ភាពប្រកួតប្រជែង ព្រមទាំងបន្តជំរុញសហគមន៍ធុរកិច្ចបារាំង ឱ្យ​មក​សិក្សា​សមិទ្ធិលទ្ធភាពបណ្តាក់ទុននៅកម្ពុជាបន្ថែមទៀត។ជាការឆ្លើយតប, លោក François Corbin បានវាយតម្លៃខ្ពស់ ចំពោះការអភិវឌ្ឍ​យ៉ាង​ឆាប់​រហ័ស​របស់​កម្ពុជា និងបានកោត សរសើរ ចំពោះការ​ដឹកនាំ​ប្រក​ប​ដោយ​ចក្ខុ​វិស័យ​វែង​ឆ្ងាយ​របស់​រាជ​រដ្ឋាភិបាល​កម្ពុជា ក្រោមការដឹកនាំរបស់សម្តេចធិបតីនាយករដ្ឋមន្ត្រី។ លោកបន្ថែមថា នៅឆ្នាំ​២០២៦ កម្ពុជានឹងទទួលធ្វើជាម្ចាស់ផ្ទះ នៃកិច្ចប្រជុំកំពូលហ្វ្រង់កូហ្វូនីលើកទី២០ ដែល​តាម​រយៈ​នេះ ​ជាការបង្ហាញពីកិត្តិនាម និងការប្តេជ្ញាចិត្តរបស់កម្ពុជា ចំពោះកិច្ច​សហប្រតិបត្តិការ​នយោបាយ​, សេដ្ឋកិច្ច និងសង្គម វប្បធម៌ក្នុងក្របខ័ណ្ឌ ពហុភាគីផងដែរ។ សូម​បញ្ជាក់ថា នៅក្នុងរយៈពេល៨ ខែ ឆ្នាំ២០២៥នេះ, បើយោងតាមរបាយការណ៍គយ និង​រដ្ឋាករ​កម្ពុជា, ការធ្វើពាណិជ្ជកម្មទ្វេភាគី កម្ពុជា-បារាំង មានទំហំទឹកប្រាក់ជាង ៣៨៤ លានដុល្លារ កើន​ជាង ១១% ក្នុងនោះកម្ពុជាមាននាំចេញ មានទឹកប្រាក់ជាង ៣០៥ លានដុល្លារ កើន ១២%, ខណៈ​កា​រនំាចូល មានទឹកប្រាក់ជិត ៨០ លានដុល្លារ កើន ៩% បើធៀ​ប​រយៈ​ពេល​ដូច​គ្នា​ឆ្នាំ​២០២៤​៕ អត្ថបទ៖ សុន រ៉ាឌី

សន្និសីទជាតិ ស្តីពីបច្ចេកវិទ្យាបញ្ញាសិប្បនិម្មិតនៅក្នុងការអប់រំនឹងរៀបចំលើកដំបូងនៅខែវិច្ឆិកា ឆ្នាំ២០២៥ខាងមុខ

2025/09/15 10:27:51 am        246
Facebook Telegram Linkin
ក្រុមប្រឹក្សាសាកលវិទ្យាធិការកម្ពុជា និងក្រសួងអប់រំ យុវជន និងកីឡា នឹង​រៀបចំ​សន្និសីទ​ជាតិ​លើកទី១ ស្តីពី​បច្ចេកវិទ្យាបញ្ញាសិប្បនិម្មិតនៅក្នុងការអប់រំ និងការអនុវត្ត​ថវិកា​កម្ម​វិធី​នៃមូល​និធិ​សម្រាប់​ការ​ស្រាវជ្រាវ គំនិតច្នៃប្រឌិត និងនវានុវត្តន៍។ នាចុងសប្ដាហ៍កន្លងទៅនេះ ក្រុមប្រឹក្សាសាកលវិទ្យាធិការកម្ពុជា និងមានការចូលរួមពី ឯកឧត្តម សាន វឌ្ឍនា រដ្ឋលេខាធិការនៃក្រសួងអប់រំ យុវជន និងកីឡា បាន​រៀបចំ​កិច្ច​ប្រជុំ​ក្រុម​ប្រឹក្សា​សាកល​វិទ្យាធិការកម្ពុជា។ កិច្ចប្រជុំនេះ បានផ្តោតលើ ការត្រៀមរៀបចំ​សន្និសីទ​ជាតិ​លើក​ទី​១​ស្តីពី​បច្ចេក​វិទ្យាបញ្ញាសិប្បនិម្មិតនៅក្នុងការអប់រំ និងការអនុវត្ត​ថវិកា​កម្ម​វិធី​នៃមូ​ល​និធិ​សម្រាប់​ការ​ស្រាវ​ជ្រាវ​ គំនិតច្នៃប្រឌិត និងនវានុវត្តន៍។ តាមការគ្រោង ក្រុមប្រឹក្សាសាកលវិទ្យាធិការកម្ពុជានឹងសហការជាមួយក្រសួងអប់រំ យុវជន និង​កីឡា ​ក្រសួងប្រៃសណីយ៍ និងទូរគមនាគមន៍ និងស្ថាប័នពាក់ព័ន្ធ ដើម្បីរៀប​ចំ​សន្និសីទ​ជាតិ​លើក​ទី១​ ស្តីពីបច្ចេកវិទ្យាបញ្ញាសិប្បនិម្មិតនៅក្នុងការអប់រំ នៅអំឡុងសប្តាហ៍ទី៤ ខែ វិច្ឆិកា ឆ្នាំ ២០២៥ ដោយ​ផ្តោតលើគោលនយោបាយ បច្ចេកវិទ្យាអប់រំ និងនវានុវត្តន៍​គរុកោសល្យ​ដែល​ប្រើប្រា​ស់​បច្ចេក​វិទ្យា​បញ្ញាសិប្បនិម្មិត ក្នុងបរិបទនិងដោយភាពជាម្ចាស់នៃកម្ពុជា។តាមរយៈមូល​និធិ​សម្រាប់ការស្រាវជ្រាវ គំនិតច្នៃប្រឌិត និងនវានុវត្តន៍ នៃក្រសួងអប់រំ យុវជន និង​កីឡា ក្រុមប្រឹក្សាសាកលវិទ្យាធិការកម្ពុជា នឹងលើកកម្ពស់ និង​ពង្រីក​អេកូស៊ីស្តែ​ម​នៃ​ការ​ស្រាវ​ជ្រាវ​មូល​ដ្ឋាន​ និងប្រតិបត្តិ ដែលពាក់ព័ន្ធនឹងបច្ចេកវិទ្យាបញ្ញាសិប្បនិម្មិត ក្នុងគោលដៅ​អភិវឌ្ឍ​ភាព​ជាមជ្ឈ​មណ្ឌលឧត្តមភាពនៃស្ថាប័ន ដំណោះស្រាយសម្រាប់វិស័យឧស្សាហកម្មនិងកសិកម្ម និង​ការ​អប់រំ​។ អ្នកដែលអាចចូលរួមទទួលថវិកាពីមូលនិធិនេះ រួមមាននិស្សិត​ដែល​អាច​ផ្សារ​ភ្ជាប់​ការ​ស្រាវ​ជ្រាវ​ជាមួ​យ​ធុរកិច្ច អ្នកស្រាវជ្រាវឧត្តមសិក្សាដែលគ្រោងពង្រីកកាលានុវត្តភាពនៃការស្រាវជ្រាវ និង​ស្ថាប័ន​ស្រាវជ្រាវដែលកំពុងលើកកម្ពស់ឧត្តមភាពស្ថាប័ន។ ក្រុមប្រឹក្សាសាកលវិទ្យាធិការកម្ពុជា ក៏​នឹងជំរុញភាពជាដៃគូក្នុងការស្រាវជ្រាវដើម្បីអភិវឌ្ឍ ជាមួយស្ថាប័នស្រាវជ្រាវមកពីប្រទេសបារាំង ក្រោម​ក្របខណ្ឌកិច្ចសហប្រតិបត្តិការ Huber Curien ទន្លេសាប ដើម្បីគាំទ្រដល់​អន្តរជាតិ​ភាវូប​នីយ​កម្ម នៃវិស័យឧត្តមសិក្សានៅកម្ពុជា៕ អត្ថបទ៖ គឹម ហុក

រដ្ឋសភា អនុម័តសេចក្តីព្រាងច្បាប់​ស្តីពីការ​អនុម័ត​យល់​ព្រម​លើ​កិច្ច​ព្រម​ព្រៀង​បន្ថែម​ទៅ​លើ​សន្ធិ​សញ្ញា​ស្តីពី​តំបន់អាស៊ី-អាគ្នេយ៍គ្មានអាវុធនុយក្លេអ៊ែរ ក្នុងការលើកកម្ពស់​សន្តិភាព និង​សន្តិ​សុខ​តំបន់ និងពិភពលោក របស់កម្ពុជា

2025/09/15 10:14:07 am        295
Facebook Telegram Linkin
សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា នៅ​ព្រឹក​ថ្ងៃទី១៥ ខែកញ្ញាឆ្នាំ២០២៥នេះ បានអញ្ជើញដឹកនាំសម័យប្រជុំរដ្ឋសភាជាវិសាមញ្ញនីតិកាលទី៧ ដើម្បី​ពិភាក្សានិងអនុម័តសេចក្តីព្រាងច្បាប់ស្តីពី ការអនុម័ត​យល់​ព្រម​លើ​កិច្ច​ព្រម​ព្រៀង​បន្ថែម​ទៅ​លើ​ស​​ន្ធិសញ្ញាស្តីពីតំបន់អាស៊ី-អាគ្នេយ៍គ្មានអាវុធនុយក្លេអ៊ែរ។សេចក្តីព្រាងច្បាប់នេះ នឹងក្លាយជាឧបករណ៍គតិយុត្តក្នុងការរក្សាតំបន់អាស៊ី-អាគ្នេយ៍​ជាតំ​បន់​ដែលគ្មា​ន​អាវុធនុយក្លេអ៊ែរ និងអាវុធប្រល័យលោក ដទៃទៀត ជាពិសេសក្នុង​ការ​លើក​កម្ពស់​ស​ន្តិភាព រក្សាស្ថិរភាព និងសន្តិសុខសម្រាប់តំបន់ក៏ដូចជាពិភពលោក ទាំងមូល។ ការអនុម័ត​សេចក្តីព្រាងច្បាប់ស្តីពី ការអនុម័តយល់​ព្រម​លើកិ​ច្ច​ព្រមព្រៀង​បន្ថែ​មទៅ​លើសន្ធិ​សញ្ញាស្តីពីតំបន់អាស៊ី-អាគ្នេយ៍គ្មានអាវុធនុយក្លេអ៊ែរ នឹងផ្តល់​ផល​ប្រយោជន៍​សំខាន់​ៗ​ជូ​ន​ព្រះ​រា​ជា​ណា​ចក្រ​កម្ពុជា ដូចជាការលើកកម្ពស់កិត្យានុភាពជាតិលើឆាកអន្តរជាតិ តាមរយៈ​ការ​បង្ហា​ញអំពីការប្តេជ្ញាចិត្តរ​បស់ព្រះរាជាណាចក្រកម្ពុជា ក្នុងនាមជាសមាជិកដ៏សកម្មមួយរបស់អាស៊ាន ក្នុងការធ្វើសមាហរណកម្មតំបន់ អាស៊ី-អាគ្នេយ៍ឱ្យកាន់តែពេញលេញ តាមរយៈការបញ្ចូលសាធារណរដ្ឋប្រជាធិបតេយ្យទីម័រឡេស្តេ ជាសមាជិកទី១១នៃអាស៊ាន និង ការចូលរួមចំណែករបស់ព្រះរាជាណាចក្រកម្ពុជាក្នុងការលើកកម្ពស់សន្តិភាពនិងសន្តិសុខតំបន់ និងពិភពលោកទាំងមូល ក្នុងការរក្សាតំបន់អាស៊ី-អាគ្នេយ៍ជាតំបន់គ្មានអាវុធនុយក្លេអ៊ែរនិងអាវុធ ប្រល័យលោកដទៃទៀត។សេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀងបន្ថែមទៅលើសន្ធិសញ្ញាស្តីពីតំបន់អាស៊ី-អាគ្នេយ៍គ្មានអាវុធនុយក្លេអ៊ែរ មាន៣មាត្រា។ ក្រោយពីបានពិភាក្សាតាមនីតិវិធី រួចរាល់ រដ្ឋសភាបានអនុម័តសេចក្តីព្រាងច្បាប់ទំាងមូលជាឯកច្ឆន្ទ៕

បណ្ដាញសង្គម

ព័ត៌មានថ្មីៗ

អគ្គិភ័យឆាបឆេះរោងចក្រចម្រាញ់ប្រេង Lavan របស់អ៊ីរ៉ង់ រយៈពេលប៉ុន្មានម៉ោងក្រោយមានបទឈប់បាញ់
04/08/2026 09:04 PM
Facebook Telegram Linkin
អារ៉ាប់រួម គូវ៉ែត បារ៉ែន រាយការណ៍ការវាយប្រហារ បើទោះបីជាមានបទឈប់បាញ់អ៊ីរ៉ង់-អាមេរិក
04/08/2026 08:04 PM
Facebook Telegram Linkin
ក្រុមហ៊ុន VINCI Airports ប្ដេជ្ញាបន្តចូលរួមជាមួយរាជរដ្ឋាភិបាល ដើម្បីជំរុញ និងអភិវឌ្ឍឧស្សាហកម្មអាកាសចរណ៍នៅកម្ពុជា
04/08/2026 08:04 PM
Facebook Telegram Linkin
អនុប្រធានាធិបតីអាមេរិក លោក Vance បញ្ជាក់ថា ជម្លោះអ៊ុយក្រែន គឺ «ពិបាកដោះស្រាយបំផុត»
04/08/2026 08:04 PM
Facebook Telegram Linkin
លោក Trump ប្រាប់ថា គ្មានការបង្កើនសារធាតុអ៊ុយរ៉ានីញ៉ូមនៅអ៊ីរ៉ង់ទេ និងសន្យាដាក់ពន្ធ ៥០% លើអ្នកផ្គត់ផ្គង់អាវុធ
04/08/2026 08:04 PM
Facebook Telegram Linkin
បែលហ្ស៊ិកក្លាយជាចំណុចចេញដំណើរថ្មីសម្រាប់ជនអន្តោប្រវេសន៍ទៅកាន់អង់គ្លេស
04/08/2026 08:04 PM
Facebook Telegram Linkin
ជប៉ុនអះអាងថា ការបាញ់មីស៊ីលចុងក្រោយរបស់កូរ៉េខាងជើងពិតជាមិនអាចទទួលយកបាននោះទេ
04/08/2026 08:04 PM
Facebook Telegram Linkin
អារម្មណ៍ច្របូកច្របល់នៅទីក្រុងតែល អាវីវ ចំពោះការប្រកាសបទឈប់បាញ់សង្រ្គាមអ៊ីរ៉ង់របស់លោក Trump
04/08/2026 08:04 PM
Facebook Telegram Linkin
ពលរដ្ឋលីបង់សង្ឃឹមថា នឹងមានការរាប់បញ្ចូលពួកគេនៅក្នុងបទឈប់បាញ់សហរដ្ឋអាមេរិក-អ៊ីរ៉ង់
04/08/2026 08:04 PM
Facebook Telegram Linkin
អគារនៅក្នុងទីក្រុងបាកដាដ ប្រទេសអ៊ីរ៉ាក់ រងការខូចខាតដោយសាការវាយប្រហាររបស់កាំជ្រួចផ្លោង
04/08/2026 08:04 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.